အမေရိကန်ပြည်ထောင်စုသည် အမေရိကန်နိုင်ငံတကာဖွံ့ဖြိုးတိုးတက်ရေးဌာန (USAID) အဖွဲ့အတွက် ၉ နှစ်ကျော်အတွင်း ဒေါ်လာ ၃၃၀ ဘီလီယံကျော် အသုံးပြုခဲ့ကြောင်း မီဒီယာတစ်ခုက ဖေဖော်ဝါရီလ ၆ ရက်တွင် ဖော်ပြသည်။

အမေရိကန်အစိုးရသည် ၂၀၁၆ ခုနှစ်မှ ၂၀၂၄ ခုနှစ်အထိ အဆိုပါငွေကြေးများကို အသုံးပြုခဲ့ခြင်းဖြစ်ပြီး ယင်းပမာဏသည် ၂၀၂၄ ခုနှစ်အတွက် နိုင်ငံတော် အသုံးစရိတ်၏ ၅ ရာခိုင်နှုန်းရှိကြောင်း သိရသည်။

အနောက်နိုင်ငံမှ နည်းပညာများအပေါ် အမှီသဟဲပြုနေရခြင်းကို  လျှော့ချနိုင်ရန်အတွက် အိန္ဒိယနိုင်ငံက ၎င်းတို့၏ကိုယ်ပိုင် AI chip များကို ထုတ်လုပ်မည်ဟု တာဝန်ရှိသူများ၏ ပြောကြားချက်ကို ကိုးကား၍ Mint သတင်းစာတွင် ဖော်ပြထားသည်။

ကိုယ်ပိုင် AI chip များ ထုတ်လုပ်နိုင်ရန်အတွက်   အိန္ဒိယအီလက်ထရွန်နစ်နှင့် သတင်းအချက်အလက် နည်းပညာဆိုင်ရာဝန်ကြီးဌာန (Meity) က နိုင်ငံပိုင်အိုင်တီနှင့် ကွန်ပျူတာစင်တာများနှင့် ပူးပေါင်းဆောင်ရွက်မည်ဖြစ်သည်။ အဆိုပါစင်တာများတွင် အဆင့်မြင့်ကွန်ပျူတာနည်းပညာ ဖွံ့ဖြိုးရေးစင်တာ (C-DAC) လည်း ပါဝင်လျက်ရှိသည်။

တရုတ်နိုင်ငံ ဟားအယ်ပင်းမြို့တွင် ၉ ကြိမ်မြောက် အာရှဆောင်းရာသီအားကစားပွဲအတွက် မီးရှူးတိုင် လက်ဆင့်ကမ်းသယ်ဆောင်ခြင်းအခမ်းအနားကို ဖေဖော်ဝါရီ ၃ ရက်က ပြုလုပ်ခဲ့ရာ မီးရှူးတိုင်သယ်ဆောင်သူ ၁၂၀ ဦးတို့ ပါဝင်ခဲ့ကြသည်။
၁၁ ကီလိုမီတာရှိသော မီးရှူးတိုင်သယ်ဆောင်းရေးလမ်းကြောင်းတွင် နှစ်ပေါင်း ၁၀၀ ကျော် သမိုင်းကြောင်းရှိသည့် ဟားအယ်ပင်းဗဟိုလမ်း၊ မြို့ကိုဖြတ်သန်းစီးဆင်းလျက်ရှိသော ဆုန်းဟွာမြစ် စသည်တို့အပါအဝင် ယင်းမြို့ရှိ အထင်ကရနေရာများစွာကို လွှမ်းခြုံထားကြောင်း သိရသည်။

လာမည့်သီတင်းပတ်တွင် အမေရိကန်သမ္မတ ဒေါ်နယ်ထရမ့်အစိုးရအဖွဲ့သည် ဂျာမနီနိုင်ငံတွင်ကျင်းပမည့် နိုင်ငံတကာအစည်းအဝေး၌ ယူကရိန်း-ရုရှား အပစ်အခတ်ရပ်စဲရေး အစီအစဉ်ကို တင်ပြဖွယ်ရှိကြောင်း သိရသည်။

ယူကရိန်းနှင့် ရုရှားနိုင်ငံဆိုင်ရာ အထူးသံတမန် Keith Kellogg က ဖေဖော်ဝါရီ ၁၄ ရက်တွင် စတင်မည့် မြူးနစ်လုံခြုံရေးညီလာခံကို တက်ရောက်မည်ဟု ဖေဖော်ဝါရီ ၄ ရက်(အင်္ဂါနေ့)တွင် ပြောကြားခဲ့ပါသည်။ အဆိုပါညီလာခံတွင် ယူကရိန်းစစ်ပွဲကို အဆုံးသတ်မည့် ထရမ့်၏ အစီအစဉ်ကို ပြောဆိုရန် စီစဉ်ထားကြောင်း ဆိုသည်။

ရုရှားနိုင်ငံနှင့် အီသီယိုးပီးယားနိုင်ငံတို့သည် ၎င်းတို့၏ အမျိုးသားငွေကြေးများဖြင့် ကုန်သွယ်မှုကို စတင်နေပြီဖြစ်ကြောင်း မော်စကိုမြို့ရှိ အီသီယိုးပီးယား သံအမတ်ကြီး Genet Teshome Jirru က ထုတ်ဖော် ပြောကြားလိုက်ပါသည်။ 

၂၀၂၅ ခုနှစ်၊ ဖေဖော်ဝါရီ ၅ ရက်တွင် ဖိလစ်ပိုင် အောက်လွှတ်တော်သည် ဒုတိယသမ္မတ ဆာရာဒူတာတေး အား စွဲချက်ပေါင်းများစွာဖြင့် အမှုဖွင့်လိုက်ပါသည်။ ထိုစွဲချက်များတွင် သမ္မတမားကို့စ်ဂျူနီယာအား လုပ်ကြံရန် စီမံမှု၊ အဂတိလိုက်စားမှု၊ တရုတ်နိုင်ငံ၏ တောင်တရုတ်ပင်လယ်ရှိ အရေးယူမှုများကို အပြင်းအထန် ရှုတ်ချရန် တာဝန်လစ်ဟင်းခြင်းတို့ ပါဝင်ပါသည်။ 

အမေရိကန်စာတိုက်ဝန်ဆောင်မှု (USPS) က တရုတ် ပြည်မကြီးနှင့် ဟောင်ကောင်တို့မှ ပါဆယ်ပစ္စည်းများ လက်ခံခြင်းကို နောက်ထပ်အမိန့်‌စာမထုတ်ပြန်မချင်း ရပ်တန့်ထားသည်ဟု ဆိုသည်။

ပါဆယ်ပစ္စည်းလက်ခံခြင်းကို ရပ်ဆိုင်းထားသော်လည်း စာပေးပို့ခြင်းလုပ်ငန်းကို ထိခိုက်စေလိမ့်မည်မဟုတ်ကြောင်း ကုမ္ပဏီက ပြောကြားခဲ့ပြီး ထိုသို့ဆုံးဖြတ်ရခြင်း၏ အကြောင်းအရင်းကို မေးမြန်းရာတွင် ကုမ္ပဏီက ဖြေကြားရန် ငြင်းဆိုခဲ့သည်။

ဥရောပသမဂ္ဂ (EU) သည် တရုတ်နိုင်ငံနှင့် အခြားနေရာများ၌ အခြေစိုက်သည့် အွန်လိုင်းမှ လက်လီရောင်းချသူများမှတစ်ဆင့် တင်သွင်းသော တန်ဖိုးနည်းပစ္စည်းများအပေါ် စည်းမျဉ်းများကို တင်းကြပ်ရန် အကောင်အထည်ဖော်မည်ဖြစ်ကြောင်း ကြေညာလိုက်ပါသည်။

ဥရောပကော်မရှင်က ဖေဖော်ဝါရီ ၅ ရက်နေ့က အဆိုပါ ကြေညာချက်ကို ထုတ်ပြန်ခဲ့ခြင်းဖြစ်ပြီး ထုတ်ကုန်များ၏ ဘေးကင်းမှုနှင့် တန်ဖိုးနည်းကုန်ပစ္စည်းများ အတွက် တရားမျှတသည့် ယှဉ်ပြိုင်မှုရှိရေးသေချာစေရန် လိုအပ်ကြောင်း EU က ဆိုပါသည်။

ယူကရိန်း၏ NATO အဖွဲ့ဝင်ဖြစ်ရေး ရည်မှန်းချက်များနှင့်ပတ်သက်၍ အမေရိကန် သမ္မတ Donald Trump ၏ ပြောကြားချက်ကို ရုရှားနိုင်ငံက ကြိုဆိုကြောင်း နိုင်ငံခြားရေးဝန်ကြီး Sergey Lavrov က ပြောကြားခဲ့သည်။ကိယက်ဗ်၏ နေတိုးအဖွဲ့တွင်ပါဝင်ရန် အစီအစဉ်များကို ထောက်ခံခြင်းမှာ မှားယွင်းကြောင်း ၀န်ခံသည့် ပထမဆုံးအနောက်နိုင်ငံခေါင်းဆောင်မှာ Trump ဖြစ်သည်ဟု Lavrov က ဖေဖော်ဝါရီ ၅ ရက်နေ့တွင် ပြောကြားခဲ့သည်။

အသည်းရောဂါခံစားနေရသည့် ဝေဒနာရှင်များအတွက် အသည်းနှင့်ပတ်သက်သောဆေးဝါးများကို ယခု ဖေဖော်ဝါရီလမှစတင်ကာ နီးစပ်ရာမြို့နယ် ကျန်းမာရေးဌာနများ၌ အခမဲ့ပေးအပ်နေပြီဖြစ်ကြောင်း ကျန်းမာရေးဝန်ကြီးဌာန၊ ပြည်သူ့ကျန်းမာရေးဦးစီးဌာနမှ သိရသည်။

ထိုဆေးဝါးများသည် အသည်းအဆီဖုံးရောဂါ၊ အသည်းခြောက်ရောဂါနှင့် အသည်းကင်ဆာရောဂါ ဖြစ်စေနိုင်သော အသည်းရောင်အသားဝါ စီပိုး (Hepatitis-C) ရောဂါခံစားနေရသူများအား ပေးအပ်သွားမည် ဖြစ်ကြောင်း သိရသည်။