ပွင့်ဖြူ   ဇူလိုင် ၅

မကွေးတိုင်းဒေသကြီး ပွင့်ဖြူ မြို့နယ်တွင် မိုးသီးနှံစိုက်ပျိုးရာသီ၌ ဖူးစားပြောင်း ၁၁၈၆ ဧက ထိ စိုက်ပျိုးပြီးစီးပြီဖြစ်ကြောင်း ပွင့်ဖြူမြို့နယ် စိုက်ပျိုးရေးဦးစီးဌာနမှ သိရသည်။

ပွင့်ဖြူမြို့နယ်တွင် မိုးသီးနှံစိုက်ပျိုးရာသီ၌ ဖူးစားပြောင်း ၂၃၁၆ ဧက စိုက်ပျိုးရန် လျာထားပြီး ဇွန်လပထမပတ်မှ စတင် စိုက်ပျိုးခဲ့ရာ ယနေ့တွင် ၁၁၈၆ ဧကထိ စိုက်ပျိုးပြီးစီးပြီဖြစ်ကြောင်း သိရသည်။

“မိုးသီးနှံစိုက်ပျိုးရာသီ ပွင့်ဖြူ မြို့နယ်မှာ ဖူးစားပြောင်း ၂၃၁၆ က စိုက်ပျိုးဖို့လျာထားပါတယ်။ ဒီနေ့ထိ ၁၁၈၆ ဧကထိ စိုက်ပျိုးပြီးစီးပြီဖြစ်ပါတယ်။ လျာထားဧကပြည့်မီအောင် စိုက်ပျိုးနိုင်ဖို့ ဆောင်ရွက်နေပါတယ်။ တောင်သူတွေကို ဖူးစားပြောင်းစိုက်ပျိုးတာနဲ့ပတ်သက်ပြီး အထွက်နှုန်း တိုးတက်ကောင်းမွန်စေဖို့၊ မျိုးကောင်းမျိုးသန့်တွေ စိုက်ပျိုးနိုင်စေဖို့ ၊ GAP နည်းစနစ်နဲ့ စိုက်ပျိုးနိုင်ဖို့ နည်းပညာပေးတာတွေဆောင်ရွက်ပေးနေပါတယ်” ဟု ပွင့်ဖြူမြို့နယ် စိုက်ပျိုးရေးဦးစီး ဌာန မြို့နယ်ဦးစီးမှူး ဒေါ်မိုးမိုးဝေ က ပြောပြသည်။ 

ပွင့်ဖြူမြို့နယ်တွင် မိုးသီးနှံ စိုက်ပျိုးရာသီ၌ စိုက်ပျိုးရေးဦးစီးဌာနက ဖူးစားပြောင်းစိုက်တောင်သူများကို အရည်အသွေးနှင့် အထွက်နှုန်း တိုးတက်ကောင်းမွန်စေရေး တောင်သူပညာပေး ဆွေးနွေးပွဲများနှင့် ကွင်းသရုပ်ပြပွဲများဆောင်ရွက်ခြင်း၊ ဖောငမြှောင် တောင်ပိုး ကြိုတင်ကာကွယ်ရေးစနစ်ဖြစ်သည့် စိုက်ပျိုးရေးဆိုင်ရာများ အသိပညာပေးလျက်ရှိကြောင်း သိရသည်။

ဖူးစားပြောင်းကို အထွက်နှုန်း တိုးတက်ကောင်းမွန်အောင် စိုက်ပျိုးနိုင်ပါက ဒေသတွင်း စားသုံးမှုဖူလုံစေမည့်အပြင် ပိုလျှံမှုကို ရောင်းချနိုင်သဖြင့် လူမှုစီးပွားဘဝများ မြင့်မားလာမည် ဖြစ်သောကြောင့် ဖူးစားပြောင်းကို တိုးချဲ့စိုက်ပျိုးနိုင်ရေး ဒေသမရွေးကြိုးပမ်းသင့်ကြောင်း မြို့နယ်ဦးစီးမှူး ဒေါ်မိုးမိုးဝေ က ပြောပြ၍ သိရသည်။ 

ရဲဝင်းနိုင်(ညောင်ဦး)

ရတနာပုံသတင်းစာ

အမေရိကန်နှင့် ပြုလုပ်မည့် ကုန်သွယ်ရေးဆိုင်ရာဆွေးနွေးပွဲ၌ အခွန် စည်းကြပ်မှုဆိုင်းငံ့ကာလကို သက်တမ်းတိုးရန် တောင်းဆိုနိုင်ကြောင်း ဇူလိုင် ၄ ရက်တွင် တောင်ကိုရီးယားကုန်သွယ်ရေးဝန်ကြီး Yeo Han-koo က ပြောကြားခဲ့သည်။

ပြီးခဲ့သည့်လတွင် တောင်ကိုရီးယား၏ ကုန်သွယ်ရေး သံတမန် အသစ် ဖြစ်လာသည့် Yeo သည် ဇူလိုင် ၄ ရက် (သောကြာနေ့)တွင် အမေရိကန် သို့ သွားရောက်၍ ဇူလိုင် ၅ ရက်တွင် အမေရိကန်နိုင်ငံဆိုင်ရာ ကုန်သွယ်ရေး ကိုယ်စားလှယ် Jamieson Greer အပါအဝင် အခြားအဆင့်မြင့် အရာရှိ များနှင့် တွေ့ဆုံဆွေးနွေးရန် စီစဉ်ထားသည်။ 

အမေရိကန်သို့ တင်သွင်းသည့် ကုန်ပစ္စည်းများအတွက် တိုးမြှင့်အခွန်နှုန်း မည်မျှ ကျသင့်မည်ကို သက်ဆိုင်ရာနိုင်ငံများသို့ ဇူလိုင် ၄ ရက်နေ့တွင် စာဖြင့် ပေးပို့အကြောင်းကြားမည်ဟု အမေရိကန်သမ္မတ ဒေါ်နယ်ထရမ့် က ပြောကြားခဲ့သည်။

တောင်ကိုရီးယားသည် အမေရိကန်သို့ တင်သွင်းသည့် မော်တော်ကား နှင့် သံမဏိထုတ်ကုန်များအပေါ် ထရမ့်၏ အခွန်နှုန်း တိုးမြှင့် ကောက်ခံခြင်း မှ ကင်းလွတ်ခွင့်ရရှိရန်နှင့် လက်ရှိ ဆိုင်းငံ့ပေးထားသည့် ၂၅ ရာခိုင်နှုန်း အခွန်တိုးမြှင့်စည်းကြပ်မှုအား ရှောင်ရှားရန် ကြိုးပမ်းလျက်ရှိသည်။

အမေရိကန်သည် ဗီယက်နမ်၏ သွင်းကုန်ပစ္စည်းများအတွက် မူလက သတ်မှတ်ထားသည့် အခွန် ၄၆% မှ ၂၀% အထိ လျှော့ချရန် သဘော တူညီခဲ့ကြောင်း ထရမ့်က ကြေညာခဲ့ပြီးနောက် တောင်ကိုရီးယား နိုင်ငံ သည် အမေရိကန်နှင့် ကုန်သွယ်ရေးသဘောတူညီချက်ရရှိရန် ကြိုးပမ်း ဆောင်ရွက်ခြင်းဖြစ်သည်။

ထရမ့်အစိုးရသည် ဗီယက်နမ်မှ သွင်းကုန်ပစ္စည်းများအတွက် အခွန်နှုန်း ကို ၄၆% မှ ၂၀% သို့ လျှော့ချပေးမည်ဖြစ်သော်လည်း ဗီယက်နမ်တွင် စက်ရုံများတည်ထောင်ထားသည့် Samsung အပါအဝင် တောင်ကိုရီးယား ကုမ္ပဏီများအနေဖြင့် အဆိုပါအခွန်များကြောင့် ကုန်ထုတ်စရိတ် တက်လာ နိုင်ကြောင်း၊ အဆိုပါကုမ္ပဏီများသည် ဗီယက်နမ်တွင် ရင်းနှီးမြှုပ်နှံမှုတိုးချဲ့ရန် ဒေါ်လာဘီလီယံချီ ရင်းနှီးမြှုပ်နှံထားကြောင်း Yeo က ပြောကြား ခဲ့သည်။

ကိုးကား -CNA 

ဘာသာပြန်ဆိုသူ-ဒေါ်မေသူခိုင်၊လက်ထောက်ညွှန်ကြားရေးမှူး၊နစက-၃

ဝါရှင်တန် ဇူလိုင် ၃

ထိုင်းနိုင်ငံ၏ ယခုနှစ်စီးပွားရေး ဖွံ့ဖြိုးမှုနှုန်းနှင့် ၂၀၂၆ ခုနှစ် စီးပွား ရေးဖွံ့ ဖြိုးမှုနှုန်းတို့ကို ကမ္ဘာ့ဘဏ်က ယနေ့တွင် ပြင်ဆင်သတ်မှတ်ခဲ့ကြောင်း သိရသည်။

ထိုင်းနိုင်ငံ၏ ယခုနှစ်စီးပွားရေးဖွံ့ဖြိုးမှုနှုန်းသည် ၁ ဒသမ ၈ ရာခိုင် နှုန်းသာရှိနိုင်ပြီး ၂၀၂၆ ခုနှစ် စီးပွားရေးဖွံ့ဖြိုးမှုနှုန်းမှာ ၁ ဒသမ ၇ ရာခိုင်နှုန်းအထိသာ ရှိနိုင်ကြောင်း ကမ္ဘာ့ဘဏ်ကထုတ်ပြန်ထားသည့် အစီရင်ခံစာ၌ ဖော်ပြထားသည်။

ကမ္ဘာ့စီးပွားရေး အခြေအနေ နှင့် ထိုင်းပြည်တွင်းစီးပွားရေးအခြေအနေများမရေမရာဖြစ်နေချိန်တွင် ကမ္ဘာ့ဘဏ်က ထိုင်းနိုင်ငံ၏ ယခု နှစ်စီးပွားရေးဖွံ့ဖြိုးမှုနှုန်းနှင့် ၂၀၂၆ ခုနှစ် စီးပွားရေးဖွံ့ဖြိုးမှုနှုန်းများကို ပြင်ဆင်သတ်မှတ်ခဲ့ခြင်းဖြစ်သည်။ ပြီးခဲ့သည့် ဖေဖော်ဝါရီလတွင် ထုတ်ပြန်ခဲ့သော ကမ္ဘာ့ဘဏ်အစီ ရင်ခံစာတွင် ထိုင်းနိုင်ငံ၏ ယခုနှစ် စီးပွားရေးဖွံ့ဖြိုးမှုနှုန်းကို ၂ ဒသမ ၉ ရာခိုင်နှုန်းအဖြစ် သတ်မှတ်ထား ပြီး ၂၀၂၆ ခုနှစ် စီးပွားရေးဖွံ့ ဖြိုးမှု နှုန်းကို ၂ ဒသမ ၇ ရာခိုင်နှုန်း သတ်မှတ်ထားသည်။ 
ထိုင်းနိုင်ငံသည် လက်ရှိအချိန်တွင် ပြည်ပပို့ကုန်ကဏ္ဍကျဆင်းလာမှု၊ ခရီးသွားလုပ်ငန်းကျဆင်းလာမှုတို့နှင့် ရင်ဆိုင်နေရသည်။ အထူးသဖြင့် ထိုင်းနိုင်ငံ၏ခရီးသွားလုပ်ငန်းမှာ ပြန်လည်နာလန်ထူ နိုင်ရေးအတွက် မျှော်လင့်ထားသည်ထက် ပိုမိုကြာမြင့်နိုင်သည်ဟု ကျွမ်းကျင်သူများက ခန့်မှန်းထားသည်။

Ref: Xinhus

Trs: KKO

YDNB Newspaper

အလုပ်အကိုင်အခြေအနေ နှင့်ပတ်သက်သည့် အချက်အလက်များ မျှော်မှန်းထားသည်ထက် ပိုကောင်းမွန်မှုကြောင့် ကမ္ဘာ့ရွှေဈေး ဒေါ်လာ ၃၀ ကျော်ကျဆင်းသွားသော်လည်း Wall Street စတော့ ရှယ်ယာဈေး မှာမူ ဒုတိယအကြိမ်ဆက်တိုက် စံချိန်တင်မြင့်တက်နေသည်။

ဇူလိုင် ၃ ရက်က ဈေးကွက်ပိတ်သိမ်းချိန်တွင် ကမ္ဘာ့ရွှေစျေးသည် တစ် အောင်စလျှင် ၃,၃၂၅ ဒေါ်လာဖြင့် ဒေါ်လာ ၃၁ ကျဆင်းခဲ့သည်။ ဈေးကွက်ဖွင့်လှစ်ထားစဉ်အချိန်အတွင်း တစ်ချိန်တွင် ရွှေစျေးသည် ၃,၃၁၅ ဒေါ်လာအထိ ကျဆင်းသွားခဲ့သည်။

အမေရိကန်အလုပ်သမားရေးရာဌာနမှ ဇွန်လအတွက် မျှော်မှန်းထားသည် ထက် ပိုမိုကောင်းမွန်သော အလုပ်အကိုင်အခြေအနေဆိုင်ရာ အစီရင်ခံစာ ထွက်ရှိပြီးနောက် ဈေးကွက်တည်ငြိမ်သွားခဲ့သည်။ အမေရိကန်နိုင်ငံတွင် အလုပ်အကိုင်အသစ် ၁၄၇,၀၀၀ ရရှိခဲ့ပြီး မျှော်မှန်းထားသည့် ၁၁၀,၀၀၀ ထက် ပိုမိုများပြားခဲ့သည်။ အဆိုပါအချက်အလက်များက အမေရိကန်ဗဟိုဘဏ် (Fed) ၏ အတိုးနှုန်းလျှော့ချမှုကို မကြာမီကာလအတွင်းလုပ်ဆောင်နိုင်ခြေကို လျော့နည်းစေသည်။ အတိုးနှုန်းမြင့်မားခြင်းက ရွှေကို စိတ်ဝင်စားမှုနည်းစေသည်။

အလုပ်အကိုင်အခြေအနေကောင်းမွန်မှုက အမေရိကန်ဒေါ်လာကို အားကောင်း စေခဲ့ပြီး ဒေါ်လာတန်ဖိုးတက်လာခြင်းက အခြားငွေကြေးသုံးစွဲသည့် ရွှေဝယ်လိုအားအတွက် ပိုမိုစျေးနှုန်းမြင့်မားစေသည်။ သို့သော် Julius Baer အဆိုအရ ဇူလိုင် ၃ ရက်က အမေရိကန်အောက်လွှတ်တော်မှဒေါ်နယ်ထရမ့်၏ အခွန်လျှော့ချရေးနှင့် အသုံးစရိတ်တိုးမြှင့်ရေး ဥပဒေကြမ်း အတည်ပြုခဲ့ခြင်းက ရေရှည်တွင် ရွှေအတွက်အကျိုးရှိစေမည်ဟု ဆိုသည်။ “အမေရိကန်အစိုးရ၏ ကြွေးမြီသည် ဒေါ်လာ ၃.၄ ထရီလီယံအထိ တိုးလာနိုင်ပြီး၊ ရင်းနှီးမြှုပ်နှံသူများက ဒေါ်လာအပေါ် စိုးရိမ်မှုတိုးလာကာ ရွှေဈေးကိုမြင့်တက်စေမည်” ဟု ၎င်းက ရှင်းပြခဲ့သည်။

ဇွန်လအတွင်း အလုပ်အကိုင်အခြေအနေကောင်းမွန်မှုက အမေရိကန်စတော့ ရှယ်ယာဈေးကို ဆက်လက်မြင့်တက်စေခဲ့သည်။ S&P 500 နှင့် Nasdaq Composite အညွှန်းကိန်းများသည် အသီးသီး ၀.၈% နှင့် ၁% တက်ကာ ဒုတိယအကြိမ်ဆက်တိုက် စံချိန်သစ်တင်ခဲ့သည်။ DJIA လည်း ၀.၇၇% တက်ပြီး ၄၄,၈၂၈ ပွိုင့် အထိရောက်ရှိခဲ့သည်။

ချစ်ပ်ထုတ်လုပ်သူ Nvidia ၏ စတော့ရှယ်ယာဈေးသည် ၁.၃% တက်ကာ ကုမ္ပဏီ၏ စျေးကွက်တန်ဖိုးသည် ဒေါ်လာ ၃.၈၉ ထရီလီယံ အထိ ရောက်ရှိခဲ့သည်။ ဈေးကွက်ဖွင့်စဉ်ကာလအတွင်း ၎င်း၏တန်ဖိုးသည် ဒေါ်လာ ၃.၉၂ ထရီလီယံ အထိရောက်ရှိခဲ့ပြီး Apple ၏ စံချိန်တင် ဒေါ်လာ ၃.၉၁၅ ထရီလီယံ ကိုပင် ကျော်လွန်သွားခဲ့သည်။

ဇူလိုင် ၃ ရက်တွင် အမေရိကန်စတော့ရှယ်ယာစျေးကွက်သည် လွတ်လပ်ရေး နေ့ အခမ်းအနားအတွက် အချိန်တိုတောင်းစွာ ဖွင့်လှစ်ခဲ့သဖြင့် ကုန်သွယ်မှုပမာဏ နည်းပါးခဲ့သည်။ Man Group ၏ စျေးကွက် လေ့လာ သုံးသပ်ရေးပညာရှင် Kristina Hooper က “အဆိုပါတိုးတက်မှုကို အဓိကဦးဆောင်နေသည်မှာ လက်လီရင်းနှီးမြှုပ်နှံသူများဖြစ်ပြီး ၎င်းတို့ သည် ငွေကြေးဖောင်းပွမှုဖိအားနှင့် ကုန်သွယ်ခွန် မတည်ငြိမ်မှုများကို လျစ်လျူရှုကာ အလုပ်အကိုင်အခြေအနေကောင်းမွန်မှုမှ အကောင်းမြင် စိတ်ကိုသာ အာရုံစိုက်နေကြသည်” ဟု ရှင်းပြခဲ့သည်။ 

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရှမ်းပြည်နယ်(တောင်ပိုင်း)မှ စိုက်ပျိုးထုတ်လုပ်ထွက်ရှိသည့်ကုန်စိမ်းသီးနှံများကို အနယ်နယ်အရပ်ရပ်သို့ တင်ပို့ရာတွင် သယ်ယူပို့ဆောင်မှုအခက်အခဲများကြောင့် ယခင်လအောက်လျော့နည်းခဲ့ကြောင်း သိရသည်။

ကုန်စိမ်းသီးနှံများအနေဖြင့် ခရမ်းချဉ်သီး၊ ဂေါ်ဖီထုပ်များမှာ ဇွန်လအစပိုင်းတွင် ဈေးနှုန်းကျဆင်းခဲ့၍ ဇွန်လကုန်ပိုင်းတွင် ဈေးနှုန်းအနည်းငယ်မြင့်တက်မှုမှာ ခရမ်းချဉ်သီးအနေဖြင့် (၁,၅၀၀ မှ ၂,၈၀၀) ကျပ်၊ ဂေါ်ဖီထုပ်မှာ (၅၀၀ မှ ၁၀၀၀)ကျပ် ရှိခဲ့ပြီး အခြားကုန်စိမ်းသီးနှံများမှာ အောက်ပိုင်းဒေသများမှ စိုက်ပျိုးထွက်ရှိချိန်ဖြစ်ခြင်း၊ သယ်ယူပို့ဆောင်မှုအခက်အခဲများကြောင့် စီးဆင်းမှုမှာ ယခင်လအောက်လျော့နည်းခဲ့ကြောင်း သိရသည်။

ရှမ်းပြည်နယ်(တောင်ပိုင်း)မှ စိုက်ပျိုးထုတ်လုပ်ထွက်ရှိသည့် ဟင်းသီးဟင်းရွက်များ၊ စားဖိုဆောင်သီးနှံများ၊ သစ်သီးဝလံများနှင့် ပန်းမန်များကို အောင်ပန်းမြို့ရှိပွဲရုံများမှတဆင့် မြန်မာတစ်နိုင်ငံလုံးသို့ တင်ပို့ဖြန့်ချီပေးနေခြင်းဖြစ်သည်။

ထိုသို့တင်ပို့ရာတွင် ပြီးခဲ့သည့် ဇွန်လအတွင်း၌ ဟင်းသီးဟင်းရွက်များဖြစ်သည့် ဂေါ်ဖီထုပ်၊ ပန်းမုံလာ၊ ရွှေပဲ၊ မုန်ညှင်း၊ ဖရုံသီး၊ ခရမ်းသီး၊ ခရမ်းချဉ်သီး၊ ငရုတ်ပွ၊ မုန်လာဥနီ၊ ဘိုစားပဲ စသည့်သီးနှံများ အနေဖြင့် ကုန်ချိန်ပိဿာ (၃၂)သိန်းကျော်၊ စားဖိုဆောင်သီးနှံများမှ ကြက်သွန်ဖြူ ကုန်ချိန်ပိဿာ (၁၈)သိန်းကျော်၊ ချင်းနှင့် နနွင်းမှာ ကုန်ချိန်ပိဿာ (၆)သိန်းကျော်ခန့်ကို အောင်ပန်းပွဲရုံများမှ မြန်မာတစ် နိုင်ငံလုံးသို့ တင်ပို့နိုင်ခဲ့ကြောင်း သိရသည်။

ထို့ပြင် ပြည်ပပို့ကုန် ပြောင်းဖူးစေ့အနေဖြင့် ကုန်ချိန်ပိဿာ (၆၇)သိန်းကျော်ကို ရန်ကုန်မြို့သို့တင်ပို့ခဲ့ကြောင်းလည်း သိရသည်။

ဈေးကွက်ဈေးနှုန်းအနေဖြင့် ပြောင်းသီးနှံမှာ ဇွန်လအတွင်း ပြည်ပဝယ်လိုအားကောင်းပြီး ရန်ကုန်ဈေးကွက်မှ အဆွဲများသဖြင့် ပြောင်းဈေးအနေဖြင့် ယခင် တစ်ပိဿာလျှင်(၁,၅၅၀)ကျပ်မှ ယခုအခါ (၁,၅၈၅) ကျပ်ခန့် ဈေးမြင့်တက်ခဲ့သည်။

ကြက်သွန်ဖြူနှင့် အာလူးမှာ ဈေးနှုန်းတည်ငြိမ်ပြီး ဈေးကွက်အဝင်နည်းမှုကြောင့် စီးဆင်းမှုမှာ ပုံမှန်အတိုင်းဖြစ်ပေါ်ခဲ့သလို ချင်းအနေဖြင့် ဥမပေါ်ချိန်ဖြစ်သည့်အတွက် (၁,၅၀၀ မှ ၂,၅၀၀)ကျပ် ဈေးသာရှိပြီး ပြည်တွင်းသုံးသာ အဆွဲများခဲ့ကြောင်း သိရသည်။

Popular Myanmar

အမေရိကန်သမ္မတ ဒေါ်နယ်ထရမ့်သည် အကောက်ခွန်တိုးမြှင့်မှုအား ရက် ၉၀ ဆိုင်းငံ့ ကာလ သက်တမ်းမကုန်ဆုံးမီ ဗီယက်နမ်နိုင်ငံနှင့်ကုန်သွယ်ရေး သဘောတူညီမှုရရှိကြောင်း ကြေညာခဲ့သည်။ အခြား ကုန်သွယ် ဖက်နိုင်ငံများကလည်း အခွန်စည်းကြပ်မှုဆိုင်းငံ့ကာလ သက်တမ်း ကုန်ဆုံးမည့်လာမည့် ဇူလိုင်လ ၉ ရက်နေ့မတိုင်မီ အမေရိကန်နှင့် ကုန်သွယ်မှုသဘောတူညီချက် ရရှိရန် ကြိုးပမ်းနေကြသည်။

ထရမ့်က ဗီယက်နမ်ထုတ်ကုန်ပစ္စည်းများအပေါ်တွင် ၂၀% အခွန် စည်းကြပ် မည်ဖြစ်ပြီး ဗီယက်နမ်မှတစ်ဆင့် အမေရိကန်သို့ တင်သွင်းလာသည့် အခြားနိုင်ငံများ၏ကုန်ပစ္စည်းများ အပေါ် အခွန် ၄၀ % စည်းကြပ်မည်ဖြစ်ကြောင်း ထရမ့်က သတိပေးခဲ့သည်။ တရုတ်ကုန်ပစ္စည်းများအားဗီယက်နမ်မှတစ်ဆင့် လှည့်ပတ်တင်သွင်းခြင်းကို တားဆီးရန်အတွက် ထိုသို့ဆောင်ရွက်ခြင်းဖြစ်ကြောင်း အမေရိကန်မီဒီယာများတွင် ဖော်ပြ ထားသည်။ အပြန်အလှန်အားဖြင့် ဗီယက်နမ်က အမေရိကန် ကုန်ပစ္စည်း များအား ၎င်း၏ စျေးကွက်သို့ အပြည့်အဝဝင်ရောက်ခွင့်ပေးရန် အကောက်ခွန် လျှော့ချပေးရန် သဘောတူညီထားသည်။ 

အမေရိကန် စီးပွားရေးဌာနက ထုတ်ပြန်သည့် အချက်အလက်များအရ အမေရိကန်သည် မက္ကဆီကို၊ ဥရောပသမဂ္ဂနှင့် တရုတ်နိုင်ငံတို့ပြီးလျှင် ဗီယက်နမ်နှင့် စတုတ္ထမြောက် အကြီးဆုံး ကုန်သွယ်ရေး လိုငွေပြမှု ရှိနေသည်။ 

လက်ရှိတွင် အမေရိကန်နှင့် ကုန်သွယ်ရေးသဘောတူညီချက် တရားဝင် လက်မှတ်ရေးထိုးပြီးစီးသည့် တစ်ခုတည်းသော နိုင်ငံမှာ ဗြိတိန်နိုင်ငံ ဖြစ်သည်။ အမေရိကန်သည် တရုတ်နှင့် ကုန်သွယ်ရေး သဘောတူညီချက် ရရှိရန် ဆက်လက်ညှိနှိုင်းဆွေးနွေးနေဆဲဖြစ်ပြီး ယခုသီတင်းပတ်အတွင်း အိန္ဒိယနှင့် ယာယီသဘောတူညီချက်ရရှိနိုင်သည်ဟု Financial Times တွင် ဖော်ပြထားသည်။ 

ကိုးကား - NHK

ဘာသာပြန်ဆိုသူ-ဒေါ်မေသူခိုင်၊ လက်ထောက်ညွှန်ကြားရေးမှူး၊နစက-၃

လပွတ္တာ   ဇူလိုင် ၂

ဧရာဝတီတိုင်းဒေသကြီး လပွတ္တာမြို့နယ်မှ ဒေသထွက် မျှင်ငါးပိများ အရောင်းအဝယ်ကောင်းမွန်နေကြောင်း လပွတ္တာမြို့နယ် ငါးပိ၊ ငါးခြောက်ရောင်းဝယ်ရေးပွဲရုံပိုင်ရှင် ဒေါ်ဌေးဌေး က ပြောပြ၍ သိရသည်။

လပွတ္တာမြို့နယ်တွင်ဒေသထွက် မျှင်ငါးပိများ ယခုနှစ် ဇွန်လတတိယပတ်မှ ယနေ့ထိ အရောင်းအဝယ်ကောင်းမွန်နေကြောင်း၊ အဆိုပါဒေသထွက် မျှင်ငါးပိများ တစ်ရက်လျှင် ပိဿာချိန် ၄၅၀၀ မှ၇၀၀၀ ထိ အရောင်းအဝယ်ကောင်းမွန်နေကြောင်းသိရသည်။

“လက်ရှိ မျှင်ငါးပိတွေက ဒေသတွင်းမှာကို အရောင်းအဝယ်ကောင်းနေတာပါ။ မျှင်ငါးပိတစ်ပိဿာကို ငွေကျပ် ၂၅၅၀၀ ထိ ဈေးပေါက်နေပါတယ်။ လပွတ္တာမြို့နယ်က မျှင်ငါးပိတွေကို ဒေသဈေးကွက်အပြင် မော်လမြိုင်ကျွန်းဘက်နဲ့ အခြားဒေသတွေက ဝယ်ယူမှု အားကောင်းနေလို့ အရောင်းအဝယ် ကောင်းနေတာပါ။ ဒီဘက်က မျှင်ငါးပိရောင်းဝယ်သူတွေက ဒေသထွက်မျှင်ငါးပိတွေကို မှာယူတဲ့ဒေသထိ လိုက်လံပို့ပေးနေပါတယ်” ဟု လပွတ္တာမြို့နယ် ငါးပိ၊ ငါးခြောက်ရောင်းဝယ်ရေးပွဲရုံပိုင်ရှင် ဒေါ်ဌေးဌေး က ပြောပြသည်။

လပွတ္တာမြို့နယ်တွင် မျှင်ငါးပိရောင်းဝယ်ရေးပွဲရုံပိုင်ရှင်များသည် ဒေသထွက်မျှင်ငါးပိများကို စနစ်တကျထုပ်ပိုးကာ အခြားဒေသများသို့ တင်ပို့ရောင်းချနေကြောင်း၊ အဆိုပါမျှင်ငါးပိများ အရောင်းအဝယ်ကောင်းလာသည့်အတွက် ကုန်သည်များ၊ ပွဲရုံပိုင်ရှင်များ၊ လုပ်သားများ အဆင်ပြေနေကြောင်း သိရသည်။

ကျော်ကျော်လင်း

ရတနာပုံသတင်းစာ

နေပြည်တော် ဇူလိုင် ၂

နိုင်ငံတော်၏ စီးပွားရေးတိုးတက်စေရေး လုပ်ငန်းညှိနှိုင်းအစည်းအဝေးကို ယနေ့မွန်းလွဲပိုင်းတွင် နေပြည်တော်ရှိ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံး အစည်းအဝေးခန်းမ၌ကျင်းပရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်အမှာစကားပြောကြားသည်။

အစည်းအဝေးသို့ ကောင်စီအဖွဲ့ဝင်များ၊ ပြည်ထောင်စုဝန်ကြီးများ၊ နေပြည်တော်ကောင်စီဥက္ကဋ္ဌ၊ ဒုတိယဝန်ကြီးများ၊ ဌာနဆိုင်ရာတာဝန်ရှိသူများ တက်ရောက်ကြပြီး တိုင်းဒေသကြီးနှင့် ပြည်နယ်ဝန်ကြီးချုပ်များ Video Conferencing ဖြင့်တက်ရောက်ကြသည်။

စိုက်ပျိုးမွေးမြူရေးကုန်ထုတ်လုပ်မှု လုပ်ငန်းများတိုးတက်အောင် ဆောင်ရွက်ခြင်းဖြင့် နိုင်ငံ့စီးပွားရေးတိုးတက်လာမည်ဖြစ်

ဦးစွာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က အဖွင့်အမှာစကားပြောကြားရာ၌ မိမိတို့နိုင်ငံ၏ အဓိကစီးပွားရေးလုပ်ငန်းမှာ စိုက်ပျိုးရေးနှင့် မွေးမြူရေးကိုအခြေခံသည့် ကုန်ထုတ်လုပ်ငန်းများကိုဆောင်ရွက်သည့် နိုင်ငံတစ်ခုဖြစ်ကြောင်း၊ အခြေခံစားကုန်ဖြစ်သည့် ဆန်၊ ဆီနှင့် အသားငါးများကို အထွက်နှုန်းများ တိုးတက်ထုတ်လုပ်နိုင်ခြင်းဖြင့် စားသောက်ကုန်များ၏ ဈေးနှုန်းမှာ သင့်တင့်သည့် ဈေးနှုန်းတစ်ခုဖြစ်ရန်လိုကြောင်း၊ မိမိအနေဖြင့် စိုက်ပျိုးမွေးမြူရေးကိုအခြေခံသည့် ကုန်ထုတ်လုပ်ငန်းများတိုးတက်စေရေး အမြဲမပြတ်တိုက်တွန်းပြောကြားလျက်ရှိကြောင်း၊ စိုက်ပျိုးမွေးမြူရေးလုပ်ငန်းများ ဆောင်ရွက်ရန်အတွက်ရှိပြီးဖြစ်သည့် အခြေခံကောင်းများကို အသုံးချ၍ ကုန်ထုတ်လုပ်မှု တိုးတက်အောင် ဆောင်ရွက်သွားကြရန်လိုကြောင်း၊ ဆီထွက်သီးနှံများဖြစ်သည့် မြေပဲ၊ နှမ်း၊ နေကြာ၊ ပဲပုပ် စသည့် သီးနှံများကို စိုက်ပျိုးလျက်ရှိသော်လည်း ပြည်တွင်းဆီဖူလုံမှုမှာ လိုအပ်ချက်များရှိနေခြင်းကြောင့် စားသုံးဆီများကို ပြည်ပမှတင်သွင်းနေရကြောင်း၊ ဆီဖူလုံရေးအမြဲ တွန်းအားပေးဆောင်ရွက်သွားရန်လိုကြောင်း။

နိုင်ငံတစ်ခု၏ စီးပွားရေးကို GDP ဖြင့်တိုင်းတာကြကြောင်း၊ ၂၀၂၄ -၂၀၂၅ ခုနှစ် ဘဏ္ဍာနှစ်တွင် မိမိတို့နိုင်ငံ၏ GDP မှာ အမေရိကန်ဒေါ်လာ ၇၆ ဒသမ ၄ ဘီလီယံရှိကြောင်း၊ ၂၀၂၅-၂၀၂၆ ဘဏ္ဍာနှစ်တွင် အမေရိကန်ဒေါ်လာ ၈၁ ဒမသ ၆ ဘီလီယံအထိ မျှော်မှန်းဆောင်ရွက်လျက်ရှိပြီး ၅ ဒသမ ၂ ဘီလီယံခန့် တိုးတက်အောင် ရည်မှန်းဆောင်ရွက်နေခြင်းဖြစ်ကြောင်း၊ ထိုသို့မိမိတို့အနေဖြင့် မျှော်မှန်းဆောင်ရွက်နေချိန်တွင် ကမ္ဘာ့ဘဏ်မှ မိမိတို့နိုင်ငံ၏ စီးပွားရေးကို ယခင်က ၂ ဒသမ ၅ အထိ မျှော်မှန်းထားသော်လည်း လက်ရှိအချိန်တွင် အနုတ် ၂ ဒသမ ၅ အထိကျဆင်းနိုင်သည်ဟု ခန့်မှန်းထားသည်ကိုတွေ့ရှိရကြောင်း၊ ၎င်းတို့ တွက်ချက်သည့်စာရင်းများတွင် အချက်အလက်များ မှန်ကန်မှုမရှိခြင်းနှင့် ပြည့်စုံမှုမရှိခြင်းများရှိသည်ကိုတွေ့ရှိရကြောင်း၊ မိမိတို့နိုင်ငံအတွက် အရေးကြီးသည်မှာ အမှန်တကယ်အလုပ်လုပ်ရန်လိုကြောင်း၊ မည်သို့ပင် နိုင်ငံ၏ GDP ကျဆင်းမည်ဟု ၎င်းတို့အနေဖြင့် မျှော်မှန်းထားသော်လည်း နိုင်ငံအတွင်းနေထိုင်သူများက ကြိုးပမ်းဆောင်ရွက်ပါက နိုင်ငံ၏ GDP မှာတိုးတက်လာမည်ဖြစ်ကြောင်း။

မိမိတို့နိုင်ငံအနေဖြင့် အာဆီယံနိုင်ငံများနှင့် အိမ်နီးချင်းနိုင်ငံများနှင့် နှိုင်းယှဉ်ပါက GDP နည်းပါးလျက်ရှိသဖြင့် GDP တိုးတက်စေရေး ကုန်ထုတ်လုပ်ငန်းများ တိုးတက်အောင် စွမ်းအားရှိသမျှ အားထုတ်ကြိုးပမ်းဆောင်ရွက်သွားကြရန်လိုကြောင်း၊ မိမိအနေဖြင့် ပြီးခဲ့သည့်ရက်ပိုင်းအတွင်းက ဘယ်လာရုစ်နိုင်ငံတွင် ကျင်းပပြုလုပ်သည့် စတုတ္ထအကြိမ် ဥရောပ-အာရှစီးပွားရေးဖိုရမ် (EEF 2025) သို့ တက်ရောက်ခဲ့ကြောင်း၊ ဘယ်လာရုစ်နိုင်ငံသည် Agro base industries ကို ဆောင်ရွက်သည့်နိုင်ငံတစ်ခုဖြစ်ကြောင်း၊ ဘယ်လာရုစ်နိုင်ငံ၏ GDP မှာ အမေရိကန်ဒေါ်လာ ၇၃ ဒသမ ၁ ဘီလီယံရှိကြောင်း၊ စိုက်ပျိုးမွေးမြူရေးပို့ကုန်များမှ ရရှိမှုမှာ အမေရိကန်ဒေါ်လာ ၆ ဒသမ ၈ ဘီလီယံမှ ၈ ဒသမ ၂ ဘီလီယံရှိကြောင်း၊ မြန်မာနိုင်ငံ၏ စိုက်ပျိုးမွေးမြူရေးပို့ကုန်များမှ ရရှိမှုမှာ အမေရိကန်ဒေါ်လာ ၄ ဒသမ ၈ ဘီလီယံခန့်သာရှိကြောင်း၊ ဘယ်လာရုစ်နိုင်ငံ၏ထက်ဝက်ခန့်သာရှိပြီး ခေတ်မီစိုက်ပျိုးမွေးမြူရေးလုပ်ငန်းများ တိုးတက်အောင် ဆောင်ရွက်ရန်လိုအပ်လျက်ရှိကြောင်း၊ ထို့ကြောင့် ဖိုရမ်တက်ရောက်ရန် အဓိကဖြစ်သော်လည်း နိုင်ငံအတွက်အချိန်ပေး၍ ၎င်းကဏ္ဍများကိုလေ့လာခဲ့ကြောင်း၊ မိမိတို့နိုင်ငံနှင့် နှိုင်းယှဉ်ပါက မိမိတို့နိုင်ငံထက် ဧရိယာအကျယ်အဝန်းအရ သေးငယ်ခြင်း၊ လူနေထိုင်မှုအရ နည်းပါးခြင်းရှိသော်လည်း GDP မှာပိုမိုမြင့်မားသည်ကိုတွေ့ရကြောင်း၊ ဘယ်လာရုစ်နိုင်ငံအနေဖြင့် ခေတ်မီသည့် စိုက်ပျိုးမွေးမြူရေးလုပ်ငန်းများကို ဆောင်ရွက်၍ ထုတ်ကုန်များကိုထုတ်လုပ်ပြီး ပြည်ပသို့တင်ပို့နိုင်မှု ပိုမိုများပြားသည်ကို လေ့လာတွေ့ရှိရကြောင်း၊ ကမ္ဘာပေါ်၌ အဆင့်မီလယ်ထွန်စက်ပစ္စည်းများ ထုတ်လုပ်တင်ပို့သည့် နိုင်ငံတစ်ခုဖြစ်သည်ဟုသိရှိခဲ့ရကြောင်း၊ အလားတူ မွေးမြူရေးနှင့်ပတ်သက်၍လည်း နို့စားနွားများမွေးမြူ၍ ခေတ်မီစက်ကိရိယာများ အသုံးပြုပြီး နို့ထွက်ပစ္စည်းများ ထုတ်လုပ်ခြင်းများဆောင်ရွက်၍ ပြည်ပသို့တင်ပို့သည်ကို လေ့လာသိရှိခဲ့ရကြောင်း။

အလားတူ ရုရှားဖက်ဒရေးရှင်းနိုင်ငံ Republic of Buryatia သို့ ရောက်ရှိချိန်တွင်လည်း ၎င်းတို့အနေဖြင့် ဒေသတွင်းမွေးမြူရေးလုပ်ငန်းများကို ဆောင်ရွက်ရာ၌ ခေတ်မီနည်းစနစ်များကို အသုံးပြု၍ မျိုးကောင်းမျိုးသန့်များဖြင့် မွေးမြူပြီး ထွက်ရှိလာသည့် အသားများကို ပြည်ပသို့တင်ပို့လျက်ရှိသည်ကို သိရှိခဲ့ရကြောင်း၊ ထို့ကြောင့် မိမိတို့နိုင်ငံတွင် စိုက်ပျိုးမွေးမြူရေးလုပ်ငန်းများကိုဆောင်ရွက်ရာ၌ ၎င်းနိုင်ငံများ၏ ကုန်ထုတ်လုပ်မှုနည်းလမ်းများကို အတုယူ၍ မိမိတို့နိုင်ငံတွင်ရှိပြီးဖြစ်သည့် အခြေခံကောင်းများကို အသုံးချပြီး စနစ်တကျဖြင့် ဆောင်ရွက်သွားမည်ဆိုပါက ၎င်းတို့ကဲ့သို့ အောင်မြင်သည့် စိုက်ပျိုးမွေးမြူရေးကုန်ထုတ်လုပ်မှုလုပ်ငန်းများကို ဆောင်ရွက်နိုင်မည်ဖြစ်ကြောင်း။

မိမိတို့နိုင်ငံတွင် တစ်နိုင်ငံလုံးဆန်ဖူလုံမှုအနေဖြင့် ၁၇၀ ရာခိုင်နှုန်းခန့်ရှိကြောင်း၊ ဆန်ဖူလုံမှုမရှိသည့် တိုင်းဒေသကြီးနှင့် ပြည်နယ်များလည်းရှိသည်ကို တွေ့ရှိရပြီး ပန်းတိုင်ရည်မှန်းချက်များပြည့်မီအောင် စနစ်တကျစိုက်ပျိုး၍ အထွက်နှုန်းတိုးတက်ကောင်းမွန်အောင် ဆောင်ရွက်သွားမည်ဆိုပါက တိုင်းဒေသကြီးနှင့် ပြည်နယ်များအလိုက် ဆန်ဖူလုံမှုများရှိလာမည်ဖြစ်ကြောင်း၊ ချင်းပြည်နယ်၊ တနင်္သာရီတိုင်းဒေသကြီး၊ မကွေးတိုင်းဒေသကြီး၊ မန္တလေးတိုင်းဒေသကြီး၊ ရန်ကုန်တိုင်းဒေသကြီးနှင့် ရှမ်းပြည်နယ်တို့တွင် ဆန်ဖူလုံမှုမရှိသည်ကို တွေ့ရကြောင်း၊ အဆိုပါတိုင်းဒေသကြီးနှင့် ပြည်နယ်များ၌ ပန်းတိုင်ရည်မှန်းချက်အတိုင်း ပြည့်မီအောင် ဆောင်ရွက်နိုင်မည်ဆိုပါက ချင်းပြည်နယ်နှင့် မန္တလေးတိုင်းဒေသကြီးမှလွဲ၍ ကျန်တိုင်းဒေသကြီးနှင့် ပြည်နယ်များတွင် ဆန်ဖူလုံမှုတိုးတက်လာမည်ဖြစ်ကြောင်း၊ မိမိတို့နိုင်ငံမှထွက်ရှိသည့် ဆန်များကို ပြည်ပနိုင်ငံများသို့ အရည်သွေးပြည့်မီစွာဖြင့် ထုတ်လုပ်တင်ပို့နိုင်မည်ဆိုပါက နိုင်ငံခြားဝင်ငွေများ ပိုမိုရရှိလာမည်ဖြစ်ကြောင်း၊ ထို့ကြောင့် မိမိတို့အနေဖြင့် စိုက်ပျိုးရေးကုန်ထုတ်လုပ်မှုလုပ်ငန်းများ တိုးတက်အောင် ကြိုးပမ်းဆောင်ရွက်သွားကြရန်လိုကြောင်း။

တိုင်းဒေသကြီးနှင့်ပြည်နယ်များအလိုက် စပါးစိုက်ပျိုးရေးလုပ်ငန်းများ ဆောင်ရွက်ရာတွင် အစေ့ချစိုက်ပျိုးခြင်း၊ ကောက်စိုက်စက်ဖြင့် စိုက်ပျိုးခြင်းများ ဆောင်ရွက်ရန် တိုက်တွန်းခဲ့ပြီး လုပ်ငန်းများ ပိုမိုတိုးတက်လာသည်ကိုတွေ့ရကြောင်း၊ စပါးစိုက်ပျိုးခြင်းလုပ်ငန်းများ ဆောင်ရွက်ရာတွင် ပင်ကြားတန်းကြားများမှန်ကန်ရန်နှင့် ကောက်ကွက်များ ပြည့်မီမှသာ စပါးပင်များရှင်သန်ဖြစ်ထွန်း၍ အထွက်နှုန်းများတိုးတက်လာမည်ဖြစ်ကြောင်း၊ အပင်ရှိမှသာ အနှံ၊ အစေ့နှင့် အသီးများရှိလာမည်ဖြစ်သဖြင့် အပင်များ စနစ်တကျရှင်သန်ဖြစ်ထွန်းအောင် စိုက်ပျိုးကြရန်လိုကြောင်း။

သီးနှံများ အထွက်နှုန်းတိုးတက်အောင် ဆောင်ရွက်သကဲ့သို့ စိုက်ဧကများကို တိုးချဲ့ဆောင်ရွက်ပြီး သီးထပ်များစိုက်ပျိုးသွားရန်လည်းလိုကြောင်း၊ ၂၀၂၂-၂၀၂၃ ခုနှစ်အတွင်း မိုးစပါးစိုက်ပျိုးမှု စုစုပေါင်းမှာ ၁၇ သန်းရှိကြောင်း၊ အသားတင်စိုက်ပျိုးမှုမှာ ၁၅ သန်းရှိပြီး သီးထပ်စိုက်ပျိုးမှုမှာ ၂ ဒသမ ၂၄ သန်း၊ သီးညှပ်စိုက်ပျိုးမှုမှာ ၂၈၀၀၀ ရှိကြောင်း၊ တစ်နှစ်လုံးတွင် စပါးတစ်သီးတည်းသာစိုက်ပျိုးသည့် လယ်ယာမြေမှာ ၇ ဒသမ ၃၃ သန်းရှိကြောင်း၊ အဆိုပါစိုက်ပျိုးမြေများပေါ်၌ စပါး(သို့မဟုတ်) အခြားသီးနှံများကို သီးထပ်စိုက်ပျိုးသွားမည်ဆိုပါက များစွာအကျိုးဖြစ်ထွန်းစေမည်ဖြစ်ကြောင်း၊ တစ်နိုင်ငံလုံးအတိုင်းအတာဖြင့် တစ်နှစ်တွင် တစ်သီးသာစိုက်ပျိုးသည့် စိုက်ပျိုးမြေမှာ သန်း ၂၀ ခန့်ရှိကြောင်း။

အားထည့်ဆောင်ရွက်

စိုက်ပျိုးရေးလုပ်ငန်းများ အောင်မြင်မှုရှိစေရေး တိုင်းဒေသကြီးနှင့် ပြည်နယ်များက အကောင်အထည်ဖော်ဆောင်ရွက်ရမည်ဖြစ်ကြောင်း၊ စိုက်ပျိုးရေးနှင့်ပတ်သက်၍ ပန်းတိုင်ရည်မှန်းချက်ပြည့်မီစေရေး အပင်အရေအတွက်ပြည့်မီအောင် စနစ်တကျ စိုက်ပျိုးခြင်းမှစ၍ ဆောင်ရွက်ရမည်ဖြစ်ကြောင်း၊ မျိုးသန့်အသုံးပြုခြင်း၊ မြေဩဇာထည့်ခြင်း၊ မြေပြုပြင်ခြင်းများကို ဆောင်ရွက်ပေးရမည်ဖြစ်ကြောင်း၊ ထို့ပြင် စိုက်ပျိုးရေ၊ အောင်ရေများ ရရှိရေးအတွက်လည်း ဆောင်ရွက်သွားရန်လိုကြောင်း၊ မိမိတို့အနေဖြင့် စိုက်ပျိုးရေးလုပ်ငန်းများကို မဖြစ်မနေ အောင်မြင်အောင် ဆောင်ရွက်သွားမည်ဖြစ်ကြောင်း၊ တိုင်းဒေသကြီးနှင့် ပြည်နယ်ဝန်ကြီးချုပ်များအနေဖြင့်လည်း မိမိတို့ ဆက်လက်တာဝန်ယူရမည့်ကာလအတွင်း သဘာဝဘေးအန္တရာယ်ကြောင့် ဖြစ်ပေါ်လာခဲ့သည့် အခြေအနေမှလွဲ၍ စိုက်ပျိုးမွေးမြူရေးလုပ်ငန်းများနှင့် နှီးနွယ်သည့် စီးပွားရေးလုပ်ငန်းများကို အောင်မြင်အောင် အားထည့်၍ဆောင်ရွက်သွားရန်မှာကြားလိုကြောင်း၊ စိုက်ပျိုးမွေးမြူရေးကို အခြေခံသည့် စီးပွားရေးလုပ်ငန်းများအောင်မြင်မှုကို မိမိတို့အစိုးရ၏ မှတ်ကျောက်အဖြစ်ကျန်ရှိအောင် ဆောင်ရွက်ပေးရန် ပြောကြားလိုကြောင်း။

စိုက်ပျိုးမွေးမြူရေးလုပ်ငန်းများကို အောင်မြင်အောင် ဆောင်ရွက်ပေးခြင်းဖြင့် ကျေးလက်ဒေသဖွံ့ဖြိုးတိုးတက်ရေးနှင့် ဆင်းရဲမွဲတေမှုလျှော့ချရေးကို များစွာ အထောက်အကူဖြစ်စေမည်

မြန်မာနိုင်ငံ၏ ဆင်းရဲမွဲတေမှုအညွှန်းကိန်းသည် ပိုမိုမြင့်တက်လာသည်ဟု သုံးသပ်မှုများရှိခဲ့ပြီး ဆင်းရဲမွဲတေမှုနှင့်ပတ်သက်၍ စီးပွားရေးလုပ်ငန်းများ အောင်မြင်မှုမရှိခြင်းနှင့် သဘာဝဘေးအန္တရာယ်ကြောင့် အလုပ်မလုပ်နိုင်၍ ဆင်းရဲမွဲတေခြင်းဟူ၍ ဖြစ်နိုင်ချေနှစ်ရပ်ရှိကြောင်း၊ မိမိတို့နိုင်ငံအနေဖြင့်လည်း လူဦးရေ၏ ၇၀ ရာခိုင်နှုန်းသည် ကျေးလက်နေသူများဖြစ်ပြီး ၃၀ ရာခိုင်နှုန်းသည် မြို့ပေါ်နေသူများဖြစ်ကြောင်း၊ ယင်းတို့အနက် ၅၀ ရာခိုင်နှုန်းကျော်ခန့်သည် စိုက်ပျိုးမွေးမြူရေးနှင့် သစ်တောကဏ္ဍတို့တွင် တစ်နည်းနည်းဖြင့် လုပ်ကိုင်နေကြသူများဖြစ်ကြောင်း၊ ထို့ကြောင့် မိမိတို့အနေဖြင့် ကျေးလက်နေပြည်သူများ အဓိကထားလုပ်ကိုင်သည့် စိုက်ပျိုးမွေးမြူရေးလုပ်ငန်းများကို အောင်မြင်အောင် ဆောင်ရွက်ပေးနိုင်မည်ဆိုပါက ဆင်းရဲမွဲတေမှုလျှော့ချရေးတွင် များစွာအထောက်အကူဖြစ်စေနိုင်မည်ဖြစ်ကြောင်း၊ ဆင်းရဲမွဲတေမှုလျှော့ချရေးနှင့်ပတ်သက်၍ ကိုယ်ချင်းစာစိတ်ဖြင့် လုပ်ငန်းများအောင်မြင်အောင် အကောင်အထည်ဖော် ဆောင်ရွက်ပေးသွားရမည်ဖြစ်ကြောင်း၊ စိုက်ပျိုးရေးလုပ်ငန်းများသာမက မွေးမြူရေးလုပ်ငန်းများကိုလည်း အောင်မြင်အောင် ဆောင်ရွက်သွားကြရန်လိုကြောင်း၊ မိမိတို့နိုင်ငံအနေဖြင့် နိုင်ငံ၏နေရာတိုင်းတွင် ကြက်၊ ဝက်၊ ဆိတ်၊ သိုး၊ နွား၊ ငါး စသည်တို့ကို အောင်မြင်စွာမွေးမြူနိုင်သည့် အခြေအနေရှိကြောင်း၊ မိမိတို့ဒေသအလိုက် လူဦးရေအလိုက် နေ့စဉ် အသားငါး၊ ဥအမျိုးမျိုးနှင့် အသီးအနှံလိုအပ်ချက်များ ဖြည့်ဆည်းပေးနိုင်ရေး စိုက်ပျိုးမွေးမြူရေးလုပ်ငန်းများကို တိုးချဲ့ဆောင်ရွက်သွားရန်လိုကြောင်း၊ ထိုသို့ဆောင်ရွက်ခြင်းဖြင့် ကျေးလက်နေပြည်သူများ၏ လူမှုစီးပွားဘဝများသည်လည်း ဖွံ့ဖြိုးတိုးတက်လာမည်ဖြစ်ကြောင်း၊ မည်သည့်စိုက်ပျိုးမွေးမြူရေးလုပ်ငန်းမဆို ကျေးလက်ကိုဗဟိုပြု၍ ဆောင်ရွက်ကြသည်ဖြစ်၍ ကျေးလက်နေပြည်သူများ ဝင်ငွေများပြားလာမည်ဖြစ်ပြီး ဆင်းရဲမွဲတေမှုညွှန်းကိန်းများလည်း ကျဆင်းလာနိုင်မည်ဖြစ်ကြောင်း။

ဝါနှင့် ဝါးကို နိုင်ငံ့စီးပွားမြှင့်တင်ရေးအတွက် အဓိကလုပ်ငန်းများအဖြစ် ထည့်သွင်းဆောင်ရွက်

စိုက်ပျိုးမွေးမြူရေးထွက်ကုန်များကို အခြေခံသည့် MSME လုပ်ငန်းများနှင့်ပတ်သက်၍ မိမိတို့အနေဖြင့် ၂၀၂၁ ခုနှစ်ခန့်မှစ၍ အားပေးဆောင်ရွက်ခဲ့ခြင်းဖြစ်ပြီး လက်ရှိအချိန်တွင် အတိုင်းအတာတစ်ခုအထိ လုပ်ငန်းများ လည်ပတ်ကာအောင်မြင်မှုများ ရရှိနေသည်ကိုတွေ့မြင်ရကြောင်း၊ နိုင်ငံတကာကိုကြည့်ပါကလည်း MSME လုပ်ငန်းများကို အားပေးမြှင့်တင်လျက်ရှိကြောင်း၊ မိမိတို့နိုင်ငံမှ MSME လုပ်ငန်းများကို ကြည့်မည်ဆိုပါက အများစုသည် စားကုန်၊ သောက်ကုန်ပစ္စည်းများဖြစ်သည်ကို တွေ့မြင်ရသဖြင့် အခြားဈေးကွက်ဝင်ထုတ်ကုန်များဖြစ်သည့် စက်မှုထုတ်ကုန်များ၊ လယ်ယာလုပ်ငန်းသုံးထုတ်ကုန်များကို ပိုမိုထုတ်လုပ်နိုင်ရန်လိုကြောင်း၊ ထုတ်ကုန်များထုတ်လုပ်ရာတွင် အလုပ်လုပ်ပြီးထုတ်လုပ်ရသည့် ထုတ်ကုန်များရှိသကဲ့သို့ သဘာဝမှပေးထားသည်များနှင့် ထုတ်လုပ်၍ရသည့် ထုတ်ကုန်များလည်းရှိကြောင်း၊ ဥပမာအားဖြင့် သဘာဝအတိုင်းပေါက်ရောက်လျက်ရှိသည့် ဝါးနှင့်ပတ်သက်၍ ထုတ်ကုန်ပစ္စည်းများ များစွာထုတ်လုပ်နိုင်မည်ဖြစ်ကြောင်း၊ အကျိုးရှိရှိအသုံးချနိုင်မည်ဆိုပါက နိုင်ငံ့ဝင်ငွေ များစွာရရှိစေနိုင်မည်ဖြစ်သဖြင့် သတိချပ်စေလိုကြောင်း၊ စိုက်ပျိုးသီးနှံနှင့်ပတ်သက်၍ ဝါစိုက်ဧက ၅ သိန်းခန့်ရှိကြောင်း၊ ဝါကိုအခြေခံသည့် စက်မှုလုပ်ငန်းများကို အားပေးဆောင်ရွက်သွားမည်ဆိုပါက နိုင်ငံ့စီးပွားမြှင့်တင်ရေးကို အထောက်အကူများစွာဖြစ်စေနိုင်မည်ဖြစ်ကြောင်း၊ ဝါသီးနှံသည် နိုင်ငံဖွံ့ဖြိုးတိုးတက်ရေးအတွက် အလားအလာကောင်းသည့် သီးနှံတစ်ခုဖြစ်သဖြင့် အားပေးတိုးချဲ့ဆောင်ရွက်သွားရမည်ဖြစ်ကြောင်း၊ ဝါနှင့် ဝါးကို နိုင်ငံ့စီးပွားမြှင့်တင်ရေးအတွက် အဓိကလုပ်ငန်းများအဖြစ် ထည့်သွင်းဆောင်ရွက်သင့်ကြောင်း။

အမှန်တကယ်အလုပ်လုပ်ရန်ဖြစ်

ပြည်ပမှသွင်းကုန်များအစားထိုးရန်၊ ပြည်တွင်းစီးပွားရေးကိုအားပေးရန်၊ အရည်အသွေးပြည့်မီသည့် ထုတ်ကုန်ပစ္စည်းများထုတ်လုပ်၍ ပြည်ပသို့တင်ပို့ကာ နိုင်ငံခြားငွေရှာဖွေနိုင်ရန် စသည့်ရည်ရွယ်ချက်များဖြင့် MSME လုပ်ငန်းများကို အားပေးဆောင်ရွက်စေခြင်းဖြစ်ကြောင်း၊ MSME လုပ်ငန်းများ ဆောင်ရွက်ရာတွင် ကုန်ကြမ်းများရရှိရေးသည် အဓိကအရေးကြီးသဖြင့် ဒေသမှထွက်ရှိသည့် ထုတ်ကုန်ပစ္စည်းများကိုအခြေခံသည့် MSME လုပ်ငန်းများကို ဦးစားပေးဆောင်ရွက်စေခြင်းဖြစ်ကြောင်း၊ သွင်းအားစုများဖြစ်သည့် ဓာတ်မြေဩဇာ၊ ပိုးသတ်ဆေးများ၊ စက်မောင်းဆီများနှင့် လျှပ်စစ်ဓာတ်အားများကိုလည်း ဖြည့်ဆည်းပေးရန်လိုကြောင်း၊ ငွေကြေးအရင်းအနှီးများလည်း ပြည့်စုံရန်လိုသကဲ့သို့ လူသားအရင်းအမြစ်ကောင်းများလည်း လုံလောက်စွာရရှိရန်လိုအပ်မည်ဖြစ်ကြောင်း၊ မိမိအနေဖြင့် နိုင်ငံအတွင်း MSME လုပ်ငန်းများကို သွားရောက်အားပေးဆောင်ရွက်ခဲ့ရာတွင် လုပ်သားရှားပါးမှုနှင့်ပတ်သက်၍ တင်ပြမှုများရှိကြောင်း၊ သို့ဖြစ်၍ ၂၀၂၄ ခုနှစ်တွင် မိမိတို့နိုင်ငံ၌ရှိသည့် လူဦးရေအပေါ်တွင်အခြေခံသည် အလုပ်လုပ်နိုင်သည့်သူစာရင်းအား တောင်းခံခဲ့ကြောင်း၊ အချက်အလက်များအရ အလုပ်လုပ်နိုင်သည့်သူ(အသက် ၁၅ နှစ်အထက်မှ ၆၅ နှစ်အကြား)လူဦးရေခန့်မှန်းချေအနေဖြင့် ၃၄ ဒသမ ၈၀၆ သန်းရှိကြောင်း၊ တစ်နည်းမဟုတ်တစ်နည်းဖြင့် အလုပ်လုပ်နေသည့်သူ မှာ ၁၉ ဒသမ ၁၄၁ သန်းရှိကြောင်း၊ နိုင်ငံ့ဝန်ထမ်းအနေဖြင့် ၁ သန်းကျော်ရှိကြောင်း၊ တက္ကသိုလ်ပညာသင်ကြားနေသူ ၁ ဒသမ ၄ သိန်းရှိကြောင်း၊ ပြည်တွင်း၊ ပြည်ပ၌ အလုပ်သမားအဖြစ် မှတ်ပုံတင်၍ အလုပ်လုပ်နေသူ ၁၇ ဒသမ ၁၃၀ သန်းရှိကြောင်း၊ လုပ်အားအင်အားများရှိနေသော်လည်း အကျိုးရှိရှိအသုံးချနိုင်ရန် လိုအပ်နေခြင်းဖြစ်ကြောင်း၊ မိမိတို့နိုင်ငံအနေဖြင့် အလုပ်လုပ်ကိုင်နိုင်မည့် ရေခံမြေခံကောင်းများ၊ အခြေခံကောင်းများရှိပြီးဖြစ်သော်လည်း အမှန်တကယ်အလုပ်လုပ်ရန်လိုအပ်နေသေးကြောင်း၊ အလုပ်လုပ်နိုင်ရေးအတွက်လည်း ဖန်တီးပေးရန်လိုပြီး နိုင်ငံတော်အနေဖြင့် တိုင်းဒေသကြီးနှင့် ပြည်နယ်များသို့ နိုင်ငံ့စီးပွားမြှင့်တင်ရေးရန်ပုံငွေများ ထုတ်ပေးထားပြီးဖြစ်ကြောင်း၊ ဆက်လက်၍လည်း တင်ပြနေသည်များကို ထုတ်ပေးလျက်ရှိကြောင်း၊ နိုင်ငံတော်အနေဖြင့် လိုအပ်သည့်အရင်းအနှီးများ၊ နည်းပညာများကို ဖြည့်ဆည်းဆောင်ရွက်ပေးသွားမည်ဖြစ်ပြီး အရေးကြီးသည်မှာ အမှန်တကယ်အလုပ်လုပ်ရန်ဖြစ်ကြောင်း။

မြေတောင်မြှောက်ပေးရမည်

ကမ္ဘာ့ဘဏ်အနေဖြင့် မိမိတို့နိုင်ငံတွင် ပဋိပက္ခများကြောင့် ကုန်ထုတ်လုပ်မှုများထိခိုက်၍ အလုပ်မလုပ်နိုင်ခြင်း၊ မန္တလေးငလျင်ကြီးဖြစ်ပေါ်ခဲ့မှုကြောင့် စီးပွားရေးလုပ်ငန်းများထိခိုက်ရခြင်း စသည်တို့ကြောင့် GDP လျော့နည်းနိုင်သည်ဟု သုံးသပ်ခဲ့ကြောင်း၊ မိမိတို့အနေဖြင့် ငလျင်သဘာဝဘေး အလွန်ဆောင်ရွက်သွားမည့်လုပ်ငန်းစဉ်များ၌ စီးပွားရေးလုပ်ငန်းများ အမြန်ဆုံးပြန်လည်ဦးမော့လာစေရေး အတိုးနှုန်းသက်သာစွာဖြင့် ရင်းနှီးမြှုပ်နှံငွေများ ထုတ်ပေးရေးသည်လည်း ပါဝင်ကြောင်း၊ မိမိတို့အနေဖြင့် ထိခိုက်ခဲ့ရသည့် နိုင်ငံ့စီးပွားပြန်လည်ကောင်းမွန်စေရေး အစွမ်းကုန်ကြိုးပမ်းဆောင်ရွက်ပေးသွားမည်ဖြစ်ကြောင်း၊ ကုန်ထုတ်လုပ်မှုလုပ်ငန်းများ တိုးတက်ရေးကို အားပေးဆောင်ရွက်သွားမည်ဖြစ်ပြီး နိုင်ငံ့စီးပွားတိုးတက်ရေးတွင် ဆောင်ရွက်လိုသူများကို မြေတောင်မြှောက်ပေးရမည်ဖြစ်ကြောင်း၊ ထိုသို့ဆောင်ရွက်သွားမည်ဆိုပါက နိုင်ငံ့စီးပွားသည်လည်း တိုးတက်လာနိုင်မည်ဖြစ်သည်ဟု ယုံကြည်ကြောင်းဖြင့် ပြောကြားသည်။

ထို့နောက် နိုင်ငံတော်၏ စီးပွားရေးတိုးတက်စေရေးနှင့်စပ်လျဉ်း၍ စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီးက ဘဏ္ဍာရေးနှစ်အလိုက် ပြည်ထောင်စု၏ အရအသုံးခန့်မှန်းခြေငွေစာရင်းအခြေအနေများ၊ သဘာဝဘေးဒဏ်ကြောင့် အရေးပေါ်ရံပုံငွေသုံးစွဲခဲ့ရမှုအခြေအနေများနှင့် အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုရန်ပုံငွေသို့ ထောက်ပံ့ငွေများပေးအပ်ခဲ့မှု၊ ၂၀၂၅-၂၀၂၆ ဘဏ္ဍာရေးနှစ် ပြည်ထောင်စု၏ အရအသုံးခန့်မှန်းခြေငွေစာရင်း ရေးဆွဲထားရှိမှု၊ စားသုံးသူဈေးဆနှုန်းနှင့် ငွေကြေးဖောင်းပွမှုနှုန်းများ၊ MSME ဖွံ့ဖြိုးတိုးတက်ရေး ရန်ပုံငွေမှသုံးစွဲငွေနှင့် လက်ကျန်ငွေအခြေအနေများ၊ နိုင်ငံ့စီးပွားမြှင့်တင်ရေးရန်ပုံငွေ ထူထောင်ခဲ့မှုနှင့် ထပ်မံထည့်ဝင်ခဲ့မှုနှင့် တိုင်းဒေသကြီးနှင့် ပြည်နယ်များအလိုက် ထုတ်ပေးခဲ့မှုများကိုလည်းကောင်း၊ စိုက်ပျိုးရေး မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီးက စိုက်ပျိုးမွေးမြူရေးကဏ္ဍများ ဖွံ့ဖြိုးတိုးတက်အောင် ဆောင်ရွက်၍ ကုန်ထုတ်လုပ်ငန်းများ တိုးတက်အောင်ဆောင်ရွက်လျက်ရှိမှု၊ ၂၀၂၀-၂၀၂၁ မှ ၂၀၂၄-၂၀၂၅ ဘဏ္ဍာရေးနှစ်အထိ ပို့ကုန်သွင်းကုန်ပမာဏများနှင့် ဝင်ငွေထွက်ငွေများအား လေ့လာတွေ့ရှိရမှု၊ အိမ်နီးချင်းနိုင်ငံများ၏ထုတ်လုပ်မှုနှင့် ပို့ကုန်ပမာဏများအား လေ့လာတွေ့ရှိရမှုများကိုလည်းကောင်း၊ စွမ်းအင်ဝန်ကြီးဌာန ပြည်ထောင်စုဝန်ကြီးက နိုင်ငံ့စီးပွားဖွံ့ဖြိုးတိုးတက်ရေးအတွက် စွမ်းအင်ကဏ္ဍတွင် ကြိုးပမ်းဆောင်ရွက်နေမှုအခြေအနေများ၊ ရေနံထွက်ပစ္စည်းများ တင်သွင်းမှုလျှော့ချနိုင်ရန် စီမံဆောင်ရွက်လျက်ရှိမှု၊ အဆင့်မြင့်လောင်စာဆီများ ကိုယ်တိုင်ထုတ်လုပ်သုံးစွဲနိုင်ရန် ဆောင်ရွက်လျက်ရှိမှုနှင့် ကိုယ်တိုင်ထုတ်လုပ်သုံးစွဲနိုင်ခြင်း၏ အကျိုးကျေးဇူးများ၊ ဓာတ်မြေဩဇာများတင်သွင်းမှုလျှော့ချနိုင်ရန် စီမံဆောင်ရွက်လျက်ရှိမှု၊ စွမ်းအင်ကဏ္ဍတိုးတက်စေရန်အတွက် အခြေခံအချက်ကြီးများကိုလည်းကောင်း၊ စက်မှုဝန်ကြီးဌာန ပြည်ထောင်စုဝန်ကြီးက စက်မှုကဏ္ဍဖွံဖြိုးတိုးတက်ရေးနှင့် MSME ကုန်ထုတ်လုပ်မှု လုပ်ငန်းများတိုးတက်ရေးအတွက် ကော်မတီ၊ ကော်မရှင်များ ဖွဲ့စည်းဆောင်ရွက်လျက်ရှိမှု၊ MSME ထုတ်ကုန်ပြပွဲများ ကျင်းပဆောင်ရွက်ခဲ့မှု၊ ဆောက်လုပ်ရေးလုပ်ငန်းသုံး သံနှင့်သံမဏိများ အရည်အသွေးပြည့်မီစွာထုတ်လုပ်နိုင်ရေး၊ ဘိလပ်မြေထုတ်လုပ်သည့် စက်ရုံများစွမ်းအား ပြည့်ထုတ်လုပ်နိုင်ရေးဆောင်ရွက်ခဲ့မှု၊ စက်မှုလုပ်ငန်းနှင့် စက်မှုဇုန်များဖွံ့ဖြိုးတိုးတက်ရေး ဆောင်ရွက်လျက်ရှိမှု၊ စက်မှုကုန်ထုတ်လုပ်ငန်းများ တိုးတက်စေရေး ဆောင်ရွက်လျက်ရှိမှု၊ မြန်မာ့ဆေးဝါးများတိုးတက်ထုတ်လုပ်လျက်ရှိမှု၊ နိုင်ငံပိုင်စက်ရုံများ၏ ဘဏ္ဍာရေးနှစ်အလိုက် ကုန်ထုတ်လုပ်မှုများ ဆောင်ရွက်ခဲ့မှု အခြေအနေများကိုလည်းကောင်း အသီးသီးရှင်းလင်းတင်ပြကြသည်။

ထို့နောက် အစည်းအဝေးတက်ရောက်လာကြသူများက နိုင်ငံတော်၏စီးပွားရေး တိုးတက်ရေးနှင့်စပ်လျဉ်း၍ အသီးသီးဆွေးနွေးတင်ပြကြသည်။

လုံလောက်စွာထုတ်လုပ်

ရှင်းလင်းတင်ပြမှုများအပေါ် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က ဆေးဝါးထုတ်လုပ်မှုနှင့်ပတ်သက်၍ ပြည်တွင်းအဓိကလိုအပ်ချက် အများဆုံးရှိသည့် ဆေးများကို ပြည်တွင်း၌ လုံလောက်စွာထုတ်လုပ်နိုင်ရေး ဆောင်ရွက်သွားရန်လိုကြောင်း၊ မိမိတို့အနေဖြင့် MSME လုပ်ငန်းများ အားပေးဆောင်ရွက်ရာတွင် ပြည်တွင်းမှထွက်ရှိသည့် ကုန်ကြမ်းပစ္စည်းများကို အဓိကထား၍ ထုတ်ကုန်ပစ္စည်းများ ပိုမိုတိုးတက်ထုတ်လုပ်ပြီး ပြည်ပသို့ တိုးမြှင့်တင်ပို့နိုင်ရန်လိုကြောင်း၊ ကုန်ထုတ်လုပ်မှုများ ဆောင်ရွက်ရာတွင် ဈေးကွက်လိုအပ်ချက်ရှိသည့် ထုတ်ကုန်များကို အဓိကထား၍ ပမာဏများများဖြင့် အရည်အသွေးကောင်းမွန်စွာ ထုတ်လုပ်ရောင်းချနိုင်ရန်လိုကြောင်းနှင့် အခြားလိုအပ်သည်များကို ဖြည့်စွက်မှာကြားသည်။

နိုင်ငံ့စီးပွားတိုးတက်ရေး ဦးစားပေး

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က နိဂုံးချုပ်အမှာစကားပြောကြားရာတွင် ယနေ့ဆွေးနွေးခဲ့သည့်အကြောင်းအရာများမှာ ကောင်းမွန်ကြောင်း၊ မိမိတို့အနေဖြင့် နိုင်ငံစီးပွားတိုးတက်ရေးနှင့် ကုန်ဈေးနှုန်းများကျဆင်းရေးအတွက် ဆောင်ရွက်နေခြင်းဖြစ်ကြောင်း၊ ရေရှည်အတွက် ဆောင်ရွက်ရမည့် ကိစ္စရပ်များရှိသကဲ့သို့ လက်တလောဖြေရှင်းရန်လိုအပ်သည့် ကိစ္စရပ်များကိုလည်း ဖြေရှင်းဆောင်ရွက်သွားရန်လိုကြောင်း၊ အချိန်တိုကာလအတွင်း နိုင်ငံ့စီးပွားတိုးတက်ရေးကို ဦးစားပေးဆောင်ရွက်သွားရမည်ဖြစ်ကြောင်း၊ ကုန်ထုတ်လုပ်မှုလုပ်ငန်းများ တိုးတက်အောင် ဆောင်ရွက်သွားရန်လိုကြောင်း၊ လုပ်ငန်းများဆောင်ရွက်ရန် လိုအပ်ချက်များကိုလည်း တတ်နိုင်သမျှ ဖြည့်ဆည်းဆောင်ရွက်ပေးရမည်ဖြစ်ကြောင်း၊ သုတေသနလုပ်ငန်းများ ဆောင်ရွက်ခြင်းဖြင့် လုပ်ငန်းများပိုမိုတိုးတက်အောင် ဆောင်ရွက်နိုင်မည်ဖြစ်ကြောင်း။

သုတေသနပြုဆောင်ရွက်

စိုက်ပျိုးရေးလုပ်ငန်းများဆောင်ရွက်ရာ၌ လက်ရှိအခြေအနေနှင့်ကိုက်ညီသည့် အထွက်ကောင်းမျိုးများနှင့် အရည်အသွေးကောင်းမွန်သည့် မျိုးများကို စိုက်ပျိုးထုတ်လုပ်နိုင်ရေး သုတေသနပြု ဆောင်ရွက်သွားရန်လိုကြောင်း၊ ပြည်တွင်းဂျုံဖူလုံမှုရှိအောင်လည်း တိုင်းဒေသကြီးနှင့် ပြည်နယ်များအလိုက် ဆောင်ရွက်သွားရန်လိုကြောင်း၊ ပြောင်းစိုက်ပျိုးထုတ်လုပ်မှုသည်လည်း နိုင်ငံအတွက်လိုအပ်ချက်တစ်ခုဖြစ်သဖြင့် အရည်အသွေးပြည့်မီသည့် ပြောင်းကုန်ကြမ်းများထုတ်လုပ်၍ ပြည်တွင်း၌ ပြောင်းထွက်ကုန်ကုန်ချောများကို ထုတ်လုပ်တင်ပို့နိုင်ရန်လိုကြောင်း၊ ဆီထွက်သီးနှံဖြစ်သည့် နေကြာစိုက်ပျိုးထုတ်လုပ်မှု တိုးတက်အောင် ဆောင်ရွက်ခြင်းဖြင့် ပြည်တွင်းဆီဖူလုံမှုကို များစွာအထောက်အကူပြုစေမည်ဖြစ်ကြောင်း၊ မိမိတို့နိုင်ငံတွင် စိုက်ပျိုးဖြစ်ထွန်းသည့် မြန်မာဒူးရင်းနှင့် စိန်တလုံးသရက်ကဲ့သို့သော သီးနှံများကို အရည်အသွေးကောင်းမွန်စွာဖြင့် စိုက်ပျိုးထုတ်လုပ်နိုင်ရေး သုတေသနပြုဆောင်ရွက်ရန်လိုကြောင်း၊ ဒေသနှင့်ကိုက်ညီသည့် သီးနှံများကို ဇုံများအလိုက်ခွဲ၍ စိုက်ပျိုးဆောင်ရွက်သွားမည်ဆိုပါက သီးနှံများအား တစ်နေရာတည်း၌ အရည်အသွေးကောင်းမွန်စွာဖြင့် အရေအတွက်များများ ထုတ်လုပ်နိုင်မည်ဖြစ်ကြောင်း၊ မီးဖိုချောင်သုံးသီးနှံများဖြစ်သည့် ကြက်သွန်နီ၊ ကြက်သွန်ဖြူ၊ အာလူးနှင့် အခြားသီးနှံများကိုလည်း တိုးတက်ထုတ်လုပ်နိုင်ရေး ဆောင်ရွက်မည်ဆိုပါက တောင်သူများအတွက် တိုက်ရိုက်အကျိုးဖြစ်ထွန်းစေမည်ဖြစ်ကြောင်း။

တရားမဝင်ကုန်သွယ်မှုများ ကြပ်မတ်ဆောင်ရွက်

သုတေသနလုပ်ငန်းသည် နိုင်ငံအတွက်အဓိကလိုအပ်သည့် သီးနှံများထုတ်လုပ်ရေးတွင် တိုးတက်မှုများကို ဖြစ်ပေါ်စေမည်ဖြစ်ပြီး နိုင်ငံ့စီးပွားတိုးတက်မှုကို များစွာအထောက်အကူပြုစေမည်ဖြစ်ကြောင်း၊ အလားတူမွေးမြူရေးနှင့်ပတ်သက်၍လည်း ဒေသကြက်မွေးမြူခြင်းလုပ်ငန်းသည်လည်း ပြည်တွင်း၊ ပြည်ပဈေးကွက်ရှိပြီးဖြစ်သကဲ့သို့ လိုအပ်သည့် တိရစ္ဆာန်အစာများကိုလည်း ပြည်တွင်း၌ လုံလောက်စွာရရှိနိုင်ကြောင်း၊ ကြက်၊ ဘဲ၊ ဝက်၊ ဆိတ်၊ နွား၊ ငါး၊ ပုစွန် စသည့် မွေးမြူရေးနှင့် ပတ်သက်သည့် သုတေသနလုပ်ငန်းများကို ဆောင်ရွက်၍ ပြည်တွင်း၌ မွေးမြူရေးလုပ်ငန်များ တိုးတက်အောင် ဆောင်ရွက်သွားရန်လိုသကဲ့သို့ မွေးမြူရေးလုပ်ငန်းဆောင်ရွက်သူများကိုလည်း အားပေးဆောင်ရွက်သွားရန်လိုကြောင်း၊ မိမိတို့အနေဖြင့် စိုက်ပျိုးမွေးမြူရေး ကုန်ထုတ်လုပ်မှုလုပ်ငန်းများကို ပိုမိုတိုးတက်အောင်ဆောင်ရွက်၍ ပြည်တွင်းဖူလုံမှုရှိပြီး ပြည်ပပို့ကုန်များ ပိုမိုရရှိအောင် ဆောင်ရွက်သွားကြမည်ဆိုပါက နိုင်ငံ့စီးပွားတိုးတက်ရေးအတွက် များစွာအထောက်အကူပြုစေမည်ဖြစ်ကြောင်း၊ နယ်စပ်ဒေသများ၌ တရားမဝင်ကုန်သွယ်မှုများပြုလုပ်ခြင်း၊ ဒေသအလိုက် တရားမဝင်သယံဇာတများထုတ်ယူခြင်းများကြောင့် နိုင်ငံတော်အနေဖြင့် များစွာထိခိုက်စေလျက်ရှိကြောင်း၊ ထို့ကြောင့် တိုင်းဒေသကြီးနှင့် ပြည်နယ်အစိုးရအဖွဲ့များအနေဖြင့် စနစ်တကျ ကြပ်မတ်ဆောင်ရွက်နေရန်လိုကြောင်းဖြင့် မှာကြားပြီး အစည်းအဝေးကို ညနေပိုင်းတွင် ရုပ်သိမ်းလိုက်ကြောင်း သတင်းရရှိသည်။

MOI

The Hindu ၊ ဇူလိုင် ၁

အိန္ဒိယနိုင်ငံသည် အင်ဒို-ပစိဖိတ်ဒေသအတွင်းရှိ မဟာဗျူဟာ မိတ်ဖက်ဖြစ်ကြောင်း အိန္ဒိယနိုင်ငံ၏ အရေးပါမှုကို တနင်္လာနေ့ (၃၀ ဇွန် ၂၀၂၅) ရက်နေ့က ပြုလုပ်သည့် သတင်းစာ ရှင်းလင်းပွဲတွင် အိမ်ဖြူတော် Press Secretary Karoline Leavitt ပြောကြားလိုက်ပါသည်။ သူမက အမေရိကန် သမ္မတ ဒေါ်နယ် ထရမ့်နှင့် ဝန်ကြီးချုပ် နာရင်ဒရာမိုဒီတို့၏ အားကောင်း ခိုင်မာသည့် ပုဂ္ဂိုလ်ရေး ဆက်ဆံမှုရှိနေခြင်းကို အလေးထားပြောကြားခဲ့ပါသည်။

အင်ဒို-ပစိဖိတ်ဒေသတွင်း တရုတ်၏ ဩဇာသက်ရောက်မှုအပေါ် အမေရိကန်ပြည်ထောင်စု၏ အမြင်နှင့် ပတ်သက်၍ ANI သတင်းဌာနကမေးမြန်းရာတွင် Ms. Leavitt က “အာရှ-ပစိဖိတ်ဒေသတွင် အိန္ဒိယ အလွန်မဟာဗျူဟာကျသည့် မိတ်ဖက်အဖြစ်တည်ရှိနေကြောင်း၊ သမ္မတနှင့်ဝန်ကြီးချုပ် မိုဒီ တို့မှာ အလွန် ကောင်းမွန်သည့် ဆက်ဆံရေးရှိကြောင်း၊ ယင်းအခြေအနေများကို သူ(သမ္မတထရမ့်) က ဆက်လက် ထိန်းသိမ်းသွားမှာ ဖြစ်ကြောင်း” ဖြေကြားခဲ့ပါသည်။ 

Ms. Leavitt က သတင်းမီဒီယာများကို ဖြေကြားရာတွင် “ အမေရိကန်သမ္မတသည် ယခင် ရက်သတ္တပတ်က အမေရိကန်နှင့် အိန္ဒိယတို့မှာ အလွန်နီးနီးစပ်စပ် ကုန်သွယ်ရေးညှိနှိုင်းမှုရှိကြောင်း  ပြောကြားမှုမှာ မှန်နေဆဲပါ၊  ကျွန်မအခုပဲ သမ္မတ၏ Oval Office တွင် သမ္မတနှင့်အတူ ရှိနေစဉ် ကူးသန်းရောင်းဝယ်ရေးဝန်ကြီးကို ထိုအကြောင်း ပြောခဲ့ပါသေးသည်။  ၎င်းတို့က အဆိုပါ သဘောတူညီချက်ကို အပြီးသတ်ရေး ဆောင်ရွက်လျက်ရှိကြပါသည်၊ မကြာခင် သမ္မတနှင့် ၎င်း၏ ကုန်သွယ်ရေး အဖွဲ့တွေဆီကနေ အိန္ဒိယနှင့် ပတ်သက်သည့် သတင်းကို မိတ်ဆွေတို့ ကြားကြ ရမှာဖြစ်ပါသည်” ဟု ပြောကြားခဲ့ပါသည်။ 

သူမက သမ္မတထရမ့်၏ မကြာသေးမီက အိန္ဒိယနှင့် ကုန်သွယ်ရေးဆိုင်ရာ ညှိနှိုင်းချက်အပေါ် အပြုသဘောဆောင်သည့် ကြေညာချက်အပေါ် မှတ်ချက်ပြုပြောကြားခြင်းဖြစ်ပါသည်။ ကုန်သွယ်ခွန် အပြန်အလှန်ကောက်ခံခြင်းနှင့်ပတ်သက်၍ မေးမြန်းချက်ကို ထရမ့်ကဖြေကြားရာတွင် “ကုန်သွယ်ရေး အဟန့်အတားတွေကို လုံးဝလျော့ချလိုက်ပြီ” (full trade barrier dropping) ဟု ပြောကြားခဲ့ပြီး အိန္ဒိယဈေးကွက်ကို ကောင်းကောင်းရရှိနိုင်မှာ ဖြစ်သော်လည်း၊ ရလဒ်ပိုင်းနှင့် စပ်လျဉ်း၍အသေအချာ မပြောနိုင်ကြောင်း “အိန္ဒိယ နှင့် မိမိတို့ ညှိနှိုင်းမှုတွေ ရရှိတော့မည်ဖြစ်ကြောင်း၊ ကုန်သွယ်ရေးလုပ်ရန် အခွင့်အရေးများ ရရှိလာတော့မည်ဖြစ်ကြောင်း၊ ယခုတော့ ဒါကို ကန့်သတ်ထားဆဲဖြစ်ကြောင်း၊ မိတ်ဆွေတို့အနေဖြင့် မသိနိုင်၊ မတွေးနိုင်သေးပါ၊ မိမိတို့ မတွေးထင်နိုင် လောက်သည့် ကုန်သွယ်မှု  အဟန့်အတား အားလုံးကို လျော့ချလိုက်ရန် ဆောင်ရွက်နေပါကြောင်း၊ ဘာတွေဖြစ်လာမလဲ ဆိုတာကတော့ သေသေချာချာ မပြောနိုင်ပါ၊ သို့သော် ယခုအချိန်မှာ မိမိတို့ အိန္ဒိယနှင့် ကုန်သွယ်မှု သဘောတူညီရန် လုပ်နေကြပါကြောင်း…..”ဟု ပြောပါသည်။

ဇူလိုင် ၉ ရက်နေ့မတိုင်မီ သီတင်းနှစ်ပတ်မပြည့်မီတွင် နှစ်ဖက်စလုံးသည် ကုန်သွယ်ရေးအခွန် အကောက်တိုးမြှင့်မှုအပေါ် ရက်ပေါင်း ၉၀ ရပ်နားထားချိန်တွင် နှစ်နိုင်ငံ ကုန်သွယ်မှု သဘောတူညီ ချက် (BTA) ကို အပြီးသတ်ရန် လုပ်ဆောင် အရေးကြီးပါသည်။

အိန္ဒိယ ပြည်ပရေးရာဝန်ကြီး S. Jaishankar သည် QUAD နိုင်ငံခြားရေးဝန်ကြီးများ အစည်းအဝေး တက်ရောက်ရန် အမေရိကန်ပြည်ထောင်စုတွင် ရောက်ရှိနေပါသည်။   တနင်္လာနေ့က ကမ္ဘာတစ်ဝှမ်းက နိုင်ငံတွေက ဦးဆောင်သည့် အကြမ်းဖက်ဝါဒကို အာရုံစိုက်လာစေရန် ကုလသမဂ္ဂက ပြုလုပ်သည့် “The Human Cost of Terrorism” အမည်ပါ ပြပွဲကိုတက်ရောက်ခဲ့ပါသည်။ 

QUAD သည် သြစတြေးလျ၊ အိန္ဒိယ၊ ဂျပန်နှင့် အမေရိကန်တို့ကြား သံတမန်ရေးရာ မိတ်ဖက်အဖွဲ့ တစ်ခုဖြစ်ပါသည်။ ယင်းသည် ပွင့်လင်းမှုရှိသော၊ တည်ငြိမ်၍ သာယာဝပြောသော အင်ဒို-ပစိဖိတ် ဒေသကို ပံ့ပိုးပေးရန် ကတိကဝတ်ပြုထားသည်။ အဖွဲ့သည် ၂၀၀၄ ခုနှစ် ဒီဇင်ဘာလတွင် အိန္ဒိယ သမုဒ္ဒရာ ဆူနာမီအတွက် လူသားချင်းစာနာထောက်ထားမှုဆိုင်ရာ ပူးတွဲ တုံ့ပြန် ဆောင်ရွက်မှုမှ စတင်ခဲ့ခြင်းဖြစ်ပါသည်။

ယခုနှစ်နှောင်းပိုင်းတွင် နယူးဒေလီ၌ ပြုလုပ်မည့် QUAD ထိပ်သီးအစည်းအဝေးသို့ တက်ရောက်ရန် ဝန်ကြီးချုပ် မိုဒီ၏ ဖိတ်ကြားချက်ကို အမေရိကန်သမ္မတ ဒေါ်နယ်ထရမ့်က ဇွန် ၁၈ ရက် အစောပိုင်း တွင် လက်ခံခဲ့ကြောင်း အတည်ပြုခဲ့ကြောင်း၊ နိုင်ငံခြားရေးဝန်ကြီး Vikram Misri က ကနေဒါနိုင်ငံ၌ ကျင်းပသည့် G7 ထိပ်သီးအစည်းအဝေးပြင်ပ ခေါင်းဆောင်နှစ်ဦးကြား ပြုလုပ်ခဲ့သည့် ဖုန်းပြောဆိုမှု အသေးစိတ်အချက်အလက်များကို ပြောကြားခဲ့ရာတွင်  “လာမည့် QUAD အစည်းအဝေးအတွက် ၀န်ကြီးချုပ် Modi က သမ္မတ Trump ကို အိန္ဒိယသို့ ဖိတ်ကြားခဲ့သည်။ ဖိတ်ကြားချက်ကို လက်ခံစဉ်မှာ သမ္မတ Trump က အိန္ဒိယကို လာဖို့ စိတ်လှုပ်ရှားနေပါသည်” ဟု မစ္စတာ Misri က ဗီဒီယို မက်ဆေ့ချ်တွင် ပြောကြားခဲ့သည်။ 

ကိုးကား- The Hindu

ဘာသာပြန်ဆိုသူ- ဦးခိုင်ထွဋ်လှ

အမေရိကန်သမ္မတ ဒေါ်နယ်ထရမ့်သည် အိန္ဒိယနှင့် ကုန်သွယ်ခွန်များကို သိသိသာသာ လျှော့ချနိုင်ရေး သဘောတူညီမှုရရှိရန် မျှော်လင့်နေ သော်လည်း ဂျပန်နှင့်ညှိနှိုင်းမှုများနှင့် ပတ်သက်၍ အဆင်မပြေမှုများ ရှိနေကြောင်း ပြောကြားခဲ့သည်။ ဇူလိုင်လ ၁ ရက်နေ့တွင် လေယာဉ်ပေါ်၌ သမ္မတထရမ့်က “အိန္ဒိယသည် အမေရိကန်ကုမ္ပဏီများအတွက် ကုန်သွယ်မှုအဟန့်အတားများကို လျှော့ချရန် အဆင်သင့်ဖြစ်နေပြီဟု ယုံကြည်ကြောင်း” ပြောကြားခဲ့သည်။ ထိုသို့ဖြစ်ပါက ဇူလိုင် ၉ ရက်မှ စတင်၍ ကျသင့်မည့် ၂၆% ပြန်လည်ကောက်ခံမည့် ကုန်သွယ်ခွန်များမှ ရှောင်ရှားနိုင်မည့် သဘောတူညီမှုအတွက် လမ်းခင်းပေးနိုင်မည်ဖြစ်သည်။

“လောလောဆယ် အိန္ဒိယက ဖွင့်မပေးသေးဘူး။ ၎င်းတို့ပြောင်းလဲမည် ဆိုပါက အခွန်နှုန်းအများကြီးလျှော့ပြီး သဘောတူညီမှုရနိုင်သည်” ဟု ၎င်းက ပြောကြားခဲ့သည်။

အမေရိကန် ဘဏ္ဍာရေးဝန်ကြီး စကော့ဘက်ဆန့်ကလည်း Fox News သို့ ပြောကြားရာတွင် အမေရိကန်နှင့် အိန္ဒိယတို့သည် နှစ်ဖက်စလုံးအတွက် ကုန်သွယ်ခွန်လျှော့ချရေး သဘောတူညီမှုရရှိရန် နီးစပ်နေပြီဖြစ်ကြောင်း ဖွင့်ဟခဲ့သည်။ 

အိန္ဒိယအရာရှိများသည် ထရမ့်အစိုးရနှင့် သဘောတူညီမှုရရှိရန် ရည်ရွယ်၍ ၎င်းတို့၏ဝါရှင်တန်ခရီးစဉ်ကို ယခုသီတင်းပတ် အစောပိုင်း အထိ ဆက်လက်တိုးချဲ့ထားကြောင်း အိမ်ဖြူတော်အရာရှိတစ်ဦး၏ ကိုးကား ပြောကြားချက်အရ သိရသည်။ အိမ်ဖြူတော်အရာရှိက “အမေရိကန် အစိုးရသည် နောက်ဆုံးရက်စွဲနီးကပ်လာသည်နှင့်အမျှ အိန္ဒိယအပါအဝင် နိုင်ငံအချို့နှင့် ကုန်သွယ်ရေးသဘောတူညီမှုများကို ဦးစားပေးဆောင်ရွက် နေသည်” ဟု ပြောကြားခဲ့သည်။

လက်ရှိတွင် အမေရိကန်နှင့် အိန္ဒိယတို့အကြား ညှိနှိုင်းမှုများသည် မော်တော်ကားအစိတ်အပိုင်းများ၊ သံမဏိနှင့် စိုက်ပျိုးထုတ်ကုန်များအပေါ် ကုန်သွယ်ခွန်များနှင့်ပတ်သက်၍ အဆိုပြုချက်များတွင် ရှေ့မဆက် နိုင်ဘဲရှိနေသည်။ ဇူလိုင် ၁ ရက်နေ့က နယူးယောက်မြို့တွင် ကျင်းပသော အခမ်းအနားတစ်ခု၌ အိန္ဒိယနိုင်ငံခြားရေးဝန်ကြီး Subrahmanyam Jaishankar က “မိမိတို့သည် အလွန်ရှုပ်ထွေးသည့် ကုန်သွယ်ရေးညှိနှိုင်းမှုများ၏ အလယ်မှာရှိနေပြီး အောင်မြင်မည်ဟု မျှော်လင့်သော်လည်း နှစ်ဖက်ညှိနှိုင်းမှုဖြစ်သောကြောင့် အာမမခံနိုင်ပါ” ဟု ပြောကြားခဲ့သည်။ ၎င်းက အဆိုပါသဘောတူညီမှုရရှိရန် နှစ်ဖက်စလုံးမှ ရပ်စဲမှုများ လိုအပ် မည်ဟုလည်း ထပ်လောင်းအလေးပေးပြောကြားခဲ့သည်။

အမေရိကန်သမ္မတထရမ့်က ဂျပန်နှင့်ညှိနှိုင်းရာတွင် အခက်အခဲများရှိကြောင်း ဆက်လက်ပြောကြားခဲ့သည်။ ၎င်းသည် ယခင်က ကုန်သွယ်ခွန် ဆိုင်းငံ့မှုကို တိုးချဲ့ရန် စဉ်းစားမထားကြောင်း ပြောဆိုခဲ့ဖူးသည်။ အမေရိကန် သည် ဇူလိုင် ၉ ရက်မှစတင်၍ စည်းကြပ်မည့်အခွန်များနှင့် ပတ်သက်သည့် အကြောင်းကြားစာများကို နိုင်ငံတစ်ခုချင်းစီသို့ ပေးပို့မည် ဖြစ်သည်။ ထရမ့်က ဂျပန်ထုတ်ကုန်များအပေါ် ၃၀-၃၅% အထိ ကုန်သွယ်ခွန် တိုးမြှင့်နိုင်ကြောင်း ပြောကြားခဲ့ပြီး၊ ၎င်းသည် ဧပြီလ ၂ ရက်က ကြေညာခဲ့သော ၂၄% ထက် သိသိသာသာ မြင့်မားနေသည်။

ထရမ့်က ဂျပန်သည် အမေရိကန်၏တောင်းဆိုမှုရှိသော်လည်း အမေရိကန် ဆန်ကို ဝယ်ယူရန် ငြင်းဆန်နေဆဲဖြစ်ကြောင်း ရှင်းပြခဲ့သည်။ 

လောလောဆယ်တွင် အမေရိကန်သည် ဗြိတိန်နှင့်သာ သေးငယ်သည့် ကုန်သွယ်ရေး သဘောတူညီမှုတစ်ခုကို ရရှိထားပြီး ထိုသဘောတူညီမှုတွင် ဗြိတိန်သည် အမေရိကန်ဈေးကွက်သို့ဝင်ရောက်မည့် မော်တော်ကား အပါအဝင် ကုန်ပစ္စည်းများအပေါ် ၁၀% ခွန်ကောက်ခံမှုကို လက်ခံထားသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂