“အသည်းအဆီဖုံးခြင်း” ဟာ အဖြစ်အများဆုံး အသည်းရောဂါတစ်ခု ဖြစ်လာပါတယ်။ အဆီဓါတ်တွေဟာ အသည်း ပေါ်မှာ စုပုံလာပြီး အချိန်ကြာလာတဲ့အခါ အသည်းတစ်ခုလုံးဟာ အဆီတွေနဲ့ ဖုံးလွှမ်းသွားပါတယ်။

နောက်ဆက်တွဲ ဆိုးကျိုးတွေကတော့ … အသည်းရောင်/အသည်းဝါ၊ အသည်းခြောက်၊ အသည်းကင်ဆာ အသည်းအစားထိုးရတာတို့ ဖြစ်တတ်ပါတယ်။ 

အသည်းအဆီဖုံးခြင်းကို ဆေးသောက်စရာမလိုဘဲ သက်သာပျောက်ကင်းစေနိုင်တဲ့ နည်းလမ်းများကို လေးစား ချစ်ခင်စွာဖြင့် မျှဝေရေးသားလိုက်ပါတယ် ခင်ဗျာ.. 

၁၀% ဝိတ်ချခြင်း 

“အဝလွန်ခြင်း” ဟာ အသည်းအဆီဖုံးခြင်းရဲ့ အဓိကအကြောင်းအရင်းတစ်ခု ဖြစ်ပါတယ်. 

(ဘာလုပ်မလဲ?)

မိမိကိုယ်အလေးချိန်ရဲ့ ၁၀% ကို လျှော့ချခြင်းဖြင့် အသည်းအဆီဖုံးတာကို သိသာစွာ သက်သာပျောက်ကင်းနိုင်ပါ တယ်…

(ဥပမာ- အလေးချိန် ပေါင် ၁၅၀ ရှိရင် ၁၅ ပေါင်လျော့ချခြင်း) 

ကိုလက်စထရော လျော့ချခြင်း (အဆီဓါတ်)

ကိုလက်စထရော (၂) မျိုး ရှိတဲ့အထဲက “LDL ကိုလက်စထရော”ဟာ အသည်းအဆီဖုံးစေပါတယ်. 

(ဘာလုပ်မလဲ?)

ငါးအဆီနဲ့ အသီးအရွက်အဆီတွေကို ပိုစားသုံးခြင်းဖြင့် အသည်းအဆီဖုံးတာကို လျော့ကျစေပါတယ်…

ကာဗိုဟိုက်ဒရိတ် လျော့စားခြင်း (ကစီဓာတ်)

“ကာဗိုဟိုက်ဒရိတ်ဓာတ်” အမြောက်အများပါတဲ့ အစားအစာတွေဟာ အသည်းအဆီဖုံးစေပါတယ်. 

(ဘာလုပ်မလဲ?)

နေ့စဉ် ကာဗိုဟိုက်ဒရိတ်ဓာတ် လျှော့စားသုံးခြင်းဖြင့် အသည်းအဆီဖုံးတာရဲ့ ၅၀% ကျော်ကို သက်သာစေပါတယ်…

(ဥပမာ. ဆိုဒါ/ သကြားဓာတ်/ ကွတ်ကီး/ ရေခဲမုန့် အစရှိသဖြင့် … ) 

အရက်/ဘီယာ/ဝိုင် လျှော့သောက်ခြင်း

“အရက်” အလွန်သောက်ခြင်းဟာ အသည်းအဆီဖုံးတာကို ပိုမိုဆိုးရွားစေပါတယ်. 

(ဘာလုပ်မလဲ?)

တစ်ပတ်ကို ဘီယာ ၇ ဘူး ထက်ပိုပြီး  ‘မ’သောက်သုံးခြင်းဖြင့် အသည်းအဆီဖုံးတာကို သက်သာလာစေပါတယ်… 

ဆီးချို ထိန်းခြင်း

“ဆီးချို” ရှိတဲ့သူများမှာ အသည်းအဆီဖုံးတာ တော်တော်အဖြစ်များပါတယ်. 

(ဘာလုပ်မလဲ?)

ဆီးချို မတက်အောင် သေချာဂရုစိုက်ပြီး ထိန်းသိမ်းခြင်းဖြင့် အသည်းအဆီဖုံးတာကို လျော့ကျစေပါတယ်…

အထက်ပါ နည်းလမ်းများကို ပြုလုပ်နိုင်မယ်ဆိုရင်တော့ အသည်းအဆီဖုံးရောဂါဟာ သိသိသာသာ သက်သာ ပျောက်ကင်းလာမှာ ဖြစ်ပါတယ်ခင်ဗျာ… 

Source: https://www.facebook.com/photo/?fbid=737138621144335&set=a.192764588915077

Photo: hellosayarwon

အောက်ဖော်ပြပါ အကြောင်းတရားများကြောင့် ခေါင်းကိုက်ဝေဒနာ ခံစားရနိုင်ပါတယ် … 

(၁) ဦးခေါင်းတခုလုံးကိုက်ခဲခြင်း

(၂) ခေါင်းတခြမ်းကိုက်ခြင်း

(၃) မျက်စိတဝိုက် ခေါင်းကိုက်ခြင်း

(၄) ထိပ်ကပ်နာကြောင့် ခေါင်းကိုက်ခြင်း

(၅) ရုတ်တရက်ပြင်းထန် ခေါင်းကိုက်ခြင်း 

(၁) ဦးခေါင်းတခုလုံးကိုက်ခဲခြင်း

နဖူး၊ နားထင်၊ ခေါင်းနောက်စေ့ခြမ်းနဲ့ ဦးခေါင်းတခုလုံးမှာ တင်းကျပ်ပြီး ကိုက်ခဲနေတတ်ပါတယ်။ ဆေးပညာမှာတော့ "Tension headache" လို့ ခေါ်ပါတယ်။

ဘာကြောင့်ဖြစ်တာလဲဆိုတော့ စိတ်ဖိစီးခြင်း၊ အိပ်ရေးမဝခြင်း၊ ဦးခေါင်းအနေအထား ကိုယ်နေဟန်ထား မမှန်ခြင်း၊ ပင်ပန်းနွမ်းနယ်ခြင်း စသည်တို့ကြောင့် ဖြစ်နိုင်ပါတယ်။ 

ဘာလုပ်သင့်လဲ

ယေဘုယျအားဖြင့် ဒီလိုခေါင်းကိုက်ခြင်းဟာ မစိုးရိမ်ရပါဘူး အကိုက်အခဲပျောက်ဆေး သောက်သုံးခြင်း၊ ဥပမာ ပါရာစီတမော ဒိုင်ကလို (ကျောက်ကပ်ဝေဒနာရှင်များ အထူးသတိပြု) မျက်စိအနားပေးခြင်း၊ ရှူဆေးရှူခြင်း တို့ ပြုလုပ်နိုင်ပါတယ်။ 

(၂) ခေါင်းတခြမ်းကိုက်ခြင်း

သွေးခုန်သလို တဒိန်းဒိန်းနဲ့ ခေါင်းကိုက်နေတတ်ပါတယ်။ ဦးခေါင်းတခြမ်းမှာပဲ ကိုက်ခဲနေတတ်ပါတယ်။

ဆေးပညာမှာတော့ "Migraine" လို့ ခေါ်ပါတယ် ပျို့အန်ခြင်း၊ အမြင်ဝေဝါးခြင်းတို့လည်း တပြိုင်နက် ခံစားရ တတ်ပါတယ်။ အမျိုးသမီးတွေမှာပိုပြီး အဖြစ်များပါတယ်။ အသံဆူညံတာတို့ စူးရှတဲ့အလင်းရောင်တို့ကို လုံးဝ မခံနိုင်ပါဘူး။ ဒီလို ခေါင်းကိုက်တဲ့ဝေဒနာ ခံစားနေရရင်တော့ အမှောင်ခန်းထဲမှာပဲ တိတ်တဆိတ် အနားယူချင် ကြပါတယ်။

ဘာလုပ်သင့်လဲ

ခေါင်းကိုက်တာ မပြင်းထန်ရင်တော့ အကိုက်အခဲ ပျောက်ဆေးတွေဖြစ်တဲ့ ဥပမာ ပါရာစီတမောနဲ့ ဒိုင်ကလိုတို့ကို သောက်သုံးနိုင်ပါတယ် မသက်သာရင် (သို့) ၁ လမှာ လေးကြိမ်လောက်အထိ မကြာခဏခေါင်းကိုက်နေမယ် ဆိုရင်တော့ ဆရာဝန်နဲ့တိုင်ပင်သင့်ပါတယ်။

(၃) မျက်စိတဝိုက် ခေါင်းကိုက်ခြင်း 

အများအားဖြင့် မျက်လုံးတဖက်ကို ဗဟိုပြုပြီး ပြင်းပြင်းထန်တန် ခေါင်းကိုက်တတ်ပါတယ်။ ဆေးပညာမှာတော့ “Cluster Headache” လို့ ခေါ်ပါတယ်။ 

နှာရည်ယိုခြင်း မျက်လုံးနီခြင်း မျက်ရည်ကျခြင်းတို့လည်း တပြိုင်နက် ခံစားရနိုင်ပါတယ်။ အမျိုးသားတွေမှာ ပိုပြီး အဖြစ်များပါတယ်။ အရက်သောက်ရင် ဆေးလိပ်သောက်ရင် ပိုဆိုးစေနိုင်ပါတယ်။

ဘာလုပ်သင့်လဲ

ဆေးရုံဆေးခန်းမှာ ကုသမှုခံယူသင့်ပါတယ်။ ဘာကြောင့်လဲဆိုရင်တော့ အောက်စီဂျင်ပိုက် ရှူလိုက်ရင် ခေါင်းကိုက်တဲ့ ဝေဒနာဟာ အလျင်အမြန် ပျောက်ကင်းနိုင်ပါတယ်။

(၄) ထိပ်ကပ်နာကြောင့် ခေါင်းကိုက်ခြင်း

နှာခေါင်းတဝိုက်နဲ့ နဖူးတဝိုက်မှာ ကိုက်ခဲတဲ့ဝေဒနာကို ခံစားကြရပါတယ်။ ဘာကြောင့်ဖြစ်တာလဲဆိုရင်တော့ အသက်ရှူလမ်းကြောင်း ပိုးဝင်ခြင်း လေထုညစ်ညမ်းခြင်း ဓါတ်မတည့်ခြင်း တို့ကြောင့် ဖြစ်တတ်ပါတယ်။

ခေါင်းကိုက်ဝေဒနာနှင့်အတူ နှာခေါင်းပိတ်ခြင်း၊ နှာရည်ယိုခြင်း၊ ဖျားနာခြင်းတို့လည်း တပြိုင်နက် ခံစားရတတ် ပါတယ်။

ဘာလုပ်သင့်လဲ

နှာခေါင်းဖြန်းဆေးများ နှာခေါင်းအစက်ချဆေးရည်များကို အသုံးပြုနိုင်ပါတယ်။ 

မသက်သာဘူး (သို့) ပိုဆိုးလာရင်တော့ နားလည်တတ်ကျွမ်းသူများနဲ့ တိုင်ပင်သင့်ပါတယ်။

(၅) ရုတ်တရက်ပြင်းထန် ခေါင်းကိုက်ခြင်း 

ချက်ချင်းဆိုသလို ဖြစ်ပေါ်လာတဲ့ ခေါင်းကိုက်ဝေဒနာဖြစ်ပြီး အဆိုးဝါးဆုံးနဲ့ အစိုးရိမ်ရဆုံး ဖြစ်ပါတယ်။ 

အချိန် ၁ မိနစ်လောက်အတွင်းမှာပဲ မိမိဘဝမှာ အပြင်းထန်ဆုံးလို့ ဆိုနိုင်လောက်တဲ့ ခေါင်းကိုက်ဝေဒနာကို ခံစားကြရပါတယ်။ 

ဆေးပညာမှာတော့ “Thunderclap” လို့ ခေါ်ပါတယ် မြန်မာလို ဘာသာပြန်ရင်တော့ လျှပ်စီးလက်သလို မိုးကြိုးပစ်လိုက်သလို ခေါင်းကိုက်ခြင်းလို့ အဓိပ္ပာယ်ပြန်ဆိုနိုင်ပါတယ်။

လေဖြတ်ခြင်း၊ ဦးနှောက်ထဲမှာ သွေးယိုစီးခြင်း၊ ဦးနှောက်သွေးကြောပေါက်ခြင်းတို့ကြောင့် ဖြစ်နိုင်ပါတယ်။

ဘာလုပ်သင့်လဲ

ဆေးရုံဆေးခန်းကို အမြန်ဆုံးသွားသင့်ပါတယ် နောက်ကျရင်တော့ အသက်အန္တရာယ်ရှိနိုင်ပါတယ်။ 

https://www.facebook.com/photo/?fbid=737138621144335&set=a.192764588915077

မာလကာသီးက စားလို့ကောင်းတာတင်မဟုတ်ဘူး။ အသားအရေကိုလည်းလှပစေပါတယ်တဲ့။ ဒီတစ်ခေါက်တော့ မာလကာသီးကပေးတဲ့ အသားအရေလှပခြင်း အကြောင်းလေးကို ပြောပြပေးချင်ပါတယ်။ မာလကာသီးက ပေးတဲ့ အသားအရေလှပခြင်းက ဘာလဲဆိုတာကို ဆောင်းပါးလေးထဲမှာ ကိုယ်တိုင် လေ့လာလိုက်တော့နော်။

မာလကာသီးမှာ ဘယ်လိုအာဟာရဓာတ်တွေ ပါဝင်နေလဲ!

ကျန်းမာရေးကိုကောင်းစေတဲ့ မာလကာသီးကို ဖျော်ထားတဲ့ မာလကာသီး ဖျော်ရည်လေးထဲမှာ

• ကစီဓာတ်

• သကြားဓာတ်

• အမျှင်ဓာတ်

• ဆိုဒီယမ်

• ပိုတက်ဆီယမ်

• ဗီတာမင် B

• ဗီတာမင် C တို့ ပါဝင်နေပါတယ်။

မာလကာသီးကပေးတဲ့ အသားအရေလှပခြင်း

မာလကာသီးက အသားအရေကို လှပစေသလားဆိုတော့ လှပစေပါတယ်။ ဘယ်လို လှပစေလဲ ဆိုတာကိုတော့

အသားအရောင် ညီစေတယ်

အရေပြားပေါ်က အမည်းစက်တွေနဲ့ အစက်အပြောက်တွေကို သက်သာချင်တယ်ဆိုရင်တော့ မာလကာသီးကို စားပေးလို့ရပါတယ်။ မာလကာသီးက အသားအရေကို ကြည်လင်လန်းဆန်းစေပြီး အသားအရောင်ကို ညီစေ သလို အသားအရေကို ကြည်လင်လှပစေမှာပါ။ မာလကာသီးကို စားပေးလို့ ရသလို မာလကာသီးကို အရေပြား ပေါ်မှာ တိုက်ရိုက်သုံးပေးတာကလည်း ဆဲလ်သေတွေကို ဖယ်ရှားပေးနိုင်မှာပါ။ ဆဲလ်သေတွေကို ထိထိ ရောက်ရောက် ဖယ်ရှားပေးပြီး အညစ်အကြေးကင်းပြီး ကြည်လင်စေဖို့ ထောက်ကူပေးနိုင်မှာပါ။

နေလောင်ဒဏ် ကာကွယ်ပေးတယ်

မာလကာသီးမှာ ဓာတ်တိုးဆန့်ကျင်ပစ္စည်းတွေ ကြွယ်ဝစွာပါဝင်နေတာကြောင့် အသားအရေကို နေလောင်ဒဏ် ကနေ ထိထိရောက်ရောက် ကာကွယ်ပေးပါတယ်။ မာလကာသီးမှာ Lycopene ပါဝင်နေတာကြောင့် ခရမ်းလွန် ရောင်ခြည်ကြောင့် အသားအရေပျက်စီးတာမျိုးမဖြစ်ဖို့ရော ညစ်ညမ်းမှုတွေကြောင့် အသားအရေ ထိခိုက်တာမျိုး မရှိစေဖို့ပါ ထောက်ကူပေးပါတယ်။

အရွယ်တင်စေနိုင်တယ်

မာလကာသီးမှာ ဓာတ်တိုးဆန့်ကျင်ပစ္စည်းတွေနဲ့အတူ ဗီတာမင် A၊ ဗီတာမင် B၊ ဗီတာမင် C နဲ့ ပိုတက် ဆီယမ်တို့ ပါဝင်နေတာကြောင့် ကိုယ်တွင်းက အဆိပ်အတောက်တွေကို ဖယ်ရှားပေးပြီး အရွယ်တင် နုပျိုစေဖို့ ထောက်ကူ ပေးပါတယ်။

သဘာဝရဲ့ Toner တစ်ခုပါ

မာလကာသီးအစိမ်းက မျက်နှာသစ်ပြီးချိန်မှာ အရေပြားပေါ်က ချွေးပေါက်တွေထဲက အညစ်အကြေးတွေကို ဖယ်ရှားပေးသလို အသားအရေကို လန်းဆန်းစေပြီး အရေးအကြောင်းတွေ ကင်းစေဖို့လည်း ထောက်ကူပေး ပါတယ်။ ဗီတာမင်နဲ့ သတ္တုဓာတ်တွေ ကြွယ်ဝစွာ ပါဝင်နေတာကလည်း အသားအရေကို တင်းရင်းစေဖို့ ထောက်ကူ ပေးနိုင်မှာပါ။

ဝက်ခြံနဲ့ အမည်းစက်တွေကို သက်သာစေနိုင်တယ်

မာလကာသီးတင်မဟုတ်ပါဘူး။ မာလကာရွက်မှာလည်း ဝက်ခြံကို သက်သာစေနိုင်တဲ့ အာနိသင် ရှိပါတယ်။ အမည်းစက်တွေကိုလည်း သက်သာစေနိုင်ပါတယ်။ မာလကာသီးကို ပုံမှန်စားပေးလို့ရသလို။ မာလကာသီးကို အနှစ်တိုက်ပြီးလိမ်းတာ၊ မာလကာရွက်ကို အနှစ်ကြိတ်ပြီးလိမ်းတာကလည်း ဝက်ခြံနဲ့ အမဲစက်တွေကို သက်သာ စေဖို့ ထိထိရောက်ရောက် ထောက်ကူပေးနိုင်မှာပါ။

အသားအရေကို ရေဓာတ်ဖြည့်ပေးတယ်

တစ်နေ့တာကို ရေ ၈ ခွက်ပြည့်အောင် သောက်ဖို့ပျင်းတယ်။ အရေပြားကိုလည်း ရေဓာတ်ပြည့်ဝစေချင်တယ် ဆိုရင် ရေဓာတ် ၈၁% ပါဝင်နေတဲ့ မာလကာသီးကို စားပေးလို့ရပါတယ်။ အရေပြားဆဲလ်တွေကို ရေဓာတ် ပြည့်ဝစေပြီး အရေပြားဆဲလ်တွေအတွက် လိုအပ်တဲ့အာဟာရတွေကို ဖြည့်ပေးပါတယ်။

ဆားဝက်ခြံကို သက်သာစေတယ်

ဆားဝက်ခြံ သက်သာဖို့ မာလကာသီးကို အရေပြားမှာ တိုက်ရိုက်လိမ်းပေးလို့ရသလို မာလကာရွက်ကို အနှစ် တိုက်ပြီး ဆားဝက်ခြံဖြစ်တဲ့နေရာမှာလည်း လိမ်းပေးလို့ရပါတယ်။ အရေပြားယားယံတာကို သက်သာစေသလို ဓာတ်မတည့်တာကြောင့် အသားအရေနီမြန်းတာ၊ ရောင်ရမ်းတာတွေကိုလည်း သက်သာစေနိုင်ပါတယ်။

အဆီပြန်တာကို သက်သာစေတယ် 

အဆီပြန်တာက ဝက်ခြံကိုဖြစ်စေသလို ဆားဝက်ခြံတွေကိုလည်း ဖြစ်စေနိုင်ပါတယ်။ မာလကာရွက်တွေကို အနှစ်ဖြစ်အောင် ကြိတ်ခြေပြီးသံပုရာရည်လေး နည်းနည်းထည့်လို့ မျက်နှာပေါ်မှာ လိမ်းပေးလို့ ရပါတယ်။ ခြောက်သွားရင် ရေအေးအေးလေးနဲ့ ဆေးချလိုက်ပါ။ တစ်ပတ်ကို တစ်ကြိမ်လောက် လုပ်ပေးမယ်ဆိုရင်တော့ အဆီပြန်တာကို သိသိသာသာ သက်သာစေမှာပါ။

အရေပြား အနာအဆာကင်းစေတယ်

မာလကာသီးမှာ ဗီတာမင် C နဲ့ ဗီတာမင် K တွေ ပါဝင်နေတာကြောင့် သွေးစီးဆင်းမှု ကောင်းစေပြီး အရေပြား ပေါ်က အနက်ရောင် အစက်အပြောက်တွေ၊ အရေပြားပြဿနာတွေကို သက်သာစေဖို့ ထောက်ကူပေးနိုင် ပါတယ်။

မာလကာသီး စားပေးတာဖြစ်ဖြစ် မာလကာရွက်ကို အရေပြားမှာ တိုက်ရိုက်အသုံးပြုပေးတာဖြစ်ဖြစ် လုပ်ပေး တာက အသားအရေကို ကျန်းမာစေပြီး လှပစေဖို့ပါ ထောက်ကူပေးနိုင်မှာပါ။

ကိုးကား- https://hellosayarwon.com/

မြန်မာနိုင်ငံသည် စိုက်ပျိုး မွေးမြူရေးကိုအခြေခံသည့် နိုင်ငံဖြစ်သည်နှင့်အညီ  နိုင်ငံအတွင်းရှိ နိုင်ငံသားတိုင်း စားရေရိက္ခာဖူလုံစွာရရှိရေးသည် လွန်စွာအရေးပါလှသည်။ ထိုသို့ စားရေရိက္ခာဖူလုံစေရန်အတွက်စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန မွေးမြူရေးနှင့်ကုသရေးဦးစီးဌာနသည် နိုင်ငံတော်၏ စီးပွားရေးဦးတည်ချက်(၃)ရပ်အနက် “စိုက်ပျိုးရေး၊ မွေးမြူရေးကိုအခြေခံသည့်  ကုန်ထုတ်လုပ်မှုကို ခေတ်မီနည်းစနစ်များဖြင့် ပိုမိုတိုးတက်အောင်ဆောင်ရွက်ပြီး အခြေခံစီးပွားရေးကဏ္ဍများကိုလည်း ဘက်စုံဖွံ့ဖြိုးတိုးတက်အောင်ဆောင်ရွက်ရေး” ဆိုသည့် ဦးတည်ချက်များနှင့်အညီ မွေးမြူရေးကဏ္ဍဖွံ့ဖြိုးတိုးတက်ရန်အတွက် ကြိုးပမ်းဆောင်ရွက်လျက်ရှိသည်။   မွေးမြူရေးကဏ္ဍဖွံ့ဖြိုးတိုးတက်အောင် ကြိုးပမ်းဆောင်ရွက်ရာတွင် မွေးမြူရေး အသိပညာရှင်၊ အတတ်ပညာရှင်များ၊ မွေးမြူရေးကျွမ်းကျင်လုပ်သားများလည်း မွေးထုတ်နိုင်ရန် များစွာလိုအပ်လျက်ရှိသည်။

ပြည်တွင်းစားသုံးမှုလုံလောက်စေရန်သာမက ပိုလျှံစေရန်အတွက်မွေးမြူရေးထုတ်ကုန်များကိုထုတ်လုပ်ရာတွင်  စံချိန်စံညွှန်းပြည့်မီစွာထုတ်လုပ်နိုင်ပါမှ   ပြည်ပနိုင်ငံများဆီသို့ ဈေးကွက်ဝင် မွေးမြူရေးထုတ်ကုန်ပစ္စည်းများ တင်ပို့ရောင်းချနိုင်မည်ဖြစ်သည်။ ထိုသို့ အရည်အသွေးပြည့်ဝသော မွေးမြူရေးထုတ်ကုန်ပစ္စည်းများထုတ်လုပ်တင်ပို့နိုင်စေရန်   အခြေခံအကျဆုံးအချက်မှာ နိုင်ငံအတွင်းရှိ မွေးမြူရေးလုပ်ငန်းလုပ်ကိုင်နေသော မွေးမြူရေးသမားများဆီသို့ တိုးတက်ပြောင်းလဲလာသောခေတ်စနစ်နှင့်အညီ မွေးမြူရေးနည်းစနစ်ကောင်းများကို မွေးမြူရေးအသိပညာရှင်၊ အတတ်ပညာရှင်များမှတစ်ဆင့် ဖြန့်ဝေပညာပေးခြင်း၊  လက်တွေ့လမ်းညွှန်ပြသခြင်း၊    ဆင့်ပွားသင်တန်းများပို့ချပေးခြင်း စသည့်နည်းလမ်းများစွာကိုအသုံးပြုပြီး ဆောင်ရွက်ပေးခြင်းအားဖြင့် နိုင်ငံအတွင်းလိုအပ်လျက်ရှိသော မွေးမြူရေးကျွမ်းကျင်လုပ်သားများ များစွာပေါ်ထွန်းလာမည် ဖြစ်သည်။      

ထိုသို့ နိုင်ငံ၏အသားကဏ္ဍဖွံ့ဖြိုးတိုးတက်စေရန် လိုအပ်လျက်ရှိသောမွေးမြူရေးအသိပညာရှင်၊ အတတ်ပညာရှင်၊  မွေးမြူရေးကျွမ်းကျင်လုပ်သားများပေါ်ထွက်လာနိုင်စေရေးရည်ရွယ်ကာ  နိုင်ငံတော်အကြီးအကဲ၏လမ်းညွှန်ချက်အရ  စိုက်ပျိုး မွေးမြူရေးပညာရပ်ဆိုင်ရာ သင်တန်းကျောင်းများ၊ တက္ကသိုလ်များ ဖွင့်လှစ်သင်ကြားပို့ချပေးလျက်ရှိသည်။ ယခုလက်ရှိဖွင့်လှစ်ထားသော တက္ကသိုလ်များမှာ မြန်မာတစ်နိုင်ငံလုံးတွင် တစ်ကျောင်းတည်းသာရှိသော ရေဆင်း နေပြည်တော်ရှိ “မွေးမြူရေးဆိုင်ရာဆေးတက္ကသိုလ်”၊ ရန်ကုန်တိုင်းဒေသကြီး အင်းစိန်မြို့နယ်ရှိ “တိရစ္ဆာန်ဆေးကု သိပ္ပံသင်တန်းကျောင်း” နှင့် တိုင်းဒေသကြီး/ ပြည်နယ်အသီးသီးရှိ “အခြေခံပညာနှင့် စက်မှု စိုက်ပျိုး မွေးမြူရေးအထက်တန်းကျောင်း” တို့ ဖြစ်သည်။

ရန်ကုန်တိုင်းဒေသကြီး    အင်းစိန်မြို့နယ်ရှိ “တိရစ္ဆာန်ဆေးကုသိပ္ပံသင်တန်းကျောင်း”ကို  တိရစ္ဆာန်မွေးမြူထုတ်လုပ်မှု ဖွံ့ဖြိုးတိုးတက်စေရေးအတွက် တိရစ္ဆာန်ရောဂါကာကွယ်ထိန်းချုပ်ရေးနှင့်  ကျန်းမာရေး စောင့်ရှောက်မှုဆိုင်ရာ   အလယ်အလတ်ကျွမ်းကျင်ပညာရှင်များ မွေးထုတ်ပေးနိုင်ရန်ရည်ရွယ်ကာ သိပ္ပံဘွဲ့ရများကိုခေါ်ယူပြီး ၂၀၂၄ ခုနှစ်မေလ  ၂ ရက်တွင်  သင်တန်းအမှတ်စဉ် (၁)ကို စတင်ဖွင့်လှစ်ခဲ့သည်။    သင်တန်းကာလတစ်နှစ်အတွင်း မွေးမြူရေးဆိုင်ရာဘာသာရပ် (၁၅) ဘာသာအား စာတွေ့လက်တွေ့   သင်ကြားပို့ချပေးမည်ဖြစ်သည်။ “တိရစ္ဆာန်ဆေးကုသိပ္ပံသင်တန်းကျောင်း”တွင် တစ်နှစ်သင်တန်းတက်ရောက်ခြင်းအားဖြင့် မွေးမြူရေးပညာရပ်များကို  ဆည်းပူးခွင့်ရကာ ဒေသအတွင်းတိရစ္ဆာန်ကူးစက်ရောဂါများကို ကုသပေးခွင့်ရမည့်အပြင် မွေးမြူရေးအတတ်ပညာရပ်များကို ဖြန့်ဝေပေးနိုင်သူ၊   မွေးမြူရေးလုပ်ငန်းများကို လွယ်လင့်တကူ လက်တွေ့ လုပ်ကိုင်ဆောင်ရွက်နိုင်သူ၊နိုင်ငံ၏အသားကဏ္ဍဖွံ့ဖြိုးတိုးတက်ဖို့ဆောင်ရွက်ရာတွင်    တစ်ဖက်တစ်လမ်းမှ ကူညီပေးနိုင်သူလည်း ဖြစ်လာမည်ဖြစ်သည်။ ထို့ပြင် သင်တန်းပြီးမြောက်ပါက တိရစ္ဆာန်ဆေးကု ဒီပလိုမာ(Dip.V.Sc)ရရှိမည်ဖြစ်ပြီး မွေးမြူရေးနှင့်ကုသရေးဦးစီးဌာနတွင် ဒုတိယလက်ထောက်ဦးစီးမှူး ရာထူးဖြင့် စတင်တာဝန်ထမ်းဆောင်ခွင့်လည်း ရရှိမည်ဖြစ်သည်။

ထို့ပြင်  မွေးမြူရေးပညာရပ်များ တစ်နိုင်ငံလုံးသို့ပြန့်ပွားနိုင်ရန်၊အဆင့်မြင့်ပညာ  ဆက်လက်မသင်ကြားနိုင်သော   ကျောင်းသား၊ကျောင်းသူများအတွက် အသက်မွေးဝမ်းကျောင်းပညာရပ်များရရှိရန်နှင့် မွေးမြူရေးကျွမ်းကျင်လုပ်သားများ ပေါ်ထွန်းလာစေရန်ရည်မှန်းကာ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ မွေးမြူရေးနှင့်ကုသရေးဦးစီးဌာနသည် ၂၀၂၃-၂၀၂၄ ပညာသင်နှစ်တွင် တိုင်းဒေသကြီး/ပြည်နယ်အသီးသီးရှိ ခရိုင် ၅၀၊ မြို့နယ် ၅၁ မြို့နယ်တွင် စိုက်ပျိုး မွေးမြူရေးအထက်တန်းကျောင်း ၅၁ ကျောင်းကို စတင်ဖွင့်လှစ်သင်ကြားခဲ့သည်။ ထို့ပြင် ၂၀၂၄-၂၀၂၅ ပညာသင်နှစ်တွင် အခြေခံပညာနှင့် စက်မှု၊ စိုက်ပျိုး၊ မွေးမြူရေးအထက်တန်းကျောင်း ၃၄ ကျောင်းကို တိုးချဲ့ဖွင့်လှစ်ကာ စုစုပေါင်း  ၈၅ ကျောင်း တိုးချဲ့ဖွင့်လှစ်နိုင်ခဲ့ပြီးဖြစ်သည်။

အခြေခံပညာနှင့် စက်မှု၊ စိုက်ပျိုး၊ မွေးမြူရေးအထက်တန်းကျောင်းတွင် တက်ရောက်လိုသူ/ လျှောက်ထားသူသည် အောက်ပါ သတ်မှတ်အရည်အချင်းများနှင့်ပြည့်မီသူဖြစ်ရမည်။

     စိုက်ပျိုးရေးနှင့်မွေးမြူရေးပညာရပ်များ၏လက်တွေ့  လုပ်ငန်းများအား ဆောင်ရွက်နိုင်ရန်အတွက် ကျန်းမာရေး  ကောင်းမွန်သူဖြစ်ရပါမည်။

     အခြေခံပညာအလယ်တန်းအဆင့် Grade -9 အောင်မြင်သူ ဖြစ်ရပါမည်။

အခြေခံပညာနှင့် စက်မှု၊ စိုက်ပျိုး၊ မွေးမြူရေးအထက်တန်းကျောင်း တွင် လေ့ကျင့်သင်ကြားပို့ချပေးလျက်ရှိသော မွေးမြူရေးအထူးပြု ဘာသာရပ်များမှာ -

ပထမနှစ်သင်တန်းတွင် -

(က)  ကြက်မွေးမြူထုတ်လုပ်ရေးဘာသာ

(ခ) စားမြုံ့ပြန်သတ္တဝါမွေးမြူထုတ်လုပ်ရေးဘာသာ

(ဂ) ရေသတ္တဝါနှင့်ပျားမွေးမြူထုတ်လုပ်ရေးဘာသာ

(ဃ) သီးနှံစိုက်ပျိုးထုတ်လုပ်ရေးနှင့်ကာကွယ်ရေးဘာသာ

(င) မြန်မာစာ

(စ) အင်္ဂလိပ်စာ

(ဆ) သင်္ချာ

(ဇ)  ပေါင်းစပ်ဘာသာရပ်(ဓာတု+ရူပ)

(ဈ) ဇီဝဗေဒ

ဒုတိယနှစ်သင်တန်းတွင် -

(က) ကြက်မွေးမြူထုတ်လုပ်ရေးဘာသာ

(ခ) စားမြုံ့ပြန်သတ္တဝါမွေးမြူထုတ်လုပ်ရေးဘာသာ

(ဂ)  ဝက်မွေးမြူထုတ်လုပ်ရေးဘာသာ

(ဃ) သီးနှံစိုက်ပျိုးထုတ်လုပ်ရေးနှင့်ကာကွယ်ရေးဘာသာ

(င) မြန်မာစာ

(စ) အင်္ဂလိပ်စာ

(ဆ) သင်္ချာ

(ဇ)  ပေါင်းစပ်ဘာသာရပ်(ဓာတု+ရူပ)

(ဈ) ဇီဝဗေဒ

(ည) သတင်းအချက်အလက်နှင့်နည်းပညာ

တတိယနှစ်သင်တန်းတွင် -

(က)ကြက်မွေးမြူထုတ်လုပ်ရေးဘာသာ

(ခ) စားမြုံ့ပြန်သတ္တဝါမွေးမြူထုတ်လုပ်ရေးဘာသာ

(ဂ) ဝက်မွေးမြူထုတ်လုပ်ရေးဘာသာ

(ဃ) ရေသတ္တဝါနှင့်ပျားမွေးမြူထုတ်လုပ်ရေးဘာသာ

(င) မြန်မာစာ

(စ) သတင်းအချက်အလက်နှင့်နည်းပညာတို့ဖြစ်သည်။

အခြေခံပညာနှင့်  စက်မှု၊ စိုက်ပျိုး၊ မွေးမြူရေးအထက်တန်းကျောင်းတွင် တက်ရောက်သူသည်   အခြေခံပညာကျောင်းများမှ Grade -9  အောင်မြင်ခဲ့ပြီး အခြေခံပညာနှင့် စက်မှု၊ စိုက်ပျိုး၊ မွေးမြူရေးအထက်တန်းကျောင်းတွင် Grade-10 မှစပြီး သုံးနှစ်သင်တန်းတက်ရောက်ကာ သတ်မှတ်နှစ်အလိုက် အခြေခံပညာအထက်တန်းအဆင့်ဘာသာရပ်များအပြင် မွေးမြူရေးအတတ်ပညာဆိုင်ရာဘာသာရပ်များကိုစာတွေ့လက်တွေ့ လေ့ကျင့်သင်ကြားပို့ချပေးသွားမည်ဖြစ်သည်။ စက်မှုနည်းပညာ၊ စိုက်ပျိုးရေးနှင့်မွေးမြူရေး အသက်မွေးဝမ်းကျောင်းအတတ်ပညာများကို   သင်ယူတတ်မြောက်နိုင်ပြီး ထူးချွန်စွာအောင်မြင်ပါက ပညာဆက်လက်သင်ယူနိုင်ခွင့်နှင့် အလုပ်အကိုင်အခွင့်အလမ်းများလည်း ရရှိမည်ဖြစ်သည်။ သင်တန်းသားများအား သုံးနှစ်တက်ရောက်သင်ကြားမှုအပေါ် အကဲဖြတ်စစ်ဆေး၍ အထူးအောင်၊ အဆင့်မီအောင်နှင့် ရိုးရိုးအောင်ဟူ၍ သတ်မှတ်ထားရှိသည်။

အခြေခံပညာနှင့်   စက်မှု၊ စိုက်ပျိုး၊ မွေးမြူရေးအထက်တန်းကျောင်း၌ မွေးမြူရေးအထူးပြုကျောင်းသားသည် အထူး (Credit)အောင်ဖြင့် အောင်မြင်ပါက မွေးမြူရေးဆိုင်ရာဆေးတက္ကသိုလ် (ရေဆင်း) နေပြည်တော်တွင် ဖွင့်လှစ်ထားသည့် တိရစ္ဆာန်ဆေးပညာဘွဲ့ (Doctor of Veterinary Medicine)ခြောက်နှစ်သင်တန်းနှင့် မွေးမြူရေးပညာဘွဲ့(Bachelor of Animal Science) လေးနှစ်သင်တန်းများကို တက်ရောက်နိုင်မည်ဖြစ်သည်။

အဆင့်မီ(Qualified)အောင်ဖြင့် အောင်မြင်သူသည်  စိုက်ပျိုးရေးသိပ္ပံကျောင်းများတွင် သင်ကြားလျက်ရှိသည့် မွေးမြူရေးဒီပလိုမာ(Diploma in Animal Husbandry) သုံးနှစ်သင်တန်းနှင့် ငါးလုပ်ငန်းသိပ္ပံ၏ငါးလုပ်ငန်းဒီပလိုမာ (Diploma in Fisheries and Aquaculture)သုံးနှစ်သင် တန်းသို့ တက်ရောက်နိုင်မည်ဖြစ်သည်။ မွေးမြူရေးဒီပလိုမာ(Diploma in Animal Science) သင်တန်းတွင် ထူးချွန်စွာအောင်မြင်သူများသည်မွေးမြူရေးဆိုင်ရာဆေးတက္ကသိုလ်လေးနှစ်သင်တန်း မွေးမြူရေးပညာဘွဲ့(Bachelor of Animal Science)၏ တတိယနှစ်(ပထမနှစ်ဝက်)သင်တန်းမှ စတင်တက်ရောက်နိုင်မည်ဖြစ်သည်။ ငါးလုပ်ငန်းဒီပလိုမာ(Diploma in Fisheries and Aquaculture)သင်တန်းတွင် ထူးချွန်စွာအောင်မြင်သူများသည် ရန်ကုန်တက္ကသိုလ် ငါးလုပ်ငန်းဆိုင်ရာဘာသာရပ် တတိယနှစ် (ပထမနှစ်ဝက်) သင်တန်းမှ စတင်တက်ရောက်နိုင်မည်ဖြစ်သည်။

ရိုးရိုးအောင်မြင်ပါက  မွေးမြူရေးအတတ်ပညာအောင်လက်မှတ်ရရှိမည်ဖြစ်ပြီး  မွေးမြူရေးနှင့်သက်ဆိုင်သောအခန်းကဏ္ဍတွင် လုပ်ကိုင်နိုင်ရန် အခွင့်အလမ်းကောင်းများရရှိမည်ဖြစ်သည်။ ထို့ပြင် “အခြေခံပညာနှင့် စက်မှု၊   စိုက်ပျိုး၊ မွေးမြူရေးအထက်တန်းကျောင်း” သို့ တက်ရောက်သူတိုင်း အထူးအခွင့်အရေးအနေဖြင့် ကျောင်းတက်နေစဉ်အတွင်း လစဉ်လတိုင်း ပညာသင်ထောက်ပံ့ကြေးများကိုလည်း နိုင်ငံတော်မှ ပေးအပ်ချီးမြှင့်သွားမည်ဖြစ်သည်။

အချုပ်အားဖြင့်ဆိုသော် နိုင်ငံတော်၏မွေးမြူရေးကဏ္ဍဖွံ့ဖြိုးတိုးတက်လာရန် ကြိုးပမ်းဆောင်ရွက်ရာတွင်  နိုင်ငံအတွင်း မွေးမြူရေးကိုစိတ်ပါဝင်စားစွာ ခေတ်မီနည်းလမ်းများဖြင့် နည်းလမ်းမှန်ကန်နည်းစနစ်ကျကျဖြင့် မွေးမြူလုပ်ကိုင်သူများ များပြားလာမှသာလျှင် နိုင်ငံအတွင်း အသားထုတ်လုပ်မှုများပြားလာကာ    အသားစားသုံးမှုဖူလုံလာရုံသာမကပိုလျှံသည်များကို ပြည်ပနိုင်ငံများသို့ တန်ဖိုးမြှင့်မွေးမြူရေးထုတ်ကုန်များအဖြစ် ပိုမိုထုတ်လုပ်လာနိုင်မည်ဖြစ်သည်။ ပြည်ပနိုင်ငံများသို့ တန်ဖိုးမြှင့်မွေးမြူရေးထုတ်ကုန်များ တင်ပို့ခြင်းအားဖြင့် နိုင်ငံ့စီးပွားလည်းမြင့်မားလာမည်ဖြစ်သည်။ မွေးမြူရေးကဏ္ဍဖွံ့ဖြိုးတိုးတက်လာခြင်းအားဖြင့် နိုင်ငံအတွင်းနေပြည်သူများ အလုပ်အကိုင်အခွင့်အလမ်းများတိုးတက်လာကာ ကျေးလက်နှင့်မြို့ပြကွာဟမှုများလည်း လျော့နည်းပပျောက်လာမည်ဖြစ်သည်။ ထို့ကြောင့် မွေးမြူရေးပညာရပ်များကိုပြန့်ပွားအောင် နည်းပြလမ်းပြပေးသူ စိုက်ပျိုးမွေးမြူရေးဆိုင်ရာ လူသားအရင်းအမြစ်များပေါ်ထွန်းလာစေရန်ရည်ရွယ်ကာ   နိုင်ငံတော်အကြီးအကဲ၏လမ်းညွှန်ချက်အရဖွင့်လှစ်ထားရှိသော“မွေးမြူရေးဆိုင်ရာဆေးတက္ကသိုလ်”၊ “တိရစ္ဆာန်ဆေးကုသိပ္ပံသင်တန်းကျောင်း” နှင့်“အခြေခံပညာနှင့် စက်မှု၊ စိုက်ပျိုး၊ မွေးမြူရေးအထက်တန်းကျောင်း” သို့ မြန်မာနိုင်ငံအတွင်းနေ အသားကဏ္ဍ ဖွံ့ဖြိုးတိုးတက်ရေးတွင် ပါဝင်အားဖြည့်လိုသူ နိုင်ငံချစ်စိတ်ရှိသည့်နိုင်ငံသားတိုင်း တက်ရောက်သင့်ပါကြောင်း တိုက်တွန်းနှိုးဆော်အပ်ပါသည်။      ။

Source: https://myawady.net.mm/

ခန္ဓာကိုယ်က အစိတ်အပိုင်းတွေ အားလုံးကျန်းမာနေမှ နေ့ရက်တိုင်းမှာ ကျန်းမာပျော်ရွှင်စွာ လှုပ်ရှားနိုင်မှာပါ။ အစိတ်အပိုင်းတိုင်းက သူ့အခန်းကဏ္ဍကို အကောင်းဆုံး ထမ်းဆောင်နေလို့သာ စိတ်သွားတိုင်းကိုယ်ပါနေရ တာပါ။ တကယ်လို့များ ခန္ဓာကိုယ် အစိတ်အပိုင်းတစ်ခုခုက အလုပ်တွေကို ကောင်းကောင်း မလုပ်နိုင်တော့တဲ့ အခါ နာမကျန်းဖြစ်မှုတွေက စလာတော့မှာပါ။ ဒီတစ်ခေါက်တော့ ခန္ဓာကိုယ်ရဲ့ အဆိပ်အတောက်တွေကို ဖယ်ရှား ပေးနေတဲ့ ကျောက်ကပ်လေးကျန်းမာနေစေဖို့ ဘာတွေကို ဂရုစိုက်ရမလဲဆိုတာကို ပြောပြပေးချင်ပါတယ်။

ကျောက်ကပ်

ကျောက်ကပ်ဆိုတာ ကျောဘက်နံရိုးတွေရဲ့ အောက်ဘက်နားမှာရှိတဲ့ လက်သီးဆုပ်အရွယ် ကိုယ်တွင်းအင်္ဂါ အစိတ်အပိုင်းပါ။ ကျောရိုးရဲ့ တစ်ဖက်တစ်ချက်ဆီမှာရှိကြပါတယ်။ ကျောက်ကပ်က ခန္ဓာကိုယ်ရဲ့ အလုပ် အများဆုံး အစိတ်အပိုင်းတစ်ခုဆိုလည်း မမှားပါဘူး။

ကျောက်ကပ်ရဲ့ အဓိကတာဝန်က ခန္ဓာကိုယ်တွင်းက အညစ်အကြေးတွေကို စစ်ထုတ်ပေးတာပါ။ သွေးတွင်းက အညစ်အကြေးတွေကိုလည်း သန့်စင်ပေးပါတယ်။ စစ်ထုတ်လိုက်တဲ့ အညစ်အကြေးတွေကို ဆီးအိမ်ထဲမှာ သိမ်းထားပြီး ဆီးအဖြစ်နဲ့ ခန္ဓာကိုယ်ပြင်ပကို စွန့်ထုတ်ပေးပါတယ်။

ဒါတွေအပြင် ကျောက်ကပ်က ကိုယ်တွင်း pH ပမာဏနဲ့ ပိုတက်ဆီယမ်ပမာဏကိုလည်း ထိန်းညှိပေးပါတယ်။ ဟော်မုန်းတွေကို ထုတ်လုပ်ပေးပြီး သွေးပေါင်ချိန်ကို ထိန်းညှိပေးသလို သွေးနီဥဆဲလ်တွေ ထုတ်လုပ်မှုကိုလည်း ထိန်းညှိပေးပါတယ်။ အရိုးတွေ သန်မာစေပြီး ကြွက်သားတွေ အကောင်းဆုံး လုပ်ဆောင်မှုတွေရရှိစေဖို့အတွက် ကယ်လ်ဆီယမ်ကို စုပ်ယူနိုင်စေဖို့ ဗီတာမင် D ဖြစ်ပေါ်အောင် လှုံ့ဆော်ပေးပါတယ်။ ဒီလောက် တာဝန်အများကြီးကို ယူထားမှတော့ ခန္ဓာကိုယ်တစ်ခုလုံးကျန်းမာဖို့အတွက် ကျောက်ကပ်ကျန်းမာဖို့က မရှိမဖြစ်လိုအပ်မယ်ဆိုတာ ထွေထွေထူးထူးပြောနေစရာမလိုအောင်ပါ။

ကျောက်ကပ်လေးကျန်းမာနေစေဖို့

ကျောက်ကပ်လေးကျန်းမာနေစေဖို့ဆိုရင် ဒီအချက်လေးတွေ သတိထားလုပ်ဆောင်ပေးသင့်ပါတယ်။

ကိုယ်လက်လေ့ကျင့်ခန်းလုပ်ပါ

နေ့စဉ် ပုံမှန်ကိုယ်လက်လေ့ကျင့်ခန်းလုပ်တာက ခန္ဓာကိုယ်ကို ကျစ်လျစ်စေရုံတင်မဟုတ်ဘဲ နာတာရှည် ကျောက်ကပ်ရောဂါကနေပါ ကာကွယ်ပြီးသားဖြစ်စေနိုင်ပါတယ်။ သွေးပေါင်ချိန်ကို လျော့ကျစေနိုင်လို့ နှလုံး ကျန်းမာစေနိုင်သလို နာတာရှည်ကျောက်ကပ်ရောဂါကနေပါ ကာကွယ်ပြီးသားဖြစ်စေမှာပါ။

ဒါကြောင့် နေ့စဉ် အပြေးလေ့ကျင့်တာ၊ လမ်းလျှောက်တာ၊ စက်ဘီးစီးတာ၊ ယောဂကစားတာ၊ ရေကူး တာတွေကို လုပ်ပေးသင့်ပါတယ်။ လေ့ကျင့်ခန်းပုံမှန်လုပ်တာက ကျောက်ကပ်လေးတွေကို ကျန်းမာစေနိုင်မှာပါ။

သွေးချိုထိန်းပါ

ဆီးချိုရောဂါရှိသူတွေနဲ့ ပုံမှန်ထက် သွေးတွင်းသကြားဓာတ်မြင့်နေသူတွေက ကျောက်ကပ်ထိခိုက်နိုင်ခြေ ပိုများနေ ကြပါတယ်။ သွေးတွင်းသကြားဓာတ်က ခန္ဓာကိုယ်ဆဲလ်တွေ လိုအပ်တဲ့ ပမာဏထက် ပိုများနေတဲ့အခါ ကျောက်ကပ်က သွေးကြောတွေကို ထိခိုက်လာပါတယ်။ ဒီအခြေအနေက ရေရှည် ဖြစ်လာတဲ့အခါ ကျောက်ကပ် ကို ဆိုးဆိုးရွားရွားထိခိုက်စေနိုင်ပါတယ်။

သွေးပေါင်ချိန်ကို ထိန်းညှိပါ

ခဏခဏသွေးတိုးတာက ကျောက်ကပ်ကို ထိခိုက်စေနိုင်ပါတယ်။ ဒါကြောင့် သွေးမတိုးအောင် ဂရုစိုက်ပါ။ ဒါကရေရှည်မှာကျောက်ကပ်ကို ပျက်စီးနိုင်ခြေနည်းစေပါတယ်။

အဝမလွန်ပါစေနဲ့

အဝလွန်တာက ကျောက်ကပ်ကို ပျက်စီးစေနိုင်တဲ့ ကျန်းမာရေးအခြေအနေတွေထဲက တစ်ခုပါ။ အဝလွန်တာရဲ့ နောက်ဆက်တွဲတွေဖြစ်တဲ့ ဆီးချို၊ နှလုံးနဲ့ သွေးတိုးရောဂါတွေ ဖြစ်လာခဲ့ရင် ကျောက်ကပ်ကို အလွယ်တကူ ထိခိုက်စေနိုင်ပါတယ်။ ဒါကြောင့် နေ့စဉ်စားသောက်မှုပုံစံကို ဂရုစိုက်လို့ ပုံမှန်ကိုယ် အလေးချိန်ကို ထိန်းညှိပေးပါ။

ရေများများသောက်ပါ 

နေ့စဉ် ရေလုံလောက်အောင် သောက်တာက ကျောက်ကပ်ကျန်းမာရေးကို ဂရုစိုက်နေတာပါပဲ။ ဒါကြောင့် ရေသောက်မပျင်းပါနဲ့။ ရေကိုလုံလောက်တဲ့ ပမာဏဖြစ်အောင်သောက်သုံးပေးပါ။ ရေသောက်တာက ကျောက်ကပ် ထဲက အဆိပ်အတောက်တွေကို အထိရောက်ဆုံးဖယ်ရှားပစ်နိုင်ပါတယ်။ နာတာရှည် ကျောက်ကပ် ရောဂါခံစားရ နိုင်ခြေကိုလည်း နည်းစေနိုင်ပါတယ်။

ဆေးလိပ်ဖြတ်ပါ

ဆေးလိပ်သောက်တာက ခန္ဓာကိုယ်က သွေးကြောတွေကို ပျက်စီးစေနိုင်ပါတယ်။ သွေးကြောလေးတွေ ထိခိုက်မှုက ကျောက်ကပ်နဲ့ ခန္ဓာကိုယ်အစိတ်အပိုင်းတွေဆီကို သွေးစီးဆင်းရောက်ရှိမှု နည်းသွားစေနိုင် ပါတယ်။ ဆေးလိပ်သောက်တာက ကျောက်ကပ်ကင်ဆာဖြစ်နိုင်ခြေကို တိုးစေနိုင်တာကြောင့် ကျောက်ကပ် ကျန်းမာချင်တယ်ဆိုရင် ဆေးလိပ်ဖြတ်သင့်သလို တစ်ဆင့်ခံဆေးလိပ်ငွေ့ကိုလည်း ရှောင်သင့်ပါတယ်။

မလိုအပ်ဘဲ ဆေးတွေမသောက်ပါနဲ့ ဆေးတွေကိုမလိုအပ်ဘဲသောက်တာကလည်း ကျောက်ကပ် ထိခိုက်စေနိုင်တဲ့ အဓိကအကြောင်းအရင်းတွေထဲကတစ်ခုပါ။ ဒါကြောင့် အကိုက်အခဲပျောက်ဆေးတွေကို စိတ်ထင်တိုင်း သောက်တာ၊ အဖျားပျောက်ဆေးတွေကို မလိုအပ်ဘဲသောက်တာအပြင် အချို့သော ဆေးဖက်ဝင် အပင်တွေကနေ ထုတ်တယ်ဆိုတဲ့ ဆေးတွေကို ထင်တိုင်းမသောက်သင့်ပါဘူး။

ကျောက်ကပ်လေးကျန်းမာနေစေဖို့ ဘာတွေစားမလဲ………

အစားအသောက်တိုင်းက ကျောက်ကပ်ကို မကျန်းမာစေနိုင်ပါဘူး။ အချို့ အစားအစာတွေဆိုရင် ကျောက်ကပ်ကို တော်တော်လေးထိခိုက်စေနိုင်တာပါ။ ဒါကြောင့် ကျောက်ကပ်ကျန်းမာနေစေဖို့ဆိုရင်

ပန်းဂေါ်ဖီ

ဘလူးဘယ်ရီ

ငါး

ကြက်သွန်ဖြူ

ကြက်သွန်နီ

ဂေါ်ဖီထုတ်

ပန်းငရုတ်ပွ

ပန်းသီး စတာတွေကို စားသုံးပေးလို့ ရပါတယ်။ ပြုပြင်ထားတဲ့ အစားအစာတွေ၊ အငန်ကဲတဲ့ အစားအစာတွေကိုတော့ ရှောင်သင့်ပါတယ်။

ကိုးကား- https://hellosayarwon.com/

လူ့ခန္ဓာကိုယ်အနှံ့ကို သွေးကြောတွေနဲ့ ကွန်ရက်ဖြန့်ကြက်လွှမ်းခြုံထားတဲ့ သွေးလည်ပတ်မှုစနစ်က ကျန်းမာရေး အတွက် သိပ်ကိုအရေးကြီးပါတယ်။သွေးလည်ပတ်မှုမကောင်းခြင်းက အဝလွန်ခြင်း၊ သွေးတိုးရောဂါ၊ နှလုံးရောဂါ၊ ကိုလက်စထရောများခြင်း၊ ဆီးချိုသွေးချိုရောဂါတို့လို တခြားကျန်းမာရေး ပြဿနာတွေရဲ့ လက္ခဏာလည်း ဖြစ်နေ နိုင်ပါတယ်။

ဒါတွေမဖြစ်အောင် သွေးလည်ပတ်မှုကောင်းချင်တယ်ဆိုရင် အရင်ဆုံးလုပ်ရမယ့် (၃) ချက်ရှိတယ် –

(၁) ဆေးလိပ်မသောက်ပါနဲ့။

(၂) အဆီများတာတွေလျှော့စားပါ။

(၃) အချိန်အကြာကြီး ထိုင်မနေပါနဲ့။

နေ့စဉ်သွားလာနေထိုင်မှုပုံစံတွေထဲ ဒီအချက်တွေကို ဂရုစိုက်ပေးရင်သွေးလည်ပတ်မှုကောင်းပြီး ကျန်းမာတဲ့ ဘဝကို ပိုင်ဆိုင်နိုင်မှာပါ။

(၁) ကျန်းမာတဲ့ ကိုယ်အလေးချိန်ကို ထိန်းပါ

ကိုယ်အလေးချိန်သိပ်မများ၊ သိပ်မနည်းဘဲ ပုံမှန်ထိန်းထားနိုင်တယ်ဆိုရင် သွေးလည်ပတ်မှုပိုကောင်းစေနိုင်တယ်။ လူတစ်ယောက်က ကိုယ်အလေးချိန်များနေတယ်ဆိုရင်သွေးလည်ပတ်မှုစနစ်ကို ထိခိုက်စေနိုင်ပါတယ်။

(၂) လှုပ်ရှားပါ

ကိုယ်လက်လှုပ်ရှားမှုတော့ ပုံမှန်ရှိသင့်ပါတယ်။ အားကစားတွေ၊ workout တွေမလုပ်နိုင်ရင်တောင် ခပ်ဖွဖွ ပြေးတာ၊ သွေးပူလေ့ကျင့်ခန်းလုပ်တာလောက်တော့ လုပ်သင့်ပါတယ်။ ယောဂ ကစားတာကလည်း လှုပ်ရှားမှု မျိုးစုံ ပါဝင်တာမို့ ခပ်ပျော့ပျော့နဲ့ ထိရောက်တဲ့ နည်းလမ်းဖြစ်ပါတယ်။ သွေးပြန်ကြောတွေကို ဖိလိုက် လွှတ်လိုက် လုပ်ရင် လှုပ်ရှားမှုတွေဖြစ်စေတာမို့ သွေးလည်ပတ်မှုကိုလည်း ပိုကောင်းစေပါတယ်။ သုတေသနတွေ အရယော ဂကစားခြင်းက နှလုံးသွေးကြောစနစ်နဲ့ ဇီဝကမ္မဖြစ်စဉ်တို့အတွက် အကျိုးရှိတယ်လို့တွေ့ရှိထားပါတယ်။

(၃) အဆီများတဲ့ငါး စားပါ

အကျိုးပြုအဆီဓါတ် omega-3fatty acidsတွေများတဲ့ ငါးတွေကို စားရင် နှလုံးသွေးကြော ကျန်းမာရေးနဲ့ သွေး လည်ပတ်မှုကို ပိုကောင်းစေနိုင်တယ်လို့ လေ့လာတွေ့ရှိထားပါတယ်။ အဆီများတဲ့ငါးတွေက – ဆယ်လ်မွန်ငါး၊ မက်ခရယ်ငါး၊ ဆာဒင်း၊ တူနာ တို့ပါဝင်ပါတယ်။ သက်သတ်လွတ်စားတဲ့သူတွေအတွက်တော့ ကိုက်လန်၊ ပင်ပွားစေ့၊ အခွံမာသီးနဲ့အစေ့အဆန်တွေကို စားလို့ရပါတယ်။

(၄) နှိပ်နယ်ပါ

ခပ်ကြမ်းကြမ်းအနှိပ်ခံဖို့မဟုတ်ပါဘူးနော်။ Spa သွားပြီးတော့လည်း ငွေကုန်စရာမလိုပါဘူး။ ကိုယ့်ရဲ့ခြေထောက်၊ ခြေမျက်စိ၊ ခြေဖဝါးတို့ကို သံလွင်ဆီလေးနဲ့ အသာအယာနှိပ်နယ်ပေးလို့ရပါတယ်။ လက်ချောင်းထိပ်လေးနဲ့ ခပ်ဖွဖွ နှိပ်နယ်ပေးတာက သွေးကြောတွေကိုကျယ်စေပြီး ကြွက်သားတွေကို ပြေလျော့စေတယ်၊ ရောင်ရမ်းမှုတွေကို သက်သာစေတယ်။

(၅) သံဓါတ်ပမာဏကို ထိန်းပါ

သံဓါတ်ဟာသွေးလည်ပတ်မှုစနစ်အတွက် မရှိမဖြစ်အရေးပါတဲ့သတ္တုဓါတ်ဖြစ်ပါတယ်။ သူက သွေးနီဥဆဲလ်တွေမှာ အဓိကပါဝင်တဲ့ ဟေမိုဂလိုဘင်ထုတ်လုပ်ဖို့ကို သံဓါတ်လိုအပ်ပါတယ်။ သံဓါတ်ကြွယ်ဝတဲ့ အနီရောင်အသား၊ ဟင်းနုနွယ်၊ ပဲနဲ့ အသည်း စတာတွေကနေ ရရှိနိုင်ပါတယ်။

ဒါပေမယ့် အားဆေးတွေသောက်၊ သံဓါတ်ကြွယ်ဝတာတွေစားလွန်းရင် သံဓါတ်လွန်ကဲတတ်တာ သတိပြုပါ။ သံဓါတ်လွန်ကဲတဲ့အခါ နှလုံးသွေးကြောကျန်းမာရေးကို ထိခိုက်စေနိုင်ပါတယ်နော်။ ၂၀၁၃ ခုနှစ်က သုတေသနအရ ခန္ဓါကိုယ်ထဲ သံဓါတ်လွန်ကဲနေခြင်းက ကိုလက်စထရောများခြင်း၊ ခါးပတ်လည်အဆီများခြင်းတို့နဲ့ ဆက်နွှယ်နေတာ တွေ့ရပါတယ်။

ခန္ဓာကိုယ်တစ်ခုလုံးကျန်းမာစေဖို့အတွက် အဓိကကျတဲ့ သွေးလည်ပတ်မှုစနစ်ကို ကောင်းအောင် ဂရုစိုက်ပေးလိုက်ပါ။ နေရတာ ထူးခြားလာပါလိမ့်မယ်နော်။

ကိုးကား- Hello ဆရာဝန်

သင်သိပါသလား။ သင့်ခန္ဓာကိုယ်မှာသွေးကြောတွေရဲ့အရှည်က မိုင်ပေါင်း ၆၀,၀၀၀လောက်ရှိတယ်ဆိုတာ။ နှလုံးနဲ့ တခြားကြွက်သားတွေကြားမှာ ဒီသွေးကြောတွေနဲ့သွေးလည်ပတ်မှုစနစ်ဖြစ်ပေါ်နေတာပါ။ အဲဒီသွေးကြောကွန်ရက် ကြီးက ခန္ဓာကိုယ်ရဲ့ အစိတ်အပိုင်း အစွန်အဖျားတိုင်းအထိ သွေးပို့လွှတ်လည်ပတ်နေတာမို့ သွေးလည်ပတ်မှု မကောင်းရင် သွေးအရောက်နှေးတာ၊ ပိတ်ဆို့တာတွေဖြစ်လာနိုင်တယ်။ ဒီလိုဆို ခန္ဓာကိုယ်ထဲကဆဲလ်တွေမှာ လိုအပ်နေတဲ့ အောက်ဆီဂျင်နဲ့ အာဟာရဓါတ်တွေ အလုံအလောက်မရနိုင်တော့ပါဘူး။

သွေးလည်ပတ်မှုမကောင်းတဲ့အခါ အရမ်းနေထိုင်မကောင်းလောက်အောင် သိသာတဲ့လက္ခဏာမပြပါဘူး။ ဟို နည်းနည်း၊ ဒီနည်းနည်းနဲ့ဖြစ်နေတာ သိပ်ပြီးသတိမထားမိကြပါဘူး။ အရေးကြီးတာက လက္ခဏာ သိသာတာ ဖြစ်ဖြစ်၊ မသိသာတာဖြစ်ဖြစ် သွေးလည်ပတ်မှုမကောင်းတာ အန္တရာယ်ရှိနိုင်ပါတယ်။

ဒါ့ကြောင့် ဒီလက္ခဏာတွေဖြစ်လာခဲ့ရင် ဆရာဝန်ပြပြီး အကြံပြုချက်အတိုင်းလိုက်နာနေထိုင်ပါ။

သွေးလည်ပတ်မှုမကောင်းရင် ဘာလက္ခဏာတွေပြတတ်လဲ

ခြေဖျားလက်ဖျားတွေ ထုံကျဉ်တာ

သွေးလည်ပတ်မှုမကောင်းတဲ့အခါ အဖြစ်များဆုံးလက္ခဏာကတော့ လက်ဖျားခြေဖျားတွေမှာ ထုံတာ၊ ကျဉ်တာပဲ ဖြစ်ပါတယ်။ သွေးလည်ပတ်မှုကို တစုံတခုကြောင့် အဟန့်အတားဖြစ်စေတဲ့အခါ ခြေဖျားလက်ဖျားတွေဆီကို အလုံအလောက်သွေးမရောက်နိုင်တော့ပါဘူး။ အဲဒီမှာ ထုံကျဉ်မှုကိုခံစားရတော့တာပါပဲ။

ခြေဖျားလက်ဖျားအေးတာ

ခြေထောက်နဲ့လက်ကိုသွေးရောက်ရှိမှုနည်းနေတဲ့အခါ တခြားခန္ဓာကိုယ်အစိတ်အပိုင်းတွေထက် ပိုအေးနေတတ် ပါတယ်။ ရှိသင့်တဲ့နှုန်းနဲ့သွေးမရောက်ရှိနိုင်တာကြောင့် ခြေနဲ့လက်အဖျားက အရေပြားနဲ့အာရုံကြောအစွန်းတွေမှာ အပူချိန်အတက်အကျရှိစေနိုင်ပါတယ်။

ဖောရောင်တာ

သွေးလည်ပတ်မှုမကောင်းတဲ့အခါ ခန္ဓာကိုယ်ရဲ့အစိတ်အပိုင်းတချို့မှာ အရည်တွေစုလာစေနိုင်ပါတယ်။ အဲဒီအခါ ခြေထောက်အောက်ပိုင်း၊ ခြေကျင်းဝတ်တို့မှာ edema လို့ခေါ်တဲ့ဖောရောင်ခြင်းကို ခံစားရနိုင်ပါတယ်။

Edema က နှလုံးလုပ်ဆောင်ချက်ပျက်ယွင်းခြင်းရဲ့လက္ခဏာတစ်ခုလည်းဖြစ်နိုင်ပါတယ်။ နှလုံးက ခန္ဓာကိုယ်အနှံ့ကို သွေးအလုံအလောက် လည်ပတ်မပို့လွှတ်နိုင်တဲ့အခါ ဒီလိုဖြစ်လာနိုင်တာပါ။ ခန္ဓာကိုယ်အောက်ပိုင်းဧရိယာတွေမှာ သွေးတွေစုလာတဲ့အခါ ဖောရောင်ခြင်းတွေဖြစ်လာတာပါ။ ဖိအားတွေဖြစ်လာပြီးသွေးကြောထဲက အရည်တွေကို ဘေးတဝိုက်က တစ်ရှူးတွေဆီရောက်ရှိစေပါတယ်။

ဖောရောင်ခြင်းလက္ခဏာတွေက –

လေးလံပြီးရောင်ရမ်းတာ၊

အရေပြားတင်းပြီး ပူနေတာ၊

အဆစ်အမြစ်တောင့်တင်းတာ၊

နာကျင်တာ တို့ပါဝင်ပါတယ်။

တချို့မှာဆို အဝတ်အစားကျပ်နေတာ(ဝလာတာမဟုတ်ဘဲ)၊ လက်ဝတ်လက်စားတွေ ကျပ်နေတာမျိုး သတိထားမိ တတ်ပါတယ်။

ဦးနှောက်မှတ်ဉာဏ်ပြဿနာဖြစ်လာတာ

သွေးလည်ပတ်မှုမကောင်းရင် ဦးနှောက်ရဲ့လုပ်ဆောင်ချက်ကိုထိခိုက်စေနိုင်ပြီး မေ့လျော့လွယ်တာ၊ အာရုံစူးစိုက်ရ ခက်တာတွေဖြစ်လာနိုင်ပါတယ်။ ဒီလိုဖြစ်ရတာက –

ဦးနှောက်ကိုသွေးအရောက်နည်းတာ၊

ခန္ဓာကိုယ်အနှံ့ကို ပို့ထုတ်ပေးလိုက်တဲ့သွေးပမာဏမလုံလောက်တာ၊

သွေးဖိအားအပြောင်းအလဲဖြစ်တာတွေကြောင့်လည်း ပါဝင်ပါတယ်။

အစာခြေစနစ်ပြဿနာရှိလာတာ

အစာခြေဖျက်ခြင်းလုပ်ငန်းစဉ်ကသွေးလည်ပတ်မှုကို အားထားရတာမို့ သွေးလည်ပတ်မှုမကောင်းရင် ဝမ်းဗိုက်ရဲ့ သွေးကြောတွေရဲ့ အမြှေးပါးနံရံအတွင်း အဆီတွေစုလာနိုင်တယ်။ သွေးရောက်ရှိမှုနည်းခြင်းနဲ့ဆိုင်တဲ့ အစာခြေ ပြဿနာတွေက –

ဗိုက်အောင့်တာ၊

ဝမ်းပျက်ဝမ်းလျှောတာ၊

ဝမ်းမှာသွေးပါတာ၊ ဝမ်းချုပ်တာ တို့ပါဝင်ပါတယ်။

မောပန်းနုံးချိနေတာ

သွေးလည်ပတ်မှုမကောင်းရင် နှလုံးက ပိုညှစ်ရတယ်၊ ပိုအလုပ်လုပ်ရတဲ့အတွက် ဘာမှမလုပ်ဘဲတောင် ပိုပြီး မောပန်းအားကုန်ရပါတယ်။

အရိုးအဆစ်နဲ့ကြွက်သား နာကျင်ကိုက်ခဲတာ

ခြေထောက်နဲ့လက်မှာသွေးလည်ပတ်မှုမကောင်းရင် နာကျင်ကိုက်ခဲမှုတွေဖြစ်စေနိုင်တယ်။ ထိုင်တာ၊ မတ်တပ် ရပ်တာ ကြာသွားတယ်ဆို နာကျင်တောင့်တင်းမှုက ပိုဆိုးတတ်ပါတယ်။

အသားအရောင်ပြောင်းလဲတာ

ခန္ဓာကိုယ်တစ်ရှူးတွေဆီကို သွေးအလုံအလောက်မရောက်ရှိနိုင်တဲ့အခါ အသားအရေကဖြူဖျော့တာ ဒါမှမဟုတ် ပြာတာတာဖြစ်လာနိုင်တယ်။ ဆံချည်မျှင်သွေးကြောတွေကနေ သွေးတွေယိုလာတဲ့အခါ အဲဒီဧရိယာလေးတွေမှာ ပြာနှမ်းသလိုဖြစ်လာနိုင်တယ်။ အသားအရောင်ပြောင်းလဲနိုင်တဲ့ အပိုင်းတွေက –

နှာခေါင်း၊

နှုတ်ခမ်း၊

နားရွက်၊

ရင်သားထိပ်၊

လက်ဖျား၊

ခြေဖျား တို့ဖြစ်ပါတယ်။

ခြေထောက်အနာလေးတွေဖြစ်တာ

ခြေထောက်သွေးပြန်ကြောတွေထဲမှာသွေးတွေစုအိုင်လာတဲ့အခါ အရေပြားအောက်မှာရောင်ရမ်းတာနဲ့ အနာလေးတွေ ဖြစ်တာတွေ ခံစားရနိုင်ပါတယ်။

သွေးကြောထုံးတာ

သွေးလည်ပတ်မှုမကောင်းလို့သွေးကြောထုံးတာကမြင်သာပါတယ်။ သွေးကြောထုံးခြင်းကြောင့် နှလုံးကို သွေးပြန် ပို့ဖို့ ခက်ခဲစေနိုင်ပါတယ်။ ဒီလက္ခဏာတွေဖြစ်စေနိုင်ပါတယ် –

ခြေထောက်မှာလေးလံနေတာ၊

ခြေထောက်မှာ နာကျင်တာ၊

ယားယံတာ၊

ရောင်ရမ်းတာ၊

အရေပြားမှာသွေးကြောထုံးတဲ့အရာလေးတွေမြင်နေရတာ စတာတွေပါဝင်ပါတယ်။

ဒီလိုဖြစ်တာကတော့ အချိန်ကြာရှည် မတ်တပ်ရပ်ရတဲ့သူတွေမှာ အဖြစ်များပါတယ်။ ဒါ့ကြောင့် သွေးလည်ပတ်မှု ကောင်းချင်ရင် အကောင်းဆုံးက ကိုယ်လက်လှုပ်ရှားမှုအတွက်အချိန်ပေးပါ။ လမ်းမလျှောက်နိုင်၊ အားကစား မလုပ်နိုင်ရင်တောင်မှခြေထောက်လေ့ကျင့်ခန်း၊ လက်လေ့ကျင့်ခန်းလေးတွေ၊သွေးပူလေ့ကျင့်ခန်းလေးတွေ ပြုလုပ်ပေးဖို့လိုပါမယ်။

ကိုးကား- Hello ဆရာဝန်

သွေးတွင်း မကောင်းတဲ့ကိုလက်စထရော(LDL- Low Density Lipoprotein) များနေရင် သွေးလည် ပတ်စီးဆင်းမှုမကောင်းပါဘူး။ ခန္ဓာကိုယ်ထဲမှာ စီးဆင်းနေတဲ့သွေးတွေက အာဟာရဓာတ်နဲ့ အောက်ဆီဂျင်တွေကိုခန္ဓာကိုယ်အနှံ့ပို့ဆောင်ပေးပါတယ်။ သွေးလည်ပတ်စီးဆင်းမှုမကောင်းတဲ့အခါခန္ဓာကိုယ်မှာကျန်းမာရေးပြဿနာတွေဖြစ်လာပါတယ်။ အဲဒီကျန်းမာရေးပြဿနာတွေက-

ခြေထောက်တွေဖောရောင်ခြင်း

ခြေထောက်တွေဖောရောင်တာက အထိုင်များတာ  ဒါမှမဟုတ် မတ်တတ်ရပ်များတာတွေကြောင့် ဖြစ်နိုင်သလို အငန်စားသုံးမှုများတာ၊ အာဟာရချို့တဲ့ တာ၊ အဝလွန်တာ၊ အသက်အရွယ်ကြီးတာ၊ လှုပ်ရှားမှုနည်းတဲ့နေထိုင်မှုပုံစံ၊  ဓမ္မတာမလာမီ  ကိုက်ခဲတာ၊ ကိုယ်ဝန်ဆောင်တာ စတာတွေကြောင့်  သွေးစီးဆင်း မှုမကောင်းလို့ဖြစ်ရပါတယ်။ သွေးစီးဆင်းမှုမကောင်း တာကြောင့်  ကျောက်ကပ်ကသွေးတွေ  တစ်သျှူး တစ်ဝိုက်မှာ  စုပုံနေပြီး  ရောင်ရမ်းတာဖြစ်လာရပါ တယ်။ ခြေထောက်မှာ  သွေးစီးဆင်းမှုမကောင်းတာဆိုးရွားလာရင်  အနာတွေဖြစ်လာနိုင်တယ်။  ခြေ ထောက်ရောင်ရင်  လဲလျောင်းတဲ့အခါ ခြေထောက် ကို အပေါ်မြှင့်ထားသင့်ပါတယ်။ အရောင်မသက်သာ ဘဲ ရက်ရှည်နေရင်  ဆရာဝန်နဲ့ ပြသစစ်ဆေးသင့်ပါတယ်။

ခုခံစွမ်းအားနည်းလာခြင်း

သွေးလည်ပတ်မှုမကောင်းတာကြောင့် ခုခံအားစနစ်အပေါ် များစွာသက်ရောက်မှုရှိပါတယ်။ သွေးလည်ပတ်မှုမကောင်းတဲ့အခါ  ဗီတာမင်နဲ့ သတ္တုဓာတ်တွေလိုအပ်တဲ့နေရာတွေဆီမရောက်တာကြောင့် ရောဂါပိုးမွှားတွေကိုတိုက်ထုတ်ဖို့ ခုခံစွမ်းအားလျော့နည်းနေတတ်ပါတယ်။ခန္ဓာကိုယ်မှာ ခုခံစွမ်းအားနည်းတဲ့အခါ ရောဂါပိုးမွှားတွေ အလွယ်တကူဝင်နိုင်ပြီး မကြာခဏဖျားနာတာ၊ ထိခိုက်ရှနာဖြစ်ပြီးတဲ့အခါ တော်ရုံအနာမကျက်တာတွေဖြစ်နိုင်ပါတယ်။ သွေးလည်ပတ်မှုကောင်းပြီး ခုခံစွမ်းအားမြင့်မားစေဖို့ ပုံမှန်လေ့ကျင့်ခန်းပြုလုပ်သင့်ပါတယ်။ နေ့စဉ် နာရီဝက်ကနေ တစ်နာရီကြာ အပြေး၊ ရွရွပြေး၊ လမ်းလျှောက်၊ စက်ဘီးစီး၊ ရေကူးပြုလုပ်သင့်ပါတယ်။ 

ခြေလက်တွေ ထုံကျဉ်နေခြင်း

ခန္ဓာကိုယ်ရဲ့ အစိတ်အပိုင်းတစ်ခုခု ထုံကျဉ်နေတာ၊ အဓိက  လက်နဲ့ခြေထောက်တွေမှာ  ထုံကျဉ်မှုတွေဖြစ်ရတာက    သွေးလည်ပတ်မှုမကောင်းလို့ဖြစ်ပါတယ်။    လက်ကိုဖိပြီးအိပ်မိတာ၊    အရမ်းအေးတဲ့အရာကိုကိုင်တွယ်မိတာ၊ အာရုံကြောခဏတာညပ် တာ၊ လှုပ်ရှားမှုနည်းတဲ့နေထိုင်မှုပုံစံနဲ့   နေထိုင်တာ၊ဗီတာမင် B 12 နဲ့ မဂ္ဂနီဆီယမ်ဓာတ်ချို့တဲ့တာ စတာ တွေကြောင့်လည်းဖြစ်နိုင်ပါတယ်။    လက်သန်းနဲ့ လက်သူကြွယ်တစ်ဝိုက်ကလွဲပြီး  ကျန်လက်ချောင်း တွေထုံကျဉ်နေတာ၊ ဆီးချိုသွေးချိုရှိတာ၊ သိုင်းရွိုက် ဂလင်းအလုပ်အလွန်လုပ်နေတာ စတဲ့ရောဂါတွေမှာ ခြေ၊ လက်ထုံကျဉ်တာကို လက္ခဏာတစ်ရပ်အနေနဲ့ ပြတတ်ပါတယ်။

ခြေထောက်သွေးပြန်ကြောထုံးခြင်း

ခြေထောက်မှာ  သွေးပြန်ကြောတွေ   ထင်ထင်ရှားရှားပေါ်လွင်နေတာ သွေးလည်ပတ်မှုမကောင်းတာကြောင့်ဖြစ်ပါတယ်။ ခြေထောက်သွေးပြန်ကြောသွေးတွေက သွေးလည်ပတ်မှုမကောင်းတာနဲ့ ကမ္ဘာမြေကြီးဆွဲအားကြောင့် အပေါ်ပြန်မတက်နိုင်တဲ့အခါ သွေးကြောတွေရောင်တာ၊ လိမ်တာတွေဖြစ်လာပါတယ်။  အဲဒါတွေက  သိသိသာသာဖြစ်ပြီး  မျက်စိနဲ့မြင်တွေ့နိုင်ပါတယ်။ သွေးပြန်ကြောတွေရောင်တာကြောင့် နာကျင်တာ၊ ယားယံတာ၊ ခြေထောက်လှုပ်တာ၊ ပူစပ်ပူလောင်ခံစားရတာ၊ ခြေထောက်ကြီးတာ စတာတွေဖြစ်ပေါ်နိုင်ပါတယ်။ ခြေထောက်သွေးပြန်ကြောရောင်တာက မျိုးရိုးလိုက်တာ၊ အဝလွန်တာ၊ဝမ်းချုပ်တာ၊     ဟော်မုန်းပြောင်းလဲမှုတွေဖြစ်တာ စတဲ့ ခန္ဓာကိုယ်ရဲ့အပြောင်းအလဲပေါ်မူတည်ပြီးလည်းဖြစ်နိုင်ပါတယ်။ ခြေထောက်သွေးပြန်ကြောရောင်တာခံစားရရင် သွေးလည်ပတ်မှုကောင်းအောင်ခြေအိတ်ကျပ်ကျပ်ဝတ်အိပ်သင့်ပါတယ်။

ခြေလက်တွေအေးနေခြင်း

သွေးလည်ပတ်စီးဆင်းမှုက    ခန္ဓာကိုယ်အပူချိန် ကိုထိန်းပေးပါတယ်။ သွေးစီးဆင်းမှုပြတ်တောက်သွားတာက  ခန္ဓာကိုယ်ရဲ့ ပုံမှန်အပူချိန်ကို  မထိန်းထားနိုင်ပါဘူး။ သွေးစီးဆင်းမှုမကောင်းရင်  ခန္ဓာကိုယ်ရဲ့ အစွန်အဖျားနေရာတွေဖြစ်တဲ့  လက်ချောင်း၊ ခြေချောင်းလေးတွေဆီကိုသွေးမရောက်ရှိတာကြောင့် အေးနေတာပဲဖြစ်ပါတယ်။

သွေးမရောက်ရင် အဲဒီနေရာတွေဆီ အောက်ဆီဂျင် ပမာဏလုံလောက်စွာမရောက်နိုင်ပါဘူး။ အေးနေတဲ့နေရာကို ပွတ်ပေးရင် သဘာဝအတိုင်း သွေးစီးဆင်းမှု ပြန်ကောင်းစေပါတယ်။ သိုင်းရွိုက်ဂလင်းလုပ်‌ဆောင်မှုများတာ၊  လက်နဲ့ခြေထောက်မှာရှိတဲ့   အာရုံကြောတွေပျက်စီးတာကြောင့်ဖြစ်တဲ့ လက်ဖျား၊ ခြေဖျားအေးတာဆိုရင်တော့ ဆရာဝန်နဲ့ ပြသပြီး ကုသမှုခံယူသင့်ပါတယ်။

ရုတ်တရက်ဆံပင်ကျွတ်ခြင်း

သွေးလည်ပတ်မှုမကောင်းတာကြောင့်ရုတ်တရက်ဆံပင်ကျွတ်နိုင်ပါတယ်။သွေးလည်ပတ်မှုမကောင်းတဲ့အခါ ဦးရေပြားက လိုအပ်တဲ့အာဟာရ ဓာတ်တွေမရရှိတာကြောင့် ဆံသားခြောက်သွေ့တာ၊ ဆံပင်ကျဲတာ၊ ဆံပင်နှစ်ခွဖြစ်တာတွေ ဖြစ်နိုင်ပါတယ်။ ဆံပင်ကျွတ်တာသက်သာစေဖို့ အဆီတစ်မျိုးမျိုးကို ဦးရေပြားအနှံ့လိမ်းပြီး ညင်သာစွာနှိပ်နယ်ပေးသင့်ပါတယ်။  အသက်အရွယ်ကြီးတာ၊  စိတ်ဖိစီးမှုများတာ၊ ဆေးလိပ်အလွန်အကျွံသောက်တာ၊ သိုင်းရွိုက်ဂလင်းပြဿနာရှိတာ၊ သံဓာတ်ချို့တဲ့ သွေးအားနည်းရောဂါရှိတာ၊ နာတာရှည်ဖျားနာနေတာ စတာတွေကြောင့်လည်း ဆံပင်ကျွတ်တာဖြစ်နိုင်ပါတယ်။

အမြဲတမ်းမောပန်းနွမ်းနယ်ခြင်း

ရုပ်ပိုင်းဆိုင်ရာလှုပ်ရှားမှုတွေ လုပ်ဆောင်ပြီးတဲ့အခါနဲ့ တချို့ဆေးဝါးတွေကြောင့် မောပန်းနွမ်းနယ်မှုတွေကို ခံစားရနိုင်ပါတယ်။ ဒါပေမဲ့ သွေးလည်ပတ်မှု မကောင်းတာကြောင့် ခန္ဓာကိုယ်အစိတ်အပိုင်းတွေ ဆီကို သွေးမရောက်တဲ့အခါမျိုးမှာလည်း မောပန်းနွမ်းနယ်တာဖြစ်နိုင်ပါတယ်။ သွေးလည်ပတ်မှု မကောင်းတာကြောင့်ခံစားရတဲ့ မောပန်းနွမ်းနယ်မှု တွေဖြစ်တဲ့အခါ   အသက်ရှူမြန်တာ၊  သက်လုံမကောင်းတာနဲ့ ကြွက်သားနာကျင်တာတွေကိုလည်း ခံစားရနိုင်ပါတယ်။ အရက်အလွန်အကျွံသောက်တာ၊ ကော်ဖီအများအပြားသောက်သုံးတာ၊ အိပ်ရေးပျက်များတာ၊  ကိုယ်လက်လှုပ်ရှားမှုမရှိတာ၊  စိုးရိမ်စိတ် များတာ၊  စိတ်ဓာတ်ကျတာ၊  စိတ်ဖိစီးမှုများတာ တွေကြောင့်လည်း မောပန်းနွမ်းနယ်မှုတွေကို ခံစားရနိုင်ပါတယ်။

သွေးတွင်းမကောင်းတဲ့ကိုလက်စထရောများခြင်း

သွေးတွင်းမကောင်းတဲ့ကိုလက်စထရော(LDL-Low Density Lipoprotein)က ခန္ဓာကိုယ်အတွက် အကျိုးမပြုတဲ့ ကိုလက်စထရောဖြစ်ပြီး HDL-High Density Lipoprotein က ခန္ဓာကိုယ်ကို အကျိုးပြုတဲ့ကိုလက်စထရောဖြစ်ပါတယ်။ သွေးတွင်းမကောင်းတဲ့ကိုလက်စထရော(LDL) များတာက  အသံတိတ်လူသတ်သမားဖြစ်ပါတယ်။

ကိုလက်စထရောက ခန္ဓာကိုယ်က ဆဲလ်တိုင်းမှာ ရှိပါတယ်။  ခန္ဓာကိုယ်ရဲ့လုပ်ငန်းဆောင်တာတွေအကောင်းဆုံးလည်ပတ်စေဖို့  လိုအပ်တဲ့အရာတစ်ခု ဖြစ်ပါတယ်။  နေ့စဉ် စားသုံးတဲ့အစားအစာတွေထဲ ကနေ  ရရှိနိုင်ပါတယ်။  ဒါပေမဲ့  သင့်တင့်တဲ့ပမာဏ ထက် ကျော်သွားမယ်ဆိုရင်တော့ ရုတ်တရက် နှလုံး ရပ်တာ၊   လေဖြတ်တာမျိုးရောဂါတွေ ခံစားရနိုင်ပါ တယ်။  သွေးတွင်းမကောင်းတဲ့  ကိုလက်စထရော(LDL)   များနေတဲ့လက္ခဏာတွေက မျက်ခွံမှာ  အဝါရောင်အဖုတွေထွက်ပြီး မျက်ကြည်လွှာတစ်ဝိုက်မှာ မီးခိုးရောင်အရစ်လေးတွေဖြစ်နေမယ်။  အပေါ်မျက်ခွံမှာဖြစ်ဖြစ်၊     အောက်မျက်ခမ်းမှာဖြစ်ဖြစ်နာကျင်မှုမရှိတဲ့  ခပ်ပျော့ပျော့အဖုလေးတွေစမ်းမိ နေရင်   အမြင်အာရုံကိုထိခိုက်မှုဖြစ်စေမယ့်   သွေး တွင်းမကောင်းတဲ့ကိုလက်စထရော (LDL) များနေ တတ်ပါတယ်။ မှန်ကြည့်တဲ့အခါ မျက်ကြည်လွှာ တစ်ဝိုက်ကို  သေချာစိုက်ကြည့်လို့  မျက်ကြည်လွှာ တစ်ဝိုက်မှာ မီးခိုးရောင်အရစ်ကလေးဖြစ်နေတာ တွေ့ရင် ဒါက သွေးတွင်းမကောင်းတဲ့ကိုလက်စထရော (LDL) များနေတာဖြစ်ပါတယ်။ အသက် ၄၅ နှစ်အထက်တွေမှာ အဖြစ်များပါတယ်။ ဒါတွေက ကိုယ်တွင်းသွေးလည်ပတ်စီးဆင်းမှု  မကောင်းတဲ့လက္ခဏာတွေ ဖြစ်ပါတယ်။

Source: https://myawady.net.mm/stories

ပြည်တွင်း၌ ချဉ်ပေါင်နီ၊ ချဉ်ပေါင်ဖြူ၊ ချဉ်ပေါင်ခါး၊ ကုလားချဉ်ပေါင်ငယ်၊ ကုလားချဉ်ပေါင်ကြီး၊ တောချဉ်ပေါင်၊ ချဉ်ပေါင်နီလက်ခြား၊ သင်္ဘောချဉ်ပေါင်၊ ဘိလပ်ချဉ်ပေါင်၊ ရွှေဘိုချဉ်ပေါင်ဟူ၍ အမျိုးအမည်များပြားလှသည်။ ယင်းတို့အနက် လူသိများပြီး စားသုံးမှုအများဆုံးချဉ်ပေါင်မှာ ချဉ်ပေါင်ခါး၊  ချဉ်ပေါင်ဖြူနှင့် ချဉ်ပေါင်နီလက်ခြားတို့ဖြစ်ကြသည်။

- ချဉ်၍အနည်းငယ်ငန်သော ချဉ်ပေါင်ခါးပင်သည် သုံးပေမှ ငါးပေ အထိမြင့်ပြီး နူးညံ့သောဆူးနှင့်အမြှေးများပါရှိသည်။ အရွက်မှာ အကွဲများရှိပြီး အစိတ်အပိုင်းတိုင်းမှာ ခွေးသွားစိပ်များသဏ္ဌာန်ဖြစ် သည်။ အပွင့်ဝါ၍ အစေ့မည်းသည်။

- အပူဓာတ်ရှိ၍ အချဉ်ပေါ့သော ချဉ်ပေါင်ဖြူပင်သည် နှစ်ပေမှသုံးပေ အထိမြင့်ပြီး အရွက်မှာ အစွန်းသုံးခု သို့မဟုတ် ငါးခုစီပါရှိသည်။ အပွင့်မှာအဖြူရောင်ဖြစ်ပြီး တစ်ပင်လုံးဖြူဖွေးသောအမွေးနုများ ရှိကြသည်။

- ချဉ်၍အပူဓာတ်ရှိသော  ချဉ်ပေါင်နီလက်ခြားပင်သည်  ပျမ်းမျှ တစ်မိုက်သာသာခန့်သာမြင့်ပြီး အရွက်မှာ ဥပုံသဏ္ဌာန်ရှိ၍ အဖျား ချွန်းကာ အရွက်ပါးလျားသည်။ အပွင့်မှာဝိုင်း၍ဖြူသည်။ အသီးမှာ ဆီးသီးအလတ်စားအရွယ်ခန့်ရှိကာ   နုစဉ်  အစိမ်းရောင်ဖြစ်ပြီး မှည့်လျှင် ဝါသွားတတ်သည်။

ချဉ်ပေါင်ကို  မိုးရာသီကုန်စတွင်  ထွန်ယက်စိုက်ပျိုးပါမှ ချဉ်ပေါင် စေ့မှာ   အပင်ပေါက်စိတ်ချရမည်။  အကယ်၍ ချဉ်ပေါင်ကို အအေး ဓာတ်ဝင်သည့်ဆောင်းရာသီတွင် စိုက်ပျိုးလိုပါက အစေ့ကို တစ်ညသိပ် ရေစိမ်၍သော်လည်းကောင်း၊  အစေ့ကို  ရေနွေးဖြောပြီးမှသော်လည်း ကောင်း စိုက်ပျိုးပေးမှသာ ချဉ်ပေါင်စေ့အပင်ပေါက်နိုင်သည်။

ချဉ်ပေါင်စားဖွယ်စုံ

ချဉ်ပေါင်ရွက်ကို ချဉ်ရည်ဟင်း၊ ချဉ်ပေါင်လှော် သို့မဟုတ် ချဉ်ပေါင် သနပ် စသည့်အရန်ဟင်းလျာများအဖြစ် စားသုံးလေ့ရှိကြသည်။ အသား အမျှင်ထူသော အနီရောင်ချဉ်ပေါင်ဖူးကို ကြော်၍သော်လည်းကောင်း၊ ချဉ်ရည်ဟင်းအဖြစ်သော်လည်းကောင်း   ချက်စားနိုင်သည်။   တချို့ အရပ်ဒေသများတွင် အရွက်ရင့်ရင့်၊  အပွင့်နှင့်အသီးတို့ကို   နေပူပူတွင် အခြောက်လှန်းပြီး      လက်ဖက်ရည်ကြမ်းအဖြစ်   သောက်ကြသည်။ ချဉ်ပေါင်ဖူးနှင့်ချဉ်ပေါင်ပွင့်တို့ကို  ထန်းလျက်  သို့မဟုတ် သကြားဖြင့် ယိုထိုး၍လည်းစားသုံးကြသည်။ ချဉ်ပေါင်ဖူးယိုက အနံ့၊ အရသာပိုစူးသော ကြောင့် ယင်းကို ဆီးယိုထက်ပို၍ လူကြိုက်များသည်။

ချဉ်ပေါင်နှင့်မြန်မာ့ဆေးစွမ်း

- ဒဗ္ဗဂုဏပကာသနီဆေးကျမ်းတွင်  ချဉ်ပေါင်နီ၊  ချဉ်ပေါင်ဖြူ၊ ချဉ်ပေါင်ခါးဟူ၍ သုံးမျိုးကွဲပြား၏။ များသောအားဖြင့် ချဉ်ပေါင်နီ၊ ချဉ်ပေါင်ဖြူရွက်သည် ချဉ်၏။ ပူ၏။ ပူနာ၊ သလိပ်နာ၊ သည်းခြေနာ တို့ကိုနိုင်၏။ လေကိုပျက်စေတတ်၏။ ခံတွင်းနာ၊ နှုတ်မမြိန်နာ တို့နှင့်သင့်၏။ ချဉ်ပေါင်ခါးသည် ချဉ်၏။ ငန်၏။ အဆီမရှိ။ လေ သလိပ်ကိုနိုင်၏။ အဆိပ်နာ၊ မြင်းသရိုက်နာများနှင့်သင့်၏။ နှုတ် ကိုမြိန်စေတတ်၏ဟုဆိုထားသည်။

- ဆေးအဘိဓာန်တွင် ချဉ်ပေါင်ရွက်သည် ဝမ်းမီးတောက်၏။ သည်း ခြေနာ၊ ကြက်ညှာနာ၊  မြင်းသရိုက်နာတို့ကို သက်သာစေတတ်၏ ဟုဆိုထားသည်။

- ဇီဝိတဝဃုနဆေးကျမ်းတွင်  ချဉ်ပေါင်ရွက်သည်  ချဉ်၍ချွဲ၏။ ယင်းသည် လက်ခြားတစ်မျိုး၊ အနီတစ်မျိုးဟူ၍ နှစ်မျိုးရှိ၏။ အနီမှာအထူးချဉ်၏။  လက်ခြားမျိုးသည်လည်း  အဖြူနှင့်အညို နှစ်မျိုးရှိရာ အညိုက စား၍ကောင်း၏။ နုန်းမြေ၊ မြေနုအရပ်တွင် ပေါက်သောချဉ်ပေါင်သည် အချဉ်နည်း၍ အချွဲအဖန်မများလှသောကြောင့် စား၍အထူးကောင်း၏။  တပေါင်း၊  တန်ခူးလများတွင် ကြက်သွန်ခင်းပတ်ဝန်းကျင်တို့အနီးစိုက်ပျိုးသော  ချဉ်ပေါင် လက်ခြားများက အချဉ်နည်း၊  အချွဲလည်းနည်းသဖြင့်  အလွန်ပင်စားကောင်း၏။ ချဉ်ပေါင်ရွက်သည် သလိပ်ကိုစိုစေ၊ ပွစေတတ်၏။ ဆီးဝမ်းကိုမှန်မှန်သွားစေတတ်သော သီတဂိုဏ်းဝင်အမျိုး အစားပေတည်းဟုဆိုထားသည်။

- ရှုတော်မူဆေးကျမ်းတွင်  ချဉ်ပေါင်ခါးရွက်သည်  အဖြူ၊ အနီဟူ၍ နှစ်မျိုးနှစ်စားရှိ၏။ ခါး၏။ အနည်းငယ်ချဉ်၏။ အနီမျိုးသည် ဝမ်းမီးကိုတောက်စေတတ်သဖြင့် အစာကြေလွယ်ခြင်းကို ဖြစ်စေတတ်၏။ ပိတ်ကိုက်နာ၊ မြင်းသရိုက်နာ၊  လေနာ၊  သည်းခြေနာ၊  ကြက်ညှာနာတို့ကိုနိုင်၏။  ရင်ကိုလည်း ချောင်စေတတ်၏။ ချဉ်ပေါင်ခါးအဖြူသည်လည်း အနီနှင့်အကျိုးပေးတူ၏။ သို့သော်အဖြူကား အနီလောက်မထက်။ ထိုချဉ်ပေါင်မျိုးတို့ကို ဓာတ်ချဉ်ပေါင်၊ ကိုင်းချဉ်ပေါင်၊ ချဉ်ပေါင်လက်ခြားဟူ၍ အမျိုးမျိုးခေါ်ကြ၏။ ကိုင်းချဉ်ပေါင်ခါးမျိုးသည် အရိုးတွင် သေးငယ်သောဆူးလေးရှိ၏။  အရွက်တွန့်လိပ်သယောင်ရှိ၏။  ချဉ်ပေါင်လက်ခြားကား  အရိုး အကြောနီ၏။ သို့သော် အကျိုးပေးခြင်းတူ၏ဟုဆိုထားသည်။

- မြန်မာ့ဆေးကျမ်းများတွင် (က) ချဉ်ပေါင်ခါးကို အစာကြေဆေး၊ နှုတ်မြိန်ဆေး၊ သွေးဝမ်း၊ မြင်းသရိုက်နာပျောက်ဆေး၊ ဝဖြိုးဆေး၊ ကာမအားတိုးဆေး၊    နားကိုက်ပျောက်ဆေး၊  လည်ချောင်းနာ ပျောက်ဆေး၊ အကိုက်အခဲပျောက်ဆေး၊ အဆစ်အမျက်လွဲနာကျင် ပျောက်ဆေး၊ ဝမ်းနုတ်ဆေး၊ သည်းခြေရောဂါနှင့် နှာစေးချောင်းဆိုး ပျောက်ဆေးအဖြစ် ဆေးဝါးများဖော်စပ်ရာတွင် သုံးလေ့ရှိသည်။ (ခ) ချဉ်ပေါင်ဖြူကို ဝမ်းပျက်ခြင်းအတွက် ဆေးဖော်လေ့ရှိသည်။ (ဂ) ချဉ်ပေါင်နီလက်ခြားကို  ဆီးရွှင်ဆေး၊  ရေငတ်ပျောက်ဆေး၊ နှုတ်မြိန်ခံတွင်းကောင်းဆေး၊ သည်းခြေရောဂါ၊ မူးဝေခြင်း၊ လေနာ ရောဂါ၊ နူနာရောဂါ၊ အဆုတ်ရောဂါ၊ အသားအရေညိုညစ်ခြင်း၊ သားသည်မိခင်များ နို့ရည်လိုက်ဆေးအဖြစ် ဆေးဝါးဖော်စပ်ကြ သည်။

ထိုမျှမက  ၉၆ ပါးသော ဝေဒနာများအတွက်ကိုလည်း ချဉ်ပေါင်ရွက် ကုထုံးဖြင့် အောက်ပါဆေးမြီးတိုများအဖြစ်  ကုသပျောက်ကင်းနိုင်ပါ သည်။

- ချဉ်ပေါင်ခါး အပွင့် ၁၂ ပွင့်ကို သကြားနှစ်ပဲသားနှင့်ရောကြိတ်၍ ငရုတ်ကောင်းအနည်းငယ်ရောထည့်သောက်ပေးခြင်းဖြင့်  အပူလွန် ၍ အချဉ်ပြန်သော အစာမကြေရောဂါပျောက်ကင်းစေနိုင်သည်။

- နာကျင်ကိုက်ခဲသောဝေဒနာများအတွက်   ချဉ်ပေါင်ခါးအစေ့ကို အမှုန့်ကြိတ်၍  ထိုအမှုန့်နှစ်ပဲသားကို  နှမ်းဆီလက်ဖက်စားဇွန်း နှစ်ဇွန်း ရောစပ်လိမ်းပေးနိုင်သည်။

- ချဉ်ပေါင်နီအရွက်နှင့်   ချဉ်ပေါင်ဖူးတို့ကို  နေရိပ်တွင်  အခြောက်လှန်းပြီး ရေနွေးဆူဆူတွင်  သင့်ရုံထည့်၍   သကြားနှင့်ရောစပ်သောက်ပေးခြင်းဖြင့်  ဆီးရောဂါနှင့်  ရေငတ်အာခြောက်ခြင်းကို သက်သာစေသည်။

- ချဉ်ပေါင်ခါးအစေ့ကိုလှော်၍   အမှုန့်ပြုလုပ်ပါ။      ထိုအမှုန့်တစ်ပဲသားကို   ရေနွေးနှင့်  နေ့စဉ်သောက်ပေးပါက   အစာမကြေ ဝမ်းပျက်ရောဂါကို ပျောက်ကင်း စေသည်။

- ဗိုက်နာပြီး  အကျိအရွဲများနှင့် ဝမ်းသွားခြင်းအတွက် ချဉ်ပေါင်ခါး သို့မဟုတ်  ချဉ်ပေါင်ဖြူ သို့မဟုတ်  ချဉ်ပေါင်နီလက်ခြားတို့၏ အမြစ်သွေးရည်တစ်ဇွန်းကို တစ်ရက်နှစ်ကြိမ် သောက်ပေးခြင်း ဖြင့် သက်သာပျောက်ကင်းစေသည်။

- ချဉ်ပေါင်နီလက်ခြားအရွက်ကို  ထမင်းနှင့်ရောကြိတ်ပြီး  ပြည် တည်နာ၊ အနာစိမ်း၊ ခွေးကိုက်နာ၊  ကြောင်ကိုက်နာ၊   အနာအို၊  အနာဆွေးများပေါ်အုံပြီး အဝတ်သန့်နှင့်စည်းထားပေးခြင်းဖြင့် အနာရင်းခြင်း၊   ငန်းမန်းလိုက်ခြင်းမရှိဘဲ    အမြန်ဆုံးသက်သာ ပျောက်ကင်းစေသည်။

- မြွေ၊ ကင်းကိုက်ခံရပါက ကုလားချဉ်ပေါင်ကို ကြိတ်၍အုံပေးပါ။

- အစာအိမ်လေပူမှုတ်ခြင်းအတွက် ကုလားချဉ်ပေါင်အရွက်သတ္တု ရည်သောက်ပါ။

- ဝမ်းပျက်ခြင်းအတွက်  ကုလားချဉ်ပေါင်အစေ့ကိုလှော်၍  အမှုန့် လုပ်ပြီး သောက်ပါ။ 

- အဆစ်အမျက်ကိုက်ခဲခြင်းနှင့် အဆစ်လွဲခြင်းတို့အတွက် ချဉ်ပေါင်ခါးအစေ့ သို့မဟုတ် အရွက်တို့ကို ထောင်းထု၍ လိမ်းအုံပေးပါ။

- နှာစေးချောင်းဆိုးခြင်းအတွက် ချဉ်ပေါင်ခါးရွက်ကို ဖျော်ရည်လုပ်သောက်ပါက ပျောက်ကင်းစေနိုင်သည်။

ချဉ်ပေါင်နှင့်သိပ္ပံဆေးစွမ်း

- အူသိမ်၊ အူမတို့ကို ကောင်းကျိုးပြုသည်။

- ချဉ်ပေါင်ရွက်တွင် Hydroxy နှင့်  Amino  Acid များကြွယ်ဝစွာပါရှိသောကြောင့် ဆီးအားကောင်းစေသည်။  ဆီးရွှင်၍ ဝမ်းသက်စေသည်။

- ဗီတာမင် C နှင့် သတ္တုဓာတ်တို့  အမြောက်အမြားပါရှိသောကြောင့်   ကိုယ်ခံစွမ်းအားကောင်းမွန်ခြင်း၊     ဆဲလ်များသေဆုံးခြင်းမှ ကာကွယ်ပေးခြင်း၊ သွားဖုံးနှင့် သွားတို့ကိုကျန်းမာစေခြင်း၊ Free Radicals အန္တရာယ်မှ ကာကွယ်ပေးခြင်း၊  အရွယ်ကိုနုပျိုစေခြင်း၊  ကင်ဆာရောဂါများ   ဖြစ်နိုင်ခြေအလားအလာနည်းပါးစေခြင်း၊ အဆုတ်ကိုကျန်းမာစေခြင်း၊  အအေးပတ်ခြင်း၊  ရာသီပေါ်နှာစေးချောင်းဆိုးကူးစက်ရောဂါများနှင့်     နှာရည်ယိုနှာပိတ်ခြင်းတို့မှ လည်း ကာကွယ်ပေးခြင်း စသည်ဖြင့် ကောင်းကျိုးပြုသည်။

- ကယ်လ်စီယမ်အမြောက်အမြားပါရှိသဖြင့်   အရိုးကိုသန်မာစေခြင်း၊ အာရုံကြောအဖွဲ့အစည်းများနှင့် ကြွက်သားများဖွဲ့စည်းမှုကို တိုးတက်ကောင်းမွန်စေခြင်း၊ သွေးကျဲရောဂါမှကာကွယ်ပေးခြင်း၊ ခြေလက်များ တဆစ်ဆစ်နာကျင်ခြင်းနှင့်  ထုံထိုင်းလေးလံခြင်း တို့ကို သက်သာပျောက်ကင်းစေခြင်း၊ ကလေးငယ်များ ဖွံ့ဖြိုးမှုနှေးကွေးခြင်းမှ   ကာကွယ်ပေးခြင်း စသည်ဖြင့်    ကောင်းကျိုးပြုသည်။

- ချဉ်ပေါင်ပန်းပွင့်များသည် နှလုံးရောဂါကို ကာကွယ်ပေးနိုင်သည်။

- ချဉ်ပေါင်ဖူး၏အစေ့မှလည်း အဆီထုတ်ယူနိုင်သည်။ ထိုအဆီဖြင့် အရေပြားပေါ်ရှိ အနာအမျိုးမျိုးတို့ကို လိမ်းပေးခြင်းဖြင့် ရောင်ကိုင်း ခြင်းကိုသက်သာစေပြီး အနာမြန်မြန်ကျက်စေသည်။

- ပြတ်ရှနာများ၊ ဖက်ခွက်နာနှင့်ပြည်တည်နာများအတွက် ချဉ်ပေါင်ရွက်ကိုမီးမြှိုက်၍    အုံပေးခြင်းဖြင့်    သက်သာပျောက်ကင်းနိုင်သည်။

- ချဉ်ပေါင်ဖူးဖျော်ရည်ကို သောက်သုံးခြင်းဖြင့်  ချောင်းဆိုးရောဂါသက်သာပျောက်ကင်းစေသည်။ လူကိုလန်းဆန်းစေနိုင်သည်။

- ချဉ်ပေါင်စေ့ပြုတ်ရည်ကို သောက်သုံးခြင်းဖြင့်  အစာနင်ခြင်းနှင့်အစာမကြေခြင်းတို့မှ  သက်သာပျောက်ကင်းစေနိုင်သည်။  

- ချဉ်ပေါင်ရွက်ခြောက်ကို လက်ဖက်ရည်ကြမ်းကဲ့သို့ သောက်သုံးခြင်းအားဖြင့် ကိုလက်စထရောကိုကျစေခြင်း၊  ကိုယ်အလေးချိန်ကျစေပြီး  သွေးလည်ပတ်နှုန်းကိုကောင်းမွန်စေသည်။  ကင်ဆာ ရောဂါအမျိုးမျိုးတို့ကို ဟန့်တားကာကွယ်ပေးနိုင်သည်။

- ဒူးရင်းသီးစားပြီးနောက်  ချဉ်ပေါင်သီးဖျော်ရည်သောက်ပေးခြင်းဖြင့်  အပူကန်ခြင်းကိုကာကွယ်နိုင်ပါသည်။

သတိပြုရန်  

သွေးတိုးရောဂါရှိသူများ  သွေးပေါင်ချိန်တက်နိုင်၍ အလွန်အကျွံမစား သင့်ပေ။  ချောင်းဆိုးရင်ကျပ်ဝေဒနာသည်များနှင့်လည်း မသင့်တော်ပါ။

အချုပ်ဆိုရသော် ရွှေချဉ်ပေါင်လက်ခြား   ကြက်သားနှင့်မလဲပေါင် ဆိုရိုးစကားရှိပါသည်။      ကြက်သားနှင့်ပင်မလဲနိုင်လောက်အောင် အရသာရှိလှပြီး   စျေးနှုန်း လည်းမကြီးဘဲ   မိမိတို့လက်တစ်ကမ်းတွင် တစ်နှစ်ပတ်လုံးအလွယ်တကူရရှိနိုင်သော ချဉ်ပေါင်ရွက်ကို အစာလည်း ဆေး၊ ဆေးလည်းအစာအဖြစ် စားသောက်နိုင်ပါကြောင်း ရေးသားလိုက်ရပါသည်။

Source: https://myawady.net.mm/stories

သတင်းသမားတစ်ဦးဖြစ်တာနဲ့အညီ၂၀၂၄ ခုနှစ်အတွက် ရုပ်ရှင်ထူးချွန်ဆုရရှိသူများနဲ့ အဘက်ဘက်မှကူညီပံ့ပိုးသူများအား  ဂုဏ်ပြုညစာစားပွဲသို့ ညီနောင်မီဒီယာများနဲ့အတူ ညစာစားပွဲကျင်းပရာ    မြဝတီမီဒီယာစင်တာသို့ရောက်ရှိခဲ့ပါတယ်။ ဒီနေရာကို ဒုတိယအကြိမ်ရောက်ရှိခဲ့ခြင်းဖြစ်ပြီး     ပထမတစ်ကြိမ်ကတော့   ရုပ်ရှင်ဇာတ်ကား Red Carpet Show ပြသတဲ့ပွဲပါ။   မြဝတီမီဒီယာစင်တာရဲ့ ခမ်းနားမှုကိုတော့ အဲ့ဒီကတည်းက သိခဲ့ရတာပါ။ ရုပ်ရှင်ရုံရဲ့လေအေးပေးစက်စနစ်ကောင်းမွန်တာရော ရုပ်ရှင်ပိတ်ကား၊ ရုပ်ရှင်ပြစက်နဲ့ အသံစနစ်တွေ ခေတ်မီတာရောတွေ့ခဲ့ရပါတယ်။

ဒီနေ့ည ညစာစားပွဲကတော့ မြဝတီမီဒီယာစင်တာရဲ့ ဆဋ္ဌမအလွှာ ခုနစ်ထပ်က Ballroom ခန်းမမှာကျင်းပတဲ့ အကယ်ဒမီဂုဏ်ပြုညစာစားပွဲပါ။ အချိန် စောနေတာနဲ့     မီဒီယာအဖွဲ့ကိုပေးတဲ့ ထမင်းဘူးလေးကိုယူရင်း ခန်းမနဲ့တွဲလျက် လေသာဆောင်ဝရန်တာကို     ထွက်လို့ ရန်ကုန်မြို့ရှုခင်းကို  ကြည့်မိပါတယ်။ လေသာဆောင်ကလည်း    ကျယ်ဝန်းလှသမို့ လူ ၃၀၀-၄၀၀ လောက်ဆံ့နိုင်ပြီး  ရန်ကုန်မြို့ရှုခင်းကို အပေါ်စီးကကြည့်ရှုခံစားရင်း ညနေခင်းဆည်းဆာ ပွဲ တစ်ခုအဖြစ် စိတ်ကူးယဉ်နေမိပါတယ်။

အတွေးစိတ်ကူး   မဆုံးခင်မှာဘဲ အကယ်ဒမီညစာစားပွဲမှာ စိန်နန်းတော်က စီစဉ်ထားတဲ့ Media Corner ကို ပြန်လှည့်ရပါတယ်။ ကိုယ့် Entertainment Media logo ပါတဲ့ MIC လေးနေသားတကျချထားပြီး အနုပညာရှင်ဖန်တီးရှင်များရဲ့ အကယ်ဒမီမုဒိတာစကားတွေကို တစ်ဦးပြီးတစ်ဦး ရယူရပါတော့တယ်။ ၂၀၂၄ အကယ်ဒမီဆု၁၆ ဆုပေမယ့်   ပေါင်းလိုက်တော့ ဇာတ် ကားကခြောက်ကားပါပဲ။ ကိုယ့်တိုက်ပိုင်က  အကယ်ဒမီအချက်အလက်တွေသေသေချာချာဖတ်မှတ်ရယူဖို့ မှာကြားတော့ ကျွန်တော့်  Hand Phone ထဲမှာ အသင့်ရှိပါကြောင်း၊ ဖတ်မှတ်ပြီးပါကြောင်း Viber ပေါ်ကနေ Report ပြန်လုပ်ရပါတယ်။

Media Corner မှာ အင်တာဗျူးသတင်းတွေရယူရသလိုပဲ   အကယ်ဒမီဂုဏ်ပြုညစာစားပွဲရဲ့ အစီအစဉ်ကိုလည်း အာရုံပြုရပြန်ပါတယ်။ ညစာစားပွဲကျင်းပတဲ့ Ballroom ရဲ့ ကျယ်ဝန်းတဲ့အနေအထား၊ မီးပန်းဆိုင်းတွေရဲ့အလှက ကြယ်ငါးပွင့်အဆင့်ရှိ ဟိုတယ်တွေရဲ့ Ballroom မျိုးပါပဲခမ်းနားလှပါတယ်။ Stage စင်မြင့်ပေါ်မှာ ကြီးမားတဲ့ LED ကြီးနဲ့အတူ အကယ်ဒမီရွှေစင်ရုပ်တုနှစ်ခုကလည်း    ဘယ်ညာဟန်ချက်ညီခံ့ထည်နေပါတယ်။  တဖွဲဖွဲရောက်ရှိလာကြတဲ့ တက်ရောက်ချီးမြှင့်ကြသူတွေကို မှတ်တမ်းတင်ရင်း ခင်းကျင်းထားတဲ့ စင်မြင့်ပေါ်က စားပွဲပေါ်မှာ အကယ်ဒမီရွှေစင်ရုပ်တုကိုးဆုရှိနေတာ ရေတွက်မိပါတယ်။ ၁၆ ဆုဆိုတော့ အကယ်ဒမီဆုရသူ ခုနစ်ယောက်ရောက်ဖို့ကျန်သေးတယ်လို့ တွက်ဆမိပြီး ၂၀၂၄ အကယ်ဒမီဆုချီးမြှင့်ပွဲအကြောင်းဖတ်မှတ်သွားဖို့ မှာကြားချက်ကို    ကျေးဇူးတင်မိနေပါတယ်။

စင်မြင့်ရဲ့ LED Board ပေါ်မှာ  စိန်နန်းတော် ရတနာဆိုင်ရဲ့ ကြော်ငြာကိုလည်း မြိုင်မြိုင် ဆိုင်ဆိုင်တွေ့ရပါတယ်။ အဲ့ဒီကြော်ငြာပြီးတော့  မြန်မာနိုင်ငံရုပ်ရှင်အစည်းအရုံးရဲ့ (၇၉)နှစ်မြောက်   နှစ်ပတ်လည်နေ့ကို ဂုဏ်ပြုသောအားဖြင့် ၂၀၂၄ အကယ်ဒမီဆုရ ရုပ်ရှင်ဇာတ်ကားတွေကို    ပြန်လည် ပြသမယ့် မြန်မာ့ရုပ်ရှင် ရက်သတ္တပတ် ကြော်ငြာကလည်း ရှေ့ဆင့်နောက်ဆင့်ပေါ် လာပါတယ်။

မြန်မာနိုင်ငံရုပ်ရှင်အစည်းအရုံးရဲ့(၇၉) နှစ်မြောက်နေ့ဆိုတော့လည်း မနှစ်က ရန်ကုန် ဝင်္ဂပါလမ်းက    အစည်းအရုံးပရိဝုဏ်ထဲမှာကျင်းပခဲ့တဲ့ မတ်လ ၈ ရက်နေ့က    (၇၈)နှစ်မြောက်နေ့ကိုလည်း ပြန်သတိရမိတယ်။ ပြန်ကြားရေး ဒုတိယဝန်ကြီးတက်ရောက်တာကို  သတင်းရယူခဲ့တာရယ် နိဗ္ဗာန်စျေးလိုစျေးတန်းတွေက မုန့်တွေစားခဲ့ရတာရယ် အမှတ်ရမိတယ်။ တစ်နှစ်ဆိုတာမကြာလိုက်ပါလား။

ရုပ်ရှင်ကိုချစ်   ရုပ်ရှင်ကြည့်ရတာကြိုက်လို့လည်း Entertainment Media သတင်းသမားဖြစ်ခဲ့ရတာပါ။   အကယ်ဒမီဆုရဇာတ်ကားတွေ တစုတစည်းတည်းကြည့်ရမှာဆိုတော့  သိပ်ကောင်းတဲ့အစီအစဉ်လို့လည်းခံစားမိလိုက်ပါတယ်။  လက်ရှိရုပ်ရှင်လောကအခြေအနေကိုသိနေတော့ ရုပ်ရှင်ရုံအခက်အခဲရှိတာလည်းသိနေပါတယ်။ ရုံတင်ဖို့တန်းစီနေရတဲ့ ဇာတ်ကားတွေကလည်း   ရာဂဏန်းရှိနေတယ်လို့ ကြားသိရပါတယ်။ ရုံအခက်အခဲရှိနေတဲ့ကြားက ၂၀၂၄ အကယ်ဒမီဆုရဇာတ်ကားတွေကိုပြသမယ့်  အစီအစဉ်ကောင်းတွေကို ဘယ်လိုပြမှာလဲ၊   ဘယ်ရုံမှာပြမှာလဲဆိုတာသိချင်လာပါတယ်။

သွားပါများ    ခရီးရောက် မေးပါများစကားရဆိုသလို ရုပ်ရှင်အစည်းအရုံးက နှံ့စပ်သူဆီ စနည်းနာရတာပေါ့။ ၂၀၂၄အကယ်ဒမီ ၁၆ ဆုချီးမြှင့်ခဲ့ပြီး    ရုပ်ရှင်ဇာတ်ကားခြောက်ကားကရရှိခဲ့တာဖြစ်လို့ရုပ်ရှင်ဆင်ဆာခွင့်ပြုချက်ရရှိခဲ့တဲ့ ရက်စွဲအလိုက် ဘိုးတော်ကင်း၊ ချစ်သူသာပန်းတစ်ပွင့်ဖြစ်ခဲ့လျှင်၊ မီး၊ နှောင်၊ အိပ်မက်ကာရန်နဲ့ တိမ်ပန်းချီဇာတ်ကားတွေကို တစ်ကားကို သုံးရက်နှုန်းနဲ့ မတ်လ ၉ ရက်နေ့မှ မတ်လ ၂၉ ရက်နေ့ထိ ရက်သတ္တပတ် သုံးပတ်ကြာ မြန်မာ့ရုပ်ရှင်ရက်သတ္တပတ် အဖြစ်ပြသသွားမှာဖြစ်ပါတယ်။ ပြသမယ့်ရုံက Star Cinema ဖြစ်တဲ့ မြဝတီမီဒီယာ စင်တာရဲ့ အဆင့်မြင့်ရုပ်ရှင်ရုံမှာ ပြသမှာဖြစ်ကြောင်းလည်းသိရပါတယ်။ ရုပ်ရှင်ချစ်ပရိသတ်အတွက် အထူးအစီအစဉ်အနေနဲ့ အစည်းအရုံးရဲ့ နှစ်ပတ်လည်နေ့နဲ့ တိုက်ဆိုင်စွာ အကယ်ဒမီရဇာတ်ကားတွေ သီးသန့်ပြသတဲ့ မြန်မာ့ရုပ်ရှင်ရက်သတ္တပတ်အဖြစ်   စီစဉ်လိုက်ရတာလို့လည်းသိလိုက်ရတော့ စဉ်းစားစီစဉ်ပေးကြတဲ့သူတွေကိုလည်း ကျေးဇူးတင်မိပါတယ်။ ကျွန်တော်က ဒီခြောက်ကားမှာ နှောင်နဲ့တိမ်ပန်းချီဇာတ်ကားရဲ့ ပရီမီယာရှိုးတွေ သွားရောက်သတင်းယူခဲ့တာမို့ အကယ်ဒမီ ဘယ်လိုတွေရတယ်လို့ သိရှိပြီးပေမယ့်ကျန်လေးကားကို    မကြည့်လိုက်ရလို့တောင့်တနေချိန်နဲ့လည်း တိုက်ဆိုင်နေပါတယ်။ ဒါကြောင့် ဇာတ်ကားတွေပြမယ့် ရက်တွေကိုဆက်ပြီး စပ်စုမိပြန်ပါတယ်။ တစ်ရက်ကို  မွန်းလွဲ ၁ နာရီပွဲနဲ့ ၄ နာရီတို့မှာ နှစ်ပွဲပြမှာဖြစ်ပြီး ၉-၃-၂၀၂၅ ရက်နေ့မှ ၁၁-၃-၂၀၂၅ ရက်နေ့ထိ ဘိုးတော်ကင်း၊ ၁၃-၃-၂၀၂၅ ရက်နေ့မှ ၁၅-၃-၂၀၂၅ ရက်နေ့ထိချစ်သူသာ   ပန်းတစ်ပွင့်ဖြစ်ခဲ့လျှင်၊၁၆-၃-၂၀၂၅ ရက်နေ့မှ  ၁၈-၃-၂၀၂၅ ရက်နေ့ထိ မီး၊ ၂၀-၃-၂၀၂၅ ရက်နေ့မှ ၂၂-၃-၂၀၂၅ ရက်နေ့ထိ နှောင်၊ ၂၃-၃-၂၀၂၅ ရက်နေ့မှ ၂၅-၃-၂၀၂၅ ရက်နေ့ထိ အိပ်မက်ကာရန်၊ ၂၇-၃-၂၀၂၅ ရက်နေ့မှ ၂၉-၃-၂၀၂၅ရက်နေ့ထိ တိမ်ပန်းချီတို့ပြမှာဖြစ်ပါတယ်။ ကျွန်တော်မကြည့်ရသေးတဲ့ ဇာတ်ကားတွေကို Entertainment News တွေအဖြစ်သတင်းရယူရင်း   ကြည့်ရမယ့် ဇာတ်ကားတွေ ရက်စွဲတွေ ပွဲချိန်တွေကို မှတ်သားမိနေပါတယ်။ ကြည့်ရမယ့်နေရာကလည်း တစ်ကြိမ်ကြည့်ခဲ့ဖူးပြီး အစစခေတ်မီပြည့်စုံလှတဲ့ ရန်ကင်း၊ ဘောက်ထော်၊  မိုးကောင်းလမ်းမပေါ်က မြဝတီမီဒီယာစင်တာရဲ့ အဆင့်မြင့်ရုပ်ရှင်ရုံမှာဆိုတော့ အကယ်ဒမီဆုရဇာတ်ကားကောင်းတွေက  သွားရောက်ကြည့်ရှုဖြစ်မယ့် ကျွန်တော်အပါအဝင် ရုပ်ရှင်ချစ်ပရိသတ်ကြီးအတွက်  ရသတွေအပြည့်အဝပေးတော့မယ်ဆိုတာ  မြေကြီးလက်ခတ်မလွဲပါလို့   သတင်းကောင်းပါးလိုက်ပါရစေတော့။   ဇာတ်ကားကောင်းတွေကိုသွားရောက်ကြည့်ရှုရင်း   မြန်မာနိုင်ငံရုပ်ရှင်အစည်းအရုံးရဲ့ (၇၉)နှစ်မြောက်နှစ်ပတ်လည်နေ့ကိုဂုဏ်ပြုကြိုဆိုရင်းမြန်မာ့ရုပ်ရှင်ရက်သတ္တပတ်ကိုစောင့်မျှော်နေရင်း........ ။     ။

Source: https://myawady.net.mm/stories