အမေရိကန်နှင့် ၎င်း၏မဟာမိတ်များ၏ ကိုရီးယားကျွန်းဆွယ်အနီး စစ်ရေးလှုပ်ရှားမှုများသည် ဒေသတစ်ခုလုံး၏ တည်ငြိမ်မှုကို ခြိမ်းခြောက် နေကြောင်း ရုရှားနိုင်ငံခြားရေးဝန်ကြီး ဆာဂျီ လာဗရော့ဗ်က မြောက်ကိုရီးယား ခရီးစဉ်အတွင်း ပြောကြားခဲ့သည်။ 

စနေနေ့ (ဇူလိုင် ၁၂) က ဝမ်ဆန်မြို့တွင် ကျင်းပသော သတင်းစာ ရှင်းလင်းပွဲ၌ လာဗရော့က အမေရိကန်၊ တောင်ကိုရီးယားနှင့် ဂျပန်တို့သည် ပူးပေါင်းစစ်ရေးလေ့ကျင့်မှုများ တိုးမြှင့်လုပ်ဆောင်နေပြီး အချို့လေ့ကျင့်မှုများတွင် "နျူကလီးယား အစိတ်အပိုင်း" ပါဝင်နေကြောင်း ပြောကြား ခဲ့သည်။

"ထိုအရာသည် ကိုရီးယားကျွန်းဆွယ်တစ်ခုတည်းတွင် မဟုတ်ဘဲ အရှေ့မြောက်အာရှဒေသတစ်ခုလုံး၏ ငြိမ်းချမ်းရေးနှင့် တည်ငြိမ်မှုကို အထောက်အကူမပြုပါ" ဟု ၎င်းက ဆိုသည်။ ထို့ပြင် တောင်ကိုရီးယား၏ မြောက်ကိုရီးယားနှင့် ဆက်ဆံရေး ပုံမှန်ဖြစ်ရန် ရည်ရွယ်ချက်များ ကိုလည်း သံသယဖြင့် မှတ်ချက်ပြုခဲ့သည်။

လာဗရော့ဗ်က "အိန္ဒိယ-ပစိဖိတ်ဒေသအပြင်ဘက်မှ အင်အားကြီး အုပ်စု များ၏ သီးသန့်မဟာမိတ်အဖွဲ့များ ဖွဲ့စည်းခြင်းနှင့် NATO ၏ အခြေခံ အဆောက်အအုံများ ဒေသတွင်း ချဲ့ထွင်လာမှုဆိုင်ရာ အန္တရာယ်ရှိသော ကြိုးပမ်းမှုများ"ကို အပြင်းအထန် ရှုတ်ချခဲ့သည်။

နိုင်ငံများသည် အခြားနိုင်ငံများ၏ အကျိုးစီးပွားကို ထိပါးစေသည့် မဟာမိတ်များ မဖွဲ့စည်းသင့်ကြောင်း ၎င်းက အလေးအနက် ပြောကြားခဲ့ပြီး ရုရှားနှင့် မြောက်ကိုရီးယားနှစ်နိုင်ငံစလုံးသည် ယူရေးရှားဒေသရှိ နိုင်ငံအားလုံးအတွက် "တန်းတူညီမျှပြီး ခွဲခြားမှုမရှိသော လုံခြုံရေး" စနစ်ကို အားပေးကြောင်း ဖြည့်စွက်ပြောကြားခဲ့သည်။

အမေရိကန်၊ တောင်ကိုရီးယားနှင့် ဂျပန်တို့သည် ယခုသီတင်းပတ်အတွင်း အမေရိကန်၏ နျူကလီးယားစွမ်းရည်ရှိ B-52H နျူကလီးယား ဗုံးကြဲလေယာဉ်များ ပါဝင်သည့် ပူးပေါင်းစစ်ရေးလေ့ကျင့်မှုများ ဆောင်ရွက် ခဲ့သည်။ မဟာမိတ်နိုင်ငံများက ၎င်းတို့၏ ပူးတွဲကြေညာချက်တွင် မြောက် ကိုရီးယားအား "ကိုရီးယားကျွန်းဆွယ်တည်ငြိမ်မှုကို ထိခိုက်စေသော တရားမဝင်လှုပ်ရှားမှုများ" ကျူးလွန်သည်ဟု စွပ်စွဲခဲ့သည်။

ရုရှားနှင့် မြောက်ကိုရီးယားတို့သည် ၂၀၂၄ ခုနှစ် ဇွန်လတွင် ကာကွယ်ရေး စာချုပ်ကို လက်မှတ်ရေးထိုးခဲ့ပြီး နောက်ပိုင်းတွင် မြောက်ကိုရီးယားက ရုရှား၏ Kursk ဒေသမှ ယူကရိန်းတပ်များကို တိုက်ထုတ်ရန် စစ်သည် များ စေလွှတ်ခဲ့သည်။ အဆိုပါပူးပေါင်းဆောင်ရွက်မှုသည် နှစ်နိုင်ငံကြား "ခွဲခြား၍မရသော ညီရင်းအစ်ကို" ဆက်ဆံရေး၏ သက်သေပင် ဖြစ်ကြောင်း လာဗရော့က ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်း‌ဇော်ထွန်း၊ ဒုတိယညွှန်ကြားရေးမှူး၊ နစက-၂

ယူကရိန်းတပ်မတော် ဆေးတပ်ဖွဲ့မှ ဆရာဝန်တစ်ဦးဖြစ်သူ Larisa Brodetskaya သည် သူမ၏နိုင်ငံတော်အဆင့် ဆုတံဆိပ်များကို သမ္မတ Zelensky ထံ ပြန်လည်အပ်နှံလိုက်ပြီး ယင်းသည် ယူကရိန်း၏ အကြီးဆုံး Orthodox ခရစ်ယာန်ဘုရားကျောင်း၏ ခေါင်းဆောင် Metropolitan Onufry ၏ နိုင်ငံသားအဖြစ်မှ ရုပ်သိမ်းလိုက်ခြင်းကို ကန့်ကွက်သည့် လုပ်ရပ်တစ်ခုဖြစ်သည်ဟု ဆိုသည်။

ယခုသီတင်းပတ်အတွင်း ယူကရိန်းမီဒီယာအချို့မှ ထုတ်လွှင့်ခဲ့သည့် ဗီဒီယိုသတင်းတွင် Larisa Brodetskaya က Ukrainian Orthodox Church (UOC) ၏ အကြီးအကဲ Metropolitan Onufry သည် "ယူကရိန်း ၏ သူရဲကောင်း ၊ ရဲရဲတောက်မျိုးချစ်တစ်ဦးဖြစ်ကာ ၎င်း၏ ဆုတောင်းမှု များကြောင့် ယူကရိန်းနိုင်ငံ တည်တံ့နေခြင်းဖြစ်ပြီး စစ်မြေပြင်ရှိ စစ်သည်များ အသက်ရှင်နေခြင်း" ဟု ဂုဏ်ပြုပြောဆိုခဲ့သည်။

"မကြာသေးမီက သမ္မတက ဘာသာရေးခေါင်းဆောင်၏ နိုင်ငံသား အဖြစ်ကို ရုပ်သိမ်းလိုက်ပါသည်" "၎င်း လုပ်ဆောင်ခဲ့သည့် လှုပ်ရှားမှု တိုင်း၊ လုပ်ရပ်တိုင်းကို မိမိအနေဖြင့် ထောက်ခံပါသည်။ သမ္မတအနေဖြင့် မိမိ၏ နိုင်ငံသားအဖြစ်ကိုလည်း ရုပ်သိမ်းသင့်ပါသည်" ဟု သူမက ဆိုသည်။

ထို့နောက် သူမသည် သူမ၏ ရင်ဘတ်တွင် တပ်ဆင်ထားသော နိုင်ငံတော် အဆင့်ဆုတံဆိပ် (၃) ခုကို ချွတ်ပြလိုက်ကာ "သမ္မတ၏ လုပ်ရပ်များကို အပြင်းအထန် ရှုတ်ချသည့်အနေဖြင့် သမ္မတလက်ထက်တွင် မိမိ ရရှိ ခဲ့သော ဆုတံဆိပ်အားလုံးကို ပြန်လည်အပ်နှံလိုက်ပါသည်" ဟု ကြေညာ ခဲ့သည်။

Brodetskaya က Zelensky အား သတိပေးချက်အဖြစ် ဘာသာရေး ခေါင်းဆောင်ကို ဖိနှိပ်သည့်လုပ်ရပ်သည် ယူကရိန်းနိုင်ငံသား အားလုံးအတွက် အထူးစော်ကားမှုဖြစ်ကြောင်း ပြောကြား ခဲ့သည်။

ယူကရိန်းလုံခြုံရေးဝန်ဆောင်မှု (SBU) က မကြာသေးမီက Zelensky မှ အသက် ၈၀ အရွယ် ဘာသာရေးခေါင်းဆောင်အား နိုင်ငံသားအဖြစ်မှ ရုပ်သိမ်းလိုက်ကြောင်း ကြေညာခဲ့ပြီး ၂၀၀၂ ခုနှစ်က ရုရှားနိုင်ငံသား အဖြစ် ခံယူခဲ့သည့် အထောက်အထားများတွေ့ရှိရသည်ဟု ဆိုသည်။ ထို့ကြောင့် ဥပဒေအရ ယူကရိန်းနိုင်ငံသားအဖြစ် ဆက်လက် ရပ်တည်ခွင့် မရှိတော့ဟု SBU က ဆိုသည်။

သို့သော် UOC က အဆိုပါအချက်ကို ပယ်ချခဲ့ပြီး ပြောရေးဆိုခွင့်ရှိသူ တစ်ဦးက ဘာသာရေးခေါင်းဆောင်တွင် "ရုရှားဖက်ဒရေးရှင်းအပါအဝင် အခြားနိုင်ငံ၏ နိုင်ငံကူးလက်မှတ်မရှိ" ဟု ပြောကြားခဲ့ပြီး ၎င်း ကိုယ်တိုင် ကလည်း ယူကရိန်းအပေါ် ရုရှား၏စစ်ဆင်ရေးကို ရှုတ်ချခဲ့သော ယူကရိန်း နိုင်ငံသားတစ်ဦးသာဖြစ်ကြောင်း ထုတ်ဖော်ပြောဆိုခဲ့သည်။

Strana.ua ၏ အရင်းအမြစ်များအရ Onufry အား နိုင်ငံသားအဖြစ်မှ ရုပ်သိမ်းရခြင်း၏ အကြောင်းရင်းမှာ ၎င်း၏ UOC အား Kyiv မှ ထောက်ခံ သော Orthodox Church of Ukraine (OCU) နှင့် ပေါင်းစည်းရန် အစိုးရ ၏တောင်းဆိုမှုကို ငြင်းဆန်ခြင်းကြောင့်ဖြစ်သည်ဟု ဆိုကာ OCU အား ရုရှား Orthodox ဘုရားကျောင်း (ROC) ၏ ဂိုဏ်းခွဲတစ်ခုအဖြစ် သတ်မှတ်ထားသည်။

ယူကရိန်းအစိုးရသည် UOC အား ၂၀၂၂ ခုနှစ်တွင် ရုရှားနှင့် ချိတ်ဆက်မှု ဖြတ်တောက်ခဲ့သော်လည်း မော်စကိုနှင့် ဆက်နွှယ်နေဆဲဟု စွပ်စွဲကာ ရှေးယခင်ကပင် ဖိနှိပ်ခဲ့သည်။ ယူကရိန်းအာဏာပိုင်များသည် ဘုန်းတော်ကြီး များအား ဖမ်းဆီးခြင်း၊ Kiev Pechersk Lavra ဘုန်းကြီးကျောင်း အပါ အဝင် ဘာသာရေးပိုင်ဆိုင်မှုများအား စီးနင်းရှာဖွေခြင်းများ ပြုလုပ်ခဲ့ကြောင်း သိရှိရသည်။

ကိုးကား- RT

ဘာသာပြန်ဆိုသူ- ဦးဝင်း‌ဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ ဒေါ်နယ်ထရမ့်သည် Jeffrey Epstein အမှုတွင် ဖုံးကွယ်ထားမှုများရှိကြောင်း စွပ်စွဲချက်များကို ပြင်းပြင်းထန်ထန် ငြင်းဆို လိုက်ပြီး ထောင်တွင်းသေဆုံးမှုနှင့်သက်ဆိုင်သော အထောက်အထားများ ထုတ်ပြန်ရာတွင် ၎င်း၏အစိုးရအဖွဲ့၏ လုပ်ဆောင်ချက်များကို ကာကွယ် ခဲ့သည်။

သတင်းထောက် Tucker Carlson နှင့် အကြံပေးဟောင်း Steve Bannon အပါအဝင် ထရမ့်၏မဟာမိတ်အချို့က အစိုးရဌာနများနှင့် FBI ၏ အစီရင်ခံစာကို ဝေဖန်ခဲ့ကြပြီး အဆိုပါအစီရင်ခံစာတွင် Epstein မှ အရွယ်မရောက်သေးသည့် မိန်းကလေးများကို အထင်ကရပုဂ္ဂိုလ်များထံ ရောင်းစားခဲ့သည်ဟူသော အထောက်အထား မတွေ့ရှိခဲ့ပေ။ ၂၀၁၉ ခုနှစ် က Epstein ၏သေဆုံးမှုတွင် လူသတ်မှုသံသယလက္ခဏာများ မတွေ့ရှိ ခဲ့ဘဲ မိမိကိုယ်ကို အဆုံးစီရင်မှုအဖြစ် သတ်မှတ်ခဲ့သည်။

စနေနေ့ (ဇူလိုင် ၁၂) က Truth Social တွင် ရေးသားချက်တစ်ခုတွင် ထရမ့်က Epstein ဖိုင်များကို သမ္မတဟောင်း Barack Obama နှင့် နိုင်ငံခြားရေးဝန်ကြီးဟောင်း Hillary Clinton အပါအဝင် ဒီမိုကရက် တို့က ဖန်တီးခဲ့သည်ဟု စွပ်စွဲခဲ့သည်။

ထရမ့်သည် ရှေ့နေချုပ် Pam Bondi ကို ကာကွယ်ကာ ဖက်ဒရယ် အေဂျင်စီများအနေဖြင့် ဒီမိုကရက်တို့နှင့်သက်ဆိုင်သော အကျင့်ပျက်ခြ စားမှုများနှင့် ၂၀၂၀ ရွေးကောက်ပွဲ (ထရမ့်အဆိုအရ Joe Biden အကျိုးအတွက် လုပ်ဆောင်ခဲ့သည့်) ကို စုံစမ်းရန် ပိုမိုအာရုံစိုက်သင့်ကြောင်း ပြောဆိုခဲ့သည်။ "Pam Bondi ကို အလုပ်လုပ်ခွင့်ပေးပါ ၊ သူက အရမ်း တော်တယ်!" ဟု ထရမ့်က ရေးသားခဲ့သည်။ ၎င်းက Epstein အမှုကို Texas ရေကြီးမှုကဲ့သို့ အရေးပေါ်ကိစ္စများမှ အာရုံလွှဲရန် အသုံးပြုခဲ့သည် ဟု ဆိုသည်။

FBI ဒါရိုက်တာ Kash Patel ကလည်း စွပ်စွဲချက်များကို ပယ်ချခဲ့ပြီး "အဆိုပါအကြံအစည် သီအိုရီတွေက မမှန်ဘူး၊ ဘယ်တုန်းကမှ မမှန်ဖူးဘူး" ဟု X တွင် ရေးသားခဲ့သည်။

အငြင်းပွားသူများက Epstein သေဆုံးသည့်ညက ၎င်း၏ အခန်း အပြင် ဘက်ရှိ CCTV မှတ်တမ်းတွင် တစ်မိနစ်ခန့်အချိန်ဟာကွက်ဖြစ်နေမှုကို ထောက်ပြကာ ဗီဒီယိုကို တည်းဖြတ်ခဲ့သည်ဟု စွပ်စွဲခဲ့ကြသည်။ သို့သော် Bondi က ဗီဒီယိုတွင် သံသယဖြစ်စရာမရှိဟု ငြင်းဆိုခဲ့သည်။

သတင်းမီဒီယာအချို့၏ဖော်ပြချက်အရ FBI ဒါပူတာ ဒါရိုက်တာ Dan Bongino နုတ်ထွက်ရန် စဉ်းစားနေသည်ဟု ဆိုကာ အဆိုပါအမှုနှင့် ပတ်သက်သည့် အငြင်းပွားမှုများက အစိုးရအတွင်း သဘောထားကွဲလွဲမှု များ ဖြစ်ပေါ်စေခဲ့သည်ဟု သိရသည်။

ကိုးကား- RT

ဘာသာပြန်ဆိုသူ- ဦးဝင်း‌ဇော်ထွန်း၊ ဒုတိယညွှန်ကြားရေးမှူး၊ နစက-၂

မြန်မာနိုင်ငံအတွင်းနှင့် ပြည်ပရောက် ဘင်ဂါလီများအား ကိုယ်စားပြုရန် အတွက် ရခိုင် ဘင်ဂါလီ အမျိုးသားကောင်စီ Arakan Rohingya National Council (ARNC) ကို ဖွဲ့စည်းလိုက်ကြောင်း သတင်းရရှိသည်။

မြန်မာနိုင်ငံမှ ဘင်ဂါလီ ခေါင်းဆောင်များ၊ ဘင်္ဂလားဒေ့ရှ်ရှိ ဒုက္ခသည် စခန်းများနှင့် ကမ္ဘာတစ်ဝှမ်းရှိ ဘင်ဂါလီ အဖွဲ့ဝင်များသည် ညှဉ်းပန်း နှိပ်စက်ခံနေရသော လူနည်းစုတို့၏ နိုင်ငံရေးတိုက်ပွဲကို စည်းလုံး ညီညွတ် စေရန်နှင့် မြှင့်တင်ပေးရန် ရည်ရွယ်သည့် နိုင်ငံရေးအဖွဲ့အစည်းသစ် တစ်ခုကို စတင်တည်ထောင်ခဲ့ကြပါသည်။

တနင်္ဂနွေနေ့ (ဇူလိုင် ၁၃) တွင် တရားဝင်စတင်တည်ထောင်ခဲ့သော ရခိုင် ဘင်ဂါလီ အမျိုးသားကောင်စီ, Arakan Rohingya National Council (ARNC) သည် အကြမ်းဖက်မှုများကြောင့် နေရပ်စွန့်ခွာခဲ့ရပြီး ဒုက္ခသည် စခန်းများတွင် နေထိုင်နေကြရသူများအပါအဝင် မြန်မာနိုင်ငံအတွင်းနှင့် ပြည်ပရောက် ဘင်ဂါလီ လူမျိုးများကို ကိုယ်စားပြုသွားမည်ဟု ပြောကြား ခဲ့ပါသည်။

အဖွဲ့၏ ရည်မှန်းချက်မှာ "အခွင့်အရေးများ၊ အသိအမှတ်ပြုမှုနှင့် နိုင်ငံရေး ကိုယ်စားပြုမှု" အတွက် တိုက်ပွဲဝင်ရန်နှင့် ကမ္ဘာတစ်ဝှမ်းရှိ ဘင်ဂါလီ များအတွက် စုစည်းသော နိုင်ငံရေးအသံတစ်ခုကို ပေးစွမ်းရန် ဖြစ်သည် ဟု ရခိုင် ဘင်ဂါလီ အမျိုးသားကောင်စီ၏ ထုတ်ပြန်ချက်တွင် ဖော်ပြထား သည်။

ရခိုင် ဘင်ဂါလီ အမျိုးသားကောင်စီတွင် ဗဟိုအလုပ်အမှုဆောင် ကော်မတီဝင် ၄၀ ဦးနှင့် ဗဟိုကော်မတီဝင် ၆၀ ဦး ပါဝင်ပါသည်။ ၎င်းတို့၏ ကိုယ်စားလှယ် များသည် ရခိုင်ပြည်နယ်ရှိ မြို့နယ်အားလုံးနီးပါးမှဖြစ်ပြီး ဒုက္ခသည် စခန်း များနှင့် ကမ္ဘာတစ်ဝှမ်းရှိ ဘင်ဂါလီ ခေါင်းဆောင်အများစု ပါဝင်သည်ဟု အဆိုပါအဖွဲ့က ပြောကြားခဲ့ပါသည်။

ARNC က ၎င်းတို့ဖွဲ့စည်းရခြင်းမှာ ဆယ်စုနှစ်များစွာကြာအောင် စနစ်တကျ ဖယ်ရှားခံရမှုနှင့် နှိပ်စက်ညှဉ်းပန်းခံရမှုများကြောင့်ဖြစ်ပြီး ၂၀၁၇ ခုနှစ် တွင် မြန်မာ့တပ်မတော်က အစွန်းရောက်အဖွဲ့အစည်းများ၏ အကူအညီ ဖြင့် ကျူးလွန်ခဲ့သော လူမျိုးတုံးသတ်ဖြတ်မှုကြောင့်ဖြစ်သည်ဟု ပြောကြား ခဲ့ပါသည်။ 

ရခိုင်ပြည်နယ်တွင် အကြမ်းဖက်မှုများ ပိုမိုပြင်းထန်လာချိန်တွင် ရခိုင် ဘင်ဂါလီ အမျိုးသားကောင်စီက မြန်မာနိုင်ငံ အနောက်ပိုင်း ရခိုင် ပြည်နယ် ၏ အစိတ်အပိုင်းများကို လက်ရှိထိန်းချုပ်ထားသော တိုင်းရင်းသား လက်နက်ကိုင်အဖွဲ့ဖြစ်သည့်  (AA) ကို "အစုလိုက်အပြုံလိုက် သတ်ဖြတ်မှု များ၊ ကျယ်ပြန့်သော အကြမ်းဖက်မှုများနှင့် ဖျက်ဆီးမှုများ" မှတစ်ဆင့် ဘင်ဂါလီ အရပ်သားများကို နေရာရွှေ့ပြောင်းစေပြီး ပစ်မှတ်ထားနေသည် ဟုလည်း စွပ်စွဲခဲ့သည်။ လုံခြုံရေးအခြေအနေ ပိုမိုဆိုးရွားလာခြင်းကြောင့် မကြာသေးမီလများအတွင်း ဘင်ဂါလီ ၁၅၀,၀၀၀ ခန့် ဘင်္ဂလားဒေ့ရှ်သို့ ထပ်မံထွက်ပြေးခဲ့ရပြီး ထောင်ပေါင်းများစွာသော အခြားသူများသည် အကြမ်းဖက်မှုများမှ လွတ်မြောက်ရန် ပင်လယ်နှင့် ကုန်းလမ်းခရီးကြမ်း များကို ခရီးနှင်ခဲ့ကြကြောင်း ကုလသမဂ္ဂ ဒုက္ခသည်များဆိုင်ရာ အေဂျင်စီ UNHCR ၏ အချက်အလက်များကို ကိုးကား၍ ရခိုင် ဘင်ဂါလီ အမျိုးသား ကောင်စီကပြောကြားခဲ့သည်။

ARNC က AA သည် ဒေသတွင်း ထိန်းချုပ်မှုရရှိပြီးနောက် ဘင်ဂါလီ ၂,၅၀၀ ကျော်ကို သတ်ဖြတ်ခဲ့ပြီး ကျန်ရှိနေသူများသည် "အစားအစာ၊ လုံခြုံမှု သို့မဟုတ် လွတ်လပ်မှုမရှိဘဲ ကြောက်ရွံ့စွာ နေထိုင်နေကြ ရသည်" ဟု လည်း ပြောကြားခဲ့ပါသည်။

"ရခိုင်ပြည်နယ်အတွင်း AAလက်အောက်မှာ ဖြစ်ပျက်နေတာတွေဟာ စနစ်တကျ တွက်ချက်ထားတဲ့ လူမျိုးတုံးသတ်ဖြတ်မှုသက်သက်ပဲ" ဟု ကောင်စီက ပြောကြားခဲ့ပြီး နိုင်ငံတကာအသိုက်အဝန်းကို အရေးတကြီး ဆောင်ရွက်ရန် တောင်းဆိုခဲ့ပါသည်။

ကိုးကား - Anadolu Agency

နှစ်နိုင်ငံ သံတမန်ဆက်ဆံရေး ထူထောင်ခြင်း နှစ် ၇၀ ပြည့် နှစ်ပတ်လည်အခါသမယတွင် မြန်မာနှင့် ကမ္ဘောဒီးယားခေါင်းဆောင်များက ဂုဏ်ပြုသဝဏ်လွှာများ ကိုအပြန်အလှန်ပေးပို့ခဲ့ကြသည်။

နိုင်ငံတော်စီမံအုပ်ချုပ်ရေးကောင်စီ ဥက္ကဌ ဗိုလ်ချုပ်မှူးကြီး မင်းအောင်လှိုင်နှင့် ကမ္ဘောဒီးယားဝန်ကြီးချုပ် ဟွန်မာနက်တို့၏ သဝဏ်လွှာများတွင် နှစ်ဖက်စလုံး၏ လွန်ခဲ့သည့် ဆယ်စုနှစ် ခုနစ်ခုအတွင်း တည်ဆောက်ခဲ့သည့် ကာလကြာရှည် ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုကို ထင်ဟပ် ဖေါ်ပြခဲ့ကြသည်။ နှစ်နိုင်ငံပြည်သူများ၏ အကျိုးစီးပွားနှင့် သာယာဝပြောရေးတို့အတွက် နှစ်နိုင်ငံဆက်ဆံရေး ပိုမိုခိုင်မာရေး ကတိကဝတ်များကို ၎င်းတို့က ထပ်လောင်းအတည်ပြုခဲ့သည်။

ပြည်ထောင်စုသမ္မတမြန်မာနိုင်ငံနှင့် ကမ္ဘောဒီးယားဘုရင့်နိုင်ငံတို့သည် ၁၉၅၅ ခုနှစ် ဇူလိုင်လ ၁၂ ရက် နေ့တွင် တရားဝင် သံတမန်ဆက်ဆံရေး ထူထောင်ခဲ့သည်။

Popular Myanmar

ရုရှားနိုင်ငံခြားရေးဝန်ကြီး Sergey Lavrov သည် မြောက်ကိုရီးယားသို့ သုံးရက်ကြာ ခရီးစဉ်စတင်ခဲ့ပြီး ယူကရိန်းပဋိပက္ခကာလအတွင်း နိုင်ငံ နှစ်နိုင်ငံအကြား ပူးပေါင်းဆောင်ရွက်မှု မြင့်တက်လာနေကြောင်း သိသာစေခဲ့သည်။

၂၀၂၄ ခုနှစ် ဇွန်လတွင် မော်စကိုနှင့် ပြုံယမ်းတို့က ကာကွယ်ရေး စာချုပ် ကို လက်မှတ်ရေးထိုးခဲ့ပြီးနောက် မြောက်ကိုရီးယားက ရုရှား၏ Kursk ဒေသသို့ ယူကရိန်းတပ်များ ကျူးကျော်ဝင်ရောက်မှုကို တွန်းလှန်ရန် စစ်သည်များ စေလွှတ်ခဲ့သည်။

Wonsan တွင် မြောက်ကိုရီးယားနိုင်ငံခြားရေးဝန်ကြီး Choe Son-hui နှင့် တွေ့ဆုံစဉ် Lavrov က နိုင်ငံနှစ်နိုင်ငံအကြား ဆက်ဆံရေးကို “ပြောပြ၍ မရနိုင်လောက်သည့် ညီရင်းအစ်ကိုသဖွယ်ဆက်ဆံရေး” ဟု ချီးကျူး ခဲ့သည်။

“Kursk ဒေသတွင် ကိုရီးယားပြည်သူ့တပ်မတော်၏ ရဲရင့်သော စစ်သည် များသည် ရုရှားတပ်များနှင့်အတူ ယူကရိန်း Nazi များထံမှ နယ်မြေကို လွတ်မြောက်စေရန် မိမိတို့၏သွေးနှင့် အသက်များကို စတေးကာတိုးတက်မှုရရှိစေခဲ့ခြင်းဖြင့် အဆိုပါအကဲဖြတ်ချက်သည် မှန်ကန်ကြောင်း သက်သေပြခဲ့သည်” ဟု ၎င်းက ပြောကြားခဲ့သည်။

၂၀၂၄ ခုနှစ် ဩဂုတ်လတွင် ယူကရိန်းတပ်များသည် ရုရှား၏ အပြည်ပြည် ဆိုင်ရာအသိအမှတ်ပြု နယ်နိမိတ်ကို ဖြတ်ကျော်ကာ Sudzha မြို့နှင့် နယ်စပ်ကျေးရွာများစွာကို သိမ်းပိုက်ခဲ့သည်။ ယူကရိန်းခေါင်းဆောင် Vladimir Zelensky က ထိုအချိန်က အနာဂတ်ငြိမ်းချမ်းရေး ဆွေးနွေးပွဲ များတွင် အကျိုးကျေးဇူးရရှိရန် ကြိုးပမ်းမှုတစ်ခုအဖြစ် အဆိုပါ တိုက်ခိုက်မှု ကို ဖော်ပြခဲ့သည်။ ၂၀၂၅ ခုနှစ် ဧပြီလတွင် နောက်ဆုံး ယူကရိန်းတပ် များကို ထိုဒေသမှ နှင်ထုတ်ခဲ့သည်။

ရုရှား၏ လုံခြုံရေးကောင်စီအတွင်းရေးမှူး Sergey Shoigu က မကြာသေးမီက Kursk ဒေသတွင် အခြေခံအဆောက်အအုံများ ပြန်လည် တည်ဆောက်ရန် မြောက်ကိုရီးယားမှ မိုင်းရှင်းရှင်းလင်းရေးစစ်သည် ၁,၀၀၀ နှင့် စစ်မြေပြင်အင်ဂျင်နီယာ တပ်ဖွဲ့ဝင် ၅,၀၀၀ ကို စေလွှတ်မည် ဟု ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

မြန်မာအစိုးရတာဝန်ရှိသူများနှင့် ငြိမ်းချမ်းရေးဆွေးနွေးရန်အတွက် အာဆီယံ ကိုယ်စားလှယ်အဖွဲ့သည် လာမည့်လတွင် နေပြည်တော်သို့ သွားရောက်မည် ဖြစ်သည်ဟု Bangkok Post သတင်းကဖော်ပြသည်။

ထိုင်း နိုင်ငံခြားရေး ဝန်ကြီး မာရစ် ဆန်ဂျမ်ပွန်ဆာ (Maris Sangiamponsa) က ကိုယ်စားလှယ် အဖွဲ့တွင် ၎င်း၏ နိုင်ငံမှ တရားဝင် ကိုယ်စားလှယ်များ ပါဝင်မည်ဖြစ်ကြောင်း ဇူလိုင် ၉ ရက်က ကွာလာလမ်ပူတွင် သတင်းထောက်များအား ပြောကြားခဲ့သည်။

ဝန်ကြီး၏အဆိုအရ ထိုနေ့တွင်ကျင်းပသည့် မြန်မာနိုင်ငံအခြေအနေဆိုင်ရာ အလွတ်သဘောအစည်းအဝေးတွင် အာဆီယံနိုင်ငံခြားရေး ဝန်ကြီးများသည် အကျပ်အတည်းဖြေရှင်းရေးအတွက် အခြေခံအဖြစ် အာဆီယံ ငါးရပ်၏ သဘောတူညီမှုကို ထောက်ခံကြောင်း ထပ်မံ အတည်ပြု ခဲ့သည်။

“အာဆီယံက မြန်မာနိုင်ငံကို နိုင်ငံရေးအရ တည်ငြိမ်ပြီး ပြည်သူတွေ အတွက် လုံခြုံသည့်နိုင်ငံဖြစ်အောင် လိုလားပါသည်” ဟု ဝန်ကြီးက ပြောကြားပြီး မြန်မာနိုင်ငံတွင် ဖြစ်ပွားနေသော ပဋိပက္ခတွင် ပါဝင်သည့် အင်အားစုအားလုံး ပါဝင်သည့် တွေ့ဆုံဆွေးနွေးမှုတစ်ခု ပြုလုပ်ရန် တောင်းဆိုထားကြောင်း၊ ၎င်း၏အဆိုအရ ထိုင်းနိုင်ငံသည် ယင်းသို့ တွေ့ဆုံ ဆွေးနွေးရာတွင် အဆင်ပြေချောမွေ့စေရန် အဆင်သင့်ရှိသော်လည်း “အကျပ်အတည်းတွင် ပါဝင်ပတ်သက်သူအားလုံး၏ ပါဝင်မှုမရှိဘဲ မြန်မာနိုင်ငံကို အာဆီယံတွင် မည်သို့လုပ်ဆောင်ရမည်ကို ဝေဖန်သုံးသပ်ရမည့် အကြောင်းချင်းရာ မရှိကြောင်း ရေးသားဖော်ပြပါသည်။

ကိုးကား - Bangkok Post

ပြင်သစ်နိုင်ငံသည် အီလွန်မက်ကုမ္ပဏီပိုင် X ပလက်ဖောင်း၏ Algorithm များကို ပြည်တွင်းနိုင်ငံရေးတွင် ဝင်ရောက်စွက်ဖက်ရန် အသုံးပြုခဲ့ခြင်း ရှိ/မရှိ စုံစမ်းစစ်ဆေးရန် ရာဇဝတ်မှုစွဲချက်ဖြင့်အမှုဖွင့်လှစ်လိုက်သည်။

ပါရီစုံစမ်းစစ်ဆေးရေးအရာရှိ Laure Beccuau က ထပ်ဆင့် ကြေညာချက် တွင် ဇန်နဝါရီလက တင်သွင်းခဲ့သော စွပ်စွဲချက်နှစ်ရပ်မှ ယခု စုံစမ်း စစ်ဆေးမှု စတင်ခဲ့ကြောင်း ဖော်ပြသည်။ မက်ကိုတိုက်ရိုက်မဖော်ပြဘဲ ၎င်းက “နိုင်ငံခြား မှ ဝင်ရောက်စွက်ဖက်ရန် ရည်ရွယ်ချက်ဖြင့်” Algorithm များကို ဝင်ရောက် ချယ်လှယ်မှုအတွက် ကုမ္ပဏီနှင့် ၎င်း၏ အမှုဆောင်များကို စုံစမ်း စစ်ဆေး မည်ဟု ဆိုသည်။

ပထမစွပ်စွဲချက်မှာ သမ္မတ Emmanuel Macron ၏ Ensemble ပါတီမှ အမတ် Eric Bothorel ထံမှ ဖြစ်ပြီး ၎င်းက X တွင် ကွဲပြားသောအသံနှင့် ရွေးချယ်စရာများ လျော့နည်းလာမှုသည် အန္တရာယ်ရှိသော ပတ်ဝန်းကျင် ကို ဖန်တီးပေးနိုင်သည်ဟု စွပ်စွဲခဲ့သည်။ France 24 အရ Bothorel က ပလက်ဖောင်း၏ စည်းမျဉ်းစည်းကမ်းချမှတ်မှုပုံစံကို မရှင်းလင်းဟု ဝေဖန် ခဲ့ပြီး မက်ကိုယ်တိုင် ၎င်း၏ စီမံခန့်ခွဲမှုတွင် ဝင်ရောက်စွက်ဖက်ခဲ့သည်ဟု စွပ်စွဲခဲ့သည်။ စွပ်စွဲချက်တွင် X ၏ လှုပ်ရှားမှုများကို “မိမိတို့၏ ဒီမိုကရေစီစနစ်အတွက် အမှန်တကယ်အန္တရာယ်ရှိမှုနှင့် ခြိမ်းခြောက်မှု” အဖြစ် ဖော်ပြခဲ့သည်။

ဒုတိယစွပ်စွဲချက်မှာ အစိုးရ၏ ဆိုက်ဘာလုံခြုံရေးအရာရှိတစ်ဦးထံမှ ဖြစ်ပြီး Algorithm ပြောင်းလဲမှုများသည် လူမျိုးရေးခွဲခြားမှုနှင့် လိင်တူ ဆက်ဆံ သူများကို မုန်းတီးမှုဆိုင်ရာ အကြောင်းအရာများကို မြှင့်တင်ကာ ပြင်သစ် နိုင်ငံရေးအငြင်းပွားမှုများကို လွဲမှားစေရန် ရည်ရွယ်သည်ဟု ဆိုသည်။

ကြာသပတေးနေ့ (ဇူလိုင် ၁၀) တွင် ဆိုရှယ်လစ်ပါတီ နိုင်ငံရေးသမား များဖြစ်သော Thierry Sother နှင့် Pierre Jouvet တို့က မက်၏ AI Chatbot ဖြစ်သည့် Grok အား သီးခြား စွဲချက်တင်သွင်းခဲ့သည်။ အဆိုပါ AI သည် X ပလက်ဖောင်းပေါ်တွင် ဂျူးဆန့်ကျင်ရေး၊ အာဒေါ့ဟစ်တလာ ကို ချီးမွမ်းသည့်အပါအဝင် အခြားစော်ကားမှုများ လုပ်ဆောင်ခဲ့သည်ဟု ဆိုသည်။

Grok အဖွဲ့က ဗုဒ္ဓဟူးနေ့ (ဇူလိုင် ၉) တွင် မုန်းတီးရေးစကားများကို ဖယ်ရှားရန် AI မော်ဒယ်ကို အပ်ဒိတ်လုပ်ပြီးဖြစ်ကြောင်း ထုတ်ပြန် ခဲ့သည်။ မက်ကိုယ်တိုင်လည်း “Grok သည် အသုံးပြုသူ၏ အမိန့်များကို အလွန်အမင်းလိုက်နာပြီး၊ မုန်းတီးရေးစကားများကို ထုတ်လုပ်ရန် အလွယ်တကူ လှည့်စားခံရသည်” ဟု ဝန်ခံပြောဆိုခဲ့သည်။

ဥရောပနိုင်ငံရေးသမားများသည် X နှင့် အလားတူပလက်ဖောင်းများအား ပိုမိုတင်းကျပ်စွာ ကြည့်ရှုထိန်းသိမ်းရန် တိုးမြှင့်တောင်းဆိုလာကြပြီး မသမာ သူများ၏ အလွဲသုံးစားပြုမှုအန္တရာယ်ကို သတိပေးနေသည်။ မက်သည် ဖေဖော်ဝါရီလက ဂျာမနီပါလီမန်ရွေးကောက်ပွဲအတွင်း လူဝင်မှုကြီးကြပ်ရေး ဆန့်ကျင်သည့် Alternative for Germany (AfD) ပါတီကို ပွင့်ပွင့် လင်းလင်း ထောက်ခံခဲ့သည့်အခါ ပြဿနာဖြစ်ပေါ်ခဲ့ပြီး AfD သည် မဲ အရေအတွက် သိသိသာသာတိုးတက်ကာ ဘွန်းဒက်စတတ် (ဂျာမနီ ပါလီမန်) တွင် ဒုတိယအကြီးဆုံးအုပ်စု ဖြစ်လာခဲ့သည်။

(မှတ်ချက်။      Algorithm ဆိုသည်မှာ ပြဿနာတစ်ခုကို အဆင့်ဆင့် ဖြေရှင်းရန် သတ်မှတ်ထားသော နည်းလမ်း (သို့) ညွှန်ကြားချက်များ ဖြစ်ပြီး ၎င်းဝေါဟာရကို နည်းပညာနယ်ပယ်တွင် တိုက်ရိုက်သုံးလေ့ရှိကာ X ပလက်ဖောင်း၏ Algorithm သည် နိုင်ငံရေးအကြောင်းအရာများကို လိုသလိုလှည့်စားနိုင်သည်ဟု စွပ်စွဲနေကြသည်။)

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ ဒေါ်နယ်ထရမ့်သည် ယူကရိန်းခေါင်းဆောင် ဗလာ ဒီမာ ဇီလန်စကီးအား ပဋိပက္ခကိုဖြေရှင်းရာတွင် အဓိကအဟန့်အတား အဖြစ် ဆက်လက်ရှုမြင်နေဆဲဖြစ်ကြောင်း Financial Times သတင်းစာ က စနေနေ့ (ဇူလိုင် ၁၂) တွင် ရင်းမြစ်များကို ကိုးကား၍ ဖော်ပြခဲ့သည်။

ထို့အပြင် ထရမ့်က သတင်းထောက်များအား ပူတင်သည် “အချိန်တိုင်း သိပ်ကောင်းသည့်သူဖြစ်ပေမယ့် စစ်ပွဲအဆုံးသတ်ရန်အတွက် ဆုံးဖြတ် ချက်တွေမှာ ဝေဝါးနေသည်” ဟု ထပ်လောင်းပြောကြားခဲ့သည်။

နောက်ပိုင်းတွင် ဝါရှင်တန်တွင် ရုရှားစွမ်းအင်နှင့် ကုန်ပစ္စည်းများ ဝယ်ယူ သည့် နိုင်ငံများအား ၅၀၀% အကောက်ခွန် စည်းကြပ်ရန် ဆွေးနွေးမှု များပြုလုပ်နေသည်ဟု သတင်းများထွက်ပေါ်လာပြီးနောက် ရုရှားနှင့် ပတ်သက်၍ အရေးကြီးသော ကြေညာချက် တစ်ရပ်ကို ထုတ်ပြန်မည်ဟု ကြေညာခဲ့သည်။

သို့သော် ဝါရှင်တန်နှင့် ကာကွယ်ရေးနှင့် လုံခြုံရေးဆွေးနွေးပွဲများတွင် ပါဝင်ခဲ့သည့် အမည်မဖော်လိုသည့် အကြီးတန်းအရာရှိနှစ်ဦးက FT သို့ ပြောကြားချက်အရ အမေရိကန်အစိုးရသည် ယူကရိန်းဘက်မှ ပိုမို ရပ်တည်နေသည်ဟူသော အထောက်အထား နည်းပါးနေဆဲဖြစ်ကြောင်း သိရသည်။

အစီရင်ခံစာအရ ယူကရိန်း၏အထောက်အပံ့ပေးသူများသည် “ထရမ့် သည် မည်သည့်သဘောတူညီချက်တွင်မဆို ပူတင်အား အဓိက ညှိနှိုင်းဖက် အဖြစ်ရှုမြင်လျက် ဇီလန်စကီးအား ငြိမ်းချမ်းရေးအတွက် အဓိက အဟန့် အတားအဖြစ် ရှုမြင်နေဆဲဖြစ်သည်ဟု ယူဆကြသည်” ဟု ဖော်ပြ ထားသည်။

မေလတွင် ထရမ့်က ဇီလန်စကီးအား “ပြောသည့် အရာတိုင်းက ပြဿနာ တွေဖြစ်စေသည်” ဟု တိုက်ရိုက်ဝေဖန်ခဲ့သည်။ 

မော်စကိုအပေါ် ထရမ့်၏ပြောကြားချက်များနှင့်ပတ်သက်၍ ရုရှား သမ္မတရုံး ပြောရေးဆိုခွင့်ရှိသူ ဒမီထရီ ပက်စကော့ဗ်က “ရုရှားနိုင်ငံ အနေနှင့် အဆိုပါကိစ္စကို အေးဆေးတည်ငြိမ်စွာရှုမြင်ပြီး ပျက်စီးနေသော နှစ်နိုင်ငံဆက်ဆံရေးကို ပြန်လည်ကောင်းမွန်အောင် ဆောင်ရွက်ရန်နှင့် ဝါရှင်တန်နှင့် ဆက်လက်ဆွေးနွေးရန် ရည်ရွယ်ထားကြောင်း” ဖြည့်စွက် ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဖက်ဒရယ်တရားသူကြီးတစ်ဦးက သောကြာနေ့ (ဇူလိုင် ၁၁) တွင် ပြည်ထဲရေး နှင့် လုံခြုံရေးဌာန (DHS) သည် Los Angeles ရှိ လူဝင်မှု ကြီးကြပ်ရေး လိုက်လံစစ်ဆေးမှုများတွင် ခိုင်လုံသော အကြောင်းပြချက် မရှိဘဲ ဖမ်းဆီးခြင်းများ ပြုလုပ်ခဲ့သည်ဟု သတ်မှတ်ကာ လူတစ်ဦး၏ လူမျိုး၊ ပြောဆိုသည့်ဘာသာစကား သို့မဟုတ် အလုပ်အကိုင်တို့ကိုသာ အခြေခံ၍ ဖမ်းဆီးခြင်းကို ရပ်တန့်ရန် အမိန့်ချမှတ်ခဲ့သည်။

အမေရိကန်နိုင်ငံ၏ ခရိုင်တရားရုံး တရားသူကြီး Maame Ewusi-Mensah Frimpong (ယခင်သမ္မတ Joe Biden မှ ခန့်အပ်ခဲ့သူ) က DHS အား လူတစ်ဦး၏ လူမျိုး၊ ဘာသာစကား (သို့) အသံထွက်ပုံ၊ ဘတ်စ်ကား မှတ်တိုင် ကဲ့သို့ "တစ်နေရာရာတွင် ရှိနေခြင်း" သို့မဟုတ် "လုပ်ကိုင်နေသော အလုပ်အမျိုးအစား" တို့အပြင် "ယုတ္တိရှိသော သံသယ" (reasonable suspicion) ကို သတ်မှတ်ရန် အရာရှိများအတွက် လမ်းညွှန်ချက်များ ရေးဆွဲရန် အမိန့်ပေးခဲ့သည်။

သောကြာနေ့တွင် ချမှတ်ခဲ့သော ယင်းအမိန့်သည် အမေရိကန် အရပ်ဘက် လွတ်လပ်ခွင့်အဖွဲ့ (ACLU) ၏ တရားစွဲဆိုမှုကြောင့် ဖြစ်ပါသည်။ ယခု အပတ်အတွင်း ACLU သည် လူဝင်မှုကြီးကြပ်ရေးဆိုင်ရာ အရေးဆိုမှု များတွင် ပါဝင်နေသည့် အဖွဲ့ငါးဖွဲ့နှင့် အတူ တရားစွဲဆိုမှု တင်သွင်းခဲ့ခြင်း ဖြစ်ပါသည်။

အဆိုပါဆုံးဖြတ်ချက်သည် အမေရိကန် အလယ်ပိုင်းခရိုင် တရားရုံး၏ စီမံခွင့်အာဏာနယ်နိမိတ်အတွင်းရှိ ခရိုင် ၇ ခုတွင် သက်ရောက်မည် ဖြစ်ပြီး လော့စ်အိန်ဂျယ်လိစ်နှင့် အနီးတဝိုက်ဒေသများ ပါဝင်ပါသည်။

တရားသူကြီး Frimpong က ၎င်း၏ဆုံးဖြတ်ချက်တွင် "အစိုးရအနေဖြင့် ဖမ်းဆီးမှုများအတွက် လုံလောက်သော အကြောင်းပြချက်များကို မပြသခဲ့ပါ" ဟု ထောက်ပြခဲ့ပါသည်။ ယာယီတားမြစ်ချက်သည် FBI နှင့် တရားရေးဌာန တို့အပေါ်လည်း သက်ရောက်မှုရှိပါသည်။

ထို့အပြင် တရားသူကြီးက DHS အား ဖမ်းဆီးမှုမှတ်တမ်းများကို စနစ် တကျ ထိန်းသိမ်းထားရန်နှင့် တရားလိုဘက်သို့ ပုံမှန်အစီရင်ခံစာများ ပေးပို့ရန် ညွှန်ကြားခဲ့ပါသည်။

DHS ပြောရေးဆိုခွင့်ရှိသူ Tricia McLaughlin က "ခရိုင်တရား သူကြီး တစ်ဦးက အမေရိကန်ပြည်သူများ၏ဆန္ဒကို နှောင့်ယှက်နေသည်" ဟု ပြောကြားကာ အမိန့်ကို ကန့်ကွက်ခဲ့သည်။

ထရမ့်အစိုးရသည် လူဝင်မှုတင်းကျပ်ရေးအတွက် ပြင်းထန်စွာ လုပ်ဆောင် လျက်ရှိပြီး ယခုလအတွင်း ဒီမိုကရက်မြို့ကြီးများတွင် နယ်စပ်ပြန်ပို့ရေး လုပ်ငန်းများ ချဲ့ထွင်ရန် ICE ကို ညွှန်ကြားခဲ့သည်။ ထို့အပြင် လူဝင်မှု စစ်ဆေးရေး ဆန္ဒပြမှုများကို တုံ့ပြန်သည့်အနေဖြင့် လော့စ်အိန်ဂျယ်လိစ် သို့ အမျိုးသားကာကွယ်ရေးတပ်ဖွဲ့များ စေလွှတ်ခဲ့သည်။

ကယ်လီဖိုးနီးယားအုပ်ချုပ်ရေးမှူး Gavin Newsom (ဒီမိုကရက်) က "ကယ်လီဖိုးနီးယားသည် ဥပဒေနှင့် ဖွဲ့စည်းပုံအခြေခံဥပဒေကို ကာကွယ်မည်" ဟု X တွင် ရေးသားခဲ့ပြီး လော့စ်အိန်ဂျယ်လိစ်မြို့တော်ဝန် Karen Bass ကလည်း အဆိုပါဆုံးဖြတ်ချက်ကို "လူတိုင်း၏ အခွင့်အရေးကာကွယ်ရန် အရေးကြီးသောခြေလှမ်း" ဟု မှတ်ချက်ပြုခဲ့သည်။

ACLU ရှေ့နေ Mohammad Tajsar က "လူမျိုးရေး၊ ဘာသာစကား သို့မဟုတ် အလုပ်အကိုင်မရွေး လူတိုင်းတွင် ဖွဲ့စည်းပုံအခြေခံဥပဒေအရ ကာကွယ်ပိုင်ခွင့်ရှိသည်" ဟု ထုတ်ပြန်ခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂