အီရန်နိုင်ငံရှိ မြို့အချို့တွင် ခွေးများကို အများသုံးနေရာများတွင် လမ်းလျှောက်ခိုင်းခြင်းနှင့် ယာဉ်များဖြင့် သယ်ဆောင်ခြင်းကို တားမြစ် လိုက်ပြီဖြစ်သည်။ မွတ်စ်လင်မ်အများစုနေထိုင်သော အဆိုပါနိုင်ငံတွင် ခွေးမွေးမြူခြင်းသည် ငြင်းခုန်မှုများရှိနေသော အကြောင်းအရာ တစ်ခု ဖြစ်သည်။

ဇွန်လ ၈ ရက်နေ့တွင် အီရန်မီဒီယာများက နိုင်ငံအလယ်ပိုင်းရှိ အစ္စဖာ ဟန်မြို့၊ တောင်ပိုင်းကာမန်မြို့နှင့် အနောက်ပိုင်း အီလမ်မြို့ အပါအဝင် မြို့ပေါင်း ၁၇ မြို့ခန့်တွင် ခွေးများကို အများသုံးနေရာများတွင် လမ်းလျှောက် ခိုင်းခြင်း သို့မဟုတ် ယာဉ်များဖြင့် သယ်ဆောင်ခြင်းကို တားမြစ် လိုက်ကြောင်း ဖော်ပြခဲ့သည်။ အာဏာပိုင်များက ထိုတားမြစ်ချက်သည် လူမှုအခြေအနေနှင့် ပြည်သူ့ကျန်းမာရေးကို ကာကွယ်ရန် ရည်ရွယ်ကြောင်း ပြောကြားခဲ့သည်။

၂၀၁၉ ခုနှစ်က တီဟီရန်တွင် ထုတ်ပြန်ခဲ့သော တားမြစ်ချက်နှင့် ဆင်တူ သည့် ထိုမူဝါဒအစီအစဉ်တွင် အီလမ်ကဲ့သို့သော မြို့အချို့က ယင်း စည်းကမ်းကို ချိုးဖောက်သူများအား တရားဥပဒေအရ အရေးယူမည်ဟု ကြေညာထားသော်လည်း ပြစ်ဒဏ်နှင့်ပတ်သက်၍ အတိအကျ ဖော်ပြ ထားခြင်း မရှိသေးပါ။

ခွေးမွေးမြူခြင်းနှင့် ခွေးလမ်းလျှောက်ခိုင်းခြင်းသည် အဆိုပါမွတ်စ်လင်မ် နိုင်ငံတွင် ဆယ်စုနှစ်များစွာကတည်းက အငြင်းပွားဖွယ်ရာ အကြောင်း အရာတစ်ခုဖြစ်သော်လည်း ခွေးများကို လုံးဝတားမြစ်ထားခြင်း မရှိသေးပါ။

အီရန်နိုင်ငံရှိ ဘာသာရေးလိုက်စားသူများစွာက ခွေးများကို ပွေ့ဖက်ခြင်း သို့မဟုတ် ခွေးတံတွေးနှင့် ထိတွေ့ခြင်းကို မစင်ကြယ်သော အပြုအမူ အဖြစ် မှတ်ယူကြပြီး အဆိုပါအိမ်မွေးတိရစ္ဆာန်များ မွေးမြူခြင်းကို အနောက်တိုင်းယဉ်ကျေးမှု၏ လွှမ်းမိုးမှုအဖြစ် ရှုမြင်ကြသည်။

၂၀၂၁ ခုနှစ်တွင် အီရန်လွှတ်တော်အမတ် ၇၅ ဦးက ခွေးမွေးမြူခြင်းကို “အီရန်နှင့် မွတ်စ်လင်မ်တို့၏ နေထိုင်မှုပုံစံကို တဖြည်းဖြည်း ပြောင်းလဲ စေနိုင်သော ဘေးအန္တရာယ်ရှိသည့် လူမှုရေးပြဿနာ” အဖြစ် ရှုတ်ချ ခဲ့သည်။

၂၀၁၇ ခုနှစ်က အီရန်ခေါင်းဆောင် Ali Khamenei က “သိုးထိန်းခြင်း၊ အမဲလိုက်ခြင်း သို့မဟုတ် စောင့်ကြပ်ခြင်းကဲ့သို့သော အကြောင်းပြချက် များမှလွဲ၍ ခွေးမွေးခြင်းသည် မနှစ်မြို့ဖွယ်ဖြစ်သည်” ဟု ကြေညာ ခဲ့သည်။ ထို့ပြင် ၎င်းက “မွတ်စ်လင်မ်မဟုတ်သူများ၏ နေထိုင်မှုပုံစံကို အတုယူခြင်း၊ ၎င်းတို့၏ယဉ်ကျေးမှုကို မြှင့်တင်ပေးခြင်း သို့မဟုတ် ပတ်ဝန်းကျင်ရှိသူများအား အနှောင့်အယှက်ဖြစ်စေခြင်းဆိုပါက ခွေးမွေးခြင်း ကို တားမြစ်မည်” ဟု ဖြည့်စွက်ပြောကြားခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ကချင်ပြည်နယ်တွင် ဒေသအတွင်းရှိ လက်နက်ကိုင်များကြောင့် သဘာဝ ဘေးဒဏ်ကို ပိုမိုကြုံလာနေရကြောင်း သဘာဝပတ်ဝန်းကျင် အရေး တက်ကြွလှုပ်ရှားသူများက NP News သို့ ပြောသည်။ ကချင်ဒေသတွင်းရှိ လက်နက်ကိုင်များ၏ ရွှေတူးဖော်မှု၊ မြေရှားသတ္တုတူးဖော်မှု၊ သစ်မှောင်ခို ခုတ်ထွင်မှုများကြောင့် ကချင်ပြည်နယ်ရှိ သစ်တောဧရိယာများ ပျောက်ကွယ် လာနေပြီး မိုးရွာသွန်းသည်နှင့် မိုးကြီးခြင်း၊ အပူချိန်များတိုးလာခြင်း စသော သဘာဝဘေးအန္တရာယ်များကို ပိုမိုကြုံတွေ့လာနေကြရကြောင်း သဘာဝ ပတ်ဝန်းကျင်အရေး တက်ကြွလှုပ်ရှားသူတစ်ဦးကဆိုသည်။

“အဓိကကတော့ သစ်ပင်တွေကို ခုတ်တယ်။ သစ်ပင်ခုတ်လို့ တောင်ကတုံး ဖြစ်သွားရင် မြေရှား သတ္တုထုတ်တယ်။ နောက်ပြီး ရွှေတွေတူးကြ တယ်။ အဲဒီလို လုပ်ကြတော့ မိုးရွာတာနဲ့ တောင်ပေါ်ကရေတွေက သစ်ပင်တွေ မရှိတော့ အရှိန်နဲ့ဆင်းလာမယ်။ တောင်ပေါ်မှာ ရေမစုထားနိုင်တော့ဘူး။ အဲဒီလို ဆင်းလာရင် ရွှေတူးထားတဲ့မြေစာတွေနဲ့ရောပြီး မြစ်ကြောင်းတွေ တိမ်ကောကုန်တယ်။ ဒီတော့ ရေတွေက ပုံမှန်ထက် ပိုတက်လာတယ်။ သေချာတာကတော့ ဒါတွေဟာ အဲဒီဒေသတွေမှာရှိတဲ့ လက်နက်ကိုင်တွေရဲ့ လုပ်ရပ်ကြောင့် ပြည်သူတွေခံနေရတာတွေပဲ” ဟု ၎င်းက ဆိုသည်။

ထိုသို့ သစ်ပင်များပျောက်လာသည်နှင့် အမျှ ယခင်က ယင်းဒေသတွင် တည်ရှိခဲ့သည့် ရာသီဥတုအခြေ အနေများပါ ပြောင်းလဲလာမည်ဖြစ်ပြီး ကချင်ဒေသတွင် ဧရာဝတီမြစ်ဖျားစတည်ရာ မေခနှင့် မလိခမြစ်တို့တည်ရှိနေသည့်အတွက် ရေရှည်တွင် ဧရာဝတီမြစ်ကိုပါ ထိခိုက်လာနိုင်ကြောင်း သဘာဝပတ်ဝန်းကျင် အရေးလေ့လာ စောင့်ကြည့်နေသူ တစ်ဦးက ဆိုသည်။

“ပထမက သစ်တော၊ သစ်ပင်တွေကို ခုတ်တယ်။ အဲဒီတော့ မိုးရာသီ ရောက်တာနဲ့ ရေတွေက အရှိန်ပြင်းပြင်းနဲ့ နုန်းတွေကို မြစ်ကြောင်း တစ်လျှောက်သယ်လာတယ်။ တကယ်လို့အပင်တွေသာ ရှိနေရင် နုန်း ပါဝင်မှုကို လျော့ကျစေနိုင်တယ်။ ဒီထက်ဆိုးတာက မြေရှားကိစ္စ။ မြေရှား သတ္တုထုတ်ဖို့ ဓာတုပစ္စည်းတွေ သုံးရတယ်။ အဲဒီကထွက်တဲ့ စွန့်ပစ်ရေ တွေက မြစ်ကြောင်းတစ်လျှောက်သာ ပါလာခဲ့ရင် အဲဒီမြစ်ရေက သောက်သုံး လို့မရတော့တဲ့အထိဖြစ်မှာပဲ” ဟု ၎င်းက ဆိုသည်။ 

အိန္ဒိယအရှေ့မြောက်ဘက်သို့ ဝင်ရောက်သွားသည့် မုန်တိုင်းငယ်၏ အကြွင်းအကျန် တိမ်တိုက်များမှာ မြန်မာနိုင်ငံဘက်သို့ရောက်ရှိလာခဲ့ သည့်အတွက် မေလ (၃၀) ရက်ခန့် မှစတင်ကာ ကချင်ပြည်နယ်ရှိ ချီဖွေ၊ မြစ်ကြီးနားနှင့် ဝိုင်းမော်ဒေသတို့တွင် ရေကြီးရေလျှံမှုများဖြစ်ပွားခဲ့ပြီး လူထောင်နှင့်ချီကာ ရေဘေးသင့်ခဲ့ကြရသည်။

ကိုးကား- NP News

လျှပ်စစ်စွမ်းအင်သုံးယာဉ် (EV) များဆိုတာ ယနေ့အချိန်အခါမှာ လူစိတ်ဝင်စားမှု မြင့်တက်နေတဲ့ ယာဉ်အမျိုးအစားတစ်မျိုးဖြစ်လာနေတာကို တွေ့ရပါတယ်။ စိတ်ဝင်စားမှုမြင့်တက်ရတဲ့ အကြောင်းရင်းက နည်းပညာမြင့်မား မှုကို ရရှိခံစားနိုင်မယ်။ လျှပ်စစ်စွမ်းအင်ကို အသုံးပြုထားတဲ့အတွက် ကာဗွန်ထုတ်လွှတ်မှုကို လျှော့ချနိုင်မယ် အစရှိတဲ့ ကောင်းကျိုးများကြောင့်ဖြစ်ပါတယ်။

ဒါပေမဲ့လည်း တစ်ဖက်ကနေပြန်ကြည့်ပြန်တော့ EV များအပေါ် လူစိတ်ဝင်စားမှုက လျော့ကျနေပြန်ပါသေးတယ်။ ဆိုလိုတာက လူစိတ်ဝင်စားမှုကို ထင်သ လောက်မရရှိသေးဘူးလို့ ပြောချင်တာပါ။ ဘာကြောင့်လဲဆိုရင် EV တွေရဲ့ဘက်ထရီ စွမ်းဆောင်ရည်ဟာ လက်ရှိအသုံးပြုနေတဲ့ လောင်စာဆီသုံးကားတွေ လောက်အထိ အသုံးမတည့်တဲ့ အတွက်ဖြစ်ပါတယ်။ ဥပမာအားဖြင့် လောင်စာဆီသုံးကားတစ်စီးက ဆီ အပြည့်ဖြည့်ထားရင် ကီလိုမီတာ ၆၀၀ သွားနိုင်သလို EV ကားတစ်စီးက အားအပြည့်ဖြည့်ထားရင် ကီလိုမီ တာ ၆၀၀ သွားနိုင်ပေမယ့် အားပြန်သွင်းချိန်မှာကျ တော့ လောင်စာဆီသုံး ကားတွေဆီဖြည့်သလို သုံးမိနစ်အတွင်းနဲ့ အားအပြည့်မရနိုင်ပါဘူး။

အခုတော့ VarEVolt ဆိုတဲ့ဘက်ထရီက အဲဒီကွာ ခြားချက်ကို ဖြည့်ဆည်းပေးမယ့် ဘက်ထရီဖြစ်လာပါပြီ။ သူ့ကို ဗြိတိန်နိုင်ငံအခြေစိုက် RML ကုမ္ပဏီက ဖန်တီးထားတာဖြစ်ပါတယ်။ အခုဆိုရင် အဲဒီဘက်ထရီတွေကို ပမာဏအများအပြား ထုတ်လုပ်ဖို့နဲ့လက်တွေ့ အသုံးပြုဖို့အတွက် အသင့်ဖြစ်နေပြီလို့ ကုမ္ပဏီ ကပြောထားပါတယ်။

VarEVolt ဘက်ထရီက လက်ရှိအချိန်အထိကမ္ဘာပေါ်မှာ သိပ်သည်းဆအများဆုံး ဘက်ထရီဖြစ်သလို အလေးချိန် ၁ ကီလိုဂရမ်ကို လျှပ်စစ်စွမ်းအင် ၆ ကီလို ဝပ်အထိ ထုတ်ပေးနိုင်တာကြောင့် EV တစ်စီးကဘယ် အချိန်မဆို တောင်းဆိုလာနိုင်တဲ့ စွမ်းအင်ပမာဏကို ထုတ်ပေးနိုင်စွမ်းရှိပါတယ်။

အဲဒီဘက်ထရီက စွမ်းအင်သိုလှောင်နိုင်မှုပမာဏ များပြားပေမယ့် သူ့ကိုအားသွင်းရမယ့် ကြာမြင့်ချိန်ကတော့ သိုလှောင်နိုင်မယ့် စွမ်းအင်ပမာဏနဲ့ မလိုက်အောင်ကိုပဲ အလွန်မြန်ဆန်လှပါတယ်။ ဘယ်လောက် ထိအောင်လည်းဆိုရင် ကမ္ဘာပေါ်မှာ အဆင့်အမြင့်ဆုံး ကားတစ်မျိုးဖြစ်တဲ့ Porsche Taycan လိုကားမျိုးက ဘက်ထရီအား အပြည့်သွင်းဖို့ ၁၂ မိနစ်ကြာမြင့်ချိန်မှာ VarEVolt ကတော့ ၁၈ စက္ကန့်ပဲကြာမယ်လို့ ဆိုထားပါတယ်။

ဒီလိုစွမ်းဆောင်ရည်မြင့်မားတဲ့ ဘက်ထရီကိုထုတ် လုပ်ရခြင်းရဲ့ နောက်ကွယ်က အကြောင်းရင်းက သိပ်မထူးဆန်းပါဘူး။ RML ကုမ္ပဏီအနေနဲ့ သူတို့အတွက် လိုအပ်တဲ့ ဘက်ထရီအမျိုးအစားကို တခြားကုမ္ပဏီတွေက မထုတ်ပေးနိုင်တဲ့အတွက် သူတို့ကိုယ်တိုင် တီထွင်ထုတ်လုပ်လိုက်ခြင်းပဲ ဖြစ်ပါတယ်။

MWD Web Portal

မြောက်ကိုရီးယားသည် ရေချစဉ် မတော်တစ်ဆမှုကြောင့် ပျက်စီးခဲ့သော စစ်သင်္ဘာအသစ်တစ်စီးကို ရုရှားနယ်စပ်အနီးရှိ ဆိပ်ကမ်းသို့ ရွှေ့ပြောင်း  ခဲ့ပြီး ယင်းလုပ်ဆောင်ချက်သည် မော်စကိုမှ သင်္ဘောပြင်ဆင်ရေးတွင် ပါဝင်နိုင်ကြောင်း ဆန်းစစ်သူများက သုံးသပ်ထားသည်။ Maxar Technologies မှ တနင်္ဂနွေနေ့ (ဇွန် ၈) က ရိုက်ကူးထားသော ဂြိုလ်တုဓာတ်ပုံများအရ တန်ချိန် ၅၀၀၀ ရှိသည့် အမည်မသတ်မှတ်ရသေးသော အဆိုပါ ဖျက် သင်္ဘောကို ရုရှားနှင့် နယ်နိမိတ်ထိစပ်နေသော မြောက်ကိုရီးယား၏ Rason အထူးစီးပွားရေးဇုန်အတွင်းရှိ Rajin ဆိပ်ကမ်းရှိ သင်္ဘောကျင်း တွင် တွေ့ရှိရသည်။

ကိုရီးယားကာကွယ်ရေးဆိုင်ရာ လေ့လာသုံးသပ်ရေးအင်စတီကျုတွင် ပြင်ပပူးပေါင်းဆောင်ရွက်ရေးဒါရိုက်တာနှင့် အကြီးတန်းသုတေသီ Yu Jihoon က အဆိုပါသင်္ဘောကျင်းသည် Chongjin မြို့ရှိ သင်္ဘောကျင်း ကဲ့သို့ ကြီးမားသော သင်္ဘောတည်ဆောက်ရေးစင်တာ မဟုတ်သော်လည်းအသေးစား ပြုပြင်ထိန်းသိမ်းမှုများအတွက် လုပ်ဆောင်ရာ သင်္ဘောကျင်း ဖြစ်ကြောင်း ပြောကြားခဲ့သည်။

ထို့အပြင် ၎င်းသည် ရုရှားနှင့် နီးကပ်စွာတည်ရှိပြီး “မြောက်ကိုရီးယား၏ မော်စကိုနှင့် စီးပွားရေးနှင့် စစ်ရေးပူးပေါင်းဆောင်ရွက်မှုများ နက်ရှိုင်း စေရန် အားထုတ်မှုများအတွက် အဓိကအချက်တစ်ခု” ဖြစ်သည်ဟု Yu က ဆိုသည်။

အမေရိကန်စစ်တက္ကသိုလ် West Point မှ Modern War Institute ၏ ၂၀၂၄ အစီရင်ခံစာတွင် Rason စီးပွားရေးဇုန်ကို မြောက်ကိုရီးယား-ရုရှား ပူးပေါင်းဆောင်ရွက်မှု၏ အရေးပါသောနေရာတစ်ခုဖြစ်ပြီး ယူကရိန်း တွင် အသုံးပြုရန် မြောက်ကိုရီးယားမှ ရုရှားသို့ လက်နက်တင်ပို့မှုများနှင့် ဆက်စပ်နေသည်ဟု ဖော်ပြထားသည်။

ယင်းဖျက်သင်္ဘောသည် မေလ ၂၁ ရက်နေ့က စတင်ရေချစဉ် ပျက်စီး ခဲ့ပြီး သင်္ဘော၏နောက်ပိုင်းသည် ရေထဲသို့ နစ်မြုပ်သွားသော်လည်း ရှေ့ပိုင်းသည် ကုန်းပေါ်တွင် ကျန်နေခဲ့ပြီးနောက် ဘေးစောင်း ဖြစ်သွား ခဲ့သည်။ ရေချပွဲတွင် တက်ရောက်ခဲ့သော မြောက်ကိုရီးယား ခေါင်းဆောင် Kim Jong Un က ဇွန်လကုန်တွင် ကျင်းပမည့် Workers' Party အစည်းအဝေးမတိုင်မီ အဆိုပါဖျက်သင်္ဘောကို ပြင်ဆင်ရန် အမိန့်ပေး ခဲ့ပြီး ၎င်းကို အမျိုးသားဂုဏ်သိက္ခာတစ်ရပ်အဖြစ် ရည်ညွှန်းခဲ့သည်။ မြောက်ကိုရီးယားနိုင်ငံပိုင်မီဒီယာများက Rajin ရှိ သင်္ဘောကျင်းတွင် ပြုပြင်မှုများ ၇ ရက်မှ ၁၀ ရက်အတွင်း ပြီးစီးမည်ဖြစ်ကြောင်း လွန်ခဲ့သည့် သီတင်းပတ်က ဖော်ပြခဲ့ပြီး Kim ၏ သတ်မှတ်ချိန်ကာလနှင့် ညီညွတ်မှု ရှိကြောင်း ဖော်ပြခဲ့သည်။

တောင်ကိုရီးယား အငြိမ်းစားရေတပ် ဗိုလ်ချုပ်ကြီး Kim Duk-ki က CNN သို့ ပြုပြင်ရန်အချိန်သည် သင်္ဘော၏ပျက်စီးမှုအပေါ် မူတည်ကြောင်း ပြောကြားခဲ့သည်။၎င်းက သင်္ဘော၏ ရှေ့ပိုင်းတွင် တပ်ဆင်ထားသော sonar နှင့် ရေစူးတိုင်းထွာရေးစနစ်များ ပျက်စီးနိုင်ကြောင်း ဖော်ပြခဲ့သည်။ မြောက်ကိုရီးယားသည် sonar စနစ်များအတွက် နည်းပညာ အားနည်းသည် ဟု ယူဆရပြီး ၎င်းတို့အား တရုတ် သို့မဟုတ် ရုရှားမှ တင်သွင်းခဲ့ဖွယ် ရှိကြောင်း Kim က ဆိုသည်။

Multilateral Sanctions Monitoring Team ၏ အဆိုအရ မြောက် ကိုရီးယားသည် ပြီးခဲ့သည့် တစ်နှစ်အတွင်း ဒုံးကျည်များ၊ ဒုံးပျံများ အပါအဝင် လက်နက်ခဲယမ်းများစွာကို ရုရှားသို့ ပို့ဆောင်ခဲ့သည်ဟု ယူဆ ရသည်။ အပြန်အလှန်အားဖြင့် ရုရှားသည် မြောက်ကိုရီးယားအားလေကြောင်းရန်ကာကွယ်ရေးပစ္စည်းများ၊ မြေပြင်မှဝေဟင်ပစ် ကာကွယ်ရေး ဒုံးကျည်များ၊ အီလက်ထရွန်နစ်စစ်ဆင်ရေးစနစ်များနှင့် ချက်လုပ်ပြီး ရေနံထွက်ပစ္စည်းများကို ထောက်ပံ့ပေးခဲ့သည်ဟု စောင့်ကြည့်အဖွဲ့က ပြီးခဲ့သည့်လက ဖော်ပြခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

B-2 Spirit အမျိုးအစား အမေရိကန် မဟာဗျူဟာမြောက် ကိုယ်ပျောက်ဗုံးကြဲလေယာဉ် တစ်စင်းသည် စစ်သင်္ဘောကြီးများကို တိုက်ခိုက်ဖျက်ဆီးရန် ထုတ်လုပ်ထားသော Quicksink ဗုံးစနစ်သစ်ကို စမ်းသပ်ခဲ့ကြောင်း Newsweek မဂ္ဂဇင်းက   အမေရိကန်လေတပ်၏ ပြောကြားချက်ကို ကိုးကား၍ ဇွန်လ ၅ ရက်တွင် ဖော်ပြခဲ့သည်။

အဆိုပါ အမေရိကန်ကိုယ်ပျောက် ဗုံးကြဲလေယာဉ်သည် ပစိဖိတ်သမုဒ္ဒရာအတွင်း တရုတ် ရေတပ်မတော်က စစ်ရေးတည်ဆောက်မှု မြင့်တက်လာချိန်တွင် ၎င်းဗုံးစနစ်သစ်ကို စမ်းသပ်ခဲ့ခြင်းဖြစ်သည်။ စစ်သင်္ဘောနစ်မြုပ်ရန်   ဒီဇိုင်းထုတ်ထားသည့် “တော်လှန်သော” လက်နက်ကို စမ်းသပ်ခဲ့သည်။

ယခုတစ်ကြိမ်စမ်းသပ်ခဲ့သည့် ဗုံးစနစ်အသစ်မှာ အလေးချိန် ပေါင် ၅၀၀ ရှိ ဝေဟင်သုံးဗုံး အမျိုးအစားဖြစ်သည်။

လက်ရှိ တရုတ်ရေတပ်မတော်တွင် စစ်ရေယာဉ်နှင့် ရေငုပ်သင်္ဘော အစင်းရေ ၃၇၀ ခန့်ရှိပြီး အမေရိကန် ရေတပ်မတော်ထက် အရေအတွက်အားဖြင့် သာလွန်နေသည်ဟု Newsweek မဂ္ဂဇင်းက ဆက်လက်ဖော်ပြသည်။

အမေရိကန်ပြည်ထောင်စုသည် ယခုနှစ် မေလ ၂၁ ရက်တွင်လည်း စမ်းသပ်ရန် စီစဉ်ထားသည့် Minuteman III တိုက်ချင်းပစ်ဒုံးကျည် (ICBM)တစ်စင်းကို ပစ်လွှတ်ခဲ့သည်။ ၎င်းဒုံးကျည်၏ ထိပ်ဖူးသည် မိုင်ပေါင်း ၄၂ဝဝ ခန့်အထိ ရောက်ရှိနိုင်သည်။  

MWD Web Portal

တရုတ်နိုင်ငံသည်   ၎င်းတို့၏ ပြည်တွင်းဖြစ် ဘက်စုံသုံး တိုက်လေယာဉ်တစ်စင်းဖြစ်သည့် J-10 တိုက်လေယာဉ်များအား အင်ဒိုနီးရှားသို့ တင်ပို့ရန် ကမ်းလှမ်းခဲ့ကြောင်း Bloomberg  က ဇွန်လ ၅ ရက်တွင်ဖော်ပြသည်။

အင်ဒိုနီးရှားအစိုးရသည် အဆိုပါ J-10 တိုက်လေယာဉ်များအား လက်ရှိနိုင်ငံအတွင်း အသုံးပြုနေသည့် လက်နက်စနစ်များနှင့် ပေါင်းစပ်နိုင်မှုရှိ၊ မရှိနှင့် အခြားစစ်ဆင်မှုဆိုင်ရာ လိုအပ်ချက်များကို အကဲဖြတ်လျက်ရှိကြောင်း အင်ဒိုနီးရှား ဒုတိယကာကွယ်ရေးဝန်ကြီး ဒွန်နီအာမာဝန်တာဝူဖန်တိုက ပြောသည်။

တိုက်လေယာဉ်များ တင်ပို့မည့်ကမ်းလှမ်းချက်ကို အင်ဒိုနီးရှား လေတပ်မတော်မှ ကိုယ်စားလှယ်များက တရုတ်နိုင်ငံသို့  အလည်အပတ် လာရောက်စဉ် တရုတ်အစိုးရက အဆိုပြုခဲ့ခြင်းဖြစ်သည်။

သို့သော်  လက်ရှိအချိန်တွင် အဆိုပါကမ်းလှမ်းချက်သည်  ဒွန်နီအာမာဝန်တာဝူဖန်တို ပြောကြားသည့်အတိုင်း  အကြံပြုချက်တစ်ခုအဖြစ်သာ ရှိနေသေးသည်။ အကြောင်းမှာ J-10 တိုက်လေယာဉ်များ၏ နည်းပညာပိုင်းကို အကဲဖြတ်ရန် အင်ဒိုနီးရှားအစိုးရက ၎င်းတို့၏ ကိုယ်စားလှယ်အဖွဲ့အား  တရုတ်နိုင်ငံသို့ စေလွှတ်ထားခြင်း မရှိသေးသောကြောင့် ဖြစ်သည်။

သို့သော်လည်း အင်ဒိုနီးရှားအစိုးရသည် တရုတ်နိုင်ငံလုပ်  အဆိုပါ J-10 တိုက်လေယာဉ်များအား ဝယ်ယူရန် စဉ်းစားလျက်ရှိကြောင်း  Bloomberg က  ဆက်လက် ဖော်ပြထားသည်။

MWD Web Portal

မြောက်ကိုရီးယားသည် ရေချချိန်တွင် မတော်တဆမှုဖြစ်ပွားခဲ့သော တန် ၅၀၀၀ ရှိ စစ်သင်္ဘောကို ဆယ်တင်ရန် ခေတ်မီစက်ကိရိယာများမရှိဘဲ လူအားကို အဓိကအသုံးပြုပြီး အခြေခံနည်းစနစ်များဖြင့် ကြိုးပမ်းခဲ့သည်။

မေလ ၂၁ ရက်နေ့တွင် Chongjin ဆိပ်ကမ်းမြို့ရှိ သင်္ဘောကျင်းတစ်ခုတွင် မြောက်ကိုရီးယားသမိုင်းတစ်လျှောက် အကြီးဆုံးနှင့် ခေတ်အမီဆုံးဖြစ်သည့် Choe Hyon-class စစ်သင်္ဘာအသစ်တစ်စင်းသည် ရေချချိန်တွင် လဲကျသွားခဲ့သည်။ ၎င်းမှာ နိုင်ငံ၏ ရေတပ်ခေတ်မီဖွံ့ဖြိုးရေးအားထုတ်မှုများအတွက် ထိခိုက်မှုတစ်ရပ်အဖြစ် မြင်တွေ့ရပြီး ခေါင်းဆောင် ကင်ဂျုံအွန်က ဇွန်လမတိုင်မီ မည်သည့်နည်းနှင့်မဆို သင်္ဘောကို ဆယ်တင်ရန် အမိန့်ပေးခဲ့သည်။

သင်္ဘောကို ပြန်လည်ရေချနိုင်ရန် အင်ဂျင်နီယာများသည် ကင်ဂျုံအွန်၏ ရှားပါးစွာ ထုတ်ဖော်ပြောဆိုလေ့မရှိသော အမျက်ထွက်မှုကြောင့် ဖိအားများအောက်တွင် လုပ်ဆောင်ခဲ့ကြရသည်။ ၎င်းမှာ ကြီးမားသော စိန်ခေါ်မှု တစ်ရပ်ဖြစ်ပြီး တန်ချိန် ၅၀၀၀ ရှိသော သင်္ဘောသည် ကုန်းပေါ်တွင် တစ်ဝက်နှင့် ရေအောက် တစ်ဝက် အနေအထားကြောင့် ကယ်ဆယ်ရေး လုပ်ငန်းသည် ရေထဲတွင် လုံးဝ နစ်မြုပ်သွားသည်ထက် ပိုမို ရှုပ်ထွေး နေသည်။ 

သင်္ဘောကို မြှောက်ရန် ခေတ်မီစက်ပစ္စည်းများ မရှိသည့်အတွက် မြောက်ကိုရီးယား အင်ဂျင်နီယာများသည် ရိုးရှင်းသော်လည်းထိရောက်သည့် နည်းလမ်းကို ရွေးချယ်ခဲ့ကြသည်။ ၎င်းတို့သည် ကြီးမားသော လေပူဖောင်းများကို အသုံးပြုကာ ကယ်ဆယ်ရေးလုပ်ငန်း တွင် ကူညီရန် အလုပ်သမား ရာနှင့်ချီ၍ စုစည်းခဲ့ကြောင်း ဆန်းစစ် လေ့လာသူများနှင့် ဂြိုလ်တုဓာတ်ပုံများက ဖော်ပြသည်။

ဖြစ်စဉ်ပြီးနောက် နှစ်ပတ်အကြာ ဇွန်လ ၅ ရက်နေ့တွင် ဂြိုလ်တုဓာတ်ပုံ များအရ မြောက်ကိုရီးယား၏ အရှေ့မြောက်ကမ်းရိုးတန်းရှိ Chongjin ဆိပ်ကမ်းတွင် ပေ ၄၇၀ (၁၄၃ မီတာ) ရှည်လျားသော ဖျက်သင်္ဘောသည် ပြန်လည်ထောင်မတ်နေသည်ကို တွေ့ရပြီး ၎င်းသည် ရေချပလက်ဖောင်းမှ ပေ ၆၀၀ (၁၈၃ မီတာ) အကွာတွင် အပြည့်အဝ ဆယ်တင်နိုင်ပြီး ဖြစ်သည်ကို တွေ့ရှိရသည်။

ကိုးကား- VN Express

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အိန္ဒိယဝန်ကြီးချုပ် မိုဒီသည် သောကြာနေ့ (ဇွန် ၆) တွင် ဂျမူးနှင့် ကက်ရှ်မီးယား ပြည်နယ်တစ်ခုလုံးကို အိန္ဒိယနိုင်ငံ၏ အခြားဒေသများနှင့် ဆက်သွယ်ပေးမည့် ရထားလမ်းစီမံကိန်း၏ အစိတ်အပိုင်းဖြစ်သော တံတားနှစ်စင်းကို ဖွင့်လှစ်ခဲ့သည်။ ပါဟယ်ဂမ်တွင် ခရီးသွားများအပေါ် လုပ်ကြံမှုဖြစ်ပွားပြီးနောက် နယူးဒေလီနှင့် အစ္စလာမာဘက်က သံတမန်နှင့် စစ်ရေးတင်းမာမှုများ ဖြစ်ပွားခဲ့ပြီးသည့်နောက် မိုဒီ၏ ကက်ရှ်မီးယား သို့ ပထမဆုံးအကြိမ် ခရီးစဉ်ဖြစ်သည်။ 

သောကြာနေ့က မိုဒီ၏ မိန့်ခွန်းတွင် ကက်ရှ်မီးယား၏ အခြေခံအဆောက်အအုံဖွံ့ဖြိုးရေး၏ အရေးပါမှုကို ထည့်သွင်းပြောကြားခဲ့သည်။ ထိုဒေသသည် ဆယ်စုနှစ်များစွာကတည်းက အိန္ဒိယနှင့် ပါကစ္စတန်တို့အကြား အငြင်းပွားစရာ နယ်မြေဖြစ်ခဲ့သည်။ 

ဝန်ကြီးချုပ်မိုဒီသည် ချီနပ်တံတား (အိန္ဒိယအစိုးရက ကမ္ဘာ့အမြင့်ဆုံး ရထားတံတားအဖြစ် သတ်မှတ်ထား) နှင့် အန်ဂျီတံတား (အိန္ဒိယ၏ ပထမဆုံး ကြိုးဆိုင်းရထားတံတား) တို့ကို ဖွင့်လှစ်ပေးခဲ့သည်။ အဆိုပါ တံတားနှစ်စင်းသည် ဥဒမ်ပူ-သရီနာဂါ-ဘာရာမုလာ ရထားလမ်း (၂၇၂ ကီလိုမီတာရှည်လျားသော ရထားလမ်းဆက်သွယ်ရေး) ၏ အစိတ်အပိုင်းများဖြစ်ပြီး မိုဒီက ဂျမူး-ကက်ရှ်မီးယား၏ အင်အားသစ်နှင့် အိန္ဒိယ၏ တိုးတက်လာသော စွမ်းရည်များအတွက် သက်သေတစ်ရပ်ဟု ချီးကျူးခဲ့သည်။ 

ချီနပ်တံတားသည် အမည်တူမြစ်ပေါ်တွင် တည်ဆောက်ထားပြီး မြစ်ကြမ်းပြင်အထက် ၃၅၉ မီတာ (အီဖယ်တာဝါထက် ၃၅ မီတာပိုမြင့်) အထိ မြင့်မားသည်။ တရားဝင်ထုတ်ပြန်ချက်အရ အဆိုပါတံတားကို ခန့်မှန်း ဘတ်ဂျက် အမေရိကန်ဒေါ်လာ ၁၇၃ သန်းဖြင့် တည်ဆောက်ခဲ့သည်။ အန်ဂျီတံတားမှာ ဟိမဝန္တာ၏ ခက်ခဲသောမြေမျက်နှာသွင်ပြင်တွင် တည်ဆောက်ထားသည့် ကြိုးဆိုင်းရထားတံတားဖြစ်ပြီး ၃၃၁ မီတာမြင့်ကာ အထူး ခိုင်မာသော ကြိုး ၉၆ ချောင်းဖြင့် ထိန်းထားသည်။ အဆိုပါတံတားတွင် အသုံးပြုထားသော ကြိုးများ၏ စုစုပေါင်းအရှည်မှာ ၆၅၃ ကီလိုမီတာ ရှိသည်ဟု ထုတ်ပြန်ချက်တွင် ဖော်ပြထားသည်။

ဝန်ကြီးချုပ် မိုဒီက ဂျမူး၏မြို့တော် သရီနာဂါနှင့် ကတ်ရာမြို့ (အိန္ဒိယ၏ အထင်ရှားဆုံးဟိန္ဒူဘုရားဖူးစခန်းဖြစ်သော ဗေ့ရှ်နိုဒေဝီဘုရားကျောင်း တည်ရှိရာဒေသ) ကြား ရထားလမ်းသစ်များ ပြေးဆွဲမည်ဟု ကြေညာခဲ့သည်။ ဤသည်မှာ ကက်ရှ်မီးယားကို ရထားလမ်းဖြင့် အိန္ဒိယနိုင်ငံ၏ အခြားအစိတ်အပိုင်းများနှင့် ဆက်သွယ်ရန် နှစ် ၄၀ ကျော်ကြာ အကောင် အထည်ဖော်ခဲ့သော စီမံကိန်း၏ ပြီးဆုံးမှုကို သရုပ်ဖော်နေသည်။ ရထား လမ်းအာဏာပိုင်များက အဆိုပါလမ်းကြောင်းပေါ်တွင် လွန်ခဲ့သည့် ဒီဇင်ဘာလက စမ်းသပ်မောင်းနှင်မှုများ ပြုလုပ်ခဲ့ကြောင်း သိရသည်။ 

ဟိမဝန္တာတောင်တန်း၏ ကြမ်းတမ်းခက်ခဲသော ဒေသကို ဖြတ်သန်းတည်ဆောက်ထားသည့် ဥဒမ်ပူ-သရီနာဂါ-ဘာရာမုလာ ရထားလမ်းကို အမေရိကန်ဒေါ်လာ ၅ ဘီလီယံနီးပါး ကုန်ကျငွေဖြင့် တည်ဆောက်ခဲ့သည်။ ထိုစီမံကိန်းတွင် ၁၁၉ ကီလိုမီတာရှည်လျားသော ဥမင် လိုဏ်ခေါင်း ၃၆ ခုနှင့် တောင်ကြားများ၊ တောင်တန်းလမ်းများကို ဖြတ်သန်း နိုင်ရန် တံတား ၉၄၃ စင်း ပါဝင်သည်။

ယခင်က ထိုဒေသသို့ သွားရောက်ရန် အန္တရာယ်များသော ကားလမ်းများသာ အဓိကအသုံးပြုခဲ့ရပြီး လေကြောင်းခရီးသည်သာ ရွေးချယ်စရာတစ်ခုအဖြစ် ရှိခဲ့သည်။ နယူးဒေလီအစိုးရက အဆိုပါ ရထားလမ်းဖွင့်လှစ်မှုသည် “ဂျမူးနှင့်ကက်ရှ်မီးယားအတွက် သယ်ယူပို့ဆောင်ရေး၊ ကုန်သွယ်ရေးနှင့် ခရီးသွားလုပ်ငန်းဆိုင်ရာ အခန်းသစ်တစ်ရပ် စတင်ခြင်း” ဟု မှတ်တမ်းတင်ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ကနေဒါနိုင်ငံသားများအနက် အာကာသအတွင်းသို့ ပထမဆုံး သွားရောက်ခဲ့သည့် မာ့ခ်ဂါနူးသည် ၇၆ နှစ် အရွယ်တွင် ကွယ်လွန်သွားပြီဖြစ်ကြောင်း သိရသည်။

ဂါနူးသည် ၁၉၈၄ ခုနှစ်တွင် နာဆာမှစီစဉ်သည့် အာကာသ မစ်ရှင်တွင်ပါဝင်ခဲ့ပြီးနောက်ကနေဒါနိုင်ငံသားများအနက်အာကာသသို့ ပထမဆုံးသွားရောက်ခဲ့သူဖြစ်လာသည်။ ၎င်းသည် ဇွန်လ ၄ ရက်တွင် မိသားစုဝင်များနှင့်အတူရှိနေစဉ် သေဆုံးသွားခြင်းဖြစ်သည်။

ဂါနူးသည် ၂၀၀၁ ခုနှစ်မှ ၂၀၀၆ ခုနှစ်အထိ ကနေဒါအာကာသ အေဂျင်စီ၏ အကြီးအကဲအဖြစ် တာဝန်ထမ်းဆောင်ခဲ့ပြီး ၂၀၂၁ ခုနှစ်တွင် နိုင်ငံခြားရေးဝန်ကြီးအဖြစ် ခေတ္တထမ်းဆောင်ခဲ့သူဖြစ် ကြောင်းသိရသည်။

Ref: Ivz

MWD Web Portal

Photo - The New York Times

ဂျာမနီနိုင်ငံမှ အီတလီနိုင်ငံသို့ပျံသန်းလာသည့် ခရီးသည်တင် လေယာဉ်တစ်စင်းသည် ပျံသန်းနေစဉ် လေထန်ပြီး လှုပ်ယမ်းသွား ခဲ့ခြင်းကြောင့် လေယာဉ်ပေါ်တွင် လိုက်ပါလာသည့် ခရီးသည် ကိုးဦး ဒဏ်ရာရရှိသွားကြောင်း ဂျာမနီသတင်းစာကြီးတစ်စောင်ဖြစ်သည့် Die Zeit က ဇွန်လ ၅ ရက်တွင် ဖော်ပြသည်။

ဘာလင်မြို့မှ အီတလီနိုင်ငံ မီလန်မြို့သို့ ပျံသန်းလာသည့် အဆိုပါ လေယာဉ်ပေါ်တွင် ခရီးသည် ၁၈၅ ဦးလိုက်ပါလာခဲ့ပြီး ဒဏ်ရာရရှိသူ များတွင် လေယာဉ်အမှုထမ်း ရှစ်ဦးနှင့် ခရီးသည်တစ်ဦး ပါဝင်ကြောင်း သိရသည်။

ဒဏ်ရာရရှိသူများအနက် သုံးဦးကို တာဝန်ရှိသူများက ဆေးရုံသို့ ပို့ဆောင်ပေးခဲ့ကြောင်း သိရသည်။

Ref: Ivz