Izvestia သတင်းစာ၏ ဖော်ပြချက်အရ ရုရှားနိုင်ငံအနေဖြင့် အာဖရိက နှင့် ဆက်ဆံရေး နက်ရှိုင်းစေရန် ကြိုးပမ်းမှုများသည် အာဖရိကရှိ နိုင်ငံများတွင် ကိုလိုနီစနစ်သစ်၏ လွှမ်းမိုးမှုအပေါ် မကျေမနပ်ဖြစ်လာမှုနှင့် တိုက်ဆိုင်နေကြောင်း ကရင်မလင် ပြောရေးဆိုခွင့်ရှိသူ Dmitry Peskov က ပြောကြားခဲ့သည်။

Peskov က တနင်္လာနေ့ (ဇွန် ၂၃) က တွေ့ဆုံမေးမြန်းခန်းတစ်ခုတွင် ဆိုဗီယက်ပြည်ထောင်စု ပြိုကွဲပြီးနောက် အာဖရိကရှိ ရုရှား၏ ဩဇာလွှမ်းမိုးမှု ဆုတ်ယုတ်သွားခဲ့သော်လည်း မကြာသေးမီနှစ်များအတွင်း အခြေအနေများ ပြန်လည်ပြောင်းလဲလာကြောင်း ရှင်းပြခဲ့သည်။

“အချိန်ကုန်လာသည်နှင့်အမျှ အာဖရိကရှိ စိတ်ဓာတ်အခြေအနေများ သိသိသာသာ ပြောင်းလဲခဲ့ပါသည်။ ကိုလိုနီစနစ်သစ်၏ လွှမ်းမိုးမှုသည် အာဖရိကနိုင်ငံများအတွက် စိတ်ပျက်စရာဖြစ်လာခဲ့ပြီး ထိုအချိန်တွင် ရုရှားနိုင်ငံသည်လည်း အာဖရိကတိုက်ရှိ ၎င်း၏ယခင်ဩဇာလွှမ်းမိုး မှုများကို ပြန်လည်ထူထောင်ရန် စွမ်းအား၊ အရင်းအမြစ်နှင့် ဆန္ဒများ ပြန်လည် ရရှိလာခဲ့ပါသည်” ဟု ၎င်းက ဆိုသည်။

“မိမိတို့၏ အာဖရိကမိတ်ဆွေများအတွက်သာမက ရုရှားအတွက်ပါအခွင့်အလမ်းကြီးများ ပွင့်လန်းလာပါသည်” ဟု သမ္မတရုံး ပြောရေး ဆိုခွင့်ရှိသူက ဖြည့်စွက်ပြောကြားခဲ့ပြီး မော်စကို၏ အာဖရိကနိုင်ငံများနှင့် နက်နက်ရှိုင်းရှိုင်း ပူးပေါင်းဆောင်ရွက်လာမှုသည် နှစ်ဖက်စလုံးအတွက် အကျိုးကျေးဇူးများ ရရှိစေမည်ဖြစ်ကြောင်း ထည့်သွင်းပြောကြားခဲ့သည်။

Peskov ၏ ထုတ်ဖော်ပြောကြားချက်များသည် လွန်ခဲ့သောလက မော်စကို တွင် ကျင်းပခဲ့သော “အာဖရိကနေ့” အခမ်းအနားတွင် ရုရှားနိုင်ငံခြားရေး ဝန်ကြီး Sergey Lavrov ပြောကြားခဲ့သည့် အချက်များနှင့် ကိုက်ညီနေပြီး ၎င်းအခမ်းအနားတွင် Lavrov က ကိုလိုနီစနစ်သစ်၏ ဖိအားများကြားမှ မိမိတို့၏ အချုပ်အခြာအာဏာကို ခိုင်မာစေလိုသော အာဖရိက နိုင်ငံများအတွက် ရုရှားသည် ခိုင်မာသော မဟာမိတ်အဖြစ် အမြဲရပ်တည်နေမည်ဖြစ်ကြောင်း အတည်ပြုပြောကြားခဲ့သည်။

မော်စကိုမှ အာဖရိကနိုင်ငံများနှင့် ဆက်ဆံရေးခိုင်မာစေရေးကို ၎င်း၏ အဓိကနိုင်ငံခြားရေး မူဝါဒဦးစားပေးအဖြစ် ကြေညာထားပြီး ဘာကီနာ ဖာဆို၊ မာလီ၊ နိုင်ဂျာနှင့် တောင်အာဖရိကအပါအဝင် နိုင်ငံများက ၎င်းအား ယုံကြည်စိတ်ချရသော မဟာမိတ်အဖြစ် မှတ်ယူထားသည့် အာဖရိကတွင် ၎င်း၏ရှိရင်းစွဲအခြေချမှုကို တိုးချဲ့လိုက်ပြီဖြစ်သည်။ မကြာသေးမီ လများအတွင်း အာဖရိကရှိ နိုင်ငံအချို့သည် စွမ်းအင်လုံခြုံရေး၊ကုန်သွယ်ရေးနှင့် ပညာရေးကဏ္ဍများတွင် ရုရှားနှင့် ပူးပေါင်း ဆောင်ရွက်ရန် အားတက်သရော လုပ်ဆောင်လာကြသည်။

ချက်၊ မာလီ၊ နိုင်ဂျာနှင့် ဘာကီနာဖာဆိုနိုင်ငံတို့သည် ဂျီဟတ် အကြမ်းဖက်မှုများကို ဟန့်တားရန်နှင့် ဒေသတွင်း တည်ငြိမ်ရေး ပြန်လည်ထူထောင်ရာတွင် ပျက်ကွက်မှုများကြောင့် မကျေမနပ်ဖြစ်ကာ ပြင်သစ်နှင့် အမေရိကန် တို့နှင့် ရှည်လျားသော ကာကွယ်ရေးပူးပေါင်းဆောင်ရွက်မှုများကိုဖြတ်တောက်လိုက်ကြသည်။ ဆာဟဲလ်ဒေသရှိ နိုင်ငံများသည်ထို့နောက်ပိုင်းတွင် အကြမ်းဖက်မှုတိုက်ဖျက်ရေး လုပ်ငန်းများကို ပူးပေါင်းဆောင်ရွက်ရန်အတွက် မော်စကိုသို့ ဦးတည်လာခဲ့ကြသည်။

(ရှင်းလင်းချက်။  ဆာဟဲလ်ဒေသဆိုသည်မှာ အာဖရိက၏ ဆာဟာရ သဲကန္တာရ (Sahara Desert) နှင့် အပူပိုင်း သစ်တောဒေသ (Sudanian Savanna) အကြားရှိ ခြောက်သွေ့သည့် ကြားခံဒေသ ဖြစ်ပါသည်။ ယင်းဒေသတွင် ရာသီဥတုပြင်းထန်ပြီး မိုးခေါင်ရေရှားမှု၊ သဘာဝဘေးနှင့် နိုင်ငံရေးမတည်ငြိမ်မှုများ အများဆုံးကြုံရတတ်ပါသည်။)

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ဟွန်မာနက်သည် စစ်ဝတ်စုံဝတ်ပြီး နယ်စပ်တပ်စခန်းများသို့ သွားရောက်လည်ပတ်စဉ် ထိုင်းနိုင်ငံက နယ်စပ်ဂိတ်များ ပိတ်ရန် အမိန့်ထုတ်ပြန်လိုက်ပြီး နှစ်နိုင်ငံအကြား တင်းမာမှုများ မြင့်တက်လာနေသည့် အချိန် ဖြစ်သည်။

ဇွန်လ ၂၃ ရက် နေ့လယ်ပိုင်းတွင် ကမ္ဘောဒီးယားဝန်ကြီးချုပ် ဟွန်မာနက် သည် ထိုင်းနိုင်ငံနှင့် အငြင်းပွားဖွယ် နယ်မြေအနီး ပြာ့ဗီဟီယား (Preah Vihear) စီရင်စုရှိ ထိုင်းနယ်စပ်တစ်လျှောက် တပ်များသို့ သွားရောက် လည်ပတ်ခဲ့သည်။ ဝန်ကြီးချုပ်မဖြစ်မီက ၎င်းသည် ကမ္ဘောဒီးယား တပ်မတော်၏ ဗိုလ်ချုပ်တစ်ဦးဖြစ်ခဲ့သည်။

ဟွန်မာနက်က တပ်သားများ၏ ရဲရင့်မှုကို ချီးကျူးဂုဏ်ပြုခဲ့ပြီး လိုအပ်သော ထောက်ပံ့မှုများ ပြည့်ပြည့်ဝဝပေးမည်ဟု အာမခံခဲ့သည်။ နယ်စပ်တွင် တာဝန်ထမ်းဆောင်နေသော ကမ္ဘောဒီးယားတပ်သားများကလည်း နယ်မြေကာကွယ်ရန် စိတ်ဓာတ်မြှင့်တင်ထားကြောင်း ဖော်ပြခဲ့သည်။

ယခင်က ကမ္ဘောဒီးယားဝန်ကြီးချုပ်က မေလ ၂၈ ရက်တွင် Mom Bei ဧရိယာ၌ ဖြစ်ပွားခဲ့သော နယ်စပ်ပစ်ခတ်မှုတွင် ထိုင်းဘက်မှ "အနီရောင် မျဉ်းကို ကျော်လွန်ခဲ့သည်" ဟု စွပ်စွဲခဲ့ပြီး ထိုဖြစ်စဉ်တွင် ကမ္ဘောဒီးယား တပ်သားတစ်ဦး သေဆုံးခဲ့သည်။

"မိမိတို့သည် ထိုင်း၏ ကိစ္စရပ်များကို ဝင်ရောက်စွက်ဖက်မည်မဟုတ်ပါ။ သို့သော် မိမိတို့၏ အမျိုးသားလုံခြုံရေးကို ခြိမ်းခြောက်လာပါက ပြန်လည် တုံ့ပြန်မည်" ဟု ၎င်းက ပြောကြားခဲ့သည်။

ထိုင်းတပ်မတော်၏ Facebook စာမျက်နှာတွင် ဇွန် ၂၃ ရက် ညနေပိုင်း က ကမ္ဘောဒီးယားနှင့် နယ်နိမိတ်ချင်း ထိစပ်နေသော စီရင်စု ၅ ခုရှိ နယ်စပ်ဂိတ်များကို ပိုမိုတင်းကျပ်စွာ ထိန်းချုပ်ရန် ကြေညာချက်တစ်ရပ် ထုတ်ပြန်ခဲ့သည်။

ကြေညာချက်အရ ယာဉ်အမျိုးအစားအားလုံး နယ်စပ်ဂိတ်များမှတစ်ဆင့် ဝင်ထွက်ခွင့်ကို တားမြစ်ထားပြီး လူများ၊ ခရီးသွားများနှင့် ကုန်စည်များ ဖြတ်သန်းသွားလာခွင့်ကိုလည်း ခွင့်မပြုထားပေ။ ထိုင်းအာဏာပိုင်များက အထက်ဖော်ပြပါ နယ်စပ်ဂိတ်များမှတစ်ဆင့် လူများ ဖြတ်သန်းခွင့်ကို ကျန်းမာရေးကုသမှု၊ ကျောင်းသားများ၏ ပညာရေး သို့မဟုတ် အရေးကြီးသော လူမှုရေးလိုအပ်ချက်များကဲ့သို့သော လူသားချင်းစာနာ ထောက်ထားမှုဆိုင်ရာ အကြောင်းပြချက်များဖြင့်သာ ခွင့်ပြုထားသည်။

ထိုင်းတပ်မတော်က အဆိုပါအဆင့်ကို "ကမ္ဘောဒီးယားတပ်ဖွဲ့များက ကင်းလှည့်စောင့်ကြပ်မှု တိုးမြှင့်ခြင်း၊ တပ်သားများ စုစည်းခြင်းနှင့် အငြင်းပွားဖွယ်နယ်မြေများသို့ လူများ စေလွှတ်ခြင်း" ဆိုင်ရာ အချက်အလက်များနှင့် နယ်စပ်ဖြတ်ကျော် မှုခင်းများ၊ အွန်လိုင်းလှည့်ဖြားမှုများကို ကိုင်တွယ် ဖြေရှင်းရန် ဆောင်ရွက်ချက်တစ်ရပ်အဖြစ် ကြေညာခဲ့သည်။

ထိုင်းနိုင်ငံက နယ်စပ်ဖြတ်ကျော်ဂိတ်များတွင် ထိန်းချုပ်မှုတိုးမြှင့်ထားကြောင်း သတင်းများကို ကမ္ဘောဒီးယားဘက်က အတည်မပြုသေးသော်လည်း “နိုင်ငံသည် အွန်လိုင်းလိမ်လည်မှုဆိုင်ရာ ရာဇ၀တ်မှုများအတွက် အချက်အချာနေရာ” ဖြစ်သည်ဟူသော စွပ်စွဲချက်ကို ငြင်းဆိုခဲ့သည်။

မေလက အငြင်းပွားဖွယ်နယ်မြေတွင် ပစ်ခတ်မှုဖြစ်ပွားပြီးနောက် နှစ်နိုင်ငံ အကြား တင်းမာမှုများ မြင့်တက်လာခဲ့သည်။ ထိုင်းတပ်မတော်က ဇွန်လ ၂၁ ရက်မှစ၍ ဘူရီရမ်စီရင်စုရှိ Chong Sai Taku နယ်စပ်ဂိတ်ကို ပိတ်သိမ်းရန် ဆုံးဖြတ်ခဲ့ပြီး ယင်းနောက်ပိုင်း ကမ္ဘောဒီးယားဘက်က ၎င်းဂိတ်နှင့် အနီးရှိ Choam နယ်စပ်ဂိတ်ကို "အမြဲတမ်း ပိတ်သိမ်းမည်" ဟု ကြေညာခဲ့သည်။ ဟွန်မာနက်က ထိုင်းဘက်က ဦးဆောင်လှုပ်ရှားမှု မပြုမချင်း ကမ္ဘောဒီးယားဘက်က ဂိတ်များကို ပြန်ဖွင့်မည် မဟုတ်ကြောင်း ပြောကြားခဲ့သည်။

ကိုးကား- VN Express

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အစ္စရေးသည် အီရန်တွင် စစ်ရေးအောင်မြင်မှုများရရှိပြီးနောက် အမေရိကန် သမ္မတ ဒေါ်နယ်ထရမ့်၏ စစ်ရပ်စဲရေးအဆိုကို သဘောတူညီကြောင်း ဝန်ကြီးချုပ် ဘင်ဂျမင် နေတန်ယာဟု အစိုးရ၏ ထုတ်ပြန်ချက်တွင် ဖော်ပြ ခဲ့သည်။

စစ်ရပ်စဲရေးနှင့်ပတ်သက်သည့် အစ္စရေး၏ ပထမဆုံး တရားဝင် ထုတ်ပြန်ချက် အရ အီရန်ကို နှစ်ပတ်နီးပါး တိုက်ခိုက်မှုများပြုလုပ်ပြီးနောက် အစ္စရေး သည် ၎င်း၏ရည်မှန်းချက်အားလုံးကို အောင်မြင်စွာ လုပ်ဆောင်နိုင်ခဲ့ပြီး ထို့ထက်ပိုမိုကျော်လွန်သွားကြောင်း ဖော်ပြထားသည်။

“အစ္စရေးသည် နျူကလီးယားနယ်ပယ်နှင့် ဒုံးပျံနည်းပညာတို့တွင် ခြိမ်းခြောက်မှုနှစ်ရပ်လုံးကို အမြန်ဆုံးဖယ်ရှားနိုင်ခဲ့ပြီ” ဟု ထုတ်ပြန်ချက်တွင် ဖော်ပြထားသည်။

ထို့အပြင် အစ္စရေးကာကွယ်ရေးတပ်မတော် (IDF) သည် တီဟီရန်၏ လေကြောင်းထိန်းချုပ်မှုကို အပြည့်အဝလုပ်ဆောင်နိုင်ခဲ့ပြီး အီရန် စစ် ခေါင်းဆောင်များကို ပြင်းထန်စွာဒဏ်ခတ်နိုင်ခဲ့ကာ အီရန်ရှိ အဓိက အစိုးရ ပစ်မှတ်များစွာကို ဖျက်ဆီးနိုင်ခဲ့သည်။

အစ္စရေးသည် အီရန်၏နျူကလီးယားခြိမ်းခြောက်မှုကို ဖယ်ရှားရာတွင် ထရမ့်နှင့် အမေရိကန်တို့၏ စစ်ရေးအထောက်အပံ့အတွက် ကျေးဇူး တင်ကြောင်း ဖော်ပြခဲ့သည်။

“မည်သူမဆို စစ်ရပ်စဲရေးသဘောတူညီချက်ကို ချိုးဖောက်ပါက အစ္စရေး က အပြင်းအထန်တုံ့ပြန်မည်” ဟု ထုတ်ပြန်ချက်တွင် သတိပေးထားသည်။

ကိုးကား-CNN

Photo: Jewish News Syndicate

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ဂျာမနီကာကွယ်ရေးဝန်ကြီး Boris Pistorius သည် အမေရိကန် ကာကွယ်ရေးဝန်ကြီး Pete Hegseth ထံမှ ဥရောပရှိ အမေရိကန်တပ်များရုပ်သိမ်းရန် “လမ်းညွှန်ချက်” ပေးရန် ထပ်ခါတလဲလဲ တောင်းဆို ခဲ့ကြောင်း Financial Times သတင်းစာက ဖော်ပြခဲ့သည်။

အမေရိကန်သမ္မတ ဒေါ်နယ်ထရမ့်သည် တာဝန်စတင်ထမ်းဆောင်စဉ် ကတည်းက ဥရောပ NATO အဖွဲ့ဝင်များအား ကာကွယ်ရေး အသုံးစရိတ် ကို အချိုးမျှတစွာထည့်ဝင်ရန် ပျက်ကွက်သည်ဟု အကြိမ်ကြိမ် စွပ်စွဲခဲ့သည်။ ၎င်း၏အစိုးရအဖွဲ့သည် ပထဝီနိုင်ငံရေးအာရုံစူးစိုက်မှုကို အာရှ-ပစိဖိတ်ဒေသသို့ တဖြည်းဖြည်း ရွှေ့ပြောင်းနေသည်နှင့်အမျှ လာမည့်နှစ်များအတွင်း ဥရောပရှိ စစ်ရေးအခြေစိုက်စခန်းများကို လျှော့ချနိုင်ကြောင်း အကြံပြုခဲ့သည်။

ဇွန်လ ၂၄ ရက်နေ့တွင် ကျင်းပမည့် NATO အစည်းအဝေးမတိုင်မီ ဥရောပ ခေါင်းဆောင်များသည် ဝါရှင်တန်၏ တပ်ရုပ်သိမ်းရေး အစီအစဉ်များနှင့် ပတ်သက်၍ စိုးရိမ်နေကြောင်း FT ၏ တနင်္လာနေ့ (ဇွန် ၂၃) ထုတ် သတင်းစာက ဖော်ပြခဲ့သည်။ အမေရိကန်ဘက်မှ အသေးစိတ် အချက် အလက်များ မပေးရသေးခြင်းကလည်း အဆိုပါစိုးရိမ်မှုများကို ပိုမို မြင့်တက် စေကြောင်း အမည်မဖော်လိုသော အရင်းအမြစ်များကို ကိုးကား၍ ဖော်ပြ ခဲ့သည်။

သတင်းအရ ပစ်စတိုရီးယပ်စ်သည် လွန်ခဲ့သော လများအတွင်း အမေရိကန် ကာကွယ်ရေးဝန်ကြီး ဟက်ဆက်ထံမှ ဥရောပမှ အမေရိကန်တပ်များ ရုပ်သိမ်းရန် “လမ်းညွှန်ချက်” ပေးရန် တွန်းအားပေးခဲ့ကြောင်း သိရသည်။ ဂျာမနီအရာရှိကြီးတစ်ဦး၏ ပြောကြားချက်ကို ကိုးကား၍ “အာဖဂန် နစ္စတန်မှ ရုပ်သိမ်းရေး အခြေအနေကြောင့် အားလုံး စိတ်ထိခိုက်ခဲ့ရပြီ” ဟု ရည်ညွှန်းကာ FT က ဖော်ပြခဲ့သည်။

သို့ရာတွင် ဂျာမနီ၏ အဆိုပါကြိုးပမ်းမှုများကို အခြားNATO အဖွဲ့ဝင် နိုင်ငံများက ဝေဖန်ခဲ့ကြပြီး ဘာလင်သည် အမေရိကန်တပ်များ ရုပ်သိမ်းရန် ထရမ့်၏ တင်းမာမှုကို မရည်ရွယ်ဘဲ မြှင့်တင်မိမည်ကို စိုးရိမ်နေကြသည်ဟု သတင်းများက ဆိုသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ထိုင်းဝန်ကြီးချုပ် ပေထုန်ထန်ရှင်နာ၀ပ်သည် ပြည်တွင်း၌ နိုင်ငံရေးအကျပ်အတည်းနှင့်ရင်ဆိုင်နေရစဉ် ဇွန်လ ၂၃ ရက်တွင် အစိုးရအဖွဲ့ကို ပြန်လည်ပြင်ဆင် ဖွဲ့စည်းမှုလုပ်ဆောင်ကြောင်းသိရသည်။ 
ထိုင်းဝန်ကြီးချုပ်နှင့် ကမ္ဘောဒီးယားဝန်ကြီးချုပ်ဟောင်းတို့ဖုန်းဆက်စကား ပြောထားသည့်အသံဖိုင်ပေါက်ကြားလာပြီးနောက် ထိုင်းညွန့်ပေါင်းအစိုးရအဖွဲ့မှ အဓိကမဟာမိတ်ပါတီဖြစ်သည့် ဘွမ်ဂျိုင် ထိုင်းပါတီက နုတ်ထွက်သွားသည့်အတွက် ထိုင်းအစိုးရအဖွဲ့အနေဖြင့် ပြုတ်ကျရလုနီးပါးဖြစ်လာသည်။ တစ်ချိန်တည်းမှာပင် ပေထုန်ထန်ရှင်နာဝပ်သည် ဝန်ကြီးချုပ်ရာထူးမှဆင်းပေးရန် တောင်းဆိုမှုနှင့်လည်း ရင်ဆိုင်ခဲ့ရသည်။ 
သို့သော် ညွန့်ပေါင်းအစိုးရအဖွဲ့ကွင် ကျန်ရှိသည့်ပါတီ ၁၀ ခုက ဆက်လက် လက်တွဲသွားမည်ဖြစ်ကြောင်းထုတ်ပြန်ပြီး နောက် ဘွမ်ဂျိုင်ထိုင်းပါတီနုတ်ထွက်မှု ကြောင့် လစ်လပ်သွားသည့်ဝန်ကြီးနေရာများကို အစားထိုးကာ အစိုးရအဖွဲ့ကို ပြန်လည်ပြင်ဆင်ဖွဲ့စည်းခြင်းဖြစ်ကြောင်း သိရသည်။

Ref: TST

MWD Daily Newspaper

photo- Bangkok post

မင့်စ် ဇွန် ၂၂
ဘယ်လာရုစ်သမ္မတ အလက်ဇန်းဒါးလူကာရှန်ကိုသည် ဇွန် ၂၁ ရက်တွင် အမေရိကန်အစိုးရအထူး သံတမန် ကိုယ်ကဲလ်လော့ဂ်နှင့်မင့်ခ်၌ တွေ့ဆုံခဲ့သည်။

သမ္မတလူကာရှန်ကိုနှင့် အမေရိကန်အထူးသံတမန်ကိုယ်ကဲလ် လော့ဂ်တို့သည် လက်ရှိကမ္ဘာ့အခြေအနေများနှင့် အမေရိကန်-ဘယ်လာရုစ် နှစ်နိုင်ငံဆက်ဆံရေးကိစ္စများကိုဆွေးနွေးခဲ့ကြကြောင်း ဘယ်လာရုစ်နိုင်ငံပိုင်မီဒီယာများ က သတင်းထုတ်ပြန်ထားသည်။

ရုရှားနိုင်ငံ၏ အဓိကမဟာမိတ်နိုင်ငံတစ်နိုင်ငံဖြစ်သည့် ဘယ်လာရုစ်နိုင်ငံသည် အမေရိကန်နိုင်ငံနှင့် ဆက်ဆံရေးတင်းမာနေသည့်နိုင်ငံဖြစ်သည်။

သို့ရာတွင် ဘယ်လာရုစ်သမ္မတ လူကာရှန်ကိုသည် ဇွန် ၂၁ ရက် တွင် အမေရိကန်အထူးသံတမန် ကိုယ်ကဲလ်လော့ဂ်ကို နွေးထွေးလှိုက်လှဲစွာကြိုဆိုခဲ့သည်။

ကိုယ်ကဲလ်လော့ဂ်၏ဘယ်လာရုစ်ခရီးစဉ်သည် အမေရိကန်အစိုးရ၏ ယူကရိန်းပဋိပက္ခအဆုံးသတ်နိုင်ရေး ကြိုးပမ်းမှုများအတွက် အထောက်အကူ ပေးနိုင်ဖွယ်ရှိကြောင်း လေ့လာသူများက သုံးသပ်ထားသည်။

Ref: RT

Tr: KKO

YDNB Newspaper

အမေရိကန်သမ္မတဒေါ်နယ်ထရမ့်က အီရန်ကိုတိုက်ခိုက်ခြင်းဖြင့် စစ်ပွဲအသစ်ကို စတင်လိုက်ပြီဖြစ်ကြောင်း ရုရှားလုံခြုံရေးကောင်စီဒုတိယဥက္ကဋ္ဌ ဒီမီထရီမက် ဗီဒက်က ဇွန်လ ၂၂ ရက်တွင်ပြောသည်။ 
"ငြိမ်းချမ်းရေးဆောင်ကြဉ်းသူသမ္မတအဖြစ် တာဝန်ယူရန်ရောက်ရှိလာတဲ့ ဒေါ်နယ်ထရမ့်က အမေရိကန်အတွက် စစ်ပွဲအသစ်တစ်ခုကို စတင်လိုက်ပါပြီ။ အခုအတိုင်းသာဆိုရင် ထရမ့်ဟာငြိမ်းချမ်းရေးနိုဘယ်ဆုကိုမရနိုင်တော့ပါဘူး" ဟု မက်ဗီဒက်က ၎င်း၏လူမှုကွန်ရက်တွင်ရေးထားခြင်းဖြစ်သည်။

ထို့ပြင် တင်းမာလာသည့်နောက်ဆက်တွဲအခြေအနေများက ဒေသတွင်းပြင်ပကိုပါကျော်လွန်နိုင်ကြောင်း၊ အမေရိကန်အနေဖြင့် အီရန်၏ကြိမ်းသေလက်တုံ့ပြန် တိုက်ခိုက်မှုများကို နားလည်ထားကြောင်း၊ ထိုအခြေအနေများအားလုံးက ထိပ်တိုက် တွေ့ဆုံမှုကို နောက်တစ်ဆင့်သို့ရောက်ရှိသွားစေပြီး ကမ္ဘာစစ်ကြီးဖြစ်ပွားစေနိုင်သည့် အန္တရာယ်မှာမြင့်မားလာကြောင်း ဒူးမားလွှတ်တော်မှတာဝန်ရှိသူတစ်ဦးက ပြောထားသည်။

Ref: TST

Photo - Reuters

အီရန်စစ်တပ်သည် အမေရိကန်က ၎င်းတို့နိုင်ငံကို တိုက်ခိုက်ပါက ပြင်းထန်သော အကျိုးဆက်များအတွက် ကြိုတင်ပြင်ဆင်ထားရမည်ဟု သတိပေးလိုက်ပြီး သမ္မတထရမ့်ကို “ဂိမ်းသမား” ဟု ဝေဖန်ခဲ့သည်။

“ဂိမ်းသမား မစ္စတာထရမ့်အနေဖြင့် ယခုစစ်ပွဲကို စတင်နိုင်သော်လည်း ယင်းစစ်ပွဲကို အဆုံးသတ်မည့်သူက မိမိတို့သာဖြစ်ကြောင်း” အီရန် တပ်မတော်၏ အထွေထွေညှိနှိုင်းရေးအမြင့်ဆုံးကွပ်ကဲမှုအဖွဲ့ Khatam al-Anbiya Central Command ၏ ပြောရေးဆိုခွင့်ရှိသူ Ebrahim Zolfaqari က ယနေ့ (ဇွန် ၂၃) တွင် ပြောကြားခဲ့သည်။

အဆိုပါကြေညာချက်ကို အမေရိကန်က Operation Night Hammer အနေဖြင့် ဇွန် ၂၂ ရက်၊ နံနက်အစောပိုင်းတွင် အီရန်၏ အဓိက နျူကလီးယားစက်ရုံသုံးခုကို လေတပ်မှ တိုက်ခိုက်ပြီးနောက် ထုတ်ပြန်ခဲ့ခြင်း ဖြစ်သည်။ အမေရိကန်က “အီရန်နှင့် စစ်မဖြစ်ပါ၊ ၎င်း၏ နျူကလီးယား အစီအစဉ်နှင့်သာ စစ်ဖြစ်သည်” ဟု ကြေညာခဲ့သည်။

တီဟီရန်က ဝါရှင်တန်အား အပြည်ပြည်ဆိုင်ရာဥပဒေကို ချိုးဖောက်ခြင်း၊ “အနီရောင်မျဉ်းကို ကျော်လွန်သွားခြင်း” ဟု ဝေဖန်ပြီး တုံ့ပြန် တိုက်ခိုက်မည်ဟု သတိပေးကာ အရှေ့အလယ်ပိုင်းရှိ အမေရိကန်စခန်းများကို အားနည်းသောပစ်မှတ်များအဖြစ် ရည်ညွှန်းဖော်ပြခဲ့သည်။

မစ္စတာထရမ့်က အီရန်အား လက်စားချေမှုမပြုဘဲ အမြန်ဆုံး ငြိမ်းချမ်းရေး ညှိနှိုင်းရန် တောင်းဆိုခဲ့ပြီး၊ သို့မဟုတ်ပါက နောင်တွင် ပိုမိုကြီးမား ပြင်းထန်သော တိုက်ခိုက်မှုများ လုပ်ဆောင်မည်ဟု သတိပေးခဲ့သည်။ Khatam al-Anbiya Central Command ၏ နောက်ဆုံး သတိပေးချက် နှင့်ပတ်သက်၍ ၎င်းက အထူးမှတ်ချက်မပြုသေးပေ။

ကျွမ်းကျင်သူများက အီရန်သည် အရှေ့အလယ်ပိုင်းရှိ အမေရိကန် စစ် စခန်းများကို တိုက်ခိုက်ခြင်း သို့မဟုတ် ဟော်မုဇ်ရေလက်ကြားမှတစ်ဆင့် ကမ္ဘာ့ရေနံတင်ပို့မှု၏ ၂၀% ကို ပိတ်ဆို့ခြင်းကဲ့သို့သော လက်စားချေမှု နည်းလမ်းများကို ရွေးချယ်နိုင်သည်ဟု ဆိုသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

နိုင်ငံတကာသတင်းဌာန Politico က စနေနေ့ (ဇွန် ၂၁) တွင် ထုတ်ပြန်သော သတင်းတစ်ရပ်အရ နယ်သာလန်နိုင်ငံတွင် ကျင်းပမည့် NATO ခေါင်းဆောင်များ ထိပ်သီးအစည်းအဝေးတွင် ယူကရိန်းဆိုင်ရာ ဆွေးနွေးမှု များကို သိသိသာသာ လျှော့ချသွားမည်ဖြစ်ကြောင်း သိရသည်။

ဇွန်လ ၂၄ ရက်မှ ၂၅ ရက်အထိ The Hague ရှိ World Forum တွင် ကျင်းပမည့် အစည်းအဝေးတွင် အဓိက အစီအစဉ် နှစ်ခုသာ ပါဝင်မည် ဖြစ်ပြီး ၎င်းတို့မှာ ဒတ်ခ်ျ ဘုရင်မ၏ ရဲတိုက်တွင် ကျင်းပမည့် ကြိုဆို ညစာပွဲနှင့် North Atlantic Council ၏ အစည်းအဝေး တစ်ကြိမ်သာ ဖြစ်ကြောင်း၊ ယခင်ကကဲ့သို့ နှစ်ကြိမ် သို့မဟုတ် သုံးကြိမ် မကျင်းပဘဲ NATO ၏ ယူကရိန်းကောင်စီ အစည်းအဝေးလည်း ပါဝင်မည် မဟုတ်ကြောင်း Politico က ဖော်ပြသည်။

ထို့အပြင် ယူကရိန်းသမ္မတ Volodymyr Zelensky အား ကြိုဆို ညစာစားပွဲ သို့သာ တက်ရောက်ရန် ဖိတ်ကြားထားပြီး ၎င်း တက်ရောက်မည်၊ မတက်ရောက်မည်ကိုမူ မသိရသေးကြောင်း သတင်းတွင် ဖော်ပြထားသည်။ အစည်းအဝေး အစီအစဉ်ကို အတိုချုပ်လိုက်ရခြင်းမှာ အထူးသဖြင့် အမေရိကန်နှင့် သမ္မတ Donald Trump အတွက် လိုက်လျောခြင်း ဖြစ်သည်ဟု သတင်းရင်းမြစ်များက ဆိုသည်။ Trump သည် အခမ်းအနား သဘောသဘာဝအရ ဘက်ပေါင်းစုံ အစည်းအဝေးများကို စိတ်မရှည်ဘဲ မကြာခဏ ရှောင်ရှားလေ့ရှိသူဖြစ်သည်။ 

G7 အစည်းအဝေး ရှုံးနိမ့်မှုအပြီး NATO အရာရှိများက လုပ်ငန်းစဉ်ကို လျှော့ချလိုက်ကြောင်း သတင်းများအရ သိရသည်။ ထိုအချိန်က Trump သည် ကနေဒါတွင် ကျင်းပသည့် နှစ်ရက်ကြာ အစည်းအဝေးမှ တစ်ဝက် တစ်ပျက် ထွက်ခွာသွားခဲ့သည်။ ထို့အပြင် ၎င်းသည် ယူကရိန်း ပဋိပက္ခ နှင့်ပတ်သက်သည့် ပူးတွဲကြေညာချက် မူကြမ်းကို ကန့်ကွက်ခဲ့ပြီး အစည်းအဝေးသည် နောက်ဆုံးတွင် ထိုကဲ့သို့သော ကြေညာချက်မပါဘဲ ပြီးဆုံးသွားခဲ့သည်။

မကြာမီကျင်းပမည့် အစည်းအဝေးတွင် ရှည်လျားသော ပူးတွဲ ကြေညာချက် ထွက်ရှိမည်မဟုတ်ဘဲ၊ အဖွဲ့ဝင်နိုင်ငံများက GDP ၏ 5% အထိ ကာကွယ်ရေး အသုံးစရိတ်ကို တိုးမြှင့်ရန် ကတိပြုမည့် အစည်းအဝေး၏ အဓိက အစီအစဉ်ကို အနှောင့်အယှက်ဖြစ်မှုအနည်းဆုံးဖြစ်စေရန် လုပ်ငန်းစဉ်များကို လျှော့ချ ထားခြင်းဖြစ်သည်ဟု ဆိုသည်။

Trump သည် NATO နိုင်ငံများအနေဖြင့် ကာကွယ်ရေးအတွက် ပိုမို အသုံးပြုရန် ကြာမြင့်စွာ တောင်းဆိုခဲ့ပြီး၊ အဆိုပါ ကတိကဝတ်အသစ်သည် အမေရိကန်သမ္မတအတွက် ကြီးမားသော “အောင်ပွဲ” တစ်ခုဖြစ်လာမည် ဟု သတင်းရင်းမြစ်များက ဆိုသည်။

“၎င်းအနေဖြင့် ၅ % အတွက် အသိအမှတ်ပြုခံရမည်ဖြစ်သည့်အတွက် အဆိုပါထိပ်သီးအစည်းအဝေးကို ကျင်းပခြင်းဖြစ်ပါသည်။ အခြားအရာ အားလုံးကို အန္တရာယ်အနည်းဆုံးဖြစ်အောင် ရိုးရှင်းစွာ စီစဉ်ထားပါသည်” ဟု ဥရောပကာကွယ်ရေးအရာရှိတစ်ဦးက Politico ကို ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အမေရိကန်၏ အီရန်အပေါ်ပစ်ခတ်တိုက်ခိုက်မှုများကို အရှေ့အလယ်ပိုင်း ဒေသရှိ ယခင်စစ်ပွဲများနှင့် နှိုင်းယှဉ်မှုများကို ဒုတိယသမ္မတ J.D. Vance က ပြင်းပြင်းထန်ထန်တုံ့ပြန်လိုက်ပြီး၊ ဝါရှင်တန်၏ ယခုလုပ်ဆောင်မှု များသည် အမှတ်တကယ် ကန့်သတ်မှုနှင့် နိုင်ငံခြားရေး ရည်မှန်းချက် များအပေါ် အခြေခံပါသည်ဟု ဆိုပါသည်။

NBC ၏ Meet the Press အစီအစဉ်မှ တွေ့ဆုံမေးမြန်းခန်းတစ်ခုတွင် Vance က “အမေရိကန်သည် အီရန်နှင့် စစ်ဖြစ်နေခြင်းမဟုတ်ဘဲ အီရန် ၏ နျူကလီးယားအစီအစဉ်ကိုသာ တိုက်ဖျက်နေခြင်းဖြစ်သည်” ဟုပြောကြားခဲ့ပြီး ဇွန် ၂၂ တိုက်ခိုက်မှုသည် အီရန်၏ နျူကလီးယား စွမ်းရည်များကို ဖျက်ဆီးလိုက်သည့် အလွန်တိကျသော တိုက်ခိုက်မှု ဖြစ်သည် ဟု ရှင်းပြခဲ့ပါသည်။

အမေရိကန်သည် နောက်ထပ်ရှည်လျားသည့် ပဋိပက္ခတစ်ခုအတွင်း ပါဝင်သွားမည်ကို စိုးရိမ်နေသူများအား Vance က ခေါင်းဆောင်မှုတွင် ကွာခြားချက်ရှိသည်ဟု ပြောကြားခဲ့ပါသည်။ “အရှေ့အလယ်ပိုင်းမှာ ၂၅ နှစ်ကြာ နိုင်ငံခြားရေးရှုပ်ထွေးမှုများနှင့် ပင်ပန်းနွမ်းနယ်နေသည့် အမေရိကန်များကို မိမိအနေဖြင့် နားလည်ပါသည်” ဟု ၎င်းက ဆိုပါသည်။

“မိမိတို့သည် ရှည်လျားသောပဋိပက္ခကို စိတ်ဝင်စားမှုမရှိသလို၊ မြေပြင် စစ်သားများကို စေလွှတ်ရန်လည်း ရည်ရွယ်ချက်မရှိပါ” ဟု ၎င်းက ဖြည့်စွက်ပြောကြားခဲ့သည်။ ဗန့်စ်က “မိမိတို့၏သဘောထားက အလွန် ရှင်းလင်းပါသည်။ အစိုးရအပြောင်းအလဲ မလိုချင်ပါ။ ထိုပဋိပက္ခကို ပိုမိုရှည်လျားစေရန် သို့မဟုတ် လက်ရှိထက် ပိုမိုကြီးထွားစေရန်လည်း မရည်ရွယ်ပါ” ဟု ၎င်းက ရှင်းလင်းခဲ့သည်။

သို့သော် ထိုနေ့နောက်ပိုင်းတွင် သမ္မတထရမ့်က Truth Social တွင် “အစိုးရပြောင်းလဲမှု” ဆိုသည့် စကားလုံးကို အသုံးပြုရန် နိုင်ငံရေးအရ မမှန်ကန်နိုင် ဟု ဆိုသော်လည်း ယင်းအစိုးရသည် MIGA (Make Iran Great Again) လုပ်နိုင်စွမ်းမရှိဘူးဆိုပါက အစိုးရပြောင်းလဲရန် မည်သည့် အတွက်ကြောင့်မဖြစ်နိုင်ရမှာလဲ” ဟု ရေးသားကာ သွယ်ဝိုက် ခြိမ်းခြောက်မှု ပြုခဲ့သည်။

ဗန့်စ်ကလည်း ထရမ့်၏သတိပေးချက်ကို ထပ်လောင်းအတည်ပြုကာ “မည်သည့်ပုံစံဖြင့်မဆို လက်စားချေမှုပြုလုပ်ပါက ကမ္ဘာပေါ်ရှိ အမိုက်မဲဆုံး အရာဖြစ်မည်” ဟု ပြောကြားခဲ့သည်။ အမေရိကန်ဝန်ထမ်းများကို ပစ်မှတ်ထားပါက “အလုံးစုံသော အင်အားဖြင့်” ပြန်လည်တုံ့ပြန်မည်ဟု ၎င်းက ထပ်မံအာမခံခဲ့သည်။

ထရမ့်အား လွှတ်တော်ခွင့်ပြုချက်မရှိဘဲတိုက်ခိုက်ခဲ့မှုကြောင့် ဝေဖန်မှုများ ရှိခြင်းနှင့်ပတ်သက်၍ ဗန့်စ်က တိုက်ခိုက်မှုသည် တရားဝင်ကြောင်း ခုခံ ပြောဆိုခဲ့ပြီး သမ္မတတွင် လက်နက်ပြန့်ပွားမှုကို တားဆီးပိုင်ခွင့် ရှိသည် ဟု ဆိုသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂