အစွန်းရောက်အကြမ်းဖက်သမားများသည် အေးချမ်းစွာနေထိုင်လျက်ရှိသော ပြည်သူများနှင့် တရားဥပဒေစိုးမိုးရေးအတွက် ဝိုင်းဝန်းဆောင်ရွက်နေသော အုပ်ချုပ်ရေးပိုင်းဆိုင်ရာ တာဝန်ရှိသူများအား ထိခိုက်ဒဏ်ရာရရှိစေရန် ရည်ရွယ်ချက်များဖြင့် အကြမ်းဖက်ဖောက်ခွဲရေးလုပ်ရပ်များအား ငွေကြေးထောက်ပံ့ကာ နောက်ကွယ်မှ သွေးထိုးမြှောက်ပင့်လှုံ့ဆော်မှုများဖြင့် အများပြည်သူသွားလာအသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများ အသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ်ဖောက်ခွဲခြင်းများ ပြုလုပ်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၁၀ ရက် ညနေ ၆ နာရီတွင် စစ်ကိုင်းတိုင်းဒေသကြီး၊ ဆားလင်းကြီးမြို့နယ်၊ ကျောက်မျက်ကျေးရွာအနီး၌ စပယ်တောင်၊ ကြေးစင်တောင် ကြေးနီစီမံကိန်းသို့ ရေပေးဝေသည့် PUMP STATION(PS-1)Portoon သို့ PDF အမည်ခံ အကြမ်းဖက်သမား ငါးဦး(စိစစ်ဆဲ)က ရုံးပင်ရိုးကျေးရွာမှ ချင်းတွင်းမြစ်ကြောင်းအတိုင်း စက်လှေ တစ်စီးဖြင့် ရောက်ရှိလာပြီး မိုင်းထောင်ဖောက်ခွဲဖျက်ဆီးမှုကြောင့် အဆိုပါ PUMP STATION ရှိ ရေတင်စက်အား သွယ်တန်းထားသည့် ဝိုင်ယာကြိုးများ ပျက်စီးသွားခဲ့ကြောင်း သိရသည်။

အထက်ပါဖြစ်စဉ်မှ အကြမ်းဖက်မှုကျူးလွန်ခဲ့သူများအား ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိပါသည်။

MOHA

လူဝင်မှုကြီးကြပ်ရေး စစ်ဆေးမှုများကြောင့် ဆူပူမှုနှင့် လုယက်မှုများ ရက်ပေါင်းများစွာ ဖြစ်ပွားပြီးနောက် လော့စ်အိန်ဂျယ်လိစ်မြို့လယ်တွင် ညမထွက်ရအမိန့် (Curfew) ထုတ်ပြန်ခဲ့သည်။

မြို့တော်ဝန် Karen Bass က အင်္ဂါနေ့ (ဇွန် ၁၁) တွင် ထုတ်ပြန်ချက်အရ ထိုကန့်သတ်ချက်များသည် ည ၈ နာရီမှ နံနက် ၆ နာရီအထိ အာဏာ သက်ရောက်မည်ဖြစ်ပြီး ယင်းအမိန့်ကို ချိုးဖောက်သူများအား ဖမ်းဆီး အရေးယူမည်ဟု ဆိုသည်။ အဆိုပါညမထွက်ရအမိန့်ကို ရက်အနည်းငယ် ကြာ ဆက်လက်ကျင့်သုံးရန် မျှော်လင့်ထားသည်။

Bass က အရေးကြီးသော အလှည့်အပြောင်းတစ်ခု ရောက်ရှိလာပြီ ဖြစ်ကြောင်း ဆိုကာ ယမန်နေ့ည (ဇွန် ၉) က လုပ်ငန်း ၂၃ ခု လုယက်ခံ ခဲ့ရသည်ဟု ဖြည့်စွက်ပြောကြားခဲ့သည်။

NBC Los Angeles ၏ ဖော်ပြချက်အရ ထိုညမထွက်ရအမိန့် သည် 5 Freeway၊ 110 Freeway နှင့် 10 Freeway တို့ဖြင့် ဝန်းရံထားသော တစ်စတုရန်းမိုင်ခန့်ဧရိယာကို ဖုံးလွှမ်းထားပြီး 10 Freeway သည် 110 နှင့် 5 Freeway တို့နှင့် ပေါင်းဆုံရာထိ ပါဝင်သည်။

LAPD ရဲမှူးချုပ် Jim McDonnell က အဆိုပါဧရိယာတွင် နေထိုင်သူများ၊ အရေးပေါ်နှင့် လုံခြုံရေးဝန်ထမ်းများ၊ သတင်းသမားများနှင့် အိမ်ရာမဲ့ များအား အဆိုပါ ညမထွက်ရအမိန့်မှ ကင်းလွတ်ခွင့်ပေးထားကြောင်း ပြောကြားခဲ့သည်။

မြို့တစ်ဝှမ်းတွင် ဆက်တိုက်ဖြစ်ပွားနေသော မငြိမ်မသက်မှုများကြောင့် လူ့အသက်နှင့် ပစ္စည်းဥစ္စာများကို ကာကွယ်ရန် ထို ညမထွက်ရအမိန့် သည် လိုအပ်သော အစီအမံတစ်ရပ်ဖြစ်သည်ဟု ၎င်းက ပြောကြား ခဲ့သည်။

သမ္မတ Donald Trump ၏ တရားမဝင် လူဝင်မှုကြီးကြပ်ရေး ပြင်းထန်စွာ ကိုင်တွယ်မှုများအတွင်း ဖက်ဒရယ်အေးဂျင့်များက လူအချို့ ကို ဖမ်းဆီးခဲ့ပြီးနောက် သောကြာညက အကြမ်းဖက်ဆူပူမှုများ စတင်ခဲ့သည်။ ယခုအချိန်ထိ လူ ၃၅၀ ကျော်ကို ဖမ်းဆီးထားပြီး ယင်းအနက် ၁၉၇ ဦးကို အင်္ဂါနေ့ (ဇွန် ၁၁) က ဖမ်းဆီးခဲ့ခြင်းဖြစ်သည်။ သတင်း ရဟတ်ယာဉ်များမှ ရိုက်ကူးထားသော ဓာတ်ပုံများတွင် လူအုပ်များ လမ်း များပေါ်တွင် ဆက်လက်စုဝေးနေသည်ကို တွေ့ရသည်။

ကိုးကား- RT

လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများအတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှ ပစ်ခတ်ခြင်း၊ Drone ဖြင့် Drop Bomb များ ပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲတိုက်ခိုက်ခြင်းများအား လုပ်ဆောင်လျက်ရှိသည့်အပြင် အေးချမ်းစွာ နေထိုင်လျက်ရှိသည့် ဒေသခံပြည်သူများကိုပါ ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန်လုပ်ဆောင်လျက်ရှိပါသည်။

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန်လ ၁၁ ရက်နေ့ နံနက် ၁၁ နာရီတွင် မန္တလေးတိုင်းဒေသကြီး၊ မလှိုင်မြို့နယ်၊ ပန်းအိုင်ကျေးရွာနေ ဦးဇော်မျိုးသက် (ခ) ကိုသက် (၄၇) နှစ်သည် ရွှေမုဌောဘုရားအနီးတွင် ဖွင့်လှစ်ရောင်းချလျက်ရှိသည့် ၎င်းပိုင်ကွမ်းဆိုင်၌ ရှိနေစဉ် PDF အမည်ခံအကြမ်းဖက်သမားအင်အား ၂၀ ဦးခန့်က 4WD အမျိုးအစား မော်တော်ယာဉ်တစ်စီး (စိစစ်ဆဲ)၊ ဆိုင်ကယ်ငါးစီးတို့ဖြင့် နွားထိုးကြီးမြို့နယ်ဘက်မှ ရောက်ရှိလာပြီး ဦးဇော်မျိုးသက် (ခ) ကိုသက်အား သေနတ်ဖြင့် ပစ်ခတ်ခဲ့သဖြင့် ၎င်းတွင်ကျည်ထိမှန်ဒဏ်ရာများရရှိကာ သေဆုံးသွားခဲ့ပြီး အဆိုပါအကြမ်းဖက်သမားများသည် ရွှေမုဌောဘုရားမြောက်ဘက်မုခ်အနီးနေသူများဖြစ်သည့် ဦးကျော်သက် (၅၅) နှစ်၊ ဦးသက်နိုင်ဦး (ခ) ငသက် (၄၇) နှစ်နှင့် မလှိုင်မြို့နယ် မြန်မာ့လယ်ယာဖွံ့ဖြိုးရေးဘဏ်မှ အကြီးတန်းစာရေး ဒေါ်ခင်မြင့်ထွေး (၄၀) နှစ်တို့ သုံးဦးအား ဖမ်းဆီးခေါ်ဆောင်ကာ တောင်သာမြို့နယ်၊ သံဘို-သန်းတန်းကျေးရွာဘက်သို့ ပြန်လည်ထွက်ခွာသွားကြောင်း သိရသည်။

အထက်ပါဖြစ်စဉ်မှ အကြမ်းဖက်သမားများ၏ ဖမ်းဆီးခြင်းခံရသည့် နိုင်ငံ့ဝန်ထမ်းတစ်ဦးနှင့် အပြစ်မဲ့ပြည်သူနှစ်ဦးအား အမြန်ဆုံးပြန်လည်ကယ်တင်နိုင်ရေးနှင့် ဒေသခံပြည်သူများအား ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော ရာဇဝတ်မှုများအား ကျူးလွန်လုပ်ဆောင်လျက်ရှိသည့် အကြမ်းဖက်သမားများအား ဖော်ထုတ်ဖမ်းဆီးအရေးယူနိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိသည်။

MOI

တိုင်းဒေသကြီးနှင့်ပြည်နယ်များရှိ မြို့နယ်အချို့တွင် အကြမ်းဖက်သမားများမှ ဌာနဆိုင်ရာရုံးများအား တိုက်ခိုက်ဖျက်ဆီးခြင်းများ၊ အုပ်ချုပ်ရေးပိုင်းဆိုင်ရာ တာဝန်ရှိသူများနှင့် အရပ်သားပြည်သူများအား ဖမ်းဆီးခေါ်ဆောင်ခြင်းနှင့် ခြိမ်းခြောက်ခြင်းများ ပြုလုပ်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၈ ရက် နံနက် ၉ နာရီတွင် ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ်၊ လှော်ကထားကျေးရွာအုပ်စု၊ ဥယျာဉ်ကုန်းကျေးရွာ ရာအိမ်မှူး ဦးမြင့်အောင်အား အကြမ်းဖက်အဖွဲ့ အင်အား(စိစစ်ဆဲ)မှ ဆိုင်ကယ် ငါးစီးဖြင့် ဥယျာဉ်ကုန်းကျေးရွာသို့ ဖမ်းဆီးခေါ်ဆောင်သွားခဲ့ကြောင်း။
 အလားတူ ဇွန် ၉ ရက် နံနက် ၆ နာရီ ၃၂ မိနစ်တွင် တနင်္သာရီတိုင်းဒေသကြီး၊ ထားဝယ်ခရိုင်၊ ရေဖြူမြို့နယ်၊ မိကျောင်းလှောင်းကျေးရွာအုပ်စု၊ အုပ်ချုပ်ရေးမှူး ဦးထွန်းကြွယ်ထံသို့ KNU တပ်မဟာ(၄) နယ်မြေတာဝန်ခံ စောတာနော်နော်မှ “ပြည်သူ့စစ်မှုထမ်းအမှတ်စဉ်(၁၄)(၆/၂၀၂၅)အတွက် ကျေးရွာအတွင်း ပုံစံ(၂)ဖြန့်ဝေသည့်ကိစ္စနှင့်ပတ်သက်၍ ၎င်းတို့အနေဖြင့် ရေဖြူမြို့နယ်၊ တလိုင်းယာကျေးရွာအုပ်စု၊ ကလုံးထာကျေးရွာမှ လော့သိုင်းကျေးရွာအုပ်စု၊ မလွှဲတောင်အထိ လုံခြုံရေးယူထားကြောင်း၊ ကလုံးထာကျေးရွာမှ မလွှဲတောင်အထိ စစ်မှုထမ်းခေါ်ခွင့်မပေးနိုင်ကြောင်း၊ ဆက်လက်ဆောင်ရွက်ပါက ဖြစ်လာသည့်ပြဿနာအား ၎င်းကို အဆိုးမဆိုနဲ့” ဟုဖုန်းဖြင့်ဆက်သွယ်၍ ခြိမ်းခြောက်ပြောဆိုခဲ့ကြောင်း သတင်းရရှိပါသည်။

MOHA

ရုရှားနိုင်ငံခြားရေးဝန်ကြီး Sergey Lavrov က ဗြိတိန်သည် ရုရှား နိုင်ငံအတွင်း အကြမ်းဖက်တိုက်ခိုက်မှုများ ဆောင်ရွက်ရာတွင် ယူကရိန်းကို ၁၀၀% ကူညီပေးနေကြောင်း သံသယဖြစ်စရာ မရှိဟု ပြောကြားခဲ့သည်။

ယခုလအစပိုင်းမှစ၍ ရုရှားရထားလမ်းများတွင် ဖျက်ဆီးမှုအချို့ ဖြစ်ပွားခဲ့ပြီး အဆိုးရွားဆုံးဖြစ်ရပ်မှာ ဇွန်လ ၁ ရက်နေ့တွင် Bryansk ဒေသ၌ ခရီးသည်တင် ရထားတစ်စီးရှေ့မှ တံတားပြိုကျမှုကြောင့် လူ ၇ ဦး သေဆုံးကာ ၁၀၀ ကျော် ဒဏ်ရာရခဲ့သည်။

ထိုနေ့တွင်ပင် ယူကရိန်းသည် အာတိတ်ဒေသရှိ Murmansk မှ ဆိုက်ဘေးရီးယားရှိ Irkutsk အထိ ရုရှားလေကြောင်း အခြေစိုက်စခန်းများကို ကုန်တင်ထရပ်ကားများမှ ပစ်ခတ်သည့် ဒရုန်းများဖြင့် ပေါင်းစပ် တိုက်ခိုက်ခဲ့သည်။ မော်စကို၏အဆိုအရ ဝင်ရောက်လာသည့် ဒရုန်း အများစုကို ပစ်ချနိုင်ခဲ့ပြီး ပျက်စီးခဲ့သည့် ရုရှားလေယာဉ်များအနက် ပြန်လည် မပြုပြင်နိုင်သည့် အခြေအနေမရှိဟု ဆိုသည်။ 

တနင်္လာနေ့ (ဇွန် ၉) က မော်စကိုတွင် ကျင်းပသည့် “အနာဂတ် ၂၀၅၀ ဖိုရမ်” တွင် ပြောကြားရင်း လာဗရော့က ရုရှားတွင် “အကြမ်းဖက် ခြိမ်းခြောက်မှု အဆင့်မြင့်တက်လာနိုင်သည့် အန္တရာယ်ရှိနေကြောင်း” ဝန်ခံပြောဆိုခဲ့သည်။

“အဆိုပါလုပ်ရပ်အားလုံးကို ယူကရိန်းဘက်မှ ဆောင်ရွက်နေသည်မှာ အထင်အရှားဖြစ်သော်လည်း ဗြိတိန်၏ထောက်ခံမှုမရှိပါက ၎င်းတို့ဘာမျှ မတတ်နိုင်ပါ” ဟု ၎င်းကပြောကြားခဲ့သည်။

ထိုသို့သောလုပ်ရပ်များကို ယခင်က အမေရိကန်နှင့် ဗြိတိန်နှစ်နိုင်ငံစလုံးက ထောက်ခံခဲ့သော်လည်း “ယခုအခါတွင် ဗြိတိန်တစ်ခုတည်းနှင့်သာ သက်ဆိုင်နေပြီ” ဟု လာဗရော့ဗ်က ဆိုသည်။

အမေရိကန်သမ္မတ ဒေါ်နယ်ထရမ့်အစိုးရလက်ထက်တွင် မော်စကိုနှင့် ပြန်လည်ဆက်သွယ်ရန်နှင့် ယူကရိန်းပဋိပက္ခအား ငြိမ်းချမ်းစွာ ဖြေရှင်းရန် ကြိုးပမ်းမှုများ ပြောင်းလဲလာသည့်တိုင် ဗြိတိန်သည် ယူကရိန်း၏ အခိုင်မာဆုံးထောက်ခံသူတစ်ဦးအဖြစ် ဆက်လက်ရှိနေဆဲဖြစ်ကြောင်း ၎င်းက ရည်ညွှန်းပြောဆိုခဲ့ခြင်းဖြစ်သည်။

“သို့သော် ဘယ်သူသိမလဲ၊ အမေရိကန်တွင် အလေ့အထအားဖြင့်ထိုသို့သောလုပ်ဆောင်မှုများတွင် ပါဝင်နေဆဲ အထူးဝန်ဆောင်မှု အဖွဲ့ အချို့ ရှိနေကောင်းရှိနေနိုင်သော်လည်း ဗြိတိသျှတို့မှာမူ ၁၀၀% ပါဝင် ပတ်သက်နေပါသည်” ဟု လာဗရော့ဗ်က အလေးအနက်ထား ပြောကြားခဲ့သည်။

လွန်ခဲ့သည့်သီတင်းပတ်အတွင်း မော်စကို၏ လန်ဒန်သံအမတ်ကြီး Andrey Kelin ကလည်း ရုရှားလေကြောင်းအခြေစိုက်စခန်းများကို ယူကရိန်း ဒရုန်းတိုက်ခိုက်မှုများတွင် ဗြိတိန်ပါဝင်ပတ်သက်နေကြောင်း အလားတူ စွပ်စွဲခဲ့ဖူးသည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားနှင့် ယူကရိန်းတို့သည် အသက် ၂၅ နှစ်အောက် စစ်သုံ့ပန်းများကို နောက်ထပ် လဲလှယ်ခဲ့ကြောင်း ရုရှားကာကွယ်ရေးဝန်ကြီးဌာနက တနင်္လာနေ့ (ဇွန် ၉) တွင် ကြေညာခဲ့သည်။

တရားဝင် Telegram Channel တွင် ထုတ်ပြန်သည့် ဝန်ကြီးဌာန၏ ထုတ်ပြန်ချက်အရ ပထမအသုတ် စစ်သုံ့ပန်းများကို ကိယက်ဗ် ထိန်းချုပ် ထားသော နယ်မြေများမှ ပြန်လည်ရရှိခဲ့ကြောင်း ဖော်ပြထားသည်။

“အပြန်အလှန်အနေဖြင့် ယူကရိန်းတပ်မတော်၏ တန်းတူ အရေအတွက်ရှိ စစ်သုံ့ပန်းများကို လွှဲပြောင်းပေးခဲ့သည်” ဟု ဝန်ကြီးဌာနက ဆိုသည်။

ရုရှားစစ်သည်များအား လက်ရှိတွင် ဘယ်လာရုဇ်နိုင်ငံ၌ လိုအပ်သော စိတ်ပိုင်းဆိုင်ရာနှင့် ကျန်းမာရေး အကူအညီများပေးနေပြီး မကြာမီ ၎င်းတို့အား ကုသရန်နှင့် ပြန်လည်ထူထောင်ရန်အတွက် နိုင်ငံသို့ ပြန်ပို့မည် ဖြစ်ကြောင်း သိရသည်။

လွန်ခဲ့သည့်သီတင်းပတ်က အစ္စတန်ဘူလ်မြို့တွင် ပြုလုပ်ခဲ့သော တိုက်ရိုက် ညှိနှိုင်းမှုများအတွင်း မော်စကိုနှင့် ကိယက်ဗ်တို့သည် ပြင်းထန်စွာ ဒဏ်ရာ ရထားသူများ၊ နာမကျန်းဖြစ်နေသူများ နှင့် အသက် ၂၅ နှစ်အောက် စစ်သုံ့ပန်းများအပါအဝင် အချို့သော စစ်သုံ့ပန်းများကို လဲလှယ်ရန် သဘောတူညီခဲ့သည်။

ထို့အပြင် ရုရှားဘက်မှ လူသားချင်းစာနာထောက်ထားမှုအရ ယူကရိန်း စစ်သား ၆,၀၀၀ ကျော်၏ အလောင်းများကို ပြန်လည်ပေးအပ်မည်ဟု ကြေညာခဲ့သည်။ စနေနေ့ (ဇွန် ၇) တွင် မော်စကိုဘက်မှ ယူကရိန်း ဘက်သို့ အလောင်း ၁,၂၁၂ ခုကို လွှဲပြောင်းရန် ကြိုးစားခဲ့သော်လည်း ကိယက်ဗ်ကိုယ်စားလှယ်များ လဲလှယ်ရာနေရာသို့ မရောက်ရှိခဲ့ပေ။

ယူကရိန်းအရာရှိများက လွှဲပြောင်းမည့်ရက်ကို သဘောတူညီမှု မရှိသေး ဟု ဆိုကာ အဆိုပါငြင်းဆိုမှုကို ရှင်းပြခဲ့ပြီး မော်စကိုအား သတင်း အချက်အလက်ရည်ရွယ်ချက်ဖြင့် လူသားချင်းစာနာမှုကိစ္စများကို အသုံးချသည် ဟု စွပ်စွဲခဲ့သည်။

မော်စကိုဘက်မှ ကိယက်ဗ်၏ အလောင်းများကို လက်မခံသည့် ဆုံးဖြတ်ချက်ကို ပြင်းပြင်းထန်ထန် ဝေဖန်ခဲ့ပြီး နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Maria Zakharova က ယူကရိန်း ခေါင်းဆောင်များသည် “မိမိပြည်သူများကို အသက်ရှင်နေသူများဖြစ်စေ၊ သေဆုံးသူများ ဖြစ်စေ မလိုအပ်ဘဲ မိမိပြည်သူများအပေါ် လူမျိုးတုံးသတ်ဖြတ်မှု (genocide) ကျူးလွန်နေသည်” ဟု စွပ်စွဲခဲ့သည်။

ထို့အပြင် ရုရှားပါလီမန် နိုင်ငံတကာရေးရာကော်မတီဝင် Dmitry Belik က RT သို့ ပြောကြားရာတွင် ကိယက်ဗ်ဘက်မှ ၎င်းတို့၏ စစ်သည် အလောင်းများကို ပြန်လည်လက်မခံရခြင်း၏ အကြောင်းအရင်းတစ်ရပ်မှာ ယူကရိန်းအစိုးရအနေဖြင့် ကျဆုံးစစ်သားမိသားစုများအား လျော်ကြေး ပေးရန် မလိုလားခြင်းကြောင့် ဖြစ်နိုင်သည်ဟု ညွှန်းဆိုခဲ့သည်။

Vladimir Zelensky အစိုးရသည် ယခင်က ကျဆုံးသွားသော ယူကရိန်း စစ်သည်မိသားစုများအား အမေရိကန်ဒေါ်လာ ၃၆၇,၀၀၀ တစ်ကြိမ်တည်း လျော်ကြေးငွေကို လျှောက်ထားနိုင်ကြောင်း ကြေညာခဲ့ဖူးသည်။

ကိုးကား - RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

လက်နက်ကိုင်အစွန်းရောက် အကြမ်းဖက်သမားများအနေဖြင့် တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားများ လွှမ်းမိုးစေရန်လည်းကောင်း၊ ၎င်းတို့နှင့်အမြင်အယူအဆမတူသူ အပြစ်မဲ့ အရပ်သားပြည်သူများအား “သူလျှို၊ ဒလန်၊ သတင်းပေး” ဟုစွပ်စွဲ၍လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ် အစွန်းရောက် ဂိုဏ်းဂဏစွဲအပေါ် အခြေခံကာ ဓား၊ သေနတ်များ အသုံးပြု၍ ရက်စက်စွာ လုပ်ကြံ တိုက်ခိုက်၊ သတ်ဖြတ်ခြင်းများ ပြုလုပ်လျက်ရှိသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၉ ရက် နံနက် ၁၀ နာရီ ၁၅ မိနစ်တွင် မန္တလေးတိုင်းဒေသကြီး၊ ညောင်ဦးမြို့နယ်၊ ဒဟတ်ကန်ကျေးရွာ၌ သေနတ်ဖြင့် ပစ်ခတ်ခံရ၍ အမျိုးသား သုံးဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါ ကျေးရွာနေ ဦးတင်စိုး(၅၆)နှစ်သည် တစ်ရွာတည်းနေ ဦးဝင်းနိုင်(၄၉)နှစ်၊ ဦးချမ်းသာ(၃၃)နှစ်တို့ နှင့်အတူ ၎င်း၏နေအိမ်၌ ရှိနေစဉ် PDF အမည်ခံ အကြမ်းဖက်သမား ရှစ်ဦး(စိစစ်ဆဲ)က ဆိုင်ကယ် ငါးစီးဖြင့် ရောက်ရှိလာပြီး သေနတ်ဖြင့် ပစ်ခတ်သတ်ဖြတ်သွားခဲ့ပြီး ဦးဝင်းနိုင်၏နေအိမ်မှ YGN-22/ 3I-XXXX TOYOTA PASSO ခဲရောင်မော်တော်ယာဉ်နှင့် MDY-6/4K-XXXX TOYOTA HIJET အဖြူရောင် မော်တော်ယာဉ် နှစ်စီးတို့အား လုယက်ယူဆောင် ထွက်ပြေးသွားခဲ့သဖြင့် ၎င်းတို့သုံးဦးတွင် ကျည်ထိမှန် ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
ထိုသို့ အပြစ်မဲ့ အရပ်သားပြည်သူများအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ် အစွန်းရောက် ဂိုဏ်းဂဏစွဲအပေါ် အခြေခံကာ လုပ်ကြံသတ်ဖြတ်မှု ကျူးလွန်ခဲ့သူများအား ဖော်ထုတ် ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

အထောက်အထားမဲ့ ရွှေ့ပြောင်းနေထိုင်သူများ ဖမ်းဆီးခံရမှုများကြောင့် လော့စ်အိန်ဂျလိစ်တွင် စတင်ဖြစ်ပွားခဲ့သော အဓိကရုဏ်းများကို ထိန်းသိမ်းရန် အမေရိကန်ကာကွယ်ရေးဌာန (ပင်တဂွန်) မှ မရိန်း တပ်ဖွဲ့ ဝင်များကို စေလွှတ်မည်ဖြစ်သည်။

US Northern Command တနင်္လာနေ့ (ဇွန် ၉) တွင် ပြောကြားချက်အရ 1st Marine Division မှ မရိန်းတပ်ဖွဲ့ဝင် ၇၀၀ ခန့်သည် လော့စ်အိန်ဂျလိစ် နှင့် ပတ်ဝန်းကျင်ရှိ ဖက်ဒရယ်ဝန်ထမ်းများနှင့် ဖက်ဒရယ် ပိုင်ဆိုင်မှုများကို ကာကွယ်ရန် ကူညီပံ့ပိုးပေးမည်ဖြစ်သည်။

Reuters ၏ သတင်းအရ မရိန်းတပ်ဖွဲ့များသည် National Guard တပ်ဖွဲ့ များကို အထောက်အပံ့ပေးမည်ဖြစ်ပြီး ဗုဒ္ဓဟူးနေ့ (ဇွန် ၁၁) တွင် National Guard တပ်သားဦးရေ ၂,၀၀၀ အထိ တိုးလာဖွယ်ရှိကြောင်း သိရှိရသည်။

ကာကွယ်ရေးဝန်ကြီး Pete Hegseth က X (Twitter) တွင် “Gavin Newsom မလုပ်ဆောင်လျှင်ပင် ဖက်ဒရယ်ဥပဒေစိုးမိုးရေးအရာရှိများကို ကာကွယ်ရန် မိမိတို့တွင်တာဝန်ရှိသည်” ဟု ရေးသားခဲ့သည်။ ပင်တဂွန်မှ တနင်္လာနေ့ညနေပိုင်းတွင် လူဝင်မှုကြီးကြပ်ရေးအရာရှိများနှင့် ရဲတပ်ဖွဲ့ များကို ကူညီရန် National Guard တပ်ဖွဲ့ဝင် ၂၀၀၀ ကို ထပ်မံ ခေါ်ယူမည်ဟု ကြေညာခဲ့သည်။

ကယ်လီဖိုးနီးယားပြည်နယ်အုပ်ချုပ်ရေးမှူး Gavin Newsom က သမ္မတ Donald Trump ၏ ဆန္ဒပြသူများကို ရင်ဆိုင်ရန် မရိန်းတပ်ဖွဲ့များ စေလွှတ်သည့် ဆုံးဖြတ်ချက်ကို “အမေရိကန်ဆန့်ကျင်သော အပြုအမူ” ဟု ပြင်းပြင်းထန်ထန် ဝေဖန်ခဲ့သည်။

Newsom က X တွင် “အာဏာရှင်သမ္မတ၏ စိတ်ကူးယဉ်ဆန်သော အိပ်မက်ကို အကောင်အထည်ဖော်ရန် အမေရိကန်မြေပေါ်တွင် မိမိ တိုင်းသူပြည်သားများကို ရင်ဆိုင်ရန် ၎င်းတို့ကို မစေလွှတ်သင့်” ဟု ရေးသားခဲ့သည်။ ၎င်းက Trump အား National Guard တပ်ဖွဲ့များကို ပြန်ခေါ်ရန် တိုက်တွန်းခဲ့ပြီး ၎င်းတို့ကို တရားမဝင်စေလွှတ်ခြင်းသည် အခြေအနေကို ပိုမိုဆိုးရွားစေကာ ကယ်လီဖိုးနီးယား၏ အခွင့်အရေး များကို ချိုးဖောက်သည်ဟု စွပ်စွဲခဲ့သည်။

ရွှေ့ပြောင်းနေထိုင်သူများအား စစ်ဆေးရေးအရာရှိများက “တရားမဝင် အလုပ်သမားစာရွက်စာတမ်းများ” အသုံးပြုမှုဖြင့် Home Depot ကားပါကင်နှင့် Ambiance Apparel အထည်စက်ရုံမှ လူ ၄၀ ကျော်ကို ဖမ်းဆီးပြီးနောက် သောကြာနေ့ (ဇွန် ၆) က ဆန္ဒပြမှုများ စတင်ခဲ့သည်။ Trump ၏ တင်းကျပ်သော ရွှေ့ပြောင်းနေထိုင်မှုမူဝါဒကို ရှုတ်ချသည့် ဆန္ဒပြမှုများသည် လုယက်မှုများနှင့် ရဲတပ်ဖွဲ့ဝင်များကို အကြမ်းဖက် တိုက်ခိုက်မှုများအထိ ပြင်းထန်လာခဲ့သည်။

ဆန္ဒပြသူများသည် မော်တော်ယာဉ်များကို မီးရှို့ကာ လုပ်ငန်းခွင်များ ထဲသို့ အင်အားအလုံးအရင်းဖြင့်ဝင်ရောက်ခဲ့ကြပြီး ရဲများက လူစုခွဲရန် ငရုတ်ကောင်းဘောလုံးများနှင့် ရာဘာကျည်များ အသုံးပြုခဲ့သည်။ သတင်းဌာနများ၏ ဖော်ပြချက်အရ ပြီးခဲ့သည့် သီတင်းပတ်ကုန်တွင် အနည်းဆုံး လူ ၅၆ ဦး ဖမ်းဆီးခံခဲ့ရကြောင်း သိရှိရပါသည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အစွန်းရောက်အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများနှင့် တရားဥပဒေစိုးမိုးရေးအတွက် ဝိုင်းဝန်းဆောင်ရွက်နေသော အုပ်ချုပ်ရေးပိုင်းဆိုင်ရာ တာဝန်ရှိသူများအား ထိခိုက်ဒဏ်ရာရရှိစေရန် ရည်ရွယ်ချက်များဖြင့် အကြမ်းဖက်ဖောက်ခွဲရေးလုပ်ရပ်များအား ငွေကြေးထောက်ပံ့ကာ နောက်ကွယ်မှ သွေးထိုးမြှောက်ပင့်လှုံ့ဆော်မှုများဖြင့် အများပြည်သူသွားလာအသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများ အသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ်ဖောက်ခွဲခြင်းများ ပြုလုပ်လျက်ရှိပါသည်။
 ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၉ ရက် နံနက် ၉ နာရီ ၁၀ မိနစ်တွင် တနင်္သာရီတိုင်းဒေသကြီး၊ ပုလောမြို့နယ်၊ ပလမြို့တိုက်နယ်ဆေးရုံသို့ မိုင်းပေါက်ကွဲစ ထိမှန်ဒဏ်ရာများဖြင့် အမျိုးသားတစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက် စစ်ဆေးခဲ့ရာ ပုလောမြို့နယ်၊ ပလမြို့၊ အမှတ်(၄)ရပ်ကွက်နေ ဦးငွေစိုး(၅၄)နှစ်သည် ၎င်း၏နေအိမ်မှ အဆိုပါရပ်ကွက်၌ ဈေးဝယ်ရန် ထွက်ခွာလာစဉ် ကျောင်းသစ်ဘုန်းကြီးကျောင်းအနီးအရောက် လမ်းဘေးမှ PDF အမည်ခံ အကြမ်းဖက်အဖွဲ့က ထောင်ထားသည့် လက်လုပ်မိုင်း တစ်လုံး ပေါက်ကွဲခဲ့မှုကြောင့် ဦးငွေစိုးတွင် မိုင်းပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။

အထက်ပါဖြစ်စဉ်မှ အကြမ်းဖက်မှုကျူးလွန်ခဲ့သူများအား ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိပါသည်။

MOHA

လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများအတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှ ပစ်ခတ်ခြင်း၊ Drone ဖြင့် Drop Bomb များ ပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲ တိုက်ခိုက်ခြင်းများအား လုပ်ဆောင်လျက်ရှိသည့်အပြင် အေးချမ်းစွာနေထိုင်လျက်ရှိသည့် ဒေသခံပြည်သူများကိုပါ ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန်လုပ်ဆောင် လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၇ ရက် ညနေ ၅ နာရီတွင် စစ်ကိုင်းတိုင်းဒေသကြီး၊ စစ်ကိုင်းမြို့နယ်၊ ရွာသစ်ကြီးကျေးရွာနေ ကိုဝင်းဇော်ထွေး(၄၀)နှစ်သည် ဇနီးဖြစ်သူ မြင်းမူ မြို့နယ်စိုက်ပျိုးရေးဦးစီးဌာနမှ ဒုဦးစီးမှူး ဒေါ်ခိုင်ဇာကြည်ဝေ(၃၇)နှစ်၊ သမီးဖြစ်သူ မယွန်းဝတီဦး(၁၃)နှစ်၊ အစ်မဖြစ်သူ ရွာသစ်ကြီးချည်မျှင်နှင့် အထည်စက်ရုံအခြေခံပညာအလယ်တန်းကျောင်းမှ အလယ်တန်းပြ ဆရာမ ဒေါ်ဆန်းဦး(၅၂)နှစ်တို့နှင့်အတူ ရွာသစ်ကြီးကျေးရွာ၌ ဈေးဝယ်နေစဉ် PDF အမည်ခံ အကြမ်းဖက်အဖွဲ့ အင်အား(စိစစ်ဆဲ)က 8L-XXXX LIGHT TRUCK အဖြူရောင်မော်တော်ယာဉ် တစ်စီးဖြင့် ရောက်ရှိလာပြီး ကိုဝင်းဇော်ထွေးပါ လေးဦးတို့အား ဖမ်းဆီးခေါ်ဆောင်သွားခဲ့ကြောင်း သိရသည်။
အထက်ပါဖြစ်စဉ်မှ အကြမ်းဖက်သမားများ၏ ဖမ်းဆီးခြင်းခံထားရသူအား အမြန်ဆုံးပြန်လည် ကယ်တင်နိုင်ရေးနှင့် ဒေသခံပြည်သူများအား ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော ရာဇဝတ်မှုများအား ကျူးလွန် လုပ်ဆောင်လျက်ရှိသည့် အကြမ်းဖက်သမားများအား ဖော်ထုတ်ဖမ်းဆီးအရေးယူနိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA