လာမည့်ဇူလိုင်လ ၁၄ ရက်တွင် ရုရှားနိုင်ငံနှင့်ပတ်သက်ပြီး အရေးကြီးသော ကြေညာချက် ထုတ်ပြန်သွားမည်ဖြစ်ကြောင်း အမေရိကန် သမ္မတ ဒေါ်နယ်ထရမ့်က NBC News နှင့် အင်တာဗျူးပြုလုပ်စဉ် ပြောကြားလိုက် ပါသည်။

“လာမည့် တနင်္လာနေ့ (ဇူလိုင် ၁၄) တွင် ရုရှားနှင့် ပတ်သက်ပြီး အရေးကြီး ကြေညာချက် ထုတ်ပြန်ဖို့ ရှိမှာပါ။ မိမိအနေဖြင့် ရုရှားနိုင်ငံ အပေါ် အလွန်စိတ်ပျက်မိပါသည်။ လာမည့် ရက်သတ္တပတ် အနည်းငယ်အတွင်း ဘာတွေဖြစ်လာနိုင်မည် ဆိုသည်ကို စောင့်ကြည့်ရမှာပေါ့” ဟု ထရမ့်က ဖြည့်စွက်ပြောကြားထားပါသည်။

ဒေါ်နယ်ထရမ့်သည် NBC News အင်တာဗျူးတွင် ရုရှားအပေါ်  လွန်စွာ ကြီးမားသည့် ပိတ်ဆို့အရေးယူ ပြုလုပ်ရန် ကွန်ဂရက်လွှတ်တော်၌အတည်ပြုရန် ရည်ရွယ်ထားသော ဥပဒေကြမ်းကို ကျင့်သုံးရန် ဆုံးဖြတ်ချက်မှာ မိမိလက်ထဲတွင် ရှိကြောင်း ပြောကြားထားပါသည်။ ထိုဥပဒေကြမ်းကို ရီပတ်ပလီကန်အမတ်တစ်ဦးနှင့် ဒီမိုကရက်တစ်အမတ်တစ်ဦးတို့ ဦးဆောင်၍ ပါတီ ၂ ခုပူးပေါင်းအဖွဲ့က မိတ်ဆက်ခဲ့ ကြသည်။ ထိုဥပဒေကြမ်းတွင် ရုရှားကုန်သွယ်ဖက်နိုင်ငံများအပေါ် ထပ်ဆင့် ပိတ်ဆို့မှုများ (ဥပမာ၊ ရုရှားမှ ရေနံ၊ ဓာတ်ငွေ့၊ ယူရေနီယမ်နှင့် အခြား ကုန်ပစ္စည်းများ ဝယ်ယူသည့်နိုင်ငံများမှ အမေရိကန်သို့ တင်သွင်းသည့် ကုန်ပစ္စည်းများအပေါ် အကောက်ခွန် ၅၀၀ % အထိ စည်းကြပ်ခြင်း) အရေးယူမှုများ ပါဝင်နေပါသည်။ 

ရုရှားနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မာရီယာ ဇာခါရိုဗာ က ဇူလိုင် ၂ ရက်က အမေရိကန်အနေဖြင့် ရုရှားအပေါ် ပိတ်ဆို့ အရေး ယူမှုများမှာ အလုပ်မဖြစ်ဘဲ ၎င်းတို့ကို အားပေးထောက်ခံသည့် နိုင်ငံ များအပေါ်တွင်သာ ဆိုးကျိုးသက်ရောက်စေမှာ ဖြစ်သည်ကို နားလည် သင့်ကြောင်း တုံ့ပြန်ပြောကြားခဲ့ပါသည်။

ကိုးကား- TASS

Photo: Report.az

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

မလေးရှားနိုင်ငံတွင် ကျင်းပသည့် ဒေသဆိုင်ရာ အဆင့်မြင့် အစည်းအဝေး အတွင်း ဖိလစ်ပိုင်နိုင်ငံခြားရေးဝန်ကြီး သရီဆာ လာဇာရို က ဇူလိုင် ၁၁ ရက်နေ့တွင် ဖိလစ်ပိုင်သမ္မတ ဖာဒီနန်မာကိုးစ်ဂျူနီယာ နှင့် အမေရိကန် သမ္မတ ဒေါ်နယ်ထရမ့် တို့ ဝါရှင်တန်ဒီစီ၌ ယခုလအတွင်း တွေ့ဆုံမည် ဖြစ်ကြောင်း အတည်ပြုပြောကြားခဲ့သည်။

ဤသည်မှာ ထရမ့်နှင့် မာကိုးစ်တို့၏ ပထမဆုံးတွေ့ဆုံမှု ဖြစ်ပြီး ယခုနှစ် များအတွင်း ဖိလစ်ပိုင်-အမေရိကန် စစ်ရေးပူးပေါင်းဆောင်ရွက်မှုများ သိသိသာသာတိုးမြင့်လာခဲ့ပြီး နှစ်နိုင်ငံအကြား ကုန်သွယ်ရေး အကောက်ခွန် တိုးမြှင့်မှုဆိုင်ရာ ဆွေးနွေးချက်များ ပါဝင်မည်ဟု မျှော်မှန်းရသည်။

“အကောက်ခွန်နှင့်ပတ်သက်သောကိစ္စကို အခြားအကြောင်းအရာများ နှင့်အတူ ဆွေးနွေးသွားမည် ၊ အကောက်ခွန်ကိစ္စသည် မိမိတို့အတွက် အလွန်အရေးကြီးပါသည်။ မိမိတို့သည် အဆိုပါကိစ္စကို ဆွေးနွေးရန် ညှိနှိုင်းသူများကို ကြိုတင်စေလွှတ်ထားပြီးဖြစ်သည်” ဟု ဖိလစ်ပိုင် နိုင်ငံခြားရေးဝန်ကြီး သရီဆာ လာဇာရို က ဇူလိုင် ၁၁ ရက်နေ့တွင် Reuters သို့ ပြောကြားခဲ့သည်။

အမေရိကန် အိမ်ဖြူတော်အရာရှိ တစ်ဦးကလည်း အဆိုပါတွေ့ဆုံမှုကို ဇူလိုင် ၂၂ ရက်နေ့တွင် စီစဉ်ထားကြောင်း Reuters သို့ ပြောကြားခဲ့သည်။ ထို့အတူ သမ္မတ မာကိုးစ်၏ ရုံးမှလည်း ၎င်းသည် ဇူလိုင် ၂၀ မှ ၂၂ ရက်နေ့ အထိ အမေရိကန်သို့ အလည်အပတ် သွားရောက်မည် ဖြစ်ကြောင်း ထုတ်ပြန်ခဲ့သည်။

ဖိလစ်ပိုင်အစိုးရသည် အမေရိကန်သမ္မတ ဒေါ်နယ်ထရမ့် မကြာသေးမီ က ကြေညာခဲ့သည့် ၂၀% အကောက်ခွန် (ဧပြီလက ၁၇% အဖြစ် ခြိမ်းခြောက်ထားခဲ့ပြီး ယခု ရှင်းလင်းချက်မပါဘဲ ၃% တိုး) နှုန်းကို စိုးရိမ် နေသည်။ ၂၀၂၄ ခုနှစ်တွင် အမေရိကန်၏ ဖိလစ်ပိုင်နှင့်ကုန်သွယ်ရေး လိုငွေပြမှုသည် အမေရိကန်ဒေါ်လာ ၄.၉ ဘီလီယံ အထိ မြင့်တက် လာခဲ့ပြီး ၂၀၂၃ ခုနှစ်နှင့်နှိုင်းယှဉ်လျှင် ၂၁.၈% တိုးလာခြင်းဖြစ်သည်။

ဖိလစ်ပိုင်အစိုးရက ကုန်သွယ်ရေးသဘောတူညီချက်ရရှိရန် ဆက်လက် ညှိနှိုင်းမည် ဟု ကတိပြုထားပြီး လာမည့်သီတင်းပတ်တွင် ကိုယ်စားလှယ် အဖွဲ့တစ်ဖွဲ့ကို ဝါရှင်တန်သို့ စေလွှတ်မည် ဖြစ်သည်။

သမ္မတ ဖာဒီနန်မာကိုးစ်ဂျူနီယာ လက်ထက်တွင် ဖိလစ်ပိုင်နှင့် အမေရိကန် ဆက်ဆံရေးသည် သိသိသာသာ တိုးတက်လာခဲ့သည်။ မာကိုးစ်သည်အမေရိကန်ဘက်သို့ ပိုမိုယိမ်းညွတ်လာကာ အမေရိကန် စစ်သည်များအား ဖိလစ်ပိုင်စစ်စခန်းများတွင် တပ်စွဲခွင့် ပိုမိုခွင့်ပြုခဲ့သည်။ အဆိုပါ အချက်များကြောင့် နှစ်နိုင်ငံအကြား စစ်ရေး၊ စီးပွားရေး ပူးပေါင်း ဆောင်ရွက်မှုများ ပိုမိုနက်ရှိုင်းလာခဲ့သည်။

အမေရိကန်၏ ကိုလိုနီဟောင်းသည် တောင်တရုတ်ပင်လယ်နှင့် ထိုင်ဝမ် တို့အပေါ် တရုတ်နိုင်ငံ၏ ဗိုလ်ကျလွှမ်းမိုးမှုကို တန်ပြန်ရန် ဝါရှင်တန်၏ ကြိုးပမ်းအားထုတ်မှုတွင် အဓိကအခန်းကဏ္ဍမှ ပါဝင်နေသည်။

အမေရိကန်နှင့် ဖိလစ်ပိုင်တို့သည် ဆယ်စုနှစ် ခုနစ်ခုကျော် သက်တမ်း ရှိသော အပြန်အလှန်ကာကွယ်ရေး သဘောတူစာချုပ် ချုပ်ဆိုထားပြီး နှစ်စဉ်ပြုလုပ်နေကျ စစ်ရေးလေ့ကျင့်မှု ဒါဇင်များစွာပါဝင်ကာ အမေရိကန် ၏ Typhon ဒုံးခွင်းဒုံးစနစ် စမ်းသပ်မှုများက တရုတ်နိုင်ငံကို အမျက် ဒေါသထွက်စေခဲ့သည်။

ကိုးကား- CNA

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတဒေါ်နယ်ထရမ့်က အမေရိကန်သို့ တင်သွင်းလာသည့် ဘရာဇီးကုန်ပစ္စည်းများအပေါ် အခွန် ၅၀ % စည်းကြပ်မည်ဟု ကြေညာ ပြီးနောက်နေ့မှာပင် ဘရာဇီးသမ္မတအီနာစီလို လူလာဒါဆီးလ်ဗါ က ဘရာဇီးဘက်ကလည်း တုံ့ပြန်သည့်အနေဖြင့် မိမိတို့နိုင်ငံထဲ တင်သွင်း လာသည့် အမေရိကန်ကုန်ပစ္စည်းများအပေါ် အခွန် ၅၀ % စည်းကြပ် သွားမည်ဖြစ်ကြောင်း ဘရာဇီး သတင်းဌာနတစ်ခုဖြစ်သည့် Record ကို ပြောကြားလိုက်ပါသည်။ 

“ဘရာဇီးအနေဖြင့် ကမ္ဘာ့ကုန်သွယ်ရေးအဖွဲ့ (WTO) ကို အယူခံ တင်သွင်း နိုင်ပါသည်၊ ထို့အပြင် အဆိုပါကိစ္စအတွက် အပြည်ပြည်ဆိုင်ရာ စုံစမ်း စစ်ဆေးမှုတွေ တောင်းဆိုပြီး ရှင်းလင်းချက်တွေ တောင်းခံနိုင်သော်လည်း အဓိကအရေးကြီးသည်က မိမိတို့၏ လွှတ်တော်က ပြဋ္ဌာန်းလိုက်သည့် အပြန်အလှန်ရပိုင်ခွင့်ဆိုင်ရာဥပဒေ (Reciprocity Law) က အဓိက ကျပါသည်” ဟု လူလာက ထည့်သွင်းပြောကြားထားပါသည်။ လူလာ ဆိုလိုခြင်းမှာ လက်တင်အမေရိကန်ကား၏ အကြီးဆုံးစီးပွားရေးအပေါ် အခွန်တိုက်ခိုက်မှုရန်မှ ကာကွယ်ရန် ရည်ရွယ်ပြီး  မကြာသေးခင်ကမှ ပြဋ္ဌာန်းလိုက်သည့် ဥပဒေကို ရည်ညွှန်းပြောကြားခြင်း ဖြစ်ပါသည်။ 

ထရမ့်၏ အခွန်သတ်မှတ်ကြောင်း ကြေညာချက်ထွက်လာပြီးနောက်နေ့ ကြာသပတေးနေ့တွင် လူလာက အစိုးရအဖွဲ့ဝင်ဝန်ကြီးများကို ခေါ်ယူကာ အမေရိကန်အခွန်ကိစ္စကို တုံ့ပြန်ကိုင်တွယ်ဖြေရှင်းနိုင်ရန် အစည်းအဝေး တစ်ရပ်ကျင်းပပြုလုပ်ခဲ့ပါသည်။ လူလာ၏ ရုံးအဖွဲ့အကြီးအကဲ ပြောကြားချက် အရ အမေရိကန်အခွန်စည်းကြပ်မှုအပေါ် မိမိတို့ဘက်က တုံ့ပြန် လုပ်ဆောင် နိုင်ရေး လေ့လာရေးအဖွဲ့တစ်ဖွဲ့ ဖွဲ့စည်းရန် ဆုံးဖြတ်လိုက်ကြသည်ဟု သိရှိ ရပါသည်။ 

အမေရိကန်သမ္မတဒေါ်နယ်ထရမ့်သည် အာရှနိုင်ငံများအပါအဝင် နိုင်ငံ အတော်များများကို အခွန်တိုးမြင့်စည်းကြပ်ကောက်ခံရန် မကြာသေးမီ ရက်အတွင်းက ကြေညာထားပြီး ဆွေးနွေးညှိနှိုင်းရန် အချိန်ပေးသည့် အနေဖြင့် သုံးပတ်နောက်ဆုတ်ကာ လာမည့် ဩဂုတ်လ ၁ ရက်တွင် စတင် အသက်ဝင်မည်ဟု အသိပေးကြေညာထားပါသည်။

ကိုးကား- The Guardian

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အမေရိကန်ပြည်ထောင်စုသည် ဩဂုတ်လ ၁ ရက်နေ့မှစတင်၍ ဘရာဇီး မှ တင်သွင်းသည့်ကုန်စည်များအပေါ် အကောက်ခွန် ၅၀% သတ်မှတ်ရန် ဆုံးဖြတ်လိုက်ကြောင်း အမေရိကန်သမ္မတ ဒေါ်နယ်ထရမ့်က ကြေညာ လိုက်ပါသည်။

ထရမ့်သည် ဘရာဇီးသမ္မတ လူးဝစ် အီဂါစီယို လူလာ ဒါ ဆီလဗာထံသို့ ပေးပို့သည့် သဝဏ်လွှာအား ၎င်း၏ Truth Social စာမျက်နှာတွင် ထုတ်ပြန်ထားပါသည်။ ထိုအကောက်ခွန်သတ်မှတ်မှုအပေါ် ဘရာဇီးက တုံ့ပြန်အခွန်လုပ်ဆောင်လာပါက ဘရာဇီးကုန်စည်များအပေါ် ၎င်းထက် ပိုမိုမြင့်မားသော နှုန်းထားများဖြင့် တိုးမြှင့်လုပ်ဆောင်သွားမည်ဟု ဒေါ်နယ်ထရမ့်က သတိပေးထားပါသည်။

ထို့အပြင် အမေရိကန် ကုန်သွယ်ရေးညှိနှိုင်းရေးမှူး ဂျေမီဆန်ဂရီယာ သည် ဘရာဇီးနှင့် အမေရိကန်တို့၏ နှစ်နိုင်ငံကြား ကုန်သွယ်ရေး လုပ်ငန်းစဉ်များကို ချက်ချင်းစုံစမ်းစစ်ဆေးမည်ဖြစ်ကြောင်း ထရမ့်က ဆိုထားပါသည်။ ထိုစစ်ဆေးမှုရလဒ်အရ ဘရာဇီးသည် အမေရိကန်၏ အကောက်ခွန်နှုန်းထား ထပ်မံတိုးမြှင့်ခြင်းကို ရင်ဆိုင်ရဖွယ် ရှိနေ ပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အီလွန်မက်က “အမေရိကန်ပါတီ” ဟု နာမည်ပေးထားသည့် နိုင်ငံရေး ပါတီတည်ထောင်ရန် ကြေညာလိုက်ပြီးနောက် ၎င်းပိုင် တက်စလာ ကုမ္ပဏီကြီး၏ စတော့ဈေးနှုန်းမှာ ၇ ရာခိုင်နှုန်းနီးပါး ကျဆင်းသွားကြောင်း အဆိုပါကုမ္ပဏီကဇူလိုင် ၇ ရက် (တနင်္လာနေ့) ပြောကြားလိုက်ပါသည်။ ထိုရာခိုင်နှုန်းမှာ ကုမ္ပဏီဈေးကွက်တန်ဖိုးအနေဖြင့် ဒေါ်လာ ၆၈ ဘီလီယံ ကျော် ရှိပါသည်။ 

အီလွန်မက်သည် အမေရိကန်ပါတီကို ဆီးနိတ်တွင် ၂ နေရာမှ ၃ နေရာ နှင့် အောက်လွှတ်တော်တွင် ၈ နေရာမှ ၁၀ နေရာခန့် ရရှိသွားအောင် ကြိုးပမ်းသွားမည်ဟု ပြောကြားထားပါသည်။ ထိုမဲများက အငြင်းပွားဖွယ် ဥပဒေများကို အဆုံးအဖြတ်ပေးရာတွင် ပြည်သူလူထု၏ အမှန်တကယ် လိုအပ်ချက်ကို အာမခံနိုင်မည် ဟု မက်က ပြောကြားထားပါသည်။ 

ဘီလီယံနာသူဌေးကြီး အီလွန်မက် နိုင်ငံရေးနယ်ပယ်ထဲ ထပ်မံ ဝင်ရောက်လာခြင်းမှာ ရင်းနှီးမြှုပ်နှံသူများကို စိုးရိမ်မှုမြင့်တက်စေခဲ့ပါသည်။ ယခုနှစ် အစောပိုင်းကလည်း မက်သည် အစိုးရစွမ်းဆောင်ရည်ဌာန (DOGE)၏ အဓိကအခန်းကဏ္ဍမှ ပါဝင်ကာ သမ္မတဒေါ်နယ်ထရမ့်နှင့် နီးကပ်စွာ ပူးပေါင်းဆောင်ရွက်ခဲ့ရာ တက်စလာ အမှတ်တံဆိပ်ကို ထိခိုက်စေနိုင် သည်ဟု ဝေဖန်သတ်မှတ်ခံခဲ့ရပါသည်။

မက်၏ နိုင်ငံရေးလှုပ်ရှားမှုများသည် အစောပိုင်းတွင် ဒေါ်နယ်ထရမ့် ချီးကျူးမှုကို ရရှိခဲ့သော်လည်း နောက်ပိုင်းတွင် အခွန်အခ လျှော့ချမှုများ၊ နေရောင်ခြည်နှင့် လေစွမ်းအင်သုံးစက်များ၊ လျှပ်စစ်ကားများအတွက် အထောက်အပံ့များ ဖြတ်တောက်ခံရမှုတို့နှင့်ပတ်သက်၍ နှစ်ဦးအကြား လူသိရှင်ကြား အငြင်းပွားခဲ့ကြပါသည်။

ကိုးကား- CNBC

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရုရှားနိုင်ငံတွင် ကျွမ်းကျင်လုပ်သား အလုံအလောက်မရှိမှုကို ဖြေရှင်းရန် ၂၀၂၅ ခုနှစ် နှောင်းပိုင်းတွင် အိန္ဒိယနိုင်ငံသား တစ်သန်းခန့် ရွှေ့ပြောင်း လာနိုင်ကြောင်း Ural Chamber of Commerce and Industry (UCCI) ဥက္ကဋ္ဌ Andrey Besedin က ပြောကြားခဲ့သည်။

Eurasian News Agency (EAN) နှင့် တွေ့ဆုံမေးမြန်းခန်းတွင် ၎င်းက ယခုနှစ်အစောပိုင်းက ကျင်းပခဲ့သည့် အစည်းအဝေးတစ်ခုတွင် အိန္ဒိယ တာဝန်ရှိသူများက အဆိုပါအရေအတွက်အား ပြောပြခဲ့ကြောင်း၊ ထို့အပြင် ရောက်ရှိလာမည့် အိန္ဒိယနိုင်ငံသားများအား စီမံဆောင်ရွက်နိုင်ရန် Yekaterinburg မြို့တွင် အိန္ဒိယကောင်စစ်ဝန်ရုံးအသစ် ဖွင့်လှစ်မည် ဖြစ်ကြောင်း ဖြည့်စွက်ပြောကြားခဲ့သည်။

“မိမိအနေဖြင့် အိန္ဒိယလုပ်ဖော်ကိုင်ဖက်များဆီက ကြားသိရသလောက် ဆိုပါက ယခုနှစ်ကုန်မတိုင်ခင်မှာ အိန္ဒိယက ကျွမ်းကျင်သူ တစ်သန်း နီးပါး ရုရှားနိုင်ငံကို ရောက်လာမည်၊ Sverdlovsk ဒေသလို နေရာတွေမှာလည်း ရောက်နိုင်သည်” ဟု ရုရှားစီးပွားရေးခေါင်းဆောင်က ပြောသည်။

Besedin က ရုရှား၏ စက်မှုလုပ်ငန်းများသည် နိုင်ငံတော်၏ တင်သွင်း ကုန်အစားထိုးရေး မူဝါဒများနှင့် ယူကရိန်းတွင် ဆက်လက် ဖြစ်ပွား နေသည့် စစ်ဆင်ရေးလိုအပ်ချက်များကြောင့် ထုတ်လုပ်မှုတိုးချဲ့ရန် ဖိအားများနေကြောင်း ဖော်ပြခဲ့သည်။

သို့သော် ၎င်းက Sverdlovsk ဒေသတွင် လုံလောက်သော အရည်အချင်း ပြည့်မီသည့် အလုပ်သမားအင်အား မရှိကြောင်း ထောက်ပြခဲ့သည်။ “အလုပ်သမားအင်အားတစ်စိတ်တစ်ပိုင်းကို အထူးစစ်ဆင်ရေးအတွက် စေလွှတ်ထားရပြီး လူငယ်တွေကလည်း စက်ရုံတွေမှာ အလုပ်မလုပ်ချင် ကြပါ” ဟု ၎င်းက ဆိုသည်။

Besedin ၏ အဆိုအရ အိန္ဒိယအလုပ်သမားများအား သတ္တုတူးဖော်ရေး နှင့် စက်မှုအင်ဂျင်နီယာလုပ်ငန်းများတွင် အလုပ်လုပ်ရန် မျှော်မှန်းထားသည်။

၎င်းက သီရိလင်္ကာနှင့် မြောက်ကိုရီးယားနိုင်ငံများနှင့်လည်း အလုပ်သမား ပူးပေါင်းဆောင်ရွက်ရေး ဆွေးနွေးမှုများ လုပ်ဆောင်နေကြောင်း ဖော်ပြ ခဲ့သည်။ ရုရှားအနေဖြင့် ထိုနိုင်ငံများမှ ရွှေ့ပြောင်းအလုပ်သမားများနှင့် အလုပ်လုပ်ကိုင်ရန် အတွေ့အကြုံမရှိသေးသော်လည်း ၎င်းကဏ္ဍကို “နိုင်ငံတကာအလုပ်သမားပူးပေါင်းဆောင်ရွက်မှု၏ အဆင့်သစ်” အဖြစ် ရှုမြင်ကြောင်း ပြောကြားခဲ့သည်။

ရုရှားအလုပ်သမားဝန်ကြီးဌာနက ၂၀၃၀ ပြည့်နှစ်တွင် အလုပ်သမား ၃.၁ သန်း ချို့တဲ့မည်ဟု ခန့်မှန်းထားပြီး ၂၀၂၄ ခုနှစ်တွင် ကုမ္ပဏီများက ဗီဇာ လိုအပ်သော နိုင်ငံများမှ ကျွမ်းကျင်အလုပ်သမား ၄၇,၀၀၀ ခန့်သာ ခန့်ထားနိုင်ခဲ့ကြောင်း ဖော်ပြခဲ့သည်။

၂၀၂၄ ခုနှစ် မတ်လက Crocus City Hall တွင် ဖြစ်ပွားခဲ့သော အကြမ်းဖက်တိုက်ခိုက်မှုအပြီး ရုရှားနိုင်ငံသည် ရွှေ့ပြောင်းနေထိုင်မှုဆိုင်ရာ ထိန်းချုပ်မှုများကို ပိုမိုတင်းကျပ်စွာ အကောင်အထည်ဖော်ခဲ့သည်။ ပြည်ထဲရေးဝန်ကြီးဌာန၏ ထုတ်ပြန်ချက်အရ ၂၀၂၄ ခုနှစ်အတွင်း နိုင်ငံခြားသား ၁၉၀,၀၀၀ ကျော်ကို နိုင်ငံမှ နှင်ထုတ်ခဲ့သည်။ ၂၀၂၅ ခုနှစ် ဧပြီလတွင် ရွှေ့ပြောင်းနေထိုင်မှုစည်းမျဉ်းများကို အကောင်အထည် ဖော်ရန်နှင့် စည်းကမ်းဖောက်ဖျက်မှုများ လျှော့ချရန် ဖက်ဒရယ် အေဂျင်စီ အသစ်တစ်ခု ဖွဲ့စည်းခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဂျာမန် ဇိမ်ခံပြိုင်ကားထုတ်လုပ်သည့် Porsche ကုမ္ပဏီကြီးမှ တရုတ် နိုင်ငံ၌ ပြင်းထန်သောယှဉ်ပြိုင်မှုများကြောင့် ယခုနှစ်ပထမနှစ်ဝက်အတွင်း ကမ္ဘာလုံးဆိုင်ရာရောင်းအား ကျဆင်းကြောင်း အင်္ဂါနေ့ (ဇူလိုင် ၈) ထုတ်ပြန်ချက်တွင် ဖော်ပြခဲ့သည်။ ၂၀၂၄ ခုနှစ် အလားတူကာလနှင့် နှိုင်းယှဉ်ပါက ကမ္ဘာ့ရောင်းအား ၆% ကျဆင်းခဲ့ပြီး ၎င်းအနက် အာရှနိုင်ငံ များ (အဓိက တရုတ်) တွင် ၂၈% အထိ ထိုးကျခဲ့သည်။

Porsche အတွက် တရုတ်သည် သမိုင်းကြောင်းအရ အရေးပါသော ဈေးကွက်တစ်ခုဖြစ်ခဲ့ပြီး ၂၀၂၂ ခုနှစ်တွင် ကုမ္ပဏီ၏ကမ္ဘာ့ရောင်းအား၏ ၃၀% ခန့်ကို ရရှိခဲ့သည်။ သို့သော် ၂၀၂၃ ခုနှစ်မှစ၍ ရောင်းအား ကျဆင်း မှုကြောင့် တရုတ်နိုင်ငံရှိ ကားရောင်းဝယ်ရေးကိုယ်စားလှယ်ဆိုင်များကို ပိတ်သိမ်းခဲ့ရသည်။

Porsche က ယခုလတ်တလော ရောင်းအားကျဆင်းမှုအတွက် တရုတ် ဈေးကွက်တွင် စိန်ခေါ်မှုများပြည့်နှက်နေသော ဈေးကွက်အခြေအနေနှင့် ပြင်းထန်သည့်ယှဉ်ပြိုင်မှုများကို အဓိကအကြောင်းအရင်းအဖြစ် ညွှန်းဆို ထားသည်။

Xiaomi အပါအဝင် တရုတ်ပြည်တွင်းကားလုပ်ငန်းများသည် စျေးနှုန်း ချိုသာစွာဖြင့် ထုတ်လုပ်မှုနှုန်းတိုးမြှင့်ကာ လျှပ်စစ်ကားများကို မိတ်ဆက် လာခြင်းဖြင့် ဈေးကွက်ဝေစုများ တိုးတက်ရယူလာကြသည်။ BYD နှင့် Chery ကဲ့သို့ တရုတ်ကားထုတ်လုပ်သူများသည် ကားထုတ်လုပ်ရေး လုပ်ငန်းစဉ်များကို ခေတ်မီနည်းပညာများဖြင့် သိသိသာသာ လျှော့ချနိုင် ခဲ့ပြီး ကမ္ဘာ့ပြိုင်ဘက်များထက် ပိုမိုမြန်ဆန်စွာ မော်ဒယ်အသစ်များမိတ်ဆက်နိုင်ခဲ့သည်။ Reuters ၏ ယခုလအစောပိုင်းသတင်းအရ တရုတ် ကုမ္ပဏီများသည် ကားထုတ်လုပ်ရေးကာလကို ၁၈ လအထိ လျှော့ချနိုင် ခဲ့ကာ နိုင်ငံခြားအမှတ်တံဆိပ်များ၏ ပျမ်းမျှ ၅.၄ နှစ် နှင့် နှိုင်းယှဉ်ပါက သိသာစွာ သာလွန်နေသည်။

အဆိုပါအခြေအနေကို တုံ့ပြန်သည့်အနေဖြင့် အမေရိကန်နှင့် EU တို့က တရုတ်ကားလုပ်ငန်းများအား အစိုးရထောက်ပံ့မှုများဖြင့် မတရား ယှဉ်ပြိုင် သည်ဟုစွပ်စွဲကာ အကောက်ခွန်မြှင့်တင်ခြင်းများ ပြုလုပ်ခဲ့သည်။ သို့သော် Reuters ၏ သုံးသပ်ချက်အရ တရုတ်ထုတ်ကုန်များ၏ နည်းပညာနှင့် စျေးနှုန်းချိုသာမှုသည် အစိုးရထောက်ပံ့မှုထက် ဖွံ့ဖြိုးရေးအရှိန်နှင့် စွမ်းဆောင်ရည် တို့ကြောင့် ပိုမိုအရေးပါသည်ဟု ဆိုသည်။

Porsche ၏ မူလဈေးကွက်ဖြစ်သော ဂျာမနီ တွင်လည်း ရောင်းအား ၂၃% ကျဆင်းခဲ့ပြီး ဥရောပဈေးကွက်တစ်ခုလုံးတွင် ၈% လျော့ကျခဲ့သည်။ ၂၀၂၄ ခုနှစ်တွင် ဂျာမနီစီးပွားရေး ၀.၂% ကျဆင်းခဲ့ပြီး ၂၀၂၃ ခုနှစ်က ၀.၃% လျော့နည်းခဲ့သည်။ စွမ်းအင်စျေးနှုန်းမြင့်မားမှု၊ အတိုးနှုန်းမြင့်တက်မှု၊ ဒစ်ဂျစ်တယ်ပြောင်းလဲရေး နှေးကွေးမှုနှင့် အရည်အချင်းပြည့်ဝသော အလုပ် သမားရှားပါးမှုတို့သည် ကားထုတ်လုပ်ရေးအပါအဝင် စက်မှုလုပ်ငန်းများ ကို ထိခိုက်စေခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂ 

နေပြည်တော် ဇူလိုင် ၈

 အမေရိကန်သမ္မတ ဒေါ်နယ်ထရမ့်က မြန်မာ၊ ဂျပန်၊ တောင်ကိုရီးယား၊ မလေးရှား၊ ကာဇက်စတန်၊ တူနီးရှား၊ ဘော့စနီးယား ဟာဇီဂိုးဗီးနား၊ တောင်အာဖရိက၊ အင်ဒိုနီးရှား၊ ဘင်္ဂလားဒေ့ရှ်၊ ဆားဘီးယား၊ ကမ္ဘောဒီးယား၊ ထိုင်း၊ လာအိုနှင့် စုစုပေါင်း နိုင်ငံ ၁၄ နိုင်ငံအား သွင်းကုန်ခွန် တိုးမြှင့်စည်းကြပ်ထားမှုနှင့်ပတ်သက်၍ ဇူလိုင် ၇ ရက်နေ့တွင် သက်ဆိုင်ရာနိုင်ငံများသို့ သဝဏ်လွှာ/ အကြောင်းကြားစာများ ပေးပို့ခဲ့ကြောင်း သိရှိရသည်။ ထိုသို့ပေးပို့ရာတွင် အမေရိကန်သမ္မတ ဒေါ်နယ်ထရမ့်က ပြည်ထောင်စုသမ္မတမြန်မာနိုင်ငံ၊ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် ထံသို့ ပေးပို့သည့် သဝဏ်လွှာ/အကြောင်းကြားစာ၌ အမေရိကန်သည် မြန်မာနှင့် ကုန်သွယ်ရေးတွင် ကုန်သွယ်မှုလိုငွေပြလျက်ရှိသော်လည်း ကုန်သွယ်မှုဆက်လက်ဆောင်ရွက်သွားမည်ဖြစ်ကြောင်း၊ မျှတမှုရှိသည့် ကုန်သွယ်မှုကို ဆောင်ရွက်ရန် ဆုံးဖြတ်ထားကြောင်း၊ မြန်မာနိုင်ငံမှ အမေရိကန်နိုင်ငံသို့ တင်ပို့သည့် မည်သည့်ပို့ကုန်အမျိုးအစားမဆို အခွန် ၄၀ ရာခိုင်နှုန်း ကောက်ခံသွားမည်ဖြစ်ကြောင်း၊ မြန်မာနိုင်ငံအတွင်းရှိ ကုမ္ပဏီများက အမေရိကန်နိုင်ငံအတွင်း စက်မှုလုပ်ငန်းများ လာရောက်ရင်းနှီးမြှုပ်နှံလုပ်ကိုင်နိုင်မှုနှင့် ကုန်သွယ်ခွန်အတွက် ညှိနှိုင်းနိုင်မှုတို့ကို ဖော်ပြထားကြောင်း သတင်းရရှိသည်။ 

ဆင်ဟွာ

MOI

နေပြည်တော် ဇူလိုင် ၈

“ဒီနေ့မှာတော့ မီဒီယာများ မေးမြန်းထားတဲ့ အမေရိကန်သမ္မတ ဒေါ်နယ်ထရမ့်က နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်ဆီကို ပေးပို့တဲ့ ကုန်သွယ်ရေးနဲ့ ပတ်သက်တဲ့ သဝဏ်လွှာ/ စာနဲ့ပတ်သက်ပြီး ပြောကြားသွားမှာ ဖြစ်ပါတယ်။”

“စာထဲမှာတော့ မြန်မာနိုင်ငံနဲ့ ကုန်သွယ်ရေးပြုလုပ်လိုတဲ့အကြောင်းနဲ့ ကုန်သွယ်ရေးလိုငွေများ ရှိနေတဲ့အကြောင်း၊ အကျဉ်းချုပ်ကတော့ အမေရိကန်နိုင်ငံအနေနဲ့ မြန်မာနိုင်ငံရဲ့ သွင်းကုန်တွေအပေါ်မှာ အခွန် ၄၀ ရာခိုင်နှုန်း စည်းကြပ်သွားမှာဖြစ်ကြောင်းနဲ့ ဒါနဲ့ပတ်သက်ပြီးလည်း မြန်မာနိုင်ငံအနေနဲ့ အမေရိကန်ပြည်ထောင်စုကသွင်းတဲ့ သွင်းကုန်တွေနဲ့ပတ်သက်ပြီးလည်း ဖြေလျှော့ပေးဖို့ ပြောကြားထားတာကို တွေ့ရပါတယ်။ ဒါ့အပြင် အမေရိကန်နိုင်ငံမှာလည်း မြန်မာနိုင်ငံအနေနဲ့ ရင်းနှီးမြှုပ်နှံမှုတွေ ပြုလုပ်နိုင်ဖို့ ပြောကြားထားတာလည်း တွေ့ရပါတယ်။ အခွန်နှုန်းထားတွေနဲ့ပတ်သက်ပြီး ညှိနှိုင်းနိုင်တဲ့အကြောင်း ပြောကြားထားတာလည်း တွေ့ရပါတယ်။ ဒီစာကိုလည်း ကျွန်တော်တို့ ကောင်းမွန်စွာ လက်ခံရရှိပါတယ်။ မြန်မာနိုင်ငံနဲ့ အမေရိကန်နိုင်ငံရဲ့ ကုန်သွယ်မှုပမာဏအနေနဲ့ ၂၀၂၃ ခုနှစ်-၂၀၂၄ ခုနှစ် ဘဏ္ဍာနှစ်မှာတော့ ကုန်သွယ်မှုပမာဏ အမေရိကန်ဒေါ်လာ ၇၀၁ ဒသမ ၉ သန်းခန့်ရှိခဲ့ပါတယ်။ ၂၀၂၄ ခုနှစ်-၂၀၂၅ ခုနှစ် မှာတော့ အမေရိကန် ဒေါ်လာ ၅၈၈ ဒသမ ၃ သန်းကျော်လောက် ရှိခဲ့ပါတယ်။ ဒီစာနဲ့ပတ်သက်ပြီး မြန်မာနိုင်ငံအစိုးရရဲ့ သဘောထားအနေနဲ့ကတော့ နံပါတ်တစ်ကတော့ အပြုသဘောဆောင်တဲ့ ညှိနှိုင်းမှု၊ ပြန်ကြားမှုတွေကို ဆောင်ရွက်သွားမှာ ဖြစ်ပါတယ်။ နံပါတ်နှစ်အချက်အနေနဲ့ကတော့ ဒီညှိနှိုင်းမှုတွေကနေပြီး နှစ်ဦးနှစ်ဖက် အကျိုးဖြစ်ထွန်းစေမည့် ရလဒ်များ ရရှိမယ်လို့မျှော်လင့်ပါတယ်။ အားလုံးကို ကျေးဇူးတင်ပါတယ်။”

MOI

ငပုတော   ဇူလိုင် ၇

ဧရာဝတီတိုင်းဒေသကြီး ငပုတောမြို့နယ်မှ ရန်ကုန်ဈေးကွက်သို့ ဇွန်လအတွင်း ကျားဂဏန်း ပိဿာချိန် ၇၅၀၀၀ ထိ တင်ပို့ရောင်းချနိုင်ခဲ့ကြောင်း ငပုတောမြို့နယ် ရေထွက်ကုန်ပစ္စည်းများရောင်းဝယ်ရေးပွဲရုံပိုင်ရှင် ဒေါ်ဌေးဝင်းက ပြောပြ၍ သိရသည်။

ငပုတောမြို့နယ်မှရန်ကုန်ဈေးကွက်သို့ မေလအတွင်း ကျားကဏန်း ပိဿာချိန် ၅၅၀၀၀ သာ တင်ပို့ရောင်းချနိုင်ခဲ့ပြီးဇွန်လအတွင်း ကျားဂဏန်း ပိဿာချိန် ၇၅၀၀၀ ထိ တင်ပို့ရောင်းချနိုင်ခဲ့ကြောင်း၊အဆိုပါ ကျားဂဏန်းများကို ရန်ကုန်ဈေးကွက်ကအဝယ်လိုက်နေကြောင်း သိရသည်။

“ဒေသထွက် ရေထွက်ကုန်တွေ ဈေးကွက်ထဲကိုပုံမှန်တင်ပို့ရောင်းချနေပါတယ်။ ဇွန်လအတွင်း ကျားဂဏန်းပိဿာချိန် တော်တော်များများတင်ပို့ရောင်းချခဲ့ရပါတယ်။ တင်ပို့ရောင်းချခဲ့တဲ့ ကျားဂဏန်းတွေက လတ်ဆတ်မှုနဲ့ အရွယ်အစား၊ အလေးချိန်အပေါ်မူတည်ပြီး ဈေးနှုန်းအပြောင်းအလဲရှိပါတယ်။ လက်ရှိမှာ ကျားဂဏန်းတွေကို ရန်ကုန်ဈေးကွက်ကအဝယ်လိုက်နေပါတယ်။ ဒီဘက်ကနေ ကျားဂဏန်းတွေကို ဒေသဈေးကွက်အပြင်အခြားဒေသတွေကို တင်ပို့ရောင်းချနေပါတယ်” ဟု ငပုတောမြို့နယ်ရေထွက်ကုန်ပစ္စည်းများ ရောင်းဝယ်ရေးပွဲရုံပိုင်ရှင် ဒေါ်ဌေးဝင်း က ပြောပြသည်။

ငပုတောမြို့နယ်မှတင်ပို့ရောင်းချခဲ့သည့် ကျားဂဏန်းတစ်ပိဿလျှင် ငွေကျပ် ၁၅၅၀၀ မှ ၃၃၅၀၀ ထိ အရွယ်အစားပေါ်မူတည်၍ ဈေးနှုန်းအပြောင်းအလဲရှိကြောင်း၊ အဆိုပါ ကျားဂဏန်းများ တင်ပို့ရောင်းချနေရသည့်အတွက်ရေလုပ်သားများ၊ ပွဲရုံပိုင်ရှင်များ၊ ကုန်သည်များ၊ကုန်တင်ယာဉ်အငှားလိုက်သူများ အဆင်ပြေနေကြောင်း သိရသည်။

ကျော်ကျော်လင်း

ရတနာပုံသတင်းစာ