တရုတ်နိုင်ငံသည် ကမ္ဘာပေါ်တွင် မြန်နှုန်းအမြင့်ဆုံး ကျည်ဆန်ရထား၏ရှေ့ပြေးပုံစံရထားတစ်စင်းကို ဒီဇင်ဘာလ ၂၉ ရက်တွင် ထုတ်ဖော်ပြသခဲ့ကြောင်း သိရသည်။

အဆိုပါ CR450 မြန်နှုန်းမြင့်ကျည်ဆန်ရထားအား မြို့တော်ပေကျင်းတွင် ပြသခဲ့ခြင်းဖြစ်ပြီး ထိုသို့ပြသစဉ် အဆိုပါမြန်နှုန်းမြင့်ရထားသည် တစ်နာရီလျှင် ၄၀၀ ကီလိုမီတာနှုန်းဖြင့် မောင်းနှင်ခဲ့ကြောင်း နိုင်ငံပိုင်တရုတ်မီးရထား ကုမ္ပဏီကထုတ်ပြန်သည်။

အဆိုပါ ကျည်ဆန်ရထားအား မောင်းနှင်စမ်းသပ်စဉ် တစ်နာရီလျှင် ၄၅၀ ကီလိုမီတာအမြန်နှုန်းဖြင့် မောင်းနှင်ခဲ့ကြောင်း သိရသည်။

အမေရိကန်ပြည်ထောင်စုသည်  နျူကလီးယားထိပ်ဖူးများ တပ်ဆင်နိုင်သည့် တာလတ်ပစ်နှင့် တာတိုပစ်ဒုံးကျည်များကို ကမ္ဘာအနှံ့ရှိဒေသများတွင်  ဖြန့်ကြက်နေခြင်းကြောင့်   ရုရှားနိုင်ငံအနေဖြင့် အဆိုပါ ဒုံးကျည်များ   ဖြန့်ကြက်မှု ဆိုင်းငံ့ထားခြင်းအား စွန့်လွှတ်မည်ဖြစ်ကြောင်း ရုရှားနိုင်ငံခြားရေးဝန်ကြီး ဆာဂျီလက်ရော့က ဒီဇင်ဘာလ ၂၉ ရက်တွင်ပြောသည်။

တရုတ်နိုင်ငံက ထုတ်ဝေသည့် ငွေချေးစာချုပ်များသည် လာမည့်ဆယ်စုနှစ်အတွင်း အလားအလာအကောင်းဆုံး ငွေချေးစာချုပ်များဖြစ်လာနိုင်ကြောင်း ဘဏ္ဍာရေးအဖွဲ့အစည်းများနှင့် ကျွမ်းကျင်သူများက ခန့်မှန်းထားသည်။

အင်ဒိုနီးရှားနိုင်ငံသည် ပြည်ပမှရေနံတင်သွင်းမှု ပမာဏကို လျှော့ချနိုင်ရန်နှင့် လောင်စာဈေးနှုန်း အပြောင်းအလဲဖြစ်ပွားခြင်းကို ရှောင်ရှားရန်အတွက် နိုင်ငံအတွင်းရှိ ရေနံတွင်းဟောင်းများကို     ပြန်လည်ပြုပြင်၍ အသုံးပြုရန် စီစဉ်လျက်ရှိသည်။

ဂျပန်နိုင်ငံတွင် စွမ်းအင်အတွက် ကုန်ကျစရိတ်မြင့်တက်မှုနှင့် ဝန်ဆောင်မှု ကဏ္ဍတွင်ဈေးနှုန်းများ မြင့်တက်လာမှုတို့ကြောင့် ဗဟိုဘဏ်က ယခုနှစ် ဒီဇင်ဘာလတွင် အတိုးနှုန်းအား ပြောင်းလဲ သတ်မှတ်ခဲ့ရသည်။

ဗဟိုဘဏ်သည် ဒီဇင်ဘာလအတွင်း အတိုးနှုန်းအား ၃ ဒသမ   ၀ အထိ တိုးမြှင့်ခဲ့ပြီး   လာမည့်နှစ်  ဇန်နဝါရီလ သို့မဟုတ် မတ်လအတွင်း၌လည်း လုပ်ခနှင့် ကမ္ဘာ့စီးပွားရေးအခြေအနေများအပေါ် မူတည်၍ အတိုးနှုန်းကို ထပ်မံတိုးမြှင့်ဖွယ်ရှိသည်။

အမေရိကန်ပြည်ထောင်စုတွင် ပြီးခဲ့သည့် ရက်သတ္တပတ် ခရစ္စမတ်ခရီးသွား ရာသီအကုန်၌ နိုင်ငံအတွင်းရှိ  အဓိကကုမ္ပဏီများ၏ အစုရှယ်ယာများ ထိုးကျသွားခဲ့သည်။

ယခုနှစ်အတွင်း ဗီယက်နမ်နိုင်ငံသို့ ငွေလွှဲပို့မှုမှာ အမေရိကန်ဒေါ်လာ ၁၆ ဘီလီယံခန့်ရှိပြီး အကြမ်းဖျင်း အားဖြင့် ယခင်နှစ်အတိုင်း အလားတူဖြစ်ကြောင်း အစိုးရထံမှ သိရသည်။

ရုရှား၏အမိန့်ကို နာခံလျက် ယူကရိန်း လုပ်ဆောင် ချက်ကို ဆန့်ကျင်ကာ ရုရှားဓာတ်ငွေ့များကို ဥရောပသို့ လွှဲပြောင်းပို့ဆောင်ရန်ကိစ္စနှင့်စပ်လျဉ်း၍ ဒုတိယ စွမ်းအင်မျက်နှာစာ ဖွင့်လှစ်နေသည်ဟု ယူကရိန်းသမ္မတ ဇယ်လန်စကီးက စလိုဗက်ကီးယားဝန်ကြီးချုပ် ရောဘတ် ဖီကို ကို ပြစ်တင်ရှုတ်ချလိုက်ပါသည်။ 

ဂျပန်မော်တော်ကား ဆူဇူကီး Suzuki ကော်ပိုရေးရှင်း အကြီးအကဲ Osamu Suzuki သည် ဒီဇင်ဘာ ၂၇ ရက်နေ့က အသက် ၉၄ အရွယ်တွင် ကွယ်လွန်သွားပြီ ဖြစ်ကြောင်း အဆိုပါကုမ္ပဏီက ပြောကြားလိုက် ပါသည်။

ခရီးသည် ၁၇၅ ဦးနှင့် လေယာဉ်မှူးဝန်ထမ်း ၆ ဦး လိုက်ပါလာသော တောင်ကိုရီးယား ဂျေဂျုး လေကြောင်း လိုင်း၏ ခရီးသည်တင်လေယာဉ်ဘိုရင်း 737-800 သည် ဒီဇင်ဘာ ၂၉ ရက်နေ့ ဒေသစံတော်ချိန် ၉:၀၀ နာရီတွင် Muan ကောင်တီ လေဆိပ်သို့ ဆင်းသက်ချိန်တွင် ပျက်ကျ၍ အနည်းဆုံး ၁၇၉ ဦး သေဆုံးသွားကြောင်း ၊ လေယာဉ်တစ်စီးလုံး လုံးဝပျက်စီးသွားကြောင်း ဒေသ ဆိုင်ရာမီးသတ်ဌာနက CNN ကို ပြောကြားလိုက်ပါ သည်။ 

ထိုလေယာဉ်သည် ထိုင်းနိုင်ငံ ဘန်ကောက်မှ ထွက်ခွာ လာခြင်းဖြစ်ပြီး သေဆုံးသူဦးရေ ထပ်မံတိုးမြင့်လာဖွယ် ရှိကြောင်း ဆက်လက်ပြောကြားထားပါသည်။