မန္တလေးငလျင်ကြီးဒဏ်ကြောင့် စစ်ကိုင်းတိုင်းရှိ သာလွန်မင်းတရားကြီး၏ ကောင်းမှုဖြစ်သော ကောင်းမှုတော်စေတီတော်မြတ်ကြီးတွင် ပျက်စီးမှုများဖြစ်ပေါ်ခဲ့ရာ အမြင့်ပေ(၁၉၀)အထက်ရှိစေတီတော်မြတ်ကြီး၏ စိန်ဖူးတော်နှင့်ရွှေထီးတော်တို့ကိုပြုပြင်နိုင်ရန် သီတဂူဆရာတော်ကြီးဦးဆောင်၍ ယနေ့ မေ ၃၀ ရက် နံနက်ပိုင်းတွင် ကြည့်ရှုစစ်ဆေးမည်ဖြစ်ကြောင်း သိရသည်။

သီတဂူဆရာတော်ကြီးဦးဆောင်၍ စေတီတော်မြတ်ကြီး၏ ဩဝါဒစရိယဆရာတော်ကြီးများ၊ ဒု-ဗိုလ်ချုပ်ကြီး သက်ပုံ၊ တာဝန်ရှိသူများ၊ အင်ဂျင်နီယာပညာရှင်များ၊ စေတီတော်မြတ်ကြီး၏ ဂေါပကအဖွဲ့ဝင်များက ကရိန်းအသုံးပြုတက်ရောက်၍ စိန်ဖူးတော်၊ ရွှေထီးတော်နှင့် စေတီတော်ကြီး၏ မျက်နှာပြင်ပေါ်ရှိအက်ကွဲကြောင်းကြီးများကို ကြည့်ရှုစစ်ဆေးသွားကြမည်ဖြစ်ကြောင်း သိရသည်။

ပြီးခဲ့သည့် မေ ၂၃ ရက် နံနက်ပိုင်းကလည်း သီတဂူဆရာတော်ကြီးသည် ငလျင်ဒဏ်သင့်ခဲ့သည့် ကောင်းမှုတော်စေတီတော်မြတ်ကြီး၏ မျက်နှာပြင်ကွဲအက်သွားမှုအား ပြုပြင်မွန်းမံနိုင်ရန် ကြည့်ရှုစစ်ဆေးတော်မူခဲ့ကြောင်း သိရသည်။

ကောင်းမှုတော်စေတီတော်မြတ်ကြီး၏ စိန်ဖူးတော်မှာ ငလျင်ဒဏ်ကြောင့် ပြုတ်ကျ၍ ရွှေထီးတော်၌ တင်နေသည်ဟုခန့်မှန်းရသဖြင့် စိန်ဖူးတော်အားမြေသို့ချ၍ အသစ်ပြုလုပ်တင်လှူသွားမည်ဖြစ်ကာ စိန်ဖူးတော်ပြုပြင်မွမ်းမံရန် “ဆင်နှစ်ကောင်”ကုမ္ပဏီမှ ကရိန်းပြုလုပ်ပေးသွားဖြစ်ပြီး လက်ရှိအချိန်၌ စေတီတော်မြတ်ကြီး၏ မျက်နှာပြင်တွင်ဖြစ်ပေါ်နေသည့် အက်ကြောင်းကြီးများအား ပြုပြင်မွမ်းမံရန် ဝါးငြမ်းများကို သုံးပုံ တစ်ပုံခန့်ထိုးထားပြီးဖြစ်ကြောင်း သိရသည်။

Source: Popular Myanmar

ကိုဗစ်-၁၉ ရောဂါက အခုတလောနိုင်ငံတချို့မှာ ပြန်လည်ပျံ့နှံ့လာနေပါတယ်။ ဒီရောဂါကိုဖြစ်စေတဲ့ ကိုရိုနာဗိုင်းရပ်ဆိုတာကလည်း အခု အချိန်အထိကို ပျောက်ကွယ်သွားခြင်းမရှိသေးဘဲ မျိုးကွဲတွေတစ်မျိုးပြီးတစ်မျိုးပြောင်းလဲဖြစ်ပေါ်လာနေဆဲဖြစ်တယ်လို့ ကျန်းမာရေးပညာရှင်များစွာက သတိပေးထားပါတယ်။

လက်ရှိမှာဆိုရင်ပဲ အမေရိကန်နိုင်ငံမှာ NB.1.8.1 ဆိုတဲ့ ကိုရိုနာဗိုင်းရပ်မျိုးကွဲတစ်မျိုး ပျံ့နှံ့လျက်ရှိနေတာကို တွေ့ရပါတယ်။ အထူးသဖြင့် အမေရိကန်ပြည်ထောင်စုထဲကိုဝင်ရောက်ရာနေရာများဖြစ်တဲ့ အပြည်ပြည်ဆိုင်ရာလေဆိပ်များမှာ ဒီရောဂါပိုးကူးစက်ခံရသူတွေကိုစစ်ဆေးတွေ့ရှိရတာကနေ  ပြည်တွင်းကူးစက်မှုအထိမြင့်မားလာတာပါ။ ဒီကိုရိုနာဗိုင်းရပ်မျိုးကွဲကိုတော့ ကမ္ဘာ့ကျန်းမာရေးအဖွဲ့က လေ့လာစောင့်ကြည့်နေဆဲမျိုးကွဲတစ်ခုဖြစ်တယ်လို့ထုတ်ပြန်ထားပါတယ်။

အမေရိကန်နိုင်ငံအတွင်းမှာ NB.1.8.1 မျိုးကွဲဟာ ဧပြီလကုန်ပိုင်းတုန်းက စတင်ပျံ့နှံ့ခဲ့တာဖြစ်တယ်လို့ ဆိုနိုင်ပါတယ်။ အဓိကအားဖြင့် တရုတ်၊ ပြင်သစ်၊ ဂျပန်၊ နယ်သာလန်၊ စပိန်၊ တောင်ကိုရီးယားနဲ့ ထိုင်းနိုင်ငံတို့မှ အမေရိကန်ကိုရောက်ရှိလာတဲ့ ခရီးသွားတွေဆီမှာ ပါလာခဲ့တာဖြစ်ပါတယ်။ တချို့နိုင်ငံတွေ မှာဆိုရင် အဲဒီမျိုးကွဲကတော်တော်လေးကိုပျံ့နှံ့နေတာဖြစ်ပြီး  ကူးစက်ခံရသူများအနက်  အရေးပေါ်ကုသမှုခံယူရသူများရှိသလို ဆေးရုံတက်ရောက်ကုသမှု ခံယူရသူများလည်းရှိနေတာကို တွေ့ရှိရပါတယ်။ အမေရိကန်နိုင်ငံအတွင်းမှာဆိုရင် ကယ်လီဖိုးနီးယား၊ ဟာဝိုင်ယီ၊ နယူးယောက်၊ အိုဟိုင်းယိုး၊ ဗာဂျီးနီးယား နဲ့ ဝါရှင်တန်တို့လိုပြည်နယ်တွေမှာ ကူးစက်မှုဖြစ်ပွား နေတာကိုတွေ့ရပါတယ်။

NB.1.8.1 မျိုးကွဲကိုရိုနာဗိုင်းရပ်ကူးစက်ခံရသူတွေအနေနဲ့ခံစားရတဲ့ ရောဂါလက္ခဏာတွေဟာလည်း တခြားကိုဗစ်-၁၉ ရောဂါဖြစ်ပွားသူတွေခံစားရတဲ့ ရောဂါလက္ခဏာတွေနဲ့သိပ်မကွာပါဘူး။ လည်ချောင်းနာမယ်၊ အဖျားတက်မယ်၊ မောပန်းမယ်။ ဒီလောက်ပါပဲ။ တခြားနိုင်ငံတွေကနေထုတ်ပြန်ထားတဲ့ အချက်အလက်တွေအရဆိုရင်လည်း NB.1.8.1 မျိုးကွဲက ရောဂါပြင်းထန်စွာမဖြစ်ပွားစေတာကို တွေ့ရပါတယ်။

သို့ပေမယ့်လည်း သူ့ရဲ့မျိုးရိုးဗီဇကိုကြည့်မယ်ဆိုရင် တခြားကလာပ်စည်းတွေကို လွယ်လင့်တကူကူးစက်ပျံ့နှံ့ စေမယ့်ပြောင်းလဲမှုတွေရှိထားတာကြောင့်  သူက ရောဂါကူးစက်ပျံ့နှံ့တာကို  အလွန်မြန်ဆန်စေမှာ ဖြစ်ပါတယ်။

ဒီတော့ လက်ရှိအသုံးပြုနေတဲ့ ကိုဗစ်-၁၉ ရောဂါ ကာကွယ်ဆေးတွေက ထိရောက်မှုရှိပါ့မလားဆိုပြီး စိုးရိမ်မှုတွေလည်းရှိလာကြပါတယ်။ ပညာရှင်များရဲ့ ထုတ်ပြန်ချက်အရဆိုရင် NB.1.8.1 ဆိုတာက အိုမီ ခရွန်မျိုးကွဲ ကိုရိုနာဗိုင်းရပ်ရဲ့တစ်စိတ်တစ်ပိုင်းဖြစ် တာကြောင့် လက်ရှိအသုံးပြုနေတဲ့ ကာကွယ်ဆေး တွေ၊ မကြာသေးမီကခံစားရတဲ့ ရောဂါကူးစက်မှုတွေ က NB.1.8.1 ကူးစက်မှုကြောင့် ရောဂါပြင်းထန်စွာဖြစ်ပွားမှုကို ကာကွယ်ပေးနိုင်စွမ်းရှိပါတယ်။

ဒါကြောင့် NB.1.8.1 ဗီဇပြောင်းရောဂါပိုးကိုဘယ်လိုမျိုးကာကွယ်ရမလဲဆိုတော့ ကိုဗစ်-၁၉ ရောဂါ ကာကွယ်ဆေးများကိုပဲ ဆက်လက်ထိုးနှံနိုင်ပါတယ်။ ကာကွယ်ဆေးထိုးခြင်းအားဖြင့် အသက်အရွယ်ကြီး ရင့်သူများ၊ ကိုယ်ခံအားနည်းသူများမှာ ရောဂါပြင်းထန်စွာဖြစ်ပွားနိုင်ခြေကို ကောင်းစွာလျှော့ချပေးနိုင်မှာပါ။ ဒါ့အပြင် ကိုဗစ်-၁၉ ရောဂါကူးစက်မှုကာကွယ်ရေးနည်းလမ်းများဖြစ်တဲ့ တစ်ကိုယ်ရည်သန့်ရှင်းရေးကိုဂရုစိုက်ခြင်း၊ လူထူထပ်တဲ့နေရာများသို့သွားခြင်းကိုရှောင်ခြင်းတို့အားဖြင့်လည်း ရောဂါကူးစက်မှုကို ကာကွယ်နိုင်ပါတယ်။                 

Ref: TIME K.H

ရှစ်နှစ်ကြာသုတေသနပြုလေ့လာမှုတစ်ခုမှာ အကြားအာရုံကျန်းမာရေးကမှတ်ဉာဏ် ကျဆင်းမှုနဲ့ ဆက်စပ်နေတယ်ဆိုတဲ့ အချက် တစ်ချက်ကို ပညာရှင်များကတွေ့ရှိလိုက်ပါတယ်။ ပညာရှင်များက ဘရာဇီးနိုင်ငံသား ၈၀၅ ဦးကိုရှစ်နှစ်ကြာလေ့လာမှုတွေလုပ်ခဲ့တာပါ။ သူတို့ရဲ့လေ့လာမှုအရတွေ့ရှိချက် မှာတော့ အသက် ၅၀ ကျော်လာချိန် သက်လတ်ပိုင်းမှာတွေ့ကြုံရတဲ့ အကြားအာရုံချို့ယွင်းမှုက အသက်အရွယ်ရလာချိန်မှာ မှတ်ဉာဏ်ကျဆင်းမှုဖြစ်ပေါ်စေနိုင်တယ် ဆိုတဲ့အချက်ကိုဖော်ပြထားတာ တွေ့ရပါတယ်။

ဒီတွေ့ရှိချက်ဟာ သက်ကြီးပိုင်းတွေမှာ ဒီမန်းရှား လို့ခေါ်တဲ့ ရောဂါကြောင့်ဖြစ်သောစိတ်ဖောက်ပြန်မှု ဖြစ်ပွားခြင်းကိုကာကွယ်နိုင်ဖို့အတွက် အရေးကြီးတဲ့ တွေ့ရှိချက်တစ်ခုဖြစ်ပါတယ်။ ဒီမန်းရှားဆိုတာက မှတ်ဉာဏ်တို့၊ တွေးခေါ်မှုတို့၊ ဆင်ခြင်တုံတရားရှိမှု တို့ကျဆင်းသွားတဲ့အခြေအနေကိုခေါ်တာပါ။ ဒီအခြေ အနေကြောင့် နေ့စဉ်လူမှုဘဝနေထိုင်ရေးမှာအဟန့် အတားအနှောင့်အယှက်ဖြစ်စေတာဖြစ်ပါတယ်။

သုတေသနအရဆိုရင်လူအများစုဟာ အသက် ၅၀ ကျော်လာချိန်မှာ အကြားအာရုံချို့ယွင်းလာတတ် တယ်လို့ဆိုပါတယ်။ ဆောင်ပေါင်လိုဆေးကျောင်းမှပါမောက္ခတစ်ဦးဖြစ်တဲ့   ကလော်ဒီယာဆူအီမိုတို ဦးဆောင်တဲ့ပညာရှင်များရဲ့သုတေသနအရဆိုရင် အခု လိုအကြားအာရုံချို့ယွင်းလာခြင်းက ဒီမန်းရှား ဖြစ်ခြင်းနဲ့ဆက်စပ်နေရတဲ့ အကြောင်းရင်းနှစ်ရပ်ရှိတယ်လို့သိရပါတယ်။ ပထမအကြောင်းရင်းတစ်ခုက သောတအာရုံဆိုတာ ဦးနှောက်ဆီသတင်းအချက်အလက်ပေးပို့ဖို့ အတွက်အဓိကကျတဲ့လမ်းကြောင်း တစ်ခုဖြစ်နေတာကြောင့်ဖြစ်ပါတယ်။

အကြားအာရုံရရှိနေခြင်းကြောင့် ဦးနှောက်ဆီကနေတုံ့ပြန်မှုတွေကို   ပြန်လည်ရရှိနေတာဖြစ်ပါတယ်။ အကယ်၍များ အကြားအာရုံမရတဲ့အခါမှာ ဦးနှောက်ကလည်း သူသိရှိထားတဲ့မှတ်ဉာဏ်တွေကိုပြန်ဖော်ထုတ်ဖို့ အားနည်းလာပါတယ်။ ဒါကြောင့်ပဲ အကြားအာရုံချို့ယွင်းခြင်းက မှတ်ဉာဏ်ကျဆင်းရခြင်းရဲ့ အကြောင်းရင်းတစ်ရပ်ဖြစ်လာပါတယ်။

နောက်ထပ်အကြောင်းရင်းတစ်ခုက ပြုမူလှုပ်ရှားမှုနဲ့များစွာသက်ဆိုင်နေပါတယ်။   အကြားအာရုံချို့ ယွင်းသူများဟာ လူ့အသိုင်းအဝိုင်းနဲ့တသီးတသန့် ကွဲထွက်သွားစေပါတယ်။ အကြားအာရုံချို့ယွင်းသူတွေရဲ့ ဆွေမျိုးမိတ်သင်္ဂဟတွေဟာ သူတို့ရဲ့မိတ်ဆွေကိုစကားပြောနိုင်ဖို့အတွက် အသံကျယ်ကျယ်နဲ့ပြောရခြင်း၊ စကားတစ်ခွန်းကိုပဲ ထပ်ခါထပ်ခါပြောရခြင်း အစရှိတဲ့အခြေအနေတွေကြောင့်    အကြား အာရုံချို့ယွင်းသူတွေဟာ ပတ်ဝန်းကျင်နဲ့မသိမသာကွဲထွက်လာရပါတယ်။

ဒီလိုမျိုးပတ်ဝန်းကျင်နဲ့ကွဲထွက်လာရတဲ့အတွက် အကြားအာရုံချို့ယွင်းသူတွေဟာ သူတို့ကိုယ်သူတို့ ပိတ်လှောင်လိုက်ကြပြီး ဘယ်အရာကိုမှစိတ်ပါဝင်စားမှုမရှိတော့ခြင်း၊ အများနဲ့ဝေးရာမှာသာရှင်သန်ခြင်းတို့ကြောင့် ဒီအခြေအနေဟာ ဒီမန်းရှားဖြစ်ရခြင်း အတွက် အဓိကကျတဲ့အကြောင်းရင်းတစ်ခုဖြစ်လာရခြင်းဖြစ်တယ်လို့ သုတေသနပညာရှင်များကပြောထားပါတယ်။ သုတေသနမှာပါဝင်သူအများအပြားအနေနဲ့ အကြားအာရုံချို့ယွင်းရခြင်းက အမျိုးမျိုးသောလုပ်ငန်းခွင်အခြေအနေများကြောင့် အများဆုံးဖြစ်ရခြင်းဖြစ်ပါတယ်။ ဒါကြောင့် အကြားအာရုံချို့ယွင်းမှုမဖြစ်ပေါ်စေရေးအတွက် လုပ်ငန်းခွင်အတွင်း အကာအကွယ်များတပ်ဆင်ခြင်းနဲ့ နားကြပ်နဲ့သီချင်းများနားထောင်ရာမှာလည်း အသံကျယ်လောင်စွာနဲ့ နားထောင်ခြင်းမပြုဖို့ ပညာရှင်များကသတိပေးထားပါတယ်။                                       

Ref: STD K.H

Source: Myawady Web Portal

Bachelor Degree ကို Australia နိုင်ငံမှာ တက်ရောက်ဖို့ စီစဉ်နေသူတွေ ရှိကြလား? ဒါဆိုရင်တော့ Australia နိုင်ငံက ထိပ်တန်းတက္ကသိုလ်ဖြစ်တဲ့ Monash University ကနေ ဘွဲ့ကြိုကျောင်းသားတွေအတွက် ပညာသင်စရိတ်အပြင် နှစ်စဉ်ကြေး၊ နေထိုင်စရိတ်၊ လေယာဉ်စရိတ်၊ ကျောင်းသားဗီဇာကြေးတို့ကိုပါ Cover ဖြစ်စေမယ့် (၄) နှစ်စာ $360,000 AUD အထိ ပေးအပ်သွားမယ့် ပညာသင်ဆုကို လျှောက်ထားနိုင်ပါပြီ။

ပညာသင်ဆုနာမည်ကတော့ K.C. Kuok Scholarship ဖြစ်ပြီး တရုတ်ပြည်မ၊ ဟောင်ကောင်အပါအဝင် အရှေ့တောင်အာရှနိုင်ငံသားတွေပဲ သီးသန့်လျှောက်ထားနိုင်တဲ့ ပညာသင်ဆု ဖြစ်ပါတယ်။ Monash University ရဲ့ နှစ်သက်ရာ Undergraduate Program တွေကို လျှောက်လို့ရပါတယ်။ ပညာသင်ဆုကို တစ်နှစ်မှာ တစ်ယောက်ပဲ ပေးတာဖြစ်တဲ့အတွက် ပြိုင်ဆိုင်မှုများသလို ပညာသင်ဆု အကျိုးခံစားခွင့်ကလည်း များပါတယ်။

ဘယ်လိုလူတွေ လျှောက်ထားလို့ရလဲ?

• တရုတ်၊ ဟောင်ကောင်နဲ့ အရှေ့တောင်အာရှနိုင်ငံသား ဖြစ်ရပါမယ်။

• မိမိလျှောက်ထားတဲ့ ပရိုဂရမ်ရဲ့ လိုအပ်ချက်နဲ့ ကိုက်ညီသူဖြစ်ရပါမယ်။

• Monash University မှာ ပညာသင်ကြားဖူးသူ မဖြစ်ရပါ။

• တခြားကျောင်းမှာ ကျောင်းတက်နေသူ မဖြစ်ရပါ။

• ငွေကြေးအခက်အခဲရှိကြောင်း သက်သေပြနိုင်သူ ဖြစ်ရပါမယ်။

• Double Degree လျှောက်ထားသူ မဖြစ်ရပါ။

ပညာသင်ဆု အကျိုးခံစားခွင့်

• ကျောင်းလခ

• နှစ်စဉ်ကြေး $14,000 AUD

• အဆောင်ကြေး (နွေရာသီကျောင်းပိတ်ရက်အတွက်မပါ)

• ကျောင်းသားဗီဇာကြေး

• အသွားလေယာဉ်စရိတ်

• ပထမနှစ်အတွက် အခြေချစရိတ် $3,000 AUD

• ကျန်မာရေးအာမခံကြေး

ဘယ်လိုလျှောက်ထားရမလဲ?

- Course Program ကို (https://www.monash.edu/admissions/apply/online) ကနေတစ်ဆင့် ရွေးချယ်လျှောက်ထားနိုင်ပါတယ်။

- မလျှောက်ခင် လျှောက်လွှာကြေး ($125) ကင်းလွတ်ခွင့်ရဖို့  asiascholarship@monash.edu ကို အီးမေးလ်ပေးပို့ပြီး Request အရင် လုပ်ရပါမယ်။

- ပြီးမှ ပညာသင်ဆုကို Online Application Form (https://monash.az1.qualtrics.com) ကနေတစ်ဆင့် (သို့) Offline Application Form (https://drive.google.com/file/) ကို Download လုပ်ပြီးလည်း လျှောက်ထားနိုင်ပါတယ်။

- လိုအပ်တဲ့ Documents တွေကို asiascholarship@monash.edu ကနေတစ်ဆင့် Subject နေရာမှာ K.C. Kuok Scholarship - [Your Name] ရေးပြီး ပေးပို့ရပါမယ်။

လိုအပ်တဲ့ စာရွက်စာတမ်းများ

• Financial Documentation

• Academic and Extracurricular documentation

• Personal Aspiration Statement

• Financial Support Statement

ရွေးချယ်မှုအဆင့်ဆင့်

ပညာသင်ဆုလျှောက်လွှာကို ၂၀၂၅ ခုနှစ်၊ ဇူလိုင်လ (၂၁) ရက်နေ့ နောက်ဆုံးထား လျှောက်ထားရပါမယ်။ ဇူလိုင် (၂၂) ကနေ ဩဂုတ် (၈) ရက်နေ့အတွင်းမှာ ပထမအဆင့် ရွေးချယ်ခံရသူတွေကို ကြေညာ သွားမှာ ဖြစ်ပြီး ဩဂုတ် (၁၁) ရက်နေ့ စတဲ့ အပတ်မှာ အင်တာဗျူးဖြေဆိုခွင့် ရရှိသူတွေကို ရွေးချယ်သွားမှာ ဖြစ်ပါတယ်။ ဩဂုတ် (၁၆) ရက်နေ့မှာ နောက်ဆုံးအဆင့် အင်တာဗျူး ဖြေဆိုရမှာ ဖြစ်ပြီး ဩဂုတ်လ (၁၈) ရက်နေ့ စတဲ့ အပတ်မှာ ပညာသင်ဆု ရရှိသူတွေကို သိရမှာဖြစ်ပါတယ်။

Scholarship အကြောင်း အသေးစိတ် သိလိုသူတွေက asiascholarship@monash.edu ကို အီးမေးလ် ပေးပို့မေးမြန်းနိုင်ပါတယ်။

ကိုးကား- Myanmar Education Guide

သမဝါယမစာရင်းရေး စာရင်းကိုင်သက်မွေးပညာသင်တန်းကျောင်း (မကွေး၊ မန္တလေး၊ တောင်ကြီး၊ မောင်လမြိုင်၊ ပုသိမ်) တို့တွင် ၂၀၂၅ ခုနှစ်၊ ဇွန်လ (၁၆) ရက်နေ့တွင် ဖွင့်လှစ်မည့် ပထမနှစ်သင်တန်းအတွက် ကျောင်းသား၊ ကျောင်းသူအသစ်များ ခေါ်ယူလျက်ရှိသည်။

သင်တန်းကာလမှာ (၃) နှစ် ဖြစ်ပြီး သင်တန်းပြီးဆုံးအောင်မြင်ပါက Certificate in Business Accounting (လက်မှတ်ရစီးပွားရေးစာရင်းကိုင်ပညာ) အောင်လက်မှတ် ပေးအပ်ချီးမြှင့်မည်ဖြစ်သည်။

သင်တန်းတွင် အထက်တန်း မြန်မာစာ၊ အင်္ဂလိပ်စာ၊ သင်္ချာ၊ ဘောဂဗေဒဘာသာရပ်တို့အပြင် ကျောင်း၏ အဓိကဘာသာရပ်များဖြစ်သော ကွန်ပျူတာဘာသာရပ်များ၊ စာရင်းကိုင်ဘာသာရပ်များ၊ စီမံခန့်ခွဲရေး ဘာသာရပ်များကို လေ့လာရမည်ဖြစ်ပါသည်။ ထို့အပြင် လက်တွေ့လုပ်ငန်းခွင်များတွင် သွားရောက် လေ့လာ လုပ်ကိုင်ရမည့် လက်တွေ့သင်ခန်းစာများလည်း ပါဝင်ပါသည်။

စာသင်နှစ်တစ်နှစ်သည် အခြေခံပညာကျောင်းများအတိုင်း ဇွန်လဆန်းကနေ ဖေဖော်ဝါရီလအထိဖြစ်ပြီး လပတ်စာမေးပွဲ အနည်းဆုံး ခြောက်ကြိမ်ရှိသည်။ ကျောင်းခေါ်ချိန် (၇၅) ရာခိုင်နှုန်းပြည့်မီပြီး Internship Period (အလုပ်သင်ကာလ) ကို အပြည့်အဝ ဆင်းနိုင်ရမည်။ စာမေးပွဲများတွင် သက်ဆိုင်ရာ ဘာသာရပ် အလိုက် ရမှတ် (၄၀) နှင့်အထက်ရရှိသူများကိုသာ Certificate ချီးမြှင့်မည် ဖြစ်သည်။

အဆိုပါ သင်တန်းသို့ အောက်ပါအရည်အချင်းများနှင့် ကိုက်ညီသူများ လျှောက်ထားနိုင်သည်-

• စနစ်သစ် Grade (9) အောင်မြင်ပြီးသူများ ဖြစ်ရမည်။

• ကျန်းမာရေးကောင်းမွန်သူဖြစ်ရမည်။

• မြန်မာနိုင်ငံသား အိမ်ထောင်မရှိသူ (လူပျို/အပျို) ဖြစ်ရမည်။

• သင်တန်းမှ ချမှတ်ထားသော ဝန်ခံကတိ၊ စည်းမျဉ်းစည်းကမ်းများကို လိုက်နာနိုင်သူဖြစ်ရမည်။

• သင်တန်းကို ပြီးဆုံးအောင် တက်ရောက်နိုင်သူ ဖြစ်ရမည်။

အဆိုပါ (၃) နှစ်သင်တန်းကို ပြီးဆုံးအောင်မြင်သူများအနက် ရိုးရိုးအဆင့်ဖြင့် အောင်မြင်သူများသည် ဘဏ်များ၊ ကုမ္ပဏီများ၊ စီးပွားရေးအဖွဲ့အစည်းများ၊ သမဝါယမအသင်းများနှင့် ချိတ်ဆက်၍ အလုပ်အကိုင် အခွင့်အလမ်းများ ရရှိနိုင်ပါသည်။ 

သတ်မှတ်အရည်အချင်းပြည့်မီသူများသည် သမဝါယမကောလိပ်များသို့ ပေါင်းကူး၍ ဆက်လက်ပညာ သင်ကြားနိုင်မည့် အခွင့်အရေး ရရှိပါမည်။ ထိုမှတစ်ဆင့် ထူးချွန်အောင်မြင်သူများသည် သမဝါယမ တက္ကသိုလ် များသို့ ဆက်လက်တက်ရောက်နိုင်သည့် အခွင့်အရေး ရရှိမည်ဖြစ်သည်။

လျှောက်ထားလိုသူများသည် မိမိတက်ရောက်လိုသည့် သင်တန်းကျောင်းများသို့ လူကိုယ်တိုင် သွားရောက်၍ လျှောက်လွှာ၀ယ်ယူကာ ဇွန်လ (၁၅) ရက်နေ့ နောက်ဆုံးထား လျှောက်ထားရပါမည်။

သမဝါယမစာရင်းရေးစာရင်းကိုင် သက်မွေးပညာသင်တန်းကျောင်း(မကွေး)

လိပ်စာ - မကွေးဘူတာတောင်ဘက်၊ အောင်မေတ္တာ (ဃ) ရပ်ကွက်၊ မြင်းကင်းကျေးရွာအနီး၊ မကွေးမြို့၊ မကွေးတိုင်းဒေသကြီး။ 

ဖုန်း - ဝ၉-၂၅၄၄၁၂၃၃၈ ၊ ဝ၉-၆၉၁၉ဝ၅၃၂၁

သမဝါယမစာရင်းရေးစာရင်းကိုင် သက်မွေးပညာသင်တန်းကျောင်း(မန္တလေး)

လိပ်စာ - အကွက် ၁၇၇၊ ၈၃ လမ်း၊ ၂၅ - ၂၆ လမ်းကြား၊ ပြည်ကြီးကျက်သရေအနောက်ရပ်၊ အောင်မြေ သာစံမြို့နယ်၊ မန္တလေးတိုင်းဒေသကြီး။

ဖုန်း - ၀၉ -၄၂၀၇၀၁၆၃၄၊ ဝ၉-၆၉၂၂၈၈၆၄၃၊ ၀၉-၂၁၁၀၆၄၉၊ ဝ၉-၆၆၅၆၉၁၉၁၈

သမဝါယမ စာရင်းရေး စာရင်းကိုင်သက်မွေးပညာ သင်တန်းကျောင်း(တောင်ကြီး)

လိပ်စာ - ဗိုလ်ချုပ်အောင်ဆန်းလမ်းမကြီးနှင့် အနော်ရထာလမ်းထောင့်၊ Hotel La Vista အနီး၊ ပြည်တော်သာ ရပ်ကွက်၊ တောင်ကြီးမြို့၊ ရှမ်းပြည်နယ်။

ဖုန်း - ၀၈၁-၂၁၂၁၃၂၀၊ ၀၉-၄၃၁၃၃၂၄၃၊ ၀၉- ၄၂၅၅၆၀၀၅၄

သမဝါယမစာရင်းရေး စာရင်းကိုင်သက်မွေးပညာသင်တန်းကျောင်း (မော်လမြိုင်)

လိပ်စာ - အရာတော်လမ်း၊ ဘိုကုန်းရပ်၊ မော်လမြိုင်မြို့၊ မွန်ပြည်နယ်။

ဖုန်း - -ဝ၉-၄၂၅၂၈၈၇၃၅၊ ဝ၉- ၄၂၃၇၃၆၄၄၉၊ ၀၉-၇၉၂၁၈၁၀၄၂၊ ဝ၉-၄၂၅၂၆၇ဝဝ၈

သမဝါယမစာရင်းရေး စာရင်းကိုင် သက်မွေးပညာသင်တန်းကျောင်း(ပုသိမ်)

လိပ်စာ - မြက်တိုလမ်းဆုံအနီး၊ ပုသိမ်မြို့၊ ဧရာဝတီတိုင်းဒေသကြီး။

ဖုန်း - -ဝ၄၂-၂၉၀ဝ၃၊ ၀၉-၆၉၇၄၄၅၃၀၂၊ ၀၉-၇၆၉၂၃၂၄၅၇၊ ၀၉-၄၅၁၀၈၉၄၀၄၊ ၀၉-၇၇၂၆၀၂၉၂၇ 

အသေးစိတ် သိရှိလိုပါက ရုံးချုပ်ဖုန်းနံပါတ် (၀၆၇-၃၄၁၀၃၄၃) ကို ဖြစ်စေ၊ မိမိတက်ရောက်လိုသည့် သက်ဆိုင်ရာ သင်တန်းကျောင်း၏ ဖုန်းနံပါတ်ကို ဖြစ်စေ ဆက်သွယ် စုံစမ်းမေးမြန်းနိုင်သည်။                                           

ကိုးကား-  Myanmar Education Guide

ရန်ကုန် မေ ၂၈

Asean All Stars အသင်းနှင့်နာမည်ကြီး အင်္ဂလန်ကလပ် မန်ချက်စတာယူနိုက်တက် အသင်းတို့၏ခြေစမ်းပွဲကိုယနေ့ညပိုင်းက မလေးရှားနိုင်ငံ ကွာလာလမ်ပူမြို့ရှိဘူကစ်ဂျာလီကွင်း၌ကျင်းပရာ Asean All Stars အသင်းမှ မြန်မာတိုက်စစ် ကစားသမား မောင်မောင်လွင်က အနိုင် ဂိုးသွင်းပြီး ၁ ဂိုး ဂိုးမရှိဖြင့် အနိုင်ရခဲ့ သည်။

မန်ချက်စတာယူနိုက်တက်အသင်းနှင့် ခြေစမ်းကစားရန် အာဆီယံဘောလုံးအဖွဲ့ ချုပ်သည် အဖွဲ့ဝင်နိုင်ငံများမှကစားသမားများဖြင့်ဖွဲ့စည်းခဲ့ပြီး မြန်မာနိုင်ငံကိုယ်စား ပြုအဖြစ် မောင်မောင်လွင် ရွေးချယ်ခံခဲ့ရ သည်။ မန်ချက်စတာယူနိုက်တက်အသင်း သည် ပွဲထွက်လူစာရင်းတွင် မက်ဂွိုင်းယား၊ ကက်စမဲရိုး၊ ဟွိုင်လန်း၊ ကိုဘီမိုင်နူး၊ အိုနာနာ စသည့်ကစားသမားများကို အသုံးပြုခဲ့ပြီး ဒုတိယပိုင်းတွင် ဘရူနိုဖာနန်ဒက်စ်၊ ဂါနာချို၊ အာမက်အပါအဝင် တစ်သင်းလုံး အပြောင်း အလဲပြုလုပ်ခဲ့သည်။

မောင်မောင်လွင်သည် ပထမပိုင်းတွင် ပွဲထွက်ကစားခွင့်မရသော်လည်း ဒုတိယ ပိုင်းအစတွင် ကစားခွင့်ရခဲ့ပြီး သမိုင်းဝင် စေမည့်အနိုင်ဂိုးကို မိနစ် ၇၀ တွင်သွင်းယူနိုင်ခဲ့ခြင်းဖြစ်သည်။ ထို့ကြောင့် မောင်မောင် လွင်သည် မန်ချက်စတာယူနိုက်တက် အသင်းဘက်သို့ ဂိုးသွင်းယူနိုင်သည့် ပထမဆုံး မြန်မာကစားသမားအဖြစ်လည်း မှတ်တမ်းဝင်ခဲ့သည်။

ပရီးမီးယားလိဂ်ပြိုင်ပွဲ ပြီးဆုံးချိန်တွင် ဇယားအောက်ပိုင်းရောက်ခဲ့သည့်အပြင် ယူရိုပါလိဂ်ဗိုလ်လုပွဲတွင်ရှုံးနိမ့်ပြီး ချန်ပီယံ ဆုနှင့်လွဲချော်ခဲ့သဖြင့် ဖိအားများနေသည့် မန်ချက်စတာယူနိုက်တက်အသင်းသည် အာရှခရီးစဉ်ပထမဆုံးပွဲတွင် ရှုံးပွဲနှင့် ရင်ဆိုင်ခဲ့ရခြင်းဖြစ်သည်။

မြဝတီ

လန်ဒန်   မေ ၂၈

ပုံမှန် နိုးထချိန်ထက် စောစောစီးစီးနိုးထနေမှုသည် သိုင်းရွိုက်အကျိတ်များ လှုပ်ရှားတုံ့ပြန်မှုလွန်ကဲခြင်းပြဿနာ (Hyperthyroidism) ၏ ရှေ့ပြေးလက္ခဏာဖြစ်နိုင်ကြောင်း မေ ၂၇ ရက် သတင်းများအရ သိရသည်။

သွိုင်းရွိုက်အကျိတ်များ လှုပ်ရှားတုံ့ပြန်မှုလွန်ကဲပါက နံနက်စောစောအချိန်များတွင် အာရုံနာ့ဗ်ဆဲလ်များကို စေ့ဆော်ပေးတတ်သည့် ဟော်မုန်းများထွက်ပေါ်မှု လွန်ကဲလာတတ်သည်။

သို့ဖြစ်ရာ နံနက်ပိုင်းပုံမှန်ထက်စော၍ နိုးကြားနေတတ်မှုသည် Hyperthyroidism ပြဿနာ၏ ရှေ့ပြေးလက္ခဏာဖြစ်နိုင်ကြောင်း ဗြိတိန်သုတေသနပညာရှင်များက ပြောကြားသည်။

Hyperthyroidism ပြဿနာကြောင့် ဆံပင်များပါးလာခြင်း၊ မျက်သားခြောက်ခြင်း၊ လည်ပင်းရောင်ရမ်းခြင်း၊ စိုးရိမ်သောကဝင်ရောက်ခြင်း စသည့် ကျန်းမာရေးပြဿနာများဖြင့် ရင်ဆိုင်ရတတ်ကြောင်း သိရသည်။

Hyperthyroidism ပြဿနာသည် အဖြစ်များသော်လည်း လူအများအပြားကမူ ရောဂါလက္ခဏာများကို သတိမပြုမိကြကြောင်း သုတေသနပညာရှင်များက ပြောကြားသည်။

Hyperthyroidism ရောဂါကြောင့် နှလုံးခုန်နှုန်း မူမမှန်မှုပြဿနာပေါ်ထွက်လာနိုင်ပြီး နောက်ဆက်တွဲအဖြစ် နှလုံးခုန် ရုတ်တရက်ရပ်တန့်မှု ဖြစ်ပွားနိုင်ကြောင်း သုတေသနပညာရှင်များက ပြောကြားသည်။

Source: ရတနာပုံသတင်းစာ

တံတားဦး ၊ မေ - ၂၈

မန္တလေးတိုင်းဒေသကြီး၊ တံတားဦးခရိုင်၊ တံတားဦးမြို့နယ်၌ ၂၀၂၅-၂၀၂၆ ပညာသင်နှစ် ကျောင်းသား ကျောင်းသူများ အေးချမ်းစွာ ပညာသင်ကြားနိုင်ရန် မိုးဦးကျတွင်ဖြစ်ပွားတတ်သော သွေးလွန်တုပ်ကွေးရောဂါ မဖြစ်ပွားရေးကြိုတင်ကာကွယ်ရေးလုပ်ငန်းများကို မြို့နယ်အတွင်းရှိ အခြေခံပညာကျောင်းများတွင် ခြင်ဆေး ဖျန်းခြင်း၊ အဘိတ်ဆေးခတ်ခြင်း၊ ဖုံး၊ သွန်၊ လဲ၊ စစ် လုပ်ငန်းများကို ဆောင်ရွက်လျက်ရှိရာ ယမန်နေ့ နံနက်ပိုင်းတွင် တံတားဦး အခြေခံပညာအထက်တန်းကျောင်းတွင် ပူးပေါင်းအဖွဲ့များဖြင့် ဆောင်ရွက်လျက် ရှိကြောင်းသိရသည် ။

အဆိုပါ လုပ်ငန်းများ ဆောင်ရွက်ရာတွင် သွေးလွန်တုပ်ကွေးရောဂါ မဖြစ်ပွားရေး ကြိုတင်ကာကွယ်နိုင်ရန် အတွက် အခြေခံပညာကျောင်းများရှိ ရေတွင်း၊ ရေကန်များ၊ ရေအိုးများအား ခြင်ပေါက်ပွားမှုရှိ၊ မရှိစစ်ဆေးခြင်း၊ ခြင်ပေါက်ပွားနိုင်သည့် ရေတွင်း ၊ ရေကန် ၊ ရေအိုးများ ရေသိုလှောင်ကန်များ အဖုံးဖုံးအုပ်ရန် အသိပေးခြင်း သောက်သုံးရေ ထည့်ထားသည့် ရေစည်၊ ရေအိုးများ၊ ဘုရားပန်းအိုးများအား ခြင်မပေါက်ပွားစေရန် လဲလှယ် ပြောင်းထည့်ခြင်း၊ စွန့်ပစ်ပစ္စည်းများ၊ ဘူးခွံများမှ ရေများအားသွန်ပစ်ခြင်း ၊ ရေများမလှယ်နိုင်သည့်ရေကန်များကို ရေစစ်ဖြင့် စစ်ထုတ်ခြင်း၊ အဘိတ်ဆေး(Abate)ခတ်ခြင်း၊ စာသင်ကျောင်းခန်းမများနှင့် ကျောင်းဝန်းအတွင်း ခြင်ဆေးဖြန်းခြင်းလုပ်ငန်းများကို အရှိန်အဟုန်မပြတ် ဆောင်ရွက်ပေးကြသည် ။

သွေးလွန်တုပ်ကွေးရောဂါ ကြိုတင်ကာကွယ်ရေးလုပ်ငန်းများကို တံတားဦးမြို့နယ် ကျန်းမာရေးဦးစီးဌာနမှ ဝန်ထမ်းများ၊ အ-ထ-က၊ တံတားဦးကျောင်းအုပ်ဆရာကြီးနှင့်ဆရာ/မများနှင့် လူမှုရေးအသင်းဝင်များက ပူးပေါင်း ဆောင်ရွက်ပေးကြကြောင်းသိရှိရသည်။

ဦးရဲတင့် (ပြန်/ဆက်)

တံတားဦး ၊ မေ - ၂၈

မန္တလေးတိုင်းဒေသကြီး၊ တံတားဦးခရိုင်၊ တံတားဦးမြို့နယ်တွင် ၂၀၂၅-၂၀၂၆ ပညာသင်နှစ် ၂၀၂၅ ခုနှစ် မေလ ၂၂ ရက်နေ့အထိ အခြေခံပညာကျောင်းများတွင် ကျောင်းသား/သူများ နေ့စဉ်ကျောင်းလာရောက်အပ်နှံလျက် ရှိကြောင်း သိရသည် ။

တံတားဦးမြို့နယ်အနေဖြင့် ၂၀၂၅-၂၀၂၆ ပညာသင်နှစ်တွင် KG တန်းမှ Grade – 5 အထိ မူလတန်းအဆင့် ကျောင်းသား/ သူ စုစုပေါင်း (၁၄,၆၄၀) ဦး ၊  Grade – 6 တန်းမှ Grade – 9 အထိ အလယ်တန်းအဆင့် ကျောင်းသား/ သူ စုစုပေါင်း (၄၀၇၁) ဦး ၊Grade – 10 တန်းမှ Grade - 12 အထိ အထက်တန်း အဆင့် ကျောင်းသား/ သူ စုစုပေါင်း(၁၃၄၅)ဦး လာရောက်၍ ကျောင်းအပ်နှံကြရာ သက်ဆိုင်ရာ ဆရာ/များမှ အသီးသီး လက်ခံပေးကြသည်။ တံတားဦးမြို့နယ်တွင် ၂၀၂၅-၂၀၂၆ ပညာသင်နှစ်၌ ထက် ၊ လယ် ၊ မူ ကျောင်းသား/သူ စုစုပေါင်း (၂၀၀၅၆) ဦး ကျောင်းအပ်လက်ခံပြီးစီးကြောင်း မြို့နယ်ပညာရေးမှူးရုံးမှ သိရသည် ။

ကျောင်းအပ်ပြီးစီးသည့် ကျောင်းသား/သူများ ငွေကြေးကုန်ကျမှုမရှိစေရေးအတွက် နိုင်ငံတော်မှ မူလတန်းအဆင့် ကျောင်းသား/ သူတစ်ဦးလျှင် ကျောင်းဝတ်စုံများ၊ ခဲတံ၊ ဘောပင်၊ ဗလာစာအုပ်များနှင့် ကျောင်းသုံးပြဋ္ဌာန်း စာအုပ်များ အခမဲ့ အသီးသီးထောက်ပံ့ပေးလျက်ရှိပါကြောင်း အခြေခံပညာကျောင်းများကို ၂၀၂၅-ခုနှစ် ဇွန်လ ၂ ရက်နေ့နံနက်ပိုင်းမှ စတင်ပြီး အခြေခံပညာကျောင်းများအားလုံးနှင့် ဘုန်းတော်ကြီးသင် ပညာရေးကျောင်းများ အားလုံးစတင်ဖွင့်လှစ်မည်ဖြစ်ကြောင်း မြို့နယ်ပညာရေးမှူးရုံးမှ သိရသည်။

ဦးရဲတင့် (ပြန် / ဆက်)

မိုးရာသီကာလ၌ သစ်တောများနှင့်သစ်ပင်များပေါက်ရောက်ရာပတ်ဝန်းကျင်များတွင် မှိုအမျိုးမျိုးကြီးထွားပေါက်ပွားမှုများပြားလေ့ရှိ၍ မှိုဆိပ်အန္တရာယ်နှင့်ပတ်သက်၍သတိပြုကြရန် ကျန်းမာရေးဝန်ကြီးဌာနမှ တိုက်တွန်းနှိုးဆော်ခဲ့သည်။

အဆိုပါ မှိုများတွင်အန္တရာယ်ကင်းစွာစားသုံးနိုင်သော မှိုအမျိုးအစားများရှိပြီး အဆိပ်ရှိမှိုများစွာလည်းရှိရာ အဆိပ်ရှိမှိုများအနက်အချို့မှိုများသည် ပြင်းထန်စွာအဆိပ်သင့်စေ၍ အသက်ဆုံးရှုံးစေသည်အထိဖြစ်နိုင်သည်ဟုလည်း ကျန်းမာရေးဝန်ကြီးဌာနက အသိပေးခဲ့သည်။

မှိုဆိပ်သင့်လက္ခဏာများအနေဖြင့် မှိုစားပြီး မိနစ် (၂၀)မှ (၄)နာရီအတွင်း မူးဝေခြင်း၊ အော့အန်ခြင်း၊ ဗိုက်အောင့်ဗိုက်နာခြင်း၊ ဝမ်းလျှောခြင်းတို့ဖြစ်ပွားနိုင်ပြီး ပြင်းထန်ပါကအသက်ဆုံးရှုံးနိုင်သည့်အပြင် ဦးနှောက်နှင့်အာရုံကြောထိခိုက်ပြီး စိတ်အာရုံခြောက်ခြားခြင်း၊ အလွန်အမင်းနိုးကြားလာခြင်းနှင့် စိတ်ဓာတ်ကျခြင်းတို့ဖြစ်စေနိုင်သည်ဟု သတိပေးခဲ့သည်။

ထို့အတူ အဆိပ်သင့်မှုလက္ခဏာနှင့် ပြင်းထန်မှုအတိုင်းအတာသည် မှိုအမျိုးအစား၊ ပါဝင်သောအဆိပ်(ဥပမာ- Cyclopeptides, Gyromitrin, Orellanine, Muscarine စသည်)ပမာဏ၊ စားသုံးမိသောသူ၏ အသက်အရွယ်၊ ကိုယ်ခံစွမ်းအားတို့အပေါ် မူတည်ပြီး သက်ကြီးဘိုးဘွားများနှင့် ရောဂါအခံရှိသူများတွင် မှိုဆိပ်သင့်ပါကပိုမိုပြင်းထန်စွာခံစားရနိုင်သည်ဟုလည်း သတိပေးခဲ့သည်။

ထို့ကြောင့် မှိုဆိပ်သင့်လက္ခဏာများခံစားရပါက အချိန်မီဆေးကုသမှုခံယူရန်လိုအပ်၍ နီးစပ်ရာဆေးရုံ/ကျန်းမာရေးဌာနများသို့ ချက်ချင်းပို့ဆောင်ကာ ဆေးကုသမှုခံယူရမည်ဖြစ်ပြီး မိမိမသိသော/မစားဖူးသော မှိုမျိုးကိုမစားသုံးခြင်းသည် အကောင်းဆုံးသောကာကွယ်နည်းဖြစ်ရာ အဆိပ်ရှိသည်ဟု သံသယဖြစ်ဖွယ်မှိုများ၊ သေချာမသိသော၊ မစားဖူးသောမှိုများကို စားသုံးခြင်းလုံးဝမပြုကြရန် ကျန်းမာရေးဝန်ကြီးဌာနက သတိပေးခဲ့သည်။

ကိုးကား : Popular Myanmar

Photo: Go Fresh