ရုရှားတပ်မတော်သည် ယူကရိန်းတို့၏ ရုရှားနိုင်ငံအတွင်းပိုင်းအထိ ဒုံးကျည်တိုက်ခိုက်မှုများကို တုံ့ပြန် ရန်အတွက် အနောက်နိုင်ငံထုတ် တာဝေးပစ် လက်နက် များ တပ်ဆင်ထားသည့် ယူကရိန်းတပ်စခန်းများကို တစ်ပတ်အတွင်းတိုက်ခိုက်ခဲ့ကြောင်း၊ ရုရှားတပ်ဖွဲ့ များသည် နိုဝင်ဘာလ ၂၅ရက် တနင်္လာနေ့တွင် ယူကရိန်းတို့၏ ATACMS ဒုံးကျည်ပစ်လွှတ်မှုစနစ် ၅ ခုကိုဖျက်ဆီးရန်အတွက် Iskander ဒုံးကျည်များကို အသုံးပြုခဲ့ကြောင်း၊ နိုဝင်ဘာလ ၂၅ ရက်နေ့တွင် ရုရှားတပ်မတော်၏ Iskander ဒုံးကျည်များသည် Sumy ဒေသတွင် ATACMS ဒုံးကျည်ပစ်လွှတ်စက် ၅ လုံး၊ MLRS ၂ လုံး၊ HIMARS ဒုံးကျည်ပစ်လွှတ်စက် ၃ လုံးနှင့်အတူ ထိုဒုံးကျည်ပစ်လွှတ်စက်များ၏ တိုက်ခိုက် ရေးအဖွဲ့များမှ စစ်သည် ၃၀ ဦးအထိ ချေမှုန်းနိုင်ခဲ့ ကြောင်း၊ Iskander ဒုံးကျည် အဖွဲ့များသည် နိုဝင်ဘာလ ၂၅ရက်နှင့် ၂၆ ရက်များတွင်အိုဒက်ဆာဒေသရှိ Grom-2 ပဲ့ထိန်းဒုံးကျည်ပစ်လွှတ်စက်၂ခု ကိုချေမှုန်းဖျက်ဆီးခဲ့သည့်အပြင် ယူကရိန်းတို့၏ Neptun anti-ship ဒုံးကျည်ပစ်လွှတ်စနစ်ကိုလည်း ဖျက်ဆီးနိုင်ခဲ့ကြောင်း သိရှိရသည်။

ယူကရိန်းအထူးစစ်ဆင်ရေးစင်တာ၏ တပ်ဆင်ရေး နေရာတွင် ရုရှားတပ်မတော်၏ အစ္စကန်ဒါ ဒုံးကျည် တိုက်ခိုက်မှုကြောင့် ပြင်သစ်လူမျိုး ၉ ဦးအပါအဝင် ယူကရိန်း တပ်ဖွဲ့ဝင် ၇၂ ဦးသေဆုံးခဲ့ကြောင်း၊ နိုဝင်ဘာလ ၂၈ ရက်နေ့တွင် ယူကရိန်း၏ ကာကွယ်ရေး -စက်မှုဆိုင်ရာ အဆောက်အအုံနှင့် ၎င်း၏ စစ်ဆင်ရေးကို ထောက်ပံ့နေသည့် အခြေခံအဆောက်အအုံများအပေါ် စုပေါင်းတိုက်ခိုက်မှုတစ်ခုပြုလုပ်ခဲ့ကြောင်း၊ ရုရှား တပ်ဖွဲ့များသည် ပြီးခဲ့သည့် ၂ရက်အတွင်း ယူကရိန်း တို့အပေါ် Caliber, Kinzhal နှင့် Zircon အမျိုးအစား ဒုံးကျည်စုစုပေါင်း ၁၀၀ စင်း နှင့်ဂျီရန်-၂ ဒရုန်း ၄၆၆ စီးကိုအသုံးပြုတိုက်ခိုက်ခဲ့ကြောင်း၊ ရုရှားတပ်ဖွဲ့ များသည် ယူကရိန်း၏ စစ်ရေး-စက်မှုလုပ်ငန်းစုများ၏ အဓိကအဆောက်အအုံ ၁၇ ခုကိုဒုံးကျည် ၉၀ စင်းနှင့်ဂျီရန်-၂ ဒရုန်း ၁၀၀ စင်းတို့ဖြင့်နိုဝင်ဘာလ ၂၇ ရက်နေ့တွင်တိုက်ခိုက်ခဲ့ကြောင်း၊ ရုရှားတပ်ဖွဲ့များ သည်အနောက်တိုင်းလက်နက်များ၏နေရာချထားမှုလမ်းကြောင်းများကိုခြေရာခံပြီး၎င်းတို့ကိုဆက်လက်ဖယ်ရှားပစ်မည်ဖြစ်ကြောင်း ရုရှားကာကွယ်ရေးဝန်ကြီး ဌာန၏ နိုဝင်ဘာလ ၂၈ ရက်နေ့က ထုတ်ပြန်ချက်များတွင် ဖော်ပြထားသည်။

ကိုးကား - ရုရှားကာကွယ်ရေးဝန်ကြီးဌာန

Kursk ဒေသတွင် ဖမ်းဆီးခံခဲ့ရသော ဗြိတိန် ကြေးစား စစ်သား James Scott Rhys Anderson က ၎င်း၏ ယူကရိန်း ခရီးစဉ်အတွက် နောင်တရကြောင်း ထုတ်ဖော် ပြောကြားခဲ့ပြီး ယူကရိန်းတပ်ဖွဲ့များသည် အဆိုပါ ဒေသအား ကျူးကျော်ခြင်းမပြုသင့်ကြောင်း ၎င်းက ပြောကြားခဲ့ပါသည်။

ကိုးကား -  BBC

ရုရှားတပ်မတော်သည် အထူးစစ်ဆင်ရေး စတင်ချိန် မှစ၍ ယူကရိန်းတို့၏ စုစုပေါင်း လေယာဉ် ၆၄၉ စီး၊ ရဟတ်ယာဉ် ၂၈၃ စင်း၊ မောင်းသူမဲ့လေယာဉ် ၃၆,၈၈၂ စီး၊ လေယာဉ်ပစ်ဒုံးကျည်စနစ် ၅၈၆ စင်း၊ တင့်ကား၁၉,၅၂၀ စီးနှင့် အခြားသံချပ်ကာတိုက်ခိုက်ရေး ယာဉ် ၁,၄၉၂ စီး၊ ပစ်လွှတ်သည့် ဒုံးပျံစနစ် အပါအဝင် အမြောက် ၁၈,၆၄၇ လက်၊ စိန်ပြောင်း ၂၈,၇၈၃ လက်နှင့် အထူးစစ်ယာဉ်များကို တိုက်ခိုက်ချေမှုန်းနိုင်ခဲ့ကြောင်း ရုရှားကာကွယ်ရေးဝန်ကြီးဌာနက နိုဝင်ဘာလ ၂၈ ရက်နေ့ ၌ ၎င်းတို့၏ အထူးစစ်ဆင်ရေးဆောင်ရွက်မှု အစီရင်ခံ စာတွင် ဖော်ပြထားပါသည်။

ကိုးကား - Ministry of Defence of the Russian Federation

ရုရှားတပ်မတော်မှ တပ်ဖွဲ့ဝင်များသည် Tornado (MLRS) ဘက်စုံသုံး ဒုံးကျည်များကို အသုံးပြု၍ Kharkov ဒေသရှိ မောင်းသူမဲ့လေယာဉ်များရှိသည့် ယူကရိန်းတပ်ဖွဲ့ဝင်များ၏ နေရာကို ဝင်ရောက်တိုက်ခိုက်ခဲ့ရာ ယူကရိန်းစစ်သည် ၆၀ ကျော်နှင့် စစ်ကား ၁၀ စီးကျော် ပျက်စီးခဲ့ကြောင်း ရုရှားကာကွယ်ရေး ဝန်ကြီး ဌာနက သတင်းထုတ်ပြန်ခဲ့သည်။

ကိုးကား- Ministry of Defence of the Russian Federation

ရုရှားတပ်ဖွဲ့များသည် ယခုသီတင်းပတ်အတွင်း Donetsk ပြည်သူ့သမ္မတနိုင်ငံနှင့် Kharkov ဒေသများတွင် ရန်သူ့ နယ်မြေလေးခုကို သိမ်းပိုက်နိုင်ခဲ့ကြောင်း  ရုရှား ကာကွယ်ရေးဝန်ကြီးဌာန၏ အပတ်စဉ် အထူးစစ်ဆင် ရေးတိုးတက်မှုနှင့် ပတ်သက်၍ ရှင်းလင်းချက်တွင် ဖော်ပြထားသည်။

ရုရှားတပ်ဖွဲ့ဝင်များသည် ယူကရိန်းစစ်သွေးကြွ အကျဉ်း သား ၃၄ ဦးကို ဖမ်းဆီးနိုင်ခဲ့ပြီး ၎င်းတို့အနက် ၁၇ ဦး သည် ရုရှားနိုင်ငံ Kursk စစ်ရေးနယ်မြေတွင် လက်နက်ချခဲ့ ပါသည်။ 

ရုရှားတပ်မတော်၏ Tsentr တပ်ဖွဲ့သည် ယူကရိန်း တို့၏ တန်ပြန်တိုက်ခိုက်မှု ၅၃ ခုကို ချေမှုန်းနိုင်ခဲ့ပြီး  ယူကရိန်းတပ်ဖွဲ့ဝင် ၂,၉၀၀ ကျော် ဆုံးရှုံးမှုရှိခဲ့ကြောင်း ဖော်ပြထားသည်။

ရုရှားတိုက်ခိုက်ရေးတပ်ဖွဲ့၏ တာဝန်ယူရာ Sever ဒေသ တွင် ယူကရိန်းစစ်သည် ၂,၄၂၀ဦး အထိ ဆုံးရှုံးခဲ့ရကြောင်း ဖော်ပြထားသည်။ 

ရုရှားတပ်မတော်၏ Zapad တပ်ဖွဲ့သည် ယူကရိန်းတို့၏ တန်ပြန်တိုက်ခိုက်မှု ၂၈ ခုကို ချေမှုန်းနိုင်ခဲ့ပြီး ယူကရိန်းစစ်သည်  ၃,၁၅၀ ဦး ကျော် ဆုံးရှုံးခဲ့ရကြောင်း ဖော်ပြထားသည်။

ရုရှားတပ်မတော်၏ Yug တိုက်ခိုက်ရေးတပ်ဖွဲ့၏ တာဝန် ကျရာဒေသတွင် ယူကရိန်းစစ်သည်၂,၇၀၀ကျော် ဆုံးရှုံးခဲ့ရကြောင်း ဖော်ပြထားသည်။

ရုရှားလေကြောင်းရန် ကာကွယ်ရေးစနစ်များသည် Neptune ဒုံးပျံတစ်စင်း၊ ATACMS ဒုံးကျည် ၁၀ စင်း၊ HAMMER ဗုံး ၁၅ လုံးနှင့် ယူကရိန်းဒရုန်း ၃၅၃ စင်းတို့ကိုပစ်ချနိုင်ခဲ့ကြောင်း ရုရှားကာကွယ်ရေးဝန်ကြီးဌာန၏ အပတ်စဉ်အထူးစစ်ဆင်ရေးတိုးတက်မှုနှင့်ပတ်သက်၍ ရှင်းလင်းချက်တွင်ဖော်ပြထားသည်။

ကိုးကား- Ministry of Defence of the Russian Federation

နယ်သာလန်နိုင်ငံသည် Patriot လေကြောင်းရန် ကာကွယ်ရေးစနစ်သုံး ဒုံးကျည်သုံးစင်းကို ယူကရိန်းသို့ ထောက်ပံ့ပေးခဲ့ကြောင်း နယ်သာလန် ကာကွယ်ရေးဝန်ကြီး Ruben Brekelmans က နိုဝင်ဘာလ၂၈ ရက်၊ ကြာသပတေးနေ့တွင် ပြောကြားခဲ့ကြောင်း RIA Novosti က ဖော်ပြခဲ့သည်။

ယူကရိန်းနိုင်ငံသားများသည် ပြင်းထန်သည့် ဆောင်းရာသီ တွင် တိုက်ခိုက်မှုများ ဆိုးရွားစွာ ရင်ဆိုင်နေရသည့် အတွက် ၎င်းတို့ကို Patriot လေကြောင်းရန် ကာကွယ် ရေးစနစ် လောင်ချာသုံးစင်းပေးခဲ့ကြောင်း  Brekelmans က ၎င်း၏ လူမှုကွန်ရက်တွင် ရေးသားခဲ့သည်။

နယ်သာလန်နိုင်ငံမှ ယူကရိန်းသို့ ပေးအပ်သည့် စစ်ရေးအကူအညီ စုစုပေါင်းသည် ယူရို ၃.၇၆ ဘီလီယံခန့် ရှိကြောင်း အစောပိုင်းသတင်းများတွင် ဖော်ပြခဲ့သည်။

ကိုးကား - RIA Novosti

ရုရှားနိုင်ငံ သမ္မတ ဗလာဒီမာပူတင်သည် အထူးစစ်ဆင် ရေးဇုန်အတွင်း အခြေအနေများနှင့် ရုရှား၏နောက်ဆုံးပေါ်လက်နက်များအကြောင်းကို ၎င်း၏CSTO မိတ်ဖက်နိုင်ငံ များအား နိုဝင်ဘာလ ၂၈ ရက်နေ့၊ ကာဇက်စတန်နိုင်ငံ Astana တွင် ကျင်းပပြုလုပ်နေသည့် CSTO ထိပ်သီး အစည်းအဝေးတွင် ရှင်းလင်းပြောကြားခဲ့ကြောင်း ကရင် မလင်သတင်းဌာနက ဖော်ပြထားသည်။

ရုရှားနိုင်ငံသည် Oreshnik ဒုံးကျည်ဖြင့် တိုက်ခိုက်ရန် အတွက် ကာကွယ်ရေးစစ်ဦးစီးချုပ်နှင့် ကာကွယ်ရေး ဝန်ကြီးဌာနတို့သည် လက်ရှိအချိန်တွင် ယူကရိန်းရှိ ပစ်မှတ်များကို ရွေးချယ်နေကြကြောင်း၊ ယူကရိန်းရှိ ဆုံးဖြတ်ချက်ချရေးစင်တာများသည် Oreshnik တိုက်ခိုက်မှုများအတွက် ပစ်မှတ်များဖြစ်လာနိုင်ကြောင်း၊ ရုရှားသည် တာဝေးပစ်ဒုံးကျည်များ အသုံးပြုမှုနှင့် ပတ်သက်၍ နေတိုးအား သတိပေးခဲ့ကြောင်း၊ ရုရှား၏ ဒုံးကျည်ထုတ်လုပ်မှုသည် NATO အဖွဲ့၏ စုပေါင်း ထုတ်လုပ်မှုထက် ၁၀ ​​ဆ ရှိကြောင်း၊  ရုရှားသည် အသံထက်မြန်သော ဒုံးကျည်ထုတ်လုပ်မှုကို လေးပုံ တစ်ပုံ တိုးမြှင့်မည်ဖြစ်ကြောင်း၊ Oreshnik ဒုံးကျည် များသည် ပြိုင်ဘက်မရှိသေးကြောင်း၊ ကမ္ဘာပေါ်တွင် ရုရှား၏ Oreshnik နှင့်ညီမျှသည့် အမျိုးအစား မရှိ သေးကြောင်း၊ မကြာခင်အချိန်အထိ အမျိုးအစားတူ ပေါ်လာနိုင်မည်မဟုတ်ကြောင်း သမ္မတပူတင်က ရှင်းပြ ခဲ့ပါသည်။

Oreshnik ဒုံးကျည်များ၏ ကြီးမားသော တိုက်ခိုက်မှု၏ အကျိုးသက်ရောက်မှုသည် နျူကလီးယားလက်နက်များ အသုံးပြုမှုနှင့် နှိုင်းယှဉ်နိုင်မည်ဖြစ်ကြောင်း၊ Oreshnik ဒုံးကျည်၏ ထိခိုက်ပျက်စီးနိုင်သော ဒြပ်စင်များ၏ အပူချိန်သည် ၄,၀၀၀ ဒီဂရီစင်တီဂရိတ်အထိရှိပြီး၊ Oreshnik ပေါက်ကွဲမှု၏ ဗဟိုချက်ရှိ အရာအားလုံးသည် အခြေခံ အားဖြင့် အမှုန်အမွှားများအဖြစ်သို့ ပြောင်းလဲသွားနိုင် ကြောင်း၊ ရုရှားနိုင်ငံ၏ပိုင်နက်ထဲသို့ ယူကရိန်းဘက်မှ ပစ်လွှတ်လိုက်သည့် ဒုံးကျည်များကို တုံ့ပြန်သည့်အနေဖြင့်ယူကရိန်းရှိအဆောက်အအုံများကို တိုက်ခိုက်မှုအသစ်များ ဆက်လက်လုပ်ဆောင်မည်ဖြစ်ကြောင်း၊ ရုရှားသည် ၎င်း၏နယ်မြေပေါ်တွင် ဖြစ်ပွားနေသောတိုက်ခိုက်မှုများ အပေါ်တုံ့ပြန်၍ ယူကရိန်း၏ စစ်တပ်အဆောက်အအုံ များကို ဒုံးကျည်ပေါင်း ၁၀၀ ခန့်ဖြင့် တိုက်ခိုက်ခဲ့ကြောင်း ဗလာဒီမီယာပူတင်က CSTO ထိပ်သီးအစည်းအဝေးတွင် ပြောကြားခဲ့သည်။

ကိုးကား - kremlin.ru

အစ္စရေးနှင့် ဟစ်ဘိုလာအကြား  အပစ်အခတ်ရပ်စဲမှုသည်  ဒေသစံတော်ချိန် နံနက် ၀၄၀၀ (လက်ဘနွန်စံတော်ချိန် ၀၂၀၀) အချိန်တွင် စတင်မည်ဖြစ်ပါသည်။  ယခုစစ်ပြေ ငြိမ်းရေးသည် လက်ဘနွန်မြို့အပါအဝင် အခြားမြို့ကြီး များအပေါ် အစ္စရေးတို့၏ တိုက်ခိုက်မှုများ အပြီးသတ် အဆုံးသတ်စေလိမ့်မည်ဖြစ်ပြီး တစ်နှစ်ကျော်ကြာ ဖြစ်ပွားလျက်ရှိသည့် လက်ဘနွန်တောင်ပိုင်းနှင့်  အစ္စရေး မြောက်ပိုင်းတို့ရှိ စစ်ရေးပဋိပက္ခများ ရပ်တန့်သွားမည် ဟု မျှော်လင့်နေကြပါသည်။ 

အမေရိကန်သမ္မတဂျိုးဘိုင်ဒန်က  အစ္စရေးနှင့် ဟစ်ဘိုလာ အကြား အပစ်အခတ်ရပ်စဲမှု သဘောတူညီချက်တွင်  အစ္စရေးတပ်များအနေဖြင့်  ရက်ပေါင်း ၆၀ အတွင်း လက်ဘနွန်မှဆုတ်ခွာပေးရန်နှင့်  လက်ဘနွန်တောင်ပိုင်း တွင်  ဟစ်ဘိုလာများက တပ်ဖွဲ့များ ပြန်လည် မဖွဲ့စည်း နိုင်ရေး လက်ဘနွန်စစ်တပ်အနေဖြင့် နယ်မြေစိုးမိုးမှုလုပ်ငန်းများဆောင်ရွက်ရေးတို့ ပါဝင်ကြောင်း ပြောကြား လိုက်သည်။

“ပစ်ခတ်ရပ်စဲခြင်းသည် စစ်ပွဲ အမှန်တကယ် အဆုံး သတ်ခြင်း ဟုတ်၊ မဟုတ် ဆိုသည်ကို လက်ဘနွန် ပြည်သူများက စောင့်ကြည့်လျက်ရှိကြောင်း” လက်ဘနွန် တောင်ပိုင်းတွင် နေထိုင်သူ Ali Hashem က AI Jazeera ကို ပြောကြားပါသည်။

ကိုးကား - AI Jazeera

Trump သမ္မတရာထူးကို မရယူခင် Biden သည် ယူကရိန်း၏ရပ်တည်ချက် အားကောင်းစေရန် ကြိုးပမ်းနေသည်ဟု The Washington Post သတင်းက ရေးသားဖော်ပြသည်။

ယူကရိန်းသို့ ATACMS ဒုံးကျည်များနှင့် မြေမြုပ်မိုင်းများ ထောက်ပံ့မှုသည် မြောက်ကိုရီးယား၏ စွက်ဖက်မှုကို ဟန့်တားရန်နှင့် ရုရှား၏ထိုးစစ်ကို ရပ်တန့်ရန် ရည်ရွယ်ပြီး ယူကရိန်း၏စေ့စပ်ညှိနှိုင်းရေးအနေအထားကို အားကောင်း စေသည်ဟု အမေရိကန်တာဝန်ရှိသူများက ပြောကြား ခဲ့သည်။ အဆိုပါမိုင်းများနှင့် ATACMS ထောက်ပံ့ရေးဆိုင်ရာ ဆုံးဖြတ်ချက်ကို အမေရိကန်သမ္မတရွေးကောက်ပွဲ အပြီး တွင် ပြုလုပ်ခဲ့ခြင်းဖြစ်သည်ဟု ရေးသားဖော်ပြပါသည်။

ကိုးကား - The Washington Post

နိုင်ငံတော်နည်းပညာပူးပေါင်းဆောင်ရွက်မှု Rostec ၏ အစိတ်အပိုင်းတစ်ခုဖြစ်သည့် United Aircraft Cooperation (UAC)အနေဖြင့် Su-34 ရှေ့တန်းဗုံးကြဲ တိုက်လေယာဉ် အသစ် တစ်သုတ်ကို ရုရှားနိုင်ငံလေကြောင်း အာကာသ တပ်ဖွဲ့ထံ လွှဲပြောင်းပို့ဆောင်ပေးခဲ့ကြောင်း၊ “နိုင်ငံတော် ကာကွယ်ရေးစာချုပ်ကို အချိန်မီဖြည့်ဆည်းဆောင်ရွက် ပေးခြင်းသည် UAC ၏ အဓိကတာဝန်တစ်ခုဖြစ်ကြောင်း၊ ၎င်းတို့၏အလုပ်သမားများသည် ယခုကဲ့သို့အရေးကြီး သည့် အလုပ်ကို ဂုဏ်ယူစွာဖြင့် ဆောင်ရွက်နေကြကြောင်း၊ အဆိုပါ Su-34 ဗုံးကြဲလေယာဉ်များသည် ယခုနှစ် အတွက် နောက်ဆုံးအသုတ် မဟုတ်သေးကြောင်း၊ ဗုံးကြဲတိုက် လေယာဉ်အသစ်များကို လိုအပ်သော စစ်ဆေး စမ်းသပ်မှုများပြုလုပ်ပြီးနောက်  စစ်ဆင်ရေး နေရာများသို့  ပို့ဆောင်ပေးခဲ့ပြီဖြစ်ကြောင်း” UAC အမှု ဆောင်အရာရှိချုပ် Vadim Badekha က တနင်္လာနေ့ တွင် ပြောကြားခဲ့သည်။ 

 Su- 34 ရှေ့တန်းဗုံးကြဲတိုက်လေယာဉ်သည် မြေပြင် (ရေပြင်)နှင့် ဝေဟင်ပစ်မှတ်များကို တိုက်ခိုက်နိုင်ရန် ဒီဇိုင်းထုတ်လုပ်ထားကြောင်း၊ ဆိုးဝါးသော ရာသီဉတု အခြေအနေများတွင် နေ့ရောညပါ ရန်သူ့ပစ်မှတ်များကို ထိရောက်စွာတိုက်ခိုက်နိုင်ပြီး ဝေဟင်ထောက်လှမ်းရေး ကိုလည်း လုပ်ဆောင်နိုင်ကြောင်း UAC ၏ သတင်း ထုတ်ပြန်ချက်တွင် ဖော်ပြထားသည်။ 

ကိုးကား - TASS