ဂျပန်နိုင်ငံအပါအဝင် အမေရိကန်၏ အဓိကကုန်သွယ်ဖက်နိုင်ငံများသည် အမေရိကန် နိုင်ငံနှင့် ကုန်သွယ်မှုဆိုင်ရာ ညှိနှိုင်းဆွေးနွေးမှုများပြုလုပ်နေပြီး ယခုသီတင်းပတ်အတွင်း သဘောတူညီမှုများ ပြုလုပ်ရန် မျှော်လင့် ထားကြောင်း အမေရိကန်ဘဏ္ဍာရေးဝန်ကြီး Scott Bessent က မေလ ၆ ရက်နေ့တွင် ပြောကြားခဲ့သည်။

အမေရိကန်သည် ၎င်း၏ အရေးပါဆုံး ကုန်သွယ်ဖက်နိုင်ငံ ၁၈ နိုင်ငံ အနက် ၁၇ နိုင်ငံနှင့် ဆွေးနွေးမှုများ ပြုလုပ်နေပြီး အထူးသဖြင့် ဂျပန်နှင့် တောင်ကိုရီးယားတို့က တက်ကြွစွာ ပါဝင်ဆွေးနွေးနေလျက်ရှိကြောင်း၊ အကောက်ခွန်များ၊ အကောက်ခွန်မဟုတ်သော စီမံဆောင်ရွက်မှုများ၊ ငွေကြေးမတည်မငြိမ်ဖြစ်ခြင်းနှင့် အစိုးရအထောက်အပံ့များအား သိသိ သာသာ လျှော့ချနိုင်မည်ဟု မျှော်လင့်ထားပြီး ယခုနှစ်ကုန်တွင် ၎င်း၏ အဓိက ကုန်သွယ်ဖက်နိုင်ငံအများစုနှင့် သဘောတူညီချက်ရရှိမည်ဟု ခန့်မှန်းကြောင်း Bessent က ပြောကြားခဲ့သည်။

လက်ရှိတွင် တရုတ်နှင့် တိုက်ရိုက်ဆွေးနွေးမှုများ မစတင်သေးသော်လည်း အမေရိကန်-တရုတ် ပထမဆုံးကုန်သွယ်မှုဆိုင်ရာ ဆွေးနွေးပွဲကို ယခု သီတင်းပတ်အတွင်း ဆွစ်ဇာလန်တွင် ပြုလုပ်မည်ဖြစ်သည်။ အဆိုပါ ဆွေးနွေးပွဲတွင် အမေရိကန်ဘဏ္ဍာရေး ဝန်ကြီး Bessent နှင့် United States Trade Representative Jamieson Greer တို့သည် တရုတ်နိုင်ငံ အကြီးအကဲများနှင့် တွေ့ဆုံမည်ဖြစ်ပြီး စီးပွားရေးနှင့် ကုန်သွယ်မှုဆိုင်ရာ ကိစ္စရပ်များကို ဆွေးနွေးသွားမည်ဖြစ်သည်။

ကိုးကား-NHK World

Photo: AOL.com

ဘာသာပြန်ဆိုသူ-ဒေါ်မေသူခိုင်၊လက်ထောက်ညွှန်ကြားရေးမှူး၊နစက-၃

အဘူဒါဘီ၏ အစိုးရပိုင် ရင်းနှီးမြှုပ်နှံမှုကုမ္ပဏီ Mubadala မှ အားဖြည့်ထောက်ပံ့ထားသော UAE အခြေစိုက် AI အုပ်စု G42 သည် အမေရိကန် ဈေးကွက်သို့ ချဲ့ထွင်ရန် စီစဉ်နေကြောင်း Financial Times (FT) က ဖော်ပြခဲ့သည်။ သတင်းစာတွင် ကုမ္ပဏီသည် ဒေါ်လာဘီလီယံချီ၍ ရင်းနှီးမြှုပ်နှံကာ အမေရိကန်တွင် အခြေစိုက်မည်ဟုဆိုသည်။

အမေရိကန်သည် AI နှင့် ဆီမီးကွန်ဒတ်တာ ကဏ္ဍတွင် ဦးဆောင်နေသော်လည်း အခြားနိုင်ငံများကလည်း မိမိတို့၏ ကိုယ်ပိုင် AI နည်းပညာနှင့် ချစ်ပ်များ ဖွံ့ဖြိုးရန် စုပေါင်းအားထုတ်လာကြသည်။

FT ၏ တနင်္ဂနွေ (မေ ၄) ထုတ် ဆောင်းပါးတွင် G42 ကိုယ်စားလှယ်၏ အတည်ပြုချက်ကို ကိုးကားခဲ့ပြီး ၎င်းတို့သည် “အမေရိကန်ဈေးကွက်သို့ ချဲ့ထွင်ရန် ရည်မှန်းထားကာ ယင်းနည်းဗျူဟာအတွက် ဥပဒေရေးရာအခြေစိုက်ဌာန (Legal Entity) ပင် ထူထောင်ပြီးဖြစ်သည်” ဟု ဖော်ပြ ခဲ့သည်။

G42 ကို UAE ၏ အမျိုးသား လုံခြုံရေး အကြံပေး Sheikh Tahnoon bin Zayed al-Nahyan မှ ဦးဆောင်ပြီး ၎င်းသည်နိုင်ငံ၏ AI ကို ဗဟိုပြုသော စီးပွားရေးကွဲပြားမှု တွန်းအားပေးမှုကို ဦးဆောင်ခဲ့သူဖြစ်သည်။

ပြီးခဲ့သည့် ဧပြီလတွင် Microsoft သည် UAE အုပ်စုရှိ လူနည်းစု အစု ရှယ်ယာတစ်ခုအတွက် G42 တွင် ဒေါ်လာ ၁.၅ ဘီလီယံ ရင်းနှီးမြှုပ်နှံရန် ကတိပြုခဲ့သည်။ အခြားအမေရိကန် ရင်းနှီးမြှုပ်နှံသူများဖြစ်သော Ray Dalio မိသားစုနှင့် Private Equity ကုမ္ပဏီ Silver Lake တို့လည်း G42 တွင် ရင်းနှီးမြှုပ်နှံထားသည်။

၂၀၂၃ ခုနှစ်တွင် G42 သည် အမေရိကန် စည်းမျဉ်းများနှင့် လိုက်လျောညီထွေရှိစေရန် Huawei ကဲ့သို့သော အမေရိကန်ပြိုင်ဘက်တရုတ် Hardware ပေးသွင်းသူများနှင့် အဆက်အသွယ်ဖြတ်တောက်ထားကြောင်း ကြေညာ ခဲ့သည်။ 

UAE ၏ AI ကုမ္ပဏီကြီး G42 သည် အမေရိကန်ဈေးကွက်သို့ ကြီးမားသော ရင်းနှီးမြှုပ်နှံမှုများဖြင့် ဝင်ရောက်လာခြင်းဖြစ်ပြီး နိုင်ငံတကာ AI နှင့် နည်းပညာ ပြိုင်ဆိုင်မှုတွင် အာရပ်ကမ္ဘာ၏ နည်းပညာရပ်ဝန်းကို မြှင့်တင်ရန် ရည်ရွယ်နေသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အာဆီယံ + ၃ (ဂျပန်၊ တရုတ်၊ တောင်ကိုရီးယား) နိုင်ငံတို့သည် လွတ်လပ်သော ကမ္ဘာ့ကုန်သွယ်ရေးစနစ်ကို အပြည့်အဝ ထောက်ခံကြောင်း ထပ်မံ အတည်ပြုပြောကြားခဲ့သည်။ အမေရိကန်၏ ကုန်သွယ်ခွန်တိုးမြှင့် ကောက်ခံမှုများကြောင့် အာရှဒေသ၏ စီးပွားရေးထိခိုက်နိုင်ခြေကို စိုးရိမ်မှုများ မြင့်တက် နေချိန်တွင် ထိုသို့ထုတ်ပြန်ခဲ့ခြင်းဖြစ်သည်။ 

မေလ ၄ ရက်နေ့တွင် အီတလီနိုင်ငံ၌ ကျင်းပပြုလုပ်သည့် အစည်းအဝေးတွင် အာဆီယံ+၃ (ဂျပန်၊ တရုတ်၊ တောင်ကိုရီးယား) နိုင်ငံများ၏ ဘဏ္ဍာရေး ဝန်ကြီးများနှင့် ဗဟိုဘဏ်အကြီးအကဲများက ပူးတွဲကြေညာချက်တစ်ရပ် ကို ထုတ်ပြန်ခဲ့သည်။ 

အဆိုပါကြေညာချက်တွင် “၎င်းတို့၏ ဒေသတွင်း စီးပွားရေးအခြေအနေသည် မတည်မငြိမ်ဖြစ်နိုင်သည့် စိန်ခေါ်မှုများနှင့် ရင်ဆိုင်နေရကြောင်း၊ ပြည်ပကုန်သွယ်မှုက ပြည်တွင်းကုန်သွယ်မှုအား ယှဉ်ပြိုင်မှု တဖြည်းဖြည်း မြင့်တက်လာခြင်းသည် ကမ္ဘာ့ကုန်သွယ်ရေးအပေါ် သက်ရောက်မှုရှိပြီး ထိုမှတစ်ဆင့် စီးပွားရေးကျဆင်းစေကာ အာဆီယံနှင့် ဒေသတွင်းနိုင်ငံများ ၏ ကုန်သွယ်မှု၊ ရင်းနှီးမြှုပ်နှံမှုနှင့် ငွေကြေးစီးဆင်းမှုများကို ထိခိုက်စေသည်” ဟု ဖော်ပြထားသည်။ 

ထို့ပြင် ကမ္ဘာ့ကုန်သွယ်ရေးအဖွဲ့ (WTO) ကို အခြေခံသော စည်းမျဉ်းများနှင့်အညီလွတ်လပ်မျှတ၍ ဘက်မလိုက်သော၊ နိုင်ငံအားလုံး ပါဝင်နိုင်သော ပွင့်လင်းမြင်သာသည့် ကုန်သွယ်ရေးစနစ်ကို အပြည့်အဝ ထောက်ခံကြောင်း နိုင်ငံ့ခေါင်းဆောင်အကြီးအကဲများအားလုံးက ထပ်မံကတိပြု ပြောကြားခဲ့ပြီး ဒေသတွင်းကုန်သွယ်ရေးနှင့် ရင်းနှီးမြှုပ်နှံမှုများ တိုးမြှင့် လုပ်ဆောင်သွားရန် သဘောတူညီခဲ့ကြသည်။ 

“ဂျပန်နိုင်ငံအနေဖြင့် အမေရိကန်နိုင်ငံအား ၎င်း၏ ကုန်သွယ်ခွန်တိုးမြှင့် ကောက်ခံခြင်းဆိုင်ရာ အစီအမံများကို ပြန်လည်သုံးသပ်ရန် အလေးအနက် တိုက်တွန်းမည်” ဟု ဂျပန်နိုင်ငံ ဘဏ္ဍာရေးဝန်ကြီး Kato Katsunobu က အစည်းအဝေးအပြီးတွင် သတင်းထောက်များအား ပြောကြားခဲ့သည်။

ထို့အပြင် အာဆီယံ+၃ နိုင်ငံများသည် ဒေသတွင်းနိုင်ငံများနှင့်သာမက နိုင်ငံတကာနှင့် ပူးပေါင်းဆောင်ရွက်ရန်နှင့် နိုင်ငံအချင်းချင်း သဘောထားအမြင်များ အပြန်အလှန်ဖလှယ်ရန် အရေးကြီးကြောင်း Kato Katsunobu က ဖြည့်စွက်ပြောကြားခဲ့သည်။  

ကိုးကား-NHK

ဘာသာပြန်ဆိုသူ- ဒေါ်မေသူခိုင်၊ လက်ထောက်ညွှန်ကြားရေးမှူး၊ နစက-၃

အိန္ဒိယနိုင်ငံသည် ကမ္ဘာ့နိုင်ငံများအနက် ဆန်အမျိုးအစားသစ် (၂) မျိုးကို စတင်မိတ်ဆက်နိုင်ခဲ့သည့် ပထမဦးဆုံးသောနိုင်ငံဖြစ်လာပါသည်။ အိန္ဒိယ နိုင်ငံ၊ စိုက်ပျိုးရေးသုတေသနကောင်စီ (ICAR) မှ ထုတ်လုပ်ခဲ့သည့် ဆန်အမျိုးအစားသစ် (၂) မျိုးကို စိုက်ပျိုးရေးဝန်ကြီး Shivraj Singh က မိတ်ဆက်ခဲ့ပါသည်။ ထို့နောက် ဝန်ကြီးက “ဖော်ပြပါ ဆန်အမျိုးအစား များကို ထုတ်လုပ်ခဲ့သည့် စိုက်ပျိုးရေးပညာရှင်များအား ဂုဏ်ပြုကြောင်း နှင့် အိန္ဒိယနိုင်ငံမှ စိုက်ပျိုးရေးပညာရှင်များ၏ စွမ်းရည်ကို ယုံကြည်ပါ ကြောင်း ပြောကြားခဲ့ပါသည်။ 

ပထမဆန်အမျိုးအစား၏အမည်မှာ DRR ဖြစ်ပြီး ယင်းမှာ မူလဆန် အမျိုးအစား Samba Mahsuri မှ ဆင်းသက်လာခြင်း ဖြစ်ပါသည်။ ၁၅ ရက် မှ ၂၀ ရက် အတွင်း စပါးရင့်မှည့်ပါသည်။ ဒုတိယအမျိုးအစားမှာ Pusa DST အမျိုးအစားဖြစ်ပြီး အငံဓာတ်ကို ခံနိုင်ရည်ရှိ၍ အငံဓာတ်ပေါများ သော နေရာဒေသတွင်အထွက်နှုန်း ၃၀ ရာခိုင်နှုန်းပိုမိုထွက်ရှိနိုင်ပါသည်။ 

ဖော်ပြပါ ဆန်အမျိုးအစားများကို သတ်မှတ်လျာထားသည့် လယ်ဧက ၅ သန်းတွင် စိုက်ပျိုးသွားမည်ဖြစ်ပြီး ခန့်မှန်းခြေ စပါးတန်ချိန်ပေါင်း ၄.၅ သန်း ပိုမိုရရှိလိမ့်မည်ဟု မျှော်မှန်းထားပါသည်။ 

ဖော်ပြပါ ဆန်အမျိုးအစားများသည် ထုတ်လုပ်မှုစရိတ်ကို သက်သာစေပြီး စပါးအထွက်နှုန်းကို ပိုမိုတိုးမြှင့်စေကြောင်း သတင်းရရှိပါသည်။

ကိုးကား- India News

Photo: The Morung Express

ဘာသာပြန်ဆိုသူ- ဒေါ်မေသူဌေး၊ ဦးစီးအရာရှိ၊ နစက-၃

တရုတ်နိုင်ငံသည် စည်းကြပ်ခွန်စစ်ပွဲကို မတိုက်ချင်သော်လည်း တိုက်ရန် မကြောက်ရွံ့ကြောင်း ၊ အကယ်၍ အမေရိကန်ဘက်က ဆွေးနွေးမည်ဟု စီစဉ်ထားပါက တန်းတူညီမျှရှိမှု၊ လေးစားမှု၊ အပြန်အလှန် အကျိုးဖြစ်ထွန်းမှုရှိသော သဘောထားကို ပြသသင့်ကြောင်း အမေရိကန်နိုင်ငံ ဆိုင်ရာ တရုတ်နိုင်ငံသံရုံးက မေ ၃ ရက်တွင် ကျင်းပသည့် အများပြည်သူ လာရောက်လည်ပတ်ရန် သံရုံးဖွင့်လှစ်သည့်နေ့နှင့် ကန်းစုပြည်နယ် မိတ်ဆက်ပွဲအခမ်းအနားတွင် အမေရိကန်နိုင်ငံဆိုင်ရာ တရုတ်သံ အမတ်ကြီး ရှဲ့ဖုန်းက ပြောကြားခဲ့သည်။

အမေရိကန်သည် နိုင်ငံတကာကုန်သွယ်ရေးမှ အကျိုးအမြတ်များစွာ ခံစားရကြောင်း၊ ကမ္ဘာတစ်ဝန်းမှ ဈေးနှုန်းချိုသာသော ကုန်ပစ္စည်းကောင်းများကို စံစားခွင့်ရသလို ဘဏ္ဍာရေး၊ သိပ္ပံနည်းပညာ၊ ဝန်ဆောင်မှု စသည့် ထပ်တိုးတန်ဖိုးမြှင့်ကဏ္ဍများတွင်လည်း သိသာထင်ရှားသော အားသာချက်ကို ရယူထားကြောင်း ရှဲ့ဖုန်းက ပြောကြားခဲ့သည်။ ၂၀၂၂ ခုနှစ်က တရုတ်နိုင်ငံရှိ အမေရိကန်လုပ်ငန်းကုမ္ပဏီများ၏ ရောင်းအားပမာဏသည် တရုတ် လုပ်ငန်းကုမ္ပဏီများ၏ အမေရိကန်နိုင်ငံတွင် ရောင်းအားပမာဏထက် ကန်ဒေါ်လာ ဘီလီယံ ၄၀၀ ကျော် ပိုများကြောင်း၊ တရုတ်-အမေရိကန်၏ ကုန်သွယ်စီးပွားကဏ္ဍ ပူးပေါင်းဆောင်ရွက်မှုသည် ယေဘုယျအားဖြင့် ဟန်ချက်ညီမှုနှင့် နှစ်ဖက်အကျိုးဖြစ်ထွန်းမှုရှိကြောင်း၊ စည်းကြပ်ခွန်ကို အလွဲသုံးခြင်းသည် နှစ်ဖက်စလုံးကို ထိခိုက်စေသလို ကုမ္ပဏီလုပ်ငန်းများ ပုံမှန် ထုတ်လုပ်လည်ပတ်မှုနှင့် ပြည်သူလူထု စားဝတ်နေရေးသုံးစွဲမှုကို အနှောင့်အယှက်ဖြစ်စေကြောင်း၊ ကမ္ဘာတစ်ဝန်း ဘဏ္ဍာရေး ဈေးကွက်ကို ပြင်းပြင်းထန်ထန်ဂယက်ထစေပြီး ကမ္ဘာ့စီးပွားရေး ရေရှည်တည်ငြိမ်စွာ တိုးတက်ရေးကို ပျက်စီးစေကြောင်း ၎င်းက ပြောကြားခဲ့သည်။

နိုင်ငံတကာအခြေအနေ မည်သို့ပင် ပြောင်းလဲစေကာမူ တရုတ်နိုင်ငံသည် အရည်အသွေးမြင့် ဖွံ့ဖြိုးတိုးတက်ရေး၊ အဆင့်မြင့် တံခါးဖွင့်လှစ်ရေး၏ တည်ငြိမ်မှုကို ဆက်လက်ဆောင်ရွက်ကာ ပြင်ပ မတည်ငြိမ်မှုများအား ရင်ဆိုင်သွားမည် ဖြစ်ကြောင်း ရှဲ့ဖုန်းက အလေးထားပြောကြားခဲ့သည်။ တရုတ်နိုင်ငံသည် ကမ္ဘာတွင် ဒုတိယအကြီးဆုံး စားသုံးသူ ဈေးကွက် ဖြစ်သလို ပမာဏအကြီးမားဆုံးသော ဝင်ငွေအလယ်အလတ်အဆင့်ရှိ လူအုပ်စုရှိရာ နိုင်ငံနှင့် ဒေသပေါင်း ၁၅၀ ကျော် ၏ အဓိက ကုန်သွယ်ရေး မိတ်ဖက် ဖြစ်နေကြောင်း၊ ယခုနှစ် ပထမသုံးလပတ်တွင် တရုတ်နိုင်ငံ၏ စီးပွားရေးသည် ထွန်းထွန်းတောက်တောက် ဖြစ်ခဲ့ရာ ပြည်တွင်း အသားတင် ထုတ်လုပ်မှုတန်ဖိုး （GDP）သည် ယမန်နှစ် ကာလတူထက် ၅.၄ ရာခိုင်နှုန်း တိုးမြင့်လာသလို တင်ပို့မှုကဏ္ဍတွင် ဖိအားများကို ရေဆန်တက်၍ ၆.၉ ရာခိုင်နှုန်း တိုးတက်လာပြီး နိုင်ငံတကာဈေးကွက် မိတ်ဆွေအသိုက် အဝန်း ပို၍ ကြီးမားလာကြောင်း ၎င်းက ပြောကြားခဲ့သည်။

ကိုးကား- Xinhua

အမေရိကန် ကုန်သည်ကြီးများအသင်း (USCC) က ၎င်းတို့အဖွဲ့အစည်းအနေဖြင့် လွန်ခဲ့သည့်ရက်က အမေရိကန်အစိုးရကို စာလွှာပေးပို့ပြီး အသေးစားလုပ်ငန်းများအပေါ် “ပြန်လည်ဖြည့်ဆည်းမရသော ထိခိုက် နစ်နာမှု” မဖြစ်စေရန် ၊ ယင်းလုပ်ငန်းများအပေါ် အခွန်ကင်းလွတ်ခွင့်ပြုရန် တောင်းဆိုခဲ့ကြောင်း မေ ၁ ရက် တွင် ကြေညာချက်ထုတ်ပြန် ပြောကြားခဲ့သည်။

ယခုကာလများတွင် စည်းကြပ်ခွန်က အမေရိကန်စီးပွားရေးအပေါ် အနုတ်လက္ခဏာ သက်ရောက်မှုများ ဖြစ်ပေါ်ခဲ့ခြင်းကို ထည့်သွင်းစဉ်းစား၍ ကုန်သွယ်ရေးမိတ်ဖက်များနှင့်ဆွေးနွေးမှု အမြန်ဆုံး အောင်မြင်ပြီး မြောက်အောင် ဆောင်ရွက်ရန်၊ ထိုမှတစ်ဆင့် အမေရိကန်၏ ယခုနှစ်မှစ၍ ထပ်တိုးထားသည့် စည်းကြပ်ခွန် များကို ဖယ်ရှားရန်မှာ အလွန်အရေးကြီးကြောင်း အမေရိကန် ကုန်သည်ကြီးများအသင်း (USCC) ၏ ပေးစာ တွင် ရေးသားထားသည်။ အဆိုပါအဖွဲ့အစည်းက အမေရိကန်အစိုးရကို “ချက်ချင်းလှုပ်ရှား ဆောင်ရွက်ရန်”၊ အမေရိကန်အသေးစားလုပ်ငန်းများအား ကယ်ဆယ်ရန်၊ အမေရိကန်စီးပွားရေး ဆုတ်ယုတ်မှုသို့ သက်ဆင်းခြင်း အား ရှောင်ရှားရန် တောင်းဆိုထားကြောင်း သိရသည်။

အမေရိကန် ကုန်သည်ကြီးများအသင်း (USCC) ၏ ပေးစာတွင် အသေးစိတ်တောင်းဆိုချက် ၃ ရပ်ကို အဆိုပြုခဲ့သည်။ ၎င်းတို့မှာ ပထမအနေဖြင့် အသေးစား သွင်းကုန်လုပ်ငန်း အားလုံးကို အလိုအလျောက် အခွန်ကင်းလွတ်ခွင့်ပေးရန်၊ ဒုတိယအနေဖြင့် အမေရိကန်တွင် ထုတ်လုပ်၍ မရသော သို့မဟုတ် ရရှိရန် မလွယ်ကူသော ထုတ်ကုန်ပစ္စည်းအားလုံးကို အခွန်ကင်းလွတ်ခွင့်ပေးရန် တတိယအနေဖြင့် စည်းကြပ်ခွန်က အလုပ်အကိုင်နေရာချထားမှုအပေါ် အန္တရာယ်ဖြစ်လာသည်ဟု သက်သေပြနိုင်သော ကုမ္ပဏီများအတွက် အခွန်ကင်းလွတ်ခွင့် လျှောက်ထားမှုအစီအစဉ် တည်ဆောက်ရန်ဖြစ်ကြောင်း သိရသည်။ ပေးစာတွင် ကော်ဖီ၊ ငှက်ပျောသီး၊ ကိုကိုး၊ အချို့သော သတ္တုပစ္စည်းစသည့် ထုတ်ကုန်များနှင့် ဝယ်သူအလိုကျ အထူးပြုလုပ် ရသော စက်မှုကုန်ကြမ်းပစ္စည်းများမှာ အမေရိကန်၌ ရရှိရန် မလွယ်ကူကြောင်း၊ ယင်းထုတ်ကုန်ပစ္စည်းများ အပေါ် စည်းကြပ်ခွန် ထပ်တိုးကောက်ခံခြင်းသည် အသေးစားလုပ်ငန်းများနှင့် စားသုံးသူများအတွက် ကုန်ဈေးနှုန်း မြင့်မားလာမှုကိုသာ သယ်ဆောင်လာမည်ဖြစ်ကြောင်း ဖော်ပြထားသည်။

အချိန်ကြာလာသည်နှင့်အမျှ အသေးစားလုပ်ငန်းများ ရင်ဆိုင်နေရသည့် အရင်းအနှီးမြင့်မားမှုနှင့် ထောက်ပံ့ရေး ကွင်းဆက် ပြတ်တောက်မှု၏ ခြိမ်းခြောက်မှုသည် ပို၍ ဆိုးရွားလာပြီး “ပြန်လည် ဖြည့်ဆည်းမရသော ထိခိုက် နစ်နာမှု” ဒဏ်ခံရနိုင်ကြောင်း အမေရိကန်ကုန်သည်ကြီးများအသင်း (USCC) ဥက္ကဋ္ဌနှင့် အမှုဆောင် အရာရှိချုပ် Suzanne Clark က ကြေညာချက်တွင် ပြောကြားခဲ့သည်။ 

ကိုးကား- Xinhua

ပြည်ပမှ ထုတ်လုပ်သော ရုပ်ရှင်အားလုံးကို ၁၀၀ % အခွန်စည်းကြပ်မည်ဟု အမေရိကန်သမ္မတဒေါ်နယ်ထရမ့်က မေလ ၄ ရက်က ၎င်း၏ Truth Social တွင် ရေးသားဖော်ပြထားပါသည်။ 

အမေရိကန်ရုပ်ရှင်လုပ်ငန်း အချိန်နှင့်အမျှ ကျဆုံးလျက်ရှိနေကြောင်း၊ အခြားနိုင်ငံများကို အားပေးသည့်အနေဖြင့် အမေရိကန်ရုပ်ရှင်ထုတ်လုပ်သူများ၊ စတူဒီယိုများ မိမိနိုင်ငံမှ ထွက်ခွာသွားအောင် လုပ်ဆောင်လျက်ရှိကြောင်း၊ ဟောလိဝုဒ်မှာ ထိုအခြေအနေများကြောင့် ပြင်းပြင်းထန်ထန် အထိနာလာရကြောင်း၊ ၎င်းမှာ အမျိုးသားလုံခြုံရေးအရ ခြိမ်းခြောက်မှုတစ်ခုဖြစ်လာကြောင်း ထရမ့်က ပြောကြားထားပါသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာနနှင့် အမေရိကန် ကုန်သွယ်ရေးကိုယ်စားလှယ်များကို အစီအစဉ် ချက်ချင်းစတင်ရန် အာဏာလွှဲအပ်ပြီး အမေရိကန်သို့ ပြည်ပမှ ဝင်ရောက်လာသော ရုပ်ရှင်အားလုံးကို ၁၀၀ % ကောက်ခံသွားမည်ဖြစ်ကြောင်း၊ အမေရိကန်ထုတ် ရုပ်ရှင်ကို ထပ်မံပိုင်ဆိုင်ခွင့်ရရှိရန် မျှော်လင့်နေကြောင်း ဒေါ်နယ်ထရမ့် က ထပ်လောင်းပြောကြားထားပါသည်။

ကိုးကား- The Hollywood Reporter

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ဥရောပရှိ မော်တော်ယာဉ်ထုတ်လုပ်သည့်ကုမ္ပဏီကြီးများသည် ယခုအခါ အကျပ်အတည်းများနှင့် ရင်ဆိုင်ရလျက်ရှိသည်။ အထူးသဖြင့် ဂျာမနီကားကုမ္ပဏီကြီးများသည် အကျိုးအမြတ်ပမာဏကျဆင်းလာခြင်း၊ ဝန်ထမ်းများကို အလုပ်မှရပ်ဆိုင်းရခြင်းနှင့် လုပ်ငန်းအချို့ကို ပိတ်သိမ်းပစ်ရခြင်း စသည့်အကျပ်အတည်းများနှင့် ရင်ဆိုင်နေရသည်။

အထူးသဖြင့် ကမ္ဘာကျော်ကားကုမ္ပဏီကြီးများဖြစ်သည့် BMW၊ Volkswagen နှင့် Mercedes-Benz တို့မှာ  ပိုမိုအထိနာလျက်ရှိသည်ကိုတွေ့ရသည်။ ထိုသို့ ဥရောပကားကုမ္ပဏီကြီးများ ဆုံးရှုံးမှုနှင့် ရင်ဆိုင်ရခြင်းမှာ ရုရှားနိုင်ငံအပေါ်ချမှတ်ခဲ့သည့်ပိတ်ဆို့မှုများကြောင့် နောက်ဆက်တွဲအဖြစ်ထွက်ပေါ်လာသည့် ဓာတ်ငွေ့ဈေးနှုန်းမြင့်တက်မှု၊   ကားဈေးကွက်အတွင်းသို့ ပြည်ပမှထုတ်လုပ်ထားသည့် မော်တော်ကားများ ဝင်ရောက်လာမှုနှင့် အဆိုပါ ဥရောပကားကုမ္ပဏီများ၏ တွက်ချက်မှု မှားယွင်းခြင်းတို့ကြောင့် ဖြစ်သည်ဟုဆိုနိုင်သည်။

လွန်ခဲ့သည့်  ၂၀၂၄ ခုနှစ်က ထုတ်ပြန်သည့် အချက်အလက်များအရ BMW ကုမ္ပဏီ၏ အမြတ်အစွန်းပမာဏကျဆင်းမှုသည် ၃၇ ရာခိုင်နှုန်းအထိရှိခဲ့သည့်အပြင် Volkswagen ကုမ္ပဏီက ၃၃ ရာခိုင်နှုန်းနှင့် Mercedes-Benz ၏ အမြတ်အစွန်းပမာဏကျဆင်းမှုသည် ၄၀ ဒသမ ၅ ရာခိုင်နှုန်းခန့်ရှိသည်။ ထိုသို့ အမြတ်အစွန်းပမာဏကျဆင်းလာမှုကြောင့် Volkswagen ကုမ္ပဏီက နိုင်ငံအတွင်းရှိ ကားထုတ်လုပ်ရေးစက်ရုံအချို့ကို ပိတ်ပစ်မည်ဟု   အရိပ်အမြွက်ပြောကြားခဲ့သည်။

ထို့ပြင် Volkswagen ကုမ္ပဏီ၏ တန်ဖိုးစုစုပေါင်းသည် ငါးနှစ်အတွင်းမှာပင် ၃၀ ရာခိုင်နှုန်းကျဆင်းလာခဲ့သည်။ အလားတူပင် အခြားနာမည်ကြီးကုမ္ပဏီတစ်ခုဖြစ်သည့် Audi အနေဖြင့်  လာမည့် ၂၀၂၉ ခုနှစ်ခန့်တွင် ခန့်အပ်ထားသည့် အလုပ်သမားဦးရေအနက် ၇၀၀၀ ကျော် ကို အလုပ်မှရပ်ဆိုင်းရန်စီစဉ်ထားသည်။ အဆိုပါကုမ္ပဏီသည် ၂၀၁၉ ခုနှစ်မှစ၍ ဝန်ထမ်းစုစုပေါင်း ၄၈၀၀၀ ခန့်ကို အလုပ်မှရပ်ဆိုင်းထားပြီးဖြစ်သည်။

ဥရောပသမဂ္ဂအဖွဲ့ သို့မဟုတ် အီးယူက ရုရှားနိုင်ငံအပေါ် အကြောင်းအမျိုးမျိုးပြ၍ ပိတ်ဆို့မှုများချမှတ်ခဲ့ခြင်းနှင့် ရုရှားနိုင်ငံမှ ထုတ်လုပ်သည့် သဘာဝဓာတ်ငွေ့အား အီးယူအဖွဲ့ဝင်နိုင်ငံများ၏ ဈေးကွက်အတွင်းသို့တင်သွင်းရန် အီးယူအဖွဲ့မှတာဝန်ရှိသူများက တားမြစ်ဟန့်တားခဲ့ခြင်းသည် ဥရောပနိုင်ငံအချို့တွင်   စွမ်းအင်ဈေးနှုန်းကို အဆမတန်မြင့်တက်လာစေခဲ့သည်။

ထို့ပြင် အီးယူနိုင်ငံများအတွင်း၌ ဝယ်လိုအားကျဆင်းလာခြင်း၊ အခြားနိုင်ငံများမှ ထုတ်လုပ်သည့် မော်တော်ကားကုမ္ပဏီများ၏ပြိုင်ဆိုင်မှုများနှင့် ဥရောပထုတ် မော်တော်ကားအချို့မှာ တရုတ်လျှပ်စစ်ကားနှင့် Tesla မှ ထုတ်လုပ်သည့် မော်တော်ကားများ၏ နည်းပညာနှင့် နှိုင်းယှဉ်ပါက နောက်ကောက်ကျနေခြင်းတို့ကြောင့် ဝယ်လိုအားမှာကျဆင်းလာခြင်းဖြစ်သည်။

အီးယူအဖွဲ့ရှိ အင်အားကြီးနိုင်ငံတစ်နိုင်ငံဖြစ်သည့် ဂျာမနီနိုင်ငံသည် လက်ရှိတွင် လျှပ်စစ်ဓာတ်အားဈေးနှုန်းများ အဆမတန်မြင့်တက်မှုနှင့်ရင်ဆိုင်နေရသည်။ ယင်းနိုင်ငံ၏ လျှပ်စစ်ဓာတ်အားဈေးနှုန်းသည် အမေရိကန်ပြည်ထောင်စု၊ တရုတ်နိုင်ငံတို့နှင့် နှိုင်းယှဉ်ပါကများစွာမြင့်တက်လျက်ရှိသည်။   ထို့ကြောင့် နည်းပညာသစ်များ  ထုတ်လုပ်ရာတွင် ရင်းနှီးမြှုပ်နှံမှုများကို   ထိရောက်စွာလုပ်ဆောင်နိုင်ခြင်းမရှိပေ။

ထို့ပြင် အီးယူအဖွဲ့ဝင်နိုင်ငံများ၌ လာမည့် ၂၀၃၅ ခုနှစ်ခန့်တွင် လျှပ်စစ်ကားအသုံးပြုခြင်းကို  အပြည့်အဝပြောင်းလဲဖော်ဆောင်ရန် အီးယူအဖွဲ့က တောင်းဆိုထားသော်လည်း အဆိုပါအစီအစဉ်မှာ လက်ရှိအခြေအနေများအရ  ဖြစ်လာနိုင်ခြေနည်းပါးလျက်ရှိသည်။ အကြောင်းမှာ အီးယူအဖွဲ့ဝင်နိုင်ငံများတွင် လျှပ်စစ်ကားအသုံးပြုမှုနှုန်းသည် ၂၀၂၄ ခုနှစ်တွင် ၂၅ ရာခိုင်နှုန်းအထိ   တိုးတက်လာစေရန် မျှော်မှန်းခဲ့သော်လည်း လက်တွေ့တွင် အသုံးပြုမှုနှုန်းမှာ ၁၃ ဒသမ ၆ ရာခိုင်နှုန်းသာရှိသောကြောင့်ဖြစ်သည်။

တစ်ချိန်တည်းမှာပင် တရုတ်နိုင်ငံသည် ဂျာမနီနိုင်ငံမှထုတ်လုပ်သည့် မော်တော်ကားများကို   ဝယ်ယူခြင်းမရှိတော့ဘဲ ဥရောပရှိ ၎င်းတို့၏ဈေးကွက်ကိုပါ ပိတ်ထားခဲ့ပြီးဖြစ်သည်။ ထို့ပြင် ယခုနှစ် ဧပြီလ ၃ ရက်မှစ၍ အမေရိကန်အစိုးရက အီးယူနိုင်ငံများမှ   တင်သွင်းလာသည့် မော်တော်ယာဉ် တင်သွင်းမှုများအပေါ် အခွန် ၂၅ ရာခိုင်နှုန်းကောက်ခံရန် ဆုံးဖြတ်လိုက်ခြင်းသည် ဥရောပကားကုမ္ပဏီများအတွက် ခံရခက်သည့်ထိုးနှက်မှုတစ်ရပ်ဖြစ်လာခဲ့သည်။ အကြောင်းမှာ ဥရောပကားကုမ္ပဏီများသည် ၎င်းတို့ထုတ်လုပ်သည့် မော်တော်ကားစုစုပေါင်း၏ ၁၃ ရာခိုင်နှုန်းခန့်ကို အမေရိကန်ပြည်ထောင်စုသို့ တင်ပို့နေခြင်းကြောင့်ပင်ဖြစ်သည်။

ဥရောပကားထုတ်လုပ်ရေးကဏ္ဍသည် လက်ရှိတွင် ဝန်ထမ်းဦးရေ ၁၄ သန်းခန့်ကို အလုပ်အကိုင် ခန့်အပ်ထားသော်လည်း ယခုအခါ ပြည်တွင်းနှင့်ပြည်ပမှ ဝယ်လိုအားမှာကျဆင်းလာခဲ့သည်။ ထို့ပြင် လျှပ်စစ်ကားထုတ်လုပ်ရာတွင် အသုံးပြုသည့် ဘက်ထရီများ၏ကုန်ကျစရိတ်မှာ ကြီးမြင့်ခြင်းကြောင့်   အီးယူနိုင်ငံများ၌ လျှပ်စစ်ကားထုတ်လုပ်ရာတွင် ဈေးနှုန်းမှာပိုမိုများပြားလျက်ရှိသည်။ တရုတ်နိုင်ငံသည် ယခုအခါ နည်းပညာပိုမိုဆန်းသစ်သည့် လျှပ်စစ်ကားအများအပြားကို ထုတ်လုပ်လျက်ရှိသည့်အပြင် ဈေးနှုန်းမှာလည်း အီးယူမှကားကုမ္ပဏီများထက် ၃၀ ရာခိုင်နှုန်း သက်သာလျက်ရှိသည်။

ထို့ကြောင့် အီးယူနိုင်ငံများအနေဖြင့် ဈေးနှုန်းသက်သာသည့် စွမ်းအင်အရင်းအမြစ်များမရှိပါက မော်တော်ကားထုတ်လုပ်မှုကဏ္ဍတွင်   အခြားနိုင်ငံများနှင့် ပြိုင်ဆိုင်နိုင်စွမ်းရှိမည် မဟုတ်ကြောင်း စိန့်ပီတာစဘာ့ ပြည်နယ်တက္ကသိုလ်မှ ပါမောက္ခတစ်ဦးဖြစ်သူ   နာတာလီယာ အီရီမီနာက   ထောက်ပြထားသည်။ ဆိုလိုသည်မှာ   အီးယူမော်တော်ကား

ကုမ္ပဏီများ သို့မဟုတ် ဓာတုလုပ်ငန်း အနေဖြင့် ၎င်းတို့၏လုပ်ငန်းများကို ပြိုင်ဆိုင်နိုင်စွမ်းကောင်းစွာဖြင့်   လည်ပတ်နိုင်ရေးအတွက် ရုရှားနိုင်ငံမှ စွမ်းအင်အရင်းအမြစ် အများအပြားလိုအပ်မည်ဖြစ်သည်။

ထို့ပြင် အီးယူနိုင်ငံများအနေဖြင့် မော်တော်ကားဈေးကွက်တွင် ယှဉ်ပြိုင်နိုင်စွမ်း ပိုမိုကောင်းမွန်တိုးတက်လာစေရန်အတွက် နှစ်စဉ် ယူရို ၈၀၀ ဘီလီယံခန့်ကို ရင်းနှီးမြှုပ်နှံရန်နှင့်ဥရောပစက်မှုလုပ်ငန်းဆိုင်ရာ   မဟာဗျူဟာသစ်တစ်ရပ်ကို ချမှတ်ဖော်ဆောင်ရန် လိုအပ်သည်ဟု ဥရောပဗဟိုဘဏ်ဥက္ကဋ္ဌဟောင်း မာရီယို ဒရာဂီက  စာမျက်နှာ  ၄၀၀  ပါသည့် အစီရင်ခံစာတစ်စောင်တွင် အကြံပြုထားခြင်းဖြစ်သည်။               

Ref: Iz

မောင်ယုယ

Source: https://myawady.net.mm/

BYD နှင့် Chery အပါအဝင် တရုတ် ကားထုတ်လုပ်သည့် ကုမ္ပဏီများသည် တရုတ်ထုတ် လျှပ်စစ်ကားများအပေါ် ဥရောပကော်မရှင်က ကြပ်မတ်ထားသော ကုန်သွယ်ခွန်ကို ရှောင်ရှားရန် Plugin-Hybrid (PHEV) ကား များကို ဥရောပတွင် ပိုမိုရောင်းချလျက်ရှိကြောင်း မတ်လ ၂ ရက် (သောကြာနေ့) က ထုတ်ပြန်သည့် အချက်အလက်များအရ သိရပါသည်။ 

၂၀၂၅ ခုနှစ်၊ မတ်လတွင် BYD သည် ဥရောပ၌ PHEV ၃,၂၆၉ စီး၊ Chery က ၇၅၇ စီး ရောင်းချခဲ့ပြီး ထိုပမာဏမှာ ယမန်နှစ် ဇူလိုင်တွင် အခွန် စည်းကြပ်ခံရစဉ်က သုညနီးပါးမှ သိသိသာသာ တိုးတက်လာခြင်း ဖြစ်ပါ သည်။ ယခုအခါ PHEV များသည် တရုတ်ထုတ် လျှပ်စစ်ကားများအတွက်အခွန်စည်းကြပ်မှုဒဏ်ကို ရှောင်ရှားနိုင်သည့် ရွေးချယ်စရာတစ်ခု ဖြစ်လာ သည်ဟု Rho Motion သုတေသနအဖွဲ့ အစီရင်ခံစာအရ    သိရပါသည်။ 

ဥရောပသမဂ္ဂသည် ပြီးခဲ့သည့် နိုဝင်ဘာလကတည်းက တရုတ်ထုတ် လျှပ်စစ်ကား (BEV) များအပေါ် ၄၅.၃ % အထိ အကောက်ခွန် စည်းကြပ်ထားပါသည်။ 

Plugin-Hybrid (PHEV) ဆိုသည်မှာ ဓာတ်ဆီ/ဒီဇယ်အင်ဂျင်နှင့် ဘက်ထရီ ဖြင့် နှစ်မျိုးလုံးမောင်းနိုင်သော ကားမျိုးဖြစ်ပြီး၊ ယင်းကားမှာ လျှပ်စစ်ကားများထက် အနည်းငယ် အကောက်ခွန်နည်းပါးသဖြင့် တရုတ်ထုတ် ကုမ္ပဏီ များအတွက် ပိုမိုအဆင်ပြေစေပါသည်။

ကိုးကား- Reuters

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

အမေရိကန်သမ္မတ Donald Trump အစိုးရအဖွဲ့သည် မော်တော်ယာဉ် အင်ဂျင်နှင့် ဂီယာများအပါအဝင် အဓိက ကားပစ္စည်းအစိတ်အပိုင်းများအပေါ် နောက်ထပ် ၂၅ ရာခိုင်နှုန်း အခွန်စည်းကြပ်လိုက်ပါသည်။

ဧပြီလ ၃ ရက်နေ့တွင် နိုင်ငံခြားထုတ်မော်တော်ယာဉ်များအပေါ် ၂၅ ရာခိုင်နှုန်း အခွန်စည်းကြပ်လိုက်ပြီးနောက် မကြာမီ စနေနေ့ (မတ်လ ၃) UTC စံတော်ချိန် ၄း၀၀ နာရီတွင် ယခုကဲ့သို့ လုပ်ဆောင်လိုက်ခြင်း ဖြစ်ပါသည်။

အမေရိကန်အစိုးရက နိုင်ငံ့လုံခြုံရေးကို ခြိမ်းခြောက်သည့်သွင်းကုန်များကို သမ္မတက ကန့်သတ်မှု ခွင့်ပြုထားသည့် ၁၉၆၂ ခုနှစ် ကုန်သွယ်ရေးတိုးချဲ့မှုဥပဒေ ပုဒ်မ ၂၃၂ ကို အကြောင်းပြခဲ့ပါသည်။

သို့သော် အမေရိကန် ကားထုတ်လုပ်သူများ၏ စိုးရိမ်ကြောင်း ပြောဆိုချက်များကြောင့် Trump အစိုးရသည် ၎င်း၏ မော်တော်ယာဉ်ဆိုင်ရာ စည်းကြပ်ခွန် အချို့ကို ဖြေလျှော့ရန် ဆုံးဖြတ်ချက်ကို ယခုသီတင်းပတ် အစောပိုင်းက ကြေညာခဲ့ပါသည်။ အဆိုပါထုတ်လုပ်သူများသည် အခြားနိုင်ငံမှ ပစ္စည်း အစိတ်အပိုင်းများ တင်သွင်းနေသည့်အတွက် အဆိုပါအခွန်စည်းကြပ်မှု က ၎င်းတို့၏ ထုတ်လုပ်မှုကုန်ကျစရိတ်များကို မြင့်တက်စေနိုင်ကြောင်း ဆိုနေပါသည်။

နိုင်ငံခြား ပစ္စည်းအစိတ်အပိုင်းများအတွက် ပေးဆောင်ရသည့် ငွေအချို့ အတွက် ကားထုတ်လုပ်သူများကို ငွေပြန်ပေးအပ်မည်ဟု အမေရိကန် အစိုးရက ဆိုပါသည်။

ပထမနှစ်၌ အဆိုပါငွေပြန်ပေးအပ်သည့်ပမာဏသည် ပြည်တွင်း၌ တပ်ဆင်သည့် ကားများ၏ မူရင်းစျေးနှုန်း၏ ၃.၇၅ ရာခိုင်နှုန်းနှင့် ညီမျှမည် ဟု အစိုးရက ဆိုပါသည်။

ဂျပန်ဘဏ္ဍာရေးဝန်ကြီးဌာန၏ အချက်အလက်များအရ အမေရိကသို့ ဂျပန်၏ မော်တော်ယာဥ်ပစ္စည်းအစိတ်အပိုင်းများ တင်ပို့မှုသည် ယန်း ၁.၂၃ ထရီလီယံ တစ်နည်းအားဖြင့် အမေရိကန်ဒေါ်လာ ၈.၅ ဘီလီယံခန့် ရှိကြောင်း သိရပါသည်။ အဆိုပါပမာဏသည် အမေရိကန် ပြည်ထောင်စုသို့ ဂျပန်၏ ပို့ကုန် စုစုပေါင်းပမာဏ၏ ၅.၈ ရာခိုင်နှုန်းဖြစ်ပြီး မော်တော်ယာဉ်ပြီးနောက် ဒုတိယအများဆုံး ပို့ကုန်အမျိုးအစား ဖြစ်ပါသည်။

ဂျပန်မှ ပစ္စည်းအစိတ်အပိုင်းထုတ်လုပ်သူများက အမေရိကန်၏ အခွန်စည်းကြပ်မှုအသစ်များသည် ၎င်းတို့၏ လုပ်ငန်းများကို ထိခိုက်စေနိုင်သည်ဆိုသည့် စိုးရိမ်မှုများရှိနေပါသည်။

ကိုးကား-NHK World

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂