နယူးယောက်  မေ ၈

သစ်ကြံပိုးအစားများမှုသည် ဆေးဝါးတချို့ကို လူ့ခန္ဓာကိုယ်က စုပ်ယူနိုင်စွမ်းအပေါ် ဆိုးကျိုးသက်ရောက်မှုရှိလာနိုင်ကြောင်း သုတေသနပညာရှင်များက မေ ၇ ရက်တွင် ပြောကြားသည်။

သစ်ကြံပိုးကို အနည်းငယ်မျှ စားပါက ကျန်းမာရေးအရ အကျိုးရှိသော်လည်း အလွန်အကျွံစားသုံးပါက လူ့ကိုယ်ခန္ဓာ၏ ဆေးဝါးများ စုပ်ယူနိုင်စွမ်းအပေါ် ဆိုးကျိုးသက်ရောက်မှုရှိလာနိုင်ကြောင်း အမေရိကန် သုတေသနပညာရှင်များက ပြောကြားသည်။

သစ်ကြံပိုးတွင် ပါဝင်သည့် Cinnamaldehyde ခေါ် ဓာတုပစ္စည်းတစ်မျိုးသည် ဆေးဝါးတချို့၏ အာနိသင်ကို ထိခိုက်စေနိုင်သော အင်ဇိုင်းများကို စေ့ဆော်ပေးနိုင်ဖွယ်ရှိကြောင်း သုတေသနပညာရှင်များက သုံးသပ်ထားသည်။

အမေရိကန် သုတေသနပညာရှင်များ၏ လေ့လာတွေ့ရှိချက်အရ သစ်ကြံပိုး အလွန်အကျွံစားသုံးပါက လူ့ခန္ဓာကိုယ်သည် အချို့ဆေးဝါးများကို လျင်မြန်စွာ ရှင်းလင်းပစ်တတ်ရာ ဆေးဝါး၏ အာနိသင်လည်း ကျဆင်းသွားတတ်ကြောင်း သိရသည်။

သို့ရာတွင် သစ်ကြံပိုးအစားများမှုနှင့် လူ့ခန္ဓာ၏ ဆေးဝါးတချို့အပေါ် တုံ့ပြန်ပုံတို့ကြား မည်သို့ ဆက်စပ်နေသည်ကို ဖော်ထုတ်ရန် သုတေသနလုပ်ငန်းများ ဆက်လုပ်ရန်လိုကြောင်း သိရသည်။

ပြီးခဲ့သည့် နှစ်များအတွင်း ပုံစံ-၂ ဆီးချိုရောဂါလူနာများကြား သစ်ကြံပိုး ဖြည့်စွက်ဆေးစားသုံးမှုမြင့်မားလာကြောင်း သိရသည်။

Source: ရတနာပုံသတင်းစာ 

နေပြည်တော် မေ ၈

ရုရှားဖက်ဒရေးရှင်းနိုင်ငံတွင် ကျင်းပပြုလုပ်မည့် ၁၉၄၁-၁၉၄၅ မဟာမျိုးချစ်စစ်ပွဲကြီးအောင်ပွဲ နှစ်(၈၀)ပြည့်အထိမ်းအမှတ် စစ်ရေးပြအခမ်းအနားသို့ တက်ရောက်ရန်အတွက် မော်စကိုမြို့သို့ ရောက်ရှိနေသည့် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် ဇနီး ဒေါ်ကြူကြူလှ၊ ခရီးစဉ်တွင်လိုက်ပါလာသည့် အဖွဲ့ဝင်များလိုက်ပါ၍ မေ ၇ ရက် ဒေသစံတော်ချိန်ညပိုင်းတွင် State Academic Bolshoi Theatre သို့ ရောက်ရှိကြပြီး ၁၉၄၁-၁၉၄၅ မဟာမျိုးချစ်စစ်ပွဲကြီးအောင်ပွဲ နှစ်(၈၀)ပြည့်အထိမ်းအမှတ် “The Young Lady and The Hooligan” ဘဲလေးအကဖြင့် ကပြဖျော်ဖြေမှုအား ကြည့်ရှုအားပေးကြသည်။

ဦးစွာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ဇနီး၊ အဖွဲ့ဝင်များသည် State Academic Bolshoi Theatre သို့ ရောက်ရှိကြရာ ရုရှားဖက်ဒရေးရှင်းနိုင်ငံ ဖက်ဒရယ်ကောင်စီလွှတ်တော်ဥက္ကဋ္ဌ Mrs. Valentina Matvienko နှင့်တာဝန်ရှိသူများက ကြိုဆိုနှုတ်ဆက်ကြသည်။ ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်ဇနီး၊ အဖွဲ့ဝင်များသည် ရုရှားဖက်ဒရေးရှင်းနိုင်ငံ ဖက်ဒရယ်ကောင်စီလွှတ်တော်ဥက္ကဋ္ဌနှင့် ရုရှားဖက်ဒရေးရှင်းနိုင်ငံမှ တာဝန်ရှိသူများ၊ အထိမ်းအမှတ်ကပွဲသို့ လာရောက်ကြည့်ရှုကြသူများနှင့်အတူ ၁၉၄၁-၁၉၄၅ မဟာမျိုးချစ်စစ်ပွဲကြီးအောင်ပွဲ နှစ်(၈၀)ပြည့်အထိမ်းအမှတ်အဖြစ် “The Young Lady and The Hooligan” ဘဲလေးအကဖြင့် ကပြဖျော်ဖြေမှုအား ကြည့်ရှုအားပေးကြသည်။

ကပြဖျော်ဖြေမှုအပြီးတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် ဇနီးတို့က ဖျော်ဖြေရေးအဖွဲ့များအတွက် ဂုဏ်ပြုပန်းခြင်းကို ပေးအပ်ချီးမြှင့်ခဲ့ရာ ကဇာတ်ရုံမှတာဝန်ရှိသူတစ်ဦးက ကိုယ်စားပေးအပ်ခဲ့သည်။

အဆိုပါ State Academic Bolshoi Theatre သည် ကမ္ဘာ့အကျော်ကြားဆုံးကဇာတ်ရုံများထဲမှတစ်ခုဖြစ်ပြီး ၁၉ နှင့် ၂၀ ရာစုများအတွင်း Bolshoi ကဇာတ်ရုံသည် Tchaikovskyl Glinka နှင့် Mussorgsky တို့၏ လက်ရာများ ပထမဆုံးဖျော်ဖြေခဲ့သည့် ရုရှားအော်ပရာနှင့် ဘဲလေးအနုပညာတို့၏ ယဉ်ကျေးမှုဗဟိုအချက်အချာနေရာဖြစ်လာခဲ့ကြောင်း၊ ၂၀၀၅ ခုနှစ်မှ ၂၀၁၁ ခုနှစ်အထိ အကြီးစားပြန်လည်မွမ်းမံမှုများပြုလုပ်ခဲ့ပြီး ခေတ်မီစက်ပစ္စည်းများတပ်ဆင်ကာ သမိုင်းဝင်အဆောက်အဦ၏အလှကို ပြန်လည်ထိန်းသိမ်းခဲ့ကြောင်း၊ ယနေ့အချိန်တွင် Bolshoi ကဇာတ်ရုံသည် ရုရှားယဉ်ကျေးမှု၏ သင်္ကေတတစ်ခုအဖြစ် ကမ္ဘာ့အဆင့်မီ အနုပညာဖျော်ဖြေမှုများကို ဆက်လက်တင်ဆက်လျက်ရှိကြောင်း သတင်းရရှိသည်။

Source: MOI

ယခုနှစ်ဘောလုံးရာသီ ပြိုင်ပွဲများအတွက် ကစားသမားအင်အားဖြည့်တင်းနေသည့် ရန်ကုန်ယူနိုက်တက်အသင်းသည် ဘရာဇီးညာတောင်ပံ ကစားသမား EDUARDO ANDRADE BRANDAO အား ခေါ်ယူခဲ့ကြောင်း သိရသည်။

EDUARDO ANDRADE BRANDAO အား အင်ဒိုနီးရှားကလပ် ပါစီကိုတာအသင်းမှ ခေါ်ယူခဲ့ခြင်းဖြစ်ကာ အသက် (၂၇) နှစ်ရှိပြီ ဖြစ်သည်။ EDUARDO ANDRADE BRANDAO သည် ဘရာဇီး ယူ – ၁၇ အသင်းတွင် ရွေးချယ်ခံခဲ့ရပြီး ညာတောင်ပံအပြင်ကွင်းလယ်တိုက်စစ်နေရာပါ ဆော့ကစားနိုင်ပြီး အဇာဘိုင်ဂျန်၊ ဘာရိန်း နှင့် ဒူဘိုင်းနိုင်ငံရှိ ကလပ်အသင်းများတွင်လည်း ခြေစွမ်းပြကစားခဲ့သည့် ကစားတစ်ဦးဖြစ်ကြောင်း ရန်ကုန်ယူနိုက်တက်က ပြောသည်။

ရန်ကုန်ယူနိုက်အသင်းသည် ယခုနှစ်ရာသီအတွက် ကစားသမားအင်အားဖြည့်တင်းမှုအဖြစ် မိုဂူး၊ အိုင်ဒရစ် နှင့် အိုတိုဆိုင်တို တို့ကိုခေါ်ယူထားခဲ့ပြီး စတုတ္ထမြောက်နိုင်ငံခြားသားကစားသမားခေါ်ယူမှုအဖြစ် EDUARDO ANDRADE BRA NDAO ကို ခေါ်ယူခဲ့ခြင်းဖြစ်သည်။

Source: Popular Myanmar

ကြာသပတေးနေ့ (မေ ၈) တွင် ရောမမြို့၌ သမိုင်းဝင်ဖြစ်ရပ်တစ်ခု ဖြစ်ပေါ်ခဲ့သည်။ ချီကာဂိုမြို့သား အသက် ၆၉ နှစ်အရွယ် Robert Francis Prevost သည် ပထမဆုံးသော အမေရိကန်နိုင်ငံသား ပုပ် ရဟန်းမင်းကြီးအဖြစ် ရွေးချယ်တင်မြှောက်ခံခဲ့ရပြီး Leo XIV ဟူသော ဘွဲ့အမည်ကို ခံယူခဲ့သည်။

Leo XIV သည် ဗာတီကန်ရှိ စိန်ပီတာဘုရားကျောင်း၏ စင်မြင့်သို့ တက်ရောက်ကာ ထောင်နှင့်ချီသော ပရိသတ်အား "သင်တို့အားလုံး ငြိမ်းချမ်းကြပါစေ" ဟု နှုတ်ဆက်ခဲ့သည်။ ၎င်းက "ပြန်လည်ထမြောက်တော်မူသော ခရစ်တော်၏ ပထမဆုံးသော နှုတ်ဆက်စကား" ကို ပေးအပ်ရင်း ၎င်း၏ ငြိမ်းချမ်းရေး သတင်းစကားသည် "ကျွန်ုပ်တို့၏ နှလုံးသားများနှင့် မိသားစုများထဲသို့ စွဲမြဲစွာ ကိန်းအောင်းနိုင်ပါစေ" ဟု တိုက်တွန်းခဲ့သည်။

Prevost သည် လက်တင်အမေရိကတွင် သာသနာပြုအဖြစ် တာဝန် ထမ်းဆောင်ခဲ့သူဖြစ်ပြီး ပီရူးနိုင်ငံ Trujillo မြို့တွင် ဆယ်နှစ်ကြာ အမှုတော်ဆောင်ခဲ့ကာ နောက်ပိုင်းတွင် Chiclayo ၏ ဂိုဏ်းအုပ် (Bishop) အဖြစ် တာဝန်ထမ်းဆောင်ခဲ့သည်။ ၂၀၂၃ ခုနှစ်တွင် ကွယ်လွန်သူ ပုပ်ရဟန်းမင်းကြီး ဖရန်စစ်မှ Cardinal အဖြစ် တင်မြှောက်ခံခဲ့ရပြီး ကမ္ဘာတစ်ဝှမ်းရှိ ဂိုဏ်းအုပ်များ ခန့်အပ်ရန် တာဝန်ရှိသည့် ဗာတီကန်၏ Congregation for Bishops အဖွဲ့၏ ခေါင်းဆောင်အဖြစ်လည်း တာဝန် ထမ်းဆောင်ခဲ့သည်။ အဆိုပါရာထူးသည် ၎င်းအား ပုပ်ရဟန်းမင်းကြီးအဖြစ် ရွေးချယ်ခံရန် အလားအလာများစေခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ထိုင်းနိုင်ငံတွင် ဝက်သားစိမ်းစားသုံးမှုနှင့်ဆက်နွှယ်သည့် Streptococcus suis ရောဂါကူးစက်မှုဖြစ်ပွားခဲ့ပြီး အတည်ပြု သေဆုံးလူနာ ၂ ဦး အထိ ရှိခဲ့ကြောင်း ထိုင်းပြည်သူ့ကျန်းမာရေးဝန်ကြီးဌာနက သတိပေးချက် ထုတ်ပြန်ခဲ့ပါသည်။

ထိုင်းနိုင်ငံရှိ အချို့ စားသုံးသူများအကြား ရေပန်းစားသည့် အစားအစာတစ်မျိုးဖြစ်သော ဝက်သားစိမ်းကို နုတ်နုတ်စင်းကာ အစပ်အရသာ အများအပြား ထည့်၍ သုပ်ထားသည့် ဝက်သားသုပ်ဟင်းလျာကို စားပြီးနောက် ကူးစက်မှုဖြစ်သည်ဟု သိရပါသည်။ ပြည်သူ့ကျန်းမာရေးဝန်ကြီး ဆွန်ဆက်ခ် သက်ဆုသင်၏ပြောကြားချက်အရ ဖာရေ့ခရိုင်တွင် ရောဂါပိုးကူးစက်ခံရသူ ၁၄ ဦး ရှိပြီး ၂ ဦး သေဆုံးခဲ့သည်ဟု သိရပါသည်။ ထို့ကြောင့် ဝက်သားအစိမ်းကို စားပြီးနောက် အဖျားကြီးလာခြင်း၊ ကြွက်သား နာကျင်ကိုက်ခဲခြင်းများခံစားရသည်နှင့် ဆေးကုသမှု ချက်ချင်းခံယူသင့်သည်ဟု အကြံပြုထားပါသည်။

Strepto coccus suis ရောဂါပိုးသည် မကုသဘဲထားပါက အကြားအာရုံကို ရေရှည်ဆုံးရှုံးနိုင်ခြင်းကြောင့် အမြန်ကုသနိုင်ရန် လိုအပ်ကြောင်း သိရပါသည်။

ကိုးကား-NP News

အမေရိကန်သမ္မတ ဒေါ်နယ်ထရမ့်က ၂၀၂၆ ကမ္ဘာ့ဖလားပြိုင်ပွဲတွင် ရုရှား အတွက် ပါဝင်ယှဉ်ပြိုင်ခွင့်ရရန် အခွင့်အလမ်းရရှိစေခြင်းက ယူကရိန်းစစ်ပွဲ အဆုံးသတ်ရန် စွမ်းဆောင်နိုင်လိမ့်မည်ဟု ပြောကြားခဲ့သည်။

၂၀၂၂ ခုနှစ်တွင် ယူကရိန်းကို ကျူးကျော်စစ်ဆင်နွှဲပြီးကတည်းက ရုရှား လက်ရွေးစင်ဘောလုံးအသင်းများကို FIFA နှင့် UEFA မှ နိုင်ငံတကာ ပြိုင်ပွဲ ယှဉ်ပြိုင်ခွင့် ပိတ်ပင်ထားခဲ့ခြင်းဖြစ်သည်။

ဒေါ်နယ်ထရမ့်သည် ၂၀၂၄ ခုနှစ်၊ နိုဝင်ဘာလက အမေရိကန်သမ္မတအဖြစ် ဒုတိယအကြိမ် ရွေးကောက်ခံရလျှင် သမ္မတရာထူး တာဝန်ထမ်းဆောင်သည့် ပထမဆုံးနေ့ကတည်းက ယူကရိန်းစစ်ပွဲ ရပ်တန့်ရန် ကြိုးပမ်းသွားမည် ဖြစ်ကြောင်း မဲဆွယ်ခဲ့သည်။

လက်ရှိစည်းမျဉ်းများအရ ရုရှားအသင်းသည် အမေရိကန်၊ ကနေဒါနှင့် မက္ကဆီကို သုံးနိုင်ငံ ပူးတွဲအိမ်ရှင်အဖြစ် ကျင်းပမည့် ၂၀၂၆ ကမ္ဘာ့ဖလား ပြိုင်ပွဲတွင် ပါဝင်ခွင့်မရှိကြောင်း သိရသည်။

ဒေါ်နယ်ထရမ့်သည် ၂၀၂၆ ကမ္ဘာ့ဖလား ကျင်းပရေးတာဝန်ရှိသူများနှင့် ၎င်း၏ ရုံးအဖွဲ့ ပထမဆုံးအကြိမ် တွေ့ဆုံရာတွင် ယခုကဲ့သို့ ပြောကြားခဲ့ခြင်း ဖြစ်သည်။

ယင်းတွေ့ဆုံပွဲသို့ ကမ္ဘာ့ဘောလုံးအဖွဲ့ချုပ် (FIFA) ဥက္ကဋ္ဌဖြစ်သူ အင်ဖန်တီနို လည်း တက်ရောက်ခဲ့သည်။

ဒေါ်နယ်ထရမ့်က ရုရှားအား နိုင်ငံတကာပြိုင်ပွဲများ ယှဉ်ပြိုင်ခွင့် ပိတ်ပင်ထားမှုကို ၎င်းအနေဖြင့် သတိမမူမိကြောင်းလည်း ဝန်ခံခဲ့သည်။

“အဆိုပါကိစ္စကို မိမိအနေဖြင့် သိရှိခြင်းမရှိပါ။ ရုရှားကို နိုင်ငံတကာပြိုင်ပွဲများ ယှဉ်ပြိုင်ခွင့်ပိတ်ပင်ထားမှုက အမှန်လား” ဟု ဒေါ်နယ်ထရမ့်က အင်ဖန်တီနို ကို မေးမြန်းခဲ့သည်။

အင်ဖန်တီနိုက “အမှန်ပါပဲ။ ရုရှားကို ပြိုင်ပွဲကစားခြင်း မပြုနိုင်ရန် ပိတ်ပင်ခံထားရပါသည်။ သို့သော် တစ်စုံတစ်ရာဖြစ်လာရန်နှင့် ငြိမ်းချမ်းရေးကို မိမိတို့ မျှော်လင့်ထားပါသည်။ ထိုအချက်ကတော့ ရုရှားအနေဖြင့် ပြိုင်ပွဲ ပြန်လည်ယှဉ်ပြိုင်ရန်ပါ” ဟု တုံ့ပြန်ခဲ့သည်။

ယင်းစကားကိုမူ ဒေါ်နယ်ထရမ့်က “ဒါက ဖြစ်နိုင်ပါသည်။ ကောင်းမွန်သည့် ဆွဲဆောင်မှုတစ်ခုလည်း ဖြစ်ပါသည်။ မိမိတို့အနေဖြင့် ၎င်းတို့ကို ရပ်တန့်ရန် အလိုရှိခဲ့ကြပါသည်။ တစ်ပတ်ကို လူငယ် ငါးထောင်ခန့် အသတ်ခံနေရပါသည်။ ဒါက ယုံနိုင်စရာပင် မရှိပါ” ဟု ပြောကြားခဲ့သည်။

ထို့ပြင် ၎င်းက ရုရှားအား ပြန်လည်ယှဉ်ပြိုင်ခွင့်ပြုမှုသည် အင်ဖန်တီနိုသာ ဆုံးဖြတ်နိုင်ပြီး မိမိအနေဖြင့် မည်သည့်တောင်းဆိုမှုမျှ ပြုလုပ်မည်မဟုတ်ကြောင်းလည်း မှတ်ချက်ပြုခဲ့သည်။

အမေရိကန်ဒုသမ္မတဖြစ်သူ ဂျေဒီဗန့်က ပြိုင်ပွဲသို့ လာရောက်မည့် ကမ္ဘာတစ်ဝန်းမှ ပရိသတ်များကို လှိုက်လှဲပျူငှာစွာ ကြိုဆိုမည်ဖြစ်သော်လည်း ပြိုင်ပွဲပြီးဆုံးလျှင် နေရပ်သို့ပြန်ရမည်ဖြစ်ကြောင်း သတိပေးခဲ့သည်။

အမေရိကန်သည် ၂၀၂၆ ကမ္ဘာ့ဖလားပြိုင်ပွဲမှ ဗိုလ်လုပွဲအပါအဝင် ပွဲစဉ်ပေါင်း (၁၀၄) ပွဲအနက် (၇၈) ပွဲကို လက်ခံကျင်းပရမည်ဖြစ်သည်။

ထို့ပြင် အမေရိကန်အနေဖြင့် လာမည့်လတွင်လည်း ပုံစံသစ်ဖြင့် ကျင်းပသွားမည့် ၂၀၂၅ ကလပ်ကမ္ဘာ့ဖလားပြိုင်ပွဲကိုလည်း အိမ်ရှင်အဖြစ် ကျင်းပမည်ဖြစ်ကြောင်း သိရသည်။

ကိုးကား- Eleven Media Group

ကင်မရွန်းနိုင်ငံက ကမ္ဘာ့ပထမဆုံးအဖြစ် ကလေးငယ်များအတွက် ငှက်ဖျားရောဂါကာကွယ်ဆေးထိုး လုပ်ငန်းဆောင်ရွက်မှုကို ဇန်နဝါရီလ ၂၂ ရက်တွင်စတင်လိုက်ပြီဖြစ်ကြောင်းသိရသည်။

အဆိုပါကာကွယ်ဆေးသည် ငှက်ဖျားရောဂါအတွက် ကမ္ဘာ့ပထမဆုံးကာကွယ်ဆေးဖြစ်ပြီး ထိုကာကွယ်ဆေးမှာ ဗြိတိန်နိုင်ငံ GSK ကုမ္ပဏီက ထုတ်လုပ်သည့် Mosquirix  ဆေးဖြစ်သည်။

ယခုကဲ့သို့ ငှက်ဖျားရောဂါကာကွယ် ဆေးထိုးလုပ်ငန်းကို ကင်မရွန်းကဲ့သို့သောနိုင်ငံ၌   စတင်လုပ်ဆောင်နိုင်ခြင်းသည် သမိုင်းမှတ်တိုင်တစ်ရပ်ကို စိုက်ထူနိုင်ခြင်းဖြစ်ကြောင်း ကမ္ဘာ့ကျန်းမာရေးအဖွဲ့ကပြောသည်။

အာဖရိကဒေသသည် ကမ္ဘာပေါ်တွင် ငှက်ဖျားရောဂါဖြစ်ပွားမှုကြောင့် သေဆုံးမှုစုစုပေါင်းအနက် ၉၆ ရာခိုင်နှုန်းနှင့် ရင်ဆိုင်နေရသည့်ဒေသဖြစ်သည်။

အာဖရိကဒေသအနက် ကင်မရွန်းနိုင်ငံမှာ နှစ်စဉ်ငှက်ဖျားရောဂါဖြစ်ပွားသူ ခြောက်သန်းကျော်ရှိပြီး ၂၀၂၁ ခုနှစ်တစ်နှစ်တည်းမှာပင်ထိုရောဂါကြောင့်သေဆုံးသူ ၁၃၈၃၉ ဦးရှိသည်။  ၎င်းတို့အနက် သေဆုံးသူအများစုမှာ အသက်ငါးနှစ်အောက်ကလေးငယ်များဖြစ်သည်။

ဒီလိုမျိုးကာကွယ်ဆေးထိုးလုပ်ငန်းက လူ့အသက်ပေါင်းများစွာကို ကယ်တင်နိုင်ပါလိမ့်မယ်။ ဒါ့အပြင်မိသားစုများနဲ့နိုင်ငံရဲ့ကျန်းမာရေးစောင့်ရှောက်မှုစနစ်များအပေါ်လည်း ကြီးစွာသောသက်သာမှု ရရှိစေပါလိမ့်မယ်ဟု ကာကွယ်ဆေးများနှင့် ကိုယ်ခံအားမြှင့်တင်ခြင်း ကမ္ဘာ့ပူးပေါင်းအဖွဲ့(GAVI)မှ ကာကွယ်ဆေးထိုး အစီအစဉ်ညွှန်ကြားရေးမှူး အော်ရယ်လီယာငုယန်ကပြောသည်။

Ref:RT

Source: https://myawady.net.mm/

ရိုမန်ကက်သလစ်ဘုရားကျောင်း၏ ခရစ်ယာန်ဘုန်းတော်ကြီးများ (Cardinals) သည် ပုပ်ရဟန်းမင်းကြီးအသစ် ရွေးချယ်ရေး ကွန်ကလိတ် အစည်းအဝေးကို မကြာမီ ပြုလုပ်မည်ဖြစ်ပြီး မဲပေးခြင်းကို မေလ ၇ ရက်နေ့တွင် စတင်မည်ဖြစ်သည်။ 

(ဂျပန်ဘုန်းတော်ကြီး ၂ ဦးအပါအဝင်) ကမ္ဘာတစ်ဝှမ်းမှ ခရစ်ယာန် ဘုန်းတော်ကြီး ၁၃၃ ဦးတို့က ဆန္ဒမဲပေးမည်ဖြစ်သည်။

လျှို့ဝှက်မဲပေးခြင်းကို ဗာတီကန်ရှိ စစ်စတိုင်းဘုရားကျောင်း (Sistine Chapel) တွင် ပြုလုပ်မည်ဖြစ်ပြီး မဲအရေအတွက်၏ အနည်းဆုံး ၃ ပုံ ၂ ပုံ (၆၇%) ရရှိမှသာ ပုပ်ရဟန်းမင်းကြီးအဖြစ် ရွေးချယ်ခံရမည်ဖြစ်သည်။

ကွယ်လွန်သွားသည့် ပုပ်ဖရန်စစ် (အာဂျင်တီးနား) သည် လက်တင် အမေရိကမှ ပထမဆုံး ပုပ်ရဟန်းမင်းကြီးဖြစ်ခဲ့ပြီး၊ ခေတ်သစ်ပြုပြင် ပြောင်းလဲရေးများကြောင့် ကျော်ကြားသည်။ 

အီတလီနိုင်ငံသား ဘုန်းတော်ကြီး Pietro Parolin (ပုပ်ဖရန်စစ်၏ အနီးကပ်အကြံပေး) သည် ပုပ်ဖရန်စစ်နေရာအား ဆက်ခံရန် အလားအလာရှိသူဟု သတင်းများက ဆိုသည်။ 

ကိုးကား-NHK World

ဘာသာပြန်ဆိုသူ-ဒေါ်မေသူခိုင်၊လက်ထောက်ညွှန်ကြားရေးမှူး၊နစက-၃

ဟယ်လ်ဆင်ကီး  မေ ၆

ဆေးလိပ်၊ အရက် သောက်သုံးခြင်းနှင့် လေ့ကျင့်ခန်းပြုလုပ်မှုကင်းမဲ့ခြင်းတို့သည် လူတစ်ဦး၏ ကျန်းမာရေးကို ဆိုးကျိုးသက်ရောက်လာနိုင်ကြောင်း မေ ၅ ရက်သတင်းများအရ သိရသည်။

ဖင်လန် သုတေသနပညာရှင်များ၏ လေ့လာတွေ့ရှိချက်အရ အထက်ဖော်ပြပါ အကျင့်ဆိုးသုံးမျိုး ရှိနေသူများအနေဖြင့် အသက် ၃၆ နှစ်လောက်မှစ၍ ရုပ်ပိုင်းဆိုင်ရာနှင့် စိတ်ပိုင်းဆိုင်ရာ ကျန်းမာရေးအခြေအနေများ စတင်ကျဆင်းလာနိုင်ကြောင်း သိရသည်။

သို့ဖြစ်ရာ အသက်ငယ်ငယ်ရွယ်ရွယ်တွင် စိတ်ကျန်းမာရေးနှင့် ရုပ်ကျန်းမာရေး အခြေအနေများ စတင်ကျဆင်းလာနိုင်မှုကို ကာကွယ်ရေးအတွက် ဆေးလိပ်သောက်သုံးမှုနှင့် အရက်သောက်သုံးမှုတို့ကို ထိန်းချုပ်ရန်လိုအပ်ပြီး လေ့ကျင့်ခန်း ပုံမှန်လုပ်သင့်ကြောင်း ဖင်လန်သုတေသနပညာရှင်များက ပြောကြားသည်။

ဖင်လန် သုတေသနပညာရှင်များသည် ၁၉၅၉ ခုနှစ်တွင် မွေးဖွားခဲ့သူ ဦးရေ ၃၀၀ ကျော်တို့၏ ဘဝတစ်လျှောက် ကျန်းမာရေးမှတ်တမ်းများကို လေ့လာခဲ့ကြကြောင်း သိရသည်။။

လေ့လာချက်မှ ပေါ်ထွက်လာသည့် ရလဒ်များအရ ကျန်းမာရေးနှင့်မညီညွတ်သည့် အကျင့်ဆိုးသုံးမျိုးလုံး ရှိနေသူများ၌ စိတ်ကျဝေဒနာနှင့် အခြားကျန်းမာရေးပြဿနာများ ပေါ်လာနိုင်ခြေ မြင့်မားနေတတ်သည်ကို တွေ့ရကြောင်း သိရသည်။

Source: ရတနာပုံသတင်းစာ

ပျောက်ကွယ်နေသည့် စက္ခုအာရုံကို ပြန်လည်ရရှိစေနိုင်သည့် ချစ်ပြားတစ်ခုကို လူသားများ၏ ဦးနှောက်အတွင်းသို့လာမည့်နှစ်အတွင်း   ထည့်သွင်းပေးနိုင်ရန် အမေရိကန်ကုမ္ပဏီကြီးတစ်ခုဖြစ်သည့် Neuralink က စီစဉ်လျက်ရှိသည်။

အဆိုပါချစ်ပြားသည်   မွေးစကပင် မျက်စိအလင်းမရခဲ့သူများကိုပင် စက္ခုအာရုံပြန်လည်ရရှိလာနိုင်စေမည်ဖြစ်သည်။

ထို့ပြင် Neuralink ကုမ္ပဏီ၏ အဆိုပါချစ်ပြားသည် လူသားများ၏ တွေးခေါ်မှု၊ မှတ်ဉာဏ်နှင့် အာရုံခံမှုစသည့် လုပ်ဆောင်ချက်များကို   လုပ်ဆောင်ပေးနေသည့် ဦးနှောက်၏ ပြင်ပအလွှာနှင့် အပြန်အလှန်အကျိုးပြုနိုင်သည်ဟုဆိုသည်။

Neuralinkကုမ္ပဏီအနေဖြင့် လူ့ဦးနှောက်အတွင်းသို့ ချစ်ပြားထည့်သွင်းပေးမည့်အစီအစဉ်ကိုတစ်နှစ်ကြာ လုပ်ဆောင်ရန်မျှော်မှန်းထားသည်။ ထို့ပြင် သိပ္ပံပညာရှင်များသည် ကျောရိုးထိခိုက် ပျက်စီးမှုကြောင့်   လမ်းမလျှောက်နိုင်သူများအတွက်လည်း အသုံးပြုနိုင်မည့် ချစ်ပြားများကို ထုတ်လုပ်နိုင်ရန်ကြိုးပမ်းလျက်ရှိသည်။

အဆိုပါကုမ္ပဏီသည် လူ့ဦးနှောက်အတွင်းသို့ အမြင်အာရုံပြန်လည်ရရှိစေမည့် ချစ်ပြားထည့်သွင်းရန်အတွက် ကုသမှုခံယူမည့် စေတနာ့ဝန်ထမ်းများကို ရှာဖွေမည်ဖြစ်ကြောင်း ယခုနှစ် ဧပြီလအတွင်းက ထုတ်ပြန်ကြေညာထားသည်။    

Ref: Iz 

Source: https://myawady.net.mm/