အမေရိကန်နှင့်အီရန်တို့သည် နျူကလီးယားသဘောတူညီချက်အတွက် တိုက်ရိုက်ဆွေးနွေးမှုများကို လုပ်ဆောင်သွားမည်ဟု အမေရိကန် သမ္မတ ဒေါ်နယ်ထရမ့်က ထုတ်ဖော်ပြောဆိုခဲ့ပါသည်။ ဒေါ်နယ်ထရမ့်သည် အစ္စရေး ဝန်ကြီးချုပ်နေတန်ရာဟုနှင့် အိမ်ဖြူတော်၌ တွေ့ဆုံစဉ် အချိန် အတွင်း ယခုကဲ့သို့ထုတ်ဖော်ပြောဆိုခဲ့ခြင်းဖြစ်ကြောင်းလည်း သိရပါသည်။ ထို့အပြင် အီရန်နှင့် အမေရိကန်ကြား အဆင့်မြင့် တွေ့ဆုံဆွေးနွေးမှုတစ်ခု ကို လာမည့်ဧပြီလ(၁၂)ရက်နေ့တွင် အိုမန်နိုင်ငံ၌ ကျင်းပသွားမည်ဟုလည်း ဒေါ်နယ်ထရမ့်က‌ ပြောကြားခဲ့ပါသည်။ ဒေါ်နယ်ထရမ့်က “မိမိတို့ အနေ ဖြင့် အလွန်ကြီးမားသည့် ဆွေးနွေးမှုတစ်ခု လုပ်ဆောင်ရန်ရှိကြောင်း၊ ဖြစ်လာနိုင်မည့် ရလဒ်ကို မြင်တွေ့ရမည်ဖြစ်ကြောင်း၊ သဘောတူညီချက် လုပ်ဆောင်ခြင်းက ပိုကောင်းမည်ဆိုသည်ကို အားလုံးက သဘောတူညီ မည်ဟု မိမိထင်မြင်မိကြောင်း” ပြောဆိုခဲ့ပါသည်။ ထို့အပြင် ဆွေးနွေးမှုများ မအောင်မြင်ခဲ့ပါက အီရန်အနေဖြင့် ကြီးမားသည့်အန္တရာယ်နှင့် ကြုံတွေ့ ရနိုင်သည်ဟု ထင်မိကြောင်းလည်း ဒေါ်နယ်ထရမ့်က ပြောကြားခဲ့ပါသည်။ဒေါ်နယ်ထရမ့်သည် အီရန်၏နျူကလီးယားအစီအစဉ်နှင့်ပတ်သက်၍ သဘောတူညီချက်တစ်ခုလုပ်ဆောင်ရန် စာတစ်စောင်ကို လွန်ခဲ့သော မတ်လ (၇) ရက်နေ့က အီရန်ခေါင်းဆောင် အလီခါမေနီထံ ပေးပို့ခဲ့ခြင်း လည်းဖြစ်ပါသည်။ ဒေါ်နယ်ထရမ့်၏ တောင်းဆိုချက်ကို အီရန်အစိုးရက အစောပိုင်း၌ ငြင်းဆန်ပယ်ချခဲ့သော်လည်း နောက်ပိုင်းတွင် ဆွေး‌နွေးမှု များ လုပ်ဆောင်ရန် သဘောတူညီခဲ့ခြင်းဖြစ်ကြောင်းလည်း သိရပါသည်။

ကိုးကား-NP News

အမေရိကန်ကာကွယ်ရေးဝန်ကြီး ပီတီဟတ်ဆတ်သည် ယီမင်အခြေစိုက် ဟူသီလက်နက်ကိုင်အဖွဲ့အတွက် သတိ‌ပေးချက်တစ်ခုကို ထုတ်ပြန်ခဲ့ပြီး အမေရိကန်၏ဗုံးကြဲတိုက်ခိုက်မှုများက ပိုမိုဆိုးရွားလာလိမ့်မည် ဖြစ်ကြောင်း ထုတ်ပြန်ကြေညာခဲ့ပါသည်။ ပင်လယ်နီအတွင်း ရေကြောင်းသွားလာမှု များကို ပစ်မှတ်ထားတိုက်ခိုက်မှုများ လုပ်ဆောင်နေသည့် ဟူသီ လက်နက်ကိုင်အဖွဲ့၏ တိုက်ခိုက်မှုများကို လက်တုံ့ပြန်သည့်အနေဖြင့် အမေရိကန်က ဟူသီလက်နက်ကိုင်အဖွဲ့အပေါ် ဗုံးကြဲတိုက်ခိုက်မှုများကို သီတင်းပတ်သုံးပတ်ကြာ လုပ်ဆောင်ခဲ့ပြီးနောက် ယခုကဲ့သို့ သတိပေး ချက်များ ထွက်ပေါ်လာခြင်းဖြစ်ပါသည်။ ထို့အပြင် ပီတီဟတ်ဆတ်သည် ဆော်ဒီအာရေဗျကာကွယ်ရေးဝန်ကြီး Khalid bin Salman နှင့် နှစ်နိုင်ငံ ကြား ကာကွယ်ရေးဆိုင်ရာဆက်ဆံမှုများ အားကောင်းလာစေရန်ကြိုးပမ်းမှုများနှင့် ဆက်လက်လုပ်ဆောင်နေသည့် စစ်ဆင်ရေးများအကြောင်းကို ပြောဆိုဆွေးနွေးခဲ့ကြကြောင်းလည်း သိရပါသည်။ အဆိုပါ ဆွေးနွေးမှုများကို Khalid bin Salman က အတည်ပြုခဲ့ပြီး ၎င်းတို့ နှစ်ဦးသည် ဒေသတွင်းဖွံ့ဖြိုးတိုးတက်မှုများကို ဆွေးနွေးခဲ့ကြပြီး ဒေသတွင်း နှင့်နိုင်ငံတကာလုံခြုံရေးနှင့် တည်ငြိမ်ရေးတို့ကို မြှင့်တင်ရန် အမြင်များ ကို မျှဝေခဲ့ကြသည်ဟု ပြောကြားခဲ့ပါသည်။ ပီတီဟတ်ဆတ်နှင့် Khalid bin Salmanတို့သည် ဟူသီလက်နက်ကိုင်အဖွဲ့၏ စစ်ရေးစွမ်းရည်များကို ကျဆင်းစေရန် လုပ်ဆောင်နေသည့် အမေရိကန်၏စစ်ဆင်ရေး တိုးတက် မှုများ၊ ပင်လယ်နီအတွင်း ရေကြောင်းလွတ်လပ်စွာသွားလာခွင့်များ အပါ အဝင် ဒေသတွင်းလုံခြုံရေးနှင့်ပတ်သက်ပြီး အမြင်များကို ဖလှယ်ခဲ့ကြ ကြောင်း အမေရိကန်စစ်ဌာနချုပ်ပင်တဂွန်၏ ပြောရေးဆိုခွင့်ရှိသူ တစ်ဦး ကပြောကြားခဲ့ပါသည်။

ကိုးကား-NP News

ယူကရိန်းသမ္မတ ဇီလန်စကီး က တရုတ်စစ်သားများသည် ရုရှားဘက်မှ စစ်ပွဲတွင်ပါဝင်ခဲ့သည်ဟု ပြောကြားခဲ့ကြောင်း The Kyiv Independent သတင်းကဖော်ပြသည်။

ယူကရိန်းစစ်တပ်သည် ယူကရိန်းအရှေ့ပိုင်းဒေသတွင် တရုတ်စစ်သား ခြောက်ဦးနှင့် ထိပ်တိုက်တွေ့ခဲ့ပြီး နှစ်ဦးကို ဖမ်းမိခဲ့ကြောင်း ယူကရိန်း သမ္မတက သတင်းထုတ်ပြန်ခဲ့သည်။ ယခုအခါ အခြားနိုင်ငံသည် ရုရှား နှင့်ယူကရိန်းစစ်ပွဲတွင် ပါဝင်လာခဲ့ပြီး အမေရိကန်ထံမှ တုံ့ပြန်မှုကို မျှော်လင့်ကြောင်း ၎င်းက ပြောကြားခဲ့သည်ဟု ရေးသားဖော်ပြပါသည်။

ကိုးကား- The Kyiv Independent

ရုရှားကာကွယ်ရေးဝန်ကြီးဌာနဒုဝန်ကြီး ဗိုလ်ချုပ်ကြီး အလက်ဇန်းဒါ ဖိုမင်သည် ဘင်္ဂလားဒေ့ရှ် တပ်မတော် ကာကွယ်ရေးဦးစီးချုပ် ဗိုလ်ချုပ်ကြီး ဝါကာအူးဇ်ဇမန် (Waker-Uz-Zaman) နှင့် စစ်ရေးပူးပေါင်းဆောင်ရွက်မှုဆိုင်ရာ အလားအလာများကို ဆွေးနွေးခဲ့ကြကြောင်း ရုရှားကာကွယ်ရေးဝန်ကြီးဌာနက အတည်ပြုခဲ့သည်။ ရုရှားကာကွယ်ရေး ဝန်ကြီးဌာန၏ ထုတ်ပြန်ချက်အရ၊ “၂၀၂၅ ခုနှစ်၊ ဧပြီလ ၇ ရက်တွင် မော်စကိုမြို့၌ ရုရှားဖက်ဒရေးရှင်းသို့ အလုပ် သဘောခရီးစဉ်ဖြင့် ရောက်ရှိလာသည့် ဘင်္ဂလားဒေ့ရှ် တပ်မတော်ကာကွယ်ရေးဦးစီးချုပ် ဗိုလ်ချုပ်ကြီး ဝါကာအူးဇ် ဇမန်နှင့် ရုရှားကာကွယ်ရေးဒုဝန်ကြီး ဗိုလ်ချုပ်ကြီး အလက်ဇန်းဒါ ဖိုမင်တို့ အလုပ်သဘောတွေ့ဆုံမှု ပြုလုပ်ခဲ့သည်” ဟု ဖော်ပြထားသည်။ ထုတ်ပြန်ချက်တွင် သဘောတူညီချက်များအရ နှစ်နိုင်ငံသည် “စစ်ရေးနယ်ပယ်တွင် နှစ်ဖက် ပူးပေါင်းဆောင်ရွက်မှု အလားအလာများကို ဆွေးနွေးခဲ့ပြီး၊ ရုရှားနှင့် ဘင်္ဂလားဒေ့ရှ်နိုင်ငံတို့၏ တပ်မတော်များနှင့် ပြည်သူများအကြား ရှိရင်းစွဲ ခင်မင်ရင်းနှီးမှုများကို ပိုမိုခိုင်မာစေရန် နှစ်ဖက်စလုံးမှ ဆန္ဒပြုခဲ့ကြသည်” ဟု ဖော်ပြထားပါသည်။

ကိုးကား - Tass 

အိန္ဒိယနိုင်ငံသည် လာမည့်နှစ်တွင် ၎င်း၏အရှေ့တောင်ဘက်ကမ်းရိုးတန်းရှိ နျူကလီးယားရေငုပ်သင်္ဘောများနှင့် အခြား စစ်သင်္ဘောများအတွက် မဟာဗျူဟာမြောက် ရေတပ်စခန်းသစ်တစ်ခု လာမည့်နှစ်တွင် စတင်ဖွင့်လှစ်ရန် စီစဉ် နေကြောင်း Times of India သတင်းဌာန၏ အစီရင်ခံစာအရ သိရှိရပါသည်။ (Visakhapatnam) ဗီဆာခါပါတနမ်ရှိ အရှေ့ပိုင်းရေတပ်ဌာနချုပ်၏ တောင်ဘက် ကီလိုမီတာ ၅၀ (မိုင် ၃၁) အကွာ ရမ်ဘီလီကျေးရွာအနီးတွင် တည်ဆောက်မည့် အဆိုပါစခန်းသည် နျူကလီးယားရေငုပ်သင်္ဘောများကို ဝင်ရောက်ထားရှိရန် မြေအောက်လှိုဏ်ခေါင်းများနှင့် တူးမြောင်း ကွန်ရက်များ ပါဝင်မည်ဖြစ်ပါသည်။ ရမ်ဘီလီ စခန်း၏ ပထမအဆင့်တည်ဆောက်မှုမှာ ပြီးစီးလုနီးပါးဖြစ်နေပြီဖြစ်ပြီး ၂၀၂၆ ခုနှစ်တွင် ဖွင့်လှစ်ပြီးနောက် ကာနာတာကပြည်နယ်ရှိ ကာရ်ဝါစခန်းကဲ့သို့ပင် အဆင့်ဆင့် တိုးချဲ့ အဆင့်မြှင့်တင် သွားမည်ဖြစ်ပါသည်။ နျူကလီးယားရေငုပ်သင်္ဘောစခန်း တည်ဆောက်မှုလုပ်ငန်းကို လွန်ခဲ့သည့် ဆယ်စုနှစ်ကျော် ကတည်းက စတင်ခဲ့ပြီး နည်းပညာဆိုင်ရာ၊ သဘာဝပတ်ဝန်းကျင်ဆိုင်ရာ စိန်ခေါ်မှုများကို ကျော်လွှားနိုင်ခဲ့သည်။ အဆိုပါအခြေစိုက်စခန်းကြောင့် အိန္ဒိယ၏ အဏုမြူရေငုပ်သင်္ဘောများသည် ဂြိုဟ်တုများမှ မထောက်လှမ်းမိစေဘဲ ဘင်္ဂလားပင်လယ်အော်ထဲသို့ တိတ်တဆိတ်ဝင်ရောက်နိုင်မည် ဖြစ်ပြီး၊ မလက်ကာ ရေလက်ကြားနှင့် အခြားအရေး ပါသော နယ်မြေများဆီသို့ ခြိမ်းခြောက်မှုကာကွယ်ရေး စောင့်ကြည့်ခရီးများအတွက် လျင်မြန်စွာ ထွက်ခွာနိုင်မည် ဖြစ်ပါသည်။ 

ကိုးကား - RT 

အီရန်နိုင်ငံသည် ၎င်း၏စစ်တပ်အား အမြင့်ဆုံးအဆင့်တပ်လှန့်မှု ထုတ်ပြန် ထားပြီး အမေရိကန်စစ်စခန်းများတည်ရှိသည့် အိမ်နီးချင်းနိုင်ငံများအား အမေရိကန်၏ လေကြောင်းတိုက်ခိုက်မှုများကို အားပေးထောက်ပံ့ခြင်း မပြုရန် သတိပေးလိုက်ကြောင်း ရိုက်တာသတင်းဌာန၏ ဧပြီ ၆ ရက် ဖော်ပြချက်အရ သိရှိရသည်။

အမေရိကန်သမ္မတ Donald Trump က အီရန်ခေါင်းဆောင် Ayatollah Ali Khamenei ထံသို့ အီရန်၏နျူကလီးယားအစီအစဉ်ကို ရပ်တန့်ရန် တိုက်ရိုက်ဆွေးနွေးနိုင်ရေး တိုက်တွန်းထားသည့် စာတစ်စောင် ပေးပို့ခဲ့ ပြီးနောက် ထိုကဲ့သို့တပ်လှန့်မှုထွက်ပေါ်လာခြင်းဖြစ်သည်။ ထရမ့်က သဘောတူညီချက်အသစ်မရရှိပါက ဗုံးကြဲတိုက်ခိုက်မှုများ လုပ်ဆောင်မည် ဟု ခြိမ်းခြောက်ထားသည်။

နျူကလီးယားလက်နက်များ တပ်ဆင်ထုတ်လုပ်နိုင်ရေး ကြိုးပမ်းနေသည် ဟု ပြောဆိုမှုများကိုငြင်းဆိုထားသော အီရန်အစိုးရက တိုက်ရိုက် ဆွေးနွေးရန် တောင်းဆိုမှုကို ပယ်ချခဲ့သည်။နိုင်ငံခြားရေးဝန်ကြီး Abbas Araghchi က ထိုအဆိုပြုချက်သည် အဓိပ္ပာယ်မရှိသောလုပ်ရပ်ဖြစ်ပြီး တောင်းဆိုမှု၏ ရိုးသားမှုကို သံသယရှိကြောင်း ပြောကြားခဲ့သည်။ “ဆွေးနွေးလိုပါက ခြိမ်းခြောက်နေရခြင်း၏ အဓိပ္ပာယ်ကိုနားမလည်” ဟု ၎င်းက ပြောဆိုခဲ့သည်။

ရိုက်တာသတင်းဌာန၏ဖော်ပြချက်အရ အီရန်သည် အီရတ်၊ကူဝိတ်၊ အာရပ်စော်ဘွားများပြည်ထောင်စု၊ကာတာ၊တူရကီနှင့်ဘာရိန်းနိုင်ငံများထံ အကြောင်းကြားစာများပေးပို့ခဲ့ပြီး အမေရိကန်စစ်တပ်အား ၎င်းတို့၏ နယ်မြေ သို့မဟုတ် လေကြောင်းကို အသုံးပြုခွင့်ပေးပါက ရန်လိုမှု အဖြစ် သတ်မှတ်မည်ဟု သတိပေးခဲ့သည်။ အမည်မဖော်လိုသူ တာဝန်ရှိသူ တစ်ဦးက “ထိုသို့ပြုလုပ်ပါက ၎င်းတို့အတွက် ပြင်းထန်သော အကျိုးဆက် များ ရှိလာမည်” ဟု ပြောကြားခဲ့သည်။

အဆိုပါသတင်းတွင် အီရန်ခေါင်းဆောင် Ayatollah Ali Khamenei က ၎င်း၏စစ်တပ်အား အမြင့်ဆုံးအဆင့်တပ်လှန့်မှုပြုလုပ်ရန် အမိန့်ပေးခဲ့သည် ဟု ဖော်ပြထားသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အီတလီနိုင်ငံ ရောမမြို့တွင် ဥရောပသမဂ္ဂ၏ပြန်လည် လက်နက်မြှုပ်နှံမှု အစီအစဉ်ကို ကန့်ကွက်သည့် ကြီးမားသော ဆန္ဒပြပွဲများ ဖြစ်ပွားခဲ့သည်။

​သောင်းနှင့်ချီ​သောလူထုသည် Piazza Vittorio Emanuele II ရင်ပြင်တွင် စုဝေးကာ ဘရပ်ဆဲလ်မြို့ရှိ ဥရောပသမဂ္ဂအဖွဲ့၏ ယူရိုငွေ ဘီလီယံ ၈၀၀ အား ကာကွယ်ရေးလုပ်ငန်းများတွင် သုံးစွဲရန် ဖိအားပေးမှုကို ပယ်ချခဲ့ ကြသည်။ 

“ဒုံးကျည် မလိုပါ၊ ဆေးရုံ လိုအပ်နေပါသည်” ဟု ဆန္ဒပြသူများက ကြွေးကြော်ခဲ့သည်။ 

စစ်တမ်းများအရ အီတလီလူမျိုး ၆၂% သည် စစ်ရေး အသုံးစရိတ် တိုးမြှင့်မှုကို ကန့်ကွက်ကြောင်း ဖော်ပြထားပြီး ယင်းသည် ဥရောပ သမဂ္ဂ၏ ပျမ်းမျှကန့်ကွက်မှုထက် သိသိသာသာ မြင့်မားနေကြောင်း သိရှိရပါသည်။

ကိုးကား-အင်တာနက်စာမျက်နှာ

သီရိလင်္ကာရေတပ်သည် ဟီရိုအင်းနှင့် မက်သမ်ဖက်တမင်း (heroin and crystal methamphetamine) ၇၀၀ ကီလိုဂရမ် စံချိန်တင် ဖမ်းဆီးရမိခဲ့ပါသည်။ သီရိလင်္ကာရေတပ်သည် ဟီရိုအင်းနှင့် ခရစ္စတယ် မက်သမ်ဖက်တမင်း ၇၀၀ ကီလိုဂရမ်ကျော်ကို ဖမ်းဆီးရမိခဲ့ပြီး နိုင်ငံ၏ လုံခြုံရေးတပ်ဖွဲ့များသည် သမိုင်းတစ်လျှောက် မူးယစ်ဆေးဝါး အများဆုံး ဖမ်းဆီးရမိသည့် ဖြစ်ရပ်ဖြစ်ကြောင်း ဧပြီ ၅ ရက်(စနေနေ့) တွင် ရေတပ်က ပြောကြားခဲ့ပါသည်။ ရေတပ် မီဒီယာ ဒါရိုက်တာ ဗုဒ္ဓိကစမ္ပတ် (Buddhika Sampath)က ဖမ်းဆီးရမိသော မူးယစ်ဆေးဝါးများ၏ ခန့်မှန်းတန်ဖိုး သည် သီရိလင်္ကာရူပီး ၁ဝ ဘီလီယံ (အမေရိကန်ဒေါ်လာ ၃၄ သန်းခန့်) ထက် ပိုမိုကြောင်း မီဒီယာသို့ ပြောကြားခဲ့သည်။ ယခင်ရက်သတ္တပတ်အတွင်း ရေတပ်နှင့် မူးယစ်ဆေးဝါးတိုက်ဖျက်ရေးဌာန (Police Narcotics Bureau) တို့ ပူးပေါင်းဆောင်ရွက်ခဲ့သည့် စစ်ဆင်ရေးတစ်ခုတွင် မူးယစ်ဆေးများကို သိမ်းဆည်းနိုင်ခဲ့ပြီး မူးယစ်ဆေးသယ်ယူသည့် ငါးဖမ်းသင်္ဘောတစ်စီးနှင့်အတူ သံသယရှိသူ ၇ ဦးကိုပါ ဖမ်းဆီးနိုင်ခဲ့ကြောင်း ၎င်းက ပြောကြားခဲ့သည်။ ဒါရိုက်တာ ဗုဒ္ဓိကစမ္ပတ်၏အဆိုအရ မူးယစ်ဆေးဝါးများကို အိတ် ၅၁ လုံးတွင် ထည့်ထားပြီး ခရစ္စတယ်မက်သမ်ဖက်တမင်း ၅၀၀ ထုပ်နှင့် ဟီရိုအင်း ၁၇၈ ထုပ် ပါဝင်ကြောင်းသိရသည်။သိမ်းဆည်းရမိမှုသည်သီရိလင်္ကာနိုင်ငံ၏အနောက်ဘက်ကမ်းရိုး တန်းမှ ရေပြင်တွင်ဖြစ်ပွားခဲ့ခြင်းဖြစ်သည်။ သိမ်းဆည်းရမိသော မူးယစ်ဆေးဝါးများအား စစ်ဆေးပြီးနောက် ရေတပ် ညွှန်ကြားရေးမှူး ဒုတိယဗိုလ်ချုပ်ကြီးကန်ချာနာတာနာဂိုဒါက ငါးဖမ်းသင်္ဘောပိုင်ရှင်များအား မူးယစ်ဆေးဝါးမှုများ တွင် ပါဝင်ပတ်သက်မှုများကို ချက်ချင်းရပ်တန့်ရန် သတိပေးခဲ့ပါသည်။

ကိုးကား- https://thepeninsulaqatar.com

အိန္ဒိယနိုင်ငံ ဝန်ကြီးချုပ် နာရင်ဒရာမိုဒီသည် သီရိလင်္ကာနိုင်ငံသို့ ကာကွယ်ရေးနှင့် စွမ်းအင်ဆိုင်ရာဆက်ဆံရေးကို မြှင့်တင်ရန် အတွက်သွားရောက်ခဲ့ပါသည်။ သီရိလင်္ကာသမ္မတ အာနုရာကူမာရ ဒီဆာနာယက္က (Anura Kumara Disanayake) သည် လွန်ခဲ့သော နှစ်က ရွေးကောက်ပွဲအနိုင်ရပြီးနောက် ကျွန်းနိုင်ငံသို့ ပထမဆုံး လာရောက်သည့် နိုင်ငံခြားခေါင်းဆောင်တစ်ဦးဖြစ်ပါသည်။ သီရိလင်္ကာ၏ အင်အားကြီးနိုင်ငံအိမ်နီးချင်းနှင့် အကြီးမားဆုံးငွေချေးသူ တရုတ်နိုင်ငံနှင့် ဆက်ဆံရေးကို ချိန်ညှိနေချိန်တွင် အိန္ဒိယနိုင်ငံ ဝန်ကြီးချုပ် နာရင်ဒရာမိုဒီသည် အိန္ဒိယနိုင်ငံနှင့် သီရိလင်္ကာနိုင်ငံကြား သမိုင်းဝင်ကာကွယ်ရေးနှင့် စွမ်းအင်ဆိုင်ရာ ပူးပေါင်းမှုများ အားကောင်းလာစေရန် သီရိလင်္ကာ သို့ သွားရောက်ခဲ့ခြင်းဖြစ်ပါသည်။ သီရိလင်္ကာသမ္မတ အာနုရာကုမာရ ဒီဆာနာယက္ကသည် မတ်လ ၅ ရက် (စနေနေ့) တွင် မြို့တော်၏ လွတ်လပ်ရေးရင်ပြင်၌ ဝန်ကြီးချုပ် မိုဒီအား အနီရောင် ကော်ဇောခင်း၍ ကြိုဆိုခဲ့ပြီး သေနတ် ၁၉ ချက်ပစ်ဖောက်ကာ ဂုဏ်ပြုခဲ့ပါသည်။ ဝန်ကြီးချုပ်မိုဒီအား သီရိလင်္ကာ၏အမြင့်ဆုံးအရပ်သားဂုဏ်ထူးဆောင်ဘွဲ့ “မိတ္ထဗုဒ္ဓံ” (Mithra Vibhushan) ဘွဲ့ကို သီရိလင်္ကာသမ္မတ ဒီဆာနာယက္က က ချီးမြှင့်ခဲ့သည်။ အိန္ဒိယဝန်ကြီးချုပ် က “အဆိုပါဂုဏ်ထူးသည် ကျွန်ုပ်တစ်ဦးတည်းအတွက်သာမက အိန္ဒိယနိုင်ငံသား ၁၄၀ ကုဋေ (၁.၄ ဘီလီယံ) အတွက်ပါ သက်ဆိုင်ပါသည်” ဟု ကျေးဇူးတင်စကားပြောကြားခဲ့ပါသည်။ ကိုလံဘိုမြို့ရှိ သမ္မတရုံးမှ ထုတ်လွှင့်နေသောအခမ်းအနားတွင် ဝန်ကြီးချုပ် မိုဒီက “မိမိတို့၏ လုံခြုံရေးအကျိုးစီးပွားများ ကိုက်ညီသည်ဟု ယုံကြည်ပါသည်။ မိမိတို့၏ လုံခြုံရေးသည် အပြန်အလှန်မှီခိုပြီး ဆက်စပ်နေသည်” ဟု ပြောကြားခဲ့ပါသည်။ နှစ်နိုင်ငံသည် အိန္ဒိယတွင် သီရိလင်္ကာ စစ်မှုထမ်းများကို လေ့ကျင့်ပေးရန်နှင့် သတင်းအချက်အလက်နှင့် နည်းပညာများမျှဝေရန် ငါးနှစ်တာ ကာကွယ်ရေး ပူးပေါင်းဆောင်ရွက်မှု သဘောတူညီချက်ကိုလက်မှတ် ရေးထိုးခဲ့ကြပါသည်။ ဒေသတွင်းအင်အားကြီးနိုင်ငံသာမက ကမ္ဘာ့အင်အားကြီးနိုင်ငံအဖြစ် အိန္ဒိယ၏ မြင့်တက်လာမှုကို သီရိလင်္ကာသမ္မတ ဒီဆာနာယက္က ချီးကျူးခဲ့သည်။ “သီရိလင်္ကာပိုင်နက်ကို အိန္ဒိယနိုင်ငံ၏ လုံခြုံရေးကို ထိခိုက်စေမည့် မည်သူ့ကိုမျှ အသုံးပြုခွင့်မပြုကြောင်း ဝန်ကြီးချုပ် မိုဒီကို ကျွန်ုပ်က အတည်ပြုပြောကြားခဲ့ပါသည်” ဟု ၎င်းက ထပ်လောင်းပြောကြားခဲ့ပါသည်။ အိန္ဒိယသည် ယခင်က ကိုလံဘိုဆိပ်ကမ်းသို့ ဝင်ရောက်ခဲ့သော တရုတ်ရေငုပ်သင်္ဘောများနှင့် သုတေသနသင်္ဘောများကို ကန့်ကွက်ခဲ့ဖူး ပါသည်။ ၂၀၁၄ ခုနှစ်မှစ၍ အိန္ဒိယ၏ကန့်ကွက်မှုကြောင့် သီရိလင်္ကာသည် တရုတ်ရေငုပ်သင်္ဘောများ ဆိုက်ကပ်ခွင့်ကို ပိတ်ပင်ထားပါသည်။ ပြီးခဲ့သောနှစ်တွင် ကိုလံဘိုသည် တရုတ်သင်္ဘောများကို အိန္ဒိယအပေါ် သူလျှိုလုပ်ရန် အသုံးပြု နေသည်ဟု နယူးဒေလီ၏ စွပ်စွဲချက်များအပြီး နိုင်ငံခြားသုတေသနသင်္ဘောများကို ပိတ်ပင်ခဲ့ပါသည်။ သို့သော် အဆိုပါ ခရီးစဉ်၏အဓိကအစိတ်အပိုင်းဖြစ်သည့် အရှေ့မြောက်ပိုင်း ထရီကိုမလီခရိုင် (Trincomalee) ရှိ ဆမ်ပူရ် (Sampur) တွင် ၁၂၀ မဂ္ဂါဝပ် နေစွမ်းအင်သုံး ဓာတ်အားပေးစက်ရုံကိုစတင်လုပ်ဆောင်ခြင်းဖြစ်သည်။ အဆိုပါစီမံကိန်းကို နှစ်ပေါင်း များစွာ ရပ်တန့်ထားခဲ့သော်လည်း အိန္ဒိယ၏ပံ့ပိုးမှုဖြင့် ပူးတွဲစီမံကိန်းအဖြစ် ပြန်လည်အသက်သွင်းခဲ့သည်။ ကိုလံဘိုမှ အယ်လ်ဂျာဇီးယား (Al Jazeera) သတင်းဌာနက မီနဲလ် ဖာနန်ဒက်စ် (Minelle Fernandez) ၏ အစီရင်ခံချက်အရ သီရိလင်္ကာပိုင်နက်ရေပြင်အတွင်း ကျူးကျော်ဝင်ရောက်နေသည်ဟု စွပ်စွဲခံထားရသော တာမီးလ်နာဒူးပြည်နယ် (Tamil Nadu) မှ တံငါသည်များ၏ ပြဿနာကိုလည်း သီရိလင်္ကာသမ္မတ ဒီဆာနာယက္က က ဆွေးနွေးလိမ့်မည်ဟု သိရပါသည်။ “အိန္ဒိယငါးဖမ်းစက်လှေ ဒါဇင်ပေါင်းများစွာသည် “ပင်လယ်ကြမ်းပြင်ကိုပိုက်ကွန်နှင့်ဆွဲခြင်း” ဟု ခေါ်သော စက်ဖြင့်ပြုလုပ်သည့်စနစ်ကို အသုံးပြု၍ ငါးများကို သယ်ဆောင်သွားကြပြီးပတ်ဝန်းကျင်ကိုလည်း ဖျက်ဆီး နေကြပါသည်” ဟု ၎င်းကဆိုသည်။

ချိန်ခွင်လျှာညှိခြင်း

ဝန်ကြီးချုပ်မိုဒီ၏ခရီးစဉ်သည် ကိုလံဘိုမြို့အနေဖြင့် အိန္ဒိယနှင့် တရုတ်တို့၏ ပြိုင်ဆိုင်မှုများ ကို ကိုင်တွယ်နေစဉ်တွင် ဖြစ်ပေါ်လာသည်။ အိန္ဒိယသည် သီရိလင်္ကာတွင် တရုတ်၏ ဩဇာလွှမ်းမှုကို စိုးရိမ်နေပြီး ၎င်းကို မိမိ၏ ပထဝီ နိုင်ငံရေး ဩဇာဧရိယာအဖြစ် မှတ်ယူထားပါသည်။ ဒီဆာနာယက္က၏သမ္မတအဖြစ် ပထမဆုံးနိုင်ငံခြားခရီးစဉ်မှာ၂ဝ၂၃ခုနှစ်၊ ဒီဇင်ဘာတွင် နယူးဒေလီသို့ဖြစ်ပြီး၊ ထို့နောက် ၂ဝ၂၄ခုနှစ်၊ ဇန်နဝါရီတွင် ပေကျင်းသို့သွားရောက်ကာ သီရိလင်္ကာ၏ ဟန်ချက်ညှိမှုကို မီးမောင်းထိုးပြခဲ့ပါသည်။ တရုတ်သည် ၂၀၂၂ ခုနှစ်တွင် သီရိလင်္ကာ၏အကြွေးများကို ပြန်လည်စီမံ ပြီးနောက် နိုင်ငံ၏အကြီးမားဆုံးနှစ်နိုင်ငံ ချေးငှားသူ ဖြစ်လာခဲ့သည်။ ထိုနှစ်တွင်ပင် သီရိလင်္ကာသည် အကြီးမားဆုံး နိုင်ငံခြားရင်းနှီးမြှုပ်နှံမှုဖြစ်သော တောင်ပိုင်းရှိ ရေနံချက်စက်ရုံအတွက် တရုတ်နှင့်သဘောတူညီချက်ကို လက်မှတ် ရေးထိုးခဲ့သည်။ ဝန်ကြီးချုပ်မိုဒီသည် ထိုင်းနိုင်ငံတွင် ကျင်းပသော BIMSTEC ထိပ်သီးအစည်းအဝေးမှတစ်ဆင့် သီရိ လင်္ကာသို့ သွားရောက်ခဲ့ပြီး အိမ်နီးချင်းနိုင်ငံများနှင့် ဆက်ဆံရေးမြှင့်တင်ရန် ကြိုးပမ်းမှုများလုပ်ဆောင်ခဲ့သည်။ ထိုင်းတွင် ကျင်းပသော BIMSTEC အစည်းအဝေးပွဲတွင် ဝန်ကြီးချုပ် မိုဒီသည် မြန်မာနိုင်ငံအကြီးအကဲ ဗိုလ်ချုပ်မှူးကြီး မင်းအောင်လှိုင်နှင့် တွေ့ဆုံခဲ့ပြီး၊ ဘင်္ဂလားဒေ့ရှ်၏ယာယီခေါင်းဆောင် ယူနွတ်စ်နှင့်လည်း ဆွေးနွေးခဲ့ပါသည်။ ဝန်ကြီးချုပ် မိုဒီသည် ဧပြီ ၄ ရက်(သောကြာနေ့)တွင် ဘန်ကောက်မြို့၌ ဘူတန်မှ ဝန်ကြီးချုပ် ဆီရင် တိုဘဂေ (Tshering Tobgay) နှင့်တွေ့ဆုံခဲ့ပြီး ၎င်း၏ နီပေါလက်တွဲဖော် ကေပီ ရှာမာ အိုလီ (KP Sharma Oil) နှင့်လည်း တွေ့ဆုံခဲ့ရာ ကတ်တမန်ဒူးခေါင်းဆောင်ကို ပြီးခဲ့သောနှစ်က အာဏာပြန်ရပြီးနောက် ပထမဆုံးအကြိမ် တွေ့ဆုံခြင်းဖြစ်ပါသည်။

ကိုးကား- Aljazeera

ဘင်္ဂလားဒေ့ရှ်၏ တရုတ်နိုင်ငံသို့ ရင်းနှီးမြှုပ်နှံမှုဆိုင်ရာ ချဉ်းကပ်မှုများ သည် အိန္ဒိယ၏ မဟာဗျူဟာအရ အရေးပါသော "ကြက်လည်ပင်းကြိုး" (Siliguri Corridor) ၏ လုံခြုံရေးကို စိုးရိမ်စရာ ဖြစ်စေသည်။ 

Siliguri Corridor သည် အနောက်ဘင်္ဂလားပြည်နယ်ရှိ ကျဉ်းမြောင်း သော မြေပြင်အစိတ်အပိုင်းဖြစ်ပြီး အိန္ဒိယအရှေ့မြောက်ပြည်နယ်များကို ကျန်အိန္ဒိယနှင့် ဆက်သွယ်ပေးထားကာ နီပေါ၊ ဘူတန်နှင့် ဘင်္ဂလားဒေ့ရှ် တို့နှင့် နယ်နိမိတ်ချင်းထိစပ်နေသည်။ 

ဘင်္ဂလားဒေ့ရှ်သည် တရုတ်၏ Belt and Road Initiative (BRI) စီမံကိန်းများတွင် ပါဝင်လာမှုနှင့်အတူ အဆိုပါဒေသတွင် တရုတ်၏ ဩဇာလွှမ်းမှုများ မြင့်တက်လာခြင်းကို အိန္ဒိယက စောင့်ကြည့်လျက် ရှိသည်။ 

အိန္ဒိယသည် အဆိုပါအရေးပါသော ချိုင့်ဝှမ်းကို ကာကွယ်ရန် Rafale တိုက်လေယာဉ်များ၊ BrahMos ဒုံးပျံများနှင့် S-400 လေကာစနစ်များ တပ်ဆင်ထားပြီး စစ်ရေးအဆင့်မြှင့်တင်မှုများ ပြုလုပ်ထားသည်။ 

“ကြက်လည်ပင်းကြိုး” သည် အိန္ဒိယ၏ အားနည်းချက်မဟုတ်ဘဲ ၎င်း၏ စစ်ရေးအားအကြီးဆုံးဒေသ တစ်ခုအဖြစ် အိန္ဒိယစစ်တပ်က သတ်မှတ် ထားပါသည်။ 

ဘင်္ဂလားဒေ့ရှ်-တရုတ် ပူးပေါင်းမှုသည် အဆိုပါဒေသ၏ မဟာဗျူဟာ မြောက်အခြေအနေကို ပိုမိုရှုပ်ထွေးစေနိုင်သည်ဟု လုံခြုံရေးပညာရှင်များ က သုံးသပ်ထားပါသည်။

ကိုးကား- India today