BRAHMOS ခရုဒုံးကျည်များကို   အင်ဒိုနီးရှားနိုင်ငံသို့ တင်ပို့မည့်အစီအစဉ်တစ်ရပ်ကို အိန္ဒိယနှင့် ရုရှားနိုင်ငံတို့က သဘောတူညီခဲ့ပြီဖြစ်ကြောင်း   အိန္ဒိယမီဒီယာတစ်ခုက ပြီးခဲ့သည့် ရက်သတ္တပတ်အတွင်း ဖော်ပြခဲ့သည်။

ဒုံးကျည်များရောင်းချမည့် အဆိုပါအစီအစဉ်သည် အင်ဒိုနီးရှားသမ္မတ ပရာဘိုဝို ဆူဗြန်တိုက အိန္ဒိယနိုင်ငံသို့ လာရောက်မည့်ခရီးစဉ်မတိုင်မီ ထွက်ပေါ်လာခြင်းဖြစ်သည်။

BRAHMOS ခရုဒုံးကျည်များ ဝယ်ယူနိုင်ရေးအတွက် အင်ဒိုနီးရှားနိုင်ငံသည် အိန္ဒိယ၊ ရုရှားနိုင်ငံတို့နှင့်  အနည်းဆုံး ၇  နှစ်ကြာ စေ့စပ်ဆွေးနွေးခဲ့သည်။ အဆိုပါဆွေးနွေးမှုတွင် ရုရှားနိုင်ငံပိုင်ကာကွယ်ရေးပစ္စည်းထုတ်လုပ်သည့် ကုမ္ပဏီဖြစ်သည့် Rosobo-ronexport လည်းပါဝင်ကြောင်း Hindustan Times က အဆိုပါအရောင်းအဝယ်ကိစ္စနှင့် နီးစပ်သည့် သတင်းအရင်းအမြစ်၏ပြောကြားချက်ကို ကိုးကား၍ဖော်ပြသည်။

အိန္ဒိယ၊ ရုရှားနှင့် အင်ဒိုနီးရှားနိုင်ငံတို့သည် ဒေါ်လာ သန်း ၄၅၀ တန်ဖိုးရှိ အဆိုပါဒုံးကျည်များ ရောင်းချမည့် အစီအစဉ်အား သဘောတူညီပြီးဖြစ်သည်။    လက်နက်ရောင်းချရေးနှင့် စပ်လျဉ်းသည့် တရားဝင်ထုတ်ပြန်ချက်ကို မကြာမီထုတ်ပြန်လာနိုင်သည်။

အင်ဒိုနီးရှားနိုင်ငံသို့ BRAHMOS  ခရုဒုံးကျည်များရောင်းချရန်  သဘောတူညီချက်သည် အင်ဒိုနီးရှားနိုင်ငံက BRICS အဖွဲ့တွင် တန်းပြည့်အဖွဲ့ဝင်နိုင်ငံဖြစ်လာပြီးနောက် ထွက်ပေါ်လာခြင်းလည်းဖြစ်သည်။ ထုတ်ပြန်ချက်များအရ အဆိုပါဒုံးကျည်များ ဝယ်ယူရန်အတွက် အိန္ဒိယနိုင်ငံက အင်ဒိုနီးရှားနိုင်ငံသို့ ချေးငွေပေးအပ်ရန် ကမ်းလှမ်းမည်ဖြစ်ကြောင်း သိရသည်။

N.A RT

Source: Myawady Web Portal

အမေရိကန် သမ္မတ ဒေါ်နယ်ထရမ့်သည် အမေရိကန်တွင် Iron Dome နည်းဗျူဟာမြောက် ဒုံးကျည်ကာကွယ်ရေးစနစ်ကို စတင်ထုတ်လုပ်ပြီး ဖြန့်ကျက်ရန် ကတိပြုခဲ့သည်။ 

အမေရိကန်ပြည်ထောင်စုတွင်  Iron Dome ဒုံးကျည်ကာကွယ်ရေးစနစ်တစ်ခုလုံး စတင်တည်ဆောက်ရန် အမေရိကန်စစ်တပ်ကို အမိန့်ပေးမည်ဖြစ်ကြောင်း ဝါရှင်တန်ရှိ Capital One Sports Arena တွင် ပြုလုပ်သည့် လူထုစုဝေးပွဲ၌ သမ္မတ ဒေါ်နယ်ထရမ့် က ထောက်ခံသူများကို ပြောကြားခဲ့ပါသည်။

ကိုးကား - TASS

Photo: The Times of Israel

မြောက်ကိုရီးယားအစိုးရက မိမိနိုင်ငံကို ကာကွယ်နိုင်ရန်အတွက် စစ်ရေးလေ့ကျင့်ခန်းများကို အရှိန်မြှင့် လုပ်ဆောင်သွားမည်ဖြစ်ကြောင်း ထုတ်ဖော်ပြောဆိုလိုက်သည်။ အမေရိကန်၊ တောင်ကိုရီးယား၊ ဂျပန်နိုင်ငံတို့ ပူးပေါင်းပြီး ဇန်နဝါရီလ ၁၅ ရက်က စစ်ရေးလေ့ကျင့်ခန်းများ လုပ်ဆောင်လာခဲ့ပြီးနောက် မြောက်ကိုရီးယားက ယင်းကဲ့သို့ ထုတ်ဖော်ပြောဆိုလိုက်ခြင်းဖြစ်သည်။ မြောက်ကိုရီးယား နိုင်ငံခြားရေးဝန်ကြီးဌာနက ဇန်နဝါရီ ၁၅ ရက်က ကိုရီးယားကျွန်းဆွယ်အနီး ရေပိုင်နက်အနီး တွင်ပြုလုပ်ခဲ့သော တောင်ကိုရီးယား၊ ဂျပန်နှင့် အမေရိကန်နိုင်ငံ တို့ပူးပေါင်းပြုလုပ်သော လေကြောင်းစစ်ရေးလေ့ကျင့်ခန်းတွင် အမေရိကန်နိုင်ငံ၏ မဟာဗျုဟာမြောက် B-1B အမျိုးအစား ဗုံးကြဲလေယာဉ်များ ပူးပေါင်းပါဝင်ခဲ့ကြောင်းသိရသည်။

မြောက်ကိုရီးယားနိုင်ငံခြားရေးဝန်ကြီးဌာနက "အမေရိကန်၊ တောင်ကိုရီးယား၊ ဂျပန်တို့၏ ပူးတွဲစစ်ရေး လေ့ကျင့်ခန်းများသည် မြောက်ကိုရီးယားနိုင်ငံ၏ လုံခြုံရေးကို စိန်ခေါ်ခြင်းဖြစ်ကြောင်း၊ အမေရိကန်နိုင်ငံ၏ နိုင်ငံရေးနှင့် စစ်ရေးရန်စမှုများသည် ဒေသအတွင်း လက်နက်ကိုင် ပဋိပက္ခများ ဖြစ်လာနိုင်သည့်အန္တရာယ်မျိုး ဖြစ်လာနိုင် ကြောင်း" ပြောကြားခဲ့သည်။

၂ဝ၂၅ ခုနှစ် စတင်ချိန်ကတည်းက ကိုရီးယားကျွန်းဆွယ် အရေးနှင့်ပတ်သက်၍ တင်းမာမှုမြင့်တက်လာခဲ့ပြီး မြောက်ကိုရီးယားနိုင်ငံက အသံထက်မြန်သော ဟိုက်ပါ ဆောနစ် ဒုံးကျည် စမ်းသပ်ခြင်းများ လုပ်ဆောင်ခဲ့ ကြောင်းသိရသည်။ မြောက်ကိုရီးယား နိုင်ငံခြားရေးဝန်ကြီးဌာနက "‌‌ဒေသအတွင်း တည်ငြိမ်ရေး၊ ကိုရီးယားကျွန်းဆွယ်တွင် ဟန်ချက်ညီမှုများကို ထိန်းသိမ်းနိုင်ရေးနှင့် အမေရိကန်၏ ရန်လိုမှုများကို တုံ့ပြန်နိုင်ရန် ကြိုတင်တားဆီးနိုင်ရေးအတွက် စစ်ရေးလေ့ကျင့်ခန်းများ ပိုမို လုပ်ဆောင်မည်ဖြစ်ကြောင်း" သတင်း ထုတ်ပြန်ထားသည်။

မြောက်ကိုရီးယားနိုင်ငံတွင် ကင်ဂျုံအမ် ခေါင်းဆောင်ဖြစ်လာခဲ့ပြီးနောက်ပိုင်း ဒုံးကျည်စမ်းသပ်မှုများ အရှိန်မြင့် လုပ်ဆောင်ခဲ့ရာတွင် အမေရိကန်၊ တောင်ကိုရီးယား၊ ဂျပန်နိုင်ငံတို့နှင့်တင်းမာမှုများ ပိုမိုဖြစ်လာခဲ့ကြောင်း သိရသည်။ တောင်ကိုရီးယားကာကွယ်ရေးဝန်ကြီးဌာနသည် ဇန်နဝါရီလ ၁၅ ရက်တွင် စတင်ခဲ့သော သုံးနိုင်ငံလေကြောင်းပူးတွဲစစ်ရေးလေ့ကျင့်ခန်းအတွင်း B-1B အမျိုးအစားဗုံးကြဲလေယာဉ်အပြင် တောင်ကိုရီးယား နိုင်ငံထုတ် F-15K အမျိုးအစား တိုက်လေယာဉ်၊ဂျပန်နိုင်ငံ ၏ F-2 အမျိုးအစား တိုက်လေယာဉ်များ ပူးပေါင်း ပါဝင်ခဲ့ကြောင်း ပြောကြားခဲ့သည်။ သုံးနိုင်ငံပူးတွဲ လေကြောင်းစစ်ရေးလေ့ကျင့်ခန်းသည် မြောက်ကိုရီးယား နိုင်ငံ၏ ဒုံးကျည်၊ နျူကလီးယားများဖြင့် ခြိမ်းခြောက်မှုများကို တုံ့ပြန်ရန်၊ ကြိုတင်ဟန့်တားရန်အတွက် မဟာမိတ် နိုင်ငံများ၏ လေကြောင်းစွမ်းရည် ပိုမိုကောင်းမွန်စေရန် လုပ်ဆောင်ခြင်းဖြစ်ကြောင်း တောင်ကိုရီးယားစစ်တပ် က ပြောကြားခဲ့သည်။

ကိုးကား-NP News

ထိုင်းင်းနိုင်ငံသက်ဆိုင်ရာဌာနများ နီးကပ်စွာ ပူးပေါင်း ဆောင်ရွက်ပြီး နယ်စပ်ဖြတ်ကျော်မှုခင်းများအား ပြတ်ပြတ်သားသားတိုက်ဖျက်ကာ ခရီးသွားများ၏ လုံခြုံရေးကို ထိရောက်စွာ ကာကွယ်သွားရန် ညွှန်ကြားထားကြောင်း ထိုင်းဝန်ကြီးချုပ်ပေထုံတန်က ဇန်နဝါရီ ၁၇ ရက် လူမှုကွန်ရက်စာမျက်နှာတွင် စာဖြင့်ရေးသား ဖော်ပြခဲ့သည်။

ယင်းနေ့နံနက်ပိုင်းတွင် ပေထုံတန်က ထိုင်းရဲတပ်ဖွဲ့ ဌာနချုပ်၊ နိုင်ငံခြားရေးဝန်ကြီးဌာန၊ ခရီးသွားနှင့် အားကစားဝန်ကြီးဌာနစသည့် သက်ဆိုင်ရာဌာနများအား အစည်းအဝေးခေါ်ယူ၍ ထိုင်းနိုင်ငံသို့ လာရောက် လည်ပတ်သော ခရီးသွားဧည့်သည်များ၏ ယုံကြည်မှု မြှင့်တင်ရေး ဆွေးနွေးခဲ့ကြကြောင်း သိရသည်။

ယခုနှစ် ဇန်နဝါရီ ပထမလဝက်တွင် ထိုင်းနိုင်ငံ၏ နေ့စဉ် ပျမ်းမျှ တရုတ်ခရီးသွားဧည့်သည် ခရီးသွားလာမှု အကြိမ်ရေသည် ယမန်နှစ် ဒီဇင်ဘာလနှင့်နှိုင်းယှဉ်ပါက လျော့နည်းခြင်း မရှိကြောင်း အစည်းအဝေးက ထောက်ပြ ခဲ့သည်။ သို့သော် ယုံကြည်မှု တစ်ဆင့်တိုး မြှင့်တင်ရန်အတွက် ပေထုံတန်က သက်ဆိုင်ရာဌာနများကို ထိုင်း ခရီးသွားလုံခြုံမှုအား အများသိရှိစေရေး အားဖြည့်ဆောင်ရွက်ရန် ညွှန်ကြားထားကြောင်း သိရသည်။ ၎င်းကိုယ်တိုင် တရုတ်စာတန်းထိုးပါသော ဗီဒီယို ရိုက်ကူး၍ ခရီးသွားများထံသို့ လုံခြုံသည့် သတင်းစကား ပါးရန် စီစဉ်ထားကြောင်းသိရသည်။

ထို့အပြင် ထိုင်းခရီးသွားလုံခြုံရေးပုံရိပ်အား ထိခိုက်သည့် ပြဿနာကို အရှိန်မြှင့်ဖြေရှင်းပြီး ခရီးသွားယုံကြည်မှု ဘက်စုံမြှင့်တင်ရန် ပေထုံတန်က သက်ဆိုင်ရာ ဌာနအသီးသီးအား ဇန်နဝါရီ ၁၃ ရက် အစိုးရအဖွဲ့ အစည်းအဝေးတွင်တောင်းဆိုခဲ့သည်။ရဲအင်အားအပြည့် ဖြန့်ကျက်ပြီး ခရီးသွားများ၏လုံခြုံရေးကို ကာကွယ်မည် ဖြစ်ပြီး ခရီးသွားလုံခြုံရေးပညာပေးကဏ္ဍကို မြှင့်တင်ဆောင်ရွက်သွားမည်ဖြစ်သည်ဟု အစည်းအဝေးတွင် အဆိုပြုခဲ့ကြောင်း သိရသည်။ 

ကိုးကား-Myanmar National Post

ဗြိတိန်နှင့် ပြင်သစ်နိုင်ငံတို့သည် ၎င်းတို့၏စစ်သည်များကို ယူကရိန်းနိုင်ငံသို့ စေလွှတ်ရန် ဆွေးနွေးတိုင်ပင်လျက်ရှိကြောင်း ဗြိတိန်နိုင်ငံထုတ် Telegraph သတင်းစာကြီးက ဖော်ပြသည်။

ယူကရိန်းနိုင်ငံသို့ တပ်ဖွဲ့ဝင်များစေလွှတ်မည့်အစီအစဉ်ကို ဗြိတိန်ဝန်ကြီးချုပ်ကီယာ စတားမားက တွန့်ဆုတ်လျက် ရှိသည်ဟု ဗြိတိန်အစိုးရအဖွဲ့မှ အရာရှိများက ပြောကြားခဲ့သော်လည်း  ယူကရိန်းသို့ ငြိမ်းချမ်းမှုထိန်းသိမ်းရေး တပ်ဖွဲ့ဝင်များစေလွှတ်နိုင်မည့် အလားအလာနှင့် စပ်လျဉ်း၍ ပြင်သစ်သမ္မတ အီမန်နျူရယ်မက်ခရွန်နှင့် ဗြိတိန်နိုင်ငံတွင် ပြီးခဲ့သည့် ရက်သတ္တပတ်အတွင်း၌ တွေ့ဆုံဆွေးနွေးခဲ့ကြောင်း အမည်မဖော်လိုသူတစ်ဦး၏ ပြောကြားချက်ကိုကိုးကား၍ Telegraph သတင်းစာက‌ ဖော်ပြထားခြင်းဖြစ်သည်။

အဆိုပါ ဆွေးနွေးမှုနှင့် ပတ်သက်၍ ဗြိတိန်အစိုးရနှင့် ပြင်သစ်အစိုးရအဖွဲ့တို့က ငြင်းဆိုထားခြင်းမရှိပေ။ သို့သော် ဆွေးနွေးမှုအသေးစိတ်ကို ထုတ်ဖော်ပြောကြားခဲ့ခြင်း မရှိကြောင်း သိရသည်။

ဗြိတိန်ဝန်ကြီးချုပ်   စတားမားသည် ဇန်နဝါရီလ ၁၆ ရက်တွင် ယူကရိန်းနိုင်ငံသို့ သွားရောက်ခဲ့ပြီး ယူကရိန်းနှင့် ဗြိတိန်တို့ကြား မိတ်ဖက်ပူးပေါင်းမှုသဘောတူညီချက်တစ်ရပ်ကို လက်မှတ်ရေးထိုးခဲ့ပြီး ယူကရိန်းနိုင်ငံအတွင်း စစ်အခြေစိုက်စခန်းများဖွင့်လှစ်နိုင်မည့် နည်းလမ်းများကိုရှာဖွေမည်ဟု ကတိကဝတ်ပြုခဲ့ကြောင်း သိရသည်။                                  

Ref: RT

Source: Myawady Web Portal

အာတိတ်ဒေသနှင့် မြောက်အတ္တလန္တိတ်ဒေသများ၏ ကာကွယ်ရေးစွမ်းဆောင်ရည်ကို တိုးမြှင့်နိုင်ရေးအတွက် ဂရင်းလန်း အနောက်ပိုင်းတွင် လေတပ်အခြေစိုက်စခန်းတစ်ခု တည်ဆောက်ရန်  ဒိန်းမတ်နိုင်ငံက စီစဉ်လျက်ရှိကြောင်းသိရသည်။

ဂရင်းလန်း၏ ကာကွယ်ရေးစွမ်းဆောင်ရည်တိုးမြှင့်နိုင်ရေးအတွက်  ဒိန်းမတ်လေတပ်မှ F-35 အမျိုးအစား တိုက် လေယာဉ်များဆင်းသက်ရန်နှင့် ပျံတက် နိုင်ရန်အတွက် Kangerlussuaq ဒေသတွင် လေတပ်အခြေစိုက်စခန်း တည်ဆောက်ရန် လိုအပ်လျက်ရှိကြောင်း၊ သို့မှသာ ဒိန်းမတ်နိုင်ငံ၏အချုပ်အခြာအာဏာပိုင်ဆိုင်မှုကို ကာကွယ်နိုင်မည် ဖြစ်ကြောင်း ဒိန်းမတ်နိုင်ငံက ၂၀၂၄ ခုနှစ် စက်တင်ဘာလအတွင်းက ထုတ်ပြန်သည့် စာမျက်နှာ ၂၂ မျက်နှာပါ လုံခြုံရေးအစီရင်ခံစာတွင်    ဖော်ပြထားသည်။

Kangerlussuaq ဒေသတွင်တည်ဆောက်မည့်    စစ်အခြေစိုက်စခန်း၌   ဒိန်းမတ်တပ်ဖွဲ့ဝင် ၉၄ ဦးအထိ တပ်စွဲနိုင်မည်ဖြစ်ပြီး ၎င်းတို့အနေဖြင့် ဂရင်းလန်းရှိ အရေးပါသည့် အခြေခံအဆောက်အဦများကို ကာကွယ်ပေးနိုင်မည် ဖြစ်သည်။ အဆိုပါ အခြေခံအဆောက်အဦများတွင် ရေအောက် ကေဘယ်ကြိုးများ၊ ဓာတ်အားပေးစက်ရုံများ၊ ရေနံသိုလှောင်ရုံများနှင့် အခြားအရေးကြီး အဆောက်အဦများ ပါဝင်ကြောင်း သိရသည်။

ဂရင်းလန်းသည်   ဒိန်းမတ်နိုင်ငံ၏ ကိုယ်ပိုင်အုပ်ချုပ်ခွင့်ရဒေသတစ်ခုဖြစ်ပြီး ယင်းဒေသသည်   အမေရိကန်အတွက် ပိုင်ဆိုင်ရန် အလွန်အရေးပါသည့်ဒေသဖြစ်ကြောင်း ဇန်နဝါရီလ ၂၀ ရက်တွင် အမေရိကန် သမ္မတအဖြစ် တက်ရောက်လာမည့် ဒေါ်နယ်ထရမ့်က ပြောကြားပြီးနောက် ဒိန်းမတ် နိုင်ငံက လုံခြုံရေးကို  တိုးမြှင့်ခဲ့ခြင်း ဖြစ်သည်။

Ref: Sputnik

Source: Myawady Web Portal

တောင်ကိုရီးယား၊ ဂျပန်နှင့်အမေရိကန်ပြည်ထောင်စုတို့ကြား ယခုရက်သတ္တပတ်အတွင်းက လုပ်ဆောင်ခဲ့သည့် ပူးတွဲစစ်ရေး လေ့ကျင့်မှုအား မြောက်ကိုရီးယားနိုင်ငံက ဇန်နဝါရီလ  ၁၇  ရက်တွင် ပြစ်တင် ရှုတ်ချခဲ့ကြောင်းသိရသည်။

အဆိုပါ ပူးတွဲစစ်ရေး လေ့ကျင့်မှုသည် နိုင်ငံအပေါ်ခြိမ်းခြောက်မှု ဖြစ်သည့်အတွက် မြောက်ကိုရီးယားအနေဖြင့်  မိမိကိုယ်ကို ကာကွယ်ရေးအတွက် စစ်ရေးလေ့ကျင့်မှုကို လုပ်ဆောင်နိုင်သည့်အခွင့်အရေးရှိကြောင်း  မြောက်ကိုရီးယားနိုင်ငံက ပြောသည်။

တောင်ကိုရီးယား၊ ဂျပန်နှင့်အမေရိကန်ပြည်ထောင်စုသုံးနိုင်ငံကြား လုပ်ဆောင်သည့် ပူးတွဲစစ်ရေးလေ့ကျင့်မှုသည် အသံထက်မြန်သည့် ဒုံးကျည်စနစ်သစ်တစ်ခုနှင့် တာတိုပစ်ဒုံးကျည်များကို  မြောက်ကိုရီးယားက စမ်းသပ်ပစ်ခတ်ခဲ့သည်ဟု အဆိုပါသုံးနိုင်ငံက ပြောကြားပြီးနောက် လုပ်ဆောင်ခဲ့ခြင်းဖြစ်သည်။ သုံးနိုင်ငံကြား လုပ်ဆောင်ခဲ့သည့်   ပူးတွဲစစ်ရေး လေ့ကျင့်မှုတွင် အမေရိကန် B-1B အမျိုးအစားအကြီးစား ဗုံးကြဲလေယာဉ်နှစ်စင်းက  ဇန်နဝါရီလ ၁၆ ရက်တွင် ကိုရီးယားကျွန်းဆွယ်ပေါ်၌ ပျံသန်းလေ့ကျင့်ခဲ့ကြောင်း သိရသည်။

သုံးနိုင်ငံ ပူးတွဲစစ်ရေးလေ့ကျင့်မှုနှင့် စပ်လျဉ်း၍  မြောက်ကိုရီးယားနိုင်ငံက အလွန်အမင်းစိုးရိမ်လျက်ရှိကြောင်း၊ ထို့ကြောင့် နိုင်ငံ၏လုံခြုံရေး အကျိုးစီးပွားကို  ကာကွယ်နိုင်ရန်အတွက် စစ်ရေးလေ့ကျင့်မှုလုပ်ဆောင်ရန် အခွင့်အရေးရှိကြောင်း  မြောက်ကိုရီးယားနိုင်ငံခြားရေးဝန်ကြီးဌာန၏ ပြောကြားချက်ကို ကိုးကား၍ KCNA သတင်းအေဂျင်စီက ဇန်နဝါရီလ ၁၇   ရက်တွင်  ဖော်ပြထားကြောင်း သိရသည်။                                   

 Ref: ST

Source: Myawady Web Portal

ပြင်သစ်နိုင်ငံသည် ယူကရိန်းတွင် တပ်ဖြန့်နိုင်ရေးပြင်ဆင်သည့်အနေဖြင့်၎င်းတို့၏အထူးတပ်ဖွဲ့များကို စစ်ရေးလေ့ကျင့်မှုများ ပြုလုပ်စေခဲ့ကြောင်း ထောက်လှမ်းရေးအွန်လိုင်းသတင်းဌာန တစ်ခုကဖော်ပြသည်။

ပြင်သစ်စစ်ဘက်သည် အဆိုပါစစ်ရေးလေ့ကျင့်မှုများကို ၂၀၂၄ ခုနှစ် ဆောင်းဦးရာသီကာလအတွင်း   လုပ်ဆောင်ခဲ့ခြင်းဖြစ်ပြီး   စစ်ရေးလေ့ကျင့်မှုများတွင်ကြည်းတပ်အထူးတပ်ဖွဲ့ဌာနချုပ်မှ အထူးတပ်ဖွဲ့များ၊ ဒရုန်းတပ်ဖွဲ့များ၊ ဆိုက်ဘာတပ်ဖွဲ့များပါဝင်သည်။ စစ်ရေးလေ့ကျင့်မှုအတွင်း   စစ်သည်တစ်ဦးချင်းစီ၏ စွမ်းဆောင်ရည်နှင့် စစ်လက်နက်ကိရိယာများအား စမ်းသပ်ခြင်းများကို  တစ်ပတ်ကြာလုပ်ဆောင်ခဲ့ကြောင်း   သတင်းဌာနက ဇန်နဝါရီလ ၁၅ ရက်ထုတ်ပြန်ချက်တွင် ဖော်ပြထားသည်။

အဆိုပါစစ်ရေးလေ့ကျင့်မှုအတွင်း အထူးတပ်ဖွဲ့ဝင် ၃၂၀၀ ခန့်ပါဝင်ပြီး ၎င်းစစ်သည်များသည် ယူကရိန်းနိုင်ငံအတွင်းသို့ စစ်ရေးအရကြားဝင်သည့် အခြေအနေမျိုး ဖန်တီးလေ့ကျင့်ခဲ့ကြောင်း သိရသည်။

အနောက်နိုင်ငံများသည် ယူကရိန်းနိုင်ငံ၏တိုက်ခိုက်ရေးစွမ်းရည် ကောင်းမွန်စေရန်အတွက် ငြိမ်းချမ်းမှုထိန်းသိမ်းရေးတပ်ဖွဲ့ဟု အမည်တပ်ထားသည့် စစ်သည် ၁၀၀၀၀၀ ခန့်ကို  ယူကရိန်း၌  တပ်ဖြန့်နိုင်ဖွယ်ရှိကြောင်း ရုရှားပြည်ပထောက်လှမ်းရေးအဖွဲ့ (SVR) က ပြောကြားထားကြောင်း သိရသည်။

Source: Myawady Web Portal

အနောက်နိုင်ငံများသည် ဘီလာရုစ်နိုင်ငံ၏ နယ်စပ် ဒေသကိုသိမ်းပိုက်ရန်နှင့် ငြိမ်းချမ်းရေးထိန်းသိမ်းရေး တပ်ဖွဲ့များဟု ခေါ်ဆိုကြသောတပ်ဖွဲ့များကို ထိုနယ်စပ်ဒေသသို့စေလွှတ်ရန် စီစဉ်နေကြောင်း ဘီလာရုစ်နိုင်ငံ နိုင်ငံတော်လုံခြုံရေးကောင်စီ အတွင်းရေးမှူး Aleksandr Wolfowitz က ပြောကြားခဲ့ပါသည်။

ပိုလန်နိုင်ငံတွင် စစ်သွေးကြွများကို လေ့ကျင့်သင်ကြားပေးသည့် လုပ်ငန်းစဉ်ကိုစီမံခန့်ခွဲရန် "Pospolite Rustication" ၏ အမိန့်နှင့်ညှိနှိုင်းရေးစင်တာ တစ်ခု တည်ထောင်ထားကြောင်း ၎င်းကထပ်လောင်း ပြောကြား ခဲ့ပါသည်။ 

ကိုးကား -BelTA

ဗြိတိန်သည်ယူကရိန်းသို့ ငြိမ်းချမ်းရေးတပ်ဖွဲ့ဝင်များစေလွှတ်ရာတွင် ပါဝင်ရန်အသင့်ရှိကြောင်း ဗြိတိန် ဝန်ကြီးချုပ် Keir Starmer က Kiev သို့ သွားရောက်စဉ် Sky News Channel ၌ ပြောကြားခဲ့ပါသည်။ ၎င်းက အဆိုပါကိစ္စရပ်နှင့် ပတ်သက်ပြီး ပြင်သစ်သမ္မတ Emmanuel Macron အပါအဝင် မဟာမိတ်အများအပြား နှင့်ဆွေးနွေးခဲ့ပြီးဖြစ်ပါကြောင်း၊ မိမိတို့အနေဖြင့် ယူကရိန်းသို့ ငြိမ်းချမ်းရေးတပ်ဖွဲ့ဝင်များ စေလွှတ်ရာတွင် အပြည့်အဝ ပါဝင်ဆောင်ရွက်သွားမည်ဖြစ်ကြောင်း ဗြိတိန်ဝန်ကြီးချုပ်ကပြောကြားခဲ့ပါသည်။   ပြင်သစ်သမ္မတ Emmanuel Macron သည် အနာဂတ်တွင် ယူကရိန်း၌ ငြိမ်းချမ်းရေးသဘောတူညီချက်များရရှိပြီးနောက်တွင် ယူကရိန်းတွင်အနောက်တိုင်း ငြိမ်းချမ်းရေးတပ်ဖွဲ့ဝင်များစေလွှတ်ရန် ၎င်း၏ပဏာမခြေလှမ်းကို ထောက်ခံရန် NATO အဖွဲ့ဝင်များကိုစည်းရုံးရန် ကြိုးစားနေကြောင်း Sky News Channel၏ ထုတ်ဝေမှုတွင် ဖော်ပြထားပါသည်။ ထိုထုတ်ဝေမှု၏ ဖော်ပြချက်အရ အဆိုပါအကြောင်းအရာသည် ပြီးခဲ့သည့်သီတင်းပတ်က ဗြိတိန်ဝန်ကြီးချုပ် Keir Starmer နှင့်တွေ့ဆုံခဲ့သော မက်ခရွန်၏ ဗြိတိန်ခရီးစဉ်အတွင်း ဆွေးနွေးခဲ့ဖွယ်ရှိကြောင်း ဖော်ပြထားပါသည်။

ပဋိပက္ခပြီးဆုံးပြီးနောက် ယူကရိန်းသို့ ငြိမ်းချမ်းရေးတပ်ဖွဲ့များ ပူးတွဲစေလွှတ်ရန် လန်ဒန်က ပါရီ၏ အဆိုပြုချက်များအား သဘောတူညီခြင်းမရှိသေးကြောင်း Daily Telegraph သတင်းစာက အစောပိုင်းတွင် ဖော်ပြခဲ့ ပါသည်။

ကျွမ်းကျင်သူများက ယူကရိန်းတွင် NATO ငြိမ်းချမ်းရေးတပ်ဖွဲ့ဝင်များ ရှိနေခြင်းသည် ရုရှားနှင့်အမေရိကန် အပါအဝင်မဟာမိတ်နိုင်ငံများအကြားစစ်ရေးပဋိပက္ခဖြစ်ပွားနိုင်သည့်အန္တရာယ်ကို တိုးမြှင့်စေမည်ဖြစ်ကြောင်း ထောက်ပြကြပါသည်။

ကိုးကား - TASS