ဒီမိုကရက်တစ်ပါတီ အမေရိကန် အောက်လွှတ်တော်အမတ် အယ်လ်ဂရင်းက ဂါဇာကို သိမ်းပိုက်ပြီးပါလက်စတိုင်းများအား ပြန်လည်နေရာချထားရေးကိစ္စကို ဆက်လက်လုပ်ဆောင်မည်ဆိုပါက သမ္မတ ဒေါ်နယ် ထရမ့်ကို စွပ်စွဲပြစ်တင်သည့် ပုဒ်မများ တင်သွင်းရန် ၎င်းဘက်ကလည်း အဆင်သင့်ဖြစ်နေဟု ပြောကြား လိုက်ပါသည်။ 

အစ္စရေးဝန်ကြီးချုပ် ဘန်ဂျမင်နေတန်ယာဟုနှင့်  အိမ်ဖြူတော်သတင်းစာရှင်းလင်းပွဲတွင် ထရမ့်က ဂါဇာနှင့် ပတ်သက်သည့် ၎င်း၏စိတ်ကူးကို ထုတ်ဖော်ပြောကြားခဲ့ပြီး ဂါဇာကိုအမေရိကန်၏ လက်အောက်တွင်ထားရှိပြီး အရှေ့အလယ်ပိုင်းငြိမ်းချမ်းရေးအတွက် ဗဟိုဌာနပြုလုပ်မည်၊ ထို့နောက် ဒေသတွင်းအလုပ်အကိုင်များရရန် လုပ်ဆောင်ပေးမည်၊ လက်ရှိနေထိုင်နေသည့် ပါလက်စတိုင်းများကို အခြားစိတ်ဝင်စားသည့် နေရာများသို့ ရွှေ့ပြောင်းပေးမည်ဟု ပြောခဲ့ပါသည်။ ဧရိယာတစ်ခုလုံးကို မိုင်းရှင်းလင်း ရေးလုပ်ဆောင်ကာ အခြေခံအဆောက်အအုံများ ပြန်လည်တည်ဆောက်ခြင်းနှင့် အလုပ်အကိုင်နှင့် အိမ်ရာများများ ဖန်တီးပေးမည်ဆိုသော အကြမ်းဖျင်း အစီအစဉ်များ ပါရှိ ပါသည်။ 

လွှတ်တော်အမတ် ဂရင်းက ကမ္ဘာပေါ်၌ အာဏာအကြီးဆုံး ပုဂ္ဂိုလ်တစ်ယောက်၏ နှုတ်ထွက်စကားသည် လူမျိုးတုံးသုတ်သင်မှုကဲ့သို့ ဖြစ်နေသည့်အတွက် လွန်စွာ ရွံစရာကောင်းသည်ဟု ရှုတ်ချခဲ့သည့်အပြင် အဆိုပါ တက္ကဆက်ပြည်နယ်လွှတ်တော်အမတ်က အစ္စရေး ဝန်ကြီးချုပ် နေတန်ယာဟုကိုလည်း ဝေဖန်ပြစ်တင်ခဲ့ပါ သည်။ 

ထရမ့်၏စိတ်ကူးသည် ဒေသတွင်းတည်ငြိမ်မှုနှင့် ပါလက်စတိုင်း အခွင့်အရေးအတွက် ဆိုးရွားသော အကျိုးဆက်များ ဖြစ်လာနိုင်သည့်အတွက် ကမ္ဘာ့ ခေါင်းဆောင်များနှင့် လူသားချင်းစာနာထောက်ထားမှု အဖွဲ့များက ထရမ့်ကိုသတိပေးမှုများ ပြုလုပ်လာကြပါသည်။ 

“သမ္မတကိုစွပ်စွဲပြစ်တင်ရန် လှုပ်ရှားမှုစတင်နေပြီ” ဟု ဂရင်းက ဆက်လက်ကြေညာခဲ့ပြီး ၎င်း၏ “ယုတ်ညံ့သောလုပ်ရပ်များ အဆိုပြုထားချက်” နှင့် “ယုတ်ညံ့သော လုပ်ရပ်များ” နှစ်ခုလုံးအတွက် စွပ်စွဲပြစ်တင်သည့် ပုဒ်မများကိုအသုံးပြုမည်ဟု ကတိပြုခဲ့ပါသည်။

ကိုးကား-Myanmar National Post

တရုတ်နိုင်ငံ သမ္မတ ရှီကျင့်ဖျင်သည် တရုတ်နိုင်ငံသို့ တရားဝင် အလည်အပတ်ခရီးစဉ် လာရောက်သော ထိုင်းနိုင်ငံ ဝန်ကြီးချုပ် ပေထုံတန်နှင့် ဖေဖော်ဝါရီ ၆ ရက် နံနက်ပိုင်းက ပေကျင်းမြို့ ပြည်သူ့ခန်းမဆောင်တွင် တွေ့ဆုံဆွေးနွေးခဲ့သည်။

ထိုသို့တွေ့ဆုံဆွေးနွေးရာတွင် ရှီကျင့်ဖျင်က တရုတ်-ထိုင်း ချစ်ကြည်ရေး လက်ဆင့်ကမ်းဆက်ခံ လာသည်မှာ နှစ်ပေါင်းတစ်ထောင်ကျော်ရှိပြီဖြစ်ရာ “တရုတ်-ထိုင်း မိသားစုပမာ ချစ်ကြည်ရင်းနှီးမှု” သည် အချိန်ကြာလာသည်နှင့်အမျှ ပို၍ရှင်သန်အားကောင်းလာခဲ့ကြောင်း ထောက်ပြပြောကြားခဲ့ သည်။ သံတမန် ဆက်ဆံရေးထူထောင်သည့် ရာစုနှစ်တစ်ဝက်ကြာကာလတွင် နှစ်နိုင်ငံသည် အပြန်အလှန်လေးစားမှု၊ တန်းတူညီမျှ ဆက်ဆံမှု၊ ရိုးသားစွာ အပြန်အလှန် ယုံကြည်မှု၊ အပြန်အလှန် ဖေးမကူညီမှုများကို လက်ကိုင်ထား၍ တစ်ဖက်နိုင်ငံ၏ နိုင်ငံ့အချုပ်အခြာအာဏာ၊ လုံခြုံရေး၊ ဖွံ့ဖြိုးတိုးတက်ရေး အကျိုးစီးပွားအား ကာကွယ်ထိန်းသိမ်းမှုကို အစဉ်အမြဲ အခိုင်အမာ ထောက်ခံ အားပေးခဲ့ကြကြောင်း၊ ယခုနှစ်သည် တရုတ်-ထိုင်း သံတမန်ဆက်ဆံရေး ထူထောင်သည့် နှစ် ၅၀ ပြည့် အခါမယနှင့် “တရုတ်-ထိုင်း ချစ်ကြည်ရေး ရွှေရောင် နှစ် ၅၀ ပြည့်” ဖြစ်ရာ နှစ်ဖက်အနေဖြင့် အစဉ်အလာကို ဆက်ခံ၍ အနာဂတ်သို့ အတူလက်တွဲ ရှေ့သို့ လျှောက်လှမ်းကာ တရုတ်-ထိုင်း အေးအတူ ပူအမျှ အသိုက်အဝန်း တည်ဆောက်ရေးကို ထဲထဲဝင်ဝင် လက်တွေ့ဖော်ဆောင်ရေး တွန်းအားပေးပြီး နှစ်နိုင်ငံပြည်သူများအား ပိုမိုကောင်းမွန်စွာ အကျိုးဆောင်ရမည် ဖြစ်သလို ဒေသနှင့် ကမ္ဘာကို ပိုမိုအကျိုးဖြစ်ထွန်းအောင် ဆောင်ရွက်ရမည်ဖြစ်ကြောင်း ၎င်းက ပြောကြားခဲ့ သည်။

ရာစုနှစ်အတွင်း မကြုံစဖူး အပြောင်းအလဲကြီးများကို ရင်ဆိုင်ရာတွင် တရုတ်-ထိုင်း ဆက်ဆံရေး၏ တည်ငြိမ်မှုနှင့် သေချာရေရာမှုများဖြင့် ပြင်ပပတ်ဝန်းကျင်၏ မရေရာမှုကို ကိုင်တွယ်စီမံရန်အတွက် ထိုင်း-တရုတ် နှစ်နိုင်ငံသည် မဟာဗျူဟာ အပြန်အလှန်ယုံကြည်မှု ခိုင်မာရမည် ဖြစ်ပြီး အပြန်အလှန် အခိုင်အမာ ထောက်ခံအားပေးရမည် ဖြစ်ကြောင်း ရှီကျင့်ဖျင်က အလေးထား ပြောကြားခဲ့သည်။ တရုတ်နိုင်ငံသည် ထိုင်းနိုင်ငံနှင့်အတူ ဖွံ့ဖြိုးတိုးတက်ရေး မဟာဗျူဟာများ ချိတ်ဆက်ပြီး အပြန်အလှန် အကျိုးဖြစ်ထွန်းသော ပူးပေါင်းဆောင်ရွက်မှုများကို တိုးချဲ့သွားလိုကြောင်း၊ တရုတ်-ထိုင်း ရထားလမ်း စသည့် ပြယုဂ်စီမံကိန်းများကို ကောင်းမွန်စွာ ဖော်ဆောင်ပြီး တရုတ်-လာအို-ထိုင်း ချိတ်ဆက်ဖွံ့ဖြိုးတိုးတက်ရေး မျှော်မှန်းချက်က ပိုမိုများပြားသော အောင်မြင်မှုရလဒ်များ ဆောလျင်စွာရရှိရေး တွန်းအားပေးဆောင်ရွက်သွားလိုကြောင်း၊ ဒစ်ဂျစ်တယ် စီးပွားရေး၊ စွမ်းအင်သစ် မော်တော်ယာဉ်စသည့် ထွန်းသစ်စကဏ္ဍ ပူးပေါင်းဆောင်ရွက်မှုများ နက်ရှိုင်းစွာ ဆောင်ရွက်မည်ဖြစ်သလို ပိုမိုတည်ငြိမ်၊ ချောမွေ့သည့် ကုန်ထုတ်လုပ်ငန်းကွင်းဆက်၊ ထောက်ပံ့ရေး ကွင်းဆက်ကို လက်တွဲအတူ တည်ဆောက်မည် ဖြစ်ကြောင်း ၎င်းက ပြောကြားခဲ့သည်။

အွန်လိုင်းလောင်းကစား၊ ဆက်သွယ်ရေးလိမ်လည်မှု တိုက်ဖျက်ရေးတွင် ထိုင်းနိုင်ငံက အားကောင်းသော အစီအမံများ ဆောင်ရွက်ခြင်းအပေါ် တရုတ်နိုင်ငံအနေဖြင့် တန်ဖိုးထားချီးကျူး ပါကြောင်း၊ နှစ်ဖက်အနေဖြင့် လုံခြုံရေးကဏ္ဍ တရားဥပဒေစိုးမိုးရေးနှင့် တရားစီရင်ရေး ပူးပေါင်းဆောင်ရွက်မှုများကို ဆက်လက်အားဖြည့်ကာ ပြည်သူများ၏အသက်အိုးအိမ်စည်းစိမ်လုံခြုံရေးကို ကာကွယ်ထိန်းသိမ်းရမည် ဖြစ်သလို ဒေသတွင်းနိုင်ငံများ ကူးလူးဖလှယ်ရေး ပူးပေါင်းဆောင်ရွက်မှုစနစ်ကို ကာကွယ်ထိန်းသိမ်းရမည် ဖြစ်ကြောင်း၊ အပြန်အလှန် သိရှိနားလည်မှု၊ ချစ်ကြည်ရင်းနှီးမှုကို နက်ရှိုင်းအောင် ဆောင်ရွက်ရမည် ဖြစ်ရာ သံတမန်ဆက်ဆံရေး ထူထောင်ခြင်း ၅၀ ပြည့်နှစ် အထိမ်းအမှတ် စုံလင်ကြွယ်ဝသော အစီအစဉ်များအား အတူတကွ ကျင်းပပြီး နှလုံးသားကို ပို၍ နွေးထွေးစေသော၊ ပြည်သူ့အကျိုးဖြစ်ထွန်းစေသော လူမှုဘဝအကျိုးဖြစ်ထွန်းစေသည့် အစီအစဉ် များအား တည်ဆောက်ခြင်းဖြင့် တရုတ်-ထိုင်း ချစ်ကြည်ရေး ရင်ထဲစွဲမြဲ နက်ရှိုင်းစေရန် ခေတ်အဆက်ဆက် လက်ဆင့်ကမ်းသွားရမည် ဖြစ်ကြောင်း၊ လန်ချန်း-မဲခေါင် ပူးပေါင်းဆောင်ရွက်မှု ပူးတွဲ ဥက္ကဋ္ဌအဖြစ် ထိုင်းနိုင်ငံက တာဝန်ထမ်းဆောင်ခြင်းကို တရုတ်နိုင်ငံအနေဖြင့် အားပေး ထောက်ခံသလို ထိုင်းနိုင်ငံက BRICS မိတ်ဖက်နိုင်ငံ ဖြစ်လာသည့်အပေါ် ဂုဏ်ပြုပါကြောင်း၊ ထိုင်းနိုင်ငံနှင့်အတူ နီးကပ်သည့် ညှိနှိုင်းပူးပေါင်းဆောင်ရွက်မှုများ ထားရှိကာ ကုလသမဂ္ဂအား ဗဟိုပြုသည့် နိုင်ငံတကာစနစ်နှင့် နိုင်ငံတကာဥပဒေအား အခြေခံသည့် နိုင်ငံတကာစနစ်ကို အခိုင်အမာ ကာကွယ်သွားမည်ဖြစ်သလို ကမ္ဘာ့တောင်ဘက်ခြမ်းနိုင်ငံများ စည်းလုံးညီညွတ်စွာ ပူးပေါင်းဆောင်ရွက်မှုကို တိုးမြှင့်ကာ ကမ္ဘာ့ငြိမ်းချမ်းရေးအား ကာကွယ်ထိန်းသိမ်းပြီး ဘုံဖွံ့ဖြိုး တိုးတက်မှုအား မြှင့်တင်သွားလိုကြောင်း ပြောကြားခဲ့သည်။

ပေထုံတန်က “ထိုင်း-တရုတ် ချစ်ကြည်ရေး ရွှေရောင် နှစ် ၅၀ ပြည့်” အခါသမယတွင် တရုတ်နိုင်ငံသို့ လာရောက်လည်ပတ်ရသည့်အတွက် အလွန်ဝမ်းသာကြောင်း ပြောကြားခဲ့သည်။ နှစ် ၅၀ ကြာ ကာလအတွင်း ထိုင်း-တရုတ် ဆက်ဆံရေးသည် မိုးဒဏ်လေဒဏ်ကို ဖြတ်သန်းခဲ့ကြရာ အစဉ်အမြဲ အပြန်အလှန် ဖေးမကူညီမှု၊ အတူတကွ ဖွံ့ဖြိုးတိုးတက်မှု၊ အစဉ်အမြဲ အပြန်အလှန် ယုံကြည်မှု၊ အပြန်အလှန် ဗဟိုအကျိုးစီးပွားများအား လေးစားမှုများဖြင့် တစ်မူထူးခြားသော ချစ်ကြည်ရင်းနှီးစွာ ပူးပေါင်းဆောင်ရွက်သည့် ဆက်ဆံရေးကို ထူထောင်ခဲ့ကြကြောင်း၊ ထိုင်းနိုင်ငံအနေဖြင့် တရုတ် တစ်နိုင်ငံတည်း မူဝါဒကို အခိုင်အမာ ကျင့်သုံးကြောင်း၊ တရုတ်နိုင်ငံနှင့်အတူ အဆင့်မြင့်အလွှာ ကူးလူးဖလှယ်ရေးကို အားဖြည့်ကာ အပြန်အလှန် ချိတ်ဆက်မှု၊ ကုန်သွယ်စီးပွား၊ လယ်ယာ စိုက်ပျိုးရေး စသည့် ကဏ္ဍများ၌ နီးကပ်သော ပူးပေါင်းဆောင်ရွက်မှုများ ထားရှိသွားလိုကြောင်း၊ လူမှုယဉ်ကျေးမှုဖလှယ်ရေး၊ ပြည်သူချင်း စိတ်ချင်းယှက်နွှယ်ရေးကို မြှင့်တင်ကာ ငြိမ်းချမ်းရေးကို အတူမျှဝေ၍ အတူတကွ စည်ပင်ဝပြောသော နောက်ထပ် နှစ် ၅၀ ကို ဖွင့်လှစ်ပြီး သားစဉ်မြေးဆက် အကျိုးဖြစ်ထွန်းအောင် ဆောင်ရွက်သွားလိုကြောင်း ၎င်းကပြောကြားခဲ့သည်။ ထိုင်းနိုင်ငံအနေဖြင့် တရုတ်နိုင်ငံနှင့် အခြားသော အိမ်နီးချင်းနိုင်ငံများနှင့်အတူ တရားဥပဒေစိုးမိုးရေး ပူးပေါင်း ဆောင်ရွက်မှုကို အားဖြည့်သွားလိုပြီး ထိရောက်သည့် အစီအမံများကို ပြတ်ပြတ်သားသား ဆောင်ရွက်ကာ အွန်လိုင်းလောင်းကစား၊ ဆက်သွယ်ရေး လိမ်လည်မှုစသည့် နယ်စပ်ဖြတ်ကျော် ပြစ်မှုများကို တိုက်ဖျက်သွားလိုကြောင်း၊ နိုင်ငံတကာရေးရာတွင် တရုတ်နိုင်ငံက တာဝန်သိနိုင်ငံကြီး အခန်းကဏ္ဍမှ အစဉ်အမြဲပါဝင်ပြီး ဖွံ့ဖြိုးဆဲနိုင်ငံများ၏ အကျိုးစီးပွားကို အခိုင်အမာ ကာကွယ် ထိန်းသိမ်းပေးရာ ထိုင်းနိုင်ငံအနေဖြင့် တရုတ်နိုင်ငံနှင့်အတူ ညှိနှိုင်းပူးပေါင်းဆောင်ရွက်မှုများ အားဖြည့်၍ ကမ္ဘာလုံးဆိုင်ရာ စိန်ခေါ်မှုများကို အတူတကွ ရင်ဆိုင်ဖြေရှင်းသွားလိုကြောင်း ၎င်းက ပြောကြားခဲ့သည်။ အဆိုပါတွေ့ဆုံဆွေးနွေးပွဲကို ဝမ်ရိ ပါဝင်တက်ရောက်ခဲ့ကြောင်း သိရသည်။ 

မှီငြမ်း။ Xinhua

ယခုသီတင်းပတ်အစောပိုင်းက UNHCR မှ နုတ်ထွက်ကြောင်း ကြေညာလိုက်သည့် အမေရိကန် နည်းတူ အစ္စရေး သည်လည်းကုလသမဂ္ဂလူ့အခွင့်အရေးကောင်စီ (UNHCR) တွင်မပါဝင်တော့ကြောင်း အစ္စရေးနိုင်ငံခြားရေးဝန်ကြီး Pascal Sim က ဖေဖော်ဝါရီ ၆ ရက်တွင် ပြောကြား လိုက်ပါသည်။

အဆိုပါ ပြောကြားချက်ကို တုံ့ပြန်သည့်အနေဖြင့် UNHCR ပြောရေးဆိုခွင့်ရှိသူ Pascal Sim က အစ္စရေးသည် ကောင်စီ၏ လေ့လာသူနိုင်ငံအဆင့်သာရှိသဖြင့် နုတ်ထွက်နိုင် မည်မဟုတ်ကြောင်း ပြောကြားထားပါသည်။ 

ဂျီနီဗာအခြေစိုက် ကုလသမဂ္ဂလူ့အခွင့်အရေးကောင်စီ (UNHCR) ကို အဖွဲ့ဝင် ၄၇ နိုင်ငံဖြင့် ဖွဲ့စည်းထားပြီး လေးနှစ်လျှင်တစ်ကြိမ် အလှည့်ကျတာဝန် ထမ်းဆောင်ကြရန် ကျန်သည့် ကုလသမဂ္ဂအဖွဲ့ဝင်နိုင်ငံများက ရွေးချယ် တင်မြှောက်ပေးရပါသည်။ အမေရိကန်သည် လက်ရှိအချိန်တွင် ကောင်စီအဖွဲ့ဝင် မဟုတ်သေးပါ။ 

၂၀၀၆ ခုနှစ်တွင် စတင်ဖွဲ့စည်းခဲ့သော လူ့အခွင့်အရေးကောင်စီသည် အစ္စရေးအပေါ် ဂျူးမုန်းတီးဝါဒကို လက်ကိုင်ထားသည့် အဖွဲ့အစည်းဖြစ်ကြောင်း၊ မိမိ နိုင်ငံအပေါ် စဉ်ဆက်မပြတ် သဘောထားတင်းမာစွာဆက်ဆံခဲ့ပြီး ဆန့်ကျင်သည့် ဘက်လိုက်မှုများ ရှိခဲ့ခြင်းဖြစ်ကြောင်း ယခုကဲ့သို့ ဆုံးဖြတ်လိုက်ခြင်းဖြစ်ကြောင်း Sim က ဆက်လက်ပြောကြားထားပါသည်။

ပါလက်စတိုင်းဒေသဆိုင်ရာ ကုလသမဂ္ဂအထူး ကိုယ်စားလှယ် Francesca Albanese ကလည်း ယခုလို အစ္စရေး၏ ဆုံးဖြတ်ချက်မှာ အလွန်အမင်း ပြင်းထန် ကြောင်း၊ လူ့အခွင့်အရေးကောင်စီအနေဖြင့် အစ္စရေးတို့ ဖြစ်ချင်သည့်ဆန္ဒကို နားလည်ပေးရန် ပျက်ကွက်ခဲ့ခြင်းကို ပြသလိုက်ခြင်းပင်ဖြစ်ကြောင်း ပြောကြားထားပါသည်။ 

ကိုးကား -AL JAZEERA 

ယူကရိန်းနှင့် ယာယီအပစ်အခတ်ရပ်စဲရေးကိစ္စကို လက်မခံကြောင်းနှင့် သဘောတူညီလိုက်ပါက အနောက်အုပ်စုနှင့်ယူကရိန်းတို့အား တိုက်ခိုက်မှုများကို ပြန်လည်မစတင်မီ အင်အားပြန်လည်ဖြည့်နိုင်ရေး အခွင့်အရေးပေးသကဲ့သို့ ဖြစ်မည်ဟု ရုရှားနိုင်ငံခြားရေးဝန်ကြီးဌာနမှ ပြောရေးဆိုခွင့်ရှိသူ Maria Zakharova က ပြောကြားလိုက် ပါသည်။

မော်စကိုသည် လက်ရှိဖြစ်ပေါ်နေသော အကျပ်အတည်းကို အဆုံးသတ်စေမည့် ရေရှည်တည်တံ့သော အဖြေတစ်ခုကိုသာ ရှာဖွေနေကြောင်း Zakharova က ဖေဖော်ဝါရီလ၆ ရက်နေ့တွင်ပြုလုပ်ခဲ့သော ပုံမှန်သတင်းစာရှင်းလင်းပွဲ တစ်ခု၌ မော်စကို၏ သဘောထားကို ရှင်းပြခဲ့သည်။

ယာယီအပစ်အခတ်ရပ်စဲရေးမှသည် ပဋိပက္ခကိုပြီးဆုံးစေမည်ဟူသော ယူဆချက်ကိုလက်မခံကြောင်းနှင့် ပဋိပက္ခအကျပ်အတည်း ထပ်မံမဖြစ်ပွားစေရန် အာမခံနိုင်မည့် ယုံကြည်စိတ်ချရပြီး တရားဝင်ချုပ်ဆိုထားသော သဘောတူညီချက်များနှင့် လုပ်ငန်းစဉ်များကိုသာလိုအပ်ကြောင်း သူမက ဆက်လက်ပြောကြားခဲ့ပါသည်။

ပဋိပက္ခကို လုံးဝချုပ်ငြိမ်းသည်အထိဆောင်ရွက်မည်ဟု ဒေါ်နယ်ထရမ့် အစိုးရအဖွဲ့၏ အကြိမ်ကြိမ် ကတိပြုမှုများကို မော်စကိုက အလေးအနက်ထားပါကြောင်း ထပ်လောင်းပြောကြားခဲ့သည်။

Trump က ၎င်း၏အစိုးရအဖွဲ့နှင့် ရုရှားအစိုးရအဖွဲ့တို့သည် သုံးနှစ်နီးပါးကြာမြင့်နေပြီဖြစ်သော ပဋိပက္ခကို အဆုံးသတ်နိုင်ရန် နှစ်ဘက်ညှိနှိုင်းနေကြောင်း လွန်ခဲ့သောသီတင်းပတ်ကပြောဆိုခဲ့ပြီး မော်စကိုကလည်း တိုက်ခိုက်ခြင်းထက် သံတမန်ရေးနည်းလမ်းဖြင့်ဖြေရှင်းနိုင်ရေး ဆောင်ရွက်လိုမှုသဘောထားကို အကြိမ်ကြိမ်ချပြခဲ့ကြောင်းနှင့် ညှိနှိုင်းမည့်အချက်များသည် ပကတိမြေပြင်အခြေအနေအပေါ်မူတည်၍ ထည့်သွင်းစဉ်းစားရန်လိုကြောင်း ကရင်မလင်က ပြောကြားခဲ့သည်။

ကိုးကား-RT

အိန္ဒိယနိုင်ငံမှ တရားမဝင် ဝင်ရောက်လာသည့် ရွှေ့ပြောင်းနေထိုင်သူ ၁၀၄  ဦးကို သယ်ဆောင်လာသည့် အမေရိကန်စစ်လေယာဉ်သည် ဖေဖော်ဝါရီ လ ၅ ရက်တွင်  အမ်ရစ်စတာမြို့လေဆိပ်သို့ ဆိုက်ရောက်လာခဲ့ကြောင်း အစိုးရအဖွဲ့မှ အရာရှိများက ပြောသည်။

ယခုပို့ဆောင်ခဲ့သည့် ရွှေ့ပြောင်းနေထိုင်သူများသည် အမေရိကန်အစိုးရ၏ တရားမဝင်ရွှေ့ပြောင်းနေထိုင်သူများ တိုက်ဖျက်ရေး အစီအစဉ်အရ အိန္ဒိယနိုင်ငံသို့ ပထမဆုံးအသုတ်အဖြစ် ပို့ဆောင်ခြင်းခံရသူများဖြစ်သည်။

အမေရိကန်စစ်လေယာဉ်သည် တက္ကဆပ်ပြည်နယ် ဆန်အန်တိုနီယိုမြို့မှ ပျံသန်းလာခြင်းဖြစ်ပြီး အိန္ဒိယနိုင်ငံမြောက်ပိုင်းရှိ အမ်ရစ်စတာလေဆိပ်သို့ ရောက်ရှိလာခြင်းဖြစ်သည်။ အမေရိကန်မှ ပြည်နှင်ဒဏ်ပေးခံရပြီး ပြန်လည်ပို့ဆောင်ခြင်း ခံရသူများတွင် အမျိုးသား ၇၉ ဦး၊ အမျိုးသမီး ၂၅ ဦးပါဝင်ကြောင်းသိရသည်။

အိန္ဒိယအစိုးရအနေဖြင့်  အမေရိကန်ပြည်ထောင်စုအပါအဝင် ပြည်ပနိုင်ငံများရှိ တရားမဝင် နေထိုင်နေသည့် နိုင်ငံသားများကို ပြန်လည်လက်ခံရန် အသင့်ရှိသည်ဟု အိန္ဒိယနိုင်ငံခြားရေးဝန်ကြီးဌာနက အစောပိုင်းတွင် ပြောကြားထားသည်။

Source: Myawady Web Portal

ပါလက်စတိုင်းပြည်သူများအား ၎င်းတို့၏ ပိုင်နက်နယ်မြေမှဖယ်ရှားမည့် မည်သည့်ကြိုးပမ်းချက်မျိုးကိုမဆို ကန့်ကွက်ကြောင်း ဆော်ဒီအာရေဗျ နိုင်ငံခြားရေးဝန်ကြီးဌာနက ဖေဖော်ဝါရီလ ၅ရက် တွင် ထုတ်ပြန်သည်။

ဆော်ဒီအာရေဗျနိုင်ငံ၏ အဆိုပါထုတ်ပြန်ချက်သည် ဂါဇာကမ်းမြောင်ဒေသအား အမေရိကန်က ထိန်းချုပ်သိမ်းပိုက်မည့် အဆိုပြုချက်ကို ဒေါ်နယ်ထရမ့်က အစ္စရေးဝန်ကြီးချုပ် ဘင်ဂျမင်နေတန်ယာဟုနှင့် ဖေဖော်ဝါရီလ ၄  ရက်က အိမ်ဖြူတော်၌ ပူးတွဲပြုလုပ်သည့် သတင်းစာရှင်းလင်းပွဲ တွင် ပြောကြားခဲ့ပြီးနောက် ထွက်ပေါ်လာခြင်းဖြစ်သည်။

အဆိုပါအဆိုပြုချက်တွင် အမေရိကန်အနေဖြင့် ဂါဇာကမ်းမြောင်ဒေသအား ထိန်းချုပ်၍ ဒေသတွင်းရှိ အပျက်အစီးများကို ဖယ်ရှားရှင်းလင်းကာ အရှေ့အလယ်ပိုင်း၏ လှပသည့်အပန်းဖြေ ဒေသတစ်ခုအဖြစ် အသွင်ပြောင်းနိုင်သည်ဟု    ထရမ့်က ပြောကြားခဲ့ကြောင်း သိရသည်။

ထို့ပြင် ဆော်ဒီအာရေဗျနိုင်ငံအနေဖြင့် ပါလက်စတိုင်းနိုင်ငံ တည်ထောင်ရေးအတွက် ခိုင်ခံ့စွာဖြင့် ကတိကဝတ်ပြုထားပြီး ပါလက်စတိုင်းနိုင်ငံကို တည်ထောင်နိုင်မှသာ ဂါဇာကမ်းမြောင်ဒေသတွင် အဓွန့်ရှည်တည်တံ့သည့် ငြိမ်းချမ်းရေးကို ဖော်ဆောင်နိုင်မည်ဖြစ်ကြောင်း ဆော်ဒီအာရေဗျနိုင်ငံခြားရေး ဝန်ကြီးဌာနက ဆက်လက်ဖော်ပြသည်။

ထို့အတူ ငြိမ်းချမ်းရေးကိုမြတ်နိုးသည့် နိုင်ငံများအနေဖြင့်လည်း   ၁၉၆၇ ခုနှစ် နယ်စပ်အပေါ် အခြေခံထားသည့် ပါလက်စတိုင်းနိုင်ငံကို အသိအမှတ်ပြုကြရန် ဆော်ဒီအာရေဗျနိုင်ငံက တိုက်တွန်းခဲ့ကြောင်း သိရသည်။ 

Source:Myawady Web Portal

လာမည့်သီတင်းပတ်တွင် အမေရိကန်သမ္မတ ဒေါ်နယ်ထရမ့်အစိုးရအဖွဲ့သည် ဂျာမနီနိုင်ငံတွင်ကျင်းပမည့် နိုင်ငံတကာအစည်းအဝေး၌ ယူကရိန်း-ရုရှား အပစ်အခတ်ရပ်စဲရေး အစီအစဉ်ကို တင်ပြဖွယ်ရှိကြောင်း သိရသည်။

ယူကရိန်းနှင့် ရုရှားနိုင်ငံဆိုင်ရာ အထူးသံတမန် Keith Kellogg က ဖေဖော်ဝါရီ ၁၄ ရက်တွင် စတင်မည့် မြူးနစ်လုံခြုံရေးညီလာခံကို တက်ရောက်မည်ဟု ဖေဖော်ဝါရီ ၄ ရက်(အင်္ဂါနေ့)တွင် ပြောကြားခဲ့ပါသည်။ အဆိုပါညီလာခံတွင် ယူကရိန်းစစ်ပွဲကို အဆုံးသတ်မည့် ထရမ့်၏ အစီအစဉ်ကို ပြောဆိုရန် စီစဉ်ထားကြောင်း ဆိုသည်။

အမေရိကန်၏ အဆိုပြုချက်တွင် “မော်စကိုက နောက်တစ်ကြိမ် မတိုက်ခိုက်နိုင်စေရန် ယူကရိန်းအား လုံခြုံရေးအာမခံချက်များပေးရန်နှင့် ပဋိပက္ခကို ရပ်ဆိုင်း၍ ရုရှားတပ်ဖွဲ့များ သိမ်းပိုက်ထားသောနယ်မြေကို ပြန်ပေးရန်” ပါဝင်ကြောင်း အမေရိကန် မီဒီယာ Bloomberg ၏ ဖေဖော်ဝါရီ ၅ ရက် (ဗုဒ္ဓဟူးနေ့) တွင် ထုတ်ပြန်ချက်အရ သိရှိရသည်။

ယူကရိန်းနှင့် ရုရှားနိုင်ငံဆိုင်ရာ အထူးသံတမန် Kellogg သည် ညီလာခံအပြီး ဖေဖော်ဝါရီ ၂၀ ရက်နေ့၌ ယူကရိန်းနိုင်ငံ မြို့တော် ကိယက်ဗ်သို့ သွားရောက် လည်ပတ်ရန် စီစဉ်နေကြောင်းနှင့် ယူကရိန်းသမ္မတ Volodymyr Zelenskyy နှင့် တွေ့ဆုံရန် မျှော်လင့်ထားကြောင်း ပြည်သူ့အသံလွှင့်ဌာနနှင့် အခြားမီဒီယာ များက ဆိုသည်။ 

ကိုးကား-NHK

ယူကရိန်း၏ NATO အဖွဲ့ဝင်ဖြစ်ရေး ရည်မှန်းချက်များနှင့်ပတ်သက်၍ အမေရိကန် သမ္မတ Donald Trump ၏ ပြောကြားချက်ကို ရုရှားနိုင်ငံက ကြိုဆိုကြောင်း နိုင်ငံခြားရေးဝန်ကြီး Sergey Lavrov က ပြောကြားခဲ့သည်။ကိယက်ဗ်၏ နေတိုးအဖွဲ့တွင်ပါဝင်ရန် အစီအစဉ်များကို ထောက်ခံခြင်းမှာ မှားယွင်းကြောင်း ၀န်ခံသည့် ပထမဆုံးအနောက်နိုင်ငံခေါင်းဆောင်မှာ Trump ဖြစ်သည်ဟု Lavrov က ဖေဖော်ဝါရီ ၅ ရက်နေ့တွင် ပြောကြားခဲ့သည်။

နေတိုးအဖွဲ့ဝင်ဖြစ်ရေး ယူကရိန်း၏လုပ်ဆောင်မှုများအတွက် ရုရှား၏စိုးရိမ်မှုများကို နားလည်ကြောင်းလွန်ခဲ့သည့်လအတွင်းတွင် ထရမ့်ကပြောဆိုခဲ့ပြီး သတင်းထောက်များနှင့်တွေ့ဆုံရာတွင်လည်း ရုရှား၏ ရပ်တည်ချက်သည် ကျောက်ထက်အက္ခရာ တင်ထားသကဲ့သို့ မပျက်မယွင်းခိုင်မြဲမှုရှိကြောင်းနှင့် ဘိုင်ဒင်က ထိုအချက်ကို လျစ်လျူရှုခဲ့ကြောင်း ပြောကြားခဲ့သည်။

Lavrov က ထရမ့်၏ မှတ်ချက်များအရ ယူကရိန်းနှင့် ပဋိပက္ခကိုဆွေးနွေးဖြေရှင်းရန် အသင့်ဖြစ်နေပြီဖြစ်ကြောင်း ဆိုသည်။

၎င်းက နေတိုးအဖွဲ့၏ လုပ်ဆောင်မှုများကြောင့် ပဋိပက္ခ ပိုမိုကြီးမားလာရကြောင်းကို ထပ်လောင်းပြောကြားခဲ့ပြီး ဝါရှင်တန်ကသာ လက်တွေ့ကျသည့် ဆုံးဖြတ်ချက်များကို ချမှတ်နိုင်မည်ဟု ယုံကြည်ကြောင်း ပြောကြားခဲ့သည်။

ကိုးကား-RT

ရုရှားနှင့်အမေရိကန်ကြား ဆက်ဆံရေးများ တိုးမြှင့်နိုင်ရန်အတွက် အမေရိကန်ဘက်က ပထမဆုံးခြေလှမ်းကို စတင်လှမ်းရမည်ဟု အကြီးတန်းရုရှားသံတမန် တစ်ဦးက ထုတ်ဖော်ပြောဆိုခဲ့ပါသည်။ အမေရိကန်အစိုးရနှင့် သဘောတူညီချက်တစ်ခုရရှိရန်အတွက် နိုင်ငံခြားရေး မူဝါဒကို အခြေခံခြင်းက မှားယွင်းသည်ဟုလည်း ရုရှား နိုင်ငံခြားရေးဒုဝန်ကြီး ဆာ‌ဂေးရိုက်ယက်ကော့ဗ်က ပြောကြားခဲ့ပါသည်။

၂၀၂၂ ခုနှစ်၊ ဖေဖော်ဝါရီလတွင် ရုရှား-ယူကရိန်း ပဋိပက္ခ စတင်ပြင်းထန်ခဲ့မှုနှင့်အတူ အမေရိကန်နှင့် ရုရှားအကြားဆက်ဆံရေးသည် ဆယ်စုနှစ်များစွာ အတွင်း အနိမ့်ဆုံးအဆင့်သို့ ကျဆင်းသွားခဲ့ကြောင်း သိရပါသည်။ သို့သော် ၂၀၂၄ခုနှစ် အမေရိကန်သမ္မတ ရွေးကောက်ပွဲ၌ ဒေါ်နယ်ထရမ့် အနိုင်ရရှိခဲ့ပြီးနောက် ရုရှားအစိုးရသည် အမေရိကန်အစိုးရအသစ်နှင့် ဆွေးနွေးမှုများ လုပ်ဆောင်လိုကြောင်း မီးစိမ်းပြခဲ့သည် ဟုလည်း သိရပါသည်။

ထို့အပြင် ရုရှားအစိုးရသည် အနောက်အုပ်စုနိုင်ငံများနှင့် မိတ်ဖက်နိုင်ငံဖြစ်ရန် ကာလရှည်ကြာ ကြိုးပမ်းခဲ့သော်လည်း မည်သည့်နိုင်ငံကမျှ အာရုံစိုက်ခဲ့ခြင်း မရှိခဲ့ကြောင်း ဆာဂေးရိုက်ယက်ကော့ဗ်က ပြောကြားခဲ့ပါသည်။

ကိုးကား-NP News

အီရန်နိုင်ငံ၏     နျူကလီးယား အစီအစဉ်နှင့်စပ်လျဉ်း၍ ငြိမ်းချမ်းသော သဘောတူညီချက်တစ်ရပ် ချမှတ်နိုင်မည့် အဆိုပြုချက်တစ်ရပ်ကို ပြောကြားခဲ့သည်ဟု အမေရိကန်သမ္မတ ဒေါ်နယ်ထရမ့်က ၎င်း၏လူမှုကွန်ရက်တွင် ဖေဖော်ဝါရီလ ၅ ရက်က ဖော်ပြခဲ့ကြောင်း သိရသည်။

အဆိုပါနျူကလီးယား သဘောတူညီချက်သည် အီရန်နိုင်ငံအား ငြိမ်းချမ်းစွာဖြင့် ဖွံ့ဖြိုးတိုးတက်ပြီး ကြွယ်ဝသည့်နိုင်ငံအဖြစ်သို့   ရောက်ရှိစေမည်ဖြစ်ကြောင်း ထရမ့်က ဆက်လက်ပြောကြားသည်။ သို့သော် ထိုသို့လုပ်ဆောင်နိုင်ရန်အတွက် အမေရိကန်နှင့်အီရန်တို့ကြား သဘောတူညီချက်များ ချမှတ်ရန် အရေးတကြီး လိုအပ်ကြောင်း ထရမ့်က   ဆက်လက်ပြောကြားခဲ့ကြောင်း သိရသည်။

အီရန်နိုင်ငံအပေါ် အမေရိကန်အစိုးရက    ဖိအားပေးခြင်းမျိုး လုပ်ဆောင်ရန် အလိုမရှိသော်လည်း ယင်းနိုင်ငံအနေဖြင့် နျူကလီးယား လက်နက်များ ပိုင်ဆိုင်ခြင်းကို လက်မခံနိုင်ဟု ထရမ့်က ဖေဖော်ဝါရီ လ ၄ ရက်တွင် ပြောကြားခဲ့သည်။

ထရမ့်၏ အဆိုပါပြောဆိုချက်သည် အခြေအမြစ် မရှိကြောင်း၊ အီရန်နိုင်ငံသည် ဇီဝလက်နက်များကို ပိုင်ဆိုင်ထားပြီးဖြစ်သည်ဟူသော ပြောဆိုချက်များမှာ အမေရိကန်၏ကြောက်ရွံ့မှုကို ဖော်ပြနေခြင်းသာ ဖြစ်ကြောင်း အီရန်နိုင်ငံခြားရေးဝန်ကြီး အဘတ်အာရက်ချီက အစောပိုင်းတွင် တုံ့ပြန်ပြောကြားခဲ့ကြောင်း သိရသည်။

Source: Myawady Web Portal