လာမည့် ဩဂုတ်(၁)ရက်မှစတင်၍ တောင်ပြုံးပွဲတော်ကို အစဉ်အလာမပျက် ကျင်းပမည်ဖြစ်ကြောင်း သိရသည်။

ပွဲတော်ကို လာမည့် ဝါခေါင်လဆန်း(၈) ရက်မှ (၁၅)ရက်အထိ ဩဂုတ်(၁)ရက်မှ ဩဂုတ်(၈)ရက်အထိ စည်ကားသိုက်မြိုက်စွာကျင်းပမည်လည်း ဖြစ်သည်။

သမိုင်းဝင် တောင်ပြုံး ဆုတောင်းပြည့်မြတ်စွာဘုရားသည် မန္တလေးတိုင်းဒေသကြီး၊ အောင်မြေသာစံခရိုင်၊ မတ္တရာမြို့နယ်၊ တောင်ပြုံးကျေးရွာအုပ်စု၊ တောင်ပြုံးကြီးကျေးရွာတွင် ရှိခြင်းဖြစ်သည်။

ယခုနှစ် ပွဲတော်သို့ ဘုရားဖူးတိုင်းရင်းပြည်သူများ၊ ရိုးရာဓလေ့ ကိုးကွယ်သူများ၊ ဈေးသူ/ဈေးသားများအား စိတ်အေးချမ်းသာစွာဖြင့် လာရောက်နိုင်ကြရန် ပွဲတော်ကျင်းပရေးကော်မတီမှ အသိပေးကြေညာထားကာ နယ်မြေဒေသအခြေအနေသည်လည်း အေးချမ်းတည်ငြိမ်လျက်ရှိသည်ဟု ဆိုသည်။

တောင်ပြုံးပွဲတော်ကို နှစ်စဉ် ဝါခေါင်လဆန်း၈ရက်မှ စတင်ပြီး ကျင်းပလေ့ရှိရာ ဝါခေါင်လဆန်း ၈ရက်နှင့် ၉ရက်တို့တွင် ကန်တော့ခံပွဲ၊ ဝါခေါင်လဆန်း၁၀ရက်တွင် ညီလာခံဝင်၊ ဝါခေါင်လဆန်း ၁၁ရက်တွင် ချိုးရေတော်သုံးပွဲ၊ ဝါခေါင်လဆန်း ၁၂ ရက်တွင် နန်းတက်ပွဲ၊ ဝါခေါင်လဆန်း ၁၃ ရက်တွင် ယုန်ထိုးပွဲ၊ ဝါခေါင်လဆန်း ၁၄ ရက်တွင် ထိန်ပင်ခုတ်ပွဲ၊ ဝါခေါင်လဆန်း ၁၅ရက်တွင် ပခန်းမင်းပို့ပွဲနှင့် ဝါခေါင်လပြည့်ကျော် တစ်ရက်တွင် ရွှေဘုံဆင်းပွဲတို့ကို ရှေးအစဉ်အလာများအတိုင်း ကျင်းပခဲ့ကြခြင်းဖြစ်သည်။

တောင်ပြုံးပွဲတော်သို့ ဘုရားဖူးပြည်သူများ၊ မင်းနှစ်ပါးကိုယုံကြည်သူများ၊ နတ်ပညာရှင်များ၊ ကနားစီးများ လာရောက်ကြပြီး ၁၂ပွဲဈေးသည်များ၊ ‌အညာဒေသထွက်ကုန်ဈေးသည်များအများအပြား လာရောက်ကြသည်။

Popular Myanmar

နေပြည်တော် ဇူလိုင် ၄

မြန်မာနိုင်ငံ လူငယ်ရေးရာလုပ်ငန်းကော်မတီ လုပ်ငန်းညှိနှိုင်းအစည်းအဝေး(၁/၂၀၂၅)ကို ယနေ့မွန်းလွဲပိုင်းတွင် နေပြည်တော်ရုံးအမှတ် (၃၁) ရှိ စုပေါင်းအစည်းအဝေးခန်းမ၌ ကျင်းပရာ မြန်မာနိုင်ငံလူငယ်ရေးရာလုပ်ငန်းကော်မတီဥက္ကဋ္ဌ၊ အားကစားနှင့်လူငယ်ရေးရာဝန်ကြီးဌာန ဒုတိယဝန်ကြီးဦးဇင်မင်းထက်၊ မြန်မာနိုင်ငံလူငယ်ရေးရာလုပ်ငန်း ကော်မတီအတွင်းရေးမှူး၊ လူငယ်ရေးရာဦးစီးဌာန ညွှန်ကြားရေးမှူးချုပ်၊ ဌာနဆိုင်ရာများမှ လုပ်ငန်းကော်မတီအဖွဲ့ဝင်များနှင့် မိတ်ဖက်အဖွဲ့အစည်းများမှ တာဝန်ရှိသူများ တက်ရောက်ကြသည်။

ပြောကြား

ဦးစွာ  ဒုတိယဝန်ကြီးက လူငယ်ရေးရာကဏ္ဍ ၁၆ ရပ်တွင်ပါရှိသည့် လူငယ်ရေးရာမူဝါဒဆိုင်ရာ အမျိုးသားအဆင့် မဟာဗျူဟာစီမံချက် (၂၀၂၀-၂၀၂၄)သည် စဉ်ဆက်မပြတ် လုပ်ဆောင်သွားရမည့် လုပ်ငန်းစဉ်များဖြစ်သည့်အတွက် လူငယ်ရေးရာ မူဝါဒဆိုင်ရာအမျိုးသားအဆင့် မဟာဗျူဟာစီမံချက်၏ (၂၀၂၅-၂၀၂၉)အဖြစ် ဆက်လက်ဆောင်ရွက်သွားနိုင်ရန်နှင့် မြန်မာနိုင်ငံလူငယ်ရေးရာဗဟိုကော်မတီက ဦးစားပေးဆောင်ရွက်ရန် ရွေးချယ်ထားရှိသည့်လုပ်ငန်းစဉ်နှင့် ဆောင်ရွက်ရန်အချက်များကို လက်ရှိအတိုင်း မြေပြင်တွင် လက်တွေ့အကောင်အထည်ဖော် ဆက်လက်ဆောင်ရွက်သွားစေလိုကြောင်း၊ ၂၀၂၅ ခုနှစ် အပြည်ပြည်ဆိုင်ရာ လူငယ်များနေ့အခမ်းအနားနှင့် ဆက်စပ်အခမ်းအနားများကို နေပြည်တော်တွင် ကျင်းပသွားမည်ဖြစ်၍ ဝန်ကြီးဌာနအသီးသီးမှ လူငယ်ကိုယ်စားလှယ်များအပါအဝင် လူငယ်ကဏ္ဍဖွံ့ဖြိုးရေးလုပ်ငန်းများကို ဆောင်ရွက်နေသည့် အဖွဲ့အစည်းများမှ လူငယ်များကို ဖိတ်ကြားသွားရန် လျာထားစီစဉ်ဆောင်ရွက်ထားပါကြောင်း၊ အဆိုပါအခမ်းအနားတွင် ထူးချွန်လူငယ်များကို ဆုများချီးမြှင့်ပေးသွားမည်ဖြစ်ကြောင်းပြောကြားသည်။

ယင်းနောက် မြန်မာနိုင်ငံလူငယ်ရေးရာလုပ်ငန်း ကော်မတီအတွင်းရေးမှူး၊ လူငယ်ရေးရာဦးစီးဌာန ညွှန်ကြားရေးမှူးချုပ်က ယခင်ကျင်းပခဲ့သည့် အစည်းအဝေး၏ ဆုံးဖြတ်ချက်များအပေါ် ဆောင်ရွက်ပြီးစီးမှုအခြေအနေများ၊ ဆက်လက်ဆောင်ရွက်သွားမည့်လုပ်ငန်းစဉ်များနှင့် ၂၀၂၅ ခုနှစ် အပြည်ပြည်ဆိုင်ရာ လူငယ်များနေ့အခမ်းအနားနှင့် လူငယ်စကားဝိုင်းများ အကောင်အထည်ဖော်ဆောင်ရွက်မည့် အစီအစဉ်များနှင့် ပတ်သက်ပြီး ရှင်းလင်းတင်ပြသည်။

ဖြည့်စွက်ပြောကြား

ထို့နောက် အစည်းအဝေးသို့ တက်ရောက်လာကြသည့် မြန်မာနိုင်ငံလူငယ်ရေးရာ လုပ်ငန်းကော်မတီအဖွဲ့ဝင်များက လူငယ်ကဏ္ဍဖွံ့ဖြိုး တိုးတက်ရေးအတွက် သက်ဆိုင်ရာကဏ္ဍများအလိုက်လုပ်ငန်းဆောင်ရွက်ခဲ့မှုများ၊ ရှေ့ဆက်လက်ဆောင်ရွက်သွားမည့် လုပ်ငန်းစဉ်များနှင့်ပတ်သက်၍ တင်ပြဆွေးနွေးရာ ဒုတိယဝန်ကြီးက ဖြည့်စွက်ပြောကြား၍ လိုအပ်သည်များကို ပေါင်းစပ်ညှိနှိုင်း ဖြည့်ဆည်းဆောင်ရွက်ပေးခဲ့ကြောင်း သိရသည်။

MOI

နေပြည်တော် ဇူလိုင် ၄ 

အစဉ်အလာကြီးမားသော မန္တလေးတက္ကသိုလ်ကြီး၏ နှစ် ၁၀၀ ပြည့်မြောက်ခဲ့သည့် နှစ်ပတ်လည်နေ့အား ဂုဏ်ပြုသောအားဖြင့် မန္တလေးတက္ကသိုလ် ရာပြည့်အထိမ်းအမှတ် ဂုဏ်ပြုတေးဂီတဖျော်ဖြေပွဲကို ယနေ့ညပိုင်းတွင် နေပြည်တော်တပ်ကုန်းမြို့ရှိ မြန်မာ့အသံနှင့်ရုပ်မြင်သံကြား (MRTV Auditorium) ခန်းမ၌ ကျင်းပသည်။

အပြည့်အစုံဖတ်ရှုရန်- https://www.moi.gov.mm/news/71868

နယူးယောက် ဇူလိုင် ၄

ဆေးလိပ်သောက်သုံးခြင်း မရှိသူများကြား အဆုတ်ကင်ဆာရောဂါဖြစ်ပွားမှု မြင့်တက်လာရ ခြင်း၏ နောက်ခံအကြောင်းတရား တစ်ရပ်မှာ အလွန်သေးငယ်သော လေထုညစ်ညမ်းမှု ဒြပ်မှုန်များကြောင့် ဖြစ်နိုင်ကြောင်း သုတေသနပညာရှင်များ၏ အဆိုကို ကိုးကား၍ ဇူလိုင် ၃ ရက် သတင်းများအရ သိရသည်။

အမေရိကန်သုတေသနပညာရှင်များ၏ လေ့လာတွေ့ရှိချက်အရ လေထုညစ်ညမ်းမှုပြင်းထန်သောနေရာများ၌ နေထိုင်သူများတွင် အဆုတ်ကင်ဆာ ဖြစ်ပွားစေနိုင်သည့် မျိုးဗီဇအပြောင်းအလဲများ ရှိလာတတ်ကြောင်း သိရသည်။

ဆေးလိပ်မသောက်သူများ၌ ဆေးလိပ်သောက်သုံးသူများကဲ့သို့ အဆုတ်ကင်ဆာဖြစ်စေနိုင်သည့်မျိုးဗီဇအပြောင်းအလဲများရှိလာမှုသည် PM 2.5ခေါ် လေထုညစ်ညမ်းမှု ဒြပ်မှုန်များနှင့် ဆက်စပ်နေနိုင်ကြောင်း အမေရိကန် သုတေသနပညာရှင်များက ပြောကြားသည်။

PM 2.5 လေထုညစ်ညမ်းမှု ဒြပ်မှုန်များသည် အရွယ်အစားအားဖြင့် ၂ ဒသမ ၅ မိုက်ခရိုမီတာ မျှသာရှိရာ အသက်ရှူလမ်းကြောင်းမှတစ်ဆင့် အဆုတ်ထဲသို့ ဝင်ရောက်နိုင်ကြောင်း သုတေသန ပညာရှင်များက ပြောကြားသည်။

အမေရိကန်သုတေသနပညာရှင်များသည် ဆေးလိပ်သောက်သုံးခြင်းမရှိဘဲ အဆုတ်ကင်ဆာဖြစ် ပွားခဲ့ရသူ လူနာဦးရေ ၁ဝဝဝ ခန့် ကိုလေ့လာခဲ့ပြီးနောက် ၎င်းတို့၏ တွေ့ရှိချက်ကို တင်ပြခဲ့ကြခြင်းဖြစ်ကြောင်း သိရသည်။

ကိုးကား- ရတနာပုံသတင်းစာ

Photo: drtanmoymedicaloncologist.com

ကျောက်ဆည်၊ ဇူလိုင်-၄

မန္တလေးတိုင်းဒေသကြီး၊ ‌ကျောက်ဆည်ခရိုင်၊ ကျောက်ဆည်မြို့တွင် လူငယ်များအချိန်ကိုအကျိုးရှိစွာ အသုံးချ တတ်စေရန်နှင့် ဘက်စုံဖွံ့ဖြိုးတိုးတက်စေရန်၊ ကျန်းမာကြံ့ခိုင်ပြီး ထူးချွန်အားကစားလူငယ်များ ပေါ်ထွန်းလာစေရန် ရည်ရွယ်၍  ခရိုင်လူထုအခြေပြုဗဟိုဌာနတွင် အခြေခံကရာတေးပညာများ (အခမဲ့)သင်ကြား ပေးလျက် ရှိကြောင်း သိရသည်။

အခြေခံကရာတေးအားကစား ပြုလုပ်ခြင်းဖြင့် အရိုးနှင့်ကြွက်သားများသန်မာစေခြင်း၊ ကာယပိုင်း၊ ဉာဏပိုင်း၊ စိတ်ပိုင်းဆိုင်ရာများ ဖွံ့ဖြိုးတိုးတက်လာခြင်း၊ ကျန်းမာရေးနှင့်သက်ဆိုင်သည့် ရောဂါများ ဖြစ်စေနိုင်သည့် အခွင့်အလမ်းများ လျော့နည်းစေခြင်း၊ ကိုယ်အလေးချိန် ထိန်းချုပ်နိုင်သည့် နည်းလမ်းကောင်း တစ်ခုဖြစ်ပြီး၊ နှလုံးရောဂါ၊ သွေးတိုးရောဂါ၊ လေဖြတ်ရောဂါများ ဖြစ်ပွားခြင်းမှ ကာကွယ်နိုင်ခြင်း၊ အမောခံနိုင်ခြင်း၊ သက်လုံ ကောင်းခြင်း၊ ဦးနှောက်ကြည်လင်ခြင်း၊ ဉာဏ်ရည်ထက်မြက်ခြင်း  စသည့် အကျိုးကျေးဇူးများ ရရှိနိုင်ကြောင်း သိရသည်။ 

သင်တန်းတွင် အခြေခံအကြောလျှော့နည်း၊ လက်သီးထိုးနည်း၊ ခြေထောက်ထိုင်နည်း၊ ကာကွယ်နည်း၊ ရိုက်ခတ်နည်း၊ ခြေကန်နည်းများ သင်ကြားပေးလျက်ရှိကြောင်းနှင့် မြို့နယ်အတွင်းရှိ အခြေခံပညာ ကျောင်းများ မှ ကျောင်းသား/ကျောင်းသူ(၁၅)ဦး တက်ရောက်သင်ကြားလျက်ရှိပြီး ဇူလိုင်(၁)ရက်နေ့မှစတင်၌ ဇူလိုင်(၆)ရက် နေ့အထိ သင်ကြားပေးသွားမည်ဖြစ်ကြောင်းနှင့် ကျောက်ဆည်ခရိုင်ပြန်ကြားရေးနှင့်ပြည်သူ့ဆက်ဆံရေး ဦးစီးဌာန အနေဖြင့် လူငယ်များအချိန်ကိုအကျိုးရှိစွာ အသုံးချတတ်စေရန်နှင့် ဘက်စုံထူးချွန်သည့် လူငယ်များ ဖြစ်လာ စေရန်အတွက် စာစီစာကုံး၊ အေရိုးဗစ် သင်တန်းများ ဆက်လက်သင်ကြားပေးသွားမည်ဖြစ်ကြောင်း သိရသည်။

သက်မောင်၊ ခရိုင်(ပြန်/ဆက်)

လန်ဒန် ဇူလိုင် ၃

နေ့စဉ် စားသောက်သည့် အစားအစာများ၌ နနွင်းကိုထည့်သွင်းစားသုံးခြင်းဖြင့် အူမကြီး ကင်ဆာရောဂါကို ကာကွယ်ရာတွင် အထောက်အကူပြုနိုင်ကြောင်း ဗြိတိန် သုတေသနပညာရှင်များ၏ အဆိုကို ကိုးကား၍ ဇူလိုင်၂ရက် သတင်းများအရ သိရသည်။

ဗြိတိန်နိုင်ငံ လက်ဆက်စတာ တက္ကသိုလ်မှ သုတေသနပညာရှင်များ၏ လေ့လာတွေ့ရှိချက်အရ နနွင်းတွင်ပါဝင်သည့် Curcumin ခေါ် ဓာတုဒြပ်ပေါင်းတစ်မျိုးသည် အူမကြီးအတွင်း ကင်ဆာဆဲလ်များ ကြီးထွားမှုကို တားဆီးပေးနိုင်ကြောင်း သိရသည်။

Curcumin ဓာတုဒြပ်ပေါင်းသည် အူမကြီးအတွင်း ပျံ့နှံ့မှုအတွက် အန္တရာယ်ကြီးမားသည့် ကင်ဆာဆဲလ်များက အသုံးပြုတတ်သော ပရိုတင်းတစ်မျိုးကို ဖျက်ဆီးပေးခြင်းဖြင့် အူမကြီး ကင်ဆာဖြစ်ပွားမှုကို တားဆီးရာတွင် အထောက်အကူပေးနိုင်ကြောင်း သုတေသနပညာရှင်များ က ပြောကြားသည်။

ဓာတ်ခွဲခန်း စမ်းသပ်မှုရလဒ်များအရ Curcumin ဓာတုဒြပ်ပေါင်းသည် ကင်ဆာဆဲလ်များ ကြီးထွားမှုကို တားဆီးပေးနိုင်သည်ကို တွေ့ရကြောင်း ဗြိတိန် သုတေသနပညာရှင်များက ပြောကြားသည်။

အူမကြီးကင်ဆာ ရောဂါကို ကာကွယ်ရေးအတွက် လူတစ်ဦးအနေဖြင့် Curcumin ဓာတုပစ္စည်း ကို နေ့စဉ် နှစ်ဂရမ်ထိ စားသင့်ကြောင်း သုတေသနပညာရှင်များ က အကြံပြုထားသည်။

ကိုးကား- ရတနာပုံသတင်းစာ

Photo: www.mskcc.org

ကင်ဘာရာ   ဇူလိုင် ၃

အိုမီဂါ-၃ ဖက်တီးအက်စစ် စားသုံးမှုမြင့်မားပါက နှလုံး ရုတ်တရက် ဖောက်နိုင်ခြေများ မြင့်တက်လာနိုင်ကြောင်း ဩစတြေးလျ သုတေသနပညာရှင်များ၏ အဆိုကို ကိုးကား၍ ဇူလိုင် ၂ ရက် သတင်းများအရ သိရသည်။ အဆီဓာတ်ကြွယ်ဝသည့် ငါးများ၊ သစ်စေ့သစ်ဆန်များနှင့် ထောပတ်သီးကဲ့သို့ အသီးအနှံများ၌ တွေ့ရတတ်သည့် အိုမီဂါ-၃ ဖက်တီးအက်စစ်ကို နှလုံးကျန်းမာရေးကို ကာကွယ်ပေးသည့် အဆီဓာတ်တစ်မျိုးအဖြစ် ရှေးယခင်က မှတ်ယူထားသည်။

သို့ရာတွင် ဩစတြေးလျ သုတေသနပညာရှင်များ၏အဆိုအရ အိုမီဂါ-၃ ဖက်တီးအက်စစ်ကြောင့်ကိုယ်တွင်းရောင်ရမ်းမှုများ မြင့်တက်လာနိုင်ပြီး အဝလွန်နိုင်ခြေ၊ ပုံစံ-၂ ဆီးချိုရောဂါဖြစ်နိုင်ခြေ နှင့် နှလုံးဖောက်နိုင်ခြေများ မြင့်တက်လာနိုင်ကြောင်း သိရသည်။ ဩစတြေးလျ သုတေသန ပညာရှင်များသည် လူပေါင်း ၂၈ဝဝ တို့၏ စားသောက်ပုံအလေ့အထနှင့် ကျန်းမာရေးအခြေအနေများကို စောင့်ကြည့်လေ့လာခဲ့ကြသည်။

လေ့လာချက်မှ ပေါ်ထွက်လာသည့် ရလဒ်များအရ အိုမီဂါ-၃ ဖက်တီးအက်စစ် ကြွယ်ဝသည့် အစားအစာများကို အစားများသူများ၌ Glye A ခေါ် ဓာတုပစ္စည်းများ ပေါ်ထွက်မှု မြင့်မားနေတတ် ကြောင်း သိရသည်။

Glye A ဓာတုပစ္စည်းများသည် နာတာရှည်ရောင်ရမ်းမှုပြဿနာ၊ ကင်ဆာရောဂါများ၊ နှလုံးပြဿနာများနှင့် ဆက်စပ်နေသည့် ဓာတုပစ္စည်းများ ဖြစ်ကြကြောင်း သိရသည်။

ရတနာပုံသတင်းစာ

လီဗာပူးတိုက်စစ်မှူး ဒီယေဂိုဂျိုတာသည် စပိန်နိုင်တွင် ယာဉ်မတော်တဆမှုဖြစ်ပြီး ကွယ်လွန်သွားခဲ့ကြောင်း အသင်းက ယနေ့ ဇူလိုင် ၃ ရက်မှာ တရားဝင်ထုတ် ပြန်ကြေညာထားသည်။

အသက် ၂၈ နှစ်အရွယ် ဒီယေဂိုဂျိုတာသည် အသင်းအတွက် အားအထားရဆုံးကစားသမားတစ်ဦးဖြစ်ပြီး၊ ၎င်း‌သေဆုံးမှုအတွက် လီဗာပူးကလပ်အသင်းသားအနေဖြင့် စိတ်ထိခိုက် ယူကျုံးမရ ဖြစ်ရကြောင်း ဆိုသည်။

“မင်းရဲ့မိသားစု၊ မင်းရဲ့ဇနီးနဲ့ မင်းရဲ့သားသမီးတွေနဲ့အတူ ဝမ်းနည်းကြောင်းနဲ့ သူတို့တွေအနေနဲ့ လောကကြီးမှာ ခွန်အားတွေပြည့်ပါစေ”ဟု ရော်နယ်ဒိုကလည်းဆုတောင်းမေတ္တာပို့ထားသည်။

ယာဉ်တိုက်မှုဖြစ်စဥ်အတွင်း ဒီယေဂိုဂျိုတာ၏ ညီဖြစ်သူ အန်ဒရီဆေးလ်ဗားလည်း ကွယ်လွန်သွားခဲ့ပြီး ပေါ်တူဂီ ဘောလုံးအဖွဲ့ချုပ်ကလည်းဖြစ်စဉ်အတွက်ဝမ်းနည်းကြောင်းနှင့် အသိပေးထုတ်ပြန်ထားသည်။

လီဗာပူးအသင်း၏ အမာခံပရိတ်သတ်တစ်ဦးဖြစ်သည့်သရုပ်ဆောင် ကျော်ကျော်ဗိုလ်ကလည်း ငြိမ်းချမ်းစွာအနားယူပါ ဒီယေဂိုဂျိုတာဟု ဆုတောင်းထားသည်။

Popular Myanmar

နယူးယောက်   ဇူလိုင်၂

မီးဖိုချောင်နှင့်ခြံထဲတွင် အလွယ်တကူစိုက်ပျိုးနိုင်သည့် ဟင်းခတ်အမွှေးအကြိုင် တစ်မျိုးသည် ဦးနှောက်စွမ်းဆောင်ရည်ထိခိုက်ပျက်စီးမှုရောဂါ (Dementia) ဖြစ်နိုင်ခြေ လျှော့ချပေးနိုင်ကြောင်း သုတေသနပညာရှင်များက ဇူလိုင် ၁ ရက်တွင် ပြောကြားသည်။

အမေရိကန် သုတေသနပညာရှင်များ၏ လေ့လာတွေ့ရှိချက်အရ ရို့စ်မာရီ (Rosemary) ခေါ် ဟင်းခတ်အမွှေးအကြိုင်ပင် တစ်မျိုးသည် Dementia ရောဂါဖြစ်နိုင်ခြေကို လျှော့ချပေးနိုင်ကြောင်း သိရသည်။

ရို့စ်မာရီပင်တွင် ပါဝင်သော Carnosic acid ခေါ် ဓာတုဒြပ်ပေါင်းတစ်မျိုးသည် မှတ်ဉာဏ်စွမ်းရည်ကို ထိန်းထားနိုင်ပြီးဦးနှောက်ဆဲလ်များကို ကာကွယ်ပေးနိုင်ကြောင်း အမေရိကန်သုတေသနပညာရှင်များက ပြောကြားသည်။

အဆိုပါ ဟင်းခတ်အမွှေးအကြိုင်တွင်ပါသော Carnosic acid သည် အောက်ဆီဂျင်ဓာတ်ဖျက်ပစ္စည်းများနှင့် ရောင်ရမ်းမှုတိုက်ဖျက်ရေး ဂုဏ်သတ္တိတို့ပိုင်ဆိုင်ထားပြီး လူ့ကိုယ်ခန္ဓာ၏ သဘာဝကာကွယ်ရေးစနစ် အင်ဇိုင်းများကိုလည်း စေ့ဆော်ပေးနိုင်ကြောင်း သုတေသနပညာရှင်များက ပြောကြားသည်။

သုတေသနပညာရှင်များ၏ အဆိုအရ ရို့စ်မာရီပင်၏ ရနံ့မှာလည်း စိုးရိမ်သောကဝေဒနာကို လျှော့ချပေးနိုင်ပြီး အိပ်စက်မှုအရည်အသွေးကိုလည်း မြှင့်တင်ပေးနိုင်ကြောင်း သိရသည်။

ရတနာပုံသတင်းစာ

ကျောက်ဆည်၊ ဇူလိုင်-၃

မန္တလေးတိုင်းဒေသကြီး၊ ကျောက်ဆည်ခရိုင်၊ အစိုးရနည်းပညာအထက်တန်းကျောင်း(ကျောက်ဆည်) တွင် ယနေ့ နံနက်ပိုင်းက စာဖတ်ရှိန်မြှင့်တင်ရေး လူငယ်ရေးရာအသိပညာပေးဟောပြောပွဲ ကျင်းပပြုလုပ်ခဲ့ကြောင်း သိရသည်။

ရှေးဦးစွာ အစိုးရနည်းပညာအထက်တန်းကျောင်း (ကျောက်ဆည်) မှ ကျောင်းအုပ်ဆရာမကြီး ဒေါက်တာ ဇာနည်ထွန်းက အဖွင့်အမှာစကားပြောကြားခဲ့ပြီး ကျောက်ဆည်ခရိုင်ပြန်ကြားရေးနှင့်ပြည်သူ့ဆက်ဆံရေး ဦးစီး ဌာနမှ လက်ထောက်ညွှန်ကြားရေးမှူး ဒေါ်တင်တင်ထွေးက လူငယ်ရေးရာအသိပညာပေးဟောပြောပွဲ ကျင်းပ ပြုလုပ်ရခြင်း၏ ရည်ရွယ်ချက်များကို ရှင်းလင်းပြောကြားခဲ့သည်။

ထို့နောက် စာရေးဆရာအကြီးကိုကို(ကသာ)က “ထိပ်ဆုံးမှာ ဆုံကြမယ်” ခေါင်းစဉ်ဖြင့် အသိပညာပေး အကြောင်းအရာများကို ဟောပြောဆွေးနွေးခဲ့ပြီး အစိုးရနည်းပညာအထက်တန်းကျောင်း(ကျောက်ဆည်)သို့ စာအုပ်များ လှူဒါန်းခဲ့ကြောင်းနှင့် ဟောပြောပွဲအပြီးတွင် ကျောင်းသား/ကျောင်းသူများအား မေးခွန်းများ မေးမြန်း ခဲ့ပြီး စာအုပ်လက်ဆောင်များပေးအပ်ခဲ့ကာ စုပေါင်းမှတ်တမ်းဓာတ်ပုံများ ရိုက်ကူးခဲ့ကြောင်း သိရသည်။

ပေးပို့သူ- သက်မောင်(ကျောက်ဆည်)