ဥရောပလုံခြုံရေးအတွက် အမေရိကန်ပြည်သူများက မည်သည့်အတွက်ကြောင့် အခွန်ပေးဆောင်ရန် လိုအပ်သည်ကို မရှင်းလင်းကြောင်း အမေရိကန် အစိုးရစွမ်းဆောင်ရည် မြှင့်တင်ရေးဌာန (DOGE) အကြီးအကဲဖြစ်သူ လုပ်ငန်းရှင် အီလွန်မက်စ်က ပြောကြားလိုက်ပါသည်။

“အမေရိကန်ပြည်သူများက ဥရောပကာကွယ်ရေးအသုံးစရိတ်၏ ၃ ပုံ ၂ ပုံကို မည်သည့်အတွက် ပေးဆောင်နေရသနည်း။ ယင်းမှာ အဓိပ္ပာယ် မရှိကြောင်း" ၎င်း၏ X ဆိုရှယ်မီဒီယာတွင်လည်း ရေးသားခဲ့ပါသည်။

အသစ်ဖန်တီးလိုက်သည့် ခရစ်တိုငွေကြေးအသစ် $ Libra ကို ၎င်း၏ X လူမှုကွန်ယက်စာမျက်နှာတွင် ကြော်ငြာပေးခဲ့သည်ဟူသော စွပ်စွဲချက်ကို အာဂျင်တီးနားသမ္မတ Javier Milei က ငြင်းဆိုခဲ့သည်။

Milei က ဖေဖော်ဝါရီ ၁၄ ရက်တွင် $ Libra ခရစ်တိုငွေကြေးအကြောင်း ပို့စ်တင်ပြီး မကြာမီဈေးကွက်တန်ဖိုး သိသိသာသာတက်လာသော်လည်း နာရီပိုင်းအတွင်း ရုတ်တရက် ကျဆင်းသွားခဲ့ခြင်းကြောင့် ရင်းနှီးမြှုပ်နှံသူ အများစုအတွက် ကြီးမားသော ဆုံးရှုံးမှုများ ဖြစ်ပေါ်စေခဲ့သည်။

ရိုမေးနီးယားအပါအဝင် ဥရောပနိုင်ငံအချို့က ယူကရိန်းဒေသအချို့ကို ပိုင်ဆိုင်ခွင့်ရှိကြောင်း စတင်ပြောဆိုလာမှုများရှိကြောင်း ဖေဖော်ဝါရီ ၁၈ ရက်တွင် ဆော်ဒီအာရေးဗီးယားနိုင်ငံ၊ ရီယာ့ဒ်မြို့၌ အမေရိကန် ကိုယ်စားလှယ်အဖွဲ့နှင့် တွေ့ဆုံမှုအပြီး ရုရှားနိုင်ငံခြားရေးဝန်ကြီး ဆာဂေးလာဗ်ရော့ဖ် က ပြောကြားလိုက်ပါသည်။

ရိုမေးနီးယားနိုင်ငံရေးသမားများက မကြာသေးခင်ကလည်း အဆိုပါအကြောင်းကို ပြောဆိုထားကြကြောင်း ၎င်းက ဆက်လက်ပြောကြားထားပါသည်။

ပြင်သစ်တပ်များကို ယူကရိန်းသို့ ပို့ရန် အစီအစဉ်မရှိကြောင်း La Depeche သတင်းစာနှင့် အင်တာဗျူးတွင် ပြင်သစ်သမ္မတ အီမန်နျူရယ်မက်ခရွန် က ပြောကြားခဲ့သည်။

မက်ခရွန်သည် ဂျာမနီ၊ အီတလီ၊ ပိုလန်၊ စပိန်၊ နယ်သာလန်၊ UK နှင့် ဒိန်းမတ်နိုင်ငံတို့၏ နိုင်ငံ့ခေါင်းဆောင်အကြီးအကဲများနှင့် အလွတ်သဘော ဆွေးနွေးပွဲတစ်ခုကို ဖေဖော်ဝါရီ ၁၇ ရက်တွင် ပဲရစ်မြို့၌ ကျင်းပခဲ့သည်။ ဆွေးနွေးပွဲသို့ ဥရောပကော်မရှင် (European Commission) နှင့် ဥရောပ ကောင်စီ (European Council) ဥက္ကဋ္ဌများနှင့် NATO တပ်ဖွဲ့၏ အထွေထွေ အတွင်းရေးမှူးချုပ်တို့လည်း တက်ရောက်ခဲ့ကြသည်။ 

ယူကရိန်းပဋိပက္ခနှင့်ပတ်သက်၍ ရုရှားနိုင်ငံအား ပိတ်ဆို့အရေးယူမှု ၁၆ ကြိမ်မြောက် အစီအစဉ်ကို EU က သဘောတူညီခဲ့ကြောင်း မီဒီယာအချို့က ဖေဖော်ဝါရီ ၁၉ ရက်နေ့တွင် ဖော်ပြခဲ့သည်။ ထိုဆုံးဖြတ်ချက်ကို EU ၏ အကြီးတန်းသံတမန် Kaja Kallas က ကြိုဆိုခဲ့ပြီး ယင်းသည် ဝါရှင်တန် နှင့် မော်စကိုတို့ကြား ရုရှား-ယူကရိန်း စစ်ပွဲကို ဖြေရှင်းရန် မကြာသေးမီ က ကြိုးပမ်းမှုများရှိခဲ့သော်လည်း EU ကဆောင်ရွက်ခဲ့ခြင်းဖြစ်သည်။

အိန္ဒိယနိုင်ငံ၏ အကြီးဆုံးလျှပ်စစ်ဓာတ်အားထုတ်လုပ်ရေးကုမ္ပဏီဖြစ်သော National Thermal Power Corporation (NTPC) သည် နောက်နှစ် ၂၀ အတွင်း နျူကလီးယားဓာတ်အား ၃၀ ဂဂ္ဂါဝပ် (GW) တည်ဆောက်ရန် ရည်မှန်းချက်ချမှတ်ထားကြောင်း Reuters သတင်းဌာနက ဖော်ပြခဲ့သည်။ ယင်းအတွက် ခန့်မှန်းကုန်ကျစရိတ်မှာ ဒေါ်လာ ၆၂ ဘီလီယံဖြစ်ပြီး၊ ကုမ္ပဏီ၏ မူလရည်မှန်းချက်ဖြစ်သော ၁၀ ဂဂ္ဂါဝပ်ထက် သုံးဆမြင့်မားကြောင်း NTPC အရာရှိများက ပြောကြားခဲ့သည်။

အာဖဂန်နစ္စတန်နိုင်ငံနှင့် ထိစပ်နေသည့် နယ်စပ်အနီးမှ South Waziristan ခရိုင်တွင် အစွန်းရောက် စစ်သွေးကြွ ၃၀ ဦး ကို သုတ်သင်ခဲ့ကြောင်း ပါကစ္စတန်စစ်တပ်က ဖေဖော်ဝါရီလ ၁၈ ရက်၌ သတင်းထုတ်ပြန်ခဲ့ပါသည်။ အစွန်းရောက် စစ်သွေးကြွများ၏ အဓိကနယ်မြေဖြစ်သည့် South Waziristan ခရိုင်သည် သတင်းထောက်နှင့် လူ့အခွင့်အရေးအဖွဲ့များ သွားရောက်ရန်အတွက် မလွယ်ကူခြင်းကြောင့် အချက်အလက်များကို တိတိကျကျ စစ်ဆေးရန် ခက်ခဲသည်ဟုလည်း သိရပါသည်။

အိန္ဒိယနှင့်ကာတာနိုင်ငံတို့သည် နှစ်နိုင်ငံကြားဆက်ဆံရေးကို ကုန်သွယ်ရေး၊ ရင်းနှီးမြှုပ်နှံမှု၊နည်းပညာ၊စွမ်းအင်နှင့် ပြည်သူအချင်းချင်းဆက်ဆံရေးကို အဓိကအာရုံစိုက်သည့် မဟာဗျူဟာမြောက်မိတ်ဖက်ဆက်ဆံရေးအဖြစ် မြှင့်တင်ခဲ့သည်ဟု သိရှိရပါသည်။

စင်္ကာပူရှိအိမ်ထောင်စုများသည် အလုပ်မှပျမ်းမျှဝင်ငွေပိုမိုမြင့်မားလာပြီး တစ်လလျှင် စင်္ကာပူဒေါ်လာ ၁၁,၂၉၇ (အမေရိကန်ဒေါ်လာ ၈,၄၁၃) အထိရောက်ရှိခဲ့ပြီး ယမန်နှစ်ကထက် အစိုးရအစီအစဉ်များမှ ပံ့ပိုးမှု ပိုမို ရရှိခဲ့သည်။

၎င်းသည် ငွေကြေးဖောင်းပွမှုကို ထိန်းညှိပြီးနောက် ဝင်ငွေ ၁.၄% တိုးလာခြင်း ဖြစ်ပြီး ၂၀၂၃ ခုနှစ်တွင် ပျမ်းမျှဝင် ၂.၈% တိုးတက်မှုထက်နည်းခဲ့ကြောင်း မကြာသေးမီက ထုတ်ပြန်ခဲ့သော မြို့တော်-ပြည်နယ်စာရင်းအင်းဌာနမှ အချက်အလက်များကို ကိုးကား၍ CNA က ဖော်ပြခဲ့သည်။

ဗီယက်နမ်နိုင်ငံသည် ဘဏ္ဍာရေးအသုံးစရိတ်များကို လျှော့ချရန်နှင့် စီမံခန့်ခွဲရေးဆိုင်ရာ စွမ်းဆောင်ရည်မြှင့်တင်ရန် ကြိုးစားနေချိန်တွင် အစိုးရယန္တရားကို ငါးပုံတစ်ပုံအထိ လျှော့ချမည့် ဗျူရိုကရေစီ ပြုပြင် ပြောင်းလဲရေးအစီအစဉ်ကို ဖေဖော်ဝါရီ ၁၈ ရက်(အင်္ဂါနေ့)တွင် ဗီယက်နမ် လွှတ်တော်မှ အတည်ပြုခဲ့သည်။

မတ်လ ၁ ရက်နေ့မှစတင်၍ အစိုးရဝန်ကြီးဌာန အရေအတွက်ကို လက်ရှိ ၁၈ ခုမှ ၁၄ ခုသို့ လျှော့ချသွားမည်ဖြစ်ကြောင်း အဆိုပါအစည်းအဝေး ထုတ်ပြန်ချက်တွင် ဖော်ပြထားသည်။