အီရန်နိုင်ငံသည် အစ္စရေးနှင့်ဖြစ်ပွားသည့်  စစ်ပွဲအတွင်း ပျက်စီးသွားသည့် လေကြောင်းရန်ကာကွယ်ရေး စနစ်များအား ပြန်လည်အစားထိုး တပ်ဆင်လိုက်ပြီဖြစ်ကြောင်း အီရန်နိုင်ငံပိုင် မီဒီယာတစ်ခုက ဖော်ပြသည်။

အီရန်နိုင်ငံ၏လေကြောင်းရန်ကာကွယ်ရေး စနစ်များသည် အစ္စရေးနိုင်ငံနှင့် ဇွန်လအတွင်းက ဖြစ်ပွားခဲ့သည့်စစ်ပွဲအတွင်း ပျက်စီးသွားခြင်းဖြစ်သည်။ အဆိုပါစစ်ပွဲအတွင်း အစ္စရေးလေတပ်မတော်သည် အီရန်၏ ဝေဟင် အတွင်း လွှမ်းမိုးထားနိုင်ခဲ့ပြီး အီရန်နိုင်ငံ၏ လေကြောင်းကာကွယ်ရေးစနစ်များအား အထိနာစေခဲ့ကြောင်း သိရသည်။

သို့သော် အစ္စရေးလေတပ်မတော်၏ တိုက်ခိုက်မှုအတွင်း လေကြောင်းကာကွယ်ရေး စနစ်အချို့ ပျက်စီးသွားခဲ့သော်လည်း အီရန်နိုင်ငံအနေဖြင့် ၎င်းတို့ကြိုတင်ပြင်ဆင်ထားသည့် လက်နက်စနစ်များဖြင့် ပြန်လည်အစားထိုး၍ နိုင်ငံ၏ဝေဟင် ကာကွယ်ရေးကို ပြန်လည်လုပ်ဆောင်နိုင်ခဲ့ကြောင်း သိရသည်။

အစ္စရေးနိုင်ငံနှင့်  စစ်မက်မဖြစ်ပွားမီ အီရန်နိုင်ငံတွင် ရုရှားနိုင်ငံလုပ် S-300 အမျိုးအစား လေကြောင်းကာကွယ်ရေးစနစ် အပြင် ပြည်တွင်းဖြစ် Bavar-373 ဒုံးခွင်းဒုံးစနစ်ကိုပါ ပိုင်ဆိုင်ထားခဲ့သည်။ ပြီးခဲ့သည့် လအတွင်းက ဖြစ်ပွားခဲ့သည့် စစ်ပွဲတွင် အစ္စရေးလေတပ်မတော်က အီရန်ပိုင်နက်တွင်းသို့  ထိုးဖောက်ဝင်ရောက်၍ တိုက်ခိုက်ခဲ့ပြီး အီရန်တပ်မတော်ကမူ ၎င်းတို့၏ ရာပေါင်းများစွာသော ဒုံးကျည်များဖြင့် အစ္စရေးပိုင်နက်အတွင်းသို့  ပစ်ခတ်တိုက်ခိုက်ခဲ့ခြင်း ဖြစ်ကြောင်း သိရသည်။ 

MWD Web Portal

အီရန်နှင့်ရုရှားနိုင်ငံတို့အကြား ကာကွယ်ရေးစွမ်းရည် တိုးမြှင့်ရေးအတွက် ရည်ရွယ်သည့်  ပူးတွဲစစ်ရေးလေ့ကျင့်မှု တစ်ရပ်ကို နှစ်နိုင်ငံ ရေတပ်မတော်များက ဇူလိုင်လ ၂၁ ရက်တွင် စတင်ခဲ့ကြောင်း သိရသည်။

CASAREX 2025 ဟုအမည်ပေးထားသည့် နှစ်နိုင်ငံ ပူးတွဲစစ်ရေးလေ့ကျင့်မှုကို အီရန်နိုင်ငံက အိမ်ရှင်အဖြစ် လက်ခံကျင်းပခြင်းဖြစ်ပြီး အဆိုပါစစ်ရေးလေ့ကျင့်မှုကို ကက်စပီယံပင်လယ် အတွင်း၌ သုံးရက်ကြာ ကျင်းပ သွားမည်ဖြစ်သည်။ အဆိုပါပူးတွဲ စစ်ရေးလေ့ကျင့်မှုတွင် အီရန်နှင့်ရုရှားနိုင်ငံတို့မှ ရေတပ်မတော်များ အပါအဝင် အစ္စလာမ်မစ်တော်လှန်ရေး အစောင့်တပ်ဖွဲ့မှ တပ်ဖွဲ့ဝင်များလည်း ပါဝင်လျက်ရှိကြောင်း သိရသည်။

CASAREX 2025 ပူးတွဲစစ်ရေးလေ့ကျင့်မှုသည် အဓိကအားဖြင့် ရေကြောင်းလုံခြုံရေးကို တိုးမြှင့်ရန်၊  ကမ်းလွန်ရေပြင်ပိုင်နက်များကို ကာကွယ်ရန်နှင့် ကယ်ဆယ်ရေး လုပ်ငန်းများကို ပူးတွဲလုပ်ဆောင်နိုင်ရန်အတွက် ရည်ရွယ်ထားခြင်းဖြစ်သည်။ အီရန်နှင့်ရုရှားနှစ်နိုင်ငံအကြား ကာကွယ်ရေးဆိုင်ရာ   ပူးပေါင်းဆောင်ရွက်မှုသည် ဆက်လက် မြင့်တက်လာမည်ဖြစ်ကြောင်း ရုရှားရေတပ်မတော်မှ တပ်မှူးတစ်ဦးက ပြောကြားသည်။

ယခုစတင် လုပ်ဆောင်ခဲ့သည့် ပူးတွဲစစ်ရေး လေ့ကျင့်မှုသည် အီရန်နှင့်ရုရှားနှစ်နိုင်ငံ ရေတပ်မတော်များ အနေဖြင့် ရေကြောင်းလုံခြုံရေးနှင့် ဒေသတွင်းအင်အား တိုးချဲ့ရေး လုပ်ဆောင်နိုင်စွမ်း ရှိကြောင်းကို ဖော်ပြသည့်   ပူးတွဲလေ့ကျင့်မှု တစ်ရပ်အဖြစ် ကက်စပီယံဒေသတွင်း နိုင်ငံများက ရှုမြင်ထားကြောင်း သိရသည်။

MWD Web Portal

အီရန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Esmaeil Baghaei က အီရန်၏နျူကလီးယားအစီအစဉ်ဆိုင်ရာ ဆွေးနွေးမှုများကို ရုရှား၊ တရုတ်တို့နှင့် ဇူလိုင် ၂၂ တွင် ပြုလုပ်မည်ဟု ကြေညာခဲ့သည်။ ထို့အပြင် ဥရောပနိုင်ငံများနှင့် သီးသန့်ဆွေးနွေးပွဲကိုလည်း ယခုသီတင်းပတ် နှောင်းပိုင်း တွင် စီစဉ်ထားကြောင်း ပြောကြားခဲ့သည်။

တနင်္လာနေ့ (ဇူလိုင် ၂၁) တွင် သတင်းထောက်များအား ပြောကြားရာ၌ Baghaei က သုံးနိုင်ငံဆွေးနွေးပွဲတွင် ဗြိတိန်၊ ပြင်သစ်နှင့် ဂျာမနီတို့က အီရန်၏နျူကလီးယားအစီအစဉ်ကြောင့် ကုလသမဂ္ဂ ဒဏ်ခတ် အရေးယူ မှုများ ပြန်လည်အသက်သွင်းရန် ခြိမ်းခြောက်မှုများကိုလည်း အဓိကထား ဆွေးနွေးမည်ဟု ဖော်ပြခဲ့သည်။ အထူးသဖြင့် ပြင်သစ်နိုင်ငံခြားရေး ဝန်ကြီး Jean-Noel Barrot က အီရန်၏ နျူကလီးယား လုပ်ငန်းစဉ် များကို အန္တရာယ်ကင်းစွာ ကန့်သတ်ရန် အတိုင်းအတာတစ်ခုအထိ တိုးမြှင့် နိုင်ခြင်းမရှိပါက လာမည့်လတွင် ဒဏ်ခတ်မှုများ အလိုအလျောက် ပြန်လည် အသက်ဝင်လာနိုင်ကြောင်း သတိပေးခဲ့သည်။ 

Baghaei က ရုရှားနှင့် တရုတ်တို့သည် ၂၀၁၅ ခုနှစ်က နျူကလီးယား သဘောတူညီချက်တွင် ပါဝင်သည့် အဖွဲ့ဝင်နိုင်ငံများဖြစ်ပြီး ကုလသမဂ္ဂ လုံခြုံရေးကောင်စီတွင် အရေးပါသော  ဩဇာလွှမ်းမိုးမှုရှိကြောင်း ထည့်သွင်းပြောကြားခဲ့သည်။ အီရန်နိုင်ငံသည် ဒဏ်ခတ်မှုများ အလိုအလျောက် ပြန်လည်အသက်ဝင်လာနိုင်ခြေနှင့်ပတ်သက်၍ ထိုနိုင်ငံနှစ်နိုင်ငံနှင့် "ကောင်းမွန်သော တိုင်ပင်ဆွေးနွေးမှုများ" ပြုလုပ်ထားကြောင်း ၎င်းက ဖြည့်စွက်ပြောကြားခဲ့သည်။ "နျူကလီးယားသဘောတူညီချက်အရ ရုပ်သိမ်း ခဲ့သည့် ဒဏ်ခတ်မှုများ ပြန်လည်အသက်ဝင်ရန် ဥပဒေအရဖြစ်စေ၊ ယုတ္တိ အရဖြစ်စေ အကြောင်းပြချက်မရှိပါ" ဟု ၎င်းက အတိအလင်း ပြောကြား ခဲ့သည်။

ပြောရေးဆိုခွင့်ရှိသူက အီရန်နိုင်ငံသည် ဗြိတိန်၊ ပြင်သစ်နှင့် ဂျာမနီ နိုင်ငံတို့နှင့် နိုင်ငံခြားရေး ဒုတိယဝန်ကြီးအဆင့် အရာရှိများ ဆွေးနွေးမည့် သီးသန့်အစည်းအဝေးကို သောကြာနေ့ (ဇူလိုင် ၂၅) တွင် အစ္စတန်ဘူလ်၌ ကျင်းပမည်ဖြစ်ကြောင်း အတည်ပြုခဲ့ပြီး "လက်ရှိအချိန်တွင် အမေရိကန် နှင့် ဆွေးနွေးရန် အစီအစဉ်မရှိကြောင်း" ဖြည့်စွက်ပြောကြားခဲ့သည်။ 

အဓိကအခက်အခဲတစ်ရပ်မှာ အီရန်၏နျူကလီးယားလုပ်ငန်းစဉ်များကို ကြီးကြပ်စောင့်ကြည့်နေသည့် အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA) နှင့် ပူးပေါင်းဆောင်ရွက်မှု ယာယီရပ်ဆိုင်းရန် တီဟီရန်၏ ဆုံးဖြတ်ချက်ဖြစ်သည်။ အီရန်ဘက်က IAEA ၏ အစီရင်ခံစာတွင် ဘက်လိုက်မှုများပါဝင်သည်ဟု စွပ်စွဲထားပြီး ၎င်းကို အစ္စရေးဘက်က အီရန်အား ၁၂ ရက်ကြာ စစ်ဆင်နွှဲရန် အကြောင်းပြချက်အဖြစ် အသုံးချ ခဲ့သည်ဟု စွပ်စွဲထားသည်။

အစ္စရေးတို့၏ တိုက်ခိုက်မှုမှာ အမေရိကန်က အီရန်အား ယူရေနီယမ် ထပ်တိုးသန့်စင်ခြင်းလုပ်ငန်းစဉ်ကို အပြည့်အဝ စွန့်လွှတ်ရန် တောင်းဆိုမှုကြောင့် အီရန်-အမေရိကန် နျူကလီးယားဆွေးနွေးပွဲများ ရပ်တန့် သွားပြီးနောက် ဖြစ်ပွားခဲ့ခြင်းဖြစ်သည်။ အမေရိကန်ဘက်က အီရန်သည် နျူကလီးယား ဗုံးထုတ်လုပ်နိုင်သည့် အရည်အသွေးရှိသည်ဟု စွပ်စွဲထားသော်လည်း အီရန်ဘက်က ထိုသို့လုပ်ဆောင်ရန် အစီအစဉ်မရှိဟု ငြင်းဆိုကာအရပ်ဘက်စွမ်းအင်လိုအပ်ချက်အတွက် ယူရေနီယမ် ထပ်တိုး သန့်စင်ခြင်း လိုအပ်ကြောင်း ခိုင်ခိုင်မာမာပြောဆိုထားသည်။ 

ရုရှားနှင့် တရုတ်နိုင်ငံတို့က အီရန်နျူကလီးယားအကျပ်အတည်းကို နိုင်ငံရေးနှင့် သံတမန်ရေးနည်းလမ်းများဖြင့်သာ အဖြေရှာနိုင်မည်ဟု ခိုင်မာစွာရပ်တည်ထားသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

မော်စကိုရှိ ကာကွယ်ရေးဝန်ကြီးဌာနက ရုရှားတပ်ဖွဲ့များသည် ယူကရိန်း၏ စစ်ဘက်ဆိုင်ရာစက်မှုလုပ်ငန်းစုများနှင့် လေယာဉ်ကွင်းအခြေခံ အဆောက်အအုံများကို ညအချိန်တွင် ပေါင်းစပ်တိုက်ခိုက်မှုများ ပြုလုပ် ခဲ့ကြောင်း ပြောကြားခဲ့သည်။

တနင်္လာနေ့ (ဇူလိုင် ၂၁) က ဝန်ကြီးဌာန၏ထုတ်ပြန်ချက်တွင် Kinzhal ဟိုက်ပါဆောနစ်ဒုံးပျံများနှင့် တိုက်ခိုက်ရေးဒရုန်းများဖြင့် ပစ်ခတ် တိုက်ခိုက် ခြင်းများအပါအဝင် ကြည်း၊ ရေ၊ လေ ပေါင်းစပ်တိုက်ခိုက်မှုများဖြင့် တိုက်ခိုက်ခဲ့ကြောင်းနှင့် အဆိုပါ တိုက်ခိုက်မှု၏ ရည်မှန်းချက် အောင်မြင် ပြီး သတ်မှတ်ထားသော ပစ်မှတ်အားလုံးကို ထိမှန်ခဲ့ပါသည်ဟု ဝန်ကြီး ဌာနက ဖော်ပြခဲ့သည်။

ယူကရိန်းခေါင်းဆောင် ဗလာဒီမာ ဇီလန်စကီးကလည်း Kiev နှင့် အနီး ဝန်းကျင်ဒေသများ၊ Kharkov နှင့် Ivano-Frankivsk တို့တွင် ပျက်စီးမှု များရှိကြောင်း အတည်ပြုခဲ့သည်။ ထို့အပြင် Sumy ၊ Khmelnitsky ၊ Kirovograd ၊ Nikolayev နှင့် Poltava ဒေသများအပြင် Kherson ဒေသ ၏ Kiev ထိန်းချုပ်နယ်မြေတွင်လည်း ယူကရိန်းလေကြောင်းရန် ကာကွယ်ရေး တပ်ဖွဲ့များက ဒရုန်းများကို ပစ်ချခဲ့ကြောင်း ဆိုသည်။

ဇီလန်စကီး၏ပြောကြားချက်အရ ညလုံးပေါက်ကြာမြင့်ခဲ့သည့် အဆိုပါ တိုက်ခိုက်မှုတွင် ဒရုန်း ၄၂၀ ကျော်နှင့် ဒုံးကျည် ၂၀ ကျော်ပါဝင်ခဲ့ပြီး လူနှစ်ဦးသေဆုံးကာ ၁၅ ဦးဒဏ်ရာရခဲ့သည်ဟု သိရှိရသည်။

ရုရှားအရာရှိများက အဆိုပါတိုက်ခိုက်မှုများသည် စစ်ရေးဆိုင်ရာနှင့် သက်ဆိုင်သော အဆောက်အဦများကိုသာ ဦးတည်သည်ဟုဆိုကာ ၎င်းတို့ သည် ပြည်သူများကို မည်သည့်အခါမျှ ပစ်မှတ်မထားဟု ပြောဆိုခဲ့သည်။ မော်စကိုကလည်း အဆိုပါတိုက်ခိုက်မှုများသည် ရုရှားနိုင်ငံအတွင်းပိုင်းရှိ နေအိမ်အဆောက်အဦများနှင့် အရေးကြီးအခြေခံအဆောက်အအုံများကို မကြာခဏ ပစ်မှတ်ထားတိုက်ခိုက်လေ့ရှိသည့် ကိယက်ဗ်၏ တိုက်ခိုက်မှုများကို ပြန်လည်တုံ့ပြန်ခြင်းဖြစ်သည်ဟု ဆိုသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အမေရိကန် ကာကွယ်ရေးဝန်ကြီးဌာနက လော့စ်အိန်ဂျလိစ်မြို့ ပြန်လည် အေးချမ်းတည်ငြိမ်လာသည့်အတွက် မရိန်းတပ်ဖွဲ့ဝင် ၇၀၀ အား ပြန်လည် ရုပ်သိမ်းမည်ဟု ကြေညာခဲ့သည်။

"လော့စ်အိန်ဂျလိစ်မြို့ ပြန်လည်အေးချမ်းသွားပါပြီ၊ ကာကွယ်ရေးဝန်ကြီး Peter Hegseth က ရေတပ်တပ်ဖွဲ့ဝင် ၇၀၀ အား အခြားနေရာသို့ ပြန်လည်စီစဉ်ရန် ညွှန်ကြားခဲ့ပါသည်" ဟု ပင်တဂွန် ပြောရေးဆိုခွင့်ရှိသူ Sean Parnell က ဇူလိုင် ၂၁ ရက်တွင် ပြောကြားခဲ့သည်။ 

ထို့အပြင် Parnell က ဇွန်လအတွင်း ကယ်လီဖိုးနီးယားပြည်နယ်၊ လော့စ်အိန်ဂျလိစ်သို့ မရိန်းတပ်ဖွဲ့များ စေလွှတ်ရန်ဆုံးဖြတ်ချက်မှာမှန်ကန်သောလုပ်ဆောင်မှုဖြစ်ပြီး အမြန်ဆုံးနှင့် စည်းကမ်းပြည့်ဝစွာ ဆောင်ရွက်ခဲ့ကြောင်း၊ ၎င်းတို့ရှိနေမှုသည် မြို့တွင် တည်ငြိမ်အေးချမ်းရေး နှင့် ဥပဒေစိုးမိုးရေး ပြန်လည်ထူထောင်ရာတွင် အရေးပါသော အခန်း ကဏ္ဍ မှ ပါဝင်ခဲ့ကြောင်း ထပ်လောင်းပြောကြားခဲ့သည်။

လော့စ်အိန်ဂျလိစ်မှ မရိန်းတပ်ဖွဲ့များ ရုပ်သိမ်းရန် ဆုံးဖြတ်ချက်ကို လွန်ခဲ့သည့် သီတင်းပတ်နှောင်းပိုင်းတွင် ချမှတ်ခဲ့ကြောင်း ဝါရှင်တန်ပို့စ် သတင်းစာက ဖော်ပြခဲ့သည်။ ယခုအချိန်တွင် တပ်ဖွဲ့များ မြို့မှ မထွက်ခွာ သေးသော်လည်း လာမည့်ရက်အနည်းငယ်အတွင်း လော့စ်အိန်ဂျလိစ်မှ မိုင် ၁၅၀ ခန့်အကွာ Twentynine Palms စခန်းသို့ ပြောင်းရွှေ့ရန် စီစဉ်နေကြောင်း သိရသည်။

ဇွန်လအတွင်း အမေရိကန် ပြည်ထဲရေး လုံခြုံရေးဌာန၏ Immigration and Customs Enforcement (ICE) အေဂျင်စီမှ ဦးဆောင်သော တရားမဝင် ရွှေ့ပြောင်းနေထိုင်သူများအား စစ်ဆင်ရေးများကြောင့် လော့စ်အိန်ဂျလိစ်တွင် ဆန္ဒပြမှုများ ပေါ်ပေါက်ခဲ့သည်။ ဆန္ဒပြမှု အများစု သည် အေးချမ်းသော်လည်း မြို့လယ်တွင် ဆန္ဒပြသူများနှင့် ဖက်ဒရယ် တပ်ဖွဲ့များအကြား အချို့သော တိုက်ခိုက်မှုများသည် အကြမ်းဖက်မှု အထိ မြင့်တက်သွားခဲ့သည်။

သမ္မတ Donald Trump သည် လော့စ်အိန်ဂျလိစ်မှ ဆန္ဒပြသူများအား အကြမ်းဖက်သမားများနှင့် ပြစ်မှုကျူးလွန်သူများအဖြစ် ရှုတ်ချခဲ့သည်။ ၎င်းသည် ကယ်လီဖိုးနီးယား အမျိုးသားကာကွယ်ရေးတပ်ဖွဲ့ (National Guard) မှ တပ်ဖွဲ့ဝင် ၄,၈၀၀ ကို မြို့တော်သို့ စေလွှတ်ခဲ့ပြီး နောက်ပိုင်း တွင် ပင်တဂွန်မှ မရိန်းတပ်သား ၇၀၀ ထပ်မံဖြည့်တင်းခဲ့သည်။ အဆိုပါ တပ်ဖွဲ့များသည် အဓိကအားဖြင့် ဖက်ဒရယ်အဆောက်အအုံများကို ကာကွယ်ရန်နှင့် ICE အား ရွှေ့ပြောင်းနေထိုင်သူများအား ဖမ်းဆီးရန် ကူညီဆောင်ရွက်ပေးရန် ဖြစ်သည်။

လွန်ခဲ့သည့် ရက်သတ္တပတ်အနည်းငယ်အတွင်း အမေရိကန် အမျိုးသား ကာကွယ်ရေးတပ်ဖွဲ့သည် လော့စ်အိန်ဂျလိစ်မှ ၎င်း၏ တပ်ဖွဲ့အချို့ကို ရုပ်သိမ်းခဲ့ပြီး ၂,၀၀၀ ခန့်သာ ကျန်ရှိခဲ့သည်။ ကယ်လီဖိုးနီးယား အုပ်ချုပ်ရေးမှူး Gavin Newsom သည် သမ္မတ Trump အား ကျန်တပ်ဖွဲ့များကို မြို့တော် မှ ရုပ်သိမ်းရန် အဆက်မပြတ်တောင်းဆိုနေဆဲဖြစ်သည်။

ပင်တဂွန်၏ အဆိုအရ အမျိုးသား ကာကွယ်ရေးတပ်ဖွဲ့ စေလွှတ်ရန် ဆုံးဖြတ်ချက်သည် ရက် ၆၀ အထိ အာဏာသက်ရောက်သော်လည်း ဝန်ကြီး Hegseth တွင် "မြေပြင်အခြေအနေအရ ပြောင်းလဲမှုများကို လိုက်လျောညီထွေတုံ့ပြန်နိုင်ရန် “အဆိုပါကာလကို လျှော့ချခြင်း သို့မဟုတ် တိုးချဲ့ခြင်းပြုလုပ်နိုင်သည့် လုပ်ပိုင်ခွင့်ရှိသည်” ဟု သိရှိရပါသည်။

ကိုးကား- VN Express

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

နယူးဒေလီအစိုးရသည် အမျိုးသမီးများအပေါ် ကျူးလွန်သည့် ရာဇဝတ်မှုများကို ကာကွယ်ရန် AI အခြေပြု AI facial recognition ၊ Smart lighting systems နှင့် ဒရုန်းများကို အသုံးပြု၍ အန္တရာယ်ရှိသော နေရာ များကို စောင့်ကြည့်မည်ဟု ပြည်ထဲရေးဝန်ကြီးဌာနက ဇူလိုင် ၂၁ တွင် အိန္ဒိယဖက်ဒရယ်တရားလွှတ်တော်ချုပ်သို့ ပြောကြားခဲ့သည်။

Hindustan Times ၏ သတင်းအရ ပြည်ထဲရေးဝန်ကြီးဌာနသည် အဆိုပါ ကြေညာချက်ကို အိန္ဒိယနိုင်ငံတွင် အမျိုးသမီးများအပေါ် ရာဇဝတ်မှု ကျူးလွန်မှုများ တိုးမြင့်လာမှုနှင့်ပတ်သက်၍ Supreme Court Women Lawyers' Association မှ တင်သွင်းခဲ့သည့် အများပြည်သူ အကျိုးစီးပွား ဆိုင်ရာ တရားစွဲဆိုမှု (PIL) တစ်ရပ်ကို တုံ့ပြန်၍ ဖော်ပြခဲ့ခြင်းဖြစ်သည်။

Times of India ၏ သတင်းတွင် ဖြည့်စွက်ဖော်ပြချက်အရ ပြည်ထဲရေးဝန်ကြီးဌာနက ဒေလီ၊ မွန်ဘိုင်းစသည့် မြို့ကြီးများရှိ ရထားဘူတာရုံ ၇ ခု တွင် AI စနစ်များ တပ်ဆင်ရန် စီစဉ်နေကြောင်း ပြောကြားခဲ့သည်။ ပြည်ထဲရေးဝန်ကြီးဌာနက ဖြည့်စွက်ပြောကြားရာတွင် အန္တရာယ် မြင့်မား သော နေရာများကို စောင့်ကြည့်ရန် ကားနံပါတ်ပြား အလိုအလျောက် မှတ်တမ်းတင်စနစ် (automatic license plate recognition) ၊ Smart lighting systems နှင့် ဒရုန်းများကဲ့သို့သော အခြားအစီအမံများကိုလည်း အကောင်အထည်ဖော်သွားမည်ဟု ဆိုသည်။

Hindustan Times ၏ ဖော်ပြမှုအရ ပြည်ထဲရေးဝန်ကြီးဌာနက အမျိုးသမီးများအပေါ် ကျူးလွန်သည့် ရာဇဝတ်မှုများ (ဥပမာ – မုဒိမ်းမှု၊ ခြေရာခံ နှောင့်ယှက်မှု၊ ကလေးအလွဲသုံးစားမှု) တွင် ပါဝင်ခဲ့သူများ၏ အမည်၊ လိပ်စာ၊ ဓာတ်ပုံနှင့် လက်ဗွေရာများ အပါအဝင် အရေးကြီး အချက်အလက် များကို National Data Sharing and Exchange Platform တွင် သိမ်းဆည်းထားကြောင်း ဖက်ဒရယ်တရားလွှတ်တော်ချုပ်သို့ တင်ပြခဲ့သည် ဟု ဆိုသည်။

လက်ရှိတွင် ယင်းဒေတာဘေ့စ်တွင် အချက်အလက် ၂.၀၂ သန်း ပါဝင်ပြီး Inter-Operable Criminal Justice System ဒေတာဘေ့စ်မှတစ်ဆင့် တစ်နိုင်ငံလုံးရှိ ရဲစခန်းများနှင့် တရားစီရင်ရေးအဖွဲ့အစည်းများက ဝင်ရောက် ကြည့်ရှုနိုင်သည်။ ဤသည်မှာ ရဲ၊ တရားရုံး၊ ထောင်၊ မှုခင်းဆေးဘက် ဆိုင်ရာဓာတ်ခွဲခန်းများနှင့် အမှုစစ်ဆေးရေးဌာနများကို နည်းပညာ အကူအညီဖြင့် ပေါင်းစည်းရန် ရည်ရွယ်သည့် လုပ်ငန်းစဉ် တစ်ခု ဖြစ်ကြောင်း ဝန်ကြီးဌာနက ဆိုသည်။

Hindustan Times ၏ ဖော်ပြချက်အရ Supreme Court Women Lawyers' Association က ဝန်ကြီးဌာန၏ လက်ရှိအစီအမံများသည် လုံလောက်သော ထိရောက်မှုမရှိသေးဟု ယူဆပြီး အမျိုးသမီးများအပေါ် ရာဇဝတ်မှုများကို ပိုမိုကာကွယ်နိုင်ရန် ထပ်မံအလေးထားဆောင်ရွက်ရန် တောင်းဆိုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားနိုင်ငံသည် ရေဒါရှောင်ကွင်းနိုင်စွမ်းရှိပြီး စစ်ကစားနိုင်သည့် ဒုံးကျည်အသစ်များကို အသုံးပြုလာခြင်းကြောင့် ယူကရိန်းနိုင်ငံရှိ အမေရိကန်လုပ် Patriot အမျိုးအစား ဒုံးကျည်ကာကွယ်ရေးစနစ်များမှာ ရုရှားဒုံးကျည်များကို ကြားဖြတ်ဟန့်တားရာ၌ အခက်အခဲနှင့် ကြုံတွေ့နေရကြောင်း Wall Street Journal က ဖော်ပြသည်။

စစ်ရေးအကူအညီအဖြစ် အမေရိကန်က  ယူကရိန်းနိုင်ငံသို့ ပေးအပ်ထားသည့် Patriot ဒုံးကျည်ကာကွယ်ရေးစနစ်များသည် ဒုံးကျည်များအား ကြားဖြတ်တားဆီးခြင်းနှင့် ဟန့်တားခြင်းတို့တွင် အစွမ်းထက်သည့် ဒုံးကျည်ကာကွယ်ရေး စနစ်တစ်ခုအဖြစ် ကာလရှည်ကြာရပ်တည်နိုင်ခဲ့သော်လည်း   ယခုအခါပိုမို အစွမ်းထက်သည့် ရုရှားပဲ့ထိန်းဒုံးကျည်များအား ကြားဖြတ်ဟန့်တားရာတွင် ရုန်းကန်နေရသည့် အခြေအနေတွင် ရှိနေကြောင်း ပြီးခဲ့သည့် Wall Street Journal ၏ ထုတ်ပြန်ချက်တွင် ဖော်ပြထားသည်။

ထို့ပြင် ရုရှားနိုင်ငံက လက်ရှိအသုံးပြုလာသည့် ပဲ့ထိန်းဒုံးကျည်များသည်  ရေဒါစနစ်ကို  ရှောင်ကွင်းနိုင်ခြင်းကြောင့်   ပိုမိုစစ်ကစားနိုင်စွမ်းရှိကြောင်း အမည်မဖော်လိုသူ ယူကရိန်းအရာရှိတစ်ဦးက မီဒီယာတစ်ခုသို့ ပြောကြားသည်။ သို့သော် ရုရှားနိုင်ငံ၏ မည်သည့်ဒုံးကျည်အမျိုးအစားကို ရည်ညွှန်းကြောင်းကိုမူ ရှင်းလင်းစွာ ပြောကြားခြင်းမရှိပေ။

ထို့ကြောင့် လက်ရှိတွင် ဥရောပသမဂ္ဂအဖွဲ့ဝင် နိုင်ငံများအနေဖြင့် ယူကရိန်းတွင် အသုံးပြုနေသည့် အမေရိကန်လုပ် Patriot ဒုံးကျည်ကာကွယ်ရေး စနစ်များ၏နေရာတွင် အစားထိုးအသုံးပြုနိုင်မည့် အဆင့်မြှင့်တင်ထားသော Samp/T ဒုံးကျည်ကာကွယ်ရေး စနစ်သစ်တစ်ခုကို ဖြန့်ကြက်နိုင်ရန် စီစဉ်လျက်ရှိသည်။     

MWD Web Portal

၂၀၂၄ ခုနှစ် အောက်တိုဘာလက ပြုံယမ်း၏ လေကြောင်း နယ်နိမိတ် အတွင်း တောင်ကိုရီးယား၏ စစ်ဘက်ဆိုင်ရာ ဒရုန်းများ ပျံသန်းစေခဲ့သည့် ဖြစ်စဉ်နှင့် သက်ဆိုင်သည့် တောင်ကိုရီးယား ဒရုန်းတပ်ဖွဲ့မှူး ဗိုလ်ချုပ်ကြီး Kim Yong-dae အား ရဲတပ်ဖွဲ့ကဖမ်းဆီးခဲ့သည်။

အစိုးရရှေ့နေ Cho Eun-seok ဦးဆောင်သော သမ္မတဟောင်း Yoon Suk-yeol ကို စုံစမ်းစစ်ဆေးနေသည့် အထူးရှေ့နေအဖွဲ့သည် ဇူလိုင် ၂၀ ရက်တွင် တောင်ကိုရီးယားစစ်တပ်၏ ဒရုန်းစစ်ဆင်ရေးကွပ်ကဲမှုဌာနချုပ် ဗိုလ်ချုပ်ကြီး Kim Yong-dae အား ဖမ်းဝရမ်းထုတ်ရန် တောင်းဆိုခဲ့သည်။ 

တင်းမာမှုများဖန်တီးရန် မြောက်ကိုရီးယား လေပိုင်နက်အတွင်းသို့ မောင်းသူမဲ့လေယာဉ်များ (UAV) များ စေလွှတ်ရန် သမ္မတဟောင်း ယွန်း က လျှို့ဝှက်လုပ်ဆောင်ခဲ့သည်ဟူသောစွပ်စွဲချက်များနှင့် စပ်လျဉ်း၍ Kim Yong-dae အား အစိုးရရှေ့နေများက ဇူလိုင် ၁၇ ရက်တွင် ဆင့်ခေါ် ခဲ့သည်။ သမ္မတဟောင်း ယွန်းက အဆိုပါစွပ်စွဲချက်ကို ငြင်းဆိုထားသည်။ 

အထူးစုံစမ်းရေးအဖွဲ့သည် ဗိုလ်ချုပ်ကြီး Kim Yong-dae အား နိုင်ငံတော် သစ္စာဖောက်ဖျက်မှု၊ စာရွက်စာတမ်းအတုပြုလုပ်မှု နှင့် အာဏာအလွဲ သုံးစားမှု စွပ်စွဲချက်များဖြင့် စစ်ဆေးနေပါသည်။ ၎င်းတို့သည် ကင်အား ဖမ်းဝရမ်းထုတ်နိုင်ရန်အတွက် စာရွက်စာတမ်းအတုပြုလုပ်မှု စွပ်စွဲချက် ကို အဓိကအသုံးပြုခဲ့သည်။

တောင်ကိုရီးယား ဒီမိုကရက်တစ်ပါတီ မှ အမတ် Boo Seung-chan ၏ ယခင်က ထုတ်ပြန်ခဲ့သည့် စာရွက်စာတမ်းများအရ ၂၀၂၄ ခုနှစ် အောက်တိုဘာ ၁၅ ရက်တွင် တပ်ဖွဲ့တစ်ခုအား UAV (ဒရုန်း) နှစ်စီး စေလွှတ်ရန် အမိန့် ပေးခဲ့သော်လည်း တစ်စီးသာ အမှန်တကယ်စေလွှတ်ခဲ့ကြောင်း ဖော်ပြ ခဲ့သည်။ ထို့အပြင် တပ်ဖွဲ့အတွင်းမှ ထွက်ဆိုချက်များအရ "ပုံမှန် ပျံသန်းစဉ် အကြောင်းပြချက်မရှိ ပျောက်ဆုံးသွားသည်ဟု အစီရင်ခံစေခဲ့သည်" ဟု ဆိုသည်။

ထိုစဉ်က ပြုံယမ်းအစိုးရက တောင်ကိုရီးယား၏ စစ်ဘက်ဆိုင်ရာ ဒရုန်း သည် "နိုင်ငံရေးရည်ရွယ်ချက်ဖြင့်" ၎င်းတို့၏ လေကြောင်း နယ်နိမိတ် အတွင်း ဝင်ရောက်ခဲ့ကြောင်း ထုတ်ဖော်ပြောဆိုကာ နောက်ထပ်အလားတူ ဖြစ်စဉ်များ ထပ်မံဖြစ်ပေါ်ပါက ပြင်းထန်စွာတုံ့ပြန်မည်ဟု သတိပေးခဲ့သည်။ သို့သော် တောင်ကိုရီးယား ကာကွယ်ရေးဝန်ကြီးဌာန က မြောက်ကိုရီးယား၏ပြောဆိုချက်များသည် "အတည်ပြုရန် သို့မဟုတ် တုံ့ပြန်ရန် မလိုအပ်" ဟု ပယ်ချခဲ့သည်။

အထူးစုံစမ်းရေးအဖွဲ့က ယခင်သမ္မတ ယွန်းဆက်ယိုး သည် တောင်ကိုရီးယား ကာကွယ်ရေးဝန်ကြီးဌာန နှင့် ပူးတွဲစစ်ဦးစီးချုပ်ရုံး (JCS) ကို ကျော်ဖြတ်ကာ Kim Yong-dae ကွပ်ကဲမှုအောက်ရှိ တပ်ဖွဲ့အား ပြုံယမ်းသို့ UAV များ ပျံသန်းစေရန် တိုက်ရိုက်အမိန့်ပေးခဲ့သည်ဟု သံသယရှိနေသည်။

သို့သော် ဗိုလ်ချုပ်ကြီး Kim Yong-dae က အဆိုပါစစ်ဆင်ရေးသည် မြောက် ကိုရီးယား၏ အမှိုက်ပူဖောင်းများ တောင်ကိုရီးယားသို့ စေလွှတ်မှုကို တုံ့ပြန်သည့်အနေဖြင့် JCS ၏ ညွှန်ကြားချက်အရ ဆောင်ရွက်ခဲ့ခြင်း ဖြစ်ကြောင်း၊ ဒရုန်းစစ်ဆင်ရေးနှင့် စစ်အုပ်ချုပ်ရေးအမိန့်အကြား ဆက်နွှယ်မှုမရှိကြောင်း၊ ၎င်းအနေဖြင့် သမ္မတရုံး သို့မဟုတ် ယွန်းဆက်ယိုးထံမှ သီးသန့်ညွှန်ကြားချက် မရရှိခဲ့ကြောင်း ငြင်းဆိုခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားသည် ယူကရိန်းကို တိုက်ခိုက်မှုတစ်ကြိမ်လျှင် အသေခံဒရုန်း ၂,၀၀၀ အထိ အသုံးပြုနိုင်သည့် အန္တရာယ်ရှိပြီး အကုန်အကျ သက်သာသော ကာကွယ်ရေးနည်းစနစ်များ ကြံဆရန် လိုအပ်သည်ဟု ဂျာမန်ဗိုလ်ချုပ်ကြီး Christian Freuding က သတိပေးခဲ့သည်။

"ရုရှားသည် UAV လက်နက်များ ထုတ်လုပ်မှုစွမ်းရည်ကို တိုးမြှင့်လျက် ရှိပြီး အဆိုပါလက်နက်အမျိုးအစားဖြင့် တိုက်ခိုက်မှုအရွယ်အစားကို ချဲ့ထွင်လာနေပြီး တိုက်ခိုက်မှုတိုင်းတွင် UAV ၂,၀၀၀ ကို တစ်ပြိုင်နက် အသုံးပြုရန် ရည်ရွယ်နေပါသည်" ဟု ဂျာမန်ကာကွယ်ရေးဝန်ကြီးဌာန၊ ယူကရိန်းအကူအညီ ညှိနှိုင်းရေးအဖွဲ့ခေါင်းဆောင် ဗိုလ်ချုပ်ကြီး Christian Freuding က ဇူလိုင် ၁၉ ရက်တွင် ပြောကြားခဲ့သည်။

ဗိုလ်ချုပ်ကြီး Freuding က တစ်စီးလျှင် အမေရိကန်ဒေါ်လာ ၃၅,၀၀၀-၆၀,၀၀၀ ခန့် ကုန်ကျသည့် Geran-2 အသေခံဒရုန်းတစ်စင်းကို တုံ့ပြန်ရန် ဒုံးပျံတစ်စင်းလျှင် ဒေါ်လာ ၄ သန်းကျော် ကုန်ကျသည့် Patriot စနစ်ကို အသုံးပြုခြင်းသည် မထိရောက်ဟု ဆိုသည်။ ရုရှား၏ UAV များကို တုံ့ပြန်ရန် နည်းစနစ်ပိုင်းဆိုင်ရာ ပြန်လည်သုံးသပ်မှုများ ပြုလုပ်ရန် လိုအပ်ပြီး တစ်ကြိမ်ပစ်ခတ်မှုကုန်ကျစရိတ်မှာ အမေရိကန်ဒေါ်လာ ၂,၃၀၀- ၄,၅၀၀ အတွင်းရှိရမည်ဟု ၎င်းက ဖြည့်စွက်ပြောကြားခဲ့သည်။

ဗိုလ်ချုပ်ကြီး Freuding ၏ ထုတ်ဖော်ပြောကြားချက်များသည် ရုရှား၏ ယူကရိန်းအပေါ် တိုက်ခိုက်မှုများ တိုးမြှင့်လာချိန်တွင် ထွက်ပေါ်လာခြင်း ဖြစ်သည်။ ဇူလိုင် ၉ ရက်က စံချိန်တင် တိုက်ခိုက်မှုတစ်ခုတွင် ရုရှားသည် Geran-2 အသေခံဒရုန်း ၇၂၈ စီးနှင့် လေယာဉ်တုများ အသုံးပြုခဲ့သည်။ ယူကရိန်းနိုင်ငံခြားရေးထောက်လှမ်းရေးဌာနက ရုရှားသည် ယခုနှစ် အတွင်း FPV ဒရုန်း ၂ သန်း ၊ တာဝေးပစ် UAV နှင့် လေယာဉ်တု ၃၀,၀၀၀ိ တည်ဆောက်ရန် စီစဉ်နေကြောင်း ပြောကြားခဲ့သည်။ ယခုနှစ် ဇွန်လ တစ်လတည်းတွင် ရုရှားသည် ယူကရိန်းကို တိုက်ခိုက်မှုများတွင် ဒရုန်း ၅,၃၃၇ စီး အသုံးပြုခဲ့သည်။

Geran-2 သည် အီရန်ထုတ် Shahed-136 ဒီဇိုင်းကို အခြေခံထားသည့် ရုရှားထုတ် ဒရုန်းအမျိုးအစားဖြစ်သည်။ ပထမဆုံး Geran-2 မျိုးကွဲသည် အလေးချိန် ၂၀၀ ကီလိုဂရမ်ခန့်ရှိပြီး ၅၀ ကီလိုဂရမ် အလေးချိန်ရှိသော ထိပ်ဖူးတပ်ဆင်ထားကာ ၂,၅၀၀ ကီလိုမီတာ ပျံသန်းနိုင်စွမ်းရှိသည်။ 

ရုရှားသည် Geran-2 စီးရီးကို စွမ်းအားမြှင့်တင်ရန် အဆင့်မြှင့်တင်မှု အကြိမ်ကြိမ် ပြုလုပ်ခဲ့ပြီး ၉၀ ကီလိုဂရမ်အလေးချိန်ရှိသာ ထိပ်ဖူးကို သယ်ဆောင်တိုက်ခိုက်နိုင်ခြင်း၊ ပစ်မှတ်များကို ရှာဖွေဖော်ထုတ်ရန်နှင့် အာရုံခံကိရိယာများကို AI နည်းပညာဖြင့် ပေါင်းစပ်ခြင်းနှင့် ယူကရိန်း၏ တန်ပြန်တိုက်ခိုက်ဖျက်ဆီးမှုများကို ကာကွယ်နိုင်စွမ်းများ မြှင့်တင်ခြင်း တို့ ပါဝင်သည်။

ယူကရိန်းအရင်းအမြစ်များနှင့် ဂျာမန်မီဒီယာများက ရုရှား၏ တာဝေးပစ် အသေခံဒရုန်းများသည် အဓိကမြို့ကြီးများနှင့် မဟာဗျူဟာမြောက် ပစ်မှတ်များကို ပစ်မှတ်ထားကာ ပြင်းထန်စွာတိုက်ခိုက်ခဲ့ကြကြောင်း ဖော်ပြ ခဲ့ကြသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

တနင်္ဂနွေ ည နှင့် တနင်္လာ နံနက်စောစော (ဇူလိုင် ၂၀-၂၁) ကာလအတွင်း ရုရှားနယ်မြေများသို့ ဦးတည်ပျံသန်းတိုက်ခိုက်လာသော ဒါဇင်နှင့်ချီသည့် ယူကရိန်းဒရုန်းများကို ရုရှားလေကာစနစ်များက ဖျက်ဆီးနိုင်ခဲ့သည်။ငြိမ်းချမ်းရေးဆွေးနွေးပွဲများ ပြန်လည်စတင်ရန် တောင်းဆိုပြီး နောက်ပိုင်း တွင်ပင် ယူကရိန်းသည် ရုရှားနယ်မြေအတွင်းပိုင်းသို့ ဒရုန်းတိုက်ခိုက်မှု များကို ပိုမိုအရှိန်မြှင့်လာခဲ့သည်။ 

မော်စကိုမြို့တော်ဝန် Sergey Sobyanin က Telegram တွင် တနင်္လာ နံနက် ၆:၃၀ နာရီအထိ ရုရှားမြို့တော်ဆီဦးတည်လာသော ဒရုန်း ၁၃ စင်း အား ကာကွယ်ရေးစနစ်များက ဖြတ်တောက်နိုင်ခဲ့ကြောင်း၊ ပျက်ကျ အကြွင်းအကျန်များရှိရာ နေရာများတွင် အရေးပေါ်ဝန်ဆောင်မှုများ ဆောင်ရွက် နေကြောင်း ထုတ်ပြန်ခဲ့သည်။

ဒရုန်းပျက်ကျအကြွင်းအကျန်တစ်ခုသည် မော်စကို၏ New Moscow ဆင်ခြေဖုံးရှိ အထပ်မြင့်တိုက်တစ်ခု၏ ခေါင်မိုးပေါ်သို့ ကျရောက်ကာ မီးလောင်မှုအနည်းငယ်ဖြစ်ပွားခဲ့သော်လည်း ဒဏ်ရာရသူမရှိကြောင်း Sobyanin က ဖြည့်စွက်ပြောကြားခဲ့သည်။

ယူကရိန်းနှင့်နယ်နိမိတ်ချင်းထိစပ်နေသော Belgorod ဒေသရှိ သာမန် အရပ်သားကားတစ်စီးနှင့် သီးသန့်အိမ်တစ်လုံးကို ဒရုန်းတိုက်ခိုက်မှုတွင် လူနှစ်ဦး ဒဏ်ရာရခဲ့ကြောင်း ဒေသအုပ်ချုပ်ရေးမှူး Vyacheslav Gladkov က ပြောကြားခဲ့သည်။

Rostov ဒေသ၏ အုပ်ချုပ်ရေးမှူး Yury Slyusar က Shakhty ၊ Novoshakhtinsk နှင့် Novocherkassk မြို့များတွင် ဒရုန်းများကို ကာကွယ်ရေးစနစ်များ ဖြင့် ဖြတ်တောက်နိုင်ခဲ့ကြောင်း ထုတ်ပြန်ခဲ့သည်။

ဒဏ်ရာရသူမရှိသော်လည်း Shakhty အနီးရှိ သတ္တုတွင်းကျေးရွာတစ်ခုမှ ရထားဘူတာ၏ ထိန်းချုပ်ရေးအဆောင်ဟောင်းကို ဒရုန်းတစ်စင်း ထိမှန်မှုကြောင့် ပျက်စီးခဲ့ပြီး အခြားဒရုန်းပျက်ကျ အကြွင်းအကျန် များသည်ကျေးရွာတစ်ခုအတွင်း ထိခိုက်စေခဲ့ကြောင်း Slyusar က ဖြည့်စွက် ပြောကြားခဲ့သည်။

ယူကရိန်းသည် လွန်ခဲ့သည့်ရက်သတ္တပတ်အတွင်း ရုရှားနယ်မြေ အတွင်း သို့ ဒရုန်းဖြင့်တိုက်ခိုက်မှုများကို သိသိသာသာ မြှင့်တင်လာခဲ့သည်။ ရုရှား ကာကွယ်ရေးဝန်ကြီးဌာနက နေ့စဉ်ဒရုန်းများကို ကာကွယ်ဖြတ်တောက် နိုင်ခဲ့ကြောင်း အစီရင်ခံထားသည်။ နောက်ဆုံးထုတ်ပြန်ချက်အရ တနင်္ဂနွေ ည ၈:၀၀ မှ ၁၁:၃၀ အထိ Bryansk ၊ Oryol ၊ Kaluga ၊ Belgorod နှင့် မော်စကိုဒေသများတွင် ဒရုန်း ၄၃ စင်းကို ဖျက်ဆီးနိုင်ခဲ့သည်။

ရုရှားအစိုးရက ယူကရိန်း၏ တိုက်ခိုက်မှုများကို "အကြမ်းဖက်လုပ်ရပ် များ" အဖြစ် ပြစ်တင်ရှုတ်ချခဲ့ပြီး၊ ထိုကဲ့သို့သော တိုက်ခိုက်မှုများသည် မကြာခဏဆိုသလို နေအိမ်များနှင့် ပြည်သူ့အခြေခံ အဆောက်အအုံများကို ပစ်မှတ်ထားကြောင်း ဆိုသည်။ တုံ့ပြန်သည့်အနေဖြင့် ရုရှားစစ်တပ်က လွန်ခဲ့သည့်ရက်သတ္တပတ်အတွင်း ဒရုန်းနှင့်ဒုံးကျည်အစိတ်အပိုင်းများ ထုတ်လုပ်သည့် ယူကရိန်းကာကွယ်ရေးစက်မှုလုပ်ငန်းဆိုင်ရာ အဆောက်အဦ များကို တိုက်ခိုက်မှုများ ဆက်တိုက်ပြုလုပ်ခဲ့သည်။

ယူကရိန်းသမ္မတ ဗလာဒီမာ ဇီလန်စကီးက စနေနေ့ (ဇူလိုင် ၁၉) တွင် "ဆွေးနွေးပွဲများ၏အရှိန်ကို မြှင့်တင်ရမည်" ဟုဆိုကာ အစ္စတန်ဘူလ် တွင် ဆွေးနွေးပွဲအသစ်ကျင်းပရန် အဆိုပြုခဲ့သည်။ ယင်းအဆိုပြုချက် သည် မော်စကိုက ယူကရိန်းအား “ဆွေးနွေးမှုများကို ရည်ရွယ်ချက်ရှိရှိ နှောင့်နှေးစေသည်ဟု စွပ်စွဲပြီး ထရမ့်အား ယူကရိန်းအပေါ် ဖိအား ပေးရန်” တိုက်တွန်းခဲ့သည့် နောက်ပိုင်းတွင် ပေါ်ပေါက်လာခြင်းဖြစ်သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂