၂၀၂၅ ခုနှစ်၊ ဖေဖော်ဝါရီ ၁ ရက်တွင် အမေရိကန်သမ္မတဒေါ်နယ်ထရမ့်သည် ကနေဒါနှင့် မက္ကဆီကိုတို့မှ သွင်းကုန်များအပေါ် ၂၅ ရာခိုင်နှုန်း အခွန်များချမှတ်မည်ဖြစ်ကြောင်း ကြေညာခဲ့ပြီး ယင်းအခွန်ကောက်ခံမှုကို ဖေဖော်ဝါရီ ၄ ရက်တွင် အတည်ပြုမည်ဟု ကြေညာခဲ့ပါသည်။ ထိုကြေညာချက်အပေါ် ကနေဒါနှင့်မက္ကဆီကိုတို့မှ ပြန်လည်အကြောင်း တုံ့ပြန်ခဲ့ကြပြီး  အခြေအနေများ ပိုမိုတင်းမာလာသည်။

ပုဂံအမွေအနှစ်ဒေသအတွင်းရှိ ပုဂံမြို့ဟောင်း သရပါ တံခါးအား ဖေဖော်ဝါရီ ပထမပတ်ကစတင်ကာ မတ်လ စတုတ္ထပတ်အထိ ခေတ္တယာယီပိတ်ထားမည် ဖြစ်ကြောင်း ရှေးဟောင်းသုတေသနနှင့် အမျိုးသား ပြတိုက်ဦးစီးဌာန (ပုဂံဌာနခွဲ)မှ သိရသည်။ ပုဂံဒေသ အတွင်း ရေကြီး၊ ရေဝပ်ခြင်းများ လျော့ချနိုင်စေရန်နှင့် ရေစီးရေလာကောင်းမွန်ရေးလုပ်ငန်းများ လုပ်ဆောင်ရန် အတွက် ပုဂံမြို့ဟောင်း သရပါတံခါးကို ခေတ္တ ပိတ် ထားမည်ဖြစ်ကြောင်း သိရသည်။

ဂျပန်အီလက်ထရောနစ်ကုမ္ပဏီကြီး Panasonic Holdings သည် အကျိုးအမြတ်နည်းလာသည့် TV ထုတ်လုပ်မှုအား ရောင်းချနိုင်ခြေရှိခြင်းအပါအဝင် ကုမ္ပဏီ အုပ်စုတစ်ခုလုံးကို ပြန်လည်ဖွဲ့စည်းမည့် အစီအစဉ်များကို ကြေညာခဲ့ပါသည်။

Panasonic သည် ၂၀၂၉ ခုနှစ် မတ်လမတိုင်မီ အနည်းဆုံး ယန်း ဘီလီယံ ၃၀၀ (အမေရိကန်ဒေါ်လာ ၂ ဘီလီယံ) ခန့်အထိ အမြတ်အစွန်းရရှိရန် ရည်မှန်းထားကြောင်း ဆိုပါသည်။

ကမ္ဘာ့ကျန်းမာရေးအဖွဲ့ (WHO) သည် ၂၀၂၆ ခုနှစ်နှင့် ၂၀၂၇ ခုနှစ်၏ ဘတ်ဂျက်ကို အမေရိကန်ဒေါ်လာသန်း ၄၀၀ ခန့် လျှော့ချဖွယ်ရှိသည်ဟုသိရှိရပြီး အမေရိကန် က WHO မှ နုတ်ထွက်ရန် ရည်ရွယ်ထားကြောင်းထုတ်ပြန်ပြီးနောက် ယခုကဲ့သို့ တုန့်ပြန်လာခြင်း ဖြစ်သည်။

အမေရိကန်သည် WHO ကို ငွေကြေးအများဆုံး ထောက်ပံ့သောနိုင်ငံဖြစ်ပြီး ဇန်နဝါရီလအတွင်း သမ္မတတာဝန် စတင်ထမ်းဆောင်သည့် ပထမဆုံးရက်တွင် ထရမ့်က အမေရိကန်သည် WHO မှ နုတ်ထွက်ရန် ရည်ရွယ်ထားကြောင်း အရိပ်အမြွက်ပြောကြားခဲ့ပြီးနောက် သမ္မတ အမိန့်ကို လက်မှတ်ရေးထိုးခဲ့ပါသည်။

အမေရိကန်-တရုတ်နှစ်နိုင်ငံအကြား စည်းကြပ်ခွန်များ အပြန်အလှန်ချမှတ်ပြီးနောက် တရုတ်သမ္မတ ရှီကျင့်ဖျင်နှင့် အလျင်စလိုတွေ့ဆုံရန် အစီအစဉ်မရှိကြောင်း အမေရိကန်သမ္မတ ဒေါ်နယ်ထရမ့်က ပြောဆိုလိုက် သည်။

ပေကျင်းက ဝါရှင်တန်၏ အခွန်စည်းကြပ်မှု တိုးမြှင့်ခဲ့ခြင်းအပေါ် ကမ္ဘာ့ကုန်သွယ်ရေးအဖွဲ့ထံ တရားစွဲဆိုခဲ့ပြီး တွေ့ဆုံဆွေးနွေးခြင်းကသာ ပြဿနာများကို ဖြေရှင်း နိုင်မည့်အကောင်းဆုံး နည်းလမ်းဖြစ်သည်ဟု အလေးပေး ပြောကြားခဲ့သည်။

ယူကရိန်း သမ္မတဇီလန်းစကီးသည် သမ္မတသက်တမ်း ကုန်ဆုံးနေပြီဖြစ်ပြီး တရားဝင်အခွင့်အာဏာ ကင်းမဲ့နေသော်လည်း ရုရှားသည် ကိယက်ဗ်နှင့်ဆွေးနွေးရန် လမ်းဖွင့်ထားကြောင်း ကရင်မလင်ပြောရေးဆိုခွင့်ရှိသူ Dmitry Peskov ကပြောကြားခဲ့သည်။

ကိုးကား-RT

ဆီးရီးယား၏ အသွင်ကူးပြောင်းရေးသမ္မတ အာမက် အယ်လ်ရှာရာက နိုင်ငံ၏အခြေခံ အဆောက်အအုံများ ပြန်လည်တည်ဆောက်ရန်နှင့် လည်ပတ်နိုင်သော နိုင်ငံ ရေးစနစ် ထူထောင်ရန် လိုအပ်သောကြောင့် ရွေးကောက်ပွဲများကို နောက်ငါးနှစ်အထိ ကျင်းပမည်မဟုတ်ကြောင်း ကြေညာခဲ့ပါသည်။

ဖေဖော်ဝါရီ ၃ ရက်နေ့က ဆီးရီးယားတီဗီနှင့် တွေ့ဆုံမေးမြန်းခန်း၌ ရွေးကောက်ပွဲကျင်းပမည့် အချိန်ဇယားကို ဆွေးနွေးရာတွင် အယ်လ်ရှာရာက ဖွဲ့စည်းပုံနှင့်ထောက်ပံ့ပို့ဆောင်ရေးဆိုင်ရာ အတားအဆီးများကြောင့် ရွေးကောက်ပွဲကို ချက်ချင်းကျင်းပနိုင်ရန် မဖြစ်နိုင်သေးကြောင်း ဆိုလိုက်ပါသည်။ 

မြန်မာ-ထိုင်းနယ်စပ်၌ ထိုင်းနိုင်ငံမှ လျှပ်စစ်မီးရယူထားသည့် မြဝတီမြို့၊ ရွှေကုက္ကိုမြို့၊ တာချီလိတ်မြို့နှင့် ဘုရားသုံးဆူမြို့များတွင် ဖေဖော်ဝါရီလ ၅ရက်၊ နံနက်ပိုင်းမှစ၍ လျှပ်စစ်မီးပြတ်တောက်သွားပြီဖြစ်ကြောင်း ဒေသခံများထံမှ သိရသည်။

ဂရိနိုင်ငံ၊ ဆန်တိုရီနီကျွန်းစုတွင် မကြုံစဖူး မြေငလျင်ဆက်တိုက်လှုပ်ခတ်မှုများကြောင့် ဖေဖော်ဝါရီ ၄ ရက် နေ့ကလူထောင်ပေါင်းများစွာ ရေကြောင်း၊ လေကြောင်းလမ်းများနှင့် နေရပ်စွန့် ထွက်ခွာခဲ့ကြပါသည်။

     ပြင်သစ်နိုင်ငံတွင် ရဲတပ်ဖွဲ့အား သေနတ်အတုဖြင့် ချိန်ခဲ့သည့် ဆီးရီးယားလူမျိုး တစ်ဦးအား ရဲတပ်ဖွဲ့ဝင်များက ပစ်ခတ် ဖမ်းဆီးခဲ့ကြောင်း သိရသည်။အဆိုပါဖြစ်စဉ်သည် ပဲရစ်မြို့တော်ရှိ အိုတယ်လစ် ဘူတာရုံတွင် ဖေဖော်ဝါရီလ ၃ ရက်က ဖြစ်ပွားခြင်းဖြစ်သည်။ အသက် ၄၉ နှစ်အရွယ် အဆိုပါအမျိုးသားသည် ဘူတာရုံတွင် စကြာတံဆိပ်များကို မှုတ်ဆေးဖြင့် ရေးဆွဲနေစဉ် ရဲတပ်ဖွဲ့ဝင်များက တားဆီးခဲ့ရာမှ ယင်းအမျိုးသားက  ၎င်း၏အင်္ကျီအိတ်အတွင်းမှ သေနတ်အတုကိုထုတ်၍ ရဲတပ်ဖွဲ့ဝင်များအား ချိန်ခဲ့ခြင်းဖြစ်သည်။