လာမည့်ဖေဖော်ဝါရီ ၁၂ ရက်နေ့တွင် အမေရိကန်သို့ သွားရောက်ပြီး သမ္မတဒေါ်နယ်ထရမ့်နှင့် တွေ့ဆုံမည့် အိန္ဒိယဝန်ကြီးချုုပ် နာရိန်ဒရာမိုဒီ အနေဖြင့် အမေရိကန်- အိန္ဒိယ ကုန်သွယ်မှု၌ အမေရိကန်ဘက်မှ ချမှတ်မည့် ကုန်သွယ်စည်းကြပ်ခွန်တိုးမြှင့်မှုအား တားဆီးနိုင်လိမ့်မည် ဟု အိန္ဒိယနိုင်ငံရေး အသိုင်းအဝိုင်းက မျှော်လင့်နေကြပါသည်။ 

ကုန်သွယ်ရေး စစ်ပွဲဖြစ်မလာစေရေး တားဆီးရန် မိုဒီက အမေရိကန် ထုတ်ကုန်များကို စိတ်ကြိုက်တင်သွင်းခွင့်ပြုမည်ဟု ယူဆရပြီး ထိုကဲ့သို့ ဖြစ်လာစေရန်လည်း အိန္ဒိယဘက်မှ ကြိုတင်ပြင်ဆင်ထားမှုများရှိသည် ဟု အိန္ဒိယအရာရှိကြီးများ၏ ပြောစကားကိုကိုးကား၍ ရိုက်တာ သတင်း ဌာနက ဖော်ပြထားသည်။

အီလက်ထရွန်နစ် ခွဲစိတ်ခန်း၊ ဆေးဘက်ဆိုင်ရာပစ္စည်းများနှင့် ဓာတုပစ္စည်းအချို့အား အနည်းဆုံး အမျိုးအစား တစ်ဒါဇင်ခန့်ကို ကုန်သွယ်မှု သဘောတူခွင့်ပြုချက်ပေးရန် ထည့်သွင်းစဉ်းစားနေကြောင်း အမည်မဖော် လိုသူ အစိုးရအရာရှိသုံးဦးက ရိုက်တာသို့ ပြောကြားခဲ့ပါသည်။ 

အိန္ဒိယသည် ပုံမှန်အားဖြင့် အမေရိကန်၏ ပို့ကုန်များအပေါ်တွင် မှီခိုနေရပြီး အမေရိကန်ထံမှ အရင်းအမြစ်များပိုမိုရရှိလာနိုင်သည့် ပစ္စည်းများ အပေါ် လိုက်လျောရန်စီစဉ်လျက်ရှိပါသည်။ ဤအကောက်ခွန်လိုက်လျောမှုသည် အိန္ဒိယပြည်တွင်းထုတ်လုပ်မှု အစီအစဉ်များ နှင့်လည်း လိုက်လျောညီထွေဖြစ်စေမည်ဟု ၎င်းတို့ကဆိုပါသည်။ 

အရာရှိတစ်ဦး၏ ပြောကြားချက်အရ ဝန်ကြီးချုပ်မိုဒီနှင့် ထရမ့် အကြား တွေ့ဆုံမှုသည် အမေရိကန်နှင့် တရုတ်နိုင်ငံကြားဖြစ်ပွားနေသည့် ကုန်သွယ်ရေးစစ်ပွဲကဲ့သို့ အခြေအနေမျိုးကို ရှောင်ရှားရန်ရည်ရွယ်ကြောင်း ဆိုပါသည်။ 

ကိုးကား-Myanmar National Post

ဟနွိုင်း  ဖေဖော်ဝါရီ ၈

ဗီယက်နမ်နိုင်ငံက ဇန်နဝါရီလအတွင်း ကော်ဖီတန်ချိန် ၁၅၄၆၃၅ တန် တင်ပို့နိုင်ခဲ့ကြောင်း ဗီယက်နမ်ကော်ဖီ-ကိုကိုးအသင်းက ထုတ်ပြန်ထားသည်။

ကော်ဖီစိမ်း တင်ပို့မှုမှာ ၁၃၇၅၆၈ တန်ရှိပြီး ဒေါ်လာ ၆၉၄ ဒသမ ၉ သန်းရရှိကာ ပြီးခဲ့သည့်နှစ် ဇန်နဝါရီလနှင့် နှိုင်းယှဉ်ကြည့်ပါက တန်ဖိုး ၈ ဒသမ ၈ ရာခိုင်နှုန်း တိုးလာသော်လည်း ပမာဏ ၃၈ ဒသမ ၂ ရာခိုင်နှုန်း ကျဆင်းသွားကြောင်း ဗီယက်နမ်သတင်းအေဂျင်စီက ဖေဖော်ဝါရီ ၇ ရက်တွင် ထုတ်ပြန်ထားသည်။

ပြုပြင်ပြီး ကော်ဖီတင်ပို့မှု ပမာဏမှာ ၁၇၀၆၇ တန်ရှိသဖြင့် ဒေါ်လာ ၁၀၄ ဒသမ ၆ သန်းရရှိကာ စုစုပေါင်း ကော်ဖီတင်ပို့မှု တန်ဖိုး၏ ၁၃ ရာခိုင်နှုန်းရှိကြောင်း သိရသည်။

ဗီယက်နမ်နိုင်ငံသည် ၂၀၂၅ ခုနှစ်အတွင်း ကော်ဖီတန်ချိန် ၁ ဒသမ ၉၈ သန်းထုတ်လုပ်ရန် ရည်မှန်းထားကြောင်း စိုက်ပျိုးရေးနှင့် ကျေးလက်ဒေသဖွံ့ဖြိုးရေးဝန်ကြီးဌာနကထုတ်ပြန်ထားသည်။

Source: မြန်မာ့အလင်းသတင်းစာ

အာရှ၏ တတိယအကြီးဆုံးစီးပွားရေး နိုင်ငံဖြစ်သည့် အိန္ဒိယတွင် နိုင်ငံ၏ စီးပွားရေးဖွံ့ဖြိုးတိုးတက်မှု နှေးကွေးလာခြင်းကို ဖြေရှင်းရန် အိန္ဒိယဗဟိုဘဏ်သည် ငါးနှစ် နီးပါးအတွင်း အတိုးနှုန်းကို ပထမဆုံးအကြိမ် လျှော့ချ လိုက်သည်။

Reserve Bank of India (RBI) သည်လည်း စီးပွားရေးပညာရှင်များ၏ မျှော်မှန်းချက်နှင့်အညီ ဖြစ်စေရန် ၎င်း၏ Repo Rate ကို ၆.၅ % မှ ၆.၂၅ % သို့ လျှော့ချခဲ့သည်။

Repo Rate သည် အိန္ဒိယဗဟိုဘဏ်မှ ကူးသန်းရောင်းဝယ်ရေး ဘဏ်များအား ချေးပေးသည့် သတ်မှတ်ချက် (ကာလတို ချေးယူမှုပုံစံ) ဖြစ်သည်။ ပြီးခဲ့သည့် ၄ နှစ် အတွင်း အိန္ဒိယနိုင်ငံ၏ GDP တိုးတက်မှုနှုန်း ၆.၇ % သို့ ကျဆင်းသွားချိန်တွင် Repo Rate အား တစ်ကြိမ် လျှော့ချ ခဲ့ဖူးသည်။ 

ကမ္ဘာ့စီးပွားရေးဖွံ့ဖြိုးတိုးတက်မှုအလျင်မြန်ဆုံး အိန္ဒိယနိုင်ငံ၏ အဓိကစီးပွားရေး လုပ်ငန်းဖြစ်သည့် ရင်းနှီးမြှုပ်နှံမှု လုပ်ငန်းတိုးတက်မှုနှင့် မြို့ပြနေလူဦးရေ၏ ကုန်စည် ဝယ်ယူသုံးစွဲမှုရာခိုင်နှုန်းမှာ ကျဆင်းလျက်ရှိပြီး ကုမ္ပဏီ လုပ်ငန်းများ၏ အမြတ်အစွန်းများမှာလည်း ယခုနှစ် ဘဏ္ဍာရေးနှစ် ပထမနှစ်ဝက်တွင် ကျဆင်းခဲ့သည်။

သို့သော် ငွေကြေးဖောင်းပွမှုကို ထိန်းညှိပေးခြင်း၊ ကျေးလက်နေပြည်သူများ၏ ဝယ်လိုအား တိုးလာစေရန်နှင့် လယ်ယာစိုက်ပျိုးရေးထုတ်ကုန်များ အထွက်နှုန်း ကောင်းအောင် ဆောင်ရွက်ခြင်းဖြင့် စီးပွားရေးဖွံ့ဖြိုး တိုးတက်မှုကို အထောက်အကူဖြစ်စေမည်ဟု RBI ဥက္ကဋ္ဌ Mr Malhotra က ပြောကြားခဲ့ပါသည်။

ယခုလို အတိုးနှုန်းလျှော့ချလိုက်ခြင်းသည် ချေးငွေနှင့် အကြွေးဝယ်ကတ်အတိုးနှုန်းများ သိသိသာသာ လျော့ကျသွားသည့်အပြင် ကုမ္ပဏီလုပ်ငန်းများအတွက် စရိတ် များလည်း သက်သာသွားစေသည်။

ဗဟိုဘဏ်အနေဖြင့် အတိုးနှုန်းမလျှော့ချမီက ပြည်တွင်း ဘဏ်လုပ်ငန်းစနစ်သို့ ကန်ဒေါ်လာ ၁၈ ဘီလီယံ (ပေါင် ၁၄.၄၈ ဘီလီယံ) ထည့်ဝင်ခြင်းအပါအဝင် နိုင်ငံ့စီးပွားရေးအတွက် ငွေသားပြတ်လပ်မှုကို သက်သာစေမည့် နည်းလမ်းများနှင့် ဆောင်ရွက်ချက်များကို ထုတ်ပြန်ကြေညာခဲ့သည်။ 

ထို့ပြင် ဒီဇင်ဘာလတွင် အရန်ငွေသားထားရှိမှုအချိုး သို့မဟုတ် ကူးသန်းရောင်းဝယ်ရေးဘဏ်များအနေဖြင့် RBI တွင် ဆက်လက်ထားရှိရန်လိုအပ်သည့် အရန်ငွေကြေး ပမာဏကို လျှော့ချခဲ့ပြီး ဒီဇင်ဘာလတွင် ရာခိုင်နူန်း တစ်ဝက်ခန့်အထိ လျှော့ချခဲ့သည်။

အိန္ဒိယနိုင်ငံလူလတ်တန်းစားများ ရင်ဆိုင်ကြုံတွေ့နေ ရသော အခက်အခဲများ ပြေလည်စေရန်အတွက် ပြည်ထောင်စုဘတ်ဂျက်၏ အခွန်ရငွေထဲမှ ဒေါ်လာ ၁၂ ဘီလီယံ လျှော့ချလိုက်ပြီးနောက် RBI ၏ အရန်ငွေကြေး ထားရှိမှုနှုန်းထား လျှော့ချလိုက်ခြင်းဖြစ်သည်။

ထို့ပြင် မိုဒီအစိုးရသည် နိုင်ငံ့စီးပွားဖွံ့ဖြိုးတိုးတက်ရေးကို ကြိုးပမ်းဆောင်ရွက်ရာတွင် ဘတ်ဂျက်လိုငွေပြမှုကို လျှော့ချရန်အတွက် အစိုးရအသုံးစရိတ်များကို ထိန်းချုပ် ကန့်သတ်ရန် ရည်မှန်းထားပါသည်။ အိန္ဒိယ ဗဟိုဘဏ်ကလည်း စီးပွားရေးဖွံ့ဖြိုးတိုးတက်မှုကို အထောက်အကူ ဖြစ်စေရန် အတိုးနှုန်းများကို ၀.၅ % မှ ၁% အထိ နောက်ထပ်လျှော့ချသွားရန် မျှော်လင့်ထားကြောင်း စီးပွားရေးပညာရှင်များ၏ ခန့်မှန်းပြောဆိုချက်များအရ သိရှိရပါသည်။

သို့သော် အမေရိကန်သမ္မတ ဒေါ်နယ်ထရမ့်၏ အကောက်ခွန်စစ်ပွဲကြောင့် ကမ္ဘာ့နိုင်ငံများ၏ စီးပွားရေး လုပ်ငန်းများ မတည်မငြိမ်ဖြစ်ခဲ့ရပြီး၊ ထိုမှတစ်ဆင့် နိုင်ငံခြားရင်းနှီးမြုပ်နှံသူများ၏ ရင်းနှီးမြှုပ်နှံမှုများ ပြန်လည် ထုတ်ယူခြင်းနှင့်  ငွေကြေးတန်ဖိုး ကျဆင်းခြင်းများ ဖြစ်ပေါ်ကာ စီးပွားရေးလုပ်ငန်းများ ပိုမိုထိခိုက်လာခြင်းနှင့် RBI ၏ လုပ်ငန်းများ ပိုမိုရှုပ်ထွေး ခက်ခဲလာခြင်း ဖြစ်ပါသည်။ မကြာသေးမီလများအတွင်း နိုင်ငံခြားရင်းနှီးမြှုပ်နှံသူ အများအပြားကလည်း ၎င်းတို့၏ ရင်းနှီးမြှုပ်နှံမှုများအားအိန္ဒိယ စတော့ရှယ်ယာဈေးကွက်များမှ ပြန်လည်ထုတ်ယူခြင်းနှင့် ရောင်းချခြင်းတို့ကြောင့် အိန္ဒိယရူပီးသည်  စံချိန်တင် ကျဆင်းလျက်ရှိသည်။

ကိုးကား -BBC

အီရန်နိုင်ငံက ရေနံစည် သန်းချီ၍ တရုတ်နိုင်ငံကို တင်ပို့ရာတွင် အသုံးပြုနေသည့် နိုင်ငံတကာကွန်ရက်များကို ပစ်မှတ်ထားကာ အီရန်ရေနံလုပ်ငန်းအပေါ် အမေရိကန် နိုင်ငံခြားပိုင်ဆိုင်မှုထိန်းချုပ်ရေးဌာန (OFAC) က ဒဏ်ခတ် ပိတ်ဆို့ အရေးယူလိုက်ပြီဖြစ်ကြောင်း ဖေဖော်ဝါရီ ၆ ရက်တွင် အမေရိကန်ဘဏ္ဍာရေးဝန်ကြီးဌာနက ထုတ်ပြန် လိုက်ပါသည်။ 

အီရန် လက်နက်ကိုင်တပ်ဖွဲ့ AFGS အတွက် ရေနံတင်ပို့မှုများကို လုပ်ဆောင်ပေးနေသော Sepehr Energy ကုမ္ပဏီကို ပစ်မှတ်ထားဒဏ်ခတ်ခြင်းဖြစ်ကြောင်း၊ ယခု ဒဏ်ခတ်ခံရသူများတွင် တရုတ်၊ အိန္ဒိယ၊ အာရပ် စော်ဘွားများ ပြည်ထောင်စုနိုင်ငံများမှ လူပုဂ္ဂိုလ်များ၊ လုပ်ငန်းများ၊ ရေနံတင်သင်္ဘော၊ ကုန်တင်သင်္ဘော အများအပြားလည်းပါဝင်ကြောင်း ထုတ်ပြန်ချက်တွင် ဖော်ပြထားပါသည်။

အီရန် AFGS အဖွဲ့ ထိန်းချုပ်မှုအောက်ရှိ လည်ပတ်နေသော Sepehr Energy ကုမ္ပဏီနှင့် ဆက်စပ်နေသည့် ကုမ္ပဏီများမှာ ရေကြောင်းသွားလာမှုများအတွက် လက်မှတ်တုများပြုလုပ်ခြင်း အပါအဝင် လိမ်ညာလှည့်ဖြား၍ တရားမဝင် နည်းလမ်းများ အသုံးပြုကာ ရေနံအမြောက်အမြားကို အီရန်က တင်ပို့ခြင်းကို ဖုံးကွယ်ပြီး တရုတ်အပါအဝင် ကမ္ဘာ့နိုင်ငံများသို့ တင်ပို့ကုန်သွယ်ခြင်း လုပ်ဆောင်နေသည်ဟု အမေရိကန်ဘဏ္ဍာရေးဝန်ကြီးဌာန၏ ထုတ်ပြန်ချက်တွင် ဖော်ပြထားပါသည်။

ဒေသတွင်း မတည်မငြိမ်ဖြစ်စေသော လှုပ်ရှားမှုများ ဆောင်ရွက်နေသည့် ဟားမတ်စ်၊ ဟူသီ နှင့် ဟစ်ဇ်ဘိုလာ အပါအဝင် ဒေသတွင်း အကြမ်းဖက်အဖွဲ့များစွာကို ထောက်ပံ့ရန်အတွက် ရေနံရောင်းချမှုမှတစ်ဆင့် နှစ်စဉ် ဒေါ်လာဘီလီယံနှင့်ချီ၍ ရရှိနေသော အီရန်လက်နက်ကိုင် တပ်ဖွဲ့ AFGS သည် ရေနံသယ်ယူတင်ပို့ရောင်းချမှုများ လုပ်ဆောင်ရန် နိုင်ငံခြားအခြေစိုက် ရှေ့တန်းကုမ္ပဏီများနှင့် ပွဲစားများ၏ ကွန်ရက်များကို အသုံးပြုကြပါသည်။ 

ကိုးကား- အမေရိကန် ဘဏ္ဍာရေးဝန်ကြီးဌာန 

ရုရှားနိုင်ငံနှင့် အီသီယိုးပီးယားနိုင်ငံတို့သည် ၎င်းတို့၏ အမျိုးသားငွေကြေးများဖြင့် ကုန်သွယ်မှုကို စတင်နေပြီဖြစ်ကြောင်း မော်စကိုမြို့ရှိ အီသီယိုးပီးယား သံအမတ်ကြီး Genet Teshome Jirru က ထုတ်ဖော် ပြောကြားလိုက်ပါသည်။ 

အဆိုပါနှစ်နိုင်ငံအမျိုးသားငွေကြေးများဖြင့် ကုန်သွယ်မှုဆောင်ရွက်ရန် လုပ်ငန်းစဉ်မှာ အစပိုင်းအဆင့်၌ပင် ရှိသေးသဖြင့် တိကျသည့် စာရင်းဇယားများဖြင့် ဖော်ပြ နိုင်ရန် စောလွန်းနေပါကြောင်း၊ သို့ရာတွင် နှစ်ဖက်စလုံး က မိမိနိုင်ငံသုံး ငွေကြေးနှင့် ပြုလုပ်မည့် ကုန်သွယ်မှုကို စိတ်ဝင်စားနေကြပါကြောင်း၊ ယခုပူးပေါင်းဆောင်ရွက်မှုသည် အချိန်နှင့်အမျှ တိုးတက်လာမည်ဖြစ်ပါကြောင်း သံအမတ်ကြီးက မှတ်ချက်ပြုထားပါသည်။ 

ကိုးကား -TASS

Photo: Sputnik Africa

Nissan ၏ အစုရှယ်ယာများကိုဝယ်ယူပြီး ၎င်း၏ ကုမ္ပဏီခွဲတစ်ခုဖြစ်လာရန် Honda Motor ၏ ကမ်းလှမ်းချက်ကို သဘောမတူကြောင်း Nissan Motor က တုံ့ပြန်ပြောကြားခဲ့ကြောင်း သတင်းရင်းမြစ်များက ဆိုပါသည်။

Nissan ၏ ဥက္ကဋ္ဌ Uchida Makoto သည် ဖေဖော်ဝါရီ ၆ ရက်နေ့တွင် Honda Motor ၏ ဥက္ကဋ္ဌ Mibe Toshihiro နှင့် တွေ့ဆုံခဲ့သည်ဟုယူဆရကြောင်း သတင်းရင်းမြစ် များက ဆိုပါသည်။

Nissan ၏ ဘုတ်အဖွဲ့ဝင်အများအပြားက Honda ၏ ကမ်းလှမ်းမှုကို လက်မခံကြောင်း Uchida က Mibe ကို ပြောကြားခဲ့ပြီး Nissan ဘက်မှ သဘောမတူပါက ပေါင်းစည်းမှုသည် ခက်ခဲမည်ဟု Honda က ပြောဆို ထားပါသည်။

အဆိုပါ ဂျပန်ကားကုမ္ပဏီများသည် ဖက်စပ်မိခင် ကုမ္ပဏီ တစ်ခုထူထောင်ရန် ဒီဇင်ဘာလကတည်းကပင် ဆွေးနွေးနေခဲ့ကြပါသည်။

သို့သော် Honda က သတ်မှတ်ချက်များကို မကြာခင်က ပြောင်းလဲခဲ့ပြီး Nissan ကို လက်အောက်ခံ ကုမ္ပဏီအဖြစ် ထည့်သွင်းရန်အဆိုပြုခဲ့ပြီး Nissan ကလည်း တန်းတူညီတူလက်တွဲဆောင်ရွက်လိုသည့်ဆန္ဒကို အမြဲအလေးပေးပြောကြားလာခဲ့ခြင်းကြောင့် ၎င်းတို့အကြား၌ ကြီးမားသော သဘောထားကွာဟချက် ပေါ်ပေါက်လာခဲ့သည်။

၎င်းကုမ္ပဏီနှစ်ခုသည် စေ့စပ်ညှိနှိုင်းမှုများ ဆက်လုပ်ဆောင်နိုင်ရေးအတွက် ဆုံးဖြတ်ရန် စီစဉ်ထားကြောင်း သိရှိရသည်။

ကိုးကား-NHK World

ဥရောပသမဂ္ဂ (EU) သည် တရုတ်နိုင်ငံနှင့် အခြားနေရာများ၌ အခြေစိုက်သည့် အွန်လိုင်းမှ လက်လီရောင်းချသူများမှတစ်ဆင့် တင်သွင်းသော တန်ဖိုးနည်းပစ္စည်းများအပေါ် စည်းမျဉ်းများကို တင်းကြပ်ရန် အကောင်အထည်ဖော်မည်ဖြစ်ကြောင်း ကြေညာလိုက်ပါသည်။

ဥရောပကော်မရှင်က ဖေဖော်ဝါရီ ၅ ရက်နေ့က အဆိုပါ ကြေညာချက်ကို ထုတ်ပြန်ခဲ့ခြင်းဖြစ်ပြီး ထုတ်ကုန်များ၏ ဘေးကင်းမှုနှင့် တန်ဖိုးနည်းကုန်ပစ္စည်းများ အတွက် တရားမျှတသည့် ယှဉ်ပြိုင်မှုရှိရေးသေချာစေရန် လိုအပ်ကြောင်း EU က ဆိုပါသည်။

EU တွင် ယူရို ၁၅၀ (အမေရိကန်ဒေါ်လာ ၁၅၆) ထက် နည်းသည့် ပါဆယ်ပို့ဆောင်မှုများအတွက် အခွန် ကင်းလွတ်သည့်စနစ်ရှိပါသည်။

၂၀၂၄ ခုနှစ်အတွင်း၌ EU သို့ အွန်လိုင်းမှာယူမှုမှတစ်ဆင့် ၄.၆ ဘီလီယံ တန်ဖိုးရှိသော ပစ္စည်းများ တင်သွင်းခဲ့ကြောင်း ကော်မရှင်က ဆိုပါသည်။ အဆိုပါ တင်သွင်းမှုများအနက်မှ ၉၁ % သည် Temu နှင့် Shein ကဲ့သို့ အွန်လိုင်းမှရောင်းချသည့် Website များမှတစ်ဆင့် တရုတ်နိုင်ငံမှတင်သွင်းလာခြင်းဖြစ်သည်ဟု ကော်မရှင်က ဆိုပါသည်။

ဆောင်ရွက်မည့် စီမံချက်များတွင် ယူရို ၁၅၀ အောက် ပါဆယ်များအတွက် အခွန်ကင်းလွတ်ခွင့်ကို ဖယ်ရှားခြင်းနှင့် Online marketing website များကို စီမံခန့်ခွဲ နေသူများအနေဖြင့် ၎င်းတို့၏ကုန်ပစ္စည်းများ EU ကို မရောက်မီ ကုန်ပစ္စည်းဆိုင်ရာအချက်အလက်များအား အကောက်ခွန်အာဏာပိုင်များထံ ပေးရမည်ဟူသော အချက်များ ပါဝင်ကြောင်းသိရှိရသည်။

ကိုးကား-NHK World

၂၀၂၅ ခုနှစ်၊ ဖေဖော်ဝါရီ ၁ ရက်တွင် အမေရိကန်သမ္မတဒေါ်နယ်ထရမ့်သည် ကနေဒါနှင့် မက္ကဆီကိုတို့မှ သွင်းကုန်များအပေါ် ၂၅ ရာခိုင်နှုန်း အခွန်များချမှတ်မည်ဖြစ်ကြောင်း ကြေညာခဲ့ပြီး ယင်းအခွန်ကောက်ခံမှုကို ဖေဖော်ဝါရီ ၄ ရက်တွင် အတည်ပြုမည်ဟု ကြေညာခဲ့ပါသည်။ ထိုကြေညာချက်အပေါ် ကနေဒါနှင့်မက္ကဆီကိုတို့မှ ပြန်လည်အကြောင်း တုံ့ပြန်ခဲ့ကြပြီး  အခြေအနေများ ပိုမိုတင်းမာလာသည်။

သို့ရာတွင် ၂၄ နာရီအတွင်းတွင် ကနေဒါနှင့်မက္ကဆီကိုတို့မှ အခွန်များကောက်ခံမည့် ကိစ္စကို ၃၀ ရက်ကြာ ရပ်ဆိုင်းရန် သဘောတူညီမှုများရရှိခဲ့သည်။ ကနေဒါက fentanyl ဆေးဝါး၏ တင်သွင်းမှုကို တားဆီးရန် အထူးတာဝန်ခံတစ်ဦး ခန့်အပ်၍  နယ်စပ်လုံခြုံရေးကို တိုးမြှင့်မည်ဟု ကတိပြုခဲ့သည်။  အခြားတစ်ဖက်တွင်  မက္ကဆီကိုက  မက္ကဆီကို-အမေရိကန် နယ်စပ်သို့ အမျိုးသားလုံခြုံရေးတပ်ဖွဲ့ဝင် ၁၀,၀၀၀ ဦး ချထား၍ မူးယစ်ဆေးဝါးနှင့် တရားမဝင် ဝင်ရောက်မှုများကို တားဆီးမည်ဟု သဘောတူခဲ့သည်။ သို့သော် အချို့သော လေ့လာသုံးသပ်သူများက ယင်းကတိများသည် အစဉ်အလာအရ ဆောင်ရွက်နေသော အစီအစဉ်များဖြစ်ကြောင်း၊ ယခုကဲ့သို့ အခွန်များချမှတ်ခြင်းမရှိဘဲ ဆွေးနွေးနိုင်သော အရာများဖြစ်ကြောင်း ဆိုကြသည်။

သမ္မတဒေါ်နယ်ထရမ့်၏ အခွန်များချမှတ်ခြင်းနှင့် ပြန်လည်ရပ်ဆိုင်းခြင်းကဲ့သို့သော လုပ်ဆောင်ချက်များသည် ကုန်သွယ်မှုမိတ်ဖက်များအကြား အပြန်အလှန် ယုံကြည်မှုကို ထိခိုက်စေပြီး စီးပွားရေးအတက်အကျများ ဖြစ်ပေါ်စေနိုင်ကြောင်း ကျွမ်းကျင်သူများက သုံးသပ်ဝေဖန်ထားကြသည်။ 

အချုပ်ဆိုရသော် အခွန်များချမှတ်ခြင်းနှင့် ရပ်ဆိုင်းခြင်းတို့က အမေရိကန်နှင့် ကနေဒါ၊ မက္ကဆီကိုတို့နှင့် ရှိရင်းစွဲ ကုန်သွယ်မှုဆက်ဆံရေးများတွင် ယုံကြည်မှုကင်းမဲ့စေပြီး အတက်အကျများ ဖြစ်ပေါ်စေကာ စီးပွားရေးအကျိုးဆက်များအပေါ် စိုးရိမ်မှုများ ဖြစ်ပေါ်လာစေပါသည်။

ကိုးကား-AL JAZEERA

အမေရိကန်ပြည်ထောင်စုမှ တင်သွင်းလာသည့် ကျောက်မီးသွေးနှင့် ဓာတ်ငွေ့ရည်တို့အပေါ် တရုတ်နိုင်ငံက အခွန် ၁၅ ရာခိုင်နှုန်း တိုးမြှင့်ကောက်ခံမည်ဟု ဖေဖော်ဝါရီ လ ၄ ရက်တွင် ကြေညာလိုက်ကြောင်း သိရသည်။

တရုတ်နိုင်ငံ၏ အဆိုပါတုံ့ပြန်မှုသည် အမေရိကန်အစိုးရက တရုတ်နိုင်ငံမှ တင်သွင်းလာသည့် သွင်းကုန်အားလုံးအပေါ် အခွန် ၁၀ ရာခိုင်နှုန်း တိုးမြှင့်ကောက်ခံမှု စတင်အသက်ဝင်လာပြီးနောက် ထွက်ပေါ်လာခြင်းဖြစ်သည်။ ထို့ပြင် တရုတ်နိုင်ငံအနေဖြင့် အမေရိကန်မှ တင်သွင်းလာသည့် ရေနံစိမ်း၊ စိုက်ပျိုးရေးသုံး စက်ကိရိယာများနှင့် မော်တော်ယာဉ်များအပေါ် အခွန် ၁၀ ရာခိုင်နှုန်း တိုးမြှင့်ကောက်ခံမည်ဖြစ်သည်။

အလားတူပင် တရုတ်အစိုးရသည် နိုင်ငံ၏လုံခြုံရေးနှင့် အကျိုးစီးပွားကို ကာကွယ်ရန်အတွက် တန်စတင်၊   တယ်လူရီယံ၊ ဘစ်မက်၊ မိုလစ်ဒီနမ်နှင့် အင်ဒီယံ စသည့် ဓာတုဒြပ်စင်များ ပါဝင်သည့်  ပို့ကုန်များအတွက် လိုင်စင်စနစ်ကိုလည်း စတင်ခဲ့သည်။ အဆိုပါဒြပ်စင်များသည် အဆင့်မြင့်ကုန်ထုတ်လုပ်မှုတွင် မရှိမဖြစ်လိုအပ်သည့် အရာများဖြစ်ကြောင်း သိရသည်။

ထရမ့်ဦးဆောင်သည့် အမေရိကန်အစိုးရသည် တရုတ်နိုင်ငံမှ တင်သွင်းလာသည့် သွင်းကုန်များအပေါ် အခွန် ၁၀ ရာခိုင်နှုန်း ကောက်ခံရန်  ပြီးခဲ့သည့် ရက်သတ္တပတ် အတွင်းက ဆုံးဖြတ်ခဲ့ခြင်း ဖြစ်သည်။

Source: Myawady Web Portal

ပနားမားသည် တရုတ်နိုင်ငံ၏ Belt and Road Initiative (BRI) စီမံကိန်းတွင် ဆက်လက်ပါဝင်မည်မဟုတ်ကြောင်း သမ္မတ José Raúl Mulino က အမေရိကန် နိုင်ငံခြားရေးဝန်ကြီး Marce Rubio နှင့် တွေ့ဆုံပြီးနောက် ပြောကြားခဲ့ပါသည်။ အဆိုပါ ဆုံးဖြတ်ချက်များကြောင့် ပနားမားသည် လက်တင်အမေရိကတွင် BRI မှ ထွက်ခွာသည့် ပထမဆုံးနိုင်ငံဖြစ်လာခဲ့ကြောင်း The Economic Time သတင်းဌာနတွင် ဖော်ပြခဲ့သည်။

ပနားမားနှင့် တရုတ်နိုင်ငံတို့အကြား ယခင်အစိုးရလက်ထက်က ပနားမားတွင် တရုတ်နိုင်ငံ၏ ရင်းနှီးမြှုပ်နှံမှုများ တိုးချဲ့နိုင်ခဲ့သည့် တရုတ်၏ Belt and Road စီမံကိန်းကို ပံ့ပိုးကူညီရန် သဘောတူညီမှုများကို ကျယ်ပြန့်စွာလုပ်ဆောင်ခဲ့သော်လည်း အဆိုပါသဘောတူညီချက်ကို သက်တမ်းတိုးမည်မဟုတ်ကြောင်း ပနားမားသမ္မတ Muine က ပြောကြားခဲ့ပါသည်။

Mutino သည် သဘောတူညီချက်ကို လာမည့် တစ်နှစ်၊ နှစ်နှစ်အတွင်း ပြန်လည်သက်တမ်း တိုးရန် စီစဉ်ထားသော်လည်း ၎င်း၏အစိုးရသည် ပိုမိုစောစီးစွာရပ်စဲဖျက်သိမ်းနိုင်ရေး ဆောင်ရွက်သွားမည်" ဟုလည်း ၎င်းကပြောကြားခဲ့ပါသည်။ ပနားမားသည် အဆိုပါ အစီအစဉ်ကို ၂၀၁၇ ခုနှစ် ယခင်အစိုးရလက်ထက်ကတည်းက ပါဝင်ခဲ့ခြင်းဖြစ်ကြောင်း ပြောကြားခဲ့ပါသည်။

“လက်ရှိအချိန်တွင် ကြားနေရေးသဘောတူစာချုပ်၏ တရားဝင်မှုနှင့် စာချုပ်ချုပ်ဆိုရန် စစ်အင်အားအသုံးပြုမှုသည် အမှန်တကယ်ခြိမ်းခြောက်မှုတစ်စုံတစ်ရာရှိလာသည်" ဟု မယူဆပါကြောင်း ပြောကြားခဲ့ပြီး Trump နှင့် မျက်နှာချင်းဆိုင် တွေ့ဆုံဆွေးနွေးနိုင်ရေးက အရေးကြီးကြောင်း ထပ်လောင်းပြောကြားခဲ့သည်။

၂၀၁၃ ခုနှစ်တွင် တရုတ်နိုင်ငံမှစတင်ခဲ့သော Belt and Road Initiative (BRI) သည် ကမ္ဘာတစ်ဝှမ်းရှိနိုင်ငံများတွင် အခြေခံအဆောက်အအုံစီမံကိန်းများကို ငွေကြေးထောက်ပံ့ ခြင်းဖြင့် တရုတ်၏ ကမ္ဘာ့စီးပွားရေးဩဇာလွှမ်းမိုးမှုကို တိုးချဲ့ရန် အဓိကယန္တရားတစ်ခုအဖြစ် ဆောင်ရွက်ခဲ့သည်။ ပနားမားနိုင်ငံသည် ၂၀၁၇ ခုနှစ်က သမ္မတဟောင်း Juan Carlos Varela ၏ အုပ်ချုပ်မှုကာလအတွင်း BRI သို့ပါဝင်ခဲ့ပြီး တရုတ်နိုင်ငံ၏ အခြေခံအဆောက်အအုံများတွင် ရင်းနှီးမြှုပ်နှံမှုများ တိုးမြင့်လာခဲ့ပါသည်။

ကိုးကား- The Economic Time သတင်းဌာန