ဆွီဒင်နိုင်ငံ၊ အိုရေဘရူမြို့ရှိ Campus Risbergska တွင် အရွယ်ရောက်ပြီးကျောင်းသားများ တက်ရောက်ရာကျောင်းတစ်ကျောင်း၌ ဖေဖော်ဝါရီ ၄ ရက် ဒေသစံတော်ချိန် ၁၂:၃၀ ခန့်တွင် အကြမ်းဖက်ပစ်ခတ်မှု ဖြစ်ပွားခဲ့ရာ ပျမ်းမျှ လူ ၁၀ ဦးခန့် သေဆုံးခဲ့ကြောင်း သတင်းရရှိပါသည်။
ဖြစ်စဉ်တွင် တရားခံဟု သံသယရှိသူသည်လည်း သေဆုံးသူများအနက်ပါဝင်နိုင်ကြောင်း ယူဆရပြီးဒေသဆိုင်ရာ အာဏာပိုင်များက အတည်ပြုရန် ဆက်လက်စစ်ဆေး လျက်ရှိပြီး ပစ်ခတ်မှုဖြစ်ပွားရသည့် အကြောင်းအရင်းကိုလည်း စုံစမ်းစစ်ဆေးဆဲဖြစ်ပါသည်။
အီတလီနိုင်ငံ၊ နိုင်ငံခြားရေးဝန်ကြီးနှင့် ဒုတိယဝန်ကြီးချုပ် အန်တိုနီယို တာဂျာနီက အမေရိကန်သမ္မတ ဒေါ်နယ် ထရမ့် အကြံပြုထားသည့် စစ်ရေးအသုံးစရိတ်ကို နိုင်ငံ GDP ၏ ၅ ရာခိုင်နှုန်း အထိ တိုးမြှင့်ရန်မှာ အီတလီ အနေဖြင့် ပြင်ဆင်ထားခြင်း မရှိပါကြောင်း ပြောကြား လိုက်ပါသည်။
ရုရှားနိုင်ငံသည် Oreshnik ဟိုက်ပါဆိုးနစ် ဒုံးကျည်များကို ဘယ်လာရုစ်နိုင်ငံတွင် တပ်ဆင်ရန် အစီအစဉ်ရှိကြောင်း၊ နှစ်နိုင်ငံသမ္မတများ၏ ပူးပေါင်းကာကွယ်ရေးဆိုင်ရာ သဘောတူညီချက်များနှင့် လုံခြုံရေးအယူအဆအရဖြစ်ကြောင်း၊ Oreshnik ဟိုက်ပါဆိုးနစ်ဒုံးကျည်များ တပ်ဆင်မှုသည် အနောက်နိုင်ငံများ၏ ယူကရိန်းသို့ လက်နက်ပို့ဆောင်မှုများနှင့် ရုရှားနိုင်ငံ၏ နယ်မြေများပေါ်တွင် ဒုံးကျည်တိုက်ခိုက်မှုများအပေါ် တုံ့ပြန်ရန်ဖြစ်ကြောင်း ရုရှားနိုင်ငံခြားရေးဝန်ကြီးဌာနမှ ဒါရိုက်တာ Alexey Polishchuk က ဖေဖော်ဝါရီ ၄ ရက် (အင်္ဂါနေ့) တွင် ပြောပြထားပါသည်။
နိုင်ငံတော်လုံခြုံရေးအတွက် ခြိမ်းခြောက်မှုအန္တရာယ်ဖြစ်လာမည်ကို စိုးရိမ်သဖြင့် ဩစတေးလျအစိုးရဌာနများရှိ ကွန်ပျူတာနှင့်နည်းပညာပစ္စည်းများ အားလုံးတွင် တရုတ်ကုမ္ပဏီပိုင် DeepSeek ဉာဏ်ရည်တုနည်းပညာ (AI) အသုံးပြုခွင့်ပိတ်ပင်လိုက်ကြောင်း ဩစတေးလျ အစိုးရက ဖေဖော်ဝါရီ ၄ ရက်(အင်္ဂါနေ့)တွင် ပြောကြား လိုက်ပါသည်။
ဖေဖော်ဝါရီ ၃ ရက်တွင် ကျရောက် ကမ္ဘာ့ကင်ဆာနေ့ကို ဂုဏ်ပြုသောအားဖြင့် ဗြိတိန် ဝေလမင်းသမီး ကတ်သရင်း က တောအုပ်တစ်နေရာရှိ သစ်ပင်များအကြား ပြုံးရွှင်နေသော မျက်နှာအမူအယာဖြင့် လက်ဆန့်တန်းကာ ရိုက်ကူးထားသည့် ဓာတ်ပုံကို နန်းတော်၏ X စာမျက်နှာတွင် မျှဝေခဲ့ပါသည်။ ထိုဓာတ်ပုံကို ၆ နှစ် သားအရွယ် မင်းသားက ရိုက်ကူးခဲ့ခြင်းဖြစ်ပါသည်။
မင်းသမီးကတ်သရင်းသည် ဖော်မပြနိုင်သည့် ကင်ဆာရောဂါအတွက် ကုသမှုခံယူရန် ယမန်နှစ်က ပြည်သူ့တာဝန်များမှ အနားယူခဲ့ပြီး ပြီးခဲ့သည့်ဇန်နဝါရီလက ကင်ဆာပျောက်ကင်းသွားပြီဖြစ်ကြောင်း ကြေညာခဲ့ပါသည်။
ယူကရိန်းအရှေ့ပိုင်းရှိ ရုရှားလိုလားသော အရန်တပ်ဖွဲ့ ခေါင်းဆောင် အာမန်ဆားစ်ဂျန်သည် မော်စကို၌ဖေဖော်ဝါရီ ၃ ရက်(တနင်္လာနေ့) နံနက်ပိုင်းက ပေါက်ကွဲမှုအတွင်း အပြင်းအထန်ဒဏ်ရာ ရရှိသွားပြီးနောက် ဆေးရုံတွင် သေဆုံးသွားခဲ့ကြောင်း ရုရှားမီဒီယာများက ပြောကြားထားသည်။
ဇန်နဝါရီလ ၂၆ ရက်တွင် ပြီးစီးခဲ့သည့် ဘယ်လာရုစ် သမ္မတရွေးကောက်ပွဲ၏မဲရလဒ်များအရ အလက်ဇန်းဒါး လူကာရှန်ကို သမ္မတအဖြစ် ရွေးကောက်တင်မြှောက်ခံရကြောင်း ဗဟိုရွေးကောက်ပွဲကော်မရှင် (CEC) က ထုတ်ပြန်ကြေညာလိုက်ပါသည်။
အမေရိကန်သမ္မတ ဒေါ်နယ်ထရမ့်သည် ကုလသမဂ္ဂလူ့အခွင့်အရေးကောင်စီ (UNHRC) မှ အမေရိကန် ပြည်ထောင်စုအနေဖြင့် တရားဝင်နုတ်ထွက်ပြီး ကုလသမဂ္ဂ ကယ်ဆယ်ရေးအေဂျင်စီ (UNRWA) အတွက် ငွေကြေးထောက်ပံ့မှုကို တားမြစ်ပိတ်ပင်မည့် အမိန့်တစ်ရပ်ကို ဖေဖော်ဝါရီ ၄ ရက် (အင်္ဂါနေ့) တွင် လက်မှတ်ရေးထိုးရန် မျှော်လင့်ထားကြောင်း Politico က ဖော်ပြထားပါသည်။
ကုလသမဂ္ဂကယ်ဆယ်ရေးအေဂျင်စီ (UNRWA) သည် အရှေ့ပါလက်စတိုင်းရှိ ကယ်ဆယ်ရေးနှင့် လူသားအရင်းအမြစ်ဖွံ့ဖြိုးတိုးတက်ရေးအတွက် ဆောင်ရွက် နေသည့် အေဂျင်စီတစ်ခု ဖြစ်သည်။
အမေရိကန်နိုင်ငံခြားရေးဝန်ကြီး Marco Rubio သည် အမေရိကန်နိုင်ငံတကာဖွံ့ဖြိုးရေးအေဂျင်စီ (USAID) ၏ ခေတ္တ အမှုဆောင်ဒါရိုက်တာအဖြစ် တာဝန်ယူ ဆောင်ရွက်သွားမည်ဖြစ်ပြီး ယင်းအေဂျင်စီကို နိုင်ငံခြားရေးဝန်ကြီးဌာနအောက်တွင် ထားရှိသွားမည်ဖြစ်ကြောင်း ကြေညာလိုက်ပါသည်။ နိုင်ငံခြားအကူအညီပေးရေးလုပ်ငန်းများကို နိုင်ငံခြားရေးဝန်ကြီးဌာန အောက်တွင်ထားရှိခြင်းမှာ အမေရိကန်သမ္မတ ဒေါ်နယ်ထရမ့်အစိုးရအဖွဲ့၏ မဟာဗျူဟာလုပ်ငန်းများ ၏တစ်စိတ်တစ်ပိုင်းအဖြစ် ပြောင်းလဲဆောင်ရွက်နေခြင်း ဖြစ်ပါသည်။
အီရန်သိပ္ပံပညာရှင်များသည် နျူကလီးယား လက်နက်ထုတ်လုပ်နိုင်ရန် ပိုမိုမြန်ဆန်သောနည်းလမ်းကို လုပ်ဆောင်နေကြောင်း အမေရိကန်ထောက်လှမ်းရေး သတင်းရင်းမြစ်များကို ကိုးကား၍ New York Times က ဖေဖော်ဝါရီ ၃ ရက်နေ့တွင် ဖော်ပြခဲ့သည်။ အစီရင်ခံစာအရ တီဟီရန်အခြေစိုက် သိပ္ပံပညာရှင်များ၏ လျှို့ဝှက် အဖွဲ့တစ်ဖွဲ့သည် အမေရိကန် သို့မဟုတ် အစ္စရေးတို့၏ စစ်ရေးလုပ်ဆောင်မှုကို ဟန့်တားရန်အတွက် အဏုမြူ ဗုံးထုတ်လုပ်ရန် နည်းလမ်းသစ်ရှာဖွေရန် တာဝန်ပေးအပ်ခံထားရပြီး အကောင်အထည်ဖော်နိုင်ရန် ကြိုးပမ်းလျက်ရှိကြောင်း သိရှိရပါသည်။