နယူးယောက်  ဖေဖော်ဝါရီ ၃

အမေရိကန် နိုင်ငံခြားရေးဝန်ကြီး မာကိုရူဘီယိုကို မြောက်ကိုရီးယား နိုင်ငံခြားရေးဝန်ကြီးဌာနက ပြင်းထန်စွာဝေဖန်ခဲ့ကြောင်း မြောက်ကိုရီးယားအစိုးရအာဘော် ကေစီအင်န်အေသတင်းဌာနက ယနေ့တွင် သတင်းထုတ်ပြန်ထားသည်။

သတင်းမီဒီယာများနှင့် ပြုလုပ်ခဲ့သော တွေ့ဆုံမေးမြန်းခန်းတစ်ခုတွင် အမေရိကန်နိုင်ငံခြားရေးဝန်ကြီး ရူဘီယိုက မြောက်ကိုရီးယားနိုင်ငံကို ထင်ရာစိုင်းနေသော နိုင်ငံအဖြစ် ဝေဖန်ခဲ့ပြီးနောက် မြောက်ကိုရီးယား နိုင်ငံခြားရေးဝန်ကြီးဌာန၏ တုံ့ပြန်ချက်ပေါ်ထွက်လာခြင်းဖြစ်သည်။

အမေရိကန် နိုင်ငံခြားရေးဝန်ကြီး ရူဘီယို၏ အဆိုပါဝေဖန်ချက်သည် အမေရိကန်နိုင်ငံ၏ အကျိုးစီးပွားများအတွက် အထောက်အကူမပြုနိုင်ကြောင်း မြောက်ကိုရီးယား နိုင်ငံခြားရေးဝန်ကြီးဌာန သတင်းထုတ်ပြန်ချက်တွင် ‌ဖော်ပြထားသည်။

ယင်းအပြင် အမေရိကန်အစိုးရ၏ ရန်လိုမှုများကို ပြင်းပြင်းထန်ထန် တုံ့ပြန်မည်ဖြစ်ကြောင်းလည်း မြောက်ကိုရီးယား နိုင်ငံခြားရေးဝန်ကြီးဌာနက သတင်းထုတ်ပြန်ချက်တွင် ဖော်ပြထားသည်။

မြောက်ကိုရီးယား နိုင်ငံခြားရေးဝန်ကြီးဌာန၏ အဆိုပါထုတ်ပြန်ချက်သည် အမေရိကန်သမ္မတ ရာထူးကို ဒေါ်နယ်ထရန့်ရယူခဲ့ပြီးနောက်ပိုင်း ပထမဆုံးအကြိမ်အဖြစ် အမေရိကန်အစိုးရကို ဝေဖန်မှုဖြစ်သည်။

မြောက်ကိုရီးယား နိုင်ငံခြားရေးဝန်ကြီးဌာနသည် သမ္မတ‌ဒေါ်နယ်ထရန့် ဦးဆောင်သော အမေရိကန်အစိုးရအဖွဲ့၏ ဒုံးကျည်ကာကွယ်ရေးစနစ်သစ် တည်ဆောက်ရေးအစီအစဉ်ကိုလည်း ဝေဖန်ထားကြောင်း သိရသည်။

Ref: RT၊ Trs: KKO

Source: ရတနာပုံသတင်းစာ

ဆက်စပ်သတင်းများ- https://sacministry.gov.mm/my/news/2263

အမေရိကန်၏ ကနေဒါကုန်ပစ္စည်းအပေါ် စည်းကြပ်ခွန် တိုးမြှင့်ကောက်ခံမှုကို တုံ့ပြန်ရန် ကနေဒါဒေါ်လာ ၁၅၅ ဘီလီယံ ( ၁ ကန်ဒေါ်လာ = ၁.၄၅ ကနေဒါဒေါ်လာ) တန်ဖိုးရှိသော အမေရိကန်မှ ကနေဒါသို့ တင်သွင်းသော ကုန်ပစ္စည်းများအပေါ် ၂၅ ရာခိုင်နှုန်း အခွန်စည်းကြပ်မည်ဖြစ်ကြောင်း ကနေဒါနိုင်ငံ ဝန်ကြီးချုပ် ထရူးဒိုးက ဖေဖော်ဝါရီ ၁ ရက်တွင် ကြေညာခဲ့သည်။
ထရူးဒိုးက ပထမအသုတ် တန်ပြန် စည်းကြပ်ခွန်ကို ဖေဖော်ဝါရီ ၄ ရက်မှ စတင်ကောက်ခံမည်ဖြစ်ပြီး ကနေဒါဒေါ်လာ ၃၀ ဘီလီယံတန်ဖိုးရှိ အမေရိကန်ကုန်ပစ္စည်းများ ပါဝင်ကြောင်း ပြောကြားခဲ့သည်။ ယင်းနောက် ၂၁ ရက်အကြာတွင် ကနေဒါဘက်က ကနေဒါဒေါ်လာ ၁၂၅ ဘီလီယံတန်ဖိုးရှိ အမေရိကန်ကုန်ပစ္စည်းများအပေါ် တန်ပြန် စည်းကြပ်ခွန်ကောက်ခံမည်ဖြစ်ကြောင်း၊ အဆိုပါကုန်ပစ္စည်းများသည် ကနေဒါသို့ တင်သွင်းသော အမေရိကန်ကုန်ပစ္စည်း စုစုပေါင်းတန်ဖိုး၏ သုံးပုံ တစ်ပုံရှိကြောင်း ၎င်းက ပြောကြားခဲ့သည်။
ကနေဒါအနေဖြင့် အခွန်စည်းကြပ်ခြင်းမဟုတ်သည့် တန်ပြန်ဆောင်ရွက်မှုများကိုလည်း စဉ်းစားလျက်ရှိကြောင်း ထရူးဒိုးက ပြောကြားခဲ့သည်။ ကနေဒါနိုင်ငံ ဒေသခေါင်းဆောင်များနှင့် နိုင်ငံရေးပါတီ အသီးသီးက အမေရိကန်၏ စည်းကြပ်ခွန်းတိုးမြှင့်ကောက်ခံမှုအပေါ် ကျေနပ်မှုမရှိကြောင်း၊ ဖက်ဒရယ်အစိုးရ၏ လက်တုံ့ပြန် စည်းကြပ်ခွန်ကောက်ခံမှုကို ထောက်ခံကြောင်း ပြောကြားခဲ့သည်။ ကနေဒါနိုင်ငံ ဗြိတိသျှကိုလံဘီယာပြည်နယ်မှူး David Eby က အမေရိကန်အစိုးရ၏ စည်းကြပ်ခွန်အစီအမံသည် “နှစ်နိုင်ငံအကြား သမိုင်းကြောင်း ချိတ်ဆက်မှုကို လုံးဝ ဖောက်ဖျက်ခဲ့တယ်” ဟု ပြောကြားခဲ့သည်။
အမေရိကန် သမ္မတ ထရမ့်က ဖေဖော်ဝါရီ ၁ ရက်တွင် မက္ကဆီကို၊ ကနေဒါ နှစ်နိုင်ငံမှ တင်သွင်းသော ကုန်ပစ္စည်းများအပေါ် ၂၅ ရာခိုင်နှုန်း စည်းကြပ်ခွန်တိုးမြှင့်ကောက်ခံမည့် အမိန့်ကြေညာချက် လက်မှတ်ရေးထိုးခဲ့သည်။ အမေရိကန်အနေဖြင့် မူးယစ်ဆေးဝါးနှင့် တရားမဝင်ရွှေ့ပြောင်းနေထိုင်သူ ပြဿနာများ ထိထိရောက်ရောက် မဖြေရှင်းနိုင်မချင်း အထက်ပါနိုင်ငံနှစ်နိုင်ငံ၏ ကုန်ပစ္စည်းအားလုံးကို စည်းကြပ်ခွန် ၂၅ ရာခိုင်နှုန်း တိုးမြှင့်ကောက်ခံမည်ဟု ယင်းမတိုင်မီ ထရမ့်က လူမှုမီဒီယာတွင် ပြောကြားခဲ့သည်။ 

Source: Xinhua

ဇန်နဝါရီလ ၂၆ ရက်တွင် ပြီးစီးခဲ့သည့် ဘယ်လာရုစ် သမ္မတရွေးကောက်ပွဲ၏မဲရလဒ်များအရ အလက်ဇန်းဒါး လူကာရှန်ကို သမ္မတအဖြစ် ရွေးကောက်တင်မြှောက်ခံရကြောင်း ဗဟိုရွေးကောက်ပွဲကော်မရှင် (CEC) က ထုတ်ပြန်ကြေညာလိုက်ပါသည်။

ဘယ်လာရုစ်ရွေးကောက်ပွဲတွင် လက်ရှိသမ္မတ လူကာရှန် က မဲအရေအတွက် ၈၆.၈၂ %  ဖြင့် အပြတ်အသတ်အနိုင်ရခဲ့ပြီး Sergey Syrankov က မဲ ၃.၂၁ % ၊ Oleg Gaidukevich က မဲ ၂.၀၂ %၊  Anna Kanopatskaya က မဲ ၁.၈၆ % နှင့်  Alexander Khizhnyak က မဲ ၁.၇၄ %  အသီးသီးရရှိခဲ့ကြပါသည်။ မဲပေးပိုင်ခွင့်ရှိသူအားလုံး၏ ၃.၆၀  % မှာ  မည်သည့်ပါတီကိုမျှ မဲပေးခဲ့ခြင်းမရှိဘဲ ကျန် ၈၅.၆၉ % သော ပြည်သူတို့မှာ လာရောက်မဲပေးခဲ့ကြောင်း CEC ထုတ်ပြန်ချက်အရ သိရှိရပါသည်။

ရွေးကောက်ပွဲမဲဆွယ်စည်းရုံးစဉ်တွင် လူကာရှန်က ဘယ်လာရုစ်နိုင်ငံလုံခြုံရေးကို အဓိကထား ဆောင်ရွက်သွားမည်ဖြစ်ပါကြောင်း၊ ဘယ်လာရုစ်စစ်တပ်၏ ခေတ်မီ ဖွံ့ဖြိုးတိုးတက်ရေးကို ဆက်လက်လုပ်ဆောင်သွားမည် ဖြစ်ပါကြောင်း၊ ရုရှားနှင့် စစ်ရေးပူးတွဲလေ့ကျင့်မှုများကို ဆက်လက်လုပ်ဆောင်သွားမည် ဖြစ်ပါကြောင်း၊ အာရှ၊ အာဖရိကနှင့် လက်တင်အမေရိကတို့၌ မိတ်ဖက်သစ်ရှာဖွေရန်နှင့် BRICS နှင့် ရှန်ဟိုင်း ပူးပေါင်းရေးအဖွဲ့တို့အကြား အခွင့်အရေးသစ်များ ဖော်ထုတ်ရန် ဆောင်ရွက်သွားမည်ဖြစ်ပါကြောင်း ပြောကြားခဲ့ပါသည်။

ကိုးကား -TASS

ဆီးရီးယားနိုင်ငံ၏ ယာယီသမ္မတ Ahmed al-Sharaa သည် ဆော်ဒီအာရေးဗီးယား အိမ်ရှေ့မင်းသား Mohammed bin Salman နှင့် အကြောင်းအရာများစွာ ဆွေးနွေးခဲ့သည်ဟု ဆီးရီးယားသမ္မတရုံးက ပြောပါသည်။

နိုင်ငံ၏အနာဂတ်တည်ဆောက်ရေး ကြိုးပမ်းအားထုတ်မှုများကို ပံ့ပိုးကူညီလိုသည့် ဆော်ဒီအာရေးဗီးယား၏ စစ်မှန်သည့်ဆန္ဒကို Sharaa က သိမြင်ခံစားခဲ့ရသည်ဟု အဆိုပါရုံးက ပြောကြားခဲ့ပါသည်။

အဆိုပါဆွေးနွေးမှုကို ဆော်ဒီအာရေးဗီးယားနိုင်ငံမြို့တော် Riyadh ၌ ပြုလုပ်ခဲ့ကြောင်း ဆီးရီးယား နိုင်ငံပိုင်သတင်းဌာနက ဖေဖော်ဝါရီ ၂ ရက်နေ့တွင် ထုတ်ပြန်ခဲ့ပြီး ဇန်နဝါရီလတွင် လက်ရှိရာထူးတာဝန်ကို စတင်ထမ်းဆောင်ခဲ့ပြီးနောက် Sharaa ၏ ပထမဆုံး နိုင်ငံခြားခရီးဖြစ်ပါသည်။

ကာတာအခြေစိုက်ရုပ်သံလိုင်း Al Jazeera က ဆီးရီးယား ယာယီသမ္မတသည် ဆော်ဒီအာရေးဗီးယား တွင် နှစ်ရက်နေထိုင်ရန်စီစဉ်ထားသည်ဟု ဆိုပါသည်။

ကာတာနိုင်ငံ ခေါင်းဆောင် Amir Sheikh Tamim bin Hamad Al Thani နှင့် Sharaa တွေ့ဆုံပြီး ရက်ပိုင်းအကြာတွင် ယခုကဲ့သို့တွေ့ဆုံမှု ထွက်ပေါ်လာခဲ့ခြင်းဖြစ်သည်။

Sharaa သည် ချမ်းသာကြွယ်ဝသည့် ပင်လယ်ကွေ့ နိုင်ငံများနှင့် ဆက်ဆံရေးခိုင်မာရန် ကြိုးပမ်းနေကြောင်း လေ့လာသူများက ဆိုပါသည်။

နှစ်ပေါင်းများစွာဖြစ်ပွားခဲ့သည့် ပြည်တွင်းစစ်ဘေးမှ ဆီးရီးယားကို ပြန်လည်ထူထောင်နိုင်ရေး အဆိုပါ နိုင်ငံများက ကူညီရန် ယာယီသမ္မတကလိုလားကြောင်း လေ့လာသူများက ယုံကြည်လျက်ရှိပြီး Sharaa ၏ Hayat Tahrir al-Sham (HTS) အဖွဲ့သည် ဆီးရီးယား အသွင်ကူးပြောင်းရေး အစိုးရတာဝန်ခံ အဖွဲ့အစည်း ဖြစ်သည်။

HTS ဦးဆောင်သည့် အစိုးရဆန့်ကျင်ရေးတပ်ဖွဲ့များ၏ ထိုးစစ်ကြောင့် ဒီဇင်ဘာလအတွင်း သမ္မတ Bashar al-Assad အစိုးရကို ဖြုတ်ချပြီးနောက် ၎င်းအဖွဲ့သည် နိုင်ငံတည်ဆောက်ရေးကြိုးပမ်းမှုများကို ဦးဆောင်နေပါသည်။

ကိုးကား-NHK World

အမေရိကန်သမ္မတ ဒေါ်နယ်ထရမ့်သည် ယူကရိန်းအား အမေရိကန်၏ အကူအညီအတွက် ယူကရိန်း၏ အဖိုးတန်ရှားပါးသတ္တုများနှင့်ဖလှယ်ရန် သဘော တူညီမှုကို မျက်စိကျလျက်ရှိပါသည်။ 

သမ္မတ ဒေါ်နယ်ထရမ့်က ဖေဖော်ဝါရီ ၃ ရက် (တနင်္လာနေ့) တွင် ယူကရိန်းနှင့် သဘောတူညီချက်တစ်ရပ်ကို ညှိနှိုင်းလိုကြောင်း ပြောကြားခဲ့သည်။ ထို သဘောတူညီချက်အရ ယူကရိန်းမှ အီလက်ထရွန်းနစ် နှင့်နည်းပညာများတွင် အဓိကအသုံးပြုသည့် အဖိုးတန် ရှားပါးသတ္တု များ (rare earth metals) ထောက်ပံ့ရန် အာမခံပြီး အမေရိကန်မှ အကူအညီနှင့် ဖလှယ်ရန် ရည်ရွယ်ထားပါသည်။ 

ယူကရိန်းသမ္မတ ဇီလန်စကီးကလည်း ပြီးခဲ့သည့် အောက်တိုဘာလက ရုရှားနှင့်စစ်ပွဲအဆုံးသတ်ရန် ၎င်း၏ “အောင်ပွဲအစီအစဉ်” (victory plan) တွင် ယင်းအကြံပြုချက်ကို စတင်မိတ်ဆက်ခဲ့ဖူးပါသည်။ 

ကိုးကား - Moscow Times

ပိုမို ဖတ်ရှုရန်
https://sacministry.gov.mm/my/news/2298

ဇီလန်စကီးအား အယုံအကြည်မဲ့စေရန် NATO မှ ကြီးမားသောစီမံကိန်းကို ပြင်ဆင်နေကြောင်း ရုရှား ပြင်ပထောက်လှမ်းရေးဝန်ဆောင်မှုဌာန (SVR) ၏ ထုတ်ပြန်ချက် အရ သိရှိရပါသည်။

အထူးသဖြင့် စစ်လက်နက်ဝယ်ယူရန် သီးသန့်ခွဲထားသော ဘဏ္ဍာငွေမှ သမ္မတအပါအဝင် အဖွဲ့ဝင်များကိုယ်တိုင် ဒေါ်လာ ၁.၅ ဘီလီယံကျော် ခိုးယူခဲ့ကြောင်း အချက် အလက်များထုတ်ဖော်ရန် စီစဉ်ထားပါသည်။

NATO နိုင်ငံများသည် ဗလာဒီမီယာ ဇီလန်စကီးအား ဖယ်ရှားရန် ၎င်း၏ဂုဏ်သိက္ခာကို ပြင်းထန်စွာထိပါးမည့် စီမံကိန်းတစ်ရပ်ကို ပြင်ဆင်နေကြောင်း ရုရှားပြင်ပ ထောက်လှမ်းရေးဝန်ဆောင်မှု (SVR) ၏ ထုတ်ပြန်ချက် တွင် ဖော်ပြထားပါသည်။

NATO မဟာမိတ်အဖွဲ့သည် ယူကရိန်းအစိုးရ ခေါင်းဆောင်ကိုဖယ်ရှားလိုပြီး အတုအယောင်ဒီမိုကရေစီ ရွေးကောက်ပွဲများဖြင့် အစားထိုးရန် ရည်ရွယ်ထားကြောင်း၊ ၎င်းတို့၏တွက်ချက်မှုအရ ယူကရိန်းတွင် ယခုနှစ် ဆောင်းဦးမတိုင်မီ ရွေးကောက်ပွဲကျင်းပရန် စီစဉ်ထား ပြီး ရွေးကောက်ပွဲမတိုင်မီ ဇီလန်စကီးအား ဂုဏ်သိက္ခာ ဖျက်မှုများ စနစ်တကျပြုလုပ်ရန် NATO ဌာနချုပ်တွင် စီမံကိန်းရေးဆွဲနေကြောင်း SVR ၏ပြောကြားချက်အရ သိရှိရပါသည်။

ထို့အပြင် SVR က ဇီလန်စကီးနှင့် ၎င်း၏အဖွဲ့သည် စစ်မျက်နှာတွင် အသက်ရှင်နေသည်ဟု မှတ်တမ်းတင်ထားသော သေဆုံးပြီးယူကရိန်းစစ်သည် ၁၃၀,၀၀၀ ၏ လစာငွေများကို နိုင်ငံခြားသို့ လျှို့ဝှက်လွှဲပြောင်းခဲ့သည့် စနစ်ကိုဖော်ထုတ်မည်ဟု ဖြည့်စွက်ပြောကြားခဲ့ပါသည်။ 

ထို့အပြင် “ယူကရိန်းစစ်ဦးစီးချုပ်ကြီး၏ အနောက်နိုင်ငံများမှ ကူညီထောက်ပံ့ထားသော စစ်လက်နက်များကို အာဖရိကရှိ လက်နက်ကိုင်အဖွဲ့များသို့ ထပ်တလဲလဲ ရောင်းချမှု” ကိုလည်း ထုတ်ဖော်သွားမည်ဟု ဆိုပါသည်။

SVR ၏ ပြန်ကြားရေးဌာနက “ဇီလန်စကီး၏ အချိန် ကုန်ဆုံးပြီဖြစ်ကြောင်း NATO ပါသိရှိလာပြီဖြစ်သော်လည်း ထိုသိမြင်မှုသည် ယူကရိန်းနိုင်ငံသား သိန်းချီ သေဆုံးမှုနှင့်ရင်းနှီးခဲ့ရသည်မှာ ဝမ်းနည်းစရာ ဖြစ်ကြောင်း” ဝေဖန်ခဲ့ပါသည်။

NATO မဟာမိတ်အဖွဲ့ ခေါင်းဆောင်များက “ရုရှား ဆန့်ကျင်ရေးစခန်းအဖြစ် ယူကရိန်း၏ ကျန်ရှိသောအပိုင်းကို ထိန်းသိမ်းခြင်း” နှင့် “ပဋိပက္ခ ဖြေရှင်းရေး ဆွေးနွေးပွဲများ စတင်ခြင်း” အားဖြင့် စစ်ပွဲကို ယာယီ ရပ်စဲရန် စီစဉ်နေကြောင်း SVR က ထပ်လောင်း ဖော်ပြခဲ့ပါသည်။ အဆိုပါကိစ္စနှင့်ပက်သတ်၍ ဝါရှင်တန် နှင့် ဘရပ်ဆဲလ်တို့က သဘောတူထားကြောင်းလည်း ဖော်ပြခဲ့ပါသည်။

ထို့အပြင် NATO မဟာမိတ်အဖွဲ့က “ရုရှား တပ်မတော်၏ ဖိအားများကို ယူကရိန်းတပ်များ မကြာမီ ခံနိုင်ရည်လျော့နည်းလာမည်” ဟု ယုံကြည်ပြီး “အမေရိကန်တွင် ဒေါ်နယ်ထရမ့် အာဏာရလာသည်နှင့်အမျှ ယူကရိန်းသို့ အနောက်နိုင်ငံများ၏စစ်ရေးအကူအညီ ဆက်လက်ပေးပို့မှုနှင့်ပတ်သက်၍ မသေချာမရေရာမှုများ တိုးလာမည်” ဟု SVR က သုံးသပ်ခဲ့ပါသည်။

ကိုးကား - TASS

ဥရောပရှိ ထိပ်တန်းခေါင်းဆောင်များအနေဖြင့် အမေရိကန်သမ္မတဒေါ်နယ်ထရမ့်၏ မူဝါဒကို ဆက်လက်လိုက်နာရဖွယ်ရှိကြောင်း ရုရှားသမ္မတဗလာဒီမာပူတင်က ဖေဖော်ဝါရီလ  ၂ရက်တွင် ပြောသည်။

ထရမ့်၏ဝိသေသလက္ခဏာ၊ မဆုတ်မနစ်ကြိုးပမ်း ပြောဆိုမှုတို့ကြောင့် ဥရောပတွင် အစီအစဉ်ကျမှုကို အလျင်အမြန်ဖြစ်ပေါ်စေမည်ဖြစ်ကြောင်း ပူတင်က သတင်းထောက်တစ်ဦးဖြစ်သူ ပါဗယ်ဇာရူဘင်နှင့် ပြုလုပ်သည့် တွေ့ဆုံမေးမြန်းခန်းတစ်ခု၌ ပြောခြင်းဖြစ်သည်။

ထို့ပြင်  လက်ရှိ  ဥရောပခေါင်းဆောင်များသည်   ယခင်ခေါင်းဆောင်ဟောင်းများနှင့်နှိုင်းယှဉ်ပါက  ၎င်းတို့၏ ကိုယ်ပိုင်အတွေးအခေါ်အတွက် တိုက်ခိုက်ရန်ရဲရင့်မှု မရှိကြောင်း၊ ထို့ပြင် ဥရောပခေါင်းဆောင်များသည်   ၎င်းတို့၏ဘဝတွင် ယခင်ကလုပ်ဆောင်ခဲ့ဖူးခြင်း မရှိသော ဆောင်ရွက်ချက်များတွင် ပါဝင်လျက်ရှိကြောင်း ပူတင်ကဆက်လက် ပြောကြားခဲ့သည်။

အမေရိကန်သမ္မတအဖြစ် ထရမ့်ပြန်လည် တက်ရောက်လာမည်ကို ဥရောပခေါင်းဆောင် အများအပြားက စိုးရိမ်မကင်းဖြစ်ခဲ့ရသည်ဟု   ပြီးခဲ့သည့်နှစ် မဲဆွယ်ပွဲကာလ တစ်လျှောက်လုံး၌ ပြောကြားခဲ့ကြောင်း ပူတင်ကဆက်လက် ပြောကြားခဲ့ကြောင်း သိရသည်။

Source: Myawady Web Portal

ဖေဖော်ဝါရီ ၃ ရက်တွင် ဘယ်လာရုစ် ဝန်ကြီးချုပ် ရိုမန် ဂိုလိုဗချင်ကို လက်မှတ်ရေးထိုးထားသည့် အမိန့်အရ ဘယ်လာရုစ်အစိုးရအဖွဲ့သည် ရာထူးမှ နုတ်ထွက်လိုက်ကြောင်း အစိုးရအဖွဲ့ သတင်းထုတ်ပြန်ချက်အရ သိရှိရသည်။

ဘယ်လာရုစ် ဖွဲ့စည်းပုံအခြေခံဥပဒေအရ ရွေးကောက်ပွဲတွင် အနိုင်ရရှိသည့် အစိုးရသစ်မတက်မီတွင် လက်ရှိအစိုးရသည် ရာထူးမှ နုတ်ထွက်ရမည်ဖြစ်ကြောင်း သတင်းထုတ်ပြန်ချက်အရ သိရပါသည်။ ထိုအမိန့်မှာ လက်မှတ်ရေးထိုးသည့်နေ့တွင် အတည်ဖြစ်သည်ဟု ဖော်ပြထားပါသည်။ 

သို့သော် “ဘယ်လာရုစ်သမ္မတနိုင်ငံဝန်ကြီးများကောင်စီဥပဒေ” အရ အစိုးရအဖွဲ့သည် နုတ်ထွက်ပြီးနောက် သမ္မတ၏ အမိန့်ညွှန်ကြားချက်အရ အစိုးရသစ် မဖွဲ့စည်းမီအချိန်ထိ ၎င်း၏ လုပ်ငန်းတာဝန်များကို ဆက်လက်တာဝန်ထမ်းဆောင်ရန် ဖြစ်ပါသည်။

ကိုးကား -TASS 

Photo: Mehr News Agency

ကနေဒါမှ အမေရိကန်သို့ တင်သွင်းသည့်ကုန်ပစ္စည်းများကို အကောက်ခွန်နှုန်းထား ၂၅ ရာခိုင်နှုန်း တိုးမြှင့်ကောက်ခံခြင်းသည် တရားမဝင်သောကိစ္စရပ်ဖြစ်၍ နိုင်ငံတကာဥပဒေအဖွဲ့အစည်းမှတစ်ဆင့် ဥပဒေကြောင်းအရ တရားစွဲဆိုသွားမည်ဟု ကနေဒါအစိုးရ အဆင့်မြင့်အရာရှိကြီးတစ်ဦးက ဖေဖော်ဝါရီ ၂ ရက် (တနင်္ဂနွေနေ့) တွင်ပြောကြားလိုက်သည်။

ကနေဒါမှ အမေရိကန်သို့ တင်သွင်းသည့် ကုန်ပစ္စည်းများကို အကောက်ခွန်နှုန်းထား ၂၅ ရာခိုင်နှုန်း တိုးမြှင့်ကောက်ခံပါကအမေရိကန်မှ ကနေဒါသို့ တင်သွင်း လာသည့် ကုန်ပစ္စည်းများကိုလည်း ယင်းနှုန်းထားဖြင့် ပြန်လည်ကောက်ခံသွားမည်ဟု ကနေဒါ၀န်ကြီးချုပ် Justin Trudeau က ဖေဖော်ဝါရီလ ၂ ရက်နေ့တွင် ပြောကြားထားပါသည်။ 

အမေရိကန်သမ္မတ ဒေါ်နယ်ထရမ့်၏ အကောက်ခွန် နှုန်းထားတိုးမြှင့်မှုသည် ဖေဖော်ဝါရီ ၄ ရက်တွင် စတင် အသက်ဝင်မည်ဖြစ်ပါသည်။ ထရမ့်၏ ကြေညာချက်ကိုတုံ့ပြန်သည့်အနေဖြင့် ကနေဒါအစိုးရသည် အမေရိကန် ကုန်ပစ္စည်းပေါင်း ၁,၂၅၆ မျိုး (စုစုပေါင်းတန်ဖိုး ကနေဒါ ဒေါ်လာ ၃၀ ဘီလီယံအထိ) အပေါ်တွင် အကောက်ခွန် နှုန်း ၂၅ % ပြန်လည်တိုးမြှင့်ကောက်ခံသွားမည် ဖြစ်ပါသည်။ 

သမ္မတ ထရမ့်၏ ကြေညာချက်သည် နှစ်နိုင်ငံအကြား ချုပ်ဆိုထားသော လွတ်လပ်သော ကုန်သွယ်ရေးသဘောတူစာချုပ်နှင့် အပြည်ပြည်ဆိုင်ရာ ကုန်သွယ်ရေးအဖွဲ့၏ ကုန်သွယ်ရေးကတိပြုမှုများကို ချိုးဖောက်သည့်အတွက် တရားစွဲဆိုသွားမည်ဖြစ်ပါကြောင်း ကနေဒါအစိုးရ အဆင့်မြင့်အရာရှိကြီးက ဆက်လက် ပြောကြားထားပါသည်။

ကိုးကား -Reuters

အမေရိကန်က ယူကရိန်းနိုင်ငံတွင် သမ္မတနှင့် လွှတ်‌တော်ရွေးကောက်ပွဲများကို ယခုနှစ်ကုန်၌ ကျင်းပစေလိုကြောင်း အမေရိကန်သမ္မတ ဒေါ်နယ်ထရမ့်၏ ယူကရိန်းပဋိပက္ခအတွက် အထူးသံတမန် ကိတ်ကယ်‌လော့၏ ပြောကြားချက်များကိုကိုးကားပြီး ရိုက်တာ သတင်းဌာနက ရေးသားဖော်ပြခဲ့ပါသည်။ အစီရင်ခံစာအရ ကိတ်ကယ်လော့နှင့် အမေရိကန်အစိုးရ တာဝန်ရှိသူများသည် ရုရှားနှင့်အလားအလာရှိသော အပစ်အခတ် ရပ်စဲရေးသဘောတူညီချက်၏ တစ်စိတ်တစ်ပိုင်းအနေဖြင့် ယူကရိန်း၌ ရွေးကောက်ပွဲများလုပ်ဆောင်နိုင်ရေး တောင်းဆိုရန်အတွက် ဆွေးနွေးခဲ့ကြကြောင်းလည်း သိရပါသည်။

ထို့အပြင် ယူကရိန်း၌ သမ္မတနှင့်လွှတ်တော် ရွေးကောက်ပွဲများ လုပ်ဆောင်ပြီးရန် လိုအပ်သည်ဟု ကိတ်ကယ်လော့က ပြောကြားခဲ့ပြီး ဒီမိုကရက်တစ် နိုင်ငံအများစု၌ စစ်ပွဲဖြစ်ပွားနေသည့် ကာလမှာပင် ရွေးကောက်ပွဲများရှိပြီး ယူကရိန်းတွင်လည်း ဤကဲ့သို့ လုပ်ဆောင်ရန် အရေးကြီးသည်ဟု ထင်မြင်ကြောင်း ၎င်းက ဆက်လက်ပြောကြားခဲ့သည်။ ယူကရိန်းတွင် ၂၀၂၃ ခုနှစ်၊ ‌အောက်တိုဘာလနှင့် ၂၀၂၄ ခုနှစ်၊ မတ်လ တို့တွင် ကျင်းပရန်စီစဉ်ထားသည့် လွှတ်တော်နှင့် သမ္မတရွေးကောက်ပွဲများကို ရုရှားနှင့်စစ်ပွဲ ဖြစ်ပွားနေမှုနှင့်အတူ စစ်အုပ်ချုပ်‌ရေးဥပဒေပြဋ္ဌာန်းထားချိန်အတွင်း ကျင်းပဖြစ်မည်မဟုတ်ကြောင်း ယူကရိန်း သမ္မတ ဇီလန်စကီးက ထုတ်ဖော်ပြောဆိုခဲ့ဖူးသည်။

၂၀၂၂ ခုနှစ်၊ ဖေဖော်ဝါရီလတွင် ရုရှား-ယူကရိန်းစစ်ပွဲ စတင်ဖြစ်ပွားခဲ့ပြီးနောက်ပိုင်း ဇီလန်စကီးက စစ်အုပ်ချုပ်ရေးဥပဒေကို စတင်ပြဋ္ဌာန်းခဲ့ခြင်းလည်းဖြစ်သည်။

ကိုးကား-NP News