ပဲခူးတိုင်းဒေသကြီး သာယာဝတီခရိုင် အုတ်ဖိုမြို့နယ်အတွင်းရှိကျေးရွာများသည် လယ်ယာ စိုက်ပျိုးရေး လုပ်ငန်းကို လုပ်ကိုင်ကြပြီး သီးနှံမျိုးစုံစိုက်ပျိုးလျက် ရှိရာ စားဖိုဆောင်သီးနှံ တစ်မျိုး ဖြစ်သော ရုံးပတီ သီးနှံကို မိသားစု အပိုဝင်ငွေရရှိရန်အတွက် တစ်နိုင် တစ်ပိုင်စိုက်ပျိုးရာမှ စီးပွားဖြစ် စိုက်ပျိုး လာကြကြောင်း သိရ သည်။

ရုံးပတီသီးကို ရာသီမရွေး စိုက်ပျိုးနိုင်၍ စိုက်ပျိုးပြီး နှစ်လ ခန့်အကြာတွင် စတင်ခူးဆွတ်ရကြောင်း၊ မျိုးအနေဖြင့် ပင်ပုမျိုး၊ ပင်လတ်မျိုး၊ ပင်မြင့်မျိုးများရှိပြီး ပင်လတ်ရုံးပတီမျိုးများကို အများဆုံး စိုက်ပျိုးလျက်ရှိရာ တစ်ဧကလျှင် မျိုးစေ့ ရှစ်ထုပ်ခန့် ကုန်ကျ ကြောင်း၊ တန်းခြား သုံးပေ၊ ပင်ခြား တစ်ပေ- တစ်ပေခွဲထား၍ ဘောင် ခတ်စနစ်ဖြင့် စိုက်ပျိုးရပြီး မျိုး၊ သွင်းအားစု၊ မြေပြုပြင်ခ၊ လုပ်သား ခအပါအဝင် တစ်ဧကလျှင် စုစု ပေါင်း ငွေကျပ် ၃၀၅၀၀၀၀ ခန့် ကုန်ကျကြောင်း၊ ရုံးပတီသီးနှံကို နှစ်ရက်ခြားတစ်ကြိမ် ခူးဆွတ် ရပြီး တစ်ဧကလျှင် ရုံးပတီသီး အတောင့်ရေ ၁၇၅၀၀၀ ခန့် ထွက်ရှိကြောင်း၊ ဈေးကွက်အနေ ဖြင့် ကုန်စိမ်းပွဲစားများက စိုက်ခင်း သို့ လာရောက်ဝယ်ယူကြပြီး ပွဲစားများမှတစ်ဆင့် ဒေသတွင်း သို့ ပြန်လည်ရောင်းချကြကြောင်း၊ ရုံးပတီသီးသည် စိုက်ပျိုးရ လွယ်ကူပြီး ရာသီမရွေး စိုက်ပျိုး နိုင်သည့်အတွက် တောင်သူများအနေဖြင့် အကျိုးအမြတ်များ ရရှိကြောင်း တောင်သူတစ်ဦးထံမှ သိရသည်။

DOCA (ပဲခူး)

အမေရိကန်နိုင်ငံအနေဖြင့် တရုတ်နိုင်ငံ နှင့်ရရှိသော ကုန်သွယ်ရေး သဘောတူညီချက်ကို ပြောင်ပြောင်တင်းတင်း ချိုးဖောက်ကြောင်း တရုတ်ကုန်သွယ်ရေး ဝန်ကြီးဌာန က ဇွန်လ ၂ ရက်တွင် ပြောသည်။ ထို့ပြင် တရုတ်နိုင်ငံ၏   အကျိုးစီးပွားများကို ကာကွယ်နိုင်ရေးအတွက် လိုအပ်သည်များကို ဆောင်ရွက်သွားမည်ဖြစ်ကြောင်း ဝန်ကြီးဌာနက ကတိပြုထားသည်။ တရုတ်နိုင်ငံ အနေဖြင့် နှစ်နိုင်ငံကြား ကုန်သွယ်ရေး သဘော တူညီချက်များကို ချိုးဖောက်သည်ဟု အမေရိကန်သမ္မတဒေါ်နယ်ထရမ့်က ပြောပြီးနောက် တရုတ်အစိုးရဘက်က ယခုကဲ့သို့ ထုတ်ပြန်လာခြင်းဖြစ်သည်။

အဆိုပါနှစ်နိုင်ငံမှ ကုန်သွယ်ရေးတာဝန် ရှိသူများက ဂျီနီဗာမြို့၌ တွေ့ဆုံဆွေးနွေးမှုများ လုပ်ဆောင်ပြီးနောက် မေလ ၁၂ ရက် တွင်ကြေညာလိုက်သော သဘောတူညီချက်အရ ဧပြီလအစောပိုင်းတွင် ချမှတ်လိုက်သည့် သွင်းကုန်အခွန်တိုးမြှင့်မှုများကိုဆိုင်းငံ့ရန် နှစ်နိုင်ငံစလုံးက သဘောတူထားသည်။

တရုတ်နိုင်ငံက ဖော်ပြထားသည့် အမေရိကန်အစိုးရက ချိုးဖောက်သော သဘောတူညီချက်များတွင် ဟွားဝေကုမ္ပဏီ၏ ချစ်ပြားများ အသုံးပြုမှုကိစ္စ၊ တရုတ်ကုမ္ပဏီ များသို့ ချစ်ပြားဒီဇိုင်းဆော့ဝဲများ ရောင်းချမှုဆိုင်းငံ့ခြင်းနှင့် တရုတ်ကျောင်းသားများကို ဗီဇာများ ပယ်ဖျက်ခြင်းတို့ ပါဝင်သည်။

အမေရိကန်သမ္မတ ဒေါ်နယ်ထရမ့်က စွပ်စွဲထားသည့် တရုတ်နိုင်ငံက ကုန်သွယ်ရေး သဘောတူညီချက်ကိုချိုးဖောက်သည် ဟူသော ပြောဆိုချက်တွင်မူ တရုတ်နိုင်ငံအနေဖြင့် မည်သည့်အချက်များကို ချိုးဖောက်သည်ဟူ၍ အသေးစိတ်ဖော်ပြထားခြင်း မရှိဘဲ တရုတ်နိုင်ငံကို စီးပွားရေးအရ အန္တရာယ်ကြီး ဖြစ်သည်ဟုသာ ပြောထား ကြောင်း သိရသည်။     

Source: MWD Web Portal

မြိတ် ဇွန် ၁

တနင်္သာရီတိုင်းဒေသကြီးအတွင်း ဈေးကွက်ဝင်အမယ်သီးနှံတစ်မျိုးဖြစ်သည့် ကော်ဖီသီးနှံပင်များကို ယခု၂၀၂၅ -၂ဝ၂၆ ခုနှစ်တွင် ဧကပေါင်း ၁၀၀၀ တိုးချဲ့ စိုက်ပျိုးသွားမည်ဖြစ်ကြောင်း တနင်္သာရီတိုင်း ဒေသကြီး စိုက်ပျိုးရေးဦးစီးဌာနမှ သိရသည်။

တနင်္သာရီတိုင်းဒေသကြီး၏ ရေ၊ မြေ၊ ရာသီဥတုအရ နှစ်ရှည် သီးနှံပင်ဖြစ်သော ရော်ဘာ၊ ဆီအုန်း၊ ကိုကိုး စသည့် သီးနှံပင် များအပြင် မြေနိမ့်ကော်ဖီဖြစ်ထွန်း စိုက်ပျိုးနိုင်သည့် ဒေသဖြစ်သည့် အတွက် တိုင်းဒေသကြီးအတွင်း ယခုနှစ်တွင် ကော်ဖီကို တိုးချဲ့ စိုက်ပျိုးနိုင်ရန် လျာထားဆောင်ရွက်လျက် ရှိကြောင်း သိရသည်။

ယခင် ၂၀၂၄ - ၂၀၂၅ ခုနှစ် တွင် တနင်္သာရီတိုင်းဒေသကြီး အတွင်း၌ ကော်ဖီစိုက်ဧက ၁၈၇၄ ဧကကို တိုးချဲ့စိုက်ပျိုးနိုင်ခဲ့ပြီး ယနေ့အထိစုစုပေါင်းကော်ဖီစိုက် ဧကပေါင်း ၃၀၂၂ ဧက စိုက်ပျိုးပြီး ဖြစ်ကြောင်း သိရသည်။

အပြည့်အစုံဖတ်ရှုရန်- https://www.mdn.gov.mm/index.php/my/ttnngsaariittiungdeskiiattng-jhekkwngsiinnttcmiuphcsnny-keaaphiisiinnkiu-ykhuncttng-ek-1www

ကျိုက်လတ် ဇွန် ၁

ဧရာဝတီတိုင်းဒေသကြီး ဖျာပုံခရိုင် ကျိုက်လတ်မြို့နယ်မှ ရန်ကုန်ဈေးကွက်သို့ ဧပြီလအတွင်း ရင်ကွဲသရက်သီးအလုံးရေ ၅၇၀၀၀၀ ထိ တင်ပို့ရောင်းချနိုင်ခဲ့ကြောင်း ကျိုက်လတ်မြို့နယ် သရက်သီးရောင်းဝယ်ရေးပွဲရုံပိုင်ရှင် ဒေါ်ညိုညိုမြင့် က ပြောပြ၍ သိရသည်။

ကျိုက်လတ်မြို့နယ်မှ ရန်ကုန် ဈေးကွက်သို့ ဧပြီလက ရင်ကွဲသရက်သီး အလုံးရေ ၃၅၀၀၀၀ ထိ သာ တင်ပို့ရောင်းချနိုင်ခဲ့ပြီး မေ ၁ ရက်မှ ၃၁ ရက်ထိ ရင်ကွဲသရက်သီးအလုံးရေ ၅၇၀၀၀၀ ထိ တင်ပို့ရောင်းချနိုင်ခဲ့ကြောင်း၊ အဆိုပါဒေသတွင် ရင်ကွဲသရက်သီးများ ပေါ်နေချိန်ဖြစ်ကြောင်း သိရသည်။

“အခုနှစ် သရက်သီးဈေးနှုန်းက သင့်တင့်တဲ့ဈေးပါ။ ရန်ကုန်ဈေးကွက်က အဝယ်လဲလိုက်နေပါတယ်။ သရက်သီးရာသီကုန်တဲ့အချိန်ထိ ဒီဘက်မှာ အရောင်းအဝယ် ကောင်းနေမယ်ထင်ပါတယ်။ သရက်သီအရွယ်အစားကတော့ အစုံပေါ့နော်။ အခုလိုသရက်သီးတွေ အရောင်းအဝယ်ဖြစ်လာလို့ ဒေသခံသရက်သီးစိုက် တောင်သူတွေလဲ အဆင်ပြေနေပါတယ်” ဟု ကျိုက်လတ်မြို့နယ် သရက်သီး ရောင်းဝယ်ရေးပွဲရုံပိုင်ရှင် ဒေါ်ညိုညိုမြင့် က ပြောပြသည်။

ကျိုက်လတ်မြို့နယ်တွင် ရင်ကွဲသရက်သီးအလုံးရေ ၁၀၀ လျှင် ငွေကျပ် ၅၅၀၀၀ ထိ ပေါက်ဈေးရှိကြောင်း၊ အဆိုပါဒေသထွက် ရင်ကွဲသရက်သီးမှည့်များကို ရန်ကုန်ဈေးကွက်သို့ အဓိကတင်ပို့ရောင်းချလျက်ရှိပြီး ရင်ကွဲသရက်သီးအပြင် ရွှေဟင်္သာ၊ စိန်တလုံး၊ မချစ်စု စသည့် သရက်သီးများလည်း ထွက်ရှိကြောင်း သိရသည်။

ကျော်ကျော်လင်း

Source: ရတနာပုံသတင်းစာ

တနင်္လာနေ့ (ဇွန် ၂) တွင် ထုတ်ပြန်ခဲ့သော အင်ဒိုနီးရှားနိုင်ငံ၊ စာရင်းအင်းဌာနမှ အချက်အလက်များအရ ၂၀၂၀ ပြည့်နှစ်၊ ဧပြီလတွင် နိုင်ငံ၏ ကုန်သွယ်ရေး ပိုငွေပြမှုသည် အမေရိကန်ဒေါ်လာ ၁၆၀ မီလီယံဝန်းကျင် တွင် ရှိခဲ့ပါသည်။ 

၂၀၂၅ ခုနှစ်၊ မတ်လတွင် နိုင်ငံ၏ ကုန်သွယ်ရေးပိုငွေပြမှုသည် အမေရိကန် ဒေါ်လာ ၄.၃၃ ဘီလီယံ အထိ မြင့်တက်ခဲ့ပါသည်။ 

သွင်းကုန်တင်သွင်းမှုကို လေ့လာကြည့်ပါက ရင်းနှီးမြှုပ်နှံကုန်စည် (Capital Goods) တင်သွင်းမှုသည် အများဆုံးဖြစ်ပြီး ၂၀၂၅ ခုနှစ်၊ ဧပြီလ တွင် သွင်းကုန်တန်ဖိုး အမေရိကန်ဒေါ်လာ ၂၀.၅၉ ဘီလီယံ ဖြင့် ယခင်လ ထက် ၂၁.၈၄ % ခုန်တက်ခဲ့ပြီး ပို့ကုန်တင်ပို့မှုကို လေ့လာကြည့်ပါက ပို့ကုန်တန်ဖိုး အမေရိကန်ဒေါ်လာ ၂၀.၇၄ ဘီလီယံဖြင့် ယခင်လထက် ၅.၇၆ % မြင့်တက်ခဲ့ပါသည်။ 

သို့ပါ၍ အင်ဒိုနီးရှားနိုင်ငံ၏ ကုန်သွယ်ရေးပိုငွေပြမှုသည် ငါးနှစ်အတွင်း အနိမ့်ဆုံး အနေအထားသို့ ရောက်ရှိခဲ့ပါသည်။ 

ကိုးကား- CNA

Photo: Tech in Asia

ဘာသာပြန်ဆိုသူ- ဒေါ်မေသူဌေး၊ ဦးစီးအရာရှိ၊ နစက-၃

ဂျပန်အစိုးရအနေဖြင့် သိုလှောင်ထားသော အရံဆန်များကို လက်လီ ရောင်းချသည့် ကုမ္ပဏီများသို့ ထုတ်ရောင်းပေးလျက်ရှိရာ ယခုအခါ ပြည်သူများအနေဖြင့် ဆန်ဆိုင်အများအပြားတွင် ဝယ်ယူနိုင်ပြီဖြစ်သည်။ ထိုသို့ သိုလှောင်ထားသော အရံဆန်များအား ကျယ်ကျယ်ပြန့်ပြန့်ထုတ်ရောင်းပေးခြင်းဖြင့် ဆန်ဈေးနှုန်းများ ကျဆင်းစေရန် အကူအညီဖြစ်စေနိုင်မည်လားဆိုသည်ကို လူအများက စိတ်ဝင်စားလျက်ရှိသည်။ 

ဂျပန်နိုင်ငံတွင် ဆန်ဈေးနှုန်းများ မြင့်တက်လာပြီးနောက် အိမ်ထောင်စုများအား ထိခိုက်လာသည့်အတွက် အစိုးရသည် သိုလှောင်ထားသော အရံဆန်များကို တိုက်ရိုက်စာချုပ်ဖြင့် စတင်ထုတ်ရောင်းခဲ့သည်။ 

ဂျပန်အစိုးရသည် ၂၀၂၁ ခုနှစ်နှင့် ၂၀၂၂ ခုနှစ်များတွင် ရိတ်သိမ်းခဲ့သော ဆန်စပါးတန်ချိန် စုစုပေါင်း ၃၀၀,၀၀၀ ကို တင်ဒါစနစ်ဖြင့် မဟုတ်ဘဲ တိုက်ရိုက်စာချုပ်ချုပ်ဆို၍ ရောင်းချလျက်ရှိသည်။ 

ဇွန်လ ၁ ရက် (တနင်္ဂနွေနေ့) တွင် အချို့စူပါမားကတ်ဆိုင်များ၌ ၅ ကီလိုဂရမ် အလေးချိန်ရှိ ဆန်အိတ်များကို ယန်း ၂,၀၀၀ (အမေရိကန် ဒေါ်လာ ၁၄ ခန့်) ဖြင့် ရောင်းချပေးလျက်ရှိပြီး ပြည်သူ အများအပြားကလည်း အဆိုပါအရံဆန်များကို ဝယ်ယူရန် ရောက်ရှိနေကြသည်။ 

ယခုလို အရံဆန်များ ထုတ်ရောင်းပေးခြင်းသည် ဆန်ဈေးနှုန်းများအတိုင်း အတာတစ်ခုအထိ ကျဆင်းစေနိုင်မည်ဟု ထင်မြင်ကြောင်း စိုက်ပျိုးရေးဝန်ကြီး Koizumi Shinjiro က ဇွန် ၁ ရက်တွင် ပြောကြားခဲ့သည်။

စိုက်ပျိုးရေးဝန်ကြီးဌာနသည် မေ ၃၀ ရက် (သောကြာနေ့) မှစတင်၍ အစိုးရအရံဆန်များကို ဝယ်ယူရန် အသေးစားနှင့် အလတ်စား လက်လီဆိုင်များ၏ လျှောက်လွှာများကို လက်ခံဆောင်ရွက်ပေးလျက်ရှိပြီး   လျှောက်လွှာ ၁,၃၀၀ ခန့် လက်ခံရရှိထားပြီဖြစ်ကြောင်း ပြောကြားခဲ့သည်။ 

ကိုးကား -NHK 

ဘာသာပြန်ဆိုသူ- ဒေါ်မေသူခိုင်၊ လက်ထောက်ညွှန်ကြားရေးမှူး၊ နစက-၃

သမ္မတ ဒေါ်နယ်ထရမ့် က အမေရိကန်သို့ တင်သွင်းသည့် သံမဏိပစ္စည်းများအား လက်ရှိ အကောက်ခွန် ၂၅% မှ ၅၀% အထိ တိုးမြှင့်မည်ဟု သောကြာနေ့ (မေ ၃၁) တွင် ကြေညာခဲ့သည်။

ပဲန်ဆီလ်ဗေးနီးယားပြည်နယ်၊ ဝက်စ်မစ်ဖလင်းမြို့ရှိ US Steel စက်ရုံတွင် မိန့်ခွန်းပြောကြားစဉ် ထရမ့်က ၎င်း၏ “အဓိကကြေညာချက်” အဖြစ် အဆိုပါဆုံးဖြတ်ချက်ကို ထုတ်ပြန်ခဲ့သည်။ အမေရိကန် သံမဏိ လုပ်သား များ၏ အားပေးသံများကြားတွင် ၎င်းက “အမေရိကန် သံမဏိလုပ်ငန်း ကို ကာကွယ်ရန် အကောက်ခွန်ကို ၅၀% အထိ တိုးမည်” ဟု ပြောကြား ခဲ့သည်။

“အမေရိကန်ပြည်ထောင်စုထဲကို တင်သွင်းသည့် သံမဏိအတွက် အကောက်ခွန်ကို ၂၅% ကနေ ၅၀% အထိ တိုးပါမည်။ ဒါက အမေရိကန်၏ သံမဏိလုပ်ငန်းကို ပိုမိုလုံခြုံစေမည်ဖြစ်ပြီး မည်သူမျှ ဒီအဆင့်ကို ကျော်ဖြတ်၍ မရပါ” ဟု ၎င်းက ပြောကြားခဲ့သည်။

ထရမ့်က မူလက ၄၀% အကောက်ခွန် စဉ်းစားထားသော်လည်း လုပ်ငန်းရှင် များက “၅၀% ဖြစ်မှ ထိရောက်မည်” ဟု အကြံပြုခဲ့ကြောင်း ဖွင့်ဟခဲ့သည်။

“၂၅% ဆိုပါက ၎င်းတို့အနေဖြင့် အတန်ငယ် ရုန်းကျော်နိုင်သော်လည်း ၅၀% ဆိုလျှင် မည်သူမျှ မကျော်နိုင်တော့ပါ” ဟု ဆိုသည်။

နောက်ပိုင်းတွင် ၎င်း၏ လူမှုကွန်ရက်စာမျက်နှာတွင် “အကောက်ခွန် အသစ်သည် ဇွန်လ ၄ ရက်၊ ဗုဒ္ဓဟူးနေ့မှ စတင်အကျိုးသက်ရောက်မည်” ဟု ထပ်မံအတည်ပြုခဲ့သည်။

ကိုးကား-CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အရှေ့တောင်အာရှနိုင်ငံများသည် ၎င်းတို့၏ ရောင်းလိုအား ကွင်းဆက် များ (Supply Chain) ကို ဒေသတွင်း နှင့် ကမ္ဘာတစ်ဝှမ်းရှိ နိုင်ငံများနှင့် ချိတ်ဆက်ပြီး ဆောင်ရွက်နိုင်ရန်နှင့် ကြီးမားသော ဈေးကွက်ကို ချိတ်ဆက်နိုင်ပြီး စီးပွားရေးအကျိုးကျေးဇူးများရရှိရန် ဆောင်ရွက်သင့်ကြောင်း ထိုင်း နိုင်ငံခြားရေးဝန်ကြီးက ပြောကြားခဲ့သည်။

လက်တလောနှစ်များတွင် လွပ်လပ်စွာကုန်သွယ်မှု သဘောတူစာချုပ်များနှင့် အမေရိကန်အကောက်ခွန်နှုန်းထား တိုးမြင့်မှုများကြောင့် တရုတ် နိုင်ငံကုမ္ပဏီများက အာဆီယံဒေသများအတွင်း ပိုမိုရင်းနှီးမြှုပ်နှံလာသောကြောင့် တရုတ်နှင့် အရှေ့တောင်အာရှနိုင်ငံများအကြား စီးပွားရေး ပူးပေါင်းဆောင်ရွက်မှုများသည် သိသိသာသာ များပြားလာပါသည်။ 

ပြီးခဲ့သည့်နှစ်တွင်   ဗီယက်နမ်နိုင်ငံ သည် တရုတ်နိုင်ငံမှ ကုန်ထုတ်လုပ်မှု ရင်းနှီးမြှုပ်နှံမှုကို အများဆုံးလက်ခံခဲ့ပြီး အင်ဒိုနီးရှားနိုင်ငံသည်လည်း ဒုတိယအများဆုံး တရုတ်နိုင်ငံမှ ကုန်ထုတ်လုပ်မှု ရင်းနှီးမြှုပ်နှံမှု လက်ခံ သည့်နိုင်ငံ ဖြစ်ပါသည်။ တရုတ်နှင့်အင်ဒိုနီးရှားနိုင်ငံတို့သည် လာရောက် ရင်းနှီးမြှုပ်နှံသည့် တရုတ်ကုမ္ပဏီများထံမှ အမေရိကန်ဒေါ်လာ ၃ ဘီလီယံခန့် ရရှိခဲ့ကြောင်း သတင်းရရှိပါသည်။ 

ကိုးကား - Eleven Media Group 

ဘာသာပြန်ဆိုသူ- ဒေါ်မေသူဌေး၊ ဦးစီးအရာရှိ၊ နစက-၃

အမေရိကန် သမ္မတ ဒေါ်နယ်ထရမ့်နှင့် တရုတ်ပြည်သူ့သမ္မတနိုင်ငံ သမ္မတရှီကျင့်ဖျင်တို့သည် ယခုအပတ်တွင် ကုန်သွယ်ရေးဆိုင်ရာ ပြဿနာများကို တယ်လီဖုန်းဖြင့် ဆွေးနွေးရန် အလားအလာရှိကြောင်း အိမ်ဖြူတော်၏ အကြီးတန်းအရာရှိတစ်ဦးက ပြောကြားခဲ့သည်။ မေလ တွင် အမေရိကန်ပြည်ထောင်စုနှင့် တရုတ်နိုင်ငံတို့သည် ဆွစ်ဇာလန်နိုင်ငံ၊ ဂျီနီဗာမြို့တွင် ကုန်သွယ်ရေးဆိုင်ရာဆွေးနွေးပွဲများ ကျင်းပပြုလုပ်ခဲ့ပြီး အဆိုပါဆွေးနွေးမှုများအပြီး နှစ်နိုင်ငံအနေဖြင့် ထပ်တိုး အကောက်ခွန် များကို ၁၁၅ ရာခိုင်နှုန်းအထိ လျှော့ချရန် သဘောတူညီမှုရယူခဲ့သည်။

သို့ရာတွင် တရုတ်နိုင်ငံအနေဖြင့် နှစ်နိုင်ငံသဘောတူညီချက်အရ အကောက်ခွန် ကင်းလွတ်ခွင့် ပြုထားသည့် အချို့ထုတ်ကုန်များ၊ အထူးသဖြင့် အမေရိကန် စက်မှုလုပ်ငန်းများအတွက် အရေးပါသည့် အရေးကြီးသတ္တုများကို အချိန်မီ မတင်ပို့ခဲ့ကြောင်း အမေရိကန်က စွပ်စွဲထားပြီး ထိုအချက်မှာ အမေရိကန် နှင့် ကုန်သွယ်မှုသဘောတူညီချက်ကို လုံးဝချိုးဖောက်ခဲ့ခြင်းဖြစ်ကြောင်း မေလ ၃၀ ရက်တွင် ထရမ့်က ပြောကြားခဲ့သည်။

ယခုသီတင်းပတ်တွင် ထရမ့်သည် ရှီနှင့် ကုန်သွယ်ရေးဆိုင်ရာ ညှိနှိုင်း ဆွေးနွေးမှုများ ပြုလုပ်ရန် မျှော်လင့်ထားကြောင်း အိမ်ဖြူတော် စီးပွား ရေးရာ ကောင်စီဒါရိုက်တာ Kevin Hassett က ပြောကြားခဲ့သည်။

နှစ်နိုင်ငံကုန်သွယ်ရေးဆိုင်ရာ တင်းမာမှုများနှင့်စပ်လျဉ်း၍ သမ္မတ ထရမ့်သည် သမ္မတ ရှီနှင့် တိုက်ရိုက်ဆွေးနွေးမည်ဟု မျှော်လင့်ရပြီး အမေရိကန်နှင့် တရုတ်နိုင်ငံအကြား ကုန်သွယ်ရေးပဋိပက္ခ တစ်ဖန် ပြန်လည်တင်းမာလာနိုင်ချိန်တွင် အဆိုပါဆွေးနွေးမှု ပေါ်ပေါက်လာခြင်း ဖြစ်သည်။

ကိုးကား - NHK

Photo: CBS News

ဘာသာပြန်ဆိုသူ- ဒေါ်မေသူခိုင်၊ လက်ထောက်ညွှန်ကြားရေးမှူး၊ နစက-၃

အမေရိကန်သမ္မတ ဒေါ်နယ်ထရမ့်က တရုတ်နိုင်ငံသည် ယခုလ အစောပိုင်းက သဘောတူညီခဲ့သည့် အကောက်ခွန်သဘောတူညီချက်ကို ချိုးဖောက်ခဲ့သည်ဟု စွပ်စွဲခဲ့ပြီး ကမ္ဘာ့အကြီးဆုံး စီးပွားရေးအင်အားကြီး နိုင်ငံ နှစ်ခုကြား အားနည်းနေသော ကုန်သွယ်ရေးစစ်ပွဲ ရပ်စဲမှုကို ပြန်လည် တင်းမာလာစေခဲ့သည်။

မေလ ၁၂ ရက်က ဂျနီဗာမြို့တွင် ကျင်းပခဲ့သည့် အဆုံးသတ် ဆွေးနွေးပွဲ များအပြီး ကြေညာခဲ့သည့် သဘောတူညီချက်အရ အမေရိကန်နှင့် တရုတ် နိုင်ငံတို့သည် ဧပြီလအစောပိုင်းကတည်းက စတင်ကျင့်သုံးခဲ့သည့် အကောက်ခွန် အသစ်အများစုကို ယာယီရပ်ဆိုင်းထားရန် သဘောတူညီခဲ့ကြသည်။

သောကြာနေ့ (မေ ၃၀) တွင် ထရမ့်သည် ၎င်း၏ Truth Social လူမှု မီဒီယာပလက်ဖောင်းတွင် “တရုတ်နိုင်ငံသည် မိမိတို့နှင့်ချုပ်ဆိုထားသော သဘောတူညီချက်ကို လုံးဝချိုးဖောက်ခဲ့ပြီ” ဟု ရေးသားခဲ့သည်။ ၎င်းက အသေးစိတ်အချက်အလက်များကို ဖော်ပြခဲ့ခြင်းမရှိသော်လည်း အကောက်ခွန်များကြောင့် တရုတ်နိုင်ငံသည် “စီးပွားရေးအရ ကြီးမားသော အန္တရာယ် နှင့် ရင်ဆိုင်နေရကြောင်း” ထည့်သွင်းရေးသားခဲ့သည်။

အမေရိကန်အစိုးရအဖွဲ့သည် အဆင့်မြင့်ပစ္စည်းများ (ချစ်ပ်ဒီဇိုင်း ဆော့ဖ်ဝဲ နှင့် အထူးဓာတုပစ္စည်းများအပါအဝင်) တရုတ်သို့ တင်ပို့မှုများကို ရပ်တန့်ရန် အမိန့်ပေးခဲ့သည်ဟု သတင်းများက ဖော်ပြခဲ့သည်။ ကျွမ်းကျင်သူများက အဆိုပါဆုံးဖြတ်ချက်သည် တရုတ်နှင့် ဆက်ဆံရေးတင်းမာမှုကို ပိုမို မြင့်တက်လာစေနိုင်ကြောင်း သတိပေးခဲ့ကြသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂