တိုကျို  မေ ၄

ဂျပန်နိုင်ငံ၌ နှစ်စဉ်ကောက်ယူလျက်ရှိသည့် စစ်တမ်းတစ်ခုအရ ကလေးငယ်များသည် အင်တာနက်ပိုမိုအသုံးပြုကာ ယခင်ကထက် အင်တာနက်တွင် ပိုမိုအချိန်ကုန်ဆုံးလာကြကြောင်း သိရသည်။

ကလေးသူငယ်နှင့် မိသားစုအေဂျင်စီက အသက်ကိုးနှစ်အထိ ကလေးငယ်များ၏ အင်တာနက်အသုံးပြုမှုနှင့်ပတ်သက်ပြီး စစ်တမ်းကောက်ယူခဲ့ခြင်းဖြစ်သည်။ ၂၀၂၄ ဘဏ္ဍာနှစ်တွင် အသက် ကိုးနှစ်အထိ ကလေးငယ်များ၏ မိဘ ၃၀၀၀ ခန့်ကို စစ်တမ်းကောက်ယူခဲ့ရာတွင် ၁၉၆၄ ဦး ပြန်လည်တုံ့ပြန်ဖြေကြားခဲ့ကြောင်း သိရသည်။

အင်တာနက်အသုံးပြုမှု နှစ်စဉ်မြင့်တက်

ကလေးငယ်များအနက် ၇၈ ဒသမ ၅ ရာခိုင်နှုန်းမှာ ဗီဒီယိုကြည့်ခြင်း၊ ဂိမ်းကစားခြင်းအပါအဝင် အင်တာနက်ကို အသုံးပြုကြသည်ဟု ဆိုသည်။ ဂျပန်နိုင်ငံ၌ ကလေးငယ်များ အင်တာနက်အသုံးပြုမှုနှစ်စဉ် မြင့်တက်လျက်ရှိကြောင်း၊ ၂၀၁၈ ခုနှစ်က မှတ်တမ်းတင်ထားသည့် ၅၆ ဒသမ ၉ ရာခိုင်နှုန်းထက် ၂၀၂၄ ခုနှစ်တွင် ၂၁ ရာခိုင်နှုန်း ပိုများလာကြောင်း သိရသည်။

အသက်အရွယ်အလိုက် အင်တာနက်အသုံးပြုမှုနှုန်းကို လေ့လာကြည့်ရာတွင် အသက်တစ်နှစ်အောက် ကလေးငယ် ၆၉ ဦးမှာ ၁၀ ဒသမ ၁ ရာခိုင်နှုန်း အင်တာနက်အသုံးပြုကြောင်း တွေ့ရသည်။ ထို့အပြင် အသက်တစ်နှစ်အရွယ် ကလေးငယ် ၁၂၆ ဦးမှာ ၄၂ ဒသမ ၉ ရာခိုင်နှုန်း အင်တာနက်အသုံးပြုကြောင်းနှင့် အသက်နှစ်နှစ်အရွယ် ကလေးငယ် ၁၃၃ ဦးမှာ ၅၆ ဒသမ ၄ ရာခိုင်နှုန်း အင်တာနက်အသုံးပြုကြောင်း တွေ့ရှိရသည်ဟု ဆိုသည်။

စိတ်စွဲလမ်းမှုများကို ဖြစ်ပေါ်စေနိုင်

အင်တာနက်ကို ပိုမိုရင်းနှီးလာသည်နှင့်အမျှ ကလေးငယ်များသည် အင်တာနက်ကို အချိန်ကြာမြင့်စွာ အသုံးပြုလာသည်ဟု ဟိုဂိုတက္ကသိုလ်ပါမောက္ခ တာကေယုချီ ကာဇူအိုက မှတ်ချက်ပြုပြောသည်။ ထို့အပြင် စမတ်ဖုန်းနှင့် အခြားအင်တာနက်ကိရိယာများက ကလေးများကို ပြုစုပျိုးထောင်ရာတွင် အထောက်အကူဖြစ်နိုင်သော်လည်း အချိန်ကြာမြင့်စွာ အသုံးပြုမည်ဆိုပါက စည်းကမ်းမဲ့သည့် နေထိုင်မှုပုံစံများနှင့် စိတ်စွဲလမ်းမှုများကို ဖြစ်ပေါ်စေနိုင်ကြောင်း ၎င်းက ဆက်ပြောသည်။

Source: မြန်မာ့အလင်းသတင်းစာ 

ဟယ်လ်ဆင်ကီး  မေ ၂

သွေးတွင်းသကြားဓာတ်ပါဝင်မှုမြင့်မားနေသော ဆယ်ကျော်သက်များသည် နှလုံးခုန်ရပ်တန့်မှုပြဿနာနှင့် ရပ်ဆိုင်ရနိုင်ခြေမြင့်မားနေကြောင်း သုတေသနပညာရှင်များ၏ အဆိုကိုကိုးကား၍ မေ ၁ ရက်သတင်းများအရ သိရသည်။

ဖင်လန်နိုင်ငံ အရှေ့ဖင်လန်တက္ကသိုလ်မှ သိပ္ပံပညာရှင်များ၏ အဆိုအရ သွေးအတွင်းသကြားဓာတ်ပါဝင်မှု မြင့်မားနေသော ဆယ်ကျော်သက်များ၌ နှလုံးအရွယ်အစား ကြီးမားလာနိုင်ခြေ သိသိသာသာ မြင့်မားနေတတ်ပြီး ၎င်းပြဿနာကြောင့် နှလုံး၏ သွေးများကို ညှစ်ထုတ်နိုင်စွမ်း အားနည်းသွားတတ်ပြီး နှလုံးခုန်ရုတ်တရက် ရပ်နိုင်ခြေလည်း မြင့်မားလာနိုင်ကြောင်း သိရသည်။

အစာမစားထားချိန် သွေးတွင်းသကြားဓာတ်ပါဝင်မှု အဆင့်သည် သွေးတစ်လီတာလျှင် ၅ ဒသမ ၆ မီလီမိုးလ်ထိ ရှိနေတတ်သည့် ဆယ်ကျော်သက်လူငယ်များသည် နှလုံးအရွယ်အစား ကြီးမားနိုင်ခြေ ၄၆ ရာခိုင်နှုန်းထိ မြင့်တက်လာနိုင်ကြောင်း သိရသည်။

ဆယ်ကျော်သက်များ၌ သွေးတွင်းသကြားဓာတ်ပါဝင်မှု မြင့်မားနေခြင်းသည် ကျန်းမာရေးနှင့်မညီညွတ်သည့် အစားအစာများစားသုံးမှု၊ လေ့ကျင့်ခန်းမပြုလုပ်မှုတို့နှင့် ဆက်စပ်နေကြောင်း ဖင်လန်သုတေသနပညာရှင်များက ပြောကြားသည်။

ဖင်လန် သုတေသနပညာရှင်များသည် အသက် ၁၅ နှစ်နှင့် ၂၄ နှစ်ကြား လူငယ် ၁၅၀၀ ကျော်တို့ကို လေ့လာပြီးနောက် ၎င်းတို့၏ တွေ့ရှိချက်ကို တင်ပြခဲ့ကြခြင်းဖြစ်ကြောင်း သိရသည်။

Source: ရတနာပုံသတင်းစာ 

အင်အားပြင်းမန္တလေးငလျင်ကြီးဒဏ်ကြောင့် ထိခိုက်ခဲ့သော မန္တလေး အပါအဝင် ဒေသ (၅)ခုရှိ ရှေးဟောင်း အမွေအနှစ်အဆောက်အအုံများကို UNESCO Guide Line နှင့်အညီ ဆောင်ရွက်နေကြောင်း သာသနာရေး နှင့်ယဉ်ကျေးမှုဝန်ကြီးဌာန၊ ရှေးဟောင်းသုတေသနနှင့် အမျိုးသား ပြတိုက်ဦးစီးဌာန၏ ထုတ်ပြန်ချက်အရ သိရသည်။ အဆိုပါငလျင်ကြောင့် မန္တလေး၊ အင်းဝ၊ ပင်းယ၊ ပလိပ်၊ မက္ခရာ၊ စစ်ကိုင်း စသည့် ဒေသများရှိ ထိခိုက် ပျက်စီးခဲ့သော ရှေးဟောင်းအမွေအနှစ် အဆောက်အအုံများကို ပြုပြင် ထိန်းသိမ်းနိုင်ရန်အတွက် ရှေးဟောင်းသုတေသနနှင့် အမျိုးသားပြတိုက် ဦးစီးဌာနက အဖွဲ့ (၈) ဖွဲ့ ဖွဲ့စည်းကာ UNESCO Guide Line နှင့်အညီ ဆောင်ရွက်လျက်ရှိပြီး Assessment များ ကောက်ယူလျက်ရှိကြောင်း ထုတ်ပြန်ထားသည်။ ထို့ပြင် ရှေးဟောင်းအဆောက်အအုံများကို ဦးစားပေး အဆင့်သတ်မှတ်ခွဲခြားလျက်ရှိပြီး ၂၀၁၆ ခုနှစ် ပုဂံငလျင် ဖြစ်ပွားခဲ့ပြီးနောက် UNESCO ပညာရှင်များ လာရောက်ပြုစု သင်ကြားပေးခဲ့သည့် ပုံစံ၊ စနစ်၊ ဇယားများအား မှီငြမ်း နမူနာယူ၍ ရှေးဟောင်းစေတီ၊ ပုထိုးများ၏ ဗိသုကာ နှင့်အနုပညာလက်ရာများအား စိစစ်မှတ်တမ်းပြုစုလျက်ရှိကြောင်း သိရသည်။ အင်းဝဒေသသည် ရှေးဟောင်းအဆောက်အအုံ ၉၆၁ ခု ရှိသည့်အနက် ထိခိုက်ပျက်စီးခဲ့သော ရှေးဟောင်းအဆောက်အအုံ ၆၁၄ ခု စစ်ဆေး တွေ့ရှိကာ စာရင်းကောက်ယူပြီးစီး၍ အသေးစိတ်စာရင်းသွင်းမှု ၅၀၀ ကျော် ပြီးစီးပြီဖြစ်ပြီး Grading ခွဲပြီးပါက ပြုပြင်ထိန်းသိမ်းခြင်းကို ရွေးချယ် ဆောင်ရွက်သွားမည်ဖြစ်ကြောင်း သိရသည်။ ရှေးဟောင်းသုတေသနနှင့် အမျိုးသားပြတိုက်ဦးစီးဌာနအနေဖြင့် ထိခိုက်ပျက်စီးခဲ့သည့် ရှေးဟောင်း အဆောက်အအုံများအား ပြန်လည်ပြုပြင်ထိန်းသိမ်းနိုင်ရန်အတွက် လုပ်ငန်းများကို အဆင့်အလိုက် စနစ်တကျဆောင်ရွက်လျက်ရှိကြောင်း ပြီးခဲ့သည့် ဧပြီလ ၂၈ ရက်က ထုတ်ပြန်ထားသည်။ အဆိုပါပြုပြင် ထိန်းသိမ်း နိုင်ရေးလုပ်ငန်းများကို ဆောင်ရွက်ရာတွင် လုပ်ငန်းစဉ်များချမှတ်ပြီး လတ်တလော ပျက်စီးမှု စာရင်းကောက်ယူခြင်း၊ ဓာတ်ပုံ/ဗွီဒီယို မှတ်တမ်းများရိုက်ကူးခြင်း၊ အတွင်းနံရံဆေးရေးပန်းချီများ ထိခိုက်မှု ရှိ/မရှိ စစ်ဆေးခြင်းတို့ကို ဆောင်ရွက်လျက်ရှိကြောင်း သိရသည်။ ထို့ပြင် အရေးပေါ်ထိန်းသိမ်းရန် လိုအပ်ပါက ထိန်းသိမ်းခြင်း၊ သန့်ရှင်းရေးလုပ်ငန်း ဆောင်ရွက်ခြင်း၊ ခန့်မှန်းခြေ စာရင်းနှင့်အစီရင်ခံစာရေးသားခြင်း၊ Conserve / Restore/ Rebuild ဆောင်ရွက်ခြင်းစသည့် လုပ်ငန်းများကို သက်ဆိုင်ရာ နယ်မြေများအလိုက် အဖွဲ့များ ဖွဲ့စည်းဆောင်ရွက်လျက်ရှိကြောင်းလည်း ထုတ်ပြန် ခဲ့သည်။

ကိုးကား-NP News

ဘရာဇီးလီးယား  မေ ၁

အလွန်အကျွံ ပြုပြင်စီရင်ထားသည့် အစားအစာများကို အစားများပါက အသက်ငယ်ငယ်ရွယ်ရွယ်ဖြင့် သေဆုံးနိုင်ခြေ ပုံမှန်ထက်မြင့်မားလာနိုင်ကြောင်း သုတေသနပညာရှင်များက ဧပြီ ၃၀ ရက်တွင် ပြောကြားသည်။

ဘရာဇီး သုတေသနပညာရှင်များ၏ အဆိုအရ အလွန်အကျွံပြုပြင်စီရင်ထားသည့် အစားအစာများကို ၁၀ ရာခိုင်နှုန်းတိုး၍ စားသုံးတိုင်း ငယ်ငယ်ရွယ်ရွယ်ဖြင့် အသက်ဆုံးပါးနိုင်ခြေမှာလည်း ၂ ဒသမ ၇ ရာခိုင်နှုန်း မြင့်တက်လာတတ်ကြောင်း သိရသည်။

ဘရာဇီး သုတေသနပညာရှင်များသည် နိုင်ငံပေါင်း ရှစ်နိုင်ငံတို့မှ အသက် ၃၀ နှင့် ၆၉ နှစ်ကြားရှိသူများ၏ နေ့စဉ်စားသောက်ပုံများနှင့် ၎င်းတို့၏ ကျန်းမာရေးအခြေအနေများကို နှိုင်းယှဉ်လေ့လာခဲ့ပြီးနောက် ၎င်းတို့၏ တွေ့ရှိချက်များကို တင်ပြခဲ့ကြခြင်းဖြစ်သည်။

အလွန်အကျွံပြုပြင်စီရင်ထားသော အစားအစာများသည် ဆိုးဆေးများ၊ ဓာတုပစ္စည်းများ ထည့်သွင်းအသုံးပြုထားသည့် အစားအစာများဖြစ်ကြပြီး သကြား၊ ပြည့်ဝဆီနှင့် ဆားဓာတ်ပါဝင်မှုမြင့်မားသော အစားအစာများ ဖြစ်ကြကြောင်း သိရသည်။ 

Source: ရတနာပုံသတင်းစာ

အူလန်ဘာတာ   မေ ၁

မွန်ဂိုလီးယားနိုင်ငံ၌ လွန်ခဲ့သည့် ၂၄ နာရီအတွင်း ဝက်သက်ရောဂါဖြစ်ပွားသူ ၄၉ ဦးရှိရာ နိုင်ငံတစ်ဝန်း ရောဂါဖြစ်ပွားသူပေါင်း ၁၀၃၅ ဦးရှိကြောင်း နိုင်ငံ၏ အမျိုးသားရောဂါ ကူးစက်ပျံ့နှံ့မှုဆိုင်ရာစင်တာ (အင်န်စီစီဒီ) က မေ ၁ ရက်တွင် ထုတ်ပြန်ထားသည်။

ရောဂါကူးစက်ခံရသူ အများစုမှာ ကျောင်းနေအရွယ်ကလေးများဖြစ်ပြီး ၎င်းတို့သည် ဝက်သက်ရောဂါကာကွယ်ဆေး တစ်ကြိမ်သာ ထိုးနှံထားသူများဖြစ်ကြောင်း အဆိုပါ စင်တာက ထုတ်ပြန်ချက်တွင် ပြောကြားသည်။

အင်န်စီစီဒီက ဝက်သက်ကာကွယ်ဆေး နှစ်ကြိမ်ထိုးနှံမှုခံယူခြင်းဖြင့် ဖြစ်နိုင်ခြေရှိသည့် ပြင်းထန်ရောဂါများမှ ကလေးများကို ကာကွယ်ရန် မိဘများအား အကြံပြုထားသည်။

ဝက်သက်ရောဂါသည် အသက်ရှူလမ်းကြောင်းဆိုင်ရာ အမှုန်အမွှားများနှင့် တိုက်ရိုက်ဆက်သွယ်မှုများမှတစ်ဆင့် ကူးစက်တတ်သော ဗိုင်းရပ်စ်ရောဂါတစ်မျိုးဖြစ်သည်။

Source: မြန်မာ့အလင်းသတင်းစာ

တရုတ်နိုင်ငံ၏ ခေတ်မီအသွင်ပြောင်းမှုကို ရှေ့ဆက်ဖော်ဆောင်ရာ၌ မျိုးဆက်သစ် လူငယ်များအနေဖြင့် ရဲရဲဝံ့ဝံ့ တာဝန်ယူကြရန် အားပေး တိုက်တွန်းထားသော တရုတ်ကွန်မြူနစ်ပါတီ (CPC) ဗဟိုကော်မတီ အထွေထွေအတွင်းရေးမှူးချုပ် ရှီကျင့်ဖျင်၏ ဆောင်းပါးအား မေ ၁ ရက်၌ ထုတ်ဝေမည်ဖြစ်ကြောင်း သိရသည်။ တရုတ်နိုင်ငံ သမ္မတနှင့် ဗဟိုစစ် ကော်မရှင် ဥက္ကဋ္ဌလည်းဖြစ်သူ ရှီ ရေးသားထားသော အဆိုပါ ဆောင်းပါးအား CPC ဗဟိုကော်မတီ၏ အထင်ကရ မဂ္ဂဇင်းဖြစ်သော Qiushi Journal ၏ ယခုနှစ်အတွင်း ကိုးကြိမ်မြောက် ထုတ်ဝေသည့် မဂ္ဂဇင်းတွင် ဖော်ပြသွားမည်ဖြစ်သည်။

ကိုးကား- Xinhua

Photo: CGTN

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရန်ကုန်   မေ ၁

မြန်မာနိုင်ငံခရစ်ယာန်ဂိုဏ်းပေါင်းစုံ ငြိမ်းချမ်းရေးအထောက်အကူပြုဗဟိုကော်မတီက ကြီးမှူးကျင်းသည့် ငလျင်ဒဏ်နှင့် သဘာဝဘေးအန္တရာယ်သင့်ပြည်သူများနှင့် ငြိမ်းချမ်းရေးအတွက် ဆုတောင်းခြင်းအစီအစဉ်ကို ယနေ့မွန်းလွဲပိုင်းက ရန်ကုန်မြို့ ဒဂုံမြို့နယ် အလံပြဘုရားလမ်းရှိ မက်သဒစ် အင်္ဂလိပ်အသင်းတော် ဘုရားရှိခိုးကျောင်း၌ ကျင်းပသည်။

ဆုတောင်းခြင်းအစီအစဉ်သို့ မြန်မာနိုင်ငံခရစ်ယာန်ဂိုဏ်းပေါင်းစုံ ငြိမ်းချမ်းရေးအထောက်အကူပြု ဗဟိုကော်မတီအဖွဲ့ခေါင်းဆောင်၊ နိုင်ငံတော်စီမံအုပ်ချုပ်ရေးကောင်စီ ဗဟိုအကြံပေးအဖွဲ့ခေါင်းဆောင် ဦးစောထွန်းအောင်မြင့်နှင့် အဖွဲ့ဝင် ဒေါက်တာ မောင်မောင်နိုင်၊ ရန်ကုန်တိုင်းဒေသကြီးအစိုးရအဖွဲ့ တိုင်းရင်းသားရေးရာဝန်ကြီး ဦးစောဂျက်ကော့ထူး၊ မြန်မာနိုင်ငံ ခရစ်ယာန်ဂိုဏ်းပေါင်းစုံမှ ခေါင်းဆောင်များ၊ ဘာသာပေါင်းစုံချစ်ကြည်ညီညွတ်ရေးအဖွဲ့ဝင်များ၊ ဖိတ်ကြားထားသူများ တက်ရောက်ကြသည်။

အခမ်းအနားတွင် နိုင်ငံတော်စီမံအုပ်ချုပ်ရေးကောင်စီ ဗဟိုအကြံပေးအဖွဲ့ခေါင်းဆောင် ဦးစောထွန်းအောင်မြင့်က အမှာစကားပြောကြားသည်။

ထို့နောက် အစီအစဉ်အတိုင်း သမ္မာကျမ်းစာဖတ်ကြားခြင်း၊ ဓမ္မဒေသနာရွတ်ဖတ်ခြင်း၊ ဂုဏ်တော်ချီးမွမ်းခြင်းတို့ ဆောင်ရွက်ပြီး ငြိမ်းချမ်းရေးစကားများ ပြောကြားကြသည်။

ယင်းနောက် မန္တလေးငလျင်ကြောင့် ငလျင်ဘေးသင့်ပြည်သူများအပါအဝင် ပြည်တွင်း ပြည်ပကူညီကယ်ဆယ်ရေးအဖွဲ့များ၊ စေတနာရှင် အလှူရှင်များ၊ အသင်းတော်အဖွဲ့အစည်း အသီးသီးတွင် ကူညီဆောင်ရွက်ပေးကြသူများ၊ ဆေးအဖွဲ့များ၊ ပြန်လည်ထူထောင်ရေးအတွက် ပါဝင်ကူညီပံ့ပိုးပေးကြသူများ၊ သဘာဝဘေးအခက်အခဲကြုံတွေ့တိုင်း ပေးလှူကူညီခဲ့ကြသည့် အလှူရှင်များ၊ အမိမြန်မာပြည်နှင့် ကမ္ဘာကြီးငြိမ်းချမ်းရေးအတွက် ဆုတောင်းမေတ္တာများ ပို့သကြသည်။ 

Source: ကြေးမုံသတင်းစာ

လူငယ်များအနေနဲ့ ညဉ့်နက်မှအိပ်ရာ ဝင်ခြင်းထက် စောစောအိပ်ရာဝင်ခြင်း၊ အိပ်ချိန်ပိုယူခြင်းတို့က သူတို့ရဲ့ဦးနှောက်စွမ်းရည်ကို တိုးတက်စေနိုင်တဲ့အပြင် မှတ်ဉာဏ်လည်းကောင်းစေတယ်လို့ အမေရိကန်သုတေသနတစ်ခုမှာ အကျယ်တဝင့်ဖော်ပြထားပါတယ်။

အဲဒီသုတေသနမှာ ဆယ်ကျော်သက်များကိုအုပ်စုနှစ်ခုခွဲလိုက်ပြီး မတူညီသော အိပ်ရာဝင်ချိန်များ၊ အိပ်စက်ချိန်များမှာ အိပ်စက်စေကာ သူတို့ရဲ့ဦးနှောက်စွမ်းရည် ကိုတိုင်းတာခြင်းဖြစ်ပါတယ်။

အဲဒီလိုတိုင်းတာတဲ့အခါ တခြားသူများထက် အချိန် ၁၅ မိနစ်လောက်ပိုယူပြီး အိပ်စက်သူဆယ်ကျော်သက်များရဲ့ မှတ်ဉာဏ်က ပိုမိုတိုးတက်လာတာကိုတွေ့ရတယ်လို့ သုတေသီများကဆိုပါတယ်။

အိပ်စက်နေချိန်မှာ ဦးနှောက်ကအဆိပ်အတောက်တွေကိုဖယ်ရှားပြီး အာရုံကြောများရဲ့ချိတ်ဆက်မှုကို ပြန်လည်ဆန်းသစ်စေကာ  ဦးနှောက်ရဲ့စွမ်းဆောင်ရည်ကိုတိုးတက်စေတာဖြစ်ပါတယ်။   

 Ref: STD

K.H

Source: https://myawady.net.mm/

သိပ္ပံပညာရှင်များက သစ်ကြားသီးကို စားသုံးခြင်းကြောင့်ရရှိနိုင်တဲ့ ကောင်းကျိုး ရလဒ်တစ်ခုကို ဖော်ထုတ်ပေးလိုက်နိုင်ပါပြီ။ အဲဒီရလဒ်ကတော့ သစ်ကြားသီးကို စားသုံးခြင်းက အူမကြီးကျန်းမာရေးကို ကောင်းမွန်စေပြီး ကင်ဆာရောဂါဖြစ်ပွားခြင်းကို ကာကွယ်ပေးနိုင်တယ်ဆိုတာပါပဲ။

အဓိကကတော့  သစ်ကြားသီးမှာပါဝင်တဲ့ ပေါ်လီဖီနောဆိုတဲ့ဒြပ်ပေါင်းကို အူလမ်းကြောင်းမှာရှိတဲ့ ဇီဝသက်ရှိပစ္စည်းများကဖြိုခွဲလိုက်ပြီး ရောင်ရမ်းမှုကိုတိုက်ဖျက်တဲ့မော်လီကျူးများအဖြစ် ပြောင်းလဲသွားစေတာဖြစ်ပါတယ်။ အဲဒီမော်လီကျူးများက ရောင်ရမ်းမှုကိုတိုက်ဖျက်နိုင်ရုံသာမကဘဲ အူမကြီးကင်ဆာရောဂါဖြစ်ပွားနိုင်ခြေကိုပါလျှော့ချပေးနိုင်တယ်ဆိုတာကို UConn ဆေးတက္ကသိုလ်မှသုတေသနပညာရှင်များက တွေ့ရှိထားတာဖြစ်ပါတယ်။                       

Ref: STD

K.H

Source: https://myawady.net.mm/

ဦးနှောက်ရဲ့စိတ်ပိုင်းဆိုင်ရာထိန်းချုပ်မှုနေရာကို အဓိကပစ်မှတ်ထားတဲ့ အသံလှိုင်းသုံးကုသနည်းတစ်မျိုးက စိတ်ကျခြင်းနဲ့ စိုးရိမ်ကြောင့်ကြခြင်းတို့လို ရောဂါ လက္ခဏာတွေကို လျော့ပါးသက်သာစေနိုင်တယ်လို့ UT Austin ရဲ့ သုတေသနပြု လေ့လာမှုမှာဖော်ပြထားပါတယ်။

လူနာတွေအနေနဲ့ အသံလှိုင်းအသုံးပြုကုသမှုကို သီတင်းပတ်သုံးပတ်ကြာခံယူပြီးတဲ့နောက်မှာ စိတ်ကျန်းမာရေးအရ တိုးတက်မှုများစွာ ရှိလာတာကိုတွေ့ရပါတယ်။ ဒါဟာ စိတ်ပိုင်းဆိုင်ရာကုသမှုအတွက် ရှေ့ပြေးလုပ်ဆောင်ချက်တစ်ခု ဖြစ်လာတယ်လို့ဆိုပါတယ်။

သူ့ရဲ့နည်းက ဦးနှောက်အတွင်းပိုင်းရှိ နေရာကို အသံလှိုင်းထုတ်လွှတ်ပြီး လှုံ့ဆော်ပေးတာမျိုးဖြစ်ပါတယ်။

Ref: STD

K.H

Source: https://myawady.net.mm/