လက်နက်ကိုင်အကြမ်းဖက်သမားများသည် အပြစ်မဲ့ အရပ်သားပြည်သူများ နေထိုင်ရာ မြို့၊ ရပ်ကွက်၊ ကျေးရွာများအတွင်း၌ တိုက်ပွဲများဖော်ဆောင်ခြင်း၊ လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများအား လုပ်ဆောင်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇန်နဝါရီ ၇ ရက် နံနက် ၁၁ နာရီ ၁၀ မိနစ်တွင် စစ်ကိုင်းတိုင်းဒေသကြီး၊ ရွှေဘိုမြို့နယ်၊ အမှတ်(၆)ရပ်ကွက်သို့ PDF အမည်ခံ အကြမ်းဖက်အဖွဲ့က အများပြည်သူထိခိုက်စေရန် ရည်ရွယ်၍ Drone အသုံးပြုကာ Drop Bomb များ ပစ်ချတိုက်ခိုက်ခဲ့ရာ ရပ်ကွက်အတွင်း Drop Bomb များကျရောက်ပေါက်ကွဲခဲ့မှုကြောင့် အဆိုပါရပ်ကွက်နေ ဒေါ်အေးအေးခိုင် (၅၁)နှစ်တွင် ဗုံးသီးပေါက်ကွဲစထိမှန် ဒဏ်ရာများရရှိခဲ့၍ ဆေးကုသနိုင်ရေး ရွှေဘိုမြို့နယ်ပြည်သူ့ဆေးရုံသို့ ပို့ဆောင်ထားရှိကြောင်း သိရသည်။
ထိုသို့ အပြစ်မဲ့ အရပ်သားပြည်သူများ အေးချမ်းစွာနေထိုင်လျက်ရှိသော မြို့၊ ရပ်ကွက်၊ ကျေးရွာအတွင်းသို့ အကြမ်းဖက်သမားများမှ တိုက်ပွဲများဖော်ဆောင်ခြင်းနှင့် လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများ လုပ်ဆောင်မှုကြောင့် အပြစ်မဲ့ အရပ်သားပြည်သူများ ထိခိုက်ဒဏ်ရာရရှိခဲ့မှုအပေါ် ဒေသခံပြည်သူများက လုံးဝလက်ခံနိုင်ခြင်းမရှိဘဲ ဆန့်ကျင်ကန့်ကွက်လျက်ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများကို ပြည်သူလူထုနှင့်ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိသည်။

Source: www.moha.gov.mm

နေတိုးအဖွဲ့အနေဖြင့် ရေအောက်အခြေခံအဆောက်အဦများကို ကာကွယ်ရန်အတွက် ဘောတစ်ပင်လယ်သို့ စစ်ရေယာဉ် ၁၀ စင်းခန့်စေလွှတ်မည်ဖြစ်ကြောင်း အဆိုပါအဖွဲ့၏ ပြောကြားချက်ကို ကိုးကား၍ နီးစပ်သည့် သတင်းအရင်းအမြစ်များကပြောသည်။

နေတိုးတပ်ဖွဲ့မှ စစ်သင်္ဘောများသည် ဘောတစ်ပင်လယ်သို့ ယခုသီတင်းပတ်အကုန်ပိုင်းတွင် ရောက်ရှိမည်ဖြစ်ပြီး ၎င်းသင်္ဘောများသည် စွမ်းအင်နှင့်တယ်လီကွန်မြူနီကေးရှင်းဆိုင်ရာ ဆက်သွယ်ရေးကြိုးများအနီးတွင် နေရာယူသွားမည်ဖြစ်ကြောင်း ဖင်လန်သတင်းဌာနတစ်ခုက ထုတ်ပြန်သည်။

အဆိုပါဒေသအတွင်းရှိ ရေအောက်ကေဘယ်လ်ကြိုးများသည် ၂၀၂၄ ခုနှစ် ဒီဇင်ဘာလ ၂၅ ရက်နှင့် ၂၆ ရက်တို့တွင် ပြတ်တောက်သွားခဲ့ရာ ၎င်းကြိုးများအနက်သုံးကြိုးမှာ ဖင်လန်နှင့် အက်စတိုးနီးယားတို့ကြား ဆက်သွယ်ထားသော ကြိးများဖြစ်ပြီး ကျန်တစ်ကြိုးမှာ ဖင်လန်နှင့် ဂျာမနီတို့ကြား ဆက်သွယ်ထားကြောင်း သိရသည်။

Source: မြဝတီသတင်းစာ

ဂျပန်ယာကူဇာ ဂိုဏ်းခေါင်းဆောင်တစ်ဦးဖြစ်သူ တာကီရှိ အီဘီဆာဝါက ၎င်းသည် မြန်မာနိုင်ငံထံမှ နျူကလီးယား ထုတ်လုပ်ရာတွင် အသုံးပြုသောအရာ များကို လက်ဝယ်ထားရှိမှုအပြင် တရားမဝင် လက်နက် မှောင်ခိုရောင်းဝယ်ရန် ကြိုးပမ်းမှုများအတွက် အပြစ် ရှိသည်ဟု ဝန်ခံလိုက်ကြောင်း အမေရိကန်အစိုးရအာဏာပိုင်များက ထုတ်ဖော် ပြောဆိုလိုက်သည်။ တာကီရှိ အီဘီဆာဝါနှင့် ကြံရာပါတစ်ဦးကို ၂၀၂၂ ခုနှစ် ဧပြီလအတွင်းတွင် လက်နက်မှု၊ မူးယစ် ဆေးဝါးမှောင်ခို ကုန်ကူးမှုများဖြင့် စွဲချက်တင်ခဲ့သော်လည်း ၎င်းတို့ နှစ်ဦးကို ရမန်ဖြင့် ပြန်လွှတ်ထားခဲ့ကြောင်းသိရသည်။

ထို့ပြင် အမေရိကန်အစိုးရသည် မြန်မာနိုင်ငံမှ နျူကလီး ယားနှင့် ဆက်နွှယ်သည့်ပစ္စည်းများကို ထိန်းချုပ်ပြီးတရားမဝင် ရောင်းချနိုင်ရေး အကျိုးဆောင်ပေးမှုဖြင့်ဂျပန်ယာကူဇာ ဒုစရိုက်ဂိုဏ်းဝင်ဖြစ်သူ တာကီရှိအီဘီဆာဝါကို စွဲချက်တင်ခဲ့ကြောင်း အမေရိကန်အစိုးရရှေ့နေ့များကပြောသည်။ ၎င်းသည် မြန်မာနိုင်ငံရှိ တိုင်းရင်းသား လက်နက်ကိုင်အဖွဲ့များကို လက်နက် ဝယ်ယူရောင်းချပေးခြင်းများလည်း လုပ်ကိုင်ခဲ့ကြောင်း အမေရိကန်အစိုးရရှေ့နေ့များက စွပ်စွဲထားသည်။

မြန်မာနိုင်ငံရှိလက်နက်ကိုင်အဖွဲ့များနှင့် ချုပ်ဆိုခဲ့သော စာချုပ်ထဲတွင် မြေပြင်မှ ဝေဟင်ပစ်ဒုံးကျည်များရရှိရန် ဆောင်ရွက်ပေးရေး အချက်လည်း ပါဝင်ခဲ့ကြောင်း အမေရိကန်အစိုးရရှေ့နေ့များကဆိုသည်။ အမေရိကန် အစိုးရအဖွဲ့ချုပ် ယာယီရှေ့နေချုပ်တစ်ဦးဖြစ်သော အက်ဝက်ဒ်ကင်က "တာကီရှိ အီဘီဆာဝါက ဇန်နဝါရီ ၉ ရက် ရုံးချိန်း၌ ဝန်ခံထွက်ဆိုခဲ့ကြောင်း၊ နျူကလီးယား လက်နက်ထုတ်လုပ်နိုင်မည့် ပလိုတိုနီယံများအပါအဝင် နျူကလီးယားနှင့် ဆက်နွှယ်သည့်ပစ္စည်းများကို မြန်မာနိုင်ငံ ပြင်ပကိုထုတ်၍ မှောင်ခိုကုန်ကူးခဲ့ကြောင်း ဝန်ခံခဲ့သည်။ ထို့ပြင် မြန်မာနိုင်ငံတွင် ဖြစ်ပွားနေသည့် တိုက်ပွဲများအတွင်းအသုံးပြုရန် မြေပြင်ကဝေဟင်ပစ် ဒုံးကျည်ကဲ့သို့ လက်နက်ကြီးများ ရယူပေးပြီး အပြန် အလှန်အနေဖြင့် အမေရိကန်နိုင်ငံအတွင်း ဟီရိုအင်းနှင့် စိတ်ကြွဆေးပြား အများအပြားတင်ပို့မှုများ လုပ်ဆောင် ခဲ့ကြောင်း” သိရှိရသည်။

၎င်းသည် မြန်မာနိုင်ငံထံမှ မူးယစ်ဆေးဝါးများနှင့်အတူ လက်နက်ထုတ်လုပ်နိုင်စွမ်းရှိမည့် ပလိုတိုနီယံ၊ ယူရေနီယံများကို လက်ဝယ်ထိန်းသိမ်းရယူခဲ့ကြောင်း၊ အမေရိကန် အစိုးရရှေ့နေ့များက စွပ်စွဲထားသည်။၂၀၂၀ ပြည့်နှစ် မှစပြီး အသက် ၆ဝ အရွယ်ရှိ အီဘီဆာဝါသည် နျူကလီးယား ဆက်စပ်ပစ္စည်းများကို ရောင်းချရန် အမေရိကန်အစိုးရ၏ အသွင်ယူထားသည့် ထောက်လှမ်းရေးအရာရှိတစ်ဦးနှင့် ဆက်သွယ်မိပြီး နျူကလီးယား ဆက်စပ်ပစ္စည်းများကို ရောင်းဝယ်ရန် စီစဉ်ဆောင်ရွက်ခဲ့ရာမှ ဖမ်းဆီးရမိခဲ့ခြင်း ဖြစ်သည်။

အီဘီဆာဝါနှင့်အတူ ၎င်း၏မိတ်ဆွေဖြစ်သူတို့ကို ဖမ်းဆီးနိုင်ရန် စုံစမ်းစစ်ဆေးမှုအတွင်း ထိုင်းအာဏာပိုင်များက အမေရိကန်စုံစမ်းစစ်ဆေးသူများကို အကူအညီ ပေးခဲ့ကြောင်းသိရသည်။

အမေရိကန်တရားရေးဌာနက "ဖမ်းဆီးရမိသည့် နျူကလီးယား ဆက်စပ်ပစ္စည်းများကို ဓါတ်ခွဲစမ်းသပ်ရာ ၌ နျူကလီးယားနမူနာများတွင် ပလူတိုနီယမ် အိုင်ဆိုတုပ်ပါဝင်မှုရှိနေပြီး လက်နက်ထုတ်လုပ်နိုင်စွမ်းရှိသည့်အဆင့်မျိုးဖြစ်ကြောင်း၊ ပလူတိုနီယံကို အလုံအလောက်ထုတ်လုပ်နိုင်ခဲ့မည်ဆိုပါက နျူကလီးယား လက်နက်ထုတ်လုပ်နိုင်စွမ်း ရှိလာမည်ဖြစ်ကြောင်း" ပြောကြားခဲ့သည်။

အီဘီဆာဝါသည် မြန်မာနိုင်ငံရှိ အမည်မဖော်လိုသည့် တိုင်းရင်းသားလက်နက်ကိုင်အဖွဲ့ကိုယ်စား လက်နက်များ ဝယ်ယူရန်အတွက် ငွေကြေးရရှိရန် နျူကလီယား ထုတ်လုပ်ရာတွင်အသုံးပြုသော ဆက်စပ်ပစ္စည်းရောင်းချမှုမှ ရရှိသောငွေများကို အသုံးပြုခဲ့ကြောင်းသိရသည်။ အီဘီဆာဝါသည် နျူကလီယားထုတ်လုပ်ရာတွင် အသုံးပြုသော ဆက်စပ်ပစ္စည်းနှင့်ပတ်သက်သည့် စွဲချက်များနှင့်ပတ်သက်ပြီး ထောင်ဒဏ် နှစ် ၂၀ ကျခံရဖွယ်ရှိနေကြောင်းသိရသည်။

ကိုးကား-NP News

Photo: The New York Times

ယီမင်နိုင်ငံမှ  ဟူသီသူပုန်အဖွဲ့သည် ဖျက်အားပြင်းသည့် အသံထက်မြန်ဒုံးကျည်တစ်စင်းအား စမ်းသပ်ပစ်ခတ်ခဲ့ပြီး  ယင်းဒုံးကျည်များကို စစ်ဆင်ရေးတွင် အသုံးပြုရန် စီစဉ်လျက်ရှိကြောင်း သူပုန်အဖွဲ့နှင့်နီးစပ်သည့် သတင်းအရင်းအမြစ်တစ်ခုက Sputnik သတင်းဌာနသို့ပြောသည်။

ဟူသီသူပုန်အဖွဲ့သည် အဆိုပါအသံထက်မြန်ဒုံးကျည်ကို မည်သည့်နေ့ရက်၊ နေရာတွင်လုပ်ဆောင်ခဲ့ကြောင်းကို အသေးစိတ်မသိရသေးသော်လည်း ဒုံးကျည်အား အောင်မြင် စွာစမ်းသပ်ပစ်ခတ်နိုင်ခဲ့ကြောင်း သိရသည်။ စမ်းသပ်ခဲ့သည့် အသံထက်မြန်ဒုံးကျည်သည် အသံထက် ရှစ်ဆပိုမိုမြန်ဆန်ပြီး တစ်နာရီ လျှင် မိုင်ပေါင်း ၆၂၀၀ သို့မဟုတ် ကီလိုမီတာ ၁၀၀၀၀ အထိပစ်ခတ်ရောက်ရှိနိုင်ကြောင်း ဖော်ပြထားသည်။

ယီမင်နိုင်ငံသည် အဆိုပါဒုံးကျည်များကို အစ္စရေးနိုင်ငံအတွင်းရှိ ပစ်မှတ်များအပါအဝင် ပင်လယ်နီ၊ အာရေဗျ ပင်လယ်များနှင့် အေဒင်ပင်လယ်ကွေ့အတွင်း၌ပါ တိုက်ခိုက်မှုများ လုပ်ဆောင်ရန်အတွက် စတင်ထုတ် လုပ်လျက်ရှိကြောင်း သတင်းအရင်းအမြစ်က ဆက်လက်ပြောကြားသည်။

ဟူသီသူပုန်အဖွဲ့ဝင်များသည် အချိုးမညီ စစ်ဆင်မှုပညာရပ်များကို အနောက်နိုင်ငံများ၌ လေ့လာလျက်ရှိပြီး အစ္စရေး၊ အမေရိကန်နှင့် ဗြိတိန်နိုင်ငံတို့အား အံ့အားသင့် စေရန် တိုက်ခိုက်သွားမည်ဟု ကြေညာထားကြောင်း သိရသည်။ 

Source: Myawady Webportal

"ယူကရိန်း၏ စစ်ရေးလိုအပ်ချက်များကို အမျိုးအစားခွဲခြားပြီး ယင်းအမျိုးအစားတစ်ခုစီအတွက် အကူအညီပေးမည့် နေတိုးအုပ်စုဝင်နိုင်ငံများကို သတ်မှတ်ပေးသွားမည်ဖြစ်ကြောင်း" အမေရိကန်၊ ပင်တဂွန်စစ်ဌာနချုပ်မှ အဆင့်မြင့်ကိုယ်စားလှယ်တစ်ဦးက ဇန်နဝါရီ ၇ ရက်နေ့က ပြောကြားခဲ့ပါသည်။

"ယူကရိန်းသို့ လက်နက်များပို့ဆောင်ပေးမည့် အုပ်စု ရှစ်စုကိုဖွဲ့စည်းခဲ့ကြောင်း၊ အုပ်စုတစ်စုစီသည် ယူကရိန်း၏ စစ်ရေးစွမ်းရည်တစ်ခုစီကို ကိုယ်စားပြုပြီး အုပ်စုတစ်စုတွင် အနည်းဆုံး နေတိုးအဖွဲ့ဝင်နှစ်နိုင်ငံ ပူးတွဲဆောင်ရွက်မည်ဖြစ်ကြောင်း" အဆိုပါ ကိုယ်စားလှယ်က ပြောကြားခဲ့သည်။ 

ယူကရိန်းကာကွယ်ရေးအဖွဲ့၏ ၂၅ ကြိမ်မြောက် အစည်းအဝေးကို ဇန်နဝါရီလ ၉ ရက်နေ့တွင် ဂျာမနီနိုင်ငံ၊ ရမ်စတန်လေတပ်စခန်း၌ ကျင်းပပြုလုပ်မည်ဖြစ်ပြီး အမေရိကန်ကာကွယ်ရေးဝန်ကြီး လွိုဒ်အော်စတင် တက်ရောက်မည်ဟု သိရှိရပါသည်။

ကိုးကား - TASS

Photo- dantri.com.vn

အမေရိကန်သမ္မတ ဂျိုးဘိုင်ဒင်၏အစိုးရအဖွဲ့သည် ယူကရိန်းသို့ နောက်ဆုံးအကြိမ်အဖြစ် အကြီးမားဆုံး စစ်ရေးအကူအညီပေးပို့ရေး အစီအစဉ်ကို ဇန်နဝါရီလ ၉ ရက်နေ့တွင် ကြေညာမည်ဖြစ်ကြောင်း ပင်တဂွန်မှ သတင်းရင်းမြစ်များက The Associated Press သို့ ပြောကြားခဲ့ပါသည်။

အမေရိကန်ကာကွယ်ရေးဝန်ကြီး Lloyd Austin ၏ ဂျာမနီနိုင်ငံခရီးစဉ်အတွင်း ယူကရိန်းကို ထောက်ခံသည့် မိတ်ဖက်နိုင်ငံပေါင်း ၅၀ ခန့်မှ ကိုယ်စားလှယ်များနှင့် တွေ့ဆုံချိန်တွင် အဆိုပါကြေညာချက်ကို ထုတ်ပြန်ဖွယ် ရှိပါသည်။ အဆိုပါ စစ်ရေးအကူအညီ၏ ပမာဏကို မဖော်ပြထားသော်လည်း အမေရိကန် ကွန်ဂရက်က ယူကရိန်းအား ကူညီရန်ကျန်ရှိနေသည့် ပမာဏ ဒေါ်လာ ၄ ဘီလီယံခန့် အားလုံးကို ထည့်သွင်းမည်မဟုတ်ကြောင်း သတင်းရင်းမြစ်များက ပြောကြားခဲ့ပါသည်။

ကိုးကား - TASS

Su 35 S ဘက်စုံသုံး တိုက်လေယာဉ် လိုက်ပါခြံရံလျက် ရုရှားလေကြောင်း၏ Su-34 အမျိုးအစား ဘက်စုံသုံး အသံထက်မြန်သည့် စူပါဆိုးနစ်ဗုံးကြဲတိုက် လေယာဉ် တစ်စင်းသည် Kursk ဒေသရှိ ယူကရိန်းစစ်တပ်၏ အမာခံတပ်စခန်းချရာ ပစ်မှတ်များကို ဗုံးကြဲတိုက်ခိုက်လိုက်ရာ တပ်စခန်းများနှင့် ယူကရိန်းတပ်ဖွဲ့ဝင်များစွာ ထိမှန်ခဲ့ကြောင်း ရုရှားကာကွယ်ရေးဝန်ကြီးဌာနက သတင်းထုတ်ပြန်လိုက်ပါသည်။ 

ရုရှား၏ အဆင့်မြင့် Su-34 ဗုံးကြဲတိုက်လေယာဉ်သည် Su 35S တိုက်လေယာဉ်နှင့်အတူခြံရံ၍ အခြေစိုက်လေတပ်စခန်းမှ ထွက်ခွာသွားကာ ယူကရိန်းစစ်တပ်၏ အမာခံတပ်စခန်း ပစ်မှတ်များကို အောင်မြင်စွာ ဗုံးကြဲပစ်ချနိုင်ခဲ့ကြောင်း၊ ယူကရိန်းတပ်ဖွဲ့ဝင် အများအပြား ထိမှန်သွားကြောင်း၊ အဆိုပါတိုက်လေယာဉ်များမှာ တိုက်ခိုက်ရေးတာဝန်ပြီးဆုံးပြီးနောက် သက်ဆိုင်ရာအခြေစိုက်လေတပ်စခန်းသို့ ချောချောမောမော ရောက်ရှိလာကြောင်း ထုတ်ပြန်ချက်တွင် ဖော်ပြထားပါသည်။

ကိုးကား - TASS

Photo- The National Interest

အထူးစစ်ဆင်ရေးဇုန်အတွင်း တစ်ရက်လျှင် ယူကရိန်းတပ်မတော်၏ ဆုံးရှုံးမှုပမာဏမှာ စစ်မှုထမ်း ၁၆၃၅ ဦးရှိကြောင်း ရုရှားကာကွယ်ရေးဝန်ကြီးဌာနက သတင်း ထုတ်ပြန်ခဲ့ပါသည်။

ဇန်နဝါရီ ၇ ရက်နေ့အတွင်း ရုရှားတပ်မတော်သည် ယူကရိန်းတို့၏ စစ်လေယာဉ်ကွင်းများ၊ လက်နက်သိုလှောင်ရုံများနှင့် ခရိုင် ၁၆၄ ခုရှိ ယူကရိန်းစစ်တပ်နှင့် ကြေးစားစစ်သားများ၏ နည်းပညာဆိုင်ရာ ပစ္စည်းများ သိုလှောင်ရာနေရာများကို ချေမှုန်းခဲ့ပါသည်။

ထို့အပြင် ပြီးခဲ့သည့် ၂၄နာရီ အတွင်း Kursk ဒေသရှိ ယူကရိန်းတပ်ဖွဲ့များ၏ ဆုံးရှုံးမှုပမာဏမှာ စစ်ဘက်ဆိုင်ရာဝန်ထမ်း ၃၂၅ ဦးထက်မနည်းကျဆုံးခဲ့ကြောင်း ရုရှားကာကွယ်ရေးဝန်ကြီးဌာနက သတင်းထုတ်ပြန်ခဲ့ပါသည်။

ကိုးကား - TASS

ပစိဖိတ်ဒေသအတွင်း ပြိုင်ဘက်ကင်းသည့် အသံထက်မြန်သော တာလတ်ပစ် ပဲ့ထိန်းဒုံးကျည်သစ်ကို ဇန်နဝါရီ ၆ ရက်နေ့ နေ့လယ်ပိုင်းတွင် ပစ်လွှတ်ခဲ့ကြောင်း မြောက်ကိုရီးယားက အခိုင်အမာ ပြောကြားလိုက်ပါ သည်။ 

မြောက်ကိုရီးယား၏ ၂ လတာ အတွင်း ပထမဆုံး အကြိမ် ဒုံးကျည်ပစ်လွှတ်လိုက်ချိန်မှာ အမေရိကန်နိုင်ငံခြားရေးဝန်ကြီး Antony Blinken သည် တောင်ကိုးရီးယားခေါင်းဆောင်အချို့နှင့် တွေ့ဆုံဆွေးနွေးရန် ဆိုးလ်သို့ရောက်ရှိနေချိန်နှင့် တိုက်ဆိုင် နေပါသည်။ 

ဟိုက်ပါဆိုးနစ်ဒုံးကျည်အမျိုးအစားများမှာ အသံထက် ငါးဆထက်မက မြန်ဆန်ပီး ခြေရာခံ၍ ပစ်ချရန်အလွန် ခက်ခဲပါသည်။ မြောက်ကိုရီးယားကမူ ၎င်းတို့ ယခု ပစ်လွှတ်လိုက်သော ဒုံးကျည်မှာ အသံထက် ၁၂ ဆ မြန်ဆန်ပြီး ကီလိုမီတာ ၁၅၀၀ ပျံသန်းနိုင်ကြောင်း ပြောကြားလိုက်သည်။ 

ကိုးကား - BBC

ရုရှားက ယူကရိန်းအရှေ့ပိုင်းဒေသများဖြစ်သည့် Donetsk နှင့် Kharkiv ဒေသများမှ ရွာအများအပြားကို သိမ်းပိုက်ခဲ့သည့်အတွက် ယူကရိန်းသည် ၂၀၂၄ ခုနှစ်တွင် ပိုင်နက် စတုရန်းကီလိုမီတာ ၃,၆၀၀ ကျော် ဆုံးရှုံးခဲ့ရသည်ဟု ခန့်မှန်းရကြောင်း ယူကရိန်းမီဒီယာတစ်ခုက ဖော်ပြသည်။

ရှေ့တန်းစစ်မျက်နှာများနှင့် အခြားအရင်းအမြစ်များမှ ပေးပို့သည့်အချက်အလက်များကို အခြေခံပြီးဒေသတွင်း အဖွဲ့အစည်းတစ်ခုမှ ရရှိသည့်မြေပုံကို လေ့လာသုံးသပ်၍ Militarnyi က အဆိုပါ ခန့်မှန်းချက်ကို ဖော်ပြခဲ့ပါသည်။

ရုရှားတပ်ဖွဲ့များသည် ပြီးခဲ့သည့် နွေရာသီကာလတွင် ၎င်းတို့၏ထိုးစစ်ကို အရှိန်အဟုန်ပြင်းစွာ စတင်ခဲ့ပြီး နိုဝင်ဘာလတစ်လအတွင်း၌ ယူကရိန်းပိုင်နက် ၆၁၀ စတုရန်းကီလိုမီတာကို သိမ်းပိုက်နိုင်ခဲ့သည်ဟု ခန့်မှန်း ထားကြောင်း အဆိုပါအစီရင်ခံစာတွင် ဖော်ပြထား သည်။

၂၀၂၄ ခုနှစ်အတွင်း ယူကရိန်းပိုင်နက် ၄,၅၀၀ စတုရန်း ကီလိုမီတာခန့်အား ၎င်း၏တပ်ဖွဲ့များက သိမ်းယူခဲ့ကြောင်း ရုရှားက ပြီးခဲ့သည့် ဒီဇင်ဘာလအတွင်းက အခိုင်အမာ ပြောကြားခဲ့ပါသည်။

ယခုအချိန်တွင်လည်း ရုရှားတပ်ဖွဲ့များသည် ယူကရိန်းကို ဆက်လက်ထိုးစစ်ဆင်တိုက်ခိုက်လျက်ရှိသည်။ အရှေ့မြောက်ပိုင်း Sumy ဒေသရှိအာဏာပိုင်များက ရုရှား၏ ပဲ့ထိန်းဒုံးကျည်များဖြင့် တိုက်ခိုက်မှုကြောင့် ကလေးငယ်နှစ်ဦးအပါအဝင် လူ ၁၀ ဦး ဒဏ်ရာရရှိခဲ့ကြောင်း သိရှိရသည်။

ကိုးကား-NHK World