ရုရှားသမ္မတ ဗလာဒီမာ ပူတင်က နိုင်ငံ၏ စီးပွားရေး စွမ်းဆောင်မှုကို ချီးကျူးပြောကြားရင်း ဝယ်ယူနိုင်စွမ်းညီမျှမှု (PPP) အရ ကမ္ဘာ့ စတုတ္ထမြောက် စီးပွားရေး အဖြစ် ရောက်ရှိလာမှုသည် စီးပွားရေးလုပ်ငန်းရှင်များနှင့် အလုပ်သမားများ၏ အားထုတ်မှုကြောင့် ဖြစ်ကြောင်း ဖော်ပြခဲ့သည်။

တနင်္လာနေ့ (မေ ၂၆) တွင် ကျင်းပသည့် အမျိုးသားစီးပွားရေးလုပ်ငန်းရှင်များနေ့ အခမ်းအနားတွင် ပြောကြားရင်း ပူတင်က ရုရှား နိုင်ငံသည် လုံးဝအဆင်ပြေသည်မဟုတ်ဘဲ ခက်ခဲသည့် အခြေအနေများအောက်တွင် လုပ်ကိုင်နေရသော်လည်း ပြီးခဲ့သည့် နှစ်နှစ်အတွင်း ထင်ရှားသည့် ရလဒ်များ ရရှိခဲ့ကြောင်း ပြောကြားခဲ့သည်။

“၂၀၂၃ ခုနှစ်တွင် GDP ၄.၁% တိုးတက်ခဲ့ပြီး ၂၀၂၄ ခုနှစ် တွင် ၄.၃% တိုးတက်ခဲ့သည်။ ဤသည်မှာ ခိုင်မာသည့် ရလဒ်တစ်ခုပင် ဖြစ်သည်” ဟု ၎င်းက ဆိုသည်။ “PPP အရ ရုရှား၏ စီးပွားရေးသည် ယခု ကမ္ဘာ့ စတုတ္ထမြောက် ဖြစ်လာခြင်းမှာ ရုရှားနိုင်ငံသားတို့၏ တိုက်ရိုက် အောင်မြင်မှုပင် ဖြစ်သည်။ ရုရှားဖက်ဒရေးရှင်း၏ ဒေသအနှံ့မှ ကုမ္ပဏီများ၏ လုပ်ဆောင်မှုများ၏ရလဒ်ပင် ဖြစ်သည်” ဟု ပြောကြားခဲ့ပါသည်။

PPP သည် ကုန်စည်နှင့် ဝန်ဆောင်မှုများ၏ ကုန်ကျစရိတ် ကွာခြားမှုများကို ညှိယူကာ နိုင်ငံများအကြား စီးပွားရေးထုတ်လုပ်မှုနှင့် လူနေမှု အဆင့်အတန်းကို နှိုင်းယှဉ်သည်။

ပူတင်က အဆိုပါ ကြီးထွားမှုသည် တစ်ခုတည်းသော ကဏ္ဍတွင် ကန့်သတ်မထားဘဲ ကုန်ထုတ်လုပ်မှု၊ စိုက်ပျိုးရေး၊ ဒစ်ဂျစ်တယ်နည်းပညာ၊ ဝန်ဆောင်မှုနှင့် ဘဏ္ဍာရေး အပါအဝင် စီးပွားရေး ကဏ္ဍမျိုးစုံတွင် လွှမ်းခြုံထားကြောင်း အလေးပေးပြောကြားခဲ့သည်။

“ထိုသို့သော ရလဒ်များသည် ကြီးမားသည့် အဖွဲ့အစည်းအနည်းငယ်၏ လုပ်ဆောင်မှုမျှ မဟုတ်ဘဲ၊ တူညီသော ရည်မှန်းချက်ဆီသို့ ဦးတည် လုပ်ကိုင်နေသည့် ထောင်နှင့်ချီ၊ သိန်းနှင့်ချီ၊ သန်းနှင့်ချီသော လူများ၏ ပူးပေါင်းပါဝင်မှု၏ ရလဒ်ပင် ဖြစ်သည်” ဟု သမ္မတက ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

လန်ဒန်၊ စီးပွားရေး
အမေရိကန်သမ္မတ  ဒေါ်နယ်ထရမ့်က ဥရောပသမဂ္ဂနှင့် ကုန်သွယ်ရေးဆွေးနွေးမှုများအတွက် သတ်မှတ်ချိန်ကို ရွှေ့ဆိုင်းလိုက်ခြင်းကြောင့် မေလ ၂၆ ရက်တွင် ရေနံစိမ်းဈေးနှုန်းများ အနည်းငယ်ပြန် လည်မြင့်တက်လာကြောင်းသိရသည်။

ထိုသို့ဆွေးနွေးမှုအတွက် နောက်ဆုံး သတ်မှတ်ချိန်ကို ရွှေ့ဆိုင်းလိုက်သောကြောင့် ဥရောပသမဂ္ဂအပေါ်အမေရိကန်၏သွင်းကုန်အခွန်များချမှတ်မှုနှင့်ပတ်သက်သည့် စိုးရိမ်ပူပန်မှုများကိုလျော့ပါးသွားစေကာ ရေနံစိမ်းဝယ်လိုအားမြင့် တက်လာစေခြင်းဖြစ်သည်။

ဘရန့်ရေနံစိမ်းမှာ တစ်စည်လျှင် ၃၉ ဆင့်တက်ကာ ၆၅ ဒသမ ၁၇ ဒေါ်လာဖြင့် ရပ်တည်ခဲ့သည်။ တစ်ချိန်တည်းမှာပင် WTI ရေနံစိမ်းမှာလည်း ၃၃ ဆင့်တက်ပြီး တစ်စည်လျှင် ၆၁ ဒသမ ၈၆ ဒေါ်လာသို့ ရောက်ရှိခဲ့ကြောင်းသိရသည်။

Ref: RTA

Photo - Reuters

Source: Myawady Daily Newspaper

ဥရောပကုန်ပစ္စည်းများအား သွင်းကုန်စည်းကြပ်ခွန် ၅၀ ရာခိုင်နှုန်း ကောက်ခံမည်ဟူသော အမေရိကန် သမ္မတ ဒေါ်နယ်ထရမ့်၏ ခြိမ်းခြောက်မှုအပေါ် ဥရောပသမဂ္ဂ(အီးယူ) တာဝန်ရှိသူများနှင့် အဖွဲ့ဝင်နိုင်ငံများ၏ ကိုယ်စားလှယ်များက ကျေနပ်မှုမရှိကြောင်း ထုတ်ဖော်ပြောဆိုခဲ့ပြီး နိုင်ထက် စီးနင်းပြုမူသော နည်းပရိယာယ်များက အတ္တလန္တိတ်ဖြတ်ကျော် ကုန်သွယ်ရေးဆွေးနွေးမှုများကို ထိခိုက်စေမည်ဖြစ်ကြောင်းလည်း သတိပေးခဲ့သည်။

အီးယူအနေဖြင့် ကုန်သွယ်ရေးတွင် အမေရိကန်အပေါ် အမြတ်ထုတ်နေပြီး ယင်းအား ကိုင်တွယ်ဖြေရှင်းရန် အလွန်ခဲယဉ်းနေသည်ဟု ထရမ့်က ၎င်း၏ ဆိုရှယ်မီဒီယာ ပလက်ဖောင်း Truth Social ၌ စွပ်စွဲပြောဆိုခဲ့ပြီး ၎င်းအနေဖြင့် အီးယူအား ၅၀ ရာခိုင်နှုန်း တောက်လျှောက် အခွန်စည်းကြပ်ရန် အကြံပြုမည်ဖြစ်ကာ ၂၀၂၅ ခုနှစ် ဇွန် ၁ ရက်၌ စတင်မည်ဖြစ်ကြောင်း ကြေညာခဲ့သည်။
ဆွေးနွေးမှုများ ကြန့်ကြာနေစဉ် အမေရိကန် စီးပွားရေးလုပ်ငန်းများကို လမ်းဖွင့်ပေးရန် အမေရိကန် အစိုးရက တစ်ဖက်သတ် လိုက်လျောမှုများကို တောင်းဆိုလျက်ရှိပြီး အီးယူဘက်ကမူ အပြန်အလှန် အကျိုးရှိသော သဘောတူညီချက်တစ်ရပ် ရယူရန် ကြိုးပမ်းနေချိန်တွင် စည်းကြပ်ခွန် ခြိမ်းခြောက်မှုထွက်ပေါ်လာခြင်းဖြစ်သည်ဟု အီးယူ-အမေရိကန် ကုန်သွယ်ရေး ဆွေးနွေးမှုများအကြောင်း သိရှိ ထားသူများ၏ ပြောကြားချက်ကို ကိုးကား၍ ရိုက်တာသတင်းတွင် ဖော်ပြထားသည်။ ကုန်သွယ်ရေးနှင့် စီးပွားရေးလုံခြုံမှုဆိုင်ရာ ဥရောပကော်မရှင်နာ မာရော့စ် ဆက်ဖ်ကိုဗစ်က အီးယူအနေဖြင့် မိမိတို့၏ အကျိုးစီးပွားကိုကာကွယ်ရန် အသင့်ရှိနေသည်ဟု ဆိုရှယ်မီဒီယာ ပလက်ဖောင်း X တွင် တုံ့ပြန်ရေးသားခဲ့သည်။

နှစ်နိုင်ငံ ကုန်သွယ်မှုအား အပြန်အလှန် လေးစားမှုဖြင့်သာ ထိန်းကျောင်းပေးရမည်ဖြစ်ပြီး ခြိမ်းခြောက်မှုများ မပြုလုပ်သင့်ဟု ဆက်ဖ်ကိုဗစ်က အလေး အနက်ပြောကြားလျက် “အီးယူအနေဖြင့် အပြည့်အဝ ချိတ်ဆက်လုပ်ဆောင်နေပြီး နှစ်ဖက်စလုံးအတွက် အကျိုးရှိသည့် သဘောတူညီချက် တစ်ရပ်ရရှိရန် စိတ်ပိုင်းဖြတ်ထားပါသည်။ အီးယူကော်မရှင်အနေဖြင့် သဘောရိုးနှင့် ကြိုးပမ်း လုပ်ဆောင်သွားရန် အသင့်ရှိနေဆဲဖြစ်ပါသည်” ဟု ရေးသားခဲ့သည်။ 

ကိုးကား -ဆင်ဟွာ

နိုင်ငံတကာငွေကြေးရန်ပုံငွေအဖွဲ့ IMF ၏ မှတ်တမ်းများအရ အိန္ဒိယနိုင်ငံ သည် ကမ္ဘာ့စီးပွားရေး အဆောက်အအုံ အကြီးဆုံးနိုင်ငံများထဲ၌ စတုတ္ထ အဆင့်ကို ရောက်ရှိလာကြောင်း သိရပါသည်။ အမေရိကန်၊ တရုတ်နှင့် ဂျာမနီ ပြီးလျှင် အိန္ဒိယသည် နံပါတ် ၄ နေရာသို့ ရောက်ရှိလာခဲ့ခြင်း ဖြစ်ပါသည်။ 

အိန္ဒိယနိုင်ငံ၏ စီးပွားရေး အဆောက်အအုံမှ လည်ပတ်မှုငွေကြေး ပမာဏ သည် ကန်ဒေါ်လာ ၄ ထရီလီယံ အထိရောက်ရှိနေပြီး အကြောင်းအရင်းမှာ ဘူမိနိုင်ငံရေးနှင့် ကုန်ထုတ်စီးပွားရေးလုပ်ငန်း ပတ်ဝန်းကျင်တစ်ခုကို တည်ဆောက်နိုင်၍ဖြစ်ကြောင်း ဒေသတွင်း စီးပွားရေး လုပ်ငန်းရှင်ကြီး တစ်ဦးက ဆိုပါသည်။ 

လက်ရှိအနေအထားအတိုင်းဆက်ပြီး ထိန်းသိမ်းထားနိုင်မည်ဆိုပါက လက်ရှိဂျပန်ကို ကျော်တက်အပြီး နောက် ၃ နှစ် အတွင်း ဂျာမနီကိုပါ ဆက်လက်ကျော်တက်ကာ ကမ္ဘာ့တတိယ စီးပွားရေး အင်အားအကြီးဆုံး နိုင်ငံဖြစ်လာနိုင်ကြောင်း IMF ၏ အစီရင်ခံစာတစ်ခုတွင် ပါရှိပါသည်။

ကိုးကား- MNP

သမ္မတ ဒေါ်နယ်ထရမ့်က တနင်္ဂနွေနေ့ (မေ ၂၅) တွင် ဥရောပသမဂ္ဂမှ တင်သွင်းကုန်ပစ္စည်းများအပေါ် ၅၀% အကောက်ခွန် စည်းကြပ်မှုကို ဇူလိုင် ၉ ရက်အထိ ရွှေ့ဆိုင်းရန် သဘောတူညီခဲ့ကြောင်း ပြောကြား ခဲ့သည်။ ထရမ့်သည် မကြာခဏဆိုသလို အကောက်ခွန်များ စည်းကြပ်မည် ဟု ကြေညာကာ စျေးကွက်များကို ရှုပ်ထွေးစေပြီးနောက် ခြိမ်းခြောက်မှု များကို နောက်ဆုတ်လေ့ရှိသည်။

ထရမ့်က ၎င်းနှင့် ဥရောပကော်မရှင်ဥက္ကဋ္ဌ အာဆူလာ ဗွန်ဒါလိုင်ယန် တို့သည် အလွန်ကောင်းမွန်သောဆွေးနွေးမှု ပြုလုပ်ခဲ့ပြီး ယင်းမှတစ်ဆင့် အကောက်ခွန်ရွှေ့ဆိုင်းမှုကို သဘောတူခဲ့ကြောင်း ပြောကြားခဲ့သည်။

“ဗွန်ဒါလိုင်ယန် က အချိန်ယူပြီး တကယ့်ညှိနှိုင်းမှုတွေ လုပ်ချင်ကြောင်း ပြောပါသည်” ဟု နယူးဂျာစီပြည်နယ်၊ မော်ရစ်စ်တောင်းမြို့ လေဆိပ်တွင် ထရမ့်က သတင်းထောက်များအား ပြောကြားခဲ့သည်။ “ဇူလိုင် ၉ ရက်က သူမတောင်းဆိုသည့် ရက်ဖြစ်ပါသည်၊ ဇွန် ၁ ရက်ကနေ ဇူလိုင် ၉ ရက်အထိ ရွှေ့၍ရနိုင်မည်လား မေးမြန်းမှုအပေါ် ကျွန်တော်က သဘောတူလိုက်ပါသည်” ဟု ၎င်းက ထပ်မံ ပြောကြားခဲ့ပါသည်။

“သူမက အမြန်ဆုံးတွေ့ဆုံပြီး တစ်ခုခု အဖြေရှာရန် ကြိုးစားမည်ဟု ပြောပါသည်” ဟု ၎င်းက ဖြည့်စွက်ပြောကြားခဲ့သည်။

သောကြာနေ့ (မေ ၂၃) ကပင် ထရမ့်က ဥရောပသမဂ္ဂနှင့် သဘော တူညီချက် ရှာဖွေနေခြင်း မဟုတ်ကြောင်း၊ ၅၀% အကောက်ခွန်နှုန်းကို ဇွန် ၁ ရက်မှစ၍ စတင်အသုံးပြုမည်ဖြစ်ကြောင်း ပြောကြားခဲ့သည်။ယခင်က ဧပြီလတွင် ဥရောပသမဂ္ဂအပေါ် ၂၀% အကောက်ခွန် စည်းကြပ်ရန် ကြေညာခဲ့သော်လည်း ယင်းကိုလည်း အခြားသော “တန်ပြန် အကောက်ခွန်” များနည်းတူ ရွှေ့ဆိုင်းခဲ့ဖူးသည်။

သတင်းထောက်များနှင့် စကားပြောပြီး မိနစ်ပိုင်းအကြာတွင် ထရမ့်က Truth Social တွင် “ဆွေးနွေးမှုများကို အမြန်ဆုံး စတင်မည်” ဟု ရေးသားခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ပြင်သစ်သမ္မတ အီမန်နျူရယ် မက်ခရွန်သည် ဗီယက်နမ်နိုင်ငံ၏မြို့တော် ဟနွိုင်းသို့ နိုင်ငံတော်ခရီးစဉ်အဖြစ် လာရောက်ခဲ့ပြီး နှစ်နိုင်ငံအကြား စီးပွားရေး၊ နည်းပညာနှင့် စွမ်းအင်ကဏ္ဍများတွင် ပူးပေါင်း ဆောင်ရွက်ရန် သဘောတူညီချက် ၁၇ ရပ်ကို လက်မှတ်ရေးထိုးခဲ့သည်။

အမေရိကန်ဒေါ်လာ ၁၀ ဘီလီယံ တန်ဖိုးရှိ အဆိုပါ သဘောတူညီချက်များတွင် လေကြောင်း၊ အာကာသ၊ သယံဇာတနှင့် စက်မှုလုပ်ငန်းများ ပါဝင်သည်။

ပြင်သစ်အနေဖြင့် အာရှတွင် တရုတ်၏ လွှမ်းမိုးမှုကို ဟန်ချက်ညီစေရန် ဗီယက်နမ်နှင့် မိတ်ဖက်ပြုခြင်းဖြစ်သည်။ ဗီယက်နမ်အတွက် နိုင်ငံခြားရင်းနှီးမြှုပ်နှံမှုရရှိပြီး အဆင့်မြင့် နည်းပညာ များ လွှဲပြောင်းရရှိမည်ဖြစ်သည်။

Vietjet Air လေကြောင်းလိုင်းမှ ပြင်သစ် Airbus လေယာဉ် ၅၀ စီး ဝယ်ယူသွားမည်ဖြစ်ပြီး ပြင်သစ်က အခြေခံအဆောက်အအုံနှင့် သန့်ရှင်း သော စွမ်းအင်စီမံကိန်းများအတွက် ရန်ပုံငွေထောက်ပံ့မည်ဖြစ်သည်။

ပြင်သစ်ကုမ္ပဏီ Electricity de France (EDF) မှ ဗီယက်နမ်၏ လေစွမ်းအင်နှင့် နျူကလီးယားစွမ်းအင်စီမံကိန်းများတွင် ပါဝင် ဆောင်ရွက်မည်ဟု သိရှိရသည်။ ပြင်သစ်သည် အင်ဒိုပစိဖိတ်ဒေသတွင် ဩဇာလွှမ်းမိုးမှု မြှင့်တင်ရန် ဗီယက်နမ်ကို အချက်အခြာကျသော မိတ်ဖက်အဖြစ် ရှုမြင်သည်။

ဗီယက်နမ်အနေဖြင့်လည်း နိုင်ငံတကာမိတ်ဖက်များ ချဲ့ထွင်ခြင်းဖြင့် စီးပွားရေးဖွံ့ဖြိုးရန် ရည်ရွယ်ခြင်းဖြစ်သည်။

အဆိုပါ သဘောတူညီချက်များသည် နှစ်နိုင်ငံအတွက် စီးပွားရေး အကျိုး ကျေးဇူး သာမက နိုင်ငံရေးအရလည်း အရေးပါသော ခြေလှမ်းဖြစ်သည်။ ပြင်သစ်သည် အာရှတွင် မိမိ၏ဩဇာညောင်းမှုကို ထိန်းသိမ်းရန်၊ ဗီယက်နမ်ကလည်း နည်းပညာနှင့် ရင်းနှီးမြှုပ်နှံမှုများ ရရှိရန် ရည်ရွယ်သည်ဟု ဆိုနိုင်ပါသည်။

ကိုးကား- Reuters

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အပ်ပဲကုမ္ပဏီအနေဖြင့် အိုင်ဖုန်းများကို အမေရိကန်ပြည်ထောင်စု၌ မထုတ်လုပ်လျှင် သွင်းကုန်အခွန် ၂၅ ရာခိုင်နှုန်း ကောက်ခံသွားမည်ဖြစ်ကြောင်း သမ္မတ ဒေါ်နယ်ထရမ့်က မေလ ၂၃ ရက်တွင်သတိ ပေးလိုက်ကြောင်း သိရသည်။

ထရမ့်၏သတိပေးချက် ထွက်ပေါ်လာပြီးနောက် စတော့ဈေးကွက် အတွင်းရှိ အပ်ပဲကုမ္ပဏီ၏ ရှယ်ယာမှာ ၂ ဒသမ ၅ ရာခိုင်နှုန်း ကျဆင်းသွားသည်ကို တွေ့ရှိရသည်။

“ကျွန်တော့်အနေနဲ့ အပ်ပဲရဲ့အမှုဆောင်ချုပ် တင်ကွတ်ကို ယခင်ကတည်းကသတိပေးခဲ့တာရှိပါတယ်။ အမေရိကန်မှာရောင်းမယ့်အိုင်ဖုန်းတွေကို အမေရိကန်မှာပဲ ထုတ်လုပ်ဖို့ပါ။ အိန္ဒိယမကလို့ ဘယ်နေရာမှာပဲ ထုတ်လုပ်သည်ဖြစ်စေ အဲဒီကနေ အမေရိကန်ကို အိုင်ဖုန်းတွေ သွင်းလာတာနဲ့ သွင်းကုန်အခွန် ၂၅ ရာခိုင်နှုန်းကောက်ခံပါမယ်” ဟု ထရမ့်က လူမှုကွန်ရက်တွင် ရေးထားသည်။

ဒေါ်နယ်ထရမ့်က တရုတ်နိုင်ငံအပေါ်အခွန်များ တိုးမြှင့်ချမှတ်သည့်အတွက် အပ်ပဲကုမ္ပဏီက ၎င်းတို့၏ ကုန်ပစ္စည်းများ ထုတ်လုပ်မှုကို အိန္ဒိယနိုင်ငံသို့ ပြောင်းရွှေ့ ခဲ့ခြင်းဖြစ်ကြောင်း သိရသည်။

Source: Myawady Web Portal

ရုရှား ရူဘယ်ငွေကြေးသည် အမေရိကန်ဒေါ်လာနှင့်နှိုင်းယှဉ်ပါက နှစ်နှစ် အတွင်း အမြင့်ဆုံးသို့ ရောက်ရှိလာခဲ့ပြီး ယင်းအား ပထဝီနိုင်ငံရေး တင်းမာမှုများလျော့ပါးလာခြင်းနှင့် ယူကရိန်းပဋိပက္ခ ဖြေရှင်းရေး မျှော်လင့်ချက်များ ပြန်လည်မြင့်တက်လာခြင်းတို့က အထောက်အပံ့ ဖြစ်စေခဲ့သည်။

ကြာသပတေးနေ့ (မေ ၂၂) တွင် ရုရှားငွေကြေးသည် အမေရိကန်ဒေါ်လာ ၁ ဒေါ်လာလျှင် ၇၈.၉ ရူဘယ် ဖြင့် ၂၀၂၃ ခုနှစ် မေလအလယ်ကတည်းက အမြင့်ဆုံးအဆင့်သို့ ရောက်ရှိခဲ့သည်။ ၂၀၂၅ ခုနှစ် မတ်လ အစောပိုင်းမှ စတင်၍ ရူဘယ်ငွေကြေး ၁၁% ခန့် တက်လာခဲ့သည်။

လက်ရှိအချိန်အထိ လပေါင်းများစွာ ခိုင်မာလာနေသော ရူဘယ် ငွေကြေး သည် ၂၀၂၅ ခုနှစ်အစပြုချိန်မှစ၍ ဖြစ်ပေါ်လာသော ဈေးကွက် ငွေကြေး များအနက် အခိုင်မာဆုံးစွမ်းဆောင်ရည်ကို ပြသနေကြောင်း Alfa-Capital ၏ စတော့ဈေးကွက်ဆိုင်ရာ သုံးသပ်သူ Alina Poptsova က RBK စီးပွားရေးနေ့စဉ်သတင်းစာတွင် ပြောကြားခဲ့သည်။

“ဈေးကွက်ကို အမေရိကန်နှင့် ဆက်ဆံရေး ပုံမှန်ဖြစ်လာနိုင်သည့် အချက် များနှင့် ယူကရိန်းပဋိပက္ခကို နိုင်ငံရေးနည်းဖြင့် ဖြေရှင်းရန် အလားအလာ များက တစ်စိတ်တစ်ပိုင်း လွှမ်းမိုးနေပါသည်” ဟု Tsifra Broker ၏ မဟာဗျူဟာဆိုင်ရာ လေ့လာသုံးသပ်သူ Natalia Pyrieva က ရှင်းပြ ခဲ့သည်။

ထို့အပြင် ပြည်ပပို့ကုန်လုပ်ငန်းရှင်များမှ အခွန်နှင့် ရင်းနှီးမြုပ်နှံမှု အကျိုးအမြတ်များ ပေးချေမှုမတိုင်မီ ၎င်းတို့၏ နိုင်ငံခြားငွေရရှိမှုများကို ပိုမို ရောင်းချခြင်းနှင့် တင်သွင်းသူများ၏ ဝယ်လိုအား ကျဆင်းလာခြင်းတို့ကလည်း ရူဘယ်ငွေကြေး ခိုင်မာလာမှုကို အထောက်အကူပြုနေကြောင်းဆန်းစစ်သူများကဆိုသည်။ ဈေးကွက်တွင် ပါဝင်နေသူများသည် နိုင်ငံခြားကုမ္ပဏီများ ရုရှားဈေးကွက်သို့ ပြန်လည်ဝင်ရောက်လာနိုင်မှုနှင့် ပိတ်ဆို့မှုများ လျော့ပါးလာနိုင်သည်ဟု မျှော်လင့်နေကြသည်။

“ရင်းနှီးမြုပ်နှံသူများသည် သံတမန်ဆက်ဆံရေး တိုးတက်မှုများကိုသာမက အခြေခံအဆောက်အအုံနှင့်သက်ဆိုင်သော ပိတ်ဆို့မှုများ ပြန်လည် ရုပ်သိမ်းခြင်း၊ နိုင်ငံခြားရင်းနှီးမြုပ်နှံမှုများ ပြန်လည် ဝင်ရောက်လာခြင်းနှင့် နိုင်ငံခြားငွေကြေး လွယ်ကူမှု တိုးတက်လာခြင်းစသည့် ရူဘယ်၏ ဆွဲဆောင်မှုကို မြင့်တက်စေသော အချက်များကိုပါ ထည့်သွင်းစဉ်းစား နေကြပါသည်” ဟု Veles Capital ၏ ဘဏ်လုပ်ငန်းနှင့် ငွေကြေးဈေးကွက် သုတေသနဌာနမှူး Yuri Kravchenko က ပြောကြားခဲ့သည်။ 

ပထဝီနိုင်ငံရေး အရှိန်အဟုန်များ ဆက်လက်ရှိနေပါက ယခုလအတွင်း ရူဘယ်ငွေကြေးသည် အမေရိကန်ဒေါ်လာ ၁ ဒေါ်လာလျှင် ၇၅ ရူဘယ် အထိ ရောက်ရှိနိုင်သည်ဟု ကျွမ်းကျင်သူအချို့က ခန့်မှန်းထားကြသည်။ 

အီးယူနှင့် ဗြိတိန်တို့က ယခင်သီတင်းပတ်အတွင်း ကြေညာခဲ့သည့် နောက်ဆုံးပိတ်ဆို့မှုများသည် ရုရှားငွေကြေးအပေါ် ကြီးမားသော သက်ရောက်မှုရှိမည် မဟုတ်ကြောင်း ဆန်းစစ်သူများက ယူဆထားသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဂျပန်နိုင်ငံ၌ ဆန်ဈေးနှုန်းများမြင့်တက်မှုသည် စံချိန်တင်လာပြီး ယမန်နှစ်က ထက် ၉၈ ရာခိုင်နှုန်း မြင့်တက်လာခြင်းဖြစ်ကြောင်း အစိုးရ၏ မေလ ၂၃ ရက်ထုတ်ပြန်ချက်တွင် ဖော်ပြထားသည်။

ယခုကဲ့သို့ဆန်ဈေးနှုန်းများမြင့်တက်လာခြင်းသည် လပေါင်းများစွာကြာမြင့်နေပြီဖြစ်ပြီး ယင်းကိစ္စက ဂျပန်ဝန်ကြီးချုပ် ရှီဂဲရူအီရှီဘာ၏ အစိုးရအဖွဲ့အတွက် ခေါင်းခဲစရာ ကိစ္စတစ်ခုဖြစ်လာသည်။

ဂျပန်နိုင်ငံ၏ယဉ်ကျေးမှုတွင် ရာစုနှစ်ပေါင်းများစွာကြာ အရိုးစွဲနေသည့် ဆန်၏ဈေးနှုန်းများစံချိန်တင် မြင့်တက်ရခြင်းမှာ ဆန်ရှားပါးလာမှုကြောင့်ဖြစ်ကြောင်း လေ့လာသူများက ပြောသည်။

အလားတူ ၂၀၂၃ ခုနှစ်တွင် အပူချိန်မြင့်တက်မှု၊ ၂၀၂၄ ခုနှစ်တွင် ဝယ်လိုအားများ ပြားလာမှု၊   အမှန်တကယ်ဖြစ်ပေါ်လာခြင်းမရှိသည့် ငလျင်ကြီးဖြစ်ပေါ်လာမည်ဟူသော  ကောလာဟလကြောင့် ကြောက်လန့်တကြား ဝယ်ယူမှုစသည့် အကြောင်းရင်းများကြောင့်လည်း ဆန်ဈေးနှုန်းများ မြင့်တက်လာခြင်းဖြစ်သည်။

ပြီးခဲ့သည့်နှစ်များစွာအတွင်း ပြည်သူများအနေဖြင့် ဆန်ကိုစားသုံးမှုနည်းပါးသည့်အတွက် အစိုးရကလည်း လယ်မြေများတွင် စပါးကိုစိုက်ပျိုးမည့်အစား အခြား ကောက်ပဲသီးနှံများကို  ပိုမိုစိုက်ပျိုးရန် မူဝါဒချမှတ်ခဲ့သလို တစ်ချိန်တည်းမှာပင် ဂျပန်နိုင်ငံ၌ သက်ကြီးရွယ်အိုများပြားလာမှုနှင့်အတူ တောင်သူအများစုမှာ အသက်အရွယ်ကြီးရင့်လာသည့်အပြင် ၎င်းတို့၏ မျိုးဆက်များက လယ်ယာစိုက်ပျိုးရေးကို လုပ်ဆောင်လိုခြင်း မရှိမှုတို့ကြောင့် ဂျပန်နိုင်ငံအတွင်း ဆန်စပါးထွက်ရှိမှုနည်းပါးလာခြင်းဖြစ်သည်။ ထို့အတူ ၁၉၆၁ ခုနှစ် တွင် စပါးစိုက်ပျိုးဧရိယာ ဟက်တာပေါင်း ၃ ဒသမ ၄ သန်းရှိရာမှ ၂၀၂၄ ခုနှစ်တွင် ဟက်တာ ၂ ဒသမ ၃ သန်းအထိ ကျဆင်းလာကြောင်း သိရသည်။

Source: Myawady Web Portal

ဆားဘီးယားနိုင်ငံသည် ယူရိုငွေကြေးတစ်ခုတည်း သုံးစွဲသည့်ဒေသဇုံ (Single Euro Payments Area –SEPA) ၏ အဖွဲ့ဝင်နိုင်ငံ ဖြစ်လာကြောင်း ဆားဘီးယားနိုင်ငံ ဒုတိယဝန်ကြီးချုပ်-၁ နှင့် ဘဏ္ဍာရေးဝန်ကြီး Sinisa Mali က ပြောကြားလိုက်ပါသည်။

“SEPA စံနှုန်းများကို ဆားဘီးယားတွင် လက်တွေ့အသုံးပြုနိုင်ရန် ၂၀၂၆ ခုနှစ်၊ မေလတွင် စတင်မည်ဟု မျှော်လင့်ရပါသည်” ဟု Mali က ၎င်း၏ Instagram စာမျက်နှာတွင် ရေးသားဖော်ပြခဲ့ပါသည်။

ယခုခြေလှမ်းမှာ အနောက်ဘော်လ်ကန်ဒေသအတွက် ဥရောပသမဂ္ဂ၏ စီးပွားရေး တိုးတက်မှုအစီအစဉ်၏ တစ်စိတ်တစ်ပိုင်းဖြစ်ပြီး ဥရောပသမဂ္ဂနှင့် စီးပွားရေးနီးကပ်မှု မြန်ဆန်စေရန်နှင့် ဒေသတွင်းပူးပေါင်း ဆောင်ရွက်မှု အားကောင်းလာစေရန် ရည်ရွယ်ကြောင်း ၎င်းက ဖြည့်စွက် ပြောကြားခဲ့ပါသည်။

ကိုးကား- Tass 

Photo: enlargement.ec.europa.eu

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃