ထိုင်ဝမ်အစိုးရဌာနများကို တရုတ်နိုင်ငံဆိုက်ဘာ တိုက်ခိုက်မှုများမှာ ၂၀၂၃ ခုနှစ် တစ်ရက်လျှင် ပျမ်းမျှ ၁.၂ သန်းရှိခဲ့သော်လည်း ၂၀၂၄ ခုနှစ်တွင်မူ တစ်ရက်လျှင် ပျမ်းမျှ ၂.၄ သန်းအထိ နှစ်ဆမြင့်တက်လာခဲ့ကြောင်း ထိုင်ဝမ်အမျိုးသားလုံခြုံရေးဗျူရို၏ ဇန်နဝါရီလ ၅ ရက် နေ့တွင် ထုတ်ပြန်သည့် အစီရင်ခံစာအရ သိရပါသည်။ 

တရုတ်နိုင်ငံသည် ဟက်ကာတိုက်ခိုက်မှုများ ပြုလုပ်လေ့ရှိကြောင်း နိုင်ငံအတော်များများ၏ အစိုးရများက မကြာခဏဆိုသလို စွပ်စွဲလေ့ရှိပြီး တရုတ်ဖက်ကလည်း ပါဝင်ပတ်သက်ခြင်းမရှိကြောင်း ငြင်းဆိုလေ့ရှိပါသည်။ ပြီးခဲ့သည့်သီတင်းပတ်က အမေရိကန်ဘဏ္ဍာရေးဌာနမှ စာရွက်စာတမ်းများကို တရုတ်ဟက်ကာများက ခိုးယူခဲ့သည်ဟု စွပ်စွဲခံထားသည်။ 

ကိုးကား - CNA

ယီမင်ဟူသီသူပုန်များသည် ဇန်နဝါရီ ၆ ရက်နေ့က ပင်လယ်နီရှိ USS Harry Truman လေယာဉ်တင် စစ်သင်္ဘောကို ဒုံးကျည်နှင့် ဒရုန်းများဖြင့် ပစ်ခတ် တိုက်ခိုက်ခဲ့ကြောင်း ထိုတိုက်ခိုက်မှု၏ စစ်ဘက်ဆိုင်ရာ ပြောရေးဆိုခွင့်ရှိသူ Yahya Saree က ပြောကြားလိုက်သည်။

“ယီမင်ဒုံးကျည်တပ်ဖွဲ့နှင့် ဒရုန်းတပ်ဖွဲ့တို့သည် ပူးတွဲ စစ်ဆင်ရေးအနေဖြင့် ပင်လယ်နီ မြောက်ပိုင်းရှိ အမေရိကန်၏ USS Harry Truman လေယာဉ်တင် စစ်သင်္ဘောကို ခရုဇ်ဒုံးကျည် ၂ စင်းနဲ့ ဒရုန်း ၄ စင်းဖြင့် တိုက်ခိုက်တာဖြစ်ပါတယ်” လို့ အဆိုပါ ပြောရေးဆိုခွင့်ရှိ သူက ပြောကြားထားပါသည်။ 

အဆိုပါဟူသီသူပုန်များ တိုက်ခိုက်နေစဉ်တွင် အမေရိကန် လေယာဉ်တင်သင်္ဘောအနေဖြင့် ဟူသီသူပုန်များ ထိန်းချုပ်ရာ ယီမင်နယ်နိမိတ်ကို လေကြောင်းဖြင့် တိုက်ခိုက်ရန် ပြင်ဆင်နေချိန်လည်း ဖြစ်ကြောင်း ၎င်းက ဆက်လက်ပြောထားပါသည်။

ကိုးကား - TASS

MNDAA၊ TNLA နှင့် KIA ထိန်းချုပ်ရာဒေများသို့ စက်သုံးဆီများ သယ်ဆောင်ရောင်းဝယ်မှုပြုလုပ်နေသူများကို ကား(၂၂)စီးအပါအဝင် ဆီဂါလံပေါင်း(၆၀၀၀၀)ကျော်နှင့်အတူ ဖမ်းဆီးရမိထားကြောင်း နစက၏ သတင်းထုတ်ပြန်ချက်များအရ သိရသည်။

လုံခြုံရေးတပ်ဖွဲ့ဝင်များက ဒီဇင်ဘာ ၂၇ ရက်၊ မွန်းလွဲ ၁နာရီအချိန်တွင် စစ်ကိုင်းတိုင်းဒေသကြီး၊ စစ်ကိုင်းမြို့နယ်၊ ညောင်ပင်ဇင်ကျေးရွာ၊ ကံတလူ ပူးပေါင်းစစ်ဆေးရေးဂိတ်အနီးတွင် ဆီသိုလှောင်ခြံများပြုလုပ်၍ သိုလှောင်ရောင်းဝယ်လျက်ရှိကြောင်း သတင်းရရှိမှုကြောင့် ဝင်ရောက်ဖမ်းဆီးခဲ့ခြင်းဖြစ်ကြောင်း သိရသည်။ ထိုသို့ ဝင်ရောက်ဖမ်းဆီးခဲ့ရာ မန္တလေးမြို့တွင်နေထိုင်ပြီး ထွက်ပြေးတိမ်းရှောင်နေသည့် ပိုင်ရှင် ဦးသိန်းသန်းဝင်းပိုင်ဆိုင်သည့် သိန်းသန်းစက်သုံးဆီခြံ၊ ဆားတောင်မြို့တွင်နေထိုင်သည့် အသက်(၂၆)နှစ်အရွယ် ဒေါ်ထက်ထက်မျိုးဆွေ ဦးစီးလုပ်ကိုင်လျက်ရှိသည့် စက်သုံးဆီခြံ၊ မြင်းမူမြို့တွင်နေထိုင်သည့် အသက်(၂၇)နှစ်အရွယ် ဒေါ်ဇင်မာမြင့် ဦးစီးလုပ်ကိုင်လျက်ရှိသည့် စက်သုံးဆီခြံ၊ မြစ်ငယ်မြို့တွင်နေထိုင်ကာ ထွက်ပြေးတိမ်းရှောင်နေသည့် မျိုးမင်းပိုင်ဆိုင်သည့် စက်သုံးဆီခြံ နှင့် Golden Star စားသောက်ဆိုင်အနီးတွင် ရပ်တန့်ထားသည့် တရားမဝင်စက်သုံးဆီရောင်းဝယ်သည့်ကားများအား ဖမ်းဆီးရမိခဲ့ခြင်းဖြစ်ကြောင်း သိရသည်

အထက်ပါ နေရာ(၅) နေရာမှ ကျူးလွန်သူ (၁၇) ဦးအား (၂၂) ဘီး ဆီသယ်ယာဉ်(၄) စီး၊ ဆီနောက်တွဲယာဉ် (၁)စီး၊ (၂ဝ) ဘီး ဆီသယ်ယာဉ် (၃) စီး၊ (၁၂)ဘီး ဆီသယ်ယာဉ် (၁) စီး၊ (၁ဝ) ဘီး ဆီသယ်ယာဉ် (၃) စီး၊ (၈)ဘီး ဆီသယ်ယာဉ် (၁) စီး၊ (၆) ဘီး ဆီသယ်ယာဉ် (၃) စီး၊ Light Truck ယာဉ် (၅) စီး၊ Toyota Van (၁) စီး၊ စုစုပေါင်းယာဉ် (၂၂) စီး၊ ပရီမီယမ်ဒီဇယ် (၃ဝ,ဝ၈၃) ဂါလန်၊ အောက်တိန်း 92 ဓာတ်ဆီ (၃၀,၄၆၂ )ဂါလန်၊ စုစုပေါင်းစက်သုံးဆီမျိုးစုံ (၆၀,၅၄၅) ဂါလန်နှင့် တရားမဝင်စက်သုံးဆီများ အရောင်းအဝယ် ပြုလုပ်ရာတွင် အသုံးပြုသည့် ငွေများနှင့်အတူ ဖော်ထုတ်ဖမ်းဆီးရမိခဲ့ကြောင်း သိရသည်။

စစ်ဆေးချက်များအရ တရားမဝင်စက်သုံးဆီရောင်းချသူများသည် စက်သုံးဆီများအား မန္တလေးမြို့မှတစ်ဆင့် ဧရာဝတီတံတား (ရတနာပုံ) အား ဖြတ်သန်း၍ စစ်ကိုင်း - ရှိန်းမကား - ကမ်းဖြူ - သစ်စိမ့်ကြီးသို့ စစ်ကိုင်း - ရွှေဘိုအမှတ် (၃) ခရိုင်ချင်းဆက်လမ်းမကြီးအတိုင်း သယ်ဆောင်ခြင်းဖြစ်ကြောင် သိရသည်။

ထိုမှတစ်ဆင့် KIA အကြမ်းဖက်သောင်းကျန်းသူများ ထိန်းချုပ်လုပ်ကိုင်လျက်ရှိသော ဖားကန့်ဒေသရှိ ကျောက်စိမ်းတူးဖော်ရေး လုပ်ငန်းများ၊ တနိုင်းဒေသရှိ ရွှေနှင့်ပယင်းမှော်လုပ်ငန်းများသို့လည်းကောင်း၊ PDF အကြမ်းဖက်အဖွဲ့များ ထိန်းချုပ်လုပ်ကိုင်လျက်ရှိသော ကောလင်းဒေသရှိ တရားမဝင်ရွှေလုပ်ကွက်များနှင့် ချင်းတွင်း မြစ်ကြောင်းတစ်လျှောက်ရှိ တရားမဝင်ရွှေလုပ်ကွက်များ၊ TNLA/ PDF များ ထိန်းချုပ်လုပ်ကိုင်လျက်ရှိသော စဉ့်ကူးမြို့နယ်၊ သပိတ်ကျင်းဒေသရှိ တရားမဝင်ရွှေလုပ်ကွက်များသို့လည်းကောင်း၊ မိုးကုတ်ဒေသရှိ တရားမဝင်ကျောက်မျက်တူးဖော်ရေးလုပ်ကွက်များသို့လည်းကောင်း အသီးသီးပို့ဆောင်ရောင်းချလျက်ရှိကြောင်း ထုတ်ပြန်ချက်အရ သိရသည်။ အလားတူ စစ်ကိုင်းတိုင်းဒေသကြီးအတွင်းရှိ ဒေသခံပြည်သူများကလည်း စက်သုံးဆီဈေးနှုန်းကြီးမြင့်မှုအပေါ်မူတည်၍ တရားဝင်ဖွင့်လှစ်ရောင်းချလျက်ရှိသော စက်သုံးဆီဆိုင်များမှတစ်ဆင့် စက်သုံးဆီများဝယ်ယူစုဆောင်းကာ အရေအတွက်များပြားလာပါက တရားမဝင်ဆီသိုလှောင်ခြံများသို့ သွားရောက်ရောင်းချမှုများပြုလုပ်ကြကြောင်း သိရသည်။ 

ထို့ကြောင့် တရားမဝင်စက်သုံးဆီရောင်းဝယ်သည့်လုပ်ငန်းများ ပေါ်ပေါက်နေပြီး တရားမဝင်ဈေးကွက်တစ်ခုသဖွယ်ဖြစ်ပေါ်လျက်ရှိသောကြောင့် ပြည်တွင်းဈေးကွက်၌ စက်သုံးဆီဈေးနှုန်းများ မြင့်တက်လာခဲ့ပြီး ဆီဈေးနှုန်းကြီးမြင့်မှုပေါ်မူတည်၍ အခြေခံစားသောက်ကုန်များ၏ ဈေးနှုန်းများလည်း မြင့်တက်နေခြင်းဖြစ်ကြောင်း သိရသည်။

လက်ရှိတွင် တရားမဝင်စက်သုံးဆီများ သိုလှောင်ရောင်းချမှုပြုလုပ်ခဲ့သည့် ကျူးလွန်သူ(၁၇) ဦးအား အရေးကြီးကုန်စည်နှင့် ဝန်ဆောင်မှုဥပဒေပုဒ်မ ၅ ဖြင့် ထိရောက်စွာ အရေးယူထားကာ ဖမ်းဆီးရမိခဲ့သည့်ယာဉ်များနှင့် စက်သုံးဆီများအား စိစစ်မှုများပြုလုပ်၍ ဥပဒေ၊ လုပ်ထုံးလုပ်နည်းများနှင့်အညီ ဆက်လက်ဆောင်ရွက်လျက်ရှိကြောင်း သိရသည်။

Source: NP News

အမေရိကန်ပြည်ထောင်စုအနေဖြင့် အိန္ဒိယကုမ္ပဏီများနှင့်    အရပ်ဘက်သုံး နျူကလီးယားဆိုင်ရာ မိတ်ဖက်ပူးပေါင်းဆောင်ရွက်ရန်အတွက် အတားအဆီးများကို ဖယ်ရှားရှင်းလင်းနိုင်ရေး အပြီးသတ်လုပ်ဆောင်လျက်ရှိကြောင်း အမေရိကန်အမျိုးသားလုံခြုံရေးအကြံပေး ဂျိတ်ဆူလီဗန်က ဇန်နဝါရီလ ၆ ရက်တွင်  ပြောသည်။

အမေရိကန်နှင့် အိန္ဒိယနိုင်ငံတို့သည် အမေရိကန်မှနျူကလီးယားဓာတ်ပေါင်းဖိုများအား အိန္ဒိယသို့ထောက်ပံ့ပေးရေးနှင့်စပ်လျဉ်း၍ လွန်ခဲ့သည့် ၂၀၀၀ ပြည့်နှစ်များမှစ၍ ဆွေးနွေးလာခဲ့ခြင်းဖြစ်သည်။ သို့ရာတွင် အိန္ဒိယနိုင်ငံ၏  အချို့စည်းမျဉ်းများကြောင့်  အဆိုပါနျူကလီးယား ဓာတ်ပေါင်းဖိုများအား နိုင်ငံအတွင်းသို့ လွှဲပြောင်းပေးရာတွင် အခက်အခဲ၊ အတားအဆီးများနှင့် ကြုံတွေ့ခဲ့ရသည်။

အိန္ဒိယနိုင်ငံသို့ အရပ်ဘက်သုံးနျူကလီးယားနည်းပညာလွှဲပြောင်းပေးရန် အမေရိကန်သမ္မတဟောင်း ဂျော့ဒဗလျူဘုရှ်လက်ထက်တွင် လက်မှတ်ရေးထိုးခဲ့ခြင်းဖြစ်သည်။ သို့သော် ယခုအခါ အမေရိကန်နှင့်အိန္ဒိယတို့ကြား နျူကလီးယားနည်းပညာလွှဲပြောင်းပေးရေးအတွက်  လိုအပ်သည့် အတားအဆီးများကို ကျော်ဖြတ်နိုင်ရန်အပြီးသတ်လုပ်ဆောင်လျက်ရှိကြောင်း အိန္ဒိယနိုင်ငံသို့ နှစ်ရက်ကြာအလည်အပတ်ရောက်ရှိနေသည့်  ဆူလီဗန်က ပြောကြားခြင်းဖြစ်သည်။

အမေရိကန်အနေဖြင့် အိန္ဒိယနိုင်ငံတွင် နျူကလီးယားစွမ်းအင်သုံးစက်ရုံ   ၆ ခုတည်ဆောက်ပေးရန်   အမေရိကန်နှင့်အိန္ဒိယနှစ်နိုင်ငံကြား  သဘောတူညီချက်တစ်ရပ်ကို ၂၀၁၉  ခုနှစ်တွင် လက်မှတ် ရေးထိုးခဲ့ကြောင်းသိရသည်။

Ref: ST

Source: Myawady Web Portal

မြောက်ကိုရီးယားသည် ၅-၁-၂၀၂၅ ရက်နေ့ နေ့လယ်ပိုင်းတွင် အရှေ့ဘက်ကမ်းလွန်ပင်လယ်သို့ တာလတ်ပစ် ဒုံးကျည်ပစ်လွှတ်ခဲ့ကြောင်း တောင်ကိုရီးယား စစ်တပ်က ပြောကြားထားပါသည်။ 

မြောက်ကိုရီးယား တာလတ်ပစ်ဒုံးကျည်မှာ နေ့လယ် ၁၂၁၁ အချိန်တွင် ကျရောက်ခဲ့ခြင်းဖြစ်ကြောင်း၊ ပြုံးယမ်းရှိ တစ်နေရာမှ ပစ်လွှတ်လိုက်သည်ဟု ယူဆရပြီးဒုံးကျည်ပျံသန်းမှုအကွာအဝေးနှင့်အမြင့်ပေ အသေးစိတ်အချက်အလက်များကို မကြာခင် ထုတ်ပြန်သွားမည်ဟု ဂျပန်ကာကွယ်ရေးဝန်ကြီးဌာနက သတင်းထုတ်ပြန်ထားပါသည်။ 

အမေရိကန်၌ ဒေါ်နယ်ထရမ့် အနိုင်ရရှိသည့် ရွေးကောက်ပွဲပြီးနောက် မြောက်ကိုရီးယား၏ ယခုဒုံးကျည်ပစ်လွှတ်မှုမှာ ပထမဆုံးအကြိမ်ဖြစ်ပြီး တောင်ကိုရီးယားတွင် နိုင်ငံရေးအကျပ်အတည်းဖြစ်နေသည့် ကာလဖြစ်နေသလို အမေရိကန်နိုင်ငံခြားရေးဝန်ကြီး အန်တိုနီဘလင်ကန်၏ ဆိုးလ်မြို့သို့ အစည်းအဝေးတက်ရောက်မည့်ခရီးစဉ်နှင့်လည်း တိုက်ဆိုင်နေပါသည်။ 

ကိုးကား - NK NEWS

တပ်မတော်အရာရှိတစ်ဦးအားပစ်ခတ်ခဲ့မှုအပါအဝင် ရန်ကုန်တိုင်းအတွင်း အကြမ်းဖက်မှုများပြုလုပ်ခဲ့သည့် Together Urban Force အဖွဲ့ဝင် (၇)ဦးကိုဖမ်းဆီးရမိခဲ့ကြောင်း နစက၏သတင်းထုတ်ပြန်ရေးအဖွဲ့ထံမှ သိရသည်။

လုံခြုံရေးအဖွဲ့ဝင်များမှ မရမ်းကုန်းမြို့နယ်တွင်ကျင်းပသည့် ညီဖြစ်သူ၏ မင်္ဂလာပွဲတက်ရောက်ပြီး ညီမဖြစ်သူနှင့်အတူပြန်ထွက်လာသော ပြင်ဦးလွင်မြို့မှခွင့်ပြန်လာသည့် တပ်မတော်အရာရှိတစ်ဦး ဒီဇင်ဘာ ၂၂ ရက်နေ့လည်ပိုင်းက ပစ်ခတ်ခံရမှုနှင့်ပတ်သက်၍ ပြစ်မှုကျူးလွန်သူများအား ဖမ်းဆီးရမိရေးအတွက် စုံစမ်းစစ်ဆေးမှုများပြုလုပ်ခဲ့ကြသည်။

ထို့ကြောင့် ပြစ်မှုကျူးလွန်သူများဖြစ်သည့် Together Urban Force အဖွဲ့ဝင် မိုးထက်အောင် (ခ)မိုးထက်(ခ)တိမ်ညို၊ နိုင်ဝင်းလတ်၊ ခိုင်မင်းစိုး(ခ)ငြိမ်းခန့်လင်း(ခ)ပါပီလွန်၊ သန်းအောင်၊ ချိုမာလွင်နှင့် ခင်ယုဆွေတို့အား ဒီဇင်ဘာ ၂၉ ရက်၊ ထက်အောင်လှိုင်အား ဇန်နဝါရီ ၂ ရက်တို့တွင် ဖမ်းဆီးရမိခဲ့ကြောင်း သိရသည်။

၎င်းတို့အားစစ်ဆေးချက်များအရ ရန်ကုန်တိုင်းအတွင်း ဖောက်ခွဲမှု(၆)ကြိမ်၊ လုပ်ကြံသတ်ဖြတ်မှု(၂)ကြိမ်ပြုလုပ်ခဲ့ခြင်းတို့ကို ဖော်ထုတ်သိရှိခဲ့ရကြောင်း သိရသည်။

ဖြစ်စဉ်မှ ပြစ်မှုကျူးလွန်သူ အမျိုးသား(၅)ဦးနှင့် အမျိုးသမီး(၂)ဦးတို့အား Sig Sauer ပစ္စတို ၂ လက်၊ ၎င်းကျည်အိမ် ၃ ခု၊ 9mm ကျည် ၂၄ တောင့်၊ ပွိုင့် 38 Special ခြောက်လုံးပြူး ၁ လက် ၊ ၎င်းကျည် ၂၅ တောင့်၊ လက်လုပ်ဗုံး ၂ လုံး၊ TNT ယမ်းတောင့် ၂ တောင့်၊ ဒီတိုနေတာ ၅၃၅ ချောင်း၊ ယမ်းမှုန့် ၃ ပိဿာ ၅ဝ ကျပ်သား၊ နိုက်ထရိုကလယ်ဇင်း ၅ဝ ကျပ်သား၊ ပုလဲ ၅ဝ ပိသာ၊ Black Powder ၂ဝ ကျပ်သား၊ ယမ်းကြိုး (၂ဝဝ ပေ) ၁ ခွေ၊ ဖောက်ခွဲရေးဆက်စပ်ပစ္စည်းများနှင့်အတူ ဖမ်းဆီးရမိခဲ့ကြောင်း သိရသည်။

ထို့ကြောင့် ပြစ်မှုကျူးလွန်သူများအား ဥပဒေအရထိရောက်စွာအရေးယူနိုင်ရေးနှင့်ဖမ်းဆီးရန်ကျန်ရှိသူများအား ထပ်မံဖမ်းဆီးရမိရေးတို့အတွက် လုံခြုံရေးအဖွဲ့ဝင်များက ဆက်လက်ဆောင်ရွက်လျက်ရှိကြောင်း သိရသည်။

Source: Popular Myanmar

ကိုင်ရို   ဇန်နဝါရီ ၅

အီဂျစ်နိုင်ငံသည် ပြီးခဲ့သည့်လအ‌စောပိုင်းက ဆီးရီးယားသမ္မတဟောင်း ဘတ်ရှာအယ်လ်အာဆက် အစိုးရပြုတ်ကျချိန်မှစကာ ပထမဆုံးအကြိမ်အဖြစ် ဆီးရီးယားနိုင်ငံမြို့တော် ဒမတ်စကတ်သို့ ကယ်ဆယ်ရေးလေယာဉ်တစ်စင်း စေလွှတ်ခဲ့ကြောင်း သိရသည်။

အီဂျစ်လခြမ်းနီက ဆီးရီးယားအာရပ်လခြမ်းနီသို့ ကူညီပေးအပ်ခဲ့သည့် အီဂျစ်အဲအရပ်ဘက်လေယာဉ်သည် အစားအစာနှင့် ဆေးဝါးများအပါအဝင် လူသားချင်းစာနာမှုဆိုင်ရာ အကူအညီ ၁၅ တန် သယ်ဆောင်လာကြောင်း အီဂျစ်နိုင်ငံခြားရေးဝန်ကြီးဌာနက ထုတ်ပြန်ထားသည်။ ဒမတ်စကတ်ရှိ အီဂျစ်သံရုံးမှ သံတမန်က လေဆိပ်၌ အကူအညီများရရှိခဲ့ကြောင်း ထုတ်ပြန်ထားသည်။

အဆိုပါ အကူအညီသည် နှစ်နိုင်ငံသမိုင်းဝင်ဆက်ဆံရေးကို ပေးအပ်သည့် ဆီးရီးယားပြည်သူများအားကူညီရန် အီဂျစ်နိုင်ငံ၏ ကြိုးပမ်းမှုတစ်စိတ်တစ်ပိုင်းဖြစ်ကြောင်း ထုတ်ပြန်ချက်အရ သိရသည်။

ဆင်ဟွာ

Source: မြန်မာ့အလင်းသတင်းစာ

ရုရှားနိုင်ငံ ယူရယ်လ်ဒေသရှိ ယေကာ တာရင်ဘာ့ဂ်မြို့၌ လုပ်ဆောင်ရန်စီစဉ်ထားသည့် အကြမ်းဖက်တိုက်ခိုက်မှုကြီးတစ်ရပ်ကို  ဖြိုခွင်းနိုင်ခဲ့ပြီး  လူလေးဦးကိုလည်း ဖမ်းဆီးထိန်းသိမ်းခဲ့ကြောင်း ရုရှားပြည်ထောင်စုလုံခြုံရေးအဖွဲ့က ထုတ်ပြန်သည်။

လုံခြုံရေးအဖွဲ့သည် လက်လုပ်ဗုံးပြုလုပ်ရာတွင် အသုံးပြုသည့်အစိတ်အပိုင်းများကို ရှာဖွေဖော်ထုတ်နိုင်ခဲ့သည်။ ဖမ်းဆီးထိန်းသိမ်းခံထားရသူများမှာ ရုရှားနိုင်ငံသား ဆယ်ကျော်သက်အရွယ်များဖြစ်ကြောင်း လုံခြုံရေးအဖွဲ့က ဇန်နဝါရီလ ၄ ရက်တွင်ပြောသည်။ သို့သော် ၎င်းတို့မှာ မည်သူမည်ဝါဖြစ်ကြောင်းကို ရုရှားလုံခြုံရေးအဖွဲ့က  ထုတ်ဖော်ပြောကြားထားခြင်းမရှိပေ။

အဆိုပါဆယ်ကျော်သက်များသည် ရုရှားအစိုးရက တားမြစ်ထားသည့် အကြမ်းဖက်အဖွဲ့အစည်း၏ အယူအဆများကို မျှဝေခဲ့ကြပြီး  လက်လုပ်ဗုံးဖြင့် အကြမ်းဖက်တိုက်ခိုက်ရန်စီစဉ်ခဲ့ကြကြောင်း သိရသည်။

ဖမ်းဆီးခံထားရသူ ဆယ်ကျော်သက် လူငယ်များအနက်  နှစ်ဦးမှာ  ယခင်ကပြည်ထဲရေးဝန်ကြီးဌာနပိုင် မော်တော်ကားတစ်စီးအား မီးရှို့တိုက်ခိုက်မှုတွင်ပါဝင်ခဲ့ဖူးကြောင်း   Interfax   သတင်း အေဂျင်စီက ဖော်ပြသည်။

Ref: ST

Source: Myawady Web Portal

ရုရှားနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Maria Zakharova သည် ဂျာမနီနိုင်ငံခြားရေးဝန်ကြီး Annalena Baerbock က ဆီးရီးယားရှိ ရုရှား၏ စစ်စခန်းများကို ပိတ်သိမ်းရန်ပြောဆိုမှုအတွက် ပြန်လည်တုံ့ပြန်ခဲ့သည်။

Zakharova က Baerbock အနေဖြင့် ဂျာမနီတွင် အမေရိကန်စစ်အခြေစိုက်စခန်းများ တည်ရှိနေခြင်းကို လည်း သုံးသပ်သင့်ကြောင်း ပြောကြားခဲ့သည်။

သမ္မတ Bashar Assad ဖြုတ်ချခံရပြီးနောက်ပိုင်း ဆီးရီးယားသို့ EU ထိပ်တန်းတာဝန်ရှိ ပုဂ္ဂိုလ်များအနေဖြင့် ပထမဆုံးလာရောက်သည့် ခရီးစဉ်တွင် Baerbock ပြောကြားခဲ့ခြင်းဖြစ်သည်။

ဆီးရီးယားနိုင်ငံကို ရုရှားနှင့် တရုတ်တို့၏ သြဇာ လွှမ်းမိုးမှုအောက်မှ တားဆီးရန် ရည်ရွယ်ထားကြောင်း ဂျာမန်သတင်းစာ Tagesschau က ဇန်နဝါရီ ၃ ရက်နေ့တွင် ရေးသားခဲ့သည်။

ရုရှားသည် အာဆတ်အစိုးရအား ၂၀၁၅ ခုနှစ်ကတည်းက ပံ့ပိုးကူညီခဲ့ပြီး ဆီးရီးယားအား အကြမ်းဖက်ဝါဒ တိုက်ဖျက်ရန် ကူညီထောက်ပံ့ပေးခဲ့သည်။ ၂၀၁၇ ခုနှစ် တွင် မော်စကိုနှင့် ဒမတ်စကပ် တို့သည် Tartus ရေတပ် အခြေစိုက်စခန်းနှင့် အရှေ့ဘက်ရှိ Khmeimim လေတပ် စခန်းတို့ကို ရုရှားစစ်တပ်မှ အခြေစိုက်စခန်း ဖွင့်လှစ် နိုင်ရေး ၄၉ နှစ်သက်တမ်းရှိ သဘောတူစာချုပ် ချုပ်ဆို ခဲ့သည်။

ရုရှား၏ ကုလသမဂ္ဂ အထူးသံတမန် Vassily Nebenzia က Baerbock ၏ပြောဆိုခဲ့ခြင်းအပေါ် ထပ်မံတုံ့ပြန်သည့်အနေဖြင့် ဆီးရီးယား၏ အာဏာပိုင်အသစ်များသည် မော်စကိုနှင့်ဒေသတွင်း စစ်ဘက်ဆိုင်ရာဆက်ဆံရေးကို ထိန်းသိမ်းရန် စိတ်ဝင်စားမှုရှိကြောင်း ပြောဆိုခဲ့သည်။

ကိုးကား-RT

ရေတာရှည်မြို့နယ် ရေလွှရွာအနီး ယနေ့ ဇန်နဝါရီလ ၃ ရက်နေ့ မနက် ၈ နာရီခန့်က KNLA တပ်မဟာ (၃) နှင့် အကြမ်းဖက် PDF ပူးပေါင်းအဖွဲ့များ ရောက်ရှိနေကြောင်း အကြမ်းဖက်မှုကိုမလိုလားသည့် ဒေသခံပြည်သူများမှ လုံခြုံရေးတပ်ဖွဲ့ဝင်များထံ သတင်းပေးပို့ခဲ့မှုကြောင့်လုံခြုံရေးတပ်ဖွဲ့ဝင်များမှ နယ်မြေရှင်းလင်းရေး ဆောင်ရွက်ခဲ့ရာ အကြမ်းဖက်သမား ၁၀ လောင်းနှင့် လက်နက်ခဲယမ်းများ သိမ်းဆည်းရရှိခဲ့သည်။

နယ်မြေရှင်းစစ်ကြောင်းနှင့် အကြမ်းဖက်သမားများ ထိတွေ့တိုက်ပွဲဖြစ်ပွားခဲ့ပြီး အကြမ်းဖက်သမား ထိခိုက်သေဆုံးသူများပြီး ထွက်ပြေးသွားခဲ့သည်။ အကြမ်းဖက်အဖွဲ့များနောက်သို့ လုံခြုံရေးအဖွဲ့များမှ လိုက်လံရှင်းလင်းခဲ့ရာ အကြမ်းဖက်သမားအလောင်း (၁၀) လောင်း၊ လက်နက်မျိုးစုံ (၁၀) လက် Type-81 (၅) လက်၊ M-4 (၁) လက်၊ MA-1 (၁) လက်၊ လက်လုပ်သေနတ် (၃) လက်နှင့် ခဲယမ်းဆက်စပ်ပစ္စည်းများ သိမ်းဆည်းရမိခဲ့ သည်။

တာဝန်သိ ဒေသခံပြည်သူများအနေဖြင့် မိမိရပ်/ရွာ လုံခြုံရေးအတွက် အကြမ်းဖက်သမား လှုပ်ရှားမှုသတင်းရရှိပါက လျှို့ဝှက်စွာဖြင့် ချက်ချင်းသတင်းပေးကြခြင်းဖြင့် ကိုယ့်ရပ်ကိုယ့်ရွာ အကြမ်းဖက်ဘေးအန္တရာယ်ကင်းဝေးစေရန် လုံခြုံရေးတပ်ဖွဲ့ဝင်များနှင့် ပူးပေါင်းဆောင်ရွက်နိုင်ပါသည်။

ကိုးကား-Myanmar National Post