Las Vegas ရှိ Trump International Hotel အပြင်ဘက်တွင် ဒီဇင်ဘာ ၁ ရက်နေ့က Tesla Cybertruck ကားပေါက်ကွဲမှုဖြစ်ပွားခဲ့ပြီး အဆိုပါ ဖြစ်စဉ်ကြောင့် ယာဉ်မောင်းသေဆုံးကာ လူ ၇ ဦး ထိခိုက်ဒဏ်ရာ ရရှိခဲ့ သည်။

Tesla Cybertruck ဖြင့် ကားပေါက်ကွဲမှုပြုလုပ်ခဲ့သည့် အဆိုပါယာဉ်မောင်းမှာ US Army Green Beret တွင် တာဝန်ထမ်းဆောင်နေသော စစ်သား Matthew Alan Livelsberger ဖြစ်ကြောင်း ရဲတပ်ဖွဲ့၏ ပြောကြားချက်အရ သိရှိရသည်။

Livelsberger သည် အမေရိကန်အထူးတပ်ဖွဲ့ (US Army Special Forces) မှ တပ်ကြပ်ကြီးတစ်ဦး ဖြစ်ကြောင်း ရဲအရာရှိ ၄ ဦး၏ ပြောကြားချက်အရ သိရှိရသည်။ ထို့ပြင် အဆိုပါ စစ်သားသည် လက်ရှိတွင် အထူးတပ်ဖွဲ့နှင့်အတူ ဂျာမနီတွင် တာဝန်ကျနေသည့် ကာလဖြစ်သော်လည်း အဆိုပါပေါက်ကွဲမှု ဖြစ်ပွားချိန်တွင် ခွင့်ဖြင့် ပြန်လာနေထိုင်ချိန်ဖြစ်ကြောင်း ပြောကြား ထားသည်။

Livelsberger သည် ကြေးကြယ်တံဆိပ်ဆုရရှိထားသူ စစ်သားဟောင်းဖြစ်ပြီး ၎င်းသည် “နိုင်ငံရေးမကျေနပ် ချက်များ” နှင့်ပတ်သက်သည့် စာများလည်း ရေးသားခဲ့ သည်။ ထို့ပြင် အချို့နေရာများတွင် ဖြစ်ပွားနေသော လက်နက်ကိုင်ပဋိပက္ခများနှင့် ၎င်း၏ အိမ်တွင်းရေး ပြဿနာများက အဆိုပါယာဉ်မောင်းအား မိမိကိုယ်ကို အဆုံးစီရင်သည်အထိဖြစ်စေခဲ့ကြောင်း တာဝန်ရှိသူ များက ဒီဇင်ဘာ ၃ ရက်နေ့တွင် ပြောကြားခဲ့သည်။

ထို့ပြင် Livelsberger ၏ ဖုန်းထဲတွင် ၎င်းကိုယ်တိုင် ရေးသားထားသည့်စာများကိုလည်း တွေ့ရှိခဲ့ကြောင်း Las Vegas မြို့တော်ရဲဌာနမှ ရဲအရာရှိ Dori Koren က သတင်းစာရှင်းလင်းပွဲတွင် ပြောကြားခဲ့သည်။

၎င်းရေးသားခဲ့သောစာတွင် အဆိုပါဖြစ်ရပ်သည် အကြမ်းဖက်တိုက်ခိုက်မှုတစ်ခုအဖြစ်မဟုတ်ဘဲ “နိုးကြားမှု တစ်ခု”ဖြစ်စေရန် ပြုလုပ်ခြင်းဖြစ်ကြောင်း၊ ရဲတပ်ဖွဲ့၏ ပြန်လည်ပြောကြားချက်အရ သိရှိရသည်။ ထို့ပြင် စုံစမ်းစစ်ဆေးသူများ၏ တွေ့ရှိချက်အရ “အမေရိကန်များသည် ပျော်ပွဲရွှင်ပွဲများနှင့် အကြမ်းဖက်မှုများကိုသာအလေးထားပြီး” “မီးရှူးမီးပန်းများနှင့် ဖောက်ခွဲရေးပစ္စည်းများ” သည် ၎င်းတို့၏ အာရုံစူးစိုက်မှုခံရစေရန် အကောင်းဆုံးဖြစ်ကြောင်း Livelsberger ၏ စာတွင် ရေးသားထားသည်ကို တွေ့ရှိရသည်။

ကိုးကား - CNN

လက်ရှိအမေရိကန်သမ္မတ ဂျိုးဘိုင်ဒင်သည် တရားမဝင်ရွှေ့ပြောင်းနေထိုင်သူများကို နိုင်ငံအတွင်းသို့အများအပြားဝင်ရောက်နေထိုင်ခွင့်ပြုခြင်း၊ အမေရိကန်-မက္ကဆီကိုနယ်စပ်တံတိုင်းတည်ဆောက်မှုအတွက် ခွဲဝေပေးထားသော ကုန်ကြမ်းပစ္စည်းများကိုရောင်းချခြင်းအားဖြင့် နိုင်ငံတော်သစ္စာဖောက်မှုကိုကျူးလွန်ကြောင်း အီလွန်မက် ကစွပ်စွဲလိုက်သည်။

အမေရိကန်သမ္မတလောင်း ဒေါ်နယ်ထရမ့်နှင့် ရီပတ်ဘလစ်ကန်များက အမေရိကန်နိုင်ငံ၏နယ်စပ်ဒေသများ လုံခြုံမှုမရှိခြင်းအတွက် ဂျိုးဘိုင်ဒင်ကိုလွန်ခဲ့သောနှစ်များစွာကတည်းက ဝေဖန်မှုများပြုလုပ်ခဲ့ခြင်းဖြစ်သည်။

အမေရိကန်-မက္ကဆီကိုနယ်စပ်တံတိုင်း ကာရံမှုအတွက် ထရမ့်၏ပထမအကြိမ် သမ္မတသက်တမ်းတွင် ခွင့်ပြုခဲ့သော်လည်း ဂျိုးဘိုင်ဒင်လက်ထက်တွင် ရပ်ဆိုင်းသည့်အပြင် ဆောက်လုပ်ရေးပစ္စည်းများကိုပါ လေလံတင်ရောင်းစားလိုက်သောကြောင့် ဂျိုးဘိုင်ဒင်အစိုးရအနေဖြင့် ပြင်းထန်သော ဝေဖန်မှုများ၊ တိုက်ခိုက်မှုများနှင့်ရင်ဆိုင်နေရခြင်းဖြစ်သည်။

ထို့ကြောင့် ဂျိုးဘိုင်ဒင်အစိုးရသည် နယ်စပ်ကိုရည်ရွယ်ချက်ရှိရှိဖွင့်ပေးခဲ့ခြင်းဖြစ်သည့်အတွက် နိုင်ငံတော်သစ္စာဖောက်မှုကိုကျူးလွန်ခြင်းဖြစ်သည်ဟု အီလွန်မက် ကပြောထားခြင်းဖြစ်သည်။

Ref: RT

Source: Myawady Web Portal

တောင်ကိုရီးယား သမ္မတ Yoon Suk Yeol အား ဖမ်းဝရမ်းထုတ်ပြီးနောက် သမ္မတအိမ်ခြံဝင်းအတွင်း ဝင်ရောက်ဖမ်းဆီးရန် ကြိုးပမ်းသည့်အဖွဲ့ဝင်များနှင့် သမ္မတလုံခြုံရေးအဖွဲ့ဝင်များ၊ ထောက်ခံသူများအကြား နာရီအတန်ကြာ အခြေအနေတင်းမာမှုများဖြစ်ပွားပြီး စုံစမ်းစစ်ဆေးရေးမှူးများက ဖမ်းဆီးရန်ကြိုးပမ်းမှုအား ရပ်ဆိုင်းလိုက်သည်။ စစ်အုပ်ချုပ်ရေးကြေညာခဲ့သည့် သမ္မတအပေါ် စုံစမ်းစစ်ဆေးမှုများ ဆောင်ရွက်နေသည့် စုံစမ်းစစ်ဆေးရေးအဖွဲ့က သမ္မတယွန်း၏ ပြစ်မှုအပေါ် ပြန်လည်သုံးသပ်ပြီး နောက်ထပ်အဆင့်များအတွက် ဆုံးဖြတ်သွားမည်ဟုဆိုပါသည်။ ဖမ်းဝရမ်းသည် ဒီဇင်ဘာ ၆ ရက်နေ့တွင် သက်တမ်းကုန်ဆုံးမည် ဖြစ်သည်။

သမ္မတယွန်းအား ထိန်းသိမ်းရန် ဖမ်းဝရမ်းဖြင့် အဖွဲ့ဝင် ၁၅၀ ကျော်ကို ဆိုးလ်မြို့ရှိ သမ္မတအိမ်ခြံဝင်းအတွင်းသို့ ဒီဇင်ဘာ ၃ ရက်နေ့ နံနက်ပိုင်းက ဖြန့်ကျက်ချထား သော်လည်း သမ္မတလုံခြုံရေးအဖွဲ့က ၎င်းတို့၏ နေအိမ်အား ရှာဖွေခွင့်မပြုကြောင်း ပြောကြားခဲ့သည်ဟု သိရသည်။

သမ္မတယွန်းကို ထောက်ခံသူများက ဖမ်းဝရမ်းထုတ်ခဲ့ခြင်းအပေါ်  ကန့်ကွက်ခဲ့ကြပြီး ဆိုးလ်မြို့ရှိ သမ္မတအိမ်တော်အပြင်ဘက်တွင် နေ့စဉ်စုဝေးခဲ့ကြသည်။ စုံစမ်းစစ်ဆေးရေးမှူးများသည် ထောက်ခံသူများနှင့် ထိပ်တိုက်တွေ့မည်ကို စိုးရိမ်မှုများရှိလာကြောင်းလည်းဖော်ပြထားပါသည်။

ကိုးကား-NHK World

မြောက်ကိုရီးယားနိုင်ငံအနေဖြင့် ရုရှားနှင့် မဟာဗျူဟာမြောက်ပူးပေါင်းဆောင်ရွက်မှုကို ပိုမိုခိုင်မာစေရန်လုပ်ဆောင်မည်ဖြစ်ကြောင်း ခေါင်းဆောင်ကင်ဂျုံအွန် က ပြောကြားခဲ့သည်ဟု  KCNA သတင်းအေဂျင်စီက   ဒီဇင်ဘာလ ၃၁ ရက်တွင် ဖော်ပြသည်။

မြောက်ကိုရီးယားနှင့် ရုရှားနိုင်ငံတို့ကြား ဆက်ဆံရေးသည်  ၂၀၂၄ ခုနှစ်အတွင်း စီမံကိန်းသစ်များ ဖော်ဆောင်ခြင်းအားဖြင့် ပိုမိုမြင့်တက် ခိုင်မာလာခဲ့ကြောင်း၊ မိမိအနေဖြင့်လည်း   နှစ်နိုင်ငံဆက်ဆံရေး ပိုမိုခိုင်ခံ့လာစေရေးလုပ်ဆောင်ရန်    ဆန္ဒရှိနေကြောင်း ဒီဇင်ဘာလ ၃၀ ရက်တွင်   ရုရှားသမ္မတ ဗလာဒီမာပူတင်နှင့် ရုရှားနိုင်ငံသားများသို့     စာရေးသားပေးပို့၍ နှုတ်ခွန်းဆက်သရာတွင် ထည့်သွင်းဖော်ပြခြင်းဖြစ်သည်။

ထို့ပြင် ၂၀၂၅ ခုနှစ် နှစ်သစ်သည် ရုရှားတပ်မတော်နှင့်  ရုရှားပြည်သူများ၏ ၂၁ ရာစုအတွင်း ပထမဆုံးအကြိမ် အောင်ပွဲရရှိသော နှစ်တစ်နှစ်အဖြစ် မှတ်တမ်းတင်ခံရမည်ဖြစ်ကြောင်း ခေါင်းဆောင်ကင်ကဆက်လက်ပြောကြားခဲ့ကြောင်း  KCNA သတင်းအေဂျင်စီက  ဆက်လက်ဖော်ပြသည်။

မြောက်ကိုရီးယားခေါင်းဆောင် ကင်ဂျုံအွန်နှင့် ရုရှားသမ္မတ ဗလာဒီမာပူတင်တို့ နှစ်ဦးသည် ၂၀၂၄ ခုနှစ်   ဇွန်လအတွင်း ထိပ်သီးဆွေးနွေးပွဲတစ်ရပ် ကျင်းပပြီး အပြန်အလှန်ကာကွယ်ရေး သဘောတူညီချက်တစ်ရပ်ကို လက်မှတ်ရေးထိုးခဲ့သည်။ အဆိုပါသဘောတူညီချက်အရ စစ်ရေးအရ တိုက်ခိုက်ခံရပါက တစ်နိုင်ငံအားအခြား တစ်နိုင်ငံမှ အပြန်အလှန် အကူအညီပေးမည် ဖြစ်ကြောင်း သိရသည်။ 

Source: Myawady Web Portal

ဒီနေ့ကျရောက်တဲ့ ၂၀၂၅ ခုနှစ်ရဲ့ နှစ်သစ်ကူးအခါသမယမှာ မြန်မာနိုင်ငံအတွင်း မှီတင်းနေထိုင်ကြပါသော မိဘပြည်သူညီအစ်ကို မောင်နှမများအားလုံး ကိုယ်၏ကျန်းမာခြင်း၊ စိတ်၏ချမ်းသာခြင်းတို့နှင့်တကွ ကောင်းကျိုးလိုအင်ဆန္ဒများ ပြည့်ဝကြပါစေလို့ ဦးစွာဆုတောင်းရင်း နှုတ်ခွန်းဆက်သအပ်ပါတယ်။

ကျွန်တော်တို့ နိုင်ငံတော်စီမံအုပ်ချုပ်ရေးကောင်စီအနေနဲ့ နိုင်ငံတော်ရဲ့တာဝန်အရပ်ရပ်ကို စတင်ထမ်းဆောင်ကတည်းက နိုင်ငံတော်ရဲ့ရှေ့ဆက်လျှောက်လှမ်းရမယ့်လမ်းကြောင်းကို မျှော်မှန်းပြီး ရည်မှန်းချက်များ၊ ရှေ့လုပ်ငန်းစဉ်များ၊ ဦးတည်ချက်များ ချမှတ်ခဲ့ပါတယ်။ ကျွန်တော်တို့ ခိုင်ခိုင်မာမာနဲ့ ကြိုးစားလျှောက်လှမ်းခဲ့ကြလို့ သိသာထင်ရှားတဲ့ ရည်မှန်းချက်ပန်းတိုင်တွေကိုလည်း တွေ့မြင်နေရပြီ ဖြစ်ပါတယ်။ ကျွန်တော်တို့ ပြည်သူများက တက်တက်ကြွကြွနဲ့ ဝိုင်းဝန်းကူညီပေးခဲ့တဲ့အတွက်ပဲဖြစ်ပါတယ်။ ရှေ့ဆက်လျှောက်လှမ်းရမယ့်ခရီးမှာ စိန်ခေါ်မှုတွေ၊ အကျပ်အတည်း၊ အခက်အခဲတွေကို ရင်ဆိုင်တွေ့နိုင်ရပေမယ့် ကျွန်တော်တို့အားလုံးရဲ့ စုစည်းညီညွတ်တဲ့ ပူးပေါင်းစွမ်းအားနဲ့ ကျော်ဖြတ်နိုင်မယ်လို့ ယုံကြည်ပါတယ်။

ကျွန်တော်တို့နိုင်ငံသားများရဲ့ ကောင်းကျိုးကို မလိုလားသူတွေအနေနဲ့ ၂၀၂၄ ခုနှစ်အတွင်း မြို့ရွာများလုံခြုံရေးနဲ့ စီးပွားရေးဆိုင်ရာ နယ်ပယ်အသီးသီးကို အဓိကပစ်မှတ်ထားပြီး နှောင့်ယှက်ဖျက်ဆီးခဲ့ကြပါတယ်။ ကိုယ်နေထိုင်ရာ ကိုယ့်ရဲ့ဒေသနဲ့ လူမျိုးကို ထိခိုက်ပျက်စီးစေတဲ့ အသိဉာဏ်မဲ့တဲ့သူများရဲ့ လုပ်ရပ်များပဲဖြစ်ပါတယ်။ လူမျိုးရေး၊ တန်းတူညီမျှရေး၊ ဒီမိုကရေစီရေးဆိုတဲ့ ကောင်းမွန်မြင့်မြတ်တဲ့ အကြောင်းအရာများကို အကြမ်းဖက်လုပ်ရပ်များအပေါ် ခေါင်းစဉ်တပ်ပြီး ကိုယ့်လူမျိုး၊ ကိုယ့်ဒေသကို အောက်ကျနောက်ကျ လုပ်နေတာပဲဖြစ်ပါတယ်။ ဒီလုပ်ရပ်တွေကို ကျွန်တော်တို့ ကာကွယ်တားဆီးကြဖို့၊ ရပ်တန့်အောင် ကြိုးစားကြဖို့လိုအပ်ပါတယ်။

ကျွန်တော်တို့အနေနဲ့ ၂၀၂၄ ခုနှစ်အတွင်းမှာ လူဦးရေနှင့် အိမ်အကြောင်းအရာသန်းခေါင်စာရင်းကို အောင်မြင်စွာကောက်ယူနိုင်ခဲ့ပါတယ်။ ပဉ္စမအကြိမ် အမျိုးသားအားကစားပွဲတော်ကြီးကိုလည်း အောင်မြင်စွာ ကျင်းပနိုင်ခဲ့ပြီး နိုင်ငံတော်ရဲ့ အားကစားအဆင့်အတန်းမြင့်မားအောင် အုတ်မြစ်ချနိုင်ခဲ့ပါတယ်။ တိုင်းပြည်ကိုလည်း အတိုင်းအတာတစ်ခုအထိ တိုးတက်အောင် ဆောင်ရွက်နိုင်ခဲ့ကြပါတယ်။ ဒီလိုဆောင်ရွက်နိုင်မှုဟာ နိုင်ငံတော်တည်ငြိမ်အေးချမ်းရေးအတွက်၊ နိုင်ငံတော်ကာကွယ်ရေး၊ ပြည်ထောင်စုမပြိုကွဲရေး၊ တရားဥပဒေစိုးမိုးရေး၊ ဒီမိုကရေစီစနစ် ခိုင်မြဲစေရေးအတွက် စွန့်လွှတ်စွန့်စားစွာ ဆောင်ရွက်နေကြသူများ ရှိနေကြလို့ပဲဖြစ်ပါတယ်။ နိုင်ငံတော်အတွက် အသက်၊ ခန္ဓာစွန့်လွှတ်ခဲ့ကြတဲ့ သူရဲကောင်းတပ်မတော်သားများ၊ မြန်မာနိုင်ငံရဲတပ်ဖွဲ့ဝင်များ၊ ပြည်သူ့စစ်တပ်ဖွဲ့ဝင်များ၊ စစ်မှုထမ်းဟောင်းများ၊ နိုင်ငံ့ဝန်ထမ်းများနှင့် နိုင်ငံသူနိုင်ငံသားများအားလုံးကို ကျွန်တော်အလေးအနက်ဂုဏ်ပြုပါကြောင်း ပြောလိုပါတယ်။ ဒါတွေဟာ သမိုင်းမှတ်တမ်းတွေအဖြစ် ကျန်ရစ်ခဲ့မှာဖြစ်သလို ကျွန်တော်တို့အားလုံးရဲ့ မျိုးချစ်စိတ်ဓာတ်ရှင်သန်ထက်မြက်နေမှုနဲ့ စည်းလုံးညီညွတ်မှုတို့ကို ဖော်ထုတ်ပြသနိုင်ခြင်းလည်းဖြစ်ပါတယ်။ ကျွန်တော်တို့နိုင်ငံမှာ လက်နက်ကိုင်ပဋိပက္ခဟာ စိန်ခေါ်မှုတစ်ရပ်အနေနဲ့ ရှိနေပါသေးတယ်။ ကျွန်တော့်အနေနဲ့ နိုင်ငံတော်အကျိုးအတွက်၊ ပြည်သူတို့ရဲ့အကျိုးအတွက် လက်နက်ကိုင်ပဋိပက္ခချုပ်ငြိမ်းပြီး တည်ငြိမ်အေးချမ်းတဲ့ ပတ်ဝန်းကျင်ကောင်းကို ဖော်ဆောင်လိုတဲ့ ရည်ရွယ်ချက်သာ ရှိပါတယ်။ ဒါကိုပြည်သူအားလုံးလိုလားတဲ့ နိုင်ငံရေးနည်း၊ တွေ့ဆုံဆွေးနွေးခြင်း နည်းများနဲ့သာ ဖြေရှင်းကြရမှာ၊ ဖော်ဆောင်ကြရမှာဖြစ်ပါတယ်။ ဒီလိုနည်းလမ်းများကသာ တည်ငြိမ်အေးချမ်းမှုကို ဖော်ဆောင်နိုင်ပြီး စီးပွားရေးနဲ့လူမှုရေးအခြေအနေများ တိုးတက်ကောင်းမွန်လာနိုင်မှာဖြစ်ပါတယ်။ ဒါပေမယ့် လက်နက်ကိုင်အဖွဲ့ခေါင်းဆောင်များအနေနဲ့ ခေါင်းစဉ်အမျိုးမျိုးပြပြီး ဒီမိုကရေစီစနစ်ကို လိုလားတယ်လို့ ပြောနေပေမယ့် လက်တွေ့မှာတော့ ကိုယ်ကျိုးအတ္တကို အခြေခံတဲ့ လိုအင်ဆန္ဒသက်သက်နဲ့ လက်နက်ကိုင်ပဋိပက္ခကိုသာ ဖန်တီးနေကြတာကို တွေ့မြင်ရမှာဖြစ်ပါတယ်။ ထို့အတူပဲ အချို့သော တိုင်းရင်းသားခေါင်းဆောင်များဟာ ဖက်ဒရယ်အခွင့်အရေး၊ တိုင်းရင်းသားအခွင့်အရေးလို့ ပြောနေကြသော်လည်း ဒီမိုကရေစီရဲ့ သဘောသဘာဝကို မျက်ကွယ်ပြုပြီး ပြည်ထောင်စုပြိုကွဲအောင် ဦးတည်ဆောင်ရွက်နေကြတာကိုလည်း တွေ့နေရပါတယ်။ ဖြစ်ချင်တာ၊ ဖြစ်သင့်တာများ ချင့်ချိန်စဉ်းစားပြီး ဖြစ်နိုင်တာကို ပြည်ထောင်စုအကျိုးကိုမျှော်ကိုးပြီး ဒီမိုကရေစီနည်းလမ်းတကျ ဆောင်ရွက်ဖို့သင့်တယ်လို့ ပြောလိုပါတယ်။ ဒီလို ဘုံရည်မှန်းချက်နဲ့ လျှောက်လှမ်းကြတဲ့ လမ်းကြောင်းမတူညီတဲ့အတွက်လည်း ကျွန်တော်တို့နိုင်ငံမှာ လက်နက်ကိုင်ပဋိပက္ခတွေ မချုပ်ငြိမ်းနိုင်သေးတာကိုလည်း ဖြစ်ပါတယ်။ ဒါတွေကိုဖြေရှင်းနိုင်ဖို့ ကျွန်တော်တို့အားလုံး စိတ်ဓာတ်ခိုင်ခိုင်မာမာနဲ့ ဒီမိုကရေစီလမ်းကြောင်းအတိုင်း လျှောက်လှမ်းကြဖို့လိုပါတယ်။ ကျွန်တော်တို့ ပြည်သူများကလည်း လက်နက်ကိုင်အဖွဲ့များကို ဒီမိုကရေစီလမ်းကြောင်းပေါ်ရောက်အောင် တွန်းအားပေးကြဖို့ လိုအပ်ကြောင်းလည်း ပြောကြားလိုပါတယ်။

ဒီကမ္ဘာလောကကြီးမှာ တိုင်းပြည်နိုင်ငံတစ်ခုဖြစ်စေ၊ လူမျိုးတစ်မျိုးဖြစ်စေ ကောင်းစွာရှင်သန်ရပ်တည်နေနိုင်ဖို့ မိမိကိုယ်ကို ခုခံကာကွယ်နိုင်စွမ်းနဲ့ မိမိတို့ရဲ့ လုပ်ကိုင်နိုင်စွမ်းတွေကို မြှင့်တင်နေကြရမှာ ဖြစ်ပါတယ်။ ကျွန်တော်တို့ရဲ့ ဘဝရပ်တည်ရေးကို ကိုယ်စွမ်းကိုယ်စနဲ့ မထိန်းသိမ်းနိုင်ရင် နိုင်ငံရဲ့အချုပ်အခြာအာဏာအားနည်းပြီး သူတစ်ပါးလက်အောက်ခံဘဝကို ကျရောက်စေနိုင်တာကိုလည်း သတိချပ်စေလိုပါတယ်။ လွတ်လပ်တဲ့နိုင်ငံအဖြစ် တည်တံ့ခိုင်မြဲစေဖို့၊ သူတစ်ပါးလက်အောက်ခံမဖြစ်စေဖို့ ကျွန်တော်တို့ နိုင်ငံသူနိုင်ငံသားအားလုံးက သွေးစည်းညီညွတ်ကြရပါမယ်။ နိုင်ငံတော်ကို ဘေးအန္တရာယ်ကျရောက်လာရင်လည်း နိုင်ငံတော်ကာကွယ်ရေးအတွက် အဓိကတာဝန်ရှိတဲ့ တပ်မတော်နဲ့ ပြည်သူတို့ ခိုင်ခိုင်မြဲမြဲလက်တွဲပြီး တိုင်းချစ်ပြည်ချစ်စိတ်ဓာတ်၊ သူရသတ္တိအပြည့်အဝနဲ့ နိုင်ငံတော်အဓွန့်ရှည်တည်တံ့ခိုင်မြဲရေးအတွက် စည်းလုံးညီညွတ်စွာနဲ့ ကာကွယ်ပြီး နိုင်ငံတော်ကြီးကို ဖွံ့ဖြိုးတိုးတက်ရေးအတွက် လုပ်ကိုင်ကြမယ်ဆိုတဲ့ စိတ်ဓာတ်တွေ မွေးကြရပါမယ်။

ကျွန်တော့်အနေနဲ့ နိုင်ငံတော်စီမံအုပ်ချုပ်ရေးကောင်စီရဲ့ အန္တိမရည်မှန်းချက်ဖြစ်တဲ့ လွတ်လပ်၍တရားမျှတမှုအပြည့်ရှိတဲ့ ရွေးကောက်ပွဲကြီးကို အောင်မြင်စွာကျင်းပပေးနိုင်ဖို့ စီမံဆောင်ရွက်လျက်ရှိပါတယ်။ နိုင်ငံတော်ကို ဒီမိုကရေစီလမ်းကြောင်းမှန်ပေါ် ပြန်လည်ရောက်ရှိအောင် ဆောင်ရွက်ပေးမှာလည်းဖြစ်ပါတယ်။ ဒါကြောင့် ကျွန်တော်တို့ပြည်သူများက ၂၀၂၄ ခုနှစ်မှာ ပြသနိုင်ခဲ့ကြတဲ့ တိုင်းချစ်ပြည်ချစ်စိတ်များ၊ မျိုးချစ်စိတ်များကိုအခြေခံပြီး စည်းလုံးညီညွတ်စွာနဲ့ ရွေးကောက်ပွဲကြီး အောင်မြင်အောင် ဝိုင်းဝန်းဆောင်ရွက်ပေးကြဖို့ ပန်ကြားလိုပါတယ်။ ၂၀၂၅ ခုနှစ်မှာ ပြည်သူများရဲ့အောင်ပွဲအဖြစ် နိုင်ငံသားအားလုံးလိုလားတဲ့ ဒီမိုကရေစီပန်းတိုင်ဆီ အရောက်လှမ်းပြီး သက်သေပြကြဖို့လည်း တိုက်တွန်းပြောကြားလိုပါတယ်။

မြန်မာနိုင်ငံသား မိဘပြည်သူညီအစ်ကို မောင်နှမများအားလုံး တစ်ဦးပေါ်တစ်ဦး အပြန်အလှန်မေတ္တာထားပြီး နိုင်ငံနဲ့လူမျိုးကောင်းကျိုးကို ဖော်ဆောင်နိုင်ကြသူများဖြစ်ပါစေကြောင်း နှစ်သစ်ကူးဆုမွန်ကောင်းတောင်းအပ်ပါတယ် ခင်ဗျာ။

Source: myanmar.gov.mm

ရုရှား သမ္မတဗလာဒီမာပူတင်၏ မိန့်ခွန်းတွင် “လာမည့် မိနစ်အနည်းငယ်အတွင်းမှာ ၂၀၂၅ ခုနှစ် ဆိုသည့် နှစ်သစ်ကို စတင်တော့မည်ဖြစ်ပါကြောင်း၊ ရုရှားနိုင်ငံတွင် အဆိုပါကာလသည် သမိုင်းဝင်အရေးပါသော အကြီးစား ဖြစ်ရပ်များ အပါအဝင် များစွာသော အခိုက်အတန့်များ ဖြင့်ပြည့်နေပါကြောင်း၊ ၎င်းတို့သည် မိမိတို့အတွက် ကြီးမားသော ရည်မှန်းချက်များကိုချမှတ်ပြီး ၎င်းတို့ကို အောင်မြင်စွာ အတူတကွ လက်တွဲခဲ့ကြသောကြောင့် စိန်ခေါ်မှုများကို တစ်ကြိမ်ထက်မကပို၍ ကျော်ဖြတ် နိုင်ခဲ့ခြင်းသည် ၎င်းတို့၏စည်းလုံးညီညွတ်မှု၊ ယုံကြည်ချက် နှင့်၎င်းတို့၏စွမ်းဆောင်နိုင်မှုတို့ကို ပိုမိုခိုင်ခံလာစေခဲ့ ပါကြောင်း ပူတင်က ပြောကြားခဲ့ပါသည်။

ထို့အပြင်၎င်းတို့တွင် ဆုံးဖြတ်စရာကိစ္စရပ်များစွာ ကျန်ရှိနေသေးပါကြောင်း သို့သော် လုပ်ဆောင်ပြီးကိစ္စရပ်များအတွက်လည်းဂုဏ်ယူပါကြောင်း၊ ဤသည်မှာ ၎င်းတို့၏ ဘုံအမွေအနှစ်ဖြစ်ပြီး နောက်ထပ် ဖွံ့ဖြိုး တိုးတက်မှုအတွက် ယုံကြည်စိတ်ချရသော အခြေခံဖြစ်ပါကြောင်း၊ လွတ်လပ်ပြီး ခိုင်မာသော ၎င်းတို့နိုင်ငံ သည် အခက်ခဲဆုံးသော စိန်ခေါ်မှုများကို တုံ့ပြန်နိုင်ခဲ့ပါကြောင်း၊ ယခုလည်း နှစ်သစ်၏ တံခါးဝတွင် ၎င်းတို့ သည် ၎င်းတို့၏အနာဂတ်ကို တွေးတောနေပါကြောင်း၊  အရာအားလုံးအဆင်ပြေသွားမည်မှာ သေချာပါကြောင်း၊ ၎င်းတို့အနေဖြင့် ရှေ့ကိုဆက်သွားမည်ဖြစ်ပါကြောင်း၊ ၎င်းတို့အတွက် ပကတိတန်ဖိုးသည် ရုရှားနိုင်ငံ၏ ကံကြမ္မာဖြစ်ပြီး နိုင်ငံသားများ၏ သုခချမ်းသာဖြစ်ရေး ကို ရှေးရှုထားပါကြောင်း၊ အမိနိုင်ငံအတွက် စိတ်ရင်းမှန် ဖြင့်ခံစားချက်များသည် ၎င်းတို့၏ဘဝများကို အဓိပ္ပာယ်ပြည့်ဝစေပါကြောင်း၊ ၎င်း၏ အချုပ်အခြာအာဏာ၊ လုံခြုံရေး၊ အကျိုးစီးပွားများနှင့် လွတ်လပ်သော ဖွံ့ဖြိုးတိုးတက်ရေးတို့ကို အကာအကွယ်ပေးလိုသောဆန္ဒသည် ၎င်းတို့အတွက် ဂုဏ်ယူစရာကိစ္စတစ်ခု ဖြစ်လာခဲ့ပါကြောင်း ပြောကြားခဲ့ပါသည်။

ဤနှစ်သစ်ကူးအကြိုတွင် ရုရှားနိုင်ငံတစ်ဝှမ်းရှိသန်းပေါင်း များစွာသောပြည်သူလူထုများ၊ မိသားစုဆွေမျိုးများ၏ အတွေးများနှင့် မျှော်လင့်ချက်များသည် ရုရှားနိုင်ငံ၏ တပ်မတော်သားများ၊ တပ်မှူးများနှင့်အတူ ရှိနေ ပါကြောင်း၊ ရုရှားနိုင်ငံကို ကာကွယ်ရန်နှင့် ပြည်သူများကို ထာဝရငြိမ်းချမ်းရေးနှင့် လုံခြုံရေးအတွက် အာမခံချက်များကို ပေးဆောင်ရန်အတွက် ကြီးကျယ်ခမ်းနားသည့် စစ်ရေးအလုပ်များကို ဆောင်ရွက်နေကြသည့် စစ်မှန်သည့်သူရဲကောင်းများအဖြစ် ရုရှားတပ်မတော်သားများအား မှတ်ယူထားပါကြောင်း၊ ၎င်းတို့၏ရဲစွမ်းသတ္တိအတွက် ဂုဏ်ယူပါကြောင်း၊ သမ္မတ ဗလာဒီမာပူတင်က ၎င်း၏ နှစ်သစ်ကူး မိန့်ခွန်းတွင် ပြောကြားခဲ့ပါသည်။

အမိမြေအတွက် တိုက်ပွဲဝင်ခဲ့ကြသော ဘိုးဘေးဘီဘင်များအား ဂုဏ်ပြုသောအားဖြင့် ကျရောက်မည့် ၂၀၂၅ ခုနှစ်အား အမိမြေကို ကာကွယ်သောနှစ် ၈၀ ပြည့်အဖြစ် ဂုဏ်ပြုမည့်နှစ်အဖြစ် ကြေညာပါကြောင်း၊ ၎င်းတို့သည် နာဇီဝါဒကို ချေမှုန်းပစ်ခဲ့သောမျိုးဆက်၏ သားသမီးများ၊ မြေးများနှင့် မြစ်များဖြစ်ပါကြောင်း၊ ၎င်းတို့သည် ၎င်းတို့၏ စစ်မှုထမ်းဟောင်းများ၏ ပဋိညာဉ်များနှင့် ဓလေ့ထုံးတမ်းများကို သစ္စာစောင့်သိသွားမည်ဖြစ်ပါကြောင်း သမ္မတက ပြောကြားခဲ့ပါသည်။

နှစ်သစ်တွင် ၎င်းတို့၏ အိပ်မက်များနှင့် အတွေးအခေါ်များ၊ အကောင်းဆုံးသော ရည်ရွယ်ချက်များသည် သေချာပေါက် အကောင်အထည်ဖော်နိုင်မည်ဟု မျှော်လင့်ပါကြောင်း ၎င်းတို့၏ ချစ်ခင်မြတ်နိုးသည့် ရုရှားနိုင်ငံနှင့် ပြည်သူလူထုများအတွက် ကောင်းကျိုးသုခနှင့် ကြွယ်ဝချမ်းသာမှုတို့ ပြည့်စုံပါစေကြောင်း ဆုမွန်ကောင်းတောင်းအပ်ပါ သည်” ဟု သမ္မတ ပူတင် မှ နှစ်သစ်ကူး ဆုမွန်တောင်းပေးခဲ့ပါသည်။

ကိုးကား - kremlin.ru

Photo- Aljazeera

ဆိုးလ်မြို့ရှိ ခရိုင်တရားရုံးတစ်ခုသည် ဆူပူအုံကြွမှု စွပ်စွဲချက်များနှင့် စွပ်စွဲခံထားရသော သမ္မတ Yoon Suk Yeol ကို ဖမ်းဆီးရန် ဖမ်းဝရမ်းကို အတည်ပြုလိုက်ပြီ ဖြစ်သည်။

အဆိုပါ ဖမ်းဝရမ်းအတွက် လျှောက်ထားချက်ကို ရဲတပ်ဖွဲ့၊ ကာကွယ်ရေး ဝန်ကြီးဌာနနှင့် အကျင့်ပျက် ခြစားမှု တိုက်ဖျက်ရေး အထူးအဖွဲ့တို့ ပါဝင်သော ပူးပေါင်း စုံစမ်းစစ်ဆေးရေးအဖွဲ့က ဒီဇင်ဘာ ၃၀ ရက်နေ့က တင်သွင်းခဲ့ခြင်းဖြစ်သည်။

Yoon သည် ပူးပေါင်းအဖွဲ့မှ ထုတ်ပြန်သော ဆင့်ခေါ်ချက် ကို လိုက်နာရန် သုံးကြိမ်တိုင်တိုင် ပျက်ကွက်ပြီးနောက် ယခုကဲ့သို့ ထွက်ပေါ်လာခြင်းဖြစ်သည်။ 

ဒီဇင်ဘာ ၂၇ ရက်နေ့တွင် Yoon အား ရာထူးမှ ပြန်လည် ခန့်အပ်ခြင်း သို့မဟုတ် အပြီးအပိုင်ဖယ်ရှားခြင်း ရှိ၊ မရှိ ဆုံးဖြတ်ရန် ဖွဲ့စည်းပုံအခြေခံဥပဒေဆိုင်ရာ တရားရုံးက ကြားနာစစ်ဆေးခဲ့သည်။

လွှတ်တော်အတွင်း မကျေလည်မှုများဖြစ်ပွားနေသော Yoon သည် ဒီဇင်ဘာ ၃ ရက်နေ့တွင် စစ်အုပ်ချုပ်ရေး ကြေညာခဲ့သည်။ အတိုက်အခံလွှတ်တော်ကိုယ်စားလှယ်များက နာရီ အနည်းငယ်အကြာတွင် အဆိုပါကြေညာမှုကို ဆန့်ကျင် ခဲ့ကြသည်။

Yoon ၏ ဥပဒေအကြံပေးအဖွဲ့သည် စွပ်စွဲပြစ်တင်မှု အား စုံစမ်းစစ်ဆေးပိုင်ခွင့်မရှိဟု ငြင်းဆိုထားသည့် ထုချေလွှာကို တရားရုံးသို့ တင်သွင်းထားကြောင်း ၎င်း၏ ရှေ့နေက ဒီဇင်ဘာ ၃၀ ရက်နေ့ တွင် ပြောကြားခဲ့သည်။

ကိုးကား-NHK World

ထိုင်ဝမ်နှင့် တရုတ်နိုင်ငံ၏ “ပြန်လည်ပေါင်းစည်းရေး” ၏ “သမိုင်းဝင်လမ်းကြောင်း” ကို မည်သူမျှ တားဆီး နိုင်မည် မဟုတ်ကြောင်း သမ္မတ ရှီက ပြောကြား ခဲ့ပါသည်။ ထိုင်ဝမ်ရေလက်ကြား၏နှစ်ဘက်စလုံးသည် “တစ်မိသားစုတည်း” ဖြစ်သည်ဟု ၎င်းက ထပ်လောင်း ပြောကြားခဲ့ပါသည်။

ကိုးကား - RT

ရုရှားကာကွယ်ရေးဝန်ကြီးဌာနက ၎င်းတို့၏ တပ်မတော်များသည် ဘီလာရုစ်ပိုင်နက်တွင်ရှိနေပြီး ၎င်းတို့အား စိတ်ပိုင်းဆိုင်ရာနှင့် ဆေးဘက်ဆိုင်ရာ အကူအညီများပေးကာ ဆွေမျိုးများနှင့် ဆက်သွယ်ရန် ဆောင်ရွက်ပေးထားကြောင်း၊ ယင်းနောက် ၎င်းတို့အား မော်စကိုရှိ ဆေးဘက်ဆိုင်ရာဌာနများတွင် ကုသရေးနှင့် ပြန်လည်ထူထောင်ရေးတို့အတွက် ခေါ်ဆောင်သွားမည်ဖြစ်ကြောင်း သတင်းထုတ်ပြန်ခဲ့ပါသည်။

ကိုးကား - Zvezdanews

Photo- SAN

၂၀၂၄ ခုနှစ် လူဦးရေနှင့်အိမ်အကြောင်းအရာ သန်းခေါင် စာရင်းကို ၂၀၂၄ ခုနှစ် အောက်တိုဘာလ(၁)ရက်နေ့မှ စတင်၍ တစ်နိုင်ငံလုံးအတိုင်းအတာဖြင့် ကောက်ယူခဲ့ ပြီးဖြစ်ရာ အဆိုပါ ၂၀၂၄ ခုနှစ် လူဦးရေနှင့်အိမ် အကြောင်း အရာ သန်းခေါင်စာရင်း၏ ရှေ့ပြေးလူဦးရေစာရင်းကို ဒီဇင်ဘာလ ၃၁ ရက်နေ့တွင် ပြည်သူ့အင်အားဦးစီး ဌာနက မြန်မာ-အင်္ဂလိပ်နှစ်ဘာသာဖြင့် ထုတ်ပြန် ထားသည်။

၂၀၂၄ ခုနှစ် လူဦးရေနှင့် အိမ်အကြောင်းအရာ သန်းခေါင် စာရင်းမှရရှိသော ရှေ့ပြေး လူဦးရေစာရင်းအရ ၂၀၂၄ ခုနှစ်၊ စက်တင်ဘာလ ၃၀ ရက်နေ့ညတွင် မြန်မာနိုင်ငံ အတွင်း၌ ရှိနေသူဦးရေမှာ (၅၁,၃၁၆,၇၅၆) ဦး ဖြစ်ပါသည်။ အဆိုပါစာရင်းတွင် သန်းခေါင်စာရင်း ကောက်ယူရရှိသည့် လူဦးရေ (၃၂,၁၉၁,၄၀၇) ဦးနှင့် စာရင်းမကောက်ယူနိုင်သည့်ဒေသများ အတွက် ခန့်မှန်း လူဦးရေ (၁၉,၁၂၅,၃၄၉) ဦး ပါဝင်ပါသည်။ ကောက်ယူ ရရှိသည့် စာရင်းအရ ကျား ဦးရေမှာ (၁၅,၁၀၅,၂၁၅) ဦးနှင့် မ ဦးရေမှာ (၁၇,၀၈၆,၁၉၂) ဦးဖြစ်၍ အမျိုးသမီး ဦးရေ ပိုများသည်ကို တွေ့ရှိရပါသည်။ အမျိုးသား (၄၆.၉) ရာခိုင်နှုန်းဖြစ်၍ အမျိုးသမီး (၅၃.၁) ရာခိုင်နှုန်း ဖြစ်ပါသည်။ မြန်မာနိုင်ငံ၏ တိုင်းဒေသကြီး / ပြည်နယ် များတွင် ကျား/မ အလိုက် လူဦးရေပျံ့နှံ့နေထိုင်မှု (စာရင်းမကောက်ယူနိုင်သည့် ဒေသများ၏ ခန့်မှန်း လူဦးရေအပါအဝင်)ကို ဇယားများဖြင့် ဖော်ပြထားသည်။

အဆိုပါ ရှေ့ပြေးလူဦးရေ စာရင်းအချက်အလက်များ ရယူလိုပါက ပြည်သူ့အင်အားဦးစီးဌာန Website ဖြစ်သည့် https://www.dop.gov.mm တွင် ရယူ နိုင်ရန် ထုတ်ပြန်ထားသည်။

Source: ပြည်သူ့အင်အားဦးစီးဌာန (DOP)