၂၀၂၅ ခုနှစ်၊ ဇန်နဝါရီလ ၂၅ ရက်နေ့တွင် စီမံကိန်းရေးဆွဲကာ စတင် တည်ထောင်ခဲ့သည့် တရုတ်နိုင်ငံ၏ သစ်တောနှင့် သစ်ပင်မျိုးစိတ်များ ထိန်းသိမ်းရေးဘဏ်သည် ကမ္ဘာ့အကြီးဆုံး ဖြစ်လာမည်ဖြစ်ပြီး ၂၀၂၈ ခုနှစ်တွင် အပြီးသတ်တည်ဆောက်နိုင်မည်ဖြစ်ကြောင်း သိရှိရပါသည်။ တရုတ်နိုင်ငံ Xiongan ပြည်နယ်တွင် တည်ဆောက်မည်ဖြစ်ပြီး ဇီဝမျိုး စိတ်ပေါင်း ၁.၈ သန်းခန့် ကို စုစည်းထိန်းသိမ်းထားနိုင်မည်ဟု မျှော်မှန်း ထားကြောင်း သိရှိရပါသည်။ 

ထိုထိန်းသိမ်းရေးဘဏ်ကို တရုတ်အမျိုးသားသစ်တောဦးစီးဌာန၊ ပညာရေးဝန်ကြီးဌာနတို့နှင့် ပူးပေါင်းပြီး ပေကျင်းသစ်တောတက္ကသိုလ်က တာဝန်ယူတည်ဆောက်သွားမည်ဖြစ်ပြီး ထိန်းသိမ်းထားမည့် ဇီဝမျိုးစိတ်ပေါင်း ၁.၈ သန်းခန့်တွင် သစ်ပင်မျိုးစိတ်များ၊ မြက်မျိုးစိတ်များ၊ သဘာဝမဟုတ်ဘဲ လူတို့တီထွင်ဖန်တီထားသည့် မျိုးစိတ်များ ပါဝင်မည်ဖြစ်ကြောင်း သိရှိရပါသည်။ 

အဆင့်မြင့်အာရုံခံစနစ်များ (Smart Sensor System) နှင့် အလိုအလျောက် ထိန်းသိမ်းမှုနည်းပညာများ အသုံးပြုမည်ဖြစ်သည့်အတွက် ဇီဝမျိုးစိတ်များကို ခေတ်မီဒစ်ဂျစ်တယ်စနစ်ဖြင့် စုဆောင်းသည့်အဆင့်မှ ထိန်းသိမ်းခြင်း၊ ဖြန့်ဖြူးခြင်းနှင့် အသုံးချခြင်းအဆင့်အထိ စီမံ ဆောင်ရွက်ထားနိုင်မည် ဖြစ်ပါသည်။ 

ထိုဇီဝမျိုးစိတ်ထိန်းသိမ်းရေးဘဏ်ကို Xiongan ပြည်နယ်ဘဏ်နှင့် အခြားသော ဘဏ်ခွဲ ၆ ခုတို့မှ တာဝန်ယူတည်ဆောက်သွားမည်ဖြစ်ပြီး ပေကျင်းသစ်တောတက္ကသိုလ်၊ တရုတ်နိုင်ငံသစ်တော သင်တန်းကျောင်း၊ တရုတ်နိုင်ငံသိပ္ပံပညာရပ် သင်တန်းကျောင်းတို့မှ သုတေသီများကိုခေါ်ယူပြီး အကြံဉာဏ်ရယူကာ တည်ဆောက်သွားမည် ဖြစ်ကြောင်း သိရပါသည်။

ကိုးကား -China Daily

အမေရိကန်အမျိုးသားလုံခြုံရေးအကြံပေး မိုက်ကယ်ဝေါ့ဇ်က ယူကရိန်း အနေဖြင့်အမေရိကန်ပြည်သူများ၏အခွန်နှင့် တည်ဆောက်ထားသည့် အနာဂတ်အကူအညီများကို ရယူလိုပါက အနည်းဆုံး အလျော်အစား ၂ ခု လုပ်ဆောင်ပေးရန်လိုအပ်မည်ဟု ပြောလိုက်ပါသည်။ 

ယူကရိန်းရှိ မြေရှားသတ္တု ၅၀% ကို အမေရိကန်အား တူးထုတ်ခွင့်ပြုရေး စာချုပ်ကို ယူကရိန်းသမ္မတ ဇီလန်စကီးက ငြင်းဆိုလိုက်ပြီးနောက် ယခုကဲ့သို့ပြောဆိုလာခြင်းဖြစ်သည်။ လက်ရှိတွင် အမေရိကန်က ယူကရိန်း ကို စစ်လက်နက်အကူအညီအပြင် အခြားသော စစ်ရေးနှင့် လူမှုရေးဆိုင်ရာအကူအညီများပေးအပ်ထားခြင်းအတွက် ကန်ဒေါ်လာ ဘီလီယံ ၃၀၀ ရှိနေပြီး အဆိုပါ အကူအညီများအတွက် အမေရိကန်က ယူကရိန်းရှိ မြေရှားသတ္တု ကန်ဒေါ်လာ ဘီလီယံ ၅၀၀ ဖိုး တူးထုတ်ခွင့်တောင်းလိုက် ခြင်းပင်ဖြစ်ပြီး ယူကရိန်းအနေဖြင့် သဘောတူပါက နောက်ထပ် ကန် ဒေါ်လာ ဘီလီယံ ၂၀၀ ကို ဆက်လက်ထောက်ပံ့သွားမည် ဟုဆိုသည်။ 

အမေရိကန်ကွန်ဂရက်က ယူကရိန်းအတွက် အကြမ်းဖျင်းအားဖြင့် ဒေါ်လာ ၁၇၅ ဘီလီယံခန့်ကို ၂၀၂၂ ခုနှစ်မှ စတင်ခွင့်ပြုထားသော်လည်း အဆိုပါ ရန်ပုံငွေများသည် ရုရှား-ယူကရိန်းစစ်ပွဲ၌ ပက်သက်နေသည့် အမေရိကန် စက်မှုလုပ်ငန်းများနှင့် အစိုးရအဖွဲ့တို့ အဓိကသုံးရန်အတွက် ရည်ရွယ်ပါသည်။ ဂျာမနီနိုင်ငံ ကီရယ်တက္ကသိုလ်၏ မှတ်တမ်းအရ ၂၀၂၄ ခုနှစ်၊ အောက်တိုဘာလအထိ အမေရိကန်က ယူကရိန်းအား ငွေကြေးနှင့် စစ်ရေးအကူအညီ ဒေါ်လာ ၉၂ ဘီလီယံခန့်သာပေးအပ်ခဲ့ပြီး အီးယူ နိုင်ငံများနှင့်ယူကေတို့က စုစုပေါင်း ကန်ဒေါ်လာ ၁၃၁ ဘီလီယံ ခွဲဝေပေးခဲ့သည်ဟု ဖော်ပြထားပါသည်။

ကိုးကား-Myanmar National Post

BRICS ညီလာခံကို လာမည့် ဇူလိုင် ၆ ရက်မှ ၇ ရက်အထိ ဘရာဇီးနိုင်ငံ ရီယိုဒီဂျနေးရိုမြို့တွင် ကျင်းပမည်ဖြစ်ကြောင်း BRICS အဖွဲ့၏ မီဒီယာဌာနက ဖေဖော်ဝါရီ ၁၆ ရက်တွင် ကြေညာလိုက်ပါသည်။

“၂၀၂၅ ခုနှစ်တွင် ကျင်းပမည့် BRICS အစည်းအဝေးအတွက် ရက်နှင့် နေရာကို အတည်ပြုပြီးဖြစ်ပါကြောင်း၊ လာမည့် ဇူလိုင် ၆ ရက်နှင့် ၇ ရက်တွင် ရီယိုဒီဂျနေးရိုမြို့၌ ကျင်းပပါမည်” ဟု မီဒီယာဌာနက ထုတ်ပြန် ကြေညာခဲ့သည်။

ဘရာဇီးနိုင်ငံသည် ယခုနှစ် ဇန်နဝါရီ ၁ ရက်မှစ၍ BRICS အဖွဲ့၏ အလှည့်ကျဥက္ကဋ္ဌအဖြစ် တာဝန်ယူထားပါသည်။

ကိုးကား- TASS

Adidas မှထုတ်လုပ်သောဖိနပ်များတွင် ဝက်သားရေ ပါဝင်နေခြင်းကို သုံးစွဲသူများအပေါ်အသိပေးရန် ပျက်ကွက်ခဲ့ခြင်းအတွက် တူရကီနိုင်ငံက ဂျာမနီအားကစားပစ္စည်းကုမ္ပဏီကြီး Adidas ကို ဒဏ်ငွေ အမေရိကန် ဒေါ်လာ ၁၅,၀၀၀ ချမှတ်ခဲ့ပါသည်။

မွတ်ဆလင်ဘာသာဝင် အများစုနေထိုင်သည့် တူရကီနိုင်ငံ၏ ကြော်ငြာ စည်းကမ်းထိန်းသိမ်းရေးအဖွဲ့က Adidas ၏ မကြာသေးခင်ကာလတွင် ကမ်ဒယ်လ်ဂျန်နာ၊ ဘဲလ်လာဟက်ဒစ်တို့ကဲ့သို့ အကျော်အမော် မော်ဒယ်လ်များနှင့် ကြော်ငြာခဲ့သည့် Samba OG ဖိနပ်များသည် ဝက်သားရေဖြင့်စီမံထုတ်လုပ်ထားခြင်းဖြစ်သည်ဟု ဆိုပါသည်။

ထို့အတွက်ကြောင့် ဖေဖော်ဝါရီ ၁၃ ရက်က ထုတ်ပြန်သည့် စီရင်ချက်တစ်ခု၌ Adidas အနေဖြင့် ကြော်ငြာ၊ ထုတ်ကုန်ဖော်ပြချက်များတွင် လူ့အဖွဲ့အစည်း အများစု၏ဘာသာရေးဆိုင်ရာ အယူအဆ စိတ်ခံစားမှုများနှင့် ဆန့်ကျင်ဘက်ဖြစ်သောပစ္စည်းအသုံးပြုမှုကို ရှင်းရှင်းလင်းလင်း ဖော်ပြရမည်ဖြစ်သည်ဟု ဝေဖန်ပြစ်တင်ခဲ့ပြီး ဒဏ်ငွေ ၅၅၀,၀၅၉ လီရာ (စင်ကာပူဒေါ်လာ ၂၀,၄၁၅) ဒဏ်ငွေ ချမှတ်ခဲ့ပါသည်။

Adidas အနေဖြင့် ဒဏ်ကြေးနှင့်ပတ်သက်၍ မှတ်ချက်မပေးသေးသော်လည်း ၎င်း၏ဝက်ဘ်ဆိုဒ်တွင် ဖိနပ်များ၏ Specification ကို ပြန်လည် မွန်းမံမှုလုပ်ခဲ့ကြောင်း ပြောကြားထားပါသည်။

ကိုးကား-NP News

၂၀၂၅ ဗလင်တိုင်းဒေးနေ့ကို ရည်စူးပြီး သုတေသနအဖွဲ့တစ်ဖွဲ့က နိုင်ငံ ၃၀ ကို စစ်တမ်းတစ်ခုကောက်ယူခဲ့ရာတွင် အချစ်ကိုမခံစားတတ်ဆုံး လူမျိုးများထဲတွင် အိန္ဒိယနိုင်ငံသားများလည်းပါဝင်သည်ဟု သိရှိရပါသည်။ 

နိုင်ငံပေါင်း ၃၀ တွင် စစ်တမ်းကောက်ယူပြီး ချစ်သူများနေ့မတိုင်မီ ထုတ်ပြန်ခဲ့သည့် ကမ္ဘာလုံးဆိုင်ရာစစ်တမ်းအသစ်တွင် အိန္ဒိယလူမျိုးများသည် ၎င်းတို့၏အချစ်ရေးအပေါ် စိတ်ကျေနပ်မှု အနည်းဆုံးသူများထဲတွင် ပါဝင်ကြောင်း ဖော်ပြထားသည်ကို တွေ့ရှိရပါသည်။

'Love Life Satisfication 2025' (ချစ်ခြင်းဘဝကျေနပ်မှု၂၀၂၅) စစ်တမ်း ရလဒ်များအနေဖြင့် ကိုလံဘီယာ (၈၂ %) ၊ ထိုင်း (၈၁ %) ၊ မက္ကဆီကို (၈၁ %) ၊ အင်ဒိုနီးရှား (၈၁ %) နှင့် မလေးရှား (၇၉ %) ဖြင့် ဦးဆောင်ပါသည်။ အိန္ဒိယ (၆၃ %) ၊ တောင်ကိုရီးယား ( ၅၉ %) နှင့် ဂျပန် (၅၆ % ) တို့ ဖြစ်ကြောင်း စစ်တမ်းများအရသိရှိရပါသည်။ 

နိုင်ငံပေါင်း ၃၀ မှ အရွယ်ရောက်ပြီးသူ ၂၃,၇၆၅  ဦးကို IPSOS ကုမ္ပဏီက စစ်တမ်းကောက်ယူခဲ့ခြင်းဖြစ်ပြီး ချစ်ခြင်းကိုကောင်းစွာ မခံစားတတ်ရသည့် အကြောင်းအရင်းများထဲ၌ မိသားစုဝင်များပြားစွာ အတူနေထိုင်ရခြင်း၊ မိသားစုတာဝန်များ/ အလုပ်ဖိအားများ/ အသက်မွေးဝမ်းကျောင်းမှုဆိုင်ရာနှင့် လူမှုရေးဖိအားများကြောင့် အချစ်ရေး၊ ရုပ်ပိုင်းဆိုင်ရာ ထိတွေ့မှုနှင့် ရင်းနှီးမှုနည်းသွားရခြင်းဖြစ်သည်ဟု ဆိုပါသည်။ အိန္ဒိယနိုင်ငံသားများအတွက် ၎င်းတို့၏အချစ်ရေးနှင့် လိင်မှုကိစ္စကို ကျေနပ်သည့် စုံတွဲမှာ စုံတွဲစုစုပေါင်း၏ တစ်ဝက်ခန့်သာရှိကြောင်း စစ်တမ်းများအရ သိရှိရပါသည်။

ကိုးကား-Myanmar National Post

လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ဘေးအန္တရာယ်ဆိုင်ရာစီမံခန့်ခွဲမှုဦးစီးဌာန၊ မြောင်းမြခရိုင်ဦးစီးမှူးရုံးမှ တာဝန်ရှိသူများသည် (၁၅-၂-၂၀၂၅) ရက်နေ့တွင် အိမ်မဲမြို့နယ်၊ ဘုရားကြီးကုန်း ကျေးရွာအုပ်စု၊ ပင်တောကျေးရွာရှိ သက်ကြီးရွယ်အို၊ အမျိုးသမီး ဦးဆောင်သည့် အိမ်၊ မသန်စွမ်း၊ လူဦးရေများပြီး ဆင်းရဲနွမ်းပါးသည့် မိသားစုနေအိမ်များအား ဦးစားပေးရွေးချယ်ပြီး လေပြင်းဘေး ကြိုတင်ကာကွယ်ရေးအတွက် အားဖြည့်၊ မွမ်းမံပြင်ဆင်ခြင်း လုပ်ငန်းများအား မြို့နယ်စီမံအုပ်ချုပ်ရေးအဖွဲ့များ၊ ကျေးရွာအုပ်ချုပ်ရေးမှူးများ၊ ရပ်မိရပ်ဖများ၊ မီးသတ်တပ်ဖွဲ့များ၊ ကြက်ခြေနီတပ်ဖွဲ့များ၊ သစ္စာရှင် ပရဟိတအဖွဲ့နှင့် ပြည်သူလူထုများ ပူးပေါင်း၍ ဆောင်ရွက်ခဲ့ပါသည်။ 

Source:  DDM

ယူကရိန်းသမ္မတ ဇီလန်စကီးသည် မကြာမီကာလအတွင်း အာရပ်စော်ဘွား ပြည်ထောင်စု၊ ဆော်ဒီအာရေးဗီးယားနှင့် တူရကီနိုင်ငံများသို့ သွားရောက်မည်ဖြစ်ကြောင်း ကြေညာလိုက်ပါသည်။

အဆိုပါခရီးစဉ်အတွင်း ရုရှားနှင့် အမေရိကန် ကိုယ်စားလှယ်များနှင့် တွေ့ဆုံမည်မဟုတ်ကြောင်း၊ သွားရောက်မှုတွင် လူသားချင်းစာနာမှု အစီအစဉ်ဖြစ်သည့် အကျဉ်းသားများ လဲလှယ်မှုကိစ္စ ပါဝင်နေကြောင်း   ၎င်းက မြူးနစ်မြို့တွင် သတင်းထောက်များကို ပြောကြားခဲ့ပါသည်။

ကနဦးစွာ ဆော်ဒီအာရေးဗီးယားနိုင်ငံသို့ ချက်ချင်း သွားရောက်မည် ဖြစ်ကြောင်း၊ ဆော်ဒီဘုရင်နှင့် တွေ့ဆုံမည်ဖြစ်ကြောင်း၊ ထပ်မံ၍ ၂ ရက် ၃ ရက်အကြာတွင် တူရကီသမ္မတ အာဒိုဂန်နှင့် တွေ့ဆုံမည်ဖြစ်ကြောင်း၊ ရုရှားနှင့်အမေရိကန်တို့နှင့် တွေ့ဆုံမည်မဟုတ်ကြောင်း ဇီလန်စကီးက ပြောကြားထားပါသည်။ 

အမေရိကန်သမ္မတ ဒေါ်နယ်ထရမ့်က ယူကရိန်းအရေးကိစ္စဖြေရှင်းရန် ဆော်ဒီအာရေဗီးယားနိုင်ငံ၌ နောက်အပတ်တွင် ဆွေးနွေးမှုများ ပြုလုပ်မည်ဟု ပြောကြားထားပါသည်။ 

ကိုးကား-TASS

Photo: Apa.az

လက်ရှိကမ္ဘာ့အချမ်းသာဆုံး သူဌေးကြီး အီလွန်မက်စ် ပြောသွားသည့် စကားတစ်ခွန်းဖြစ်ပြီး သည်းခံခြင်းနှင့်ပတ်သက်၍ မြတ်စွာဘုရားက “ခန္တီ” ဟု ၃၈ ဖြာမင်္ဂလာ၌ ဆုံးမထားပါသည်။ သည်းခံခြင်းနှင့်ပတ်သက်၍ ကမ္ဘာကျော်ပုဂ္ဂိုလ် အများအပြားကလည်း ပြောဆိုဆုံးမထားမှု များစွာ ရှိပါသည်။ လက်တွေ့နယ်ပယ်မှာတွင်မူ သည်းခံခြင်းသဘောတရားကို လက်ခံနိုင်ရန် ခက်ခဲစွာကျင့်သုံးလိုက်နာရသည့် ကိစ္စတစ်ခုဖြစ်သည်မှာ အမှန်ပင်ဖြစ်သည်။

မြတ်ဗုဒ္ဓက လူဖြစ်လာလျှင် မဖြစ်မနေကြုံတွေ့ရမည့်ဖြစ်စဉ် ၈ ခု ရှိကြောင်းနှင့် ၎င်းဖြစ်စဉ်များကို “ဒုက္ခ”ဟု ဟောကြားထားခဲ့ပါသည်။ ၎င်းတို့မှာ (၁ )မွေးဖွားလာရခြင်းဒုက္ခ၊ ( ၂ )အိုမင်းရခြင်းဒုက္ခ၊( ၃ ) နာကျင်ရခြင်းဒုက္ခ၊ ( ၄ ) သေရခြင်းဒုက္ခ၊ ( ၅ ) ချစ်သောသူနှင့် ကွေကွင်း ရခြင်းဒုက္ခ၊ ( ၆ ) မချစ်မနှစ်သက်သောသူနှင့်နေရခြင်းဒုက္ခ၊ ( ၇ ) လို၍ မရခြင်းဒုက္ခ နှင့် (၈) ခန္ဓာကိုယ်ကြီးရှိနေသည့်ဒုက္ခ တို့ပင်ဖြစ်ပါသည်။

၎င်းဒုက္ခများကို ကျော်ဖြတ်နိုင်ရေးကြိုးစားရင်းနှင့် မိမိတို့၏ ဘဝများသည် တဖြည်းဖြည်းနှင့် နေဝင်ချိန်ဆီသို့ ဦးတည်သွားခဲ့ကြရသည်။ ဒုက္ခ ဆိုသည်မှာ မလိုချင်လည်းရ၊ လိုချင်လည်းရသည့် အရာဖြစ်ပြီး ဒုက္ခကို ကျော်ဖြတ်နိုင်မည့်နည်းလမ်း ၂ နည်း ရှိပြီး ၎င်းတို့မှာ ရောင့်ရဲခြင်းနှင့် သည်းခံစောင့်ဆိုင်းခြင်း တို့ပင်ဖြစ်သည်။ ရောင့်ရဲခြင်းဆိုသည်မှာ လက်ရှိ ဘဝကို လက်ခံကျေနပ်လိုက်ခြင်းဖြစ်ပြီး သည်းခံစောင့်ဆိုင်းခြင်း ဆိုသည် မှာ မိမိ၏ရည်မှန်းချက်အတွက် လက်ရှိဘဝကို စတေးနေသည့် သဘောပင်ဖြစ်ပါသည်။သည်းခံခြင်း ဆိုသည်မှာမူ အောင်မြင်မှုဆီသို့ ရောက်ရှိရန်အတွက် ပင်မလမ်းကြောင်းကြီး၏အစပင်ဖြစ်သည်။

 အီလွန်မက်စ်က သည်းခံခြင်းအကြောင်းကိုပြောပြီး နောက်ဆက်တွဲ စကားတစ်ခွန်း ပြောဆိုရာ၌ သည်းခံခြင်း၌ ကြမ်းတမ်းသော သင်ခန်းစာ များပါဝင်နေပြီး ဂရိစကားပုံ တစ်ခုတွင် ၁ မိနစ်ခန့် သည်းခံလိုက်ခြင်းက ၁၀ နှစ်စာ အေးချမ်းစေရန်အတွက် ဦးတည်သွားစေသည်ဟု ဆိုသည်။ ဒုက္ခတိုင်းအတွက် အကောင်းဆုံး ကုသဆေးသည် သည်းခံခြင်းပင်ဖြစ်သည် ဟု တောင်အာဖရိကနိုင်ငံမှ ချမ်းသာသည့် မိသားစုက ဆင်းသက်လာသော်လည်း ကလေးဘဝ၌ မိမိကိုယ်ကို သတ်သေချင်သည်အထိ ကျောင်းသားချင်း နှိပ်စက်သည့်ကျောင်းတွင် ပညာသင်ကြားခဲ့ရပြီး  မိသားစုစိတ်ဒဏ်ရာများဖြင့် ကြီးပြင်းခဲ့ရသော်လည်း စိတ်ရှည် သည်းခံခြင်းများဖြင့် အချိန်ကောင်းကိုစောင့်ကာ ကြိုးစားခဲ့ခြင်းရလဒ်အနေဖြင့် ကမ္ဘာ့ နံပါတ် ၁ သူဌေးကြီး ဖြစ်နေပြီဖြစ်သည်။

ကိုးကား-Myanmar National Post

15 February 2025

     ၂၀၂၅ ခုနှစ်၊ ဖေဖော်ဝါရီ ၁၂ ရက်က မန္တလေးတိုင်းဒေသကြီး၊  အမရပူရမြို့နယ်၌  တရားမဝင် သယ်ဆောင်လာသော ကျောက်စိမ်းအကြမ်းထည်တုံးများနှင့် ကျောက်စိမ်းလက်ကောက်များ ဖမ်းဆီး ရမိခဲ့ကြောင်း သိရသည်။
    ဖြစ်စဉ်မှာ ၂၀၂၅ ခုနှစ်၊ ဖေဖော်ဝါရီ ၁၂ ရက် နံနက် ၁၁ နာရီတွင် မန္တလေးတိုင်းဒေသကြီး၊ အမရပူရ မြို့နယ်၊ ရွှေကြက်ယက်ကျေးရွာအနီးရှိ ရတနာပုံတံတားပူးပေါင်းစစ်ဆေးရေးဂိတ်၌ အမရပူရခရိုင် ရဲတပ်ဖွဲ့ဝင်များ ပါဝင်သောပူးပေါင်းအဖွဲ့မှ ယာဉ်စစ်ဆေးခြင်းများ ဆောင်ရွက်နေစဉ်  စစ်ကိုင်းမြို့မှ မန္တလေးသို့ ချမ်းမြသာစည်မြို့နယ်၊ သံလျက်မော်တောင်ရပ်ကွက်နေ  ခိုင်ဇင်ဦး(ခ)အရှည်ကြီး(၃၈)နှစ် မောင်းနှင်လာသည့် YGN-19 8K/XXXX Light Truck ယာဉ်အား ရပ်တန့်စစ်ဆေးရာ ယာဉ်၏နောက်ခန်းရှိ ပလတ်စတစ်ဆီပုံးများအတွင်း အထောက်အထားတစ်စုံတစ်ရာ ပြသနိုင်ခြင်းမရှိဘဲ သိုဝှက်သယ်ဆောင် လာသည့် ကျောက်စိမ်းအကြမ်းထည် ၉ တုံး၊ ကျောက်စိမ်းလက်ကောက် ၇၁၀ ကွင်းတို့အား တွေ့ရှိ သိမ်းဆည်းရမိသဖြင့်  ခိုင်ဇင်ဦး(ခ)အရှည်ကြီးအား အမရပူရမြို့မရဲစခန်း(ပ)၂၇/၂၀၂၅၊ မြန်မာ့ကျောက်မျက် ရတနာဥပဒေ ပုဒ်မ ၅၁(က)ဖြင့် အမှုဖွင့်အရေးယူထားကြောင်း သတင်းရရှိသည်။

အီလွန်မက်ဦးဆောင်သည့် ရင်းနှီးမြှုပ်နှံသူအဖွဲ့တစ်ဖွဲ့က ChatGPT chatbot ကို   ထုတ်လုပ်ခဲ့သည့် OpenAI ကုမ္ပဏီကို ဒေါ်လာ ၉၇ ဒသမ၄  ဘီလီယံဖြင့်ဝယ်ယူရန် ကမ်းလှမ်းချက်အား အဆိုပါကုမ္ပဏီက တရားဝင်ပယ်ချလိုက်ကြောင်း သိရသည်။

အီလွန်မက်နှင့် ရင်းနှီးမြှုပ်နှံသူများပါဝင်သော   အဖွဲ့တစ်ဖွဲ့သည် OpenAI ကုမ္ပဏီကို ဒေါ်လာ ၉၇ ဒသမ ၄ ဘီလီယံဖြင့်ဝယ်ယူရန် ကမ်းလှမ်းခဲ့ကြောင်းကို    The  Wall Street Journal က ပြီးခဲ့သည့် ရက်သတ္တပတ်အတွင်းက ဖော်ပြခဲ့သည်။

သို့ရာတွင် အီလွန်မက်၏ကမ်းလှမ်းချက်ကို OpenAI ကုမ္ပဏီဘုတ်အဖွဲ့က သုံးသပ်ခဲ့ပြီးနောက် အဆိုပါကမ်းလှမ်းချက်ကို   ဘုတ်အဖွဲ့က ဖေဖော်ဝါရီလ ၁၄ ရက်တွင် ပယ်ချခဲ့ခြင်းဖြစ်ကြောင်း OpenAI ကုမ္ပဏီ၏ ရှေ့နေဖြစ်သူ   ဝီလီယံဆားဗစ်က ပြောသည်။

ထို့ပြင် OpenAI ကုမ္ပဏီကိုရောင်းချမည်မဟုတ်ဟု ကုမ္ပဏီဥက္ကဋ္ဌ ဘရက်တေလာကလည်း  ကြေညာချက်တစ်ခုတွင် အတည်ပြုထားကြောင်း သိရသည်။

OpenAI ကို ဝယ်ယူရန်ကမ်းလှမ်းရာတွင် အဆိုပါကုမ္ပဏီ၏ ပိုင်ဆိုင်မှုအားလုံး၊ ရန်ပုံငွေအသုံးပြုမှုများနှင့် ယင်းကုမ္ပဏီ၏ ပရဟိတလုပ်ငန်းများဖော်ဆောင်မှုတို့ပါဝင်ကြောင်း အီလွန်မက်၏ ရှေ့နေဖြစ်သူ မာ့တိုဘာရော့က ပြောသည်။

OpenAI ကုမ္ပဏီသည် ပရဟိတအဖွဲ့အစည်းဖြစ်သည်ဟု ထုတ်ပြန်ထားသော်လည်း ၎င်းတို့၏လုပ်ဆောင်ချက်များမှာ စီးပွားရေးဆန်နေသည်ဟု အီလွန်မက်က ပြီးခဲ့သည့် ၂၀၂၄ ခုနှစ်  မတ်လတွင်စွပ်စွဲ၍  OpenAI ကုမ္ပဏီနှင့် တာဝန်ရှိသူတစ်ဦးတို့အား တရားစွဲဆိုခဲ့သေးကြောင်း သိရသည်။

Ref: Xinhua, Ivt

Source: Myawady Web Portal