အမေရိကန်အစိုးရအနေဖြင့် ယူကရိန်းနိုင်ငံသို့ လုံခြုံရေးဆိုင်ရာ အပိုထောက်ပံ့မှုအဖြစ် ဒေါ်လာ ၂ ဒသမ ၅ ဘီလီယံ ပေးအပ်မည်ဖြစ်ကြောင်း သမ္မတဂျိုးဘိုင်ဒင်က ဒီဇင်ဘာလ ၃၀ရက်တွင် ပြောကြားခဲ့ကြောင်း သိရသည်။

သမ္မတဘိုင်ဒင်အစိုးရသည် ရာထူးမှ မထွက်ခွာမီ ယူကရိန်းနိုင်ငံသို့ ဆက်လက် ထောက်ပံ့ပေးမည်ဖြစ်ကြောင်း၊ ယခုပေးအပ်မည့်အပိုထောက်ပံ့မှုတွင်   လေကြောင်းကာကွယ်ရေး၊   အမြောက်စနစ်နှင့် အခြားအရေးကြီးလက်နက်စနစ်များ  ပါဝင်မည် ဖြစ်ကြောင်း ဂျိုးဘိုင်ဒင်က ထုတ်ပြန်ချက် တစ်စောင်တွင်ပြောသည်။

ဂရင်းလန်း၊ ကနေဒါနှင့် ပနားမားတူးမြောင်းတို့အပေါ် အမေရိကန် ရွေးကောက်ခံသမ္မတ ဒေါ်နယ်ထရမ့်၏ သဘောထားမှတ်ချက်များက ရုရှားနှင့် တရုတ်ကို တုံ့ပြန်မည့်မူဝါဒ၏ တစ်စိတ်တစ်ပိုင်းဖြစ်နိုင်သည်ဟု The Washington Post က ရေးသားခဲ့သည်။ 

ကနေဒါ၊ မက္ကဆီကို၊ ဂရင်းလန်းနှင့် ပနားမားတို့နှင့် ပတ်သက်ပြီး ထရမ့်၏ မှတ်ချက်များမှာ ခြိမ်းခြောက် လာနေသည့် ပြိုင်ဘက် ရုရှားနှင့် တရုတ်တို့ကို တုံ့ပြန်ရန် ရည်ရွယ်ထားခြင်းဖြစ်ပြီး တစ်ခုနှင့်တစ်ခု ဆက်နွှယ်မှုရှိနေကြောင်း ထရမ့်၏ အသွင်ကူးပြောင်းရေး အရာရှိတစ်ဦး၏ပြောကြားချက်ကို ကိုးကား၍ ဖော်ပြ ထားသည်။ 

တရုတ်ပြည်သူ့လွတ်မြောက်ရေးတပ်မတော် တရုတ် လေယာဉ် ၂၃ စင်း၊ တရုတ်ပြည်သူ့လွတ်မြောက်ရေး တပ်မတော် ရေတပ်သင်္ဘော ၆ စီးသည် ဒီဇင်ဘာ ၃၀ ရက်နေ့၊ ဒေသစံတော်ချိန် ၀၆၀၀ နာရီခန့်တွင် ချဉ်းကပ်လာသည်ကို တွေ့မြင်ရကြောင်း ထိုင်ဝမ် စစ်တပ်က ပြောကြားလိုက်ပါသည်။ 

တရုတ်သမ္မတရှီကျင့်ဖျင်သည် လာမည့် ၂၀၂၅ ခုနှစ် တွင် ရုရှားနိုင်ငံသို့ သွားရောက်မည်ဖြစ်ကြောင်း ဘေဂျင်း မြို့အခြေစိုက် မော်စကိုသံရုံး၏ သံအမတ်ကြီး Igor Morgulov ကို ကိုးကား၍ ရုရှားအစိုးရပိုင် RIA သတင်း ဌာနက ဒီဇင်ဘာ ၂၇ ရက်နေ့တွင် ပြောကြားထားပါသည်။

“နှစ်နိုင်ငံအကြား ဆက်ဆံရေးခိုင်မာမှုအတွက်သင့်လျော်သည့်အစီအမံများ စီစဉ်လုပ်ဆောင်နေကြောင်း၊လာမည့်နှစ်တွင် တရုတ်ခေါင်းဆောင်က ရုရှားကို သွားမည်ဟု မျှော်မှန်းထားသည့် ခရီးစဉ်ကို လျှို့ဝှက် ထားစရာမလိုကြောင်း” သံအမတ်ကြီး Igor Morgulov က RIA ကို ပြောကြားထားပါသည်။

အမေရိကန်ပြည်ထောင်စု၏ ၃၉ ဦးမြောက် သမ္မတ ဂျင်မီကာတာသည် ဒီဇင်ဘာ ၂၉ ရက်နေ့က အမေရိကန် ပြည်ထောင်စု ဂျော်ဂျီယာပြည်နယ်ရှိ ၎င်း၏နေအိမ်တွင် ကွယ်လွန်သွားပြီဖြစ်ပါသည်။ ၎င်းသည် ကွယ်လွန်ချိန် တွင် အသက် ၁၀၀ အရွယ်ရှိပြီ ဖြစ်ပါသည်။ 

မြောက်ကိုရီးယား အလုပ်သမားပါတီ၏ ဗဟိုကော်မတီ မျက်နှာစုံညီ အစည်းအဝေးတွင် အမေရိကန်အပေါ် အလွန်ပြင်းထန်သော တုံ့ပြန်ရေး မဟာဗျူဟာတစ်ရပ် ကို မြောက်ကိုရီးယားက ကြေညာခဲ့သည်ဟု ကိုရီးယား ဗဟိုသတင်းအေဂျင်စီ (KCNA) က ဖော်ပြသည်။

ဒီဇင်ဘာ ၂၃ ရက်မှ ၂၇ ရက်အထိ ကျင်းပသည့် အဆိုပါ အစည်းအဝေးတွင် နိုင်ငံရေးနှင့်ပတ်သက်သည့် တစ်နှစ်တာရလဒ်များကို အကျဉ်းချုံးဆွေးနွေးကြပြီး လာမည့်နောက်နှစ်အတွက် လုပ်ဆောင်ရမည့် ကဏ္ဍ များကို ဆုံးဖြတ်ခဲ့ကြသည်။ 

ယူကရိန်းနိုင်ငံကိုဖြတ်ကျော်ကာ ရုရှားနိုင်ငံမှ ဓာတ်ငွေ့ အား ပိုက်လိုင်းများနှင့် ဥရောပနိုင်ငံများဆီသို့ ရောင်းချ နေသော ဖြတ်သန်းသွားလာရေး သဘောတူညီချက် သည် ဒီဇင်ဘာ ၃၁ ရက်တွင် သက်တမ်း ကုန်ဆုံးမည် ဖြစ်သဖြင့် ရုရှားသဘာဝဓာတ်ငွေ့ ဆက်လက်စီးဆင်းမှု သေချာစေရန် ဥရောပအလယ်ပိုင်းနှင့် တောင်ပိုင်းရှိ နိုင်ငံများသည် အဖြေများကို ရှာဖွေနေကြကြောင်း Bloomberg သတင်းဌာနကဖော်ပြထားသည်။ 

ဂျပန်နိုင်ငံအလယ်ပိုင်းတွင် ၂၀၂၄ ခုနှစ် နှစ်ဦးပိုင်းက လှုပ်ခတ်ခဲ့သည့် အင်အားပြင်းငလျင်ကြောင့် Ishikawa ခရိုင် Wajima မြို့၏ ကမ်းရိုးတန်းမြေသည် ၅.၅ မီတာ အထိ မြင့်တက်လာမှုအား သုတေသီအဖွဲ့တစ်ဖွဲ့မှ တိုင်းတာတွေ့ရှိခဲ့ပါသည်။

Toyama တက္ကသိုလ်နှင့် တိုကျိုငလျင်သုတေသနဌာနမှ သုတေသီများပါဝင်သည့် အဆိုပါအဖွဲ့သည် ယခုနှစ် ဇန်နဝါရီလမှ ဇွန်လအတွင်း Noto ကျွန်းဆွယ်၏ မြောက်ဘက်ကမ်းရိုးတန်းတစ်လျှောက်ရှိ နေရာ ၁၀၀ ခန့်တွင် စစ်တမ်းကောက်ယူခဲ့ပါသည်။

ရုရှားနိုင်ငံသည် ကာဇက်စတန်နိုင်ငံမှတစ်ဆင့် တရုတ် နိုင်ငံသို့ ဆက်သွယ်ပေးမည့် သဘာဝဓာတ်ငွေ့ပိုက်လိုင်း အသစ်တစ်ခုကို စတင်တည်ဆောက်နေပြီ ဖြစ်ပြီး နှစ်စဉ် သဘာဝဓာတ်ငွေ့ ကုဗမီတာ(၄၅)ဘီလီယံထိ ပေးပို့ရန် စီစဉ်ထားကြောင်း ရုရှားနိုင်ငံခြားရေးဒုဝန်ကြီး အဲလက်ဇန်းဒါးနိုဗက်က ထုတ်ဖော်ပြောဆိုခဲ့သည်။

AI(ဉာဏ်ရည်တု)နှင့်ပတ်သက်၍ ရှေ့ပြေးပုဂ္ဂိုလ် တစ်ဦး လည်းဖြစ် ၊ ၂၀၂၄ ခုနှစ်၊ ရူပဗေဒဆိုင်ရာ နိုဘယ်လ်ဆုရ ပုဂ္ဂိုလ်လည်းဖြစ်သူ ဂျီရော့ဖရေးဟင်တန်က လာမည့် နှစ် ၃၀ အတွင်းတွင် အေအိုင်က လူသားမျိုးနွယ် ၂၀ % ကို မျိုးသုဉ်းသွားစေမည်ဟု ဆိုလိုက်ပါသည်။ ၎င်း၏ ခန့်မှန်းချက်ကို မနှစ်မှစ၍ဟောကိန်းထုတ်ခဲ့ရာ တစ်နှစ် အတွင်းမှာပင် ၎င်း၏ဟောကိန်းက ၁၀ % တက်လာခဲ့ ပါသည်။