အမေရိကန်သမ္မတ ဒေါ်နယ်ထရမ့်က ဆော်ဒီအာရေဗျနှင့် ကြီးမားသည့် ရင်းနှီးမြှုပ်နှံမှု သဘောတူညီချက်ကို လုပ်ဆောင်နိုင်ခဲ့သည်။ အဆိုပါဝယ်ယူမှု သဘောတူညီချက်တွင် အမေရိကန်နိုင်ငံထုတ် စစ်လက်နက်ပစ္စည်းများအား ဝယ်ယူမှုမှာ အများဆုံး ဖြစ်သည်။

ထရမ့်က အိမ်ရှေ့မင်းသား Mohammed bin Salmanနှင့် မြို့တော်ရီယက်တွင် မတ်လ ၁၄ ၌ တွေ့ဆုံ ဆွေးနွေး ခဲ့ပြီး ထိုသို့ဆွေးနွေးစဉ် အမေရိကန်၌ တိုက်ခိုက်ရေးလေယာဉ်များ၊ ဒုံးကျည်များ၊ လက်နက် စနစ်များစသည့် အကောင်းဆုံးစစ်လက်နက်ပစ္စည်းများ ရှိသည့်အနက်မှ လက်နက်အမျိုးအစား များစွာကို ဝယ်ယူခဲ့မှုအပေါ် ကျေးဇူးတင်ရှိကြောင်း ထရမ့်က ပြောကြားခဲ့ပါသည်။

အိမ်ဖြူတော်က ကြေညာချက်တစ်ရပ်ကို ထုတ်ပြန်ခဲ့ပြီး အဆိုပါကြေညာချက်တွင် အမေရိကန်နှင့် ဆော်ဒီအာရေဗျ တို့သည် နှစ်နိုင်ငံ မဟာဗျူဟာမိတ်ဖက်ဖြစ်မှုကို ပိုမိုခိုင်မာအားကောင်းလာစေရန် သဘောတူညီခဲ့ကြကြောင်းနှင့် အမေရိကန်၌ ဒေါ်လာ ၆၀၀ ဘီလီယံ ရင်းနှီးမြှုပ်နှံမည့် အစီအစဉ်ကိုလည်း ဆော်ဒီအာရေဗျထံမှ ကတိကဝတ် ရရှိခဲ့ကြောင်း ဖော်ပြပါရှိသည်။ အဆိုပါ ၆၀၀ ဘီလီယံရင်းနှီးမြှုပ်နှံမှုတွင် ဒေါ်လာ၁၄၂ ဘီလီယံတန်ဖိုးရှိ စစ်လက်နက် ပစ္စည်းများကို ဝယ်ယူမည့်အစီအစဉ်လည်းပါဝင်သည်။ ထို့အပြင် အမေရိကန်အနေဖြင့် ဒုံးလက်နက် ကာကွယ်ရေး၊ ရေကြောင်းလုံခြုံရေးနှင့် ခေတ်မီတပ်မတော်ဖြစ်ရေးနှင့် ဆက်စပ်သည့်ပစ္စည်းကိရိယာများကိုလည်း ရောင်းချ သွားမည် ဖြစ်ပါသည်။

ဆော်ဒီခေါင်းဆောင်ပိုင်းများအနေဖြင့်လည်း ဒေသအတွင်း သာလွန်ကောင်းမွန်သော တပ်မတော်အဖြစ် ရပ်တည် နိုင်ရန် အဆိုပါပစ္စည်းများကို ဝယ်ယူခွင့်ရရှိရေး မျှော်လင့်လျက်ရှိသည်။

ထရမ့်အနေဖြင့် ဆော်ဒီအာရေဗျမှ မထွက်ခွာမီ မေလ ၁၄ ရက်နေ့တွင် ဆီးရီးယားကြားဖြတ်သမ္မတ Ahmed al-Sharaa နှင့် တွေ့ဆုံရန်စီစဉ်ထားပြီး ဆီးရီးယားအပေါ်ထားရှိသည့် ဒဏ်ခတ်ပိတ်ဆို့မှုများအား ဖယ်ရှားပေးသည့် အမိန့်တစ်ရပ်ကိုလည်း ထုတ်ပြန်သွားရန် စီစဉ်ထားရှိသည်။ ထို့နောက် ထရမ့်သည် ကာတာနှင့် ယူအေအီးနိုင်ငံ များသို့ ဆက်လက်သွားရောက်မည်ဖြစ်ကြောင်း NHK သတင်းစာမျက်နှာတွင် ရေးသားဖော်ပြထားပါသည်။

ကိုးကား- NHK World

အလွတ်သဘောဘာသာပြန်သူ- ဦးထက်ထက်အောင်၊ နစက-၄

ရေဦး   မေ ၁၃

စစ်ကိုင်းတိုင်းဒေသကြီး ရေဦးခရိုင် ဒီပဲယင်းမြို့နယ်တွင် ဆောင်းသီးနှံစိုက်ပျိုးရာသီ၌ နေကြာဧက ၅၀၀၀ ကျော် စိုက်ပျိုးမည်ဖြစ်ကြောင်း ရေဦးခရိုင် စိုက်ပျိုးရေးဦးစီးဌာနမှ သိရသည်။

မိုးသီးနှံစိုက်ပျိုးရာသီ၌ ဒီပဲယင်းမြို့နယ်တွင် နေကြာ ၅၁၆၃ ဧက စိုက်ပျိုးရန်လျာထားပြီး ယခုလက်ရှိ နေကြာစိုက်ပျိုးနိုင်ရေးအတွက် လယ်ယာမြေများ ထွန်ယက်လျက်ရှိကြောင်း သိရသည်။

“ဒီနှစ် ဒီပဲယင်းမြို့နယ် မိုးသီနှံစိုက်ပျိုးရာသီမှာ နေကြာ ဧက ၅၀၀၀ ကျော် စိုက်ပျိုးဖို့ လျာထားပါတယ်။ လျာထားဧက ပြည့်မီအောင် စိုက်ပျိုးနိုင်ဖို့အတွက် ဆောင်ရွက်ပေးသွားမယ်။ ပြည်ပကနေတင်သွင်းတဲ့ စားအုန်းဆီကို လျှော့ချနိုင်ဖို့အတွက် ဆီထွက်သီးနှံဖြစ်တဲ့နေကြာကို တိုးချဲ့စိုက်ပျိုးဖို့ ဆောင်ရွက်ပေးသွားမယ်။ ဆီထွက်သီးနှံဖြစ်တဲ့ နေကြာဟာ တစ်ဧက ဆီထွက်ရှိမှုက ကျန်တဲ့ မြေပဲ၊ နှမ်းတွေထက်များတယ်” ဟု ရေဦးခရိုင် စိုက်ပျိုးရေးဦးစီးဌာန ခရိုင်ဦးစီးမှူး ဦးဇော်မြင့်ထွန်းက ပြောပြသည်။

ယခုနှစ် ဒီပဲယင်းမြို့နယ်တွင် နေကြာစိုက်တောင်သူများကို မျိုးစေ့များပံ့ပိုးပေးနိုင်ရေး၊ ယူရီးယားဓာတ်မြေဩဇာများ ချိုသာသောဈေးနှုန်းဖြင့် ရောင်းချပေးနိုင်ရေးစီမံထားခြင်း၊ ထွက်ရှိလာသော နေကြာမျိုးများကို တောင်သူမှ တောင်သူဖလှယ်သည့် နည်းစနစ်များဖြင့် ဖြန့်ဖြူးပေးသွားမည်ဖြစ်ကြောင်း သိရသည်။

နေကြာကို အထွက်နှုန်းကောင်းမွန်အောင် စိုက်ပျိုးနိုင်မည်ဆိုပါက ဒေသတွင်းဆီစားသုံးမှုဖူလုံစေမည့်အပြင် ပိုလျှံမှုကို ရောင်းချနိုင်သဖြင့် ဝင်ငွေရရှိကာ လူမှုစီးပွားဘဝများ ပိုမိုဖွံ့ဖြိုးတိုးတက်လာမည်ဖြစ်၍ နေကြာကို တိုးချဲ့စိုက်ပျိုးနိုင်ရန် ဒေသမရွေးကြိုးပမ်းကြရမည်ဖြစ်ကြောင်း ခရိုင်ဦးစီးမှူး ဦးဇော်မြင့်ထွန်းက ပြောပြ၍ သိရသည်။

Source: ရတနာပုံသတင်းစာ

အမေရိကန်နိုင်ငံနှင့် တရုတ်နိုင်ငံတို့မှ အဆင့်မြင့်တာဝန်ရှိသူများက  ၎င်းတို့နှစ်နိုင်ငံကြား ဆွေးနွေးမှုများ လုပ်ဆောင်ပြီးနောက်  တစ်နိုင်ငံက တစ်နိုင်ငံအပေါ်ချမှတ်ထားသည့် သွင်းကုန်စည်းကြပ်အခွန်များ တိုးမြှင့်ကောက်ခံမှုကို ခေတ္တရပ်ဆိုင်းရန် သဘောတူလိုက်ပြီဖြစ်ကြောင်း သိရသည်။

အဆိုပါနှစ်နိုင်ငံကြား ကုန်သွယ်ရေး ပဋိပက္ခများ ဖြစ်ပွားလာပါက နှစ်နိုင်ငံစလုံးတွင် စီးပွားရေးကျဆင်းမှုသာမက ဘဏ္ဍာရေးဈေးကွက်ကိုလည်း   ကမောက်ကမ ဖြစ်သွားစေနိုင်သည်။

အမေရိကန်နိုင်ငံသည် တရုတ်နိုင်ငံမှ သွင်းကုန်များအပေါ် ကောက်ခံမည့် အခွန်နှုန်းထားကို ၁၄၅ ရာခိုင်နှုန်းအထိ သတ်မှတ်ထားသော်လည်း ၃၀ ရာခိုင်နှုန်းအထိ လျှော့ချပေးသွားမည်ဖြစ်ကြောင်း၊ အလားတူ တရုတ်နိုင်ငံကလည်း   အမေရိကန်မှ သွင်းကုန်များအပေါ် သတ်မှတ်ထားသည့်သွင်းကုန်အခွန် ၁၂၅ ရာခိုင်နှုန်းကို  ၁၀ ရာခိုင်နှုန်းအထိ  လျှော့ချပေးသွားမည်ဟု နှစ်ဖက်စလုံးက မေလ ၁၂ ရက်တွင်ပြောထားသည်။ အဆိုပါနှစ်နိုင်ငံကြား ဆောင်ရွက်ချက်အသစ်သည် ရက်ပေါင်း ၉၀ ကြာအထိ အသက်ဝင်မည်ဖြစ်သည်။

ဆွေးနွေးပွဲတွင် နှစ်နိုင်ငံစလုံးက ကိုယ်စီအမျိုးသား အကျိုးစီးပွားအတွက် ဆောင်ကြဉ်းနိုင်ကြောင်း၊   နှစ်နိုင်ငံကြား ညီမျှမှုရှိသော ကုန်သွယ်ရေး ရှိလာပြီဖြစ်ကြောင်း၊ အမေရိကန်အနေဖြင့် ဖြစ်ပေါ်လာသည့် ထိုအခြေအနေအတိုင်း ဆက်လက်လျှောက်လှမ်းသွားမည်ဖြစ်ကြောင်း အမေရိကန်ဘက်က ပြောထားသည်။

Source: https://myawady.net.mm/

Audi ကုမ္ပဏီရဲ့ ဒီနှစ်ပထမသုံးလပတ် အတွက်ရောင်းအားက အနည်းငယ်ကျ ဆင်းသွားပေမယ့် ကားအမျိုးအစားအရ ပြောရမယ်ဆိုရင်တော့ Audi EV ရဲ့ရောင်း အားက ပြီးခဲ့တဲ့နှစ်ကထက် ၃၀ ရာခိုင်နှုန်း မြင့်တက်လာတယ်လို့ ဆိုပါတယ်။

ပထမသုံးလပတ်အတွင်း Audi က တင်ပို့ရတဲ့ မော်တော်ကား အစီးရေစုစု ပေါင်း ၄၆၃၇၁ စီးရှိပါတယ်။ ဒါဟာ ယမန် နှစ်ကထက် ၃ ဒသမ ၄ ရာခိုင်နှုန်း ကျဆင်း သွားတာပါ။

ဒါပေမဲ့ လျှပ်စစ်ကားတင်ပို့မှု အပိုင်းမှာ ဆိုရင်တော့ ၅၀ ဒသမ ၄ ရာခိုင်နှုန်း တိုးမြင့်လာပြီး အစီးရေ ၂၅၁၂၉ စီးအထိမြင့် တက်လာတာကိုတွေ့ရပါတယ်။ ဒါ့အပြင် အမှာစာတွေအရဆိုရင် လျှပ်စစ်ကားတင် ပို့မှုက ၈၆ ရာခိုင်နှုန်းရှိမှာပါ။ လက်ရှိမှာတော့ Audi ကအမြတ်ငွေ ယူရို ၁၅ ဘီလီယံကျော် ရရှိထားပါတယ်။ ဒါကယမန်နှစ်ကထက် ပိုများတဲ့ ပမာဏပါ။

Source: https://myawady.net.mm/

Tesla ကုမ္ပဏီက အမေရိကန်ပြည်မှာ သူတို့ရဲ့ Model Y အမျိုးအစားကိုမှ ဈေးသက်သာတဲ့အပြင် ခရီးဝေးသွားနိုင်တဲ့ မော်ဒယ်နဲ့ ထပ်မံမိတ်ဆက်လိုက်ပါပြီ။ နောက်ဘီးယက်  အမျိုးအစားဖြစ်တဲ့ ဒီမော်ဒယ်အတွက် အခြေခံဈေးနှုန်းကို ဒေါ်လာ ၄၄၉၉၀ သတ်မှတ်ပေးထားပါတယ်။

အရင်တုန်းကဆိုရင် အမေရိကန်မှ Tesla ပရိသတ်များဟာ Model Y ကို ဝယ်ယူမယ်ဆိုရင် ဒေါ်လာ ၆၀၀၀၀ အထိ ပေးပြီးဝယ်ယူခဲ့ရတာပါ။ ဒါပေမဲ့  အဲဒီအမျိုးအစားမှာတော့ လေးဘီးယက်စနစ် ဖြစ်ပါတယ်။

အခုမိတ်ဆက်လိုက်တဲ့ နောက်ဘီး ယက်အမျိုးအစားက တစ်ကြိမ်အားသွင်း ရုံနဲ့ အကွာအဝေး ၅၇၅ ကီလိုမီတာအထိ ခရီးပေါက်မှာပါ။ လေးဘီးယက်စနစ်နဲ့ ယှဉ်ရင်တော့ သူကနည်းနည်းလေး အထနှေးတယ်လို့ ဆိုရမှာဖြစ်ပါတယ်။ သုညကနေ တစ်နာရီ ၉၇ ကီလိုမီတာနှုန်းနဲ့ မောင်းနိုင်ဖို့ အချိန် ၅ ဒသမ ၄ စက္ကန့် ကြာတယ်လို့ဆိုပါတယ်။

Source: https://myawady.net.mm/

တရုတ်ပြည်သူ့သမ္မတနိုင်ငံ အစိုးရ (“တရုတ်”) နှင့် အမေရိကန် ပြည်ထောင်စု အစိုးရ (“အမေရိကန်”) တို့သည် နှစ်နိုင်ငံ ကုန်သွယ်စီးပွားကဏ္ဍ ဆက်ဆံရေးက နှစ်နိုင်ငံနှင့် ကမ္ဘာ့စီးပွားရေးအပေါ် အရေးပါမှုကို နားလည်သိရှိ၍ လည်းကောင်း၊ စဉ်ဆက်မပြတ်တည်တံ့သော၊ ရေရှည်ဖြစ်သော၊ အပြန်အလှန် အကျိုးပြုသော နှစ်နိုင်ငံ ကုန်သွယ်စီးပွားကဏ္ဍ ဆက်ဆံရေး၏ အရေးပါမှုကို နားလည်သိရှိ၍လည်းကောင်း၊ နှစ်ဖက်အကြား လတ်တလော ဆွေးနွေးမှုများအား ထည့်သွင်းစဉ်းစားသောအားဖြင့် စဉ်ဆက်မပြတ် ညှိနှိုင်းဆွေးနွေးမှုများသည် ကုန်သွယ်စီးပွားကဏ္ဍ နှစ်ဖက်စလုံးက စိုးရိမ်သောကိစ္စများကို ဖြေရှင်းရာ၌ အထောက်အကူပြုသည်ကို ယုံကြည်၍လည်းကောင်း၊ အပြန်အလှန် တံခါးဖွင့်မှု၊ စဉ်ဆက်မပြတ် ညှိနှိုင်းဆွေးနွေးမှု၊ ပူးပေါင်းဆောင်ရွက်မှုနှင့် အပြန်အလှန်လေးစားမှုရှိသော စိတ်ဓာတ်ကို အခြေခံကာ သက်ဆိုင်ရာလုပ်ငန်းများကို ဆက်လက်တွန်းအားပေးသည့် အနေဖြင့်လည်းကောင်း နှစ်ဖက်အနေဖြင့် အောက်ပါအစီအမံများကို ၂၀၂၅ ခုနှစ်၊ မေ ၁၄ ရက်မတိုင်မီ ချမှတ်ဖော်ဆောင်ရန် ကတိပြုသည်။

အမေရိကန်နိုင်ငံအနေဖြင့် – 

(က) ၂၀၂၅ ခုနှစ်၊ ဧပြီ ၂ ရက်က ထုတ်ပြန်သော အမှတ်စဉ် ၁၄၂၅၇ အမိန့် ကြေညာချက်တွင် ပြဋ္ဌာန်းထားသည့် တရုတ်ထုတ်ကုန် (ဟောင်ကောင် အထူးအုပ်ချုပ်ခွင့်ရဒေသနှင့် မကာအိုအထူးအုပ်ချုပ်ခွင့်ရဒေသမှ ထုတ်ကုန် များ အပါအဝင်) အပေါ် တိုးမြှင့်ကောက်ခံသော တန်ဖိုးအလိုက် စည်းကြပ်ခွန် များကို ပြင်ဆင်မည်ဖြစ်ရာ ၎င်းတို့အနက် ၂၄ ရာခိုင်နှုန်းရှိသော စည်းကြပ်ခွန် ကို ပထမ ၉၀ ရက်အတွင်း ဖော်ဆောင်ခြင်းကို ယာယီဆိုင်းငံ့ထားမည့် တစ်ချိန်တည်းမှာပင် ယင်းအမိန့်ကြေညာချက်၌ ပြဋ္ဌာန်းထားသည့်အတိုင်း ထိုထုတ်ကုန်များအပေါ် ကျန် ၁၀ ရာခိုင်နှုန်း စည်းကြပ်ခွန် တိုးမြှင့် ကောက်ခံခြင်းအား ဆက်လက်ထိန်းသိမ်းသွားမည်ဖြစ်သည်။

(ခ) ၂၀၂၅ ခုနှစ်၊ ဧပြီ ၈ ရက်က ထုတ်ပြန်သော အမှတ်စဉ် ၁၄၂၅၉ အမိန့် ကြေညာချက်နှင့် ၂၀၂၅ ခုနှစ်၊ ဧပြီ ၉ ရက်က ထုတ်ပြန်သော အမှတ် ၁၄၂၆၆ အမိန့်ကြေညာချက်၌ ပြဋ္ဌာန်းထားသော ထိုထုတ်ကုန်များအပေါ် စည်းကြပ်ခွန်တိုးမြှင့်ကောက်ခံခြင်းကို ပယ်ဖျက်သည်။

တရုတ်နိုင်ငံအနေဖြင့်- 

(က) အလားတူပြင်ဆင်သည့်အနေဖြင့် အခွန်ကော်မတီ၏ ၂၀၂၅ ခုနှစ် အမှတ်စဉ် ၄ ကြေညာချက်တွင် ပြဋ္ဌာန်းထားသော အမေရိကန်ထုတ်ကုန် များအပေါ် ကောက်ခံသည့် တန်ဖိုးအလိုက် စည်းကြပ်ခွန်များကို ပြင်ဆင်သည်။ ၎င်းတို့အနက် ၂၄ ရာခိုင်နှုန်းရှိသော စည်းကြပ်ခွန်ကို ပထမ ၉၀ ရက်အတွင်း ဖော်ဆောင်ခြင်းကို ယာယီဆိုင်းငံ့ထားမည့် တစ်ချိန်တည်းမှာပင် ထိုထုတ်ကုန်များအပေါ် ကျန် ၁၀ ရာခိုင်နှုန်း စည်းကြပ်ခွန်တိုးမြှင့် ကောက်ခံခြင်းအား ဆက်လက်ထိန်းသိမ်းသွားမည်ဖြစ်ပြီး အခွန်ကော်မတီ ၏ ၂၀၂၅ ခုနှစ် အမှတ်စဉ် ၅ နှင့် ၆ ကြေညာချက်များအရ ထိုထုတ်ကုန်များအပေါ် စည်းကြပ်ခွန်တိုးမြှင့်ကောက်ခံခြင်းကို ပယ်ဖျက်သည်။

(ခ) လိုအပ်သော အစီအမံများ ချမျတ်သွား၍ ၂၀၂၅ ခုနှစ်၊ ဧပြီ ၂ ရက်မှစ၍ အမေရိကန်အပေါ် အခွန်စည်းကြပ်မှုမဟုတ်သော တန်ပြန်အစီအမံများကို ဆိုင်းငံ့ သို့မဟုတ် ပယ်ဖျက်သည်။ အထက်ဖော်ပြပါ အစီအမံများ ချမှတ်ပြီးနောက် နှစ်ဖက်သည် ယန္တရားထူထောင်ပြီး ကုန်သွယ်စီးပွားကဏ္ဍ ဆက်ဆံရေးနှင့် စပ်လျဉ်း၍ ဆက်လက်ညှိနှိုင်းဆွေးနွေးသွားမည်ဖြစ်သည်။ တရုတ်ကိုယ်စားလှယ်မှာ တရုတ်နိုင်ငံတော်ကောင်စီ ဒုတိယဝန်ကြီးချုပ် ဟယ်လိဖုန်းဖြစ်ပြီး အမေရိကန်ကိုယ်စားလှယ်မှာ အမေရိကန် ဘဏ္ဍာရေးဝန်ကြီး စကော့ဘက်ဆန့်နှင့် အမေရိကန် ကုန်သွယ်ရေးကိုယ်စားလှယ်မှာ Jamieson Greer ဖြစ်သည်။ ညှိနှိုင်းဆွေးနွေးမှုကို တရုတ်၊ အမေရိကန် သို့မဟုတ် နှစ်ဖက်က သဘောတူထားသည့် တတိယနိုင်ငံတွင် ပြုလုပ်နိုင်သည်။ လိုအပ်ချက်အရ နှစ်ဖက်သည် သက်ဆိုင်ရာ ကုန်သွယ်စီးပွားကဏ္ဍဆွေးနွေးရန် အကြောင်းအရာများနှင့်စပ်လျဉ်း၍ လုပ်ငန်းအဆင့် ညှိနှိုင်းဆွေးနွေးမှုများ ပြုလုပ်နိုင်သည်။ 

ကိုးကား- Xinhua

Photo: Erie News Now

Apple က Samsung လိုမျိုး ခေါက်ဖုန်းတွေ မထုတ်သေးဘူးလားလို့ မေးနေကြသူတွေအတွက် အခုတော့သတင်းလေးတစ်ပုဒ် ထွက်လို့လာပါပြီ။ အဲဒီသတင်းကတော့ Apple အနေနဲ့ ခေါက်ဖုန်းတွေကို  ထုတ်လုပ်တော့မယ်ဆိုတဲ့ သတင်းပဲဖြစ်ပါတယ်။ သို့သော်လည်းမမျှော်လင့်ထားတဲ့ နောက်ထပ်သတင်း တစ်ခုက အဲဒီခေါက်ဖုန်းတွေမှာအသုံးပြုမယ့် ဖန်သားပြင်တွေအတွက် Samsung Display က ထုတ်လုပ်ပေးမှာဖြစ်တယ်ဆိုတဲ့ သတင်းပါပဲ။

နောက်ထပ် သိရှိထားတဲ့သတင်း တစ်ခုကတော့ အဲဒီခေါက်ဖုန်းဖန်သားပြင်မှာဆိုရင် Samsung Galaxy Z Fold ဆိုတဲ့ စမတ်ဖုန်းမှာတောင်မှ ပါဝင်လာခြင်းမရှိတဲ့လုပ်ဆောင်ချက်တွေ ပါဝင်လာမယ် ဆိုတဲ့သတင်းဖြစ်ပါတယ်။ ဒါ့အပြင်ထိတွေ့ဖန်သားပြင်ကို   သူ့ရဲ့မူလဖန်သားပြင် ထဲမှာ တစ်ပါ   တည်း ထည့်သွင်း မှာဖြစ်တဲ့အတွက် ဖုန်းရဲ့အထူ ကလည်း ပါးလွှာသွားမှာဖြစ်ပါတယ်။ ဒါ့အပြင် အလေးချိန်ကလည်း လျော့သွားမှာပါ။

ဒါပေမဲ့ ဈေးနှုန်းအပိုင်းမှာတော့နည်းနည်းလေးစိုးရိမ်စရာ ရှိနေပါတယ်။ ဘာကြောင့်လဲဆိုရင် Apple က သူ့ရဲ့စံနှုန်းတွေအတိုင်း မလွဲမသွေ ထုတ်လုပ်လာမှာဖြစ်တဲ့ အတွက်ကြောင့်ပါပဲ။

Source: https://myawady.net.mm/

အမေရိကန်သမ္မတ ဒေါ်နယ်ထရမ့်သည် မေလ ၁၂ ရက် (တနင်္လာနေ့) တွင် အမေရိကန်ရှိ ဆေးဝါးစျေးနှုန်းများကို ၃၀% မှ ၈၀% အထိ လျှော့ချရန် အမိန့်ညွှန်ကြားချက်တစ်ရပ်ကို လက်မှတ်ရေးထိုးရန် ရည်ရွယ်ထားကြောင်း မေလ ၁၁ ရက်က ပြောကြားလိုက်ပါသည်။

“မေ ၁၂ ရက် နံနက် ၉ နာရီတွင် အိမ်ဖြူတော်၌ မိမိတို့နိုင်ငံ၏ သမိုင်းတစ်လျှောက် အရေးပါဆုံး အမိန့်ညွှန်ကြားချက်တစ်ရပ်ကို လက်မှတ်ရေးထိုးမည်ဖြစ်ကြောင်း ကြေညာလိုက်ပါသည်။ ဆေးဝါးနှင့် ဆေးပစ္စည်းစျေးနှုန်းများမှာ ၃၀% မှ ၈၀% အထိ လျင်မြန်စွာ လျော့ကျသွားပါလိမ့်မည်” ဟု ထရမ့်က ၎င်း၏ Truth Social မီဒီယာပေါ်တွင် ပြောကြားထားပါသည်။

အမေရိကန်တွင် ဆေးဝါးစျေးနှုန်းများ မြင့်မားနေမှုကို နှစ်ပေါင်းများစွာ စိုးရိမ်နေခဲ့ကြောင်း ထရမ့်က ထပ်လောင်းပြောကြားခဲ့ပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

V-Day အခမ်းအနား တက်ရောက်ရန် ရုရှားနိုင်ငံသို့ အလည်အပတ် ရောက်ရှိနေသည့် တရုတ်သမ္မတရှီကျင့်ဖျင်နှင့် ရုရှားသမ္မတတို့ တွေ့ဆုံ ဆွေးနွေးကြပြီးနောက် နှစ်နိုင်ငံအကြား ကုန်သွယ်မှုအားလုံးနီးပါးကို မိမိတို့၏ အမျိုးသားငွေကြေးများဖြစ်သော ရူဘယ်နှင့် ယွမ်ငွေများဖြင့်သာ ဆောင်ရွက်ကြရန် ဆုံးဖြတ်လိုက်ကြပါသည်။

“ရုရှား-တရုတ် နိုင်ငံခြားကုန်သွယ်မှု လုပ်ငန်းအားလုံးနီးပါးကို ရူဘယ်နှင့် ယွမ်ငွေဖြင့် ဆောင်ရွက်ခြင်းက တည်ငြိမ်သည့် အပြန်အလှန် ကုန်သွယ်မှုစနစ်ကို တည်ဆောက်ထားနိုင်မည်ဖြစ်ပြီး၊ တတိယနိုင်ငံများ၏ လွှမ်းမိုးမှုမှ စိတ်ချယုံကြည်စွာ အကာအကွယ်ပေးထားနိုင်မည် ဖြစ်ပါကြောင်း” ရုရှား သမ္မတ ဗလာဒီမာပူတင်က ပြောကြားလိုက်ပါသည်။

ထို့ပြင် ရုရှား၏ ကုန်သွယ်မှုတွင် တရုတ်နိုင်ငံသည် ပထမနေရာ ဖြစ်ကြောင်း ပူတင်က မှတ်ချက်ပြုခဲ့သည်။ ၂၀၂၄ ခုနှစ်တွင် အခြားနှစ်များ၏ စံချိန်ကို ကျော်လွှားကာ ကုန်သွယ်မှုပမာဏ ဒေါ်လာ၂၄၅ ဘီလီယံရှိခဲ့ကြောင်း ရုရှားခေါင်းဆောင်က ထပ်လောင်းပြောကြားထားပါသည်။

ကိုးကား- TASS

Photo: Reuters

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

ကမ္ဘာ့အရောင်းရဆုံး မော်တော်ကားထုတ်လုပ်ရေးကုမ္ပဏီဖြစ်သည့် တိုယိုတာကုမ္ပဏီသည် လက်ရှိဘဏ္ဍာရေးနှစ်အတွက် လည်ပတ်မှု အမြတ်ငွေ ၃.၈ ထရီလီယံ ယန်း (အမေရိကန်ဒေါ်လာ ၂၆ ဘီလီယံ) ရရှိမည်ဟု ခန့်မှန်းထားပါသည်။ ယခုခန့်မှန်းချက်မှာ ၂၀၂၅ ခုနှစ် မတ်လ တွင် ကုန်ဆုံးခဲ့သော ဘဏ္ဍာရေးနှစ်က ၄.၈ ထရီလီယံ ယန်းရရှိခဲ့သည့် နှင့်နှိုင်းယှဉ်လျှင် ၂၁% ကျဆင်းမည်ဖြစ်ပါသည်။

ထိုသို့ကျဆင်းရသည့်အဓိကအကြောင်းအရင်းများမှာ အမေရိကန် သမ္မတ ဒေါ်နယ်ထရမ့်၏ အကောက်ခွန် တိုးမြှင့်လိုက်ခြင်းကြောင့် အမေရိကန်နှင့် အခြားနိုင်ငံများမှ ဝယ်ယူလိုသူများ၏ ဝယ်လိုအား ကျဆင်းမှုဒဏ်ကို ရင်ဆိုင်နေရခြင်း၊ ယန်းငွေတန်ဖိုးတက်လာခြင်း၊ ကုန်ကြမ်းဈေးနှုန်းများ မြင့်တက်လာမှုကြောင့် ကုန်ထုတ်စရိတ် ပိုမိုများပြားလာခြင်း တို့ကြောင့် ဖြစ်ပါသည်။

အခြားကမ္ဘာကျော် ကားထုတ်လုပ်ရေးကုမ္ပဏီများကဲ့သို့ပင် တိုယိုတာသည် အမေရိကန်ရှိ စက်ရုံများကို ထပ်မံတိုးချဲ့မည်ဆိုပါက အလုပ်သမား လုပ်ခ ကုန်ကျစရိတ်မြင့်မားမှုနှင့် ရင်ဆိုင်ရနိုင်ပြီး ရင်းနှီးမြှုပ်နှံမှု စရိတ် ပိုမိုကျခံရနိုင်သည်ဟု သိရပါသည်။

တိုယိုတာသည် တရုတ်ဈေးကွက်တွင် အခြားဂျပန်ကားများထက် ရောင်းအားကျဆင်းမှု နည်းပါးသော်လည်း   တရုတ်ကားများ၏ အပြင်းအထန်ယှဉ်ပြိုင်မှုကြောင့် ကမ္ဘာ့အကြီးဆုံးကားဈေးကွက်တွင် ရောင်းအားကျဆင်းမှုကို ကာကွယ်ရန် ရုန်းကန်နေရဆဲဖြစ်ပါသည်။

ကိုးကား- CNN

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃