ရုရှားနိုင်ငံအပေါ် ၁၅ ကြိမ်မြောက် ဒဏ်ခတ်ပိတ်ဆို့မည့် အစီအစဉ်အား ဥရောပသမဂ္ဂနိုင်ငံ ကိုယ်စားလှယ်များကဒီဇင်ဘာ ‌၆ ရက်နေ့တွင် ကန့်ကွက်ခဲ့ကြပါသည်။ အဆိုပါ အစီအစဉ်တွင် ရုရှားနိုင်ငံ၏ ရေနံနှင့် ရေနံထွက်ပစ္စည်းများကို ဆလိုဗက်ကီးယားနိုင်ငံမှတစ်ဆင့် ချက်သမ္မတနိုင်ငံသို့ တင်သွင်းခွင့်ပြုသည့်ကာလအား သက်တမ်း တိုးမြှင့်ခြင်းအစီအစဉ်လည်း ပါဝင်ပါသည်။

ဥရောပအခြေစိုက်ကုမ္ပဏီများအနေဖြင့် ရုရှားနိုင်ငံရှိ ၎င်းတို့၏ ရင်းနှီးမြှုပ်နှံမှုများအား ပြန်လည်ရုပ်သိမ်းခြင်းဖြင့် ရုရှားနိုင်ငံအပေါ် ဒဏ်ခတ်ပိတ်ဆို့မှု သက်တမ်း တိုးမည့်အစီအစဥ်အပေါ် အီးယူအဖွဲ့ဝင် နိုင်ငံ(၂) နိုင်ငံက ကန့်ကွက်ခဲ့ပါသည်။  သို့ဖြစ်ရာ အီးယူအဖွဲ့ဝင် နိုင်ငံများအနေဖြင့်  ထိုဒဏ်ခတ်ပိတ်ဆို့မှု အစီအစဉ်အား  မကြာမီကာလတွင် ထပ်မံဆွေးနွေးရန် လိုအပ်နေပါသည်။

ယခုအစီအစဉ်တွင် ရုရှားနိုင်ငံပိုင်ရေနံတင် သင်္ဘောများအား ဒဏ်ခတ်ပိတ်ဆို့ခြင်းလည်း ပါဝင်ပါသည်။ ချက်သမ္မတနိုင်ငံနှင့် ဆလိုဗက်ကီးယားနိုင်ငံတို့ကို  ရုရှားအပေါ် ဒဏ်ခတ်ပိတ်ဆို့မှုအစီအစဉ်မှကင်းလွတ်ခွင့်ပြုထားပြီး  ဒီဇင်ဘာ ၅ ရက်နေ့ကထိုကင်းလွတ်ခွင့်ပြုသည့်သက်တမ်းကာလကုန်ဆုံး‌ခဲ့ပြီးဖြစ်ပါသည်။ ဆလိုဗက်ကီးယားနိုင်ငံအနေဖြင့် ရေနံထွက်ပစ္စည်းများအား အိမ်နီးချင်းနိုင်ငံဖြစ်သည့် ချက်သမ္မတနိုင်ငံသို့  ဆက်လက်တင်သွင်းခွင့်ပြု၊ မပြုကိုလည်း အီးယူအဖွဲ့ဝင် နိုင်ငံကိုယ်စားလှယ်များက  အလေးအနက်ဆွေးနွေးခဲ့ကြသည်ကို သိရှိရသည်။

ကိုးကား - Reuters

မလေးရှားနိုင်ငံသည် BRICS အသင်းအဖွဲ့၏ မိတ်ဖက်နိုင်ငံဖြစ်လာရန် သဘောတူကြောင်း ပြန်ကြားခဲ့သည်ဟု မော်စကိုမြို့ရှိ ရုရှားနိုင်ငံဆိုင်ရာ မလေးရှား သံအမတ်ကြီး Cheong Loon Lai မှ TASS သတင်းဌာနသို့ ပြောကြား ခဲ့သည်။

ကိုးကား - TASS 

Photo- Malaymail

ရှားနိုင်ငံနှင့် မြောက်ကိုရီးယားနိုင်ငံအကြားဘက်စုံ မဟာဗျူဟာမြောက် မိတ်ဖက်ဆက်ဆံရေး သဘောတူစာချုပ်သည် ဒီဇင်ဘာလ ၄ ရက်နေ့တွင် စတင်အသက်ဝင်ခဲ့သည်ဟု မြောက်ကိုရီးယားအာဏာရ အလုပ်သမားပါတီ သတင်းစာက ဖော်ပြထားသည်။

ကြာသပတေးနေ့ထုတ် Rodong Sinmun သတင်းစာ၌ မော်စကိုမြို့တွင် ဒီဇင်ဘာလ ၄ ရက်နေ့က လက်မှတ်ရေးထိုးထားသော သဘောတူစာချုပ်ကို နှစ်နိုင်ငံလဲလှယ်ခဲ့ကြသည်ဟု ဖော်ပြခဲ့ကြသည်။

နှစ်နိုင်ငံမှ ဒုတိယနိုင်ငံခြားရေး၀န်ကြီးများသည် အဆိုပါ လဲလှယ်မှုဆိုင်ရာ စာရွက်စာတမ်းတစ်ခုကို လက်မှတ်ရေးထိုးခဲ့ကြောင်း၊ ဤစာချုပ်သည် နိုင်ငံတကာ မဟာဗျူဟာ တည်ငြိမ်မှုကိုအာမခံသော "အားကောင်းသော လုံခြုံရေးဆိုင်ရာကိရိယာ" ဖြစ်သည်ဟု ယင်းသတင်းစာက ဆိုသည်။

ဇွန်လက ရုရှားသမ္မတ Vladimir Putin ပြုံယမ်းမြို့ကို လာရောက်ချိန်တွင် မြောက်ကိုးရီးယားခေါင်းဆောင် Kim Jong Un နှင့် မစ္စတာ Putin တို့ ယင်းသဘောတူ စာချုပ်ကို လက်မှတ်ရေးထိုးခဲ့ပါသည်။ ထိုစာချုပ်တွင် “ရုရှားနှင့်မြောက်ကိုရီးယားနှစ်နိုင်ငံထဲမှ တစ်နိုင်ငံကို ကျူးကျော်ဝင်ရောက်ခံရပြီး စစ်ဖြစ်သည့် အနေအထား ရှိခဲ့မည်ဆိုပါက နောက်တစ်နိုင်ငံအနေဖြင့် ၎င်းပိုင်ဆိုင်ထားသော စစ်ဘက်ဆိုင်ရာနှင့် အခြားအကူအညီများ အားလုံးကို နှောင့်နှေးမှုမရှိဘဲပေးရမည်”ဟု ပြဋ္ဌာန်းထားပါသည်။

ယူကရိန်းနိုင်ငံနှင့် ရုရှားနိုင်ငံတို့ တိုက်ခိုက်မှုများ ဆက်လက်ဖြစ်ပွားနေသည့်အကြား မြောက်ကိုရီးယားက ရုရှားနိုင်ငံသို့ တပ်ဖွဲ့များစေလွှတ်နေချိန်တွင် ယင်း သဘောတူစာချုပ် အသက်ဝင်လာခြင်းဖြစ်ပါသည်။

ကိုးကား-NHK World

တိုကျို ဒီဇင်ဘာ ၄

ကနေဒါနှင့် မက္ကဆီကို နှစ်နိုင်ငံကို ပစ်မှတ်ထားသည့် အမေရိကန်ရွေးကောက်ခံသမ္မတ‌ ဒေါ်နယ်ထရမ့်၏ စည်းကြပ်ခွန်သစ် အစီအစဉ်နှင့်ပတ်သက်ပြီး ဂျပန်ကားထုတ်လုပ်သည့် ကုမ္ပဏီများက စိုးရိမ်စပြုလာကြောင်း သိရသည်။

ယင်းနှစ်နိုင်ငံသည် အမေရိကန်ဈေးကွက်အတွက် အရေးကြီးသော ထုတ်လုပ်မှုအခြေခံများ ဖြစ်သည်။

ဂျပန်ကားကုမ္ပဏီများဖြစ်သည့် တိုယိုတာမော်တာ (Toyota Motor) နှင့် ဟွန်ဒါမော်တာ (Honda Motor) တို့သည် ကနေဒါနိုင်ငံ၌ ကားထုတ်လုပ်ရေးစက်ရုံများရှိကြောင်း သိရသည်။

တိုယိုတာမော်တာသည် ဂျပန်နိုင်ငံအတွင်း ကားထုတ်လုပ်သည့်အကြီးဆုံး ကုမ္ပဏီဖြစ်ကြောင်း ဂျပန်ပြည်ပကုန်သွယ်ရေးအဖွဲ့က ပြောကြားသည်။

ယမန်နှစ်တွင် အစီးရေ ၅၂၀၀၀၀ ကျော်ထုတ်လုပ်ခဲ့ပြီး ကနေဒါနိုင်ငံထုတ် မော်တော်ကားအချို့ကို အမေရိကန်နိုင်ငံသို့  တင်ပို့လျက်ရှိကြောင်း သိရသည်။

ဟွန်ဒါမော်တာသည် ၂၀၂၃ ခုနှစ်တွင် မော်တော်ကားအစီးရေ ၃၇၀၀၀၀ ကျော်ထုတ်လုပ်ခဲ့ပြီး ၇၇ ရာခိုင်နှုန်းသည် အမေရိကန်နိုင်ငံသို့ နယ်စပ်ဖြတ်ကျော်ဝင်ရောက်ခဲ့သည်။

အမေရိကန်-မက္ကဆီကို-ကနေဒါ သဘောတူညီချက် စတင်အသက်ဝင်သည့် ၂၀၂၀ ပြည့်နှစ်တွင် ‌ဒေါ်နယ်ထရမ့်၏ အခွန်စည်းကြပ်မှုမူဝါဒသည် ဂျပန်မော်တော်ကားထုတ်လုပ်ရေးကုမ္ပဏီများအား ၎င်းတို့၏ လုပ်ငန်းလည်ပတ်မှုကို ချိန်ညှိရန် တွန်းအားပေးခဲ့သည်။

ကနေဒါနှင့် မက္ကဆီကိုနိုင်ငံတို့မှ သွင်းကုန်အားလုံးအပေါ် ဒေါ်နယ်ထရမ့်၏ ၂၅ ရာခိုင်နှုန်း အခွန်စည်းကြပ်မှု မူဝါဒစတင်အသက်ဝင်မည်ဆိုပါက ဂျပန်မော်တော်ကားထုတ်လုပ်သည့် ကုမ္ပဏီများသည် ၎င်းတို့၏ မော်တော်ကားများ အမေရိကန်နိုင်ငံအတွင်းသို့ တင်ပို့မှုနည်းလမ်းပုံစံများကို ပြောင်းလဲရန် လိုအပ်မည်ဖြစ်သည်။

သမ္မတဂျိုးဘိုင်ဒင် လက်ထက်တွင် အခွန်လျှော့ပေါ့ကောက်ခံလျက်ရှိသည့် လျှပ်စစ်ကားများ တင်သွင်းမှုအပေါ် ရွေးကောက်ခံသမ္မတ ဒေါ်နယ်ထရမ့်က မည်သို့ဆက်လက်ကိုင်တွယ်သွားမည် ဆိုသည်ကို စောင့်ကြည့်ရမည်ဖြစ်သည်။

မြောက်အမေရိကဒေသတွင် ထုတ်လုပ်သည့် ဘက်ထရီအစိတ်အပိုင်းများကို တပ်ဆင်အသုံးပြုသည့် လျှပ်စစ်ကားများသည် လက်ရှိတွင် အခွန်လျှော့ပေါ့ကောက်ခံမှုတွင် အကျုံးဝင် ကြောင်း သိရသည်။

ဟွန်ဒါကုမ္ပဏီသည် ကနေဒါနိုင်ငံ၌ လျှပ်စစ်ကားထုတ်လုပ်‌ရေးနှင့် ဘက်ထရီစက်ရုံများကို ၂၀၂၈ ခုနှစ်တွင် စတင်လည်ပတ်ရန် စီစဉ်ထားသည်။

ကိုးကား- အင်န်အိတ်ချ်ကေ

ဘာသာပြန်- အောင်ကျော်ကျော်

Source- ကြေးမုံသတင်းစာ

အမေရိကန်အစိုးရက တရုတ်နိုင်ငံကို တစ်ပိုင်းလျှပ်ကူး ပစ္စည်းတင်ပို့မှုအတွက် ကန့်သတ်ချက်များ တင်းကျပ်ခဲ့ပြီးနောက် တရုတ်နိုင်ငံက အမေရိကန်နိုင်ငံသို့ အရေးပါသည့် ဓာတ်သတ္တုအချို့ တင်ပို့မှုကို တားမြစ်လိုက်ပါသည်။

အမေရိကန်ပြည်ထောင်စုကို ဂဲလီယမ်၊ ဂျာမနီယမ်နှင့် ခနောက်စိမ်းတင်ပို့မှုများကို မူအားဖြင့် တားမြစ်ကြောင်းတရုတ်ကူးသန်းရောင်းဝယ်ရေးဝန်ကြီးဌာနက အင်္ဂါနေ့တွင် ပြောကြားခဲ့ပါသည်။

ထိုဓာတ်သတ္တုများသည် တစ်ပိုင်းလျှပ်ကူးပစ္စည်းများ ပြုလုပ်ရာတွင် အဓိကကျကြောင်း၊ ယင်းပစ္စည်းများကို  စစ်ရေးရည်ရွယ်ချက်များအတွက်လည်း အသုံးပြုနိုင် ကြောင်း၊ တရုတ်နိုင်ငံသည် ယင်းကဲ့သို့ နှစ်မျိုးသုံး ဓာတ်သတ္တုများ ထုတ်လုပ်သည့် ထိပ်တန်းနိုင်ငံတစ်ခု ဖြစ်ပါသည်။

ထို့အပြင် လစ်သီယမ်-အိုင်ယွန် ဘက်ထရီများအတွက် ပစ္စည်းတစ်မျိုးဖြစ်သည့် ဂရပ်ဖိုက်အပေါ် ပိုမိုတင်းကျပ်သော ပို့ကုန်စစ်ဆေးမှုများကို စတင်မည်ဖြစ်ကြောင်း၊ ချပ်စ် ထုတ်လုပ်ရေး စက်ကိရိယာများ၊ တစ်ပိုင်းလျှပ်ကူး ပစ္စည်းတီထွင်မှုနှင့် ထုတ်လုပ်မှုများအတွက်  software များ အပေါ် တင်ပို့မှုတားမြစ်ချက်အသစ်များကို အမေရိကန် ကူးသန်းရောင်းဝယ်ရေးဌာနက ထုတ်ပြန်ခဲ့ပြီးနောက် တရုတ်အစိုးရဘက်က ယခုကဲ့သို့ ကြေညာချက်ထွက်ပေါ်လာခြင်းဖြစ်ပါသည်။

အမေရိကန် ကူးသန်းရောင်းဝယ်ရေးဌာနသည် တရုတ် နိုင်ငံသားပိုင် ကုမ္ပဏီ ၁၄၀ ကိုလည်း ပို့ကုန်တားမြစ်မှုစာရင်းတွင် ဖြည့်စွက်ထည့်သွင်းခဲ့ပါသည်။

တရုတ်နိုင်ငံက အဆင့်မြင့်နည်းပညာကို အသုံးပြုပြီး စစ်ရေးစွမ်းရည်များ မြှင့်တင်နေခြင်းအား တားဆီးရန် အတွက် ထိုကဲ့သို့သော စီမံချက်များကို ကျင့်သုံးခြင်း ဖြစ်ကြောင်း သိရှိရပါသည်။ 

ကိုးကား - NHK World

အမေရိကန် ရွေးကောက်ခံသမ္မတ ဒေါ်နယ်ထရန့်က တရုတ်ကုန်ပစ္စည်းများအပေါ် ထပ်ဆောင်းအခွန်စည်း ကြပ်ရန် ကတိကဝတ်ပြုခြင်းသည် ကမ္ဘာ့ထိပ်သီး စီးပွားရေးနှစ်နိုင်ငံအကြား အပျက်သဘောဆောင်သည့်  အကောက်ခွန်စစ်ပွဲ ဖြစ်သွားနိုင်ကြောင်း တရုတ်နိုင်ငံပိုင် မီဒီယာက နိုဝင်ဘာ ၂၇ ရက်တွင် သတိပေးပြောကြား လိုက်ပါသည်။ “မိမိတာဝန်ယူသည့်ရက်မှစ၍ တရုတ် နိုင်ငံမှ သွင်းကုန်များအပေါ် ထပ်ဆောင်းအခွန် ၁၀ ရာခိုင်နှုန်းစည်းကြပ်မည်”ဟု   ဇန်နဝါရီ ၂၀ ရက်တွင် သမ္မတဖြစ်လာမည့် ထရန့်က တနင်္လာနေ့တွင် ပြောလိုက် ခြင်းအပေါ် တရုတ်ဖက်က တုံ့ပြန်ပြောကြားလိုက်ခြင်း ဖြစ်ပါသည်။ 

ထရန့်သည် ယခင်ကလည်း တရုတ်ကုန်ပစ္စည်းများ အပေါ်   ၆၀ ရာခိုင်နှုန်းအထက် အခွန်စည်းကြပ်ရမည် ဟု ပြောခဲ့ပါသည်။ ယင်းမှာ အမေရိကန်သို့ နှစ်စဉ် ဒေါ်လာ ဘီလီယံ ၄၀၀ ကျော်တန်ဖိုးရှိ  ကုန်ပစ္စည်းများ ထုတ်လုပ်တင်ပို့နေသည့် တရုတ်စက်မှုလုပ်ငန်းများ အတွက်  ခြိမ်းခြောက်မှုတစ်ခု ဖြစ်လာနိုင်ကြောင်း၊   ထရန့်၏ ယခုထပ်ဆောင်းအခွန် တိုးမြှင့်ကောက်ခံမည့် အစီအစဉ်သည် တရုတ်နိုင်ငံကို အဆင့် ၂ နေရာမှ အဆင့် လျော့ကျသွားစေနိုင်သော်လည်း နှစ်နိုင်ငံ  စီးပွားရေးကို ပြိုလဲထိခိုက်ပျက်စီးစေနိုင်သည်ဟု တရုတ်နိုင်ငံပိုင် မီဒီယာက သတိပေးပြောကြားလိုက်ကြောင်း   Reuters   သတင်းဌာနက ဖော်ပြထားပါသည်။

ကိုးကား - Reuters

အမေရိကန်နိုင်ငံ၏ စီးပွားရေးပိတ်ဆို့မှုကြောင့် တရုတ် နည်းပညာကုမ္ပဏီတစ်ခုဖြစ်သည့် Huawei ၏ နောက်ဆုံးပေါ် ဖုန်းများရှိ application များ သုံးစွဲခွင့် မရသည့်အခြေအနေကို ယခုအခါ အဆိုပါကုမ္ပဏီက  ကျော်လွှားနိုင်ခဲ့ပြီးဖြစ်သည်။ Huawei အနေဖြင့် Android နှင့် iOS တို့ကို စွန့်ခွာလိုက်ပြီး ၎င်း၏ နောက်ဆုံးပေါ် Mate 70 ဖုန်းအမျိုးအစားတွင် မိမိ ကိုယ်ပိုင် Harmony OS operating system ကို ထည့်သွင်းအသုံးပြုနိုင်ခဲ့ပြီ ဖြစ်ပါသည်။

Mate 70 စမတ်ဖုန်းသည် ၅၄၉၉ ယွမ် (ဒေါ်လာ ၇၅၈) တန်ဖိုးရှိပြီး Mate series များထဲတွင် အကောင်းဆုံး ဖုန်းအမျိုးအစားဖြစ်ကြောင်း၊ Huawei ကုမ္ပဏီမှ မိတ်ဆက်မည့် နောက်ဆုံးပေါ်ဖုန်းများတွင်လည်း ကိုယ်ပိုင် Harmony OS operating system ကိုသာ ဆက်လက် သုံးစွဲသွားမည်ဖြစ်ကြောင်း Huawei နည်းပညာကုမ္ပဏီ အမှုဆောင်အရာရှိချုပ် Richard Yu က ပြောကြားလိုက် ပါသည်။

Huawei မှ မိတ်ဆက်လိုက်သည့် Harmony OS သည် အမေရိကန်နည်းပညာထုတ်ကုန် semiconductor များ အပေါ် မှီခိုနေမှုကို အဆုံးသတ်စေပါသည်။ ယခုအခါ operating system ကို စတင်အသုံးပြုလိုက်ခြင်း ဖြစ်သည့်အတွက် Huawei ကုမ္ပဏီအနေဖြင့် ၎င်းတို့၏ system အသစ်ကို သုံးစွဲသူများက ပြောင်းလဲသုံးစွဲလာ စေရေး ဆွဲဆောင်ရန် လိုအပ်နေသေးကြောင်း တရုတ် နည်းပညာရှင် Lucas Zhong က ပြောကြားလိုက်သည်။

ယခုနှစ်အတွင်း Huawei ကုမ္ပဏီမှ ထုတ်လုပ်သည့် ဒေါ်လာ ၆၀၀ တန် ဖုန်းအမျိုးအစားများသည် ဈေးကွက် ထဲတွင် ရောင်းအား ၁၁ %  မှ ၃၃ % အထိ တိုးတက် လာခဲ့ပြီး Apple ထုတ် premium ဖုန်းများ၏ ရှယ်ယာသည် ၇၂ % မှ ၅၂ % သို့ ကျဆင်းသွားခဲ့သည်။

အမေရိကန်နိုင်ငံ၏ ပိတ်ဆို့မှုများကြောင့်   Honor budget ဖုန်းများ  ထုတ်လုပ်၍ ဖြေရှင်းလာခဲ့ရာမှ  ယခု မိတ်ဆက်လိုက်သည့် Harmony OS operating system သည် Huawei ကုမ္ပဏီအတွက် အောင်မြင်မှု တစ်ခု ဖြစ်လာခဲ့ချေပြီ။ 

ကိုးကား(CNN)

ဇန်နဝါရီ ၂၀ ရက်တွင် အမေရိကန်သမ္မတရာထူး စတင် တာဝန်ယူမည့် ဒေါ်နယ်ထရန့်က အဆိုပြုထားသော အခွန်စည်းကြပ်မှု မူအသစ်သည် ၂၀၂၆ ခုနှစ်အရောက် တွင် အမေရိကန်နိုင်ငံ၏ စီးပွားရေးဖွံ့ဖြိုးတိုးတက်မှုကို ထိခိုက်လာနိုင်ကြောင်း မော်ဂန်စတန်လေ၏ Chief Global Economist ဖြစ်သူ Seth Carpenter က ပြောကြားလိုက်ပါသည်။

ဒေါ်နယ်ထရန့်က သမ္မတရွေးကောက်ပွဲကာလအတွင်း စက်တင်ဘာလက ပြုလုပ်ခဲ့သည့် စကားစစ်ထိုးပွဲ တစ်ခု၌ အမေရိကန်နိုင်ငံ၏ အခွန်စည်းကြပ်မည့် အဆိုပြုချက်တစ်ရပ်ကို ချပြခဲ့ပါသည်။ ယင်းအဆိုပြု ချက်တွင် အမေရိကန်နိုင်ငံက ပြည်ပနိုင်ငံများမှ မိမိ နိုင်ငံအတွင်းသို့ တင်သွင်းလာသည့် မည်သည့်ကုန်ပစ္စည်း ကိုမဆို အခွန် ၁၀ ရာခိုင်နှုန်းမှ ၂၀ ရာခိုင်နှုန်းအထိ စည်းကြပ်ကောက်ခံရန်လည်းကောင်း၊ တရုတ်နိုင်ငံမှ တင်သွင်းလာသည့်ကုန်ပစ္စည်းများကိုမူ ၆၀ ရာခိုင်နှုန်းမှ ၁၀၀ ရာခိုင်နှုန်းတိုင်အောင် စည်းကြပ်ကောက်ခံရန် လည်းကောင်း ဖော်ပြထားပါသည်။ 

“ယင်းသည် အလွန်ရှင်းနေသည့်ကိစ္စဖြစ်ကြောင်း၊ ယခု ကဲ့သို့ အခွန်စည်းကြပ်မှုများက ငွေကြေးဖောင်းပွမှုကို ဖြစ်စေမည်ဖြစ်ကြောင်း၊ အခွန်စည်းကြပ်ခံရသည့် နိုင်ငံ များကို သက်ရောက်မည် မဟုတ်ဘဲ အမေရိကန်နိုင်ငံ၏ စီးပွားရေး ဖွံ့ဖြိုးတိုးတက်မှုကို နှောင့်နှေးစေမည် ဆိုသည်မှာ ရှင်းလင်းကြောင်း” Seth Carpenter က ပြောကြားကြောင်း CNBC က ဖော်ပြထားပါသည်။

ကိုးကား - CNBC 

ယခုလများအတွင်း Mercedes-Benz ၊ BMW နှင့် Volkswagen ကဲ့သို့ ဧရာမ ကားကုမ္မဏီကြီးများသည် တရုတ်နိုင်ငံထုတ် လျှပ်စစ်ကားများကြောင့် မကြုံစဖူး ဖိအားများနှင့် ကြုံတွေ့နေရကြောင်း၊ နည်းပညာမြင့် တရုတ်လျှပ်စစ်ကားထုတ်လုပ်သူများက ဥရောပတွင် ဝင်ရောက်နေရာ ယူလာကြကြောင်း၊ ဥရောပသမဂ္ဂနှင့် တရုတ်နိုင်ငံအကြား အခွန်စည်းကြပ်မှု တင်းမာလာခြင်း ကြောင့် ဂျာမနီမော်တော်ကားကုမ္ပဏီကြီး ၃ ခုတို့၏ အမြတ်အစွန်းများ ကျဆင်းလာကြောင်း ဖော်ပြထား သည်။

ဂျာမနီသည် ကားထုတ်လုပ်မှုစွမ်းရည်မြင့်မားသော်လည်း  ကမ္ဘာကြီးသည် ဓာတ်ဆီလောင်ကျွမ်းသည့် အင်ဂျင်မှ ဘတ်ထရီစွမ်းအင်သုံး ကားများအဖြစ် ပြောင်းလဲလာ သဖြင့် ရုန်းကန်နေရပါကြောင်း၊ မော်တော်ကား ထုတ်လုပ်မှုအတွက် စွမ်းအင်ကုန်ကျစရိတ် တိုးမြင့် လာခြင်း၊ တရုတ်နိုင်ငံနှင့် အိန္ဒိယနိုင်ငံကဲ့သို့ အခြားနိုင်ငံများနှင့်နှိုင်းယှဉ်ပါက လုပ်သားစရိတ်မြင့်မားခြင်းအပြင် ဥရောပသမဂ္ဂ၏ တင်းကျပ်သော စည်းမျဉ်းများကလည်း အဟန့်အတားဖြစ်နေပါကြောင်း ဖော်ပြထားသည်။

ထို့ပြင် ရွေးကောက်ခံသမ္မတဒေါ်နယ်ထရန့်၏ အမေရိက သို့ ဥရောပမော်တော်ယာဉ်များ တင်ပို့မှုတွင် အနိမ့်ဆုံး ၁၀ ရာခိုင်နှုန်း အခွန်စည်းကြပ်ကောက်ခံရန် သတိပေး ချက်ကလည်း ဂျာမန် ကားအမှတ်တံဆိပ်များ၏ ကုန်သွယ်ရေး လိုငွေပြမှုနှင့်ပတ်သက်၍ အမျက်ဒေါသ ထွက်စရာကောင်းနေကြောင်း   CNA က ဖော်ပြထားပါသည်။

ကိုးကား - CNA

အမေရိကန်နှင့် တရုတ်တို့အကြား ပြည်သူများ၏ အကျိုးစီးပွါးအတွက် နှစ်နိုင်ငံဆက်ဆံရေးတိုးတက်ခိုင်မာလာစေရန်  ဇန်နဝါရီလတွင် တက်လာမည့် အမေရိကန်အစိုးရသစ်နှင့် ပူးပေါင်းဆောင်ရွက်ရန်အသင့်ဖြစ်ပါကြောင်း APEC အစည်းအဝေးတက်ရောက်နေကြသည့် တရုတ်သမ္မတရှီက အမေရိကန်သမ္မတဘိုင်ဒန်ကို  ပြောကြားလိုက်ပါသည်။

ဇန်နဝါရီလတွင် အမေရိကန်သမ္မတရာထူးတာဝန်ယူမည့် ဒေါ်နယ်ထရန့်သည်  ကမ္ဘာ့အကြီးဆုံးစီးပွါးရေးအင်အားကြီး နှစ်ခုကြား ကုန်သွယ်ရေးကို ကမောက် ကမဖြစ်စေမည့် စိန်ခေါ်မှုတစ်ရပ်ဖြစ်သည့် တရုတ်ကုန်ပစ္စည်းများအပေါ် အခွန်နှုန်း ၆၀ ရာခိုင်နှုန်း အထိ တိုးမြှင့်စည်းကြပ်ကောက်ခံရေး ကြုံးဝါးနေသူတစ်ဦးဖြစ်ပါသည်။ 

ဆက်လက်၍ ရုရှားယူကရိန်းအရေးတွင် ဝင်ရောက်ကူညီနေကြသည့် မြောက်ကိုးရီးယားတပ်များ ပြန်ရုတ်သိမ်းပေးရေးအတွက် ဘိုင်ဒန်က ရှီကို တိုက်တွန်းပြောကြားခဲ့ကြောင်း သိရှိရပါသည်။

Source- hindushantimes.com