ဥရောပနိုင်ငံများက ဆီးရီးယားဒုက္ခသည်များ တင်သွင်းသည့် ခိုလှုံခွင့်လျှောက်ထားမှု လုပ်ငန်းစဉ်များကို ရပ်ဆိုင်းလိုက်သည်။ ဆီးရီးယားတွင် သမ္မတ Bashar al-Assad အစိုးရပြုတ်ကျပြီးနောက် ယခုကဲ့သို့ ထွက်ပေါ် လာခြင်းဖြစ်သည်။

ဆီးရီးယားဒုက္ခသည်များနှင့်ပတ်သက်သည့် ခိုလှုံခွင့်ဆိုင်ရာလုပ်ငန်းစဉ်များကို ရပ်ဆိုင်းလိုက်ပြီဟု ဂျာမနီနိုင်ငံက ဒီဇင်ဘာ ၉ ရက်နေ့က ကြေညာခဲ့သည်။ ဂျာမနီသည် ဆီးရီးယား နိုင်ငံပြင်ပရှိ ဆီးရီးယားမှလာသူဦးရေ အများဆုံးနေထိုင်သောနိုင်ငံဖြစ်သည်။

ဂျာမနီပြည်ထဲရေးဝန်ကြီး Nancy Faeser က ကြေညာချက် တစ်စောင်ထုတ်ပြန်ခဲ့ရာတွင် "ဂျာမနီတွင် ကာကွယ်စောင့်ရှောက်မှုကို ရှာဖွေခဲ့သည့် ဒုက္ခသည်များအနေဖြင့် နောက်ဆုံးတွင် ၎င်းတို့၏ မွေးရပ်မြေ ဆီးရီးယားသို့ပြန်ရန် မျှော်လင့်ချက်များရှိလာပါပြီ" ဟု ၎င်းက ပြောကြားခဲ့ သည်။ သို့သော် လတ်တလောဆီးရီးယား၏ အခြေအနေသည် ရှင်းရှင်းလင်းလင်းမဖြစ်သေးသဖြင့် ဂျာမနီအာဏာပိုင်များက “အခြေအနေ ပိုပြီးရှင်းလင်းသည်အထိ ဆက်လက်လုပ်ဆောင်ဆဲ ခိုလှုံခွင့်ဆိုင်ရာလုပ်ငန်းစဉ်များကိုရပ်ဆိုင်းထားရန် ဆုံးဖြတ်ချက်ချမှတ်ခဲ့သည်"ဟု ဝန်ကြီး Faeser က ပြောသည်။

ဗြိတိန်နှင့် ဘယ်လ်ဂျီယံတို့ကလည်း ဆီးရီးယားနိုင်ငံသားများ တင်သွင်းသည့် ခိုလှုံခွင့်လျှောက်ထားမှုလုပ်ငန်းစဉ်အား ရပ်ဆိုင်းရန် ဆုံးဖြတ်ခဲ့ကြသည်။

ဆွီဒင်နှင့် ပြင်သစ်တို့သည်လည်း လာမည့်ရက်များအတွင်း အလားတူလုပ်ဆောင်မည်ဟု ခန့်မှန်းရသည် ဟု ဖော်ပြထားရှိပါသည်။

ကိုးကား- NHK World

လက်ရှိအမေရိကန်ရွေးကောက်ခံသမ္မတ ဒေါ်နယ်ထရန့်သည် ယခင်က အင်တာဗျူးတစ်ခုတွင် “အမေရိကန်နိုင်ငံတွင်မွေးဖွေးသူဖြစ်လျှင် နိုင်ငံသားချက်ချင်း ဖြစ်ခွင့် ရှိသည်ဆိုသည့်ဥပဒေကို ဖျက်သိမ်းရန် စီစဉ်ထားကြောင်း” ပြောကြားခဲ့ပါသည်။ 

အမေရိကန်တွင် ယင်းဥပဒေကို နှစ်ပေါင်း ၁၅၀ ကျော်ကြာ ကျင့်သုံးလာခဲ့သောကြောင့် ဒေါ်နယ်ထရန့်အနေဖြင့် တရားဝင်သမ္မတဖြစ်လာချိန်တွင်  မည်ကဲ့သို့ ဆောင်ရွက်မည်ကို စိတ်ဝင်စားမှုမြှင့်တက်နေပါသည်။ 

လက်ရှိတွင် အမေရိကန်ရှိ ရွှေ့ပြောင်းအလုပ်သမားများမှ မွေးဖွားသည့်သားသမီးများ၊ အလည်အပတ်ခရီးသွားများနှင့် ကျောင်းသားကျောင်းသူများသည် ထိုဥပဒေအရ အမေရိကန်နိုင်ငံသားအဖြစ် ခံယူခွင့်ရနေကြပါသည်။ 

၎င်းအနေဖြင့် မိသားစုများ တကွဲတပြားဖြစ်မည်ကို မလိုလားသောကြောင့် လက်ရှိတရားဝင်အမေရိကန် နိုင်ငံသားဖြစ်နေသည့်နိုင်ငံသားများကိုပါ ပြန်လည် စိစစ်ပြီး ၎င်းတို့၏သက်ဆိုင်ရာနိုင်ငံများသို့ ပြန်လည်ပို့ဆောင်မည့်အစီအစဉ်ရှိကြောင်း ထရန့်က ထပ်မံပြောကြားခဲ့ပါသည်။ 

ကိုးကား - Aljazeera

ရုရှားဖက်ဒရေးရှင်းသည် လစဉ် လေကာစနစ်များ ကြားဖြတ်မဟန့်တားနိုင်သည့် Oreshnik ပဲ့ထိန်းဒုံးကျည် ၂၅ စင်း ထုတ်လုပ်နိုင်ကြောင်း Military Watch Magazine သတင်းကဖော်ပြသည်။

အဆိုပါ ဒုံးကျည်များသည် ၁၉၈၀ ခုနှစ်နောက်ပိုင်း ရုရှားဖက်ဒရေးရှင်းတွင် ပထမဆုံးသော တီထွင်မှုများဖြစ်ပြီး ခန့်မှန်းခြေအားဖြင့် ကီလိုမီတာ ၄,၀၀၀ ပျံသန်းနိုင်ပြီး သီးခြားပြန်လည်ပစ်မှတ်ထားသော ထိပ်ဖူးများစွာကို သယ်ဆောင်နိုင်စွမ်းရှိကြောင်း ထုတ်ပြန်ချက်တွင် ဖော်ပြထားသည်။

ကိုးကား - Military Watch Magazine

နေပြည်တော် ဒီဇင်ဘာ ၁၀

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်သည် ရုရှားဖက်ဒရေးရှင်းနိုင်ငံ၊ ကာလ်မီးကီယာပြည်နယ်အကြီးအကဲ H.E. Mr. Batu KHASIKOV ဦးဆောင်သော ကိုယ်စားလှယ်အဖွဲ့အား ယနေ့နံနက်ပိုင်းတွင် နေပြည်တော်ရှိ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံး သံတမန်ဆောင်ဧည့်ခန်းမ၌ လက်ခံတွေ့ဆုံသည်။

အဆိုပါတွေ့ဆုံပွဲသို့ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်အတူ ကောင်စီတွဲဖက်အတွင်းရေးမှူး ဗိုလ်ချုပ်ကြီးရဲဝင်းဦး၊ ပြည်ထောင်စုဝန်ကြီးများဖြစ်ကြသည့် ဦးတင်ဦးလွင်၊ ဦးမင်းနောင်နှင့် ဒုတိယဝန်ကြီးများ တက်ရောက်ကြပြီး ရုရှားဖက်ဒရေးရှင်းနိုင်ငံ၊ ကာလ်မီးကီယာပြည်နယ်အကြီးအကဲနှင့်အတူ မြန်မာနိုင်ငံဆိုင်ရာရုရှားနိုင်ငံသံအမတ်ကြီး H.E. Mr. Iskander Azizov နှင့်ကိုယ်စားလှယ်အဖွဲ့များ တက်ရောက်ကြသည်။

ထိုသို့တွေ့ဆုံရာတွင် မြန်မာနိုင်ငံနှင့် ရုရှားဖက်ဒရေးရှင်းနိုင်ငံတို့အကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ တိုးတက်ကောင်းမွန်လျက်ရှိသကဲ့သို့ မြန်မာနိုင်ငံနှင့် ကာလ်မီးကီယာပြည်နယ်တို့အကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများ မြှင့်တင်ဆောင်ရွက်သွားနိုင်မည့်ကိစ္စရပ်များ၊ ၂၀၂၅ ခုနှစ်အတွင်း ကာလ်မီးကီယာပြည်နယ်တွင် အပြည်ပြည်ဆိုင်ရာ ဗုဒ္ဓဘာသာဖိုရမ်ကျင်းပသွားမည့်အခြေအနေများနှင့် ဖိုရမ်အောင်မြင်စွာကျင်းပနိုင်ရေး မြန်မာနိုင်ငံမှကူညီ ဆောင်ရွက်နိုင်သည့်အခြေအနေများ၊ မြန်မာနိုင်ငံနှင့် ကာလ်မီးကီယာပြည်နယ်တို့အကြား ကိုးကွယ်ယုံကြည်မှုအရ၊ စီးပွားရေးအရ ပူးပေါင်းဆောင်ရွက်မှုများကို မြှင့်တင်ဆောင်ရွက်ခြင်းမှတစ်ဆင့် ခရီးသွားလုပ်ငန်းများကိုလည်း ဖွံ့ဖြိုးတိုးတက်အောင် ဆောင်ရွက်နိုင်မည့်အခြေအနေများ၊ ပညာရေးမြှင့်တင်မှုအခန်းကဏ္ဍတွင် အပြန်အလှန်ပူးပေါင်းဆောင်ရွက်ရေးနှင့် စိုက်ပျိုးရေးနှင့်မွေးမြူရေးလုပ်ငန်းများ တိုးတက်ရေးပူးပေါင်းဆောင်ရွက်နိုင်သည့် အခြေအနေများ၊ နှစ်ဖက်တာဝန်ရှိသူများ ချစ်ကြည်ရေးခရီးစဉ်များ အပြန်အလှန်သွားရောက်ခြင်းဖြင့် ပူးပေါင်းဆောင်ရွက်မှုများကို တိုးမြှင့်ဆောင်ရွက်နိုင်မည့်အခြေအနေများနှင့်ပတ်သက်၍ ရင်းနှီးပွင့်လင်းစွာ အမြင်ချင်းဖလှယ်ဆွေးနွေးခဲ့ကြသည်။

တွေ့ဆုံပွဲအပြီးတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ရုရှားဖက်ဒရေးရှင်းနိုင်ငံ၊ ကာလ်မီးကီယာပြည်နယ်အကြီးအကဲတို့သည် အမှတ်တရလက်ဆောင်ပစ္စည်းများ အပြန်အလှန်ပေးအပ်ကြပြီး မှတ်တမ်းတင်ဓာတ်ပုံရိုက်ခဲ့ကြကြောင်း သတင်းရရှိသည်။

Source- www.moi.gov.mm

ယနေ့ခေတ်တွင် မိုဘိုင်းဖုန်းမှ လွယ်ကူစွာ ငွေပေးချေနိုင်သော နည်းပညာများထွက်ပေါ်လျက်ရှိသော်လည်း တရုတ်နည်းပညာရှင်များ၏ တီထွင်မှုက ပိုမိုဆန်းသစ်လာပြီဖြစ်သည်။ တရုတ်နိုင်ငံတွင် ဖုန်းအသုံးမပြုဘဲ လက်ဖဝါးအသုံးပြု၍ ငွေပေးချေ၍ရသော စနစ်ကို နည်းပညာကုမ္ပဏီကြီး Tencent က ဖန်တီးပေးလိုက်ပါသည်။ Weixin Palm Payment ဟု နာမည်ပေးထားပြီး ၎င်းနည်းပညာတွင် လက်ဖဝါး၏ လက်ဗွေရာနှင့် သွေးကြော Patterns များကို အနီအောက်ရောင်ခြည် ကင်မရာကို အသုံးပြုကာ Scan ဖတ်ခြင်းဖြစ်ပြီး စက္ကန့်ပိုင်းအတွင်း ငွေပေးချေနိုင်မည်ဖြစ်သည်။ ၎င်းစနစ်သည် Facial Recognition ထက်ပိုမို ကောင်းမွန်ပြီး အမွှာညီအစ်ကိုမောင်နှမများတွင်ပင် လက္ခဏာမတူညီသောကြောင့် လိမ်လည်၍ မရနိုင်ပေ။ ဘေကျင်း၏ ရထားပို့ဆောင်ရေးလုပ်ငန်းများတွင် ၎င်းလက်ဖဝါးဖြင့်ငွေပေးချေသော စနစ်ကို စတင်အသုံးပြုနေပြီဖြစ်ပြီး ရထားစီးခအတွက် ငွေပေးချေသည့်ကဒ်နှင့် စမတ်ဖုန်းများ မလိုအပ်တော့ပေ။ အနာဂတ်တွင် လက်ဖဝါးအသုံးပြု၍ ငွေပေးချေသော နည်းပညာကို ကမ္ဘာအဝန်း၌ တွင်တွင်ကျယ်ကျယ်အသုံးပြုလာကြမည်ဟု တွေးထင်ရပါသည်။ 

ကိုးကား -  The Verge

ရန်ကုန်မြို့တွင် နိုဝင်ဘာလကစ၍လျှပ်စစ်မီးပြတ်တောက်မှုဆိုးရွားစွာကြုံတွေ့နေရသည့်အပြင်ဂျိုးဖြူရေမှ သုံးရေပြတ်တောက်ခြင်းမျိုးပါကြုံနေရကြောင်း မြို့ခံများက ပြောသည်။

လတ်တလောတွင် ရန်ကုန်မြို့တွင်း မြို့နယ်များ၌ ယခင်က ပုံမှန်မီးပေးသည့်အချိန်များတွင်ပါ လျှပ်စစ်မီးပြတ်တောက်နေပြီး ဂျိုးဖြူရေမလာသောကြောင့်လည်း တိုက်ခန်းနေသူများစုပြီး ရေဝယ်သုံးနေရသည်ဟု သိရသည်။

ထို့ပြင် လျှပ်စစ်မီးပြတ်တောက်မှုကြောင့် စမ်းချောင်းမြို့နယ်တွင်လည်း ရေစက်မော်တာအငှားတင်စနစ်ဖြင့် ရေလိုက်တင်ပေးနေရသည့် လုပ်ငန်းများလည်း ရှိလာနေသည်။

“ရုံးကိုဖုန်းဆက်မေးရင် ဝန်အားလျှော့လို့ ဆိုပြီးပြောတယ်။ နောက်ထပ်ပြန်ရမယ့် အချိန်ကျလည်း မလာဘူး။ ရေလာပြန်တော့ မီးမလာလို့ မတင်ရနဲ့” ဟု စမ်းချောင်းမြို့နယ်နေ အမျိုးသမီးတစ်ဦးက ပြောသည်။

လက်ရှိတွင် တစ်နိုင်ငံလုံး၌ လျှပ်စစ်ဓာတ်အားလိုအပ်ချက်ကို ဓာတ်အားထုတ်လုပ်နိုင်မှု အလွန်လျော့ကျနေသည့်အတွက် ရှေ့လာမည့်လများ၌လည်း မီးပြတ်ချိန်ပိုများလာမည်ဟု ရန်ကုန်လျှပ်စစ်ဓာတ်အားပေးရေးကော်ပိုရေးရှင်း (YESC)က ထုတ်ပြန်ထားသည်။

Source- Popular Journal

ဆော်ပိုလို   ဒီဇင်ဘာ ၉

ဘရာဇီးနိုင်ငံတောင်ပိုင်း ရီယိုဂရန်ဒီ ဒိုဆူပြည်နယ်၌ လွန်ခဲ့သည့် ရက်သတ္တပတ်ကျော်က မိုးသည်းထန်စွာရွာသွန်းပြီး ရေကြီးမှုကြောင့် လူ ၁၀၀ ကျော် သေဆုံးပြီး နေအိမ်တစ်သိန်းနီးပါး ပျက်စီးခဲ့ကြောင်း ဒေသဆိုင်ရာအာဏာပိုင်များက ဆိုသည်။ ပြည်နယ်အတွင်း မြစ်ရေလျှံမှုနှင့် ရေကြီးမှုတို့ကြောင့် လူပေါင်း ၁ ဒသမ ၄၅ သန်းခန့် ထိခိုက်ခံစားရပြီး ဒေသခံနှစ်သိန်းခန့်မှာ ဘေးလွတ်ရာပြောင်းရွေ့ခဲ့ရ‌ကြောင်း သိရသည်။

ထို့ပြင် ဘရာဇီးနိုင်ငံတောင်ပိုင်း ဆန်တာကတ်တာရီနာ ပြည်နယ်ရှိ မြို့ပေါင်း ၂၂ မြို့တွင် ရေကြီးခြင်း၊ မြေပြိုခြင်းနှင့် ဘေးလွတ်ရာသို့ပြောင်းရွှေ့ခြင်းတို့ဖြစ်ပေါ်ခဲ့သည့်အတွက် ပြင်းထန် သည့် မုန်တိုင်းသတိပေးချက်ထုတ်ပြန်ထားဆဲဖြစ်ကြောင်း နိုင်ငံ၏ အရပ်ဘက်ကာကွယ်ရေး အာဏာပိုင်အဖွဲ့က ပြောသည်။

ဆန်တာကတ်တာရီနာ ပြည်နယ်၏ အကြီးဆုံးမြို့ဖြစ်သည့် ဂျိုအင်ဗဲလ်သည် ဒီဇင်ဘာ ၃ ရက်မှ စတင်ကာ ရေကြီးမှုဒဏ်ကိုခံစားခဲ့ရပြီး ဒီဇင်ဘာ ၁၀ ရက်နံနက်ပိုင်းအထိ မိုးဆက်လက် ရွာသွန်းနိုင်ကြောင်း မိုးလေဝသဌာနက ခန့်မှန်းထားသည်။ ဒီယိုနီရှိုဆာခီရာမြို့သည် လွန်ခဲ့သည့် ၄၈ နာရီအတွင်း မိုးရေချိန် ၁၈၆ ဒသမ ၄ မီလီမီတာစံချိန်တင်ခဲ့ပြီး ဆိုးရွားသည့် မြေပြိုမှု အန္တရာယ်ဖြစ်ပေါ်နိုင်ခြေများလာကြောင်း အဆိုပါဌာနက ပြောသည်။

ဘရာဇီးနိုင်ငံ၌ မေလမှ ဇွန်လအတွင်း မုန်တိုင်းဝင်ရောက်တိုက်ခတ်မှုကြောင့် အိမ်နီးချင်း ရီယိုဂရန်ဒီဒိုဆူပြည်နယ်၌ ရေကြီးမှုဖြစ်ပွားသဖြင့် လူ ၁၈၃ ဦးသေဆုံးခဲ့ပြီး ယင်းဒေသ၏ ၉၀ ရာခိုင်နှုန်းကျော် ထိခိုက်ခဲ့ကြောင်း သိရသည်။

ဆင်ဟွာ

Sorce- မြန်မာ့အလင်းသတင်းစာ

မြန်မာလူမျိုးတို့၏ နှစ်စဉ်အစဉ်အလာမပျက် ကျင်းပလေ့ရှိသည့် မြန်မာ့ရိုးရာမဟာသင်္ကြန်ပွဲတော်ကို ယူနက်စကို ၏လူသားမျိုးနွယ်နှင့်သက်ဆိုင်ရာ ဒြပ်မဲ့ယဉ်ကျေးမှု အမွေအနှစ်စာရင်းအဖြစ် အတည်ပြုသတ်မှတ်လိုက် ကြောင်း နိုင်ငံတော်စီမံအုပ်ချုပ်ရေးကောင်စီ သတင်း ထုတ်ပြန်ရေးအဖွဲ့က  ထုတ်ပြန်လိုက်ပါသည်။ 

အဆိုပါဆုံးဖြတ်ချက်ကို ပါရာဂွေးနိုင်ငံတွင် ဒီဇင်ဘာ ၂ ရက်မှ ၇ ရက်အထိ ကျင်းပနေသည့် ၁၉ ကြိမ်မြောက် ယူနက်စကို၏ ဒြပ်မဲ့ယဉ်ကျေးမှုအမွေအနှစ် ထိန်းသိမ်း ရေး အတွက် အစိုးရများဆိုင်ရာကော်မတီက ချမှတ်လိုက်ခြင်း ဖြစ်ပါသည်။

မြန်မာနိုင်ငံအနေဖြင့် မိမိတို့၏နှစ်သစ်ကူး အတာသင်္ကြန် ပွဲတော်ကို ယူနက်စကို၏ လူသားမျိုးနွယ်ဆိုင်ရာ ဒြပ်မဲ့ယဉ်ကျေးမှုအမွေအနှစ်စာရင်းတွင် ပါဝင်နိုင်ရေးအတွက်အတာသင်္ကြန်ပွဲတော်နှင့်ပတ်သက်သည့် အဆိုပြုစာတမ်းကို ယူနက်စကို၏ ဒြပ်မဲ့ယဉ်ကျေးမှုအမွေအနှစ် ကော်မတီသို့  ၂၀၂၃ ခုနှစ် မတ်လ ၂၄ ရက်တွင် ပေးပို့ တင်သွင်းခဲ့ခြင်းဖြစ်ပါသည်။

ကိုးကား - ဆင်ဟွာ 

နေပြည်တော် ဒီဇင်ဘာ ၆

စစ်တက္ကသိုလ် ဗိုလ်လောင်းသင်တန်းအမှတ်စဉ်(၆၆) သင်တန်းဆင်းဂုဏ်ပြု စစ်ရေးပြအခမ်းအနားကို ယနေ့နံနက်ပိုင်းတွင် ပြင်ဦးလွင်မြို့၊ စစ်တက္ကသိုလ်စစ်ရေးပြကွင်း၌ ကျင်းပပြုလုပ်ရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး သတိုးမဟာသရေစည်သူ သတိုးသီရိသုဓမ္မ မင်းအောင်လှိုင် တက်ရောက်မိန့်ခွန်း ပြောကြားသည်။

အဆိုပါအခမ်းအနားသို့ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော် ကာကွယ်ရေးဦးစီးချုပ်နှင့်အတူ ဇနီး ဒေါ်ကြူကြူလှ၊ ညှိနှိုင်းကွပ်ကဲရေးမှူး (ကြည်း၊ ရေ၊ လေ) ဗိုလ်ချုပ်ကြီး သီရိပျံချီ စည်သူ မောင်မောင်အေးနှင့်ဇနီး၊ ကာကွယ်ရေးဦးစီးချုပ်(ရေ) ဗိုလ်ချုပ်ကြီး ဇေယျကျော်ထင် ထိန်ဝင်းနှင့်ဇနီး၊ ကာကွယ်ရေးဦးစီးချုပ်(လေ) ဗိုလ်ချုပ်ကြီး ဇေယျကျော်ထင် စည်သူထွန်းအောင်နှင့်ဇနီး၊ ကာကွယ်ရေးဦးစီးချုပ်ရုံးမှ အဆင့်မြင့်တပ်မတော်အရာရှိကြီးများနှင့် ဇနီးများ၊ ပြည်ထောင်စုဝန်ကြီးများ၊ မန္တလေးတိုင်းဒေသကြီးဝန်ကြီးချုပ်နှင့်ဇနီး၊ အလယ်ပိုင်းတိုင်းစစ်ဌာနချုပ်တိုင်းမှူး၊ မြန်မာနိုင်ငံဆိုင်ရာနိုင်ငံခြားစစ်သံရုံးများမှ စစ်သံမှူးများ၊ စစ်တက္ကသိုလ်ကျောင်းအုပ်ကြီး၊ ပြင်ဦးလွင်တပ်နယ်မှ တာဝန်ရှိသူများ၊ ကျောင်းဆင်းဗိုလ်လောင်းများ၏ မိဘဆွေမျိုးများနှင့် ဖိတ်ကြားထားသည့် ဧည့်သည်တော်များ တက်ရောက်ကြသည်။

ဦးစွာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး သတိုးမဟာသရေစည်သူ သတိုးသီရိသုဓမ္မ မင်းအောင်လှိုင်အား ဗိုလ်လောင်းတပ်ခွဲများက အနှေးလျှောက်၊ အမြန်လျှောက်ဖြင့် ချီတက်အလေးပြုကြသည်။ ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး သတိုးမဟာသရေစည်သူ သတိုးသီရိသုဓမ္မ မင်းအောင်လှိုင်က စစ်တက္ကသိုလ် ဗိုလ်လောင်းသင်တန်းအမှတ်စဉ်(၆၆)မှ အောင်စစ်သည်ဆုရရှိသူ ဗိုလ်လောင်းအမှတ် ၃၅၉၈၈၊ ဗိုလ်လောင်း ထက်အာကာ၊ လေ့ကျင့်ရေးထူးချွန်ဆုရရှိသူ ဗိုလ်လောင်းအမှတ် ၃၅၈၅၃၊ ဗိုလ်လောင်း သီဟစိုး၊ စာပေထူးချွန်ဆု(ဝိဇ္ဇာ)ရရှိသူ ဗိုလ်လောင်းအမှတ် ၃၆၀၀၁၊ ဗိုလ်လောင်းနေသုခ၊ စာပေထူးချွန်ဆု(သိပ္ပံ)ရရှိသူ ဗိုလ်လောင်းအမှတ် ၃၆၁၂၆၊ ဗိုလ်လောင်းရဲထက်၊ စာပေထူးချွန်ဆု(ကွန်ပျူတာ)ရရှိသူ ဗိုလ်လောင်းအမှတ် ၃၅၉၄၀၊ ဗိုလ်လောင်း ဇော်ဖြိုးအောင်တို့အား ဆုများအသီးသီးပေးအပ်ချီးမြှင့်သည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး သတိုးမဟာသရေစည်သူ သတိုးသီရိသုဓမ္မ မင်းအောင်လှိုင်က သင်တန်းဆင်းမိန့်ခွန်းပြောကြားသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး သတိုးမဟာသရေစည်သူ သတိုးသီရိသုဓမ္မ မင်းအောင်လှိုင်သည် ဗိုလ်လောင်းတပ်ခွဲများ၏ အလေးပြုခြင်းကို ခံယူပြီးနောက် စစ်ရေးပြအခမ်းအနားမှ ပြန်လည်ထွက်ခွာသည်။

စစ်ရေးပြအခမ်းအနားအပြီးတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး သတိုးမဟာသရေစည်သူ သတိုးသီရိသုဓမ္မ မင်းအောင်လှိုင်သည် စစ်တက္ကသိုလ်ကျောင်းဌာနချုပ်၊ ဧည့်ခန်းမ၌ ထူးချွန်ဆုရရှိကြသည့် ဗိုလ်လောင်း ၅ ဦးနှင့် ၎င်းတို့၏ မိဘဆွေမျိုးများကို တွေ့ဆုံ၍ ဂုဏ်ပြုအမှာစကားပြောကြားသည်။

ဂုဏ်ပြုအမှာစကားပြောကြားရာတွင် သင်တန်းတက်ရောက်ရသည့် ၄ နှစ်တာ ကာလတစ်လျှောက်လုံး စာပေကဏ္ဍ၊ လေ့ကျင့်ရေးကဏ္ဍတို့တွင် စဉ်ဆက်မပြတ် ကြိုးစားအားထုတ်ခဲ့မှု၊ စည်းကမ်းကောင်းမွန်မှုတို့ကြောင့် ယခုကဲ့သို့ ထူးချွန်ဆုများရရှိခဲ့ကြခြင်းဖြစ်သဖြင့် ချီးကျူးအသိအမှတ်ပြုကြောင်းနှင့် မိဘများနှင့်ထပ်တူ ဂုဏ်ယူဝမ်းမြောက်ပါကြောင်း၊ ဆက်လက်လျှောက်လှမ်းရမည့် ဘဝခရီးတစ်လျှောက်တွင်လည်း မိဘများ၊ ဆရာ၊ ဆရာမများက သွန်သင်ပဲ့ပြင်ပေးခဲ့သည့် အခြေခံကောင်းများ၊ ယခုသင်တန်းမှရရှိခဲ့သည့် မိမိဘဝတိုးတက်မှုရှိစေရေး ကြိုးစားအားထုတ်နိုင်မှု၊ မိမိကိုယ်ကိုယ်ထိန်းသိမ်းနိုင်မှု၊ စည်းကမ်းကောင်းမွန်မှု စသည့် အခြေခံအလေ့အကျင့်ကောင်းများကို ဆက်လက်ထိန်းသိမ်းပြီး စဉ်ဆက်မပြတ် ဆက်လက်ကြိုးစားအားထုတ်သွားကြရမည်ဖြစ်ကြောင်း၊ ယနေ့ခေတ်သည် နည်းပညာများ စဉ်ဆက်မပြတ် ပြောင်းလဲတိုးတက်နေသည့်အတွက် မိမိတို့ဘဝတိုးတက်ရေးအတွက် အထောက်အကူဖြစ်စေမည့် အသိပညာ၊ အတတ်ပညာများကို စဉ်ဆက်မပြတ် ဖတ်မှတ်လေ့လာခြင်းဖြင့် ဆက်လက်ဆည်းပူးလေ့လာပြီး နိုင်ငံတော်နှင့် တပ်မတော်ကအားထားရပြီး လက်အောက်က အားကိုးရသူများဖြစ်အောင် ဆက်လက်ကြိုးပမ်းသွားကြစေလိုကြောင်း။

ယခုကဲ့သို့ ထူးချွန်ထက်မြက်သူများဖြစ်လာစေရေး ငယ်စဉ်ကတည်းက ကျွေးမွေးပြုစုပျိုးထောင်ပေးခဲ့သည့် မိဘများ၏ ကျေးဇူးများ၊ အသိပညာများရရှိစေရေး သင်ကြားပေးခဲ့သည့် ဆရာ၊ ဆရာမများ၏ ကျေးဇူးများကို သိတတ်ရန်နှင့် ကျေးဇူးဆပ်ရန်လိုအပ်မည်ဖြစ်ကြောင်း၊ ထို့အတူ ဗိုလ်လောင်း သင်တန်းလေးနှစ်တာကာလအတွင်း တပ်မတော်၏ ခေါင်းဆောင်ငယ်များဖြစ်လာစေရေး လေ့ကျင့်မွေးထုတ်ပေးခဲ့သည့် တပ်မတော်နှင့် အမိစစ်တက္ကသိုလ်၏ ကျေးဇူးကိုလည်းမမေ့ရန်လိုကြောင်း၊ မိဘများ၏စကားကို နားထောင်ခြင်း၊ မိဘကို စိတ်ချမ်းသာအောင်ထားရှိခြင်း၊ မိမိတတ်နိုင်သရွေ့ ကျွေးမွေးစောင့်ရှောက်ခြင်းတို့သည် မိဘကျေးဇူးကိုဆပ်ခြင်းပင်ဖြစ်သကဲ့သို့ မိမိကိုယ်ကိုယ် ထိန်းသိမ်းနေထိုင်ခြင်း၊ စစ်သားကောင်းတစ်ယောက်ပီသစွာ နေထိုင်ကျင့်ကြံခြင်းအားဖြင့်လည်း နိုင်ငံတော်နှင့် တပ်မတော်၏ ဂုဏ်ကိုမြှင့်တင်ရမည်ဖြစ်ကြောင်း။

တာဝန်ထမ်းဆောင်ရာတွင်လည်း စစ်သားကောင်းတစ်ယောက်ပီသစွာ နေထိုင်ကျင့်ကြံရမည်ဖြစ်ပြီး နိုင်ငံတော်နှင့် တပ်မတော်၏ တာဝန်များကို ထမ်းဆောင်လျက်ရှိကြသည့် နောင်တော်ကျောင်းဆင်းအရာရှိများ၊ စစ်သည်များထံမှလည်း ကောင်းမွန်သည့် အတွေ့အကြုံကောင်းများကို လက်ဆင့်ကမ်းသင်ယူကြရန်လိုကြောင်း၊ တပ်မတော်သားများသည် ပြည်သူကြားမှပေါက်ဖွားလာခြင်းဖြစ်ပြီး တပ်မတော်သည် နိုင်ငံတော်၏ အစိတ်အပိုင်းတစ်ရပ်ဖြစ်ကြောင်း၊ ထို့ကြောင့် မိမိကိုယ်ကိုယ်၊ မိမိအဖွဲ့အစည်းနှင့် နိုင်ငံတော်အပေါ် သစ္စာစောင့်သိ၍ ပေးအပ်သည့်တာဝန်များကို အောင်မြင်ကျေပွန်စွာ ထမ်းဆောင်သွားကြရန်လိုကြောင်း၊ ထိုသို့ ဆောင်ရွက်ခြင်းသည် နိုင်ငံတော်နှင့် တပ်မတော်အကျိုးကို ဆောင်ရွက်ခြင်းပင်ဖြစ်ကြောင်းဖြင့် အမှာစကားပြောကြားခဲ့ကြောင်း သတင်းရရှိသည်။

Source- www.moi.gov.mm

ဝါရှင်တန် ဒီဇင်ဘာ ၄

အမေရိကန်သမ္မတ ဂျိုးဘိုင်ဒင်၏ သားဖြစ်သူ ဟန်းတားဘိုင်ဒင်ကို လွတ်ငြိမ်းချမ်းသာခွင့်ပေးလိုက်ခြင်းက အမေရိကန်သမ္မတ၏ သားဖြစ်သူသည် ဥပဒေအထက်တွင် ရှိနေသည်ဆိုသည့် အချက်မှာ ထင်ရှားကြောင်း အိက်စ်လူမှုကွန်ရက်တည်ထောင်သူ အီလွန်မတ်စ်က ၎င်း၏ အိက်စ်လူမှုမီဒီယာစာမျက်နှာတွင် ပြောကြားခဲ့သည်။

ဒီဇင်ဘာ ၁ ရက်နေ့တွင် အိမ်ဖြူတော်က ထုတ်ပြန်သည့် ကြေညာချက်အရ ဟန်းတားဘိုင်ဒင်အား သီးခြားတရားစွဲဆိုထားသည့် ရာဇဝတ်မှုနှစ်ခုအတွက် သမ္မတဂျိုးဘိုင်ဒင်က လွတ်ငြိမ်းချမ်းသာ ခွင့်ပြုကြောင်း ကြေညာခဲ့သည်။

ဟန်းတားဘိုင်ဒင်အား ခွင့်ပြုခဲ့သည့် လွတ်ငြိမ်းချမ်းသာခွင့်သည် ခြွင်းချက်မရှိ လွတ်ငြိမ်းချမ်းသာခွင့်ဖြစ်၍ ရွေးကောက်ခံသမ္မတ ဒေါ်နယ်ထရမ့်အနေဖြင့် ပြန်လည်ရုပ်သိမ်းခြင်း မပြုနိုင်ကြောင်း သိရသည်။

ဟန်းတားဘိုင်ဒင်အား တရားစွဲဆိုထားခြင်းမှ ကင်းလွတ်ခွင့်ပြုရန် သမ္မတဘိုင်ဒင်၏ ဆုံးဖြတ်ချက်သည် ဒီမိုကရေစီစနစ်ကို ပြက်ရယ်ပြုခြင်းဖြစ်ကြောင်း ရုရှားနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မာရီယာဇာကာရိုဗာက ပြောကြားသည်။

ကိုးကား- တက်စ်သတင်းဌာန၊ ဘာသာပြန်- စိုးသူရ

Source- ကြေးမုံသတင်းစာ