ဂျကာတာ  ဇန်နဝါရီ ၂၀

အင်ဒိုနီးရှားအစိုးရသည် လာမည့်ငါးနှစ်အတွင်း စက်သုံးဆီ တင်သွင်းမှုများကိုရပ်ဆိုင်းရန် စီစဉ်နေကြာင်း သမ္မတ ပရာဘိုဝို စုရီယန်တိုးက ဇန်နဝါရီ ၂၀ ရက်တွင် ပြောသည်။

အင်ဒိုနီးရှားနိုင်ငံသည် ဆင်းရဲနွမ်းပါးမှုပပျောက်ရေးနှင့် ပြည်သူလူထု၏ လူနေမှုအဆင့်အတန်းကို မြှင့်တင်နိုင်ရန်အတွက် သဘာဝသယံဇာတများကို ကုန်ချောနှင့် စက်မှုထုတ်ကုန်များအဖြစ် ပြောင်းလဲရန် အဓိကထားလုပ်ဆောင်ရမည်ဖြစ်ကြောင်း သမ္မတ စုရီယန်တိုးက ပြောသည်။

ထို့အပြင် အင်ဒိုနီးရှားနိုင်ငံသည် စားရေရိက္ခာဖူလုံမှုရှိရေးအတွက် ရည်မှန်းချက်ထားလုပ်ဆောင်လျက်ရှိပြီး ၂၀၂၇ ခုနှစ်တွင် အောင်မြင်မှုရရှိမည်ဟု မျှော်မှန်းထားသည်။

Source: မြန်မာ့အလင်းသတင်းစာ

Apple အမှုဆောင်အရာရှိချုပ် Tim Cook က မိမိတို့ ကုမ္ပဏီအနေဖြင့် အမေရိကန်စီးပွားရေးအတွက် ရင်းနှီး မြှုပ်နှံမှုများ ပြုလုပ်သွားမည် ဟု ကတိပြုခဲ့ကြောင်း အမေရိကန် သမ္မတ ဒေါ်နယ်ထရမ့်က ပြောကြားလိုက် ပါသည်။

“Tim Cook အနေဖြင့် မိမိ၏ အမေရိကန်ရွေးကောက်ပွဲ ရလဒ်ကြောင့် အမေရိကန်၌ ၎င်းတို့၏ ကုန်ပစ္စည်း ထုတ်လုပ်မှုများအတွက် ရင်းနှီးမြှုပ်နှံမှုများ ထပ်မံ ဆောင်ရွက်မည် ဖြစ်ကြောင်း” ဝါရှင်တန်ရှိ Capital One အားကစားကွင်း၌ ပြုလုပ်သည့် လူထုအစည်း အဝေးတွင် ဒေါ်နယ်ထရမ့်က ပြောကြားလိုက်ခြင်း ဖြစ်သည်။ 

ဒေါ်နယ်ထရမ့်သည်  အမေရိကန်သို့ ကုန်ထုတ်လုပ်မှု လုပ်ငန်းများ ပြန်လည်ရောက်ရှိလာပြီး နိုင်ငံသားများ အတွက် အလုပ်အကိုင်အခွင့်အလမ်းသစ်များ ဖန်တီး ပေးနိုင်ရေးတို့အတွက် နိုင်ငံအတွင်း ကြီးမားသည့် စီးပွားရေးလုပ်ငန်းများ လုပ်ကိုင်သွားမည်ဖြစ်ကြောင်း ယခင်ကလည်း အကြိမ်ကြိမ်ပြောခဲ့ဖူးပါသည်။ 

ကိုးကား -TASS

Photo: New York Post

ဒေါ်နယ်ထရမ့်သည် ၎င်း၏သမ္မတ ကျမ်းသစ္စာဆိုပွဲ မကျင်းပမီ ရက်ပိုင်းအလိုတွင် Meme ခရစ်တို ငွေကြေးပုံစံအသစ်ကို မိတ်ဆက်လိုက်ပါသည်။ 

"ယခုအချိန်သည် မိမိတို့၏ ရပ်တည်ချက် အားလုံး အတွက် ဂုဏ်ပြုရမယ့်အချိန်ဖြစ်ပြီး ထရမ့် အသိုက်အဝန်းကို ဝန်းရံပေးပါ"ဟု ပြီးခဲ့သည့် ဇန်နဝါရီ ၁၇ ရက် (သောကြာ)နေ့တွင် ခရစ်တိုငွေကြေးပုံစံအသစ်ကို တန်ဖိုးမြှင့်တင်သည့်သဘောဖြင့် မီဒီယာသို့ ပြောကြားခဲ့ပါသည်။ ခရစ်တိုငွေကြေးပုံစံအသစ်ကို ထရမ့် လက်သီးဆုပ်ထားသည့်ပုံစံဖြင့် ထုတ်ဝေခဲ့ပြီး ထရမ့်က မိတ်ဆွေနိုင်ငံရေးသမား လုပ်ကြံသတ်ဖြတ်ခံရခြင်းအပေါ် တုံ့ပြန်ထားသည့် "FIGHT FIGHT FIGHT" စာသား အားဒင်္ဂါးပေါ်တွင် ရိုက်နှိပ်ထားပါသည်။

ထို ထရမ့် meme ဒင်္ဂါးများကို တစ်ဒင်္ဂါးလျှင် ၁၀ ဒေါ်လာဖြင့် စတင်ရောင်းချခဲ့ရာမှ ဇန်နဝါရီ ၁၉ ရက် (တနင်္ဂနွေနေ့)၊ နံနက်ပိုင်းမှစ၍ ဒေါ်လာ ၇၀ ခန့်အထိ ဈေးနှုန်းမြင့်တက်နေပြီဖြစ်ကြောင်း သိရှိရပါသည်။ 

ထိုmeme ဒင်္ဂါးများမှာ မီဒီယာပေါ်တွင် ရေပန်းစားရန်ရည်ရွယ်ချက်ဖြင့် ထုတ်ဝေထားခြင်းဖြစ်သော်လည်း ထရမ့်က သမ္မတ ဂျိုးဘိုင်ဒင်လက်ထက်က ပစ်ပယ်ထားသော ခရစ်တိုငွေကြေးဈေးကွက်ကို ၎င်း၏ သက်တမ်းတစ်လျှောက် အားပေးမည့်သဘောကို ပြသခြင်းဖြစ်နိုင်ကြောင်း ကျွမ်းကျင်သူများက သုံးသပ်ထားပါသည်။ ထရမ့်က ခရစ်တိုငွေကြေးဈေးကွက် လည်ပတ်ရန် အားပေးမည့် ဘဏ္ဍာရေးစည်းမျဉ်းများကို ထုတ်ပြန်သွားမည်ဖြစ်ကြောင်း၊ ခရစ်တိုငွေကြေးဈေးကွက်မှ အရာရှိများကိုလည်း အစိုးရအဖွဲ့တွင် နေရာကောင်းများပေးသွားမည်ဖြစ်ကြောင်းကိုလည်း ကတိပေး ပြောကြားခဲ့ဖူးပါသည်။ 

ကိုးကား -AP

ဂျပန်၊ အမေရိကန်၊ ဥရောပသမဂ္ဂနှင့် ထိုင်ဝမ်တို့မှ တင်သွင်းလာသော ဓာတုဗေဒပစ္စည်းများ တင်သွင်းမှုအပေါ် ယာယီအခွန်စည်းကြပ်ရန် တရုတ်ကဆုံးဖြတ်ခဲ့သည်။

Polyformaldehyde Copolymer နှင့်ပတ်သက်သော ရင်းနှီးမြှုပ်နှံမှုထိန်းချုပ်ရေး စီမံချက်သည် လာမည့် ဇန်နဝါရီ ၂၄ ရက်နေ့တွင် အသက်ဝင်မည်ဖြစ်ကြောင်း တရုတ်ကုန်သွယ်ရေးဝန်ကြီးဌာနက ဇန်နဝါရီ ၁၆ ရက်နေ့ တွင်ပြောကြားခဲ့သည်။ အဆိုပါကုန်ပစ္စည်းကို မော်တော်ယာဉ်အစိတ်အပိုင်းများမှ အီလက်ထရွန်းနစ်ပစ္စည်းများအထိ ကျယ်ကျယ်ပြန့်ပြန့် အသုံးပြုနိုင်ပါသည်။ 

စုံစမ်းစစ်ဆေးမှုတစ်ခု၏ တွေ့ရှိချက်များအရ ထိုကဲ့သို့ သော တင်သွင်းမှုများကြောင့် သွင်းကုန်များ ရင်းနှီးမြှုပ်နှံခြင်းနှင့် ဆက်စပ်ပြည်တွင်းစက်မှုလုပ်ငန်းများကို ကြီးမားသောထိခိုက်မှုများ ဖြစ်စေခဲ့ကြောင်း ဝန်ကြီးဌာနက ပြောကြားခဲ့ပါသည်။

သွင်းကုန်လုပ်ငန်းရှင်များသည် ကုန်ပစ္စည်းများ ဝယ်ယူသည့်အခါတွင် တရုတ်အကောက်ခွန်ဌာန၌ ကြိုတင်အပ်ငွေထားရှိရန်လိုအပ်ကြောင်း ဈေးလျှော့ချ တင်သွင်းမှုတိုက်ဖျက်ရေးအတွက် ကြိုတင်အပ်ငွေပမာဏသည် ၎င်းပစ္စည်းထုတ်သည့်နိုင်ငံပေါ် မူတည်ပြီး ၃.၈ ရာခိုင်နှုန်းမှ ၇၄.၉ ရာခိုင်နှုန်းအထိ ရှိကြောင်းလည်း အဆိုပါဝန်ကြီးဌာနကပြောပါသည်။ 

တရုတ်နိုင်ငံသို့ အမေရိကန်မှ ဈေးနှုန်းသက်သာသော ချစ်ပ်အဟောင်းများ တင်ပို့ရောင်းချမှုဆိုင်ရာ စုံစမ်းစစ်ဆေးမှုကိုစတင်မည်ဖြစ်ကြောင်း ဝန်ကြီးဌာနက ပြောကြားခဲ့သည်။

အမေရိကန် ရွေးကောက်ခံသမ္မတ ဒေါ်နယ်ထရမ့် ဇန်နဝါရီ ၂၀ ရက် ကျမ်းသစ္စာကျိန်ဆိုမှု မစတင်မီ ရက်ပိုင်းအလိုတွင် အဆိုပါစီမံချက်ထွက်ပေါ်လာခြင်း ဖြစ်ပြီး တရုတ်နိုင်ငံလုပ်လျှပ်စစ်ကားများအပေါ် အခွန်စည်းကြပ်မှုနှင့်အခြားကိစ္စရပ်များအတွက် တရုတ်နိုင်ငံသည် EU နှင့်လည်း ပွတ်တိုက်မှုများ ဖြစ်ပွားလျက် ရှိသည်။

ကိုးကား-NHK World

ဗီယက်နမ်နိုင်ငံသည် ယခု ၂၀၂၅  ခုနှစ်တွင် နိုင်ငံအတွင်းမှ ထွက်ရှိသည့် အသီးအနှံနှင့်ဟင်းသီးဟင်းရွက်  စသည့် စိုက်ပျိုးပို့ကုန်တင်ပို့မှုမှ ဒေါ်လာ ၈ ဘီလီယံအထိ ရရှိနိုင်မည်ဟု မျှော်မှန်းလျက်ရှိသည်။

နိုင်ငံ၏ စိုက်ပျိုးရေး ထုတ်ကုန်များကို ပြည်ပနိုင်ငံများသို့ တင်ပို့ရာတွင် လက်ရှိဖြစ်ပွားနေသည့် ကုန်သွယ်ရေး တင်းမာမှုများ၊ ပထဝီနိုင်ငံရေးပဋိပက္ခများသည် အဟန့်အတားများအဖြစ် တည်ရှိနေကြောင်း၊ ဗီယက်နမ်အနေဖြင့် ၂၀၂၄ ခုနှစ်အတွင်း စိုက်ပျိုးထုတ်ကုန်များ တင်ပို့မှုမှ ဒေါ်လာ ၇ ဒသမ ၁ ဘီလီယံအထိရရှိခဲ့ကြောင်း ဗီယက်နမ်အသီးအနှံနှင့် ဟင်းသီးဟင်းရွက်စိုက်ပျိုး ထုတ်လုပ်ရေးအဖွဲ့ ဥက္ကဋ္ဌဖြစ်သူ ငုယင်သန်းဘင်၏   ဇန်နဝါရီလ ၁၄ ရက်ပြောကြားချက်ကို ကိုးကား၍ ဒေသတွင်းမီဒီယာ တစ်ခုကဖော်ပြသည်။

ဗီယက်နမ်စိုက်ပျိုးရေးကုမ္ပဏီများ အနေဖြင့် ၎င်းတို့ထုတ်ကုန်များ၏ အရည်အသွေးနှင့်ပြိုင်ဆိုင်မှုကို တိုးမြှင့်နိုင်ရန် အာရုံစိုက်လုပ်ဆောင်သင့်ပြီး ဗီယက်နမ်နှင့် နှစ်နိုင်ငံကြား သို့မဟုတ် နိုင်ငံစုံ သဘောတူညီချက်များပါ သတ်မှတ်ချက်များနှင့် ကိုက်ညီမှုရှိစေရန် လုပ်ဆောင်သင့်ကြောင်း ၎င်းကဆက်လက် ပြောကြားသည်။

ဗီယက်နမ်နိုင်ငံမှထုတ်လုပ်သည့် စိုက်ပျိုးထုတ်ကုန်များသည် ဈေးကွက်ထိုးဖောက်နိုင်မှု တိုးတက်လာလျက်ရှိပြီး တရုတ်နိုင်ငံအတွင်းရှိ ဈေးကွက်အတွင်းမှာပင် တတိယနေရာမှ ယခုအခါ ဒုတိယနေရာသို့ တက်လှမ်းနိုင်ခဲ့ပြီဖြစ်ကြောင်း Xinhua သတင်း အေဂျင်စီတွင် ဖော်ပြထားသည်။

Source: Myawady Web Portal

တစ်ကမ္ဘာလုံးတွင် ၂၀၂၄ ခုနှစ်အတွင်း ရောင်းချနိုင်ခဲ့သည့်   လျှပ်စစ်ကား အရေအတွက်သည်   ၁၇ ဒသမ ၁ သန်းအထိ  စံချိန်တင်မြင့်တက်လာခဲ့ကြောင်း လျှပ်စစ်ကားဆိုင်ရာ သုတေသနအဖွဲ့ တစ်ခုဖြစ်သည့် Rho Motion က ထုတ်ပြန်သည်။

အဆိုပါရောင်းချနိုင်သည့် ပမာဏသည် ပြီးခဲ့သည့်နှစ်က ပမာဏနှင့်နှိုင်းယှဉ်ပါက ၂၅ ရာခိုင်နှုန်း မြင့်တက်လာခြင်း ဖြစ်သည်။

တရုတ်နိုင်ငံသည် လျှပ်စစ်ကားထုတ်လုပ် ရောင်းချမှုတွင် လွှမ်းမိုးထားပြီး ၂၀၂၄  ခုနှစ် တစ်နှစ်တည်းမှာပင်   ကားအစီးရေ  ၁၁ သန်း ရောင်းချနိုင်ခဲ့သည်။ တရုတ်လျှပ်စစ်ကား ထုတ်လုပ်သည့်ကုမ္ပဏီများ အနက် BYD သည်  လက်ရှိတွင်  ဦးဆောင်နေသည့် အခြေအနေတွင်ရှိနေပြီး  တရုတ်နိုင်ငံအတွင်းရှိ လျှပ်စစ်ကားဈေးကွက်၏ သုံးပုံတစ်ပုံကျော်ကို ရယူထားနိုင်သည်။

ဥရောပဒေသတွင်မူ     ဗြိတိန်နိုင်ငံက   ဂျာမနီအား ကျော်တက်၍ ၂၀၂၄  ခုနှစ်တွင် လျှပ်စစ်ကား အစီးရေ ၄၀၀၀၀၀ ကျော် ထုတ်လုပ်ရောင်းချနိုင်ခဲ့သည်။ အမေရိကန်ပြည်ထောင်စုနှင့် ကနေဒါနိုင်ငံတို့၌  ၂၀၂၄ ခုနှစ်တွင် လျှပ်စစ်ကားအစီးပေါင်း ၁ ဒသမ ၈ သန်းခန့် ရောင်းချနိုင်ခဲ့ခြင်းကြောင့် ၂၀၂၃ ခုနှစ်နှင့်နှိုင်းယှဉ်ပါက ၉ ရာခိုင်နှုန်းမြင့်တက်လာသည်။ 

Source: Myawady Web Portal

ရုရှားနိုင်ငံနှင့် ပူးပေါင်းဆောင်ရွက်မှုများ  ပြန်လည်လုပ်ဆောင်လိုကြောင်း အနောက်နိုင်ငံများမှ စီးပွားရေးလုပ်ငန်းများ၏ အချက်ပြပြောဆိုမှုများ လက်ခံရရှိကြောင်း ရုရှားနိုင်ငံခြားရေးဝန်ကြီးဌာန လက်အောက်ရှိ  စီးပွားရေးပူးပေါင်း ဆောင်ရွက်မှုဌာနမှ ညွှန်ကြားရေးမှူး ဒီမစ်ဒရီဘီရီချက်စကီက ပြောသည်။

ရုရှားနိုင်ငံနှင့် ပူးပေါင်းဆောင်ရွက်ခြင်းသည် အနောက်နိုင်ငံများမှ  စီးပွားရေးလုပ်ငန်းများအတွက် အရေးပါကြောင်းကို တွေ့ရှိရပြီး ရုရှားအနေဖြင့် ၎င်းစီးပွားရေးလုပ်ငန်းများနှင့်  ထိရောက်ပြီး အပြန်အလှန်အကျိုးပြုသည့် ပူးပေါင်းဆောင်ရွက်မှုများ လုပ်ဆောင်နိုင်မည်ဟု မျှော်လင့်ကြောင်း၊ ရုရှားအစိုးရအနေဖြင့် တွေ့ဆုံဆွေးနွေးရန် လမ်းဖွင့်ထားကြောင်း  ဒီမစ်ဒရီဘီရီချက်စကီက Sputnik သတင်းစာနှင့် ပြုလုပ်သည့် တွေ့ဆုံမေးမြန်းခန်း တစ်ခုတွင်ပြောသည်။

အနောက်နိုင်ငံများမှ ကုမ္ပဏီများ အနေဖြင့် ရုရှားဈေးကွက်အတွင်းသို့ ပြန်လည်ဝင်ရောက်လိုသည်ဟူသော အချက်ပြမှုများ တွေ့မြင်ရကြောင်း၊ ၎င်းကုမ္ပဏီများအနေဖြင့် ရုရှားဈေးကွက်အတွင်းသို့ ပြန်လည်ဝင်ရောက်လိုကြောင်း၊ သို့သော် အခြေအနေအသစ်များ အပေါ်မူတည်၍ ဝင်ရောက်နိုင်မည်ဖြစ်ကြောင်း ရုရှားသမ္မတ ဗလာဒီမာပူတင်က ၂၀၂၄ ခုနှစ်  နိုဝင်ဘာလအတွင်း က ပြောကြားခဲ့သည်။

ထို့ပြင် ရုရှားနိုင်ငံအနေဖြင့် ဥရောပသို့ ဓာတ်ငွေ့ပြန်လည်ထောက်ပံ့ပေးရန် အသင့်ရှိကြောင်း၊ သို့သော် ထိုသို့ထောက်ပံ့ပေးမည့် အလားအလာသည် ဝယ်ယူမည့် နိုင်ငံအပေါ် မူတည်ကြောင်း ရုရှားအစိုးရက ဆက်လက် ပြောကြားသည်။

Source: Myawady Web Portal

ကမ္ဘာလုံးဆိုင်ရာ ငွေကြေးဖောင်းပွမှုသည် လာမည့် ၂၀၂၈ ခုနှစ်အထိ ဆက်လက်ဖြစ်ပွားနေမည်ဖြစ်ကြောင်း စီးပွားရေးပညာရှင်များက ဇန်နဝါရီလ ၁၄ ရက်တွင် ထုတ်ပြန်သည့် လေ့လာမှုစစ်တမ်းတစ်ခုတွင် ဖော်ပြထားသည်။

ကမ္ဘာလုံးဆိုင်ရာ ငွေကြေးဖောင်းပွမှုသည် ယခု ၂၀၂၅ ခုနှစ်တွင် ပျမ်းမျှအားဖြင့် ၃ ဒသမ ၉ ရာခိုင်နှုန်းရှိပြီး ၂၀၂၆ ခုနှစ်တွင် ၃ ဒသမ ၅ ရာခိုင်နှုန်းအထိ ကျဆင်းလာနိုင်ကြောင်း ဂျာမနီစီးပွားရေးသုတေသနအင်စတီကျုနှင့် ဆွစ်ဇာလန်စီးပွားရေးအင်စတီကျုတို့မှ စီးပွားရေးပညာရှင်များက ဦးဆောင်ထုတ်ပြန်သည့် လေ့လာမှုစာတမ်းတွင် ဖော်ပြထားခြင်းဖြစ်သည်။

ထို့ပြင် ၂၀၂၄ ခုနှစ်တွင် ကမ္ဘာလုံးဆိုင်ရာ ငွေကြေးဖောင်းပွမှုနှုန်းသည် အ‌နောက်ဥရောပတွင် ၂ ဒသမ ၁ ရာခိုင်နှုန်း၊ မြောက်အမေရိကတွင် ၂ ဒသမ ၆ ရာခိုင်နှုန်းနှင့် အရှေ့တောင်အာရှဒေသတွင် ၂ ဒသမ ၉ ရာခိုင်နှုန်းအသီးသီးရှိကြောင်း ၎င်းတို့က ဆက်လက်ပြောကြားသည်။

လက်ရှိ ၂၀၂၅ ခုနှစ်တွင် တောင်အာရှဒေသ၏ ငွေကြေးဖောင်းပွမှုနှုန်းသည် ၇ ဒသမ ၄ ရာခိုင်နှုန်း၊ တောင်အမေရိကဒေသတွင် ၃၃ ဒသမ ၆ ရာခိုင်နှုန်း၊ မြောက်အာဖရိကဒေသတွင် ၃၇ ဒသမ ၂ ရာခိုင်နှုန်းအထိ ရှိလာနိုင်သည်ဟု စီးပွားရေးပညာရှင်များက ခန့်မှန်းထားသည်။

အဆိုပါလေ့လာမှုစာတမ်းတွင် နိုင်ငံပေါင်း ၁၂၅ နိုင်ငံမှ ကျွမ်းကျင်သူ ၁၃၉၈ ဦးက ပူးပေါင်းပါဝင်၍ လေ့လာထားခြင်းဖြစ်သည်။

N.A

Source: မြဝတီသတင်းစာ

ဂျာမဏီ မော်တော်ကားကုမ္ပဏီ Volkswagen ၏ ၂၀၂၄ ခုနှစ် ကမ္ဘာလုံးဆိုင်ရာရောင်းအား ကျဆင်းသွားခဲ့ပြီး ၎င်း၏ပြိုင်ဖက် ဂျပန်ကားကုမ္ပဏီ Toyota Motor က ၅ နှစ်ဆက်တိုက် ထိပ်ဆုံးနေရာကို ရယူရန်ရှိနေကြောင်း သိရှိရပါသည်။

ယမန်နှစ်က ကမ္ဘာတစ်ဝန်း၌ ကားအစီးရေ ၉.၀၂ သန်း ရောင်းချခဲ့ရကြောင်း Volkswagen ကားကုမ္ပဏီက ဇန်နဝါရီ ၁၄ ရက်နေ့တွင် ကြေညာခဲ့ပါသည်။ အချက်အလက်များအရ ၂၀၂၃ ခုနှစ်ကထက် ၂.၃ % ကျဆင်းသွားခဲ့ရခြင်းဖြစ်ပါသည်။

အဓိကဖြစ်သော အနောက်ဥရောပဈေးကွက်တွင် ရောင်းအားအပြောင်းအလဲများစွာမရှိခဲ့သော်လည်း တရုတ်နိုင်ငံရှိ ပြည်တွင်းကားထုတ်လုပ်သူများ၏ ပြင်းထန်သောပြိုင်ဆိုင်မှုများကြောင့် တရုတ်နိုင်ငံ အတွင်း Volkswagen ၏ ရောင်းအားသည် နှစ်အလိုက် နှိုင်းယှဉ်ပါက ၉.၅ % ကျဆင်းသွားခဲ့ရသည်။ Volkswagen ‌ရောင်းအား၏ ၃၀ % ကျော်သည် တရုတ်ဈေးကွက် ဖြစ်ပါသည်။

Volkswagen ကုမ္ပဏီသည် ကမ္ဘာတစ်ဝန်း ဘက်ထရီစွမ်းအင်သုံးလျှပ်စစ်ကား (EV) အစီးရေ ၇၄၄,၈၀၀ ရောင်းချခဲ့ပြီး ယခင်နှစ်ကထက် ၃.၄ % ကျဆင်းခဲ့ ပါသည်။ ဥရောပနှင့် အမေရိကန်ပြည်ထောင်စုဈေးကွက်တွင်လည်း Volkswagen ၏ EV ကား ဝယ်လိုအားလျော့နည်းလာနေပြီး ကုမ္ပဏီသည် ကုန်ကျစရိတ် လျှော့ချနိုင်ရန်အတွက် ၎င်း၏ထုတ်လုပ်မှုနှင့် အလုပ်သမား ၃၅,၀၀၀ ကျော် လျှော့ချရန်စီစဉ်ထားကြောင်း ဒီဇင်ဘာလက ကြေညာခဲ့ပါသည်။

Toyota ကားကုမ္ပဏီအနေဖြင့် ၂၀၂၄ ခုနှစ်အတွက် ကုမ္ပဏီအစုအဖွဲ့တစ်ခုလုံး၏ နောက်ဆုံးကိန်းဂဏန်းများကို မထုတ်ပြန်သေးသော်လည်း ၂၀၂၄ ခုနှစ် နိုဝင်ဘာလအထိ အစီးရေ ၉.၈၅ သန်းကျော် ရောင်းချနိုင်ခဲ့ကာ Volkswagen ၏ စုစုပေါင်းကိန်းဂဏန်းထက် ကျော်လွန်ခဲ့ကြောင်းသိရှိရပါသည်။

ကိုးကား-NHK World

အင်ဒိုနီးရှားနိုင်ငံက BRICS အဖွဲ့သို့ တင်းပြည့်အဖွဲ့ဝင်နိုင်ငံအဖြစ် ဝင်ရောက်ပြီး နောက်ပိုင်းတွင် နိုင်ငံအတွင်း၌ BRICS အဖွဲ့ဝင်နိုင်ငံများမှ  ဝင်ရောက်လာသည့် ရင်းနှီးမြှုပ်နှံမှုပမာဏသည်   မြင့်တက်လာမည့် အလားအလာရှိကြောင်း  သိရသည်။

နိုင်ငံအတွင်းသို့ BRICS အဖွဲ့ဝင်နိုင်ငံများမှ ရင်းနှီးမြှုပ်နှံမှုများ တိုးမြင့်ဝင်ရောက်လာခြင်းသည် နိုင်ငံ၏စီးပွားရေး တိုးတက်မှုကို တိုးမြှင့်ပေးနိုင်မည်ဖြစ်ပြီး ပြည်တွင်းစီးပွားရေး လုပ်ဆောင်မှုများ တိုးမြင့်လာခြင်းသည် အင်ဒိုနီးရှားအစုရှယ်ယာ ဈေးကွက်၏ လုပ်ဆောင်မှုကို ပိုမိုတိုးတက် ကောင်းမွန်လာစေမည်ဖြစ်ကြောင်း အင်ဒိုနီးရှား အစုရှယ်ယာဈေးကွက်မှ ညွှန်ကြားရေးမှူး ဂျက်ဖရီဟင်းဒရစ်က ဇန်နဝါရီလ၁၀ ရက်တွင် ပြောသည်။

အင်ဒိုနီးရှားနိုင်ငံအနေဖြင့် BRICS အဖွဲ့ဝင်နိုင်ငံအဖြစ် ဝင်ရောက်ခြင်းအားဖြင့် အဖွဲ့ဝင်နိုင်ငံများ၏ အကျိုးဖြစ်ထွန်းမှုနှင့် စိုးရိမ်မကင်းဖြစ်မှုများကို အဓိကဖြေရှင်းရန်နှင့် အဖွဲ့ဝင်နိုင်ငံများကြား  ပူးပေါင်းဆောင်ရွက်မှုကို တိုးမြှင့်ရန် လိုအပ်ကြောင်း အင်ဒိုနီးရှား အစုရှယ်ယာဈေးကွက်မှ တာဝန်ရှိသူများက တိုက်တွန်းထားသည်။

အင်ဒိုနီးရှားနိုင်ငံသည် BRICS အဖွဲ့ဝင် နိုင်ငံအဖြစ် ယခုရက်သတ္တပတ် အစောပိုင်းက ဝင်ရောက်ခဲ့ခြင်းဖြစ်သည်။

Source: Myawady Web Portal