ဥရောပသမဂ္ဂ(EU)ခေါင်းဆောင်များက ဥရောပတိုက်လုံခြုံရေးအတွက် အဓိကတာဝန်ယူ ဆောင်ရွက်ရမည်ဖြစ်ကြောင်း NATO တပ်ဖွဲ့ဝင် နိုင်ငံများ၏ ကာကွယ်ရေးဝန်ကြီးများ အစည်းအဝေးကျင်းပပြီးနောက် ဘရပ်ဆဲလ် မြို့၌ ကျင်းပသည့် သတင်းစာရှင်းလင်းပွဲတွင် အမေရိကန် ကာကွယ်ရေးဝန်ကြီး Pete Hegseth က ပြောကြားခဲ့ပါသည်။

မကြာသေးမီရက်များအတွင်း အမေရိကန်သမ္မတ ဒေါ်နယ်ထရမ့်က "NATO တပ်ဖွဲ့ဝင် မဟာမိတ်နိုင်ငံများအနေဖြင့် ၎င်းတို့၏ ကာကွယ်ရေးအသုံးစရိတ်ကို GDP ၏ ၅% အထိ တိုးမြှင့်သွားရန်" တိုက်တွန်းခဲ့သည်။

ရုရှားသမ္မတ ဗလာဒီမာပူတင်နှင့် ပထမဆုံး တွေ့ဆုံမည့် အစည်း အဝေးကို ဆော်ဒီအာရေးဗီးယားတွင် ကျင်းပရန် စီစဉ်ထားကြောင်း၊ အဆိုပါ တွေ့ဆုံမှုတွင် ဆော်ဒီအိမ်ရှေ့မင်းသား Mohammed bin Salman AI Saud လည်း ပါဝင်နိုင်ကြောင်း ထရမ့်က ပြောကြားလိုက်ပါသည်။ 

ဖေဖော်ဝါရီ ၁၂ ရက်တွင် ပူတင်နှင့် ထရမ့်တို့၏ တယ်လီဖုန်း ဆက်သွယ်ပြောကြားမှုသည် ၁ နာရီခွဲကြာမြင့်ခဲ့ပြီး နိုင်ငံသားများ အပြန်အလှန်လဲလှယ်မှုကိစ္စရပ်များအပါအဝင် ယူကရိန်း အရေးနှင့် အရှေ့အလယ်ပိုင်းဒေသ ဖွံ့ဖြိုးတိုးတက်ရေးဆိုင်ရာကိစ္စရပ်များကို ဆွေးနွေးခဲ့ကြောင်း ကရင်မလင်က ထုတ်ပြန်ထားပါသည်။ 

ဖေဖော်ဝါရီ ၁၂ ရက်မှ ၁၃ ရက်ထိ အမေရိကန်ပြည်ထောင်စုသို့ သွားရောက်လည်ပတ်ခဲ့သော အိန္ဒိယဝန်ကြီးချုပ် နာရိန်ဒရာမိုဒီသည် အမေရိကန်သမ္မတ ဒေါ်နယ်ထရမ့်နှင့် ဖေဖော်ဝါရီ ၁၂ ရက်တွင် အိမ်ဖြူတော်၌ တွေ့ဆုံခဲ့သည်၊။ ထိုသို့တွေ့ဆုံချိန် ခေါင်းဆောင်နှစ်ဦးသည် အိန္ဒိယ-အမေရိကန် ကုန်သွယ်ရေးသဘောတူညီချက်တစ်ရပ်ကို လက်မှတ်ရေးထိုးခဲ့ကြသည်။ 

ထို့ပြင် နှစ်နိုင်ငံအကြား ၁၀ နှစ်ကြာမြင့်မည့် ကာကွယ်ရေး မိတ်ဖက်ဆက်ဆံရေး သဘောတူညီချက်မူဘောင်အသစ်တစ်ခု လက်မှတ်ရေးထိုးရန် စီစဉ်နေကြောင်း ခေါင်းဆောင်နှစ်ဦးက ကြေညာလိုက်ကြပြီး ရက်အတိအကျ ပြောပြထားခြင်း မရှိချေ။

ယူကရိန်းသမ္မတ Volodymyr Zelenskyy က အမေရိကန်သမ္မတ Donald Trump သည် ၎င်းနှင့် စကားမပြောမီ ရုရှားသမ္မတနှင့် ဦးစွာ ဖုန်းဆက်စကားပြောဆိုခြင်းကို မကျေနပ်ကြောင်း အရိပ်အမြွက် ပြောဆို လိုက်ပါသည်။ ယူကရိန်းစစ်ပွဲအဆုံးသတ်ရေးအတွက် ရုရှားသည် အမေရိကန်နှင့် နှစ်ဖက်ညှိနှိုင်းကြိုးပမ်းမည်ကို စိုးရိမ်ကြောင်း Zelenskyy က ထုတ်ဖော်ပြောဆိုခဲ့ပါသည်။

Vladimir Putin နှင့် တယ်လီဖုန်းဆက် စကားပြောခဲ့သည်ဟု Trump က ဖေဖော်ဝါရီ ၁၂ ရက်နေ့တွင် ကြေညာခဲ့ပြီး စစ်ပွဲအဆုံးသတ်ရေး ရည်ရွယ်သည့် စေ့စပ်ညှိနှိုင်းမှုများစတင်ရန် ၎င်းတို့နှစ်ဦး သဘောတူ ခဲ့ကြောင်း ဆိုပါသည်။

(၆၁) ကြိမ်မြောက် မြူးနစ်လုံခြုံရေးညီလာခံ (MSC) သည် ဂျာမနီနိုင်ငံ၊ မြူးနစ်မြို့ရှိ Hotel Bayerischer Hof တွင် တရားဝင်စတင်ခဲ့ပြီး ကမ္ဘာ့ပြဿနာများကို ဆွေးနွေးရန် အဆင့်မြင့်နိုင်ငံရေးသမားများ၊ ဆန်းစစ်သူများ၊ အနောက်နိုင်ငံမီဒီယာများနှင့် လုံခြုံရေးကျွမ်းကျင်သူများ တက်ရောက်ခဲ့ကြပြီး ယူကရိန်းပဋိပက္ခကို အဓိကထား ဆွေးနွေး ကြမည်ဖြစ်သည်။

သမ္မတ Vladimir Putin ၏ ၂၀၀၆ ခုနှစ်က NATO ၏ချဲ့ထွင်မှုကို သတိပေးခဲ့သည့် ကျော်ကြားသောမိန့်ခွန်းပြောကြားခဲ့ရာ ဤညီလာခံသို့ ရုရှား အရာရှိများကို ဖိတ်ကြားခြင်းမရှိခဲ့ပေ။

အမေရိကန် နိုင်ငံခြားရေးဝန်ကြီးဌာနသည် ကမ္ဘာတစ်ဝှမ်းရှိ သံရုံးများအား ဝန်ထမ်းအင်အား လျှော့ချနိုင်ရေး ပြင်ဆင်ရန် ညွှန်ကြားထားကြောင်း ABC News နှင့် Reuters သတင်းဌာနများက ဖေဖော်ဝါရီ ၁၃ ရက်နေ့တွင်ဖော်ပြခဲ့သည်။ Reuters သတင်းဌာန၏ ထုတ်ပြန်ချက်အရ အချို့သံတမန်ရေးရာကိုယ်စားလှယ်များအား အမေရိကန်နှင့် ဒေသတွင်း ခန့်ထားသော ဝန်ထမ်းများကို ၁၀% အထိ လျှော့ချရန် ညွှန်ကြားထားကြောင်း သိရသည်။

မြန်မာနယ်ခြားစောင့်တပ်ဖွဲ (BGF)အနေဖြင့် အွန်လိုင်းမှတဆင့် လိမ်လည်နေသည့် ဂိုဏ်းများ သို့မဟုတ် ကျားဖြန့် ဂိုဏ်းများလက်ထဲတွင် ဖမ်းဆီးခံရသူ အနည်းဆုံး ၇၀၀၀ ကို ပြန်လွှတ်ပေးဖွယ်ရှိနေကြောင်း သိရသည်။ (BGF)သည် ထိုင်းနှင့်မြန်မာနယ်စပ်ဒေသကို အခြေပြုလှုပ်ရှားနေသည့် ကျားဖြန့်ဂိုဏ်းများကို ဖြိုခွင်းမည်ဖြစ်ပြီး အရေးယူအပြစ်ပေးနိုင်ရန် တရုတ် နိုင်ငံသို့ လွှဲပြောင်းပေးဖွယ်ရှိနေကြောင်း ကတိပြုထားသည်ဟု ထိုင်းကာကွယ်ရေးဝန်ကြီး ဝီချာယာချိုင်းကပြောသည်။

ဆူဒန်နိုင်ငံ၌ ရုရှားရေတပ်အခြေစိုက်စခန်းတစ်ခု တည်ထောင်ရန် ဆွေးနွေးမှုများ အောင်မြင်စွာပြီးဆုံးခဲ့ပြီဖြစ်ကြောင်း ဆူဒန်နိုင်ငံခြားရေးဝန်ကြီး Ali Youssef Ahmed Al-Sharif က ထုတ်ပြန်ကြေညာခဲ့ပါသည်။

Ali Youssef Ahmed Al-Sharif က ရုရှားနိုင်ငံခြားရေးဝန်ကြီး ဆာဂေးလာရော့ဗ်နှင့် သတင်းစာရှင်းလင်းပွဲတစ်ခုတွင် ဤကိစ္စသည် လွန်စွာရိုးရှင်းကြောင်းနှင့် အားလုံးသဘောတူညီပြီးဖြစ်ကြောင်း ထုတ်ဖော် ပြောဆိုခဲ့ခြင်းလည်းဖြစ်ပါသည်။

တောင်တရုတ်ပင်လယ်၌ နိုင်ငံတကာလေပိုင်နက်တွင် ပျံသန်းနေသော ဩစတေးလျ စပိုင်လေယာဉ်တစ်စင်းကို တရုတ်တိုက်လေယာဉ်ကမီးပန်းများနှင့်ကျဲချလိုက်သည့်အတွက် ဩစတေးလျနိုင်ငံသားများ မကျေမနပ်ဖြစ်ကာ ပေါက်ကွဲနေကြောင်း သိရှိရပါသည်။ 

တရုတ် J-16 တိုက်လေယာဉ်က မီးပန်းများကို ကျဲချလိုက်သော်လည်း P-8 ဩစတေးလျှ စပိုင်ဂျက်ကို ထိခိုက်ခဲ့ခြင်းမရှိသောကြောင့် လေယာဉ်ပေါ်ပါသူ ၉ ဦးလုံး ဘေးအန္တရာယ်မှလွတ်ကင်းသွားခဲ့ပါသည်။ 

၂၀၂၄ခုနှစ်၊ ဒီဇင်ဘာလ ၃၁ ရက်နေ့မှစ၍ ယူကရိန်းနိုင်ငံကိုဖြတ်ကာ ဥရောပသို့တင်ပို့နေသော ရုရှား ရေနံနှင့် သဘာဝဓာတ်ငွေ့ ပိုက်လိုင်းများကိုယူကရိန်း ခွင့်မပြုတော့သည့်အတွက် ဥရောပတွင် လောင်စာဈေးနှုန်းများ မြင့်တက်သွားခဲ့သည်။ ယခုအခြေအနေတွင် ယူကရိန်း ကိုယ်တိုင် အီးယူစွမ်းအင်ကုမ္ပဏီများမှတစ်ဆင့် ရုရှားဓာတ်ငွေ့ကို ဝယ်ယူနေရကြောင်း ဆလိုဗက်ကီးယား နိုင်ငံခြားရေးနှင့် ဥရောပရေးရာဝန်ကြီး ဂျူရက် ဘလာနာက ပြောကြားခဲ့ပြီး ဆလိုဗက်ကီးယားမှ တစ်ဆင့် ရုရှားဂတ်စ်ကို ဈေးကြီးပေးဝယ်နေရသည်ဟု ဆလိုဗက် ရုပ်သံ STVR နှင့် ဖေဖော်ဝါရီ ၁၂ ရက်နေ့က အင်တာဗျူးတွင် ပြောကြားခဲ့ပါသည်။