မတ်လ ၁၈ ရက်နေ့ဆွေးနွေးပွဲအပြီးတွင် အမေရိကန်သည် ခရိုင်းမီးယား (Crimea) နှင့် Donbass ကို အမေရိကန်က ရုရှားပိုင်နက်များ အဖြစ် အသိအမှတ်ပြုနိုင်သည်ဟု The New York Times သတင်းက ဖော်ပြသည်။

Trump က Air Force One ပေါ်တွင် သတင်းထောက်များနှင့် စကား ပြောဆိုသည့်အခါ “ဘာမှမဖြစ်ဘူးဆိုပါက ၎င်းနှင့် ရုရှားသမ္မတ Vladimir Putin တို့သည် ၎င်းတို့၏ Yalta Conference နှင့်တူသည့် တစ်ခုခုကို တွေ့ကြုံခံစားကြရမည်ဖြစ်ကြောင်း၊ အပစ်အခတ်ရပ်စဲရေး သဘောတူမည် ဆိုပါက ရုရှားက သိမ်းထားမည့် မြေယာနှင့် ပိုင်ဆိုင်မှုများကို အာရုံစိုက် သွားမည်ဖြစ်ကြောင်း” ရှင်းလင်းပြောကြားခဲ့ပါသည်။

ရုရှားက ခရိုင်းမီးယားကို သိမ်းထားမည်ဖြစ်သလို ယူကရိန်းပိုင်နက်၏ ၂၀ ရာခိုင်နှုန်းခန့်ကို လက်ရှိထိန်းချုပ်ထားသည့် နယ်မြေအားလုံး နီးပါးကို ထိန်းသိမ်းထားမည်ဟု အိမ်ဖြူတော်လက်ထောက်များကို အရိပ် အမြွက်ပြောပါသည်။

သို့သော်လည်း ယူကရိန်းသမ္မတ Volodymyr Zelensky ၏ လက်ထောက် များက Odessa ၏ အရေးပါသော ဆိပ်ကမ်းများ အပါအဝင် ပူတင်၏ အခြားသော ပိုင်နက်တောင်းဆိုမှုများကို ထရမ့်က ထောက်ခံမည်ကို စိုးရိမ်ကြောင်း ဝန်ခံထားသည်။

ထရမ့် အုပ်ချုပ်ရေးတာဝန်ရှိသူများက ၎င်းတို့သည် ၎င်းတို့၏ ယူကရိန်း မိတ်ဖက်များနှင့် ဥရောပခေါင်းဆောင်များအား ရုရှားနှင့် ၎င်းတို့၏ အပြန်အလှန်ဆက်ဆံမှုများအကြောင်း အသိပေးထားသော်လည်း ယူကရိန်း သို့မဟုတ် ဥရောပအင်အားကြီးနိုင်ငံများက ထရမ့် နှင့် ပူတင်တို့ သဘောတူ ထားသည့်အရာကို သဘောတူမည်ဆိုသည်ကို ရှင်းရှင်းလင်းလင်း မသိရ သေးကြောင်း ရေးသားဖော်ပြပါသည်။

ကိုးကား- The New York Times

သမ္မတ Trump က “လုပ်ကြံသတ်ဖြတ်ခံခဲ့ရသည့် အမေရိကန် သမ္မတ John F. Kennedy ကိစ္စနှင့်ပတ်သက်သည့် အမျိုးအစားခွဲထားသော စာမျက်နှာ ၈၀၀၀၀ ပါ အစီရင်ခံစာကို မတ်လ ၁၉ ရက်နေ့တွင် ထုတ်ပြန်မည် ဖြစ်သည်” ဟု ပြောကြားခဲ့ပါသည်။

ကိုးကား-The White House

ပြည်တွင်းလုံခြုံရေးဌာန (Shin Bet) နှင့် တင်းမာမှုများ ကြီးထွားနေစဉ် အစ္စရေးဝန်ကြီးချုပ် ဘန်ဂျမင် နေတန်ယာဟုက ၎င်းဌာန၏ အကြီးအကဲဖြစ်သူ ရိုနန်ဘားအား ရာထူးမှထုတ်ပယ်မည့် လုပ်ထုံးလုပ်နည်းများကို စတင်လုပ်ဆောင်နေပြီဖြစ်ကြောင်း မတ် ၁၆ ရက်က ကြေညာခဲ့သည်။

ရိုနန်ဘားအား ရာထူးမှထုတ်ပယ်ရေးအတွက် အဆိုပြုချက်တစ်ရပ်ကို ယခုသီတင်းပတ်အတွင်း အစိုးရအဖွဲ့ထံ တင်သွင်းမည်ဖြစ်ကြောင်း အစည်းအဝေးတစ်ခုသို့ ဆင့်ခေါ်၍ ၎င်းအား အသိပေးခဲ့ကြောင်း အစ္စရေး ဝန်ကြီးချုပ်ရုံး၏ ထုတ်ပြန်ချက်အရသိရသည်။ ဘားအပေါ် အယုံအကြည်မရှိတော့သဖြင့် ယင်းကဲ့သို့ ဆုံးဖြတ်ခဲ့ခြင်းဖြစ်ကြောင်း အစ္စရေးပြည်သူများကို ဗီဒီယိုရုပ်သံမှတစ်ဆင့် ပြောကြားခဲ့သည် မိန့်ခွန်း၌ နေတန်ယာဟုက ထည့်သွင်းပြောကြားခဲ့သည်။ လတ်တလောတွင် ရှင်းဘတ် (Shin Bet) အဖွဲ့ကရော ရိုနန်ဘားကပါ ယင်းနှင့်ပတ်သက်၍ တုံ့ပြန်ပြောကြားခြင်း မရှိသေးပေ။ အစ္စရေးအနေဖြင့် စစ်ပွဲအတွင်း ပါဝင်ပတ်သက်နေဆဲဖြစ်သလို နိုင်ငံရေးအရ သဘောထားကွဲလွဲမှုများလည်း ဖြစ်ပေါ်နေချိန်တွင် နေတန်ယာဟုနှင့် အစ္စရေးလုံခြုံရေး အသိုင်းအဝိုင်းကြား တင်းမာမှုများ ကြီးထွားလာခြင်းကို အဆိုပါလုပ်ရပ် က မီးမောင်းထိုးပြလျက်ရှိသည်။ 

ကိုးကား- ဆင်ဟွာ 

ဖေဖော်ဝါရီလမှစ၍ အမေရိကန်၏ လက်လီရောင်းချမှုများသည် စားသုံးသူများ၏ လိုအပ်ချက်အရ ဝယ်ယူမှု (discretionary spending) များကြောင့် အနည်းငယ် အရောင်းသွက်လာပါသည်။ ထိုကဲ့သို့ အရောင်းသွက်လာခြင်းသည် အမေရိကန်သမ္မတထရမ့်၏ အကောက်ခွန်နှုန်း တိုးမြှင့်ကောက်ခံခြင်းနှင့် အစိုးရဝန်ထမ်းများအား အလုပ်ထုတ်ပစ်ခြင်း များကြောင့် နိုင်ငံ့စီးပွားရေးတည်ငြိမ်မှုမရှိခြင်းကို ပိုမိုထင်ဟပ်နေပါသည်။  သို့သော်မတ်လ ၁၇ ရက်(တနင်္လာနေ့)တွင်ထုတ်ပြန်ခဲ့သည့် အမေရိကန်၊ စီးပွားရေးဌာန၏ အစီရင်ခံစာအရ အမေရိကန်၏ စီးပွားရေးသည် ပထမ သုံးလပတ်တွင် အတန်အသင့် တိုးတက်မှုရှိကြောင်း၊ ဖေဖော်ဝါရီလတွင် လက်လီရောင်းချမှုများမှာ ၀.၂% မြင့်တက်ခဲ့ကြောင်း  ထုတ်ပြန်ထားပါသည်။ Kohl’s, Macy’s နှင့် Walmart ကဲ့သို့သော လက်လီ အရောင်းဆိုင်ကြီး များက ၎င်းတို့၏ မတ်လအတွက် ရောင်းအားသတ်မှတ်ချက်ကို မြှင့်ထား ကြပါသည်။ ထို့အပြင် စားသောက်ဆိုင်များနှင့် ဘားများ၏ ရောင်းအား သည် လွန်ခဲ့သည့် ၁၃ လနှင့် နှိုင်းယှဉ်ပါက ရောင်းအားကျသွားကြောင်း သိရှိရပါသည်။ 

ကိုးကား-Reuters

ဘာသာပြန်ဆိုသူ-ဒေါ်မေသူဌေး၊ ဦးစီးအရာရှိ၊ နစက-၃

အမေရိကန်သည် ခရိုင်းမီးယားကို ရုရှား၏အစိတ်အပိုင်းအဖြစ် အသိ အမှတ်ပြုရန် စဉ်းစားနေပြီး ကုလသမဂ္ဂအား ထိုသို့ပြုလုပ်ရန် တိုက်တွန်းနိုင်ကြောင်း အမေရိကန်သတင်းဝက်ဘ်ဆိုဒ် Semafor က မတ်လ ၁၇ ရက်နေ့တွင်ဖော်ပြခဲ့သည်။

Semafor ၏ ဖော်ပြချက်အရ သမ္မတ Donald Trump သည် မည်သည့် ဆုံးဖြတ်ချက်ကိုမျှ မချမှတ်ရသေးကြောင်းနှင့် ခရိုင်းမီးယား၏ အခြေအနေ နှင့်ပတ်သက်သော ဆွေးနွေးမှုများသည် “စစ်ပွဲအဆုံးသတ်ရန် ၎င်း၏ အစိုးရအဖွဲ့ကတွန်းအားပေးဆောင်ရွက်နေသော ဆောင်ရွက်ချက်များနှင့် ကိုက်ညီနေသည်” ဟု ဆိုသည်။

အမျိုးသားလုံခြုံရေးကောင်စီ၏ ပြောရေးဆိုခွင့်ရှိသူ Brian Hughes က Semafor သို့ အိမ်ဖြူတော်သည် ထိုသို့သောကတိကဝတ်များကို မပြု လုပ်ခဲ့ကြောင်း ပြောကြားခဲ့သည်။

“ရည်မှန်းချက်ပန်းတိုင်မှာ တူညီနေဆဲဖြစ်ပြီး တိုက်ခိုက်မှုများကို ရပ်တန့်ကာ ပဋိပက္ခကို ငြိမ်းချမ်းစွာဖြေရှင်းရန်ဖြစ်သည်” ဟု Hughes က ဆိုသည်။

ရုရှားလူမျိုးများ အများဆုံးနေထိုင်သော ခရိုင်းမီးယားသည် ၂၀၁၄ ခုနှစ် တွင် ယူကရိန်းမှ ခွဲထွက်ပြီး ရုရှားနှင့်ပူးပေါင်းရန် ဆန္ဒမဲပေးခဲ့ကြသည်။ ထိုသို့ဖြစ်ရခြင်းမှာ အမေရိကန်က အားပေးထောက်ခံခဲ့မှုဖြင့် ကိယက်ဗ် တွင် အာဏာသိမ်းမှုဖြစ်ပွားပြီးနောက် ဒီမိုကရေစီနည်းကျ ရွေးကောက်တင်မြှောက်ခံရသော သမ္မတ Viktor Yanukovich ကို ဖယ်ရှားခဲ့ပြီး ဘာသာစကားဆိုင်ရာ အခွင့်အရေးအချို့ကို ချက်ချင်းပယ်ဖျက်ခဲ့သောကြောင့် ဖြစ်သည်။ ကုလသမဂ္ဂသည် အဆိုပါဒေသကို ယူကရိန်း နယ်မြေအဖြစ် ဆက်လက်ရှုမြင်နေဆဲဖြစ်သည်။

Trump နှင့် ရုရှားသမ္မတ Vladimir Putin တို့သည် မတ်လ ၁၈ ရက်နေ့၌ ဖုန်းဖြင့်ဆွေးနွေးစဉ် အမေရိကန်က အဆိုပြုထားသော ရက်ပေါင်း ၃၀ စစ်ပြေငြိမ်းရေးကို ဆွေးနွေးရန် မျှော်လင့်ထားပြီး Putin က လွန်ခဲ့သည့် သီတင်းပတ်က မည်သည့်ဖြေရှင်းမှုမဆို “အကျပ်အတည်း၏ မူလ အကြောင်း အရင်းများ” ကို ညှိနှိုင်းဖြေရှင်းရမည်ဟု အတိအလင်း ပြောကြားခဲ့သည်။ စစ်မြေပြင်တွင် ဆုံးရှုံးမှုများစွာဖြစ်ပွားပြီးနောက် ယူကရိန်းသည် ၎င်း၏ စစ်တပ်ကို ပြန်လည်ဖြည့်တင်းရန် စစ်ပွဲရပ်စဲမှုကို အသုံးချနိုင်သည်ဟု ၎င်းက ဖော်ပြခဲ့သည်။

ယူကရိန်းခေါင်းဆောင် Vladimir Zelensky သည် ယာယီစစ်ပြေငြိမ်းရေးကို ထောက်ခံခဲ့သော်လည်း ရုရှားသို့ မည်သည့်နယ်မြေဆိုင်ရာ ပိုင်ဆိုင်မှုကိုမျှ လွှဲပြောင်းမပေးနိုင်ကြောင်း ပြောဆိုခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ဝါရှင်တန်၊ နိုင်ငံရေး

အမေရိကန်နှင့် ရုရှားနိုင်ငံတို့ကြား ဆက်ဆံရေးပြန်လည်တည်ထောင်ရန်အတွက်နောက်တစ်ဆင့်ထပ်မံတက်လှမ်းရေးနှင့်စပ်လျဉ်း၍ အမေရိကန်နိုင်ငံခြားရေးဝန်ကြီး မားကို့ရူဘီယိုက ရုရှားနိုင်ငံခြားရေးဝန်ကြီး ဆာဂျီလက်ရော့နှင့် ဖုန်းမှတစ်ဆင့်ပြောဆိုဆွေးနွေးခဲ့သည်ဟု အမေရိကန်နိုင်ငံခြားရေးဝန်ကြီးဌာနက ထုတ်ပြန်သည်။

ရူဘီယိုသည် ရုရှားနိုင်ငံခြားရေးဝန်ကြီး လက်ရော့နှင့် မတ်လ ၁၅  ရက်တွင် ဖုန်းမှတစ်ဆင့် ဆက်သွယ်၍   နှစ်နိုင်ငံကြားတိုက်ရိုက်ဆက်သွယ်ရေး    ပြန်လည်တည်ဆောက်ရန် ဆွေးနွေးခြင်းဖြစ်ပြီးအဆိုပါဆွေးနွေးမှုအတွင်း နှစ်နိုင်ငံကြားဆက်ဆံရေးပြန်လည်တည်ထောင်ရန်နှစ်ဖက်စလုံးက သဘောတူညီခဲ့ကြောင်း  ထုတ်ပြန်ချက်တွင် ဆက်လက်ဖော်ပြသည်။

နှစ်နိုင်ငံစလုံးမှ   နိုင်ငံခြားရေးဝန်ကြီးများ၏ဆွေးနွေးမှုသည်   အမေရိကန်နှင့် ရုရှားနိုင်ငံတို့က နှစ်နိုင်ငံကြားဆက်ဆံရေးကိုပြန်လည်တည်ထောင်ရေးနှင့် ယူကရိန်းနိုင်ငံတွင် အပစ်အခတ်ရပ်စဲရေးသဘောတူညီချက်တစ်ရပ်ချမှတ်နိုင်ရေး ကြိုးပမ်းနေစဉ် ထွက်ပေါ်လာခြင်းဖြစ်ကြောင်း သိရသည်။

ရူဘီယိုနှင့်လက်ရော့တို့ကြား ဆွေးနွေးမှုအတွင်းပြောကြားခဲ့သည့် အခြားအသေးစိတ်အချက်အလက်များကိုမူ ထုတ်ပြန်ထားခြင်းမရှိပေ။

သို့သော် အဆိုပါဆွေးနွေးမှုအတွင်း ယီမင်နိုင်ငံအတွင်းရှိ    ဟူသီသူပုန်များအပေါ် အမေရိကန်က လုပ်ဆောင်ခဲ့သည့် လေကြောင်းတိုက်ခိုက်မှုများနှင့် အဆိုပါသူပုန်အဖွဲ့အား ပင်လယ်နီအတွင်းအမေရိကန်က ဆက်လက်တိုက်ခိုက်မည့်အစီအစဉ်များကိုလည်း ရူဘီယိုက လက်ရော့အား အကျဉ်းချုပ်ပြောကြားခဲ့ကြောင်းသိရသည်။                                   

Ref:RT

Source: https://myawady.net.mm/

ယူကရိန်းသမ္မတ ဇီလန်စကီးသည် ယူကရိန်းစစ်တပ်ဦးစီးချုပ် (Chief of General Staff) ဖြစ်သူ Anatoly Bargilevich ၏ ရာထူးနေရာတွင် ဒုတိယဦးစီးချုပ် Andrey Gnatov အား မတ်လ ၁၆ ရက်တွင် အစားထိုး ခန့်အပ်လိုက်ကြောင်း ကြေညာလိုက်ပါသည်။

ဦးစီးချုပ်ဟောင်း Bargilevich ကို ယူကရိန်းကာကွယ်ရေးဝန်ကြီးဌာန၏ စုံစမ်းစစ်ဆေးရေးအရာရှိချုပ်အဖြစ် ပြောင်းလဲခန့်အပ်လိုက်ပြီး အဆိုပါ ရာထူးအပြောင်းအလဲအတွက် အကြောင်းအရင်းကို ကြေညာချက်၌ ဖော်ပြ ထားခြင်းမရှိပါ။

ထိုသို့ ယူကရိန်းစစ်တပ် အကြီးအကဲရာထူးအပြောင်းအလဲမှာ ကာ့ဒ်ဒေသ၌ ယူကရိန်းတပ်ဖွဲ့ဝင်များ ပိတ်ဆို့ဝန်းရံထားခံရသည့်အချိန်တွင် လုပ်ဆောင် လိုက်ခြင်းဖြစ်ပါသည်။

“ကာ့ဒ်ဒေသရှိ ပိတ်မိနေသော ယူကရိန်းတပ်ဖွဲ့ဝင်များအနေဖြင့် လက်နက်ချလိုက်ပါက လူသားချင်းစာနာထောက်ထားမည်ဖြစ်ပြီး လိုအပ်သည့် ကျန်းမာရေးဝန်ဆောင်မှုနှင့် လုံခြုံမှု ဆောင်ရွက်ပေးသွားမည်ဖြစ်ကြောင်း” ရုရှားသမ္မတဗလာဒီမာပူတင်က ပြောကြားထားပြီးဖြစ်ပါသည်။ သို့ရာတွင် အဆိုပါတပ်ဖွဲ့ဝင်များအနေဖြင့် စစ်ဘက်နှင့်နိုင်ငံ့ခေါင်းဆောင်များ၏ တရားဝင်အမိန့်မရရှိဘဲ လက်နက်ချပေးရန် အခက်အခဲရှိနိုင်ကြောင်း ပူတင်က ထပ်မံ သတိပေးပြောကြားထားပါသည်။ 

ကိုးကား- TASS

Photo: 24 News HD

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

အမေရိကန်သမ္မတ Donald Trump က ရုရှားသမ္မတ Vladimir Putin နှင့် နှစ်နိုင်ငံဆက်ဆံရေးနှင့် ယူကရိန်းပဋိပက္ခတွင် ငြိမ်းချမ်းရေးသဘောတူညီချက်ရရှိရေး အလားအလာများကို မတ်လ ၁၈ ရက်(အင်္ဂါ)နေ့တွင် ဖုန်းဖြင့်ဆက်သွယ်ဆွေးနွေးမည်ဟု ပြောကြားခဲ့ပါသည်။

Reuters သတင်းထောက် Jeff Mason ၏အဆိုအရ Trump က မတ်လ ၁၆ ရက်နေ့က Air Force One ပေါ်၌ သတင်းထောက်များကို ပြောကြားရာတွင် မတ်လ ၁၈ ရက်တွင် Putin နှင့် စကားပြောရန် စီစဉ်ထားပြီး ယူကရိန်းနှင့်ပဋိပက္ခ အဆုံးသတ်နိုင်ရေး၊ နယ်မြေပိုင်ဆိုင်မှုနှင့် ဓာတ်အားပေးစက်ရုံကိစ္စရပ်များအား ဆွေးနွေးကြမည်ဟု ဆိုသည်။

အဆိုပါ သတင်းအပေါ် ကရင်မလင်ပြောရေးဆိုခွင့်ရှိသူ Dmitry Peskov ကလည်း အတည်ပြုခဲ့သည်။

အမေရိကန်အထူးကိုယ်စားလှယ် Steve Witkoff က မော်စကို၌ Putin နှင့် တွေ့ဆုံဆွေးနွေးမှုများသည် အပြုသဘောဆောင်ကြောင်း ဖော်ပြခဲ့ပြီး ရုရှားနှင့် ယူကရိန်းနှစ်ဖက်စလုံးအနေဖြင့် ညှိနှိုင်းဆွေးနွေးမှုများတွင် ပိုမိုနီးစပ်လာသည်ဟု ဖော်ပြခဲ့ပါသည်။ မတ်လ ၁၅ ရက်နေ့တွင် အမေရိကန် နိုင်ငံခြားရေးဝန်ကြီး Marco Rubio နှင့် ရုရှားနိုင်ငံခြားရေးဝန်ကြီး Sergey Lavrov တို့ ဖုန်းဖြင့်ဆက်သွယ်ပြောဆိုဆွေးနွေးခဲ့ပြီး နှစ်နိုင်ငံအကြားသံတမန်လုပ်ငန်းများ ပြန်လည်ထူထောင်ရန်နှင့် နှစ်နိုင်ငံဆက်ဆံရေးတွင်အခြားအငြင်းပွားဖွယ်ရာကိစ္စရပ်များကိုဖြေရှင်းနိုင်ရေးဆွေးနွေးခဲ့ကြကြောင်း ဆိုသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊နစက-၂

မတ်လ ၁၇ ရက်တွင် ဘယ်ဂျီယံနိုင်ငံမြို့တော် ဘရပ်ဆဲလ်၌ ကျင်းပလျက်ရှိသည့် ဥရောပသမဂ္ဂအစည်းအဝေးတွင် ဥရောပသမဂ္ဂကောင်စီသည် (Macro-Financial Assistance- MFA) အစီအစဉ်အရ ယူကရိန်းကို ယူရို ၃.၅ ဘီလီယံ ပေးချေရန် အတည်ပြုလိုက်ပါသည်။

ယခုတတိယအကြိမ်ငွေပေးချေမှုအပါအဝင်   ဥရောပသမဂ္ဂသည် ယူကရိန်းကို Ukraine Facility ခေါင်းစဉ်အောက်မှ ယူရို ၂၀ ဘီလီယံနီးပါး ပေးဆောင်မည်ဟု ကြေညာချက်တွင် ဖော်ပြထားပါသည်။ 

Ukraine Facility ဆိုသည်မှာ ယူကရိန်းနိုင်ငံ၏ စီးပွားရေးနှင့် ဘဏ္ဍာရေး တည်ငြိမ်မှုရှိစေရန်နှင့် ပြန်လည်တည်ဆောက်ရေး လုပ်ငန်းများအတွက် အထောက်အကူပြုစေရန် ဥရောပသမဂ္ဂ၏ ထောက်ပံ့သည့် အကူအညီအစီအစဉ်တစ်ခု ဖြစ်ပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊နစက-၃

ယူကရိန်းအနေဖြင့် ရုရှားနှင့် ငြိမ်းချမ်းရေးရယူနိုင်ရေး ဆွေးနွေးရာတွင် ပိုင်နက်နယ်မြေအချို့ကို စွန့်လွှတ်နိုင်ရေး ပြင်ဆင်ထားရမည်ဟု အမေရိကန်သမ္မတ ဒေါ်နယ်ထရမ့်၏ လုံခြုံရေးအကြံပေး မိုက်ဝေါ့က ထုတ်ဖော်ပြောဆိုလိုက်ပါသည်။

အမေရိကန်အစိုးရသည် လက်ရှိအချိန်တွင် ရုရှားနှင့်ယူကရိန်းနိုင်ငံကြား ရက် ၃ဝ ကြာ အပစ်ခတ်ရပ်စဲရေးရယူနိုင်ရန် ရုရှားကိုဖိအားပေးမှု ဆက်လက် လုပ်ဆောင်ရန် အဆင်သင့်ရှိနေသည်ဟု ၎င်းကပြောသည်။ ယူကရိန်းက ခရိုင်းမီးယားဒေသအပြင် ဒွန်းညက်စ်၊ လူဟန့်၊ ခါဆွန်၊ ဇာပိုရိုဟီ ဒေသ များသည် ၎င်းတို့ပိုင်နက်များဖြစ်ကြောင်း ပြောဆိုထားပြီး လက်ရှိအချိန်တွင် အဆိုပါဒေသများသည် ရုရှားထိန်းချုပ်မှုအောက်သို့ ရောက်ရှိနေသည်။ ခရိုင်းမီးယားဒေသသည် ၂၀၁၄ ခုနှစ် စစ်ပွဲဖြစ်လာခဲ့ပြီးနောက် ရုရှား ပိုင်နက်ဖြစ်ခဲ့ကာ ဒွန်းညက်စ်၊ လူဟန့်၊ ခါဆွန်၊ ဇာပိုရိုဟီ ဒေသများသည်လည်း ၂၀၂၂ ခုနှစ် စစ်ပွဲများအတွင်း ရုရှားထိန်းချုပ်မှုအောက် ထပ်မံ ရောက်ရှိခဲ့ခြင်းဖြစ်သည်။

အမေရိကန် အမျိုးသားလုံခြုံရေး အကြံပေးဖြစ်သူက “ယူကရိန်းစစ်ပွဲ ငြိမ်းချမ်းရေးရယူနိုင်မည့် အလားလာများတွင် ယူကရိန်းအတွက် လုံခြုံရေး အာမခံချက်ပေးရမည့်အချက်များလည်းပါဝင်မည်ဖြစ်ပြီး ယူကရိန်း အနေဖြင့် နေတိုးအဖွဲ့ဝင်နိုင်ငံအဖြစ် ပါဝင်နိုင်ရေးအစီအစဉ်ကို လက်လျှော့ရမည် ဖြစ်ကြောင်း၊ ခရိုင်းမီးယားအပါအဝင် ယူကရိန်းပိုင်နက်များကို ပြန်ပေးရန် ကြိုးပမ်းမှုများသည် လက်တွေ့မဆန်ကြောင်းနှင့် အမေရိကန်အစိုးရသည် ယူကရိန်းစစ်ပွဲအဆုံးသတ်နိုင်ရန် မြေပြင်အခြေနေမှန်ကို အဓိကထားကာ ကြိုးပမ်းမည်” ဟု ပြောဆိုခဲ့သည်။

ကိုးကား-NP News