လေကြောင်းစက်မှုလုပ်ငန်းမှာ ပထမဆုံးသော အောင်မြင်မှုတစ်ခုအဖြစ် အလိုအလျောက်ထွက်ခွာစနစ်ကို Embraer က ထုတ်ဖော်မိတ်ဆက်လိုက်ပါတယ်။ ဒီစနစ်ဟာ ခရီးသည်တင်လေယာဉ်များအတွက် ကမ္ဘာ့ပထမဆုံးသော အလိုအလျောက် ထွက်ခွာစနစ်လည်း ဖြစ်ပါတယ်။

Embraer ကုမ္ပဏီက သူတို့ရဲ့ E2 အမျိုးအစား ခရီးသည်တင်လေယာဉ်အတွက် အထောက်အပံ့ဖြစ်စေနိုင်ဖို့ အဆင့်မြင့် ထွက်ခွာစနစ်ကို   မိတ်ဆက်လိုက်တာ ဖြစ်ပါတယ်။

ဒီစနစ်ကိုအသုံးပြုခြင်းအားဖြင့် ခရီးသည်တင်လေယာဉ်ရဲ့ စွမ်းအင်အသုံးပြု မှုကို ပိုမိုတိုးတက်စေနိုင်ပါတယ်။ အဲဒီကနေမှတစ်ဆင့် ခရီးသည်တင်လေယာဉ်ရဲ့ ပျံသန်းနိုင်တဲ့ အကွာအဝေးကို တိုးမြှင့်နိုင်မှာဖြစ်သလို လေယာဉ်ရဲ့ကုန်စည်သယ် ဆောင်နိုင်မယ့်ပမာဏကိုလည်း မြင့်မားစေနိုင်မှာပါ။

ဒါ့အပြင် အခုဒီဇိုင်းက ခရီးသည်တင် လေယာဉ်ရဲ့လှည့်ပတ်မှုနဲ့ လမ်းကြောင်းပေါ်ရောက်ရှိမှုကို မြန်ဆန်စေတဲ့အတွက် ပြေးလမ်းလိုအပ်ချက်ကိုလည်း  လျှော့ချပေးနိုင်မှာဖြစ်ပါတယ်။

ဒီလိုမျိုးအတွက် တစ်ခုတည်းသော လိုအပ်ချက်က လေယာဉ်ရဲ့အစိတ်အပိုင်းများမှလွဲပြီး ဆော့ဝဲတစ်ခုတည်းကိုသာ အဆင့်မြှင့်တင်ရမှာပါ။     

 Source: Myawady Webportal

 အီရန် Supreme Cyberspace Council သည် Whats App messenger နှင့် Google Play app များ ပိတ်ပင် ထားရှိမှုကို ရုတ်သိမ်းရန် မဲခွဲဆုံးဖြတ်ခဲ့ကြောင်း နိုင်ငံပိုင် မီဒီယာက ဖော်ပြခဲ့သည်။

Supreme Cyberspace Council သည် WhatsApp နှင့် Google Play အပါအဝင် နိုင်ငံခြားပိုင် အပလီကေးရှင်း အချို့အပေါ် ကန့်သတ်ချက်များကို ရုတ်သိမ်းရန် ဒီဇင်ဘာ ၂၄ ရက်က ပြုလုပ်သည့် အစည်းအဝေးတစ်ခု အတွင်း ဆုံးဖြတ်ခဲ့ကြောင်း နိုင်ငံပိုင်သတင်းအေဂျင်စီ IRNA က ထုတ်ပြန်ခဲ့သည်။

ပြင်းထန်စွာဖိနှိပ်ခံခဲ့ရသော အမျိုးသမီး၊ ဘဝ၊ လွတ်လပ်သော ဆန္ဒပြပွဲများအပြီး ၂၀၂၂ ခုနှစ်တွင် အဆိုပါ Applications နှစ်ခုကို ကန့်သတ်ခဲ့သည်။

Supreme Cyberspace Council အစီအစဉ်၏ ပထမအဆင့်တွင် ပြည်တွင်းပလက်ဖောင်းများ အတွက် အခြေခံအဆောက်အအုံတည်ဆောက်ခြင်း ပါ၀င်မည် ဟု စာတမ်းတွင်ဖော်ပြထားသည်။

Whats App နှင့် Google Play တို့ကို ကောင်စီမှ ကန့်သတ်ထားမှုမှ ဖယ်ရှားခဲ့သော်လည်း၊ Facebook၊ X၊ Telegram နှင့် YouTube အပါအဝင် အခြားသော နာမည်ကြီး ဆိုရှယ်မီဒီယာ ပလက်ဖောင်းများကို အီရန် တွင် အသုံးမပြုရန် ကန့်သတ်ထားဆဲဖြစ်သည်။

 “ကန့်သတ်ချုပ်ချယ်မှုတွေက လူတွေရဲ့ဘဝကို ဒေါသနဲ့ ကုန်ကျစရိတ်တွေ ထပ်တိုးလာရုံကလွဲလို့ ဘာမှ မအောင်မြင်ခဲ့ဘူး” ဟု လူမှုရေးနှင့် နိုင်ငံရေးတက်ကြွ လှုပ်ရှားသူ Ali Rabiei က ဒီဇင်ဘာ ၂၄ ရက်က X တွင် ပြောကြားခဲ့သည်။

ဒုတိယသမ္မတ Mohammad Javad Zarif က သမ္မတ Masud Pezeshkian သည် ကန့်သတ်ချက်များကို ဖယ်ရှားပေးမည်ဟု ယုံကြည်ပြီး တားမြစ်ချက်များသည် ပြည်သူနှင့် နိုင်ငံအတွက် အကျိုးရှိမည်ဟု မယူဆကြောင်း ပြောကြားခဲ့သည်။

“ဒီပြဿနာဟာ နိုင်ငံရဲ့ လုံခြုံရေးအတွက် အကျိုးမရှိဘူးလို့ ကျွမ်းကျင်သူအားလုံးက ယုံကြည်ပါတယ်” ဟု Zarif က ဒီဇင်ဘာ ၂၄ ရက်တွင် ပြောကြားခဲ့သည်။ အခြား သူများကမူ ကန့်သတ်ချက်များကို ရုတ်သိမ်းရန် သတိ ပေးခဲ့သည်။

ဥပဒေပြုအမတ်များသည် အစ္စလာမ် လူ့အဖွဲ့အစည်း၏ တန်ဖိုးများကိုအလေးထားပြီး အီရန်၏ ဥပဒေများကို လိုက်နာသူများကိုသာ ကန့်သတ်ထားသော အွန်လိုင်း ပလက်ဖောင်းများသို့ ဝင်ရောက်ခွင့်ပေးသင့်ကြောင်း တောင်းဆိုခဲ့သည်။

ကိုးကား - Radio Free Europe

အိန္ဒိယဝန်ကြီးချုပ်ဟောင်း မန်မိုဟန်ဆင်းသည် အသက် ၉၂ နှစ်အရွယ်တွင် ကွယ်လွန်သွားကြောင်း ဒေသတွင်းသတင်းမီဒီယာများကဖော်ပြခဲ့ကြပါသည်။ မန်မိုဟန်ဆင်းသည် အိန္ဒိယ၏ သက်တမ်းအရှည်ဆုံးဝန်ကြီးချုပ်များအနက်မှ တစ်ဦးဖြစ်ခဲ့ပြီး လက်ရှိအိန္ဒိယ၏ဝန်ကြီးချုပ် နာရိန္ဒရာမိုဒီက အိန္ဒိယသည်၎င်းတို့၏ "အထင်ရှားဆုံးခေါင်းဆောင်တစ်ဦး"ကို ဆုံးရှုံးခဲ့သည့်အတွက် ဝမ်းနည်းကြောင်း ပြောကြားခဲ့ပါသည်။

ကိုးကား - Sputnik

Photo- CNN

အိန္ဒိယ ဝန်ကြီးချုပ်ဟောင်း မန်မိုဟန်ဆင်း အကြောင်း ဖတ်ရှုရန်

https://sacministry.gov.mm/my/subjects/1269

လေကြောင်းနည်းပညာမှာ သန့်ရှင်းစွမ်းအင်ကို အသုံးပြုမှုက တဖြည်းဖြည်းနဲ့မြင့်မားလာတာနဲ့အမျှ    လေကြောင်း ကုမ္ပဏီတွေကလည်း ပြန်လည်ပြည့်ဖြိုးမြဲ စွမ်းအင်တွေကို   တိုးမြှင့်အသုံးပြုလာနိုင်ဖို့ကြိုးစားလာကြပါတယ်။

ဒီအချိန်မှာ ဂျိုဘီလေကြောင်းကုမ္ပဏီက ဟိုက်ဒရိုဂျင်နဲ့ လျှပ်စစ်စွမ်းအင်အသုံးပြုတဲ့ ဝေဟင်တက္ကစီတစ်မျိုးကို ထုတ်ဖော်မိတ်ဆက်ထားတာရှိပါတယ်။ သူ့ရဲ့ အောင်မြင်မှုကလည်း တကယ့်ကိုအံ့မခန်းပါပဲ။

သူတို့ကုမ္ပဏီရဲ့လက်တွေ့စမ်းသပ်မှုတစ်ခုမှာ  အဲဒီဝေဟင်တက္ကစီက မရပ်မနားပျံသန်းမှုကို အောင်မြင်စွာလုပ်နိုင်တယ်လို့ဆိုပါတယ်။   အဲဒီလိုစမ်းသပ်ပျံသန်းမှုမှာ ဝေဟင်တက္ကစီက မိုင်ပေါင်း ၅၂၃ မိုင်အထိ အောင်မြင်စွာပျံသန်းလိုက်နိုင်တာကိုတွေ့ရပါတယ်။

ဒီလိုပျံသန်းစဉ်မှာလည်း      ဝေဟင်တက္ကစီကနေ ထုတ်ပေးလိုက်တဲ့အရာက ရေသာဖြစ်တာကြောင့်   ပတ်ဝန်းကျင်ကို လွန်စွာအကျိုးဖြစ်ထွန်းစေပါတယ်။

သမားရိုးကျအားဖြင့် လောင်စာဆီကိုသာအသုံးပြုနေရတဲ့ လေယာဉ်တွေမှာ ဟိုက်ဒရိုဂျင်စွမ်းအင်သုံးနည်းပညာကို ပြောင်းလဲအသုံးပြုခြင်းအားဖြင့် သဘာဝ ပတ်ဝန်းကျင်နဲ့လည်း လိုက်လျောညီထွေမှုရှိစေနိုင်တဲ့အတွက်   နိုင်ငံဖြတ်ကျော်လေယာဉ်ကြီးများအထိ အသုံးပြုလာနိုင်မှာဖြစ်ပါတယ်။

Source: Myawady Web Portal

Koenigsegg ဆိုတဲ့ မော်တော်ကား ထုတ်လုပ်ရေးကုမ္ပဏီက သူတို့ရဲ့နောက်ဆုံးထုတ် ပြိုင်ကားအမျိုးအစားနဲ့အတူ ကမ္ဘာ့စံချိန်အသစ်ကို တင်လိုက်နိုင်တာ တွေ့ရပါတယ်။

အဲဒီပြိုင်ကားအမျိုးအစားက Jesko Absolut ပါ။ ဒီပြိုင်ကားက အရှိန်နှုန်း သုည ကနေ မိုင် ၂၅၀ အထိကို ၁၉ ဒသမ ၂ စက္ကန့် အတွင်း  အရှိန်တင်နိုင်တာဖြစ်ပါတယ်။

သုညကနေ မိုင် ၂၅၀၊ မိုင် ၂၅၀ ကနေ သုည အထိ အရှိန်တင်၊ အရှိန်လျှော့ခြင်းကို ၂၈ ဒသမ ၂၇ စက္ကန့်အတွင်း လုပ်ဆောင်နိုင်တာပါ။

ဒီနှုန်းထားဟာ Regera ကားကတင်ထားတဲ့စံချိန်ထက် ၁ ဒသမ ၃၃ စက္ကန့် ပိုမြန်နေတာကိုတွေ့ရပါတယ်။ ဒါ့အပြင် Jesko Absolut ဟာ တစ်နာရီ မိုင် ၄၀၀ အထိကို အရှိန်တင်၊ အရှိန်လျှော့ခြင်းမှာလည်း ၂၇ ဒသမ ၈၃ စက္ကန့်သာ ရှိတယ်လို့ သိရပါတယ်။      

Source: Myawady Web Portal 

ဇူးရစ်   ဒီဇင်ဘာ ၂၄

ဆွစ်နိုင်ငံတကာလေကြောင်းလိုင်းမှ ခရီးသည်တင်လေယာဉ်တစ်စင်းသည် ရိုမေးနီးယားနိုင်ငံ ဘူခါရက်စ်မြို့မှ ဆွစ်ဇာလန်နိုင်ငံ ဇူးရစ်မြို့သို့ ပျံသန်းနေစဉ် ဩစတြီးယားနိုင်ငံ ဂရက်ဇ်မြို့လေဆိပ်၌ ယနေ့တွင် အရေးပေါ်ဆင်းသက်ခဲ့ရကြောင်း သိရသည်။

ပျံသန်းနေစဉ် အင်ဂျင်ပြဿနာတစ်ရပ်ပေါ်ထွက်လာပြီး လေယာဉ်မောင်းခန်း၌ မီးခိုးများအူလာမှုကြောင့် ယင်းလေယာဉ်အနေဖြင့် ဂရက်ဇ်မြို့လေဆိပ်တွင် အရေးပေါ်ဆင်းသက်ခဲ့ရခြင်းဖြစ်ကြောင်း ဆွစ်နိုင်ငံတကာလေကြောင်းလိုင်းက သတင်းထုတ်ပြန်ထားသည်။

အဲဘတ်စ်အေ ၂၂၀-၃၀၀ အမျိုးအစား အဆိုပါခရီးသည်တင်လေယာဉ်ပေါ်တွင် ခရီးသည် ၇၄၁ ဦးလိုက်ပါလာကြောင်း သိရသည်။

အရေးပေါ် ဆင်းသက်စဉ်အတွင်း လိုက်ပါလာသည့် ခရီးသည်များအနက် ၁၂ ဦးမှာ ဒဏ်ရာများရခဲ့ကြောင်း သိရသည်။

သို့ရာတွင် လေယာဉ်အရေးပေါ်ဆင်းသက်ခဲ့ရပြီးနောက် ခရီးသည်အားလုံးကို ဘေးကင်းရာသို့ ကယ်ထုတ်ပေးနိုင်ခဲ့ကြောင်း ဆွစ်နိုင်ငံတကာ လေကြောင်းလိုင်းတာဝန်ရှိသူများက ပြောကြားခဲ့သည်။

လက်ရှိအချိန်တွင် အဆိုပါ ခရီးသည်တင်လေယာဉ် ရင်ဆိုင်ခဲ့ရသော အင်ဂျင်ပြဿနာကို လေကြောင်းလိုင်းတာဝန်ရှိသူများက စုံစမ်းစစ်ဆေးလျက်ရှိကြောင်း သိရသည်။

Source: ရတနာပုံသတင်းစာ

အာဖရိကအရှေ့ပိုင်းနိုင်ငံဖြစ်သည့် မိုဇမ်ဘစ်နိုင်ငံတွင် ပြီးခဲ့သည့်သီတင်းပတ်က တိုက်ခတ်ခဲ့သော ဆိုင်ကလုန်း မုန်တိုင်း ချီဒို ကြောင့် လူပေါင်း ၉၄ ဦးသေဆုံးသွားရပြီး ၇၆၈ ဦး ဒဏ်ရာရရှိကာ လူပေါင်း ၆၂၂,၀၀၀ ကျော် မုန်တိုင်းဒဏ် ထိခိုက်ခံစားခဲ့ရကြောင်း  မိုဇမ်ဘစ်နိုင်ငံ၊ အမျိုးသားဘေးအန္တရာယ်စီမံခန့်ခွဲမှုအဖွဲ့က ထုတ်ပြန် ထားပါသည်။ 

ဆိုင်ကလုန်းမုန်တိုင်း ချီဒိုသည် ပြီးခဲ့သည့် ဒီဇင်ဘာလ ၁၅ ရက်က မိုဇမ်ဘစ်နိုင်ငံကို တစ်နာရီ လေတိုက်နှုန်း ၂၆၀ ကီလိုမီတာ (၁၆၀ မိုင်) ဖြင့် ဖြတ်သန်း ဝင်ရောက် ခဲ့ပြီး ပထမရက် (၂၄) နာရီအတွင်း မိုးရေချိန် ၂၅၀ မီလီမီတာအထိ ရွာသွန်းခဲ့သောကြောင့် နိုင်ငံအတွင်း မြေပြိုမှုများ အဆက်မပြတ်ဖြစ်ပွားခဲ့သည်။ 

ဆိုင်ကလုန်း ချီဒိုသည် မိုဇမ်ဘစ်၊ မာလာဝီနှင့် ဇင်ဘာဘွေနိုင်ငံများအတွင်းသို့ ဖြတ်သန်းဝင်ရောက်ခြင်းမပြုမီ ပြင်သစ်အိန္ဒိယသမုဒ္ဒရာအတွင်းရှိ Mayotte နယ်မြေကို ဝင်‌ရောက်တိုက်ခတ်ခဲ့ခြင်း‌ကြောင့် ဆိုးဆိုးရွားရွား ထိခိုက်ပျက်စီးမှုများ ရှိခဲ့သည်။ 

ကိုးကား -BBC/ Malu Cursino

ပြီးခဲ့သည့်လက ကျောင်းသားတစ်ဦး ဓားထိုးအသတ်ခံရပြီးနောက် ကလေးများအပေါ် လူမှုမီဒီယာ လွှမ်းမိုးလာခြင်းနှင့်ပတ်သက်၍ ကြောက်ရွံ့မှုမြင့်တက်လာသည့်အတွက် Tik Tok ကို တစ်နှစ်ပိတ်ပင်ရန် ရည်ရွယ်ထားကြောင်း အယ်လ်ဘေးနီးယားဝန်ကြီးချုပ် Edi Rama က ဒီဇင်ဘာ ၂၁ ရက်နေ့က ကြေညာလိုက်ပါသည်။ 

အယ်လ်ဘေးနီးယားအစိုးရ၏ Tik Tok ကို ပိတ်ပင်တားမြစ်ရန် အဆိုပြုချက်နှင့်စပ်လျဉ်း၍ အရေးတကြီး ရှင်းလင်းချက်များ လိုက်လံတောင်းခံနေကြောင်း Tik Tok က ဆိုထားပါသည်။ ဒီဇင်ဘာ ၂၁ ရက်နေ့က ထုတ်ပြန်သည့် ထို Tik Tok ပိတ်ပင်ရန်ကိစ္စကို လာမည့်ဇန်နဝါရီတွင် စတင်မည်ဖြစ်ကြောင်း ဝန်ကြီးချုပ်က ပြောကြားထားပါသည်။ 

Tik Tok တားမြစ်ပိတ်ပင်ရန်ဖြစ်ပေါ် လာရသည့် အကြောင်းအရင်းမှာ ပြီးခဲ့သည့်လက လူမှုမီဒီယာပေါ်တွင် ကျောင်းသားအချင်းချင်း ရန်စောင်ကြရင်း အယ်လ် ဘေးနီးယားနိုင်ငံ၊ တီရန်နာမြို့တောင်ပိုင်းရှိစာသင်ကျောင်းအနီးတွင် အသက် ၁၄ နှစ်အရွယ်ကျောင်းသားတစ်ဦး ဓါးဖြင့်ထိုးသတ်ခံရပြီး အခြားသူများ ဒဏ်ရာရရှိသွားသည့်တိုက်ခိုက်မှုဖြစ်စဉ်က စတင်ခဲ့ခြင်းဖြစ်ကြောင်း သိရပါသည်။ 

ကိုးကား - BBC/Thomas Mackintosh

ရုရှားပို့ဆောင်ရေးဝန်ကြီးဌာနသည် ဘရာဇီး၊ မလေးရှား နှင့်ပါကစ္စတန်နိုင်ငံများသို့ တိုက်ရိုက်လေကြောင်း ပျံသန်းမှု စတင်ရန် ညှိနှိုင်းမှုများ ပြုလုပ်နေကြောင်း ရုရှားပို့ဆောင်ရေးဝန်ကြီးဝန်ကြီး Roman Starovoyt က TASS နှင့် အင်တာဗျူးတွင် ပြောကြားသွားပါသည်။

“မလေးရှားနှင့် ဘရာဇီးကို လေကြောင်းလိုင်းပြေးဆွဲရန် စဉ်းစားနေကြောင်း၊ ပါကစ္စတန်နှင့်လည်း မကြာခင် ကပဲ ဆက်သွယ်ထားကြောင်း၊ ယခုကိစ္စအတွက် အဆက်မပြတ်တွေ့ဆုံဆွေးနွေးမှုများ ပြုလုပ်နေကြောင်း၊ ယခုညှိနှိုင်းမှုမှာ ခရီးသွားလုပ်ငန်းက ကိုယ်စားလှယ် များလည်း ပါဝင်ရန် လိုကြောင်း၊ ရုရှားသည် မိတ်ဖက် နိုင်ငံများ၏ လေကြောင်းလိုင်းများနှင့် ဆွေးနွေးညှိနှိုင်းမှု များပြုလုပ်နေကြောင်း၊ မိမိတို့လေကြောင်းကွန်ရက်မှာ အဆက်မပြတ် ပြောင်းလဲနေကြောင်း၊ နိုင်ငံတကာ စည်းမျဉ်းများနှင့်အညီ တန်းတူညီမျှမှု၊ အပြန်အလှန် လေးစားလိုက်နာမှုတို့အပေါ် အခြေခံ၍ လုပ်ဆောင် သွားရန် အသင့်ဖြစ်နေပြီ ဖြစ်ကြောင်း”  ဝန်ကြီးက ပြောကြားထားပါသည်။ 

ကိုးကား- Donat Sorokin/TASS                                                                                                                                                                 

အမေရိကန်သမ္မတအဖြစ် ကျမ်းသစ္စာ ကျိန်ဆိုတော့မည့် ဒေါ်နယ်ထရမ့်သည် အမေရိကန်နိုင်ငံ၏ အမျိုးသားအကျိုးစီးပွားနှင့် လွတ်လပ်စွာ သွားလာနိုင်ရေးတို့အတွက် ဂရင်းလန်းကျွန်းကို ဝယ်ယူရန် လိုအပ်သည်ဟု ခံစားနေရကြောင်း ပြောလာသည်ဟု သိရသည်။

ထရမ့်က ၂၀၁၉ ခုနှစ်တွင်လည်း အလားတူစကားမျိုးကို ပြောခဲ့ဖူးသောကြောင့် ဂရင်းလန်းကျွန်းကို ဝယ်ယူမည်ဟူသော ယခုပြောဆိုမှုသည် ဒုတိယအကြိမ်ဖြစ်လာသည်။

သို့သော် ဂရင်းလန်းကျွန်းသည် ရောင်းကုန်မဟုတ်ကြောင်း၊ မည်သည့်အခါမျှ ကျွန်းကိုရောင်းချသွားမည် မဟုတ်ကြောင်းနှင့် ကာလရှည်ကြာ တိုက်ပွဲဝင်နေရသည့် လွတ်လပ်ရေးအတွက် ဆက်လက်ကြိုးပမ်းသွားမည်ဖြစ်ကြောင်း အဆိုပါကျွန်း၏ ဝန်ကြီးချုပ်က ပြောထားသည်။

ဒိန်းမတ်နိုင်ငံ၏အစိတ်အပိုင်းတစ်ခုအဖြစ် နှစ်ပေါင်း ၆၀၀ ကျော်ကြာတည်ရှိနေခဲ့သည့် ကမ္ဘာ့အကြီးဆုံးကျွန်းဖြစ်သောဂရင်းလန်းကျွန်းသည် အာတိတ်ဒေသနှင့် မြောက်အတ္တလန္တိတ်ဒေသတို့ကြား အလွန်အရေးပါသည့် မဟာဗျူဟာမြောက်နေရာ တစ်ခုဖြစ်လာသည့်အပြင် အမေရိကန်ပြည်ထောင်စု၏ အမျိုးသားကာကွယ်ရေးမဟာဗျူဟာအတွက် အချက်အချာကျသော နေရာတစ်ခုဖြစ်လာကြောင်း သိရသည်။ 

Source: Myawady Webportal