ဝါရှင်တန် ဇွန် ၂၃ 
အမေရိကန်အစိုးရအမျိုးသား လေကြောင်းနှင့် အာကာသစီမံခန့်ခွဲရေး အေဂျင်စီ (နာဆာ)၏ ဆိုက်ခီအာကာသယာဉ်၏ ဒုံးကန် အားစနစ်များ အပြည့်အဝပြန်လည်လည်ပတ်နိုင်ပြီဖြစ်ကြောင်း ဇွန် ၂၂ ရက် သတင်းများအရ သိရသည်။

ဆိုက်ခီ အာကာသယာဉ်သည် ၂၀၂၅ ခုနှစ် ဧပြီလမှစ၍ ဒုံးကန်အားစနစ်များ ရုတ်တရက်ရပ်တန့်မှု     ပြဿနာနှင့်ရင်ဆိုင်ခဲ့ရသည်။ လက်ရှိအချိန်တွင် နာဆာ အင်ဂျင်နီယာများက ဆိုက်ခီ အား ကာသယာဉ်၏ ဒုံးကန်အားစနစ်ကို အပြည့်အဝ ပြန်လည်ထိန်းသိမ်း နိုင်ခဲ့ကြောင်း သိရသည်။

ဒုံးကန်အားစနစ် အပြည့်အဝ ပြန်လည် လည်ပတ်နိုင်ခဲ့မှုကြောင့် ဆိုက်ခီ အာကာသယာဉ်အနေဖြင့် ဆိုက်ခီ သတ္တုဂြိုဟ်သိမ်ဆီသို့ သတ်မှတ်ထားသည့် အချိန်ကာလ အတိုင်း ဆက်လက်ပျံသန်းနိုင်ပြီ ဖြစ်ကြောင်း၊ နာဆာအဖွဲ့ သည် ဆိုက်ခီအမည်ရှိ ထူးဆန်းသော ဂြိုဟ်သိမ်တစ်စင်းကို လေ့လာရေး အတွက် ဆိုက်ခီအာကာသယာဉ် ထို၂၀၂၃ ခုနှစ် အောက်တိုဘာ ၁၃ ရက်တွင် လွှတ်တင်ခဲ့ခြင်းဖြစ်သည်။

၎င်း အာကာသယာဉ်သည် ၂ဝ၂၉ ခုနှစ် ဩဂုတ်လတွင် ဆိုက်ခီ ဂြိုဟ်သိမ်ဆီသို့ ရောက်ရှိမည်ဖြစ် ကြောင်း သိရသည်။

Ref: Xinhua News

YDNB Newspaper

မိုးတွင်းကာလတွင် ကျိုက်ထီးရိုးစေတီတော်မြတ်ကို လာရောက်ဖူးမြှော်သူများအတွက် တောင်တက်ယာဉ်များကို အလှည့်ကျ နှစ်ဖွဲ့ခွဲ၍ပြေးဆွဲပေးနေကြောင်း သိရသည်။

မိုးတွင်းကာလသည် ကျိုက်ထီးရိုးဘုရားပွဲတော် ကာလမဟုတ်သော်လည်း လာရောက်ဖူးမြော်သူများရှိသည့်အတွက် ထိုကဲ့သို့ တောင်တက်ယာဉ်များလည်း ပြေးဆွဲပေးလျက်ရှိနေခြင်း ဖြစ်သည်။

“ကားအစီးရေ ၁၅၀ ကျော်မှာ ၇၀ လောက်နဲ့ နှစ်ဖွဲ့စီခွဲပြီး အလှည့်ကျ ပြေးဆွဲပေးနေပါတယ်” ဟု ကျိုက်ထီးရိုးတောင်တက်မော်တော်ယာဉ်လုပ်ငန်းရှင်များထံမှ သိရသည်။

ထိုတောင်တက်ယာဉ်တစ်စီးလျှင် ခရီးသည်စုစုပေါင်း ၄၀ ကျော်တင်ဆောင်ခွင့်ပြုထားသော်လည်း မိုးတွင်းကာလတွင် ခရီးသည် ၁၀ ဦးလောက် ပြည့်ရန်ပင် အချိန်ကြာအောင်စောင့်ရခြင်းကြောင့် ဘုရားဖူးခရီးသည် အချို့ မှာ ယာဉ်စီးခငွေကို စုပေါင်းကျခံ၍ စင်းလုံးငှားပုံစံမျိုး စီးနင်းကြခြင်းများလည်းရှိကြသည်။

တောင်တက်ယာဉ်လိုင်းများမှာ ကင်မွန်းစခန်းမှ ရသေ့တောင်စခန်း၊ ရင်ပြင်တော်စခန်းဟူ၍ ခရီးစဉ်ဂိတ် နှစ်ခု သတ်မှတ်ပြေးဆွဲခြင်းမျိုးရှိသော်လည်း မိုးတွင်းကာလတွင် လာရောက်သည့်ဘုရားဖူးများမှာ ရင်ပြင်တော်ဂိတ်အထိ ခရီးစဉ်ပြေးဆွဲသောယာဉ်များကိုသာ စီးနင်းကြခြင်းကြောင့် တောင်တက်ယာဉ်အများစုမှာ ရင်ပြင်တော်ဂိတ်အထိ ပြေးဆွဲပေးကြခြင်းရှိကြောင်း သိရသည်။

Popular Myanmar

ကျွန်တော်တို့လူသားတွေ အနေနဲ့လိုအပ်တဲ့ လျှပ်စစ်ဓာတ်အားကို နည်းလမ်းအမျိုးမျိုးနဲ့ ထုတ်လုပ်လျက်ရှိပါတယ်။ သမားရိုးကျအားဖြင့်ဆိုရင် ရေအားလျှပ်စစ်ဓာတ်အားပေးစက်ရုံ၊ ကျောက်မီးသွေး သို့မဟုတ် နျူကလီးယား စွမ်းအင်သုံး ဓာတ်အားပေးစက်ရုံ အစရှိတာတွေကနေ လျှပ်စစ်ဓာတ်အားကို ထုတ်လုပ်ရယူနေကြတာပါ။ အခုနောက်ပိုင်းမှာတော့ ပြည့်ဖြိုးမြဲစွမ်းအင်လို့ခေါ်တဲ့ သန့်ရှင်းစွမ်းအင်ကနေတစ်ဆင့်လျှပ်စစ်ကို ထုတ်လုပ်လာကြပါပြီ။

အဲဒီသန့်ရှင်းစွမ်းအင်တွေထဲမှာ နေရောင်ခြည်အသုံးပြုတာ၊ လေစွမ်းအင်ကို အသုံးပြုတာတွေပါဝင်ပါတယ်။ အခုနောက်ဆုံးပေါ် နည်းလမ်းတစ်ခုကတော့ သမုဒ္ဒရာရေစီးကြောင်းကနေမှ တစ်ဆင့်လျှပ်စစ်ဓာတ်အား ထုတ်လုပ်တာပါ။ နေရောင်ခြည်တို့၊  လေတို့ဆိုတာ ကမ္ဘာကြီးပေါ်မှာအမြဲတမ်း တည်ရှိနေနိုင်မယ့်အရာတွေ ဖြစ်ပေမယ့်လည်း တစ်ခါတလေမှာဆိုရင် မိုးအုံ့ခြင်းကြောင့် နေမထွက်နိုင်သလို လေဆိုတာကလည်း ရံဖန်ရံခါ ငြိမ်သက်နေနိုင်ပါတယ်။ ဒါပေမဲ့ သမုဒ္ဒရာထဲမှာဖြစ်ပေါ်နေတဲ့ ရေစီးကြောင်းဆိုတာကတော့ ဘယ်သောအခါမှ ရပ်တန့်မှာမဟုတ်တဲ့ သဘာဝစွမ်းအင်အရင်းအမြစ်တစ်ခုဖြစ်ပါတယ်။

ဒီလိုမျိုးသဘာဝစွမ်းအင် အရင်းအမြစ်ကို အကျိုးရှိစွာအသုံးချပြီး လျှပ်စစ်ဓာတ်အား ထုတ်လုပ်နိုင်ဖို့ ကြိုးပမ်းလာတဲ့ ကုမ္ပဏီကတော့ နယ်သာလန်နိုင်ငံ မှ Equinox Ocean Turbines ဆိုတဲ့ ကုမ္ပဏီပဲဖြစ်ပါတယ်။ သူတို့ဖန်တီးမယ့်အရာက ဂျက်လေယာဉ်တစ်စင်းရဲ့ အရွယ်အစားရှိတဲ့ ရေအောက်တာဘိုင်တွေဖြစ်ပါတယ်။  အဲဒီတာဘိုင်တွေက  သမုဒ္ဒရာရေစီးကြောင်းရဲ့ အားနဲ့သာ လည်ပတ်ကြမှာပါ။

သူတို့ဖန်တီးမယ့်စနစ်ထဲမှာ မီတာ ၅၀ အရှည်ရှိတဲ့ ကွန်ကရစ်ဒလက်တစ်ခုပါဝင်ပါတယ်။ ဒလက်တစ်ခုစီမှာ အသေးစားတာဘိုင်များ ပါဝင်ပြီး သူတို့က ရေအောက်ထဲမှာသာ လုံးလုံးလျားလျား အလုပ်လုပ်မှာပါ။ သူ့ကြောင့် မြင်ကွင်းနှောင့်ယှက်မှုမရှိသလို ပတ်ဝန်းကျင်အပေါ်လည်း ထိခိုက်မှုရှိစေမှာမဟုတ်ပါဘူး။ အဲဒီတာဘိုင်တစ်ခုက တည်ငြိမ်တဲ့ရေစီးကြောင်း အောက်မှာဆိုရင် ၃ မဂ္ဂါဝပ်ပမာဏရှိတဲ့ လျှပ်စစ်ဓာတ်အားကို ထုတ်လုပ်ပေးနိုင်မှာဖြစ်ပါတယ်။

Equinox Ocean Turbines ကုမ္ပဏီက သူတို့ရဲ့ ဖန်တီးမှုအတွက် ပထမဆုံးသောစီးပွားဖြစ်အသုံးပြုမှုကို ၂၀၂၇ ခုနှစ်မှာ လုပ်ဆောင်သွားမယ်လို့ဆိုထား ပါတယ်။ လက်ရှိမှာတော့ သူတို့အနေနဲ့ နောက်ထပ် ရင်းနှီးမြှုပ်နှံမှုတွေကို ရရှိထားပါတယ်။ အဲဒီရင်းနှီး မြှုပ်နှံမှုတွေက Samenwerkingsverband Noord-Nederland (SNN) Valorisatie အစီအစဉ်၊ European Regional Development Fund (EFRO) တို့ မှဆင်းသက်လာတာပါ။ ဒါ့အပြင် အခုလိုမျိုးလူအသုံး ပြုမှုနည်းတဲ့ လျှပ်စစ်ဓာတ်အား ထုတ်လုပ်မှု နည်းပညာကို ရရှိရေးအတွက် ဂရိုနင်ဂျန် တက္ကသိုလ်နဲ့ ပူးပေါင်းဆောင်ရွက်ခဲ့တာဖြစ်ပါတယ်။

MWD Web Portal
 

စွမ်းအင်စနစ်တစ်ခုကနေ အများဆုံးပြန်ထုတ်ပေးနိုင်တာက စွမ်းအင်တစ်ခု သို့မဟုတ် စွမ်းအင်တစ်ခုနဲ့ ထွက်ကုန်တစ်ခုဖြစ်ပါတယ်။ ဒါကို သမားရိုးကျစနစ်မှာ အများဆုံးတွေ့ရှိရတာပါ။ ဒါပေမဲ့ စွမ်းအင်စနစ်တစ်ခုတည်းကနေပြီး ရေသန့်ကိုလည်းထုတ်မယ်၊ ဟိုက်ဒရိုဂျင်ကိုလည်းထုတ်မယ်၊ ကာဗွန်ဓာတ်ငွေ့ ထုတ်လွှတ်မှုကင်းစင်မယ့် လျှပ်စစ်ဓာတ်အားကိုလည်း ထုတ်မယ်ဆိုတာကတော့ မဖြစ်နိုင်လောက်ဘူးလို့ ယူဆစရာရှိပါတယ်။ တကယ်တော့မဖြစ်နိုင်တာ မရှိဘူးဆိုတာကို သက်သေပြလိုက်တာကတော့   အမေရိကန်ပြည်ထောင်စုအခြေစိုက် NuScale Power Corporation ဆိုတဲ့ ကုမ္ပဏီပါပဲ။

သူတို့က ပေါင်းစပ်စွမ်းအင်စနစ်တစ်ခုကိုဖန်တီးနိုင်ရေးအတွက် သုတေသနအစီအစဉ်များကို စတင်လုပ်ဆောင်လိုက်ပါပြီ။ သူတို့ရဲ့အစီအစဉ်ကနေထွက် ပေါ်လာမယ့် ပေါင်းစပ်စွမ်းအင်စနစ်က သန့်ရှင်းတဲ့ သောက်သုံးရေ၊ ဟိုက်ဒရိုဂျင်ဓာတ်ငွေ့နဲ့ ကာဗွန်ဓာတ်ငွေ့ထုတ်လွှတ်မှု ကင်းစင်တဲ့ လျှပ်စစ်ဓာတ်အားတို့ ကိုတစ်ပြိုင်နက်တည်း ထုတ်လုပ်ပေးမှာ ဖြစ်ပါတယ်။ အဲဒီကုမ္ပဏီက အစောပိုင်းမှာအသေးစား မော်ဂျူးပုံစံဓာတ်ပေါင်းဖို နည်းပညာကို အသုံးပြုပြီး စက်မှုလုပ်ငန်းနဲ့ ပတ်ဝန်းကျင်ဆိုင်ရာ စိန်ခေါ်မှုတွေကို ကိုင်တွယ်နေတာပါ။ အခုလိုမျိုးထုတ်ပြန်လိုက်ချိန်မှာတော့  သူတို့အနေနဲ့ အဲဒီနည်းပညာကို တိုးချဲ့အသုံးပြုသွားဖို့ လုပ်ဆောင်မယ်ဆိုပြီး ပြောလိုက်တာနဲ့ အတူတူပါပဲ။

အခုဖန်တီးမယ့်စနစ်မှာ NuScale Power Module (NPM) တစ်ခုကို R.O ရေသန့်စင်စနစ်နဲ့ပေါင်းစပ်မှာ ဖြစ်ပါတယ်။ ကုမ္ပဏီရဲ့ထုတ်ပြန်ချက်အရဆိုရင် NPM တစ်ခုတည်းက ရေသန့်ဂါလန်ပေါင်းသန်း ၁၅၀ ခန့်ကို ထုတ်လုပ်ပေးနိုင်တယ်လို့ ဆိုပါတယ်။ အဲဒီလိုထုတ် လုပ်ပေးရာမှာလည်း ကာဗွန်ဓာတ်ငွေ့ကိုထုတ်လွှတ်မှုလုံးဝမရှိပါဘူး။ ဒါကြောင့် NPM ၁၂ လုံးရှိရင် လူဦး ရေ ၂ ဒသမ ၃ သန်းလောက်နေထိုင်တဲ့ မြို့တစ်မြို့ကို ရေသန့်လုံလောက်စွာ ဖြန့်ဖြူးပေးနိုင်မှာဖြစ်ပြီး တစ်ချိန်တည်းမှာပဲ  အိမ်ခြေ ၄ သိန်းကို လျှပ်စစ်ဓာတ်အား ထောက်ပံ့ပေးနိုင်မှာဖြစ်တယ်လို့ ကုမ္ပဏီရဲ့ ထုတ်ပြန်ချက်ထဲမှာ ဖော်ပြထားပါတယ်။

ရေကိုသန့်စင်တဲ့နေရာမှာ ဘေးထွက်ပစ္စည်းအဖြစ် ထွက်လာတာက ဆားရည်ဖြစ်ပါတယ်။ ဆားရည်ဆိုတာ သဘာဝ ပတ်ဝန်းကျင်အတွက် ဆိုးကျိုးဖြစ်စေတဲ့ ပစ္စည်းတစ်ခုပါ။ ဒါကြောင့် NuScale မှသုတေသန ပညာရှင်များက ဆားရည်ကိုအသုံးချပြီး အကျိုးရှိစေမယ့်ပစ္စည်းတစ်မျိုးကို ထုတ်လုပ်ဖို့ စိတ်ကူးလာ ပါတယ်။ သူတို့ရဲ့စိတ်ကူးအရဆိုရင် ထွက်လာမယ့်အရာက သန့်ရှင်းစွမ်းအင်ကမ္ဘာကြီးအတွက်လိုအပ်တဲ့ဟိုက်ဒရိုဂျင်စွမ်းအင်ပါပဲ။ ဟိုက်ဒရိုဂျင် ထုတ်လုပ်ရာမှာ သမားရိုးကျ လျှပ်စစ်သုံးဓာတ်ခွဲနည်းကို အသုံးမပြုတဲ့အတွက် စွမ်းအင်သုံးစွဲမှုနဲ့ ရေအသုံးပြုမှုတို့ကိုလည်း လျော့နည်းစေမှာဖြစ်ပါတယ်။    

MWD Web Portal
 

တရုတ်မိုးလေဝသဌာနက နိုင်ငံ၏ မြို့တော် ပေကျင်းမြို့၌ ဒုတိယအမြင့်ဆုံး အပူချိန်မြင့်တက်မှု သတိပေးချက်ထုတ်ပြန်ထားကြောင်းသိရသည်။ ပေကျင်းမြို့ အပူချိန်သည် ၃၈ ဒီဂရီစင်တီဂရိတ်အထိမြင့်တက်လာနိုင်သည့်အတွက် ပြည်သူများအနေဖြင့် သတိထားရန် မိုးလေဝသ ဌာနက ဇွန်လ ၂၃ ရက်တွင် သတိပေး ချက်ထုတ်ပြန်ထားခြင်းဖြစ်သည်။

ယခုထုတ်ပြန်သော သတိပေးချက်သည် အဝါရောင်အဆင့်သတိပေးချက် ဖြစ်သောကြောင့် ပြည်သူများအနေဖြင့် အမိုးအကာအောက်တွင်သာနေထိုင်ရန် နှင့် အပူလျှပ်ခြင်းမဖြစ်စေရေးအတွက် ရေများများသောက်ရန်လိုအပ်ကြောင်း ထုတ်ပြန်ချက်တွင်ဖော်ပြထားသည်။

ထို့အတူ ဆောက်လုပ်ရေးအလုပ်သမားများအနေဖြင့် အလုပ်ချိန်ကိုလျှော့ချရန်လိုအပ်ကြောင်း၊ သက်ကြီးရွယ်အိုများ၊ နေမကောင်းသူများ၊ အားနည်းနေသူများအနေဖြင့် ပင်ပန်းစေမည့်အလုပ်များ လုပ်ဆောင်ခြင်းမပြုသင့်ကြောင်း သတိပေးချက်တွင် ဖော်ပြထားသည်ဟု သိရသည်။

Ref: TST

MWD Daily Newspaper

Photo -VN Express

အိန္ဒိယနိုင်ငံ၌ လာမည့်သီတင်းပတ်ပေါင်းများစွာအထိ လုံလောက်မှုရှိသည့် ရေနံစိမ်းများရှိကြောင်းနှင့် နိုင်ငံအနေဖြင့် လိုအပ်သောရေနံစိမ်းများကို အရင်းအမြစ် ပြောင်းလဲတင်သွင်းထားကြောင်း အိန္ဒိယရေနံနှင့်သဘာဝဓာတ်ငွေ့ဝန်ကြီး ဟားဒိဆင်းပူရီက ဇွန်လ ၂၂ ရက်တွင်ပြောထားသည်။

အမေရိကန်က အီရန်အပေါ်တိုက်ခိုက်မှုများလုပ်ဆောင်ပြီးနောက် အီရန်နိုင်ငံက ၎င်းတို့ထိန်းချုပ်ထားသော ဟော်မုရေလက်ကြားကို ပိတ်လာနိုင်သည့်အခြေ

အနေနှင့်ပတ်သက်၍ ဆင်းပူရီကယခုကဲ့ သို့ပြောလာခြင်းဖြစ်သည်။

ကမ္ဘာပေါ်တွင်ရေနံတင်သွင်းမှုတတိယအများဆုံးနိုင်ငံဖြစ်သည့် အိန္ဒိယနိုင်ငံသည် လွန်ခဲ့သောနှစ်အနည်းငယ်မှစ၍ ရေနံစိမ်းပမာဏအများအပြားကို ဟော်မု ရေလက်ကြားမှ ဖြတ်သန်းရခြင်းမရှိသည့် အရင်းအမြစ်များမှရယူခြင်းဖြစ်ကြောင်း၊ နိုင်ငံကတင်သွင်းနေသည့် ရေနံစိမ်းစည် ၅ သန်းခွဲတွင်၂ သန်းခန့်ကသာ ထိုရေလက် ကြားမှ ဖြတ်သန်းခြင်းဖြစ်ကြောင်း ဆင်းပူရီကပြောထားသည်။

Ref: RT

MWD Daily Newspaper

Photo - Sia Sat

ရန်ကုန် ဇွန် ၂၃

မြန်မာနိုင်ငံဆောက်လုပ်ရေးဆိုင်ရာလုပ်ငန်းရှင်များအသင်းချုပ်နှင့် ဗီယက်နမ် စီးပွားရေးလုပ်ငန်းရှင်များအဖွဲ့တို့သည် Myanmar - Vietnam Construction Business Matching ကို ယနေ့နံနက် ၉ နာရီခွဲတွင် သင်္ဃန်းကျွန်းမြို့နယ် သံသုမာလမ်းနှင့် ဝေဇယန္တာလမ်းထောင့်ရှိမြန်မာနိုင်ငံဆောက်လုပ်ရေးဆိုင်ရာလုပ်ငန်းရှင်များအသင်းချုပ်၌ပြုလုပ်သည်။

အခမ်းအနားတွင် မြန်မာနိုင်ငံဆောက်လုပ်ရေးဆိုင်ရာ လုပ်ငန်းရှင်များ အသင်းချုပ်ဥက္ကဋ္ဌ ဦးရှိန်ဝင်းက ကြိုဆို နှုတ်ခွန်းဆက်စကားပြောကြားသည်။ ထို့နောက်မြန်မာနိုင်ငံဆိုင်ရာ ဗီယက်နမ် သံအမတ် H. E.Mr.Ly Quoc Tuan က အမှာစကားပြောကြားသည်။

ဆက်လက်၍ ဗီယက်နမ်သံအမတ်နှင့် အသင်းချုပ်ဥက္ကဋ္ဌတို့က အမှတ်တရ လက်ဆောင်ပစ္စည်းလဲလှယ်ပေးအပ်ကြသည်။

မြန်မာ - ဗီယက်နမ်စီးပွားရေးလုပ်ငန်း ရှင်များ တွေ့ဆုံပွဲတွင်ဗီယက်နမ်နိုင်ငံမှ ဆောက်လုပ်ရေးလုပ်ငန်းနှင့်သက်ဆိုင်သည့်ကုမ္ပဏီ ၂၂ ခုတို့မှစီးပွားရေးလုပ်ငန်းရှင်တို့က မိမိတို့၏ထုတ်ကုန်များနှင့် လုပ်ငန်းဆောင်ရွက်ချက်များကိုရှင်းလင်းတင်ပြကြသည်။

အဆိုပါတွေ့ဆုံဆွေးနွေးပွဲဖြစ်မြောက်ရေးအတွက် ဇွန်လ ၁၇ ရက်က ဗီယက်နမ်သံရုံးအရာရှိ Mr. Nguyen Van Bay နှင့် အဖွဲ့ဝင်များ မြန်မာနိုင်ငံဆောက်လုပ်ရေးဆိုင်ရာ လုပ်ငန်းရှင်များအသင်းချုပ်သို့ လာရောက်ပြီး အကြိုညှိနှိုင်းအစည်းအဝေး ပြုလုပ်ကြောင်းသိရသည်။
ဝန်းရံခ

MWD Daily Newspaper

ရန်ကုန်   ဇွန်   ၂၃

အပြည်ပြည်ဆိုင်ရာ  မြန်မာလေကြောင်း(MAI)မှ သတ္တမမြောက် Airbus လေယာဉ်အသစ်သည် ယနေ့တွင် ရန်ကုန်အပြည်ပြည်ဆိုင်ရာ လေဆိပ်သို့ ရောက်ရှိခဲ့ကြောင်း သိရသည်။

အဆိုပါလေယာဉ်  ရန်ကုန်အပြည်ပြည်ဆိုင်ရာ   လေဆိပ်သို့ရောက်ရှိချိန်တွင် အစဉ်အလာအရ  ရေသန့်စင်ပက်ဖျန်းမှု ပြုလုပ်ပြီး ကြိုဆိုခြင်း အခမ်းအနားပြုလုပ်ခဲ့ကြသည်။

ယခုရောက်ရှိလာသည့် Airbus A319 လေယာဉ်အပါအဝင် MAI ၏လေယာဉ်အင်အားစုသည် စုစုပေါင်း ၁၁ စီး ရှိလာခဲ့ပြီဖြစ်သည်။ မြန်မာနိုင်ငံ၏ ဦး‌ဆောင်လေကြောင်းလိုင်း ဖြစ်သည့် အပြည်ပြည်ဆိုင်ရာ မြန်မာလေကြောင်း MAI သည် ရန်ကုန်နှင့် မန္တလေး အပြည်ပြည်ဆိုင်ရာ လေဆိပ်နှစ်ခုတွင် အခြေစိုက်၍ မြို့ပေါင်း ၄၁ မြို့ဆီသို့ ဆက်သွယ်ပျံသန်းပြေးဆွဲလျက်ရှိကြောင်း သိရသည်။

Myawady Webportal

နေပြည်တော် ဇွန် ၂၃

မြန်မာနိုင်ငံတွင် လှုပ်ခတ်ခဲ့သော မန္တလေးငလျင်ကြီးကြောင့် ထိခိုက်ပျက်စီးခဲ့ရသည့်နေရာများ၌ ပြန်လည်ထူထောင်ရေးလုပ်ငန်းများကို အဖွဲ့အစည်းအသီးသီးက ဒေသခံပြည်သူများနှင့် ပူးပေါင်း၍ အင်တိုက်အားတိုက် ကူညီဆောင်ရွက်ပေးလျက်ရှိသည်။

ထိုသို့ဆောင်ရွက်ပေးလျက်ရှိရာ ယနေ့တွင် ကာကွယ်ရေးဦးစီးချုပ်ရုံး (ကြည်း) မှ ဒုတိယဗိုလ်ချုပ်ကြီး သက်ပုံနှင့် တာဝန်ရှိသူများသည် စစ်ကိုင်းမြို့အတွင်းရှိ ရာဇမဏိစူဠာကောင်းမှုတော်စေတီ၊ မေတ္တာကန်နှင့် ဆွမ်းဦးပုညရှင်စေတီတော်တို့ရှိ ငလျင်ဒဏ်ကြောင့် ထိခိုက်ပျက်စီးခဲ့သော သာသနိက အဆောက်အအုံများအား အဖွဲ့အစည်းအသီးသီးက ဒေသခံပြည်သူများနှင့်ပူးပေါင်း၍ အပြီးသတ်ဖယ်ရှားရှင်းလင်းမှု၊ စေတီတော်ရင်ပြင်တိုးချဲ့ရန် မြေသားခိုင်မာမှု စမ်းသပ်စစ်ဆေးခြင်းနှင့် စေတီတော်လုံးပတ် ပြန်လည်ပြုပြင်မွမ်းမံတည်ဆောက်နေမှု၊ စေတီတော်ပရိဝုဏ်အတွင်း သန့်ရှင်းသာယာလှပရေးနှင့် ဘက်စုံပြန်လည်ပြုပြင်တည်ဆောက်နေမှု၊ စစ်ကိုင်းမြို့အတွင်းရှိ သကျဓီတာ သီလရှင်စာသင်တိုက်နှင့် တောလေးထပ်ကျောင်းတိုက်ရှိ ငလျင်ဒဏ်ကြောင့် ထိခိုက်ပျက်စီးခဲ့သော သာသနိကအဆောက်အအုံ များကို အပြီးသတ်ဖယ်ရှားရှင်းလင်းပြီး ပြန်လည်တည်ဆောက်နေမှုတို့ကို ကြည့်ရှုစစ်ဆေး၍ လိုအပ်သည်များ ပေါင်းစပ်ညှိနှိုင်းဆောင်ရွက်ပေးပြီး လုပ်ငန်း ဆောင်ရွက်နေသူများအား အားဖြည့်အချိုရည်များ ပေးအပ်သည်။

ထို့နောက် စစ်ကိုင်းမြို့အတွင်းရှိ စစ်ကိုင်းပညာရေးဒီဂရီကောလိပ်သို့ သွားရောက်၍ ငလျင်ဒဏ်ကြောင့် ထိခိုက်ပျက်စီးခဲ့သော ကျောင်းဆောင်များကို အပြီးသတ်ဖယ်ရှားရှင်းလင်းနေမှု၊ စစ်ကိုင်းမြို့ အတွင်းရှိ ငလျင်ဒဏ်သင့် နေအိမ်အဆောက်အအုံများကို စက်ယန္တရားကြီး အသုံးပြု၍ အပြီးသတ် ဖယ်ရှားရှင်းလင်းနေမှုနှင့် မဟာစည်းခုံကြီးစေတီတော်ပရိဝုဏ်အတွင်း၌ ငလျင်ဘေးဒဏ်သင့်ပြည်သူများ နေထိုင်နိုင်ရန်အတွက် Modular House ဆောက်လုပ်ပြီးစီးမှုများကို ကြည့်ရှုစစ်ဆေးပြီး လိုအပ်သည်များကို တာဝန်ရှိသူများနှင့် ပေါင်းစပ်ညှိနှိုင်းဆောင်ရွက်ပေးသည်။

အလားတူ ကာကွယ်ရေးဦးစီးချုပ်ရုံး (ကြည်း) မှ ဒုတိယဗိုလ်ချုပ်ကြီး စိုးတင့်နိုင်နှင့် တာဝန်ရှိသူများ သည် မန္တလေးမြို့ ချမ်းအေးသာစံမြို့နယ် ပြည်ကြီးမျက်ရှင်ရပ်ကွက်ရှိ အမှတ် (၁၆) အခြေခံပညာအထက်တန်းကျောင်း၌ ၂၀၂၅ ခုနှစ် တက္ကသိုလ်ဝင်စာမေးပွဲကို ပြန်လည်ဖြေဆိုခဲ့သည့် မန္တလေးတိုင်းဒေသကြီးအတွင်းရှိ စာစစ်ဌာနအသီးသီး၏ အဖြေလွှာများကို စနစ်တကျ သိမ်းဆည်းဆောင်ရွက်ထားရှိမှုနှင့် သက်ဆိုင်ရာစာစစ်ဌာနသို့ အချိန်မီပေးပို့နိုင်ရေး ပြင်ဆင်ဆောင်ရွက်ထားရှိမှုတို့ကို ကြည့်ရှုစစ်ဆေး၍ လိုအပ်သည်များ ပေါင်းစပ်ညှိနှိုင်းဆောင်ရွက်ပေးသည်။

ယင်းနောက် အောင်မြေသာစံမြို့နယ် ပြည်ကြီးကျက်သရေအနောက်ရပ်ကွက်ရှိ အန္တရာယ်ရှိ အဆောက်အအုံအား စက်ယန္တရားကြီးများအသုံးပြု၍ အပြီးသတ်ဖယ်ရှားရှင်းလင်းမှု၊ ချမ်းမြသာစည်မြို့နယ် ချမ်းမြသာစည်တောင်ရပ်ကွက်ရှိ ရှမ်းစုဆီးဘန်နီတိုက်အတွင်းရှိ အလယ်တိုက်ကြီးအုတ်ကျောင်းနှင့် ကျွန်းလုံးဥသျှောင်ရပ်ကွက်၊ ဒက္ခိဏာရာမဘုရားကြီးကျောင်းတိုက်ရှိ မြင်းတန်းကျောင်းတိုက်ရှိ ငလျင်ဒဏ်ကြောင့် ထိခိုက်ပျက်စီးခဲ့သော အပျက်အစီးများအား တပ်မတော်သားများကလည်းကောင်း၊ စက်ယန္တရားကြီးများကို အသုံးပြု၍လည်းကောင်း အင်တိုက်အားတိုက် ဖယ်ရှားရှင်းလင်းနေမှုတို့ကို ကြည့်ရှုစစ်ဆေး၍ လိုအပ်သည်များမှာကြားပြီး လုပ်ငန်းဆောင်ရွက်နေသူများအား အားဖြည့်အချိုရည်များ ပေးအပ်ခဲ့ကြောင်း သတင်းရရှိသည်။

MOI

ကျောက်ဆည်၊ ဇွန်-၂၄

မန္တလေးတိုင်းဒေသကြီး၊ ကျောက်ဆည်ခရိုင်၊ ကျောက်ဆည်မြို့နယ်တွင် ရေရရှိရေးနည်းလမ်းများ အလိုက် ၂၀၂၄-၂၀၂၅ခုနှစ် နွေသီးနှံမျိုးစုံ(၅၂၅၃၄)ဧက စိုက်ပျိုးခဲ့ပြီး သင်းတွဲစိုက်ပျိုးရေးနည်းပညာပေး ရှေ့တန်းစခန်း တွင် (၁၀၄၀၃)ဧက စိုက်ပျိုးခဲ့ကြောင်း မြို့နယ်စိုက်ပျိုးရေးဦးစီးဌာနမှ သိရသည်။ 

သင်းတွဲစိုက်ပျိုးရေးနည်းပညာပေးရှေ့တန်းစခန်း၌ နွေသီးနှံမျိုးစုံစိုက်ပျိုးရာတွင် နွေးစပါးသီးနှံများကို သင်္ဂတုံ ကျေးရွာအုပ်စုတွင်(၆၁)ဧက၊ အရှေ့သာဂရကျေးရွာအုပ်စုတွင်(၉၃)ဧက၊ ကလေးကျေးရွာအုပ်စုတွင် (၂၈၃)ဧက၊ မှိုင်းပန်ကျေးရွာအုပ်စုတွင်(၅၈၇)ဧက၊  ပြည်တော်သာကျေးရွာအုပ်စုတွင်(၃၇၀)ဧက၊ ရှမ်းတောင်ဦး ကျေးရွာ အုပ်စုတွင် (၂၆၀)ဧက၊ ပုထိုးနီကျေးရွာအုပ်စုတွင်(၅၁၇)ဧက၊ ကုလားကျောင်းကျေးရွာအုပ်စုတွင် (၈၇၇) ဧက၊ ငှက္ကတောင်ကျေးရွာအုပ်စုတွင်(၄၄၅)ဧက၊ ထန်းဇင်တော်ကျေးရွာအုပ်စုတွင်(၁၄၅)ဧက၊ အရှေ့ငယ်တိုး ကျေးရွာ အုပ်စုတွင် (၆၂၆) ဧက၊ နွေနှမ်းသီးနှံများကို သင်္ဂတုံကျေးရွာအုပ်စုတွင်(၆၅၈)ဧက၊ အရှေ့သာဂရကျေးရွာ အုပ်စု တွင်(၃၀၂)ဧက၊ ကလေးကျေးရွာအုပ်စုတွင် (၄၉၉) ဧက၊ မှိုင်းပန်ကျေးရွာအုပ်စုတွင် (၁၄၁) ဧက၊ ပြည်တော်သာ ကျေးရွာအုပ်စုတွင်(၂၇၉)ဧက၊ ရှမ်းတောင်ဦးကျေးရွာအုပ်စုတွင်(၃၄၅)ဧက၊ပုထိုးနီကျေးရွာအုပ်စုတွင်(၁၂၅)ဧက၊ ကုလားကျောင်းကျေးရွာအုပ်စုတွင်(၂၁၇)ဧက၊ ငှက္ကတောင်ကျေးရွာအုပ်စုတွင်(၃၉၃)ဧက၊ ထန်းဇင်တော်ကျေးရွာ အုပ်စုတွင်(၁၄)ဧက၊ အရှေ့ငယ်တိုးကျေးရွာအုပ်စုတွင်(၇၀၁)ဧက၊ ရွှေဒါးကျေးရွာအုပ်စုတွင်(၁၅၁)ဧက၊ ရဲဘော်ကြီး ကျေးရွာအုပ်စုတွင်(၂၃)ဧက မိုးကြိုပဲတီစိမ်းသီးနှံများကို  ပြည်တော်သာကျေးရွာအုပ်စုတွင်(၂၈၀)ဧက၊ ရှမ်းတောင်ဦး ကျေးရွာအုပ်စုတွင်(၃၇)ဧက၊ ပုထိုးနီကျေးရွာအုပ်စုတွင်(၈)ဧက၊ ကုလားကျောင်းကျေးရွာ အုပ်စုတွင်(၇၆)ဧက၊ ငှက္ကတောင်ကျေးရွာအုပ်စုတွင်(၉၆)ဧက၊ ထန်းဇင်တော်ကျေးရွာအုပ်စုတွင်(၅၅)ဧက၊ အရှေ့ငယ်တိုး ကျေးရွာ အုပ်စုတွင် (၆၅၉)ဧက၊ ရွှေဒါးကျေးရွာအုပ်စုတွင်(၄၂၂)ဧက၊ ရဲဘော်ကြီးကျေးရွာအုပ်စုတွင် (၆၅၈)ဧက စုစုပေါင်း သီးနှံစုံ (၁၀၄၀၃)ဧက  စိုက်ပျိုးထားရှိကြောင်း သိရသည်။

နွေသီးနှံများ မျှော်မှန်းအထွက်နှုန်းရရှိရေး  မြို့နယ်စိုက်ပျိုးရေးဦးစီးဌာနမှ ဝန်ထမ်းများက တောင်သူများနှင့် ပူးပေါင်း၍ ဒေသနှင့်ကိုက်ညီသည့်မျိုးများ၊ စိုက်နည်းစနစ်များ စနစ်တကျကူညီပေးလျက်ရှိပြီး  မြို့နယ် ဆည်မြောင်း နှင့်ရေအသုံးချမှုစီမံခန့်ခွဲရေးဦးစီးဌာနမှ စိုက်ပျိုးရေများ ပြည့်ဝစွာ ပေးဝေလျက်ရှိကြောင်း သိရသည်။ 

ပေးပို့သူ- သက်မောင်၊(ကျောက်ဆည်)