၂၀၂၂ ယူကရိန်း- ရုရှား ပဋိပက္ခ အရှိန်မြင့်လာပြီးနောက် ဥရောပသမဂ္ဂ (အီးယူ)က ဈေးနှုန်းသက်သာသည့် ရုရှား ရေနံနှင့်ဂတ်စ်တင်သွင်းမှုကို အရှိန်မြှင့်ပြီး လျှော့ချရန်အတွက် ကြိုးပမ်းခဲ့ကြပြီး ယခုအခါတွင် အီးယူနိုင်ငံ အချင်းချင်းကြား၌ သဘောထားကွဲလွဲမှုများ စတင် ဖြစ်ပေါ်လာလျက်ရှိသည်။

ယူကရိန်း ပဋိပက္ခဖြေရှင်းရေးကို အာရုံစိုက်လာကြပြီး သဘောတူညီမှုတစ်ခုပြုလုပ်နိုင်ပါက သဘောတူညီမှု၏ အစိတ်အပိုင်းတစ်ရပ်အဖြစ် ရုရှားရေနံနှင့် ဂတ်စ် တင်သွင်းမှု ပြန်လည်စတင်နိုင်ရန်အတွက် ဆွေး‌နွေးမှုများကို အီးယူတာဝန်ရှိသူများ လုပ်ဆောင်နေကြောင်း စီးပွားရေးဆိုင်ရာ သတင်းရင်းမြစ်တစ်ခုက ဖော်ပြခဲ့ ပါသည်။ 

ဂျာမနီနှင့် ဟန်ဂေရီတို့မှ တာဝန်ရှိသူများက ရုရှားမှ သွင်းကုန်များ ပြန်လည်စတင်ခြင်းသည် အီးယူ၏ စွမ်းအင်ကုန်ကျစရိတ်ကို သိသိသာသာလျှော့ချနိုင်ပြီး စေ့စပ်ညှိနှိုင်းမှုများ လုပ်ဆောင်ရန်အတွက် မော်စကိုအစိုးရကို တိုက်တွန်းပေးနိုင်သည်ဟု ပြောဆိုလျက်ရှိနေပါသည်။ ၎င်းတို့က အပစ်ရပ်ရေးအတွက် ရုရှား-ယူကရိန်း ၂ နိုင်ငံစလုံးကို လှုံ့ဆော်ပေးနိုင်မည်ဟု ယုံကြည်နေကြသည်။ 

မော်စကို၏ ပို့ကုန်ဝင်ငွေများတိုးမြင့်လာခြင်းနှင့် ရုရှား စွမ်းအင်အပေါ် အီးယူအဖွဲ့ မှီခိုအားထားမှုအား လျှော့ချနိုင်ရေး ကြိုးပမ်းခဲ့မှုကို ပြန်လည်သုံးသပ်ရန် ဆွေးနွေးနေကြခြင်းဖြစ်ကြောင်း ပြောဆိုလျက်ရှိကြသည်။ 

မော်စကိုအစိုးရဘက်မှလည်း အဆိုပါအစီအစဉ်၏ ဖြစ်နိုင်ခြေနှင့်ပတ်သက်၍ EU သည် မကြာမီ ကာလအတွင်း ရုရှားဓာတ်ငွေ့ဝယ်ယူမှုများကို ပြန်လည် စတင်နိုင်မည့်အခြေအနေမရှိကြောင်း ဒူမားလွှတ်တော် စွမ်းအင်ကော်မတီ ပထမဥက္ကဋ္ဌ အိုင်ဂေါအာနန်စကစ်က ပြည်တွင်းမီဒီယာတစ်ခုကို ပြောကြားခဲ့ပါတယ်။ 

အီးယူမှ ယူကရိန်းနှင့်ပတ်သက်၍ ရုရှားစွမ်းအင်တင်ပို့မှုများအား ပိတ်ဆို့အရေးယူမှုများဆောင်ရွက်ခဲ့ခြင်း၊  Nord Stream ပိုက်လိုင်းကို ၂၀၂၂ ခုနှစ်က ဖျက်ဆီးမှုများလုပ်ခဲ့ခြင်းများကြောင့် ရုရှားက အီးယူနိုင်ငံများသို့ တင်ပို့နေသည့် စွမ်းအင်ပမာဏကိုလျှော့ချခဲ့သည်။ အီးယူနိုင်ငံများသုံးစွဲနေသော စွမ်းအင်ပမာဏ ၄၀% ကျော်သည် ရုရှားထံမှဖြစ်သည်။ မော်စကိုနှင့် သဘောတူညီချက် သက်တမ်းကုန်ဆုံးပြီးနောက် ယူကရိန်းက ၎င်း၏ပိုင်နက်အတွင်း ရုရှားဓာတ်ငွေ့များ စီးဆင်းမှုကို ဇန်နဝါရီ ၁ ရက်က ရပ်တန့်စေခဲ့သည်။ အီးယူသည် အမေရိကန်နှင့် နော်ဝေးကဲ့သို့သော နိုင်ငံများမှ ပိုမိုဈေးကြီးသော သဘာဝဓာတ်ငွေ့အရည် (LNG) တင်သွင်းမှုများကြောင့် စွမ်းအင်ကဏ္ဍအတွက် ကုန်ကျစရိတ်များ ပိုမိုခဲ့ရသည်။ အမေရိကန်သမ္မတ ထရမ့်ကလည်း အမေရိကန်ထုတ် LNG ကို ပိုမိုဝယ်ယူရန် အီးယူနိုင်ငံများကို ယခင်ကတိုက်တွန်းခဲ့ပြီး လိုက်နာခြင်းမရှိပါက အခွန်ကောက်ခံမှုတိုးမြှင့်မည်ဟု  ခြိမ်းခြောက်ထားပါသည်။ မြင့်မားသော စွမ်းအင်ဈေးနှုန်းများက အီးယူစီးပွားရေးကို သိသိသာသာထိခိုက်လာစေပြီး တရားဝင်အချက်အလက်များအရ အီးယူ၏ စီးပွားရေးအင်အားကြီးနိုင်ငံဖြစ်သော ဂျာမနီ၏ စီးပွားရေးသည် ၂၀၂၃ နှင့်၂၀၂၄ ခုနှစ်များတွင် ၂ နှစ်ဆက်တိုက် ကျဆင်းသွားကြောင်း သိရပါသည်။ 

ကိုးကား-RT

ဇန်နဝါရီလ ၃၁ ရက် (သောကြာနေ့)တွင် ဒုသမ္မတ ဆာရာ ဒူတာတေးကို စွပ်စွဲပြစ်တင်ရန် ဖိလစ်ပိုင် အောက်လွှတ်တော်ကို တောင်းဆိုသည့် ထောင်နှင့် ချီသော ဆန္ဒပြသူများက မနီလာမြို့ရှိ လမ်းမများပေါ် ချီတက်ဆန္ဒပြခဲ့ကြသည်။

ဒုသမ္မတ ဆာရာဒူတာတေးသည် အကျင့်ပျက်ခြစားမှုနှင့် အစိုးရရန်ပုံငွေ ဒေါ်လာသန်းပေါင်းများစွာ အလွဲသုံးစားလုပ်မှုတို့ကြောင့် စွပ်စွဲပြစ်တင်မှု ၃ ခုတို့နှင့် ရင်ဆိုင်နေရသည်။ ကွန်ဂရက်လွှတ်တော်က ဒုသမ္မတအပေါ် စွပ်စွဲပြစ်တင်မှုလုပ်ဆောင်ခြင်းကို လာမည့်အပတ်သို့ ရွှေ့ဆိုင်းမည့်အစား မေလတွင် ကျင်းပပြုလုပ်မည့် ကြားဖြတ်ရွေးကောက်ပွဲ မတိုင်မီ ကြိုတင် ကိုင်တွယ်ဖြေရှင်းရမည်ဖြစ်သည်။

အသက် ၄၆ နှစ်အရွယ် ဒုသမ္မတသည် သမ္မတ ဖာဒီနန် မားကို့စ်နှင့် ဆက်ဆံရေးတင်းမာလျက်ရှိသော်လည်း သမ္မတအနေဖြင့် ၎င်း၏ တာဝန်များကို ဆက်လက်မထမ်းဆောင်နိုင်ပါက ဒုသမ္မတက ဖွဲ့စည်းပုံအခြေခံဥပဒေအရ ဆက်ခံဆောင်ရွက်သူဖြစ်ပြီး သူမအပေါ် စွပ်စွဲပြစ်တင်မှုများကို ငြင်းဆိုထားသည်။

မားကို့စ်ကိုယ်တိုင်ကလည်း လွှတ်တော်အတွင်း ဒူတာတေးအပေါ် စွပ်စွဲပြစ်တင်မှုကို ဆက်လက်မပြုလုပ်ရန်နှင့် ထိုသို့ပြုလုပ်ခြင်းသည် လွှတ်တော်၏ အဓိကလုပ်ငန်းတာဝန်များကို ကန့်သတ်လိုက်ခြင်းဖြစ်သည်ဟု ပြောကြားထားသည်။

ဇန်နဝါရီ ၃၁ ရက်နေ့ နံနက်ပိုင်း ဆန္ဒပြပွဲတွင် လူပေါင်း ၄,၀၀၀ ခန့် ပါဝင်ခဲ့ပြီး အဓိကရုဏ်းနှိမ်နင်းရေးရဲ ၇,၄၀၀ ကို ဖြန့်ကြက်ထားကြောင်း ရဲတပ်ဖွဲ့က ပြောကြားခဲ့သည်။

ကိုးကား-CNA

BRICS အဖွဲ့ဝင်နိုင်ငံများသည် ငွေကြေးအသစ် ဖန်တီးခြင်း သို့မဟုတ် အမေရိကန်ဒေါ်လာအား အခြားငွေကြေး တစ်မျိုးမျိုးဖြင့် အစားထိုးရန် ကြိုးစားပါက သွင်းကုန်ခွန် ၁၀၀ % စည်းကြပ်မည်ဟု အမေရိကန်သမ္မတ ဒေါ်နယ် ထရမ့်က ထပ်မံကတိပြု ပြောကြားခဲ့သည်။

BRICS အဖွဲ့ဝင်နိုင်ငံများအနေဖြင့် ငွေကြေးအသစ်ကို ဖန်တီးမည်မဟုတ်ကြောင်းနှင့် ကမ္ဘာသုံး US ဒေါ်လာ နေရာတွင် အခြားငွေကြေးအား အစားထိုးမည် မဟုတ်ကြောင်း ကတိကဝတ်ပြုရန် လိုအပ်မည်ဖြစ်ပြီး အခြားငွေကြေးတစ်မျိုးမျိုးအား အစားထိုးရန် ကြိုးစားမည်ဆိုပါက အဆိုပါအဖွဲ့ဝင်နိုင်ငံများအနေဖြင့် ၁၀၀% သွင်းခွန်စည်းကြပ်ခြင်းခံရမည်ဖြစ်ကြောင်းနှင့် အမေရိကန်နိုင်ငံသို့ ကုန်ပစ္စည်းတင်သွင်းခွင့်ရမည် မဟုတ်တော့ကြောင်း” ထရမ့်က ၎င်း၏ Truth လူမှုကွန်ရက်တွင် ရေးသားခဲ့သည်။

အိန္ဒိယနိုင်ငံခြားရေးဝန်ကြီး Subrahmanyam Jaishankar က  ကမ္ဘာ့ကုန်သွယ်ရေးနှင့် ငွေကြေးလွှဲပြောင်းမှုများဆောင်ရွက်ရာတွင် အမေရိကန်ဒေါ်လာ အပေါ် မှီခိုမှုကိုလျှော့ချသွားရန်  မိမိတို့နိုင်ငံအနေဖြင့် ထောက်ခံခဲ့ခြင်းမရှိခဲ့ပါကြောင်း ပြောကြားခဲ့သည်။ BRICS အဖွဲ့သည် အမေရိကန်ဒေါ်လာကို စွန့်လွှတ်ရန် ပြောဆိုခြင်းမဟုတ်ဘဲ ဝါရှင်တန်၏ မှားယွင်းသော မူဝါဒများနှင့်ပတ်သက်၍ ပြောဆိုခြင်းသာဖြစ်ကြောင်းကို ထရမ့်အား ရှင်းပြလိုကြောင်း BRICS အဖွဲ့ဝင် ရုရှားနိုင်ငံဆိုင်ရာ ဒုတိယနိုင်ငံခြားရေးဝန်ကြီး Sherpa Sergey Ryabkov ၏ ပြောကြားချက်အရ သိရှိရပါသည်။

ကိုးကား-TASS

နိုင်ငံတကာအနုမြူစွမ်းအင်အေဂျင်စီ (International Atomic Energy Agency –IAEA) အမှုဆောင်အရာရှိချုပ် Rafael Grossi သည် နျူကလီးယားလုံခြုံရေးနှင့်ပတ်သက်၍ အဆင့်မြင့်ဆွေးနွေးပွဲတက်ရောက်ရန် လာမည့်အပတ်တွင် ယူကရိန်းသို့ သွားရောက်ရန် စီစဉ်နေကြောင်း၊ ရုရှားနိုင်ငံသို့လည်း သွားရောက်ရန် စီစဉ်ထားကြောင်း   အေဂျင်စီက ဇန်နဝါရီ ၃၀ ရက်တွင် သတင်းထုတ်ပြန်ထားပါသည်။

စစ်ရေးပဋိပက္ခအတွင်း နျူကလီးယားလက်နက် မတော်တဆ အသုံးပြုမှုကို တားဆီးကာကွယ်ရန် ရည်ရွယ်၍ သွားရောက်ဆွေးနွေးရန်ဖြစ်ပြီး ရုရှား-ယူကရိန်း စစ်ပွဲစတင်ချိန်မှဆိုလျှင် ၎င်း၏ ယူကရိန်းသို့ သွားရောက်မည့်ခရီးစဉ်သည် ယခုအခါ ၁၁ ကြိမ်မြောက်ဖြစ်ကြောင်း သတင်းထုတ်ပြန်ချက်တွင် ဖော်ပြထားပါသည်။ 

ကိုးကား (နိုင်ငံတကာအနုမြူစွမ်းအင် အေဂျင်စီ-IAEA website)

ဂါဇာကမ်းမြောင်ဒေသတွင် ဓားစားခံလဲလှယ်ရေး အစီအစဉ် ဆက်လက်လုပ်ဆောင်လျက်ရှိရာ ဟားမတ်စ် အဖွဲ့က ဓားစာခံ ၇ ဦးလွှတ်ပေးရာတွင် အစ္စရေး စစ်သမီး ၁ ဦးပါဝင်ပြီး ထိုင်းနိုင်ငံသား ၅ ဦး ပါဝင်ကြောင်း သိရှိရသည်။ အေဂမ်ဘာဂါ ( ၂၀နှစ် )ကို လက်နက်ကိုင် ဟားမတ်စ်အဖွဲ့က စင်ပေါ်သို့ခေါ်ဆောင်လာကာ ဓာတ်ပုံရိုက်ခဲ့ပြီး သူမကိုကြက်ခြေနီအဖွဲ့ဝင်များထံသို့ လွှဲအပ်လိုက်ကြသည်။ ယခုလွှဲပြောင်းမှုမတိုင်မီက အမျိုးသမီး ၇ ဦးကိုလွှဲပြောင်းပေးအပ်ခဲ့ပါသည်။ ပြန်လည် လွတ်မြောက်လာသော ဓားစာခံများကို ဂါဇာ ကမ်းမြောင်တွင်ရှိသည့် IDF နှင့် ISA တပ်ဖွဲ့များထံ လွှဲပြောင်းပေးအပ်ခဲ့သည်။ ပြန်လည်ရောက်ရှိလာသော ဓားစာခံသည် လက်ရှိတွင် IDF အထူးတပ်ဖွဲများနှင့် ISA တပ်ဖွဲ့များနှင့်အတူ အစ္စရေးနယ်မြေသို့ ပြန်လည် ရောက်ရှိလာကာ ကနဦးဆေးဘက်ဆိုင်ရာ အကဲဖြတ်မှု ခံယူရမည်ဖြစ်ပါသည်။ အစ္စရေးကာကွယ်ရေးတပ်ဖွဲ့၏ တပ်မှူးများနှင့် စစ်သည်များသည် အစ္စရေးနိုင်ငံသို့ ပြန်လည်ရောက်ရှိလာသည့် ဓားစာခံများကို အလေးပြုကာ ကြိုဆိုခဲ့ကြကြောင်း အစ္စရေးကာကွယ်ရေးတပ်ဖွဲ့(IDF)မှ ထုတ်ပြန်ချက်တွင် ဖော်ပြထားပါသည်။

အစ္စရေးဝန်ကြီးချုပ် ဘင်ဂျမင်နေတန်ယာဟုက ဓားစာခံ အားလုံး ပြန်လည်လွတ်မြောက်နိုင်ရေးအတွက်အစ္စရေး အစိုးရထံ ကတိပြုထားဆဲဖြစ်ကြောင်း ပြောကြားခဲ့ပါသည်။ အစ္စရေးအစိုးရက အစ္စရေးကာကွယ်ရေးတပ်ဖွဲ့မှ စစ်သမီးတစ်ဦးဖြစ်သော အေဂမ်ဘာဂါကို နွေးနွေးထွေးထွေး ကြိုဆိုခဲ့ပြီး ပြန်ပေးဆွဲခံရကာ ပျောက်ဆုံးနေသူအားလုံးကို အစ္စရေးအစိုးရက ပြန်လည်ရှာဖွေပေးမည်ဟု ကတိကဝတ်ပြုထားကြောင်း အစိုးရ၏ ထုတ်ပြန်ချက်တွင် ဖော်ပြထားပါသည်။ 

ကိုးကား-Myanmar National Post

ဇန်နဝါရီ ၂၀ တွင် လက်မှတ်ရေးထိုးလိုက်သည့် အမေရိကန် သမ္မတဒေါ်နယ်ထရမ့်၏ စီမံအုပ်ချုပ်ရေးအမိန့်အရ အမေရိကန်ရှိ Google အသုံးပြုသူများအတွက် Google Map ပေါ်တွင် မက္ကဆီကိုပင်လယ်ကွေ့ (Gulf of Mexico) အမည်ကို အမေရိကပင်လယ်ကွေ့ (Gulf of America) အမည်သို့ ပြင်ဆင်ပြောင်းလဲတော့မည်ဖြစ်ကြောင်း Google က ဇန်နဝါရီ ၂၇ ရက်(တနင်္လာနေ့)တွင် ကြေညာလိုက်ပါသည်။ 

ထို့ပြင် မြောက်အမေရိက၏ အမြင့်ဆုံးတောင်ထွတ် ဖြစ်သည့် Mount Denali ကို Mount McKinley အဖြစ် ပြောင်းလဲသွားမည်ဖြစ်ပြီး ထိုပြောင်းလဲမှုများကိုအမေရိကန်အစိုးရက တရားဝင် ညွှန်ကြားလာပါက ဆောင်ရွက်သွားမည်ဖြစ်ကြောင်း ပြောကြားထားပါသည်။

ကိုးကား -ALJAZEERA

အမေရိကန်အစိုးရအနေဖြင့် အမေရိကန် လူဝင်မှုကြီးကြပ်ရေးဥပဒေ ချိုးဖောက်မှုများကြောင့် မြန်မာနိုင်ငံသားများအပါအဝင် လူပေါင်း ၁,၄၄၅,၅၄၉ ဦးကို Non-Detained Docket with Final Orders of Removal အမိန့်အရ မိခင်နိုင်ငံသို့ ပြန်ပို့ခဲ့ကြောင်း သိရသည်။ 

အမေရိကန်လူဝင်မှုကြီးကြပ်ရေးနှင့် အကောက်ခွန်ဌာနလက်အောက်ခံဌာနတစ်ခုဖြစ်သော Enforcement and Removal Operations (ERO) သည် ပြည်သူ့ လုံခြုံရေးနှင့် နိုင်ငံတွင်းလုံခြုံရေးအတွက် ပဋိပက္ခရှိနိုင်သောနိုင်ငံခြားသားများကို စစ်ဆေးမှုပြုလုပ်ခြင်း၊ ဖမ်းဆီးခြင်းနှင့်နိုင်ငံပြန်ပို့ခြင်း (deportation) အဓိကထားလုပ်ဆောင်ရပြီး ၂၀၂၄ ခုနှစ်၊ နိုဝင်ဘာ ၂၄ ရက် အထိ လူပေါင်း ၁,၄၄၅,၅၄၉ ဦးကို အမေရိကန်နိုင်ငံမှ ထွက်ခွာရန် (သို့မဟုတ်) မိခင်နိုင်ငံထံပြန်ပို့ရန် အမိန့် ချမှတ်ထားကြောင်း သိရသည်။

Non-Detained Docket with Final Orders of Removal ဆိုသည်မှာ အမေရိကန်နိုင်ငံသားမဟုတ်သူတစ်ဦး (Non-Citizen) တစ်ဦးသည် ICE (Immigration and Customs Enforcement) မှ ဖမ်းဆီးမခံရသေးသော်လည်း အမေရိကန် နိုင်ငံအတွင်းမှ ထွက်ခွာရန် အမိန့် (Final Order of Removal) ရရှိထားခြင်းမျိုးဖြစ်ကြောင်း သိရသည်။ အမေရိကန်လူဝင်မှုဥပဒေ (Immigration Law) ချိုးဖောက်မှုများကြောင့် Immigration Judge (လူဝင်မှုတရားသူကြီး) က နိုင်ငံပြန်ပို့ခြင်း (Deportation/Removal) ကို ဆုံးဖြတ်ခဲ့ခြင်းဖြစ်ပြီး Asylum (ခိုလှုံခွင့်) တောင်းခံမှုငြင်းပယ်ခံရခြင်း၊ Green Card, Visa သက်တမ်းကုန်ဆုံးပြီး မထွက်ခွာခြင်း၊ Criminal Convictions (ပြစ်မှုကျူးလွန်မှု)ကြောင့် ပြည်နှင်ခြင်း၊ စသည့်အချက်များကြောင့် လူဝင်မှုကြီးကြပ်ရေးဥပဒေချိုးဖောက်သူများအဖြစ် သတ်မှတ်ခံရခြင်းဖြစ်သည်။

(ERO) သည် ပြည်တွင်းတွင် လျှို့ဝှက်နေသော တရားမဝင် နိုင်ငံခြားသားများ ဖမ်းဆီးခြင်း၊ ပြစ်မှုကျူးလွန်သူများ (Criminal Aliens) ကို ဖမ်းဆီးပြီး နိုင်ငံပြန်ပို့ခြင်း၊ လူဝင်မှုကြီးကြပ်ရေးဥပဒေနှင့် စပ်လျဉ်းသောစစ်ဆေးမှုများပြုလုပ်ခြင်း၊ နိုင်ငံခြားသားမိသားစုများနှင့် ကလေးသူငယ်များအတွက် စောင့်ရှောက်မှုနှင့် ကြီးကြပ်မှုများဆောင်ရွက်ခြင်း အမေရိကန်နိုင်ငံအတွင်း လျှို့ဝှက်နေထိုင်သော တရားမဝင် နိုင်ငံခြားသားများကို ရှာဖွေဖမ်းဆီးခြင်းနှင့် နိုင်ငံပြန်ပို့ခြင်းကို အဓိကထား၍ လုပ်ဆောင်ကြောင်း သိရသည်။

(ERO) ဌာန၏ Non-Detained Docket with Final Orders of Removal အမိန့်အရ မိခင်နိုင်ငံသို့ ပြန်ပို့ခံရမည့် လူပေါင်း ၁,၄၄၅,၅၄၉ ဦးထဲတွင် မြန်မာနိုင်ငံသား အနည်းဆုံး ၆၇၉ ဦး ပါဝင်ခဲ့ပြီး အမေရိကန် လူဝင်မှုကြီးကြပ်ရေးဥပဒေ ချိုးဖောက်မှုများကြောင့် မိခင်နိုင်ငံသို့ ပြန်ပို့ခံရမည်ဖြစ်ကြောင်း သိရသည်။ Non-Detained Docket with Final Orders of Removal အမိန့်အရ မိခင်နိုင်ငံသို့ပြန်ပို့ခံရမည့် နိုင်ငံသားများစာရင်းတွင် ဘင်္ဂလားဒေ့ရှ်၊ ဘရူနိုင်း၊ ကမ္ဘောဒီးယားနိုင်ငံသားများ ပါဝင်ခဲ့ပြီး အယ်ဆာဗေးဒိုးနိုင်ငံသားများက မိခင်နိုင်ငံသို့ ပြန်ပို့ခံရမည့်သူများထဲတွင် အများဆုံးဖြစ်ကြောင်း သိရသည်။

အမေရိကန်နိုင်ငံတွင် ဇန်နဝါရီ ၂၀ ရက်က ထရမ့် သမ္မတအဖြစ် ပြောင်းလဲတာဝန်ယူခဲ့ပြီးနောက် ယခင် သမ္မတဟောင်း ဂျိုးဘိုင်ဒင်လက်ထက်က အမိန့် စည်းကမ်းဥပဒေအများစုကို ပြင်ဆင်ပြောင်းလဲ ပယ်ဖျက်ခဲ့ပြီး အမေရိကန်နိုင်ငံအတွင်း တရားမဝင် နေထိုင်နေသူများကိုဖြိုခွင်းရန် အမိန့်များထုတ်ပြန်ခဲ့ကြောင်း သိရသည်။ အမေရိကန်အစိုးရသစ်သည် လက်ရှိအချိန်တွင် အမေရိကန်နိုင်ငံအတွင်း လူဝင်မှုကြီးကြပ်ရေးဥပဒေချိုးဖောက်မှုဖြင့် တရားမဝင် ရောက်ရှိနေထိုင်သူများကို မိခင်နိုင်ငံသို့ ပြန်ပို့နေပြီဖြစ်ရာ ပြီးခဲ့သောရက်ပိုင်းအတွင်း ကိုလံဘီယာ၊ မက္ကဆီကို နိုင်ငံသားများကို မိခင်နိုင်ငံသို့ ပြန်ပို့ခဲ့ကြောင်းသိရသည်။

ကိုးကား-NP News

ဆီးရီးယား၏ခေါင်းဆောင်သစ်များသည် နိုင်ငံနှစ်နိုင်ငံကြား “ယုံကြည်မှုပြန်လည်ရရှိရန်” ရုရှားထံမှ လျော်ကြေးငွေတောင်းခံနေကြောင်း Sana သတင်း အေဂျင်စီက ဖော်ပြခဲ့သည်။ လွန်ခဲ့သော ဒီဇင်ဘာလအတွင်းက ဘာရှာအာဆတ်အစိုးရပြုတ်ကျပြီးနောက် ဇန်နဝါရီ ၂၉ ရက်နေ့က ရုရှားသံတမန်များ၏ ပထမဆုံးခရီးစဉ်အတွင်း ပြောဆိုခဲ့သည်ဟု သိရသည်။ ရုရှားသည် ၂၀၁၁ ခုနှစ်ကတည်းက သမ္မတဟောင်း အာဆတ်ကို ထောက်ခံခဲ့ပြီး ဆီးရီးယားကို လွှမ်းခြုံထားသည့်သူပုန်ထမှုကို ဆန့်ကျင်သည့်စစ်ပွဲများတွင် ပါဝင်ခဲ့သည်။

ယခုအခါ အစ္စလာမ္မစ် ဟေယက်တာဟာအယ်ရှန် (HTS) လှုပ်ရှားမှုကို ဦးဆောင်နေသည့် ဆီးရီးယားအစိုးရသည် မော်စကိုအစိုးရအနေဖြင့် “အတိတ်က အမှားများကို ထည့်သွင်းစဉ်းစားပြီး ဆီးရီးယား ပြည်သူများ၏ဆန္ဒကို လေးစားသင့်သည်” ဟု ထုတ်ဖော်ပြောဆိုခဲ့သည်။

ရုရှားကိုယ်စားလှယ်အဖွဲ့ကလည်း ဆီးရီးယားတွင် အပြုသဘောဆောင်သော အပြောင်းအလဲများအတွက် ၎င်း၏ထောက်ခံမှုကို အတည်ပြုခဲ့ပြီး လျော်ကြေး၊ ပြန်လည်တည်ဆောက်ရေးနှင့်ပြန်လည်ထူထောင်ရေးကဲ့သို့သော ခိုင်မာသောအစီအမံများမှတစ်ဆင့် ဆီးရီးယားပြည်သူများ၏ ယုံကြည်မှု ပြန်လည်တည်ဆောက်ရာတွင် မော်စကိုအစိုးရ၏ အခန်းကဏ္ဍကို အလေးပေး ပြောကြားခဲ့သည်။

တွေ့ဆုံပွဲအပြီးတွင် ရုရှားကိုယ်စားလှယ်အဖွဲ့ကို ဦးဆောင်သည့် ဒုတိယနိုင်ငံခြားရေးဝန်ကြီး မီခေးလ် ဘောဂ်ဒန်နော့ဗ်က မော်စကိုနှင့် ဒမတ်စကတ်တို့ အကြား သမိုင်းကြောင်းအရ တည်ငြိမ်ပြီး အပြန်အလှန်အကျိုးရှိသောဆက်ဆံရေးကို ထိန်းသိမ်းရန် ရည်ရွယ်ထားကြောင်း ပြောကြားခဲ့သည်။

ဆွေးနွေးပွဲများတွင် ဆီးရီးယား၌ ရုရှား၏စစ်ရေးစခန်းများဖြစ်သည့် ခမဲမင်းနှင့်တာတပ်တို့၏ ဆက်လက်တည်ရှိနေမှုအတွက် တိကျသော သဘောတူညီချက်များ မရရှိခဲ့သေးပေ။ မော်စကိုသည် ခမဲမင်းလေတပ်စခန်းနှင့် တာတပ်ရှိ ထောက်ပံ့ပို့ဆောင်ရေးစင်တာတစ်ခုကို မြေထဲပင်လယ်ကမ်းရိုးတန်းတွင် တည်ထားသည်။ ၂၀၁၇ ခုနှစ်က ရုရှားနှင့်ဆီးရီးယားတို့သည် မော်စကို၏ တပ်များကို ၄၉ နှစ်ကြာ တပ်စွဲထားရန် သဘောတူညီခဲ့ကြသည်။ ရုရှားပိုင်အဆောက်အအုံများ၏ အနေအထားမှာ ပြောင်းလဲခြင်းမရှိကြောင်း သံတမန်က ပြောကြားခဲ့သည်။

ရုရှားသံတမန်များက ဆီးရီးယားလျော်ကြေးတောင်းခံမှုအပေါ် လိုက်လိုက်လျောလျောပြောခဲ့သော်လည်း ကရင်မလင်အစိုးရ ပြောခွင့်ရပုဂ္ဂိုလ် ဒီမီထရီပက်စ်ကော့ဗ်ကမူ မှတ်ချက်တစ်စုံတစ်ရာပေးခြင်း မရှိခဲ့ပေ။ ဒမတ်စကတ်အစိုးရဘက်မှ ရုရှားကဲ့သို့ အင်အားကြီးနိုင်ငံနှင့် ဆက်လက်လက်တွဲရန်အတွက် မဟာဗျူဟာမြောက် အစီအစဉ်များရှိကြောင်း ထုတ်ဖော်ခဲ့ဖူးကြောင်း သိရှိရပါသည်။ 

ကိုးကား-Myanmar National Post

ကျူးဘားနိုင်ငံ၊ ဂွာတာနာမိုပင်လယ်အော်ရှိ အမေရိကန် ရေတပ်အခြေစိုက်စခန်းတွင် ထိန်းသိမ်းရေးစခန်းများ တိုးချဲ့ဖွင့်လှစ်ရန် အမေရိကန်သမ္မတ ဒေါ်နယ်ထရမ့်က ညွှန်ကြားခဲ့ပြီး ပြည်နှင်ဒဏ်ခံရသော ထောင်နှင့်ချီသည့်တရားမဝင်ရွှေ့ပြောင်းနေထိုင်သူများကို ထားရှိရန် စီစဉ်ထားသည်ဟု ကြေညာခဲ့သည်။

တရားမဝင်ရွှေ့ပြောင်းနေထိုင်သူများကို ပြည်နှင်ဒဏ်ပေးမည့် Laken Riley Act ကိုပြဋ္ဌာန်းထားပြီး ပြစ်မှုထင်ရှားစီရင်ခြင်းမခံရသေးသော်လည်း ခိုးမှုနှင့် အကြမ်းဖက်ရာဇ၀တ်မှုများဖြင့် စွပ်စွဲခံထားရသော အထောက်အထားမဲ့ပုဂ္ဂိုလ်များကို ဖမ်းဆီးခြင်းနှင့် ပြည်နှင်ဒဏ်ပေးခြင်းတို့ လုပ်ဆောင်မည် ဖြစ်ကြောင်း ပါရှိပြီး သက်ဆိုင်ရာနိုင်ငံများမှ ပြန်လည်လက်မခံသူများကို ဂွာတာနာမိုသို့ ပို့ဆောင်မည်ဖြစ်ကြောင်းနှင့် အကျဉ်းသားဦးရေ ၃၀,၀၀၀ အတွက်ပြင်ဆင်ထားရန် ညွှန်ကြားထားကြောင်းကိုလည်း ထရမ့်က ပြောကြားခဲ့သည်။

ထရမ့်၏ အစိုးရအဖွဲ့သည် ပြည်နှင်ဒဏ်ပေးရေး ကြိုးပမ်းမှုများကို အရှိန်မြှင့်လုပ်ဆောင်ခဲ့ပြီး ဖယ်ရှားရေးခရီးစဉ်များအတွက် စစ်လေယာဉ်များကိုအသုံးပြုကာ ပြည်နှင်ဒဏ်ပေးခံရမှုများကို လက်ခံရန်ငြင်းဆန်သောနိုင်ငံများအတွက် အခွန်စည်းကြပ်မှုနှင့် အခြားအရေးယူမှုများဆောင်ရွက်မည်ဟု ပြောဆိုမှုများရှိနေသည်။

ကိုးကား-RT

ဥရောပသမဂ္ဂအနေဖြင့် ရုရှားနိုင်ငံအပေါ် ၁၆ ကြိမ်မြောက် အရေးယူပိတ်ဆို့မှုပြုလုပ်ရန် ပြင်ဆင်ဆွေးနွေးနေကြောင်း၊ ထိုပိတ်ဆို့မှုတွင် ရုရှားဘဏ် ၁၅ ခုကို SWIFT ဘဏ်စနစ်မှ ဖြတ်တောက်ရန် စီစဉ်နေကြောင်း၊ ရုရှားရေနံတင်သင်္ဘော ၇၄ စင်းကိုလည်း ပိတ်ဆို့မှုစာရင်းတွင် ထည့်သွင်းလာနိုင်ကြောင်း၊ ထို့အပြင် ရုရှားက အလူမီနီယမ်တင်သွင်းမှုကိုလည်း ကန့်သတ်လာနိုင်ကြောင်း၊ ထိုပိတ်ဆို့မှုအဆိုပြုချက်များအတွက် ဥရောပသမဂ္ဂနိုင်ငံများ၏ သဘောတူညီချက်ရယူရန် လိုအပ်ကြောင်း Bloomberg က အစီရင်ခံ ဖော်ပြထားပါသည်။

ကိုးကား-TASS

Photo: UNITED24 Media