MSK ကင်ဆာဌာနမှ သုတေသနပညာရှင်များက လူ့ခန္ဓာကိုယ်ရဲ့ ရိုးတွင်းခြင်ဆီထဲအထိကို ထိခိုက်စေနိုင်ပြီး လက်ရှိမှာကိုပဲ ကုသနိုင်ခြင်းမရှိသေးတဲ့     သွေးကင်ဆာရောဂါဖြစ်ပွားမှုကို ရပ်တန့်စေမယ့် နည်းလမ်းတစ်ခုကို တွေ့ရှိလိုက်ပါတယ်။

အဲဒီနည်းလမ်းကတော့ အမျှင်ဓာတ်ကြွယ်ဝတဲ့ အပင်အခြေခံအစားအသောက်တွေကို များများစားသုံးပေးခြင်းပဲဖြစ်ပါတယ်။ တစ်နည်းပြောရရင် အမျှင်ဓာတ် ကြွယ်ဝစွာ စားသုံးပေးရမှာပါ။

အပင်အခြေခံအမျှင်ဓာတ်ပါ အစားအစာတွေကို သီတင်းပတ် ၁၂ ပတ်စားသုံးပြီး ပညာရှင်တွေထံမှ နည်းနာတွေခံယူကာ သီတင်းပတ် ၂၄ ပတ်ကြာသည်အထိ စားသောက်မှုပုံစံ ပြောင်းလဲခဲ့တဲ့ ကင်ဆာရှေ့ပြေးလက္ခဏာတွေ ခံစားနေရပြီး စမ်းသပ်မှုမှာ ပါဝင်သူအယောက် ၂၀ စလုံးက ကင်ဆာရောဂါ ဆက်ဖြစ်မလာတော့တာကို တွေ့လိုက်ရတာဖြစ်ပါတယ်။

Source: Myawady Webportal

UCSF မှ သုတေသနပညာရှင်များက ကိုယ်ခံအား ကလာပ်စည်းတွေအနေနဲ့ တခြားသောကိုယ်တွင်း တစ်သျှူးတွေကို မထိခိုက်စေဘဲ ဦးနှောက်ကင်ဆာတစ်ခု တည်းကိုသာ တိုက်ခိုက်နိုင်စေမယ့်နည်း လမ်းတစ်ခုကို ဖန်တီးလိုက်နိုင်ပါတယ်။

အဲဒီနည်းလမ်းကို "Molecular GPS" လို့ အမည်ပေးထားပါတယ်။ ဒီနည်းလမ်း က ကိုယ်ခံအား ကလာပ်စည်းတွေကို ဦးနှောက်ဆီသို့သာ သွားစေရန် လမ်းညွှန်ပြီး ကျန်းမာနေတဲ့ တခြားတစ်သျှူးတွေကို မထိခိုက်စေဘဲ ကင်ဆာအကျိတ်များကို သာပစ်မှတ်ထား တိုက်ခိုက်စေမှာဖြစ်ပါတယ်။

ဒီနည်းလမ်းကို ကြွက်တွေနဲ့စမ်းသပ်ရာ အောင်မြင်မှုရရှိထားပြီ ဖြစ်တဲ့အတွက် လာမယ့်နှစ်မှာ လူသားတွေနဲ့ လက်တွေ့ စမ်းသပ်တော့မယ်လို့ သုတေသနပညာရှင် များက ပြောထားပါတယ်။      

Source: Myawady Webportal

လက်ရှိအမေရိကန်နိုင်ငံမှာ မွေးမြူရေး နွားတွေမှာကူးစက်ပျံ့နှံ့နေတဲ့ H5N1 ဆိုတဲ့ ဗိုင်းရပ်က  မျိုးရိုးဗီဇပြောင်းလဲလာနေ ပြီး  လူအချင်းချင်း ကူးစက်ပျံ့နှံ့တဲ့ အဆင့် အထိ  လျင်မြန်စွာ တိုးတက်ဖြစ်ပေါ်လာ နေတာကြောင့် စိုးရိမ်ရတဲ့ အခြေအနေဖြစ် လာပြီလို့ အမျိုးသားကျန်းမာရေး ဌာနက ထုတ်ပြန်ထားပါတယ်။

ယခုအချိန်အထိ အဲဒီဗိုင်းရပ်ကမွေးမြူ ရေးတိရစ္ဆာန်တွေကနေ  လူအချို့ဆီကို ကူးစက်မှုတွေရှိနေပါတယ်။ ဒါပေမဲ့လည်း လူလူချင်းတော့ ကူးစက်မှုမရှိသေးပါဘူး။ သို့ပေမယ့် သူ့ရဲ့မျိုးရိုးဗီဇ ပြောင်းလဲမှုကြောင့်    လူလူချင်းကူးစက်မှုဆီအထိ ဖြစ်ပေါ်လာနိုင်တယ်လို့  ပညာရှင်များက သတိပေးထားတာပါ။

ပညာရှင်များရဲ့ ထုတ်ပြန်ချက်ထဲမှာ H5N1 ဗိုင်းရပ်က လူလူချင်း ကူးစက်နိုင်မှု နည်းပါးသေးတယ် ဆိုပေမယ့်လည်း မပေါ့ဆဖို့တော့ လိုပါလိမ့်မယ်။       

Source: Myawady Webportal 

ဘာလင်  ဒီဇင်ဘာ ၁၇

ဂျာမနီနိုင်ငံ၌ မျောက်ကျောက်ရောဂါမျိုးစိတ်သစ် Clade Ib ကူးစက်ခံရသူလေးဦးကို တွေ့ရှိခဲ့ကြောင်း တာဝန်ရှိသူများက ဒီဇင်ဘာ ၁၆ ရက်တွင် ပြောကြားသည်။ ၎င်းတို့အနက်မှ ကူးစက်ခံရသူနှစ်ဦးမှာ ကျောင်းနေအရွယ်ကလေးများဖြစ်သည်။

ပထမဆုံးရောဂါကူးစက်ခံရသူသည် အာဖရိကဒေသသို့ မိသားစုလိုက်ခရီးထွက်ရာမှ အပြန်တွင် ကူးစက်ခြင်းဖြစ်သည်။ နောက်ပိုင်းတွင် မိသားစုဝင်သုံးဦးကို ထပ်မံကူးစက်ခဲ့ရာမှ လက်ရှိအချိန်တွင် ၎င်းမိသားစုအား သီးခြားခွဲ၍ စောင့်ကြည့်မှုဆောင်ရွက်နေရသည်။ မျောက်ကျောက်ရောဂါကူးစက်ခံရသည့် ကလေးများတက်ရောက်သင်ကြားနေသည့် ကျောင်းအား လက်ရှိအချိန်တွင် ပိတ်ထားပြီး အွန်လိုင်းမှသင်ကြားရန် ဆောင်ရွက်နေသည်။ ဂျာမနီနိုင်ငံတွင် မျောက်ကျောက်ရောဂါမျိုးစိတ်သစ် Clade Ib ကူးစက်မှုကို အောက်တိုဘာလအတွင်းက တွေ့ရှိခဲ့‌သော်လည်း လက်ရှိအချိန်အထိ ‌‌မျောက်ကျောက်ရောဂါကြောင့် သေဆုံးသူမရှိကြောင်း သိရသည်။ ရောဂါလက္ခဏာများအဖြစ် ကိုယ်အပူချိန်မြင့်တက်ခြင်း၊ ပြွန်ရေကျိတ်များ ရောင်ရမ်းခြင်း၊ ကိုယ်ခန္ဓာတွင် အဖုအကြိတ်များထွက်ခြင်းတို့ ခံစားရသည်။ 

ကိုးကား- ဆင်ဟွာ၊ ဘာသာပြန်- စိုးသူရ

Source- ကြေးမုံသတင်းစာ

ပါကစ္စတန်အစိုးရသည် နိုင်ငံအတွင်း ပိုလီယိုရောဂါကင်းစင်ရန်အတွက် ပိုလီယိုရောဂါ တိုက်ဖျက်ရေး လှုပ်ရှားမှုကို ဆောင်ရွက်ခဲ့ကြောင်း ဝန်ကြီးချုပ်ရုံးက ပြောကြားသည်။

ဒီဇင်ဘာ ၁၆ ရက်မှ ၂၂ ရက်အထိ နိုင်ငံအတွင်းရှိ ကလေးငယ်များကို ပိုလီယိုရောဂါ ကာကွယ်ဆေး တိုက်ကျွေးမည်ဟု သိရသည်။

လက်ရှိအချိန်တွင် နိုင်ငံအတွင်း ပိုလီယို ရောဂါ ဖြစ်ပွားသူ ၆၃ ဦး အထိ ရှိခဲ့သည်။ ၎င်းအစီအစဉ်အရ ကျန်းမာရေးဝန်ထမ်း ၄၀၀,၀၀၀ ကျော်သည် ခရိုင် ၁၄၃ ခုရှိ ကလေး ၄၄ သန်းကျော်အား ပိုလီယို ရောဂါ ကာကွယ်ဆေးတိုက်ကျွေးမည်ဖြစ်သည်။

ပိုလီယိုရောဂါ ကာကွယ်ဆေးတိုက်မှုသည် ကလေးများအားရောဂါမှ ကာကွယ်ရေးအတွက် အရေးကြီးသည့် လုပ်ငန်းတစ်ခုဖြစ်ကြောင်းနှင့် နိုင်ငံအတွင်း ပိုလီယိုရောဂါပပျောက်အောင် ဆောင်ရွက်မည်ဟု ဝန်ကြီးချုပ် ရှာဘတ် ရှာရိဒ်က ပြောကြားသည်။ ကလေးတိုင်း ပိုလီယိုရောဂါ ကာကွယ်ဆေးတိုက်ကျွေးမှုခံယူရန်အတွက် မိဘများတွင် တာဝန်ရှိကြောင်း ဝန်ကြီးချုပ်က ထပ်လောင်းပြောကြားသည်။ ကာကွယ်ဆေးတိုက်ကျွေးခြင်းဖြင့် ကလေးများ၏ အနာဂတ် ဘဝသာယာမည်ဖြစ်ပြီး နိုင်ငံကို အလုပ်အကျွေးပြုနိုင်သည့် ပညာတတ်များ အများအပြား ပေါ်ထွက်လာမည်ဟု ဝန်ကြီးချုပ်က ပြောကြားသည်။

Source : ၁၇-၁၂-၂၀၂၄ ထုတ် ကြေးမုံသတင်းစာ

ငါး၊ သံလွင်ဆီနှင့် သစ်ကြားသီးတို့ကို များများစားပေးပြီး အာလူးကြော်၊ ဘီစကွတ်နှင့် မယိုးနိစ်တို့ကို ချင့်ချင့်ချိန်ချိန် စားသုံးခြင်းသည် အစောပိုင်းအဆင့် ဆီးကျိတ်ကင်ဆာကြီးထွားမှုကို နှေးစေနိုင်ကြောင်း သိပ္ပံပညာရှင်များက တွေ့ရှိခဲ့ကြသည်။

လက်ရှိ ဆီးကျိတ်ကင်ဆာဝေဒနာရှင်တို့ကို အဆက်မပြတ် စောင့်ကြည့်ခဲ့သော လေ့လာမှုအသစ်တစ်ခုက သာမန်အစားအသောက် ပြောင်းလဲလိုက်ရုံဖြင့် ဆီးကျိတ်ကင်ဆာကြီးထွားနှုန်းကို ရပ်တန့်နိုင်လောက်သည်အထိ အကျိုးဖြစ်စေသည်ကို တွေ့ရှိခဲ့ခြင်းဖြစ်သည်။ ထိုကုသနည်းမှာ ကင်ဆာအကျိတ်ကို ချက်ချင်းခွဲထုတ်ခြင်းမျိုးမလုပ်ဘဲ ပုံမှန်စောင့်ကြည့်ကုသသည့် နည်းလမ်းတစ်ခုဖြစ်သည်။

ကယ်လီဖိုးနီးယားတက္ကသိုလ် လော့စ်အိန်ဂျလိစ်မှ ဆီးလမ်းကြောင်းဆိုင်ရာ ပါမောက္ခ ဒေါက်တာ ဝီလျံအရွန်ဆင်က “ဒါက ဆီးကျိတ်ကင်ဆာအပေါ် အစားအသောက်က ဘယ်လိုသက်ရောက်မှုရှိလဲဆိုတာကို နားလည်နိုင်ဖို့ အရေးကြီးတဲ့ခြေလှမ်းတစ်ခုပါ။ ကင်ဆာဖြစ်တဲ့ လူတော်တော်များများက သူတို့ရဲ့ စားသောက်နေထိုင်မှုပုံစံကို ပြောင်းပြီး သူတို့ရောဂါတိုးမလာအောင် လုပ်ချင်ကြပါတယ်” ဟု ဆိုသည်။

အန္တရာယ်နည်းသည့် ဆီးကျိတ်ကင်ဆာဖြစ်သူ တော်တော်များများသည် ခွဲစိတ်ကုသရန်၊ ဓာတ်ရောင်ခြည်ဖြင့် ကုသမှုတို့ထက် စောင့်ကြည့်လေ့လာကုသမှုတို့ကို ပိုမိုလိုလားကြသည်။ သို့သော် ပြီးခဲ့သည့်ငါးနှစ်အတွင်း ထိုကဲ့သို့ ဝေဒနာရှင်တစ်ဝက်ကျော်မှာ ခွဲစိတ်ကုသမှု၊ ဓာတ်ရောင်ခြည်ကုထုံးတို့ ခံယူခဲ့ကြရသည်။

“ ကျွန်တော်တို့ရဲ့ တွေ့ရှိမှုက အစားအသောက်ကို ရိုးရိုးရှင်းရှင်း ထိန်းညှိလိုက်တာဟာ ကင်ဆာကြီးထွားမှုကိုနှေးသွားစေပြီးကြီးကြီးမားမားလုပ်စရာမလိုခင် အချိန်ကို ဆွဲဆန့်နိုင်စေပါတယ်” ဟု ‌ဒေါက်တာ အရွန်ဆင်က ထပ်လောင်းပြောကြားသည်။

Ref: DailyMial

Source- ကြေးမုံသတင်းစာ

ထိုင်းနိုင်ငံရှိ အထင်ကရ ဦးနှောက်နှင့် အာရုံကြောပါရဂူ ဒေါက်တာ သီရာဗတ်ဟီမာချတ်ဟာက ဩစတြေးလျ ဓာတ်ခွဲခန်းတစ်ခုမှ လူများကိုသေစေနိုင်သော ဗိုင်းရပ်စ်များ ပါဝင်သည့် ဓာတ်ခွဲခန်းသုံးပြွန်အခု ၃၀၀ ကျော် ပျောက်ဆုံးနေမှုအပေါ် စိုးရိမ်ကြောင်း သတိပေးပြောကြား ခဲ့သည်။

Hendra ဗိုင်းရပ်စ်၊ Lyssa ဗိုင်းရပ်စ်နှင့် Hanta ဗိုင်းရပ်စ်တို့အပါအဝင် ပျောက်ဆုံးနေသော ဗိုင်းရပ်စ်များသည် ဇီဝလုံခြုံမှုကန့်သတ်ချက် အမြင့်ဆုံးအဆင့် ချမှတ်ရန် လိုအပ်သော ဗိုင်းရပ်စ်များဖြစ်သည်။

သီရာဗတ်၏လူမှုမီဒီယာကွန်ယက်တွင် ယင်းကူးစက်မြန် ဗိုင်းရပ်စ်များ ပျောက်ဆုံးမှုနှင့်ဆက်နွှယ်သည့်အန္တရာယ်ကို ဖော်ပြထားသည်။

သီရာဗတ်က ယင်းဗိုင်းရပ်စ်များ မသမာသူများ၏လက်ဝယ်သို့ရောက်ရှိသွားနိုင်ခြင်းသို့မဟုတ်မကောင်းသောရည်ရွယ်ချက်များဖြင့်အသုံးပြုနိုင်ခြင်း စသည့်အခြေအနေများအပေါ် စိုးရိမ်ကြောင်း ပြောကြားခဲ့သည်။

ကျွမ်းကျင်သူများက ယင်းကိစ္စရပ်နှင့်ပတ်သက်၍ စုံစမ်းစစ်ဆေးမှုများ ပြုလုပ်ပေးရန် တောင်းဆိုထားကြကာ ဖြစ်ပေါ်လာနိုင်မည့်အန္တရာယ်ကို ကြိုတင်ကာကွယ်ရန်အတွက် ချက်ချင်း အရေးယူဆောင်ရွက်ပေးနိုင်ပါရန် အာဏာပိုင်များကို တိုက်တွန်းထားကြောင်း သိရှိရသည်။

ကိုးကား -  The Nation

Photo- The Australian 

ကင်ရှာဆာ   ဒီဇင်ဘာ ၅

ကွန်ဂိုဒီမိုကရက်တစ်သမ္မတနိုင်ငံ၌ မကြာသေးမီရက်သတ္တပတ်များအတွင်း အမည်မသိရောဂါတစ်မျိုး ကူးစက်မှုကြောင့် လူပေါင်း ၈၀ နီးပါး သေဆုံးခဲ့ကြောင်း ကျန်းမာရေးအာဏာပိုင်များက ပြောကြားသည်။

ပျံ့နှံ့လျက်ရှိ

တုပ်ကွေးကဲ့သို့သော ရောဂါလက္ခဏာများဖြစ်ပွားစေသည့် အဆိုပါရောဂါသည် အောက်တိုဘာ ၂၄ ရက်မှစပြီး အနောက်တောင်ပိုင်း ကွန်ဂိုပြည်နယ်၌ ပျံ့နှံ့လျက်ရှိကြောင်း သိရသည်။

လက်ရှိအချိန်အထိ အတည်ပြုလူနာ ၃၇၆ ဦးရှိပြီး ၇၉ ဦး သေဆုံးခဲ့ကြောင်း ကျန်းမာရေးအာဏာပိုင်များက ပြောသည်။ သေဆုံးသူအများစုမှာ ဆယ်‌ကျော်သက်အရွယ်များဖြစ်ကြောင်း သိရသည်။

ရောဂါလက္ခဏာများမှာ အဖျားတက်ခြင်း၊ ခေါင်းကိုက်ခြင်း၊ နှာရည်ယိုခြင်း၊ ချောင်းဆိုးခြင်း၊ အသက်ရှူရခက်ခဲခြင်းနှင့် သွေးအားနည်းခြင်းတို့ ပါဝင်သည်။

ကွန်ဂိုအစိုးရက ကမ္ဘာ့ကျန်းမာရေးအဖွဲ့၏ အကူအညီများရယူကာ ရောဂါဖြစ်ပွားမှု၏ အကြောင်းရင်းနှင့်ပတ်သက်သည့် အချက်အလက်များကို ရှာဖွေစုဆောင်းရန် ကျွမ်းကျင် ပညာရှင်အဖွဲ့တစ်ဖွဲ့ကို ညွှန်ကြားထားကြောင်း သိရသည်။

ကိုးကား- အင်န်အိတ်ချ်ကေ

ဘာသာပြန်- အောင်ကျော်ကျော်

Source- ကြေးမုံသတင်းစာ

လူမှုကွန်ရက်များ ထွန်းကားလာပြီးနောက် အိမ်တွင်ဖြစ်ဖြစ်၊ စားသောက်ဆိုင်တွင်ဖြစ်ဖြစ် ထူးထူးခြားခြား တစ်ခုခု စားသောက်ပြီဆိုလျှင် လူမစားခင်ဖုန်းက အရင်စားခြင်းမှာ ယနေ့ခေတ်၏ အလေ့အထတစ်ခုလို ဖြစ်နေပါပြီ။

ယခုတွင် သိပ္ပံပညာရှင်များက ထိုသို့ အစာစားနေစဉ် ဖုန်းသုံးခြင်းသည် ယဉ်‌ကျေးမှုမရှိရုံသာမကဘဲ ဖုန်းတွင် ကပ်ပါလာသည့် ရောဂါပိုးမွှားများကြောင့် ဘေးသင့်စေနိုင်ကြောင်း သတိပေးနေပြီဖြစ်သည်။

ချက်စတာ တက္ကသိုလ်မှ ခန္ဓာဗေဒပညာရှင် ဒေါက်တာ ဂါရက်သ်နေးက “အဓိကအားဖြင့် ဝမ်းပျက်ဝမ်းလျှောလို၊ အော့အန်တာလို၊ အစာအိမ်အောင့်တာလို အစာအိမ်နဲ့ အူလမ်းကြောင်းဆိုင်ရာ ရောဂါတွေ ဖြစ်စေနိုင်ပါတယ်။ လူတွေမှာ ရောဂါခုခံနိုင်စွမ်းအား အထိုက်အလျောက်ရှိတယ်ဆိုပေမယ့် အသက်အန္တရာယ်ထိခိုက်နိုင်တဲ့ သွေးအဆိပ်တက်တာလို၊ အဆုတ်ရောင်လို ရောဂါပိုးတွေ ဝင်သွားရင် အန္တရာယ်ကြီးပါတယ်” ဟုဆိုသည်။

လူ၏ လက်သည် နေ့စဉ် အရာဝတ္ထု အမျိုးပေါင်း ၁၅၀ နီးပါးထိတွေ့နေရပြီး ဟိုဟိုဒီဒီ သွားလာနေရသူများဆိုလျှင် ထို့ထက်ပိုများနိုင်ကြောင်း လေ့လာမှုများက ချပြထားသည်။ ထိုသို့ ထိတွေ့နေသလို ဖုန်းနှင့်လည်း အစဉ်အမြဲနီးပါး ထိတွေ့နေကြရာ ဖုန်းများတွင် ဗက်တီးရီးယားများ ကပ်ပါလာနိုင်ခြေ အလွန်များသောကြောင့် အစာစားနေစဉ် ဖုန်းကို ဝေးဝေးထားရန် ပညာရှင်များက သတိပေးလာကြခြင်းဖြစ်သည်။

အစာစားနေစဉ် ဖုန်းသုံးခြင်းသည် လူမှုဆက်ဆံ‌ရေး ထိခိုက်နိုင်စေခြင်း၊ စိတ်ကျန်းမာရေးထိခိုက်နိုင်စေခြင်း၊ ကလေးများအပေါ်တွင် ထိရောက်မှုကြီးမားခြင်း၊ စိတ်ပါလက်ပါ မစားသောက်ခြင်းကြောင့် အာဟာရကျဆင်းနိုင်ခြင်း၊ အာရုံစူးစိုက်မှု အားနည်းလာခြင်းတို့ဖြစ်နိုင်ကြောင်း သိပ္ပံပညာရှင်များက သတိပေးထားခဲ့ပြီး ယခုအချိန်တွင် ကူးစက်ရောဂါများပါ ဖြစ်နိုင်ကြောင်း အရေးတကြီး သတိပေးလာခြင်းလည်းဖြစ်သည်။

Ref: Daily Mail

Source- ကြေးမုံသတင်းစာ

နယူး‌ယောက်‌ အောက်တိုဘာ ၂၄

ကာဘိုဟိုက်ဒရိတ် ပါဝင်မှုနည်းပါးသော ဓာတ်စာများသည် ပုံစံ-၂ ဆီးချိုရောဂါ လူနာများ သွေးအတွင်း သကြားဓာတ်ပါဝင်မှုအဆင့်ကို ထိန်းချုပ်ရာတွင် အထောက်အကူပြုနိုင်ဖွယ် ရှိကြောင်း အောက်တိုဘာ ၂၃ ရက်သတင်းများအရ သိရသည်။

ထို့ပြင် ကာဘိုဟိုက်ဒရိတ်ပါဝင်မှုနည်းပါးသော ဓာတ်စာများစားသုံးပါက ပုံစံ-၂ ဆီးချိုရောဂါ လူနာများအနေဖြင့် ဆီးချိုဆေးများ သုံးစွဲရမှုကိုလည်း လျှော့ချပေးနိုင်ဖွယ်ရှိကြောင်း အမေရိကန် နိုင်ငံ အလာဘားမားတက္ကသိုလ်မှ သိပ္ပံပညာရှင်များက ပြောကြားသည်။

အမေရိကန် သုတေသနပညာရှင်များ၏ အဆိုအရ ကစီဓာတ်သို့မဟုတ် ကာဘိုဟိုက်ဒရိတ်ပါဝင်မှု ကန့်သတ်ထားသော အစားအစာများသည် ပန်ကရိယအင်္ဂါအတွင်းရှိ ဘီတာဆဲလ်ခေါ် ဆဲလ်များ၏ လုပ်ငန်းလည်ပတ်မှုကို မြှင့်တင်ပေးနိုင်ကြောင်း သိရသည်။

သွေးအတွင်း သကြားဓာတ်ပါဝင်မှုကို ထိန်းညှိပေးသည့် အင်ဆူလင် ဟော်မုန်းများကို ထုတ်ပေး နေသော ဘီတာဆဲလ်များ ပျက်စီးပါက ပုံစံ-၂ ဆီးချိုရောဂါဖြစ်ပွားတတ်သည်။

သို့ရာတွင် မိမိတို့၏ လေ့လာတွေ့ရှိချက်အရ ကာဘိုဟိုက်ဒရိတ်နည်းပါးသည့် ဓာတ်စာများသည် ဘီတာဆဲလ်များ လုပ်ငန်းလည်ပတ်မှုကို မြှင့်တင်ပေးခြင်းဖြင့် ပုံစံ-၂ ဆီးချိုလူနာများ သွေးအတွင်း သကြားဓာတ်ပါဝင်မှုကို ထိန်းချုပ်ရာ၌ အထောက်အကူပြုနိုင်ဖွယ်ရှိကြောင်း အမေရိကန်သုတေ သန ပညာရှင်များက ပြောကြားသည်။

ဘာသာပြန်- KKO

Source- မြန်မာ့အလင်း