ရွေးကောက်ခံသမ္မတထရန့်က ထိုင်ဝမ်နိုင်ငံအား မိတ်ဆွေအဖြစ်သဘောထားခဲ့ပြီး လက်နက်အများအပြား ရောင်းချပေးခြင်း၊ သံတမန်များ အလည်အပတ် စေလွှတ်ခြင်းများကို ၎င်း၏ပထမသက်တမ်းတွင် ဆောင်ရွက်ခဲ့ကြောင်း၊ ဒုတိယသက်တမ်းအတွက် မဲဆွယ်မှုများပြုလုပ်ရာတွင် အမေရိကန်နိုင်ငံ၏ လုံခြုံရေးကို အလေးထားဆောင်ရွက်သွားမည်ဖြစ်ပြီး ထိုင်ဝမ်နိုင်ငံသည် အမေရိကန်၏ အီလက်ထရောနစ် စီးပွားရေးကို ခိုးယူသည်ဟု ထရန့်က ပြောကြားခဲ့ ပါသည်။

ထိုအချက်များကြောင့် ယခင်သက်တမ်းတွင် ထရန့် သည် တရုတ်ပြည်မကြီးရန်မှ ကာကွယ်ပေးသည့် မိတ်ဆွေဖြစ်ခဲ့သော်လည်း ဒုတိယသက်တမ်းတွင် ထရန့် မည်ကဲ့သို့ဆောင်ရွက်မည်ကို မခန့်မှန်းနိုင်သည့်အတွက် ထိုင်ဝမ်အစိုးရသည် ကြိုတင်ပြင်ဆင်ထားရန် လိုအပ်ကြောင်း၊ ထိုင်ဝမ်နိုင်ငံအတွင်း နေထိုင်သူများသည် ထရန့်၏နိုင်ငံရေးအခင်းအကျင်းကို ခန့်မှန်းရန် ခက်ခဲသောကြောင့် ထိုင်ဝမ်နိုင်ငံ၏ လုံခြုံရေးအပါ် စိုးရိမ်မှုမြင့်တက်နေကြောင်း  ထိုင်ဝမ်အမျိုးသားလုံခြုံရေး ကောင်စီထိပ်တန်းအကြံပေး (အငြိမ်းစား) တစ်ဦးက CNN သို့ ပြောကြားခဲ့ပါသည်။

ထိုင်ဝမ်အစိုးရအနေဖြင့် နိုင်ငံ၏လုံခြုံရေးကို ရှေးရှု၍ အမေရိကန်နိုင်ငံ၏ လက်နက်အကူအညီကို ဆက်လက် ရရှိရန် ရွေးကောက်ခံသမ္မတ ထရန့်အစိုးရနှင့် ကောင်းမွန်သော ဆက်ဆံရေးမျိုး ယခုကတည်းက တည်ဆောက်ရန် လိုအပ်ပါသည်။ 

တရုတ်ပြည်မကြီး ကွန်မြူနစ်ပါတီသည် ထိုင်ဝမ်အား ၎င်းတို့၏ အချုပ်အခြာအာဏာအောက်သို့ရောက်ရန် ကြိုးပမ်းနေသည်မှာ အချိန်ကာလတစ်ခုတိုင်ခဲ့ပြီ ဖြစ်ပါ သည်။ သို့သော်လည်း ထိုင်ဝမ်-အမေရိကန် ဆက်ဆံရေး အက်ဥပဒေအောက်တွင် အမေရိကန်မှ ထိုင်ဝမ်သို့ လက်နက်ကိရိယာများ တရားဝင်တင်သွင်းနိုင်ပြီး တရုတ် ပြည်မကြီး၏ ရန်ကို ခုခံနေနိုင်ခြင်း ဖြစ်ပါသည်။ 

ထိုင်ဝမ်အစိုးရကလည်း အမေရိကန်-ထိုင်ဝမ် ဆက်ဆံရေး ကိုအလေးထားကြောင်းနှင့် ထိုင်ဝမ်သမ္မတ Lai Ching-te က ထိုင်ဝမ်အစိုးရသည် အမေရိကန်နိုင်ငံအတွက် ယုံကြည်စိတ်ချရသည့် မိတ်ဆွေဖြစ်လိုကြောင်း အမေရိကန်ရွေးကောက်ပွဲအပြီးတွင် သတင်းထုတ်ပြန် ခဲ့ပါသည်။ 

သို့သော်လည်း ထရန့်၏ မူဝါဒ၊ သဘောထားများအပေါ် စောင့်ကြည့်ပြီး ဒုတိယသက်တမ်းတွင် ထိုင်ဝမ်အစိုးရအပေါ် ပြောင်းလဲဆက်ဆံမည်လား ဆက်လက် စောင့်ကြည့်ရမည် ဖြစ်ပါသည်။ 

ကိုးကား - CNN

ဘိုင်ဒန်အစိုးရအဖွဲ့က လက်နက်ကိုင်အဖွဲ့ Hayat Tahriral-Sham နှင့်တိုက်ရိုက်ဆက်သွယ်ပြောဆိုမှုများ ပြုလုပ်နေကြောင်း အမေရိကန်နိုင်ငံခြားရေးဝန်ကြီး အန်တိုနီဘလင်ကန်က ‌အတည်ပြုပြောကြားထားသည်။

HTS အဖွဲ့သည် အမေရိကန်နိုင်ငံက အကြမ်းဖက်အဖွဲ့အစည်းအဖြစ် သတ်မှတ်ထားသော လက်နက်ကိုင် အဖွဲ့ဖြစ်ပြီး သမ္မတ‌အာဆတ်အား ဖြုတ်ချရာတွင် ပါဝင်သော အဖွဲ့လည်း ဖြစ်သည်။

ဆီးရီးယားအနာဂတ်အရေးဆွေးနွေးရန် ဒေသတွင်းနိုင်ငံများနှင့် အနောက်အုပ်စုနိုင်ငံများမှ သံတမန်များ တွေ့ဆုံခဲ့သည့် ဂျော်ဒန်နိုင်ငံရှိ သတင်းစာရှင်းလင်းပွဲတွင် ဘလင်ကန်က  ထိုသို့ ထုတ်ဖော်ပြောကြားလိုက်ခြင်းဖြစ်သည်။

ကိုးကား - AI jazeera

အသစ်ဖွဲ့စည်းလိုက်သည့် ဆီးရီးယားကြားဖြတ်အစိုးရကို ဦးဆောင်နေသော အဖွဲ့၏အကြီးအကဲက  သမ္မတဟောင်း Bashar al-Assad ဘက်မှရပ်တည်ခဲ့သည့် ရုရှား၊ အီရန် တို့နှင့် ဆက်ဆံရေးကို ပြန်လည်သုံးသပ်သွားမယ်ဟု ပြောကြားခဲ့သည်။

Hayat Tahrir al-Sham အဖွဲ့၏ ခေါင်းဆောင် Abu Mohammed al-Golani က ယခုကဲ့သို့ မှတ်ချက်ချ ပြောကြားခဲ့ကြောင်း ဆီးရီးယားမီဒီယာများတွင် ဒီဇင်ဘာ ၁၄ ရက်နေ့က ကိုးကားဖော်ပြခဲ့ကြသည်။

ဆီးရီးယားတွင် အစိုးရအား ပုန်ကန်တိုက်ခိုက်ခဲ့သော အဖွဲ့များသည် ဒီဇင်ဘာ ၈ ရက်နေ့က အာဏာရှင် Assad အစိုးရကို ဖြိုခွင်းခဲ့ပြီးနောက် မစ္စတာ Golani အဖွဲ့၏ ဦးဆောင်မှုအောက်တွင် ယာယီအစိုးရတစ်ရပ်ကို ဖွဲ့စည်း ခဲ့သည်။

ကြားဖြတ်အစိုးရအနေဖြင့် အချိန်အတိုင်းအတာတစ်ခု အထိ ရုရှားနှင့်ပတ်သက်ပြီး သတိထားဆက်ဆံမည့် သဘောထားရှိကြောင်း မစ္စတာ Golani က အလေးပေး ပြောကြားခဲ့သည်။

ဆီးရီးယားခေါင်းဆောင်ပိုင်းက ၂ နိုင်ငံအကျိုးစီးပွားကို ဖော်ဆောင်သည့်အနေဖြင့် ဆက်ဆံမှုများကို ပြန်လည် သုံးသပ်ရန် ရုရှားကို အခွင့်အရေးပေးခဲ့ကြောင်း ၎င်းက ပြောကြားခဲ့သည်။

ရုရှားသည် ဆီးရီးယားရှိ ၎င်းတို့၏စစ်စခန်းများတွင်ရှိသော စစ်ရေး အထောက်အပံ့များအား သယ်ယူရွှေ့‌ပြောင်းနေ ကြောင်း သိရှိရသည်။

ဆီးရီးယား၏ နောက်ဆုံးအခြေအနေများအပေါ် ရုရှားအနေဖြင့် မည်သို့တုံ့ပြန်မည်ဆိုသည်ကို အများက အာရုံစိုက် စိတ်ဝင်စားနေကြသည်။

အမေရိကန် နိုင်ငံခြားရေးဝန်ကြီး Antony Blinken သည် တူရကီနှင့် အခြားသက်ဆိုင်ရာ နိုင်ငံများမှ နိုင်ငံခြားရေးဝန်ကြီးများနှင့် တွေ့ဆုံပြီး ဆီးရီးယား အခြေအနေများအား ဆွေးနွေးခဲ့ကြောင်းသိရှိရသည်။

အမေရိကန်နိုင်ငံက အကြမ်းဖက်အဖွဲ့အစည်းအဖြစ် သတ်မှတ်ထားသည့် Hayat Tahrir al-Sham အဖွဲ့နှင့် တိုက်ရိုက်ဆက်သွယ်မှု ရှိခဲ့ကြောင်း ဆွေးနွေးပွဲ အပြီး တွင် ၎င်းကသတင်းထောက်များကို ပြောကြားခဲ့သည်။

Hayat Tahrir al-Sham အဖွဲ့က ဦးဆောင်သည့် ဆီးရီးယားကြားဖြတ်အစိုးရကို အမေရိကန်အစိုးရ အနေဖြင့် မည်ကဲ့သို့ ဆက်ဆံဆောင်ရွက်သွားမည်ကို အများက စိတ်ဝင်စားစွာ စောင့်ကြည့်လျက်ရှိကြောင်း ဖော်ပြထားပါသည်။

ကိုးကား- NHK World

ဆီးရီးယားတွင် အာဏာရလာသော လက်နက်ကိုင် အဖွဲ့များ၏ ခေါင်းဆောင်က ရုရှားနိုင်ငံနှင့် အနာဂတ် ဆွေးနွေးနေပါကြောင်း Reuters သတင်းအေဂျင်စီက ဖော်ပြထားသည်။

၂၀၆၆ ခုနှစ်အထိ ငှားရမ်းထားသော ရုရှား၏ Khmeimim နှင့် Tartus အခြေစိုက်စခန်းများသည် ဆီးရီးယားတွင် ဆက်လက်လည်ပတ်နေဆဲဖြစ်ကြောင်း၊ ရုရှားနိုင်ငံက ဆီးရီးယားနိုင်ငံနှင့်ဆက်ဆံရေးအတွက် လုပ်ဆောင်မည် ဆိုလျှင် ရုရှားနှင့်ဆက်ဆံရေးရှိလာနိုင်ပါကြောင်း Hayat Tahrir-al-Sham (HTS) ဂျီဟတ် အဖွဲ့အကြီးအကဲ Abu Mohammed al-Julani က ပြောကြားခဲ့ပါသည်။

အစ္စတန်ဘူလ်အခြေစိုက် ဆီးရီးယားနိုင်ငံပိုင် TV Channel တွင် ဒီဇင်ဘာ ၁၃ ရက်က တွေ့ဆုံမေးမြန်းခန်း တစ်ခု၌ “ဆီးရီးယားခေါင်းဆောင်များသည် ရုရှားနိုင်ငံ အားရန်စလိုခြင်းမှ ရှောင်ရှားရန် စိတ်အားထက်သန်ကြ ပါကြောင်း Hayat Tahrir-al-Sham (HTS) အကြီးအကဲ အယ်လ်ဂျူလာနီက ပြောကြားခဲ့သည်။

HTS ဦးဆောင်သော စစ်သွေးကြွများသည် နိုင်ငံ၏တပ် များကို ထိုးစစ်ဆင်ကာ မြို့ကြီးများကို သိမ်းပိုက်ကာ ဒမတ်စကတ်၌ နိုဝင်ဘာလကုန်မှစ၍ နှစ်ပတ်တာ ကာလအတွင်း အခြေအနေဆိုးရွားလာခဲ့သည်။ ဆီးရီးယား စစ်တပ်ပြိုကွဲပြီးနောက် အာဆတ်သည် နိုင်ငံမှ ထွက်ပြေးကာ ရုရှားတွင် ခိုလှုံခွင့်ရရှိခဲ့ပါသည်။

Hayat Tahrir-al-Sham (HTS) အကြီးအကဲ အယ်လ်ဂျူလာနီ က ဆီးရီးယားအစိုးရသစ်သည် ရုရှား နိုင်ငံအား ဘုံအကျိုးစီးပွားကို ဖော်ဆောင်သည့်နည်းလမ်း ဖြင့် ဆီးရီးယားနှင့် ဆက်ဆံရေးကို ပြန်လည်အကဲဖြတ်ရန် အခွင့်အရေးကို ပေးဆောင်ရန် ဆန္ဒရှိကြောင်းနှင့် ထိုအခိုက်အတန့်တွင် အခြားနိုင်ငံများနှင့် ဆက်ဆံရေးကို ဂရုတစိုက် စီမံခန့်ခွဲရန် လိုအပ်ကြောင်း ပြောကြားခဲ့ ပါသည်။

ရုရှားနှင့် ဆီးရီးယားစစ်သွေးကြွများသည် လက်ရှိတွင် ဆီးရီးယား၌ ရုရှား၏တည်ရှိမှုနှင့် ယခင်အခြေအနေ များကို ဆက်လက်ထိန်းသိမ်းရန် ဆွေးနွေးနေကြောင်း TASS သတင်းဌာန၏ဖော်ပြချက်အရ သိရှိရသည်။

ရုရှား၏ Khmeimim လေတပ်စခန်းနှင့် Tartus ရှိ ထောက်ပံ့ပို့ဆောင်ရေးစင်တာသည် မြေထဲပင်လယ် ကမ်းရိုးတန်းတစ်လျှောက် နိုင်ငံ၏ အနောက်ဘက်ခြမ်း တွင် တည်ရှိပါသည်။ ၂၀၁၇ ခုနှစ်တွင် ရုရှားနှင့် ဆီးရီးယားတို့သည် အဆိုပါအခြေစိုက်စခန်းများတွင် ရုရှားတပ်များကို ၄၉ နှစ် ကြာတပ်စွဲထားရန် သဘော တူညီခဲ့ကြပါသည်။

စစ်သွေးကြွအုပ်စုများသည် ဒမတ်စကတ်ကို သိမ်းပိုက် ပြီးနောက် Khmeimim နှင့် Tartus အခြေစိုက်စခန်း များ၏ ကံကြမ္မာကို မေးခွန်းထုတ်လာခဲ့သည်။ သို့သော် လည်း ရုရှားနိုင်ငံ နိုင်ငံခြားရေးဒုတိယဝန်ကြီး Mikhail Bogdanov ၏ ပြောကြားချက်အရ ရုရှားသံတမန်များ သည် အဆိုပါပြဿနာများကို HTS နိုင်ငံရေးကော်မတီ နှင့် ဆွေးနွေးထားပြီးဖြစ်ကြောင်း ဖော်ပြထားသည်။

ကိုးကား - Reuters 

အမေရိကန် ရွေးကောက်ခံသမ္မတ ဒေါ်နယ်ထရန့်က  လာမည့်ဇန်နဝါရီလတွင် ပြုလုပ်မည့် ၎င်း၏ သမ္မတ ကျမ်းသစ္စာဆိုပွဲအခမ်းအနားသို့ တက်ရောက်ရန် တရုတ် သမ္မတရှီကျင့်ဖျင်ကို ဖိတ်ကြားထားကြောင်း ထရန့်၏ သတင်းထုတ်ပြန်ရေးအဖွဲ့ အတွင်းရေးမှူး Karoline Leavitt က အတည်ပြုပြောကြားလိုက်သည်။ ကာလ ကြာရှည်စွာပြိုင်ဘက်များအဖြစ် ရှုမြင်ခံထားရသည့် နှစ်နိုင်ငံအကြား ဆက်ဆံရေးခိုင်မာလာစေရန် ကြိုးပမ်းမှု ဖြစ်ကြောင်း သူမက ပြောထားပါသည်။ 

ဒါဟာ မဟာမိတ်နိုင်ငံများသာမက ရန်ဖက်နိုင်ငံများ၊ ပြိုင်ဘက်နိုင်ငံများအပေါ်လည်း ခေါင်းဆောင် အချင်းချင်းပွင့်ပွင့်လင်းလင်း ဆွေးနွေးမှုများကို ဖန်တီးနေသည့် သမ္မတထရန့်၏ ဥပမာတစ်ခုဖြစ်ကြောင်း  သူမက Fox & Friends အစီအစဉ်တွင် ပြောကြားထားပါသည်။ 

နှစ်နိုင်ငံအကြား ဆယ်စုနှစ်များစွာ အေးခဲနေသည့် ဆက်ဆံရေးအခြေအနေများကြောင့် အမေရိကန် သမ္မတ ကျမ်းသစ္စာဆိုပွဲကို တရုတ်ခေါင်းဆောင်တစ်ဦး တက်ရောက်ရန်ဆိုသည်မှာ ယခင်ကတခါမျှ မကြုံဖူးသည့် ကိစ္စဖြစ်သဖြင့် ဖြစ်နိုင်ဖွယ်ရာမရှိကြောင်း ကျွမ်းကျင်သူ များက ပြောကြားထားကြသည်။ 

ဒါက သံတမန်သက်သက် ဟန်ပြတစ်ခုသာဖြစ်ကြောင်း၊  သမ္မတရှီကျင့်ဖျင်သာမက အခြားနိုင်ငံခေါင်းဆောင်များ သည်လည်း အမေရိကန်သမ္မတ ကျမ်းသစ္စာဆိုပွဲများကို တက်လေ့မရှိကြကြောင်း   ဝါရှင်တန်ရှိ မဟာဗျူဟာနှင့် နိုင်ငံတကာလေ့လာရေးဌာနမှ တရုတ်အရေးအထူး ကျွမ်းကျင်သူ Scott Kennedy က Reuters သတင်း ဌာနသို့ ပြောကြားထားသည်ကို ကိုးကား၍ ALJAZEERA က ဖော်ပြထားပါသည်။ 

ကိုးကား - ALJAZEERA

တောင်ကိုရီးယားသမ္မတ ယွန်းဆွတ်ယိုးလ်ကို လွှတ်တော်က မဲခွဲဆုံးဖြတ်၍ စွပ်စွဲပြစ်တင်မှု ပြုလုပ်ခဲ့ ပါသည်။ အရေးပေါ်စစ်အုပ်ချုပ်ရေးအမိန့် ထုတ်ပြန်ခဲ့ခြင်း နှင့်စပ်လျဉ်း၍ သမ္မတကို ရာထူးမှ ဖယ်ရှားရန် စွပ်စွဲ ပြစ်တင်မှုကို ထောက်ခံမဲ ၂၀၄ မဲ၊ ကန့်ကွက်မဲ ၅ မဲဖြင့် အတည်ပြုနိုင်ခဲ့ခြင်းဖြစ်ပါသည်။

တောင်ကိုရီးယားဉပဒေအရ သမ္မတအပေါ် စွပ်စွဲ ပြစ်တင်မှုနှင့်စပ်လျဉ်း၍ အမြင့်ဆုံးတရားရုံးဖြစ်သည့် အခြေခံဉပဒေတရားရုံးက စုံစမ်းစစ်ဆေးပြီး ဆုံးဖြတ်ချက် ချမှတ်သွားမည်ဖြစ်ပါသည်။ အပြီးသတ်အမိန့်ချမှတ်ရန် အချိန် ၆ လခန့်အထိ ကြာမြင့်မည် ဖြစ်ပါသည်။ ယင်း ကာလအတွင်း သမ္မတအနေဖြင့် ၄င်း၏ လုပ်ပိုင်ခွင့် အာဏာများကို ဆိုင်းငံ့ခံထားရမည်ဖြစ်ပြီး ဝန်ကြီးချုပ်က ခေတ္တသမ္မတအဖြစ် တာဝန်ထမ်းဆောင်ရမည်ဖြစ်ပါ သည်။

တောင်ကိုရီးယားနိုင်ငံ၏ ပထမဆုံး အမျိုးသမီး သမ္မတ ဖြစ်သည့် ပတ်ဂွမ်ဟေး အကျင့်ပျက်ခြစားမှု စွဲချက်ဖြင့် စွပ်စွဲပြစ်တင်ခံရပြီးနောက် ယွန်းဆွတ်ယောလ်သည် ဒုတိယမြောက် စွပ်စွဲပြစ်တင်ခံရသည့် သမ္မတ ဖြစ်လာ ခဲ့ပါသည်။

လွှတ်တော်က သမ္မတအပေါ် စွပ်စွဲပြစ်တင်ရန် ဒုတိယ အကြိမ် မဲခွဲဆုံးဖြတ်သည့် ဒီဇင်ဘာလ ၁၄ ရက် (စနေနေ့) တွင် သမ္မတ ရာထူးမှ နုတ်ထွက်ပေးရန် ဆန္ဒပြသူများရှိခဲ့ပြီး တစ်ချိန်တည်းတွင် သမ္မတယွန်းဆွတ်ယိုးလ်ကို ထောက်ခံသူများကလည်း ကိုရီးယားအလံများ၊ အမေရိကန်အလံများ ကိုင်ဆောင် ဝှေ့ယမ်း၍ စုဝေးဆန္ဒပြမှု ပြုလုပ်ခဲ့ကြပါသည်။

သမ္မတယွန်းနှင့် တာဝန်ရှိသူများကို နိုင်ငံတော်သစ္စာ ဖောက်ဖျက်မှုဖြင့် စုံစမ်းစစ်ဆေးမှုများ ပြုလုပ်လျက် ရှိပြီး သမ္မတယွန်းကို ပြည်ပထွက်ခွာခွင့် ပိတ်ပင်ထား ပါသည်။

နိုင်ငံရေးသမားများ၏ အတ္တများကြောင့် တိုင်းပြည်က မသေချာ မရေရာမှုများနှင့် ရင်ဆိုင်နေရသည့် တောင်ကိုရီးယားနိုင်ငံ၏ လက်ရှိအခြေအနေသည် သင်ခန်းစာယူစရာပင် ဖြစ်ပါသည်။

ကိုးကား - ICHIRO NMK

ဆီးရီးယားတွင် အာဏာရလာသော လက်နက်ကိုင် အဖွဲ့များ၏ ခေါင်းဆောင်က သမ္မတလောင်းအဖြစ် ဝင်ရောက်ယှဉ်ပြိုင်ရန် အဆင်သင့်ဖြစ်နေသည်ဟု ကြေညာခဲ့ကြောင်း TASS သတင်းအေဂျင်စီက ဖော်ပြ ထားသည်။

ဆီးရီးယားမြို့တော် ဒမတ်စကတ်တွင် အာဏာရလာသော လက်နက်ကိုင်အဖွဲ့များ၏ ခေါင်းဆောင် Ahmed al-Sharaa (Abu Mohammed al-Julani) သည် ဆီးရီးယားသမ္မတနိုင်ငံမှ နိုင်ငံသားများ သို့မဟုတ် ၎င်း၏ တပ်ဖွဲ့ဝင်များမှ တောင်းဆိုပါက ဆီးရီးယားသမ္မတ ရာထူးအတွက် ဝင်ရောက်ယှဉ်ပြိုင်ရန် အဆင်သင့်ရှိကြောင်း ကြေညာခဲ့ပါသည်။

တရားဥပဒေစိုးမိုးရေးကို အခြေခံသည့် နိုင်ငံတစ်ခု ထူထောင်ရန်အတွက် ကတိကဝတ်ပြုထားကြောင်း ၎င်းက ပြောကြားခဲ့သည်။ ဆီးရီးယားတွင် အာဏာရ လာရန် တစ်ခုတည်းသောနည်းလမ်းက မဲပုံးများထဲ တွင်သာ ရှိနေမည်ဖြစ်ကြောင်း ၎င်း၏ ပြောကြားချက် အရ သိရှိရပါသည်။

ဒီဇင်ဘာ ၁၂ ရက်က အာဏာရလာသော ပြည်သူ့ စစ်ကိုယ်စားလှယ် Ubayda Arnaut က ဆီးရီးယား အသွင်ကူးပြောင်းရေးအစိုးရသည် လွှတ်တော်နှင့် ဖွဲ့စည်းပုံအခြေခံဥပဒေဆိုင်ရာလုပ်ငန်းများကို သုံးလကြာ ဆိုင်းငံ့ထားမည်ဖြစ်ကြောင်း၊ အာဏာပိုင်အသစ်များသည် နိုင်ငံ၏အခြေခံဥပဒေအား ပြင်ဆင်ရန်အတွက် ဥပဒေ ရေးရာနှင့် လူ့အခွင့်အရေးဆိုင်ရာကော်မတီများ ဖွဲ့စည်း မည်ဖြစ်ကြောင်း AFP သတင်းအေဂျင်စီသို့ ပြောကြားခဲ့ ပါသည်။ 

ကိုးကား - TASS / AFP

အမေရိကန်ရွေးကောက်ခံသမ္မတ ဒေါ်နယ်ထရမ့်သည် ယူကရိန်းတွင် ဖြစ်ပွားနေသောပဋိပက္ခများ အဆုံးသတ်ရေးဆွေးနွေးမှုများ ပြုလုပ်ခဲ့ကြောင်း NBC သတင်း အေဂျင်စီတွင် ဖော်ပြထားပါသည်။

ဒေါ်နယ်ထရမ့်၏ ကိုယ်စားလှယ်အဖွဲ့သည် အိမ်ဖြူတော် နှင့်ယူကရိန်းမှ ကိုယ်စားလှယ်များနှင့် တွေ့ဆုံဆွေးနွေး ခဲ့ကြသည်။

မော်စကိုနှင့် ကိယက်ဗ်တို့ကြား ပဋိပက္ခကို အဆုံးသတ်ရန် နည်းလမ်းရှာဖွေရန် လက်ရှိအမေရိကန်အစိုးရ၏ ကိုယ်စားလှယ်များ နှင့် ယူကရိန်းခေါင်းဆောင်များနှင့် တွေ့ဆုံဆွေးနွေးခဲ့ကြောင်း NBCသတင်းက ဖော်ပြထား ပါသည်။

ကိုးကား - NBC

တောင်ကိုရီးယား သမ္မတ Yoon Suk-yeol က အချိန်ပိုင်းသာကြာခဲ့သော ၎င်းထုတ်ပြန်ခဲ့သည့် စစ်ဥပဒေအရအုပ်ချုပ်ရေးအမိန့်ကို ကာကွယ်ပြောဆိုခဲ့ပြီး အဆိုပါကိစ္စနှင့်ပတ်သက်ပြီး စွဲချက်တင်ခံရသည် ဖြစ်စေ၊ စုံစမ်းစစ်ဆေးခံရသည်ဖြစ်စေ ပြတ်သားစွာ ရင်ဆိုင်သွားမည်ဖြစ်ကြောင်း ပြောကြားခဲ့ကြောင်း သိရှိရသည်။

ဒီဇင်ဘာ ၁၂ ရက်နေ့ နံနက်တွင် ပြောခဲ့သော မိန့်ခွန်းတွင် မစ္စတာ Yoon က အတိုက်အခံများအား “နိုင်ငံကို ဆန့်ကျင်သော အင်အားစု” ဟု ခေါ်ဆိုလိုက်ပြီး ၎င်းတို့ကြောင့် တိုင်းပြည်နိုင်ငံရေးကို ရပ်တန့်သွားစေခဲ့ သည်ဟု စွပ်စွဲလိုက်ပါသည်။

တောင်ကိုရီးယားနိုင်ငံ၏ ရွေးကောက်ပွဲကော်မရှင်နှင့် အစိုးရအဖွဲ့အစည်းများ၏ ကွန်ပျူတာကွန်ယက်စနစ်အတွင်း မြောက်ကိုရီးယားဟက်ကာများက ထွင်းဖောက် ဝင်ရောက်ခံခဲ့ရသည်ကို တောင်ကိုရီးယားနိုင်ငံ၏ ထောက်လှမ်းရေးအေဂျင်စီမှ တွေ့ရှိခဲ့သော်လည်း ကော်မရှင်က ၎င်း၏ဆာဗာစနစ်ကို အစစ်ဆေးခံရန် ငြင်းဆိုခဲ့သည်ဟု မစ္စတာ Yoon က ပြောကြားခဲ့ပါသည်။

အဆိုပါ အကြောင်းအချင်းအရာများသည် ၎င်းအနေဖြင့် စစ်ဥပဒေအရ အုပ်ချုပ်ရေးအမိန့်အား ထုတ်ပြန်ရန် ဆုံးဖြတ်ချက်ချခဲ့ရသည့်နောက်ကွယ်မှ အကြောင်းအရင်းများဖြစ်သည်ဟု မစ္စတာ Yoon က ရှင်းပြခဲ့ပါသည်။

ကိုးကား- NHK World

သမ္မတဘိုင်ဒင်သည် ယူကရိန်းအား စစ်ရေးအကူအညီပေးရေး နောက်ထပ်အစီအစဉ်အသစ်ကို အတည်ပြုလိုက်ကြောင်း အိမ်ဖြူတော်ပြောရေးဆိုခွင့်ရှိသူက ပြောကြားခဲ့ကြောင်း RIA သတင်းအေဂျင်စီက ဖော်ပြထားပါသည်။

အမေရိကန်ပြည်ထောင်စုသည် ယူကရိန်းနိုင်ငံအားစစ်ရေးအကူအညီပေးရေးအစီအစဉ်သစ်ကို အတည်ပြုခဲ့ပြီး ယင်းအစီအစဉ်တွင် လေကြောင်းကာကွယ်ရေး ပစ္စည်းများ၊ လက်နက်ကြီးများ၊ ဒရုန်းများနှင့် သံချပ်ကာယာဉ်များ ပါဝင်မည်ဖြစ်ကြောင်း အိမ်ဖြူတော်၏ မဟာဗျူဟာဆက်သွယ်ရေးညှိနှိုင်းရေးမှူး  ဂျွန်ကတ်ဘီ က ဒီဇင်ဘာလ ၁၁ ရက်နေ့တွင်ပြောကြားခဲ့သည်။

၇၂ ကြိမ်မြောက် အဆိုပါစစ်ရေးအကူအညီအစီအစဉ်တွင် လေကြောင်းရန်ကာကွယ်ရေးစနစ်များ၊ UAVများ၊ လက်နက်ကြီးများနှင့် သံချပ်ကာယာဉ်များ ပါဝင်မည်ဖြစ်ကြောင်း သတင်းအေဂျင်စီက ဖော်ပြထားပါသည်။

ကိုးကား - RIA သတင်းအေဂျင်စီ