၂၀၂၅ ခုနှစ် Times Higher Education (THE)၏ ဖော်ပြချက်အရ တရုတ်နိုင်ငံရှိ ထိပ်တန်းတက္ကသိုလ်များသည် နိုင်ငံတကာ ကျောင်းသားများထံမှ တစ်နှစ်လျှင် အမေရိကန်ဒေါ်လာ ၂၈,၀၀၀ အထိ ကောက်ခံ နေကြောင်း သိရသည်။

၂၀၂၅ ခုနှစ် ကမ္ဘာ့တက္ကသိုလ်အဆင့်သတ်မှတ်ချက်အရ တရုတ်နိုင်ငံရှိ တက္ကသိုလ်များအနက် Tsinghua တက္ကသိုလ်သည် ကမ္ဘာ့အဆင့် ၁၂ နေရာတွင် ရပ်တည်လျက် ထိပ်ဆုံးမှ ဦးဆောင်နေသည်။၎င်းနောက်တွင် Peking တက္ကသိုလ် (ကမ္ဘာ့အဆင့် ၁၃) ၊ University of Hong Kong (ကမ္ဘာ့အဆင့် ၃၅) နှင့် Fudan တက္ကသိုလ် (ကမ္ဘာ့အဆင့် ၃၆) တို့က အသီးသီး ရပ်တည်နေကြသည်။

THE ၏ စာရင်းဇယားများအရ နိုင်ငံတကာကျောင်းသားများသည် ထိုကျောင်းများရှိ ကျောင်းသားစုစုပေါင်း၏ ၄% မှ ၂၀% အထိ ရှိကြောင်း ဖော်ပြထားသည်။ တရုတ်ပြည်မကြီးရှိ တက္ကသိုလ်များတွင် နိုင်ငံတကာ ကျောင်းသားများအတွက် နှစ်စဉ်ကျောင်းစရိတ် အမေရိကန်ဒေါ်လာ ၁၆,၀၀၀ အထိ ရှိနိုင်ပြီး၊ ဟောင်ကောင်ရှိ တက္ကသိုလ်များတွင် နှစ်စဉ် အမေရိကန်ဒေါ်လာ ၂၈,၀၀၀ အထိ ပေးဆောင်ရနိုင်ကြောင်း သိရသည်။ အစားအသောက်နှင့် နေထိုင်စရိတ်များမှာ တစ်လလျှင် အမေရိကန် ဒေါ်လာ ၅၅၀ မှ ၁,၀၀၀ အထိ ကုန်ကျနိုင်သည်။

၂၀၂၁ ခုနှစ်အထိ တရုတ်နိုင်ငံတွင် နိုင်ငံတကာကျောင်းသား စုစုပေါင်း ၂၅၅,၇၀၀ ခန့် ရှိပြီး၊ ၎င်းတို့အနက် ၂၇,၀၀၀ မှာ ဗီယက်နမ်နိုင်ငံသားများဖြစ်ကြောင်း သိရသည်။

အဆင့်မြင့်ပညာရေးဆိုင်ရာ သုတေသီအဖွဲ့ Quacquarelli Symonds (QS) ၏ အဆိုအရ တရုတ်နိုင်ငံတွင် ပညာသင်ကြားရန် နိုင်ငံတကာ ကျောင်းသားများ ဆုံးဖြတ်ရာတွင် ထည့်သွင်းစဉ်းစားသည့် အကြောင်းအရာများမှာ ပညာသင်ဆုများ တိုးမြှင့်ပေးခြင်း၊ တရုတ်တက္ကသိုလ်များ၏ အဆင့်သတ်မှတ်ချက် မြင့်တက်လာခြင်းနှင့် ကမ္ဘာပေါ်တွင် အပြောအများဆုံး ဘာသာစကားများထဲမှ တစ်ခုဖြစ်သည့် တရုတ်ဘာသာစကားကို သင်ယူနိုင်သည့် အခွင့်အလမ်းများ ပါဝင်ကြောင်း သိရသည်။

ကိုးကား-VN Express

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ရန်ကုန်   ဖေဖော်ဝါရီ ၂၆

နီပေါနိုင်ငံက အိမ်ရှင်အဖြစ်လက်ခံကျင်းပလျက်ရှိသည့် နီပေါဖိတ်ခေါ်ဖလားပြိုင်ပွဲ ဗိုလ်လုပွဲစဉ်အဖြစ် ယနေ့မြန်မာစံတော်ချိန် ည ၆ နာရီ ၄၅ မိနစ်တွင် မြန်မာအမျိုးသမီးအသင်းနှင့် နီပေါအမျိုးသမီးအသင်းတို့ကစားခဲ့ရာ မြန်မာအမျိုးသမီးအသင်းက နှစ်ဂိုး ဂိုးမရှိဖြင့် အနိုင်ရရှိခဲ့ပြီး ချန်ပီယံဆုဆွတ်ခူးနိုင်ခဲ့ကြောင်း သိရသည်။

အဆိုပါပြိုင်ပွဲတွင် အိမ်ရှင် နီပေါအမျိုးသမီးအသင်းနှင့်အတူ မြန်မာအမျိုးသမီးအသင်း၊ လက်ဘနွန်အမျိုးသမီးအသင်းနှင့် ကာဂျစ်စတန်အမျိုးသမီးအသင်း စသည့် အသင်းလေးသင်းဖြင့် ကျင်းပခဲ့ခြင်းဖြစ်သည်။

အဆိုပါပွဲစဉ်တွင် ပွဲစကတည်းက နှစ်သင်းစလုံးအပြန်အလှန် ဖိအားပေးမှုများဖြင့် အကြိတ်အနယ်ရှိခဲ့သော်လည်း ဂိုးသွင်းယူနိုင်ခြင်းမရှိခဲ့သည့်အတွက် ပထမပိုင်းတွင် ဂိုးမရှိသရေရလဒ်ထွက်ပေါ်ခဲ့သော်လည်း ဒုတိယပိုင်းပြန်လည်စတင်ချိန်တွင် မြန်မာအမျိုးသမီးအသင်းက ပိုမိုတိုက်စစ်ဆင် ဖိအားပေးကစားခဲ့ရာမှ ပွဲချိန် ၆၁ မိနစ်တွင် ရူပါခိုင်ကလည်းကောင်း၊ ပွဲချိန် ၆၃ မိနစ်တွင် ဝင်းသိင်္ဂီထွန်းကလည်းကောင်း မြန်မာအမျိုးသမီးအသင်းအတွက် ဦးဆောင်ဂိုးများသွင်းယူပေးနိုင်ခဲ့သောကြောင့် ပွဲပြီးဆုံးချိန်တွင် မြန်မာအမျိုးသမီးအသင်းက နှစ်ဂိုး ဂိုးမရှိဖြင့် အနိုင်ရရှိခဲ့ပြီး ချန်ပီယံဆု ဆွတ်ခူးနိုင်ခဲ့သည်။

မြန်မာအမျိုးသမီအသင်းသည် အုပ်စုပွဲစဉ်များကစားခဲ့ရာ လက်ဘနွန်အမျိုးသမီးအသင်းကို သုံးဂိုးတစ်ဂိုး၊ ကာဂျစ်စတန် အမျိုးသမီးအသင်းကို ငါးဂိုး ဂိုးမရှိဖြင့် အနိုင်ရရှိခဲ့ပြီး နီပေါအသင်းနှင့်ပွဲစဉ်တွင် နှစ်ဂိုးစီသရေရလဒ် ထွက်ပေါ်ခဲ့သော်လည်း ဗိုလ်လုပွဲစဉ်တွင် နီပေါအမျိုးသမီးအသင်းကို နှစ်ဂိုး ဂိုးမရှိဖြင့် အနိုင်ရရှိခဲ့ပြီး ချန်ပီယံဆု ဆွတ်ခူးနိုင်ခဲ့ခြင်း ဖြစ်ကြောင်း သိရသည်။ 

STA

Source: ရတနာပုံသတင်းစာ

နယူးယောက်  ဖေဖော်ဝါရီ ၂၆

လေ့ကျင့်ခန်း ပုံမှန်ပြုလုပ်မှုသည် အူမကြီးကင်ဆာရောဂါလူနာများ အသက်ရှည်ရှည်နေနိုင်ရေးအတွက် အထောက်အကူပြုနိုင်ကြောင်း သုတေသနပညာရှင်များက ဖေဖော်ဝါရီ ၂၅ ရက်တွင် ပြောကြားသည်။

အမေရိကန်သုတေသနပညာရှင်များ၏ လေ့လာတွေ့ရှိချက်အရ လေ့ကျင့်ခန်းတက်တက်ကြွကြွပြုလုပ်သူ အူမကြီးကင်ဆာလူနာများသည် လေ့ကျင့်ခန်း မပြုလုပ်သူလူနာများထက် သုံးနှစ်ထိ အသက်ပိုရှည်ကြောင်း သိရသည်။

အမေရိကန်သုတေသနပညာရှင်များသည် အူမကြီးကင်ဆာလူနာဦးရေ ၂၉၀၀ ခန့်တို့၏ လေ့ကျင့်ခန်းပြုလုပ်မှုအဆင့်များကို လေ့လာခဲ့ကြသည်။

လေ့လာချက်မှ ထွက်ပေါ်သည့်ရလဒ်များအရ သီတင်းတစ်ပတ်လျှင် ၁၈ နာရီထိ လေ့ကျင့်ခန်းပြုလုပ်သူ အူမကြီးကင်ဆာလူနာများသည် အသက်သုံးနှစ်ထိ ထပ်မံရှင်သန်ခွင့်ရနိုင်ခြေ မြင့်မားလာတတ်သည်ကို တွေ့ရကြောင်း အမေရိကန် သုတေသနပညာရှင်များက ပြောကြားသည်။

လေ့ကျင့်ခန်းကို တက်ကြွစွာပြုလုပ်မှုသည် အူမကြီးကင်ဆာလူနာများ၏ အသက်ရှင်နိုင်ခွင့်နှုန်းအပေါ် အကျိုးသက်ရောက်မှုရှိနေကြောင်း အမေရိကန်သုတေသနပညာရှင်များက သုံးသပ်ထားသည်။

သို့ဖြစ်ရာ အူမကြီးကင်ဆာလူနာများအနေဖြင့် လေ့ကျင့်ခန်းတက်တက်ကြွကြွပြုလုပ်ပေးရန် လိုအပ်ကြောင်း သုတေသနပညာရှင်များက တိုက်တွန်းထားသည်။

Source: ရတနာပုံသတင်းစာ

တောင်တွင်းကြီး ဖေဖော်ဝါရီ ၂၅ 

မကွေးတိုင်းဒေသကြီး၊ တောင်တွင်းကြီးမြို့နယ်၏ အနောက်ဘက် ၁၂ မိုင်ခန့် အကွာ ကမ္ဘာ့အမွေအနှစ်စာရင်းဝင် ဗိဿနိုး ရှေးဟောင်းယဉ်ကျေးမှုနယ်မြေရှိ ဗိဿနိုး ရှေးဟောင်းသုတေသနပြတိုက်ကို ပုံမှန် ဖွင့်လှစ်လျက် ရှိကြောင်း သိရသည်။ ထိုပြတိုက်ကို၂၀၀၄ ခုနှစ်၊ ဇူလိုင်လ ၁၂ ရက်တွင် ပန္နက်တင်ဆောက်လုပ်ပြီး ၂၀၀၇ ခုနှစ်၊ နိုဝင်ဘာလ ၃၀ ရက်တွင် ဆောက်လုပ်ပြီးစီး ခဲ့ပြီး ၂၀၀၈ ခုနှစ် စက်တင်ဘာလ ၁ ရက် တွင် အများပြည်သူ ဝင်ရောက်လေ့လာ နိုင်ရန် စတင်ဖွင့်လှစ်ပြသခဲ့ခြင်းဖြစ်သည်။

အဆိုပါဗိဿနိုးရှေးဟောင်းသုတေသန ပြတိုက်အတွင်း၌ ကျောက်ခေတ်၊ သံခေတ်၊ ကြေးခေတ်ပြကွက်များ၊ ကျောက်ဖြစ် ရုပ်ကြွင်းပြကွက်များ၊ ဓလေ့ရိုးရာနေအိမ် ပုံစံငယ်၊ ဗိဿနိုးမြို့ဟောင်းမြေပုံ၊ ဗိဿနိုး မြို့ဟောင်းသမိုင်းအကျဉ်း၊ ပျူတို့၏ ထင်ရှားသောအမှတ်လက္ခဏာများ၊ ဗိဿနိုး မြို့ဟောင်းဝန်းကျင်ဒေသရှိ သမိုင်းမတင်မီ ခေတ်အထောက်အထားများ၊ ဗိဿနိုးမြို့ဟောင်းမှ တူးဖော်တွေ့ရှိရသော စာပေဆိုင်ရာ အထောက်အထားများ၊ ပျူစာပေ အရေးအသား၊ ပျူခေတ်အုတ်များ၊ ရေစင် တော်သွန်းအိုး၊ ကြေးဗုဒ္ဓဆင်းတု၊ ငှက် ရုပ်ပုံအရိုးအိုး၊ အရိုးအိုးမြှုပ်နှံမှုဆိုင်ရာ အဆောက်အအုံပုံစံငယ်၊ တော်ဝင်ဗိသုကာ အထောက်အထားများ၊ မြို့ရိုးနှင့် အရန် အတား(ပုံစံငယ်)၊ သပိတ်ပုံအရိုးအိုး၊ ပျူဒင်္ဂါးများ၊ ပျူပုတီးစေ့များ စသည့်တူးဖော်တွေ့ရှိမှု သမိုင်းဆိုင်ရာ အထောက်အထား များကို စိတ်ဝင်စားဖွယ်ရာ ခင်းကျင်းပြသထားသည်။

နောင်နောင်(ဗိဿနိုးမြေ)

Source: Myawady Daily Newspaper

တောင်ကိုရီးယားနိုင်ငံတွင် ကျောင်းနေအရွယ်လူဦးရေ  ဆက်လက်ကျဆင်းလာမှုကြောင့် ပြည်နယ်နှင့် မြို့ကြီး ၁၇ ခုရှိ စာသင်ကျောင်း စုစုပေါင်း ၄၉ ကျောင်းကို ပိတ်ပစ်ခဲ့ရကြောင်း Korea Herald နေ့စဉ်သတင်းစာတွင် ဖော်ပြသည်။

ကျောင်းနေအရွယ်လူဦးရေ မလုံလောက်မှုကြောင့် ပိတ်ပစ်ခဲ့ရသည့် စာသင်ကျောင်း အရေအတွက်မှာ ၂၀၂၃ ခုနှစ်တွင် ၂၂ ကျောင်း၊ ၂၀၂၄ ခုနှစ်တွင် ၃၃ ကျောင်းရှိခဲ့သော်လည်း  ယခုနှစ်တွင် ၄၉ ကျောင်းအထိ မြင့်တက်လာခြင်းဖြစ်သည်။ ပိတ်ပစ်ခဲ့ရသောကျောင်းများတွင် မူလတန်းကျောင်း၊ အလယ်တန်းနှင့် အထက်တန်းကျောင်းများ ပါဝင်ကြောင်း အစိုးရကထုတ်ပြန်သည့် အချက်အလက်များအရ သိရသည်။

ထို့ပြင် ယခုနှစ်အကုန်ပိုင်းတွင် ကျေးလက်ဒေသရှိ  စာသင်ကျောင်းများအနက် ၈၈ ရာခိုင်နှုန်းကို ပိတ်ပစ်ရန် စီစဉ်ထားကြောင်း ပညာရေးဝန်ကြီးဌာနက  ထုတ်ပြန်ထားသည်။

ဆိုးမြို့တော်ရှိ စာသင်ကျောင်းများကို ပိတ်ပစ်မည်မဟုတ်သော်လည်း  ၎င်းမြို့အနီးရှိ ဂွန်ဂျီးပြည်နယ်တွင် စာသင်ကျောင်း ခြောက်ကျောင်းမှာ ပိတ်ခံရမည့်အခြေအနေနှင့်   ရင်ဆိုင်နေရသည်။ 

စာသင်ကျောင်းအများဆုံး  ပိတ်ပစ်ခဲ့ရသည့် ပြည်နယ်မှာ တောင်ဂျိုလာပြည်နယ်ဖြစ်ပြီး ယင်းပြည်နယ်တစ်ခုတည်းမှာပင် စာသင်ကျောင်း ၁၀ ကျောင်းမှာပိတ်ခံရမည့် အလားအလာရှိသည်။

ကျေးလက်ဒေသများရှိ   မူလတန်းကျောင်းများကို   ပိတ်ပစ်ရသည့်   အဓိကအကြောင်းရင်းမှာ  ကျောင်းတက်ရန် ကျောင်းအပ်နှံသည့် ကျောင်းသား၊   ကျောင်းသူ အသစ်များ မရှိသောကြောင့်ဖြစ်ကြောင်း သိရသည်။

Source: Myawady Web Portal

နေပြည်တော် ဖေဖော်ဝါရီ ၂၄

ကျန်းမာရေးဝန်ကြီးဌာနသည် ပြည်သူများလိုအပ်သော နိုင်ငံတကာအဆင့်မီကုသမှုများကို ပြည်တွင်း၌ လက်လှမ်းမီရရှိနိုင်ခြင်းဖြင့် ပြည်သူများဆေးကုသမှုအတွက် စိုက်ထုတ်ကုန်ကျစရိတ် သက်သာစေရေးနှင့် ပြည်သူ့ဆေးရုံများ၏ ကုသမှုအရည်အသွေး တိုးတက်စေရေးအတွက် လုပ်ငန်းစဉ်များ ချမှတ်ဆောင်ရွက်လျက်ရှိရာ မန္တလေးပြည်သူ့ဆေးရုံကြီး၌ (၈၃) ကြိမ်မြောက် ကျောက်ကပ်အစားထိုးခွဲစိတ်ကုသမှုကို ဖေဖော်ဝါရီ ၂၀ ရက်က အောင်မြင်စွာဆောင်ရွက်နိုင်ခဲ့သည်။

အဆိုပါကျောက်ကပ်အစားထိုး ခွဲစိတ်ကုသမှုတွင် မန္တလေးတိုင်းဒေသကြီး ပြည်ကြီးတံခွန်မြို့နယ်တွင် နေထိုင်သူ အသက် (၂၆) နှစ် ရှိ အမျိုးသားလူနာနှင့် ဇနီးဖြစ်သူ အသက် (၂၆) နှစ် ကျောက်ကပ် အလှူရှင်တို့အား ခွဲစိတ်ကုသခဲ့ခြင်းဖြစ်ပြီး ခွဲစိတ်ကုသမှုကို ဖေဖော်ဝါရီ ၂၀ ရက် နံနက် ၉ နာရီ ၂၂ မိနစ်တွင် စတင်ဆောင်ရွက်ခဲ့ကာ မွန်းလွဲ ၂ နာရီ ၄၅ မိနစ်တွင် ဆောင်ရွက်ပြီးစီးသည်။

ကျောက်ကပ်အစားထိုးခွဲစိတ် ကုသမှုဆောင်ရွက်ခဲ့သော လူနာနှင့်ကျောက်ကပ်အလှူရှင်တို့၏ ခွဲစိတ်ပြီး ကျန်းမာရေးအခြေအနေမှာ ကောင်းမွန်လျက်ရှိပြီး ဘာသာရပ်ဆိုင်ရာ ပါမောက္ခ/ အထူးကု ဆရာဝန်ကြီးများ၊ ကျွမ်းကျင်သူနာပြုများက လိုအပ်သော ပြုစုကုသမှုများကို အနီးကပ်ဆက်လက် ဆောင်ရွက်ပေးလျက်ရှိသည်။

အဆိုပါကျောက်ကပ်အစားထိုး ခွဲစိတ်ကုသမှုကို ပါမောက္ခ ဒေါက်တာ ကိုကိုနိုင်နှင့် ပါမောက္ခ ဒေါက်တာဝင်းဝင်းလှိုင်တို့ ဦးဆောင်သော ဆီးနှင့်ကျောက်ကပ် ဆေးကုသမှုဆိုင်ရာလုပ်ငန်းအဖွဲ့၊ ပါမောက္ခဒေါက်တာလမင်းဝင်းနှင့် ပါမောက္ခ ဒေါက်တာကျော်စိုးကျော်တို့ဦးဆောင်သော ဆီးနှင့် ကျောက်ကပ်ခွဲစိတ်မှုဆိုင်ရာလုပ်ငန်းအဖွဲ့၊ ပါမောက္ခဒေါက်တာ ဝင်းဝင်းကျော်နှင့် အထူးကု ဆရာဝန်ကြီး ဒေါက်တာသတိုးသိန်းဇံတို့ဦးဆောင်သော နှလုံးနှင့်သွေးကြောခွဲစိတ်မှုဆိုင်ရာ လုပ်ငန်းအဖွဲ့၊ ပါမောက္ခ ဒေါက်တာ မီမီသော်နှင့် ပါမောက္ခဒေါက်တာမူမူနိုင်တို့ဦးဆောင်သော မေ့ဆေးပညာဆိုင်ရာလုပ်ငန်းအဖွဲ့၊ ဆေးတက္ကသိုလ် - မန္တလေး ပါမောက္ခချုပ် ပါမောက္ခဒေါက်တာ မျိုးသက်တင်နှင့် ပါမောက္ခ ဒေါက်တာ နီလာဝင်းတို့ဦးဆောင်သော ရောဂါရှာဖွေရေးနှင့် သွေးနှင့်သွေးပစ္စည်းဆိုင်ရာ အထောက်အကူပြုလုပ်ငန်းအဖွဲ့၊ ပါမောက္ခ ဒေါက်တာသန္တာလွင် ဦးဆောင်သော ဓာတ်မှန်ပညာဆိုင်ရာလုပ်ငန်းအဖွဲ့၊ ဆေးရုံအုပ်ကြီး ဒေါက်တာဆန်းလွင်ဦးနှင့် ဆေးရုံစီမံခန့်ခွဲမှုအဖွဲ့ဝင်များ၊ သူနာပြုများအဖွဲ့၊ ကျွမ်းကျင်ဝန်ထမ်းများနှင့် အထောက်အကူပြု ဝန်ထမ်းများအားလုံး ပူးပေါင်းဆောင်ရွက်ခဲ့ကြခြင်းဖြစ်သည်။

ကျန်းမာရေးဝန်ကြီးဌာန ဒုတိယဝန်ကြီး ပါမောက္ခ ဒေါက်တာအေးထွန်းသည် ယမန်နေ့နံနက်ပိုင်းတွင် ညွှန်ကြားရေးမှူးချုပ်များ၊ ပါမောက္ခချုပ်များ၊ မန္တလေးတိုင်းဒေသကြီး ကုသရေးဦးစီးဌာနမှူးနှင့် တာဝန်ရှိသူများနှင့်အတူ မန္တလေးပြည်သူ့ဆေးရုံကြီး အထူးကြပ်မတ်ကုသဆောင်သို့သွားရောက်ကာ ကျောက်ကပ်အစားထိုးခွဲစိတ်ကုသမှုခံယူခဲ့သော လူနာနှင့် ကျောက်ကပ်အလှူရှင်တို့ကို ကြည့်ရှုအားပေးပြီး အာဟာရပြည့်လက်ဆောင် ပစ္စည်းများပေးအပ်ကာ ခွဲစိတ်ကုသမှုတွင် ပါဝင်ဆောင်ရွက်ခဲ့ကြသော ပါမောက္ခ/အထူးကု ဆရာဝန်ကြီးများကို တွေ့ဆုံနှုတ်ဆက်ဂုဏ်ပြုစကား ပြောကြားသည်။

မန္တလေးပြည်သူ့ဆေးရုံကြီး၌ ကျောက်ကပ်အစားထိုး ခွဲစိတ်ကုသမှုကို ၂၀၀၁ ခုနှစ်မှ စတင်ဆောင်ရွက်ခဲ့ပြီး ၂၀၂၀ ပြည့်နှစ် မတ်လ၌ (၈၂) ကြိမ်မြောက်အဖြစ် ကျောက်ကပ်အစားထိုး ခွဲစိတ်ကုသမှုဆောင်ရွက်ကာ ကိုဗစ်-၁၉ ကပ်ရောဂါ ဖြစ်ပွားမှုအခြေအနေများကြောင့် ယာယီရပ်နားခဲ့ရကာ ယခု (၈၃) ကြိမ်မြောက်အဖြစ် ပြန်လည်စတင်နိုင်ခဲ့ခြင်းဖြစ်သည်။ ကျောက်ကပ်အစားထိုး ခွဲစိတ်ကုသမှုများကို ပြည်သူ့ဆေးရုံများအနေဖြင့် အထူးကုဆေးရုံကြီး (ခုတင်- ၅၀၀) ရန်ကုန်၊ နေပြည်တော်ပြည်သူ့ဆေးရုံကြီး (ခုတင်-၁၀၀၀) နှင့် မန္တလေးပြည်သူ့ဆေးရုံကြီးတို့၌လည်းကောင်း၊ တပ်မတော်ဆေးရုံများအနေဖြင့် ရန်ကုန်ရှိ အမှတ် (၁) တပ်မတော်ဆေးရုံ (ခုတင်-၁၀၀၀)၊ နေပြည်တော်ရှိ အမှတ် (၂) တပ်မတော်ဆေးရုံ (ခုတင်-၁၀၀၀)၊ ပြင်ဦးလွင်ရှိ အမှတ် (၁) တပ်မတော်ဆေးရုံ (ခုတင်-၇၀၀) နှင့် အောင်ပန်းရှိ အမှတ် (၂) တပ်မတော်ဆေးရုံ (ခုတင်-၇၀၀) တို့၌လည်းကောင်း၊ ပုဂ္ဂလိကဆေးရုံများအနေဖြင့် ရန်ကုန်ရှိ ပန်းလှိုင်ဆေးရုံနှင့် ကန်သာယာဆေးရုံတို့၌လည်းကောင်း ဆောင်ရွက်ပေးလျက်ရှိကြောင်း သိရသည်။

Source: moi.gov.mm

နေပြည်တော် ဖေဖော်ဝါရီ ၂၄

မြန်မာနိုင်ငံ ဂေါက်သီးအားကစားအဖွဲ့ချုပ်မှကြီးမှူး၍ Burmese Golf (BG) မှ အဓိကကူညီပံ့ပိုးသော (President Cup) ဥက္ကဋ္ဌဖလား ဂေါက်သီးရိုက်ပြိုင်ပွဲ၏ ဝါသနာရှင်အဆင့်နှင့် သက်ကြီးတန်းဝါသနာရှင်အဆင့် ပြိုင်ပွဲများ၏ဖွင့်ပွဲကို ယနေ့နံနက်ပိုင်းက ရန်ကုန်မြို့ ရန်ကုန်ဂေါက်ကွင်း (တညင်းကုန်း) ၌ပြုလုပ်ရာ မြန်မာနိုင်ငံ ဂေါက်သီးအားကစားအဖွဲ့ချုပ် ရန်ကုန်ဂေါက်ကွင်းတို့မှ တာဝန်ရှိသူများ၊ ပြိုင်ပွဲဝင်အားကစားသမားများနှင့် ဖိတ်ကြားထားသူများ တက်ရောက်ကြသည်။

ဦးစွာ မြန်မာနိုင်ငံဂေါက်သီးအားကစားအဖွဲ့ချုပ် နာယက ဦးဝင်းလှိုင်၊ ဥက္ကဋ္ဌ ဦးကိုကိုအေး၊ ဗဟိုအလုပ်အမှုဆောင်နှင့် အထက်မြန်မာပြည် ဂေါက်သီးအားကစားဆပ်ကော်မတီ ဒုတိယဥက္ကဋ္ဌ ဦးစိုး၊ ဗဟိုအလုပ်အမှုဆောင် ဦးအောင်ကိုဇော်၊ ရန်ကုန်ဂေါက်ကွင်းအတွင်းရေးမှူး ဦးခင်မောင်တင့်နှင့် အလုပ်အမှုဆောင် ဦးအောင်ဌေးလှိုင်တို့က အလှည့်ကျ ဂေါက်သီးရိုက်၍ ဖွင့်လှစ်ပေးပြီး ပထမနေ့ ၁၈ ကျင်းပြိုင်ပွဲကို စတင်ယှဉ်ပြိုင်ကြသည်။

ယနေ့ပြိုင်ပွဲတွင် ဝါသနာရှင်အဆင့် (အမျိုးသား) ၁၄၇ ဦး၊ ဝါသနာရှင်အဆင့် သက်ကြီးတန်း (အသက်၅၅) နှစ်နှင့်အထက် ၂၇ ဦး စုစုပေါင်းအားကစားသမား ၁၇၄ ဦး ဝင်ရောက်ယှဉ်ပြိုင်မည်ဖြစ်ပြီး ပြိုင်ပွဲကို မျိုးဆက်သစ်ဂေါက်သီးအားကစားသမားများ၏ လက်ရည်အဆင့်အတန်း တိုးတက်လာစေရန်နှင့် နိုင်ငံတကာအဆင့်မီယှဉ်ပြိုင်နိုင်စေရန် ရည်ရွယ်ကျင်းပခြင်းဖြစ်သည်။

ပြိုင်ပွဲကို ရန်ကုန်မြို့ရှိ ရန်ကုန်ဂေါက်ကွင်း (တညင်းကုန်း) ၌ ဖေဖော်ဝါရီ ၂၄ ရက်မှ ၂၇ ရက်အထိ လေးရက်ကြာ ပြုလုပ်သွားမည်ဖြစ်ကြောင်း သတင်းရရှိသည်။

Source: Myanmar.gov.mm
 

နယူးယောက် ဖေဖော်ဝါရီ ၂၃

လူသန်းပေါင်းများစွာတို့ သုံးစွဲနေကြသော ကိုယ်အလေးချိန်လျှော့ချရေး ဆေးများကြောင့် အမြင်အာရုံ ပြဿနာတစ်မျိုး ပေါ်လာနိုင်ခြေ မြင့်မားလာနိုင်ကြောင်း သုတေသနပညာရှင်များက ဖေဖော်ဝါရီ ၂၂ ရက်တွင် ပြောကြားသည်။

Wegovy နှင့် Ozempic ကဲ့သို့သော ကိုယ်အလေးချိန် လျှော့ချရေးဆေးများ၏ အဓိကဓာတုပစ္စည်းဖြစ်သော Semaglutide သည် ပုံစံ-၂ ဆီးချိုရောဂါနှင့် အဝလွန်မှုပြဿနာတို့ကို ဖြေရှင်းရာတွင် ထိရောက်သော ကုထုံးများဖြစ်ကြောင်း ဆေးပညာရှင်များက လက်ခံထားသည်။

သို့ရာတွင် အမေရိကန်သုတေသနပညာရှင်များ၏ လေ့လာတွေ့ရှိချက်အရ အထက်ပါကိုယ်အလေးချိန်လျှော့ချရေးဆေး သုံးစွဲသူများသည် Nonarteritic Ischemil Anteiror Optic Neuropathy (NAION) ခေါ် အမြင်အာရုံ ပြဿနာတစ်မျိုးပေါ်လာနိုင်ခြေ မြင့်မားလာနိုင်ကြောင်း သိရသည်။

မျက်လုံး လေဖြတ်မှုဟူ၍လည်း လူသိများသည့် NAION ပြဿနာသည် မျက်လုံး၏ မြင်လွှာနာ့ဗ်ဆဲလ်များဆီသို့ သွေးပို့ပေးနေသော သွေးကြောများပိတ်ဆို့၍ အောက်ဆီဂျင်ပြတ်လပ်ပြီး မြင်လွှာနာ့ဗ်ဆဲလ်များ ပျက်စီးချိန်တွင် ပေါ်ပေါက်တတ်သည့် အမြင်အာရုံပြဿနာဖြစ်သည်။

သို့ရာတွင် ကိုယ်အလေးချိန်လျှော့ချရေးဆေး သုံးစွဲသူများ၌ NAION ဖြစ်နိုင်ခြေ မြင့်မားလာနိုင်မှုနှုန်းမှာ စိုးရိမ်ရသည့်အဆင့်တွင် မရှိကြောင်း သုတေသနပညာရှင်များက ပြောကြားသည်။

Source: ရတနာပုံသတင်းစာ 

မလေးရှားနိုင်ငံ၊ ပီနန်၌ အသက် ၁၀ နှစ်အရွယ် ကလေးငယ်တစ်ဦး စားပွဲတင်တင်းနစ် ဘောလုံးအရွယ် မျက်လုံးပုံစံ ဂျယ်လီခြောက် စားပြီး နောက် ဖေဖော်ဝါရီလ ၂၀ ရက်တွင် သေဆုံးသွားခဲ့ကြောင်း သိရှိရသည်။

ကလေးငယ်သည် ဖေဖော်ဝါရီ ၁၈ ရက်တွင် ပီနန်ပြည်နယ်၊ ဆီကို လာကဲဘန်ဆန် ဆန်ဂိုင်ဒူအာ အဝန်းအဝိုင်းရှိ ကျောင်းဝင်းအပြင်ဘက် မုန့်ဆိုင်မှ ဝယ်ယူခဲ့သည့် မျက်လုံးပုံသဏ္ဍာန်ဂျယ်လီခြောက်ကို ဝယ်ယူ စားသောက်ခဲ့ပြီး မွန်းလွဲ ၂ နာရီ ၃ဝ မိနစ် အချိန်တွင် ကျောင်းသားသည် သူငယ်ချင်းများနှင့်အိမ်သာသွားစဉ် လမ်း၌လဲကျ သတိလစ်သွားခဲ့ခြင်း ဖြစ်သည်ဟု ပီနန်သတင်းဌာန Guang Ming Daily ၏ ဖော်ပြချက်အရ သိရပါသည်။

ထို့နောက် Seremban Jaya ဆေးရုံ အရေးပေါ်ဌာန၏ ဆေးဘက် ဆိုင်ရာဝန်ထမ်းတစ်ဦး အခင်းဖြစ်ပွားရာနေရာသို့ ရောက်ရှိလာပြီး ကျောင်းသား ၏လည်ချောင်းထဲမှ ဂျယ်လီခြောက်ကို ဖယ်ထုတ်ပေးနိုင်ခဲ့သော်လည်း သတိလစ်နေဆဲဖြစ်ခြင်းကြောင့် ပီနန်အထွေထွေရောဂါကုဆေးရုံကြီးကို အလျင်အမြန်ပို့ဆောင်ခဲ့ရကာ နောက်ပိုင်းတွင် သေဆုံးသွားခဲ့ပါသည်။

အဆိုပါဖြစ်ရပ်နှင့်ပတ်သက်၍ မလေးရှားကျန်းမာရေးဝန်ကြီးဌာနက ၎င်းထုတ်ကုန်ရောင်းချမှုကို အွန်လိုင်းပလက်ဖောင်းအားလုံးနှင့် ဒေသအတွင်း ဈေးကွက်များတွင် တင်းကြပ်စွာတားမြစ်ခဲ့သည့်အပြင် အများ ပြည်သူများအနေဖြင့်လည်း အထူးသဖြင့် မိဘများအနေဖြင့် ကလေးများကို အစားအသောက် ရွေးချယ်ကျွေးမွေးရာ၌ အထူးသတိထားရန်လည်း အကြံပြုတိုက်တွန်းထားပါသည်။

ကိုးကား-NP News

နေပြည်တော်   ဖေဖော်ဝါရီ   ၂၂

ပြည်ထောင်စုနယ်မြေ နေပြည်တော်ရှိ ဥပ္ပါတသန္တိစေတီတော်မြတ်ကြီး၏ (၁၇) ကြိမ်မြောက် ဗုဒ္ဓပူဇနိယပွဲတော်ကြီးကို စေတီတော်မြတ်ကြီး၏ တပေါင်းကွင်းအတွင်း၌ မတ်လ ၇ ရက်မှ ၁၃ ရက်အထိ ခုနစ်ရက်တိုင်တိုင် စည်ကားသိုက်မြိုက်စွာ ကျင်းပမည်ဖြစ်ကြောင်း သိရသည်။

အဆိုပါပွဲတော်တွင် ရေကျော်ဂီတဖျော်ဖြေရေးအဖွဲ့၊ မြန်မာ့အသံနှင့် ရုပ်မြင်သံကြား ဖျော်ဖြေရေးအဖွဲ့၊ သာသနာရေးနှင့် ယဉ်ကျေးမှုဝန်ကြီးဌာန အနုပညာဦးစီးဌာနမှ ဖျော်ဖြေရေးအဖွဲ့နှင့် မြဝတီရုပ်မြင်သံကြားဖျော်ဖြေရေး အဖွဲ့တို့က အလှည့်ကျဖျော်ဖြေ တင်ဆက်ကြမည်ဖြစ်သည်။

သို့ဖြစ်ပါ၍ ရပ်နီး၊ ရပ်ဝေးမှ ဘုရားဖူးပြည်သူများအနေဖြင့်   ဥပ္ပါတသန္တိစေတီတော်မြတ်ကြီးအား ဖူးမြော်ကြည်ညိုရင်း တပေါင်းပွဲတော်ကြီးအား  ပါဝင်ဆင်နွှဲနိုင်ကြောင်း ဂေါပကအဖွဲ့၏ ထုတ်ပြန်ချက်အရ သိရသည်။

Source: Myawady Web Portal