NUG၊ CRPH တို့၏ လက်ဝေခံ PDF အမည်ခံအကြမ်းဖက်သမားများသည် တိုင်းပြည်တည်ငြိမ်အေးချမ်းမှုနှင့် တရားဥပဒေစိုးမိုးမှုကို ပျက်ပြားစေရန် ရည်ရွယ် ချက်ဖြင့် ရုံးဌာနအဆောက်အဦများ၊ စာသင်ကျောင်းများ၊ အများပြည်သူ နေထိုင် လျက်ရှိသောနေအိမ်များ၊ လမ်း၊ တံတားများအား မီးရှို့ဖျက်ဆီးခြင်း၊ မိုင်းထောင် ဖောက်ခွဲခြင်းများ အလစ်အငိုက်လုပ်ဆောင်လျက်ရှိသည်။

တပ်မတော်အနေဖြင့် နိုင်ငံတော်တွင် ဖြစ်ပေါ်လျက်ရှိသည့် ငလျင် ဘေးဒဏ်ကြောင့် ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများကို အရှိန်အဟုန်ဖြင့် ဆောင်ရွက်နိုင်စေရန် ယာယီပစ်ခတ်တိုက်ခိုက်မှုရပ်စဲရေး ကာလကို  ထုတ်ပြန်ထားပြီး ဖြစ်သော်လည်း KNLA အဖွဲ့မှ အကြမ်းဖက်မှုလိုလားသူများနှင့် အကြမ်းဖက်အဖွဲ့အစည်းများဖြစ်သည့် NUG၊ CRPH တို့၏ လက်ဝေခံ PDF အမည်ခံ အကြမ်းဖက်သမားများသည် ယနေ့နံနက် ၇ နာရီခန့်တွင် မွန်ပြည်နယ်၊ ဘီးလင်းမြို့၏ အနောက်မြောက်ဘက် မီတာ ၁၁၀၀၀ ခန့်အကွာရှိ မိုင်တိုင်အမှတ် (၁၀၇/၉) နှင့် မိုင်တိုင်အမှတ် (၁၀၇/၁၀) ကြား အရှည်ပေ ၄၀ ရှိ သံဘောင်အမျိုးအစား တံတား အမှတ်(၅၉)နေရာ မော်လမြိုင်- ရန်ကုန်သွား မီးရထားလမ်းအား ဒေသန္တရ လက်လုပ် မိုင်းများဖြင့် မိုင်းထောင်ဖောက်ခွဲခဲ့ရာ တံတားအောက်ခြေတိုင် ၂ ပေခွဲ ခန့် ကွဲအက် ပျက်စီးခဲ့ကြောင်းနှင့် အဆိုပါပျက်စီးမှုများကြောင့် မီးရထားများ ဖြတ်သန်းသွားလာမှုကို မထိခိုက်စေဘဲ ကောင်းမွန်စွာ ဖြတ်သန်းသွားလာနိုင်ကြောင်း သိရှိရသည်။

ငလျင်ဘေးဒဏ်ကြောင့် ကူညီကယ်ဆယ်ရေးနှင့် ပြန်လည်ထူထောင် ရေးလုပ်ငန်းများကို အရှိန်အဟုန်ဖြင့်ဆောင်ရွက်နေသည့်ကာလအတွင်းတွင် ယခုကဲ့သို့ စစ်ရေးနှင့်မသက်ဆိုင်သော နေရာများ၌ အကြမ်းဖက်လုပ်ဆောင်ခြင်းများသည် ပြည်သူများအား ပိုမိုအထိတ်တလန့်ဖြစ်ပြီး ကြောက်ရွံ့လာစေရန်၊ သွားလာမှုခက်ခဲ စေရန်နှင့် ကုန်စည်စီးဆင်းမှုကို ထိခိုက်ဆုံးရှုံးမှုဖြစ်စေပြီး တည်ငြိမ်မှုပျက်ပြားစေရန် ရည်ရွယ်လုပ်ဆောင်ခြင်းများ ဖြစ်ကြောင်း သတင်းရရှိသည်။

Source​: Myawady Webportal 

သီရိလင်္ကာရေတပ်သည် ဟီရိုအင်းနှင့် မက်သမ်ဖက်တမင်း (heroin and crystal methamphetamine) ၇၀၀ ကီလိုဂရမ် စံချိန်တင် ဖမ်းဆီးရမိခဲ့ပါသည်။ သီရိလင်္ကာရေတပ်သည် ဟီရိုအင်းနှင့် ခရစ္စတယ် မက်သမ်ဖက်တမင်း ၇၀၀ ကီလိုဂရမ်ကျော်ကို ဖမ်းဆီးရမိခဲ့ပြီး နိုင်ငံ၏ လုံခြုံရေးတပ်ဖွဲ့များသည် သမိုင်းတစ်လျှောက် မူးယစ်ဆေးဝါး အများဆုံး ဖမ်းဆီးရမိသည့် ဖြစ်ရပ်ဖြစ်ကြောင်း ဧပြီ ၅ ရက်(စနေနေ့) တွင် ရေတပ်က ပြောကြားခဲ့ပါသည်။ ရေတပ် မီဒီယာ ဒါရိုက်တာ ဗုဒ္ဓိကစမ္ပတ် (Buddhika Sampath)က ဖမ်းဆီးရမိသော မူးယစ်ဆေးဝါးများ၏ ခန့်မှန်းတန်ဖိုး သည် သီရိလင်္ကာရူပီး ၁ဝ ဘီလီယံ (အမေရိကန်ဒေါ်လာ ၃၄ သန်းခန့်) ထက် ပိုမိုကြောင်း မီဒီယာသို့ ပြောကြားခဲ့သည်။ ယခင်ရက်သတ္တပတ်အတွင်း ရေတပ်နှင့် မူးယစ်ဆေးဝါးတိုက်ဖျက်ရေးဌာန (Police Narcotics Bureau) တို့ ပူးပေါင်းဆောင်ရွက်ခဲ့သည့် စစ်ဆင်ရေးတစ်ခုတွင် မူးယစ်ဆေးများကို သိမ်းဆည်းနိုင်ခဲ့ပြီး မူးယစ်ဆေးသယ်ယူသည့် ငါးဖမ်းသင်္ဘောတစ်စီးနှင့်အတူ သံသယရှိသူ ၇ ဦးကိုပါ ဖမ်းဆီးနိုင်ခဲ့ကြောင်း ၎င်းက ပြောကြားခဲ့သည်။ ဒါရိုက်တာ ဗုဒ္ဓိကစမ္ပတ်၏အဆိုအရ မူးယစ်ဆေးဝါးများကို အိတ် ၅၁ လုံးတွင် ထည့်ထားပြီး ခရစ္စတယ်မက်သမ်ဖက်တမင်း ၅၀၀ ထုပ်နှင့် ဟီရိုအင်း ၁၇၈ ထုပ် ပါဝင်ကြောင်းသိရသည်။သိမ်းဆည်းရမိမှုသည်သီရိလင်္ကာနိုင်ငံ၏အနောက်ဘက်ကမ်းရိုး တန်းမှ ရေပြင်တွင်ဖြစ်ပွားခဲ့ခြင်းဖြစ်သည်။ သိမ်းဆည်းရမိသော မူးယစ်ဆေးဝါးများအား စစ်ဆေးပြီးနောက် ရေတပ် ညွှန်ကြားရေးမှူး ဒုတိယဗိုလ်ချုပ်ကြီးကန်ချာနာတာနာဂိုဒါက ငါးဖမ်းသင်္ဘောပိုင်ရှင်များအား မူးယစ်ဆေးဝါးမှုများ တွင် ပါဝင်ပတ်သက်မှုများကို ချက်ချင်းရပ်တန့်ရန် သတိပေးခဲ့ပါသည်။

ကိုးကား- https://thepeninsulaqatar.com

ငလျင်လှုပ်ခတ်ပြီးနောက် လူသားချင်းစာနာထောက်ထားမှုဆိုင်ရာလုပ်ငန်းများ အဆင်ပြေချောမွေ့စေရန်အတွက် အပစ်အခတ်ရပ်စဲရေးကို သက်တမ်းတိုးရန် အာဆီယံက မြန်မာနိုင်ငံအစိုးရကို တိုက်တွန်းထားပါသည်။ အထူးသဖြင့် မလေးရှားနိုင်ငံ အပါအဝင် အာဆီယံနိုင်ငံများသည် မြန်မာအစိုးရအား ငလျင်အပြီး ကယ်ဆယ်ရေးနှင့် ပြန်လည် ထူထောင်ရေးလုပ်ငန်းများဆက်လက်လုပ်ဆောင်နိုင်ရန်အတွက် ကြေညာထားသည့်ကာလထက် ကျော်လွန်၍ အပစ် အခတ်ရပ်စဲရေးကို သက်တမ်းတိုးပေးရန် မျှော်လင့်ကြောင်း ဖော်ပြထားသည်။ မတ်လ ၂၈ ရက်နေ့က မြန်မာနိုင်ငံတွင် လှုပ်ခတ်ခဲ့သော ပြင်းအား ၇.၇ ရှိသည့် ငလျင်ကြီးအပြီး နိုင်ငံတော်စီမံအုပ်ချုပ်ရေးကောင်စီက ဧပြီလ ၂၂ ရက်အထိ သုံးပတ်ကြာ အပစ်အခတ်ရပ်စဲကြောင်း ကြေညာခဲ့ပါသည်။ မလေးရှားနိုင်ငံခြားရေးဝန်ကြီး ဒါတုတ် ဆရီ မိုဟာမဒ် ဟာဆန် (Datuk Seri Mohamad Hasan)က မလေးရှားနှင့် အာဆီယံ တို့သည် အဆိုပါအပစ်အခတ်ရပ်စဲရေး ကြေညာချက်ကို ကြိုဆိုကြောင်း ပြောကြားခဲ့ပါသည်။ မြန်မာပြည်သူများ၏ လုံခြုံရေးနှင့် သာယာဝပြောရေးအတွက် အဆိုပါငလျင်ကြောင့်ဖြစ်ပေါ်လာသော ပျက်စီးဆုံးရှုံးမှုပမာဏနှင့် ရေရှည်လူသားချင်းစာနာထောက်ထားမှု အကူအညီ များ လိုအပ်မှုတို့ကို ထည့်သွင်းစဉ်းစားကာ အပစ်အခတ်ရပ်စဲရေးကို သက်တမ်းတိုးမြှင့်ပေးရန် လိုအပ်ကြောင်း ၎င်းက ပြောကြားခဲ့ပါသည်။ “အဆိုပါကြေညာချက်ကိုမိမိတို့အလွန်ဝမ်းသာပါသည်။ အဘယ်ကြောင့်ဆိုသော် ဤအရေးပေါ် အခြေအနေတွင် မြန်မာနိုင်ငံသည် ကပ်ဘေးကြီးတစ်ခုနှင့်ရင်ဆိုင်နေရသည်။ ပဋိပက္ခများနှင့်ဆက်လက်မသွားသင့်ပါ။ အရေးကြီးဆုံးအရာက မြန်မာပြည်သူများကို မည်သို့ကယ်တင်နိုင်မလဲ၊ အကူအညီများ မည်သို့ ရရှိနိုင်မလဲ ဆိုသည် ပါပဲ” ဟု ၎င်းက ဧပြီ ၅ ရက်(စနေနေ့)တွင် လူသားချင်းစာနာထောက်ထားမှုဆိုင်ရာ အကူအညီများ ပေးအပ်ရန်မြန်မာနိုင်ငံသို့လာရောက်သည့် ခရီးစဉ်အပြီး သတင်းစာရှင်းလင်းပွဲတွင် ပြောကြားခဲ့ပါသည်။ အစောပိုင်းက မလေးရှားနိုင်ငံခြားရေးဝန်ကြီး မိုဟာမက်နှင့် ထိုင်းနိုင်ငံခြားရေးဝန်ကြီး Maris Sangiampongsa တို့သည် နိုင်ငံ၏ အလယ်ပိုင်းဒေသနှင့် အနီးတစ်ဝိုက်ဒေသများကို လှုပ်ခတ်ခဲ့သော ငလျင်ကြောင့် မြန်မာနိုင်ငံသို့ လူသားချင်းစာနာ ထောက်ထားမှုဆိုင်ရာ အကူအညီပေးရေးမစ်ရှင်ကို ပူးတွဲဦးဆောင်ခဲ့ပါသည်။ အာဆီယံနိုင်ငံခြားရေးဝန်ကြီးများ အစည်းအဝေး၏ သဘာပတိအဖြစ် မလေးရှားနိုင်ငံခြားရေးဝန်ကြီး မိုဟာမက်က လက်ရှိမြန်မာတွင်ရှိသော မလေးရှား နှင့် အခြားအာဆီယံနိုင်ငံများမှ ကယ်ဆယ်ရေးအဖွဲ့များသည် အကူအညီများပေးနိုင်ရန်အတွက် အပစ်အခတ်ရပ်စဲရေးကို သက်တမ်းတိုးပေးနိုင်လိမ့်မည်ဟု မျှော်လင့်ကြောင်း ထပ်လောင်းမှတ်ချက်ပြုပြောကြားခဲ့သည်။ “မိမိတို့အဖွဲ့များ၏ လုံခြုံရေးကို ခြိမ်းခြောက်နိုင်သည့်အရာများ တွေ့မြင်ရပါက အာဆီယံမိတ်ဖက်များကို မြန်မာနိုင်ငံတွင် ရှိနေခြင်းနှင့် ပတ်သက်ပြီး ပြန်လည်သုံးသပ်ရန် တောင်းဆိုရန် ဝန်မလေးပါ” ဟု ၎င်းကဆိုပါသည်။ ထို့အပြင် လူသားချင်းစာနာ ထောက်ထားမှုဆိုင်ရာ အပစ်အခတ်ရပ်စဲရေးသည် အာဆီယံ၏ ဘုံသဘောတူညီချက် ၅ ချက်နှင့်အညီ မြန်မာနိုင်ငံမှ သက်ဆိုင်သူအားလုံးကြား၌ပိုမိုကျယ်ပြန့်ပြီးဘက်စုံပါဝင်နိုင်သော ဆွေးနွေးမှုအတွက် ရှေ့ပြေးနိမိတ်အဖြစ် ဆောင်ရွက် နိုင်သည်ဟု ၎င်းက အဆိုပြုခဲ့သည်။ ခရီးစဉ်အတွင်း မလေးရှားနိုင်ငံခြားရေးဝန်ကြီး မိုဟာမက်နှင့် ထိုင်းနိုင်ငံခြားရေး ဝန်ကြီး မာရစ်တို့သည် နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌဗိုလ်ချုပ်မှူးကြီးမင်းအောင်လှိုင်နှင့် နိုင်ငံခြားရေးဝန်ကြီး ဦးသန်းဆွေတို့နှင့် တွေ့ဆုံဆွေးနွေးခဲ့ပါသည်။ တစ်ချိန်တည်းမှာပင် နိုင်ငံခြားရေးဝန်ကြီးဌာနက ထုတ်ပြန်ချက် တစ်စောင်တွင် ဆွေးနွေးမှုအတွင်း မိုဟာမက်က အာဆီယံကိုယ်စား မြန်မာပြည်သူများအတွက် အာဆီယံ၏ ဝမ်းနည်း ကြောင်းနှင့် မယိမ်းမယိုင် သော ထောက်ခံအားပေးမှုကို ပေးပို့ခဲ့ကြောင်း ဖော်ပြထားသည်။ “ဘေးဒဏ်သင့်ရပ်ရွာများ ပြန်လည်ထူထောင်ရေး ကြိုးပမ်းမှုများအတွက် ချက်ချင်းလက်ငင်းထိရောက်သောအကူအညီများနှင့် ရေရှည်ပံ့ပိုး ကူညီမှုများ ဆက်လက်လုပ်ဆောင်ရန် အာဆီယံ၏စုပေါင်းကတိကဝတ်ကိုလည်း ထပ်မံအတည်ပြုခဲ့သည်” ဟု ထုတ်ပြန်ချက်တွင် ဖော်ပြထားသည်။ မလေးရှား၏ လူသားချင်းစာနာထောက်ထားမှုဆိုင်ရာ ပံ့ပိုးမှုတစ်ခုအဖြစ် မိုဟာမက်သည် နေပြည်တော်သို့ ရောက်ရှိပြီးနောက် လူသားချင်းစာနာထောက်ထားမှုအကူအညီ ၁၅ တန် ကို တရားဝင် လွှဲပြောင်းပေးအပ်ခဲ့သည်။ အဆိုပါအကူအညီကို မြန်မာအာဏာပိုင်များနှင့်ပူးပေါင်း၍ အာဆီယံ၏ ပံ့ပိုးကူညီမှုများကို ညှိနှိုင်းရန် တာဝန်ပေးအပ်ထားသည့် လူသားချင်းစာနာထောက်ထားမှုနှင့် ဘေးအန္တရာယ်စီမံခန့်ခွဲမှုဆိုင်ရာ အာဆီယံ ပူးပေါင်းညှိနှိုင်းရေးစင်တာ (AHA စင်တာ) သို့ လွှဲပြောင်းပေးအပ်ခဲ့သည်။ နောက်ထပ်အကူအညီများ သယ်ဆောင် လာမည့်လေယာဉ်သည် ဧပြီလ ၇ ရက်နေ့တွင် နေပြည်တော်သို့ ရောက်ရှိရန် စီစဉ်ထားပါသည်။ မြန်မာနိုင်ငံမှ မထွက်ခွာမီ မိုဟာမက်သည် နေပြည်တော်ရှိ AHA စင်တာကိုယ်စားလှယ်ထံမှ အခြေအနေအကျဉ်းကိုရယူခဲ့ပြီး လူသားချင်းစာနာထောက်ထားမှုလုပ်ငန်းများသည် ရှာဖွေကယ်ဆယ်ရေးအဆင့်မှ ပြန်လည်ထူထောင်ရေးအဆင့်သို့ ကူးပြောင်းသွားပြီဖြစ်ကြောင်း အတည်ပြုခဲ့ပါသည်။ အဆိုပါလူသားချင်းစာနာထောက်ထားမှုအဖွဲ့သည် အာဆီယံ ညီညွတ်မှုနှင့် ညှိနှိုင်းထားသော ဒေသတွင်းလုပ်ဆောင်ချက်များကို ထပ်မံအတည်ပြုခဲ့ပြီး စိန်ခေါ်မှုများနှင့် ရင်ဆိုင် ရသည့်အခါတွင်လည်း အာဆီယံ၏ခိုင်မာသောညီညွတ်မှုနှင့် လူသားချင်းစာနာထောက်ထားမှုအကျပ်အတည်းများကို မြန်ဆန်စွာတုံ့ပြန်နိုင်စွမ်းကို ပြသခဲ့ကြောင်း နိုင်ငံခြားရေးဝန်ကြီးဌာနက ဖော်ပြခဲ့သည်။ “အာဆီယံဥက္ကဋ္ဌအဖြစ်မလေးရှားသည် အခြားအာဆီယံအဖွဲ့ဝင်နိုင်ငံများ၊ AHA စင်တာနှင့် အပြည်ပြည်ဆိုင်ရာလူသားချင်းစာနာ ထောက်ထားမှုမိတ်ဖက်များနှင့် ပူးပေါင်းကာ အကူအညီများ အချိန်မီရောက်ရှိစေရန် ဆက်လက်ဆောင်ရွက်သွားမည်” ဟု ထုတ်ပြန်ချက်တွင် ဖော်ပြထားပါသည်။

ကိုးကား-The Sun

အိန္ဒိယနိုင်ငံ ဝန်ကြီးချုပ် နာရင်ဒရာမိုဒီသည် သီရိလင်္ကာနိုင်ငံသို့ ကာကွယ်ရေးနှင့် စွမ်းအင်ဆိုင်ရာဆက်ဆံရေးကို မြှင့်တင်ရန် အတွက်သွားရောက်ခဲ့ပါသည်။ သီရိလင်္ကာသမ္မတ အာနုရာကူမာရ ဒီဆာနာယက္က (Anura Kumara Disanayake) သည် လွန်ခဲ့သော နှစ်က ရွေးကောက်ပွဲအနိုင်ရပြီးနောက် ကျွန်းနိုင်ငံသို့ ပထမဆုံး လာရောက်သည့် နိုင်ငံခြားခေါင်းဆောင်တစ်ဦးဖြစ်ပါသည်။ သီရိလင်္ကာ၏ အင်အားကြီးနိုင်ငံအိမ်နီးချင်းနှင့် အကြီးမားဆုံးငွေချေးသူ တရုတ်နိုင်ငံနှင့် ဆက်ဆံရေးကို ချိန်ညှိနေချိန်တွင် အိန္ဒိယနိုင်ငံ ဝန်ကြီးချုပ် နာရင်ဒရာမိုဒီသည် အိန္ဒိယနိုင်ငံနှင့် သီရိလင်္ကာနိုင်ငံကြား သမိုင်းဝင်ကာကွယ်ရေးနှင့် စွမ်းအင်ဆိုင်ရာ ပူးပေါင်းမှုများ အားကောင်းလာစေရန် သီရိလင်္ကာ သို့ သွားရောက်ခဲ့ခြင်းဖြစ်ပါသည်။ သီရိလင်္ကာသမ္မတ အာနုရာကုမာရ ဒီဆာနာယက္ကသည် မတ်လ ၅ ရက် (စနေနေ့) တွင် မြို့တော်၏ လွတ်လပ်ရေးရင်ပြင်၌ ဝန်ကြီးချုပ် မိုဒီအား အနီရောင် ကော်ဇောခင်း၍ ကြိုဆိုခဲ့ပြီး သေနတ် ၁၉ ချက်ပစ်ဖောက်ကာ ဂုဏ်ပြုခဲ့ပါသည်။ ဝန်ကြီးချုပ်မိုဒီအား သီရိလင်္ကာ၏အမြင့်ဆုံးအရပ်သားဂုဏ်ထူးဆောင်ဘွဲ့ “မိတ္ထဗုဒ္ဓံ” (Mithra Vibhushan) ဘွဲ့ကို သီရိလင်္ကာသမ္မတ ဒီဆာနာယက္က က ချီးမြှင့်ခဲ့သည်။ အိန္ဒိယဝန်ကြီးချုပ် က “အဆိုပါဂုဏ်ထူးသည် ကျွန်ုပ်တစ်ဦးတည်းအတွက်သာမက အိန္ဒိယနိုင်ငံသား ၁၄၀ ကုဋေ (၁.၄ ဘီလီယံ) အတွက်ပါ သက်ဆိုင်ပါသည်” ဟု ကျေးဇူးတင်စကားပြောကြားခဲ့ပါသည်။ ကိုလံဘိုမြို့ရှိ သမ္မတရုံးမှ ထုတ်လွှင့်နေသောအခမ်းအနားတွင် ဝန်ကြီးချုပ် မိုဒီက “မိမိတို့၏ လုံခြုံရေးအကျိုးစီးပွားများ ကိုက်ညီသည်ဟု ယုံကြည်ပါသည်။ မိမိတို့၏ လုံခြုံရေးသည် အပြန်အလှန်မှီခိုပြီး ဆက်စပ်နေသည်” ဟု ပြောကြားခဲ့ပါသည်။ နှစ်နိုင်ငံသည် အိန္ဒိယတွင် သီရိလင်္ကာ စစ်မှုထမ်းများကို လေ့ကျင့်ပေးရန်နှင့် သတင်းအချက်အလက်နှင့် နည်းပညာများမျှဝေရန် ငါးနှစ်တာ ကာကွယ်ရေး ပူးပေါင်းဆောင်ရွက်မှု သဘောတူညီချက်ကိုလက်မှတ် ရေးထိုးခဲ့ကြပါသည်။ ဒေသတွင်းအင်အားကြီးနိုင်ငံသာမက ကမ္ဘာ့အင်အားကြီးနိုင်ငံအဖြစ် အိန္ဒိယ၏ မြင့်တက်လာမှုကို သီရိလင်္ကာသမ္မတ ဒီဆာနာယက္က ချီးကျူးခဲ့သည်။ “သီရိလင်္ကာပိုင်နက်ကို အိန္ဒိယနိုင်ငံ၏ လုံခြုံရေးကို ထိခိုက်စေမည့် မည်သူ့ကိုမျှ အသုံးပြုခွင့်မပြုကြောင်း ဝန်ကြီးချုပ် မိုဒီကို ကျွန်ုပ်က အတည်ပြုပြောကြားခဲ့ပါသည်” ဟု ၎င်းက ထပ်လောင်းပြောကြားခဲ့ပါသည်။ အိန္ဒိယသည် ယခင်က ကိုလံဘိုဆိပ်ကမ်းသို့ ဝင်ရောက်ခဲ့သော တရုတ်ရေငုပ်သင်္ဘောများနှင့် သုတေသနသင်္ဘောများကို ကန့်ကွက်ခဲ့ဖူး ပါသည်။ ၂၀၁၄ ခုနှစ်မှစ၍ အိန္ဒိယ၏ကန့်ကွက်မှုကြောင့် သီရိလင်္ကာသည် တရုတ်ရေငုပ်သင်္ဘောများ ဆိုက်ကပ်ခွင့်ကို ပိတ်ပင်ထားပါသည်။ ပြီးခဲ့သောနှစ်တွင် ကိုလံဘိုသည် တရုတ်သင်္ဘောများကို အိန္ဒိယအပေါ် သူလျှိုလုပ်ရန် အသုံးပြု နေသည်ဟု နယူးဒေလီ၏ စွပ်စွဲချက်များအပြီး နိုင်ငံခြားသုတေသနသင်္ဘောများကို ပိတ်ပင်ခဲ့ပါသည်။ သို့သော် အဆိုပါ ခရီးစဉ်၏အဓိကအစိတ်အပိုင်းဖြစ်သည့် အရှေ့မြောက်ပိုင်း ထရီကိုမလီခရိုင် (Trincomalee) ရှိ ဆမ်ပူရ် (Sampur) တွင် ၁၂၀ မဂ္ဂါဝပ် နေစွမ်းအင်သုံး ဓာတ်အားပေးစက်ရုံကိုစတင်လုပ်ဆောင်ခြင်းဖြစ်သည်။ အဆိုပါစီမံကိန်းကို နှစ်ပေါင်း များစွာ ရပ်တန့်ထားခဲ့သော်လည်း အိန္ဒိယ၏ပံ့ပိုးမှုဖြင့် ပူးတွဲစီမံကိန်းအဖြစ် ပြန်လည်အသက်သွင်းခဲ့သည်။ ကိုလံဘိုမှ အယ်လ်ဂျာဇီးယား (Al Jazeera) သတင်းဌာနက မီနဲလ် ဖာနန်ဒက်စ် (Minelle Fernandez) ၏ အစီရင်ခံချက်အရ သီရိလင်္ကာပိုင်နက်ရေပြင်အတွင်း ကျူးကျော်ဝင်ရောက်နေသည်ဟု စွပ်စွဲခံထားရသော တာမီးလ်နာဒူးပြည်နယ် (Tamil Nadu) မှ တံငါသည်များ၏ ပြဿနာကိုလည်း သီရိလင်္ကာသမ္မတ ဒီဆာနာယက္က က ဆွေးနွေးလိမ့်မည်ဟု သိရပါသည်။ “အိန္ဒိယငါးဖမ်းစက်လှေ ဒါဇင်ပေါင်းများစွာသည် “ပင်လယ်ကြမ်းပြင်ကိုပိုက်ကွန်နှင့်ဆွဲခြင်း” ဟု ခေါ်သော စက်ဖြင့်ပြုလုပ်သည့်စနစ်ကို အသုံးပြု၍ ငါးများကို သယ်ဆောင်သွားကြပြီးပတ်ဝန်းကျင်ကိုလည်း ဖျက်ဆီး နေကြပါသည်” ဟု ၎င်းကဆိုသည်။

ချိန်ခွင်လျှာညှိခြင်း

ဝန်ကြီးချုပ်မိုဒီ၏ခရီးစဉ်သည် ကိုလံဘိုမြို့အနေဖြင့် အိန္ဒိယနှင့် တရုတ်တို့၏ ပြိုင်ဆိုင်မှုများ ကို ကိုင်တွယ်နေစဉ်တွင် ဖြစ်ပေါ်လာသည်။ အိန္ဒိယသည် သီရိလင်္ကာတွင် တရုတ်၏ ဩဇာလွှမ်းမှုကို စိုးရိမ်နေပြီး ၎င်းကို မိမိ၏ ပထဝီ နိုင်ငံရေး ဩဇာဧရိယာအဖြစ် မှတ်ယူထားပါသည်။ ဒီဆာနာယက္က၏သမ္မတအဖြစ် ပထမဆုံးနိုင်ငံခြားခရီးစဉ်မှာ၂ဝ၂၃ခုနှစ်၊ ဒီဇင်ဘာတွင် နယူးဒေလီသို့ဖြစ်ပြီး၊ ထို့နောက် ၂ဝ၂၄ခုနှစ်၊ ဇန်နဝါရီတွင် ပေကျင်းသို့သွားရောက်ကာ သီရိလင်္ကာ၏ ဟန်ချက်ညှိမှုကို မီးမောင်းထိုးပြခဲ့ပါသည်။ တရုတ်သည် ၂၀၂၂ ခုနှစ်တွင် သီရိလင်္ကာ၏အကြွေးများကို ပြန်လည်စီမံ ပြီးနောက် နိုင်ငံ၏အကြီးမားဆုံးနှစ်နိုင်ငံ ချေးငှားသူ ဖြစ်လာခဲ့သည်။ ထိုနှစ်တွင်ပင် သီရိလင်္ကာသည် အကြီးမားဆုံး နိုင်ငံခြားရင်းနှီးမြှုပ်နှံမှုဖြစ်သော တောင်ပိုင်းရှိ ရေနံချက်စက်ရုံအတွက် တရုတ်နှင့်သဘောတူညီချက်ကို လက်မှတ် ရေးထိုးခဲ့သည်။ ဝန်ကြီးချုပ်မိုဒီသည် ထိုင်းနိုင်ငံတွင် ကျင်းပသော BIMSTEC ထိပ်သီးအစည်းအဝေးမှတစ်ဆင့် သီရိ လင်္ကာသို့ သွားရောက်ခဲ့ပြီး အိမ်နီးချင်းနိုင်ငံများနှင့် ဆက်ဆံရေးမြှင့်တင်ရန် ကြိုးပမ်းမှုများလုပ်ဆောင်ခဲ့သည်။ ထိုင်းတွင် ကျင်းပသော BIMSTEC အစည်းအဝေးပွဲတွင် ဝန်ကြီးချုပ် မိုဒီသည် မြန်မာနိုင်ငံအကြီးအကဲ ဗိုလ်ချုပ်မှူးကြီး မင်းအောင်လှိုင်နှင့် တွေ့ဆုံခဲ့ပြီး၊ ဘင်္ဂလားဒေ့ရှ်၏ယာယီခေါင်းဆောင် ယူနွတ်စ်နှင့်လည်း ဆွေးနွေးခဲ့ပါသည်။ ဝန်ကြီးချုပ် မိုဒီသည် ဧပြီ ၄ ရက်(သောကြာနေ့)တွင် ဘန်ကောက်မြို့၌ ဘူတန်မှ ဝန်ကြီးချုပ် ဆီရင် တိုဘဂေ (Tshering Tobgay) နှင့်တွေ့ဆုံခဲ့ပြီး ၎င်း၏ နီပေါလက်တွဲဖော် ကေပီ ရှာမာ အိုလီ (KP Sharma Oil) နှင့်လည်း တွေ့ဆုံခဲ့ရာ ကတ်တမန်ဒူးခေါင်းဆောင်ကို ပြီးခဲ့သောနှစ်က အာဏာပြန်ရပြီးနောက် ပထမဆုံးအကြိမ် တွေ့ဆုံခြင်းဖြစ်ပါသည်။

ကိုးကား- Aljazeera

ဘင်္ဂလားဒေ့ရှ်၏ တရုတ်နိုင်ငံသို့ ရင်းနှီးမြှုပ်နှံမှုဆိုင်ရာ ချဉ်းကပ်မှုများ သည် အိန္ဒိယ၏ မဟာဗျူဟာအရ အရေးပါသော "ကြက်လည်ပင်းကြိုး" (Siliguri Corridor) ၏ လုံခြုံရေးကို စိုးရိမ်စရာ ဖြစ်စေသည်။ 

Siliguri Corridor သည် အနောက်ဘင်္ဂလားပြည်နယ်ရှိ ကျဉ်းမြောင်း သော မြေပြင်အစိတ်အပိုင်းဖြစ်ပြီး အိန္ဒိယအရှေ့မြောက်ပြည်နယ်များကို ကျန်အိန္ဒိယနှင့် ဆက်သွယ်ပေးထားကာ နီပေါ၊ ဘူတန်နှင့် ဘင်္ဂလားဒေ့ရှ် တို့နှင့် နယ်နိမိတ်ချင်းထိစပ်နေသည်။ 

ဘင်္ဂလားဒေ့ရှ်သည် တရုတ်၏ Belt and Road Initiative (BRI) စီမံကိန်းများတွင် ပါဝင်လာမှုနှင့်အတူ အဆိုပါဒေသတွင် တရုတ်၏ ဩဇာလွှမ်းမှုများ မြင့်တက်လာခြင်းကို အိန္ဒိယက စောင့်ကြည့်လျက် ရှိသည်။ 

အိန္ဒိယသည် အဆိုပါအရေးပါသော ချိုင့်ဝှမ်းကို ကာကွယ်ရန် Rafale တိုက်လေယာဉ်များ၊ BrahMos ဒုံးပျံများနှင့် S-400 လေကာစနစ်များ တပ်ဆင်ထားပြီး စစ်ရေးအဆင့်မြှင့်တင်မှုများ ပြုလုပ်ထားသည်။ 

“ကြက်လည်ပင်းကြိုး” သည် အိန္ဒိယ၏ အားနည်းချက်မဟုတ်ဘဲ ၎င်း၏ စစ်ရေးအားအကြီးဆုံးဒေသ တစ်ခုအဖြစ် အိန္ဒိယစစ်တပ်က သတ်မှတ် ထားပါသည်။ 

ဘင်္ဂလားဒေ့ရှ်-တရုတ် ပူးပေါင်းမှုသည် အဆိုပါဒေသ၏ မဟာဗျူဟာ မြောက်အခြေအနေကို ပိုမိုရှုပ်ထွေးစေနိုင်သည်ဟု လုံခြုံရေးပညာရှင်များ က သုံးသပ်ထားပါသည်။

ကိုးကား- India today

ဘင်္ဂလားဒေ့ရှ်၏ ယာယီအစိုးရခေါင်းဆောင် မိုဟာမက် ယူနွတ်စ် သည် အိန္ဒိယ၏ မဟာဗျူဟာမြောက် အကျိုးသက်ရောက်မှုမှ ရုန်းထွက်ရန် “လာမိုနီရဟတ် (Lalmonirhat)” တွင် တရုတ်နိုင်ငံအား လေတပ်စခန်း တည်ဆောက်ရန် တရားဝင်အဆိုပြုလိုက်ခြင်းသည် စိန်ခေါ်မှု တစ်ရပ် အဖြစ် ရှုမြင်ခံနေရသည်။ 

“မိမိတို့ (ဘင်္ဂလားဒေ့ရှ်) သည် အဆိုပါဒေသတစ်ခုလုံး၊ အထူးသဖြင့် အိန္ဒိယအရှေ့မြောက်ဒေသအတွက် သမုဒ္ဒရာ၏ တစ်ခုတည်းသော စောင့်ရှောက်သူများဖြစ်သည်” ဟု ယူနွတ်စ်ပြောကြားရင်း “၎င်းသည် တရုတ်အတွက် အခွင့်အလမ်းကြီးများကို ဖန်တီးပေးပြီး ၎င်းတို့ ထုတ်ကုန် များကို ကမ္ဘာတစ်ဝှမ်းသို့ တင်ပို့နိုင်မည်” ဟု ထပ်လောင်း ဖွင့်ဟခဲ့ ပါသည်။ 

အဆိုပါစီမံကိန်းအား တရုတ်ဘက်မှ စတင်ဆောင်ရွက်ရန် သဘောတူ ထားပြီး ပါကစ္စတန်ကုမ္ပဏီတစ်ခုက လက်အောက်ခံလုပ်ငန်းရှင်အဖြစ် ပါဝင်မည်ဟု သိရှိရပါသည်။ လုပ်ငန်းစဉ်ကို အောက်တိုဘာလတွင် စတင်နိုင်ကြောင်း သတင်းအရင်းအမြစ်များက အတည်ပြုထားပါသည်။ 

ပါကစ္စတန်-ဘင်္ဂလားဒေ့ရှ် သံတမန်ဆက်ဆံရေး တိုးမြှင့် 

အဆိုပါဖြစ်စဉ်နှင့်အတူ ပါကစ္စတန်၏ နိုင်ငံခြားရေးဝန်ကြီး အစ်ရှာဒါ သည် ဧပြီ ၂၄ ရက်တွင် ဘင်္ဂလားဒေ့ရှ်သို့ လာရောက်မည်ဖြစ်ပြီး၊ နိုင်ငံခြားရေးအတွင်းဝန် အာမ်နာ ဘလို့ချ် ကလည်း တစ်ပတ်စောပြီး လည်ပတ်မည်ဟု သိရှိရပါသည်။ 

အစွန်းရောက်မှုစိုးရိမ်ချက်များ  

၂၀၂၄ ခုနှစ်၊ ဩဂုတ်လ ၅ ရက်က အာဏာသိမ်းပြီးနောက် ဘင်္ဂလားဒေ့ရှ် တွင် ရာဒီကယ်အစွန်းရောက်အဖွဲ့များ အားကောင်းလာမှုကို စိုးရိမ်မှုများ ရှိနေသည်။ ယူနွတ်စ် အစိုးရအား အစ္စလာမ်မစ်အဖွဲ့များ၏ ဩဇာ လွှမ်းမိုးမှုအောက်တွင် အစွန်းရောက်အယူအဆများကို သည်းခံသည်ဟု စွပ်စွဲခံနေရသည်။ 

ကိုးကား - GG political

ပေးပို့သည့်ရက်စွဲ- ဧပြီလ ၄ ရက်

NATO စစ်လေယာဉ်များသည် မတ်လအတွင်း လစ်သူယေးနီးယားနယ်စပ်၌ ရုရှားစစ်လေယာဉ်များအား ၁၂ ကြိမ်အထိ လိုက်ပါစောင့်ကြပ်ခဲ့ပါသည်။ လစ်သူယေးနီးယားနိုင်ငံ Zokniai လေတပ်စခန်းတွင် အလှည့်ကျတာဝန်ထမ်းဆောင် နေသော NATO စစ်လေယာဉ်များသည် မတ်လအတွင်း ဘောလ်တစ်နိုင်ငံ၏လေပိုင်နက် နယ်နိမိတ်အနီးတွင် ရုရှားစစ်လေယာဉ်များအား ၁၂ ကြိမ် စောင့်ကြပ်လိုက်ပါခဲ့ကြောင်း လစ်သူယေးနီးယားကာကွယ်ရေးဝန်ကြီးဌာနက ကြေညာခဲ့ပါသည်။ လစ်သူယေးနီးယား ကာကွယ်ရေးဝန်ကြီးဌာန၏ဖော်ပြချက်အရ၊ ၎င်းတို့သည် တစ်ပတ်လျှင် ၃ ကြိမ်မှ ၅ ကြိမ်အထိ လေကြောင်းထိန်းသိမ်းမှုများ ပြုလုပ်ခဲ့ပါသည်။ ၂၀၂၄ ခုနှစ်၊ ဇူလိုင်လ ၃၀ ရက်မှစတင်၍ အီတလီ လေတပ်၏ Eurofighter Typhoon စစ်လေယာဉ် ၄ စင်းနှင့် ပြင်သစ်၏ Rafale လေယာဉ် ၄ စင်း ပါဝင်သော တပ်ဖွဲ့များကို လစ်သူယေးနီးယားလေတပ်စခန်းတွင် အလှည့်ကျတပ်စွဲထားခဲ့သည်။ မတ်လ ၃၁ ရက်တွင် F-16 Fighting Falcon လေယာဉ် ၈ စင်းပါဝင်သော ပိုလန်နှင့် ရိုမေးနီးယား လေတပ်များက အဆိုပါတာဝန်ကို လွှဲပြောင်း ယူခဲ့ပါသည်။ ယခုနှစ် ဇန်နဝါရီလတွင် NATO တပ်ဖွဲ့များသည် ဘောလ်တစ်နိုင်ငံများ၏လေပိုင်နက်တွင် ထိုသို့ ထိန်းသိမ်းမှုကို ၁၁ ကြိမ်၊ ဖေဖော်ဝါရီလတွင် ၉ ကြိမ် ပြုလုပ်ခဲ့ပါသည်။ ရုရှားကာကွယ်ရေးဝန်ကြီးဌာနက ကယ်လီနင် ဂရက်ဒေသသို့ ရုရှားစစ်လေယာဉ်များ ပျံသန်းမှုသည် အပြည်ပြည်ဆိုင်ရာ လေပိုင်နက်စည်းမျဉ်းများနှင့်အညီ ကြားခံ ရေပြင်ပေါ်မှသာ ပြုလုပ်ကြောင်း မကြာခဏ ထုတ်ဖော်ပြောကြားခဲ့ပါသည်။

ကိုးကား-TASS

ရုရှားသည် ဥရောပ-အာရှ (ယူရေးရှား) လုံခြုံရေးစနစ်တည်ဆောက်ရာတွင် အာဆီယံ၊ SCO၊ BRICS နှင့် CSTO အဖွဲ့ဝင်နိုင်ငံများနှင့် ဆက်လက်ပူးပေါင်းဆောင်ရွက်သွားမည်ဟု ရုရှားနိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မာရီယာဇာခါရိုဗာက ကြေညာခဲ့ပါသည်။ “ယူရေးရှားလုံခြုံရေးစနစ်ပုံစံဖော်ရာတွင် ရုရှားသည် တိုက်ကြီးအတွင်းရှိ ပါဝင်နိုင်သည့် နိုင်ငံအားလုံးနှင့် ဆွေးနွေးမှုများကို တိုးချဲ့သွားမည်” ဟု ၎င်းက ပြောကြားခဲ့သည်။ “ရုရှားဖက်ဒရေးရှင်း သည် အိမ်နီးချင်းနိုင်ငံများ၊ အခြားမိတ်ဖက်များနှင့် နှစ်နိုင်ငံချင်းဆွေးနွေးမှုများအပြင် CSTO၊ CIS၊ SCO၊ အာဆီယံနှင့် GCC ကဲ့သို့သော ရုရှားပါဝင်သည့် အဖွဲ့အစည်းများတွင်လည်း ဆွေးနွေးသွားမည်” ဟု ၎င်းက ထပ်လောင်း ပြောကြား ခဲ့ပါသည်။ ရုရှားဘက်မှ SCO ကဲ့သို့သော ဘက်စုံအဖွဲ့အစည်းများ၏ ပလက်ဖောင်းများတွင် ယူရေးရှားတွင် တည်ရှိသော BRICS အဖွဲ့ဝင်နိုင်ငံများနှင့် လုံခြုံရေးစနစ်အသစ်တည်ဆောက်ရန် ဆွေးနွေးနေကြောင်း ဇာခါရိုဗာက ထောက်ပြခဲ့ သည်။ “ယူရေးရှားတွင် လုံခြုံရေးစနစ်အသစ်၏ မူဘောင်များ သတ်မှတ်ပြီးပါက ကမ္ဘာ၏ အခြားဒေသများမှ BRICS မိတ်ဖက်များအား ၎င်း၏တည်ဆောက်မှုအတွေ့အကြုံများကို ဆွေးနွေးရန် အဆင်သင့်ဖြစ်လာမည်” ဟု ၎င်းက ဖြည့်စွက်ပြောကြားခဲ့သည်။ ရုရှားသည်မဟာမိတ်ဆန့်ကျင်ရေးမူဝါဒများနှင့် အုပ်စုလိုက်တွေးခေါ်မှုများကို စွန့်လွှတ် ပါက ဥရောပဘက်မှနိုင်ငံများကို အဆိုပါတိုက်ကြီးဆိုင်ရာပူးပေါင်းမှုလုပ်ငန်းစဉ်တွင်ဝမ်းပန်းတသာ ပါဝင်စေလိုကြောင်း ရုရှားနိုင်ငံခြားရေးဝန်ကြီးဌာန၏ပြောရေးဆိုခွင့်ရှိသူက ထည့်သွင်း ပြောကြားခဲ့ပါသည်။

ကိုးကား-TASS

ရုရှားနိုင်ငံအတွင်းရှိ အသက် ၁၈ နှစ်မှ ၃၀ နှစ်အတွင်းရှိ နိုင်ငံသားများအား ၂၀၂၅ ခုနှစ် ဧပြီလမှ ဇူလိုင်လအထိ ဥပဒေအရ စစ်မှုထမ်းစေမည့် ကြေညာချက်တစ်ရပ်ကို သမ္မတဗလာဒီမာပူတင်က   လက်မှတ်ရေးထိုးခဲ့ကြောင်း မတ်လ ၃၁ ရက်တွင် ထုတ်ပြန်သည့် အစိုးရ၏ ကြေညာချက်တွင် ဖော်ပြထားသည်။

ယခုပြဋ္ဌာန်းလိုက်သည့် စစ်မှုထမ်းရေး ကြေညာချက်အရ အသက်ပြည့်မီပြီး အရန်တပ်ဖွဲ့ဝင်မဟုတ်သော ရုရှားနိုင်ငံသားများအနေဖြင့် ယခုနှစ် ဧပြီလ ၁ ရက်မှ ဇူလိုင်လ ၁၅ ရက်အထိ စစ်မှုထမ်းရမည်ဖြစ်ကြောင်း   သမ္မတ ပူတင်၏     ကြေညာချက်တွင် ဖော်ပြထားသည်။

ရုရှားအစိုးရ၏ အဆိုပါကြေညာချက်အရ စစ်မှုထမ်းအသက်ပြည့်မီသည့် ရုရှားနိုင်ငံသား  ၁၆၀,၀၀၀ ခန့်မှာ ဥပဒေအရ စစ်မှုထမ်းရမည်ဖြစ်ကြောင်း သိရသည်။

ထို့ပြင်  စစ်မှုထမ်းသက်တမ်း ပြည့်မြောက်သွားသည့် စစ်သည်များ၊ ရေတပ်မှ တပ်ဖွဲ့ဝင်များအား ဥပဒေအရ စစ်မှုထမ်းခြင်းမှ နုတ်ထွက်စေမည်ဖြစ်သည်။

ရုရှားနိုင်ငံ၏ ဥပဒေအရ   နိုင်ငံသားများအား  စစ်မှုထမ်းဆောင်စေမည့် ပြဋ္ဌာန်းချက်အား  ပိုမိုကောင်းမွန်လာစေရန်အတွက်  ပြင်ဆင်ချက်များကို ရုရှား ဒူးမားလွှတ်တော်က ယခုနှစ်  မတ်လ ၁၅ ရက်တွင် အတည်ပြုခဲ့ခြင်း ဖြစ်ကြောင်း သိရသည်။

Source: https://myawady.net.mm/

ပင်တဂွန်စစ်ဌာနချုပ်သည် အာရှ-ပစိဖိတ်ဒေသနှင့် တရုတ်ကို အမေရိကန် စစ်တပ်၏ ထိပ်တန်းဦးစားပေးအဖြစ် သတ်မှတ်ထားပါသည်။ အမေရိကန်သမ္မတ ဒေါ်နယ်ထရမ့်မှကာကွယ်ရေးဦးစီးချုပ်များ ကော်မတီဥက္ကဋ္ဌရာထူးအတွက်အမည်စာရင်း တင်သွင်းခံရသူ ဒန်ကိန်း(Dan Kaine) က “အိန္ဒိယနှင့် ပစိဖိတ်သမုဒ္ဒရာ ဒေသများရှိ အမေရိကန် အကျိုးစီးပွားများကို တရုတ်ပြည်ကြီးက ခြိမ်းခြောက်နေမှုသည်အမှန်တကယ်ဖြစ်ပြီး တိုးပွားလျက်ရှိသည်” ဟု ယုံကြည်ကြောင်း ဖော်ပြခဲ့ပါသည်။ အမေရိကန်စစ်တပ်၏ အမြင့်ဆုံးဦးစားပေးမှုမှာ အာရှ-ပစိဖိတ်ဒေသနှင့် တရုတ်ကို ထိန်းချုပ်ရန်ဖြစ်ကြောင်း အမေရိကန်သမ္မတဒေါ်နယ်ထရမ့်မှ ကာကွယ်ရေးဦးစီးချုပ်များကော်မတီ ဥက္ကဋ္ဌအဖြစ် အဆိုပြု ထားသော ဒန်ကိန်းက ထုတ်ဖော်ပြောကြားခဲ့ပါသည်။ ကိန်း၏အဆိုအရ “တရုတ်၏ခြိမ်းခြောက်မှုသည် အမေရိကန်၏ အကျိုးစီးပွားများကို အန္တရာယ်ပြုနေပြီး ပိုမိုဆိုးရွားလာနေသည်” ဟု ဆိုပါသည်။ အမေရိကန်သည် ထိုဒေသတွင် တရုတ်၏စစ်ရေးစူးရှမှုကို ထိန်းချုပ်ရန် မဟာမိတ်များနှင့် မိတ်ဖက်များနှင့် ပူးပေါင်းဆောင်ရွက်ရမည်” ဟု ၎င်းက ယုံကြည်နေပါသည်။ ထို့ပြင် အမေရိကန်၏ စစ်ထောက်ခံမှုစက်မှုလုပ်ငန်းများ၏လက်ရှိလုပ်ဆောင်မှုများကိုဝေဖန်ခဲ့ပြီး ယခုခေတ်၏ လိုအပ်ချက်များနှင့် မကိုက်ညီ ဟု ၎င်းက ထောက်ပြခဲ့ပါသည်။ ဒန်ကိန်းသည် ၂၀၂၄ ခုနှစ်၊ ဒီဇင်ဘာတွင် ဒုတိယဗိုလ်ချုပ်ကြီးရာထူးဖြင့် အမေရိကန် လေတပ်မှ အငြိမ်းစားယူခဲ့သည်။ အမေရိကန်ဥပဒေအရ ကာကွယ်ရေး ဦးစီးချုပ်များကော်မတီဥက္ကဋ္ဌရာထူးကို စတားလေးပွင့်ရှိသော ဗိုလ်ချုပ်ကြီးများသာ ထမ်းဆောင်နိုင်သော်လည်း အမေရိကန်သမ္မတသည် အထူးအခြေအနေများတွင် ထိုစည်းမျဉ်းကို ပယ်ဖျက်ပိုင်ခွင့်ရှိသည်။ အကယ်၍ ဆီးနိတ်က ၎င်း၏ခန့်အပ်မှုကို အတည်ပြုပါက ကိန်းသည် စစ်မှုထမ်းဘဝသို့ ပြန်လည်ဝင်ရောက်ပြီး အလိုအလျောက် စတား လေးပွင့်ဗိုလ်ချုပ်ကြီးဖြစ်လာမည်ဖြစ်ပါသည်။

ကိုးကား-TASS