ရောမ   ဇွန် ၄

အီတလီနိုင်ငံတွင် မောင့်အက်တနာမီးတောင် ပေါက်ကွဲပြီးနောက် မီးခိုးလုံးများသည် မီးတောင်အနီးပျံ့နှံ့နေပြီး ထပ်မံလှုပ်ရှားနိုင်သဖြင့် စစ္စလီမြို့ပြကာကွယ်ရေးဌာနက ဇွန် ၃ ရက်က မီးတောင်သတိပေးချက် ထုတ်ပြန်ထားကြောင်း ယနေ့သတင်းများအရ သိရသည်။

အီတလီနိုင်ငံရှိ မောင့်အက်တနာမီးတောင်သည် ဇွန် ၂ ရက်က ပေါက်ကွဲခဲ့ပြီးနောက် မီးတောင်မှ ပြာမှုန်များနှင့် မီးခိုးငွေ့များသည် စစ္စလီကျွန်းအရှေ့ဘက်ထိ ပျံ့နှံ့နေကာ မီးတောင်ထိပ်တစ်ဝိုက်တွင်လည်း မီးခိုးများဖြင့် ဖုံးလွှမ်းနေသောကြောင့် ဇွန် ၃ ရက်တွင် မီးတောင်သတိပေးချက် ထုတ်ပြန်ထားကြောင်း၊ ထို့ကြောင့် မီးတောင်သို့ လေ့လာလည်ပတ်မည့်သူများ မြို့ပြကာကွယ်ရေးဌာနက သတိပေးထားကြောင်း သိရသည်။

“မီးတောင်သတိပေးချက်ထုတ်ထားပေမဲ့ စွန့်စွန့်စားစားတက်ကြတဲ့ တောက်တက်သမားတွေရှိပါတယ်။ အသက်အန္တရာယ်မဖြစ်ဖို့ အတွက်တော့ ဂရုစိုက်ကြရမှာပါ။ လက်ရှိအခြေအနေထိ မီးတောင်က မတည်ငြိမ်သေးပါဘူး။ စွန့်စားတာမျိုး မလုပ်စေချင်ပါဘူး။ တောက်မတက်မီ မိမိကိုယ်ကို ကာကွယ်ရေးအစီအစဉ်တွေတော့ သေချာပြင်ဆင်သွားဖို့လိုပါမယ်” ဟု စစ္စလီမြို့ပြကာကွယ်ရေးဌာနအကြီးအကဲ ဆာဗိုကိုနီကာက ပြောကြားခဲ့ကြောင်း သိရသည်။

Source: ရတနာပုံသတင်းစာ

အိန္ဒိယနိုင်ငံတောင်ပိုင်း ဘန်ဂါလူရူမြို့ရှိ ခရစ်ကက်ကစားကွင်းတစ်ခု၏ အပြင် ဘက်တွင် ဇွန်လ ၄ရက်က လူအုပ်ပြိုကျမှုဖြစ်ပွားရာ အနည်းဆုံးလူ ၁၁ ဦးသေဆုံးပြီး ၅၀ ဦးဒဏ်ရာရရှိခဲ့ကြောင်းသိရသည်။

အဆိုပါဖြစ်စဉ်သည် M. Chinnaswamy ကစားကွင်းပြင်ပ၌ အားပေးသူထောင်ပေါင်း များစွာက အောင်ပွဲရ ခရစ်ကက်အသင်းအား အားပေးထောက်ခံနေစဉ် ဖြစ်ပွားခြင်း ဖြစ်ပြီး အားပေးသူ ပရိသတ်များက အလုအယက်တိုးဝှေ့ရာမှ လူအုပ်ပြိုကျမှုဖြစ်ပွား ခြင်းဖြစ်ကြောင်းသိရသည်။

Ref: Xinhua, Abc

Photo - Aljazzera

ထိုင်ဝမ်၏ အလှအပလုပ်ငန်းတွင် လူကြိုက်များပြီး မိတ်ကပ်ပစ္စည်းများကို စားသုံးပြသည့် ဗီဒီယိုများဖြင့် ကျော်ကြားခဲ့သော အမျိုးသမီးငယ်တစ်ဦး အသက် ၂၄ နှစ်အရွယ်တွင် ကွယ်လွန်သွားခဲ့သည်။

Guava Beauty အမည်ရှိ အဆိုပါ အမျိုးသမီးငယ်သည် နုပျိုချစ်စရာကောင်းသော ဟန်ပန်နှင့် “မိတ်ကပ်နှင့် အစားအစာ” ပေါင်းစပ်ထားသည့် "mukbang" ဗီဒီယိုများကြောင့် လူမှုကွန်ရက်ပေါ်တွင် ပရိသတ် ၁၂,၀၀၀ ကျော်ရှိခဲ့သည်။ သူမ၏ ဗီဒီယိုများတွင် နှုတ်ခမ်းနီ၊ မိတ်ကပ်၊ မျက်နှာနှင့် ဝက်ခြံအတွက် အသုံးပြုသည့် ဂွမ်းပြားများအထိ စားသုံး နေသည်ကို တွေ့ရသည်။

ဇွန်လ ၃ ရက်နေ့တွင် ထိုင်ဝမ်မီဒီယာများက အဆိုပါ အမျိုးသမီးငယ်၏ မိသားစုမှ ၎င်းတို့၏သမီး ကွယ်လွန်သွားသည်ကိုအတည်ပြုကြောင်းဖော်ပြခဲ့သည်။ “မိမိတို့၏ အဖိုးတန်သမီး Guava Beauty သည် ၂၀၂၅ ခုနှစ်၊ မေလ ၂၄ ရက်နေ့တွင် ဤကမ္ဘာမှ ထွက်ခွာသွားကြောင်း ဝမ်းနည်းစွာ ကြေညာအပ်ပါသည်၊ သူမကို နှစ်သက်ခဲ့ကြသူများ၊ မှတ်ချက်ပေးခဲ့ကြသူများနှင့် အတူရယ်မောခဲ့ကြသူများအားလုံးကို ကျေးဇူးတင်ပါသည်” ဟု ဖော်ပြခဲ့သည်။

Guava ၏ သေဆုံးရသည့် အကြောင်းရင်းကို မိသားစုနှင့် အာဏာပိုင်များက ထုတ်ပြန်ခြင်း မရှိသေးပါ။ သို့သော် သူမ၏ သေဆုံးမှုသည် လူမှုကွန်ရက်ပေါ်တွင် များစွာ စဉ်းစားဆင်ခြင်မှုများ ဖြစ်ပေါ်စေခဲ့သည်။အချို့က မိတ်ကပ်ပစ္စည်းများ အဆိပ်သင့်မှုကြောင့် ဖြစ်နိုင်သည်ဟု ယုံကြည်ကြပြီး အချို့က စိတ်ဖိစီးမှုနှင့် မူမမှန်သော နေထိုင်မှုပုံစံတို့ကြောင့် လေဖြတ်ခြင်း သို့မဟုတ် နှလုံးရပ်ခြင်း ဖြစ်နိုင်သည်ဟု သံသယ ရှိကြသည်။

ကိုးကား- VN Express

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊ နစက-၂

အမေရိကန်ရှေ့နေချုပ်ရုံးက တရုတ်သိပ္ပံပညာရှင် ၂ ဦးကို သီးနှံများကို ပျက်စီးစေနိုင်သည့် အဆိပ်ပြင်းမှိုမျိုးကို တရားမဝင် သယ်ဆောင်လာမှုဖြင့် တရားစွဲဆိုလိုက်ပါသည်။

မစ်ရှီဂန်ပြည်နယ် အရှေ့ပိုင်းခရိုင်ရှေ့နေရုံးက ဇွန်လ ၃ ရက်နေ့တွင် တရုတ်နိုင်ငံသား သိပ္ပံပညာရှင် ၃၃ နှစ်အရွယ် Yunqing Jian နှင့် ၃၄ နှစ် အရွယ် Zunyong Liu တို့အား အမေရိကန်သို့ တရားမဝင် ပစ္စည်းများ သယ်ဆောင်ခြင်း၊ လိမ်လည်ထွက်ဆိုခြင်းနှင့် ဗီဇာလိမ်လည်မှုများဖြင့် စွဲချက်တင်ကြောင်း ကြေညာခဲ့သည်။

အမေရိကန်တရားရေးဌာန၏ အဆိုအရ ထိုသိပ္ပံပညာရှင် ၂ ဦးသည် Fusarium graminearum ဟုခေါ်သော အဆိပ်ရှိမှိုမျိုးကို အမေရိကန်သို့ လျှို့ဝှက်သယ်ဆောင်ကာ မစ်ရှီဂန်တက္ကသိုလ်တွင် သုတေသနပြုလုပ်ရန် စီစဉ်ခဲ့ကြသည်။ FBI ၏ ဖော်ပြချက်အရ အဆိုပါမှိုမျိုးသည် ဂျုံ၊ မုယော၊ ဆန်နှင့် ပြောင်းကဲ့သို့သော သီးနှံများတွင် Cotton blight ရောဂါကို ဖြစ်စေနိုင်ပြီး “စိုက်ပျိုးရေးအကြမ်းဖက်လက်နက်” အဖြစ် သတ်မှတ်ခံထားရသည့် အန္တရာယ်ရှိသော မှိုမျိုးဖြစ်ကာ ကမ္ဘာတစ်ဝှမ်းတွင် နှစ်စဉ် ဒေါ်လာဘီလီယံချီ ဆုံးရှုံးမှုများ ဖြစ်စေနိုင်ပါသည်။ ထို့အပြင် ထိုမှိုမျိုးသည် လူနှင့် တိရစ္ဆာန်များတွင် အန်ခြင်း၊ အသည်းပျက်စီးခြင်း နှင့် မျိုးပွားမှုဆိုင်ရာ ချို့ယွင်းချက်များကိုလည်း ဖြစ်စေနိုင်ပါသည်။

Zunyong Liu သည် ၂၀၂၄ ခုနှစ်၊ ဇူလိုင်လတွင် ၎င်း၏ ကျောပိုးအိတ်တွင်တွေ့ရသော အနီရောင်နမူနာပစ္စည်းနှင့်ပတ်သက်၍ မေးမြန်း စစ်ဆေးစဉ် လိမ်လည်ထွက်ဆိုခဲ့ခြင်းကြောင့် ဒက်ထရိုက်လေဆိပ်၌ ဝင်ရောက်ခွင့်ငြင်းပယ်ခံရပြီး တရုတ်နိုင်ငံသို့ ပြန်ပို့ခြင်းခံခဲ့ရသည်။ FBI ၏အဆိုအရ Liu သည် အစောပိုင်းတွင် နမူနာပစ္စည်းများအကြောင်း ဘာမှမသိဟု ငြင်းဆိုခဲ့သော်လည်း နောက်ပိုင်းတွင် မစ်ရှီဂန် တက္ကသိုလ် ဓာတ်ခွဲခန်းတွင် သုတေသနပြုလုပ်ရန် ရည်ရွယ်ခဲ့ကြောင်း ဝန်ခံခဲ့သည်။ Liu ၏ ချစ်သူ Yunqing Jian သည် အဆိုပါဓာတ်ခွဲခန်းတွင် အလုပ်လုပ်နေဆဲဖြစ်ပြီး Liu ကိုယ်တိုင်မှာမူ အလုပ်မှ နုတ်ထွက်ထားသူဖြစ်သည်။

တရားစွဲဆိုချက်အရ ၎င်းတို့နှစ်ဦးစလုံးသည် တရုတ်နိုင်ငံတွင် Fusarium graminearum မှိုမျိုးကို လေ့လာခဲ့ဖူးပြီး ၂၀၂၄ ခုနှစ်က သူတို့အကြား ပို့သောစာတိုများတွင် Jian သည် Liu ဒက်ထရိုက်လေဆိပ်တွင် ဖမ်းဆီးခံရချိန်မတိုင်မီကပင် မစ်ရှီဂန်တက္ကသိုလ်ဓာတ်ခွဲခန်းတွင် ထိုမှိုမျိုးကို လေ့လာနေခဲ့ကြောင်း ဖော်ပြထားသည်။ မစ်ရှီဂန်တက္ကသိုလ်တွင် အဆိုပါ မှိုမျိုးကို လေ့လာရန် ဖက်ဒရယ်လိုင်စင်မရှိခဲ့ပေ။

အမေရိကန်ပြည်ထောင်စုသည် တရုတ်နိုင်ငံနှင့် တရားခံလွှဲပြောင်းရေး သဘောတူစာချုပ်မရှိသောကြောင့် Liu ကို ဝါရှင်တန်က ဖမ်းဆီးနိုင်ရန် မဖြစ်နိုင်ဟု ယူဆရသည်။ ထိုအတောအတွင်း Jian အား တရားရုံးတွင် ရုံးထုတ်ခဲ့ပြီး လာမည့်ရက်များအတွင်း အာမခံကြားနာမှုကို ဆိုင်းငံ့ထားကာ အကျဉ်းထောင်သို့ ပြန်လည်ပို့ဆောင်ခဲ့သည်။

တရုတ်အစိုးရက အဆိုပါဖြစ်ရပ်နှင့်ပတ်သက်၍ မှတ်ချက်တစ်စုံတစ်ရာ ထုတ်ပြန်ပြောဆိုခြင်းမရှိသေးဘဲ မစ်ရှီဂန်တက္ကသိုလ်မှ စုံစမ်းစစ်ဆေးမှုတွင် အာဏာပိုင်များနှင့် ပူးပေါင်းဆောင်ရွက်နေကြောင်း ပြောကြားခဲ့သည်။

ကိုးကား-VN Express

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊ နစက-၂

အမေရိကန် ရေတပ်သည် USNS Harvey Milk ဟုအမည်ပေးထားသော လောင်စာဆီဖြည့် စစ်သင်္ဘောကို အမည်ပြန်မှည့်ရန် ညွှန်ကြားခံရသည်။ ယင်းသင်္ဘောကို လိင်တူချစ်သူ အခွင့်အရေး တက်ကြွလှုပ်ရှားသူနှင့် ရေတပ်အရာရှိဟောင်း Harvey Milk ၏ အမည်ကို ဂုဏ်ပြုမှည့်ခေါ် ထားခြင်းဖြစ်သည်။ ယခုအခါ သမ္မတ Donald Trump ၏ စစ်တပ်အတွင်း မတူကွဲပြားမှု၊ တရားမျှတမှုနှင့် ပါဝင်မှု (DEI) ဆိုင်ရာ ကိုးကားချက် များကို ဖယ်ရှားရန် စီမံချက်၏တစ်စိတ်တစ်ပိုင်းအဖြစ် အဆိုပါ ပြောင်းလဲမှု ကို ဆောင်ရွက်ခြင်းဖြစ်သည်။

ထိုအမည်ပြောင်းလဲမှုကို တရားဝင်အတည်မပြုရသေးသော်လည်း ကာကွယ်ရေးဆိုင်ရာ အရင်းအမြစ်များက Military.com နှင့် အခြား အမေရိကန် မီဒီယာများအား အတွင်းရေးမှတ်တမ်းတစ်ခုတွင် ဖော်ပြ ထားကြောင်း အင်္ဂါနေ့ (ဇွန် ၃) က ပြောကြားခဲ့သည်။

USNS Harvey Milk ကို ၂၀၁၆ ခုနှစ်တွင် ထိုစဉ်က ရေတပ် အတွင်းရေးမှူး Ray Mabus မှ Milk ၏ ရေတပ်တာဝန်ထမ်းဆောင်မှုနှင့် တက်ကြွ လှုပ်ရှားမှုအား ဂုဏ်ပြုသောအားဖြင့် အမည်ပေးခဲ့ပြီး၊ ၂၀၂၁ ခုနှစ်တွင် လိင်ပြောင်းစစ်မှုထမ်းဟောင်းတစ်ဦးမှ အမည်မှည့်ခဲ့သည်။

Milk သည် ၁၉၅၀ ပြည့်လွန်နှစ်များတွင် အမေရိကန် ရေတပ်တွင် တာဝန်ထမ်းဆောင်ခဲ့သော်လည်း ၎င်း၏ လိင်စိတ်တိမ်းညွှတ်မှုကြောင့် ရေတပ်မှ ထုတ်ပယ်ခံခဲ့ရသည်။ ထို့နောက် California ပြည်နယ်တွင် ပထမဆုံးသော လူသိရှင်ကြား လိင်တူချစ်သူ အရာရှိအဖြစ် အမေရိကန် LGBT လှုပ်ရှားမှု၏ သင်္ကေတတစ်ခုဖြစ်လာခဲ့သည်။ San Francisco မြို့တော်ကောင်စီသို့ အရွေးခံပြီး တစ်နှစ်မပြည့်မီ ၁၉၇၈ ခုနှစ်တွင် မြို့တော်မူဝါဒကြောင့် ၎င်းနှင့် အချင်းများခဲ့သော အဖွဲ့ဝင်တစ်ဦး၏ လုပ်ကြံ သတ်ဖြတ်ခြင်းခံခဲ့ရသည်။

Pride Month အတွင်း ချမှတ်လိုက်သော အဆိုပါဆုံးဖြတ်ချက်သည် ဒီမိုကရက်များထံမှ အပြင်းအထန် ဝေဖန်မှုများကို ဖြစ်ပေါ်စေခဲ့သည်။ အမေရိကန်လွှတ်တော်အကြီးအကဲဟောင်း Nancy Pelosi က အဆိုပါ လုပ်ရပ်ကို “အရှက်ရဖွယ်၊ လက်စားချေမှုသဘောဆောင်သော နိုင်ငံသား အခွင့်အရေး ပုဂ္ဂိုလ်များ၏ အမွေအနှစ်များကို ဖျက်ဆီးခြင်း” ဟု ပြင်းပြင်း ထန်ထန် ရှုတ်ချခဲ့သည်။ California ပြည်နယ်အုပ်ချုပ်ရေးမှူး Gavin Newsom ကလည်း အဆိုပါ ဆုံးဖြတ်ချက်ကို “မိမိတို့၏ စစ်မှုထမ်း ဟောင်းများ ကာကွယ်ရန် တိုက်ပွဲဝင်ခဲ့သော တန်ဖိုးများအပေါ် Trump ၏ မထီမဲ့မြင်ပြုမှု၏ လက္ခဏာ” ဟု ဝေဖန်ခဲ့သည်။

Harvey Milk သည် လိင်တူချစ်သူများ၏ အခွင့်အရေးအတွက် သမိုင်းဝင် တိုက်ပွဲဝင်ခဲ့သူဖြစ်ပြီး ၎င်း၏အမည်ဖြင့် သင်္ဘောအမည်ပေးခံရခြင်းသည် LGBT အသိုင်းအဝိုင်း၏ အောင်ပွဲတစ်ခုအဖြစ် မှတ်ယူခံခဲ့ရသည်။ ထရမ့် အစိုးရက DEI အစီအစဉ်များကို “စစ်တပ်အား နိုင်ငံရေးအရ အားနည်း စေသည့် အစီအမံများ” ဟု စွပ်စွဲပယ်ဖျက်လျက်ရှိသည်။ အဆိုပါ အမည် ပြောင်းလဲမှုသည် လိင်တူချစ်သူ စစ်မှုထမ်းဟောင်းများ၏ ဂုဏ်သိက္ခာကို ထိခိုက်စေသည်ဟု LGBT အခွင့်အရေးအဖွဲ့များက စိုးရိမ်ပူပန်လျက် ရှိသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ဒုတိယညွှန်ကြားရေးမှူး၊ နစက-၂

ခရီးသွားဧည့်သည် ၂၀၀ ကျော် လိုက်ပါလာသည့် ပထမဆုံးသော တရုတ်-ဗဟိုအာရှယဉ်ကျေးမှု ခရီးစဉ် ရထားမှာ နှစ်ရက်ကြာ ခရီးနှင်ပြီးနောက် ကာဇက်စတန်နိုင်ငံ အယ်လ်မာတီမြို့သို့ ဆိုက်ရောက်လာ ခဲ့သည်။
ရှီးအန်းမြို့မှ ထွက်ခွာလာသည့် အဆိုပါရထားမှာ မေ ၃၁ ရက်က တရုတ်နိုင်ငံ ရှင်းကျန်းဒေသရှိ ဟော့အယ် ကောစစ် နယ်စပ်စခန်းမှတစ်ဆင့် နယ်စပ်ကိုဖြတ်ကျော်ခဲ့ခြင်းဖြစ်သည်။ အဆိုပါ နိုင်ငံတကာရထား အဆင်ပြေပြေ ထွက်ခွာနိုင်ရေးအတွက် ဘူတာရုံက လက်မှတ်လဲလှယ်ခြင်း၊ အထွက်စစ်ဆေးခြင်းနှင့် ရထား အစိတ်အပိုင်းများ လဲလှယ်ခြင်းတို့ လွယ်ကူချောမွေ့စေရန် ထိထိရောက်ရောက် ဆောင်ရွက်ပေးခဲ့သည်။

ကိုးကား- Xinhua

အီလွန်မတ်၏ Neuralink ကုမ္ပဏီနှင့် ယှဉ်ပြိုင်လာသည့် Paradromics ကုမ္ပဏီ က ဦးနှောက်နှင့်ကွန်ပျူတာချိတ်ဆက် ပေးမည့်ချစ်ပြားကို လူသားဖြင့်ပထမဆုံး အကြိမ်စမ်းသပ်မှုလုပ်ဆောင်လိုက်ပြီဖြစ် ကြောင်း ဇွန်လ ၂ ရက်တွင်ထုတ်ပြန်ထား သည်။

ယင်းစမ်းသပ်မှုကို မီချီဂန်တက္ကသိုလ် ၌မေလ ၁၄ ရက်တွင်လုပ်ဆောင်ခြင်းဖြစ် ကြောင်း၊ စမ်းသပ်မှုကိုခံယူသူအမျိုးသား သည် ဝက်ရူးပြန်ရောဂါဖြင့်အာရုံကြော ရောဂါကုသမှုခံယူနေသူဖြစ်ကြောင်းနှင့်

ချစ်ပြားကိုထိုအမျိုးသား၏ဦးနှောက်ထဲ သို့ထည့်ပြီး မိနစ် ၂၀ အကြာ၌ ပြန်ထုတ် ခဲ့ခြင်းဖြစ်ကြောင်း ထုတ်ပြန်ချက်တွင်ဖော် ပြထားသည်။

ထိုနည်းပညာကို လူနာ၏ဦးနှောက် အတွင်း ဘေးကင်းစွာတပ်ဆင်နိုင်သည့် အပြင် အာရုံကြောလှုပ်ရှားမှုကိုမှတ်တမ်း တင်နိုင်ကြောင်း သက်သေပြနိုင်သည်ဟု ကုမ္ပဏီကပြောသည်။ နောက်တစ်ဆင့် တွင်မူ လူအများအပြားဖြင့်လက်တွေ့စမ်း သပ်မှုလုပ်ဆောင်သွားမည်ဖြစ်ကြောင်း သိရသည်။

Ref: CNBC

Photo - Paradromics

ဖားကန့်မြို့နယ်၊ လုံခင်း ကျေးရွာအုပ်စု၊ မှော်စီစာကျေးရွာတွင် ဇွန်လ ၃ ရက်နေ့၊ နေ့လယ်ပိုင်းက ယမ်းဂိုထောင် ပေါက်ကွဲမှုဖြစ်ပွားသည့်အတွက် ၃ ဦး သေဆုံးကာ အများအပြား ဒဏ်ရာရရခဲ့ကြောင်း ဒေသခံများထံ NP News က ဆက်သွယ်မေးမြန်းထားသော အချက်အလက်များအရ ကနဦး သိရသည်။

အဆိုပါ ဖြစ်စဥ်မှာ နေ့လယ်ပိုင်း ၁ နာရီကျော်အချိန်ခန့်က လုပ်ကွက်ဟောင်းတစ်ခုအတွင်း ဖြစ်ပွားခဲ့ခြင်းဖြစ်ကာ ယမ်းဂိုထောင် ပေါက်ကွဲသည့်အတွက် အသံကို ကျယ်လောင်စွာ ကြားခဲ့ရကြောင်း သိရသည်။

“လူကတော့ ထိခိုက်မှုရှိတယ်။ ကျွန်တော် သိသလောက်ကတော့ သုံးယောက် သေတယ် ဆယ်ယောက်လောက် ဒဏ်ရာရတယ်လို့ သိရပါတယ်။ ဒဏ်ရာရက အဲဒီထက် ပိုများနိုင်တယ်။ အခြေအနေကတော့ မသိရသေးဘူး။ ပေါက်တာက ယမ်းဂိုထောင်ပါ” ဟု ဒေသခံတစ်ဦးက ဆိုသည်။

သေဆုံးသူ သုံးဦး အနက် အမျိုးသား ၂ ဦး နှင့် အမျိုးသမီး ၁ ဦး ပါဝင်ကြောင်း ကနဦးသိရှိရပြီး ပေါက်ကွဲအားမှာ ပြင်းထန်ခဲ့ကာ အခြားပျက်စီးဆုံးရှုံးမှုများလည်း များပြားခဲ့ကြောင်း သိရသည်။ အဆိုပါ ပေါက်ကွဲမှုနှင့်ပတ်သက်၍ နောက်ဆက်တွဲအခြေအနေများအား ဆက်လက် စုံစမ်းမေးမြန်းနေဆဲဖြစ်သည်။

ကိုးကား- NP News

မကွေးတိုင်း၊ မင်းဘူး(စကု)မြို့နယ်အတွင်း မိုးသည်းထန်စွာရွာသွန်းမှုကြောင့် မန်းရွှေစက်တော်ဘုရားကြီး၏ အောက်စက်တော်ရာရင်ပြင်တော်ပေါ်သို့ ယနေ့ ဇွန် ၂ ရက်နံနက်ပိုင်းက မန်းချောင်းရေများတက်လာခဲ့ကြောင်း ဒေသခံများထံမှ သိရသည်။

“ရေကအတော်တက်လာတယ်လို့ပြောရမယ်။ အောက်စက်တော်ရာရင်ပြင်ပေါ်မှာတော့ ရေတွေဝင်နေပြီ။ အခြေအနေကိုစောင့်ကြည့်နေရတဲ့အနေ အထားပါ။ အောက်စက်တော်ရာရဲ့ ခြေတော်ရာဖန်အုပ်ဆောင်းရှေ့မှာလည်းရေတွေဝင်နေတယ်။ မနှစ်ကလည်း သြဂုတ်လထဲမှာ ရေတက်သေးတယ်”ဟု ဒေသခံတစ်ဦးက ပြောသည်။

မန်းရွှေစက်တော်ဘုရား၏ (၂၅၉၁)ကြိမ်မြောက် ဗုဒ္ဓပါဒပူဇနိယဘုရားပွဲတော်အား ပြီးခဲ့သည့် ဖေဖော်ဝါရီ ၂ ရက်မှ ဧပြီ ၁၇ ရက်အထိ(၇၅) ရက်ကြာကျင်းပပြုလုပ်ခဲ့ကြောင်း သိရသည်။

Source: Popular Myanmar

အနာဂတ်ဆီသို့ အတူလက်တွဲလျှောက်လှမ်းမည် မြန်မာ - တရုတ် သံတမန်ဆက်ဆံရေး ထူထောင်ခြင်း (၇၅) နှစ်ပြည့်အထိမ်းအမှတ် နှစ်နိုင်ငံမီဒီယာဆွေးနွေးပွဲ အခမ်းအနားကို ပြန်ကြားရေးဝန်ကြီးဌာန၊ မြန်မာ့အသံနှင့်ရုပ်မြင်သံကြား၊ မီဒီယာဖွံ့ဖြိုးတိုးတက်ရေးဦးစီးဌာနနှင့် China Media Group(CMG)  တို့ပူးပေါင်း၍ ဇွန်လ ၁ ရက်နေ့၊ နံနက်ပိုင်းတွင် နေပြည်တော်ရှိ Park Royal Hotel ၌ ကျင်းပခဲ့ကြောင်း သိရသည်။ 

အခမ်းအနားသို့ ပြန်ကြားရေးဝန်ကြီးဌာန ဒုတိယဝန်ကြီး ဦးရဲတင့်၊ ဌာနဆိုင်ရာတာဝန်ရှိသူများ၊ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံးမှ သံမှူးကြီး Ms. Cao Jing နှင့် တာဝန်ရှိသူများ၊ ပါဝင်ဆွေးနွေးကြမည့် ပုဂ္ဂိုလ်များနှင့် ဖိတ်ကြားထားသူများ တက်ရောက်ခဲ့သည်။

ယင်းနောက် ဒုတိယဝန်ကြီး ဦးရဲတင့်က ယခုနှစ်သည် မြန်မာ-တရုတ် သံတမန်ဆက်ဆံရေး ထူထောင်ခြင်း (၇၅) နှစ်ပြည့် စိန်ရတုကာလဖြစ်သဖြင့် နှစ်နိုင်ငံအတွက် ထူးခြားလေးနက်မှုရှိပါ ကြောင်း၊ ယနေ့ပြုလုပ်သည့် နှစ်နိုင်ငံမီဒီယာဆွေးနွေးပွဲ၏ ရည်ရွယ်ချက်ဖြစ်သော “အနာဂတ်ဆီသို့ အတူလက်တွဲလျှောက်လှမ်းမည်” ဆိုသည့်အတိုင်း နှစ်နိုင်ငံမီဒီယာပိုင်းဆိုင်ရာ ပူးပေါင်းဆောင်ရွက်မှု များမှတစ်ဆင့် နှစ်နိုင်ငံဆွေမျိုးပေါက်ဖော်ချစ်ကြည်ရေးကို ပိုမိုတိုးတက်ခိုင်မြဲအောင် ဆောင်ရွက်သွား နိုင်မည်ဟု ယုံကြည်ပါကြောင်း၊ မကြာမီက မိမိတို့နိုင်ငံတွင် ကြုံတွေ့ခဲ့ရသည့် မန္တလေးငလျင်ကြီးနှင့် ပတ်သက်ပြီး တရုတ်နိုင်ငံမှ မီဒီယာများက ကမ္ဘာအနှံ့သိရှိအောင် အချိန်နှင့်တစ်ပြေးညီ မျှဝေပေးခဲ့ သည့်အတွက် ရှာဖွေကယ်ဆယ်ရေးနှင့် ပြန်လည်ထူထောင်ရေးလုပ်ငန်းများတွင် များစွာအထောက်အပံ့ ဖြစ်ခဲ့ပါကြောင်း၊ မိမိတို့နှစ်နိုင်ငံအကြား မီဒီယာပူးပေါင်းဆောင်ရွက်မှုသည် ဆယ်စုနှစ်များစွာ ကြာမြင့်ခဲ့ပြီး ရင်းနှီးခင်မင်သော ကူးလူးဖလှယ်မှုများ ရှိနေပြီဖြစ်ပါကြောင်း၊ တိုးတက်လာသည့် နည်းပညာများနှင့်အညီ ဖွံ့ဖြိုးတိုးတက်သည့် မီဒီယာကဏ္ဍကို ယခုထက်ပိုမိုပူးပေါင်းဆောင်ရွက်ပြီး နှစ်နိုင်ငံဆက်ဆံမှု ခိုင်မြဲရေး၊ ပြည်သူအချင်းချင်း ချစ်ကြည်ရင်းနှီးမှုမြှင့်တင်ရေးတို့ကို ထိရောက်စွာ ဆောင်ရွက်သွားကြမည်ဖြစ်ပြီး အေးအတူ ပူအမျှအသိုက်အဝန်းပုံသဏ္ဌာန်ဖြင့် ပူးပေါင်းဆောင်ရွက် သွားကြမည်ဖြစ်ပါကြောင်း ပြောကြားခဲ့သည်။

ဆက်လက်၍ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံးမှ သံမှူးကြီး Ms. Cao Jing က မြန်မာနိုင်ငံဆိုင်ရာ တရုတ်သံရုံးအနေဖြင့် မီဒီယာ၏ အခန်းကဏ္ဍကို အလေးထားပါကြောင်း၊ မြန်မာ-တရုတ် မီဒီယာတွေ့ဆုံပွဲကို သုံးလတစ်ကြိမ် ကျင်းပလေ့ရှိပါကြောင်း၊ နှစ်စဉ် မြန်မာမီဒီယာမိတ်‌ဆွေ များကို တရုတ်နိုင်ငံလေ့လာရေးခရီးစဉ်နှင့် မွမ်းမံသင်တန်းများ စီစဉ်ပေးပြီး မြန်မာ့နယ်ပယ်အသီးသီးသို့ စစ်မှန်သည့် တရုတ်နိုင်ငံ၏ ပုံစံကိုပြသလျက်ရှိပါကြောင်း၊ နောက်ပိုင်းတွင်လည်း တရုတ်သံရုံးက နှစ်နိုင်ငံမီဒီယာမိတ်ဆွေများ ကူးလူးဖလှယ် ဆွေးနွေးပွဲများကို ပိုမိုကျင်းပပေးပြီး တရုတ်ယဉ်ကျေးမှု၏ ဝိသေသလက္ခဏာများနှင့် ဆွဲဆောင်မှု၊ တရုတ်ပြည်သူများ၏ ခင်မင်ရင်းနှီးမှုနှင့် ရိုးသားမှုတို့ကို မြန်မာမိတ်ဆွေများ လက်တွေ့ခံစားရစေရန် ကူညီဆောင်ရွက်ပေးမည်ဖြစ်ပါကြောင်း ပြောကြားခဲ့သည်။

ယင်း​နောက် “အရေးပေါ်အခြေအနေများအတွင်း မြန်မာ-တရုတ် မီဒီယာပူးပေါင်းဆောင်ရွက်မှု များသည် တူညီသော အနာဂတ်များရှိသည့် မြန်မာ-တရုတ်အသိုက်အဝန်း၏ အနှစ်သာရအဓိပ္ပာယ်ကို ဖော်ကျူးခြင်း” ခေါင်းစဉ်၊ “ငလျင်အလွန် ပြည်သူ့အကျိုးပြုလုပ်ငန်းများ ပြန်လည်ထူထောင်ရေးနှင့် ဖွံ့ဖြိုးတိုးတက်ရေးဆောင်ရွက်နေမှု သတင်းများရယူရေးအတွက် မီဒီယာပူးပေါင်းဆောင်ရွက်မှု အနာဂတ်အလားအလာ” ခေါင်းစဉ်နှင့် “မြန်မာ-တရုတ်နှစ်နိုင်ငံ သံတမန်ဆက်ဆံရေးထူထောင်ခြင်း (၇၅) နှစ်ပြည့်မြောက်ခြင်းကို အခွင့်အလမ်းအဖြစ် သဘောထား၍ တရုတ်အသွင်ပုံစံခေတ်မီမှုဖြင့် မြန်မာ-တရုတ် ပူးပေါင်းဆောင်ရွက်မှု (သံတမန်ဆက်ဆံရေး၊ မီဒီယာကဏ္ဍ) အတွက် အခွင့်အလမ်း အသစ်များယူဆောင်လာပေးခြင်း” ခေါင်းစဉ်တို့ဖြင့် အပိုင်းသုံးပိုင်းခွဲ၍ မြန်မာ့အသံနှင့်ရုပ်မြင်သံကြား၊ မီဒီယာဖွံ့ဖြိုးတိုးတက်ရေးဦးစီးဌာန၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ မြန်မာနိုင်ငံမဟာဗျူဟာနှင့် နိုင်ငံတကာလေ့လာရေးအဖွဲ့၊ မြန်မာနိုင်ငံသတင်းမီဒီယာကောင်စီ နှင့် China Media Group တို့မှ တာဝန်ရှိသူများက ပါဝင်ဆွေးနွေးခဲ့ကြောင်း သိရသည်။

MOI