ဆီးရီးယား အစိုးရသစ်က နိုင်ငံ၏လွှတ်တော်ကို ဖျက်သိမ်းပြီး ဒမက်စကတ်ရှိ အစိုးရအသစ်၏ ခေါင်းဆောင်အား ကြားဖြတ်ကာလအတွက် နိုင်ငံတော် သမ္မတအဖြစ် ခန့်အပ်ကြောင်း ထုတ်ပြန်ခဲ့ပါသည်။ 

ထို့အပြင် အစိုးရသစ်က နိုင်ငံ၏ ယခင်ဖွဲ့စည်းပုံအခြေခံဥပဒေကို ပယ်ဖျက်ခြင်း၊ နှစ် ၆၀ ကြာ အာဏာရှိခဲ့သော ဗာ့သ်ပါတီကို ဖျက်သိမ်းခြင်းတို့ကို ကြေညာခဲ့သည်။ 

ထိုသို့ပြုလုပ်ခဲ့သည့်အပြင် နိုင်ငံ၏လုံခြုံရေးနှင့် စစ်အင်အားစုအားလုံးကို ဖျက်သိမ်းမည်ဖြစ်ပြီး ၎င်းတို့အစား အသစ်ပြန်လည်ဖွဲ့စည်းမည်ဟုလည်း ကြေညာခဲ့သည်။

ရုရှားသမ္မတ ဗလာဒီမာပူတင်က ယူကရိန်းနှင့် ငြိမ်းချမ်းရေးဆွေးနွေးမှုများ ပြုလုပ်နိုင်ကြောင်း ဇန်နဝါရီလ ၂၈ရက် (အင်္ဂါနေ့) ညနက်ပိုင်းတွင် ပြောကြားခဲ့သော်လည်း သမ္မတ ဗလာဒီမီယာ ဇီလန်စကီးနှင့် တိုက်ရိုက်ဆွေးနွေးမည်မဟုတ်ကြောင်း ထပ်လောင်း ထုတ်ပြန်ခဲ့သည်။ သမ္မတ ဗလာဒီမာပူတင်က ဇီလန်စကီးအား “တရားဝင်မှုမရှိသောခေါင်းဆောင်” အဖြစ် ရည်ညွှန်းခဲ့ပါသည်။ 

သမ္မတ ဗလာဒီမာပူတင်သည် UAV ထုတ်လုပ်မှုကဏ္ဍဖွံ့ဖြိုးတိုးတက်ရေးဆိုင်ရာ အစည်းအဝေးကို ဆမာရာမြို့ရှိ UAV သုတေသနနှင့် ထုတ်လုပ်ရေးစင်တာ ၌ ကျင်းပခဲ့ပါသည်။

အမေရိကန်ပြည်ထောင်စုသည် အစ္စရေးမှတစ်ဆင့် ယူကရိန်းနိုင်ငံသို့ Patriot ဒုံးကျည် အစင်း ၉၀ လွှဲပြောင်းပေးခဲ့ကြောင်း သိရှိရပါသည်။

အဆိုပါ ဒုံးကျည်များကို ဧပြီလတွင် အစ္စရေးတွင် ဖျက်သိမ်းခဲ့ပြီး ယူကရိန်းနိုင်ငံသို့ ပို့ဆောင်ရန် ယခု သီတင်းပတ်တွင် ပိုလန်အရှေ့ပိုင်းသို့ လွှဲပြောင်းပေးခဲ့ ကြောင်း Axios သတင်းအေဂျင်စီက ဖော်ပြထားပါသည်။

ကိုးကား - RT

တရုတ်အခြေစိုက် DeepSeek ကုမ္ပဏီသည် ၎င်းတို့၏ AI အပလီကေးရှင်းမော်ဒယ်တစ်ခုကို ပြီးခဲ့သည့်ရက်သတ္တပတ်အတွင်းက မိတ်ဆက်လိုက်ပြီးနောက် ကမ္ဘာပေါ်ရှိ ငွေကြေးအကြွယ်ဝဆုံးသော  လူပုဂ္ဂိုလ် ၅၀၀ ခန့်မှာ ဇန်နဝါရီလ ၂၇ ရက် တစ်ရက်တည်းမှာပင် ဒေါ်လာ ၁၀၈ ဘီလီယံ ဆုံးရှုံးသွားခဲ့ကြောင်း Bloomberg ကဖော်ပြသည်။

BYD ကုမ္ပဏီထုတ်မော်တော်ကားသည် တရုတ်နိုင်ငံရှိ   မော်တော်ကားဈေးကွက်တွင် နာမည်ကြီး ဂျာမနီကားကုမ္ပဏီများကို ကျော်ဖြတ်၍ ဘဏ္ဍာငွေအများဆုံး ရှာဖွေပေးနိုင်သည့်ကားအဖြစ် ရပ်တည်နိုင်ခဲ့ကြောင်း Sina Finance တွင်ဖော်ပြထားသည်။

တရုတ်နိုင်ငံ၏ ရေနံစိမ်းနှင့် သဘာဝဓာတ်ငွေ့ထုတ်လုပ်မှုသည်    ပထမဆုံးအကြိမ်အဖြစ် ၂၀၂၄ ခုနှစ်တွင် တန်ချိန်ပေါင်း သန်း ၄၀၀ ကျော်လွန်လာခဲ့သည်။

တရုတ်နိုင်ငံ၏ ရေနံစိမ်းထုတ်လုပ်မှုသည် ၂၀၁၈ ခုနှစ်တွင် တန်ချိန် ၂၄ သန်း ရှိခဲ့သော်လည်း ၂၀၂၄ ခုနှစ်တွင်  တန်ချိန်ပေါင်း ၂၁၃ သန်းအထိမြင့်တက်လာသည်။

ထို့ပြင် သဘာဝဓာတ်ငွေ့ ထုတ်လုပ်မှုတွင်လည်း ပြီးခဲ့သည့်နှစ်တွင် ၂၄၆ ဒသမ ၄ ဘီလီယံ ကုဗမီတာအထိမြင့်တက်လာခဲ့ကြောင်း တရုတ်အမျိုးသားစွမ်းအင်စီမံခန့်ခွဲမှုအဖွဲ့က ထုတ်ပြန်ထားသည်။

ဒိန်းမတ်နိုင်ငံသည် ဂရင်းလန်းကျွန်းလုံခြုံရေးအတွက် ခရိုနာ ၁၄ ဒသမ ၆ ဘီလီယံ (ဒေါ်လာ ၂ ဒသမ ၀၅ ဘီလီယံ)  အသုံးပြုသွားမည်ဖြစ်ကြောင်း ကာကွယ်ရေးဝန်ကြီး ထရိုးအယ်လန်း ပေါဆင်က ပြောသည်။

တောင်ကိုရီးယားနိုင်ငံ ဘူဆန်မြို့ရှိ ဂင်ဟေး   အပြည်ပြည်ဆိုင်ရာလေဆိပ်တွင် ဇန်နဝါရီလ ၂၈ ရက်က ခရီးသည်တင်လေယာဉ်တစ်စင်းပေါ်၌ မီးလောင်ကျွမ်းမှုဖြစ်ပွားခဲ့ကြောင်း   ယွန်ဟပ် သတင်းအေဂျင်စီက ထုတ်ပြန်သည်။

မီးလောင်ကျွမ်းမှုသည်  Air   Busan လေကြောင်းလိုင်းပိုင်  ခရီးသည်တင်လေယာဉ်သည်    ဒေသစံတော်ချိန်  ည ၁၀ နာရီ  ၃၀  မိနစ်ခန့်က   လေဆိပ်မှ   ဟောင်ကောင်သို့      ထွက်ခွာရန်ပြင်ဆင်နေစဉ်   စတင်ဖြစ်ပွားခြင်းဖြစ်သည်။

Iron Dome ဒုံးကျည်ကာကွယ်ရေးစနစ်တစ်ခု၏ဒီဇိုင်းကို ရက်ပေါင်း ၆၀ အတွင်းပြင်ဆင်၍ ပြန်လည်တင်ပြရန် အမေရိကန်သမ္မတ ဒေါ်နယ်ထရမ့်က ကာကွယ်ရေးဝန်ကြီး ပိဟက်ဆက်အား ညွှန်ကြားလိုက်ကြောင်း သိရသည်။

ကာကွယ်ရေးဝန်ကြီးဟက်ဆက်အနေဖြင့် အမိန့်ကြေညာစာထွက်သည့်နေ့မှစ၍ ရက်ပေါင်း ၆၀ အတွင်း Iron Dome ဒုံးကျည်ကာကွယ်ရေးစနစ်အား ဒီဇိုင်းရေးဆွဲမည့် အစီအစဉ်၊  စွမ်းဆောင်ရည်အခြေပြုလိုအပ်ချက်များကို သမ္မတထရမ့်ထံသို့ ပြန်လည်တင်ပြရမည်ဖြစ်သည်။