ဂါဇာကမ်းမြောင်ဒေသတွင် အပစ်အခတ်ရပ်စဲရေးနှင့် ဓားစာခံများလွှတ်ပေးရေး ဆွေးနွေးရန် အစ္စရေး လုံခြုံရေးကိုယ်စားလှယ်အဖွဲ့သည် ဇန်နဝါရီ ၁၂ ရက်နေ့ တွင် ကာတာနိုင်ငံသို့ ရောက်ရှိခဲ့ပါသည်။

အစ္စရေးဝန်ကြီးချုပ် Benjamin Netanyahu စေလွှတ်လိုက်သည့် အဆိုပါကိုယ်စားလှယ်အဖွဲ့တွင် မော့ဆက်ထောက်လှမ်းရေးအေဂျင်စီ အကြီးအကဲလည်း ပါဝင်ကြောင်း Reuters သတင်းဌာနနှင့်အခြား မီဒီယာ များက သတင်းဖော်ပြပါသည်။

ဂါဇာကမ်းမြောင်ဒေသတွင် အစ္စရေးနှင့် ဟားမတ်စ်တို့အကြား တိုက်ပွဲများကြောင့် သေဆုံးသူဦးရေသည် ၄၆,၀၀၀ ကျော်ရှိနေပြီဖြစ်ပြီး ကြားဝင်စေ့စပ်နေသည့် ကာတာနိုင်ငံတွင် ဆွေးနွေးပွဲများ ပြုလုပ်နေပါသည်။

အမေရိကန်သမ္မတ Joe Biden ၏ အစိုးရအဖွဲ့မှ အကြီးတန်းအရာရှိတစ်ဦးနှင့်အမေရိကန် ရွေးကောက်ခံသမ္မတ Donald Trump ၏ အရှေ့အလယ်ပိုင်းဆိုင်ရာ အထူးသံတမန်လည်း ကာတာတွင် ရောက်ရှိနေကြောင်း သိရှိရပါသည်။

အမေရိကန်နိုင်ငံလုံခြုံရေးအကြံပေး Jake Sullivan က သဘောတူညီချက်ရရန် အလွန်နီးစပ်နေပြီဖြစ်ကြောင်း CNN ၏အစီအစဉ်တစ်ခုတွင် ပြောကြားခဲ့ပါသည်။

ဇန်နဝါရီ ၁၂ ရက်နေ့တွင် မစ္စတာ Netanyahu သည် မစ္စတာ Biden နှင့်ဖုန်းဆက်သွယ်ပြောဆိုခဲ့ပြီး စေ့စပ်ညှိနှိုင်းမှု၏ ဖြစ်ပေါ်တိုးတက်မှုများကို ၎င်းတို့ဆွေးနွေးခဲ့ကြကြောင်းသိရှိရပါသည်။

ဇန်နဝါရီ ၂၀ ရက်နေ့ ကျမ်းသစ္စာကျိန်ဆိုမှုမတိုင်မီတွင် ဟားမတ်စ်အနေဖြင့် ဓားစာခံများကို ပြန်လည်လွှတ်ပေးခြင်းမရှိပါက ထို့အတွက် ပေးဆပ်ရမည် ဖြစ်ကြောင်း ထရမ့် က ပြောကြားခဲ့ပါသည်။

ကိုးကား-NHK World

ယူကရိန်းစစ်သားများနှင့် မြောက်ကိုးရီးယားစစ်သားတို့ကို လဲလှယ်လိုကြောင်း မြောက်ကိုးရီးယားစစ်သား နှစ်ဦးကို  ရုရှားနိုင်ငံ၊ ကာ့ခ်စ်(Kusk) ဒေသတွင် ဖမ်းဆီး ရမိပြီးနောက် သမ္မတဇယ်လန်စကီးက ကြေညာခဲ့ပါသည်။

"ရုရှား တွင် သုံ့ပန်းအဖြစ် ထိန်းသိမ်းခံရသော ယူကရိန်းစစ်သားများကို လွှတ်ပေးပါက မြောက်ကိုးရီးယားစစ်သားများကို ကင်ဂျုံအန်ထံ လွှဲပြောင်းပေးမည်ဖြစ်ကြောင်း" သမ္မတဇယ်လန်စကီးက ၎င်း၏ X မီဒီယာ ပလက်ဖောင်းတွင် ရေးသားခဲ့ပါသည်။ ထို့အပြင် စစ်ပွဲကြာရှည်လာသည်နှင့်အမျှ မြောက်ကိုရီးယား စစ်သားများကို ပိုမိုဖမ်းဆီးရမည်ဖြစ်ကြောင်း" ဇယ်လန်စကီးက ပြောကြားခဲ့ပါသည်။

"ရုရှား ၏ မဟာမိတ်မြောက်ကိုရီးယားတပ်ဖွဲ့ပေါင်း ၁၁,၀၀၀ ခန့်သည် မော်စကို၏ တပ်ဖွဲ့များကို အကူအညီပေးရန် ကာ့ခ်စ်(Kusk) ဒေသတွင် တပ်စွဲထားကြောင်း” ယူကရိန်းနှင့် အနောက်မီဒီယာများက ပြောကြားထားသော်လည်း ရုရှားနိုင်ငံကမူ ပြန်လည် တုံ့ပြန်ပြောကြားထားမှုမရှိကြောင်း သိရှိရပါသည်။ 

ကိုးကား -Aljazerra

ဥရောပတွင် အကြီးမားဆုံး နေတိုးကာကွယ်ရေးစစ်စခန်းဖြစ်လာမည့် ရိုမေးနီးယားနိုင်ငံအရှေ့တောင်ပိုင်း၌ တည်ရှိသည့် Mihail Kogalniceanu အခြေစိုက်စခန်းတွင် ရုရှားကို စစ်ပွဲစတင်ရန် အဓိကနေရာတစ်ခုအဖြစ် အသုံးပြုလာမည်ဟု ယုံကြည်နေကြောင်း ရိုမေးနီးယား တစ်သီးပုဂ္ဂလက သမ္မတလောင်း Calin Georgescu က ပြောကြားလိုက်သည်။ 

မိမိအနေဖြင့် ယခုနေတိုးအခြေစိုက်စခန်းကိစ္စကို လက်မခံနိုင်ကြောင်း၊ ရိုမေးနီးယားတွင် ယခုဖြစ်ပျက်နေသည့်ကိစ္စအပေါ် အမေရိကန်ရော အခြားနိုင်ငံ များကပါ စိတ်ဝင်စားခြင်းမရှိပါကြောင်း၊  ၎င်းတို့က ရိုမေးနီးယားကို စစ်ပွဲအတွက် တံခါးတစ်ချပ်တစ်ခုအဖြစ် အသုံးပြုလာပါက မိမိနိုင်ငံတွင် ဖြစ်ပျက်လာနိုင်သည်များကို စိတ်ထဲမရှိကြပါကြောင်း၊ မိမိတို့မြေရှိ နေတိုးအခြေစိုက်စခန်းက ရုရှားကို ကြီးကြီးမားမားစစ်ဆင်နွှဲလာပါက မိမိတို့နိုင်ငံကို မည်ကဲ့သို့ သက်ရောက်မှုများ ရှိလာနိုင်မည်ဆိုသည်ကို ထည့်သွင်းစဉ်းစားလိုကြောင်း၊ မိမိအနေဖြင့် စစ်ပွဲကို လုံးဝမလိုချင်ကြောင်း Georgescu က အမေရိကန် ရေတပ် အငြိမ်းစား Shawn Ryanနှင့် အင်တာဗျူးတွင် ပြောကြားခဲ့သည်။ 

ရိုမေးနီးယားမှ စတင်မည့် နေတိုး၏ ရုရှားအပေါ် စစ်ဆင်နွှဲမည်ဆိုသည့် ၎င်း၏ ယူဆချက်ကို ထုတ်ဖော်ပြောပြခြင်းသည် ပထမအကြိမ် မဟုတ်ဘဲ ယခင် ကလည်း ပြောပြဖူးကြောင်း ရိုမေးနီးယား တီဗီချန်နယ်တစ်ခုဖြစ်သည့် Digi 24 မှတ်ချက်ပြုထားပါသည်။

ကိုးကား-TASS

CIA အပါအဝင် အမေရိကန် အစိုးရအာဏာပိုင်များက WhatsApp ကို အသုံးပြုသူများပြောသည့် သတင်းစကားများကို အဝေးမှထိန်းချုပ်ပြီး ဝင်ရောက်ကြည့်ရှု နိုင်ကြောင်း Meta ပိုင်ရှင် မက်ခ်ဇူကာဘာဂ်က ထုတ်ဖော်ပြောကြားခဲ့ပါသည်။ အာဏာပိုင်အဖွဲ့အစည်းများက WhatsApp ၏ end-to-end encryption ကို ထိထိရောက်ရောက် ကျော်လွှားနိုင်ခဲ့ကြောင်းကိုလည်း ပြောပါသည်။ 

ဇန်နဝါရီ ၁၀ ရက်နေ့က ဂျိုးရီဂျင် အတွေ့အကြုံဆိုင်ရာ နှီးနှောဖလှယ်ပွဲတွင် WhatsApp ၏ ကုဒ်အတွက် Meta က မက်ဆေ့ချ်အကြောင်းအရာများကို ကြည့်ရှုခြင်းမှတားဆီးထားသော်လည်း သုံးစွဲသူ၏ ဖုန်းသို့ ဝင်ရောက်ကြည့်ရှု့ခြင်းမှ ကာကွယ်ပေးနိုင်မည်မဟုတ်ကြောင်း Zuckerberg မှ ရှင်းပြခဲ့ပါသည်။

ရုရှားသမ္မတ ဗလာဒီမာပူတင်နှင့် တွေ့ဆုံမေးမြန်းခန်းအတွက် ကြိုးစားနေသည့် တက်ကာကားလ်ဆင် က ဇူကာဘာဂ်ကို သတင်းစကားလုံခြုံရေးနှင့် ပတ်သက်ပြီး မည်ကဲ့သို့လုပ်ဆောင်ရမည်နည်းဆိုသည့် မေးခွန်းကို ၎င်းကဖြေကြားခဲ့ခြင်းဖြစ်ကြောင်း၊ တက်ကာ က ပူတင်နှင့်စကားပြောဆိုရန်အတွက် ၃ နှစ်ကြာ ကြိုးစား ခဲ့ပြီး စကားပြောခွင့်ရချိန်တွင် အမေရိကန်အမျိုးသားလုံခြုံရေး NSA နှင့် ထောက်လှမ်းရေး CIA တို့က ၎င်း၏ ဖုန်းကို ဖောက်ဝင်နိုင်ခဲ့ပြီး စပိုင်လုပ်ခဲ့ခြင်းကြောင့် ရုရှားဖက်က အဆက်အသွယ်ဖြတ်ခဲ့ခြင်းနှင့်ပတ်သက်ပြီး တက်ကာက အဆိုပါအဖွဲ့များကို အပြစ်တင်ခဲ့ပါသည်။ 

“မိမိတို့အနေဖြင့် သုံးစွဲသူပြည်သူများ၏ သတင်းအချက်အလက်များကို ကာကွယ်ထိန်းသိမ်းပေးနိုင်သော်လည်း ဥပဒေစိုးမိုးရေးအတွက် လုံလောက်သည့် အကြောင်းပြချက်ရှိပါကတားဆီးပေး၍မရနိုင်ကြောင်း” ဇူကာဘာဂ်က ပြောပါသည်။ ယခုကာလ်ဆင်သုံးခဲ့သော လျှို့ဝှက်ကုဒ်သည် Meta ၏ ဒေတာဘေ့စ်များနှင့် တူနေသည့်အတွက် ဖောက်ဝင်ခံလိုက်ရကြောင်း ပြောကြားခဲ့ပါသည်။ 

ဇူကာဘာဂ်က အစ္စရေးကုမ္ပဏီ NSO Group မှ ဖန်တီးထားသည့် လျှို့ဝှက်ဆော့ဖ်ဝဲဖြစ်သည့် Pegasus ကဲ့သို့သော ကိရိယာများဖြစ်ပြီး ဒေတာဝင်ရောက် ကြည့်ရှု့ရန် မိုဘိုင်းလ်ဖုန်းများတွင် လျှို့ဝှက်ထည့်သွင်းထားနိုင်ကြောင်း ပြောကြားခဲ့ပါသည်။ 

ကိုးကား-Myanmar National Post

တရုတ်နိုင်ငံအခြေစိုက် TikTok ကုမ္ပဏီအနေဖြင့် လာမည့် ဇန်နဝါရီလ ၁၉ ရက်မတိုင်မီတွင် TikTok ကို တရုတ်နိုင်ငံသားမဟုတ်သည့်ကုမ္ပဏီထံ ရောင်းချခြင်းမရှိပါက နိုင်ငံလုံခြုံရေး ခြိမ်းခြောက်လာနိုင်မည်ဖြစ်သည့်အတွက် အမေရိကန်နယ်နိမိတ်အတွင်း TikTok သုံးစွဲခွင့်အား ပိတ်ပင်မည့် ဉပဒေတစ်ရပ်ကို အမေရိကန်သမ္မတဂျိုးဘိုင်ဒန်က လက်မှတ်ရေးထိုး ထုတ်ပြန်ထားပြီးဖြစ်ပါသည်။

အမေရိကန်တရားလွှတ်တော်ချုပ် တရားသူကြီး ၉ ဦး က TikTok ပိတ်သိမ်းရန် ထုတ်ပြန်ထားသည့် ဥပဒေအပေါ် အယူခံလွှာတင်သွင်းထားမှုအတွက် TikTok ၏ ကိုယ်စားလှယ်ရှေ့နေများနှင့် စစ်ဆေးကြားနာမှုများဆောင်ရွက်ခဲ့ပါသည်။ တစ်ဖက်တွင်လည်း ထိုသို့ ပိတ်ပင်လိုက်ခြင်းက အမေရိကန်တွင် TikTok သုံးစွဲနေသူ သန်း ၁၇၀ ကျော်၏ လွတ်လပ်စွာ ထုတ်ဖော်ပြောဆိုခွင့်ကို ချိုးဖောက်ရာရောက်ကြောင်း Content Creators များ ကလည်း ပြောကြားထားပါသည်။ 

တရုတ်နိုင်ငံအနေဖြင့် TikTok Application ကို အသုံးပြု၍ အမေရိကန်နိုင်ငံသားများ၏ ကိုယ်ရေးအချက်အလက်များကို သူလျှိုထောက်လှမ်းနိုင်ခြင်းအပြင် နိုင်ငံရေးအရ လွှမ်းမိုးခြယ်လှယ်လာနိုင်ဖွယ်ရှိကြောင်း အမေရိကန်အစိုးရက သတိပေးပြောကြားထားသည်။

အမေရိကန်တရားလွှတ်တော်ချုပ်က TikTok ပိတ်ပင်မည့် ဥပဒေအပေါ်   တရုတ်ကုမ္ပဏီ၏ အယူခံဝင်ရောက်မှုကို လာမည့်ရက်ပိုင်းအတွင်း ဆုံးဖြတ်မည်ဖြစ်သည်။မကြာမီရက်ပိုင်းအတွင်း အိမ်ဖြူတော်သို့ ပြန်လည်ရောက်ရှိလာမည့် ရွေးကောက်ခံသမ္မတ ဒေါ်နယ်ထရမ့် ကမူ TikTok Application အသုံးပြုမှု ပိတ်ပင်မည့်ကိစ္စကို ၎င်း၏ သမ္မတရာထူး တရားဝင် စတင်ထမ်း‌ဆောင်မည့် ဇန်နဝါရီ ၂၀ ရက်နေ့အထိ ဆိုင်းငံ့ထားရန် ပြောကြားထားသည်။

ကိုးကား-BBC

နေတိုးအဖွဲ့အနေဖြင့် ရေအောက်အခြေခံအဆောက်အဦများကို ကာကွယ်ရန်အတွက် ဘောတစ်ပင်လယ်သို့ စစ်ရေယာဉ် ၁၀ စင်းခန့်စေလွှတ်မည်ဖြစ်ကြောင်း အဆိုပါအဖွဲ့၏ ပြောကြားချက်ကို ကိုးကား၍ နီးစပ်သည့် သတင်းအရင်းအမြစ်များကပြောသည်။

နေတိုးတပ်ဖွဲ့မှ စစ်သင်္ဘောများသည် ဘောတစ်ပင်လယ်သို့ ယခုသီတင်းပတ်အကုန်ပိုင်းတွင် ရောက်ရှိမည်ဖြစ်ပြီး ၎င်းသင်္ဘောများသည် စွမ်းအင်နှင့်တယ်လီကွန်မြူနီကေးရှင်းဆိုင်ရာ ဆက်သွယ်ရေးကြိုးများအနီးတွင် နေရာယူသွားမည်ဖြစ်ကြောင်း ဖင်လန်သတင်းဌာနတစ်ခုက ထုတ်ပြန်သည်။

အဆိုပါဒေသအတွင်းရှိ ရေအောက်ကေဘယ်လ်ကြိုးများသည် ၂၀၂၄ ခုနှစ် ဒီဇင်ဘာလ ၂၅ ရက်နှင့် ၂၆ ရက်တို့တွင် ပြတ်တောက်သွားခဲ့ရာ ၎င်းကြိုးများအနက်သုံးကြိုးမှာ ဖင်လန်နှင့် အက်စတိုးနီးယားတို့ကြား ဆက်သွယ်ထားသော ကြိးများဖြစ်ပြီး ကျန်တစ်ကြိုးမှာ ဖင်လန်နှင့် ဂျာမနီတို့ကြား ဆက်သွယ်ထားကြောင်း သိရသည်။

Source: မြဝတီသတင်းစာ

ဂျပန်ယာကူဇာ ဂိုဏ်းခေါင်းဆောင်တစ်ဦးဖြစ်သူ တာကီရှိ အီဘီဆာဝါက ၎င်းသည် မြန်မာနိုင်ငံထံမှ နျူကလီးယား ထုတ်လုပ်ရာတွင် အသုံးပြုသောအရာ များကို လက်ဝယ်ထားရှိမှုအပြင် တရားမဝင် လက်နက် မှောင်ခိုရောင်းဝယ်ရန် ကြိုးပမ်းမှုများအတွက် အပြစ် ရှိသည်ဟု ဝန်ခံလိုက်ကြောင်း အမေရိကန်အစိုးရအာဏာပိုင်များက ထုတ်ဖော် ပြောဆိုလိုက်သည်။ တာကီရှိ အီဘီဆာဝါနှင့် ကြံရာပါတစ်ဦးကို ၂၀၂၂ ခုနှစ် ဧပြီလအတွင်းတွင် လက်နက်မှု၊ မူးယစ် ဆေးဝါးမှောင်ခို ကုန်ကူးမှုများဖြင့် စွဲချက်တင်ခဲ့သော်လည်း ၎င်းတို့ နှစ်ဦးကို ရမန်ဖြင့် ပြန်လွှတ်ထားခဲ့ကြောင်းသိရသည်။

ထို့ပြင် အမေရိကန်အစိုးရသည် မြန်မာနိုင်ငံမှ နျူကလီး ယားနှင့် ဆက်နွှယ်သည့်ပစ္စည်းများကို ထိန်းချုပ်ပြီးတရားမဝင် ရောင်းချနိုင်ရေး အကျိုးဆောင်ပေးမှုဖြင့်ဂျပန်ယာကူဇာ ဒုစရိုက်ဂိုဏ်းဝင်ဖြစ်သူ တာကီရှိအီဘီဆာဝါကို စွဲချက်တင်ခဲ့ကြောင်း အမေရိကန်အစိုးရရှေ့နေ့များကပြောသည်။ ၎င်းသည် မြန်မာနိုင်ငံရှိ တိုင်းရင်းသား လက်နက်ကိုင်အဖွဲ့များကို လက်နက် ဝယ်ယူရောင်းချပေးခြင်းများလည်း လုပ်ကိုင်ခဲ့ကြောင်း အမေရိကန်အစိုးရရှေ့နေ့များက စွပ်စွဲထားသည်။

မြန်မာနိုင်ငံရှိလက်နက်ကိုင်အဖွဲ့များနှင့် ချုပ်ဆိုခဲ့သော စာချုပ်ထဲတွင် မြေပြင်မှ ဝေဟင်ပစ်ဒုံးကျည်များရရှိရန် ဆောင်ရွက်ပေးရေး အချက်လည်း ပါဝင်ခဲ့ကြောင်း အမေရိကန်အစိုးရရှေ့နေ့များကဆိုသည်။ အမေရိကန် အစိုးရအဖွဲ့ချုပ် ယာယီရှေ့နေချုပ်တစ်ဦးဖြစ်သော အက်ဝက်ဒ်ကင်က "တာကီရှိ အီဘီဆာဝါက ဇန်နဝါရီ ၉ ရက် ရုံးချိန်း၌ ဝန်ခံထွက်ဆိုခဲ့ကြောင်း၊ နျူကလီးယား လက်နက်ထုတ်လုပ်နိုင်မည့် ပလိုတိုနီယံများအပါအဝင် နျူကလီးယားနှင့် ဆက်နွှယ်သည့်ပစ္စည်းများကို မြန်မာနိုင်ငံ ပြင်ပကိုထုတ်၍ မှောင်ခိုကုန်ကူးခဲ့ကြောင်း ဝန်ခံခဲ့သည်။ ထို့ပြင် မြန်မာနိုင်ငံတွင် ဖြစ်ပွားနေသည့် တိုက်ပွဲများအတွင်းအသုံးပြုရန် မြေပြင်ကဝေဟင်ပစ် ဒုံးကျည်ကဲ့သို့ လက်နက်ကြီးများ ရယူပေးပြီး အပြန် အလှန်အနေဖြင့် အမေရိကန်နိုင်ငံအတွင်း ဟီရိုအင်းနှင့် စိတ်ကြွဆေးပြား အများအပြားတင်ပို့မှုများ လုပ်ဆောင် ခဲ့ကြောင်း” သိရှိရသည်။

၎င်းသည် မြန်မာနိုင်ငံထံမှ မူးယစ်ဆေးဝါးများနှင့်အတူ လက်နက်ထုတ်လုပ်နိုင်စွမ်းရှိမည့် ပလိုတိုနီယံ၊ ယူရေနီယံများကို လက်ဝယ်ထိန်းသိမ်းရယူခဲ့ကြောင်း၊ အမေရိကန် အစိုးရရှေ့နေ့များက စွပ်စွဲထားသည်။၂၀၂၀ ပြည့်နှစ် မှစပြီး အသက် ၆ဝ အရွယ်ရှိ အီဘီဆာဝါသည် နျူကလီးယား ဆက်စပ်ပစ္စည်းများကို ရောင်းချရန် အမေရိကန်အစိုးရ၏ အသွင်ယူထားသည့် ထောက်လှမ်းရေးအရာရှိတစ်ဦးနှင့် ဆက်သွယ်မိပြီး နျူကလီးယား ဆက်စပ်ပစ္စည်းများကို ရောင်းဝယ်ရန် စီစဉ်ဆောင်ရွက်ခဲ့ရာမှ ဖမ်းဆီးရမိခဲ့ခြင်း ဖြစ်သည်။

အီဘီဆာဝါနှင့်အတူ ၎င်း၏မိတ်ဆွေဖြစ်သူတို့ကို ဖမ်းဆီးနိုင်ရန် စုံစမ်းစစ်ဆေးမှုအတွင်း ထိုင်းအာဏာပိုင်များက အမေရိကန်စုံစမ်းစစ်ဆေးသူများကို အကူအညီ ပေးခဲ့ကြောင်းသိရသည်။

အမေရိကန်တရားရေးဌာနက "ဖမ်းဆီးရမိသည့် နျူကလီးယား ဆက်စပ်ပစ္စည်းများကို ဓါတ်ခွဲစမ်းသပ်ရာ ၌ နျူကလီးယားနမူနာများတွင် ပလူတိုနီယမ် အိုင်ဆိုတုပ်ပါဝင်မှုရှိနေပြီး လက်နက်ထုတ်လုပ်နိုင်စွမ်းရှိသည့်အဆင့်မျိုးဖြစ်ကြောင်း၊ ပလူတိုနီယံကို အလုံအလောက်ထုတ်လုပ်နိုင်ခဲ့မည်ဆိုပါက နျူကလီးယား လက်နက်ထုတ်လုပ်နိုင်စွမ်း ရှိလာမည်ဖြစ်ကြောင်း" ပြောကြားခဲ့သည်။

အီဘီဆာဝါသည် မြန်မာနိုင်ငံရှိ အမည်မဖော်လိုသည့် တိုင်းရင်းသားလက်နက်ကိုင်အဖွဲ့ကိုယ်စား လက်နက်များ ဝယ်ယူရန်အတွက် ငွေကြေးရရှိရန် နျူကလီယား ထုတ်လုပ်ရာတွင်အသုံးပြုသော ဆက်စပ်ပစ္စည်းရောင်းချမှုမှ ရရှိသောငွေများကို အသုံးပြုခဲ့ကြောင်းသိရသည်။ အီဘီဆာဝါသည် နျူကလီယားထုတ်လုပ်ရာတွင် အသုံးပြုသော ဆက်စပ်ပစ္စည်းနှင့်ပတ်သက်သည့် စွဲချက်များနှင့်ပတ်သက်ပြီး ထောင်ဒဏ် နှစ် ၂၀ ကျခံရဖွယ်ရှိနေကြောင်းသိရသည်။

ကိုးကား-NP News

Photo: The New York Times

ယီမင်နိုင်ငံမှ  ဟူသီသူပုန်အဖွဲ့သည် ဖျက်အားပြင်းသည့် အသံထက်မြန်ဒုံးကျည်တစ်စင်းအား စမ်းသပ်ပစ်ခတ်ခဲ့ပြီး  ယင်းဒုံးကျည်များကို စစ်ဆင်ရေးတွင် အသုံးပြုရန် စီစဉ်လျက်ရှိကြောင်း သူပုန်အဖွဲ့နှင့်နီးစပ်သည့် သတင်းအရင်းအမြစ်တစ်ခုက Sputnik သတင်းဌာနသို့ပြောသည်။

ဟူသီသူပုန်အဖွဲ့သည် အဆိုပါအသံထက်မြန်ဒုံးကျည်ကို မည်သည့်နေ့ရက်၊ နေရာတွင်လုပ်ဆောင်ခဲ့ကြောင်းကို အသေးစိတ်မသိရသေးသော်လည်း ဒုံးကျည်အား အောင်မြင် စွာစမ်းသပ်ပစ်ခတ်နိုင်ခဲ့ကြောင်း သိရသည်။ စမ်းသပ်ခဲ့သည့် အသံထက်မြန်ဒုံးကျည်သည် အသံထက် ရှစ်ဆပိုမိုမြန်ဆန်ပြီး တစ်နာရီ လျှင် မိုင်ပေါင်း ၆၂၀၀ သို့မဟုတ် ကီလိုမီတာ ၁၀၀၀၀ အထိပစ်ခတ်ရောက်ရှိနိုင်ကြောင်း ဖော်ပြထားသည်။

ယီမင်နိုင်ငံသည် အဆိုပါဒုံးကျည်များကို အစ္စရေးနိုင်ငံအတွင်းရှိ ပစ်မှတ်များအပါအဝင် ပင်လယ်နီ၊ အာရေဗျ ပင်လယ်များနှင့် အေဒင်ပင်လယ်ကွေ့အတွင်း၌ပါ တိုက်ခိုက်မှုများ လုပ်ဆောင်ရန်အတွက် စတင်ထုတ် လုပ်လျက်ရှိကြောင်း သတင်းအရင်းအမြစ်က ဆက်လက်ပြောကြားသည်။

ဟူသီသူပုန်အဖွဲ့ဝင်များသည် အချိုးမညီ စစ်ဆင်မှုပညာရပ်များကို အနောက်နိုင်ငံများ၌ လေ့လာလျက်ရှိပြီး အစ္စရေး၊ အမေရိကန်နှင့် ဗြိတိန်နိုင်ငံတို့အား အံ့အားသင့် စေရန် တိုက်ခိုက်သွားမည်ဟု ကြေညာထားကြောင်း သိရသည်။ 

Source: Myawady Webportal

Su 35 S ဘက်စုံသုံး တိုက်လေယာဉ် လိုက်ပါခြံရံလျက် ရုရှားလေကြောင်း၏ Su-34 အမျိုးအစား ဘက်စုံသုံး အသံထက်မြန်သည့် စူပါဆိုးနစ်ဗုံးကြဲတိုက် လေယာဉ် တစ်စင်းသည် Kursk ဒေသရှိ ယူကရိန်းစစ်တပ်၏ အမာခံတပ်စခန်းချရာ ပစ်မှတ်များကို ဗုံးကြဲတိုက်ခိုက်လိုက်ရာ တပ်စခန်းများနှင့် ယူကရိန်းတပ်ဖွဲ့ဝင်များစွာ ထိမှန်ခဲ့ကြောင်း ရုရှားကာကွယ်ရေးဝန်ကြီးဌာနက သတင်းထုတ်ပြန်လိုက်ပါသည်။ 

ရုရှား၏ အဆင့်မြင့် Su-34 ဗုံးကြဲတိုက်လေယာဉ်သည် Su 35S တိုက်လေယာဉ်နှင့်အတူခြံရံ၍ အခြေစိုက်လေတပ်စခန်းမှ ထွက်ခွာသွားကာ ယူကရိန်းစစ်တပ်၏ အမာခံတပ်စခန်း ပစ်မှတ်များကို အောင်မြင်စွာ ဗုံးကြဲပစ်ချနိုင်ခဲ့ကြောင်း၊ ယူကရိန်းတပ်ဖွဲ့ဝင် အများအပြား ထိမှန်သွားကြောင်း၊ အဆိုပါတိုက်လေယာဉ်များမှာ တိုက်ခိုက်ရေးတာဝန်ပြီးဆုံးပြီးနောက် သက်ဆိုင်ရာအခြေစိုက်လေတပ်စခန်းသို့ ချောချောမောမော ရောက်ရှိလာကြောင်း ထုတ်ပြန်ချက်တွင် ဖော်ပြထားပါသည်။

ကိုးကား - TASS

Photo- The National Interest

အထူးစစ်ဆင်ရေးဇုန်အတွင်း တစ်ရက်လျှင် ယူကရိန်းတပ်မတော်၏ ဆုံးရှုံးမှုပမာဏမှာ စစ်မှုထမ်း ၁၆၃၅ ဦးရှိကြောင်း ရုရှားကာကွယ်ရေးဝန်ကြီးဌာနက သတင်း ထုတ်ပြန်ခဲ့ပါသည်။

ဇန်နဝါရီ ၇ ရက်နေ့အတွင်း ရုရှားတပ်မတော်သည် ယူကရိန်းတို့၏ စစ်လေယာဉ်ကွင်းများ၊ လက်နက်သိုလှောင်ရုံများနှင့် ခရိုင် ၁၆၄ ခုရှိ ယူကရိန်းစစ်တပ်နှင့် ကြေးစားစစ်သားများ၏ နည်းပညာဆိုင်ရာ ပစ္စည်းများ သိုလှောင်ရာနေရာများကို ချေမှုန်းခဲ့ပါသည်။

ထို့အပြင် ပြီးခဲ့သည့် ၂၄နာရီ အတွင်း Kursk ဒေသရှိ ယူကရိန်းတပ်ဖွဲ့များ၏ ဆုံးရှုံးမှုပမာဏမှာ စစ်ဘက်ဆိုင်ရာဝန်ထမ်း ၃၂၅ ဦးထက်မနည်းကျဆုံးခဲ့ကြောင်း ရုရှားကာကွယ်ရေးဝန်ကြီးဌာနက သတင်းထုတ်ပြန်ခဲ့ပါသည်။

ကိုးကား - TASS