ဆီးရီးယား အစိုးရသစ်က နိုင်ငံ၏လွှတ်တော်ကို ဖျက်သိမ်းပြီး ဒမက်စကတ်ရှိ အစိုးရအသစ်၏ ခေါင်းဆောင်အား ကြားဖြတ်ကာလအတွက် နိုင်ငံတော် သမ္မတအဖြစ် ခန့်အပ်ကြောင်း ထုတ်ပြန်ခဲ့ပါသည်။ 

ထို့အပြင် အစိုးရသစ်က နိုင်ငံ၏ ယခင်ဖွဲ့စည်းပုံအခြေခံဥပဒေကို ပယ်ဖျက်ခြင်း၊ နှစ် ၆၀ ကြာ အာဏာရှိခဲ့သော ဗာ့သ်ပါတီကို ဖျက်သိမ်းခြင်းတို့ကို ကြေညာခဲ့သည်။ 

ထိုသို့ပြုလုပ်ခဲ့သည့်အပြင် နိုင်ငံ၏လုံခြုံရေးနှင့် စစ်အင်အားစုအားလုံးကို ဖျက်သိမ်းမည်ဖြစ်ပြီး ၎င်းတို့အစား အသစ်ပြန်လည်ဖွဲ့စည်းမည်ဟုလည်း ကြေညာခဲ့သည်။

ကိုးကား- TASS

Photo: France 24

ကမ္ဘာကြီးပူနွေးလာမှုတိုက်ဖျက်ရေး နိုင်ငံတကာ မူဘောင်တစ်ခုဖြစ်သည့် ပဲရစ်သဘောတူညီချက်မှ နှုတ်ထွက်ကြောင်း အမေရိကန်ပြည်ထောင်စုက ကုလသမဂ္ဂအထွေထွေအတွင်းရေးမှူးချုပ် Antonio Guterres ကို အကြောင်းကြားခဲ့သည်ဟု ကုလသမဂ္ဂက ဆိုပါသည်။

အတွင်းရေးမှူးချုပ်၏ ပြောရေးဆိုခွင့်ရှိသူ Stephane Dujarric က ဇန်နဝါရီ ၂၈ ရက်နေ့က သတင်းစာရှင်းလင်းပွဲ၌ ယခုကဲ့သို့ ပြောကြားခဲ့ခြင်းဖြစ်ပါသည်။

အဆိုပါနှုတ်ထွက်မှုသည် လာမည့်နှစ် ဇန်နဝါရီလ ၂၇ ရက်နေ့တွင် အသက်ဝင်မည်ဖြစ်ကြောင်း ၎င်းကဆိုပါသည်။

အမေရိကန်သမ္မတ Donald Trump သည် အဆိုပါ သဘောတူညီချက်မှ နှုတ်ထွက်ရန် သမ္မတအမိန့်ကို ၎င်း၏ရာထူးသက်တမ်း ပထမဆုံးနေ့ဖြစ်သည့် လွန်ခဲ့သော သီတင်းပတ် ဇန်နဝါရီ ၂၀ ရက်နေ့က လက်မှတ်ရေးထိုးခဲ့ခြင်းဖြစ်သည်။

သမ္မတ Trump ၏ ပထမသက်တမ်းအတွင်း ၂၀၂၀ ပြည့်နှစ်က အမေရိကန်သည် အဆိုပါဘောတူညီချက်မှ နှုတ်ထွက်ခဲ့သော်လည်း သမ္မတ Joe Biden လက်ထက် ၌ ပြန်လည်ဝင်ရောက်ခဲ့ခြင်းဖြစ်သည်။

မစ္စတာ Dujarric က “ပဲရစ်သဘောတူညီချက်အတွက် ကမ္ဘာ့အပူချိန်မြင့်တက်မှုကို ၁.၅ ဒီဂရီဆဲလ်စီးယပ်စ် အထိ ကန့်သတ်ရန် ထိရောက်သည့် ကြိုးပမ်း အားထုတ်မှု အားလုံးကိုပံ့ပိုးပေးရန် ထပ်လောင်း အတည်ပြုပါကြောင်း” ပြောကြားခဲ့ပါသည်။

အမေရိကန်သည် ကမ္ဘာပေါ်တွင် ဖန်လုံအိမ်ဓာတ်ငွေ့ ဒုတိယအများဆုံး ထုတ်လွှတ်သည့် နိုင်ငံဖြစ်ပါသည်။

ကိုးကား-NHK World

ကရိန်းသည် ငွေကြေးနှင့်လက်နက်ခဲယမ်းများထောက်ပံ့မှုမရရှိတော့ပါက ပဋိပက္ခသည် နှစ်လအတွင်း ပြီးဆုံးသွားနိုင်ကြောင်း ပူတင်က ပြောကြားခဲ့သည်။

ဇန်နဝါရီ ၂၈ ရက်နေ့က သတင်းထောက် Pavel Zarubin နှင့်တွေ့ဆုံမေးမြန်းမှု အစီအစဉ်တွင် ရုရှား-ယူကရိန်း ပဋိပက္ခအဆုံးသတ်နိုင်ရေးနှင့် စေ့စပ်ညှိနှိုင်းရေး အခြေအနေအပေါ် မေးမြန်းခဲ့ခြင်းကို ပူတင်က အနောက်နိုင်ငံများ၏ထောက်ပံ့မှုမရပါက ယူကရိန်းသည် ငွေကြေးနှင့် ခဲယမ်းမီးကျောက်များ ပြတ်တောက်သွားပြီး တစ်လခွဲမှ နှစ်လအတွင်း ပြီးဆုံးသွားနိုင်သည်ဟု ပြန်လည်ဖြေကြားခဲ့သည်။ ယူကရိန်းသည် လက်ရှိအခြေအနေ၌ ကိုယ်ပိုင်အချုပ်အခြာအာဏာမရှိဟုလည်း ၎င်းကဆက်လက်ပြောကြားခဲ့ပါသည်။

ပူတင်၏အဆိုအရ ထောက်ပံ့နေသော အနောက်နိုင်ငံများအနေဖြင့် ငြိမ်းချမ်းရေးကိုအမှန်တကယ် လိုလားပါက လုပ်ဆောင်ရန် လွန်စွာလွယ်ကူပါကြောင်းနှင့် မော်စကို၏သဘောထားကို ရှင်းလင်းစွာ ဖော်ပြထားပြီးဖြစ်ကြောင်း ၎င်းကပြောကြားခဲ့သည်။

ရုရှားနှင့်စေ့စပ်ညှိနှိုင်းရန် ပိတ်ပင်ထားသည့် အမိန့်ကို ဖျက်သိမ်းခြင်းဖြင့် ကိယက်ဗ်အနေဖြင့် ဆွေးနွေးလိုသည့် အရိပ်အမြွက်ကိုပြသနိုင်ပြီး ထိုကဲ့သို့ခြေလှမ်း မစတင်နိုင်ပါက အဆိုပြုထားသည့် စေ့စပ်ညှိနှိုင်းရေးအချက်များသည် လွန်ခဲ့သည့်နွေဦးရာသီတွင် သမ္မတသက်တမ်း ကုန်ဆုံးသွားခဲ့သည့် ဇီလန်းစကီးကဲ့သို့ တရားမဝင် ဖြစ်သွားမည်ဖြစ်ကြောင်း ပူတင်က ရှင်းပြခဲ့ပါသည်။

အမေရိကန်နှင့် ယူကရိန်းအားထောက်ပံ့နေသော နိုင်ငံများသည် စက်ကိရိယာများ၊ လက်နက်ခဲယမ်းများမှစ၍ အစိုးရဝန်ထမ်းများ၏ လစာနှင့် ပင်စင်လစာများအထိ ကိယက်ဗ်သို့ ဒေါ်လာဘီလီယံ ၂၀၀ ကျော် ထောက်ပံ့ကူညီမှုများ ပေးပို့ခဲ့ကြသည်။

ထိုကဲ့သို့သော ထောက်ပံ့ကူညီမှုများကြောင့် “အနောက်နိုင်ငံများသည် ပဋိပက္ခကို ပိုမိုဆိုးရွားလာစေသည့် အင်အားစုများ” ဟု ကရင်မလင်ကထောက်ပြဝေဖန်ခဲ့သော်လည်း ဝါရှင်တန်နှင့်ဘရပ်ဆဲလ်တို့က တရားဝင် ငြင်းဆိုထားသည်။

ကိုးကား-RT

အမေရိကန်သမ္မတ ဒေါ်နယ်ထရမ့်သည် ၎င်းအစိုးရ အဖွဲ့၏ ပထမဆုံး ဥပဒေအဖြစ် LAKEN RILEY ACT ကို လက်မှတ်ရေးထိုး ပြဋ္ဌာန်းခဲ့သည်။

ဤဥပဒေအရ ပြစ်မှုကျူးလွန်သည်ဟု စွပ်စွဲခံရသော တရားမဝင် ရွှေ့ပြောင်းနေထိုင်သူများအား ပြည်တွင်းလုံခြုံရေးဌာန (Homeland Security) က ဥပဒေအရ ချုပ်နှောင်ထားရန် လိုအပ်မည်ဖြစ်ကြောင်း သိရှိရပါသည်။

ကိုကား - RIA NoVosti

Photo: AP News

ရုရှားသမ္မတ ဗလာဒီမာပူတင်က ယူကရိန်းနှင့် ငြိမ်းချမ်းရေးဆွေးနွေးမှုများ ပြုလုပ်နိုင်ကြောင်း ဇန်နဝါရီလ ၂၈ရက် (အင်္ဂါနေ့) ညနက်ပိုင်းတွင် ပြောကြားခဲ့သော်လည်း သမ္မတ ဗလာဒီမီယာ ဇီလန်စကီးနှင့် တိုက်ရိုက်ဆွေးနွေးမည်မဟုတ်ကြောင်း ထပ်လောင်း ထုတ်ပြန်ခဲ့သည်။ သမ္မတ ဗလာဒီမာပူတင်က ဇီလန်စကီးအား “တရားဝင်မှုမရှိသောခေါင်းဆောင်” အဖြစ် ရည်ညွှန်းခဲ့ပါသည်။ 

“ဇီလန်စကီး ဆွေးနွေးပွဲတွင် ပါဝင်လိုပါက မိမိဘက်မှ ကိုယ်စားလှယ်များစေလွှတ်မည်” ဟု သမ္မတဗလာဒီမာ ပူတင်က ရုရှားအစိုးရပိုင် ရုပ်မြင်သံကြားသတင်းထောက် ပါဗဲလ် ဇာရုဘင်ထံ ပြောကြားခဲ့ပါသည်။ ထို့ပြင် ယူကရိန်းခေါင်းဆောင်အား စစ်အုပ်ချုပ်ရေးကာလအတွင်း ၂၀၂၃ ခုနှစ်တွင် သက်တမ်းကုန်ဆုံးခဲ့သည့်အတွက် “တရားဝင်မှုမရှိ” ကြောင်းပြောကြားခဲ့ပါသည်။

ကိုးကား - RT

ဥရောပသမဂ္ဂအဖွဲ့ဝင်နိုင်ငံများမှ နိုင်ငံခြားရေးဝန်ကြီးများသည် ဇန်နဝါရီ ၃၁ ရက်တွင် သက်တမ်းကုန်ဆုံးမည့် ရုရှားအပေါ် ပိတ်ဆို့အရေးယူမှုများကို နောက်ထပ် ၆ လ သက်တမ်းတိုးရန် သဘောတူညီခဲ့ ကြောင်း ဥရောပသမဂ္ဂအဖွဲ့ဝင် နိုင်ငံတစ်နိုင်ငံ၏ ကိုယ်စားလှယ်အဖွဲ့မှ TASS သို့ ပြောကြားခဲ့သည်။

ဥရောပသမဂ္ဂအဖွဲ့ဝင် နိုင်ငံခြားရေးဝန်ကြီးများအနေဖြင့် အဆိုပါပိတ်ဆို့အရေးယူမှုကို ထပ်မံသက်တမ်းတိုးလိုက်ကြပါကြောင်း နိုင်ငံခြားရေးဝန်ကြီးဌာန အဆင့်မြင့် ကိုယ်စားလှယ် Kaja Kallas က နောက်ပိုင်းတွင် ၎င်း၏ X လူမှုကွန်ရက်တွင် ရေးသားဖော်ပြထားပါသည်။

ဟန်ဂေရီသည် ရုရှားအပေါ် ဒဏ်ခတ်ပိတ်ဆို့မှု သက်တမ်းတိုးရန် မဲခွဲမဆုံးဖြတ်မီ ဥရောပသမဂ္ဂထံမှ တောင်းဆိုထားသည့် စွမ်းအင်လုံခြုံရေးဆိုင်ရာအာမခံချက်ကို ရရှိထားပြီးဖြစ်သော်လည်း ရုရှားအပေါ် ဒဏ်ခတ်ပိတ်ဆို့မှုအား သက်တမ်းတိုးရန်ဆုံးဖြတ်ချက်ကို ဟန်ဂေရီက ပိတ်ပင်ခဲ့ကြောင်း ဟန်ဂေရီ နိုင်ငံခြားရေးဝန်ကြီး Peter Szijjarto က ပြောကြားထားပါသည်။

ကိုးကား-TASS

ဇန်နဝါရီ ၂၇ ရက်နေ့က အမေရိကန်သမ္မတ ဒေါ်နယ်ထရမ့်သည် Iron Dome အမျိုးသားဒုံးကျည်ကာကွယ်စနစ် ဖွံ့ဖြိုးတိုးတက်ရေးဆိုင်ရာ အမိန့်တစ်ရပ်ကို လက်မှတ်ရေးထိုးလိုက်ကြောင်း အိမ်ဖြူတော်က ပြောကြားလိုက်ပါသည်။ 

ဒေါ်နယ်ထရမ့်သည် ကျမ်းသစ္စာကျိန်ဆိုသည့် ဇန်နဝါရီ ၂၀ ရက်က မိန့်ခွန်းပြောကြားရာတွင် ဒုံးကျည်ကာကွယ်ရေးစနစ်ကို ပြည်တွင်း၌ ထုတ်လုပ်မည်ဖြစ်ကြောင်း ထည့်သွင်းပြောကြားခဲ့ပါသည်။ 

ယခု ဒုံးကျည်ကာကွယ်ရေးစနစ်အမိန့်ကို ထရမ့်က ဖလော်ရီဒါမှ မေရီလန်းသို့ သွားရောက်သည့် Air Force One လေယာဉ်ပေါ်တွင် လက်မှတ်ရေးထိုးလိုက်ခြင်းဖြစ်ပါသည်။ 

ကိုးကား-TASS

ဇန်နဝါရီ ၂၇ ရက်နေ့တွင် ခေါင်းဆောင်နှစ်ဦးကြား ဖုန်းခေါ်ဆိုမှုအပြီး နာရီပိုင်းအကြာတွင် အမေရိကန် သမ္မတ ဒေါ်နယ်ထရမ့်က ၀န်ကြီးချုပ် နာရိန္ဒြာမိုဒီသည် ဖေဖော်ဝါရီလတွင် အိမ်ဖြူတော်သို့ လာရောက်လည်ပတ်ဖွယ်ရှိပြီး အမေရိကန်သည် အိန္ဒိယနှင့် ဆက်ဆံရေးကောင်းမွန်ကြောင်း ထပ်လောင်း ပြောကြားခဲ့သည်။ အိန္ဒိယအစိုးရက အမေရိကန်ခရီးစဉ်ကို တရားဝင်အတည်မပြုသေးသော်လည်း ခေါင်းဆောင်နှစ်ဦး၏ ဖုန်းခေါ်ဆိုမှုအတွင်း ဆွေးနွေးခဲ့ကြောင်း အိမ်ဖြူတော်က ပြောကြားခဲ့သည်။

“မိုဒီသည် လာမည့် ဖေဖော်ဝါရီလတွင် အိမ်ဖြူတော်သို့ ရောက်ရှိလာမည်ဖြစ်ကြောင်း၊ အိန္ဒိယနှင့် အလွန်ကောင်းမွန်သည့် ဆက်ဆံရေးရှိပါကြောင်း” ဇန်နဝါရီ ၂၇ ရက်နေ့က ဖလော်ရီဒါပြည်နယ်မှ Joint Base Andrews သို့ သွားသည့်ခရီးစဉ်၌ Trump က Air Force One လေယာဉ်ပေါ်တွင် သတင်းထောက်များအား ပြောကြားခဲ့သည်။

သတင်းထောက်များက ထရမ့်အား မိုဒီအနေဖြင့် တရားမ၀င်ရွှေ့ပြောင်းနေထိုင်သူများကို ပြန်လည်ခေါ်ဆောင်ရန် သဘောတူညီမှု ရှိ/မရှိ မေးမြန်းရာတွင် ထရမ့်က မိုဒီသည်အမှန်တရားကို ဆောင်ရွက်မည်ဖြစ်ကြောင်းနှင့် ၎င်းတို့ ဆွေးနွေးနေကြောင်း ပြန်လည်ဖြေကြားခဲ့ပါသည်။

ကိုးကား-The Indian Express

အိန္ဒိယနှင့်တရုတ်တို့သည် ငါးနှစ်ကြာဆိုင်းငံ့ထားပြီးနောက် နှစ်နိုင်ငံကြား တိုက်ရိုက်လေကြောင်းခရီးစဉ်များ ပြန်လည်စတင်ရန် မူအားဖြင့်သဘောတူညီခဲ့ကြပြီး နယ်နိမိတ်ပြဿနာများကြောင့် နှစ်ရှည်လများ တင်းမာနေသည့် နှစ်နိုင်ငံဆက်ဆံရေး ရှေ့သို့ခြေလှမ်းသစ် လှမ်းလာနိုင်ခဲ့သည်။ နိုင်ငံခြားရေးအတွင်းဝန် Vikram Misri သည် ပေကျင်းသို့ နှစ်ရက်ကြာ အလည်အပတ်ခရီးစဉ်အပြီးတွင် အိန္ဒိယနိုင်ငံခြားရေးဝန်ကြီးဌာနက ဇန်နဝါရီ ၂၇ ရက်နေ့တွင် အဆိုပါသဘောတူညီချက်ကို ထုတ်ပြန်ခဲ့သည်။ 

Covid-19 ကပ်ရောဂါကြောင့် အိန္ဒိယနှင့်တရုတ်ကြား တိုက်ရိုက်လေကြောင်းဆက်သွယ်မှုကို ၂၀၂၀ ပြည့်နှစ်တွင် ရပ်ဆိုင်းခဲ့ပြီး အိမ်နီးချင်းနိုင်ငံများ၏ တပ်ဖွဲ့များအကြား ပဋိပက္ခများဖြစ်ပွားပြီးနောက် နှစ်နိုင်ငံသံတမန်ဆက်ဆံရေး ယိုယွင်းခဲ့ရသည်။ ၂၀၂၄ ခုနှစ်၊ အောက်တိုဘာလတွင် နယူးဒေလီနှင့် ပေကျင်းတို့သည် အငြင်းအခုံဖြစ်နေရာများမှ ဆွေးနွေးညှိနှိုင်းမှု သဘောတူညီချက်တစ်ရပ်ကို ရယူကြေညာနိုင်ခဲ့ပြီး ဆက်ဆံရေး ပြန်လည်ထူထောင်ရန် ဆောင်ရွက်သွားမည်ဟု ကတိပြုခဲ့ကြသည်။ ရုရှားနိုင်ငံ၊ Kazan ၌ BRICS အကြိုထိပ်သီးအစည်းအဝေးတွင် ခေါင်းဆောင်များဖြစ်သည့် ရှီကျင့်ဖျင်နှင့် နာရိန္ဒြာမိုဒီတို့ နှစ်နိုင်ငံတွေ့ဆုံမှုအတွင်း နယ်စပ်ပြဿနာများနှင့် သံတမန်ရေးရာကိစ္စရပ်များအား ကျယ်ပြန့်စွာဆွေးနွေးခဲ့ကြပါသည်။ အိန္ဒိယမီဒီယာများ၏ ဖော်ပြချက်အရ လေကြောင်းခရီးစဉ်များ ပြန်လည်စတင်ရန် တရုတ်နိုင်ငံ၏တောင်းဆိုမှုကို နယူးဒေလီက ပယ်ချခဲ့ဖူးကြောင်း သိရသည်။ 

ပေကျင်း၌ ဇန်နဝါရီ ၂၆ ရက်နေ့နှင့် ၂၇ ရက်နေ့ ဆွေးနွေးမှုများအပြီးတွင် တိုက်ရိုက်ပျံသန်းမှု ပြန်လည်စတင်ရန် သဘောတူညီမှုရရှိခဲ့ပြီး အောက်တိုဘာလ တွေ့ဆုံဆွေးနွေးမှု နှစ်နိုင်ငံသဘောတူညီချက်များအတိုင်း ဆက်လက်အကောင်အထည်ဖော်နိုင်ခဲ့ခြင်း ဖြစ်သည်။

နောက်ဆုံးအကြိမ် ဆွေးနွေးပွဲများအတွင်း နှစ်နိုင်ငံအကြား တည်ငြိမ်အေးချမ်းရေးနှင့် ပြန်လည်တည်ဆောက်ရေး ဆိုင်ရာခြေလှမ်းအချို့ကို လုပ်ဆောင်ရန် သဘောတူညီခဲ့ကြပြီး စီးပွားရေးနှင့်ကုန်သွယ်မှုနယ်ပယ်များရှိ အထူး စိုးရိမ်မှုပြဿနာများကို ဖြေရှင်းရန်နှင့် ရေရှည်အတွက် မူဝါဒများ၌ ပွင့်လင်းမြင်သာမှုကိုမြှင့်တင်ရန် ရည်ရွယ်ချက်ဖြင့် ဆွေးနွေးခဲ့ကြကာ ဘုရားဖူးခြင်း၊ မီဒီယာနှင့် နည်းပညာရပ်ပိုင်းဆိုင်ရာကိစ္စရပ်များ၌ အပြန်အလှန်ဆက်ဆံရေးများ ပြန်လည်စတင်ခြင်းလည်း ပါဝင်သည်ဟု နယူးဒေလီကဖော်ပြထားသည်။

တရုတ်-အိန္ဒိယဆက်ဆံရေးတိုးတက်မှုနှင့် ဖွံ့ဖြိုး တိုးတက်မှုသည် နှစ်နိုင်ငံ၏ အခြေခံအကျိုးစီးပွားများနှင့်ကိုက်ညီပြီး ကမ္ဘာ့တောင်ဘက်ခြမ်းနိုင်ငံများ၏ တရားဝင်အခွင့်အရေးများနှင့် အကျိုးစီးပွားများကို အကာအကွယ်ပေးကာ အာရှဒေသ၏ ငြိမ်းချမ်းရေး၊ တည်ငြိမ်ရေး၊ ဖွံ့ဖြိုးတိုးတက်ရေးနှင့်သာယာဝပြောရေးကို အထောက်အကူဖြစ်စေသည်ဟု တရုတ်နိုင်ငံခြားရေးဝန်ကြီး Wang Yi က ဇန်နဝါရီ ၂၇ ရက်နေ့တွင် ပြောကြားခဲ့ကြောင်း သိရှိရပါသည်။

ကိုးကား-RT

ဆက်စပ်သတင်း- https://sacministry.gov.mm/my/news/2047

မွမ်ဘိုင်း၊ နိုင်ငံရေး

တရုတ်နိုင်ငံခြားရေးဝန်ကြီး  ဝမ်ယိသည် တရုတ်နှင့်အိန္ဒိယနိုင်ငံကြား ဆက်ဆံရေးတိုးတက်စေရန်အတွက်  အိန္ဒိယနိုင်ငံခြားရေးဝန်ကြီး ဗီခရမ်မစ်စရီနှင့် ပေကျင်းမြို့တော်၌ ဇန်နဝါရီလ၂၇ ရက်တွင် တွေ့ဆုံဆွေးနွေးသည်။

တရုတ်နှင့်အိန္ဒိယတို့အနေဖြင့် နှစ်နိုင်ငံကြားဖြစ်ပွားနေသည့် နယ်စပ်အငြင်းပွားမှုကို လျှော့ချနိုင်ရေးအတွက် လွန်ခဲ့သည့်နှစ်အတွင်းက ချမှတ်ထားသည့် ဆုံးဖြတ်ချက်ကိုဖော်ဆောင်နေစဉ်အတွင်း   ယုံကြည်မှုနှင့်နားလည်မှုကို  တိုးမြှင့်သင့်ကြောင်း ဝမ်ယိက အဆိုပါတွေ့ဆုံပွဲတွင် ပြောကြားသည်။

ထို့ပြင် တရုတ်နှင့် အိန္ဒိယတို့အနေဖြင့် တစ်ဦးနှင့်တစ်ဦးအပေါ် သံသယဖြစ်ခြင်းကို ရှောင်ရှားသင့်ပြီး နှစ်နိုင်ငံစလုံး၏ အကျိုးစီးပွားနှင့် ကိုက်ညီသည့်ဆက်ဆံရေးကို ပိုမိုတိုးတက်လာစေရန်နှင့် အာရှဒေသ၏ငြိမ်းချမ်းရေးကိုသာမက ကမ္ဘာ့ငြိမ်းချမ်းရေးကို အထောက်အကူပြုနိုင်စေရန် လုပ်ဆောင်သင့်ကြောင်း ဝမ်ယိကဆက်လက်ပြောကြားသည်။

လက်ရှိတွင် တရုတ်နှင့် အိန္ဒိယနိုင်ငံတို့သည် နှစ်နိုင်ငံစလုံးအတွက် အကျိုးဖြစ်ထွန်းစေသည့် တွေ့ဆုံဆွေးနွေးမှုများကို ကျင်းပလျက်ရှိပြီး နှစ်နိုင်ငံကြားရှိ  ကွဲပြားမှုများကို   ကောင်းစွာဖြေရှင်းနိုင်ခဲ့ကြောင်း အိန္ဒိယနိုင်ငံခြားရေးဝန်ကြီး ဗီခရမ်မစ်စရီကတုံ့ပြန်ပြောကြားသည်။

နှစ်နိုင်ငံကြားဆက်ဆံရေးသည် ၂၀၂၀ ပြည့်နှစ်တွင် ဖြစ်ပွားခဲ့သည့် အငြင်းပွားမှုများကြောင့် ယိုယွင်းခဲ့ရသော်လည်း ယခုအခါ သံတမန်ရေးနှင့် ကာကွယ်ရေးဆိုင်ရာတွေ့ဆုံဆွေးနွေးမှုများကိုကျင်းပခဲ့ပြီးနောက်   နှစ်နိုင်ငံဆက်ဆံရေးမှာ ပြန်လည်ကောင်းမွန်တိုးတက်လာခဲ့ကြောင်းသိရသည်။

Source: Myawady Web Portal