ဗုဒ္ဓဟူးနေ့ (ဇူလိုင် ၁၆) တွင် အစ္စရေးတို့သည် ဆီးရီးယားမြို့တော် ဒမတ်စကပ်ကို ပြင်းထန်သော ဒုံးကျည်ပစ်ခတ်တိုက်ခိုက်မှုများ ဆက်တိုက် လုပ်ဆောင်ခဲ့ပြီး အစ္စရေးက အစိုးရတပ်များနှင့် ပဋိပက္ခဖြစ်ပွားနေသော ဒရုဇ် (Druze) လူနည်းစုအုပ်စုကို ထောက်ခံသည့် တိုက်ခိုက်မှုဟု ဆိုသည်။

ဆီးရီးယား ရုပ်မြင်သံကြားဌာနတစ်ခုမှ တိုက်ရိုက်ထုတ်လွှင့်နေစဉ် ကာကွယ်ရေးဝန်ကြီးဌာနအဆောက်အအုံအား ဒုံးကျည်ထိမှန်မှုကို ဖော်ပြ ခဲ့ပြီး မှတ်တမ်းတင်နေသည့် သတင်းထောက်များ အပြေးအလွှား တိမ်းရှောင်ခဲ့ရသည်။

အစ္စရေး ကာကွယ်ရေးတပ်ဖွဲ့ (IDF) ၏ သတင်းစာရှင်းလင်းပွဲတွင် စစ်ဘက် အရာရှိတစ်ဦးက အဆိုပါ ကာကွယ်ရေးဝန်ကြီးဌာနနှင့် သမ္မတနန်းတော် အနီးရှိ နေရာတစ်ခုကို ပစ်မှတ်ထားခဲ့ကြောင်း အတည်ပြုခဲ့သည်။

CNN သို့ ဆီးရီးယား ကျန်းမာရေးဝန်ကြီးဌာန၏ ပြောကြားချက်အရ အဆိုပါတိုက်ခိုက်မှုတွင် အနည်းဆုံး တစ်ဦးသေဆုံးပြီး ၁၈ ဦး ဒဏ်ရာရရှိ ခဲ့သည်ဟု သိရှိရသည်။

အစ္စရေးသည် ဆီးရီးယားအစိုးရသစ္စာခံများနှင့် ပဋိပက္ခဖြစ်နေသော ဒရုဇ် လူနည်းစုအုပ်စုကို ကာကွယ်မည်ဟူသော ကတိကဝတ်အတွက် ဆီးရီးယားကို လေကြောင်းတိုက်ခိုက်မှုများ ဆက်လက်ဆောင်ရွက်နေခြင်း ဖြစ်သည်။

ဆီးရီးယားတောင်ပိုင်း Suwayda မြို့တွင် ဒရုဇ် တပ်ဖွဲ့များနှင့် Bedouin အုပ်စုများအကြား အကြမ်းဖက်တိုက်ခိုက်မှုများ စတင်ဖြစ်ပွားခဲ့ပြီး ဆီးရီးယား အစိုးရက ဝင်ရောက်စွက်ဖက်ခဲ့သည်။

အမေရိကန်၏ ဆီးရီးယားဆိုင်ရာ အထူးကိုယ်စားလှယ် Tom Barrack က အခြေအနေကို စိုးရိမ်ဖွယ်ရာအဖြစ် သတ်မှတ်ပြီး အစ္စရေးအား တိုက်ခိုက်မှု များ ရပ်တန့်ရန် တိုက်တွန်းခဲ့သည်ဟု သိရသည်။

သို့သော် အစ္စရေး နိုင်ငံခြားရေးဝန်ကြီး Gideon Sa’ar က အဆိုပါ လုပ်ဆောင်မှုသည် ဒရုဇ် အသိုင်းအဝိုင်းအား ထိခိုက်မှုမဖြစ်စေရန်နှင့် တောင်ဘက်နယ်စပ်ကို ကာကွယ်ရန် အရေးကြီးကြောင်း ပြောကြား ခဲ့သည်။

အစ္စရေး ကာကွယ်ရေးဝန်ကြီး Israel Katz က IDF သည် "Suwayda တွင် ဒရုဇ်များကို တိုက်ခိုက်ခဲ့သော တပ်ဖွဲ့များကို အပြီးအပိုင် ချုပ်ငြိမ်း သွားသည်အထိ အင်အားသုံးကာ ဆက်လက်တိုက်ခိုက်သွားမည်" ဟု ပြောကြားခဲ့သည်။ 

ကိုးကား- CNN 

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

၂၀၃၀ ပြည့်နှစ်မတိုင်မီ ဥရောပတွင် စစ်ပွဲကြီးတစ်ခု ဖြစ်ပွားလာနိုင်ကြောင်း ပြင်သစ်က ခန့်မှန်းထားသည်ဟု ဆိုပါသည်။ ဇူလိုင် ၁၄ ရက်နေ့တွင် ပြင်သစ်၏ ကာကွယ်ရေးနှင့် အမျိုးသားလုံခြုံရေး အတွင်း ရေးမှူးချုပ်ရုံးမှ ထုတ်ပြန်သော နိုင်ငံတကာ မဟာဗျူဟာမူဝါဒ အစီရင်ခံ စာတွင် ယင်းကဲ့သို့ ဖော်ပြထားပါသည်။ 

မော်စကိုက ဥရောပကို ထိုးစစ်ဆင်ရန် အစီအစဉ်ရှိကြောင်း ငြင်းဆိုနေသော်လည်း အဆိုပါ အစီရင်ခံစာတွင် ရုရှားကို အဓိက ခြိမ်းခြောက်မှုအဖြစ် သတ်မှတ်ထားပြီး အီရန်၊ တရုတ်၊ အကြမ်းဖက်ဝါဒ၊ ခွဲထွက်ရေး၊ ဆိုက်ဘာနှင့် အဖွဲ့အစည်းဆိုင်ရာမှုခင်းများကိုလည်း အန္တရာယ်အဖြစ် ဖော်ပြထားပါသည်။

“ရုရှားသည် ပြင်သစ်၏ အကျိုးစီးပွား၊ ၎င်း၏ မိတ်ဖက်နိုင်ငံများနှင့် မဟာမိတ်များ၏ အကျိုးစီးပွား၊ ဥရောပဒေသနှင့် ယူရိုအတ္တလန္တိတ် ဒေသ၏ တည်ငြိမ်မှုကို တိုက်ရိုက်ခြိမ်းခြောက်နေပါသည်” ဟု အစီရင်ခံ စာက ဆိုထားပြီး မော်စကိုကို ဆိုက်ဘာတိုက်ခိုက်မှု၊ ရွေးကောက်ပွဲ များတွင် ဝင်ရောက်စွက်ဖက်မှုနှင့် လူသတ်မှုများဖြင့် စွပ်စွဲထားပါသည်။ ရုရှား၏ အာဖရိက၊ လက်တင်အမေရိက နှင့် အာရှနိုင်ငံများနှင့် ဆက်ဆံရေး တိုးချဲ့မှုများကိုပင် ရန်လိုသော ချဉ်းကပ်မှုကို အတည်ပြုသည့် အထောက် အထားအဖြစ် ဖော်ပြထားပါသည်။

အစီရင်ခံစာတွင် ရုရှားသည် မော်လ်ဒိုဗာ၊ ဘောလ်ကန်ဒေသ သို့မဟုတ် အရှေ့ဥရောပ NATO အဖွဲ့ဝင်နိုင်ငံများကို တိုက်ခိုက်နိုင်သည်ဟု သတိ ပေးထားပြီး အီရန်နှင့် တရုတ်ကိုလည်း မဟာဗျူဟာမြောက် ခြိမ်းခြောက်မှု များအဖြစ် သတ်မှတ်ထားသည်။ အီရန်အား အရှေ့အလယ်ပိုင်းဒေသကို မတည်မငြိမ်ဖြစ်စေသည်ဟု စွပ်စွဲထားပြီး တရုတ်ကိုမူ ကမ္ဘာ့အလုံးစုံ စိုးမိုးရေးကို ရှာဖွေနေသည်ဟု သရုပ်ဖော်ထားသည်။

ပြင်သစ်သည် ၎င်း၏စစ်အားကို အားဖြည့်ရန်နှင့် စီးပွားရေးကို စစ်အတွက် အဆင်သင့်ဖြစ်မှုအဖြစ် ပြောင်းလဲရန် လိုအပ်ကြောင်း အစီရင်ခံစာက ကောက်ချက်ချထားပြီး စစ်ရေးခြိမ်းခြောက်မှုများကို တားဆီးရန် ပြည်တွင်း နှင့် EU တစ်ဝှမ်းလုံးတွင် ရင်းနှီးမြှုပ်နှံမှုအသစ်များ လိုအပ်ကြောင်း တောင်းဆို ထားသည်။

အဆိုပါအစီရင်ခံစာ ထုတ်ပြန်ချိန်သည် EU ၏ စစ်ရေးချဲ့ထွင်မှုကာလနှင့် ယှဉ်တွဲနေသည်။ ဘရပ်ဆဲလ်သည် မကြာသေးမီက ယူရို ၈၀၀ ဘီလီယံ တန်ဖိုးရှိ “ReArm Europe” စီမံကိန်းကို အတည်ပြုခဲ့ပြီး ပြီးခဲ့သည့် လ တွင် ဥရောပ NATO အဖွဲ့ဝင်နိုင်ငံများသည် ကာကွယ်ရေးအသုံးစရိတ်ကို GDP ၏ ၅% အထိ တိုးမြှင့်ရန် သဘောတူညီခဲ့ကြသည်။ ထို ဆုံးဖြတ်ချက် နှစ်ရပ်လုံးတွင် ရုရှား၏ခြိမ်းခြောက်မှုကို အကြောင်းပြချက်အဖြစ် ဖော်ပြ ထားသည်။

အနောက်နိုင်ငံများကို တိုက်ခိုက်ရန် အစီအစဉ်ရှိသည်ဟူသော စွပ်စွဲချက် များကို ရုရှားက ပယ်ချခဲ့ပြီး ကရင်မလင် ပြောရေးဆိုခွင့်ရှိသူ ဒမီထရီ ပက်စကော့ဗ်က အနောက်နိုင်ငံများသည် ၎င်းတို့၏ တိုးမြှင့်လာသော စစ်အသုံးစရိတ်များကို ကာကွယ်ပြောဆိုနိုင်ရန် ရုရှားကို ကြောက်စရာ ကောင်းသော ရန်သူအဖြစ် သမုတ်ကာ အသုံးချနေသည်ဟု ပြောကြား ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ဂျာမနီသည် "နောက်တစ်ကြိမ် အန္တရာယ်ရှိလာနေပြီ" ဟု ကရင်မလင် ပြောရေးဆိုခွင့်ရှိသူ Dmitry Peskov က ဂျာမနီကာကွယ်ရေးဝန်ကြီး Boris Pistorius က ဂျာမန်တပ်များအနေဖြင့် ရုရှားစစ်သားများကို ချေမှုန်းရန် အဆင်သင့်ဖြစ်နေကြောင်း ပြောကြားချက်ကို တနင်္လာနေ့ (ဇူလိုင် ၁၄) က တုံ့ပြန်ပြောကြားခဲ့သည်။ 

RBK စီးပွားရေးသတင်းစာနှင့် အင်တာဗျူးတွင် Peskov က Pistorius အမှန်တကယ် ထိုကဲ့သို့ပြောဆိုခဲ့သည်ကို ယုံကြည်ရန် ခက်ခဲကြောင်း ပြောကြားခဲ့သည်။ "သို့သော် ကံမကောင်းစွာပင် ဤသည်မှာ အမှန် ဖြစ်နေပါသည်" ဟု ၎င်းက ဆိုသည်။

Pistorius သည် တနင်္ဂနွေနေ့ (ဇူလိုင် ၁၃) တွင် ဖော်ပြခဲ့သော Financial Times ၏ အင်တာဗျူးတစ်ခုတွင် စစ်ရေးဆန်သော မှတ်ချက်များကို ပြုလုပ်ခဲ့ပြီး ဂျာမန်တပ်များ၏ တိုက်ပွဲဝင်ရန် အဆင်သင့်ဖြစ်မှုနှင့် လိုအပ်ပါက ရုရှားတပ်များကို အပြီးတိုင် ချေမှုန်းရန်အထိ ပြန်လည် တုံ့ပြန်ရန် စိတ်ပိုင်းဖြတ်ထားမှုတို့ကို ချီးကျူးခဲ့သည်။

ငြိမ်းချမ်းရေးဆွေးနွေးမှုများသည် တန်းတူညီမျှသောအခြေအနေနှင့် တောင့်တင်းခိုင်မာသော အင်အားတစ်ရပ်ရှိနေမှသာ ဖြစ်နိုင်ကြောင်း Pistorius က ခိုင်ခိုင်မာမာပြောကြားခဲ့သည်။ ဘာလင်အနေဖြင့် မည်သူ့ ကိုမျှ ခြိမ်းခြောက်ရန် မရည်ရွယ်သော်လည်း ၎င်းတို့တွင်လည်း သင့်တင့် သော အင်အားရှိကြောင်း ၎င်းက ဖြည့်စွက်ပြောကြားခဲ့သည်။

ရုရှားကငြင်းဆိုထားသော ခြိမ်းခြောက်မှုသည် နေတိုးအဖွဲ့ဝင်နိုင်ငံများမှ အရာရှိများအတွက် အဓိကပြောစရာများထဲမှ တစ်ခုဖြစ်နေဆဲဖြစ်သည်။ အမေရိကန်ဦးဆောင်သောမဟာမိတ်အဖွဲ့ကို ရုရှားကတိုက်ခိုက်ရန် စီစဉ် နေသည်ဆိုသော စွပ်စွဲပြောဆိုမှုများကို မော်စကိုမှ ထပ်ခါတလဲလဲ အဓိပ္ပာယ်မရှိသော စွပ်စွဲချက်အဖြစ် ပယ်ချခဲ့သည်။

ကိုးကား- RT

Photo: fakti.bg

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ကမ္ဘောဒီးယားနိုင်ငံအနေဖြင့် လာမည့်နှစ်မှစ၍ ပြည်သူ့စစ်မှုထမ်းစနစ်ကို စတင်ကျင့်သုံးသွားမည်ဖြစ်ကြောင်း ဝန်ကြီးချုပ် ဟွန်မာနက်က ဇူလိုင်လ ၁၄ ရက်တွင် ပြောသည်။ အိမ်နီးချင်းနိုင်ငံနှင့် တင်းမာမှုများ မြင့်တက်လာရသည့် အခြေအနေသည် နှစ်များစွာကြာ ကျင့်သုံးခြင်းမရှိသည့် ပြည်သူ့စစ်မှုထမ်းစနစ်ကို ကျင့်သုံးရန် အကြောင်းဖန်လာခြင်းဖြစ်ကြောင်း ဝန်ကြီးချုပ်ကပြောသည်။

အသက် ၁၈ နှစ်မှ ၃၀ ကြားရှိ ကမ္ဘောဒီးယားနိုင်ငံသားများအားလုံး နိုင်ငံတော် အတွက် ၁၈ လကြာ စစ်မှုထမ်းရမည်ဟူသော ဥပဒေကို ကမ္ဘောဒီးယားလွှတ်တော် က ၂၀၀၆ ခုနှစ်တွင် အတည်ပြုထားပြီးဖြစ်သည်။

ကမ္ဘောဒီးယားနိုင်ငံနှင့် အိမ်နီးချင်းနိုင်ငံဖြစ်သည့် ထိုင်းနိုင်ငံတို့သည် နယ်စပ်ပိုင်ဆိုင်မှု အငြင်းပွားပြဿနာနှင့်ပတ်သက်၍ မေလတွင် ပဋိပက္ခဖြစ်ပွားမှုကြောင့် ကမ္ဘောဒီးယားစစ်သည်တစ်ဦး   ကျဆုံးသွားသည့်အတွက် နှစ်နိုင်ငံကြား တင်းမာမှုများ မြင့်တက်လာရခြင်း ဖြစ်ကြောင်းနှင့် ယခုအချိန်အထိ ပြေလည်မှု မရရှိသေးကြောင်း သိရသည်။   

MWD Web Portal
 

မော်စကို ဇူလိုင် ၁၄ 
ရုရှားစစ်ဦးစီးချုပ် ဗိုလ်ချုပ်ကြီး ဂျီရာဆီမော့ဗ်သည် ယူကရိန်း စစ်မြေပြင်၌ တိုက်ပွဲဝင်နေသော ရုရှားတပ်များကို သွားရောက် စစ်ဆေးခဲ့ကြောင်း ရုရှားကာကွယ်ရေး၀န်ကြီးဌာနက ယနေ့တွင် သတင်းထုတ်ပြန်ထားသည်။

ရုရှားစစ်ဦးစီးချုပ်ဂျီရာဆီမော့ဗ် သည် ယူကရိန်းအရှေ့ပိုင်းဒွန်းနက်စ် ဒေသ ပိုကရော့ခ်နယ်မြေ၌ တိုက်ပွဲဝင်နေသည့် ရုရှားတပ်များကို သွားရောက်စစ်ဆေးခဲ့ခြင်းဖြစ်သည်။ .

ပိုကရော့ခ် နယ်မြေသည် ဒွန်းနက်စ်ဒေသတစ်ခုလုံးကို ထိန်းချုပ်ရန် ကြိုးပမ်းနေသည့် ရုရှားတပ်များအတွက် အဓိက စစ်ရေးပစ်မှတ်တစ်ခုဖြစ်သည်။

ရှေ့တန်းနယ်မြေ ခရီးစဉ်အတွင်း ရုရှားတပ်မှူးများက စစ်မြေပြင် အခြေအနေများကို ဗိုလ်ချုပ်ကြီး ဂျီရာဆီမော့ဗ်ထံ တင်ပြခဲ့ကြကြောင်း သိရသည်။ ဒွန်းနက်စ် စစ်မြေပြင်သို့ ဗိုလ်ချုပ်ကြီး ဂျီရာဆီမော့ဗ် သွား ရောက်ခဲ့သည့်အချိန်ကို ရုရှား ကာကွယ်ရေးဝန်ကြီးဌာန သတင်းထုတ်ပြန်ချက်၌ ဖော်ပြထားခြင်း မရှိကြောင်း သိရသည်။

ရုရှားတပ်များသည် လက်ရှိအချိန်တွင် ယူကရိန်းတစ်နိုင်ငံလုံး အကျယ်အ၀န်း၏ ၁၉ ရာခိုင်နှုန်း နီးပါးကို ထိန်းချုပ်ထားကြောင်း သိရသည်။

Ref: RT

Trs: KKO

YDNB Newspaper
 

ထိုင်းနိုင်ငံ၏ တပ်မတော်အကြီးအကဲသည် ကမ္ဘောဒီးယားနိုင်ငံနှင့် ဖြစ်ပွားလျက်ရှိသော နယ်စပ်အရေး တင်းမာမှုပြေလျော့စေရန် နည်းလမ်းများကို အဆိုပြုကြောင်း သိရသည်။ ထိုနည်းလမ်းများတွင် နှစ်နိုင်ငံကြားနယ်စပ်ရေးရာ  ကိစ္စရပ်များတွင် ပူးပေါင်းဆောင်ရွက်ရန်နှင့် တာဝေးပစ် လက်နက်များကို ဖယ်ရှားရန်တို့ပါဝင်သည်။

ထို့ပြင် နှစ်နိုင်ငံအနေဖြင့် နယ်စပ်ဖြတ် ကျော်ကုန်သွယ်မှု ချောမွေ့စေရေးနှင့် ပြည်သူများ ပိုမိုလွတ်လပ်စွာသွားနိုင်စေရေးတို့အတွက်  နယ်စပ်စစ်ဆေးရေးဂိတ်များ ဖွင့်လှစ်မှုကို တစ်ပြိုင်နက် လုပ်ဆောင်သွားရန် အကြံ ပြုကြောင်း၊ တာဝေးပစ်လက်နက်များကို ၂၀၂၄ ခုနှစ်တွင် ချထားသည့်နေရာသို့ ရွှေ့ပြောင်းရန် တောင်းဆိုကြောင်း ထိုင်း တပ်မတော်အကြီးအကဲဖြစ်သည့် ဗိုလ်ချုပ်ကြီး ဆောင်ဝစ်နွန်ပက်ဒီးက ပြောသည်။

အလားတူ နှစ်နိုင်ငံစစ်ဘက်ဆိုင်ရာ ဆွေးနွေးမှုများအရ ပူးပေါင်းဆောင်ရွက်ရေးတွင် တိုးတက်မှုများ ရရှိထားပြီး သီတင်းပတ်တစ်ပတ်လျှင် နယ်စပ်တွင် ပူးတွဲကင်းလှည့်မှု သုံးကြိမ် လုပ်ဆောင်ရန် သဘောတူထားကြောင်း ဗိုလ်ချုပ်ကြီးဆောင်ဝစ်နွန်ပက်ဒီးက ပြောထားကြောင်း သိရသည်။

 MWD Web Portal

တီဟီရန်၊ ဇူလိုင် ၁၃ 

ပြီးခဲ့သည့် ဇွန်လ ၁၅ ရက်က အစ္စရေးလေတပ်၏ ဗုံးကြဲတိုက်ခိုက်မှု ကြောင့် အီရန်မြို့တော် တီဟီရန်ရှိ အမျိုးသားလုံခြုံရေးကောင်စီ (Supreme National Security Council) အစည်းအဝေး တက်ရောက်နေသူ အီရန် သမ္မတ Masoud Pezeshkian အပါအဝင် အဆင့်မြင့်အရာရှိများ ခြေထောက် ဒဏ်ရာ အနည်းငယ်ကိုယ်စီ ရခဲ့ကြကြောင်း အီရန်တာဝန်ရှိသူများ ဝန်ခံချက် ကို ကိုးကား၍ Fars သတင်းဌာနက ဇူလိုင်လ ၁၃ ရက်တွင် ထုတ်ဖော် ပြောကြားလာပါသည်။ 

ထိုဖြစ်စဉ်အတွင်း အီရန်သမ္မတနှင့် အဆင့်မြင့်အရာရှိများသည် အရေးပေါ် ထွက်ပေါက်မှတစ်ဆင့် အဆိုပါအဆောက်အဦမှ ထွက်ခွာခဲ့ရကြောင်း သတင်းတွင် ဖော်ပြထားပါသည်။ အစ္စရေးဘက်မှ ထွက်ပေါက် လမ်းကြောင်းများကို ပိတ်ဆို့ရန် ဒုံးကျည် အနည်းဆုံး ၆ ကြိမ် ပစ်ခတ်ခဲ့ပြီး ယင်း တိုက်ခိုက်မှုတွင် အစ္စရေး၏ ထောက်လှမ်းရေးကွန်ရက်များ ပါဝင် ပတ်သက် နိုင်ကြောင်း Fars က ဖြည့်စွက်ပြောကြားထားပါသည်။

ဇွန် ၁၃ ရက် နံနက်စောစောတွင် အစ္စရေးက အီရန်ကို စစ်ဆင်ရေး စတင်ခဲ့ပြီး ၂၄ နာရီအတွင်း အီရန်ဘက်မှ ပြန်လည်တုံ့ပြန်ခဲ့ပါသည်။ ထို့နောက် ၉ ရက်အကြာ ဇွန် ၂၂ ရက် နံနက်စောစောတွင် အမေရိကန်က Fordow၊ Natanz နှင့် Isfahan ရှိ အီရန်၏ နျူကလီးယားစက်ရုံ ၃ ခုကို တိုက်ခိုက်ကာ ပဋိပက္ခတွင် ပါဝင်လာခဲ့သည်။ နောက်တစ်နေ့ညတွင် တီဟီရန်က ကာတာရှိ အမေရိကန်၏ အကြီးဆုံးစစ်အခြေစိုက်စခန်း Al Udeid သို့ ဒုံးကျည်များ ပစ်ခတ်တိုက်ခိုက်ခဲ့သည်။ အမေရိကန်သမ္မတ ဒေါ်နယ်ထရမ့်က ဇွန် ၂၄ ရက်မှစတင်၍ အစ္စရေးနှင့် အီရန်တို့ လုံးဝ စစ်ပြေငြိမ်းရန် သဘောတူညီခဲ့ကြောင်း ထုတ်ပြန်ကြေညာခဲ့သည်။ တရားဝင် အချက်အလက်များအရ ထိုပဋိပက္ခတွင် အီရန်နိုင်ငံသား ၁၀၆၀ ဦး သေဆုံးပြီး ၅၀၀၀ ကျော် ဒဏ်ရာရရှိခဲ့ပါသည်။

ကိုးကား- TASS

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ယူကရိန်းခေါင်းဆောင် ဗလာဒီမာ ဇီလန်စကီးက အမေရိကန်က ယူကရိန်း အား စစ်ရေးအကူအညီများ ပြန်လည်ပေးအပ်ရန် ကတိပြုပြီးနောက်ရက်ပိုင်းအတွင်း ရုရှားနိုင်ငံအတွင်းပိုင်းအထိ နက်ရှိုင်းစွာ ထိုးစစ်ဆင်မည် ဟု ခြိမ်းခြောက်လိုက်သည်။ တနင်္ဂနွေနေ့ (ဇူလိုင် ၁၃) က ကာကွယ်ရေး ဝန်ကြီး Rustem Umerov ၊ တပ်မတော်ကာကွယ်ရေးဦးစီးချုပ် Aleksandr Syrsky နှင့် ဗိုလ်ချုပ်ကြီး Andrey Gnatov တို့နှင့် တွေ့ဆုံပြီးနောက် ဇီလန်စကီးက ထိုသို့ပြောကြားခဲ့ခြင်းဖြစ်သည်။

ထို့အပြင် ယူကရိန်းသည် အမေရိကန်သမ္မတ၏ အထူးကိုယ်စားလှယ် Keith Kellogg ၏ လာရောက်လည်ပတ်မှုအတွက် ပြင်ဆင်နေပြီး "လက်နက်များပေးပို့ရေးနှင့် အရေးကြီးသော ကာကွယ်ရေးပစ္စည်းများ ပူးပေါင်းထုတ်လုပ်မှုတိုးချဲ့ရန် မိတ်ဖက်များနှင့် လုပ်ဆောင်မည်" ဟု ၎င်းက ဖြည့်စွက်ပြောကြားခဲ့သည်။

မကြာသေးမီက တိုက်ခိုက်မှုများတွင် ယူကရိန်းသည် ဇွန်လအတွင်းက ရုရှားဒေသများရှိ နျူကလီးယားဗုံးကြဲလေယာဉ်များ ရှိရာလေယာဉ်ကွင်း များကို ပစ်မှတ်ထားတိုက်ခိုက်ခဲ့သည်။ ယူကရိန်း၏ ဒရုန်းနှင့် ဒုံးကျည် များသည် စစ်ဘက်ဆိုင်ရာအဆောက်အဦများနှင့် အခြားအရပ်သား အခြေခံ အဆောက်အဦများကိုလည်း ထိမှန်ခဲ့သည်။ 

ဥရောပသမဂ္ဂ (EU) သည် လွန်ခဲ့သော လအနည်းငယ်အတွင်း ၎င်း၏ ကာကွယ်ရေးဆိုင်ရာ စက်မှုလုပ်ငန်းများကို ချဲ့ထွင်ရန်နှင့် ယူကရိန်း၏ ပြည်တွင်းလက်နက်ထုတ်လုပ်မှုကို ပံ့ပိုးရန် ယူရိုဘီလီယံပေါင်းများစွာသုံးစွဲခဲ့သည်။ ဂျာမနီနိုင်ငံ၏ ယူကရိန်းအား စစ်ရေးအကူအညီပေးရေး ညှိနှိုင်းမှုကို တာဝန်ယူထားသော ဗိုလ်ချုပ်ကြီး Christian Freuding က ဘာလင်သည် လာမည့်ရက်သတ္တပတ်အနည်းငယ်အတွင်း တာဝေးဒုံးပစ် ကျည်များကို ယူကရိန်းသို့ ပထမဆုံးအကြိမ် ပေးပို့မည်ဟု ပြောကြား ခဲ့သည်။

ယခုသီတင်းပတ်အစောပိုင်းတွင် ပင်တဂွန်သည် ယူကရိန်းသို့ ထောက်ပံ့မှု များကိုရပ်ဆိုင်းရန်ထုတ်ပြန်ခဲ့ပြီးနောက် အမေရိကန်သမ္မတ Donald Trump က လက်နက်များ ပြန်လည်ပေးပို့မည်ဖြစ်ကြောင်း၊ ထို့အပြင် ၎င်း၏ ရာထူးပြန်လည်ရရှိပြီးနောက် ပထမဆုံးသော လက်နက်ထောက်ပံ့မှု အသစ် ကို အတည်ပြုရန် စဉ်းစားနေကြောင်း ပြောကြားခဲ့သည်။

ရုရှားက ပြည်ပမှ ရရှိသော ဒုံးကျည်များအသုံးပြုမှုကို အနောက်နိုင်ငံ များ၏ တိုက်ရိုက်ပါဝင်မှုအဖြစ် ရှုမြင်ပြီး ယူကရိန်းတပ်ဖွဲ့များသည် အဆင့်မြင့် လက်နက်စနစ်များကို ကိုယ်တိုင်ကိုင်တွယ် ထိန်းချုပ်နိုင်စွမ်းမရှိဟု ပြောဆိုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ပြင်သစ်နိုင်ငံရှိ ထောင်တစ်ခုမှ အကျဉ်းသားတစ်ဦးသည် ၎င်း၏အခန်းဖော် ပြစ်ဒဏ်ကာလပြည့်မြောက်၍ လွှတ်ပေးရာတွင် ခရီးဆောင်အိတ်အတွင်း၌ ဝင်ရောက်ပုန်းအောင်းကာ ထောင်မှလွတ်မြောက်သွားခဲ့ကြောင်း ထောင်ပိုင် ရုံး အရာရှိတစ်ဦးက ဒေသခံမီဒီယာများအား ပြောကြားခဲ့သည်။

ထောင်အုပ်ချုပ်ရေးဌာနဒါရိုက်တာ ဆီဘက်စတီယန် ကော်ဝဲလ် (Sébastien Cauwel) က ယင်းအကျဉ်းသားသည် လိုင်ယွန်မြို့အနီးရှိ ကော့ဘား (Corbas) ထောင်မှ ၎င်း၏အခန်းဖော်လွတ်မြောက်ခွင့်ကို အခွင့်ကောင်းယူကာ ထွက်ပြေးခဲ့ခြင်းဖြစ်ကြောင်း CNN ၏ မိတ်ဖက် ဌာန BFMTV သို့ တနင်္ဂနွေနေ့ (ဇူလိုင် ၁၃) က ပြောကြားခဲ့သည်။

သို့သော် ထောင်မှထွက်ပြေးသူသည် တနင်္လာနေ့ (ဇူလိုင် ၁၄) နံနက်ပိုင်း တွင် လိုင်ယွန်မြို့ဆင်ခြေဖုံးရှိ ဆာသိုနေး စခန်း (Sathonay-Camp) ၌ ပြန်လည်ဖမ်းဆီးခံရကာ ၎င်း၏တိုတောင်းသော ထွက်ပြေးမှု အဆုံးသတ် သွားခဲ့ရသည်ဟု လိုင်ယွန် စုံစမ်းရေးရုံးက CNN သို့ ပြောကြားချက်အရ သိရှိရသည်။

စုံစမ်းရေးရုံး၏ ထုတ်ပြန်ချက်တွင် “ကော့ဘားထောင်မှ ထွက်ပြေးသူ အား ဇူလိုင် ၁၄ ရက်နေ့၊ နံနက် ၆ နာရီခန့်တွင် ဆာသိုနေး-စခန်း ရှိ မြေအောက်ခန်းတစ်ခုမှ ထွက်လာစဉ် ဖမ်းဆီးရမိခဲ့ပြီး ထိခိုက်ဒဏ်ရာ ရသူ မရှိခဲ့ကြောင်းနှင့် ၎င်း၏အပေါင်းအပါမှာ အတူရှိမနေဘဲ ယခုအချိန်ထိ ဖမ်းဆီးရမိမှုမရှိသေးပါ” ဟု ဖော်ပြထားသည်။

ကော်ဝဲလ်က BFMTV သို့ ပြောကြားရာတွင် ထောင်အရာရှိများသည် စနေနေ့ (ဇူလိုင် ၁၂) နံနက်ပိုင်းတွင် အကျဉ်းသား ပျောက်ဆုံးနေကြောင်း သတိထားမိခဲ့သည်ဟု ဝန်ခံခဲ့သည်။ “ဒါဟာ အလွန်ရှားပါးသည့် အဖြစ် အပျက်ဖြစ်ပြီး မိမိတို့၏အုပ်ချုပ်ရေးမှာ ယခင်က တစ်ခါမျှ မကြုံဖူးပါ။ ဒါဟာ ကြီးမားသည့် ချို့ယွင်းချက်တစ်ခုရှိနေသည်ကို ပြသနေပါသည်” ဟု ကော်ဝဲလ် က ပြောကြားခဲ့ပြီး ကော့ဘားထောင်သည် လူအဝင်များ နေကြောင်း ထောက်ပြခဲ့သည်။ ထောင်တွင် လက်ရှိလူဦးရေသည် စံ သတ်မှတ်ချက်၏ ၁၇၀% ခန့်ရှိနေကြောင်း၊ “ဒါက မိမိတို့ အရာရှိများ အတွက် လုပ်ငန်းတာဝန်ထမ်းဆောင်ရာတွင် ပိုမိုခက်ခဲစေပါသည်” ဟု ၎င်းက BFMTV သို့ ပြောကြားခဲ့သည်။

ဥရောပသတင်းဌာန AFP က ကိုးကားဖော်ပြချက်အရ ထောင်ထွက်ပြေး သူသည် ပြစ်ဒဏ်များစွာကျခံနေရသူဖြစ်ပြီး အဖွဲ့အစည်းဆိုင်ရာ မှုခင်း တစ်ခုနှင့်လည်း စုံစမ်းစစ်ဆေးခံနေရသူဖြစ်ကြောင်း သိရသည်။

ယခင်နှစ်က ပြင်သစ်နိုင်ငံမြောက်ပိုင်း နော်မန်ဒီ ဒေသရှိ ထောင်သို့ သယ်ဆောင်နေစဉ် လက်နက်ကိုင်တိုက်ခိုက်မှုဖြင့် အကျဉ်းသားတစ်ဦး ထွက်ပြေးခဲ့ဖူးသည်။ "The Fly" အမည်ရှိ မိုဟာမက် အမ်ရာ (Mohamed Amra) ကို ယခုနှစ် ဖေဖော်ဝါရီလတွင် ရိုမေးနီးယားနိုင်ငံ၌ ပြန်လည် ဖမ်းဆီးနိုင်ခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ယူကရိန်းလုံခြုံရေးအဖွဲ့အစည်း (SBU) က တနင်္ဂနွေနေ့ (ဇူလိုင် ၁၃) တွင် လွန်ခဲ့သောရက်အနည်းငယ်က မြို့တော် Kyiv တွင် SBU အရာရှိကြီး တစ်ဦးကို ပစ်သတ်ခဲ့သည်ဟု သံသယရှိသူ ရုရှားအထူးအေးဂျင့်များကို သတ်ဖြတ်ခဲ့ကြောင်း ထုတ်ပြန်ခဲ့သည်။ အဆိုပါလုပ်ရပ်အတွက် ရုရှား၏ ဖက်ဒရယ်လုံခြုံရေးအဖွဲ့အစည်း (FSB) က တာဝန်ရှိသည်ဟု SBU က ယုံကြည်နေသည်။

SBU အရာရှိ Ivan Voronych သည် ကြာသပတေးနေ့ (ဇူလိုင် ၁၀) နံနက်ပိုင်းတွင် Kyiv ၌ လုပ်ကြံသတ်ဖြတ်ခံခဲ့ရသည်ဟု အာဏာပိုင် များက CNN သို့ ဖော်ပြခဲ့သည်။ SBU ၏ ထုတ်ပြန်ချက်အရ သံသယရှိသူ အမျိုးသားနှင့် အမျိုးသမီးတို့သည် ပစ်ခတ်သတ်ဖြတ်ပြီးနောက် ပုန်းအောင်းနေခဲ့ကြကာ နောက်ပိုင်းတွင် SBU နှင့် အမျိုးသား ရဲတပ်ဖွဲ့ တို့က Kyiv တွင် ၎င်းတို့၏နေရာကို ရှာဖွေတွေ့ရှိခဲ့သည်။ ဝင်ရောက် စီးနင်း ဖမ်းဆီးစဉ် အပြန်အလှန်ပစ်ခတ်မှုများဖြစ်ပွားခဲ့ပြီး သံသယရှိသူ နှစ်ဦးစလုံး သေဆုံးခဲ့ကြောင်း ဖော်ပြခဲ့သည်။

SBU သည် ယူကရိန်း၏ အဓိကလုံခြုံရေးဝန်ဆောင်မှုဖြစ်ပြီး ပြည်တွင်း လုံခြုံရေးနှင့် ရုရှားရှိပစ်မှတ်များကို တိုက်ခိုက်ရေးလုပ်ငန်းများအတွက် တာဝန်ယူဆောင်ရွက်လျက်ရှိသည်။ လွန်ခဲ့သောလက ရုရှားလေတပ်အခြေစိုက်စခန်းများကို ယူကရိန်း၏ ဒရုန်းတိုက်ခိုက်မှုများကိုလည်း ယင်းအဖွဲ့အစည်းက အဓိကတာဝန်ယူဆောင်ရွက်ခဲ့သည်။

Voronych လုပ်ကြံခံရခြင်းသည် ရုရှားက ယူကရိန်းကို တိုက်ခိုက်မှုများ တိုးမြှင့်လုပ်ဆောင်နေချိန်တွင် ဖြစ်ပွားခဲ့ခြင်းဖြစ်ပြီး လွန်ခဲ့သော သီတင်း ပတ်အတွင်း ပဋိပက္ခ၏ စတုတ္ထနှစ်တွင် အကြီးမားဆုံးနှင့် ဒုတိယ အကြီးမားဆုံး ဒရုန်းတိုက်ခိုက်မှုများ လုပ်ဆောင်ခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂