လာမည့် ဖေဖော်ဝါရီ ၂၄ ရက်(တနင်္လာနေ့)တွင် ယူကရိန်းစစ်ပွဲ အဆုံးသတ်နိုင်ရေး အရေးပါသည့် သဘောတူညီချက် အစီအစဉ်မူကြမ်းကို အမေရိကန်နိုင်ငံက ကုလသမဂ္ဂအထွေထွေညီလာခံ (United Nation General Assembly UNGA) သို့ တင်သွင်းမည်ဖြစ်ကြောင်း အမေရိကန် နိုင်ငံခြားရေးဝန်ကြီး မာကိုရူဘီယိုက ၎င်း၏ X စာမျက်နှာမှ ပြောကြား လိုက်ပါသည်။ 

ထိုသဘောတူညီချက်မူကြမ်းပါ အချက်များမှာ ယူကရိန်းနှင့် ဥရောပ မဟာမိတ်နိုင်ငံများက တင်ပြမည့်အဆိုပြုချက်နှင့် ကွဲလွဲနေကြောင်း၊ ဥရောပ မူကြမ်းမှာမူ ရုရှားတပ်များ ယူကရိန်းမှ ချက်ချင်းထွက်ခွာရန် တိုက်တွန်းထားသော်လည်း အမေရိကန်မူကြမ်းမှာမူ ပြည်သူအမြောက်အမြားသေဆုံးရသဖြင့် ဝမ်းနည်းကြောင်းဖော်ပြထားပြီး စစ်ပွဲအမြန်ဆုံး အပြီးသတ်ရေး ကြိုးပမ်းကြရန် တိုက်တွန်းခြင်းသာ ဖြစ်ကြောင်း သိရပါသည်။ 

[အဆိုပါမူကြမ်းတင်ပြချက်သည် ရုရှား-ယူကရိန်း စစ်ပွဲ ၃ နှစ်မြောက် အချိန်အခါနှင့် တိုက်ဆိုင်နေပါသည်။]

ကိုးကား -TASS

ပင်တဂွန်စစ်ဌာနချုပ်အနေဖြင့် အလုပ်ခန့်အပ်မှုများကို ယာယီရပ်ဆိုင်း ထားမည်ဖြစ်ပြီး ဝန်ကြီးဌာနရှိ အရပ်သားဝန်ထမ်း ၉၅၀,၀၀၀ ခန့်အနက် ၅% မှ ၈% အထိ လျှော့ချသွားမည်ဖြစ်ကြောင်း၊ ပထမဆုံးအနေဖြင့် “အရေးကြီးလုပ်ငန်းတာဝန်” များတွင် မပါဝင်သော အစမ်းခန့်ဝန်ထမ်း ၅,၄၀၀ ဦးကို လာမည့်အပတ်တွင် အလုပ်ဖြုတ်မည်ဖြစ်ကြောင်း ပင်တဂွန် က ဖေဖော်ဝါရီ ၂၁ ရက်တွင် ထုတ်ပြန်ကြေညာခဲ့သည်။ 

အစမ်းခန့်ဝန်ထမ်း ၅၅,၀၀၀ ဦးရှိသည့်အနက်မှ ရာခိုင်နှုန်းအနည်းသာ လျှော့ချခြင်းဖြစ်သော်လည်း အရပ်သားဝန်ထမ်းအင်အား အရေအတွက်ကို သိသိသာသာ လျှော့ချနိုင်မည်ဖြစ်ကာ နောက်ဆုံးတွင် စုစုပေါင်း ဝန်ထမ်းဦးရေ ၄၇,၄၀၀ မှ ၇၆,၀၀၀ အထိ လျှော့ချနိုင်မည်ဟု ခန့်မှန်း ထားသည်။ 

ပင်တဂွန်စစ်ဌာနချုပ်သည် အစိုးရ၏အကြီးဆုံးဌာနဖြစ်ပြီး ၎င်း၏ အရပ်သားဝန်ထမ်းအရေအတွက်ကို လျှော့ချခြင်းဖြင့် အစိုးရ အသုံးစရိတ်များကို လျှော့ချရန် ရည်ရွယ်ခြင်း ဖြစ်သည်။

အဆိုပါဝန်ထမ်းအရေအတွက် လျှော့ချရေးအစီအစဉ်သည် သမ္မတ ဒေါ်နယ်ထရမ့်အစိုးရ၏ ဦးစားပေးလုပ်ငန်းများအနက် တစ်ခုအပါအဝင်ဖြစ်ပြီး ဘီလျံနာသူဌေးကြီး အီလွန်မတ်စ်၏ အစိုးရစွမ်းဆောင်ရည် မြှင့်တင်ရေးဌာန (Department of Government Efficiency) ၏ ကြိုးပမ်းဆောင်ရွက်မှုများလည်း ဖြစ်သည်။

ကိုးကား -CNN

အမေရိကန်နိုင်ငံခြားရင်းနှီးမြှုပ်နှံမှု စိစစ်ရေးကော်မတီ (CFIUS) အနေဖြင့် နိုင်ငံအကျိုးစီးပွားအတွက် အရေးပါသည့်ကဏ္ဍများတွင် တရုတ်ရင်းနှီးမြှုပ်နှံမှုများကို ကန့်သတ်ဆောင်ရွက်မည့် အမိန့်တစ်ရပ်ကို ထရမ့်က ဖေဖော်ဝါရီ ၂၁ ရက်တွင် လက်မှတ်ရေးထိုးလိုက်ကြောင်း အိမ်ဖြူတော် က ပြောကြားထားသည်။

ထရမ့်အစိုးရအဖွဲ့သည် အမေရိကန်နိုင်ငံ၏ အမျိုးသားလုံခြုံရေးနှင့် အကျိုးစီးပွားကို တရုတ်နိုင်ငံကဲ့သို့သော ပြိုင်ဘက်နိုင်ငံများ၏ ခြိမ်းခြောက်မှု အန္တရာယ်မှ ကာကွယ်ရန် အဆိုပါအမိန့်အား ထုတ်ပြန် လိုက်ခြင်းဖြစ်သည်။

အဆိုပါအမိန့်အရ အမေရိကန်သည် ၎င်းတို့၏ ရင်းနှီးမြှုပ်နှံမှု၊ နည်းပညာနှင့် အချက်အလက်များကို တရုတ်ကဲ့သို့သော နိုင်ငံများ၏ ခိုးယူခြင်းမှ ကာကွယ်ရန် ဥပဒေ၊ စည်းမျဉ်းသစ်များ ချမှတ်သွားမည် ဖြစ်ပြီး အမေရိကန်အကျိုးစီးပွားကို ဖြည့်ဆည်းဆောင်ရွက်ပေးမည့် ရင်းနှီးမြှုပ်နှံမှုများကိုသာ ခွင့်ပြုသွားမည်ဖြစ်သည်။

ထရမ့်အစိုးရအဖွဲ့အနေဖြင့် ဆီမီးကွန်ဒတ်တာ၊ ဉာဏ်ရည်တု၊ quantum၊ ဇီဝနည်းပညာ၊ အာကာသ စသည့် နည်းပညာကဏ္ဍများနှင့်ပတ်သက်၍ တရုတ်နိုင်ငံအတွင်း အမေရိကန်၏ ရင်းနှီးမြှုပ်နှံမှုများကိုလည်း ကန့်သတ်ရန် စဉ်းစားသွားမည်ဟု ဆိုသည်။

အမေရိကန်သည် စီးပွားရေးကိစ္စရပ်များကို နိုင်ငံရေးလက်နက်အဖြစ် အသုံးပြုခြင်းကို ရပ်တန့်သင့်ကြောင်း တရုတ်ကုန်သွယ်ရေးဝန်ကြီးဌာန က ထုတ်ပြန်ခဲ့ပြီး တရုတ်ဘက်ကလည်း အခြေအနေကို စောင့်ကြည့်ကာ ၎င်းတို့၏ တရားဝင်အခွင့်အရေးများကို ကာကွယ်ရန် လိုအပ်သည့် အစီအမံများ ချမှတ်သွားမည်ဟု ဆိုသည်။

ကိုးကား -Reuters

ရုရှားသမ္မတ ဗလာဒီမာပူတင်အနေဖြင့် ၎င်းဆန္ဒရှိလျှင် ယူကရိန်း တစ်နိုင်ငံလုံးကိုသိမ်းယူသွားနိုင်ကြောင်း ဒေါ်နယ်ထရမ့် က သတိပေး ပြောကြားပြီး ယူကရိန်းသမ္မတ ဗလာဒီမာဇီလန်စကီးတွင် အောက်ဖဲများ မရှိဘဲ ၎င်းနှင့်တွေ့ဆုံဆွေးနွေးရန်အလွန်အရေးမပါကြောင်းဆိုသည်။

“အောက်ဖဲမရှိသည့် စေ့စပ်ညှိနှိုင်းမှုကို မိမိအနေဖြင့် နှစ်အတော်ကြာအောင် စောင့်ကြည့်နေခဲ့ကြောင်း” Fox News ရေဒီယို၏ “The Brian Kilmeade Show” အစီအစဉ်အင်တာဗျူးတစ်ခုတွင် အမေရိကန် သမ္မတ ဒေါ်နယ်ထရမ့်ကပြောကြားသည်။

အဆိုပါ အင်တာဗျူးအတွင်း စစ်ပွဲဖြစ်ပွားခြင်းအတွက် ရုရှားအပေါ် ပြစ်တင်ရှုတ်ချရန် အစီအစဉ်တင်ဆက်သူ ဘရိုင်ယန်ကေးလ်မိဒ်က ဖိအားပေး မေးမြန်းခဲ့ပြီးနောက် ထရမ့်က ယင်းသို့ပြောကြားခြင်း ဖြစ်သည်။

“တွေ့ဆုံဆွေးနွေးမှု လုပ်ဆောင်ခဲ့သည်မှာ သုံးနှစ်ကြာမြင့်ခဲ့သော်လည်း အကျိုးမထူးသည့်အတွက် တွေ့ဆုံဆွေးနွေးမှုများ လုပ်ဆောင်ရန် ဇီလန်စကီးက အရေးပါသည်ဟု မိမိ မထင်မြင်ကြောင်း၊ ၎င်းက အပေး အယူလုပ်ဆောင်ရန် အရမ်းခက်ခဲကြောင်း၊ ထို့အတွက် ၎င်း၏နိုင်ငံ စုတ်ပြတ် သွားကြောင်း” ထရမ့် က ယူကရိန်းသမ္မတ ဇီလန်စကီးနှင့် ပတ်သက်၍ ဆက်လက်ပြောသည်။

ထို့နောက်ရုရှားသမ္မတ ပူတင်က၎င်းဆန္ဒရှိလျှင် ယူကရိန်း တစ်နိုင်ငံလုံး ကို သိမ်းယူနိုင်ခြင်းကြောင့် ဇီလန်စကီးအနေနှင့် လွန်ခဲ့သည့် သုံးနှစ် နီးပါးက ကျူးကျော်ခဲ့သည့်ရုရှားနှင့် သဘောတူညီချက်အတွက် လုပ်ဆောင် သင့်ကြောင်းလည်း ထရမ့်ကဆိုသည်။

ထို့ပြင် အဆိုပါအင်တာဗျူးအတွင်း ယူကရိန်းစစ်ပွဲအတွက် ရုရှားကို အပြစ်တင်ရမည့်မေးခွန်းများကို ထရမ့်က အကြိမ်ကြိမ် လျစ်လျူရှုခဲ့ပြီး နောက်ဆုံးတွင်မှ ရုရှားက တိုက်ခိုက်ခဲ့ကြောင်း ဝန်ခံခဲ့သော်လည်း ဘိုင်ဒင် အစိုးရနှင့် ဇီလန်စကီးတို့အပေါ် အပြစ်ပုံချခဲ့သည်။

၂၀၂၂ ခုနှစ်တွင် ရုရှား၏ ကျူးကျော်မှုကို တားဆီးနိုင်သည့် အပေးအယူ တစ်ရပ်ဖြစ်လာရန် သမ္မတဟောင်း ဂျိုးဘိုင်ဒင်နှင့်ဇီလန်စကီး တို့က လုံလောက်အောင် မလုပ်ဆောင်ခဲ့ကြောင်း ထရမ့်ကစွပ်စွဲ ပြောကြား သည်။

“ပူတင်နှင့် အေးအေးဆေးဆေးညှိနှိုင်းနိုင်သည်ကို ၎င်းတို့အနေဖြင့် သိရှိခြင်းမရှိကြကြောင်း၊ ပူတင်ကို ပိုကောင်းလာစေရန် သို့မဟုတ် ပိုဆိုး လာစေရန် ကြိုးစားနေခြင်း မဟုတ်သော်လည်း စစ်ပွဲကတော့ မည်သည့် အခါမျှ ဖြစ်မလာသင့်ကြောင်း” ၎င်းကဆိုသည်။

ထို့နောက် လာမည့်မေ ၉ ရက်တွင် မော်စကိုသို့ သွားရောက်မည်ဆိုသည့် သတင်းများကို ထရမ့်က ပယ်ချခဲ့ပြီး ရုရှားသမ္မတ ဗလာဒီမာပူတင်အား အာဏာရှင်ဟု ယူဆခြင်းရှိ၊မရှိနှင့် ဇီလန်စကီးအပေါ် ကင်ပွန်းတပ်ခြင်း နှင့်ပတ်သက်သည့်မေးခွန်းကိုလည်း ထပ်မံဖြေကြားခြင်းမရှိခဲ့ပေ။

ထို့ပြင် ယူကရိန်းစစ်ပွဲကို အဆုံးသတ်အရေးအတွက် အီမန်နျူယယ် မက်ခရွန် နှင့် ဗြိတိန်ဝန်ကြီးချုပ် ကီယာစတာမာ တို့က မည်သည့်အရာ မျှမလုပ်ခဲ့ကြောင်းလည်းထရမ့်ပြစ်တင်ပြောကြားခဲ့သည်။

ပြင်သစ်သမ္မတ မက်ခရွန်က အမေရိကန်သမ္မတထရမ့် နှင့်လာမည့် ဖေဖော်ဝါရီ ၂၄ ရက်(တနင်္လာနေ့)တွင် တွေ့ဆုံမည်ဖြစ်ပြီး မရှေးမနှောင်း ပင် ဗြိတိန်ဝန်ကြီးချုပ် ကီယာစတာမာနှင့်လည်း ဖေဖော်ဝါရီ ၂၇ ရက် (ကြာသပတေးနေ့) တွင်တွေဆုံကြမည်ဖြစ်ကြောင်း CNN သတင်းက ဖော်ပြသည်။

သတင်း-လင်းခေတ်

ကိုးကား-CNN

ရုရှားနှင့်အမေရိကန်တို့ကြား သံတမန်ဆက်ဆံရေး ပြန်လည်စတင်ရန်အတွက် နှစ်နိုင်ငံစလုံးမှ သံအမတ်များက ၎င်းတို့၏ လုပ်ငန်းများကို မကြာမီပြန်လည်စတင်မည်ဟု ရုရှားလွှတ်တော်မှ အရင်းအမြစ်တစ်ခုက ပြောသည်။

ရုရှားနှင့်အမေရိကန် သံအမတ်များက ၎င်းတို့၏တာဝန်များကို အပြည့်အဝပြန်လည်ထမ်းဆောင်မည်ဖြစ်သောကြောင့် ၎င်းအချက်သည် နှစ်နိုင်ငံကြား သံတမန်ဆက်ဆံရေး ပုံမှန်ပြန်ဖြစ်စေရေးအတွက် အလွန်အရေးပါကြောင်း အဆိုပါ သတင်းအရင်းအမြစ်က ဆက်ပြောသည်။

ယခင် အမေရိကန်ပြည်ထောင်စုဆိုင်ရာ ရုရှားသံအမတ်ဟောင်း အန်နတိုလီ အန်တိုနော့သည် ၎င်း၏ သံအမတ်တာဝန်များကို ၂၀၂၄  ခုနှစ် အောက်တိုဘာလတွင် အဆုံးသတ်ခဲ့ခြင်း ဖြစ်သည်။

ရုရှားအစိုးရသည် အမေရိကန်ပြည်ထောင်စုဆိုင်ရာ ရုရှားသံအမတ် အသစ်အဖြစ် ရုရှားနိုင်ငံခြားရေးဝန်ကြီးဌာနရှိ မြောက်အမေရိကရေးရာဌာနမှ ညွှန်ကြားရေးမှူး အလက်ဇန္ဒား ဒါချီယက်အား ခန့်အပ်ရန် လျာထားသည်ဟု ရုရှားမီဒီယာတချို့က ဖော်ပြခဲ့သော်လည်း ယင်းကိစ္စရပ်နှင့် စပ်လျဉ်း၍ ရုရှားအစိုးရက   တရားဝင်ထုတ်ပြန်ထားခြင်း မရှိသေးပေ။

သို့သော် အမေရိကန်ပြည်ထောင်စုဆိုင်ရာ ရုရှားသံအမတ်သစ်ကို မကြာမီခန့်အပ်မည်ဟု ရုရှားအစိုးရအဖွဲ့မှ ပြောရေးဆိုခွင့်ရှိသူ ဒီမီထရီ ပက်စကော့က ပြောကြားထားသည်။

လက်ရှိ   ရုရှားနိုင်ငံဆိုင်ရာ အမေရိကန်သံအမတ်မှာ လင်းထရေစီဖြစ်ပြီး သူမအား ယခင်သမ္မတဟောင်း ဂျိုးဘိုင်ဒင်က ခန့်အပ်ခြင်းဖြစ်သောကြောင့် လက်ရှိသမ္မတ ဒေါ်နယ်ထရမ့်က ၎င်းနေရာတွင် အခြားသူတစ်ဦးအား အစားထိုး ခန့်အပ်နိုင်သူဟူသော  ပြောဆိုယူဆမှုများ ထွက်ပေါ်လျက်ရှိကြောင်း သိရသည်။

Source: Myawady Web Portal

အမေရိကန်ဖက်ဒရယ်အစိုးရ၏ ငွေကြေးအသုံးစရိတ်များကို လျှော့ချရန် သမ္မတထရမ့်၏ တာဝန်ပေးအပ်ခြင်းခံထားရသော ဘီလီယံနာ အီလွန်မတ် သည် ဗာဂျီးနီးယားပြည်နယ်၊ နေရှင်နယ်ဆိပ်ကမ်းတွင် ကျင်းပသည့် ကွန်ဆာဗေးတစ်နိုင်ငံရေးညီလာခံ စင်မြင့်ပေါ်သို့ တက်ရောက်ခဲ့ရာတွင် အာဂျင်တီးနားနိုင်ငံသမ္မတ ဇေဗီယာမီလီထံမှ လက်ဆောင်ရရှိထားသည့် သစ်ခုတ်လွှစက်တစ်ခုကို လက်ဖြင့်ကိုင်ဆောင်လာခဲ့သည်။

“ဒါဟာ ဗျူရိုကရေစီယန္တရားကို ဖြတ်တောက်ပစ်မယ့် လွှစက်ပါ” ဟုလည်း အီလွန်မတ်က ပြောကြားခဲ့သည်။

အာဂျင်တီးနားနိုင်ငံသမ္မတ ဇေဗီယာမီလီက မတ်အား လက်ဆောင်အဖြစ်ပေးအပ်ခဲ့သော အနီရောင် သစ်ခုတ်လွှစက်တွင် “လွတ်လပ်ရေး အသက်ရှည်ပါစေ (Viva la libertad, carajo)” ဟု ရေးထွင်းထားသည်။ အီလွန်မတ်သည် မီလီ သမ္မတမဖြစ်မီကတည်းက ထောက်ခံအားပေးခဲ့သူဖြစ်သည်။

အီလွန်မတ်သည် အမေရိကန်သမ္မတ ဒေါ်နယ်ထရမ့်၏ လမ်းညွှန်မှုဖြင့် ဘဏ်လုပ်ငန်းဝန်ထမ်းများ၊ သစ်တောလုပ်သားများ၊ ဒုံးပျံသိပ္ပံပညာရှင်များနှင့် အစိုးရဝန်ထမ်းများစွာအပေါ် ပစ်မှတ်ထား၍ မလိုအပ်သည်တို့ကို ထိထိရောက်ရောက်လျှော့ချမှုများကို ဦးဆောင်လျက်ရှိသည်။ ယမန်နေ့ကလည်း အမေရိကန်အခွန်ဌာန(IRS) မှ ဝန်ထမ်း ၆,၀၀၀ ခန့်အား အလုပ်ထုတ်ပစ်မည်ဟု အီလွန်မတ်က အသိပေးခဲ့ကြောင်း ယင်းကိစ္စရပ်နှင့် ရင်းနှီးသူတစ်ဦးက ပြောသည်။

Source: Popular Myanmar

ဘရပ်ဆဲလ်မြို့အခြေစိုက် အီးယူဆိုင်ရာ အာဆီယံသံအမတ်ကြီးများ ပါဝင်သည့် အာဆီယံ-ဘရပ်ဆဲလ် ကော်မတီ (ASEAN Brussels Committee - ABC) နှင့် ပင်လယ်ကွေ့ ပူးပေါင်းဆောင်ရွက်ရေးကောင်စီ (Gulf Cooperation Council - GCC) အဖွဲ့ဝင်နိုင်ငံများမှ သံအမတ်ကြီး များအကြား အလုပ်သဘော နေ့လယ်စာစားပွဲကို ဖေဖော်ဝါရီ ၁၉ ရက်တွင် ABC ၏ အလှည့်ကျဥက္ကဋ္ဌဖြစ်သည့် ဖိလစ်ပိုင်သံရုံးနှင့် မြန်မာသံရုံးတို့က ဘရပ်ဆဲလ်မြို့၌ ပူးပေါင်းစီစဉ် ကျင်းပခဲ့ကြသည်။ 

အဆိုပါအလုပ်သဘော နေ့လယ်စာစားပွဲတွင် အာဆီယံနှင့် GCC သံအမတ်ကြီးများသည် ၂၀၂၃ ခုနှစ်၊ အောက်တိုဘာလက ကျင်းပခဲ့သော အာဆီယံ- GCC ထိပ်သီးအစည်းအဝေးမှ ဒေသ နှစ်ခုအကြား ပူးပေါင်း ဆောင်ရွက်ရေးမူဘောင် (၂၀၂၄-၂၀၂၈) ထွက်ပေါ်ခဲ့ပါကြောင်း၊ အဆိုပါ မူဘောင်တွင် ဒေသနှစ်ခုအကြား စီးပွားရေးပူးပေါင်းဆောင်ရွက်မှုနှင့် ပြည်သူများအကြား ထိတွေ့ဆက်ဆံမှု (people-to-people ties) အား မြှင့်တင်ဆောင်ရွက်ရေးကို မီးမောင်းထိုးပြနိုင်ခဲ့ကြောင်း၊ ယခုနှစ်အတွင်း အာဆီယံအလှည့်ကျဥက္ကဋ္ဌဖြစ်သည့် မလေးရှားနိုင်ငံ၌ အာဆီယံ- GCC- တရုတ် ထိပ်သီးအစည်းအဝေးကိုလည်း ကျင်းပသွားမည်ဖြစ်ကြောင်း၊ GCC အဖွဲ့ဝင်နိုင်ငံများသည် အာဆီယံနိုင်ငံများ၌ အိမ်ခြံမြေ၊ ဟိုတယ်နှင့် ခရီးသွားလုပ်ငန်း၊ ဝန်ဆောင်မှုနှင့် ငွေရေးကြေးရေးကဏ္ဍတို့တွင် ရင်းနှီးမြှုပ်နှံမှုများ ဆောင်ရွက်လျက်ရှိပါကြောင်း၊ သို့ဖြစ်ရာ ယခုကဲ့သို့ ဘရပ်ဆဲလ် မြို့ရှိ အာဆီယံနှင့် GCC သံအမတ်ကြီးများ တွေ့ဆုံခြင်းသည် ဒေသ နှစ်ရပ်စလုံးနှင့် မိတ်ဖက်ဖြစ်လျက်ရှိသော အီးယူ စသည့် မိတ်ဖက်များနှင့် ဆက်ဆံရေး၌ ကြုံတွေ့နေရသည့် ဘုံစိန်ခေါ်မှုများနှင့် ပတ်သက်ပြီး အပြန်အလှန် ဆွေးနွေးဖလှယ်မှုပြုနိုင်ကာ ဘုံအကျိုးစီးပွား နယ်ပယ်များတွင် ပူးပေါင်းဆောင်ရွက်မှုပြုနိုင်မည့် အလားအလာများကို ရှာဖွေနိုင်ရေး ယန္တရားတစ်ရပ်ဖြစ်လာရန် မျှော်လင့်ပါကြောင်း၊ ဘရပ်ဆဲလ်မြို့ ရှိ အာဆီယံနှင့် GCC တို့၏ လှုပ်ရှားမှုများတွင် အပြန်အလှန် ပူးပေါင်း ပါဝင်သွားကြရန်လည်း မျှော်လင့်ပါကြောင်း စသည်ဖြင့် ဆွေးနွေးပြောကြားခဲ့ကြကြောင်း သိရသည်။

ကိုးကား-Myanmar National Post

ဧရာဝတီ - ကျောက်ဖရား - မဲခေါင် စီးပွားရေးပူးပေါင်းဆောင်ရွက်မှု မဟာဗျူဟာ (ACMEC) အလှည့်ကျဥက္ကဋ္ဌ အဖြစ် တာဝန်ယူထားသော မြန်မာနိုင်ငံအနေဖြင့် (၁၁) ကြိမ်မြောက် အက်ခ်မက်ထိပ်သီးအစည်းအဝေးကို ဦးဆောင်ကျင်းပသွားရမည်ဖြစ်ကြောင်း သိရသည်။

မြန်မာနိုင်ငံအနေဖြင့် ပထမအကြိမ်အက်ခ်မက် ထိပ်သီးအစည်းအဝေးကို ၂၀၀၃ ခုနှစ်က ပုဂံမြို့တွင် ကျင်းပခဲ့သလို (၆) ကြိမ်မြောက် အက်ခ်မက်ထိပ်သီးအစည်းအဝေးကိုလည်း ၂၀၁၅ ခုနှစ်တွင် နေပြည်တော်၌ အိမ်ရှင်အဖြစ် လက်ခံကျင်းပခဲ့ပြီးဖြစ်သည်။

ယခုအခါ အဆိုပါ ဧရာဝတီ - ကျောက်ဖရား - မဲခေါင် စီးပွားရေးပူးပေါင်းဆောင်ရွက်မှု မဟာဗျူဟာ (ACMEC) အလှည့်ကျ ဥက္ကဋ္ဌတာဝန်ကို ပြီးခဲ့သည့် ၂၀၂၄ ခုနှစ်၊ နိုဝင်ဘာလက တရုတ်နိုင်ငံကူမင်းမြို့၌ ကျင်းပခဲ့သည့် (၁၀) ကြိမ်မြောက် အက်ခ်မက်ထိပ်သီးအစည်းအဝေးတွင် လာအိုနိုင်ငံထံမှ လွှဲပြောင်းလက်ခံခဲ့ခြင်းဖြစ်သည်။

အဆိုပါ အလှည့်ကျဥက္ကဋ္ဌတာဝန်ကို အောင်မြင်စွာထမ်းဆောင်နိုင်ရေးနှင့်ပတ်သက်၍ ဝန်ကြီးဌာနများ၏ အခန်း ကဏ္ဍနှင့် ပေါင်းစပ်ညှိနှိုင်းမှုမြှင့်တင်ရေး အလုပ်ရုံဆွေးနွေးပွဲတစ်ရပ်ကို ဖေဖော်ဝါရီ ၂၀ ရက်နေ့က နိုင်ငံခြားရေးဝန်ကြီးဌာန လောကနတ်ခန်းမ၌ ကျင်းပခဲ့သည်။

အလုပ်ရုံဆွေးနွေးပွဲတွင် ဒုတိယဝန်ကြီးချုပ်နှင့် နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးသန်းဆွေက မြန်မာနိုင်ငံအနေဖြင့် နိုင်ငံတကာအဖွဲ့အစည်းများ၊ ဒေသတွင်းပူးပေါင်းဆောင်ရွက်မှု အစီအစဉ်များတွင် တက်ကြွစွာ ပါဝင်ဆောင်ရွက်လျက်ရှိကြောင်း ပြောကြားခဲ့ပြီး မြန်မာနိုင်ငံက အလှည့်ကျဥက္ကဋ္ဌအဖြစ် ဦးဆောင်ကျင်းပသွားမည့် (၁၁) ကြိမ်မြောက် အက်ခ်မက်ထိပ်သီးအစည်းအဝေးခေါင်းစဉ် (Theme) အဖြစ် “Strengthening Socio-Economic Development towards Smart and Sustainable ACMECS” (လူမှုစီးပွားဖွံ့ဖြိုးရေးကို တိုးမြှင့်ဖော်ဆောင်ကာ ခေတ်မီ၍ စဉ်ဆက်မပြတ်ဖွံ့ဖြိုးတိုးတက်သော အက်ခ်မက်ဒေသ တည်ဆောက်ကြပါစို့) ကို အတည်ပြုရွေးချယ်ထားပြီးဖြစ်ကြောင်း ပြောကြားသည်။

အလားတူ မြန်မာနိုင်ငံအနေဖြင့် အလှည့်ကျဥက္ကဋ္ဌအဖြစ် တာဝန်ထမ်းဆောင်စဉ် အကောင်းဆုံးဖြစ်အောင် လုပ်ဆောင်သွားနိုင်ရန်ရည်ရွယ်၍ ယခု အလုပ်ရုံဆွေးနွေးပွဲကို ကျင်းပခြင်းဖြစ်ပါကြောင်း၊ မြန်မာနိုင်ငံအနေဖြင့် ဒေသတွင်းလူမှုစီးပွားဖွံ့ဖြိုးတိုးတက်မှုကို အထောက်အကူပြုစေမည့် စိုက်ပျိုးရေးအခြေခံစက်မှုလုပ်ငန်းများ ဖွံ့ဖြိုး တိုးတက်ရေး၊ သစ်တောသယံဇာတများကို အရည်အသွေးမြင့် လူသုံးကုန်ပစ္စည်းများအဖြစ် တိုးမြှင့်ထုတ်လုပ်ရေး နှင့် သဘာဝပတ်ဝန်းကျင် ထိန်းသိမ်းစောင့်ရှောက်ရေး စသည်တို့ကို အလေးထားဆောင်ရွက်မည့် နယ်ပယ်များ အဖြစ် သတ်မှတ်ထားရှိပြီး ဦးစားပေးဆောင်ရွက်သွားရန် လိုအပ်ပါကြောင်း၊ ယခုအလုပ်ရုံဆွေးနွေးပွဲသည် အက်ခ်မက် လုပ်ငန်းစဉ်အောက်ရှိ ဝန်ကြီးဌာနများ၏ ပူးပေါင်းဆောင်ရွက်မှုများနှင့် ပတ်သက်သည့် အတွေ့အကြုံများ၊ စိန်ခေါ်မှု များနှင့် ရှေ့ဆက်ဆောင်ရွက်သွားမည့် လုပ်ငန်းအစီအစဉ်များအပေါ် အမြင်ချင်းဖလှယ်ဆွေးနွေးနိုင်ရန် အခွင့်အရေးကောင်းတစ်ခုဖြစ်ပါကြောင်းဖြင့် ပြောကြားသည်။

ထို့နောက် စုံညီဆွေးနွေးပွဲအစီအစဉ်တွင် ဒုတိယဝန်ကြီး ဦးလွင်ဦးက မြန်မာနိုင်ငံမှ အက်ခ်မက်အလှည့်ကျ ဥက္ကဋ္ဌအဖြစ် ဆောင်ရွက်သွားမည့်အစည်းအဝေးများနှင့် အစီအစဉ်များ၊ အလုပ်ရုံဆွေးနွေးပွဲ ကျင်းပရခြင်း ရည်ရွယ်ချက်များနှင့် မျှော်မှန်းရလဒ်များနှင့်ပတ်သက်၍ ဆွေးနွေးပြောကြားသည်။

ယင်းနောက် ဆွေးနွေးပွဲတက်ရောက်လာကြသူများက အက်ခ်မက် ပူးပေါင်းဆောင်ရွက်မှုအောက်တွင် ဆောင်ရွက်လျက်ရှိသည့် ပူးပေါင်းဆောင်ရွက်မှုလုပ်ငန်းများ၊ အက်ခ်မက် ပူးပေါင်းဆောင်ရွက်မှုဆိုင်ရာ ဖြစ်ပေါ်တိုးတက်မှုများနှင့် မြန်မာနိုင်ငံက လက်တွေ့ဆောင်ရွက်သွားနိုင်မည့် စီမံကိန်းများနှင့် အစီအစဉ်များ၊ မြန်မာနိုင်ငံက အက်ခ်မက် အလှည့်ကျဥက္ကဋ္ဌ တာဝန်ထမ်းဆောင်စဉ်ကာလအတွင်း ပူးပေါင်းဆောင်ရွက်မှုများနှင့် ပေါင်းစပ်ညှိနှိုင်းမှုများ ထိရောက်စွာဆောင်ရွက်သွားနိုင်ရေး၊ အက်ခ်မက်စီမံကိန်းများနှင့် အစီအစဉ်များကို ထိရောက်စွာ ရေးဆွဲအကောင်အထည်ဖော်နိုင်ရေးနှင့် အက်ခ်မက်အလှည့်ကျဥက္ကဋ္ဌတာဝန် အောင်မြင်စွာထမ်းဆောင်နိုင်ရေး ဝန်ကြီးဌာနများ၏ အခန်းကဏ္ဍနှင့် ပေါင်းစပ်ညှိနှိုင်းမှု ဆက်လက်မြှင့်တင်သွားရေးတို့ကို ဆွေးနွေးကြသည်။

ဆွေးနွးပွဲအပြီးတွင် ဒုတိယဝန်ကြီးက နိဂုံးချုပ်အမှာစကား ပြောကြားရာတွင် အက်ခ်မက် ပူးပေါင်းဆောင်ရွက်မှု မဏ္ဍိုင် (၃)ခု အောက်တွင်ရှိသည့် ဦးစားပေးစီမံကိန်းများနှင့် လုပ်ငန်းအစီအစဉ်များကို ပြည်တွင်းလုပ်ငန်းစဉ် များနှင့်အညီ သက်ဆိုင်ရာဝန်ကြီးဌာနများအနေဖြင့် ဆက်လက်အကောင်အထည်ဖော်ဆောင်ရွက်သွားရန် တိုက်တွန်းကြောင်း၊ အလုပ်ရုံဆွေးနွေးပွဲ၏ ရလဒ်များကို ဆက်လက်အကောင်အထည်ဖော်ခြင်းဖြင့် မိမိတို့နိုင်ငံနှင့် ဒေသတွင်း ရေရှည်အကျိုးစီးပွားဖြစ်ထွန်းစေမည့်အစီအစဉ်များ ချမှတ်ဖော်ဆောင်သွားရမည်ဖြစ်ကြောင်း ပြောကြားသည်။

အလုပ်ရုံဆွေးနွေးပွဲသို့ အက်ခ်မက်ပူးပေါင်းဆောင်ရွက်မှုဆိုင်ရာကိစ္စရပ်များကို တာဝန်ယူထားသည့် ဝန်ကြီးဌာန ၂၀ မှ တာဝန်ရှိသူများ တက်ရောက်ခဲ့ကြသည်ဟု သိရသည်။

ကိုးကား- MHTNEWS 

သဘောထားချင်းတူညီသည့် နိုင်ငံများနှင့်အတူ ယူကရိန်းကို ဆက်လက် ထောက်ပံ့မည်ဟု နိုင်ငံ၏သန္နိဋ္ဌာန်ကို ဂျပန်နိုင်ငံခြားရေးဝန်ကြီးက ပြောဆိုခဲ့ပြီး ကူညီမှုများ၌ ကာလလတ်မှ ကာလရှည် ပြန်လည်ထူထောင်ရေးနှင့် ပြန်လည်တည်ဆောက်ရေး လုပ်ငန်းများအတွက်အကူအညီများပါဝင်ကြောင်း Iwaya Takeshi က ဖေဖော်ဝါရီ ၂၀ ရက်နေ့တွင် တောင်အာဖရိက၌ စတင်ခဲ့သည့် G20 နိုင်ငံခြားရေးဝန်ကြီး များ၏ ဆွေးနွေးပွဲတွင် ပြောကြားခဲ့ခြင်းဖြစ်ပါသည်။

သံတမန်ရေးရာ ကြိုးပမ်းမှုများသည် ယူကရိန်း၌ဖြစ်ပွားနေသော တိုက်ပွဲများကို အဆုံးသတ်ရန်နှင့် ခက်ခဲသည့်အခြေအနေများကို ကျော်လွှားနိုင်ရန် လမ်းခင်းပေးလိမ့်မည်ဟု မျှော်လင့်ကြောင်း ၎င်းက ပြောကြားခဲ့ ပါသည်။

ရုရှားနှင့် မြောက်ကိုရီးယားတို့အကြား စစ်ရေးပူးပေါင်းဆောင်ရွက်မှု တိုးလာခြင်းအပေါ် အလွန်အမင်းစိုးရိမ်သည်ဟု Iwaya က ပြောခဲ့ပြီးယူကရိန်းတပ်များကို တိုက်ခိုက်ရန် မြောက်ကိုရီးယားစစ်သားများ ပါဝင်နေမှုကို ရှုတ်ချခဲ့ပါသည်။

နိုင်ငံတကာအသိုက်အဝန်းသည် တရားဥပဒေစိုးမိုးရေး၌ ကြီးမားသော စိန်ခေါ်မှုနှင့် ရင်ဆိုင်နေရကြောင်း Iwaya က ပြောကြားခဲ့ပြီး တောင်တရုတ်ပင်လယ် အပါအဝင် ကမ္ဘာပေါ်ရှိ မည်သည့်နေရာ၌မဆို လက်ရှိအခြေအနေကို အင်အားသုံးပြီး ပြောင်းလဲရန် တစ်ဖက်သတ် ကြိုးပမ်းမှုများကို ဂျပန်အနေဖြင့် မည်သည့်အခါတွင်မှ လက်ခံမည် မဟုတ်ကြောင်း ၎င်းက ဖြည့်စွက်ပြောကြားခဲ့သည်။

G20 အနေဖြင့် နိုင်ငံတကာ ပူးပေါင်းဆောင်ရွက်မှုတွင် ဦးဆောင် အခန်းကဏ္ဍမှ ပါဝင်လုပ်ဆောင်ရန် လိုအပ်နေသည်ဟုလည်း ၎င်းက အလေးပေး ပြောကြားခဲ့ပါသည်။

ကိုးကား-NHK World

BRICS နိုင်ငံများအနေဖြင့် မိမိတို့၏ အမေရိကန်ဒေါ်လာကို ဖျက်ဆီးကာ ငွေကြေးအသစ်တစ်ခု ဖန်တီးချင်နေကြကြောင်း” အမေရိကန်သမ္မတ ဒေါ်နယ်ထရမ့်က ဖေဖော်ဝါရီ ၂၀ ရက် (ကြာသပတေးနေ့) တွင် ဝါရှင်တန်၊ ရီပတ်ဘလီကန်ရှိ ပြည်နယ်အုပ်ချုပ်ရေးမှူးများအဖွဲ့ကို ပြောကြား သည့် မိန့်ခွန်းထဲတွင် ထည့်သွင်းသတိပေးလိုက်ပါသည်။ 

BRICS နိုင်ငံများသည် တရုတ်ယွမ်ငွေများကို အသုံးပြုလိုကြကြောင်း၊ အမေရိကန်ဒေါ်လာ ပျက်စီးရာပျက်စီးကြောင်း လုပ်မည်ဆိုပါက BRICS   နိုင်ငံတိုင်းကို အခွန် ၁၅၀ % ကောက်ခံသွားမည်ဖြစ်ကြောင်းနှင့် မိမိတို့ အနေဖြင့် ၎င်းတို့၏ ကုန်ပစ္စည်းများကို မလိုချင်ကြောင်း” ဒေါ်နယ်ထရမ့် က ပြောကြားလိုက်ပါသည်။ 

ကိုးကား-TASS