တရုတ်နိုင်ငံအနေဖြင့် မြန်မာနိုင်ငံရှိ သက်ဆိုင်ရာ ဘက်အသီးသီး၏ ဆန္ဒ နှင့် ရည်မှန်းချက်များအရ မြန်မာနိုင်ငံ မြောက်ပိုင်းတွင် ငြိမ်းချမ်းရေးလုပ်ငန်းစဉ် ဆက်လက်ဖော်ဆောင်ရေးအတွက် မြန်မာနိုင်ငံ၏ ကြိုးပမ်း အားထုတ်မှုများကို တက်တက်ကြွကြွ ပံ့ပိုးကူညီလျက်ရှိကြောင်း တရုတ် နိုင်ငံ၊ နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ကောကျားခွန်းက ဧပြီ ၂၂ ရက်၌ ပြောကြားခဲ့သည်။ မြန်မာနိုင်ငံရှိ တိုင်းရင်းသား လက်နက်ကိုင် အဖွဲ့ တစ်ဖွဲ့ဖြစ်သော Myanmar National Democratic Alliance Army (MNDAA) သည် ရှမ်းပြည်နယ်၊ လားရှိုးမြို့၏ မြို့ပေါ်နေရာများမှ ဧပြီ ၂၂ ရက် နံနက်အစောပိုင်းတွင် ဆုတ်ခွာသွားကာ ယင်းမြို့အား ထိန်းချုပ်မှုကို တပ်မတော်ထံ ပြန်လည်လွှဲပြောင်းပေးခဲ့ပြီးနောက် ကော၏ မှတ်ချက် စကား ထွက်ပေါ်လာခြင်းဖြစ်သည်။ ထိုသို့ လားရှိုးမြို့အား ပြန်လည် လွှဲပြောင်းပေးမှုကို တရုတ်နိုင်ငံက ကြားဝင်ညှိနှိုင်းပေးခဲ့သလို တရုတ် နိုင်ငံက အပစ်အခတ်ရပ်စဲမှု စောင့်ကြည့်ရေးအဖွဲ့တစ်ဖွဲ့ကိုလည်း လားရှိုးမြို့ သို့ မကြာသေးမီက စေလွှတ်ခဲ့သည်ဟု သတင်းရင်းမြစ်များက ဆိုသည်။ “တရုတ်နိုင်ငံနှင့် မြန်မာနိုင်ငံတို့သည် အစဉ်အလာအားဖြင့် ချစ်ကြည် ရင်းနှီးသည့် အိမ်နီးချင်းနိုင်ငံများဖြစ်ပါသည်” ဟု နေ့စဉ် သတင်းစာ ရှင်းလင်းပွဲ၌ ကောက ပြောကြားခဲ့ပြီး မြန်မာနိုင်ငံ မြောက်ပိုင်းတွင် တည်ငြိမ်အေးချမ်းမှုရှိအောင် ထိန်းသိမ်းခြင်းက နှစ်နိုင်ငံ အတွက် သာမက နှစ်နိုင်ငံ ပြည်သူများ၏ အကျိုးစီးပွားနှင့်လည်း ကိုက်ညီကြောင်း ၎င်းက ဖြည့်စွက်ပြောကြားခဲ့သည်။ 

တရုတ်နိုင်ငံအနေဖြင့် မြန်မာနိုင်ငံ၏ အချုပ်အခြာအာဏာ၊ နယ်မြေပိုင်နက်ပြည့်စုံမှုတို့ကို လေးစားကာ မြန်မာနိုင်ငံ သက်ဆိုင်ရာ ဘက်အသီးသီး၏ ဆန္ဒနှင့် ရည်မှန်းချက်များအရ မြန်မာနိုင်ငံမြောက်ပိုင်းတွင် ငြိမ်းချမ်းရေးလုပ်ငန်းစဉ် ဆက်လက်ဖော်ဆောင်ရေးအတွက် ကြိုးပမ်းမှုများကို တက်တက်ကြွကြွ ပံ့ပိုးကူညီလျက်ရှိကြောင်း ကောက ပြောကြားခဲ့သည်။ ကူမင်းမြို့၌ မြန်မာနိုင်ငံအစိုးရနှင့် တိုင်းရင်းသားလက်နက်ကိုင်အဖွဲ့ MNDAA တို့အကြား ငြိမ်းချမ်းရေး ဆွေးနွေးမှု များတွင် ရရှိခဲ့သော ဘုံသဘောတူညီမှုများကို လက်တွေ့ ဖော်ဆောင်ရေး အတွက် ၎င်းတို့၏ ပူးတွဲဖိတ်ကြားချက်အရ တရုတ်နိုင်ငံအနေဖြင့် တပ်မတော်နှင့် MNDAA တို့အကြား အပစ်အခတ်ရပ်စဲမှုကို ကြီးကြပ်ရန် အပစ်အခတ်ရပ်စဲမှု စောင့်ကြည့်ရေးအဖွဲ့တစ်ဖွဲ့အား လားရှိုးမြို့သို့မကြာမီက စေလွှတ်ခဲ့ပြီး လားရှိုးမြို့၏ မြို့ပေါ်နေရာများအား ချောမွေ့စွာ လွှဲပြောင်းမှုကို အသိသက်သေပြုခဲ့သည်ဟု ကောက ဆိုသည်။ နှစ်ဖက် စလုံးကလည်း မြန်မာနိုင်ငံ မြောက်ပိုင်းတွင် ငြိမ်းချမ်းရေးနှင့် တည်ငြိမ်ရေး ကို ထိန်းသိမ်းရာ၌ အပြုသဘောဆောင်သော အခန်းကဏ္ဍမှ ပါဝင်မှု အတွက် တရုတ်နိုင်ငံအား ချီးကျူးကာ ကျေးဇူးတင်လျက်ရှိကြောင်း ကော က ပြောကြားခဲ့သည်။ “တရုတ်နိုင်ငံအနေဖြင့် ကူမင်း ငြိမ်းချမ်းရေး ဆွေးနွေးပွဲ လုပ်ငန်းစဉ်ကို ရှေ့ဆက်ဖော်ဆောင်သွားမည်ဖြစ်ပြီး တရုတ်-မြန်မာနယ်စပ်တစ်လျှောက် ငြိမ်းချမ်းမှုနှင့် တည်ငြိမ်မှု ခိုင်မာသေချာစေရန်အတွက် ပဋိပက္ခ အဆုံးသတ်ရေးနှင့် ငြိမ်းချမ်းရေးဆွေးနွေးမှုများကို အားပေးထောက်ကူရာမှာ တစ်တပ်တစ်အား ပါဝင်ခြင်းတို့ကို ဆက်လက်လုပ်ဆောင်သွားမည်ဖြစ်ပါသည်” ဟု နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက ပြောကြားခဲ့သည်။ 

ကိုးကား-ဆင်ဟွာ

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ ဒေါ်နယ်ထရမ့်၏ အထူးကိုယ်စားလှယ် စတီဗင် ဝှစ်ကော့ဖ်သည် မကြာမီ မော်စကိုသို့ ရောက်ရှိမည်ဟု သမ္မတ ဗလာဒီမာ ပူတင်၏ နိုင်ငံတကာရေးအကြံပေးပုဂ္ဂိုလ် ယူရီဦး ရှာကော့ဗ် က အတည် ပြုခဲ့ပါသည်။

အမေရိကန်သမ္မတ ဒေါ်နယ်ထရမ့်၏ အထူးသံတမန် စတီဗင် ဝှစ်ကော့ဖ် သည် ယခုသီတင်းပတ်နှောင်းပိုင်းတွင် ရုရှားနိုင်ငံသို့ သွားရောက်မည် ဖြစ်ကြောင်း ရုရှားအစိုးရက အတည်ပြုပြောကြားခဲ့ပါသည်။

ဝှစ်ကော့ဖ်သည် သမ္မတ ဗလာဒီမာပူတင် အပါအဝင် ရုရှားအရာရှိများနှင့် အကြိမ်ကြိမ်တွေ့ဆုံခဲ့ပြီး အမေရိကန်သမ္မတဒေါ်နယ်ထရမ့်၏ ဒုတိယ သက်တမ်းအတွင်း မော်စကို-ဝါရှင်တန် ပြန်လည်နီးစပ်ရေးတွင် အဓိက အခန်းကဏ္ဍမှ ပါဝင်သူအဖြစ် သတ်မှတ်ခံနေရပါသည်။ 

ရုရှားနှင့် ယူကရိန်းတပ်ဖွဲ့များအကြား အလုံးစုံအပစ်အခတ်ရပ်စဲရေးကို ဦးတည်နိုင်သည့် ဖြစ်နိုင်ခြေရှိသော တိုးတက်မှုတစ်ရပ်ကို ယခု သီတင်းပတ်တွင် တွေ့မြင်ရနိုင်ကြောင်း အမေရိကန်သမ္မတက အစောပိုင်းက ပြောကြား ခဲ့ပါသည်။   

ပြီးခဲ့သည့် ကြာသပတေးနေ့ (ဧပြီ ၁၇) တွင် ဝှစ်ကော့ဖ်အပါအဝင် အမေရိကန် အဆင့်မြင့်ကိုယ်စားလှယ်များသည် ယူကရိန်းအား စစ်ရေးဆိုင်ရာအကူအညီကို ဆက်လက်ထောက်ခံရန် ထောက်ခံအားပေးနေကြသော ဥရောပအရာရှိများအား ယူကရိန်း ကိုယ်စားလှယ်များနှင့်အတူ တွေ့ဆုံခဲ့ပြီး ပဋိပက္ခဖြေရှင်းရန် ရွေးချယ်စရာများကို ဆွေးနွေးခဲ့ပါသည်။ ယူကရိန်းဘက်မှ တုံ့ပြန်မှုများအား ယခုသီတင်းပတ်အတွင်း မျှော်လင့်ထားကြောင်း အကြမ်းဖျင်းပြောကြားခဲ့သည်ဟု သိရှိရပါသည်။ 

ကိုးကား - RT

ရုရှားသမ္မတ ဗလာဒီမာ ပူတင်သည် အိုမန်နိုင်ငံသို့ သွားရောက်ရန် အိုမန် ဆူလတန်၏ ဖိတ်ကြားချက်ကို ကျေးဇူးတင်စွာ လက်ခံခဲ့ပါသည်။

အိုမန်နိုင်ငံ ဆူလတန် ဟိုင်းသမ် ဘင်တာရက်က် အယ်လ်ဆာအီဒ်က ရုရှားသမ္မတ ဗလာဒီမာ ပူတင်အား အိုမန်သို့ လာရောက်လည်ပတ်ရန် ဖိတ်ကြားခဲ့ပြီး ရုရှားသမ္မတက ကျေးဇူးတင်စွာ လက်ခံခဲ့ကြောင်းကရင်မလင်နန်းတော်၏ ဝက်ဘ်ဆိုက်တွင် ထုတ်ပြန်သော ပူးတွဲ ကြေညာချက်တွင် ဖော်ပြထားပါသည်။

“အိုမန် ဆူလတန် ဟိုင်းသမ် ဘင်တာရက်က် အယ်လ်ဆာအီဒ်က ရုရှား ဖက်ဒရေးရှင်းသမ္မတ ဗလာဒီမာ ပူတင်၊ ရုရှားအစိုးရနှင့် ပြည်သူများ၏ စိတ်ထားဖြူစင်စွာ လက်ခံကြိုဆိုမှုနှင့် စေတနာပြည့်ဝသော ဧည့်ဝတ်ကျေပွန်မှုအတွက် အထူးကျေးဇူးတင်ကြောင်း ထည့်သွင်းပြောကြားခဲ့ပါသည်။ ထို့အပြင် ရုရှားဖက်ဒရေးရှင်းနိုင်ငံအား နောက်ထပ်တိုးတက်မှုနှင့် ဖွံ့ဖြိုးတိုးတက်မှုများ ရရှိပါစေဟု ဆုတောင်းပို့သကာ သမ္မတဗလာ ဒီမာ ပူတင်အား အိုမန်နိုင်ငံသို့ လာရောက်ရန် ဖိတ်ကြားခဲ့ပါသည်။ ထို ဖိတ်ကြားချက်ကို သမ္မတ ဗလာဒီမာ ပူတင်က ကျေးဇူးတင်စွာ လက်ခံခဲ့သည်” ဟု ထုတ်ပြန်ချက်တွင် ဖော်ပြထားပါသည်။

ဤဖိတ်ကြားမှုသည် နှစ်နိုင်ငံကြား နိုင်ငံရေးနှင့် စီးပွားရေးပူးပေါင်းဆောင်ရွက်မှုများ ပိုမိုနက်ရှိုင်းလာစေရန် ရည်ရွယ်သည်ဟု သိရှိရပြီး၊ အိုမန်နိုင်ငံသည် နိုင်ငံ၊ ပြည်နယ်များအကြား ငြိမ်းချမ်းရေး တည်ဆောက်ရာတွင် အရှေ့အလယ်ပိုင်းဒေသ၏ အဓိကအခန်းကဏ္ဍမှ ပါဝင်လျက်ရှိပြီး ရုရှားနှင့် သံတမန်ဆက်ဆံရေးကို အထူးအလေးထားလျက်ရှိပါသည်။

ကိုးကား - Tass

ရုရှားသမ္မတ ဗလာဒီမာ ပူတင်နှင့် မော်စကိုသို့ အလည်အပတ် ရောက်ရှိနေသော အိုမန်နိုင်ငံ ဆူလတန် Haitham bin Tariq Al Said တို့သည် တွေ့ဆုံဆွေးနွေးမှုများ ပြုလုပ်နေကြောင်း TASS သတင်းထောက်၏ သတင်းအရ သိရပါသည်။ 

အဆိုပါအစည်းအဝေးတွင် နှစ်နိုင်ငံအကြား ကုန်သွယ်ရေး၊ စီးပွားရေး၊ ငွေကြေး၊ ယဉ်ကျေးမှုနှင့် လူသားချင်းစာနာမှုဆိုင်ရာ ပူးပေါင်း ဆောင်ရွက်မှု များအပါအဝင် ပူးတွဲဆောင်ရွက်မှုများကို ဆွေးနွေးသွားမည်ဖြစ်သည်။ ထို့အပြင် နိုင်ငံတကာရေးရာ အရေးကြီးကိစ္စများနှင့် အီရန်၏ နျူကလီးယား အစီအစဉ်များလည်း ဆွေးနွေးမည့် အကြောင်းအရာ များတွင် ပါဝင်နိုင်သည်။ 

ဆွေးနွေးပွဲအပြီးတွင် နှစ်နိုင်ငံသည် သဘောတူညီချက် ၁၀ ခုကို လက်မှတ် ရေးထိုးရန် စီစဉ်ထားပြီး ယင်းတို့တွင် နှစ်နိုင်ငံ သာမန် နိုင်ငံကူးလက်မှတ် ကိုင်ဆောင်သူများအတွက် ဗီဇာလိုအပ်ချက် ပယ်ဖျက်ရေးဆိုင်ရာ သဘောတူညီချက်လည်း ပါဝင်ပါသည်။ ကုန်သွယ်ရေး၊ စီးပွားရေးနှင့် နည်းပညာဆိုင်ရာ ပူးပေါင်းဆောင်ရွက်မှုအတွက် ပူးတွဲကော်မရှင် ဖွဲ့စည်းရန် ပရိုတိုကောလ်လည်း လက်မှတ်ရေးထိုးသွားမည်ဖြစ်သည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရုရှားသမ္မတက မော်စကိုနှင့် ရုရှားတစ်ဝှမ်းလုံး၏ သာသနာ့ခေါင်းဆောင် ပထမဆုံးသော ပက်ထရီအာ့ချ် ကာရီးလ်နှင့် ဆားဘီးယား သာသနာ့ ခေါင်းဆောင် ပါ့ဖီရီးယပ်စ်တို့နှင့် တွေ့ဆုံစဉ် ဆားဘီးယားသမ္မတ အလက်ဇန်းဒါ ဗူချစ်အား မေလ ၉ ရက်နေ့၌ မော်စကိုမြို့တွင် လက်ခံ တွေ့ဆုံရန်မျှော်လင့်နေကြောင်း ပြောကြားခဲ့ပါသည်။ 

“ဒုတိယကမ္ဘာစစ်ကြီးတွင် အောင်ပွဲရရှိမှုနှစ် ၈၀ ပြည့် အထိမ်းအမှတ် အခမ်းအနားများအတွက် ဆားဘီးယားသမ္မတအား မေလ ၉ ရက်တွင် မော်စကိုမြို့၌ ကျင်းပမည့်အစီအစဉ်များတွင် လာရောက်ရန် မျှော်လင့်ပါသည်” ဟု သမ္မတဗလာဒီမာပူတင်က ပြောကြားခဲ့သည်။

ကိုးကား - Tass

ရုရှားနိုင်ငံ မော်စကို၌ မေလ ၉ ရက်တွင် ကျင်းပမည့် ဒုတိယကမ္ဘာစစ် အောင်ပွဲနေ့ (Victory Day) အခမ်းအနားသို့ အမေရိကန် သမ္မတ ဒေါ်နယ်ထရမ့် တက်ရောက်မည် မဟုတ်ကြောင်း ကရင်မလင် ပြောခွင့်ရ ပုဂ္ဂိုလ် ဒီမီထရီပက်စကိုဗ်က TASS သတင်းဌာနကို ပြောကြားလိုက် ပါသည်။

အဆိုပါအခမ်းအနားသို့ နိုင်ငံပေါင်း ၂၀ ကျော်က နိုင်ငံ့အကြီးအကဲများနှင့် အစိုးရခေါင်းဆောင်များ တက်ရောက်မည်ဖြစ်ကြောင်း ကရင်မလင်က ပြောကြားထားပြီး ဖြစ်ပါသည်။ ထို့ပြင် အခမ်းအနားသို့ ဂုဏ်ပြု တက်ရောက်လိုသူ မည်သူ့ကိုမဆို ရုရှားက ကြိုဆိုကြောင်း   ကရင်မလင် ပြောခွင့်ရက ဆက်လက်ပြောကြားထားပါသည်။

ကိုးကား- ကရင်မလင်

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အမေရိကန်သမ္မတအဖြစ် ဒေါ်နယ်ထရမ့် ကျမ်းသစ္စာကျိန်ဆိုခဲ့သည်မှာ တနင်္ဂနွေနေ့ (ဧပြီ ၂၀) တွင် ၃ လ ပြည့်ပြီဖြစ်ပါသည်။ ၎င်း၏မူဝါဒ များသည် ပြည်တွင်းစီးပွားရေးကို အပျက်သဘောဆောင်သည့်သက်ရောက်မှုရှိနိုင်သည်ဆိုသည့် စိုးရိမ်မှုများ ဖြစ်ပေါ်နေသည့်အချိန် လတ်တလော ကောက်ယူခဲ့သော စစ်တမ်းများတွင် ၎င်းအပေါ် ထောက်ခံမှု နှုန်း ကျဆင်းသွားခြင်းကို ပြသနေပါသည်။

ထရမ့် တက်လာပြီးနောက်ပိုင်း ကုန်သွယ်မှုလိုငွေပြမှုကို လျှော့ချရန်နှင့် အခြားပြည်တွင်းပြဿနာများကို ဖြေရှင်းရန်ရည်ရွယ်သည့် အခွန် စည်းကြပ်မှု အစီအမံများကို ဆက်တိုက်လုပ်ဆောင်ခဲ့သည်။

အမေရိကန် နိုင်ငံရေးသတင်းဝက်ဘ်ဆိုက် RealClearPolitics က ထရမ့် သမ္မတရာထူးတာဝန်ယူပြီး ၇ ရက်အကြာ ဇန်နဝါရီလ ၂၇ ရက်နေ့ တွင် ကောက်ယူသည့် သီးခြားစစ်တမ်းများတွင် ၎င်းအပေါ် ထောက်ခံမှုသည် ပျမ်းမျှအားဖြင့် ၅၀.၅ ရာခိုင်နှုန်း၊ ကန့်ကွက်မှု ၄၄.၃ ရာခိုင်နှုန်းရှိကြောင်း ဆိုပါသည်။

ထိုကာလနောက်ပိုင်း ၎င်းအပေါ် ထောက်ခံမှုသည် တဖြည်းဖြည်း ကျဆင်း လာပြီး မတ်လ ၁၃ ရက်နေ့တွင် ကန့်ကွက်မှုပိုသွားခဲ့ပါသည်။ ဧပြီလ ၁၈ ရက်နေ့တွင် ထောက်ခံမှု ၄၆.၅ ရာခိုင်နှုန်းရှိပြီး ကန့်ကွက်မှု ၅၀.၇ ရာခိုင်နှုန်းအထိ ရှိခဲ့ပါသည်။

Quinnipiac တက္ကသိုလ်က အမေရိကန်မဲဆန္ဒရှင် ၁,၄၀၇ ဦးကို ဦးတည်၍ ဧပြီလ ၃ ရက်နေ့မှ ဧပြီလ ၇ ရက်နေ့အထိ သဘောထား စစ်တမ်းတစ်ခု ကောက်ခံခဲ့ပြီး အဆိုပါစစ်တမ်းတွင် ထရမ့် ၏ ကိုင်တွယ်အုပ်ချုပ်မှုပုံစံ၊ စည်းကြပ်ခွန်အစီအမံများ၊ အခြားပြဿနာများနှင့်ပတ်သက်ပြီး မေးမြန်းခဲ့ပါသည်။

ဖြေဆိုသူ ၂၂ ရာခိုင်နှုန်းက အခွန်စည်းကြပ်မှုသည် အမေရိကန် စီးပွားရေးအပေါ် ကာလတိုအတွက် အကျိုးရှိမည်ဟု ယုံကြည်ကြပြီး ၇၂ ရာခိုင်နှုန်း က အဆိုပါအစီအမံများသည် စီးပွားရေးကိုထိခိုက်စေမည်ဟု ယူဆကြောင်း ဖြေဆိုခဲ့ပါသည်။

ကိုးကား-NHK World

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားနှင့်ယူကရိန်းတို့သည် လာမည့်သီတင်းပတ်တွင် သဘောတူညီချက်တစ်ရပ်ကို ရရှိလိမ့်မည်ဟု အမေရိကန် သမ္မတဒေါ်နယ်ထရမ့်က မျှော်လင့်နေကြောင်း သိရှိရပါသည်။

အမေရိကန်သမ္မတ ဒေါ်နယ်ထရမ့်က ယူကရိန်းအရေး အဖြေရှာရေးအတွက် လာမည့်သီတင်းပတ်တွင် သဘောတူညီချက်ရရှိလိမ့်မည်ဟု မျှော်လင့်ကြောင်း ပြောကြားခဲ့ပါသည်။ ၎င်းက ယင်းနှင့်ပတ်သက်သည့် ကြေညာချက်ကို ၎င်း၏လူမှုကွန်ရက်Truth Socialတွင် ဖော်ပြခဲ့ပါသည်။

“ရုရှားနှင့် ယူကရိန်းတို့ ယခုသီတင်းပတ်ထဲမှာ သဘောတူညီချက် ရလိမ့်မည်ဟု မျှော်လင့်ပါကြောင်း” အမေရိကန်သမ္မတက ရေးသားခဲ့ပါသည်။ ၎င်း၏အဆိုအရ ထိုသို့ဖြစ်လာပါက (ရုရှား-အမေရိကန်) နှစ်ဖက်စလုံးသည် “စီးပွားရေးလုပ်ငန်းများကို တက်တက်ကြွကြွ လုပ်ကိုင်တော့မည်” ဖြစ်ပါသည်။

ကိုးကား - Tass

ဂရင်းလန်ကျွန်းကို အမေရိကန်သမ္မတ ဒေါ်နယ်ထရမ့်က သိမ်းယူမည် ဟူသည့် ကြိုးစားမှုများကြောင့် ရွေးချယ်၍ရမည်ဆိုပါက တရုတ်ကိုသာ ရွေးချယ်မည်ဟု ဂရင်းလန်ကျွန်း နိုင်ငံခြားရေးဝန်ကြီး ဗီဗီယန်မော်ဇ်ဖီးလ် ကပြောသွားပါသည်။

"ကျနော်တို့ တရုတ်နိုင်ငံနဲ့ ဆက်ဆံရေးကို ပိုပြီး နက်နက်ရှိုင်းရှိုင်းဖြစ်အောင် ကြိုးစားနေပါတယ်။တရုတ်က ကျနော်တို့အတွက် ပိုပြီးအရေးကြီးတဲ့ နိုင်ငံ ဖြစ်ပါတယ်။ကိစ္စတော်တော်များများအတွက် လက်မှတ်တွေထိုးဖို့ လုပ်နေပါ တယ်။လောလောဆယ် လွတ်လပ်စွာကုန်သွယ်မှုအတွက် လက်မှတ်ထိုး ထားပြီးပါပြီ။ တရုတ်ဘက်ကလည်း ကျနော်တို့ရဲ့ ပင်လယ်စာတင်သွင်းမှုကို လက်ခံထားပါတယ်။တရုတ်နိုင်ငံမှာရှိတဲ့ ဒိန်းမတ်သံရုံးမှာ ဂရင်းလန်သံတမန် ဌာနကို သီးခြားဖွင့်လှစ်ထားပါတယ်"ဟု ဆိုပါသည်။ 

အမေရိကန်၏ မြောက်အတ္တလန်တစ် မဟာဗျူဟာကျကျ ကာကွယ်ရေး အတွက် ဂရင်းလန်ကို သိမ်းပိုက်ရန်ကြိုးစားမှုတွင် ဂရင်းလန်က တရုတ်နှင့် ပေါင်းရန်ကြိုးစားနေသည့်အတွက် အမေရိကန်အတွက် ပိုမို၍အခက်အခဲ ဖြစ်သွားရန်ရှိနေပြီး ဂရင်းလန်ကို သိမ်းပိုက်ရန် ဒိန်းမတ်အစိုးရအပေါ် ဖိအားပေးနိုင်ရန် လွယ်ကူသော်လည်း တရုတ်ကို ဖိအားပေးရန် မလွယ်ကူ သည့် သဘောသက်ရောက်နေပါသည်။

ကိုးကား-Myanmar National Post

အီရန်နိုင်ငံခြားရေးဝန်ကြီး အဘ်ဘတ်စ် အရာချီသည် မော်စကိုမြို့သို့ ရောက်ရှိနေပြီဖြစ်ပြီး ရုရှားနိုင်ငံခြားရေးဝန်ကြီး ဆာဂျေးလာဗရော့ဗ်နှင့် တွေ့ဆုံဆွေးနွေးမည်ဖြစ်ကြောင်း ၄င်းရောက်ရှိလာသည့်ဗီဒီယိုကို သူ၏ Telegram တွင် ပြသထားပါသည်။ 

ယခုခရီးစဉ်မစတင်မီက  အီရန်၏ အဆင့်မြင့်သံတမန်တစ်ဦးဖြစ်သူ အရာချီ သည်  မော်စကိုသို့သွားရောက်၍ အီရန်ခေါင်းဆောင် အလီခါမေနီ၏ သတင်းစကားကို ရုရှားသမ္မတ ဗလာဒီမာ ပူတင်ထံ ပေးပို့ရန် စီစဉ်နေ ကြောင်း ခရီးစဉ်သတင်းကို မျှဝေခဲ့သည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃